ភ្នំពេញ៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី ២៦ ខែកក្កដា ឆ្នាំ២០២១នេះ បានផ្ញើសារលិខិតចូលរួមរំលែកទុក្ខជូន លោកស្រី Laurette STEENSSENS (MD) ប្រធាន សមាគមជាតិកាកបាទក្រហមបែលហ្សិក ចំពោះគ្រោះទឹកជំនន់យ៉ាងគំហុកនៅភាគអាគ្នេយ៍នៃប្រទេសបែលហ្សិក។
ក្នុងសារលិខិតរំលែកទុក្ខរបស់សម្តេចកិត្តិព្រឹទ្ធបណ្ឌិត បានបញ្ជាក់ថា៖ «ខ្ញុំពិតជាមានក្តីក្រៀមក្រំជាខ្លាំងនៅពេលបានទទួលដំណឹងថា ប្រជាជនចំនួន២០នាក់ បានបាត់បង់ជីវិត ជាច្រើននាក់ទៀតកំពុងបាត់ខ្លួន និងរាប់ម៉ឺននាក់ទៀត ត្រូវបានជម្លៀសទៅកាន់ទីជំរក ដោយសារតែទឹកជំនន់យ៉ាងគំហុកនៅភាគអាគ្នេយ៍នៃប្រទេសបែលហ្សិក កាលពីថ្ងៃទី ១៥ ខែកក្កដា ឆ្នាំ២០២១ កន្លងមក។»
សម្តេចប្រធានកាកបាទក្រហមកម្ពុជា បានបន្ថែមថា ៖ «ក្នុងព្រះបរមនាម សម្តេចព្រះមហាក្សត្រី នរោត្តម មុនិនាថ សីហនុ ព្រះប្រធានកិត្តិយសកាកបាទក្រហមកម្ពុជា ក្នុងនាមកាកបាទក្រហមកម្ពុជា និងសហការី និង ក្នុងនាមខ្លួនខ្ញុំផ្ទាល់ ខ្ញុំសូមចូលរួមរំលែកទុក្ខ និងផ្ញើជូននូវសមានចិត្តអាណិតអាសូរយ៉ាងក្រៃលែងចំពោះ លោកស្រី ឡូរ៉េត ស្ទីនសេន ចំពោះសមាគមជាតិកាកបាទក្រហមបែលហ្សិក និងប្រជាជនបែលហ្សិក ជាពិសេសចំពោះក្រុមគ្រួសារអ្នករងគ្រោះ និងអ្នកដែលបានបាត់បង់មនុស្សជាទីស្រឡាញ់របស់ខ្លួន។ ខ្ញុំសូមបួងសួងឲ្យអ្នករងរបួសឆាប់ជាសះស្បើយ សូមឲ្យការរុករកអ្នកបាត់ខ្លួនឆាប់រកឃើញ និងសូមជូនពរជោគជ័យក្នុងការស្តារឡើងវិញតំបន់ទាំងឡាយដែលខ្ទេចខ្ទាំដោយទឹកជំនន់ខាងលើនេះ។»
ខាងក្រោមនេះ ជាខ្លឹមសារទាំងស្រុងនៃសារលិខិតរំលែកទុក្ខរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្ញើជូន លោកស្រី Laurette STEENSSENS (MD)៖
«សម្ដេច តេជោហ៊ុន សែន ចុះជួបប្រជាពលរដ្ឋនាពេលកន្លង»
ភ្នំពេញ៖លោកតា លោកយាយ មានអាយុជាង ១០០ឆ្នាំ ដែលបានស្ម័គ្រចិត្តចាក់វ៉ាក់សាំងការពារជំងឺកូវីដ-១៩ ចំនួន ៣នាក់ បានទទួលអំណោយរបស់សម្ដេច ហ៊ុន សែន នាយករដ្ឋមន្ត្រី ក្នុងម្នាក់ទទួលបានថវិកាចំនួន ៣លានរៀល និងសម្ភារជាគ្រឿងឧបភោគ បរិភោគមួយចំនួនទៀត។
ការទទួលបានអំណោយ នៅថ្ងៃចន្ទ ទី២៦ ខែកក្កដា ឆ្នាំ២០២១នេះ តាមរយៈ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩។
សូមជម្រាបថាការផ្ដល់អំណោយពីសំណាក់សម្ដេចតេជោ ហ៊ុន សែន ជូនលោកយាយ លោកតា មានវ័យជាង១០០ឆ្នាំនេះ មិនមែនទើបតែជាលើកទី១នោះទេ ពោលគឺកន្លងមក សម្ដេចតេជោ ក៏ធ្លាប់ផ្ដល់អំណោយជាថវិកា និងសម្ភារដល់លោកយាយ លោកតា ដែលបានស្ម័គ្រចិត្ត ចាក់វ៉ាក់សាំងការពារជំងឺកូវីដ-១៩រួចផងដែរ។
ក្នុងនោះពលរដ្ឋដែលបានទទួលការចាក់វ៉ាក់សាំងបង្ការជំងឺ១៩ នៅលេខរៀង ទី១លានដូស រហូតដល់ទី៦លានដូស ក៏បានទទួលអំណោយថវិកានិងសម្ភារពីសម្ដេចហ៊ុន សែន ប្រមុខដឹកនាំកម្ពុជាផងដែរ៕SRP
លោក សំ សុខហេន «រូបភាពពេលផ្ដល់បទសម្ភាសន៍ដល់អ្នកសារព័ត៌មាន នៅថ្ងៃទី២៥ខែកក្កដាឆ្នាំ២០២១ ម្សិលមិញ»
ខេត្តសៀមរាប៖លោកសំ សុខហេន ដើមបណ្តឹងឧទ្ធរណ៍ បានអះអាងថា ថៅកែ គ្លីនិកឯកជនយីហោ ស៊ឹង រិទ្ធីរ៉េត ពិតជារំលោភលើទំនុកចិត្ត ក្នុងការទិញផ្ទះធ្វើគ្លីនិក លើទំហំទឹកប្រាក់ ២៣៥ ០០០ ដុល្លារ។ ករណីនេះ រូបលោកនឹងស្វាគមន៍តាមផ្លូវច្បាប់ ប្រសិនលោកស៊ឹង រិទ្ធីរ៉េត ប្តឹងរូបលោកព្រោះតែផ្តល់ព័ត៌មានពិត ដល់អ្នកសារព័ត៌មានសម្រាប់ចុះផ្សាយ។
លោកវរសេនីយ៍ទោ សំ សុខហេន នាយរងការិយាល័យ បច្ចេកទេសវិទ្យាសាស្ត្រ ខេត្តសៀមរាបនៅថ្ងៃទី២៦ ខែកក្កដា ឆ្នាំ២០២១នេះ បានផ្តល់បទសម្ភាសន៍ថា៖ ថ្មីៗនេះ មានបណ្តាញសង្គមមួយ បានស្រង់សម្ដី លោកស៊ឹង រិទ្ធីរ៉េត ថៅកែគ្លីនិកឯកជន យីហោស៊ឹង រិទ្ធីរ៉េត និងមានឋានៈជាអនុប្រធានមន្ទីរសុខាភិបាលខេត្តសៀមរាប យកទៅផ្សាយថា៖ លោកស៊ឹង រិទ្ធីរ៉េត នឹងពិចារណាប្តឹងរូបលោក បើនៅតែផ្តល់ព័ត៌មាន ដល់អ្នកសារព័ត៌មាន អោយចុះផ្សាយប៉ះពាល់ដល់កិត្តិយសរបស់គាត់។
លោកវរសេនីយ៍ទោ សំ សុខហេន បានបន្តថា ក្នុងដំណើររឿង កាលថ្ងៃទី៣១ខែឧសភា ឆ្នាំ ២០១៩ រូបលោកនិងឪពុក រួមទាំងចុងបណ្តឹង បានព្រមព្រៀងគ្នាទិញដីនិងផ្ទះមួយកន្លែង ក្នុងភូមិវត្តបូព៌ សង្កាត់សាលាកំរើក ក្រុងសៀមរាប ដែលមានតម្លៃ៥៦ម៉ឺនដុល្លារ ។ ក្នុងនោះរូបលោកមានចំណែក២៥គាគរយ ឪពុក២៥ ភាគរយ ហើយចុងបណ្តឹង៥០ភាគរយ ដោយស្រាក់គ្នាខ្ចីលុយពីធនាគារ។ ក្រោយពេលទិញហើយក៏មានជនបរទេស មករកទិញវិញ ដោយអោយតម្លៃ៩៦ម៉ឺនដុល្លារ តែពួកគាត់ទាំង៣ភាគហ៊ុន សម្រេចមិនលក់ ដោយព្រមព្រៀងជួលអោយចុងបណ្តឹងធ្វើជាគ្លីនិកតម្លៃក្នុង១ខែ៣០០០ដុល្លារ។ ក្នុងពេលព្រមព្រៀងគ្នា ចុងបណ្តឹងក៏បានរៀបចំជួសជុលហើយបង្កើតជាគ្លីនិកតែម្តង។ ក្នុងកំឡុងពេលដំណើរការជួសជុល រូបលោកបានធ្វើលិខិតមួយច្បាប់បញ្ជាក់ពីចំណែកហ៊ុនទាំង៣ និងកិច្ចសន្យាជួល។ ប៉ុន្តែក្នុងពេលអោយលិខិតទៅចុងបណ្តឹងផ្តិតមេដៃ ចុងបណ្តឹងចេះតែពន្យាពេល រហូតចុងក្រោយឆ្លើយតបមកវិញថា ដីផ្ទះរបស់គាត់ ឈ្មោះកម្មសិទ្ធិរបស់គាត់ ខ្ចីធនាគារក៏ឈ្មោះរបស់គាត់ តើ មានរឿងអីត្រូវគាត់ផ្តិតមេដៃជួលនិងចែកភាគហ៊ុន។
លោកសំ សុខហេន បានអោយដឹងទៀតថា បន្ទាប់ពីចុងបណ្តឹងឆ្លើយថា ដីផ្ទះនោះជារបស់គាត់តែម្នាក់ឯង រូបលោកបានដាក់ពាក្យប្តឹងទៅតុលារការសៀមរាប ដោយចោទពីបទ រំលោភលើទំនុកចិត្ត។ តែនៅថ្ងៃទី២៤ ខែមិថុនា ឆ្នាំ២០២១នេះ សាលាដំបូងខេត្តសៀមរាប សម្រេចតម្កល់រឿងឥតចាត់ការ។
លោកសំ សុខហេន បានបញ្ជាក់ទៀតថា ក្នុងការព្រមព្រៀងទិញដីនិងផ្ទះចូលគ្នា៣ចំណែក ឯខ្ចីលុយធនាគារក៏ខ្ចីទាំង៣ចំណែក ហើយបង់ប្រាក់សងធនាគារវិញក៏៣ចំណែកដូចគ្នា។ គ្រាន់តែអោយចុងបណ្តឹងជាអ្នកចេញមុខដាក់ឈ្មោះទិញ និងចេញមុខខ្ចីធនាគារ ព្រោះរូបគាត់ជាបងនិងជាកូនរបស់សហភាគហ៊ុន។ តែរូបលោកនិងឪពុកដែលជាម្ចាស់ភាគហ៊ុន មានឯកាសារទូទាត់ប្រាក់ទៅធនាគារ និងទៅចុងបណ្តឹងទាំងអស់។ ក្នុងនោះសម្រាប់រូបលោកដែលមានចំណែក២៥ភាគរយ គឺស្មើទឹកប្រាក់ ២៣៥ ០០០ដុល្លារ។
លោកសំ សុខហេន បានបញ្ជាក់បន្ថែមទៀតថា ដំណើររឿងដែលនាំអោយឈានដល់ប្តឹងផ្តល់នេះ គឺដំបូងឡើយលោកស៊ឹង រិទ្ធីរ៉េត មកទាមទារអោយរូបលោកដកភាគហ៊ុនចេញនិងទទួលយកប្រាក់៥០០០ដុល្លារ។ លុះពេលរូបលោកមិនព្រម ក៏ឈប់ជួលផ្ទះអោយលោកទាំងមិនទាន់ចប់កុងត្រា ហើយប្តឹងទារសំណងជាង១០ម៉ឺនដុល្លារ តែសាលាឧទ្ធរណ៍ សម្រេចអោយលោកជាអ្នកឈ្នះក្តី។
លោកបញ្ជាក់ថា រឿងក្តីដែលរូបលោកផ្តល់បទសម្ភាសន៍នេះ គឺជាការពិតទាំងអស់ ហើយបើលោកស៊ឹង រិទ្ធីរ៉េត យល់ថាផ្តល់ព័ត៌មានមិនពិត សូមប្តឹងលោកចុះ លោកចាំស្វាគមន៍តាមផ្លូវច្បាប់។ ក្រៅពីនោះបើលោក ស៊ឹង រិទ្ធីរ៉េត និងប្រពន្ធ ហ៊ានទៅស្បថនៅមុខព្រះអង្គចេកព្រះអង្គចម ឬវត្តកម្ម ដោយធ្វើតាមបែបប្រពៃណីខ្មែរ រួមជាមួយរូបលោកផង នោះរូបលោកសុខចិត្តដកពាក្យបណ្តឹងចេញទាំងអស់ ហើយលុយភាគហ៊ុន២៥ភាគរយ ស្មើ២៣៥ ០០០ដុល្លារ សុខចិត្តចោលដោយប្រគល់អោយលោកស៊ឹង រិទ្ធីរ៉េត។
ជុំវិញការចោទប្រកាន់នេះ អ្នកសារព័ត៌មាន មិនអាចស្វែងរកជួបលោកស៊ឹង រិទ្ធីរ៉េត ម្ចាស់គ្លីនិកយីហោ ស៊ឹង រិទ្ធីរ៉េត និងជាអនុប្រធានមន្ទីរសុខាភិបាលខេត្ត សៀមរាប ដើម្បីសុំការបកស្រាយបានទេ នៅព្រឹកថ្ងៃទី២៦ ខែកក្កដាឆ្នាំ២០២១នេះ។ ប៉ុន្តែលោកស៊ឹង រិទ្ធីរ៉េត ធ្លាប់បានផ្តល់បទសម្ភាសន៍ ដោយផ្ទាល់ កាលពីថ្ងៃទី២០ ខែកក្កដា ឆ្នាំ២០២១ ថា រូបលោកជាម្ចាស់កម្មសិទ្ធិដីនិងផ្ទះដោយមានឯកសារ ហើយក៏ជាអ្នកខ្ចីធនាគារដោយផ្ទាល់ផងដែរ។ រឿងបុគ្គលដើមចោទអះអាងយ៉ាងណានោះ គឺជាការប្រឌិតព្រោះតែចង់បានទ្រព្យរបស់លោកតែប៉ុណ្ណោះ។ សម្រាប់លោក គឺមិនបរិយាយវែងទេ ពីព្រោះសំអាងលើឯកសារ ម្យ៉ាងវិញទៀត តុលាការបាន សម្រេចតម្កល់រឿងឥតចាត់ការរួចទៅហើយ។
ទោះជាយ៉ាងណា លោកសំ សុខហេន បញ្ជាក់ថា ព្រោះតែហេតុផលបែបនេះ រូបលោកសម្រេចប្តឹងទៅសាលាឧទ្ធរណ៍ ហើយរំពឹងថា នឹងទួលបានភាពយុត្តិធម៌មកវិញសម្រាប់រូបលោក។
ករណីនេះមហាជននៅក្នុងខេត្តសៀមរាប នៅតែរងចាំមើលថា តើរឿងក្តីដែលមានទំហំទឹកប្រាក់រហូតជាង២៣ម៉ឺនដុល្លារនេះ ទៅជាយ៉ាងណា បើម្ខាងជានគរបាល ចំណែកឯម្ខាងទៀត ជាមន្ត្រីមានមុខមាត់ ពិសេស ជាថៅកែគ្លីនិកដ៏ល្បីល្បាញប្រចាំខេត្តសៀមរាបផងដែរ៕SRPដោយ កញ្ញា ស្រីណុច
សំឡេង លោកសំ សុខហេន អះអាងប្រាប់អ្នកសារព័ត៌មាន
ភ្នំពេញ៖សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តបាត់ដំបង និងព្រៃវែង បានថ្លែងថា រាជរដ្ឋាភិបាលកម្ពុជា បានយកចិត្តទុកដាក់លើកកម្ពស់ ការអប់រំនៅកម្ពុជា ឱ្យកាន់តែមានប្រសិទ្ធភាព និងលទ្ធផលខ្ពស់ ហើយជាមួយគ្នានេះ ក៏បានដាក់ចេញគោលនយោបាយជាតិ ស្ដីពីការអប់រំមួយជីវិត ដែលក្លាយជាប្រធានបទដ៏សំខាន់នៅកម្ពុជា ជាមួយនឹងការលើកទឹកចិត្ត ឱ្យមានការសិក្សាភាសាបរទេសគ្រប់កម្រិត និងអនុញ្ញាតឱ្យវិស័យឯកជនបើកការបណ្ដុះបណ្ដាល ទាំងភាសាបរទេស ចំណេះដឹងទូទៅ និងការបណ្ដុះបណ្ដាលលើជំនាញវិជ្ជាជីវៈ។
សម្ដេច ស ខេង ក៏បានគូសបញ្ជាក់អំពីគុណតម្លៃស្មើគ្នារវាងអ្នករៀនចំណេះដឹងទូទៅថ្នាក់បរិញ្ញបត្រ ឬក្រោយបរិញ្ញាបត្រ និងអ្នករៀនជំនាញវិជ្ជាជីវៈ និងបានបន្ថែមក្នុងន័យដើមថា« អ៊ីចឹងហើយបានជាខ្ញុំនិយាយថារវាងអ្នកដែលមានទ្រឹស្ដី មានទស្សនទាន ការយល់ដឹង គឺជាការចាំបាច់ ប៉ុន្តែអ្នកមានជំនាញ មានបទពិសោធន៍គឺជាបញ្ហាដ៏សំខាន់មិនអាចខ្វះបាន ហើយបើបូកចំណុចទាំងនេះជាមួយគ្នាវានឹងធ្វើមនុស្សហ្នឹងកាន់តែខ្លាំង បើបូកទាំងលក្ខណសម្បត្តិរបស់មនុស្សទៀតនោះ»។
សម្ដេច ស ខេង ថ្លែងយ៉ាងដូច្នេះនៅថ្ងៃអាទិត្យទី២៥ ខែកក្កដា ក្នុងឱកាសអញ្ជើញជាអធិបតីក្នុងពិធីបិទកម្មវិធី«វោហារឆ្នើម»ខេត្តបាត់ដំបង ការប្រកួតប្រជែងនិយាយភាសាអង់គ្លេសជាសាធារណៈ វគ្គផ្ដាច់ព្រ័ត្រ តាមប្រព័ន្ធវីដេអូសន្និសីទZoom។
សម្ដេច ស ខេង បានបន្តថា ការរៀនភាសាអង់គ្លេស ឬភាសាបរទេស និងការបង្កើតកម្មវិធីប្រកួតប្រជែង ដូចកម្មវិធី វោហាឆ្នើម នេះ មិនមែនជាការផ្ដល់តម្លៃដល់ភាសាបរទេស ហើយមើលរំលងភាសាជាតិនោះទេ។ សម្ដេចបានបន្តថា«ភាសាខ្មែរយើង កើតមកគឺចេះហើយ បញ្ហាគឺចេះតែនិយាយ តែមិនចេះអាន និងចេះសរសេរដែលយើងមានការអប់រំបណ្ដុះបណ្ដាលហើយ មានន័យថា បន្ទាប់ពីភាសាកំណើត ការចេះភាសាបរទេសកាន់តែច្រើនកាន់តែល្អ ទោះជាភាសាបរទេសនោះជាភាសាប្រទេសសត្រូវរបស់យើងក៏ដោយ សំខាន់គឺភាសាបរទេសដែលប្រើជាអន្តរជាតិ និងចេះប្រើភាសាប្រទេសជិតខាង»។
សម្ដេច ក៏បានផ្ដល់អនុសាសន៍ឱ្យពិនិត្យលទ្ធភាព រៀបចំបើកការប្រកួតកម្មវិធី វោហារឆ្នើម លើភាសាចិនមួយទៀត ដោយសម្ដេចបានសង្កត់ធ្ងន់ថាបច្ចុប្បន្ន ភាសាបរទេសដែលមានមនុស្សជាតិប្រើប្រាស់ច្រើនជាងគេ និងកំពុងមានឥទ្ធពលដូចភាសាអង់គ្លេសដែរនោះ គឺភាសាចិន ហើយថាភាសាចិននេះក៏កំពុងមានតម្រូវការខ្ពស់ទាំងទីផ្សារការងារក្រៅប្រទេស និងក្នុងប្រទេសកម្ពុជាតែម្ដង។ សម្ដេចក៏បានឱ្យណែនាំឱ្យយកបទពិសោធន៍នៃរៀបចំកម្មវិធី វោហារឆ្នើម នៅព្រៃវែង និងបាត់ដំបង រៀបចំកម្មវិធីវោហារឆ្នើម នៅខេត្តបន្ទាយមានជ័យឱ្យបានកាន់តែល្អបន្ថែមទៀត។
សម្ដេច ក៏បានផ្ដល់ការលើកទឹកចិត្តដល់បេក្ខជនដែលមិនជាប់ជ័យលាភី ដោយសម្ដេចបានសង្កត់ធ្ងន់ថា«នេះមិនមែនជាការបរាជ័យទេ ព្រោះការបរាជ័យលើកដំបូង គឺជាការចាប់ផ្ដើមឈានទៅរកជោគជ័យ សូមកុំទំលាក់ចោលក្ដីសង្ឃឹម ដ្បិតយ៉ាងហោចណាស់យើងមានមេរៀន និងបទពិសោធន៍ថ្មីមួយសម្រាប់ការដណ្ដើមយកជោគជ័យនៅថ្ងៃខាងមុខ។ ចំណែកអ្នកជោគជ័យក៏ត្រូវបន្តការខិតខំដើម្បីសម្រេចគោលដៅដែលខ្លួនចង់បាននាពេលអនាគត។ គឺគោលដៅដែលអាចជាការទទួលបានការងារសមស្របនឹងសមត្ថភាព ហើយទទួលបានកម្រៃសមនឹងការងារ ទាំងវិស័យឯកជន និងសាធារណៈ»។
សូមបញ្ជាក់ថាសម្រាប់កម្មវិធី«វោហារឆ្នើម»ខេត្តបាត់ដំបង ការប្រកួតប្រជែងនិយាយភាសាអង់គ្លេសជាសាធារណៈ វគ្គផ្ដាច់ព្រ័ត្រនាថ្ងៃនេះ ជ័យលាភីលេខ១ វិញ្ញាសារឯកបុគ្គលបានទៅលើបេក្ខនារី San Nika Marie លេខ២ បានទៅលើបេក្ខនារី Heang Kemhouy។ ចំណែកម្ចាស់ជ័យលាភីលេខ១ វិញ្ញាសារជជែកជាក្រុមបានទៅលើក្រុមបេក្ខជន Seng Maomeng បេក្ខនារី Mony Marida បេក្ខនារី Pov Viriya និងលេខ២ បានទៅលើក្រុមបេក្ខនារី Chhor Youkheng បេក្ខនារី Pa Sopheavoleak និងបេក្ខនារី Lim Kunthea៕SRP
ភ្នំពេញ៖លោកហ៊ុន ម៉ានី ប្រធានសហភាពសហព័ន្ធយុវជនកម្ពុជា បានបង្ហោះសារ សូមអរគុណជប៉ុន ដែលបានផ្តល់វ៉ាក់សាំង អាស្ត្រាហ្សេនីកា ១លានដូស ដល់កម្ពុជា។
នៅលើគណនីហ្វេសប៊ុក លោកហ៊ុន ម៉ានី បានសរសេរថា៖សូមអរគុណដល់រដ្ឋាភិបាល និងប្រជាជនជប៉ុនដែលបានផ្តល់វ៉ាក់សាំងប្រឆាំងជំងឺកូវីដ១៩ អាស្ត្រាហ្សេនីកា (AstraZeneca) ចំនួនសរុប ១លានដូស ដល់រាជរដ្ឋាភិបាល និងប្រជាជនកម្ពុជា។
ថ្មីៗនេះ វ៉ាក់សាំងប្រឆាំងជំងឺកូវីដ១៩ អាស្ត្រាហ្សេនីកា (AstraZeneca) ចំនួន៣៣ម៉ឺនដូស បានមកដល់ប្រទេសកម្ពុជា ដែលជាជំនួយរបស់មិត្តជប៉ុន បន្ទាប់ពីរដ្ឋាភិបាលជប៉ុន កាលពីថ្ងៃទី១៣ ខែកក្កដា កន្លងទៅនេះ បានប្រកាសជូនជាជំនួយចំនួនសរុប ១លានដូស ដល់រាជរដ្ឋាភិបាល និងប្រជាជនកម្ពុជា។
លោកហ៊ុន ម៉ានី បានសរសេរបន្តថា៖ អ្វីដែលយើងទទួលបានបន្ថែមនៅពេលនេះ គឺស្តែងចេញពីទំនាក់ទំនង ដ៏ស្អិតរមួតរវាងប្រទេសទាំងពីរ ក៏ដូចជាចេញពីការខិតខំប្រឹងប្រែងស្វែងរក និងបញ្ជាទិញវ៉ាក់សាំងចាក់ជូនប្រជាជន រួមជាមួយនយោបាយនានា របស់រាជរដ្ឋាភិបាលកម្ពុជា ដែលផ្តល់អាទិភាពចំពោះសុខុមាលភាពប្រជាពលរដ្ឋ។
ជាក់ស្តែង ប្រមុខរាជរដ្ឋាភិបាល សម្តេចតេជោហ៊ុន សែន នាយករដ្ឋមន្ត្រី បានមានប្រសាសន៍ថា រាជដ្ឋាភិបាលកម្ពុជា ក៏បានដាក់ចេញនូវយុទ្ធសាស្ត្រចំនួន ០៦ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ រួមមាន៖
(១)បន្តទប់ស្កាត់ការនាំចូលនូវមេរោគកូវីដ-១៩ បំប្លែងថ្មី
(២)កាត់បន្ថយទំហំតំបន់ឆ្លង និងចំនួនឆ្លងឱ្យមានកម្រិតទាប
(៣)បន្តខិតខំព្យាបាលអ្នកឆ្លងឱ្យបានជាសះស្បើយ និងកាត់បន្ថយអត្រាអ្នកស្លាប់ (៤)រុករក និងគ្រប់គ្រងករណីពាក់ព័ន្ធនឹងជំងឺកូវីដ-១៩
(៥)ការរៀបចំបូជាសពនិងបញ្ចុះសពអ្នកស្លាប់ឱ្យបានល្អប្រសើរ
(៦)ជំរុញយុទ្ធនាការចាក់វ៉ាក់សាំង។ ជាងនេះទៅទៀត រដ្ឋាភិបាលកម្ពុជា ក៏បានប្រកាសបើកយុទ្ធនាការចាក់វ៉ាក់សាំងជូនកុមារ និង យុវវ័យ អាយុ១២ឆ្នាំ ដល់ ១៧ឆ្នាំផងដែរ។
សូមជម្រាបថាកាលពីយប់ថ្ងៃសុក្រ ទី២៣ ខែកក្កដា នេះ រដ្ឋាភិបាលជប៉ុន បានផ្តល់វ៉ាក់សាំងប្រឆាំងជំងឺកូវីដ១៩ អាស្ត្រាហ្សេនីកា (AstraZeneca) ចំនួន ១លានដូស ដល់រាជរដ្ឋាភិបាលកម្ពុជា ដោយបានដឹកមកដល់កម្ពុជា មាន៣៣ម៉ឺនដូស ហើយចំនួននៅសល់ នឹងដឹកមកជាបន្តបន្ទាប់ទៀត៕SRP
ខេត្តកំពង់ធំ៖មន្ត្រីសុរិយោដីស្រុកស្ទោង បានរងការរិះគន់ថា បើកដៃឲ្យមានការសាងសង់សំណង់ដោយខុសច្បាប់ នាំឲ្យមានការរិះគន់យ៉ាងខ្លាំង។
យោងតាមប្រភពពីមន្ត្រីជំនាញបានបង្ហើបឲ្យដឹងថាសំណង់សាងសង់អគារដោយខុសច្បាប់នៅទីប្រជុំជនជិតបេនឡាន បានសាងសង់អគារ៤ល្វែង៣ជាន់ ជាកម្មសិទ្ធរបស់អ្នកស្រី គឹង គន់ និងនាង ជិន ណារ៉ុម ស្ថិតនៅភូមិឈើទាល ឃុំកំពង់ចិនត្បូង ស្រុកស្ទោង ខេត្តកំពង់ធំ បានបន្តសាងសង់ដោយរលូនបើទោះបីជាមានការហាមឃាត់ពីជំនាញសុរិយោដីខេត្តយ៉ាងណាក៏ដោយ។
ប្រភពបានបន្តទៀតថាសម្រាប់ការសាងសង់សំណង់ផ្ទះល្វែងរបស់លោកគឹង គន់ និងនាង ជិន ណារ៉ុម បានដំណើរការសាងសង់ជាធម្មតា បើទោះបីជាមានក្រុមការងារថ្នាក់ខេត្តចុះ មកផ្អាកការសាងសង់បណ្តោះអាសន្នក៏ដោយ។ ការសាងសង់បែបនេះត្រូវបានគេសង្ស័យថាមន្ត្រីជំនាញសុរិយោដីស្រុកស្ទោង មានការឃុបឃិតគ្នា ជាមួយម្ចាស់សំណង់ ទើបសំណង់បានដំណើរការដោយរលូន។
សូមជម្រាបថា រហូតមកដល់ពេលនេះ សំណង់ផ្ទះល្វែង របស់លោកគឹង គន់ និងនាង ជិន ណារ៉ុម នៅតែដំណើរការសាងសង់ដដែល ដោយគ្មានកោតញញើតទៅនឹងការចេញលិខិតរបស់មន្ទីរសុរិយោដីខេត្តនោះឡើយ។
ពាក់ព័ន្ធករណីនេះ លោក អ៊ឹម សុឌីណា ប្រធានមន្ទីរសុរិយោដី និងសំណង់ខេត្តកំពង់ធំ បានឆ្លើយតប តាមប្រព័ន្ឋតេក្រាមថា៖ មន្ទីរបានចុះទៅពិនិត្យ និងផ្អាកការសាងសង់នេះជាបណ្តោះអាសន្ន និងបានរបាយការណ៏ជូនទៅឯកឧត្តមអភិបាលខេត្ត រួចរាល់ហើយ តែបើសកម្មភាពការសាងសង់នេះ នៅតែបន្ត មន្ទីរនិងចាត់ក្រុមការងារ ដោយសហការណ៏ជាមួយរដ្ឋបាលខេត្តចុះទៅពិនិត្យថែមទៀត ។
ជុំវិញការសាងសង់សំណង់នេះពលរដ្ឋ នៅស្រុកស្ទោង មានក្ដីរំពឹងថាមន្ត្រីជំនាញខេត្តកំពង់ធំ នឹងចាត់វិធានការតាមផ្លូវច្បាប់ចំពោះសំណង់សាងសង់ផ្ទះល្វែងដោយខុសច្បាប់ របស់លោកគឹង គន់ និងនាង ជិន ណារ៉ុម ជាក់ជាពុំខានឡើយ។
បណ្ដាញសារព័ត៌មាន សៀមរាបប៉ុស្ដិ៍ នៅមិនពុំទាន់ទទួលបានការបំភ្លឺពីលោកគឹង គន់ និងនាង ជិន ណារ៉ុម ជុំវិញការសាងសង់សំណង់ខាងលើនេះនៅឡើយទេ ដោយមិនមានលេខទំនាក់ទំនង៕SRP
ខេត្តកំពង់ចាម៖លោក អ៊ុន ចាន់ដា អភិបាល ខេត្តកំពង់ចាម នៅរសៀលថ្ងៃទី២៣ ខែកក្កដា ម្សិលមិញ បានដឹកនាំក្រុមការងារ ចុះពិនិត្យស្ថានភាពនៃសួនច្បារតាមមាត់ទន្លេមេគង្គ ក្នុង ក្រុងកំពង់ចាម។
ការចុះពិនិត្យនេះដើម្បីធ្វើការជួសជុលកែលម្អសួនសាធារណៈ រួមទាំងការដាំដើមឈើ និងផ្កាលម្អគ្រប់ប្រភេទបន្ថែមទៀត សំដៅលើកកម្ពស់សោភ័ណភាព អនាម័យ បរិស្ថានឲ្យស្រស់បំព្រង រួមទាំងការរៀបចំសណ្តាប់ធ្នាប់ របៀបរៀបរយ ឲ្យសាកសមនឹង ទីក្រុងជ័យលាភី រំដួល៣ទង និងជាទីកន្លែងដ៏ទាក់ទាញ សម្រាប់ប្រជាពលរដ្ឋ ភ្ញៀវទេសចរណ៍ មកលំហែកាយ ស្រូបយកខ្យល់ អាកាសបរិសុទ្ធ ពីជំនោរទន្លេមេគង្គ។
សូមជម្រាបថាក្រុងកំពង់ចាម ជាក្រុងដែលទទួលបានជ័យលាភី រំដួល៣ទង ក្នុងការចូលរួមប្រឡងប្រណាំងទីក្រុងស្អាត ក្នុងក្របខណ្ឌទូទាំងប្រទេស កាលពីឆ្នាំ២០១៨កន្លងទៅ ប៉ុន្តែជាអកុសល នៅឆ្នាំបន្ទាប់គ្រោះទឹកជំនន់ទន្លេមេគង្គ បានបំផ្លិចបំផ្លាញ ជាច្រើនពាន់ម៉ែត្រ នូវផ្នែកមួយចំនួន នៃសួនច្បារ នៅតាមបណ្តោយមាត់ទន្លេ ស្ថិតនៅសង្កាត់ចំនួន៣ ក្នុងក្រុងកំពង់ចាម៕SRP
ភ្នំពេញ៖សម្តេច ហ៊ុន សែន នាយករដ្ឋមន្ត្រី បានប្រកាសបើកយុទ្ធនាការចាក់វ៉ាក់សាំងជូនកុមារ និង យុវវ័យ អាយុ១២ឆ្នាំ ដល់ ១៧ឆ្នាំ ហើយសម្តេចនឹងអញ្ជើញជាអធិបតីភាព បើកយុទ្ធនាការនេះ នៅមន្ទីរពេទ្យកាល់ម៉ែត ព្រមទាំងនឹងនាំចៅៗរបស់សម្តេចដែលមានអាយុចាប់ពី១២ឆ្នាំឡើងទៅ ទៅទទួលវ៉ាក់សាំង។
សម្តេចហ៊ុន សែន បានប្រកាសថា ទោះបីតម្លៃណាក៏ដោយ កម្ពុជាត្រូវតែចាក់វ៉ាក់សាំងការពារកូវីដ១៩ ជូនប្រជាពលរដ្ឋឲ្យបានជោគជ័យ។
សម្តេចតេជោ ក៏បានជំរុញឱ្យក្រសួងពាក់ព័ន្ធ បន្តអនុវត្តវិធានការសុខាភិបាល និងរួមគ្នាប្រយុទ្ធប្រឆាំងជំងឺកូវីដ១៩ បន្តទៀត និងអំពាវនាវដល់ប្រជាពលរដ្ឋ ឱ្យបន្តអនុវត្តវិធានការសុខាភិបាល ដើម្បីរួមគ្នាទប់ស្កាត់ជំងឺកូវីដ១៩ និងស្រោចស្រង់ សង្គមកម្ពុជាឡើងវិញ នាពេលខាងមុខ។
ការប្រកាសនេះនៅអាកាសយានដ្ឋានអន្តរជាតិភ្នំពេញ នៅទី២៣ ខែកក្កដា យប់មិញនេះ ក្នុងឱកាសអញ្ជើញទៅទទួលដោយផ្ទាល់នូវការមកដល់ វ៉ាក់សាំងជំងឺកូវីដ១៩ ដែលជាជំនួយរបស់រដ្ឋាភិបាល និងប្រជាជនជប៉ុន៕SRP
