ខេត្តសៀមរាប៖មានការលើកឡើងថាសកម្មភាព បទល្មើសព្រៃឈើ ស្ថិតនៅក្នុងភូមិអូរ ឃុំខ្វាវ ស្រុកជីក្រែង ខេត្តសៀមរាប កើតមានយ៉ាងពេញបន្ទុកប៉ុន្តែមិនត្រូវបានអាជ្ញាធរជំនាញពាក់ព័ន្ធ ធ្វើការបង្ក្រាបនោះឡើយ។

ប្រភពពីប្រជាពលរដ្ឋបានឲ្យដឹងថា ពួកគាត់ សង្កេតឃើញមានបទល្មើសព្រៃឈើ កើតមានយ៉ាងអនាធិបតេយ្យក្នុងឃុំខ្វាវស្រុកជីក្រែង ជាពិសេសភូមិអូរ។

សេចក្ដីរាយការណ៍មួយបានឲ្យដឹងថា ក្នុងភូមិឃុំខាងលើនេះមានបទល្មើសព្រៃឈើយ៉ាងច្រើន ដោយមិនមានការទប់ស្កាត់ ពីមន្ត្រីបរិស្ថាននិងរដ្ឋបាលព្រៃឈើដែលស្ថិតនៅតំបន់គ្រប់គ្រងនោះឡើយ។

ប្រភពពីពលរដ្ឋបានឲ្យដឹងទៀតថា សកម្មភាពកាប់បំផ្លាញព្រៃឈើនិងដឹកឈើនៅតំបន់ឃុំខ្វាវស្រុកជីក្រែង ត្រូវបានក្រុមឈ្មួញដឹកជញ្ជូនតាមរថយន្តគោយន្តកន្ត្រៃនិងរទេះគោផងដែរ។

ពលរដ្ឋបានបញ្ជាក់ទៀតថា នៅតំបន់ឃុំខ្វាវ ក៏មានទីតាំងសិប្បកម្មកែច្នៃឈើ រាប់សិបកន្លែងផងដែរ ដែលបានកែច្នៃឈើផលិតជាគ្រឿងសង្ហារឹម។ ករណីបែបនេះជាហេតុនាំឲ្យមានការបំផ្លិចបំផ្លាញព្រៃឈើនៅតំបន់ឃុំខ្វាវយ៉ាងធ្ងន់ធ្ងរបំផុត។ ពាក់ព័ន្ធទៅនឹងការលើកឡើងរបស់ប្រជាពលរដ្ឋបែបនេះគេនៅពុំទាន់ឃើញមានអាជ្ញាធរសមត្ថកិច្ច បញ្ចេញប្រតិកម្មឆ្លើយតបនៅឡើយទេ៕SRP

ភ្នំពេញ៖រដ្ឋមន្ត្រីក្រសួងមហាផ្ទៃសម្តេចក្រឡាហោមស ខេង បង្ហាញលទ្ធផល ក្រុមការងារតាមដានដោះស្រាយ មតិយោបល់ របស់ពលរដ្ឋ នៅក្នុងទំព័រហ្វេសប៊ុក។

សម្តេចស ខេង នៅព្រឹកថ្ងៃទី ២០ ខែតុលានេះបានបង្ហាញថា ខ្ញុំសូមជម្រាបជូនបងប្អូនជនរួមជាតិ នូវលទ្ធផលការងារប្រចាំខែកញ្ញា ឆ្នាំ២០២១ របស់ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋ នៅក្នុងទំព័រហ្វេសប៊ុករបស់ខ្ញុំ ។

នៅក្នុងខែកញ្ញា ឆ្នាំ២០២១នេះ ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋ នៅក្នុងទំព័រហ្វេសប៊ុករបស់ខ្ញុំបានទទួលសំណូមពរ និងសំណួររបស់ប្រជាពលរដ្ឋ ស្ថិតក្នុងដែនសមត្ថកិច្ចក្រសួងមហាផ្ទៃចំនួន៦៩គណនី។

ក្នុងចំណោមនោះ ក្រុមការងារបានឆ្លើយតបទៅម្ចាស់គណនី និងដោះស្រាយចំនួន៣៦គណនី។ ក្រៅពីនេះករណីផ្សេងទៀតក្នុងខែកញ្ញា និងសេសសល់ពីខែមុនៗ កំពុងស្ថិតក្នុងដំណាក់កាលដោះស្រាយ ខណៈសំណូមពរ សំណួរ និងបញ្ហាខ្លះទៀត ត្រូវបានរកឃើញថាខុសពីសមត្ថកិច្ចក្រសួងមហាផ្ទៃ។

ជនរួមជាតិជាទីគោរព! វឌ្ឍនភាពការងារនេះ អាចសម្រេចបានដោយសារកិច្ចខិតខំប្រឹងប្រែង និងការសហការគ្នាដ៏ល្អរវាងថ្នាក់ដឹកនាំ និងមន្ត្រីក្រសួងមហាផ្ទៃ ស្ថាប័នថ្នាក់ជាតិ និងថ្នាក់ក្រោមជាតិ និងក្រុមការងារគេហទំព័រហ្វេសប៊ុករបស់ខ្ញុំ នៅពេលប្រឈមមុខនឹងបញ្ហាបង្កឡើងដោយជំងឺកូវីដ-១៩ក៏ដោយ។

ជាមួយគ្នានេះ ខ្ញុំសូមថ្លែងអំណរគុណបងប្អូនជនរួមជាតិ ដែលបានលើកជាមតិយោបល់ និងសំណូមពរនានាមកកាន់រូបខ្ញុំតាមរយៈទំព័រហ្វេសប៊ុកដើម្បីយើងរួមគ្នាដោះស្រាយនូវបញ្ហានានាក្រៅប្រព័ន្ធតុលាការ ដែលអាចនឹងជួយសម្រួលដល់ជីវភាពរស់នៅរបស់បងប្អូនប្រជាពលរដ្ឋ និងការរួមគ្នាអភិវឌ្ឍន៍សង្គមជាតិយើង ។

ខ្ញុំក៏សូមយកឱកាសនេះ ស្នើសុំការយល់យោគអធ្យាស្រ័យពីបងប្អូនជនរួមជាតិ ចំពោះករណីមួយចំនួនទៀតដែលក្រុមការងារ និងភាគីពាក់ព័ន្ធនៅមិនទាន់បានដោះស្រាយចប់សព្វគ្រប់ អាស្រ័យលើករណីខ្លះទាមទារពេលវេលា និងអនុវត្តទៅតាមនីតិវិធី៕SRP

ភ្នំពេញ៖សម្តេចហ៊ុន សែន តាមរយៈសំឡេងមួយផ្ញើទៅកាន់ជនរួមជាតិ នៅថ្ងៃទី១៩ ខែតុលា ឆ្នាំ២០២១នេះ បានបញ្ជាក់យ៉ាងដូច្នេះថា៖ «ប្រសិនបើមានការចាត់បញ្ជូនអ្នកជំងឺពីខេត្តមកកាន់រាជធានីភ្នំពេញ នឹងនាំឱ្យមានគ្រោះថ្នាក់ទៅវិញទេ ខ្ញុំសូមស្នើឱ្យមានការយកចិត្តទុកដាក់»។

ការអំពាវនាវរបស់ សម្តេចហ៊ុន សែន បានធ្វើឡើងបន្ទាប់ពីសម្តេចសង្កេតឃើញថា មានការបញ្ជូនអ្នកជំងឺកូវីដ១៩ ពីបណ្តាខេត្តមករាជធានីភ្នំពេញ ដែលការបញ្ជូននេះមិនមែនជាការសម្រេចចិត្តរបស់មន្ទីរពេទ្យនោះទេ ប៉ុន្តែជាការបញ្ជូនដោយក្រុមគ្រួសារអ្នកជំងឺ។
សម្តេចបញ្ជាក់ថា ករណីនេះកន្លងទៅបានបង្កឱ្យគ្រោះថ្នាក់ដល់អ្នកជំងឺ ឬកាន់តែធ្លាក់ក្នុងស្ថានភាពធ្ងន់ធ្ងរថែមទៀត។

សម្តេចហ៊ុន សែន បញ្ជាក់ថា យោងតាមការស្រាវជ្រាវរបស់គ្រូពេទ្យ ប្រសិនបើអ្នកជំងឺនេះធ្វើដំណើរឆ្ងាយតាមរថយន្ត ដោយមានម៉ាស៊ីនត្រជាក់ ធ្វើឱ្យអ្នកជំងឺកាន់តែធ្ងន់ទៅវិញ ដែលមកដល់មន្ទីរពេទ្យពិបាកស្រោចស្រង់តែម្តង។

សម្តេចហ៊ុន សែន បានអំពាវនាវដល់ជនរួមជាតិឱ្យទុកចិត្តមន្ទីរពេទ្យរបស់យើង នៅតាមបណ្តាខេត្តដែលយើងបានខិតខំកសាង ក្នុងរយៈពេលកន្លងទៅ ជាមួយនឹងការពង្រឹងសមត្ថភាពព្យាបាលរបស់មន្ទីរពេទ្យនៅតាមខេត្ត។ ការធ្វើបែបនេះ ដើម្បីចៀសវាងការធ្វើឱ្យកកកុញអ្នកជំងឺនៅតាមមន្ទីរពេទ្យនៅរាជធានីភ្នំពេញ។

«អ្វីដែលជាបញ្ហាធំជាងគេគឺបញ្ហាការពារអាយុជីវិតអ្នកជំងឺ ដើម្បីកុំឱ្យគ្រោះថ្នាក់ដោយការចាត់បញ្ជូន ដោយមិនមានការទទួលខុសត្រូវច្បាស់លាស់ ហើយធ្វើឱ្យមានគ្រោះថ្នាក់ដល់អ្នកជំងឺនោះវិញ តាមរយៈការបញ្ជូនមករាជធានីភ្នំពេញ ដែលគ្មានាករចាំបាច់ ខណៈដែលខេត្តក៏មានលទ្ធភាពព្យាបាលជំងឺនេះដែរ»៕SRP

ភ្នំពេញ៖ក្រុមប្រឹក្សាធុរកិច្ចអាមេរិក-អាស៊ាន ដឹកនាំដោយ លោក ថេត អូសៀស (Ted Osius) បានប្រាប់សម្ដេចហ៊ុន សែន នូវចំណាប់អារម្មណ៍របស់ក្រុមប្រឹក្សាធុរកិច្ចអាមេរិក-អាស៊ាន ដែលមានបំណងចង់វិនិយោគនៅកម្ពុជា លើវិស័យថាមពល វិស័យឧស្សាហកម្ម វិស័យសុខាភិបាល វិស័យបច្ចេកវិទ្យា វិស័យហិរញ្ញវត្ថុ និងការនាំចេញនាំចូល។

លោកក៏បានជំរាបជូននាយករដ្ឋមន្ត្រីថា ក្រុមប្រឹក្សាធុរកិច្ចអាមេរិក-អាស៊ាន នឹងគាំទ្រកម្ពុជានៅពេលដែលកម្ពុជាទទួលធ្វើជាម្ចាស់ផ្ទះអាស៊ាននៅពេលខាងមុខ ក៏ដូចជាជួយដល់កម្ពុជាលើវិស័យសេដ្ឋកិច្ច នៅក្នុងអំឡុងពេលនៃការរាតត្បាតនៃជម្ងឺកូវីដ១៩ ក៏ដូចជាជួយកម្ពុជាក្នុងការកសាងសមត្ថភាព និងបញ្ហាសន្តិសុខថាមពលផងដែរ។

ក្នុងជំនួបនោះ លោក ថេត អូសៀស (Ted Osius) រួមជាមួយនឹងសមាជិកក្រុមហ៊ុនទាំងអស់បាន សម្ដែងនូវការអបអរសាទរចំពោះសម្ដេចហ៊ុន សែន ដែលបានចាត់វិធានការទប់ស្កាត់ការឆ្លងរីករាលដាលនៃជំងឺកូវីដ១៩ បានជោគជ័យ។

លោកប្រាប់យ៉ាងដូច្នេះនៅថ្ងៃអង្គារ ទី១៩ ខែតុលា នេះ ក្នុងឱកាសពិភាក្សាការងារជាមួយ សម្ដេច ហ៊ុន សែន នាយករដ្ឋមន្ត្រី។

សម្ដេចហ៊ុន សែន បានសំដែងនូវការអបអរសាទរចំពោះ លោក ថេត អូសៀស (Ted Osius) ដែលត្រូវបានតែងតាំងជា ប្រធាន និងជាអគ្គនាយកប្រតិបត្តិរបស់ ក្រុមប្រឹក្សាធុរកិច្ចអាមេរិក-អាស៊ាន។

សម្ដេចតេជោក៏បានថ្លែងអំណរគុណចំពោះសហរដ្ឋអាមេរិកផងដែរ ដែលបានផ្ដល់វ៉ាក់សាំងកូវីដ១៩ដល់កម្ពុជា ហើយសម្ដេចក៏បានសម្ដែងនូវសេចក្តីរីករាយ ដែលក្រុមប្រឹក្សាធុរកិច្ចអាមេរិក-អាស៊ាន បានទទួលស្គាល់នូវភាពជឿនលឿនរបស់កម្ពុជាក្នុងការចាក់វ៉ាក់សាំងជូនដល់ប្រជាពលរដ្ឋ និងការទទួលបានផ្លែផ្កាជាវិជ្ជមាននេះ។

សម្ដេចតេជោ បានជម្រាបជូន ក្រុមប្រឹក្សាធុរកិច្ចអាមេរិក-អាស៊ាននូវផែនការចូលរួមដោះស្រាយបញ្ហាបម្រែបម្រួលអាកាសធាតុរបស់កម្ពុជា ក៏ដូចជាវិធានការឆ្ពោះទៅមុខរបស់កម្ពុជា ដែលរួមមាន បន្តគ្រប់គ្រងជំងឺកូវីដ១៩ ជំរុញការកែទម្រង់ផ្នែកធុរកិច្ចឲ្យបានកាន់តែប្រសើរ ដើម្បីទាក់ទាញអ្នកវិនិយោគឲ្យបានកាន់តែច្រើន ជំរុញការកែទម្រង់លើគ្រប់វិស័យ និងជំរុញការបង្កើនសកម្មភាពធុរកិច្ច និងលើកទឹកចិត្តឲ្យវិស័យឯកជនចូលរួមដើម្បីជំរុញសេដ្ឋកិច្ចកម្ពុជា។

នាយករដ្ឋមន្ត្រី ក៏បានជម្រាបជូនដល់ក្រុមប្រឹក្សាធុរកិច្ចអាមេរិក-អាស៊ាន នូវសក្តានុពលអំពីការវិនិយោគ នៅក្នុងប្រទេសកម្ពុជា ព្រមជាមួយការអំពាវនាវ ឲ្យវិនិយោគិនសហរដ្ឋអាមេរិកពិចារណាមកវិនិយោគនៅកម្ពុជានាពេលខាងមុខផងដែរ៕SRP

ខេត្តកំពង់ចាម៖ក្នុង​ដំណើរ​អញ្ជើញ​ចុះ​ពិនិត្យ​ការ​រៀបចំ​​បេីកវិទ្យាល័យព្រះសីហនុ​ឡើងវិញ លោក​ អ៊ុន​ ចាន់ដា​ អភិបាលខេត្តកំពង់ចាម​ បាន​ជំរុញ​ណែនាំ​ដល់​មន្ត្រី​ពាក់ព័ន្ធ​ ធ្វើយ៉ាងណា​ក្នុង​រយៈពេល​៣ថ្ងៃ​ទៀត​ ត្រូវ​រៀបចំ​ដឹក​ជញ្ជូន​គ្រែ​ និង​សម្ភារ​ផ្សេងៗ​ ចេញ​ពី​សាលា​ឲ្យ​អស់​ ជាពិសេស​ត្រូវរៀបចំ​​សំអាត​បរិស្ថាន​ទាំង​ក្នុង​បន្ទប់​ និង​ទីធ្លា​ជុំវិញ​ខាង​ក្រៅ​សាលា​ ​លេីសពីនោះត្រូវ​បាញ់​ថ្នាំ​សម្លាប់​មេរោគ​ឲ្យ​បាន​គ្រប់សព្វទីកន្លែងផងដែរ។

លោកណែនាំបែបនេះនៅព្រឹក​មិញនេះ​ ក្នុងឱកាសចុះពិនិត្យ​ការ​រៀបចំ​បេីកសាលាវិទ្យាល័យព្រះសីហនុ​ ដេីម្បីឲ្យ​សិស្សានុសិស្ស​បាន​ចូលរៀនវិញក្នុងពេលឆាប់ៗនេះ។ អភិបាលខេត្ត​ ក៏បាន​ឧបត្ថម្ភ​ថវិកា​មួយ​ចំនួន​ដល់​គណៈគ្រប់គ្រង​សាលា​​ ដេីម្បី​ប្រេីប្រាស់​តាម​តម្រូវការ​ចាំបាច់​ផ្សេងៗ​ ក្នុង​ដំណេីរការ​បេីក​សាលា​រៀន​នេះ។

​គួរ​រំលឹក​ផងដែរ​ថា កន្លងទៅនេះ​រដ្ឋបាលខេត្ត​កំពង់ចាម បានរៀបចំ​ឃ្លាំង​ពាណិជ្ជកម្ម ចំនួន​៣ទីតាំង​ ​សម្រាប់​ធ្វើជា​​មន្ទីរពេទ្យ​ពិនិត្យ​ព្យាបាល​ជំងឺ​កូ​វីដ-​១៩កម្រិត​ស្រាល​ និង​កន្លែង​សម្រាប់​ធ្វើ​ច​ត្រា​ឡី​ស័ក ដោយទីតាំងទី១-​ ​ឃ្លាំង​ពាណិជ្ជកម្ម​​ ស្ថិត​ក្នុងស្រុក​កំពង់សៀម គឺ​ត្រូវ​បានរៀបចំ​ ជា​មន្ទីរពេទ្យ​សម្រាប់​ពិនិត្យ​​ព្យាបាល​អ្នកជំងឺ​កូ​វីដ-​១៩​ កម្រិត​ស្រាល ដែល​អាច​ផ្ទុក​អ្នកជំងឺ​បាន​ក្នុង​រង្វង់​ជិត ១០០០​នាក់។ ទីតាំងទី២-​ ​​ឃ្លាំងនៃ​មន្ទីរ​ពាណិជ្ជកម្ម​ខេត្តកំពង់ចាម ក្នុង​ក្រុង​កំពង់ចាម ធ្វើជា​មណ្ឌល​ច​ត្តា​ឡី​ស័ក ដែលអាចដាក់​ប្រជាពលរដ្ឋ​ក្នុង​រង្វង់​ពី ៨០០ ទៅ ១០០០ នាក់ ។ និងទីតាំង​ទី៣-ឃ្លាំង​នៅក្នុង​ស្រុក​កងមាស ធ្វើជា​មណ្ឌល​ច​ត្តា​ឡី​ស័ក ដែលអាចដាក់​ប្រជាពលរដ្ឋ ធ្វើ​ច​ត្តា​ឡី​ស័ក​ក្នុង​រង្វង់​ពី ៨០០ ទៅ ១០០០ នាក់​ផងដែរ៕SRP

ខេត្តសៀមរាប៖សមត្ថកិច្ចនគរបាលស្រុកប្រាសាទបាគង បានបង្ក្រាបបទល្មើសព្រៃឈើ មួយករណី។ ការបង្ក្រាបធ្វើឡើងនៅក្នុងភូមិចំបក់ ឃុំរលួស ស្រុប្រាសាទបាគង នៅព្រលប់ថ្ងៃទី១៧ ខែតុលា ឆ្នាំ២០២១។

សមត្ថកិច្ចក្នុងហេតុការណ៍បានឲ្យដឹងថាការបង្ក្រាបនេះបានរឹបអូសឈើប្រភេទយាង ឈ្លីក ប្រវែងពី៦ម៉ែត្រទៅ១០ម៉ែត្រ មានមុខកាត់ពី ៥x១៥ និង ៥x២០ ជាង៤ម៉ែត្រគូប ត្រូវបានយក​ទៅរក្សាទុក​នៅ​ផ្នែករដ្ឋបាល​ព្រៃឈើបន្ទាយស្រី ស្ថិតនៅឃុំព្រះដាក់ ស្រុកបន្ទាយស្រី។

សេចក្ដីរាយការណ៍បានឲ្យដឹងថាសកម្មភាពបទល្មើសព្រៃឈើនេះជាររបស់ឈ្មោះ ណាក់ បានដឹកចេញពីស្រុកស្វាយលើ ក្នុងគោលដៅយកមកចែកចាយតាមដេប៉ូនៅក្រុងសៀមរាប៕SRP

ខេត្តសៀមរាប៖ផ្លួវ១ខ្សែនៅស្រុកអង្គរធំដែលមានចម្ងាយជាង២០គីឡូពីក្រុងសៀមរាបបាន រងការខូចខាតយ៉ាងធ្ងន់ធ្ងរ មិនទាន់​មានការជួសជុលឬធ្វើឡើងវិញនោះ មន្ត្រីថាដោយសាររថយន្តដឹកលើសទម្ងន់ហួសកម្រិត។

ប្រជាពលរដ្ឋរស់នៅតាមបណ្ដោយផ្លូវបានប្រាប់សៀមរាបប៉ុស្ដិ៍ថាផ្លូវមួយខ្សែមានទីតាំងនៅ ភូមិបំពេញរាជ ឃុំលាងដៃ ស្រុកអង្គរធំ ខេត្តសៀមរាប រងការខូចខ្ទេចខ្ទីទាំងស្រុងដោយសារ ឡានធំៗដឹកគ្រួស ថ្ម ខ្សាច់ និង ដី របស់ក្រុមឈ្មួញប្រកបរបរជីវកម្ម។ ពលរដ្ឋថា ករណីនេះបានបង្កឲ្យពលរដ្ឋជួបការលំបាកយ៉ាងខ្លាំងក្នុងការធ្វើដំណើរ។

ប្រជាពលរដ្ឋថាតាមផ្លូវមួយខ្សែនេះ ជាផ្លូវសក្តានុពលទេសចរណ៍ សម្រាប់បម្រើក្នុងវ័យទេសចនិងការដឹកជញ្ជូនកសិកផលរបស់ប្រជាពលរដ្ឋផងដែរ។ ក្នុងនោះពលរដ្ឋក៏ដូចជាភ្ញៀវដែលតែងតែធ្វើដំណើរទៅទស្សនាតំបន់ទេសចរណ៍ ទឹកជ្រោះធ្លាក់ពាក់ស្នែង និងរមណីយដ្ឋានភ្នំពើងតានាន់ ភ្នំថ្មធម្មជាតិជាច្រើន ជាដើម។

ប្រជាពលរដ្ឋបន្តថាបើទោះបីជាផ្លូវមួយនេះសំខាន់ក្នុងការបម្រើលើវិស័យទេសចរណ៍និងការដឹកជញ្ជូនកសិផល ហើយបានរងការខូចខាតយ៉ាងណាក៏ដោយពួកគាត់មិនទាន់ឃើញអាជ្ញាធរមន្ទីរពាក់ព័ន្ធធ្វើការធ្វើនៅឡើយទេ។

មន្ត្រីមន្ទីរសាធារណការនិងដឹកជញ្ជូនខេត្តសៀមរាប បានលើកឡើងថាផ្លូវ១ខ្សែ ខាងលើដែលរងការខូចខាតនោះ មិនស្ថិតនៅក្រោមការគ្រប់គ្រងរបស់មន្ទីរសាធារណការនិងដឹកជញ្ជូននោះឡើយ គឺស្ថិតនៅក្រោមការទទួលខុសត្រូវរបស់មន្ទីរអភិវឌ្ឍន៍ជនបទខេត្តសៀមរាប។

ករណីនេះលោក ខេង ញ៉ល ប្រធានមន្ទីរអភិវឌ្ឍន៍ជនបទខេត្តសៀមរាប បានថ្លែងប្រាប់អង្គភាពសៀមរាបប៉ុស្ដិ៍ថា៖

ជុំវិញការផ្លូវខូចនេះ អភិបាលស្រុកអង្គរធំ លោកឡុង រដ្ឋារក្ស បានបញ្ជាក់តាមប្រព័ន្ទតេលេក្រាមថា៖

បើតាមមន្ត្រីមន្ទីរសាធារណការបញ្ជាក់ថា ជញ្ជីងថ្លឹងរថយន្តនៅផ្លូវខាងលើគឺក្រោមការគ្រប់គ្រងរបស់អាជ្ញាធរជាតិអប្សរា។ ទោះជាយ៉ាង មិនទាន់ទទួលបានការឆ្លើយតប ពីអាជ្ញាធរជាតិអប្សរានៅឡើយ

នៅឡើយទេ ចំពោះការដាក់ទីតាំងថ្លឹងរថយន្តនេះ។

សូមរំលឹកថាផ្លូវមួយខ្សែនេះ បានរងការខូចខាតយ៉ាងធ្ងន់ធ្ងរ ដោយខែវស្សាបែកភក់ ឯខែប្រាំងវិញ គឺហុយទ្រលោម ដោយសារតែរថយន្តធុនធំៗ ដឹកជញ្ជូនថ្ម ដែលកាយចេញភ្នំនៅឃុំគោកដូង ស្រុកអង្គរជុំ ដោយករណីនេះពលរដ្ឋធ្លាប់បិទផ្លូវតវ៉ាផងដែរ៕SRP

ខេត្តស្វាយរៀង៖បុរសខ្មែរនិងវៀតណាម២នាក់ ត្រូវបានចាប់ខ្លួនរួមជាមួយវត្ថុតាងថ្នាំញៀន ជិត២០គីឡូក្រាម។

មន្ត្រីប្រឆាំងគ្រឿងញៀនបានឲ្យដឹងថាកាលពីថ្ងៃទី១៣ ខែតុលា ឆ្នាំ២០២១ វេលាម៉ោង១៩និង៣០នាទីនៅចំណុចផ្លូវបេតុង ស្ថិតក្នុងភូមិតាបិប សង្កាត់បាវិត ក្រុងបាវិត ខេត្តស្វាយរៀង កម្លាំងអធិការដ្ឋាននគរបាលក្រុងបាវិត ដឹកនាំដោយលោកអែម សុវណ្ណារិទ្ធិ សហការជាមួយកម្លាំងជំនាញការិយាល័យប្រឆាំងគ្រឿងញៀនខេត្ត បានបើកប្រតិបត្តិការស្រាវជ្រាវបង្ក្រាបករណីជួញដូរ ដឹកជញ្ជូនគ្រឿងញៀនឆ្លងដែនមដោយបានឃាត់ខ្លួនជនសង្ស័យចំនួន០២នាក់។

១.ឈ្មោះ ឡេ វ៉ាន់ថ អាយុ១៨ឆ្នាំ ភេទប្រុស ជនជាតិវៀតណាម មុខរបរជាងឈើ រស់នៅភូមិដើមស្លែង សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ(ជាអ្នកដឹកជញ្ជូនគ្រឿងញៀនពីរាជធានីភ្នំពេញ ឆ្លងដែនទៅកាន់ប្រទេសវៀតណាម)។

២.ឈ្មោះ វ៉ាន់ សុផា អាយុ២០ឆ្នាំ ភេទប្រុស ជនជាតិខ្មែរ មុខរបរជាងឈើ រស់នៅភូមិដើមស្លែង សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ(ជាអ្នកដឹកជញ្ជូនគ្រឿងញៀនពីរាជធានីភ្នំពេញ ឆ្លងដែនទៅកាន់ប្រទេសវៀតណាម)។

មន្ត្រីបានបន្តថា ប្រតិបត្តិការនេះ រឹបអូសយកវត្ថុតាងរួមមាន:

– ថ្នាំញៀន ប្រភេទហេរ៉ូអុីន ទម្ងន់ ៣៥០២ក្រាម

– ថ្នាំញៀនប្រភេទមេតំហ្វេតាមីន ទម្ងន់ ២៩៨៦ក្រាម

– ថ្នាំញៀន ប្រភេទកេតាមីន ទម្ងន់ ១៣០០០ក្រាម(សរុបទម្ងន់ ១៩kg៤៨៨ក្រាម)

– អាវុធខ្លីធុន K54ចំនួន០១ដើម បង់០១ គ្រាប់ចំនួន០៨គ្រាប់

– ម៉ូតូ ០១គ្រឿងនិងកាបូបធំ សំរាប់ដាក់គ្រឿងញៀនចំនួន០១។

បច្ចុប្បន្នកម្លាំងជំនាញផែនការងារប្រឆាំងគ្រឿងញៀន ខេត្តស្វាយរៀង បញ្ជូនទៅកាន់សាលាដំបូងខេត្ត៕SRP

ខេត្តកំពង់ធំ៖បុរសម្នាក់ម្នាក់បានស្លាប់ភ្លាមៗ ខណៈកំពុងបើកម៉ូតូត្រូវបានរថយន្តបុកចំពេញទំហឹង។

ហេតយការណ៍កើតឡើងនៅល្ងាច ថ្ងៃទី១៧ ខែតុលាឆ្នាំ២០២១ នៅតាមបណ្តោយផ្លូវជាតិលេខ៦ ចន្លោះគីឡូម៉ែត២៩និង៣០ ចំណុចភូមិធន់មោង ឃុំកំពង់ថ្ម ស្រុកសន្ទុក ខេត្តកំពង់ធំ។

សមត្ថកិច្ចបានឲ្យដឹងថារថយន្តបង្កម៉ាកហាយលិនឌ័រ ពណ៌ស ពាក់ស្លាកលេខ ភ្នំពេញ ១ AI ៧៧៨៣ បើកបរដោយឈ្មោះ ម៉ៅ សួស ភេទប្រុស អាយុ៤១ឆ្នាំ មានទីលំនៅ ភូមិថ្មី សង្កាត់ឃ្លាំង ខណ្ឌសែនសុខ ក្រុងភ្នំពេញ។
ចំណែកជនរងគ្រោះ ឈ្មោះ ភិន សុវណ្ណ: អាយុ២៨ឆ្នាំ មានទីលំ ភូមិលើកដែក ឃុំលើកដែក ស្រុកកោះធំ ខេត្តកណ្តាល បើក
ម៉ូតូ ម៉ាកសងC១២៥ ពណ៌ខ្មៅ ស្លាកលេខ សៀមរាប ១.AB ០៤១១។

សមត្ថកិច្ចបានបន្តថាគ្រោះថ្នាក់ចរាចរណ៍នេះ ម៉ូតូបើកចេញពីកើតទៅលិច លុះដល់កន្លែងកើតហេតុ រថយន្តហាយលិនឌ័រ ឡើងជែងរថយន្តមួយគ្រឿងទៀត ក៏ជ្រុលចង្កូតទៅបុកបណ្តាលឲ្យស្លាប់តែម្ដង។

សូមបញ្ជាក់ថា វត្ថុតាងរថយន្តនិងម៉ូតូត្រូវបានយកទៅរក្សារទុក នៅអធិការដ្ឋាននគរបាលស្រុកសន្ទុក។ ចំណែកតៃកុងរថយន្ត ត្រូវបានឃាត់ខ្លួនផងដែរ៕SRP

ភ្នំពេញ៖នាយករដ្ឋមន្ត្រីហ៊ុន សែន នៅព្រឹកថ្ងៃចន្ទនេះបានប្រកាសឲ្យចរាចរនិងប្រើប្រាស់ក្រដាសប្រាក់ប្រភេទ៣ម៉ឺនរៀលគំរូថ្មី។

នាយករដ្ឋមន្ត្រីបានឲ្យដឹងថា រាជរដ្ឋាភិបាលចេញអនុក្រឹត្ យលេខ២០០អនក្រ.បក អនុញ្ញាតដាក់ឲ្យចរាចរ និងប្រើប្រាស់ទូទាំងប្រទេស ក្រដាសប្រាក់ប្រភេទ៣០០០០រៀលគំរូថ្មី អបអរខួប៣០ឆ្នាំ កិច្ចព្រមព្រៀងសន្តិភាពទីក្រុងប៉ារីស និងខួប៣០ឆ្នាំនៃការយាងនិវត្តន៍របស់ ព្រះករុណាព្រះបាទ សម្តេចព្រះនរោត្តម សីហនុ “ព្រះបរមរតនកោដ្ឋ”៕SRP

ខេត្តសៀមរាប៖បុរសញៀនស្រាម្នាក់បានស្លាប់នៅវាលស្រែ។ ហេតុការណ៍បានកើតឡើងនៅរសៀល ថ្ងៃទី១៧ ខែតុលា ឆ្នាំ២០២១ វេលាម៉ោងវាលស្រែខាងលិច ស្ថិតនៅភូមិគោកឫស្សី ឃុំកែពណ៌ ស្រុកពួក ខេត្តសៀមរាប។

សមត្ថកិច្ចបានឲ្យដឹងថាជនរងគ្រោះឈ្មោះរឿន មឿន ភេទប្រុស អាយុ៣៨ឆ្នាំ មុខរបរធ្វើស្រែមានទីលំនៅភូមិ ឃុំកើតហេតុ ជាបុរសពោះម៉ាយរស់ នៅជាមួយម្តាយ។

តាមរៀបរាប់ម្តាយថា កូនរបស់ខ្លួនជាមនុស្សញៀន ស្រា និងធ្លាប់មានអាការ:ប្រកាច់ មុនកើតហេតុកូនខ្លួនមានសភាពស្រវឹង និងប្រាប់ខ្លួនថា ទៅដាក់បង្កៃ ខ្លួនបានឃាត់ តែមិនស្តាប់។

តាមក្រុមគ្រូពេទ្យបានយកសំណាក អវិជ្ជមានកូវីដ១៩ លើដងខ្លួនជនរងគ្រោះពុំមានស្លាកស្នាមដែលគួរសង្ស័យពាក់ព័ន្ធបទល្មើសឡើយ។

ការសន្និដ្ឋានរបស់គ្រូពេទ្យ គីស្លាប់សារខ្យល់គ បណ្តាលដួលផ្កាប់មុខក្នុងទឹក។ សពត្រូវបានប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕SRP

ខេត្តកំពង់ចាម៖លោកកែវ នារិទ្ធិ សមាជិកក្រុមប្រឹក្សាខេត្តកំពង់ចាម បានអំនាវដល់យុវវ័យក៏ដូចជាបងប្អូនប្រជាពលរដ្ឋទាំងអស់ សូមជ្រើសរើសយកផលិតផលណាដែលមានគុណភាពនិងស្របច្បាប់ ទទួលស្គាល់ដោយក្រសួងសុខាភិបាលពោលគឺត្រូវប្រុងប្រយ័ត្នកុំប្រើប្រាស់ផលិតផលក្លែក្លាយ ព្រោះវាអាចបណ្តាល ឲ្យមានគ្រោះថ្នាក់ដល់សុខភាព និងស្បែករបស់យើង។

ថ្លែងយ៉ាងដូច្នេះក្នុងពិធីបើកសម្ពោធក្រុមហ៊ុន អ៊ីអេសអិនស៊ីប៊ីយូធី ឯ.ក នារសៀល ថ្ងៃទី១៦ ខែតុលា ឆ្នាំ២០២១ នៅក្រុងកំពង់ចាម ខេត្តកំពង់ចាម។

លោកកែវ នារិទ្ធិ ក៏បានកោតសរសើរដល់ សមាជិ សមាជិការ ភាគីរបស់ក្រុមហ៊ុន ដែលជាកូនខ្មែរ មានទឹកចិត្តមោះមុត ពួតដៃគ្នា ក្នុងការបើកដំណើការ ក្រុមហ៊ុន អ៊ី អេសអិនស៊ី ប៊ីយូធី ឯ.ក នេះ ដោយស្របច្បាប់នៅក្នុងព្រះរាជាណាចក្រកម្ពុជា អោយមានដំណើរការល្អប្រសើរទទួលបានលទ្ធផលជោគជ័យ។  លោកបានគូសបញ្ជាក់ផងដែរថា យុវជន យុវនារី នៅតាមបណ្តារប្រទេសជាច្រើន គឺកំពុងមាន ការវិវឌ្ឍន៍ខ្លាំង អំពីការការថែរក្សាសម្ពស្សនេះ។

លោកស្រី អេង សុខលី នាយិការក្រុមហ៊ុន អ៊ី អេស អិន ស៊ី ប៊ីយូធី ឯ.ក បានគូសបញ្ជាក់ឲ្យដឹងថា ក្រុមហ៊ុនបើកដំណើរការមិនទាន់បាន១ឆ្នាំផង មានតំណាងចែកចាយចំនួនជាង២០០នាក់ នេះគឺជាសញ្ញា បញ្ជាក់ថា ក្រុមហ៊ុននេះបាននាំចូលនូវផលិតផលមានគុណភាពល្អពិតៗ និងមានច្បាប់ទំលាប់ត្រឹមត្រូវ។

លោកស្រី បានបញ្ជាក់ថា នៅពេលថ្មីៗនេះ ក្រុមហ៊ុនបានធ្វើតេស្តទៅលើផលិតផលចំនួន ៣មុខបន្តទៀត គឺ ១ហ្វូមលាងមុខ ទី២ ឡេលាបខ្លួន និងសេរ៉ូមជួយពន្យាភាពចាស់ ដោយត្រៀមនាំចូលក្នុង ពេលឆាប់ៗនេះផងដែរ។ ម្យ៉ាងទៀតក្រុមហ៊ុននឹងមានផែនការពង្រីកផ្សព្វផ្សាយអំពីផលិតផលអោយមាន វិសាលភាពធំទូលាយទូទាំងអាស៊ី និងបន្តស្វែងរកតំណាងចែកចាយគ្រប់តំបន់បន្ថែមទៀតត៕SRP