ខេត្តសៀមរាប៖អតីតគណបក្សសង្គ្រោះជាតិ (CNRP) ក្នុងខេត្តសៀមរាប ចំនួន១៨រូប បានស្ម័គ្រចិត្តចូលរួមរស់ និងធ្វើសកម្មភាពនយោបាយ ជាមួយ គណបក្សប្រជាជនកម្ពុជា។

ការចុះចូលនេះនៅថ្ងៃពុធ ទី៩ ខែកុម្ភៈ ឆ្នាំ២០២២ ម្សិលមិញ នៅទីស្នាក់ការគណបក្សប្រជាជនកម្ពុជាខេត្តសៀមរាប ក្រោមវត្តមានលោកទៀ សីហា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណបក្សប្រជាជនកម្ពុជាខេត្តសៀមរាប។

អតីតថ្នាក់ដឹកនាំ និងសមាជិកអតីតគណបក្សសង្គ្រោះជាតិក្នុងខេត្តសៀមរាប ដែលបានចុះចូលនេះរួមមាន៖
លោក សៅ យ៉ូអេង អតីតក្រុមប្រឹក្សាខេត្ត ប្រធានហិរញ្ញឹកខេត្តសៀមរាប និងជាប្រធានក្រុមការងារស្រុកពួក,
លោក រស់ សំណាង អតីតក្រុមប្រឹក្សាសង្កាត់គោកចក,
លោក ទេព ចិន អតីតក្រុមប្រឹក្សាសង្កាត់គោកចក,
លោកស្រី ចាន់ សុម៉ាលី អតីតចៅសង្កាត់ទី១ សង្កាត់គោកចក ក្រៅពីនោះជាអតីតសមាជិក សមាជិកា ដែលសុទ្ធសឹងជាសកម្មជនដ៏សកម្មរបស់អតីតគណបក្សសង្គ្រោះជាតិក្នុងខេត្តសៀមរាបផងដែរ។

លោក សៅ យូអេង តំណាងឱ្យសមាជិក សមាជិកាដទៃទៀត បានគោរពថ្លែងអំណរគុណយ៉ាងជ្រាលជ្រៅ ជូនចំពោះសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដែលបានអនុញ្ញាតឱ្យលោក និងអតីតសមាជិកក្រុមប្រឹក្សាឃុំ សកម្មជន យុវជនខេត្តសៀមរាប បានចូលរួមរស់ជីវភាពនយោបាយជាមួយគណបក្សប្រជាជនកម្ពុជា។

លោក សៅ យូអេង បានគូសរំលេចថា មានហេតុផលពីរដែលនាំឱ្យរូបលោក និងសមាជិក សមាជិកា ដទៃទៀតស្ម័គ្ររួមរស់ជាមួយគណបក្សប្រជាជនកម្ពុជា។
ហេតុផលទាំងពីរនោះ ទី១ គឺការមើលឃើញនូវស្នាដៃដឹកនាំ ឆន្ទៈមនសិការ និងសមិទ្ធផលជាច្រើន ដែលគណបក្សប្រជាជនកម្ពុជាបានកសាងសម្រាប់ជាតិមាតុភូមិ, ហេតុផលទី២ គឺការឆ្អែតឆ្អន់ នឿយណាយចំពោះភាពពិសពុល ល្បិចកិច្ចកល និងមនោគមន៍នយោបាយដ៏គ្រោះថ្នាក់របស់ អតីត គណបក្សសង្គ្រោះជាតិ។

អតីតមន្ត្រីជាន់ខ្ពស់អតីតគណបក្សសង្គ្រោះជាតិរូបនេះ បានគូសបញ្ជាក់ថា «យើងខ្ញុំទាំងអស់គ្នាចូលរួមរស់ជាមួយ គណបក្សប្រជាជនកម្ពុជា គឺកើតចេញពីទឹកចិត្តរបស់ពួកខ្ញុំ។ ពួកខ្ញុំបានភ្ញាក់រលឹក និងបានមើលឃើញយ៉ាងច្បាស់ពីគុណសម្បត្តិ ស្នាដៃ និងកិច្ចប្រឹងប្រែងរបស់គណបក្សប្រជាជនកម្ពុជា ក្រោមការដឹកនាំរបស់សម្តេចតេជោ ក្នុងការសង្គ្រោះជាតិ សង្គ្រោះប្រជាជនឱ្យរួចផុតពីភាពវេទនានៃភ្លើងសង្គ្រាម ហើយបានប្រឹងប្រែង កសាងសង្គមកម្ពុជា ឱ្យរីកចម្រើន ប្រជាជនមានជីវភាព កាន់តែប្រសើរ ការរស់នៅកាន់តែសុខសុភមង្គល»។

លោក សៅ យូអេង និងក្រុមការងាររបស់លោក បានសន្យាថា នឹងខិតខំបំពេញការងារដោយស្មោះត្រង់ និងកៀរគរ អូសទាញ អតីតសមាជិក សមាជិកា អតីតគណបក្សសង្គ្រោះជាតិ វិលត្រលប់មករួមរស់ជាមួយគណបក្សប្រជាជនកម្ពុជាវិញ។

លោក សៅ យូអេង និងសមាជិក សមាជិកថ្មី បានប្រកាសគាំទ្រ លោកហ៊ុន ម៉ាណែត ជានាយករដ្ឋមន្ត្រីបន្តវេន នាពេលអនាគតផងដែរ។ ពួកគេជឿជាក់ថា ក្រោមការដឹកនាំរបស់លោកហ៊ុន ម៉ាណែត នឹងបន្តរក្សាស្នាដៃ និងសមិទ្ធផលទាំងឡាយ របស់ សម្តេចតេជោ ហើយនាំមកនូវសមិទ្ធផល ជាច្រើនទៀត សម្រាប់ជាតិកម្ពុជា ជាពិសេសរក្សាបាន នូវសុខសន្តិភាព ដែលជាលក្ខខណ្ឌដ៏ចាំបាច់ សម្រាប់ការរស់នៅរបស់ប្រជាជន និងភាពចម្រើនរបស់ជាតិ៕SRP

ភ្នំពេញ៖សម្តេចតេជោហ៊ុន សែន នៅព្រឹកនេះបាន អំពាវនាវឲ្យបន្តចូលរួមទប់ស្កាត់ជំងឺកូវីដ ១៩ ខណ:ការឆ្លងកើនឡើងវិញ ក្នុងរយៈពេលប៉ុន្មានថ្ងៃនេះថ្ងៃ។

ការអំពាវនាវ នៅព្រឹកថ្ងៃទី ១០ ខែកុម្ភៈ ឆ្នាំ ២០២២ នេះក្នុងពេលដែលសម្ដេចតេជោនាយករដ្ឋមន្ត្រី កំពុងដឹកនាំគណៈប្រតិភូជាន់ខ្ពស់កម្ពុជា ទៅបំពេញទស្សនកិច្ច នៅប្រទេសកូរ៉េ និងធ្វើជាសហប្រធានកិច្ចប្រជុំកំពូលសន្តិភាពពិភពលោក ចាប់ពីថ្ងៃទី១០-១៣ ខែកុម្ភៈ ឆ្នាំ២០២២។

ក្នុងសាររបស់សម្តេចតេជោបានបញ្ជាក់ថា ឆ្លៀតនៅក្នុងឱកាសនេះ ខ្ញុំសូមអំពាវនាវដល់បងប្អូនជនរួមជាតិ បន្តចូលរួមទប់ស្កាត់ ការរីករាលដាលជំងឺឆ្លងកូវីដ១៩ ជាពិសេសមេរោគបំប្លែងខ្លួនថ្មីៗ អូមីក្រុង (Omicron) ដែលអត្រាឆ្លងកំពុងកើនឡើងក្នុងរយៈពេលប៉ុន្មានថ្ងៃចុងក្រោយនេះ។ សូមយកចិត្តទុកដាក់ការពារខ្លួនជាចាំបាច់ ក្នុងនោះត្រូវមានការកាត់បន្ថយការជួបជុំ ឬការប្រមូលផ្តុំ ដែលមានមនុស្សច្រើន និងត្រូវអនុវត្តវិធានការ ៣កុំ និង៣ការពារ» ដើម្បីសុវត្ថិភាពសុខភាពយើងទាំងអស់គ្នា។

សូមជម្រាបថានៅក្នុងកិច្ចប្រជុំកំពូលសន្តិភាពពិភពលោក ឆ្នាំ២០២២នេះ នឹងមានការចូលរួមពីបណ្តាវាគ្មិនសំខាន់ៗ និងអ្នកចូលរួមមកពី១៥៧ប្រទេស ដើម្បីស្វែងរកក្តីសង្ឃឹមក្នុងការបង្រួបបង្រួមឧបទ្វីបកូរ៉េប្រកបដោយសន្តិវិធី។

សម្ដេចតេជោបានបញ្ជាក់ទៀតថា ក្នុងអំឡុងពេល ស្នាក់នៅទីក្រុងសេអ៊ូល (Seoul) ខ្ញុំនឹងជួបជាមួយ ឯកឧត្តម មូន ចេ-អ៊ីន (Moon Jae-in) ប្រធានាធិបតីនៃសាធារណរដ្ឋកូរ៉េ ដើម្បីពិភាក្សាអំពីទំនាក់ទំនង និងកិច្ចសហប្រតិបត្តិការទ្វេភាគី រួមមាន កិច្ចសហប្រតិបត្តិការ លើវិស័យនយោបាយ សេដ្ឋកិច្ច និងសង្គម-វប្បធម៌។ល។ ទន្ទឹមនឹងនោះដែរ ខ្ញុំនឹងមានជំនួបជាមួយឯកឧត្តម បាន គី-មូន (Ban Ki-moon) អតីតអគ្គលេខាធិការអង្គការសហប្រជាជាតិ និងឥស្សរជននយោបាយ និងធុរជនផ្សេងទៀតផងដែរ៕SRP

ខេត្តសៀមរាប៖យុវជនម្នាក់ និងនារីជាសង្សារត្រូវបាននគរបាលការិយាល័យ ព្រហ្មទណ្ឌកម្រិតធ្ងន់ស្នងការនគរបាល ខេត្តសៀមរាប សហការជាមួយនគរបាលស្រុកសូទ្រនិគម ឃាត់ខ្លួនពាក់ព័ន្ធករណីឃាតកម្ម។

ការឃាត់ខ្លួននៅម៉ោង១១និង៤០នាទី ថ្ងៃទី៩ ខែកុម្ភៈ ឆ្នាំ២០២២ នៅភូមិសំរោងកញ្ជោច ឃុំឬស្សីលក ស្រុកជីក្រែង។ ជនសង្ស័យឈ្មោះ ចិត្ត ភន ភេទប្រុស អាយុ២១ឆ្នាំ មុខរបរកម្មករសំណង់រស់នៅភូមិរំរោងកញ្ចោច ឃុំឬស្សីលក ស្រុកជីក្រែង ខេត្តសៀមរាប។

ចំណែកម្នាក់ទៀតឈ្មោះ ឡាយ សាភី ភេទស្រី អាយុ ១៧ឆ្នាំ មុខរបរសិស្ស រស់នៅភូមិបឹងវៀន ឃុំតាយ៉ែក ស្រុកសូទ្រនិគម ខេត្តសៀមរាប ជាសហចារី ត្រូវបានឃាត់ខ្លួននៅភូមិបឹងវៀន ឃុំតាយ៉ែក ស្រុកសូត្រនិគម ខេត្តសៀមរាប នៅថ្ងៃនេះដែរ។

លោកឆាន់ វុទ្ធី នាយរងការិយាល័យនគរបាលព្រហ្មទណ្ឌកំរិតធ្ងន់ បានឲ្យដឹងថាករណីនេះបានកើតកាលពីវេលាម៉ោង២១ និង៣០នាទី ថ្ងៃទី៨ ខែកុម្ភៈ ឆ្នាំ២០២២ នៅចំណុចបរិវេណ ផ្ទះជនរងគ្រោះស្ថិតនៅភូមិបឹងវៀន ឃុំតាយ៉ែក ស្រុកសូទ្រនិគម ខេត្តសៀមរាប។

យោងតាមរបាយការណ៍បានឲ្យដឹងថាជនរងគ្រោះឈ្មោះ ឡាយ ប៉ុនលេង ភេទប្រុស អាយុ ១១ឆ្នាំ ៤ខែ មុខរបរសិស្ស រស់នៅភូមិបឹងវៀន ឃុំតាយ៉ែក ស្រុកសូទ្រនិគម ខេត្តសៀមរាបបានស្លាប់នៅក្នុងអង្រឹង។

របាយការណ៍បន្តថាស្លាកស្នាមនៅលើសាកសព៖ ស្នាមរឹតត្រង់ក ទំហំប៉ុនពីរធ្នាប់ដៃ ឆ្អឹងកងករបស់ជនរងគ្រោះត្រូវបានបាក់ រីឯដងខ្លួន និងដៃជើងសពពុំមានស្លាកស្នាមអ្វីនោះទេ។ ករណីនេះដកហូតវត្ថុរួមមាន៖ ខ្សែក្រវ៉ាត់ ពណ៌ខ្មៅ១ និងខ្សែចងអង្រឹងពណ៌ខ្មៅ ១កំណាត់ ប្រវែង ៩២ Cm និងអង្រឹងប៉ារ៉ា១។

របាយការបញ្ជាក់ថា កំលាំងជំនាញការិយាល័យ នគបាលព្រហ្មទណ្ឌកម្រិតធ្ងន់ បាននាំខ្លួនឈ្មោះ ឡាយ សាភី ភេទស្រី ត្រូវជាបងស្រីបង្កើតរបស់សពមកធ្វើការសាកសួរ។

តាមការស្តាប់ចម្លើយឈ្មោះ ឡាយ សាភី បានសារភាពថា៖ នៅថ្ងៃកើតហេតុគឺខ្លួន និងប្អូនប្រុសជាជនរងគ្រោះ នៅផ្ទះតែ២នាក់។ ចំណែកឪពុកម្តាយ ទៅស្នាក់នៅនិងធ្វើចំការនៅភូមិខ្វាវ ឃុំខ្វាវ ស្រុកជីក្រែង ខេត្តសៀមរាប លុះដល់១៩:០០នាទី សង្សាខ្លួនឈ្មោះ ចិត្ត ភន បានផ្ញើតាមគណីហេ្វសប៊ុក មកខ្លួនថាគេសុំមកលេងផ្ទះ នាងក៏យល់ព្រម លុះដល់វេលាម៉ោង២១:០០នាទី ឈ្មោះ ចិត្ត ភន ក៏បានទៅដល់ ហើយគេបានអោបថើប និងសុំនាងរួមភេទ នាងក៏យល់ព្រម ហើយនាំគ្នាទៅរួមភេទនៅចំណុងរោងដាក់ឈើ ក្រោយផ្ទះ ខណៈពេលកំពុងរួមភេទស្រាប់តែ ប្អូនប្រុសខ្លួនឈ្មោះ ឡាយ ប៉ុនលេង បានទៅទាន់ ហើយនិយាយថា គេនិងយករឿងពួកខ្លួនខាងលើប្រាប់ទៅឪពុកម្តាយទាំងអស់ ពេលនោះខ្លួន និងសង្សាក៏រួមគំនិតសម្លាប់ជនរងគ្រោះ បំបិតមាត់តែម្តង។ ដោយឈ្មោះ ចិតុ្ត ភន បានវាយទៅលើជនរងគ្រោះ ចំត្រង់ដងក ផ្នែកខាងក្រោយ មួយដៃ បណ្តាលឲ្យដួលសន្លប់ផ្កាប់មុខទៅលើដី ហើយខ្លួនស្ទុះចាប់ជើងជនរងគ្រោះទាំងសងខាង ហើយឈ្មោះ ចិត្ត ភន បានចាប់ផ្ងាសព ហើយយកដៃទំាងពីរមួលបំបាក់កសពតែម្តង ក្រោយធ្វើសកម្មភាពនេះហើយឈ្មោះ ចិត្ត ភន ក៏បានឡើងជិះម៉ូតូគេចខ្លួនបាត់។

តាមការស្តាប់សចម្លើយរបស់ឈ្មោះ ចិត្ត ភន បានសារភាពថា៖ រូបគេពិតជាបានធ្វើសកម្មភាពខាងលើ ពិតប្រាកដមែន ដោយខ្លួនជាអ្នកវាយ និងមួលបំបាក់កជនរងគ្រោះ។ ចំណែកឈ្មោះ ឡាយ សាភី បានយកខ្សែក្រវ៉ាត់ ទៅរឹតកសពបន្ថែម និងបានលើកសពទៅដាក់ក្នុងអង្រឹងលើផ្ទះ បន្ទាប់មកយកខ្សែក្រវ៉ាតខាងលើ ទៅចងភ្ភាប់និងខ្សែអង្រឹង បង្វែថា ជាករណីអត្តឃាត ដោយចងកសម្លាប់ខ្លួន។

សុំជម្រាបថាប្រតិបត្តិការបង្ក្រាបជនដៃដល់ទាំងពីរនាក់នេះ ធ្វើឡើងតាមការណែនាំរបស់ស្នងការនគរបាលខេត្ត លោក តេង ច័ន្ទណាត នឹងក្រោមការបង្ហាញរបស់លោកភឹង ចិន្តារ៉េត ស្នងការរងទទួលការងារផែនព្រហ្មទណ្ឌ លោកណុប សារ៉ាក់ ស្នងការរងជំនួយដឹកនាំការិយាល័យកំរិតធ្ងន់ នឹងលោកសុខ ម៉េងអ៊ាង នាយការិយាល័យព្រហ្មទណ្ឌកម្រិតធ្ងន់ ដោយដឹកនាំបញ្ជាផ្ទាល់ ដោយលោកឆាន់ វុទ្ធី នាយរងការិយាល័យនគរបាល ព្រហ្មទណ្ឌកំរិតធ្ងន់៕SRP

ខេត្តសៀមរាប៖សមត្ថកិច្ចបានឲ្យដឹងថាជនបរទេសម្នាក់ បានគំាងបេះដូង បណ្ដាលឲ្យស្លា..ប់។ ហេតុការណ៍ បានកើតឡើងនៅ ម៉ោង០៩និង២៥នាទីថ្ងៃទី០៩ខែកុម្ភ: ឆ្នាំ២០២២ នៅចំណុចមន្ទីរពេទ្យបង្អែកខេត្តសៀមរាប ស្ថិតនៅភូមិមណ្ឌល១ សង្កាត់ស្វាយដង្គំ ក្រុងសៀមរាប។

ជនរងគ្រោះឈ្មោះ KASS JONATHAN FIER ភេទប្រុស អាយុ៦៤ឆ្នាំ ជនជាតិ អាមេរិច កាន់លិខិតឆ្លងដែន លេខ5672122486 មុខរបរ ចូលនិវត្តន៍ ស្នាក់នៅខុនដូរបន្ទប់លេខ១១ជាន់ទី៣(BB Angkor Residence )ស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប។

តាមការស្រាវជ្រាវរបស់សមត្ថកិច្ចជំនាញ និងលោកគ្រូពេទ្យអមតុលាការបានសន្និដ្ឋានថា មូលហេតុ ជនរងគ្រោះស្លាប់ដោយសារជំងឺ គំាងបេះដូង (អវិជ្ជមានកូវីដ១៩)។ សាកសពរៀបចំបញ្ជូនទៅតម្កល់ទុកបណ្តោះអាសន្ន នៅវត្តទឹកថ្លា រាជធានីភ្នំពេញ រង់ចាំការសម្រេចពីក្រុមគ្រួសារ និងស្ថានទូត៕SRP

ភ្នំពេញ៖រដ្ឋមន្ដ្រីក្រសួងមហាផ្ទៃ បានបញ្ជាក់ថា នៅរាជធានីភ្នំពេញ ខេត្តព្រះសីហនុ និងខេត្តសៀមរាប ត្រូវបន្តសហការបំពាក់កាមេរ៉ាតាមដងផ្លូវ តាមគម្រោងរបស់រាជរដ្ឋាភិបាល និងត្រូវចាត់តាំងគ្រប់គ្រង ប្រើប្រាស់ និងថែទាំឱ្យស្របតាមនិយាមបច្ចេកទេស។

រដ្ឋមន្ត្រីក្រសួងមហាផ្ទៃ បន្ដថា ពិសេសត្រូវជំរុញការបំពាក់បរិក្ខារសុវត្ថិភាព លើផ្លូវថ្នល់រួមមាន ភ្លើងស្តុប ផ្លាកសញ្ញា និងគំនូសសញ្ញាចរាចរណ៍នៅតាមផ្លូវថ្នល់ ដែលរដ្ឋបាលរាជធានី-ខេត្ត ទទួលខុសត្រូវ។ 

សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ ផ្លូវគោក (គ.ស.ច.គ) មានប្រសាសន៍យ៉ាងដូច្នេះ ក្នុងឱកាស អញ្ជើញជាអធិបតីដ៏ខ្ពង់ខ្ពស់ ដឹកនាំកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆ្នាំ២០២១ និងលើកទិសដៅការងារឆ្នាំ២០២២ របស់ គណៈកម្មាធិការជាតិសុវត្ថិភាព ចរាចរណ៍ផ្លូវគោក នៅថ្ងៃអង្គារ ទី០៩ ខែកុម្ភៈ ឆ្នាំ២០២២នេះ។

សម្ដេចស ខេង បានមានប្រសាសន៍បន្តថាស្ថិតក្នុងបរិបទ នៃការឆ្លងរាតត្បាតជំងឺកូវីដ-១៩ គ្រោះថ្នាក់ចរាចរណ៍ផ្លូវគោក នៅតែបន្តកើតមាន ហើយបានបន្សល់ទុក នូវសោកនាដកម្ម ជាច្រើន ដល់ប្រជាពលរដ្ឋ ដូចជា ការបាត់បង់ជីវិត ការរងរបួស ពិការភាព និងការខាតបង់ទ្រព្យសម្បត្តិ ដែលបង្កដោយអ្នកប្រើប្រាស់ផ្លូវមួយចំនួន ដែលមិនគោរពប្រតិបត្តិច្បាប់ និងខ្វះសីលធម៌យោគយល់អាធ្យាស្រ័យ ហាក់បីដូចជា មិនស្រឡាញ់ជីវិតខ្លួនឯង ឬជីវិត អ្នកដទៃ។

សម្ដេចមានប្រសាសន៍ទៀបថា ទោះជាយ៉ាងនេះក្តី ដោយសារកិច្ចខិតខំប្រឹងប្រែងចាត់វិធានការរឹតបន្តឹងច្បាប់ និងការផ្សព្វផ្សាយអប់រំច្បាប់យ៉ាងសកម្ម របស់យន្តការ និងសមត្ថកិច្ចគ្រប់ថ្នាក់ចំណុះគណៈកម្មាធិការជាតិសុវត្ថិភាពចរាចរណ៍ផ្លូវគោក បានធ្វើឱ្យស្ថានភាពគ្រោះថ្នាក់ចរាចរណ៍ផ្លូវគោកឆ្នាំ២០២១ មានការថយចុះគួរជាទីមោទន:។ 

សម្តេចបន្តថា តាមការកត់សម្គាល់យើងពិនិត្យឃើញថាឆ្នាំ២០២១ ហេតុការណ៍គ្រោះថ្នាក់ចរាចរណ៍ពិតជាមានការថយចុះ ប៉ុន្តែគោលដៅមួយចំនួនដូចជា រាជធានីភ្នំពេញ ខេត្តកណ្តាល ខេត្តកំពង់ចាម និងខេត្តព្រះសីហនុ នៅតែមានតួលេខគ្រោះថ្នាក់ខ្ពស់។ គ្រោះថ្នាក់ចរាចរណ៍មានកំណើនខ្ពស់នេះ គឺនៅថ្ងៃបុណ្យ និងថ្ងៃឈប់សម្រាក៕SRP

ខេត្តសៀមរាប៖ផ្នូរខ្មោច របស់សាសនាគ្រឺស្ទ ខេត្តសៀមរាប ដែលមានទីតាំងនៅជាយក្រុងសៀមរាប ស្ថិតនៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ត្រូវបានឈ្មួញទិញសម្រាប់ធ្វើអាជីវកម្ម ដោយបានយកគ្រឿងចក្រឈូលឆាយខ្ទេច ដើម្បីយកពុះជាដីឡូតិ៍។

មានការលើកឡើងថា ផ្នូរខ្មោច របស់សាសនាគ្រឺស្ទ មានទំហំ ៥០ម៉ែត្រគុណ១០០ម៉ែត្រ ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប  កាលពីអំឡុងឆ្នាំ២០០៤ និកាយមេថូឌីសប្រគល់អោយ សមាគមសពគ្រីស្ទាន ទុកសម្រាប់កប់សព។ ដោយមានផ្នូរសពបញ្ចុះ នៅទីនោះច្រើនផ្នូរ តែបច្ចប្បន្ន ត្រូវគេយកគ្រឿងចក្រឈូសឆាយខ្ទេចខ្ទីដូចខ្ទឹម៕SRP

ខេត្តក្រចេះ៖មានការលើកឡើងថាក្រុមហ៊ុនស៊ីងបាយអូថេក នៅតែបន្តសកម្មភាពប្រមូលទិញឈើនិងដឹកជញ្ជូនឈើយ៉ាងគគ្រឹកគគ្រេង បើទោះបីជាមានការរិះគន់យ៉ាងខ្លាំងក៏ដោយ។

ប្រភពបានឲ្យដឹងថាក្រុមឈ្មួញបានប្រើប្រាស់គោយន្តកន្ត្រៃ រាប់រយគ្រឿង ដើម្បីដឹកជញ្ជូនឈើចេញពីតំបន់ព្រៃឡង់ ចូលមកតាមផ្លូវត្រង់ក្រវ៉ាត់ ក្នុងដីក្រុមហ៊ុន ត្រង់និយាមកា 48P 0595836 UTM 1431190 ដើម្បីជ្រកក្រោមស្លាកក្រុមហ៊ុនស៊ីងបាយអូថេក ឲ្យឈើក្លាយជាឈើស្របច្បាប់។

ប្រជាពលរដ្ឋបានបង្ហាញផ្លូវនិងទីតាំងដែលក្រុមគោយន្តរាប់សិបគ្រឿងកំពុងធ្វើសកម្មភាពកាប់ឈើឈ្លីក និងដឹកចេញពីតំបន់ព្រៃឡង់។ ជាកស្ដែងអ្នកសារព័ត៌មានបានជួបប្រទះគោយន្តកន្ត្រៃដឹកឈើឈ្លីក(ឃ្លុម)ជាបន្តបន្ទាប់រាប់សិបគ្រឿង នៅចំណុចនិយាមកា 48P 592218 UTM1430366 និងចំណុច48P 594143 UTM1429657 ស្ថិតក្នុងឃុំកំពង់ចាមស្រុកសំបូរខេត្តក្រចេះ។

បើតាមម្ចាស់គោយន្តកន្ត្រៃដឹកឈើនោះបានអះអាងថា ដឹកលក់ឲ្យក្រុមហ៊ុនស៊ីងបាយអូថេក តម្លៃក្នុងមួយម៉ែត្រគូប១០០ដុល្លារ (ស្មើ៤០ម៉ឺនរៀល) គោយន្តកន្ត្រៃដឹកឈើថ្ងៃនេះមានជាង៣០គ្រឿង។ក្នុងនោះមានគោយន្តដឹកឈើទាំងអស់សរុបប្រមាណជាង៣៥០គ្រឿង។

 សេចក្ដីរាយការណ៍បង្ហើបថា ក្រោយមានបណ្ដាញសារព័ត៌មានក្នុងស្រុកជាច្រើនបានធ្វើការចុះផ្សាយពាក់ព័ន្ធ ថាមានមនុស្សរបស់ក្រុមហ៊ុនស៊ីងបាយអូថេក បានកៀងគរប្រជាពលរដ្ឋកាន់រណាយន្តនិងគោយន្តកន្ត្រៃ បន្តលូចចូលទៅកាប់ឈើ និងអារឈើក្នុងតំបន់ព្រៃឡង់ ដឹកចូលលក់ឲ្យក្រុមហ៊ុនស៊ីងបាយអូថេក។

យោងតាមបណ្ដាញព័ត៌មានក្នុងស្រុកថាមានមេឈ្មួញបាននៅពីក្រោយខ្នងឲ្យមនុស្សរបស់ខ្លួនឈរចាំទិញឈើ និងកៀងគរ ប្រជាពលរដ្ឋឲ្យចូលទៅក្នុងព្រៃកាប់ឈើ និងអារឈើ ដើម្បីឲ្យក្រុមហ៊ុនស៊ីងបាយអូថេក។ ជុំវិញការលើកឡើងបែបនេះ សៀមរាបប៉ុស្ដិ៍ នៅមិនទាន់ទទួលបានការបកស្រាយបំភ្លឺពីក្រុមហ៊ុនស៊ីងបាយអូថេក នៅឡើយទេដោយមិនមានលេខទំនាក់ទំនង៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់អញ្ជើញទៅបំពេញទស្សនកិច្ចនៅសាធារណរដ្ឋកូរ៉េ និងធ្វើជាសហប្រធានកិច្ចប្រជុំកំពូលសន្តិភាពពិភពលោកឆ្នាំ២០២២។ នេះបើតាមសេចក្ដីប្រកាសរបស់ក្រសួងការបរទេសនិងសហប្រតិបត្តិការអន្តរជាតិ៕SRP

ខេត្តបាត់ដំបង៖អភិបាលខេត្តបាត់ដំបង លោកសុខ លូ បានថ្លៃប្រាប់សិស្សថា ប្រសិនបើសិស្សានុសិស្ស ឃើញអ្វីមិនប្រក្រតីក្នុងសាលារៀន ឬខាងក្រៅសាលារៀន ដូចជាអំពើហិង្សា ឬការប្រើប្រាស់គ្រឿងញៀនផ្សេងៗ សូមប្រញាប់មករាយការណ៍មកលោកគ្រូ អ្នកគ្រូ នាយកសាលា ឬអាជ្ញាធរមានសមត្ថកិច្ច ជាបន្ទាន់ដើម្បីធ្វើការដោះស្រាយ និងអប់រំពួកគេឲ្យបានទាន់ពេលវេលា ព្រោះពួកគេគឺជាជនរងគ្រោះ ដោយយើងមិនត្រូវទុកចោលឡើយ យើងត្រូវធ្វើការណែនាំ និងអប់រំជាបន្ទាន់ដើម្បីកុំឲ្យហួសពេលវេលា។

លោកក៏បានលើកទឹកចិត្តដល់សិស្សានុសិស្សទាំងអស់ កុំបោះបង់ចោលឲ្យសោះនូវភាសាបរទេស និងកំព្យូទ័រ ដែលជាជំនាញទន់មួយ ព្រោះយើងមិនអាចខ្វះភាសាបរទេស និងកំព្យូទ័របានឡើយ ដោយសារពិភពលោកបច្ចុប្បន្នកំពុងស្ថិតក្នុងសម័យបច្ចេកវិទ្យា និងការទំនាក់ទំនងគ្នាជាអន្តរជាតិ ។ 

លោក សុខ លូ ក៏បានមានប្រសាសន៍កោតសរសើរដល់សិស្សានុសិស្ស ទាំងអស់ដែលបានខិតខំរៀនសូត្រ ទទួលបាននិទ្ទេសល្អៗ ដែលបាននាំយកកិត្តិយស ជូនដល់សាលា គ្រួសារ និងសង្គម ឲ្យកាន់តែមានការរីកចម្រើនលើផ្នែកប្រព័័ន្ធអប់រំ។ 

លោកបានបន្តទៀតថា ចំពោះសិស្សានុសិស្សដែលមិនទទួលបាននិទ្ទេស ល្អប្រសើរ ឬមិនអាចប្រឡងជាប់ការប្រឡងសញ្ញាបត្រមធ្យមសិក្សាទុតិយភូមិ សូមកុំបាក់ទឹកចិត្តឲ្យសោះ ត្រូវតែបន្តខិតខំប្រឹងប្រែងបន្តទៅមុខទៀត ជាពិសេសខិតខំក្រេបយកចំណេះដឹងផ្នែកឧត្តមសិក្សា ដែលជាស្ពានឆ្លងទៅរកភាពមានការងារធ្វើ ទទួលបានប្រាក់កំរៃគ្រប់គ្រងជីវភាព ព្រោះថា មិនថាក្នុងការធ្វើអាជីវកម្ម ឬធ្វើការអ្វីឡើយ ទាមទារឲ្យមាននជំនាញ និងចំណេះដឹងច្បាស់លាស់ ហើយជំនាញ និងចំណេះដឹងទាំងនេះ គឺកើតឡើងដោយសារការខិតខំប្រឹងប្រែង ពិសេសថ្នាក់ឧត្តមសិក្សា ជួនកាលសិស្សានុសិស្សមួយចំនួនមិនសូវពូកែពេលសិក្សាចំណេះដឹងទូទៅ ក៏ប៉ុន្តែពូកែពេលជាឧត្តមសិក្សានៅពេលដែលសិស្សានុសិស្សទាំងនោះបានជ្រើសរើសជំនាញដែលខ្លួនស្រឡាញ់ពេញចិត្ត ។ 

លោកសុខ លូ មានប្រសាសន៍បែបនេះក្នុងឱកាស អញ្ជើញជាអធិបតីភាពក្នុងពិធីប្រគល់រង្វាន់លើកទឹកចិត្ត ដល់សិស្សឆ្នើមនិទ្ទេសA និងនិទ្ទេសB នៃសាលាអន្តរជាតិ USA និងពិធីចែកអំណោយជូនដល់គ្រួសារក្រីក្រចំនួន១១០នាក់នៅថ្ងៃអង្គារ ទី៨ ខែកុម្ភៈ ឆ្នាំ២០២២នេះ៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី០៨ ខែកុម្ភៈ ឆ្នាំ២០២២ បានអញ្ជើញសំណេះសំណាល ជាមួយក្រុមការងារផលិតភាពយន្តភាគរឿង ” កូនប្រុសក្រោមពន្លឺព្រះចន្ទ័ពេញបរមី “។

រឿង ” កូនប្រុសក្រោមពន្លឺព្រះចន្ទពេញបូរណ៌មី ” ដែលពីដំបូងឡើយគ្រោងថតផលិត ភាពយន្តភាគចំនួន ៤៤ភាគ ឥឡូវក្រុមគណៈកម្មការដឹកនាំរឿង បានពង្រីកនូវសេណារីយូដោយបញ្ជូលនូវតួអង្គប្រវត្តិសាស្រ្តមួយចំនួន និងឈុតឆាកថ្មីៗបន្ថែមទៀត ធ្វើឲ្យអត្ថបទភាពយន្តកើនឡើងរហូតដល់៥២ភាគ ក្រោយទទួលបានអនុសាសន៍ណែនាំដ៏ខ្ពង់ខ្ពស់បំផុត ពីសម្តេចតេជោ ហ៊ុន សែន និងដោយមានការផ្ចិតផ្ចង់និងប្រុងប្រយ័ត្នខ្ពស់បំផុត ក្រោមការជួយជ្រោមជ្រែង និងគាំទ្រយ៉ាងពេញទំហឹងពី ឯកឧត្តមនាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង។

នៅក្នុងរបាយការណ៍សង្ខេបស្តីពីវឌ្ឍនភាពការងារ របស់គណៈកម្មការផលិតខ្សែភាគយន្តភាគរឿង កូនប្រុសក្រោមពន្លឺព្រះចន្ទពេញបូរណ៌មី លោក ហ៊ុយ វាសនា អ្នកដឹកនាំរឿង បានឲ្យដឹងថា ក្រោយពីបានទទួលអនុសាសន៍ណែនាំដ៏ខ្ពង់ខ្ពស់បំផុតពី សម្តេចតេជោនាយករដ្ឋមន្រ្តី កាលពីថ្ងៃទី១៣ ខែធ្នូ ឆ្នាំ២០២១ ក្នុងពិធីក្រុងពាលី គណៈកម្មការបានរៀបចំបំពេញបន្ថែមនូវសេណារីយូ ដោយបញ្ចូលតួអង្គប្រវត្តិសាស្រ្តមួយចំនួន និងឈុតឆាកថ្មីៗបន្ថែមមួយចំនួនទៀត ធ្វើឲ្យអត្ថបទភាពយន្តកើនពី៤៤ភាគ ដល់៥២ភាគ ដោយមានការផ្ចិតផ្ចង់ និងប្រុងប្រយ័ត្នខ្ពស់បំផុត ក្រោមការជួយជ្រោមជ្រែង និងគាំទ្រយ៉ាងពេញទំហឹងពី ឯកឧត្តមនាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង បានអនុញ្ញាតឲ្យគណៈកម្មការ បានសាងសង់ទីតាំងសម្រាប់ថតសំខាន់ៗ មួយចំនួន នៅមជ្ឈមណ្ឌលហ្វឹកហ្វឺនភ្នំស្រង់ នៃបញ្ជាការដ្ឋានអង្គរក្ស។

លោក ហ៊ុយ វាសនា បន្តថា ភាពយឺតយ៉ាវនៃការថត ដែលគ្រោងអនុវត្តក្នុងខែមករា ដោយសាទី១) បណ្តាមកពីបញ្ហាជំងឺកូវីដ១៩ និងទី២) គឺពាក់ព័ន្ធទៅនឹងតួអង្គប្រវត្តិសាស្រ្តខ្លះ ដែលត្រូវបំពេញបន្ថែម និងសម្ភារៈមួយចំនួន ត្រូវ ស្វែងរក។ ជារួមការងារផលិតថតភាពយន្តភាគ នឹងចាប់ផ្តើមដំណើរការរបស់ខ្លួន នៅថ្ងៃទី១៥ ខែកុម្ភៈឆ្នាំ២០២២តទៅ ដោយក្រុមការងារ និងសិល្បៈករ សិល្បៈការិនីទាំងអស់ បានរួមគំនិតគ្នាជាធ្លុងមួយ ដើម្បីផលិតខ្សែភាពយន្តភាគប្រវត្តិសាស្រ្តមួយនេះ គោរពជូនសម្តេចទាំងទ្វេ ឲ្យបាន សម្រេចជោគជ័យ ១០០ភាគរយ។

ថ្លែងទៅកាន់គំណៈកម្មការ អ្នកនិពន្ធ អ្នកដឹកនាំរឿង ក្រុមអ្នកបច្ចេកទេសថត និងតួសំដែងទាំងអស់ សម្តេច ហ៊ុន សែន បានធ្វើការក្រើនរំលឹកជាថ្មីម្តងទៀតដល់គណៈកម្មការ អ្នកដឹកនាំ អ្នកនិពន្ធរឿង និងអ្នកបច្ចេកទេសថតទាំងអស់ ត្រូវខិតខំបន្តសិក្សាស្រាវជ្រាវឲ្យកាន់តែស៊ីជំរៅ ថែមទៀត ទាក់ទិនទៅនឹងសាច់រឿង និងទីតាំងប្រវត្តិសាស្រ្ត នៃដំណើររឿង តួសំដែងគ្រប់តួអង្គ ទាំងអស់ ក្នុងភាពយន្តភាគរឿង កូនប្រុសក្រោមពន្លឺព្រះចន្ទពេញបូរណ៌មី ដែលជារឿងភាគមួយ ទាក់ទិនទៅនឹងដំណើរជីវិតពិតរបស់សម្តេច និងសម្តេចកិត្តិព្រឹទ្ធបណ្ឌិត ក្នុងសម័យសង្រ្គាម លុន ណុល រដ្ឋប្រហារទម្លាក់សម្តេចព្រះនរោត្តមសីហនុ ព្រះបរមរតនកោដ្ឋ ការរត់ចូលព្រៃម៉ាកគី សម័យកាលនៃរបបប្រល័យពូជសាសន៍ ប៉ុល ពត ការឆ្លងដែនចូលទៅកាន់ប្រទេសវៀតណាម ដើម្បីស្វែងរកកម្លាំងអ្នកស្នេហាជាតិ មករំដោះប្រទេសចេញ ពីរបបប៉ុលពត ការជួបជុំភរិយាសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្រោយថ្ងៃរំដោះ៧មករា ឆ្នាំ១៩៧៩ ពិសេសទាក់ទិនទៅនឹងជីវិតពិតរបស់សម្តេចផ្ទាល់ ការចាកចេញពី មាតា បិតា បងប្អូនបង្កើតរបស់សម្តេចពីភូមិកំណើត មកស្វែងរកការសិក្សារៀនសូត្រ នៅរាជធានីភ្នំពេញ ការស្នាក់នៅអាស្រ័យជាមួយព្រះសង្ឃក្នុងវត្តនាគវ័ន្ត ដើម្បីការសិក្សាកុំឲ្យល្ងង់ខ្លៅ។

សម្តេចតេជោក៏បានបន្តដាស់តឿនហើយ ដាស់តឿនទៀត ដល់គណៈកម្មការដឹកនាំ អ្នកនិពន្ធរឿង និងអ្នកបច្ចេកទេសថត ត្រូវយកចិត្តទុកដាក់ឲ្យបានហ្មត់ចត់បំផុត ពីតួសំដែងនៃតួអង្គប្រវត្តិសាស្រ្តនិមួយៗ ក្នុងសាច់រឿងកូនប្រុសក្រោមពន្លឺព្រះចន្ទពេញបូរណ៌មី ពិសេសតួអង្គមេបញ្ជាការ សំរេច ដែលឆ្លងកាត់នូវធ្វើពលីកម្មសាច់ស្រស់ ឈាមស្រស់ ឆ្លងកាត់សមរភូមិរាប់មិនអស់ រហូតធ្លាក់ខ្លួនពិការភ្នែក និងតួអង្គអ្នកគ្រូពេទ្យ រ៉ានី ដែលសំដៅទៅលើសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

សម្តេចតេជោបន្តថា ដំណើរសាច់រឿងមួយចំនួនធំ យើងគួរតែចុះថតដោយផ្ទាល់នៅតាមទីតាំងប្រវត្តិសាស្រ្តមួយចំនួន ឯសាច់រឿងមួយចំនួនយើងត្រូវថតក្នុងស្ទីឌីយោ ហើយតួសម្លែងទៀតសោតត្រូវតែមានការហ្វឹកហាត់ បណ្តុះបណ្តាល ឲ្យមានយល់ដឹងច្បាស់លាស់ និងស៊ីជម្រៅទៅនឹងប្រវត្តិសាស្រ្តពិតដែលបានកើតឡើងទាក់ទិនទៅនឹងសាច់រឿងទាំងមូល។

សម្តេចតេជោ ក៏បានជូនពរដល់ក្រុមការងារទាំងអស់ ក៏ដូចជាតួសំដែងសិល្បៈករ សិល្បៈការិនីទាំងអស់ សូមមានជោគជ័យថែមទៀត ក្នុងការថតខ្សែភាពយន្តភាគរឿង កូនប្រុសក្រោមពន្លឺព្រះចន្ទពេញបូរណ៌មី បានចប់សព្វគ្រប់ទៅតាមពេលវេលាដែលបានគ្រោងទុក ដើម្បីបានដាក់បញ្ចាំងឲ្យប្រជាជនកម្ពុជា ក៏ដូចអន្តរជាតិ បានសិក្សាស្វែងយល់ពី ដំណើររឿងប្រវត្តិសាស្រ្តដ៏ល្អឯង និងជាវណ្ណកម្មរបស់កូនខ្មែរ៕SRP

ខេត្តព្រះសីហនុ៖យោងតាមការស៊ើបអង្កេត លើករណីផ្ទុះគ្រាប់​ និងបណ្តាលឲ្យ​ឆេះត្រាក់ទ័រមួយគ្រឿងកំពុងធ្វើការភ្ជួរដី ព្រមទាំងបណ្ដាលឲ្យបុរសម្នាក់ដែលជាអ្នកបើកបររងរបួសធ្ងន់ កាលពីពេលកន្លងទៅ គឺជាការផ្ទុះគ្រាប់មីនតោន ប្រភេទTM-46 ។ 

អង្គភាពសកម្មភាពកំចាត់មីន កម្ពុជា(CMAC) លើកឡងថា៖ កន្លងមក មានមតិខ្លះលើកឡើងថា ជាតំបន់ភ្នំសោះ វាមិនសមមានគ្រាប់មីនតោនទេ? នេះជាការសន្និដ្ឋានមិនត្រឹមត្រូវ ព្រោះថា ករណីសំណល់យុទ្ធភណ្ឌសង្គ្រាមនេះ វាជាមរតកសង្គ្រាម ហេីយគ្រាប់មីនតោនអាចជាសំណល់ពីសង្គ្រាម។ 

អង្គភាពនេះមានបញ្ជាក់បន្ថែមទៀតថា៖ ហេតុដូច្នេះ គ្រាប់មីននេះ​អាចកប់តាំងពី​សម័យ​សង្គ្រាម​​ រវាង​កងទ័ព​ខែ្មរក្រហម និង​ទាហានសាធារណរដ្នខ្មែរ​។ អ្វីដែលជាភស្តុតាង គឺតំបន់នេះ​ជា​អតីត​បន្ទាយទាហានលន់ ណុល មាន​ចំនួន​ដល់ទី​បីទីតាំង។ ចំពោះស្ថានភាពដីនៃទីកន្លែងផ្ទុះ គឺជាដីស្រែ​ដែលបានភ្ជួរដោយនង្គ័លផាល ៧ ចំនួន ៦លេីករួចមកហើយ ហេីយលេីកនេះ កសិករបាន​ប្តូរទៅប្រើ​​នង្គ័លផាល៣ដើម ដើម្បីភ្ជួរ មានជំរៅជ្រៅ ទើបដល់ជម្រៅមីនដែលបក់ក្នុងដី បណ្តាលឲ្យផ្ទុះតែម្តង។

គួរបញ្ជាក់ផងដែរថា៖ ករណីផ្ទុះសំណល់យុទ្ធភណ្ឌពីសង្រ្គាម បណ្តាលឲ្យ បុរសម្នាក់ដែលបើកត្រាក់ទ័រភ្ជួរដីម្នាក់រងរបួសធ្ងន់ និងត្រាក់ទ័រមួយគ្រឿងឆេះខូចខាតស្ទើរទាំងស្រុង កាលពីវេលាម៉ោង ៩និង៣០នាទីព្រឹក ថ្ងៃទី ៣ ខែកុម្ភ: ឆ្នាំ ២០២២ កន្លងទៅ នៅភូមិ១ ឃុំអូរត្រេះ ស្រុកស្ទឹងហាវ ខេត្តព្រះសីហនុ។ អ្នករងរបួសមានឈ្មោះគឹម ហុីម អាយុប្រមាណជាង៣០ឆ្នាំ មានស្រុកកំណើតនៅស្រុកកោះសូទិន ខេត្តកំពង់ចាម។ ជនរងគ្រោះត្រូវបានគេបញ្ជូនទៅសង្រ្គោះ​បន្ទាន់​នៅគ្លីនិចសេតេ ខេត្តព្រះសីហនុ។ 

ទោះជាយ៉ាងណាបន្ទាប់កើតមានហេតុការណ៍នេះឡើង អង្គភាពសកម្មភាពកំចាត់មីន កម្ពុជា(CMAC) បានដាក់ផែនការបញ្ជូនកម្លាំងទៅបោសសំអាត រំដោះផ្ទៃដី​ចម្ការ​មីន​នៅ ខេត្តព្រះសីហនុ ឲ្យអស់ នៅក្នុងឆ្នាំ២០២២ នេះ សំដៅ​ប្រែក្លាយខេត្តព្រះសីហនុ ឱ្យទៅជាខេត្តដែលគ្មានការភ័យខ្លាច ដោយសារគ្រាប់មីនបន្តទៅទៀតឡើយ ព្រោះថាខេត្តនេះជាខេត្តប៉ូលសេដ្ឋកិច្ចកម្ពុជាមួយផងដែរ៕SRP

ភ្នំពេញ៖លោកសុខ ប្រសិទ្ធិ បានសង្កត់ធ្ងន់ថា ព្រះរាជាណាចក្រកម្ពុជា កំពុងគោរពយ៉ាងពេញលេញនូវ សិទ្ធិមនុស្ស សិទ្ធិបញ្ចេញមតិ និងសេរីភាពនៃការបញ្ចេញមតិ ដែលមានចែងក្នុងធម្មនុញ្ញអង្គការសហប្រជាជាតិ សេចក្តីប្រកាស ជាសកលស្តីពីសិទ្ធិមនុស្ស និងសន្ធិសញ្ញា និងអនុសញ្ញាទាំងអស់ដែលទាក់ទង នឹងសិទ្ធិមនុស្ស សិទ្ធិស្ត្រី និងសិទ្ធិកុមារ។ 

លោកសុខ ប្រសិទ្ធិ បានបញ្ជាក់ថា ក្រសួងព័ត៌មាន ក្រោមការដឹកនាំ របស់ឯកឧត្តម រដ្ឋមន្ត្រីខៀវ កាញារីទ្ធ តែងយកចិត្តទុកដាក់ និងជួយសម្របសម្រួលបណ្តុះបណ្តាលផ្សព្វផ្សាយដល់អ្នកសារព័ត៌មាន ដើម្បីអាចធានា បានការអនុវត្តសិទ្ធិសេរីភាព បញ្ចេញមតិនៅកម្ពុជា ប្រកបដោយប្រសិទ្ធិភាព និងស្របតាមច្បាប់ជាធរមាន។ ក្រសួងបានបានបង្កើតគណៈកម្មការនីតិកម្ម និងក្រុមមេធាវីប្រចាំ ក្រសួងព័ត៌មាន ដែលសុទ្ធតែជាអង្គភាពជំនាញក្នុងការ អនុវត្តភារកិច្ចដោះស្រាយ និងគាំទ្រផ្នែកច្បាប់ដល់ អ្នកសារព័ត៌មាន។ 

លោកបានគាំទ្រចំពោះរបាយការណ៍ របស់អង្គការ និងបានផ្តល់មតិណែនាំបន្ថែម សម្រាប់បន្តកិច្ចខិតខំប្រឹងប្រែង ក្នុងការរៀបចំគម្រោង បណ្តុះបណ្តាល អំពីច្បាប់ស្តីពីរបបសារព័ត៌មាន និងច្បាប់ដទៃទៀត ឱ្យមាន សង្គតិភាព និងកិច្ចសហការជាមួយក្រសួងព័ត៌មាន ដើម្បីចូលរួមលើកស្ទួយ សមត្ថភាពរបស់ អ្នកសារព័ត៌មាន ក៏ដូចជាការពារសិទ្ធិសេរីភាព ដែលកំណត់ដោយច្បាប់ធរមាន។

លោក សុខ ប្រសិទ្ធិ រដ្ឋលេខាធិការ និងជាប្រធានគណៈកម្មាធិការនីតិកម្ម នៃក្រសួងព័ត៌មាន មានប្រសាសន៍យ៉ាងដូច្នេះ ក្នុងឱកាសបើកកិច្ចប្រជុំជាមួយអង្គការជំនួយផ្នែកច្បាប់នៃកម្ពុជា ដើម្បីពិភាក្សាលើគម្រោងបណ្តុះបណ្តាលច្បាប់ស្តីពីរបបសារព័ត៌មាន និងច្បាប់ដទៃទៀតដល់អ្នកសារព័ត៌មាន នៅថ្ងៃទី៨ ខែកុម្ភៈ ព្រឹកមិញនេះ នៅសាលប្រជុំព្រះវិហារ ទីស្តីការក្រសួង។     

បើតាមលោក ស៊ឹង ម៉ុនវិចិត្រ ប្រធានគម្រោងអង្គការជំនួយផ្នែកច្បាប់នៃកម្ពុជា បានលើកឡើងថាអង្គការជំនួយផ្នែកច្បាប់នៃកម្ពុជា គឺជាអង្គការក្រៅរដ្ឋាភិបាល ដែលផ្តោតយកចិត្តទុកដាក់ដល់ជនក្រីក្រនៅប្រទេសកម្ពុជា លើសេវាកម្មច្បាប់។ កន្លងមកអង្គការបានជួយសេវាកម្មច្បាប់ដល់ស្ត្រី កុមារ  និងអ្នកសារព័ត៌មាន នៅកម្ពុជា ដែលបានចាប់ផ្តើមគម្រោងនៅឆ្នាំ២០១៩ ហើយនឹងបញ្ចប់ដំណាក់ កាលទី១ នៅខែឧសភា ឆ្នាំ២០២២ខាងមុខនេះ។ សកម្មភាពគោលមួយចំនួន ដែលអង្គការបានអនុវត្តទាក់ទង នឹងសេវាកម្ម ផ្នែកច្បាប់រួមមាន ការរៀបចំសិក្ខាសាលាដល់អ្នកសារព័ត៌មាន ប្រជុំជាមួយ អង្គភាពពាក់ព័ន្ធនៅតាមបណ្តាខេត្ត និងការពារក្តី ពិគ្រោះយោបល់ដល់អ្នកសារ ព័ត៌មាន។ អង្គការបានចូលរួមលើកកម្ពស់ការផ្សព្វផ្សាយរបស់អ្នកសារព័ត៌មាន ប្រកបដោយក្រមសីលធម៌វិជ្ជាជីវៈ ស្របតាមច្បាប់ និងបទ ដ្ឋានគតិយុត្ត។ 

លោកប្រធានគម្រោង បានសំណូមពរដល់ ក្រសួងព័ត៌មាន ក្នុងការអនុញ្ញាតដល់អង្គការដើម្បីអាចចូលរួមក្នុងកម្មវិធីនានា ទាក់ទង នឹងអ្នកសារព័ត៌មាន និងស្នើសុំកិច្ចសម្របសម្រួល និងសហការអនុវត្តគម្រោង របស់អង្គការនៅតាមបណ្តាខេត្ត ជាមួយនឹងមន្ទីរព័ត៌មាន។

 អង្គការជំនួយផ្នែកច្បាប់នៃកម្ពុជា គឺជាអង្គភាពដែលបំពេញតួនាទីក្នុងការ ផ្តល់ប្រឹក្សា និងជំនួយផ្នែកច្បាប់ដល់ អ្នកសារព័ត៌មាន ហើយតាមរយៈលិខិត ស្នើសុំមកក្រសួងព័ត៌មាន ដើម្បីស្នើសុំកិច្ចសម្របសម្រួលលើការអនុវត្តគម្រោង បណ្តុះបណ្តាលច្បាប់ស្តីពីរបបសារព័ត៌មាន និងច្បាប់ដទៃទៀតដល់ អ្នកសារព័ត៌មាន និងអនុវត្តតាម គោលការណ៍ណែនាំរបស់ ឯកឧត្តម រដ្ឋមន្ត្រី និងគណៈកម្មាធិការនីតិកម្ម នៃក្រសួងព័ត៌មាន៕SRP