ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម​ បានថ្លែងថា​ ជីវភាពរស់នៅ របស់ប្រជាពលរដ្ឋ​ ត្រូវបានលើកកម្ពស់ជាបណ្តើរៗ តាមរយៈការទទួលបាននូវសមិទ្ធផលនានា ពីរាជរដ្ឋាភិបាលកម្ពុជា និងដៃគូរអភិវឌ្ឍន៍ អង្គការសង្គមស៊ីវិល វិស័យឯកជន សប្បុរសជននានា ដែលមានដូចជាផ្លូវ ស្ពាន សាលារៀន មន្ទីរពេទ្យ ប្រព័ន្ធធារាសាស្ត្រ អគ្គិសនី និង​ទឹកស្អាតជាដេីម​។ លោកបន្តថា ខេត្តកំពង់ចាម​ មានការរីកចម្រើន និងប្រែប្រួលមុខមាត់ជាបន្តបន្ទាប់​ ទាំងផ្នែកសន្តិសុខ សណ្តាប់ធ្នាប់ សាធារណៈ សេដ្ឋកិច្ច សង្គមកិច្ច បរិស្ថាន និងសមិទ្ធផលរូបវ័ន្តជាច្រើនទៀត​។

លោកប្រសាសន៍យ៉ាងដូច្នេះ ក្នុង​អង្គសិក្ខាសាលា ផ្សព្វផ្សាយអំពីសៀវភៅផែនការជាតិប្រឆាំងភេរវកម្ម នៅ​សាលា​ខេត្តកំពង់ចាម​ នៅថ្ងៃទី​៨​ ខែកុម្ភៈ​ ឆ្នាំ​២០២២​នេះ​។

អភិបាលខេត្ត​ បាន​លើក​ឡើងទៀត​ថា​ ការងារអនុវត្តគោលនយោបាយភូមិ-ឃុំ សង្កាត់មានសុវត្ថិភាព ខេត្តកំពង់ចាម បានទទួលជ័យលាភី​ចំណាត់ថ្នាក់លេខ១ លើចលនាប្រឡងប្រណាំង អនុវត្តគោលនយោបាយភូមិ-ឃុំមានសុវត្តិភាព ទូទាំងប្រទេសចំនួន ៥ឆ្នាំជាប់គ្នា។ លោកថា លទ្ធផលនេះ គឺពិតជាសបញ្ជាក់ថាកងកម្លាំងទាំងអស់ ពិតជាបានប្រឹងប្រែងយកអស់កម្លាំងកាយកម្លាំងចិត្ត បញ្ចេញអស់ថាមពល ពុះពារគ្រប់ភារកិច្ច ប្រកបដោយស្មារតីទទួលខុសត្រូវខ្ពស់ អនុវត្ត និងប្រតិបត្តិ តាមបទបញ្ជាដោយភាពម៉ឺងម៉ាត់ តាមគោលនយោបាយ របស់រាជរដ្ឋាភិបាលកម្ពុជា​ ក្រសួងមហាផ្ទៃ គណៈបញ្ជាការឯកភាពរដ្ឋបាលខេត្ត ហ៊ានធ្វើពលិកម្មគ្រប់បែបយ៉ាង ដើម្បីបុព្វហេតុជាតិ សាសនា ព្រះមហាក្សត្រ ដោយបានបង្ហាញ នូវការប្ដេជ្ញាចិត្តខ្ពស់ ប្ដូរផ្ដាច់ការពារ រាជរដ្ឋាភិបាលស្របច្បាប់ ដែលកើតចេញពីឆន្ទៈរបស់ប្រជាពលរដ្ឋ មិនអនុញ្ញតឲ្យពួកក្រុមឧទ្ទាមក្រៅច្បាប់ ធ្វើសកម្មភាពបង្កអសន្តិសុខ ក្នុងខេត្តកំពង់ចាមជាដាច់ខាត។

ក្នុងអង្គសិក្ខាសាលានេះដែរ​ លោក​ ឈួន​ ចាន់​ថន​ អនុប្រធាន​លេខាធិការដ្ឋានគណៈកម្មាធិការជាតិ ប្រឆាំងភេរវកម្ម​ បាន​ធ្វើ​បទបង្ហាញ​ ដើម្បីបញ្ជ្រាបចំណេះដឹង ជូនដល់មន្ត្រី និងកងកម្លាំងប្រដាប់អាវុធ នៅថ្នាក់ក្រោមជាតិ ឲ្យបានយល់ដឹងអំពីចរិតលក្ខណៈ ទម្រង់​ សកម្មភាពនានាពាក់ព័ន្ធក្រុមភេរវកម្មអន្តរជាតិ រួមនឹងផែនការជាតិប្រឆាំងនឹងភេរវកម្ម សំដៅទប់ស្កាត់ការគំរាមកំហែង ឬការជ្រៀតចូលនៃសកម្មភាព ឬក្រុមភេរវកម្មនានាចំពោះប្រទេសកម្ពុជា។

លោក​ ឈួន​ ចាន់​ថន​ បាន​បញ្ជាក់​ថា​ គោលបំណងនៃសៀវភៅ ផែនការជាតិប្រឆាំងភេរវកម្ម​ សម្របសម្រួល និងនីតិវិធីនានាក្នុងការត្រៀមខ្លួនជាមុន ការបង្ការ និងការប្រឆាំងភេរវកម្ម រួមទាំងការលាងសម្អាតប្រាក់ ហិរញ្ញប្បទានភេរវកម្ម ហិរញ្ញប្បទានដល់ការរីកសាយភាយអាវុធ មហាប្រល័យ​ និង​ផែនការឆ្លើយតប របស់អន្តរជាតិក្រសួង/ស្ថាប័ន​៕SRP

ខេត្តព្រះវិហារ៖ប្រជាពលរដ្ឋក្នុងស្រុកគូលែន ខេត្តព្រះវិហារ ជាច្រើនគ្រួសារ បានចោទប្រកាន់ថា យោធាដឺបេ ពាក់ស័ក្ត៣ម្នាក់ឈ្មោះក្រូច ប៊ុនគីម ហៅហែម បូរិន ប្រើអំណាច ដោយអោយកូនប្រុសរបស់ខ្លួន យកគ្រឿងចក្រទៅឈូសឆាយលើដីពួកគាត់ និងដីព្រៃរបស់រដ្ឋច្រើនរយហិកតាទាំងកំរោល។

ដីរបស់អ្នកភូមិនិងដីព្រៃរបស់រដ្ឋ ដែលបុគ្គលពាក់ស័ក្ត៣ឈ្មោះក្រូច ប៊ុនគីម កំពុងឈូសឆាយ ស្ថិតនៅចំណុច ត្រពាំងផ្លុង និងអូរខ្សាច់ ក្នុងភូមិសាស្ត្រភូមិក្តាក់ ឃុំភ្នំត្បែងពីរ ស្រុកគូលែន ខេត្តព្រះវិហារ។

ការដាក់គ្រឿងចក្រចូលទៅឈូសឆាយដីព្រៃ ពីសំណាក់បុគ្គលក្រូច ប៊ុនគីម នេះ មិនមែនទើបតែម្សិលមិញនោះទេ បុគ្គលនេះបានចូលទៅឈូសឆាយតាំពីឆ្នាំ២០១៨ មកម្លេះ តែសកម្មភាពរបស់គេ ហាក់មិនរំខានដល់សមត្ថកិច្ចពាក់ព័ន្ធនោះឡើយ។

ពលរដ្ឋបានអោយដឹងទៀតថា លោកស័ក្ត៣ក្រូច ប៊ុនគីម ហៅហែម បូរិន ជាមន្ត្រីយោធាដឺបេពាក់ស័ក្ត៣ នៅការិយាល័យទី២ យោធភូមិភាគទី៤ កងទ័ពជើងគោក។

ស្ត្រីឈ្មោះគុណ សុឃន់ នៅថ្ងៃទី៧ខែកុម្ភ:ឆ្នាំ២០២២នេះ បានផ្តល់បទសម្ភាសន៍ថា ដីរបស់គាត់ និងអ្នកភូមិ២នាក់ទៀតដែលស្ថិតនៅក្នុងភូមិឃុំខាងលើមានលិខិតកាន់កាប់តាំងពីឆ្នាំ២០០៧មកម្លេះ។ នៅឆ្នាំ២០២០ ពួកគាត់បានទៅបោះបង្គោលរបង ហើយឈ្មោះក្រូច ប៊ុនគីម បានដកបង្គោលរបងពួកគាត់ជា បន្តបន្ទាប់។ លុះថ្ងៃទី១៤ ខែ១១ ឆ្នាំ២០២១ ពួកគាត់បានដាក់ពាក្យប្តឹងនៅសាលាឃុំ ដោយចោទ ឈ្មោះក្រូច ប៊ុនគីម ពីបទបំផ្លាញទ្រព្យសម្បត្តិ។ នៅពេលបន្ទាប់សាលាឃុំ បានហៅដោះស្រាយ តែឈ្មោះក្រូច ប៊ុនគីម មិនដែលចូលដោះស្រាយឡើយ ផ្ទុយទៅវិញបុគ្គលរូបនេះ បានយកគ្រឿងចក្រទៅឈូសឆាយដីពួកគាត់ ហើយដាំដំឡូងនិងចេកទាំងបំពានថែមទៀតផង។

ស្ត្រីដដែលបញ្ជាក់ថា ថ្មីៗនេះ នៅថ្ងៃទី៣០ ខែមករា ឆ្នាំ២០២២ ពេលពួកគាត់ទៅដាក់បង្គោលនិងឈូសក្រវ៉ាត់ព្រំ ក៏ត្រូវបុគ្គលឈ្មោះក្រូច ប៊ុនគីម បញ្ជាអោយកូនប្រុសរបស់ខ្លួន២នាក់ មករារាំងជេរប្រមាថនិងអះអាងថា ដីទាំងនោះ ជារបស់ឪពុកគេ (ក្រូច ប៊ុនគីម)។

លោកគុណ សុឃន់ បញ្ជាក់ថា ករណីនេះពួកគាត់កំពុងរៀបចំឯកសារប្តឹង ទៅថ្នាក់ស្រុក និងខេត្ត ដើម្បីផ្តន្ទាទោសឈ្មោះក្រូច ប៊ុនគីម តាមផ្លូវច្បាប់។ ម៉្យាងវិញទៀត បើពួកគាត់ចូលទៅមើលដី ឬអាស្រ័យផល ហើយមានករណីបង្ករបួសស្នាម ទោះបង្ហាញមុខឬលាក់មុខក៏ដោយ គឺពួកគាត់ចោទប្រកាន់លើបុគ្គលក្រូច ប៊ុនគីម ទាំងស្រុង។

ចំណែកស្ត្រីឈ្មោះឈិន វៀន បានផ្តល់បទសម្ភាសន៍ថា រូបគាត់រួមទាំងអ្នកភូមិជាង១០គ្រួសារ ទៀត ក៏កំពុងរងការគំរាមកំហែងនិងរំលោភបំពានយកដី ពីសំណាក់ បុគ្គល ឈ្មោះក្រូច ប៊ុនគីម ដូចគ្នា។ បុគ្គលរូបនេះ ក្រៅពីរំលោភបំពានយកដីពួកគាត់ច្រើនហិកតា ក៏បានឈូសឆាយឃ្លុំព័ទ្ធដីព្រៃរបស់រដ្ឋជាង២០០ហិកតាទៀត លក់អោយឈ្មួញម្នាក់ឈ្មោះជំទាវ ចន្ទ្រា ដោយបានទទួលលុយកក់ជិត៣ម៉ឺនដុល្លាររួចហើយ។ ចំពោះ រឿងនេះបើសិនឈ្មោះក្រូច ប៊ុនគីម មិនព្រមប្រគល់ដីដល់ពួកគាត់វិញទេ ពួកគាត់នឹងប្តឹងទៅស្ថាប័នច្បាប់រួមទាំងអង្គភាពប្រឆាំងអំពើពុករលួយទៀត ព្រោះបុគ្គលនេះ បំផ្លាញដីព្រៃរបស់រដ្ឋ រាប់រយហិកតា គ្មានសមត្ថកិច្ចណាហ៊ានបង្ក្រាប។

ជុំវិញការចោទប្រកាន់ថា ទៅលើឈ្មោះក្រូច ប៊ុនគីម ថាបានប្រើអំណាចរំលោភយកដីរបស់អ្នកភូមិ និងឈូសឆាយដីព្រៃ របស់រដ្ឋរាប់រយហិកតា លក់អោយឈ្មួញនឡ ក្រុមសារព័ត៌មានមិនអាចស្វែងរកជួបដើម្បីសុំការបំភ្លឺពីលោកបានទេនៅឡើយទេ។ ប៉ុន្តែកាលពីថ្ងៃទី ២២ខែមករាឆ្នាំ២០២២ កន្លងទៅនេះ លោកក្រូច ប៊ុនគីម ហៅហែម បូរិន មន្ត្រីយោធាដឺបេ ការិយាល័យទី២ យោធភូមិភាគទី៤ កង ទ័ពជើងគោក ធ្លាប់បានបកស្រាយថា ពុំមែនជាការពិតនោះទេ។ នេះជាព័ត៌មាន ដែលក្រុមពលរដ្ឋផ្តល់ដោយគ្មានមូលដ្ឋានពិតប្រាកដ។

ការបកស្រាយបែបនេះ បន្ទាប់ពីព័ត៌មានច្រើនបានចុះផ្សាយថា លោកក្រូច ប៊ុនគីម បានយកគ្រឿងចក្រឈូសដីព្រៃរបស់រដ្ឋ ត្រង់ចំណុចត្រពាំងផ្លុង និងអូរខ្សាច់ ក្នុងភូមិសាស្ត្រភូមិក្តាក់ ឃុំភ្នំត្បែងពីរ ស្រុកគូលែន ខេត្តព្រះវិហារជិត ២០០ហិកតាលក់អោយឈ្មួញ។ ប្រជាពលរដ្ឋរំពឹងថា អាជ្ញាធរមានសមត្ថ កិច្ចក្នុងខេត្តព្រះវិហារ នឹងបើកការស្រាវជ្រាវ ដើម្បីរកការពិតជាក់ជាពុំខានឡើយ៕SRP

ខេត្តសៀមរាប៖ក្នុងឱកាសចុះពិនិត្យមើលស្ថានភាពដាំដុះដំណាំ និងការប្រមូលផលបន្លែ នៅភូមិកន្រ្ទាំង និងភូមិតាត្រាវ ឃុំកន្រ្ទាំង ស្រុកប្រាសាទបាគង កាលពីថ្ងៃសៅរ៍ ចុងសប្តាហ៍ កន្លងមក ទី៥ ក្នុងខែកុម្ភ: ឆ្នាំ២០២២ ភរិយាអភិបាលខេត្តសៀមរាប  លោកជំទាវ ទាង អេង ទៀ សីហា មានសប្បាយរីករាយ ដោយឃើញ កសិករដាំដុះដំណាំ ទទួលបានផលល្អ និងមានទីផ្សារល្អ។

ការចុះត្រួតពិនិត្យ របស់លោកជំទាវ ទាង អេង ទៀ សីហា នៅសហគមន៍កសិកម្មបន្លែសុវត្ថិភាព នៅឃុំកន្រ្ទាំង ស្រុកប្រាសាទបាគង ដើម្បីមើលការដាំដុះ និងការប្រមូលផលបន្លែរបស់ប្រជាកសិករបានយ៉ាងល្អប្រសើរ៕SRP

ខេត្តកំពត៖សម្តេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងថាភូមិ​សាស្ត្រ​ក្រុង​បូក​គោ​ បច្ចុប្បន្ន​ មានធំទូលាយ ប៉ុន្តែនៅថ្ងៃអនាគត ក្រុង​ថ្មី​នេះ​អាច​ នឹ​ង​មាន​ប្រជាជន​ម​ក​រស់​នៅ​កាន់​តែ​ច្រើន​ ពិសេស​នៅ​លើ​ភ្នំ​បូក​គោ​ដែលកំ​ពុង​មាន​ការ​អភិវឌ្ឍ។

សម្តេចស ខេង មានប្រសាសន៍យ៉ាងដូច្នេះ ក្នុងឱកាស អញ្ជើញចុះពិនិត្យទីតាំងសាងសង់អគាររដ្ឋ​សាលាក្រុងបូកគោ ខេត្តកំពត នៅថ្ងៃទី៧ ខែកុម្ភៈ ម្សិលមិញ។

សម្ដេច ស ខេង បានថ្លែងថា ដើម្បីបង្កើនភាពងាយស្រួល និង​ឆាប់​រហ័ស​ ក្នុង​ការ​បម្រើ​សេ​វា​ផ្សេងៗ​ ជូន​ប្រជាពលរដ្ឋ រដ្ឋ​បាន​សម្រេច​រៀប​​ចំ​ ទី​តាំង​អគារ​រដ្ឋ​បាល​ ក្រុង​បូក​គោ​ ជា​២​កន្លែង​ គឺនៅសាលាក្រុងចាស់​ ក្បែរ​ច្រក​ចូល​ឧទ្យាន​ជាតិ​ព្រះ​មុ​នី​វ​ង្ស​បូក​គោ​ និងនៅក្បែរកាស៊ីណូចាស់លើភ្នំបូកគោ ។

សម្តេច ស ខេង ក៏បានណែនាំអាជ្ញាធរខេត្ត និងថ្នាក់ដឹកនាំក្រសួងមហាផ្ទៃ ពិភាក្សាគ្នា ថាតើការិយាល័យជំនាញណាខ្លះ ត្រូវនៅរដ្ឋបាលក្រុងទីតាំងខាងក្រោម និងការិយាល័យណាខ្លះ ត្រូវនៅរដ្ឋបាលក្រុងទីតាំងខាងលើ ឬក៏ចាំបាច់ត្រូវមានទាំងពីរទីតាំង។

សម្តេច ស ខេង មានប្រសាសន៍ទៀតថាក្រុមការងារ ពាក់ព័ន្ធ នឹងពន្លឿការគូរប្លង់ទីតាំងសាលាក្រុងបូកគោ ផ្នែកខាងក្រោម ដើម្បីរៀបចំកសាងកន្លែងធ្វើការងារឲ្យបានត្រឹមត្រូវ និងសមរម្យដូចបណ្តាក្រុងផ្សេងៗផងដែរ៕SRP

ខេត្តត្បូងឃ្មុំ៖មេគយ និងរដ្ឋាករ ច្រកទ្វារព្រំដែនទ្វេភាគីកម្ពុជា-វៀតណាម ដារ ឬហៅដូង៧ដើម ស្រុកមេមត់ ខេត្តត្បូងឃ្មុំ លោក មុយ បញ្ញារីទ្ធ កំពុងទទួលរងការរិះគន់យ៉ាងខ្លាំងថា បន្តគាបសង្កត់កំណត់យកលុយពីអាជីវករ អ្នកដឹកចំណីអាហារ ផលិតផលកសិកម្ម ចេញចូលពីវៀតណាម មកកម្ពុជា និងពីកម្ពុជា ទៅវៀតណាម យ៉ាងគឃ្លើន តាមរបៀបពុករលួយ។

ការរិះគន់អំពើពុករលួយ លោក មុយ បញ្ញារីទ្ធ គឺស្របពេលដែលក្រសួងសេដ្ឋកិច្ច និងហិរញ្ញវត្ថុ ចេញសេចក្ដីប្រកាសលើកលែង មិនយកពន្ធចំពោះទំនិញ ជាប្រភេទចំណីអាហារ រយៈពេល២ឆ្នាំ ដើម្បីលើកស្ទួយជីវភាព ប្រជាពលរដ្ឋ។

មានការលើកឡើងថានៅថ្ងៃទី៦ ខែកុម្ភៈ ឆ្នាំ២០២២ អ្នកដឹកអុសកៅស៊ូ ទៅលក់នៅវៀតណាម តាមច្រកទ្វារព្រំដែនទ្វេភាគី ដារ ដោយប្រើរថយន្តប្រភេទវេអង បាននិយាយថា ខ្លួនដឹកអុសកៅស៊ូ រាល់លើក គឺត្រូវបានមន្ត្រីគយច្រកទ្វារព្រំដែនកំណត់យកលុយចំនួន ៤០ម៉ឺនរៀលក្នុងមួយជើង។ ក្នុងនោះបើខ្លួន ដឹកអុសដែលកាប់ចេញពីព្រៃមិនមែន ជាអុសកៅស៊ូ គឺមួយជើង គយយក៦០ម៉ឺនរៀល។

មន្ត្រីពាក់ព័ន្ធបានឲ្យដឹងថា អ្នកដឹកផ្លែស្វាយកែវរមៀត ទៅលក់នៅវៀតណាម តាមច្រកទ្វារព្រំដែនទ្វេភាគី ដារ ដោយប្រើរថយន្តចំណុះ ៥តោន គឺមន្ត្រីគយកំណត់យក ២៥ម៉ឺនរៀលក្នុងមួយជើង និងរថយន្តយីឌុបដឹកផ្លែស្វាយ គយកំណត់យក ៤០ម៉ឺនរៀលក្នុងមួយជើង។ រថយន្តវេអងដឹកដំឡូងមី ទៅលក់នៅវៀតណាម មួយជើងបង់ឱ្យគយចំនួន ២៥ម៉ឺនរៀលជាកំហិត។

ទន្ទឹមនិងនោះរថយន្តខ្នាតតូច ដឹកផ្លែដូងពីវៀតណាម មកលក់នៅកម្ពុជា ក៏ត្រូវបានមន្ត្រីគយ កំណត់យកចំនួន៦ម៉ឺនរៀល.ក្នុងមួយជើងផងដែរ។ រថយន្តចំណុះ៥តោន ដឹកបន្លែផ្លែឈើ ១ជើងបង់លុយ ឱ្យមន្ត្រីច្រកទ្វារព្រំដែនទ្វេភាគីដារ អស់ចាប់ពី៤០ម៉ឺនរៀល ទៅ៥០ម៉ឺនរៀល។ មិនតែប៉ុណ្ណោះទេសូម្បីតែ រ៉ឺម៉ក ដឹកជ័រកៅស៊ូ ទៅលក់នៅវៀតណាម ក៏ត្រូវបានមន្ត្រីគយប្រចាំច្រកទ្វារព្រំដែនខាងលើកំណត់យក ៣ម៉ឺនរៀលក្នុងមួយជើងផងដែរ។ រថយន្តខ្នាតតូច ដឹកជ័រកៅស៊ូ ទៅវៀតណាម គយកំណត់យក ចាប់ពី០៦ម៉ឺនរៀល ទៅ១០ម៉ឺនរៀល។ រថយន្តភ្លៅ៥ដឹកជ័រកៅស៊ូ ទម្រាំចេញផុតច្រកទ្វារព្រំដែនទ្វេភាគីដារ(ហៅដូង៧ដើម) ត្រូវបង់លុយឱ្យមន្ត្រីអស់ចំនួន១.២០០.០០០រៀលក្នុង១ជើង។ រថយន្តដឹកផ្លែស្វាយចន្ទីទៅលក់ឱ្យឈ្មួញវៀតណាម មួយជើងបង់លុយឲ្យមន្ត្រីគយនៅច្រកទ្វារព្រំដែនដារចំនួន ៤០០.០០០រៀលជាកំហិត។ ចំពោះរ៉ឺម៉កដឹកគ្រឿងជ័រ ពីវៀតណាមចូលមកខ្មែរ មួយជើង ទម្រាំចេញផុតច្រកព្រំដែនអស់ជិត ២០ម៉ឺនរៀល។

ប្រភពពីក្រុមអាជីវករបញ្ជាក់ថា រាល់ការបង់លុយទាំងនោះ មិនដែលមានលិខិតស្នាម ឬវិក្កយបត្រ បង់ពន្ធចូលរដ្ឋអ្វីទេ គឺជារៀងរាល់លើកហុចលុយផ្ទាល់ដៃ ទៅតាមកំណត់ និងតាមកន្លែងនីមួយៗ នៃច្រកទ្វារព្រំដែនដា។ ក្នុងមួយថ្ងៃៗ មានរថយន្តដឹកដំឡូងមី រថយន្តដឹកអុស រួមនិងរថយន្តដឹកជ័រកៅស៊ូ រថយន្តដឹកបន្លែផ្លែឈើ រថយន្តដឹកអំពៅ រាប់សិបគ្រឿង ដែលត្រូវឆ្លងកាត់តាម «ច្រកទ្វារព្រំដែនទ្វេភាគីដារ ហៅដូង៧ដើម ដើម្បីលើកដាក់សាងទំនិញ ដោះដូរទំនិញ ពីកម្ពុជាទៅវៀតណាម និងពីវៀតណាមមកកម្ពុជា។ ជាហេតុនាំឱ្យមន្ត្រីប្រចាំការនៅច្រកទ្វារព្រំដែន មានឱកាសរាប់ក្បាលឡាន យកលុយពីអាជីករ ក្រៅប្រព័ន្ធច្បាប់ បានលុយរាប់សិបលានរៀលក្នុងមួយថ្ងៃៗ។

ករណីនេះ សៀមរាបប៉ុស្តិ៍ មិនទាន់ទទួលបានបំភ្លឺពី លោក ទន់ ចាន់ធី ប្រធានសាខាគយនិងរដ្ឋាករ ខេត្តត្បូងឃ្មុំ និងលោក មុយ បញ្ញារីទ្ធ ប្រធានការិយាល័យគយនិងរដ្ឋាករ ច្រកទ្វារព្រំដែនទ្វេភាគីដារ បាននៅឡើយទេដោយមិនមានលេខទូរស័ព្ទទំនាក់ទំនង៕SRP

ខេត្តសៀមរាប៖សម្តេចទៀ បាញ់ បានអះអាងថាបញ្ហាព្រៃលិចទឹក ដែលក្រុមជនខិលខូច បានយកប្រជាកសិករធ្វើរបាំង ដើមី្បផលប្រយោជន៍របស់ខ្លួននោះ គ្រប់អាជ្ញាធរសមត្ថកិច្ចទាំងអស់ ត្រូវពិនិត្យចំពោះជន ដែលបានបំពានការកាប់ទន្ទ្រានព្រៃលិចទឹក បើមានស្ថានភាពធ្ងន់ធ្ងរនោះ យើងក៏មិនអាចអនុគ្រោះឲ្យបានឡើយ គឺត្រូវអនុវត្ត ទៅតាមផ្លូវច្បាប់។

សម្តេច ទៀ បាញ់ ក៏បានណែនាំដល់អាជ្ញាធរក្រុង ស្រុកទាំងអស់ សំខាន់ជាប់បឹងទន្លេសាប រួមសហការសាមគ្គីគ្នា ដើមី្បធ្វើការផ្សព្វផ្សាយអប់រំណែនាំដល់ ប្រជាពលរដ្ឋ និងសូមឲ្យអាជ្ញាធរបឹងទន្លេសាប ធ្វើការផ្សព្វផ្សាយអំពីច្បាប់គ្រប់តំបន់ព្រៃលិចទឹក ឲ្យបានស៊ីជម្រៅដល់ប្រជាកសិករ ដែលអាស្រ័យផល.នៅក្នុងតំបន់៣ ក្នុងការសំដៅរក្សាការពារ បឹងទន្លេសាប កុំឲ្យវិនាសបាត់បង់នូវព្រៃ លិចទឹក ដែលជាដែនជម្រកត្រីពងកូននៅរដូវវស្សា និងសត្វស្លាបរស់នៅ។

សម្តេចទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប អះអាងយ៉ាងដូច្នេះ នៅសាលាខេត្តសៀមរាប នារសៀលថ្ងៃទី ៧ ខែ កុម្ភៈ ម្សិលមិញ ក្នុងឱកាសដឹកនាំកិច្ចប្រជុំបូកសរុបលទ្ធផលការងារប្រចាំ ឆ្នាំ២០២១ និងងទិសដៅអនុវត្តបន្តឆ្នាំ២០២២ របស់ក្រុមការងាររាជរដ្ឋាភិបាល ចុះមូលដ្ឋានខេត្តសៀមរាប។

សម្តេចទៀ បាញ់ ក៏បានថ្លែងជំរុញឲ្យមន្ត្រីគ្រប់លំដាប់ថ្នាក់ត្រូវពង្រឹង ការផ្តល់សេវាសាធារណៈលើវិស័យមួយចំនួន ដែលជាកង្វះខាត ដោយគ្រប់គ្នាត្រូវធ្វើការកែលម្អ និង ធ្វើការពង្រឹងដោះស្រាយ ទៅតាមវេទិកាសាធារណៈ ជាពិសេសតាមរយៈ ក្រុមការងាររាជរដ្ឋាភិបាល ថ្នាក់ខេត្តចុះមូលដ្ឋាន ធ្វើការត្រួតពិនិត្យ និង គាំទ្រការអនុវត្តកម្មវិធីនយោបាយ និង យុទ្ធសាស្ត្រចតុកោណ ដំណាក់កាលទី៤ របស់រដ្ឋាភិបាលកម្ពុជា ក្នុងការពង្រឹងការធ្វើកំណែទម្រង់ អនុវត្តកម្មវិធីនយោបាយ អភិវឌ្ឍន៍ លើគ្រប់វិស័យ ឲ្យមានប្រសិទ្ធភាពខ្ពស់ នៅក្នុងឆ្នាំ២០២២។

បើតាមលោកទៀ សីហា អភិបាលខេត្តបញ្ជាក់ថាកន្លងមកនេះអាជ្ញាធរគ្រប់លំដាប់ថ្នាក់ បានខិតខំអភិវឌ្ឍន៍ សមិទ្ធផលនានា ដើមី្បបំពេញតម្រូវការរបស់ប្រជាពលរដ្ឋ នៅតាមមូលដ្ឋាន។ ជាពិសេសលើការងារសន្តិសុខ សុវត្ថិភាពជូនប្រជាពលរដ្ឋ និងការយកចិត្តទុកដាក់ដោះស្រាយ ពីទុក្ខលំបាកជីវភាព រស់នៅរបស់ប្រជាពលរដ្ឋ ក្នុងបរិបទកូវីដ១៩ ព្រមទាំងការងារទប់ស្កាត់ បង្រ្កាបបទល្មើសកាប់ទន្ទ្រានព្រៃលិចទឹក តំបន់បឹងទន្លេសាប (តំបន់៣) នៅខេត្តសៀមរាប មានលើសពី២ពាន់ហិកតា ហើយនឹងឈានទៅធ្វើការបោះបង្គោល កំណត់តំបន់១,តំបន់២ និងតំបន់៣ ឲ្យបានច្បាស់លាស់ នារដូវប្រាំងនេះផងដែរ៕SRP

ខេត្តបាត់ដំបង៖លោកសុខ លូ អភិបាល ខេត្តបាត់ដំបង បានលើកឡើងថាបច្ចុប្បន្ននេះខេត្តបាត់ដំបង ជួបបញ្ហាប្រឈមមួយចំនួនពាក់ព័ន្ធនឹងបញ្ហាបរិស្ថាន ជាទុក្ខកង្វល់ ដែលរដ្ឋបាលខេត្តត្រូវដោះស្រាយ ជាបន្ទាន់។

លោកសុខ លូ ក៏បានស្នើដល់អង្គការ ជួយដល់ខេត្តបាត់ដំបងពាក់ព័ន្ធ នឹងបញ្ហាបរិស្ថាន និងជាពិសេសស្នើជួយឡដុតសំរាម ដើម្បីពន្លឿនដល់ការដុតសំរាមឲ្យកាន់តែឆាប់រហ័សផងដែរ។

លោមសុខ លូ ក៏បានថ្លែងអំណរគុណ ដល់អង្គការUSAID ដែលកន្លងមកបានខិតខំប្រឹងក្នុងការចូលរួមអភិវឌ្ឍន៍ ខេត្តបាត់ដំបង កន្លងមកនេះ ។ 

លោកមានប្រសាសន៍យ៉ាងដូច្នេះ ក្នុងឱកាស 

ទទួលជួបសម្ដែងការគួរសម ជាមួយ លោកស្រីនាយិកាបេសកកម្មភ្នាក់ងារសហរដ្ឋអាមេរិច សម្រាប់ការអភិវឌ្ឍអន្តរជាតិ(USAID) នៅសាលាខេត្តបាត់ដំបង នៅរសៀលថ្ងៃចន្ទនេះ។

លោកស្រី ណែនស៊ី អ៊ីសលីក នាយិកាបេសកកម្មភ្នាក់ងារសហរដ្ឋអាមេរិច បានប្រាប់អូខេត្តបាត់ដំបង សម្រាប់ការអភិវឌ្ឍអន្តរជាតិ ដើម្បីរាយការណ៍ អំពីលទ្ធផលការងារដែលអង្គការUSAID បានសម្រេចកន្លងមក និងលើកទិសដៅសម្រាប់កិច្ចការបន្ទាប់ទៀត ក្នុងការចូលរួមអភិវឌ្ឍន៍ខេត្តបាត់ដំបង។

លោកស្រី ណែនស៊ី អ៊ីសលីក បានថ្លែងអំណរគុណដល់ខេត្ត អបអរសាទរ ដែលក្រុងបាតដំបង នៃខេត្តបាត់ដំបង បានទទួលពាន់រង្វាន់ទេសចរណ៍ស្អាតអាស៊ានលើកទី៣ (២០២២-២០២៤)។ 

លោកស្រី បានបន្តទៀតថា អង្គការUSAID នឹងបន្តជួយទៅលើគម្រោងនានា ដូចជាលើវិស័យកសិកម្ម ក្នុងការជួយការបណ្តុះបណ្តាល រកទីផ្សារដល់កសិករក្នុងការនាំចេញ  វិស័យសុខាភិបាល វិស័យបរិស្ថាន និងវិស័យអប់រំ  ក៏ដូចជាគម្រោងទប់ស្កាត់ការជួញដូរមនុស្ស នៅក្នុងខេត្តបាត់ដំបង៕SRP

ខេត្តកំពង់ចាម​៖ថ្លែងក្នុង​អង្គ​សិក្ខាសាលាផ្សព្វផ្សាយ និងចងក្រងសមាជិកចលនាភូមិមួយផលិតផលមួយ និងពិធីប្រគល់វិញ្ញាបនបត្រទទួលស្គាល់ផលិតផល នៅសាលាខេត្តកំពង់ចាម នៅព្រឹក​មិញនេះ​ លោក​​ ហាន​ កុសល​ អភិបាល​រង​ខេត្តកំពង់ចាម​ បាន​លេីក​ឡើង​ថា​ ក្នុង​នាម​ជា​អាជ្ញាធរសាធារណៈ គឺជាក្តីសង្ឃឹមរបស់ប្រជាពលរដ្ឋ ដូច្នេះតួនាទីរបស់យើងគួរតែបម្រើសេវាសាធារណៈជូនប្រជាពលរដ្ឋឲ្យបានល្អ​ប្រសើរ​។

​លោក ហាន កុសល ក៏បានសំដែងនូវការថ្លែងអំណរ​គុណដល់ គណៈកម្មាធិការជាតិជម្រុញចលនាភូមិ១ ផលិតផល១ ដែលកន្លងទៅធ្វើឲ្យចលនា​ភូមិ១ ផលិតផល១ ក្នុងខេត្តកំពង់ចាម ដំណើការបានល្អប្រសើរ ជាបន្តបន្ទាប់មក។

លោកបានបញ្ជាក់ថា ដើម្បី លើកកម្ពស់ជីវភាពរស់នៅ របស់ប្រជាពលរដ្ឋ ក្នុងខេត្តកំពង់​ចាម តាមរយៈ យុទ្ធសាស្ត្រផ្សេងៗ រដ្ឋបាលខេត្តកំពង់ចាម មានក្រុមប្រឹក្សាខេត្ត អភិបាលខេត្ត ដឹកនាំដោយ លោក​ អ៊ុន ចាន់ដា​ បានខិតខំប្រឹងប្រែង និងអនុវត្ត តាមគោលនយោបាយ របស់រាជរដ្ឋា​ភិបាល ស្តីពីការលើកកម្ពស់សេដ្ឋកិច្ច នៅក្នុងខេត្ត និងការកាត់បន្ថយភាពក្រីក្រ របស់ប្រជាពលរដ្ឋ បើទោះបីជា ពិភពលោក ក៏ដូចជា ប្រទេសកម្ពុជា និយាយរួម និងដោយឡែក ខេត្តកំពង់ចាម ស្ថិតក្នុងកាលៈទេសៈ នៃការរាតត្បាត នៃជម្ងឺកូវីដ ១៩ យ៉ាងណាក៏ដោយ។
​
លោក ហៀង សុវណ្ណារ៉ា បានគូសបញ្ជាក់ថា គណៈកម្មាធិការជាតិ ជម្រុញចលនា​ភូមិ១ ផលិតផល១ បានពិនិត្យ និងវាយតម្លៃ ក្នុងការកំណត់ផលិតផលខ្មែរ ដែលមានសក្តានុពលក្នុងខេត្ត​កំពង់ ចាម ជាភូមិ១ ផលិតផល១។ ការពិនិត្យ និងវាយតម្លៃ នៃផលិតផលទាំងនោះ ត្រូវបានកំណត់ ដោយ ផ្អែក លើលក្ខណៈវិនិច្ឆ័យសំខាន់ ចំនួន ៤គឺ ៖ ទី១.មានទីតាំងផលិតកម្មច្បាស់លាស់។ ទី២.មានការឆ្លុះ បញ្ចាំង នូវអត្តសញ្ញាណភូមិឋាន ដែលឆ្លើយតបទៅនឹងនិយមន័យចលនាភូមិ១ ផលិតផល១។ ទី៣.មានការ កែច្នៃដោយបានបង្កប់គំនិតច្នៃប្រឌិត និងទី៤ ជាផលិផល ប្រមូលផ្តុំគ្នា ជាសហគមន៍ ឬសមាគមន៍។

សូមបញ្ជាក់ថា គណៈកម្មាធិការជាតិ ជម្រុញចលនា​ភូមិ១ ផលិតផល១ បានពិនិត្យ និងវាយតម្លៃ ការទទួលស្គាល់ផលិតផល ក្នុងខេត្តកំពង់ចាម ចំនួន ១៥មុខ លើសំណើទាំង ១៧មុខ ដែលក្នុងនោះរួមមាន៖ ស្កត្នោត ឆៃប៉ូវ ចេកឆាប នំខ្លូត ស្ករចេក គ្រាប់ស្វាយចន្ទីរ ប្រេងស្លឹកគ្រៃ ក្រម៉ា ហូលផាមួង ព្រៃចង្រ្កាន ហូលផាមួង កងមាស ធូប ស៊ុយចំរើន ធូប ហ៊ែលវុទ្ធី ត្បាល់ថ្មបុកគ្រឿង និងឆ្នាំងខ្ទះ អាលុយមីញ៉ូម៕SRP

ខេត្តបាត់ដំបង៖អភិបាលខេត្តសុខ លូ បានមានប្រសាសន៍ថា រដ្ឋបាលខេត្តបាត់ដំបងនឹងចូលរួមសហការ ក្នុងការផ្ដល់ជាព័ត៌មានផ្សេងៗទាក់ទងទៅនឹងសក្ដានុពល របស់ខេត្ត ផែនការវិនិយោគរបស់ខេត្ត និងកិច្ចការមួយចំនួនទៀតជាមួយសមាគមសហគ្រិន វ័យក្មេងកម្ពុជា ក្នុងការតាក់តែងសៀវភៅ មគ្គុទេសក៏វិនិយោគនេះមកចេញជាសមិទ្ធិផលមួយ ដើម្បីឲ្យវិនិយោគិនអាចយកទៅអាន និងយល់ច្បាស់អំពីសក្ដានុពលរបស់ខេត្ត មុននឹងធ្វើការវិនិយោគក្នុងខេត្តបាត់ដំបង ដើម្បីជំរុញឲ្យមានការទាក់ទាញដល់វិនិយោគិនជាតិ អន្តរជាតិដែលមានបំណងចង់សិក្សាអំពីភូមិសាស្រ្ដខេត្តបាត់ដំបង និងដើម្បីងាយស្រួលដល់វិនិយោគិនមុន នឹងធ្វើការវិនិយោគ ក្នុងខេត្តឲ្យត្រូវគោលដៅ និងតម្រូវការរបស់ប្រជាពលរដ្ឋ។

លោកសុខ លូ មានប្រសាសន៍យ៉ាងដូច្នេះ ក្នុងឱកាសដឹកនាំកិច្ចប្រជុំ ពិភាក្សា ពិនិត្យនិងសម្រេចលើទិន្នន័យដែលមាននៅក្នុងសៀវភៅមគ្គុទេសវិនិយោគ សម្រាប់ខេត្តបាត់ដំបង រវាងសមាគមសហគ្រិនវ័យក្មេងកម្ពុជា និងរដ្ឋបាលខេត្តបាត់ដំបង នៅព្រឹកមិញនេះ៕SRP

ខេត្តកំពង់ចាម​៖លោកយឹម ឆៃលី ប្រធានក្រុមការងារថ្នាក់កណ្តាលចុះជួយខេត្តកំពង់ចាម​ ​បានមានប្រសាសន៏ថា គណបក្សប្រជាជនកម្ពុជា ដែលមាន សម្តេចតេជោ ហ៊ុន សែន ជាអគ្គមគ្គុទេ្ទសដ៏ឆ្នើម បានដឹកនាំ​ប្រទេសសម្រេចបានសមិទ្ឋផលធំៗជាច្រើន មានជាអាទិ៍ ខឿនឯករាជ្យជាតិ អធិបតេយ្យ បូរណភាពទឹកដី សន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម ហេីយអំណាចរដ្ឋ ត្រូវបានថែរក្សាការពារយ៉ាងរឹងមាំ និងដំណើរការកែទម្រង់ស៊ីជម្រៅ កំណើនសេដ្ឋកិច្ចជាតិនៅតែមានសន្ទុះទៅមុខ ទោះបីជា​ពិភពលោក​ស្ថិត​ក្នុង​បរិបទ​កូវីដ​-១៩​ ក៏ដោយ។

ការ​លេីក​ឡើង​​បែប​នេះ​ក្នុងកិច្ចប្រជុំផ្សព្វផ្សាយរបាយការណ៏ស្តីពីសភាពការណ៏ទូទៅ និងការងារគណបក្សឆ្នាំ២០២១ និងទិសដៅភារកិច្ចឆ្នាំ២០២២ ដែលបាន​ប្រារព្ធ​ឡើងនៅសាលប្រជុំសសរ១០០ សម្តេចតេជោ សួនគ្រញូងនគរបាជ័យ ខេត្តកំពង់ចាម នៅថ្ងៃទី៦ ខែកុម្ភ: ម្សិលមិញ។

ក្នុង​កិច្ចប្រជុំ លោក យឹម ឆៃលី បានផ្តល់នូវអនុសាសន៏មួយចំនួន ក្នុងនោះ
ទី១. បន្តអនុវត្តនិងប្រកាន់ខ្ជាប់នូវបាវចនាពីរ គឺ “កែទម្រងខាងក្នុង និងបង្កើនមិត្តពីខាងក្រៅ” និងបន្តគោរពអនុវត្តស្មារតីនៃអភិក្រម៥ គឺ ឆ្លុះកញ្ចក់ ងូតទឹក ដុសក្អែល ព្យាបាល ​និងវះកាត់ ,
ទី២. បន្តពង្រឹងសាមគ្គីភាពផ្ទៃក្នុងបក្ស បន្តចុះជួយមូលដ្ឋានតាមមុខសញ្ញា ពង្រឹងបរិមាណសមាជិកបក្សដោយឈរលើទស្សនៈ “ពង្រឹកចាស់ បង្កើនថ្មី” និងណែនាំប្រជាពលរដ្ឋពីសមិទ្ឋផលជាច្រើនរបស់រាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា,
ទី៣. ពង្រឹងគុណភាពនៃការចូលរួមរបស់យុវជនឲ្យរឹតតែសកម្ម និងមានប្រសិទ្ឋិភាពក្នុងការអភិវឌ្ឍន៏សង្គមជាតិ ដែលជាកម្លាំងប្រជាសាសន៏ដ៏ធំមួយ ដែលអាចជម្រុញ និងបង្កើនការអភិវឌ្ឍន៏សេដ្ឋកិច្ចសង្គម និងកំណែទម្រង់នានាឲ្យរឹតតែមានប្រសិទ្ឋភាព,
ទី៤. បន្តធ្វើបច្ចុប្បន្នភាពសមាជិកបក្សឲ្យបានច្បាស់លាស់ និងខិតខំកសាងសមិទ្ឋផលនៅមូលដ្ឋាន និងផ្តល់សេវាសាធារណៈនានាជូនដល់ប្រជាពលរដ្ឋឲ្យកាន់តែសកម្ម និងមានប្រសិទ្ឋភាព ពិសេសត្រូវកសាងមន្ទីរបក្សឲ្យបានគ្រប់ឃុំ សង្កាត់,
ទី៥. លើកកម្ពស់ស្មារតីឲ្យប្រជាជស្រឡាញ់ថែរក្សាសន្តិភាព និងបន្តរំលឹកពាក្យ ​“អរគុណសន្តិភាព” និងបន្តអប់រំប្រជាជនឲ្យយល់ពីការបញ្ចប់សង្គ្រាមស៊ីវិលនៅកម្ពុជា តាមរយៈ “នយោបាយឈ្នះ ឈ្នះ” ដែលដឹកនាំដោយសម្តេចតេជោនាយករដ្ឋមន្ត្រី,
ទី៦. ក្រុមការងារគណបក្សគ្រប់ថ្នាក់ ត្រូវរួមគ្នាគាំទ្រដល់បេក្ខជនរបស់គណបក្សយើងដែលឈរឈ្មោះបោះឆ្នោតឃុំ សង្កាត់ ដោយធ្វើសកម្មភាពរកការគាំទ្រពីប្រជាពលរដ្ឋឲ្យបានផុលផុស ដោយប្រើប្រាស់កម្លាំងសរុប មធ្យោបាយសរុប និងធនធានសរុប ពិសេសថ្នាក់ដឹកនាំបក្សគ្រប់ជាន់ថ្នាក់ ទាំងថ្នាក់កណ្តាល និងថ្នាក់មូលដ្ឋាន ត្រូវអនុវត្តឲ្យស្នើដៃគ្នា ប្រៀបដូចអម្រែកដែលត្រូវរែកស្មើគ្នា ដើម្បីដណ្តើមជ័យជំនះក្នុងការបោះឆ្នោតនៅក្នុងអាណត្តិទី៥នេះ និងអាណត្តិក្រោយៗទៀត,
ទី៧. ត្រូវយកចិត្តទុកដាក់រៀបចំការបណ្តុះ បណ្តាលអំពីច្បាប់ និងបទបញ្ជានីតិវិធីនៃការបោះឆ្នោត ​និងរាប់សន្លឹកឆ្នោតដល់មន្ត្រីរបស់យើង ដើម្បីការពារភាពត្រឹមត្រូវនៃគណបក្សយើង,
ទី៨. ចាប់ពីពេលនេះ រហូតដល់យុទ្ឋនាការឃោសនាបោះឆ្នោត គណៈកម្មាធិការបក្សខេត្ត ក្រុមការងារគ្រប់ថ្នាក់ ត្រូវបង្កើនសកម្មភាពមូលដ្ឋាន ដោយពង្រឹងពង្រីកអំពើល្អរបស់បក្សយើង ​បកស្រាយការបំភ័ន្តមតិផ្សេងៗរបស់ក្រុមពួកអគតិ និងទី៩. គណៈកម្មការប្រយុទ្ឋនឹងជម្ងឺកូវីដ១៩ ខេត្ត និងរដ្ឋបាលខេត្ត ត្រូវជម្រុញឲ្យប្រជាពលរដ្ឋមកទទួលវ៉ាក់សាំងជម្រុញដូសទី៣ និងដូសទី៤ ឲ្យបានគ្រប់ៗគ្នា និងបន្តខិតខំអនុវត្តឲ្យបានខ្ជាប់ខ្ជួននូវវិធានការ “៣កុំ និង៣ការពារ” និងកែប្រែទម្លាប់នៃការរស់នៅសម្របតាមបរិបទនៃជម្ងឺកូវីដ១៩ ដោយអនុវត្តយ៉ាងម៉ឺងម៉ាត់នូវវិធានការអនាម័យតាមការណែនាំរបស់ក្រសួងសុខាភិបាល​ ដើម្បីចៀសផុតពីជម្ងឺនេះ​៕SRP

ខេត្តសៀមរាប៖សម្ដេចទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានថ្លែងថាខេត្តសៀមរាបបានមោទនភាព ដែលមាន សិស្សជាប់និទ្ទេស A ជាច្រើនយ៉ាងដូច្នេះ។

សម្ដេចមានប្រសាសន៍ថា ការជាប់និទ្ទេស A ជាច្រើននាក់នេះ ជាមោទនភាពមួយដែលខេត្តសៀមរាប មានការរីកចម្រើនលើវិស័យអប់រំជារៀងរាល់ឆ្នាំ។ ភាពរីកចំរើននៃចំណេះដឹងនេះ ដោយសារប្រទេសជាតិយើងមានសន្ដិភាព។
សម្ដេច ទៀ បាញ់ ក៏បានណែនាំឲ្យសិស្សានុសិស្ស យកចិត្តសិក្សារៀនសូត្រ ឱ្យបានជាប់ជាប្រចាំ ក្នុងនាមយុវជនជាទំពាំងស្នងឫស្សី ដើម្បីលើកកម្ពស់ជីវភាពគ្រួសារ និងដើម្បីចូលក្នុងសង្គមជាតិ។

សម្ដេចទៀ បាញ់ មានប្រសាសន៍បែបនេះ ក្នុងឱកាសអញ្ជើញផ្ដល់រង្វាន់ម៉ូតូចំនួន ១៥៣ គ្រឿង និងប័ណ្ណសរសើរ ដល់សិស្សានុ សិស្ស ក្នុងខេត្តសៀមរាប ដែលទើបបានប្រឡងមធ្យមសិក្សាទុតិយភូមិ ទទួលបាននិទ្ទេស A ចំនួន១៥៣នាក់ សម្រាប់ឆ្នាំសិក្សា ២០២០- ២០២១ ដោយក្នុងម្នាក់ៗទទួលបានម៉ូតូ១គ្រឿង និងបណ្ណ័សរសើរ នៅព្រឹកមិញនេះ។

សម្ដេចទៀ បាញ់ ក៏ប្រកាសបន្តចែកជូនរង្វាន់ម៉ូតូដល់សិស្សានុ សិស្ស ប្រឡងបាក់ឌុបដែលទទួលបាននិទ្ទេសA នៅឆ្នាំក្រោយបន្តទៀត។

សម្ដេចក៏បានអំពាវនាវដល់ប្រជាពលរដ្ឋ អាណាព្យាបាល លោកគ្រូអ្នកគ្រូ ចូលរួមបន្ដលើកកម្ពស់វិស័យ អប់រំ ឲ្យកាន់តែខ្ពស់ និងចូលរួមលើកកំពស់សុខភាព ផងដែរ៕SRP

ខេត្តក្រចេះ៖សម្តេចតេជោហ៊ុន សែន នាយករដ្ឋមន្ត្រី បានមានប្រសាសន៍ថា ការតភ្ជាប់ហេដ្ឋារចនាសម្ព័ន្ធមកកាន់ភាគឦសាននេះ គឺមិត្តចិនបានជួយកសាងហេដ្ឋារចនាសម្ព័ន្ធច្រើន មានដូចជាក្រចេះ ស្ទឹងត្រែង រតនគិរី និងមណ្ឌលគិរីជាដើម។ សម្តេចតេជោ នឹងប្រែក្លាយខេត្តភាគឦសានឱ្យក្លាយជាប៉ូលសេដ្ឋកិច្ចទី៤របស់កម្ពុជា ដែលផ្តោតសំខាន់ពាក់ព័ន្ធនឹងកសិឧស្សាហកម្ម និងធនធានរ៉ែ។

សម្តេចតេជោបានមានប្រសាសន៍ថា សម្តេចពិតជារីករាយចំពោះសមិទ្ធផលទាំងឡាយដែលកើតចេញពីការគូសវាសរបស់សម្តេចផ្ទាល់ ក្រោយពេលដែលកម្ពុជាយើងបានបិទបញ្ចប់នូវភ្លើងសង្គ្រាមដ៏រាំរ៉ៃនៅចុងឆ្នាំ១៩៩៨។ សម្តេចតបានមានប្រសាសន៍ថា បច្ចុប្បន្ននេះ បណ្តាខេត្តនានានៅទូទាំងប្រទេសបានចងភ្ជាប់គ្នាដោយហេដ្ឋារចនាសម្ព័ន្ធ ផ្លូវថ្នល់ ស្ពាន ជាច្រើន នៅសល់តែការចងភ្ជាប់ពីភាគពាយ័ព្យ ទៅភាគនិរតីប៉ុណ្ណោះ។ សម្តេចបន្តថា ស្ថានភាពកម្ពុជាបច្ចុប្បន្ន មិនដូចពីពេលមុនទៀតនោះទេ ពីព្រោះពេលនេះ ផ្លូវជាច្រើនត្រូវបានកសាង មណ្ឌលសុខភាព និងសាលារៀនក៏ត្រូវបានពង្រាយជាច្រើនកន្លែងផងដែរ។
សម្តេចតេជោនាយករដ្ឋមន្ត្រីបានថ្លែងថា នៅខែអំឡុងមីនា ខាងមុខនេះ មន្ទីរពេទ្យធំៗចំនួនពីរតម្លៃជិត ៨០លានដុល្លារ ដែលជាជំនួយរបស់ចិន នឹងត្រូវសម្ពោធដាក់ឱ្យប្រើប្រាស់ផងដែរ ក្នុងនោះមានមន្ទីរពេទ្យមិត្តភាពកម្ពុជា-ចិន ត្បូងឃ្មុំ និងមន្ទីរពេទ្យមិត្តភាពកម្ពុជា-ចិន ព្រះកុសុមៈ នៅភ្នំពេញ។

សម្តេចតេជោ ហ៊ុន សែន បានបន្តស្នើមិត្តចិនជួយសាងសង់ផ្លូវតភ្ជាប់ពីកំណាត់ផ្លូវជាតិលេខ៧ ពីតំបន់អូរគ្រៀង ទៅព្រំដែនកម្ពុជា-ឡាវ ជាបន្តទៀត ផងដែរ។ ទាក់ទងទៅនឹងការនាំចេញផលិតផលកម្ពុជាទៅទៅផ្សារចិន សម្តេចតេជោបានថ្លែងថា ចិន បានពិនិត្យរួចហើយលើនីតិវិធីភូតគាមអនាម័យលើត្រីប្រា និងផ្លែមៀនប៉ៃលិនរបស់កម្ពុជា ដែលត្រូវនាំចេញទៅកាន់ទីផ្សាររបស់ប្រទេសចិន ដែលជាការបើកទីផ្សារកាន់តែធំមួយនាពេលខាងមុខនេះ។

សម្តេចតេជោ ហ៊ុន សែន បានអំពាវនាវប្រជាពលរដ្ឋគោរពច្បាប់ចរាចរណ៍ ខណៈគ្រោះថ្នាក់ចរាចរណ៍បានសម្លាប់មនុស្សរាល់ថ្ងៃ ។ ហើយទាក់ទងទៅនឹងបញ្ហានៃជំងឺ Covid-19 នោះ សម្តេចតេជោបានថ្លែងថា រយៈពេល៣០ថ្ងៃហើយ កម្ពុជាមិនមានអ្នកស្លាប់ដោយសារជំងឺកូវីដ១៩ទេ តែត្រូវបន្តយកចិត្តទុកដាក់លើការការពារ និងបន្តចាក់វ៉ាក់សាំងដូសជំរុញបន្តទៀត។

សម្តេចហ៊ុន សែន ថ្លែងបែបនេះក្នុងឱកាសអញ្ជើញសម្ពោធដាក់ឱ្យប្រើប្រាស់កំណាត់ផ្លូវជាតិលេខ៧ក្នុងខេត្តក្រចេះ នៅព្រឹកថ្ងៃចន្ទ ថ្ងៃទី៧ ខែកុម្ភៈ ឆ្នាំ២០២២នេះ៕SRP