ភ្នំពេញ៖សម្ដេចតេជោ ហ៊ុន សែន នៅរាត្រីថ្ងៃសៅរ៍ ទី២៥ ខែកញ្ញា ឆ្នាំ២០២១ បានថ្លែងសុន្ទរកថា ក្នុងអង្គមហាសន្និបាតអង្គការសហប្រជាជាតិ លើកទី៧៦។ ខាងក្រោមនេះគឺជាសុន្ទរកថាទាំងស្រុង របស់សម្ដេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕SRP

ខេត្តបាត់ដំបង៖អំណោយរបស់សម្ដេច ស ខេង និងលោកជំទាវ ញ៉ែម សាខន ស ខេង ត្រូវបានផ្ដល់ជូនប្រជាពលរដ្ឋ២៤៩គ្រួសារ ក្នុងនោះមានវិជ្ជមានកូវីដ- ១៩ ចំនួន១៧២នាក់។

ការផ្ដល់អំណោយនៅថ្ងៃសៅរ៍ទី២៥ ខែកញ្ញានេះស្ថិតក្នុងតំបន់បិទខ្ទប់ នៅភូមិព្រាលនិល ឃុំព្រៃតូច ស្រុកមោងឫស្សី ខេត្តបាត់ដំបង តាមរយៈក្រុមការងារក្រឡាហោមមនុស្សធម៌ ដឹកនាំដោយលោក ខាន់ ម៉ាណេរ អ្នកតំណាងរាស្ត្រមណ្ឌលបាត់ដំបង។អំណោយសម្ដេចស ខេង និងលោកជំទាវ បានផ្ដល់ជូនគ្រួសារប្រជាពលរដ្ឋ រួមមាន អង្ករ មី ត្រីខ ទឹកស៊ីអ៊ីវ ទឹកត្រី ទឹកសុទ្ធ ម៉ាស និងអាកុល៕SRP

ខេត្តសៀមរាប៖អតីតយុទ្ធជនម្នាក់ត្រូវបានខ្សែភ្លើងឆក់ស្លាប់នៅផ្ទះរបស់ខ្លួន។ ហេតុការណ៍បានកើតឡើងនៅវេលម៉ោង ១៥និង៣០នាទីថ្ងៃសុក្រ ទី២៤ខែកញ្ញា ឆ្នាំ២០២១ រស់នៅភូមិជប់លើ ឃុំស្វាយលើ ស្រុកស្វាយលើ។

សមត្ថកិច្ចបានឲ្យដឹងថាជនរងគ្រោះមានឈ្មោះជា យាន ភេទប្រុសអាយុ៦៧ ឆ្នាំមានលេខសម្គាល់ (RA02001440) ជាអតីតយុទ្ធជន(ចូលនិវត្ដ)រស់នៅភូមិជប់លើ ឃុំស្វាយលើ ស្រុកស្វាយលើ។

យោងតាមការបំភ្លឺពីសាក្សី ការពិនិត្យកន្លែងកើតហេតុរបស់កម្លាំងជំនាញ និង ផ្អែកតាមការសន្និដ្ឋានរបស់ក្រុមគ្រូពេទ្យមណ្ឌលសុខភាពស្រុកស្វាយលើ បានបញ្ជាក់ថាជនរងគ្រោះពិតជាស្លាប់ដោយសាឆក់ខ្សែភ្លើងពិតប្រាកដមែន។ករណីនេះក្រុមគ្រូពេទ្យបានធ្វើតេស្ដរកមេរោគកូវីដ ១៩ ជាលទ្ធផលអវិជ្ជមាន៕SRP

ខេត្តកំពង់ធំ៖លោក ស្រី ស៊ីន ប្រធានមន្ទីរសុខាភិបាលខេត្តកំពង់ធំ បានឲ្យដឹងថា«លោកទទួលស្គាល់ថាពិតជាមានចំណុចខ្វះខាតមែន ដោយសារគ្រូពេទ្យមានចំនួនតិច ជាប់ធ្វើចត្តាឡីស័ក  ហើយគ្រូពេទ្យទាំងនោះហត់ខ្លាំង ទើបប្រើប្រាស់សម្ដីអសីលធម៌ខ្លះលើអ្នកជំងឺ។ លោកថា ពាក់ព័ន្ធសុជីវធម៌ លោកធ្លាប់បាន ណែនាំអប់រំ និងកែប្រែ ញាក់ញាប់ណាស់ តែបើដឹងគ្រូពេទ្យណាមួយច្បាស់លាស់យើងងាយស្រួលធ្វើការអប់រំគាត់អោយកែប្រែនៅពេលក្រោយទៀត។

ដោយឡែកលោក ប៉ឹក គឹមសាន អនុប្រធានមន្ទីរពេទ្យខេត្តកំពង់ធំ បានថ្លែងប្រាប់អ្នកសារព័ត៌មានថា លោកទទួលស្គាល់ថា«ពិតជាមានចំណុចខ្វះខាតមួយចំនួនមែន ដោយសារតែបច្ចុប្បន្នជាសម័យជំងឺកូវីដ ធ្វើអោយគ្រូពេទ្យរវល់ច្រើន ពុំសូវមានពេលទទួលអោយបានដិតដល់ ហើយគ្រូពេទ្យមួយចំនួនជាប់ធ្វើ ចត្ដាឡីស័ក ទើបធ្វើអោយខ្វះខាតកម្លាំង។ លោកថារឿងក្រមសីលធម៌វិញ គឺធ្លាប់បានពន្យល់និងអប់រំ ណែនាំ កែប្រែ និងផ្សព្វផ្សាយច្រើនដងហើយ។

ការទទួលស្គាល់បែបនេះបន្ទាប់ពីមានមានមតិពីសំណាក់ពលរដ្ននិងក្រុមគ្រួសារអ្នកជំងឺ ថាក្រុមគ្រូពេទ្យមួយចំនួនក្នុងពេទ្យបង្អែកខេត្តកំពង់ធំ ហាក់បីដូចជាមិនសូវយកចិត្តទុកក្នុងការជួយសង្រ្គោះជីវិតអ្នកជំងឺនោះទេ។ ក្នុងក្រមសីលធម៌និងការប្រើពាក្យសម្ដីវិញ មិនសូវសមរម្សនោះឡើយ។

ប្រជាពលរដ្ឋបានឲ្យដឹងថាគាត់បានយកឪពុករបស់គាត់កំពុងហត់ខ្លាំងទៅមន្ទីរពេទ្យខេត្តកំពង់ធំ បែរជាគ្រូពេទ្យប្រើពាក្យសម្ដីអសីលធម៌ សឹងតែមិនអាចទទួលយកបាន និងមិនយកចិត្តទុកដាក់ជួយសង្រ្គោះជីវិតអោយទាន់ពេលវេលានោះទេ ទោះបីក្រុមគ្រួសារគាត់បានសុំអង្វរយ៉ាងទទូចអោយដាក់អ៊ុកស៊ីសែនអោយអ្នកជំងឺដែលកំពុងហត់ខ្លាំងយ៉ាងណាក៏ដោយ ក៏គ្រូពេទ្យមិនដាក់អោយដែរ គឺទុកអោយឪពុកគាត់ស្លាប់តែម្ដង។

ពលរដ្ឋបានសំណូមពរសុំឲ្យលោក សុខ លូ អភិបាលខេត្តកំពង់ធំ ជួយពិនិត្យមើលគ្រូពេទ្យអសីលធម៌មួយចំនួនក្នុងមន្ទីរពេទ្យខេត្តកំពងធំ ករណីអសីលធម៌និងមិនយកចិត្តទុកដាក់សង្រ្គោះអ្នកជំងឺ មានតាំងពីមុនកើតជំងឺកូវិដ១៩មកម្លេះ មិនមែនទើបតែរើសអើងក្នុងពេលបច្ចុប្បន្ននេះទេ៕SRP

ខេត្តសៀមរាប៖ក្រុមការងារអន្តរាគមន៍បង្ក្រាបបទល្មើសចរាចរសត្វ និងផលិតផលមានដើមកំណើតពីសត្វ បានបង្រ្កាបរថយន្តមួយគ្រឿង ដឹកផលិតផល មានដេីមកំណេីតពីរសត្វជិត២០តោន។

ការបង្ក្រាបធ្វើឡើង នៅយប់ ថ្ងៃទី២៣ ខែកញ្ញា ឆ្នាំ២០២១ នៅភូមិបន្ទាយស្រី ឃុំខ្នារសណ្ដាយ ស្រុកបន្ទាយស្រី ខេត្តសៀមរាប ក្រោមការបញ្ជដោយផ្ទាល់ពីលោកតាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋានសុខភាពសត្វនិងផលិតកម្មសត្វ និងដោយមានការសម្របសម្រួលនីតិវិធីពីលោក មាស ច័ន្ទពិសិដ្ឋ ព្រះរាជអាជ្ញានៃអយ្យការអមសាលាដំបូងខេត្តសៀមរាប។

មន្ត្រីក្រសួងបានឲ្យដឹងថារថយន្តដែលរងការបង្ក្រាប ម៉ាក HYUNDAI ពណ៌សលាយខៀវ ជាប្រភេទរថយន្តដឹកទំនិញចំណុះ២០តោន(V1) ពាក់ស្លាកលេខ កំពង់ចាម៣A ៧៨៨១ បានដឹកផលិតផលមានដើមកំណើតពីសត្វ(ជើងមាន់) ចំនួន១,១៤០កេះស្មើនឹង១៧,១០០គីឡូក្រាម។

មន្ត្រីបានបន្តថាវត្ថុតាង និងបទល្មើសខាងលើនេះ ត្រូវបានយកទៅរក្សាទុកនៅទីតាំងចត្តាឡីស័កសត្វ របស់ឣគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់ការទៅតាមនិតិវិធីច្បាប់។

បើតាមត្រីបានបញ្ជាក់ថារថយន្តដឹកផលិតផលមានដើមកំណើតពីសត្វនេះបានដឹក មកពីប្រទេសថៃ តាមច្រកអូរស្មាច់ សង្កាត់អូរស្មាច់ ខេត្តឧត្តរមានជ័យ ឆ្ពោះទៅចែកចាយនៅរាជធានីភ្នំពេញ ដោយពុំមានលិខិតអនុញ្ញាតអ្វីទាំងអស់។

សូមបញ្ជាក់ថាប៉ុន្មានថ្ងៃកន្លងទៅនេះក៏មានការបង្ក្រាបរថយន្តដឹក ផលិតផលដេីមកំណេីតពីរសត្វជាច្រើន២០តោន នៅខេត្តកំពង់ចាម ដោយរថយន្តដឹកបទល្មើសនេះត្រូវបានឆ្លងកាត់ ខេត្តឧត្តរមានជ័យ ខេត្តសៀមរាប នៅខេត្តកំពង់ធំ ហើយមិនត្រូវបានមន្ត្រីពេទ្យសត្វទាំងបីខេត្តធ្វើការបង្ក្រាបនោះទេ។ ជាពិសេសប្រធានពេទ្យសត្វខេត្តសៀមរាបលោកព្រំ វិច ត្រូវបានគេកត់សម្គាល់ថាជាមន្ត្រីអសកម្ម៕SRP

ខេត្តបាត់ដំបង៖មានការលើកឡើងថាលោកអ៊ុំ ចាន់រតនា ប្រធានការិយាល័យគយនិងរដ្ឋាករដូង នៅចំណុចភូមិអូរដារ  ស្រុកកំរៀង ខេត្តបាត់ដំបង បានប្រើអំណាចឲ្យកូនចៅរបស់ខ្លួនគាបយកលុយពីអាជីវករដឹកទំនិញ តាមតែអំពើចិត្តជាហេតុនាំឲ្យមានការផ្ទុះការតវ៉ាយ៉ាងខ្លាំង។

ក្រុមឈ្មួញដែលរកស៊ីដឹកផ្លែឈើនិងដឹកទំនិញគ្រប់ប្រភេទ តាមរថយន្តសាំយ៉ុង រថយន្តកូរ៉េ បានយកថយន្តជិត១០០គ្រឿង បិទផ្លូវ និងប្រមូលផ្តុំគ្នាតវ៉ានៅមុខការិយាល័យគយនិងរដ្ឋាករដូងបង្កឲ្យមានការកកស្ទះ និងបង្កការភ្ញាក់ផ្អើលយ៉ាងខ្លាំង។

ការដែលក្រុមអាជីវកលើកគ្នាតវ៉ាបែបនេះដោយសារតែទ្រាំពុំបានទៅនឹងអំពើគាបសង្កត់យកលុយពីក្រុមគយនិងរដ្ឋាករដូង ក្រោមមើលការខុសត្រូវរបស់លោកអ៊ុំ ចាន់រតនា ជាមេកើយ។ ក្រោយពីមានករណីបែបនេះគេឃើញលោក ភូ ភា អភិបាលរងអភិបាលរងខេត្តបាត់ដំបង ចុះមកជួយសម្របសម្រួល រកដំណោះស្រាយឲ្យក្រុមអាជីវករនិងលោក ប្រធានការិយាល័យគយនិងរដ្ឋាករដូង។

ប្រភពបានបន្តថាមូលហេតុដែលក្រុមឈ្មួញរកស៊ីដឹកផ្លែឈើនិងដឹកទំនិញគ្រប់ប្រភេទតាមរថយន្តសាំយ៉ុង.រថយន្តកូរ៉េលើកគ្នាមកតវ៉ា គឺដោយសារតែខាងការិយាល័យគយនិងរដ្ឋាករដូងដែលមានលោកអ៊ុំ ចាន់រតនា ជាប្រធានគយ ប្រើអោយកូនចៅក្រោមឱវាទទារបង់ពន្ធពីក្រុមឈ្មួញយកថ្លៃកប់ពពក។

ក្រុមអាជីវករបានប្រាប់អ្នកសារព័ត៌មានក្នុងស្រុកថា៖សព្វថ្ងៃលោកអ៊ុំ ចាន់រតនា កំពុងប្រើអំណាចរបស់ខ្លួនគាបឲ្យពួកគាត់បង់លុយក្បាលឡាន ក្នុងមួយរថយន្តសាំយ៉ុង(២០ម៉ឺនរៀល)។ដោយឡែករថយន្តកូរ៉េប្រភេទ២តោនកន្លះ តម្រូវអោយបង់ប្រាក់ ១២០,០០០០ (មួយលានពីរសែនរៀល)ដោយពុំមានចេញវិក្កយបត្រអ្វីទាំងអស់។

ប្រភពពីក្រុមអាជីវករបានបន្តថាកាលពីដើមឡើយគឺបង់ជាធម្មតា គឺក្នុងមួយរថយន្តសាំយ៉ុងខាងការិយាល័យគយនិងរដ្ឋាករដូង តម្រូវអោយបង់ប្រាក់ក្បាលឡាន(៣ម៉ឺនរៀលទៅ៤ម៉ឺនរៀល) សម្រាប់រថយន្ត២តោនកន្លះ តម្រូវអោយបង់តែ(១០ម៉ឺនរៀលទៅ១៥ម៉ឺនរៀលប៉ុណ្ណោះ)ហើយករណីនេះពុំមានចេញវិក្កយបត្រ ឲ្យពួកគាត់នោះទេ។

សូមជម្រាបថាក្រោយពីលោក ភូ ភា ដឹកនាំក្រុមឈ្មួញទាំងនោះចូលទៅក្នុងការិយាល័យគយនិងរដ្ឋាករដូង ដើម្បីរកដំណោះស្រាយដោយសម្រេចទី១ លោក អ៊ុំ ចាន់រតនា ប្រធានការិយាល័យគយនិងរដ្ឋាករដូង សម្រេចអោយក្រុមឈ្មួញរកស៊ីដឹកផ្លែឈើ និងដឹកទំនិញគ្រប់ប្រភេទបង់ពន្ធលើក្បាលរថយន្តសាំយ៉ុងជាធម្មតាវិញក្នុងមួយគ្រឿង។ ចំពោះការស្នើសុំរបស់អាជីវករ ខាងគយនិងធ្វើពាក្យស្នើសុំទៅថ្នាក់លើសិន បើខាងថ្នាក់លើសម្រេចអោយបង់ពន្ធបែបណានឹងចាំនិយាយគ្នាពេលក្រោយបន្តទៀត។ ទោះជាយ៉ាងណាអង្គភាពសៀមរាបប៉ុស្ដិ៍ នៅមិនទាន់ទទួលបានការបំភ្លឺពីការិយាល័យគយនិងរដ្ឋាករដូង នៅឡើយទេជុំវិញការចោទប្រកាន់ពីអាជីវករខាងលើនេះ។

មានការលើកឡើងបន្ថែមថានៅច្រកដូងស្រុកកំរៀងមានក្រុមឈ្មួញជាច្រើនបានដឹកជញ្ជូនទំនិញចេញចូល មិនមានការបង់ពន្ធឬបង់ពន្ធមិនគ្រប់ ដោយពួកគេបានឃុបឃិតគ្នាជាមួយស្ថាប័នគយ ដែលជាហេតុនាំឲ្យបាត់បង់ចំណូលចូលរដ្ឋយ៉ាងច្រើនក្នុងមួយខែៗ ក្នុងនោះត្រូវបានគេទម្លាយថាលោកអ៊ុំ ចាន់រតនា ប្រធានការិយាល័យគយនិងរដ្ឋាករដូងឃុបឃិតគ្នាជាមួយកូនចៅប្រមូលលុយពីក្រុមឈ្មួញដែលរកស៊ីដឹកផ្លែឈើនិងទំនិញគ្រប់ប្រភេទចេញពីប្រទេសថៃ តាមតែអំពើចិត្តដោយពុំមានចេញ វិក្កយបត្រ ឲ្យក្រុមឈ្មួញទាំងនោះទេ អាចជាហេតុនាំឲ្យបាត់បង់ថវិកាចូលរដ្ឋ រាប់ម៉ឺនដុល្លារក្នុងមួយខែៗ ដោយថវិកាទាំងនោះបានធ្លាក់ចូលទៅហោប៉ៅ របស់បក្ខពួករបស់តែប៉ុណ្ណោះ។ ដូច្នេះជាសារមួយជូនដល់លោកឱម យិនទៀង ប្រធានអង្គភាពប្រឆាំងអំពើពុករលួយ អាចបើកការស៊ើបអង្គេតទៅលើលោកអ៊ុំ ចាន់រតនា ប្រធានការិយាល័យគយនិងរដ្ឋាករដូងនិងបក្ខពួក ដែលកំពុងល្បីល្បាញប្រព្រឹត្តអំពើពុករលួយយ៉ាងធ្ងន់ធ្ងរ។ គួរបញ្ជាក់ថាហេតុការណ៍តវ៉ារបស់ក្រុមអាជីវករនេះបានកើតឡើងនៅថ្ងៃទី២៣ ខែកញ្ញា ឆ្នាំ២០២១ម្សិលមិញ៕SRP

ខេត្តសៀមរាប៖ស្ត្រីម្នាក់បានប្ដឹងសមត្ថកិច្ចថាមានករណីចោរប្លន់យកលុយជាង២ ម៉ឺនដុល្លារ។ ក៏ប៉ុន្តែករណីនេះក្រោយពីមានការស្រាវជ្រាវរបស់ប៉ូលិសស្រុកប្រាសាទបាគង ទើបដឹងថាជារឿងប្រឌិតនោះទេ។

លោកលឹម សម្បត្តិ អធិការនគរបាលស្រុកប្រាសាទបាគងបានឲ្យដឹងថា បន្ទាប់ពីទទួលបានសេចក្តីរាយការណ៍ និងពាក្យបណ្តឹង ថាមានករណី ប្លន់យកទ្រព្យ សម្បត្តិអស់លុយចំនួន២២០០០ដុល្លា កាលពីយប់ថ្ងៃទី ២៣ខែ កញ្ញាឆ្នាំ ២០២១ ម្សិលមិញ នៅចំណុចភូមិតាភោគ ឃុំបាគង ស្រុកប្រាសាទបាគង ខេត្តសៀមរាប លោកបានដឹកនាំកម្លាំងនគរបាលស្រុកសហការណ៍ ជាមួយកម្លាំង ការិយាល័យព្រហ្មទណ្ឌកម្រិតធ្ងន់បើកការស៊ើបអង្កេត។

លោកលឹម សម្បត្តិ បានបន្តថា ក្រោយពីបានធ្វើការស្រាវជ្រាវស៊ើបអង្កេតពាក់ព័ន្ធជុំវិញករណីនេះជាលទ្ធផល គឺជាប្រឌិតនិងប្តឹងបំភ្លៃរឿងថាត្រូវគេប្លន់មូលហេតុ ចាយលុយលក់ដីអស់ខ្លាចប្តីខឹងតែប៉ុណ្ណោះ៕SRP

ភ្នំពេញ៖សម្ដេចនាយករដ្ឋមន្ត្រីហ៊ុន សែន បានអះអាងថា វ៉ាក់សាំងបង្ការជំងឺកូវីដ១៩ ស៊ីណូវ៉ាក់ (Sinovac) របស់ក្រុមហ៊ុនចិន ចំនួន ៣លានដូសបន្ថែមទៀត ដែលជាការបញ្ជាទិញរបស់រាជរដ្ឋាភិបាលកម្ពុជាបានដឹកមកដល់ប្រទេសកម្ពុជាហើយ នៅថ្ងៃសុក្រ ទី២៤ ខែកញ្ញា ឆ្នាំ២០២១នេះ។

សម្ដេច ហ៊ុន សែន បានបន្តថា វ៉ាក់សាំងដែលកម្ពុជា បានបញ្ជាទិញមកនៅពេលនេះ គឺសម្រាប់បម្រើដល់ការចាក់ជូនកុមារអាយុ ៦ឆ្នាំ ទៅ១២ឆ្នាំ។ នៅចុងខែនេះ ក៏នឹងមានវ៉ាក់សាំងមកដល់ប្រមាណ ៣លានដូសបន្ថែមទៀត។

សូមជម្រាបថារាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន បានយកការចាក់វ៉ាក់សាំងបង្ការជំងឺកូវីដ១៩ គឺជាយុទ្ធសាស្ត្រលើសមរភូមិសង្គ្រាមជាមួយនឹងសត្រូវឥតស្រមោលកូវីដ១៩នេះ។ ការចាក់វ៉ាក់សាំងបង្ការជំងឺកូវីដ១៩ គឺមានសារៈសំខាន់ណាស់ក្នុងការជួយឱ្យប្រជាពលរដ្ឋមានអង្គបដិបក្ខរឹងមាំក្នុងការប្រយុទ្ធប្រឆាំងនឹងជំងឺកូវីដ១៩ កាត់បន្ថយអត្រាស្លាប់ដោយសារឥទ្ធិពលមេរោគ ហើយក៏ជួយកាត់បន្ថយការរីករាលដាលជំងឺផងដែរ។

លទ្ធផលដែលកម្ពុជាសម្រេចបានលើការងារចាក់វ៉ាក់សាំងនេះ បានធ្វើឱ្យកម្ពុជាអាចគ្រប់គ្រងស្ថានភាពនៃការរីករាលដាលមេរោគកូវីដ១៩នៅក្នុងប្រទេស ជាពិសេសជួយកាត់បន្ថយនូវអត្រាទទួលមរណភាព របស់ប្រជាពលរដ្ឋពីឥទ្ធិពលជំងឺកូវីដ១៩៕SRP

ភ្នំពេញ៖កម្ពុជាបានសម្រេចផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។ នេះបើតាមលិខិតរបស់នាយករដ្ឋមន្ត្រីហ៊ុន សែន បានចុះហត្ថលេខា នៅថ្ងៃទី ២៣ ខែកញ្ញាឆ្នាំ ២០២១។

ការដែលកម្ពុជាសម្រេចចិត្តផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌ យ៉ាងដូច្នេះបន្ទាប់ពីនាយករដ្ឋមន្ត្រី ហ៊ុន សែន មានប្រសាសន៍ នៅល្ងាចថ្ងៃទី២៣ម្សិលមិញ ថាមានវត្តមួយចំនួននៅរាជធានីភ្នំពេញមានការឆ្លងជំងឺកូវីដ-១៩៕SRP

ខេត្តត្បូងឃ្មុំ៖អភិបាលខេត្តត្បូងឃ្មុំ លោកជាម ច័ន្ទសោភ័ណ បានណែនាំជំរុញដល់មន្ត្រីនគរបាលទាំងអស់ ត្រូវបន្តធ្វើកិច្ចការពារសុខសុវត្ថិភាពសណ្តាប់ធ្នាប់ សាធារណៈ ជូនប្រជាពលរដ្ឋ ឲ្យបានកាន់តែល្អប្រសើរ ស្របតាមនូវគោលនយោបាល «ភូមិ-ឃុំមានសុវត្ថិភាព»។

អភិបាលខេត្ត ក៏បានអំពាវនាវដល់ប្រជាពលរដ្ឋទាំងអស់សូមបន្តអនុវ្តតន៍ឲ្យបានម៉ឺងម៉ាត់និងមានប្រសិទ្ធភាពនូវវិធានការ«៣កុំ-៣ការពារ» ដើម្បីខ្លួនយើង ក្រុមគ្រួសារយើង សហគមន៍យើង និងប្រទេសជាតិយើងទាំងមូលចៀសឆ្ងាយពីជំងឺដ៏អន្តរាយនេះ។ លោកក៏បានដឹកនាំក្រុមការងារបន្តចុះពិនិត្យភូមិសាស្ត្រមួយចំនួនបន្ថែមទៀត ក្នុងស្រុកក្រូចឆ្មារ ដើម្បីបន្តក្តាប់ព័ត៌មាន ដាក់ចេញវិធានការទប់ស្កាត់ជំងឺកូវីដ។

លោកថ្លែងជំរុញបែបនេះនៅថ្ងៃទី២៣ខែកញ្ញាឆ្នាំ២០២១នេះក្នុងឱកាសអញ្ជើញចុះជួបសាកសួរសុខទុក្ខដល់អាជ្ញាធរនិងកងកម្លាំងដែលកំពុងឈរជើងនៅទីតាំងគោលដៅចំនួន៤ក្នុងស្រុកក្រូចឆ្មារដើម្បីផ្តល់ការលើកទឹកចិត្តផងដែរ។គួរបញ្ជាក់ថាក្នុងឱកាសចុះជួបសាកសួរសុខទុក្ខលោកក៏បានឧបត្ថម្ភ មី៤០កេស ទឹកសុទ្ធ៤០កេស ម៉ាស២៥០០ម៉ាស អាកុល៦០លីត្រ និងកងកម្លាំងប្រមាណ៨៥នាក់និងថវិកាក្នុងម្នាក់២ម៉ឺនរៀលផងដែរ៕SRP

ខេត្តបាត់ដំបង៖ក្រុមអាជីវករដឹកឈើជាច្រើននាក់ បាននាំគ្នាតវ៉ារឿងគយគាបយកលុយពីពួកគាត់តាមតែអំពើចិត្ត។ ការផ្ទុះការតវ៉ានៅរសៀលថ្ងៃទី២៣ ខែកញ្ញានេះនៅមុខគយរដ្ឋាករ អូរដារ ស្រុកកំរៀង ខេត្តបាត់ដំបង។

ប្រភពបានឲ្យដឹងថាការដែលក្រុមអាជីវករ រកស៊ីដឹកផ្លែឈើ តាមរថយន្តតូចធំ បានលើកគ្នាតវ៉ាបែបនេះដោយសារតែគយអូរដារ តម្រូវឲ្យបង់ពន្ធ 60% នៃការដឹកទំនិញផ្លែឈើ។​  ដោយក្នុងនោះឡានពីរតោនកន្លះ ត្រូវបង់លុយ១២០,០០០០( មួយលានម្ភៃម៉ឺនរៀល) ដោយមិនមានការលើកឡើងនោះឡើយ។

ប្រភពពីក្រុមអាជីវករបានឲ្យដឹងថា កន្លងមកពួកគាត់ធ្លាប់បង់លុយការដឹកជញ្ជូនតាមឡានពីតោនកន្លះ គឺបង់តែ៥ ម៉ឺនរៀលតែប៉ុណ្ណោះ ប៉ុន្តែគយអូដារឡើងតម្លៃរហូតហើយតម្រូវឲ្យបង់លុយមុន បើទោះបីជាមិនទាន់ដឹកផ្លែឈើយ៉ាងណាក៏ដោយ។

ជុំវិញការលើកឡើងរបស់អាជីវករនេះ អង្គភាពសៀមរាបប៉ុស្ដិ៍ មិនទាន់ទទួលបានការបំភ្លឺពីក្រុមគយរដ្ឋាករ អូរដារ ស្រុកកំរៀង ខេត្តបាត់ដំបង នៅឡើយទេ។

បើតាមប្រភពបានឲ្យដឹងទៀតថានៅច្រកអូដារ ស្រុកកំរៀង ខេត្តបាត់ដំបង មានក្រុមឈ្មួញជាច្រើនបានដឹកជញ្ជូនទំនិញចេញចូល មិនមានការបង់ពន្ធឬបង់ពន្ធមិនគ្រប់ ដោយពួកគេបានឃុបឃិតគ្នាជាមួយស្ថាប័នគយ ដែលជាហេតុនាំឲ្យបាត់បង់ចំណូលចូលរដ្ឋយ៉ាងច្រើនក្នុងមួយខែៗ៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម នៅថ្ងៃពុធ​ ខែ ទី២២កញ្ញានេះ បាន​ដឹកនាំ​មន្ត្រី​រាជការ​ មន្ទីរ​អង្គភាព​ពាក់ព័ន្ធ​ជុំវិញខេត្ត​ និង​អាជ្ញាធរ​មូលដ្ឋាន​​ រួម​ជាមួយ​​ពុទ្ធបរិស័ទ​ជិត​ឆ្ងាយ​​ ចូលរួមកាន់បិណ្ឌវេនទី១ ព្រមទាំង​បាន​នាំ​យក​គ្រឿង ​ឧបភោគ បរិភោគ ចង្ហាន់ រួមនឹង​បច្ច័យ​មួយ​ចំនួន​​ ​វេរ​ប្រគេន​ដល់​ព្រះសង្ឃ​ ដែល​គង់​ចាំ​ព្រះ​វស្សា​អស់​កាល​ត្រីមាស​ នៅវត្តជ័យគីរី​ ​(ភ្នំហាន់ជ័យ​) ក្នុង​ស្រុក​កំពង់​សៀម ដេីម្បី​ឧទ្ទិស​កុសល​ផលបុណ្យ​ជូនទៅដល់បុព្វការីជន​ទាំងអស់ ដែលបានចាកឋានទៅកាន់លោកខាងមុខ​ រួមទាំង​​​ប្រជាពលរដ្ឋ​​ដែលបាន​ស្លាប់​បាត់បង់​ជីវិត​ដោយ​ជំងឺ​កូវីដ​-១៩​ ​ផង​ដែរ​។

គួរ​បញ្ជាក់​ថា​ ទេយ្យទាន​ និង​បច្ច័យ​ដែលវេរ​ប្រគេន​ដល់​ព្រះសង្ឃ​ក្នុងឱកាសកាន់បិណ្ឌវេនទី១​នេះ​រួមមាន​ បច្ច័យ​សរុប​​ ចំនួន​​ ៥លាន​ ៤សែនរៀល​ និង១០០ដុល្លារ​​ អង្ករ​ ២០០គីឡូក្រាម​ មី​ ៥កេស​ ទឹកបរិសុទ្ធ​ ៥កេស​ ទឹកក្រូច​ ៥កេស​ ទឹកដោះគោខាប់​ ១កេស​ធំ​ តែ​ ៥កញ្ចប់​ ស្ករស​ ៥គីឡូ​ ចង្ហាន់​ ៧ស្រាក់​ និង​ផ្លែឈើ​ ៥កន្ត្រក​ ផងដែរ។ឆ្នាំនេះពិធីបុណ្យកាន់បិណ្ឌនិងភ្ជុំបិណ្ឌបានចាប់ផ្តើម ពីថ្ងៃទី២២ ដល់ថ្ងៃទី២៨ខែកញ្ញាដល់ថ្ងៃទី​៦​ ខែតុលា​ ដែលមានរយៈពេល១៤ថ្ងៃ សម្រាប់​ការកាន់បិណ្ឌ និង១ថ្ងៃចុងក្រោយជាថ្ងៃភ្ជុំធំ៕SRP