ខេត្តសៀមរាប៖លោក សឿន តុលា ស្ថាបនិកក្រុមហ៊ុនផា ផា យ៉ា បានសរសេរនូវអត្ថបទមួយក្រោមចំណងជើងថា«ភាពប្រថុយប្រថានជាមួយសមត្ថភាពខ្លួន»។

លោក សឿន តុលា បានសរសេរថា “ប្រសិនបើអ្នកសម្រេចចិត្តទទួលយកហានិភ័យ ក្នុងកម្រិតសមត្ថភាពគ្រប់គ្រងបាន នោះអ្នកនឹងអាចបង្កើតឱកាសថ្មី នឹងទទួលបានផលប្រសើរឡើង ក្នុងពេលអនាគត” នៅក្នុងលោកយើងនេះ មនុស្សអាចសម្រេចធ្វើអ្វីក៏បានដែរ ពេលដែលពួកគេ ប្រកាន់ភ្ជាប់ខ្លួននៅតែចំណុចអវិជ្ជមាន ជាពិសេសនោះ គឺហ៊ានសម្រេចចិត្តប្រថុយ ដើម្បីឱ្យបានសម្រេចកិច្ចការអ្វីមួយ។

រីឯកចំពោះការបរាជ័យវិញ គឺជាសញ្ញាមួយបញ្ជាក់ប្រាប់ថា:
# ស្វែងរកចំណេះដឹងបន្ថែម ហើយ កុំបោះបង
# រៀនពីកំហុស ដឹងភាពដាច់ខាតជាមួយវិន័យផ្ទាល់ខ្លួន និងនៅក្នុងអង្គភាព
# បន្ថែមជំនឿលើខ្លួនឯង និងរក្សាមេត្រីភាពល្អ ជាមួយមនុស្សជុំវិញខ្លួន ដឹងបន្ថែមអំពើល្អផ្សេងៗទៀត ដើម្បីលើកកម្លាំងចិត្ត និងកម្លាំងការងារ។

ប្រសិនបើអ្នកខ្វះចំណេះដឹង ក្នុងការធ្វើកិច្ចការអ្វីមួយ សូមធ្វើការប្រថុយក្នុងកម្រិតទាប ដើម្បីមានឱកាសគ្រប់គ្រាន់ រៀនយកចំណេះដឹង ពីព្រោះចំណេះដឹងមានសារះសំខាន់ នៃប្រភព ជោគជ័យ។

សូមចូលចាំថា : ភាពក្លាហានពិតប្រាកដគឺមិនមែនជាការ លោតផ្លោះនោះទេ ” គឺការក្លាហានប្រថុយប្រថាន ជាមួយធ្វើចំណេះដឹង និងកម្រិតសមត្ថភាព សម្រាប់គ្រប់គ្រង រៀបចំកិច្ចការដដែល ប៉ុន្តែឱ្យប្រសើរជាងមុនជារៀងរាល់ថ្ងៃ ពោលគឺ ផ្ដោតទៅលើ ទៅលើគុណភាពការងារ ប្រសើរឡើង ។

ជាទូទៅអ្នកដែលបរាជ័យ កើតចេញពីការងារដែលគ្មានគុណភាព ។
សូមចងចាំថា: ដើម្បីឱ្យមានភាពប្រសើរឡើង គឺត្រូវចំណាយពេលវេលា រៀនពីបទពិសោធ..និងបន្តធ្វើ..
#បញ្ហាដ៏ធំនោះ គឺសំនួរមួយ ដែលត្រូវសួរថា:

តើអ្នក តាំងចិត្តគ្រប់គ្រាន់ ដើម្បីប្រថុយ ដើម្បីរៀន ដើម្បីបង្កើនសមត្ថភាព ដែរឬទេ? ហើយសូមចងចាំថា នៅក្នុងលោកយើងនេះ ប្រសិនបើគ្មានការប្រថុយ នោះមិនមានការរីកចម្រើនអ្វីឡើយ៕

និពន្ធដោយលោក សឿន តុលា ស្ថាបនិកក្រុមហ៊ុន ផា ផា យ៉ា PAPAYA NEXT STEP CO,.LTD. *PAPAYA REAL ESTATE (គម្រោងអភិវឌ្ឍន៍អចលនទ្រព្យ)

*PAPAYA HOMESTAY (គម្រោងលើវិស័យទេសចរណ៍)*PAPAYA GARDEN
(គម្រោងលើវិស័យកសិកម្មនិងចែកចាយអាហារ) ៕ល៕

ខេត្តសៀមរាប៖លោក ធឿន វុឌ្ឍី លេខាធិការដ្ឋាន ចលនាយុវជនកម្ពុជា (ក្រុម១៥៧)ស្រុកជីក្រែង ព្រមជាមួយសមាជិក សមាជិកា បាននាំយកអំណោយ ទៅចែកជូនប្រជាពលរដ្ឋ មុខផ្សារភូមិអូរ។

ការចែកនៅថ្ងៃពុធ ទី១៦ ខែមិថុនា ឆ្នាំ២០២១ នេះ តាមការណែនាំពីលោក ហ៊ុន ប៉ូគា ប្រធានសមាគមចលនាយុវជនកម្ពុជា(ក្រុម១៥៧) សាខាខេត្តសៀមរាប ដោយការចូលរួមពីអាជ្ញាធរសមត្ថកិច្ចមូលដ្ឋានផងដែរ។

ឆ្លៀតក្នុងឱកាសនោះដែរ លោក ធឿន វុឌ្ឍី បានអំពាវនាវដល់បងប្អូន ប្រជាពលរដ្ឋ ទាំងអស់ឱ្យបង្កើនការប្រុងប្រយ័ត្ន ការពារឱ្យបានខ្ពស់ ចំពោះជំងឺកូវីដ១៩ ជាពិសេសអនុវត្តតាមប្រសាសន៍របស់ សម្តេចតេជោ (៣កុំ ៣ការពារ ) ឲ្យបានខ្ជាប់ខ្ជួន ដើម្បីចៀសផុតពីជំងឺដ៏កាចសាហាវនេះ។អំណោយចែកចាយជូនរួម មាន៖-អាកុល ៧០លីត្រ -ម៉ាស ២៥០០ម៉ាស -ដបបាញ់អាកុល ២០០ដប -សាប៊ូ ១០០ដុំ+ក្នុងមួយនាក់ទទួលបាន៖-អាកុល ១ដប-សាប៊ូ ១ដុំ-ម៉ាស ១គូ៕SRP

ខេត្តកំពង់ចាម៖លោក អ៊ុន​ ចាន់ដា​​ អភិបាលខេត្ត​កំពង់ចាម​ បានថ្លែងនូវការកោតសរសើរ ចំពោះ វឌ្ឍនភាពនៃការអភិវឌ្ឍរីកចំរើន លើគ្រប់វិស័យ ក្រោមការដឹកនាំ របស់ក្រុមប្រឹក្សា គណៈអភិបាល និងមន្ត្រីសាលាស្រុកចំការលេីទាំងអស់ ដែលបានចូលរួមចំណែក ដោះស្រាយកិច្ចការ នៅក្នុងអង្គភាព និងការផ្តល់សេវាសាធារណៈ សេវារដ្ឋបាល ជូនប្រជាពលរដ្ឋ ដោយទទួលបានលទ្ធផល យ៉ាងល្អប្រសើរ នាពេលកន្លងមក។

ថ្លែង​យ៉ាង​ដូច្នេះ​ក្នុងពិធីប្រកាសតែងតាំងលោក​ សំ​ ពិសិដ្ឋ​ ជាអភិបាល​ស្រុកចំការលេី​ ជំនួសលោក​ខ្លូត​ ចន្តា​ ដែលត្រូវទទួលភារកិច្ចថ្មី​ នៅថ្ងៃទី១៦​ ខែមិថុនានេះ។

លោកក៏បាន​ផ្តាំផ្ញេីដល់​លោកអភិបាលស្រុកថ្មី ត្រូវប្រែក្លាយការប្ដេជ្ញាចិត្ត នាពេលនេះ ទៅជា​ឆន្ទៈក្នុងការអនុវត្តជាក់ស្ដែង ឲ្យទទួលបានប្រសិទ្ធភាពខ្ពស់ ទៅពេលអនាគត ចំពោះ​សិល្បៈ​នៃ​ការ​ដឹកនាំ​ ត្រូវ​ឲ្យ​មន្ត្រី​ក្រោម​ឱវាទ​ចេះ​ធ្វើ​ការ​ ទាំង​មាន​ធនធាន​សម្រាប់​ការងារ​​ និង​ឲ្យ​មន្ត្រី​ចេះ​សម្រេច​ចិត្ត​​អារកាត់ផងដែរ​។

អភិបាលខេត្តក៏បានណែនាំលោកអភិបាលស្រុកចំការលេី ដែលទើបបានប្រកាសតែងតាំងថ្មីនេះ ត្រូវមានការសាមគ្គីភាពផ្ទៃក្នុង នៅក្នុងអង្គភាព រវាងថ្នាក់លើ និងថ្នាក់ក្រោម ព្រមទាំងមានគំនិតផ្តួចផ្តើម មនសិការការងារខ្ពស់ ប្រកបដោយតម្លាភាព និងគណនេយ្យភាព ក្នុងការ បម្រើប្រជាពលរដ្ឋ ដោយការយកចិត្តទុកដាក់ខ្ពស់ លើការសម្របសម្រួល ការដោះស្រាយបញ្ហាការងារ ប្រកបដោយភាពឈ្លាសវៃ និងមានគំនិតច្នៃប្រឌិត មានចក្ខុវិស័យ លើកជាទិសដៅ ដាក់ចេញនូវផែនការអនុវត្តឲ្យបានច្បាស់លាស់ ព្រមទាំងខិតខំបញ្ចេញឲ្យអស់ពីសមត្ថភាព និងទេពកោសល្យ ក្នុងស្មារតីយកចិត្តទុកដាក់ និងការទទួលខុសត្រូវខ្ពស់ ចំពោះ មុខថ្នាក់ដឹកនាំ ក្រសួងមហាផ្ទៃ និងចំពោះមុខគណៈអភិបាលខេត្ត រដ្ឋបាលខេត្ត លើវិស័យការងារ ដែលខ្លួនកំពុងបំពេញតួនាទី ជាពិសេសនោះ គឺត្រូវ​ប្រែក្លាយការប្ដេជ្ញាចិត្ត នាពេលនេះ ទៅជា​ឆន្ទៈក្នុងការអនុវត្តជាក់ស្ដែង ឲ្យទទួលបានប្រសិទ្ធភាពខ្ពស់ ទៅពេលអនាគតផងដែរ​៕SRP

ខេត្តសៀមរាប៖មានការលើកឡើងថាគេបានឈូសឆាយដីផ្នូរខ្មោច (កប់ខ្មោច)ធ្វើជាដីឡូតិ៍សម្រាប់លក់ ករណីនេះស្ថាបនិក របស់សមាគមសពគ្រីស្ទាន និងជាប្រធានសមាគម គ្រូគង្វាលប្រចាំខេត្តសៀមរាប គ្រោងដាក់ពាក្យប្តឹងទៅតុលាការ។

ដីផ្នូរខ្មោចឬកប់ខ្មោច ដែលត្រូវបានគេឈូសឆាយ បោះបង្គោលធ្វើជាដីឡូតិ៍ សម្រាប់លក់ ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប។

ស្ថាបនិករបស់សមាគមសព គ្រី ស្ទាន និងជាប្រធានសមាគមគ្រូគង្វាល លោកប្រាក់ វុទ្ធី បានថ្លែងតាមទូរស័ព្ទប្រាប់នៅថ្ងៃទី១៥ខែមិថុនាឆ្នាំ២០២១ ម្សិលមិញថា លោកនឹងប្តឹងទៅតុលាការ ចំពោះអ្នកឃុបឃិតគ្នាឈូសឆាយដីផ្នូរខ្មោចនេះ យកធ្វើជាដីពុះឡូតិ៍សម្រាប់លក់។ ដីនេះមានទំហំ៥០ម៉ែត្រគុណ១០០ម៉ែត្រស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប។ កាលពីអំឡុងឆ្នាំ២០០៤ អង្គការ វិហារមេថីឌីសកម្ពុជា បានប្រគល់អោយសមាគមសពគ្រីស្ទាន ទុកសម្រាប់កប់សព។ អីចឹងទេចំពោះបុគ្គល ដែលឃុបឃិតគ្នារំលោភបំពានយកដីនេះធ្វើជាកម្មសិទ្ធិ ឬពុះឡូតិ៍លក់ត្រូវតែទទួលទោសតាមផ្លូវច្បាប់។

លោកបន្តថា ក្នុងរយៈកាលនេះខាងលោកមិន បានដឹងថា មានជនឃុបឃិតទៅឈូសឆាយផ្នូរខ្មោចដើម្បីយកដីពុះចែកគ្នាលក់អីចឹងទេ។ តែបើមានអីចឹងលោកនឹងរៀបចំដើម្បីដាក់ពាក្យប្តឹងលើជនដែលជាប់ពាក់ព័ន្ធទៅតាមផ្លូវច្បាប់។

លោក ក្អោប រ៉ន ចៅសង្កាត់ជ្រាវ បានថ្លែងថា ករណីនេះលោកនៅមិនទាន់ដឹងច្បាស់ដែរទេ តែអាចសួរទៅលោក ខន ទើបដឹងច្បាស់។

លោកឃុន សុខន ថៅកែដីឡូតិ៍ ក្នុងតំបន់សៀមរាប បានអោយដឹងថា ដីខាងលើនេះរូបលោកបានត្រៀមទិញមែន។ តែមិនទាន់ទិញទេ គ្រាន់តែកក់សម្ដីប៉ុណ្ណោះ ព្រោះរងចាំអោយអ្នកលក់រត់ច្បាប់បានសិន។ ឯការឈូសឆាយចាក់ដីនោះ ក៏មិនមែនរូបលោកដែរ។ អីចឹងទេសូមសួរទៅលោក ចាន់ ឆ្វៀល ព្រោះគាត់ជាម្ចាស់។

ទោះជាយ៉ាងណា បណ្ដាញសៀមរាបប៉ុស្ដិ៍ មិនអាចទំនាក់ទំនងស្វែងជួបដើម្បីសុំការពន្យល់ពីលោកចាន់ ឆ្វៀល ដែលអះអាងថាជាម្ចាស់ដីនេះបានទេ នៅថ្ងៃទី១៥ខែមិថុនាម្សិលមិញ។
ប៉ុន្តែលោក នួន ពុទ្ធារ៉ា អភិបាលក្រុងសៀមរាប បានបញ្ជាក់តាមទូរស័ព្ទថា រាល់ការឈូសឆាយពុះជាដីឡូតិ៍ត្រូវមានលិខិតកាន់កាប់ដី និងច្បាប់អនុញ្ញាតត្រឹមត្រូវ។ មិនចឹងទេគឺខុសច្បាប់។ តែបើដីខាងលើនៅជាប់ពាក់ព័ន្ធនិងសមាគម ខាងសមាគមអាចមកដាក់ ពាក្យនៅសាលាក្រុងបាន។

លោកអភិបាលក្រុងបន្តថា ថ្វីត្បិតអាជ្ញាធរក្រុងមិនទាន់បានចុះទៅពិនិត្យ ទីតាំងដីនោះពិតមែន តែបើពិនិត្យឃើញ ថាដីនោះស្ថិតក្រោមការគ្រប់គ្រង របស់អាជ្ញាធរបឹងទន្លេសាប សាលាក្រុងមិនអនុញ្ញាតច្បាប់ឡើយ។

យ៉ាងណាមិញ លោកប្រាក់ វុទ្ធី នៅតែបញ្ជាក់ជំហរ របស់ខ្លួនថា នឹងរៀបចំឯកសារដាក់ពាក្យប្តឹង ព្រម ទាំងធ្វើសន្និសីទកាសែត នៅលើដីផ្នូរខ្មោចតែម្តង ដើម្បីដឹងថា មានបុគ្គលណាខ្លះជាប់ពាក់ព័ន្ធ ហើយចេញមកតតាំង៕SRP

ភ្នំពេញ៖ក្រសួងកសិកម្ម​ រុក្ខាប្រមាញ់និងនេសាទ នៅថ្ងៃទី១៥ ខែមិថុនា ឆ្នាំ២០២១នេះបានចេញសេចក្តីប្រកាសព័ត៌មានពាក់ព័ន្ធការផ្គត់ផ្គង់ត្រីនៅកម្ពុជា៕SRP

ភ្នំពេញ៖អ្នកស្រី ស៊ុ សំអឿន ដែលមនុស្សទី៣លាន ដែលបានចាក់វ៉ាក់សាំងបង្ការជំងឺកូវីដ១៩ បានទទួលថវិកាលើកទឹកចិត្ត របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

ការទទួលបានថវិកា របស់សម្ដេចហ៊ុន សែន នៅរសៀលថ្ងៃទី ១៥ ខែមិថុនា ឆ្នាំ ២០២១ តាមរយៈលោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល។

សូមបញ្ជាក់ថា គិតត្រឹមល្ងាចថ្ងៃ១៤ ខែ មិថុនា ២០២១ កម្ពុជាបានចាក់វ៉ាក់សាំងបានជាង៣លាននាក់ហើយ ក្នុងនោះបានរកឃើញបុគ្គលដែលបានចាក់វ៉ាក់សាំងទី៣លាន គឺអ្នកស្រី ស៊ុ សំអឿន អាយុ៤៨ឆ្នាំ ជាស្ត្រីមេម៉ាយរស់នៅមន្ទីរពេទ្យជ័យជំនះខេត្តកណ្តាល។សម្រាប់មនុស្សទី១លាន មនុស្សទី២លាន ហើយអ្នកស្រី ស៊ុ សំអឿន ជាមនុស្សទី៣លាន ទទួលបានជំនួយឧបត្ថម្ភនូវទឹកប្រាក់ចំនួន១០លានរៀល តាមរយៈលោកជំទាវ ឱ វណ្ណឌីន ដែលប្រគល់នាថ្ងៃនេះ។

សូមជម្រាបថា កម្ពុជាសម្រេចបានការចាក់វ៉ាក់សាំងចំនួន៣០ភាគរយនៃចំនួនដែលត្រូវចាក់ ដែលនេះជាជោគជ័យដ៏ធំក្នុងដំណើរឆ្ពោះទៅរកគោលដៅ១០លាននាក់ដែលត្រូវចាក់៕SRP

ខេត្តកំពង់ចាម​៖ក្នុង​ដំណើរ​អញ្ជើញ​ចុះ​ពិនិត្យ​ការ​សាងសង់​ច្រាំងទន្លេ​នេះ​ លោក អ៊ុន​ ចាន់ដា​ អភិបាលខេត្តកំពង់ចាម​ បានណែនាំឲ្យក្រុមហ៊ុនទទួលការ​ ត្រូវ​ពន្លឿនការងារ​សាងសង់​ ព្រោះរដូវ​ទឹក​ឡើង​ជិតឈាន​ចូលមកដល់នាពេលខាងមុខនេះហេីយ​។ ជាមួយគ្នានោះក្រុមហ៊ុនត្រូវគោរពតាមបទដ្ឋានបច្ចេកទេស ក្នុងការបូមដីកោះដុះថ្មី និងដីខ្សាច់ តម្រង់ចរន្តទឹកហូរ នៅតំបន់កោះតូច ចន្លោះរវាងស្រុកស្រីសន្ធរ និងស្រុកកងមាស ដើម្បីបញ្ជៀសការបាក់ស្រុតច្រាំងទន្លេ។​​

ការណែនាំនេះនៅព្រឹកមិញក្នុងពេលចុះពិនិត្យលក្ខណៈបច្ចេកទេស​ នៃការសាងសង់ច្រាំងទន្លេ​ នៅតំបន់កោះតូច​ ស្រុកស្រីសន្ធរ​ និង​ស្រុកកងមាស​។

សូមជម្រាបថាការសាងសង់ច្រាំងទន្លេ​នៅតំបន់កោះតូច​ ប្រវែង២.០០០ ម៉ែត្រ ស្ថិត​ក្នុង​ឃុំឬស្សីស្រុក និងឃុំកោះអណ្តែត នៃស្រុកស្រីសន្ធរ និងឃុំសូរគង ស្រុកកងមាស​ ដេីម្បី​ត្រៀមលក្ខណ:ការពារច្រាំងទន្លេ​កុំ​ឲ្យ​បាក់​ ខណ:រដូវវ​ទឹក​ឡើង។

បេីតាមការបញ្ជាក់ពីអ្នកបច្ចេកទេស របស់ក្រុមហ៊ុន រីវើសាយឌីវេឡុបម៉ិន ឯ.ក បាន​ឲ្យដឹងថា​ ចំពោះគម្រោង​ការ​សាងសង់​ច្រាំងទន្លេ​នេះ​ ក្រុម​ការងារ​បច្ចេកទេស បានរៀបចំបាវខ្សាច់(Geo-textile) ដើម្បីទប់ច្រាំងទន្លេ ប្រវែង២០០០ ម៉ែត្រ ដោយបានបូមខ្សាច់ធ្វើបាតចាប់ពីដើមខែមេសា​ ក្នុងជំហានទី១ ឲ្យបានកំពស់ ០៤ម៉ែត្រ និងចាប់រៀបចំបាវខ្សាច់ ហើយបន្តក្នុងជំហានទី២ ឲ្យបាន៨,៥ ម៉ែត្រ ស្មើនឹង៥០% នៃកំពស់ច្រាំងទន្លេ រួចត្រូវបន្តធ្វើជំហានទី៣ ទៀត រហូតដល់កំពស់ ១២ ម៉ែត្រ បញ្ចប់គម្រោង ដែលស្មើនឹង៧៥% នៃកំពស់ច្រាំងទន្លេ។ ក្នុងនោះ​ក្រុមហ៊ុន បានប្រើប្រាស់ទន្និន័យមូលដ្ឋានអំពីកំពស់ទឹកទន្លេ ពីមន្ទីរធនធានទឹក និងឧតុនិយមខេត្ត និងទិន្នន័យ ផែនទីបាតទន្លេ ពីវេបសាយ របស់គណៈកម្មាធិការទន្លេមេគង្គ​ផងដែរ​៕SRP

ខេត្តសៀមរាប៖នៅទីបំផុត កម្មករប្រុសស្រីជាង៧០នាក់ អ្នកធ្វើផ្លូវនៅក្រុងសៀមរាប បានទទួលបានឈ្នួលហើយ កាលពីថ្ងៃទី១២ ខែមិថុនា ឆ្នាំ២០២១ បន្ទាប់ពីបានធ្វើការតវ៉ា។

ក្រុមកម្មករធ្វើផ្លូវទាំងនោះ បានអោយដឹងថា ពួក គាត់ទាំងអស់គ្នា ទទួលបានប្រាក់ខែទាំងអស់គ្នាហើយគឺខែ៤និងខែ៥ គ្រាន់តែមានបញ្ហាខុសច្រឡំថ្ងៃឈប់ បន្តិចបន្តួចប៉ុណ្ណោះ។

សូមបញ្ជាក់ កម្មករប្រុសស្រីជាង៧០នាក់ កាលពីរសៀលថ្ងៃទី១១ខែមិថុនាឆ្នាំ២០២១ បាននាំគ្នាតវ៉ារឿងអ្នកម៉ៅការធ្វើផ្លូវ ព្យាពេលការបើកប្រាក់ខែ។

ក្រុមកម្មករបានទៅប្រមូលផ្តុំគ្នានៅទីតាំងស្នាក់ ការនៅរបស់អ្នកម៉ៅការ ក្នុងភូមិគោកចក សង្កាត់គោកចក ក្រុងសៀមរាប។ ប៉ុន្តែក្នុងពេលផ្ទុះការតវ៉ាខ្លាំង សមត្ថកិច្ចនគរបាល ក៏បាននាំអ្នកម៉ៅការផ្លូវនោះទៅកាន់សាលាសង្កាត់ បញ្ជៀសការផ្ទុះហិង្សា។

ក្រុមកម្មករបានរៀបរាបថា ពួកគាត់ទាំងជាង៧០ នាក់ ជាកម្មករធ្វើផ្លូវបេតុង១ខ្សែក្នុងគំរោង(៣៨)ខ្សែក្នុងសង្កាត់គោកចក ឈ្មោះថាផ្លូវលេខ០៧ ដែលគេនិយមហៅថា ផ្លូវពេទ្យ (រ៉ាក់)។ ពួកគាត់អ្នកខ្លះអត់ទាន់បើកប្រាក់តាំងខែ៣មក ឯខ្លះទៀតតាំងខែ៤មក។ នៅរសៀលថ្ងៃទី១១ខែមថុនា អ្នកម៉ៅការសន្យាបើក ប្រាក់ខែអោយ។ លុះពេលមកបើក បែជាឆ្លើយថាអត់ទាន់មានលុយ ទើបពួកគាត់តវ៉ាបែបនេះ។ ប៉ុន្តែកាល ពី ថ្ងៃទី១២ខែមិថុនា ពួកគាត់បានបើកប្រាក់ខែទាំងអស់គ្នាវិញហើយ៕SRP

ភ្នំពេញ៖សម្ដេចអគ្គមហាពញាចក្រី ហេង សំរិន ប្រធានរដ្ឋសភា នៅព្រឹកថ្ងៃអង្គារ ទី១៥ ខែមិថុនាឆ្នាំ២០២១ បានដឹកនាំកិច្ចប្រជុំគណៈគម្មាធិការអចិន្រ្តៃយ៍រដ្ឋសភា តាមប្រព័ន្ធវីដេអូ ដើម្បីអនុម័តរបៀបវារៈមួយចំនួន។

ជាលទ្ធផលអង្គប្រជុំបានអនុម័តយល់ព្រមនូវបេក្ខជន ដែលបានដាក់ពាក្យជា ប្រធានគណៈកម្មាធិការជាតិរៀបចំការបោះឆ្នោត មានលក្ខណៈសម្បត្តិគ្រប់គ្រាន់ចំនួន ២រូប ដើម្បីបញ្ជូនទៅគណបក្សនយោបាយពាក់ព័ន្ធជ្រើសរើស បេក្ខជនចំនួន១រូប ហើយផ្ញើមកគណៈកម្មាធិការអចិន្រ្តៃយ៍រដ្ឋសភា វិញ។

អង្គប្រជុំ ក៏បានអនុម័តប្រគល់ សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀង ពាណិជ្ជកម្មសេរី រវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាមានិតចិន និងសេចក្តីព្រាងច្បាប់ស្តីពីការប្រកួតប្រជែង ដល់គណៈកម្មការជំនាញរដ្ឋសភា ពិនិត្យសិក្សា៕SRP

ខេត្តសៀមរាប៖លោកសឿន តុលា ស្ថាបនិកក្រុមហ៊ុនផាផាយ៉ា បានសរសេរនូវអត្ថបទមួយក្រោមចំណងជើងថា«សុភមង្គល គឺជាទ្រព្យ»។

លោកសឿន តុលា បានសរសេរថា សុភមង្គល ដែលអ្នកជ្រើសរើសចេញពីក្នុងចិត្ត នាំឲ្យអ្នក មានលុយនិងមានទ្រព្យ ហើយតែងតែប្រសើរជាងការចង់បានតែលុយ និងទ្រព្យសម្បត្តិ ដើម្បីឱ្យមានសុភមង្គលនោះ។

មានគោលការណ៍ធំៗមួយចំនួន ដែលយើងត្រូវអនុវត្តជាប្រចាំថ្ងៃ ដើម្បីឲ្យមានសុភមង្គលក្នុងផ្លូវចិត្ត:
# រៀន បើកចិត្តទូលាយ ដោយបោះចោលភាពប្រកាន់និយមជ្រុល:
ការប្រកាន់ និយមតែគំនិតរបស់ខ្លួន យល់ថាខ្លួនជាអ្នកត្រឹមត្រូវ អ្នកនិងបាត់បង់ឱកាស រៀនពីអ្នកដែលមានគំនិតផ្សេងៗពីយើង ព្រមទាំង បាត់បង់ ភាពទំនាក់ទំនង ស្វែងយល់ពីគ្នាទៅវិញទៅមក ដើម្បីស្វែងយល់ នៅបុព្វហេតុរួម ។
# រក្សាភាពម្ចាស់ការ និង ប្រកាន់ជំហរម្ចាស់ការខ្លួនឯង:
សុភមង្គល ភាពរីករាយ មិនអាចកើតឡើងតែឯងបានទេ ប៉ុន្តែ យើងក៏មិនពឹងផ្អែក អ្នកដទៃ ផ្ដល់សុភមង្គលឲ្យយើងដែរ នៅក្នុងលោកយើងនេះ គ្មានអ្នកណាមួយ មិនជួបការលំបាក មិនជួបបញ្ហានោះទេ ដូច្នេះ ការមើលឃើញអ្នកដទៃ ប្រសើរជាងខ្លួន សប្បាយចិត្តជាងខ្លួន នោះពិតជាមិនត្រឹមត្រូវ សម្រាប់ខ្លួនយើងទេ ” សុភមង្គល គឺជាជម្រើសចេញពីក្នុងចិត្ត ដែលយើងចាប់ផ្ដើមគិត នឹងធ្វើ តែម្ដង ” អ្នកអាចឲ្យ សុភមង្គល ការលើកទឹកចិត្ត ដល់អ្នកដទៃ នៅពេលដែលអ្នក រៀនចាប់យក សុភមង្គល និង ចេះ ចាប់យក ការលើកទឹកចិត្តខ្លួនឯង ពីព្រោះ អ្នកអាចផ្ដល់ឱ្យអ្នកដទៃ នូវអ្វីដែលអ្នកមានប៉ុណ្ណោះ”។

# រៀនបត់បែន តាមកាលៈទេសៈ

ប្រសិនបើអ្នក ចេះរាំតែមួយបទ អ្នកមិនមានអារម្មណ៍ ល្អ នឹងសប្បាយចិត្តទេ ពីព្រោះ មានបទភ្លេងច្រើនណាស់ តើអ្នកត្រូវរាំបន្តទៀត..យើងអាចគ្រប់គ្រងខ្លួនយើងបាន យើងអាចមានវិន័យចំពោះខ្លួនយើងបាន យើងអាចទិញវត្ថុ ដែលយើងត្រូវការបាន ប៉ុន្តែក្នុងលោកយើងនេះ យើងមិនអាចគ្រប់គ្រង ឲ្យមានភាពសប្បាយ ពេញក្នុងដៃ របស់យើងបានដោយ ” សេដ្ឋកិច្ច មានឡើង មានចុះ ” ទំនាក់ទំនងក្នុងគ្រួសារឬមិត្តភក្កិក្នុងសង្គម មានល្អនឹងអត់ល្អ ទាំងអស់នោះ ទាមទារឲ្យយើង អត់ធ្មត់ និងបត់បែន ហើយចាប់យក ចំណុចល្អៗ ដើម្បីសន្សំក្នុងចិត្ត ហើយមានភាពរីករាយ ទោះស្ថិតក្នុង កាលៈទេសៈណាក៏ដោយ។ យ៉ាងហោចណាស់ អ្នកត្រូវសម្ដែងនូវអំណរគុណ ជាប្រចាំថ្ងៃ ដែលយើងបានដើរ ដែលយើងមានខួរក្បាលគិត ដែលយើងបានរស់រានមានជីវិត ដែលយើងមានលទ្ធភាព ប្រស្រ័យទាក់ទងគ្នាបាន មកដល់ថ្ងៃនេះ។
# រស់ក្នុងបច្ចុប្បន្នភាព: លុបបំបាត់រឿងលំបាកឈឺចាប់ កើតទុក្ខ និងគំនុំពីអតីតកាល ហើយកុំបណ្ដោយខ្លួន គិតចំណុចអវិជ្ជមានក្នុងពេលអនាគត។

ភាពស្ដាយស្រណោះ អ្វីដែលបានបាត់ ភាពឈឺចាប់ក្នុងអតីតកាល នឹងធ្វើឲ្យអ្នក
បាត់បង់កម្លាំងចិត្ត និងសុភមង្គលក្នុងពេលបច្ចុប្បន្ន រីឯ ការគិត ត្រេកត្រអាលចំពោះអនាគត នឹងធ្វើឲ្យអ្នក បាត់បង់ ភាពម៉ត់ចត់ និងភាពរីករាយ ក្នុងពេលបច្ចុប្បន្ន ។
អ្វីដែលយើងត្រូវធ្វើ គឺសប្បាយ រីករាយ ម៉ត់ចត់ ឲ្យអស់លទ្ធភាព ក្នុងពេលបច្ចុប្បន្ន ” ប្រសិនបើ យើង ធ្វើបានល្អ ក្នុងពេលបច្ចុប្បន្ន អនាគតយើង នឹងចាប់ផ្ដើម ពីថ្ងៃនេះទៅ”។

# គិតតែរឿងល្អ មើលតែចំណុចល្អ :
សូមចងចាំថា: លទ្ធផលដែលអ្នកបានទទួលមកដល់ថ្ងៃនេះ កើតចេញពីអ្វីអ្នកបានគិតក្នុងអតីតកាល ។
ប្រសិនបើអ្នកចាប់ផ្ដើមគិតល្អ ធ្វើតែរឿងល្អៗ អ្នកនឹងមានសុភមង្គល ដែលសុភមង្គលនោះ និងអ្នក ឲ្យមានទ្រព្យ មិនប្រាក់ កើនឡើង។
# រៀនលើកទឹកចិត្តខ្លួនឯង :
ពិភពលោក ឬពិភពខាងក្រៅ ពិតជាស្មុគស្មាញ អាចឱ្យយើង មានអារម្មណ៍ បាក់ទឹកចិត្ត និងអព្វមង្គល ប្រសិនបើយើង ទទួលយកលើសលប់ពេក ” មានផ្លូវតែមួយគត់ ដែលអ្នកត្រូវដើរ គឺកើតលើកទឹកចិត្តខ្លួនឯង ជាប្រចាំ ឲ្យបានច្រើនដង ជារៀងរាល់ថ្ងៃ ហើយក្លាយជា ” អ្នកជំនាញ ការលើកទឹកចិត្ត ឲ្យខ្លួនឯង”
# ទទួលយកការលំបាក ឲ្យក្លាយជាការពិត ដើម្បីរកដំណោះស្រាយ:
ជម្លោះកើតឡើង ក្នុងគ្រួសារ ឬក្នុងក្រុមការងារ រឿងក្នុងចិត្តរបស់យើង ដោយសារតែ ភាគច្រើនបំផុត មនុស្សមិនចង់ទទួលការលំបាក សូមចងចាំថា: នៅក្នុងលោកយើងនេះ គ្មានអ្វីលំបាកនោះទេ លើកលែងតែមនុស្សលំបាកប៉ុណ្ណោះ ពីព្រោះ ពួកគាត់ខ្ជិលគិត ពូគាត់ខ្ជិលធ្វើ ដោយសារតែពួកគាត់ចង់បានភាពងាយស្រួល។
# ចេះគោរពខ្លួនឯង
ការរៀនគោរពខ្លួនឯង គឺជាតម្លៃ ថ្លៃជាងគ្រាប់ពេជ្រ ឬជាងអ្វីទាំងអស់ សូមចូលចាំថា ” នៅពេលដែលយើងបាត់បង់ការគោរពខ្លួនឯង គឺយើងបាត់បង់ការស្រលាញ់ខ្លួនឯង នៅសល់តែ ភាពស្អប់ នឹងជម្លោះតែប៉ុណ្ណោះ ” នៅពេលដែលស្អប់ចូលខ្លួន យើងចាប់ផ្ដើមមើលជ្រុងអាក្រក់ យើងចាប់ផ្ដើមកុំគួនសងសឹក និងការយកឈ្នះយកចេញ ” ការយកឈ្នះយកចាញ់ មិនអាចពាំនាំ សុភមង្គលបានឡើយ ប៉ុន្តែការរៀនលត់ដំខ្លួនដើម្បីសុភមង្គល គឺជាទ្រព្យនៃជីវិត ”

និពន្ធដោយលោក សឿន តុលា ស្ថាបនិកក្រុមហ៊ុនផា ផា យ៉ា
PAPAYA  NEXT STEP CO,.LTD.* PAPAYA REAL ESTATE(គម្រោងអភិវឌ្ឍន៍អចលនទ្រព្យ)*PAPAYA HOMESTAY(គម្រោងលើវិស័យទេសចរណ៍)*PAPAYA GARDEN  (គម្រោងលើវិស័យកសិកម្មនិងចែកចាយអាហារ)

ភ្នំពេញ៖លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានថ្លែងថា កម្ពុជាមិនអាចលាក់បាំង នូវការឆ្លងរីករាល់ដាលនៃជំងឺកូវីដ ១៩ បាននោះទេ ដោយសាររាជរដ្ឋាភិបាលកម្ពុជានិងក្រសួងសុខាភិបាល បានធ្វើកិច្ចការងារជាមួយដៃគូរ អភិវឌ្ឍន៍សំខាន់ៗ ដូចជាអង្គការសុខភាពពិភពលោក ក៏ដូចជាទីភ្នាក់ងារសុខភាព និងចំណី អាហារ របស់សហរដ្ឋអាមេរិក CDC ក្នុងការតាមដាន ពីការវិវឌ្ឍន៍និងការឆ្លើយ តបរបស់ ប្រទេសកម្ពុជា ទៅនឹងការឆ្លងរីករាលដាលនៃជំងឺកូវីដ ១៩ ហើយរួមគ្នាដោះស្រាយទប់ស្កាត់ តាមរយៈការ ដាក់ចេញនូវផែនការសកម្មភាពនានា និងគោលនយោបាយសំខាន់ៗ របស់រាជរដ្ឋាភិបាល ដើម្បីប្រយុទ្ធប្រឆាំង ការឆ្លងរីករាលដាល នៃជំងឺកូវីដ-១៩។

លោក ខៀវ កាញារីទ្ធ ថ្លែងបញ្ជាក់យ៉ាងដូច្នេះនៅក្នុងកិច្ចប្រជុំប្រចាំសប្ដាហ៍ជាមួយ ថ្នាក់ដឹកនាំអគ្គនាយកដ្ឋានទាំង ៥ ចំណុះអោយក្រសួងព័ត៌មាន។

តាមការបញ្ជាក់របស់ លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានជម្រាបជូនពីខ្លឹមសារសំខាន់ៗនៃកិច្ចប្រជុំប្រចាំសប្តាហ៍ថ្នាក់ដឹកនាំក្រសួងព័ត៌មាន នៅថ្ងៃទី១៤ ខែមិថុនា ឆ្នាំ ២០២១ ព្រឹកមិញនេះ គឺបានធ្វើការបន្តពិនិត្យលើវឌ្ឍនភាពការងារ ដែលគ្រប់បណ្តាអគ្គនាយកដ្ឋានទាំង ៥ ចំណុះអោយក្រសួងព័ត៌មាន សម្រេចអនុវត្តន៍បាន ក្នុងរយៈ ពេលពេញ១ សប្តាហ៍កន្លងមកនេះ ទទួលបានលទ្ធផលល្អ ស្របតាមផែនការ និងសកម្មភាពការងារដែលបានដាក់ចេញកន្លងមក។

លោក ខៀវ កាញារីទ្ធ ក៏បានជំរុញដល់អគ្គនាយកដ្ឋានរដ្ឋបាល និងហិរញ្ញវត្ថុ ក្រសួងព័ត៌មាន ធ្វើការពិនិត្យអោយបានច្បាស់លាស់ ក្នុងផែនការចំណាញថវិកា សម្រាប់កិច្ចការផ្សេងៗ នៅក្នុងឆ្នាំ២០២២ ពិសេសការចំណាយសម្រាប់ប្រេងឥន្ទន: ទុកត្រៀមចាក់ម៉ាស៊ីនផ្សាយរបស់ស្ថានីយ៍វិទ្យុជាតិកម្ពុជា និងទូរទស្សន៍ជាតិកម្ពុជា កុំអោយមានការអាក់ខាននៅពេលដាច់ចរន្តអគ្គីសនី ក្នុងពេលណាមួយ។

លោករដ្ឋមន្រ្តី បានណែនាំអោយប្រព័ន្ធផ្សព្វផ្សាយរបស់ជាតិ ត្រូវផ្សាយនូវរាល់ព័ត៌មាន បែបពន្យល់ បកស្រាយទៅតាមច្បាប់ និងឯកសារ គតិយុត្ត ដែលមានជាធរមាន ដើម្បីធ្វើយ៉ាងណា អោយបងប្អូនប្រជាពលរដ្ឋ កាន់តែមានការយល់ដឹងស៊ីជម្រៅ ពាក់ពន្ធ័ការអនុវត្តន៍សេចក្តីសម្រេច និងវិធានការច្បាប់នានា របស់រាជរដ្ឋាភិបាល។ ជាមួយនេះរាល់ការផ្សាយព័ត៌មាន ត្រូវផ្អែកលើ ស្ថាប័នជំនាញ និង សមត្ថកិច្ច ក៏ដូចជាប្រភពច្បាស់លាស់ ហើយត្រូវដកស្រង់នូវរាល់ចំណុចសំខាន់ៗ របស់អ្នកជំនាញ និងស្ថាប័ន មានសមត្ថកិច្ច ពិសេសពាក់ព័ន្ធរឿងជំងឺកូវីដ ១៩ ត្រូវតែយក ប្រភព និង ព័ត៌មានច្បាស់លាស់ ដែលចេញដោយ ក្រសួងសុខាភិបាល ព្រោះជាព័ត៌មានពិត សម្រាប់អោយ ប្រជាពលរដ្ឋ បានដឹងទាន់ពេលវេលា៕SRP

ខេត្តកំពង់ចាម៖លោក អ៊ុន​ ចាន់ដា​ អភិបាលខេត្តកំពង់ចាម​ និង​ជា​ប្រធាន​គណកម្មការ​ខេត្ត​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ នៅព្រឹកមិញនេះបានអញ្ជើញចុះពិនិត្យស្ថានភាព​បិទខ្ទប់ផ្ទះ​ប្រជាពលរដ្ឋ​ ចំនួន​៥៤​ខ្នង​ នៅក្នុង​ភូមិ​ចំនួន​១១​ ស្ថិត​ក្នុង​ឃុំ​ព្រែក​រំដេង​ រួមទាំងការផ្អាកអាជីវកម្មលក់ដូរក្នុងផ្សារ​ព្រែករំដេង​ និងផ្សារអូរលែង​ ស្ថិតក្នុងភូមិអូឡេង​ ឃុំព្រៃរំដេង​ ស្រុកស្រីសន្ធរ​។

ក្នុង​ដំណើរ​អញ្ជើញ​ចុះ​ពិនិត្យ​ស្ថានភាព​បិទខ្ទប់​ និង​ផ្អាក​អាជីវកម្ម​ផ្សារខាងលេី​ លោក អ៊ុន​ ចាន់ដា​ បាន​ដាក់​ចេញ​នូវ​ផែនការ​មួយ​ចំនួន​ ដល់មន្ត្រី​ពាក់ព័ន្ធ​ ត្រូវរៀបចំចងខ្សែហ៊ុំព័ទ្ធ​ឲ្យ​បាន​ត្រឹមត្រូវ​តាម​ខ្នងផ្ទះ​ ហើយ​ត្រូវស្រាវជ្រាវរកកម្មករ កម្មការីនី ដែលបានប៉ះពាល់ផ្ទាល់ និងប្រយោល ជាមួយអ្នកជំងឺកូវីដ-១៩​ ដេីម្បី​ធ្វេីការ​ពិត្រួតនិត្យ​សំណាក​ ហេីយ​បញ្ជួន​ពួក​គាត់​ទៅ​ព្យាបាល​ឲ្យ​ទាន់​ពេល​វេលា​។

អភិបាលខេត្ត បាន​ដាក់​ចេញ​នូវ​ផែនការ​ចំពោះ​ការ​បិទខ្ទប់​ផ្ទះ​ ត្រូវ​មាន​ការ​អនុវត្ត​ឲ្យ​បាន​ត្រឹមត្រូវ​តាម​សេចក្តី​ណែនាំ​របស់​រដ្ឋបាល​ខេត្ត​ ក៏ដូចជា​សេចក្តី​ណែនាំ​របស់​រាជរដ្ឋាភិបាល​ ដោយឡែក​ការផ្អាក​អាជីវកម្ម​គ្រប់​ប្រភេទ​នៅ​ផ្សារ​ គឺ​ត្រូវ​បិទ​ទាំងស្រុង​ ដោយ​មិន​ត្រូវ​អនុញ្ញាត​ឲ្យ​មាន​ការ​លក់ដូរ​ តាម​ការ​យល់​ឃើញ​ថា​ អ្នក​​គ្មានជំងឺ​ ឬ​មាន​ជំងឺ​នោះទេ​។

អភិបាលខេត្ត បាន​បញ្ជាក់​ថា​ ចំពោះ​ការ​ធ្វេី​ចត្តាឡីស័ក​យេីង​សុខចិត្ត​អនុវត្តខុស​មុខសញ្ញា​ តែ​ប្រសើរ​ជាង​យើង​បណ្តែតបណ្តោយ​ឲ្យ​ជំងឺ​កូវីដ​-១៩​ ឆ្លង​រាតត្បាតទៅ​ដល់​ប្រជាពលរដ្ឋ​យើង​ក្នុង​សហគមន៍​។អភិបាលខេត្ត ក៏បាន​អំពាវនាវ​ដល់ពលរដ្ឋ ឲ្យ​អនុវត្ត​តាម​វិធានការ​៣ការពារ​ ៣កុំ​ ឲ្យ​បាន​ខ្ជាប់ខ្ជួន​​ផងដែរ​៕SRP