ខេត្តបាត់ដំបង៖ប៉ូលិសក្រុងបាត់ដំបងបានឃាត់ខ្លួនបុរសម្នាក់ពាក់ព័ន្ធករណីជួញដូរគ្រឿងញៀន។

ការឃាត់ខ្លួនធ្វើឡើង នៅថ្ងៃសៅរ៍ ទី២៥ ខែធ្នូឆ្នាំ២០២១ នៅចំណុច ភូមិព្រែកតាតន់ សង្កាត់ព្រែកព្រះស្តេច ក្រុងបាត់ដំបង។     

ជនសង្ស័យឈ្មោះ ញ៉ឹក ប៊ុនរ័ត្ន ហៅប៊ុន អាយុ ៤២ឆ្នាំ មានទីលំនៅភូមិអូរតាគាំ២ សង្កាត់ទួលតាឯក ក្រុងបាត់ដំបង។

ករណីនេះដកហូតវត្ថុតាង រួមមាន៖ម្សៅក្រាមពណ៌សចំនួន ១០កញ្ចប់,ទូរស័ព្ទ១គ្រឿង, ថ្នាំគ្រាប់ពណ៌ក្រហម១គ្រាប់, ជញ្ជីង១ ,សម្ភារប្រើប្រាស់ និងច្រករំលែកថ្នាំញៀនលក់មួយចំនួន។

បច្ចុប្បន្ននគរបាលក្រុងបាត់ដំបង ដើម្បីកសាងសំណុំរឿងបញ្ជូនទៅតាមនីតិវិធី៕SRP

ខេត្តសៀមរាប៖នៅទីបំផុត ផ្លូវបំបែកជា៤ ទីប្រជុំផ្សារស្វាយធំ ខេត្តសៀមរាប នឹងកសាងរង្វង់មូល ដើម្បីសម្រួលចរាចរណ៍។

មន្ត្រីសាធារណការដឹកជញ្ជូនខេត្តសៀមរាបបានឲ្យដឹងនៅថ្ងៃទី ២៦ធ្នូ នេះថានៅពេលឆាប់ៗខាងមុខនេះចំណុចផ្លូវបំបែកជា៤ទីប្រជុំផ្សារស្វាយធំនឹងកសាងរង្វង់មូលមួយដើម្បីសម្រួលចរាចរណ៍ ដោយខណ:ពេលនេះកំពុងវាស់វែង។

ដូច្នេះសូមអ្នកធ្វើដំណើរបើកបរ រថយន្តតូចធំ ឆ្លងកាត់ទីកន្លែងនេះជាពិសេសពេលយប់ មេត្តាប្រុងប្រយ័ត្នខ្ពស់បំផុតដើម្បីចៀសវាងគ្រោះថ្នាក់ដោយជាយថាហេតុ។ (រូបភាពពង្រាងរង្វង់មូលនាពេលអនាគត)

ខេត្តសៀមរាប៖បុរសម្នាក់បានស្លាប់នៅនឹងកន្លែងកើតហេតុខណៈបើកម៉ូតូបុកជាមួយគោយន្តកន្ត្រៃ។

ហេតុការណ៍កើតឡើងវេលាម៉ោង២១និង៤៥នាទី ថ្ងៃទី២៥ខែធ្នូ ឆ្នាំ ២០២១ លើផ្លូវកៅស៊ូ ពីឃុំមោងស្រុក ស្រីស្នំ ទៅស្រុកអង្គរជុំ ត្រង់ចំណុចខាងកើតលូជាង៣០ម៉ែត្រ ស្ថិតនៅភូមិល្វា ឃុំមោង
ស្រុកស្រីស្នំ ខេត្តសៀមរាប។

សមត្ថកិច្ចខេត្តសៀមរាបបានឲ្យដឹងថា ផលនៃគ្រោះថ្នាក់ចរាចរណ៍នេះ រវាងម៉ូតូនិងគោយន្ដកន្ត្រៃបញ្ច្រាសទិសគ្នា។ អ្នកបើកគោយន្ដកន្ត្រៃ មិនស្គាល់អត្តសញ្ញាណ បុករួចបើកបរគោយន្ដកន្ត្រៃគេចខ្លួនបាត់ទៅទិសខាងកើត។ ចំណែកម៉ូតូហុងពណ៌ខ្មៅ ស៊េរី២០១៧ ពាក់ស្លាកលេខ ឧត្ដរមានជ័យ ១C-៦៤៩៣ រងការខូចខាតយ៉ាងដំណំ បើកបរដោយឈ្មោះបឺត បឿក ភេទ ប្រុស អាយុ២១ឆ្នាំមុខរបរធ្វើស្រែ ទីលំនៅបច្ចុប្បន្នភូមិយាយមុី ឃុំជ្រោយនាងងួន ស្រុកស្រីស្នំ ខេត្តសៀមរាប បើកពីកើត ទៅខាងលិចបណ្ដោយឲ្យស្លាប់ នៅកន្លែង។

ក្រោយកើតហេតុកម្លាំងនគរបាលចរាចរណ៍ បានចុះដល់ធ្វើការវាស់វែង និងប្រគល់សាកសពជូនគ្រួសារធ្វើបុណ្យតាមប្រពៃណី៕SRP

ខេត្តសៀមរាប៖ជាងដែកម្នាក់បានចងកសម្លាប់ខ្លួនបង្កឲ្យមានការភ្ញាក់ផ្អើលដល់សមត្ថកិច្ច។

ហេតុការណ៍បានកើតឡើងនៅវេលាម៉ោង១៧ និង ៣០នាទី ថ្ងៃទី២៥ ខែធ្នូ ឆ្នាំ ២០២១ នៅចំណុចក្នុងផ្ទះបន្ទប់ដេក ស្ថិតនៅភូមិវិហារចិន សង្កាត់ស្វាយដង្គំ ក្រុងសៀមរាប។

សមត្ថកិច្ចបានឲ្យដឹងថាជនរងគ្រោះឈ្មោះ នូរ សំណាង ភេទប្រុសអាយុ៣៨ឆ្នាំ មានទីលំនៅបច្ចុប្បន្នភូមិវិហារចិន សង្កាត់ស្វាយដង្គំ ក្រុងសៀមរាប។
តាមការពិនិត្យសាកសព ផ្នែកក្បាល ពុំមានស្លាកស្នាមអ្វីទេ ត្រង់ចំណុចករបស់សពមានស្នាមរឹតមានប្រវែង៣០សង់ទីម៉ែត្រ។-ផ្នែកដងខ្លួន ពុំមានស្លាកស្នាមអ្វីគួរអោយគត់សំគាល់នោះទេ។-ផ្នែក អវយវ: និងមិនពាក់ពន្ធ័ និង បទល្មើសព្រហ្មទណ្ឌ នោះផងដែរ។

តាមការបំភ្លឺគ្រួសារសព តាមការពិនិត្យកន្លែងកើតហេតុ និង ផ្អែកតាមការសន្និដ្ឋានពីលោកគ្រូពេទ្យកោសល្យវិច្ឆ័យខេត្តសៀមរាប បានបញ្ជាក់ថាជនរងគ្រោះស្លាប់ដោយសារធ្វើអត្តឃាត (ចងក)ប្រាកដមែន៕SRP

ខេត្តសៀមរាប៖ប្រជាពលរដ្ឋរស់នៅក្នុងភូមិខ្នារ ឃុំខ្នារសណ្តាយស្រុកបន្ទាយស្រី ខេត្តសៀមរាប ទទួលបានផ្លូវបេតុងមួយខ្សែ។

សូមជម្រាបថានៅថ្ងៃសុក្រ ទី២៤ ខែធ្នូ ម្សិលមិញ លោក ឃឹម ហ្វីណង់ អភិបាលស្រុកបន្ទាយស្រី អញ្ជើញចូលរួមក្នុងពិធីបិទការដ្ឋានផ្លូវបេតុងមួយខ្សែ នៅក្នុងភូមិខ្នារ ឃុំខ្នារសណ្តាយ ស្រុកបន្ទាយស្រី ខេត្តសៀមរាប។

ផ្លូវបេតុងនេះ គឺជាគម្រោងមូលនិធិ ឃុំខ្នារសណ្តាយឆ្នាំ២០២១ ប្រវែង ៥១០ម៉ែត្រ ទទឹង ៤ម៉ែត្រ ចំណាយថវិកាមូលនិធិឃុំចំនួន ២១៦,៣៩០,៤០០រៀល និងទុនចូលរួមចំនួន ២០០,០០០រៀល សរុបចំនួន ២១៦,៥០៩,៤០០រៀល។

ឆ្លៀតក្នុងឱកាសនេះផងដែរ អាជ្ញាធរស្រុកបន្ទាយស្រី សូមថ្លែងអំណរគុណចំពោះ លោក ឌួង អ៊ា ដែលបានឧបត្ថម្ភជាថវិកា ចំនួន៤លានរៀល ជូនដល់រដ្ឋបាលស្រុកសម្រាប់គាំទ្រទៅលើយុទ្ធនាការ “ផ្ទះ១ អំពូល១” ដើម្បីប្រើប្រាស់ដាក់ជាអំពូលជូនប្រជាពលរដ្ឋដែលរស់នៅជាប់ដងផ្លូវថ្មីនេះផងដែរ៕SRP

ខេត្តសៀមរាប៖អាជ្ញាធរខេត្តសៀមរាប បានប្រាប់មន្ត្រីពាក់ព័ន្ធឲ្យរួមគ្នាទប់ស្កាត់និងលុបបំបាត់សកម្មភាពដឹកជញ្ជូនឈើ និងការធ្វើអាជីវកម្មឡធ្យូងគ្រប់ប្រភេទ។

ថ្លែងក្នុងកិច្ចប្រជុំ របស់គណៈកម្មាធិការសម្របសម្រួលបច្ចេកទេសនៃក្រុមប្រឹក្សាខេត្តសៀមរាប នៅថ្ងៃទី២៣ ខែធ្នូ ឆ្នាំ២០២១ លោក ង៉ាន់ ភិរុណ អភិបាលរងខេត្ត បានអះអាងថា៖ការបាត់បង់ព្រៃឈើ នៅតែជាកម្មវត្ថុក្តៅ សម្រាប់ការប្រើប្រាស់វិធានការបង្ក្រាប និងទប់ស្កាត់ឱ្យខានតែបាន។

លោក ង៉ាន់ ភិរុណ បានលើកឡើងថា កិច្ចប្រជុំនេះ មានរបៀបវរ:៥ចំណុចដូចខាងក្រោមះ

ទី១ ការត្រួតពិនិត្យ និងពិភាក្សាអំពីការដឹកជញ្ជូនឈើតាម រទេះ និងគោយន្តកន្រ្តៃនៅក្នុងតំបន់ ឬឆ្លងកាត់តំបន់ការពារធម្មជាតិ។កិច្ចការនេះគឺជាភារកិច្ចពហុវិស័យ ដូចនេះមន្ត្រីជំនាញពាក់ព័ន្ធទាំងអស់ត្រូវពង្រឹងកិច្ចសហការអោយមានភាពទន់ភ្លន់និងបត់បែនទៅតាមស្ថានភាព ដែលបងប្អូនប្រជាពលរដ្ឋបានធ្វើការដឹកជញ្ជូនក្នុងការប្រើប្រាស់ក្នុងគ្រួសារនិងធ្វើអាជីវកម្ម។

ទី២ កិច្ចប្រជុំបានធ្វើដំណើរលើក ម្យ៉ាងទៀត បញ្ហាធ្វើឡធ្យូងក្នុងតំបន់ដែនជម្រកសត្វព្រៃនៅក្នុងភូមិសាស្រ្តនៃស្រុកជីក្រែង មិនត្រឹមតែប្រើប្រាស់ក្នុងសហគមន៍នោះទេ តែបែរជាធ្វើអាជីវកម្មនាំចេញទៅខេត្តកំពង់ធំទៅវិញ ដែលតម្រូវអោយ មន្ត្រីពាក់ព័ន្ធត្រូវចាត់វិធានការកាត់បន្ថយ ដោយប្រើវិធានការអប់រំ ណែនាំ មុនឈានដល់ការបង្រ្កាប។

ទី៣ ដើម្បីពង្រឹងការអនុវត្តលិខិតរបស់រដ្ឋបាលខេត្តលេខ ១៤៣៧ សជណ ចុះថ្ងៃទី០៨ ខែធ្នូ ឆ្នាំ២០២១ ស្តីពីការចាត់វិធានការបញ្ឈប់ទីតាំងរោងម៉ាស៊ីន រោងសន្និធិ និងរោងសិប្បកម្មកែច្នៃឈើនៅក្នុង និង នៅក្រៅតំបន់ការពារធម្មជាតិ អាជ្ញាធរក្រុង-ស្រុក មន្ទីរជំនាញ និងសមត្ថកិច្ចត្រូវសហការអនុវត្ត។ បើយោងតាមតារាងបញ្ជីទន្នន័យទីតាំងកែច្នៃឈើទាំងនោះ នៅក្នុងឬនៅក្បែរតំបន់ការពារធម្មជាតិ និងរបៀងអភិរក្សជីវចម្រុះ ក្នុងភូមិសាស្ត្រខេត្តសៀមរាប គិតត្រឹមខែកញ្ញាឆ្នាំ២០២១ រកឃើញមានចំនួន១៤៦ទីតាំង ដែល៣ទីតាំងមានច្បាប់អនុញ្ញាតត្រឹមត្រូវ។

ទី៤អាជ្ញាធរមូលគ្រប់លំដាប់ថ្នាក់ ត្រូវចាត់វិធានការឲ្យបញ្ឈប់ជាបន្ទាន់ និងមោឃភាព នូវរាល់ការចុះហត្ថលេខា ឬការបញ្ជាក់ទទួលស្គាល់លើលិខិតផ្ទេរសិទ្ធិ ពាក្យស្នើសុំកាន់កាប់ប្រើប្រាស់ដីធ្លី លិខិតទិញលក់ដីរដ្ឋ និងការបញ្ជាក់លើប្លង់បង្ហាញទីតាំងដី ជាអាទិ៍ ដែលធ្វើឡើងនៅលើដីក្នុងតំបន់ការពារធម្មជាតិ និងក្នុងរបៀងអភិរក្សជីវៈចម្រុះ ដែលក្រសួងបរិស្ថានក៏បាន ព្រមានផងដែរ ចំពោះរដ្ឋបាលឃុំ-សង្កាត់ណា ដែលនៅតែបន្តបំពានចុះហត្ថលេខា ផ្តល់ជាកម្មសិទ្ធិឯកជន ក្នុងតំបន់ការពារធម្មជាតិ និងរបៀងអភិរក្សជីវៈចម្រុះក្នុងដែនសមត្ថកិច្ចរបស់ខ្លួន នឹងចាត់វិធានការយ៉ាង ម៉ឺងម៉ាត់តាមផ្លូវច្បាប់។

ទី៥ ពិនិត្យនិងធ្វើបច្ចុប្បន្នភាព នៃការដោះស្រាយលើបញ្ជីសំណួរ-សំណូមពរ ដែលបានលើកឡើងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំ២០១៩ និង២០២០៕SRP

ខេត្តសៀមរាប៖បច្ចុប្បន្ននេះ គេសង្កេតឃើញសហគ្រាសធុនតូច និងមធ្យមនៅក្នុងស្រុក ក៏ដូច ជាការបង្កើតផលិតផលស្នាដៃក្នុងស្រុក មានការលូតលាស់ គួរឲ្យកត់សម្គាល់។ ខណៈដែល ក្នុងខេត្តសៀមរាបផ្ទាល់ គេឃើញមានរោងចក្រផលិតគុយទាវអនាម័យដំបូងគេ កំពុងដំណើរ និងទទួលការគាំទយ៉ាងច្រើន ពីសំណាក់អ្នករស់នៅក្នុងខេត្តសៀមរាបផ្ទាល់។

លោកលី ប៊ុនសេង អ្នកគ្រប់គ្រងទូទៅនៃសហគ្រាស គុយទាវអនាម័យសៀមរាប បានឲ្យដឹង ថា រោងចក្រនេះបានវិវត្តន៍ខ្លួនពីគុយទាវផលិត តាមបែបលក្ខណៈគ្រួសារ និងប្រពៃណី មកដា គុយទាវដែលមានរោងចក្រសហគ្រាសផលិតត្រឹមត្រូវ និង ធំជាងគេដំបូងបង្អស់ នៅខេត្តសៀមរាប ប្រកបដោយអនាម័យខ្ពស់ គ្មានជាតិគីមី ហើយចំណុចសំខាន់គឺ ផលិតពីអង្ករខ្មែរសុទ្ធ ១០០%។

លោកបន្តថា រោងចក្រអាចធ្វើការផលិតបានច្រើនតោន ក្នុងមួយថ្ងៃ ដែលធានាបាននូវការផ្គត់ ផ្គង់គុយទាវស្រស់ៗ ថ្មីៗជូនអតិថិជន ហើយគុយទាវអនាម័យនេះ មានបីប្រភេទដូចជា គុយទាវសសៃតូច គុយទាវសសៃធំ និងមីលឿង។

លោកប្រាប់ថា៖ “គុយទាវនេះ មានការគាំទ្រពេញទំហឹងពីប្រជាពលរដ្ឋ ដោយសារយើងផលិត គុយទាវចេញពីអង្ករខ្មែរសុទ្ធ និងមានគ្រឿងផ្សំដែលមានគុណភាពខ្ពស់ គ្មានជាតិគីមី និងធ្វើឱ្យ សរសៃគុយទាវមានក្លិនក្រអូបអង្ករ ថែមទាំងមានសរសៃទន់ស្វិត ងាយពីសារ ហើយឆាប់ចូល រសជាតិជាមួយនឹងទឹកស៊ុប។ ជាពិសេស គុយទាវយើងផលិតថ្មីៗ ជារៀងរាល់ថ្ងៃ ហើយមិនធ្វើ ឱ្យគុយទាវមានក្លិនផ្អួរនោះទេ។”

ក្រៅពីព្យាយាមពង្រឹងខ្លួនឲ្យក្លាយជាសហគ្រាសស្របតាមស្តង់ដារ ដែលផ្ដោតសំខាន់លើ គុណភាពខ្ពស់ សហគ្រាសគុយទាវអនាម័យសៀមរាប ក៏បានរួមចំណែកយ៉ាងសកម្ម ក្នុងការបង្កើតឱកាសការងារ ក៏ដូចជាបង្កើនប្រាក់ចំណូល ហើយកាត់បន្ថយចំណាកស្រុក ផងដែរ។

បច្ចុប្បន្នទីផ្សាររបស់គុយទាវអនាម័យសៀមរាប បានពង្រីកទៅដល់ ២៥ ខេត្តក្រុង ហើយសហ គ្រាសនេះក៏ត្រូវការតំណាងចែកចាយនៅទូទាំងប្រទេសបន្ថែមទៀតផងដែរ។

គួររំលឹកផងដែរថា គុយទាវអនាម័យខេត្តសៀមរាបបានផលិតជាលក្ខណៈគ្រួសារ ចាប់តាំងពី ឆ្នាំ ១៩៩៤ រហូតដល់ឆ្នាំ២០១៨ ដែលមានគុណភាពល្អ មានអនាម័យខ្ពស់ គ្មានជាតិគីមី សាច់គុយទាវទន់ស្វិតងាយស្រួលពិសារ មានឱជារសឈ្ងុយឆ្ងាញ់។

គួរបញ្ចាក់ផងដែរថា សហគ្រាសមួយនេះមានច្បាប់ និងអាជ្ញាប័ណ្ណចុះបញ្ជីដោយក្រសួង ពាណិជ្ជកម្មត្រឹមត្រូវឆ្លងកាត់ឡាបូ និងមន្ទីរពិសោធន៍ដែលធានា ១០០% ចំពោះសុខភាពដល់ អ្នកពិសារ។

គុយទាវអនាម័យសៀមរាប និមិត្តសញ្ញាបញ្ជាក់អំពីអត្តសញ្ញាណខេត្តសៀមរាប មានទីតាំង ស្ថិតនៅផ្លូវលេខ ២២ ភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប។ ទំនាក់ទំនងតាមលេខទូរសព្ទ ០៩៩ ៣៤៩ ៩៩៧ / ០១០ ៩២ ៣៣ ៧៨ / ០៩៧ ៧៨ ២៧ ៥១៦

ខេត្តសៀមរាប៖លោក ថាដាសិ អូហ្គាសាវ៉ារ៉ា (Tadashi Ogasawara) ទីប្រឹក្សាគម្រោង បានឲ្យដឹងថា គម្រោងនេះនឹងធ្វើឲ្យកាត់តែមានភាពប្រសើរឡើងវិញ នៃមន្ទីរពេទ្យបង្អែកខេត្ត ក៏ដូចមន្ទីរពេទ្យស្រុកប្រតិបត្តិទាំង៤ផងដែរ។

លោកថា គម្រោងនេះ គឺជាគម្រោងហិរញ្ញទានឥតសំណងរបស់រដ្ឋាភិបាលជប៉ុន ក្នុងគោលបំណងធ្វើឲ្យប្រសើរឡើង នូវគុណភាពសេវាសុខភាព និង ពង្រីកនូវសេវាសុខភាពគ្រប់ដណ្តប់នៅក្នុងតំបន់។ ការសាងសង់អគារមន្ទីរពេទ្យ ក៏ដូចជាការឧបត្ថម្ភនូវឧបករណ៍បរិក្ខាពេទ្យផងដែរ។ លោកថាគម្រោងសាងសង់នេះមានទឹកប្រាក់ប្រមាណ ១៩លានដុល្លាសហរដ្ឋអាមេរិក។ លោកសង្ឃឹមថា គម្រោងនេះនិងចូលរួមចំណែកជាច្រើននៅក្នុងវិស័យនេះ។

សូមជម្រាបថាសំណង់អគារមន្ទីរពេទ្យបង្អែកខេត្ត មានកម្ពស់៤ជាន់ ដែលជាជំនួយរបស់រាជរដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) ក្រោមគម្រោងអភិវឌ្ឍន៍ធ្វើឲ្យប្រសើរឡើងត្រូវបានប្រារព្ធពិធីប្រុងពលីបើកការដ្ឋានសាសង់ជាផ្លូវការ នៅថ្ងៃទី ២៣ ខែធ្នូ ម្សិលមិញ។

បើតាមមន្ត្រីសុខាភិបាលខេត្តសៀមរាបបានឲ្យដឹងថាគម្រោងអភិវឌ្ឍន៍មន្ទីរពេទ្យបង្អែកខេត្តសៀមរាបបានទទួលនូវជំនួយឧបត្ថមពីរដ្ឋាភិបាលជប៉ុននូវអគារមួយខ្នងមានផ្ទៃក្រឡាសំណង់ទំហំ ៧ពាន់២៦០ ម៉ែត្រការ៉េ កំពស់៤ជាន់ ប្រវែង២៥ ម៉ែត្រ គុណនឹង ៦៩ ម៉ែត្រ ដែលនឹងត្រូវប្រើប្រាស់សម្រាប់សេវាឯកទេស វះកាត់ សេវាសង្រ្គោះបន្ទាន់ និងសេវាពាក់ព័ន្ធផ្សេងៗទៀត។ អគារមន្ទីរពេទ្យថ្មីនេះមានលក្ខណៈជាស្តង់ដារ ជាមន្ទីរពេទ្យដែលមានផាសុភាព មានកម្រឹតបង្កការ ចំលងរោគកម្រិតទាប មានបំពាក់ជណ្តើរយោង និងមានភាពងាយស្រួលក្នុងការប្រើប្រាស់ ដែលមានចំនួនគ្រែសរុបចំនួន២២០គ្រែ ដែលទទួលអ្នកជម្ងឺទៅតាមជាន់នីមួយៗផងដែរ៕SRP

ភ្នំពេញ៖សម្ដេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានមានប្រសាសន៍ទទួលស្គាល់ថា ប៉ូលិសចរាចរណ៍ ពិតជាមានភាពលំបាក ដោយសារពួកគាត់ធ្វើការទាំងយប់ ទាំងថ្ងៃ ហើយហាលភ្លៀង ហាលក្តៅ ទោះបីប្ដូរវេនគ្នាក៏ដោយ ហើយមានភាពតស៊ូ។

សម្ដេចស ខេង មានប្រសាសន៍បញ្ជាក់បន្តថា «ប៉ូលិសចរាចរណ៍ គ្នាពិបាកណាស់ ហើយប៉ូលិសចរាចរណ៍ហ្នឹងមែនទែនទៅ គឺធ្វើការទាំងយប់ និងទាំងថ្ងៃ នៅប្រចាំការ ភ្លៀងផងក៏នៅនឹង ពេលក្ដៅក៏នៅនឹង ហើយមានអ្នកប្ដូរវេន ហើយពេលខ្លះវេនយប់ ចឹងទៅ អ្នកខ្លះក្រោកពីព្រលឹមឃើញថា តស៊ូ»។

សម្ដេចបានបញ្ជាក់ថា កត្តាផ្លូវខ្វះស្លាកសញ្ញា គំនូសសញ្ញា នៅតាមដងផ្លូវជាតិ និងផ្លូវជនបទ បានបង្កជាការលំបាកដល់ការបើកយានយន្ដ បញ្ហាទាំងនេះដោយសារតែខ្វះថវិកា ប៉ុន្ដែទោះបីយ៉ាងណាក៏ដោយ ត្រូវដោះស្រាយ ហើយកិច្ចការនៅសេសសល់ក្រសួងសាធារណការ និងដឹកជញ្ជូន ក៏ដូចជា រដ្ឋបាលរាជធានី-ខេត្ត ខិតខំបន្ដទៀត ពីព្រោះបញ្ហានឹងជាចំណុចមួយសំខាន់ផងដែរ។

សម្ដេចបានពន្យល់បន្ថែមថា បើនៅតាមដងផ្លូវអត់មានស្លាកសញ្ញា នៅពេលប៉ូលិសចរាចរណ៍ទៅចាប់ គេសួរថា មានអ្វីជាសម្អាងមកឃាត់ខ្ញុំ ពីព្រោះផ្លូវនឹងអត់ស្លាកសញ្ញាផង។ សម្ដេចក្រឡាហោម ក៏បានស្នើដល់ក្រសួងសាធារណការ និងដឹកជញ្ជូន ដើម្បីពិនិត្យនឹងជំរុញការងារបន្ដទៀត ក្នុងការដាក់ស្លាកសញ្ញាចរាចរណ៍ និងគំនូសសញ្ញាចរាចរណ៍បន្ថែមទៀត។

សម្ដេចស ខេង មានប្រសាសន៍ទទួលស្គាល់បែបនេះ ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីទិវាអន្តរជាតិរំលឹកដល់ជនរងគ្រោះ ដោយគ្រោះថ្នាក់ចរាចរណ៍ផ្លូវគោក លើកទី១៦ នៅស្រុកជើងព្រៃ ខេត្តកំពង់ចាម នាព្រឹកមិញនេះ៕SRP

ខេត្តកំពង់ចាម៖សម្ដេចស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពជាតិចរាចរណ៍ផ្លូវគោក ក្នុងឱកាសអញ្ជើញជាអធិបតីនៃពិធី «ទិវាអន្តរជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី១៦» ប្រារព្ធនៅស្រុកជើងព្រៃ ខេត្តកំពង់ចាម នៅព្រឹក​ នៅតែបង្ហាញក្ដីបារម្ភចំពោះកំណើនគ្រោះថ្នាក់ជាក្រុម ដូចជាការបាត់បង់ជីវិតគ្រួសារចំនួន៧នាក់នៅស្រុកជំគិរី និងការបាត់បង់ជីវិត៥នាក់នៅផ្លូវជាតិលេខ៣ក្រុងបូគោ ខេត្តកំពត ការបាត់បង់ជីវិត៥នាក់នៅផ្លូវជាតិលេខ៥ស្រុកមោងឬស្សី និងករណីគ្រោះថ្នាក់ចរាចរណ៍រថយន្តដឹកកម្មករតាមបណ្ដាខេត្តមួយចំនួន។ សម្ដេចកត់សំគាល់ថាមូលហេតុនៃគ្រោះថ្នាក់នេះ គឺបណ្ដាលមកពីបើកបរលើសល្បឿនកំណត់ មិនគោរពសិទ្ធិអាទិភាព និងការមិនប្រកាន់ស្ដាំ។

សម្ដេច ស ខេង បន្តថាពិធីនេះមិនត្រឹមតែរួមចំណែករំលែកទុក្ខជនរងគ្រោះប៉ុណ្ណោះទេ ប៉ុន្តែក៏ជាជាព្រឹត្តិការណ៍ក្រើនរំលឹកអ្នកប្រើប្រាស់ផ្លូវឱ្យមានការយល់ដឹងអំពីហានភ័យនៃគ្រោះថ្នាក់ចរាចរណ៍ ដែលបណ្ដាលមកពីការបើកបរលើសល្បឿនកំណត់ មិនគោរពសិទ្ធិអាទិភាព បើកបរវ៉ាជែងដោយប្រថុយប្រថាន បើកបរមិនប្រកាន់ស្ដាំ បើកបរក្នុងស្ថានភាពស្រវឹង និងមានសារធាតុញៀនជាដើម ដើម្បីឱ្យកែប្រែឥរិយាបទទាំងនោះ ហើយងាកមកគោរពច្បាប់ និងមានការប្រុងប្រយ័ត្នវិញ។

សម្ដេច ស ខេង ក៏បានរំលឹកថាបើប្រៀបធៀបនឹងឆ្នាំ២០១៩ គឺនៅក្នុងឆ្នាំ២០២០កន្លងទៅនេះ កម្ពុជាកាត់បន្ថយគ្រោះថ្នាក់ចរាចរណ៍បានចំនួន៩៤២លើកស្មើនឹង២៣ភាគរយ កាត់បន្ថយអ្នកស្លាប់៣៥៥នាក់ស្មើនឹង១៧ភាគរយ និងអ្នករបួស១៤៥៥នាក់ស្មើនឹង២៤ភាគរយ។ ដោយឡែកក្នុងរយៈពេល១១ខែឆ្នាំ២០២១ ធៀបនឹងឆ្នាំ២០២០ កម្ពុជាបានកាត់បន្ថយគ្រោះថ្នាក់ចរាចរណ៍បាន៥៣៣លើកស្មើនឹង១៨ភាគរយ អ្នកស្លាប់១៦៧នាក់ស្មើនឹង១១ភាគរយ និងអ្នករបួសបាន១១២០នាក់ស្មើនឹង២៦ភាគរយ។

សម្ដេច ក៏បានឆ្លៀតគូសបញ្ជាក់អំពីភាពចាំបាច់និងសារៈសំខាន់នៃការអនុវត្តគោលនយោបាយភូមិ ឃុំ សង្កាត់ មានសុវត្ថិភាព រួមមាន ១.ផ្ដល់សេវាសាធារណៈ ជាពិសេសេវារដ្ឋបាលប្រកបដោយគុណភាព តម្លាភាព និងទទួលបានជំនឿទុកចិត្ត, ២.គ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ, ៣.មានសណ្ដាប់ធ្នាប់សាធារណៈ ជាពិសេសគ្មានគ្រោះថ្នាក់ចរាចរណ៍, ៤.គ្មានអំពើអនាចារ គ្មានការជួញដូរមនុស្ស ពិសេសស្រ្តី និងកុមារ គ្មានអំពើហិង្សាក្នុងគ្រួសារ និងគ្មានក្មេងទំនើង, ៥.ដុះស្រាយវិវាទនៅមូលដ្ឋានក្រៅប្រព័ន្ធតុលាការប្រកបដោយគុណភាព និងប្រសិទ្ធភាព, ៦.មានអនាម័យ មានសោភណ្ឌភាពល្អ និងមានបរិស្ថានល្អ និង៧.ឆ្លើយតបបានទាន់ពេលវេលាចំពោះគ្រោះមហាន្តរាយ និងរាល់ជំងឺឆ្លងរាតត្បាតកាចសាហាវប្រកបដោយប្រសិទ្ធភាព៕SRP

ភ្នំពេញ៖ក្នុងឱកាស អញ្ជើញសម្ពោធដាក់ឱ្យប្រើប្រាស់ អគាររដ្ឋបាលអគ្គនាយកដ្ឋានគយ និងរដ្ឋាករកម្ពុជា នៅព្រឹកមិញនេះសម្តេចតេជោ ហ៊ុន សែន បានថ្លែងកោតសរសើរថ្នាក់ដឹកនាំ និងមន្ត្រីគយទាំងអស់ សម្រាប់កិច្ចប្រឹងប្រែងប្រមូលពន្ធ។

សម្តេចតេជោនាយករដ្ឋមន្ត្រី ក៏បានផ្ដល់នូវអនុសាសន៍សំខាន់ៗចំនួន៥ចំណុចដូចខាងក្រោម:

១- បន្តលើកកម្ពស់ការផ្សព្វផ្សាយឲ្យកាន់តែទូលំទូលាយដល់គ្រប់ភាគីពាក់ព័ន្ធ បទប្បញ្ញត្តិច្បាប់ និងលិខិតបទដ្ឋានទាំងឡាយដើម្បីបង្កើនការយល់ដឹង និងការចូលរួមពីគ្រប់ភាគីទាំងអស់ក្នុងការអនុវត្តកាតព្វកិច្ចសារពើពន្ធ និងការអនុវត្តច្បាប់ និងបទប្បញ្ញត្តិជាធរមាន ដើម្បីពង្រឹងនីតិរដ្ឋ កសាងវប្បធម៌សារពើពន្ធឲ្យកាន់តែប្រសើរឡើង។

២- ត្រូវបន្តអនុវត្តឲ្យមានប្រសិទ្ធភាពនូវយុទ្ធសាស្ត្រគៀងគរចំណូល និងកម្មវិធីកែទម្រង់ការគ្រប់គ្រងហិរញ្ញវត្ថុ សាធារណៈ តាមរយៈការលើកកម្ពស់ភាពជាអ្នកដឹកនាំ ការបង្កើតឆន្ទៈក្នុងការអនុវត្តការងារកែទម្រង់ ការពង្រឹងភាពជាម្ចាស់ ការងារកែទម្រង់ការពង្រឹងភាពជាម្ចាស់ និងការយកចិត្តទុកដាក់ពង្រឹងសមត្ថភាពធនធានមនុស្សជាមួយនឹងការប្រើប្រាស់អោយបានច្រើននូវបច្ចេកវិជ្ជាព័ត៌មាន និងគមនាគមន៍ជាដើម។

៣- ត្រូវនៅបន្ត និងកែលម្អជាប្រចាំនូវការអនុវត្តយន្តការគាំទ្រកិច្ចសម្រួលពាណិជ្ជកម្ម ដូចដូចជាប្រព័ន្ធស្វ័យប្រវត្តិកម្ម ប្រព័ន្ធគ្រប់គ្រងហានិភ័យក្រោយពេលបញ្ចេញទំនិញពីគយ។

៤- ត្រូវចូលរួមអនុវត្តឲ្យបានម៉ឺងម៉ាត់ប្រកបដោយប្រសិទ្ធភាព នូវវិធានការនានា ក្នុងការទប់ស្កាត់ការឆ្លងនៃជំងឺកូវីដ-១៩ និងដោះស្រាយផលប៉ះពាល់ ដោយអនុវត្តឲ្យបានខ្ជាប់ខ្ជួននូវយុទ្ធសាស្ត្រស្តីពីការរស់នៅតាមគន្លងប្រក្រតីភាពថ្មីក្នុងបរិការណ៍នៃជំងឺកូវីដ-១៩ ដើម្បីស្ដាសេដ្ឋកិច្ចឡើងវិញ។

៥- ត្រូវបន្តពង្រឹងប្រកបដោយប្រសិទ្ធភាព ទប់ស្កាត់អំពើរត់ពន្ធ ដើម្បីរួមចំណែកបង្កើនចំណូល ការប្រកួតប្រជែងសម្រាប់ការលើកស្ទួយអនុលោមភាពសារពើពន្ធនៅកម្ពុជា ម្យ៉ាងទៀតដើម្បីលុបបំបាត់ទាំងស្រុងនូវអំពើរត់គេចពន្ធ ត្រូវពង្រឹកការរដ្ឋច្បាប់លើកកម្ពស់ក្រមសីលធម៌វិជ្ជាជីវៈរួមសហការជាមួយវិស័យពាក់ព័ន្ធ រួមជាមួយវិស័យឯកជនផងដែរ៕SRP