ខេត្តសៀមរាប៖ផ្ទុះការរិះគន់ថា «សណ្ឋាគារស្ទឹងសៀមរាប» វាយរបង វត្តព្រះព្រហ្មរ័ត្ន ដើម្បីដាក់ម៉ាស៊ីនភ្លើង ធ្វើឲ្យប៉ះពាល់ដល់ការសមាធិរបស់ព្រះសង្ឃនិងឧបាសក ឧបាសិកា។

ព្រះចៅគ្រូអធិការវត្តព្រះព្រហ្មរ័ត្ន ព្រះតេជគុណព្រះនាម តង់ តន បានមានសង្ឃដីកាប្រាប់សារព័ត៌មាន ឲ្យដឹងនៅរសៀលថ្ងៃទី២៩ ខែវិច្ឆិកានេះថា ព្រះអង្គមិនថាអីទេ តែគណៈកម្មការវត្តនិងឧបាសក ឧបាសិកាចំណុះជើងវត្ត ស្នើសុំម្ចាស់សណ្ឋាគារស្ទឹងសៀមរាប មេត្តាជួយធ្វើរបងនោះឡើងវិញនិងជួយយកម៉ាស៊ីនភ្លើងចេញពីក្នុងវត្តវិញផងដែរ។

ប្រធានមន្ទីរធម្មការនិងសាសនាខេត្តសៀមរាប លោក វណ្ណា ប៊ុនណា មិនអាចទាក់ទងដើម្បីបំភ្លឺបាននៅឡើយទេ ជុំវិញករណីនេះ។

សូមជម្រាបថា សណ្ឋាគារស្ទឹងសៀមរាប មានទីតាំងស្ថិតនៅក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប ជាប់របងវត្តព្រះព្រហ្មរ័ត្ន។

ករណីនេះប្រជាពលរដ្ឋរំពឹងថាអាជ្ញាធរមន្ទីរពាក់ព័ន្ធនឹងមានវិធានការចំពោះម្ចាស់សណ្ឋាគារខាងលើ ជាក់ជាពុំខាន។

ពាក់ព័ន្ធទៅនឹងការលើកឡើងបែបនេះ អង្គភាពសៀមរាប ប៉ុស្ដិ៍ នៅពុំទាន់ទទួលបានការបំភ្លឺពីខាង«សណ្ឋាគារស្ទឹងសៀមរាប» នៅឡើយទេដោយពុំមានលេខទំនាក់ទំនង៕SRP

ខេត្តត្បូងឃ្មុំ​៖អភិបាលខេត្តលោក​ ជាម ច័ន្ទសោភ័ណ បានមានប្រសាសន៍ថា តួនាទីនិងការទទួលខុសត្រូវរបស់អ្នកនាំពាក្យ និងមន្ត្រីព័ត៌មានគឺជាមុខងារចាំបាច់ និងត្រូវពង្រឹងពង្រីកសមត្ថភាពឲ្យទាន់សភាពការណ៍ ការវិវឌ្ឍន៍រីកចម្រើននៃបច្ចេកវិទ្យា រួមនឹងអភិបាលកិច្ចលំហូរព័ត៌មានឲ្យកាន់តែមានប្រសិទ្ធភាពខ្ពស់ដើម្បីចូលរួមចំណែកជាមួយនឹងរាជរដ្ឋាភិបាលនៅក្នុងការដឹកនាំ ការអភិវឌ្ឍ និងការកសាងសង្គមជាតិមាតុភូមិរក្សាបាននូវសុខសន្តិភាព និងការចម្រើនឡើងថែមទៀត។

លោក​អភិបាលខេត្ត ក៏បានថ្លែងអំណរគុណយ៉ាងជ្រាលជ្រៅចំពោះ លោក​ ប្រធានអង្គភាពអ្នកនាំពាក្យរាជរដ្ឋាភិបាល ដែលបានយកចិត្តទុកដាក់នៅក្នុងការបណ្តុះបណ្តាលកសាងសមត្ថភាពដល់មន្ត្រីព័ត៌មាននិងអ្នកនាំពាក្យរបស់រដ្ឋបាលថ្នាក់ក្រោមជាតិទទួលបាននូវធនធានដ៏សំខាន់លើវិស័យការងារជំនាញជាមន្ត្រី និងអ្នកនាំពាក្យរបស់ស្ថាប័នអង្គភាពសាធារណៈនៅក្នុងកម្រិតសមស្របមួយ។

លោកមានប្រសាសន៍យ៉ាងដូច្នេះ នៅខេត្តត្បូងឃ្មុំ​ នាព្រឹកមិញនេះ ក្នុងសិក្ខាសាលាស្តីពី « ការិយាល័យព័ត៍មានឈ្លាសវៃ និងអភិបាលកិច្ចល្អក្នុងវិស័យព័ត៍មាន » ដែលរៀបចំដោយអង្គភាពអ្នកនាំពាក្សរាជរដ្ឋាភិបាល។

លោក​ ផៃ ស៊ីផាន រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានអង្គភាពអ្នកនាំពាក្សរាជរដ្ឋាភិបាល បានសម្ដែងនូវអំណរគុណយ៉ាងខ្លាំង ដល់រដ្ឋបាលខេត្តត្បូងឃ្មុំ​ ដែលបានផ្តល់ការអនុញ្ញាតដល់ក្រុមការងាររបស់អង្គភាពអ្នកនាំពាក្យរាជរដ្ឋាភិបាល​ មានលទ្ធភាពនៅក្នុងការរៀបចំសិក្ខាសាលាស្ដីពីការិយាល័យព័ត៌មានឆ្លាតវៃនិងអភិបាលកិច្ចល្អនៅក្នុងវិស័យព័ត៌មាន ជូនដល់មន្ត្រីជំនាញខេត្តទាំង៤ ដែលបានចូលរួមនាពេលនេះ។

លោក​មានប្រសាសន៍បន្តថា នេះគឺជាការបង្ហាញនូវការលើកទឹកចិត្តយ៉ាងក្លៀវក្លា និងផ្តល់ភាពកក់ក្តៅដល់អង្គភាពអ្នកនាំពាក្យរាជរដ្ឋាភិបាលនៅក្នុងកិច្ចបន្តពង្រឹងការអនុវត្តតួនាទីភារកិច្ចស្នូលរបស់ខ្លួនដោយឆន្ទៈប្ដេជ្ញាយ៉ាងមោះមុតចូលរួមចំណែកលើអភិបាលកិច្ចល្អនៃវិស័យព័ត៌មាននៅក្នុងកិច្ចការពារសន្តិភាព ស្ថិរភាពសង្គម និងការអភិវឌ្ឍដ៏ផុសផុល ក្រោមគ្គុទ្ទេសដ៏ប៉ិនប្រសប់និងឈ្លាសវៃរបស់សម្ដេចហ៊ុន សែន។

សូមជម្រាបថា សិក្ខាសាលាស្ដីពី «ការិយាល័យព័ត៌មានឆ្លាតវៃនិងអភិបាលកិច្ចល្អ នៅក្នុងវិស័យព័ត៌មាន» គឺជាយន្តការដែលបានបង្ហាញពីទិសដៅព័ត៌មាននៅតាមភូមិសាស្ត្រ ជាក់ស្ដែងស្ដីអំពីបញ្ហានីមួយៗកើតឡើងនិងការដោះស្រាយនៅថ្នាក់មូលដ្ឋានខេត្ត ស្រុក ឃុំសង្កាត់ ដើម្បីចូលរួមយ៉ាងជិតស្និទ្ធជាមួយនឹងរាស្ត្រ ឈរលើគោលការណ៍ឆ្លើយឆ្លងយ៉ាងជិតស្និទ្ធ រាស្ត្រនិងរដ្ឋ ដែលបង្កើតបាននូវទំនុកចិត្តការព្រមព្រៀង ការឯកភាពគាំទ្រប្រសិទ្ធភាពនិងភាពស័ក្តិសិទ្ធិឆ្លើយទាន់ពេលវេលា​។

សូមជម្រាបថា សិក្ខាសាលានេះ មានការអញ្ជើញចូលរួម ពីថ្នាក់ដឹកនាំរដ្ឋបាលខេត្ត ប្រធាន-អនុប្រធានមន្ទីរអង្គភាពជំនាញជុំវិញខេត្ត និងមន្រ្តីពាក់ព័ន្ធ មកពីខេត្តចំនួន៤រួមមាន ខេត្តត្បូងឃ្មុំ ខេត្តកំពង់ចាម ខេត្តព្រៃវែង និងខេត្តស្វាយរៀង មានសិក្ខាកាមសរុបចំនួន១៨០នាក់ ដែលប្រព្រឹត្តិទៅរយ:ពេល២ថ្ងៃ ចាប់ពីថ្ងៃទី២៩ដល់ថ្ងៃទី​៣០ ខែវិច្ឆិកា ឆ្នាំ២០២១ នឹងធ្វើពិធីបិទ ក្រោមវត្តមានលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅថ្ងៃស្អែក៕SRP

ខេត្តកណ្តាល៖សម្ដេច សខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានមានប្រសាសន៍ថា បច្ចុប្បន្នក្រសួងមហាផ្ទៃ កំពុងពិនិត្យលទ្ធភាព ដើម្បីបង្កើតច្រកចេញចូលតែមួយបន្ថែមទៀត នៅទូទាំងប្រទេសកម្ពុជា។ សម្ដេចបញ្ជាក់ថា បើករណីច្រកចេញចូលតែមួយនេះ បម្រើពលរដ្ឋមិនបានល្អ នៅមានការិយាល័យទទួលពាក្យបណ្តឹង ឬការិយាល័យប្រជាពលរដ្ឋ មួយទៀត ដែលទទួលពាក្យបណ្តឹងពីប្រជាពលរដ្ឋ ក្នុងករណីការិយាល័យច្រកចេញចូលតែមួយនេះមិនអាចឆ្លើយតបនិងសំណូមពរចាំបាច់របស់ប្រជាពលរដ្ឋ។

សម្តេចស ខេង បានបញ្ជាក់បន្ថែមថា បើតាមរបាយការណ៍ មកដល់ពេលនេះ ការិយាល័យច្រកចេញចូលតែមួយ មាននៅទូទាំងរាជធានីភ្នំពេញ ខេត្តកណ្តាល ខេត្តកំពង់ចាម និងបាត់ដំបង ត្រូវបានដាក់គ្រប់ស្រុកទាំងអស់រួចរាល់ហើយ សម្ដេចស ខេង បានមានថ្លែងថា ទាក់ទងនឹងការបង្កើតច្រកចេញចូលតែមួយនេះ គោលបំណងធំបំផុត គឺដើម្បីឆ្លើយតបតាមការអនុវត្តគោលនយោបាយរបស់រាជរដ្ឋាភិបាល ដើម្បីឱ្យជីវភាពរស់នៅរបស់ប្រជាពលរដ្ឋកាន់តែប្រសើរឡើង ដោយបង្កលក្ខណៈងាយស្រួល ដោយមិនប្រើរយៈពេលយូរក្នុងការទទួលបាននូវព័ត៌មានរហ័ស ការផ្តល់សេវារដ្ឋបាលរហ័ស និងមានតម្លាភាព។

សម្ដេចស ខេង មានប្រសាសន៍បែបនេះ នៅក្នុងឱកាស អញ្ជើញដឹកនាំគណៈប្រតិភូនៃស្ថានទូតអាល្លឺម៉ង់ និងអូស្រ្តាលី ចុះធ្វើទស្សនកិច្ចនៅប៉ុស្តិ៍នគរបាលរដ្ឋបាលឃុំដីឥដ្ឋ បណ្ឌិត្យសភានគរបាលកម្ពុជា និងការិយាល័យច្រកចេញចូលតែមួយ ស្រុកកៀនស្វាយ ខេត្តកណ្តាល នាព្រឹកមិញនេះ៕SRP

ភ្នំពេញ៖ក្រុមប្រជាពលរដ្ឋ​ប្រមាណជាង១៥០គ្រួសារ ដែល​ទិញ​ផ្ទះ​ពី​បុរី វី​អាយ​ភី (VIP) បានដាក់​ពាក្យបណ្តឹង​ អគ្គនាយក​ក្រុមហ៊ុន អ​.​អិន វី​អាយ​ភី រៀល អ៊ី​ស្តេត ឯ​.​ក និង​បុរី​វី​អាយ​ភី ទៅខុទ្ទកាល័យសម្តេចហ៊ុន សែន កាលពី​ព្រឹក​ថ្ងៃទី​២៦ ខែវិច្ឆិកា ឆ្នាំ​២០២១ ដើម្បីសុំឲ្យ​ជួយ​អន្តរាគមន៍​។​

នៅក្នុង​ពាក្យបណ្តឹង​ប្រជាពលរដ្ឋ​ បាន​ជម្រាបជូន​សម្តេច​អគ្គមហាសេនាបតី​តេ​ជោ ហ៊ុន សែន​នាយករដ្ឋមន្ត្រី​នៃ​ព្រះរាជា​ណា ចក្រ​កម្ពុជា​ថា “​យើងខ្ញុំ​បាន​ទិញ​ផ្ទះ​ពី​បុរី VIP តាំងពី​ឆ្នាំ​២០១៨ រហូតដល់​បច្ចុប្បន្ន​ខា​ង​បុរី​ ធ្វើ​ផ្ទះ​មិនទាន់​ហើយ​តាម​ការកំណត់ និង​ខ្លះ​ហើយ​តែ​មិនទាន់បាន​ប្លង់​កម្មសិទ្ធិ​។ ពេល​យើងខ្ញុំ​សុំ​ជួប​ដើម្បី​ចរចា​ដោះស្រាយ​តែ​ខាង​បុរី​ មិន​ព្រម​ជួប និង​ចេះតែ​គេចវេស​មិន​ព្រម​ចូលខ្លួន​ដោះ​ស្រ​យ​ជាមួយ​ពួកយើងខ្ញុំ​”​។​

​ជាមួយគ្នានេះ ប្រជាពលរដ្ឋ​បាន​សូម​សម្តេចនាយក​រដ្ឋមន្ត្រី ហ៊ុន សែន ជួយ​អន្តរាគមន៍​ទៅ​លោក​ប្តឹង​លោក ហម រ៉​ន និង លោក វន វណ្ណៈ អគ្គនាយក​ក្រុមហ៊ុន អ​.​អិន វី​អាយ​ភី រៀល អ៊ី​ស្តេត ឯ​.​ក​និង​បុរី​វី​អាយ​ភី​សាងសង់​ផ្ទះ​ឲ្យ​ប្រជាពលរដ្ឋ​ឲ្យ បាន​រួចរាល់ និង​ប្រគល់​ប្លង់​កម្មសិទ្ធិ​មក​ឲ្យ​ពួកគាត់​។​

អ្នកស្រី សេក ចាន់​រ៉ា តំណាង​ប្រជាពលរដ្ឋ​បាន​ឲ្យ​ដឹងថា ពួកគាត់​ធ្លាប់បាន​ដាក់ពាក្យ​បណ្តឹង​ប្តឹងទៅ​សង្កាត់ ខណ្ឌ​និង សាលា​រាជធានី​ភ្នំពេញ​ ឲ្យ​ជួយ​រក​ដំណោះស្រាយ​ តែ​មិនទទួលបាន​ដំណោះស្រាយ​នោះទេ​ ទើបបានជា​ពួកគាត់​ដាក់ពាក្យ​ប្តឹង ទៅ​សម្តេច​តេ​ជោ ហ៊ុន សែន ឲ្យ​ជួយ​អន្តរាគមន៍​។

អ្នកស្រី សេក ចាន់​រ៉ា បាន​បញ្ជាក់ថា អ្នកខ្លះ​បង់លុយ​ផ្តាច់​ហើយ​អត់បាន​ទាំង​ប្លង់ អត់​បាន​ទាំង​ផ្ទះ​ នៅ​អ្នកខ្លះ​បង់​រំលស់ ខាង​ក្រុមហ៊ុន​អត់ដា​ក់ជាង​សាងសង់​។​ ហើយ​ក្រុមហ៊ុន​កុងត្រា​ជាមួយ​អតិថិជន​រយៈពេល​១២​ខែ​ធ្វើ​ផ្ទះ​ហើយ​ដល់ពេល​១២​ខែ អត់​ទាន់​ហើយ ក្រុមហ៊ុន​ធ្វើ​កុងត្រា​សា​ថ្មី​ទៀត បន្ត​តាំងពី​១២​ខែ​រហូតដល់​បី ទៅ​បួន​ឆ្នាំ​ដោយ​អត់​ព្រម​ដាក់​ជាង​សាងសង់នោះទេ​។​ ខាង​ថៅកែ​បុរី​ គេចវេស​មិន​ព្រម​ដោះស្រាយ​ជាមួយ​អតិថិជន​ទេ​។​ គាត់​ដាក់ពាក្យ​ប្តឹងទៅ​ខណ្ឌ​ឲ្យ​ជួយ​អន្តរាគមន៍​ គឺ​គេ​មិនមាន​ដំណោះស្រាយ​ឲ្យ​នោះទេ បែរជា​ហៅ​ប្រជាពលរដ្ឋ​ទៅ​សម្រួល។​ ទៅ​សម្រួល​យ៉ាងម៉េច​ប្រជាពលរដ្ឋ​ចង់​ឲ្យ​ខាងខណ្ឌហៅភាគី​ទាំងសងខាង​ មក​តទល់​គ្នា​ដោះស្រាយ​មិនមែន​ឲ្យ​ទៅ​សម្រួល​ទេ​ តែ​ខាង​ខណ្ឌ​កាន់ជើង​ខាង​បុរី​ គេ​អត់​មាន​ដំណោះស្រាយ​ឲ្យ​ពួក​ប្រជាពលរដ្ឋ​ បែរជា​ឲ្យ​ប្រជាពលរដ្ឋ​ សម្រួល​ទៅវិញ សម្រួល​ម៉េច​កើត​បើ​ខាង​បុរី​ខុស​។​

អ្នកស្រី​បាន​បន្តថា​ខាង​ក្រុមហ៊ុន​មិនមាន​ដំណោះស្រាយ​ឲ្យ​ប្រជាពលរដ្ឋ​ បែរជា​និយាយ​ឲ្យ​ប្រជាពលរដ្ឋ​ចង់​ប្តឹង​ ទៅដល់​ណា​ ប្តឹងទៅ​។ ហើយ​កន្លងមក​ប្រជាពលរដ្ឋ​បានដាក់​ពាក្យ​ប្តឹងទៅ​សង្កាត់ ខណ្ឌ រហូតដល់​សាលា​រាជធានី​ភ្នំពេញ តែ​មិនមាន​ដំណោះស្រាយ ទើប​ប្រជាពលរដ្ឋ​នាំគ្នា​ឡើងទៅ​ដាក់ពាក្យ​ប្តឹង​នៅ​ខុទ្ទកាល័យ​សម្តេចនាយក​រដ្ឋមន្ត្រី ហ៊ុន សែន ឲ្យ​ជួយ​អន្ត​រាមន៍​។​

ជុំវិញការលើកឡើងរបស់ប្រជាពលរដ្ឋបែបនេះ អង្គភាពសៀមរាបប៉ុស្ដិ៍ នៅពុំទាន់ទទួលបាន ការឆ្លើយតបបំភ្លឺ ពីលោក​ហម រ៉​ន និង​លោក វន វណ្ណៈ អគ្គនាយក​ក្រុមហ៊ុន អ​.​អិន វី​អាយ​ភី រៀល អ៊ី​ស្តេត ឯ​.​ក និង​បុរី​វី​អាយ​ភី នៅឡើយទេ។

បញ្ជាក់​បុរី វី​អាយ​ភី (VIP) មាន​អាសយដ្ឋាន​ស្ថិតនៅ​ភូមិ​ម៉ឺន​ត្រា​ សង្កាត់​ស្ពានថ្ម​ ខណ្ឌដង្កោ​រាជធានី​ភ្នំពេញ​ ពាក់ព័ន្ធ​រឿង​សាងសង់​ផ្ទះ មិនទាន់​រួចរាល់ និង​ទាមទារ​ប្រគល់​ប្លង់​កម្មសិទ្ធិ​ឲ្យ​ពួកគាត់ ពីព្រោះ​ហួស​កិច្ចសន្យា ពីរទៅបីឆ្នាំ​ហើយ​៕SRP

ភ្នំពេញ៖បុរសម្នាក់ត្រូវបានសមត្ថកិច្ច នគរបាលខណ្ឌកំបូល ឃាត់ខ្លួនករណីរំលោភសេពសន្ថវៈ កាលពីវេលាម៉ោង២៤និង០០នាទី ឈានចូលថ្ងៃទី២៦ ខែវិច្ឆិកា ឆ្នាំ២០២១ នៅភូមិកប់ភ្លុក សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។

ការឃាត់ខ្លួនក្រោយពីទទួលបានពាក្យបណ្តឹងពីជនរងគ្រោះ ឈ្មោះ សន ស្រីអូន ភេទស្រី អាយុ២២ឆ្នាំ មុខរបរម៉ាស្សា កោសជប់ មានទីលំនៅបច្ចុប្បន្នភូមិគោកឃ្លាង សង្តាត់គោកឃ្លាង ខណ្ឌសែនសុខ រាជធានីភ្នំពេញ។

ជនសង្ស័យឈ្មោះ ផេង ភក្តី ហៅ និចហ្សីន ភេទប្រុស អាយុ២៤ឆ្នាំ មុខរបរកម្មករ មានទីលំនៅបច្ចុប្បន្ន ភូមិតាំងរនាម សង្កាត់ប្រទះឡាង ខណ្ឌកំបូល រាជធានីភ្នំពេញ (គ្មានសារធាតុញៀន)

សមត្ថកិច្ចបានឲ្យដឹងថា មុនពេលកើតហេតុ ជនរងគ្រោះបានស្គាល់គ្នាជាមួយជនសង្ស័យតាមFacebook អ្នកទាំងពីរបានណាត់ជួបគ្នានៅម្តុំសួនកុមារមុខផ្សារស៊ីនជូរី រួចនាំគ្នាទៅលេងកោះពេជ្រ បាននាំគ្នាផឹកស៊ីនៅទីនោះ ក្រោយពីត្រឡប់មកវិញជនសង្ស័យមិនបានដឹកជនរងគ្រោះទៅផ្ទះវិញទេ បានដឹកជនរងគ្រោះមកទីកន្លែងស្ងាត់ ចំណុចដីវាលក៏បានធ្វើសកម្មភាពតែម្ដង។

បច្ចុប្បន្នជនសង្ស័យត្រូវបាននគរបាលខណ្ឌកំបូល កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់៕SRP

ភ្នំពេញ៖ឆ្លើយតបសំណូមពររបស់ សម្តេចហេង សំរិន ប្រធានរដ្ឋសភា ឯកអគ្គរដ្ឋទូតប្រទេសឆែក បានសន្យានឹងបន្តជំរុញកិច្ចសហប្រតិបត្តិការលើវិស័យពាណិជ្ជកម្ម វិនិយោគ និងទេសចរណ៍ ឱ្យកាន់តែល្អប្រសើរថែមទៀតជាមួយកម្ពុជា ក្រោយជំងឺរាតត្បាតកូវីដ-១៩ បានធូរស្បើយនោះ។ 

មានប្រសាសន៌ក្នុងជំនួបសវនាការជាមួយសម្តេចប្រធានរដ្ឋសភា លោក ម៉ាទីន វែវរ៉ា (Martin Vavra) ឯកអគ្គរដ្ឋទូតថ្មី នៃសាធារណរដ្ឋឆែក ប្រចាំកម្ពុជា បានសន្យានឹងខិតខំជំរុញអ្នកវិនិយោគិនឆែកមកបណ្តាក់ទុននៅកម្ពុជាឲ្យបានច្រើនឡើង។ លោកបានជម្រាបសម្តេចថា ក្រុមហ៊ុនរបស់ឆែកបាននិងកំពុងវិនិយោគនៅក្នុងប្រទេសថៃ និងប្រទេសវៀតណាម ដូច្នេះលោកនឹងសិក្សាដើម្បីជំរុញកិច្ចសហប្រតិបត្តិការពាណិជ្ជកម្មរវាងប្រទេសទាំងពីរឱ្យកាន់តែមានទំហំធំឡើង។

ទោះយ៉ាងណា លោក ម៉ាទីន វែវរ៉ា លើកឡើងថាឆែកបានផ្តល់ជំនួយទ្វេភាគីមកកម្ពុជាជាច្រើននៅក្នុងវិស័យសុខាភិបាល និងអប់រំ។ កាលពីពេលថ្មីនេះជំនួយឧបករណ៍បរិក្ខាពេទ្យជាច្រើនបានផ្តល់ជូនមន្ទីរពេទ្យខេត្តតាកែវ ហើយឆែកនៅបន្តផ្តល់ជំនួយមនុស្សធម៌មកកម្ពុជាបន្តបន្ទាប់ទៀត ពិសេសអាហារូបករណ៍ដល់សិស្ស និស្សិត និងមន្រ្តីរាជការកម្ពុជាបានទៅសិក្សានៅសាធារណរដ្ឋឆែក។

សម្តេចហេង សំរិន បានអនុញ្ញាតឱ្យ លោក ម៉ាទីន វែវរ៉ា ចូលជូបសម្តែងការគួរសមនាព្រឹកថ្ងៃទី២៩ ខែវិច្ឆិកា ឆ្នាំ២០២១ នៅវិមានរដ្ឋសភា។ ក្រៅពីសំណូមពរខាងលើ សម្តេចប្រធានរដ្ឋសភាបាន ស្វាគមន៍ និងអបអរសាទរលោក ម៉ាទីន វែវរ៉ា ដែលត្រូវបានរដ្ឋាភិបាលឆែក តែងតាំងជាឯកអគ្គរដ្ឋទូត ប្រចាំនៅព្រះរាជាណាចក្រកម្ពុជា។

សម្តេចបានលើកឡើងថា ប្រទេសទំាងពីរកម្ពុជា-ឆែក បាន ភ្ជាប់ទំនាក់ទំនង និងកិច្ចសហប្រតិបត្តិការជាមួយគ្នាអស់រយៈពេលជាយូរមកហើយ ហើយប្រជាជាតិទាំងពីរ ទទួលបានផ្លែផ្កាដែលកើតចេញពីកិច្ចសហប្រតិបត្តិការដ៏ល្អនេះ ជារៀងរហូតមក។ នៅក្នុងដំណាក់កាលជាបន្ត បន្ទាប់ ឆែក បានរួមចំណែកអភិវឌ្ឍន៍កម្ពុជាយ៉ាងច្រើន គឺតាំងពីអតីតឆេកូស្លូវ៉ាគី រហូតដល់បច្ចុប្បន្ន។

សម្តេចបានមានប្រសាសន៍បញ្ជាក់ថាប្រជាជនកម្ពុជាសុទ្ធតែបានដឹងថា ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានសិក្សារៀនសូត្រនៅសាធារណរដ្ឋឆែក ដែលជាប្រទេសមានប្រព័ន្ធអប់រំល្អ ប្រកបដោយគុណភាពខ្ពស់ តាំងពីសម័យមុនមកម៉្លេះ។

សម្តេចប្រធានរដ្ឋសភាមានជំនឿថាបេសកកម្មការទូតថ្មីរបស់លោក នៅកម្ពុជាពិតជាមានសារសំខាន់ខ្លាំងណាស់ ក្នុងការបន្តលើកកម្ពស់ទំនាក់ទំនង ចំណងមិត្តភាព និងកិច្ចសហប្រតិបត្តិការរវាងប្រទេស ទំាងពីរ ដែលមានស្រាប់ ឱ្យកាន់តែល្អប្រសើរមួយកម្រិតថែមទៀត។

សម្តេចប្រធានបានបញ្ជាក់ថា រដ្ឋសភាកម្ពុជាគាំទ្រចំពោះបេសកកម្មការទូត របស់ឯកឧត្តម និងត្រៀមធ្វើកិច្ចសហប្រតិបត្តិការពេញលេញ ដើម្បីឱ្យបេសកកម្មការទូតរបស់ឯកឧត្តម ប្រចាំនៅកម្ពុជា ទទួលបានជោគជ័យ៕SRP

ខេត្តកំពង់ចាម៖ លោក​ កៅ សុខអាន អភិបាលរងខេត្ត តំណាង​លោក​​ អ៊ុន​ ចាន់ដា​ ភិបាលខេត្តកំពង់ចាម​ នៅព្រឹក​មិញនេះ​បាន​អញ្ជើញកាត់បេីបវិញ្ញាសារប្រឡងជ្រើសរើសបេក្ខជន​ឲ្យ​ចូល​បម្រើ​ការងារ​នៅ​រដ្ឋបាលខេត្តកំពង់ចាម ក្នុងក្របខ័ណ្ឌក្រសួងមហាផ្ទៃ​។

គួរ​បញ្ជាក់​ថា​ ការប្រឡងក្របខ័ណ្ឌមន្ត្រីរដ្ឋបាលជាន់ខ្ពស់ ក្របខ័ណ្ឌមន្ត្រីក្រមការ និងក្របខ័ណ្ឌលេខាធិការរដ្ឋបាល សម្រាប់ឆ្នាំ២០២១ នេះបានចាប់ដំណើរការនាព្រឹកថ្ងៃទី២៨ ខែវិច្ឆិកា ឆ្នាំ២០២១ ក្នុងក្របខ័ណ្ឌទូទាំងប្រទេសក្រោម កិច្ចសហការរវាង អាជ្ញាធរដែនដី និងក្រសួងមហាផ្ទៃ។ ដោយឡែកសម្រាប់ខេត្តកំពង់ចាម បានជ្រើសរើសយកសាលាបឋមសិក្សា និងវិទ្យាល័យ ដីដុះ ធ្វើជាមណ្ឌលប្រឡង ដែលក្របខ័ណ្ឌមន្ត្រីរដ្ឋបាលជាន់ខ្ពស់ មានចំនួន​៥បន្ទប់ ក្របខ័ណ្ឌមន្ត្រីក្រមការ មាន ៦បន្ទប់ និងក្របខ័ណ្ឌលេខាធិការរដ្ឋបាល មានចំនួន​ ១៦បន្ទប់។​ ដែលមានបេក្ខជនដាក់ពាក្រប្រឡងសរុបចំនួន ៤០៧នាក់ ក្នុងនោះមានបេក្ខជនដាក់ពាក្យប្រឡងក្របខ័ណ្ឌមន្ត្រីរដ្ឋបាលជាន់ខ្ពស់ចំនួន ៧៦នាក់ ស្រីចំនួន ៣៦នាក់ ក្របខ័ណ្ឌមន្ត្រីក្រមការចំនួន ៩២នាក់ ស្រីចំនួន ៤៦នាក់ និងក្របខ័ណ្ឌលេខាធិការដ្ឋបាលចំនួន ២៣៩នាក់ ស្រីចំនួន ១៧៥នាក់។ ក្នុងនោះត្រូវធ្វើការជ្រើសរើសទាំង ៣ក្របខ័ណ្ឌ នៅខេត្តកំពង់ចាម​ ចំនួន ៨នាក់។
លោក​ កៅ សុខអាន អភិបាលរងខេត្ត និងលោកនាយករដ្ឋបាលសាលាខេត្ត ព្រមទាំងតំណាងក្រសួងមហាផ្ទៃ បានចូលរួមកាត់វិញ្ញាសារបើកការប្រឡងនេះ ដែលមានវិញ្ញាសារ ក្របខ័ណ្ឌមន្ត្រីរដ្ឋបាលជាន់ខ្ពស់ និងក្របខ័ណ្ឌមន្ត្រីក្រមការ រយៈពេល២ម៉ោង ជំនាញឯកទេស (កំណែទម្រង់រដ្ឋបាលសាធារណៈ និងកំណែទម្រង់វិមជ្ឍការ និងវិសហមជ្ឍការ និងភាសារអង់គ្លេស និងក្របខ័ណ្ឌលេខាធិការរដ្ឋបាល រយៈពេល ២ម៉ោង ចំណេះដឹងទូទៅ ចំណេះដឹងកិច្ចការរដ្ឋបាល និងគណិតវិទ្យា​​ផងដែរ​៕SRP

ខេត្តត្បូងឃ្មុំ​៖រដ្ឋបាល​ខេត្តត្បូងឃ្មុំ មានបេក្ខជន
ប្រឡងចូលបម្រើការងារនៅក្របខណ្ឌក្រសួងមហាផ្ទៃចំនួន១៣៣រូប។

ពាក់ព័ន្ធការប្រឡងនេះ លោក​ ជាម ច័ន្ទសោភ័ណ អភិបាលខេត្តត្បូងឃ្មុំ នៅព្រឹកមិញបាន​អញ្ជើញ​កាត់បើកវិញ្ញាសារប្រឡងជ្រើសរើស នេះបានធ្វើឡើងនៅសាកលវិទ្យាល័យ ហេង សំរិន ត្បូងឃ្មុំ។

អភិបាលខេត្តបានលើកឡើងថា ការសិក្សារៀនសូត្រគឺជារឿងមួយសំខាន់ណាស់ សម្រាប់ប្អូនៗគ្រប់រូប តែអ្វីដែលកាន់តែសំខាន់នោះ គឺក្រោយការការៀនសូត្រ ដែលទាំងអស់គ្នាត្រូវប្រគួតប្រជែងលើទីផ្សារកាងារ មិនថាក្នុងក្របខណ្ឌរដ្ឋ ឬ ឯកជននោះទេ ដែលទាមទានូវចំនេះដឹងយ៉ាងពិតប្រាកដ។

អភិបាលខេត្ត​ក៏បានផ្តាំផ្ញើដល់បេក្ខជនទាំងអស់ត្រូវបញ្ចេញឲ្យអស់នូវសមត្ថភាព ដើម្បីទទួលបានជោគជ័យ រៀងៗខ្លួន ហើយក្នុងនោះមិនត្រូវធ្វើសកម្មភាពណាមួយដែលខុសទៅនឹងលក្ខណនៃការប្រឡងឡើយ ពោលគឺប្រើប្រាសសមត្ថភាពរៀងៗខ្លួនប្រកបដោយតម្លាភាព និងភាពយុត្តិធម៌។

សូមជម្រាបថា ការប្រឡងជ្រើសរើសបេក្ខជនឲ្យចូលបម្រើការងារនៅ​រដ្ឋបាល​ខេត្តត្បូងឃ្មុំ ក្នុងក្របខ័ណ្ឌ​មន្ត្រី​រាជការស៉ីវីលក្រសួងមហាផ្ទៃ មានបេក្ខជនសរុបចំនួន ១៣៣នាក់ ស្មើនឹង មាន៩បន្ទប់ ក្នុងនោះ ក្របខ័ណ្ឌមន្ត្រីគ្រប់រដ្ឋបាលជាន់ខ្ពស់៤បន្ទប់ ៦២នាក់ និងក្របខ័ណ្ឌមន្ត្រីក្រមការ ៥បន្ទប់ ៧១ នាក់ ដោយប្រើរយៈពេល១ព្រឹក មានវិញ្ញាសារ ជំនាញឯកទេស​និងភាសារអង់គ្លេស​៕SRP

ខេត្តសៀមរាប៖បុរសម្នាក់បានបែកក្បាលស្លាប់ភ្លាមៗ ខណ:បើកម៉ូតូទៅបុករថយន្តធុនធំ១គ្រឿង ចំពេញទំហឹងដែលតៃកុងឈប់ទិញខារ៉ាបាវផឹក។

ហេតុការណ៍បានកើតឡើងនៅថ្ងៃទី២៧ ខែវិច្ឆិកា ឆ្នាំ២០២១ វេលាម៉ោង២១និង១០នាទីនៅចន្លោះបង្គោលគីឡូលេខ ៣០០-៣០១ ស្ថិតក្នុងភូមិលលៃ ឃុំបាគង ស្រុកប្រាសាទបាគងលើផ្លូវជាតិលេខ៦។

លោកលឹម  សម្បត្តិ អធិកានគរបាលស្រុកប្រាសាទបាគង បានឲ្យដឹងថា ករណីគ្រោះថ្នាក់ចរាចរណ៍នេះ រវាងម៉ូតូនិងរថយន្តចតស្ងៀម ដោយរថយន្តម៉ាកហ៊ីណូពណ៌ស ពាក់ស្លាកលេខត្បូងឃ្មុំ 3A 2904 បើកបរដោយមិនស្គាល់អត្តសញ្ញាណបានឈប់នៅផ្លូវ  បែមុខទៅទិសខាងកើត។ ចំណែកម៉ូតូម៉ាកហុង ដាទ្រីមសេ១២៥ ពណ៌ខ្មៅឆ្នាំ២០០៦ ស្លាកលេខសៀមរាប1G1165 បើកបរដោយឈ្មោះ  ម៉ៅ លន់ ភេទប្រុសអាយុ២៦ឆ្នាំ នៅភូមិថ្មី ឃុំខ្ចាស់ ស្រុកសូទ្រនិគម ខេត្តសៀមរាប បានបុករថយន្តឈប់ចំពីក្រោយ  បណ្តាលអោយស្លាប់នៅកន្លែងតែម្តង។

អធិការបន្តថា ក្រោយកើតហេតុកម្លាំងសមត្ថកិច្ចបានចុះទៅដល់ទីតាំងនិងធ្វើការវាស់វែង ប្រគល់សាកសពអោយទៅក្រុមគ្រូសារយកទៅបុណ្យតាមប្រពៃណី។ ដោយឡែកម៉ូតូខូចខាតធ្ងន់  រថយន្ត មិនមានការខូចខាតនោះទេ វត្ថុតាងទាំង២យកមករក្សាទុកនៅអធិការដ្ឋានស្រុកដើម្បីរង់ចាំការដោះស្រាយតាមច្បាប់។

បើតាមអធិការនគរបាលស្រុកប្រាសាទបាគងបានបញ្ជាក់ថា ករណីនេះមូលហេតុគឺម៉ូតូបើកបរក្នុងល្បឿនលឿនដោយខ្វៈការប្រុងប្រយ័ត្ន៕SRP

ខេត្តសៀមរាប៖ក្រុមចោរប្លន់ប្រុសស្រីចំនួន៨នាក់ ត្រូវបានចាប់ខ្លួនជាបន្តបន្ទាប់។

ក្នុងនោះមនុស្ស៣នាក់ចាប់ខ្លួនធ្វើឡើងនៅថ្ងៃទី ២៥ ខែវិច្ឆិកាម្សិលមិញ នៅស្រុកសូនិគមខេត្តសៀមរាប។ ចំណែក៥នាក់ទៀតចាប់ខ្លួននៅខេត្តបាត់ដំបងនិងខេត្តសៀមរាបកាលពីថ្ងៃទី ១០ខែវិច្ឆិកានេះ។

លោកសុខ ម៉េងអ៊ាង នាយការិយាល័យនគរបាលព្រហ្មទណ្ឌកម្រិតធ្ងន់នៃស្នងការប៉ូលិសខេត្តសៀមរាប បានថ្លែងប្រាប់អ្នកសារព័ត៌មានថា ករណីអំពើលួចមានស្ថានមានស្ថានទម្ងន់ទោស ( ប្រើហិង្សា ) កាប់នឹងកាំបិតប្លន់យកម៉ូតូ២គ្រឿងនេះ បានកើតឡើងកាលពីថ្ងៃទី០៧ ខែ វិច្ឆិកា ឆ្នាំ២០២១ វេលាម៉ោង ០១ និង ៣០នាទីទៀបភ្លឺ ស្ថិតនៅផ្លូវ៦០ ម៉ែត្រ ក្នុងភូមិទ្រាំង សង្កាត់ស្លរក្រាម ក្រុងសៀមរាប។

លោកសុខ ម៉េងអ៊ាង បន្តថាប្រតិបត្តិការបង្ក្រាបនេះ ដោយឆ្លងកាត់ការស៊ើបអង្កេត និងតាមចាប់ ០៣ខេត្ត គឺខេត្តកំពង់ធំ រាជធានីភ្នំពេញ និងខេត្តបាត់ដំបង សៀមរាប។ ក្នុងនោះកម្លាំងសមត្ថកិច្ច បានដកហូតវត្ថុតាងម៉ូតូជារបស់ជនរងគ្រោះចំនួន ០២គ្រឿង(បាន ប្រគល់ជូនជនរងគ្រោះវិញ )និងវត្ថុតាង កាំបិត០១ ដែលធ្វើកម្មភាពកាប់ជនរងគ្រោះ។ បច្ចុប្បន្នមនុស្សទាំង ៨នាក់ ត្រូវបានសមត្ថកិច្ចកសាងសំណុំរឿងតាម នីតិវិធី។

សូមបញ្ជាក់ថាលទ្ធផលទទួលបានជោគជ័យក្នុងការបង្ក្រាបក្រុមចោរប្លន់នេះ ដោយមានការចង្អុរបង្ហាញពីលោកតេង ច័ន្ទណាត ស្នងការនគរបាលខេត្តសៀមរាប និងមានការសម្របសម្រួលនីតិវិធីពី លោកមាស ចន្ទ័ពិសិដ្ឋ ព្រះរាជអាជ្ញាអមសាលា រួមទាំងលោកស្រី លិ ស៊ីវទាន ជាចៅក្រមស៊ើបសួរនៃសាលាដំបូងខេត្តសៀមរាប ដឹកនាំកម្លាំងដោយ លោកសុខ ម៉េងអ៊ាង នាយការិយាល័យនគរបាលព្រហ្មទណ្ឌកម្រិតធ្ងន់ ដាក់ចេញនូវសកម្មភាពប្រតិបត្តិការ របស់លោក ភឹង ចិន្តារ៉េត និង លោកណុប សារ៉ាក់ ស្នងការរងទទួលដឹកនាំការិយាល័យនគរបាលព្រហ្មទណ្ឌកម្រិតធ្ងន់៕SRP

ខេត្តបាត់ដំបង៖ប្រជាពលរដ្ឋមានបញ្ហាក្នុងជីវភាពចំនួន២៩៩គ្រួសារ មកពីចំនួន៣ក្នុងស្រុកបវេល គឺឃុំល្វា ឃុំអំពិលប្រាំដើម និងឃុំបវេល នៅព្រឹកមិញនេះបានទទួលអំណោយមនុស្សធម៌ របស់សម្តេចក្រឡាហោម ស ខេង អ្នកតំណាងរាស្រ្តមណ្ឌលបាត់ដំបង និងជាប្រធានក្រុមការងារចុះជួយមូលដ្ឋានខេត្តបាត់ដំបង និងលោកជំទាវ។ 

ការផ្ដល់អំណោយ ដឹកនាំដោយលោកសក់ សេដ្ឋា ប្រធានក្រុមការងារចុះជួយមូលដ្ឋានស្រុកបវេល លោក ខាន់ ម៉ាណេរ អនុប្រធានទី១ក្រុមការងារចុះជួយស្រុកបវេល និងលោក ចន្ទ សុផល អ្នកតំណាងរាស្ត្រមណ្ឌលបាត់ដំបង។ 

អំណោយដែលបានផ្ដល់ជូន រួមមានអង្ករ មី ត្រីខ ទឹកស៊ីអុីវ ទឹកត្រី ទឹកសុទ្ធ ម៉ាស់ និងអាកុល។

ក្នុងឱកាសនោះដែរ លោក សក់ សេដ្ឋា បានជម្រាបជូនប្រជាពលរដ្ឋនូវសេចក្ដីផ្ដាំផ្ញើសួរសុខទុក្ខ និងការនឹករលឹកពីសម្តេចក្រឡាហោម និងលោកជំទាវ ព្រមទាំងសេចក្ដីថ្លែងអំណរគុណជូនប្រជាពលរដ្ឋដែលបានផ្ដល់ការគាំទ្រមកលើរាជរដ្ឋាភិបាល ដើម្បីបន្តដឹកនាំប្រទេសជាតិប្រកបដោយសុខ សន្តិភាព និងការអភិវឌ្ឍ។

ក្នុងនាមសម្ដេចក្រឡាហោម លោកក៏បានអំពាវនាវបងប្អូនប្រជាពលរដ្ឋអញ្ជើញទៅពិនិត្យបញ្ជីឈ្មោះនិងចុះឈ្មោះបោះឆ្នោតឲ្យបានគ្រប់ៗគ្នានៅតាមការិយាល័យក្នុងភូមិ ឃុំនិងសង្កាត់របស់ខ្លួន និងសូមបន្តអនុវត្តវិធានការ៣កុំ ៣ការពារ ដើម្បីការពារខ្លួន ក្រុមគ្រួសារ និងសហគមន៍ ពីការឆ្លងជំងឺកូវីដ-១៩៕SRP

ភ្នំពេញ៖ស្ថាប័នគយទទួលបានប្រាក់ពន្ធចំនួន ១៧.៣លានដុល្លារអាមេរិក ពីម្ចាស់រថយន្តអត់ពន្ធទាំងចង្កូតឆ្វេង និងស្តាំជ្រកក្រោមស្លាកលេខផ្សេងៗ ចំនួន ១៦៤០គ្រឿងហើយបាននាំយករថយន្តរបស់ខ្លួនមកបង់ពន្ធ (ចង្កួតឆ្វេង) និងតម្កល់ប្រាក់កក់បង់ពន្ធ (ចង្កួតស្តាំ) គិតមកត្រឹមថ្ងៃទី២៥ ខែវិច្ឆិកា ឆ្នាំ២០២១។

នេះបើតាម លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានធ្វើឡើងក្នុងសន្និសីទសារព័ត៌មាន ស្តីពីវឌ្ឍនភាពនៃការអនុវត្តការប្រមូលពន្ធនាំចូល លើយន្តយន្តគ្មានពន្ធ ដែលមានស្រាប់ នៅព្រឹកថ្ងៃទី២៦ ខែវិច្ឆិកា ឆ្នាំ២០២១នេះ តាមរយៈប្រព័ន្ធវីដេអូ។

«គិតតាំងពីថ្ងៃទី៩ ខែកញ្ញា ឆ្នាំ២០២១ ពេលដែលអគ្គនាយដ្ឋានគយ ជូនដំណឹងឲ្យរថយន្តគ្មានពន្ធ ចូលមកបង់ពន្ធ រហូតមកដល់ថ្ងៃទី២៥ ខែវិច្ឆិកា ឆ្នាំ២០២១ ដែលមានរយៈពេល២ខែកន្លះ តែបើកាត់ថ្ងៃឈប់សម្រាក និងថ្ងៃបុណ្យមានរយៈពេល៦០ថ្ងៃ មានម្ចាស់រថយន្តអត់ពន្ធជ្រកក្រោមស្លាកលេខផ្សេងៗចំនួន ១៦៤០គ្រឿង ក្នុងនោះចង្កួតឆ្វេងចំនួន ៨០៨គ្រឿង និងរថយន្តចង្កួតស្តាំ ដែលមានមកបង់ប្រាក់កក់ (កែចង្កូតស្តាំទៅឆ្វេង ទើបអនុញ្ញាតឲ្យបង់ពន្ធ) ចំនួន៨៣២គ្រឿង (៨៥គ្រឿងកែចង្កូតរួច) សរុបជាទឹកប្រាក់ពន្ធចំនួន ១៧.៣លានដុល្លារអាមេរិក ជាតួលេខមួយល្អ»។

តាមការប៉ាន់ស្មានរបស់អគ្គនាយកដ្ឋានគយ និងរដ្ឋាករកម្ពុជា នៅកម្ពុជាមានរថយន្តចង្កូតឆ្វេង និងចង្កូតស្តាំ ដែលជ្រកក្រោមផ្លាកលេខផ្សេងៗ ដូចជាផ្លាកលេខ ខ.ម ផ្លាកលេខរដ្ឋ ផ្លាកលេខ ន.ប និងប្រភេទផ្លាកលេខស៊ីវិល ទាំងរថយន្តទេសចរណ៍ រថយន្តដឹកទំនិញ រថយន្តដឹកដីអត់ពន្ធ មានប្រមាណជិតមួយម៉ឺនគ្រឿង។

លោកបានអំពាវនាវជាថ្មី ឱ្យម្ចាស់រថយន្តចង្កូតឆ្វេង ដែលជ្រកក្រោមផ្លាកលេខផ្សេងៗគ្មានពន្ធ បំពេញកាតព្វកិច្ចពន្ធ ឱ្យបានយ៉ាងយូរថ្ងៃទី៣១ ខែធ្នូ ឆ្នាំ២០២១ ដើម្បីទទួលបានការអនុគ្រោះបន្ធូរបន្ថយពន្ធ និងអាករចំនួន ១០%។ ចំណែករថយន្តចង្កូតស្តាំ ត្រូវមកប្រកាសបង់ពន្ធ និងកែចង្កូតពីស្តាំមកឆ្វេង ឱ្យបានរួចរាល់យ៉ាងយូរត្រឹមថ្ងៃទី៣០ ខែមិថុនា ឆ្នាំ២០២២៕SRP