ខេត្តសៀមរាប៖លោក​ប្រាក់​ វណ្ណះ​ មេបញ្ជាការ​កកងរាជអាវុធហត្ថក្រុង បានដឹកនាំកម្លាំងមូលដ្ឋានកងរាជអាវុធហត្ថក្រុងសៀមរាប ចុះបង្ក្រាបករណីលួចកាច់សោម៉ូតូ និងឈានដល់ការឃាត់ខ្លួនមនុស្ស៣នាក់។

ការបង្ក្រាបធ្វើឡើងថ្ងៃទី៨​ ខែតុលា​ ឆ្នាំ​២០២១​ នៅត្រង់ចំណុចភូមិធ្លូកអណ្តូង​ សង្កាត់​ស្លក្រាម​ ក្រុងសៀមរាប​ តាមការណែនាំរបស់លោក​ ប៉ោ វណ្ណនិត មេបញ្ជាការ​កងរាជអាវុធហត្ថខេត្តសៀមរាប​​។

សមត្ថកិច្ចអាវុធហត្ថក្រុងសៀមរាប បានឲ្យដឹងថាជនសង្ស័យទាំង០៣នាក់៖១-ឈ្មោះ​ បាង​ សុធារ៉ា​ ភេទ​ប្រុស​ អាយុ​៣៩ឆ្នាំ​ មុខរបរ​នៅផ្ទះ​ រស់នៅភូមិតាភុល​ សង្កាត់​ស្វាយដង្គំ​ ក្រុងសៀមរាប។ ២-ឈ្មោះ​ ឡាច​ សម្បត្តិ​ ភេទ​ប្រុស​ អាយុ​៣៦ឆ្នាំ​ មុខរបរ​ចុងភៅ​ រស់​នៅភូមិអញ្ចាញ​ សង្កាត់​នគរធំ​ ក្រុងសៀមរាប។
៣-ឈ្មោះ​ ថុល​ សេងធូ​ ភេទ​ប្រុស​ អាយុ​៣០ឆ្នាំ​ មុខរបរ​ជាងធ្វេីម៉ូតូ​ នៅភូមិធ្លូកអណ្តូង​ សង្កាត់​ស្លក្រាម​ ក្រុងសៀមរាប។

សមត្ថកិច្ចបន្តថាប្រតិបត្តិការនេះដកហូតវត្ថុ​តាងរួមមាន៖ ម៉ូតូ២គ្រឿង.ដែកសម្រាប់បុកកាច់កសោ​ម៉ូតូ១.ទូរស័ព្ទ២គ្រឿង​ និងសម្ភារម៉ូតូមួយចំនួន។

សមត្ថកិច្ចបញ្ជាក់ថាបច្ចុប្បន្ន​ ជនសង្ស័យ​និងវត្ថុតាង ត្រូវបានបញ្ចូនទៅការិយាល័យជំនាញអាវុធហត្ថ ខេត្តសៀមរាប៕SRP

ខេត្តសៀមរាប៖ស្ត្រីម្នាក់ត្រូវបានប្ដីអះអាងថាឧស្សាហ៍ផឹកស្រាបណ្ដាលឱ្យឈឺរហូតដល់ស្លាប់។

ហេតុការណ៍បានកើតឡើងនៅភូមិចុងកៅស៊ូ សង្កាត់ស្លក្រាម ក្រុងសៀមរាប។

របាយការណ៍របស់អាជ្ញាធរមូលដ្ឋានបានបង្ហាញថា ឈ្មោះ ហ៊ន ពុធជា ដែលត្រូវជាប្ដីបានរៀបរាប់ប្រាប់សមត្ថកិច្ចថារូបគាត់បានគ្នាជាប្ដីប្រពន្ធជាមួយនឹងឈ្មោះ គឹម ឡែន អាយុ៣២ឆ្នាំ មានស្រុកកំណើត ភូមិកំពង់ ឃុំព្រះបាទជាន់ជុំ ស្រុកគីរីវង្ស ខេត្តតាកែវ រយៈពេល ០៤ ឆ្នាំមកហើយ ដោយពុំមានសាច់ញាតិនោះទេគឺឪពុកម្ដាយបានស្លាប់អស់ហើយ។ ដោយប្រពន្ធរបស់គាត់មានកូនស្រី ១នាក់ឈ្មោះហ៊ន ពំុពុយ អាយុ ០៥ ឆ្នាំ ជាកូនរបស់ប្ដីមុន។

បុរសជាប្ដីបន្តថារូបគាត់តាំងពីបានគ្នាជាមួយគឹម ឡែន មកប្រពន្ធខ្ញុំនេះគឺផឹកស្រាជាប្រចាំស្រាសត្រាំថ្នាំ រហូតដល់មកដល់ថ្ងៃទី ០៤ ខែវិច្ឆិកា ឆ្នាំ ២០២១ ប្រពន្ធខ្ញុំមានសភាពឈឺធ្ងន់ធ្ងរ ខ្ញុំហៅពេទ្យមកដាក់សេរ៉ូមអស់ចំនួន ០៣ កំផ្លោកក៏គាត់មានសភាពធូរស្រាលបន្តិចរហូតមកដល់ថ្ងៃទី ០៩ ខែវិច្ឆិកា ឆ្នាំ ២០២១ វេលាម៉ោង៨ រូបខ្ញុំបានចេញទៅសុំទានគេនៅផ្សារកន្ត្រក ទុកគាត់ឲ្យនៅនឹងផ្ទះជាមួយនឹងកូនស្រី តែគាត់ដើរមិនរួចទេដេកនៅនឹងកន្ទេលទេ។ រហូតដល់ម៉ោង ១២ ថ្ងៃនេះគាត់ត្រឡប់មកពីសុំទានគេមកដល់ផ្ទះវិញ ស្រាប់តែប្រពន្ធបានស្លាប់បាត់ទៅហើយ ការស្លាប់នេះគឺស្លាប់ដោយសារជម្ងឺប្រចាំកាយរបស់គាត់ទេ ដោយបន្សល់ទុកកូនស្រីឱ្យប្ដីមើលថែ៕SRP

ខេត្តកំពង់ចាម៖អភិបាលខេត្ត បាននាំយកអំណោយ ចែកជូនដល់អតីតយុទ្ធជនចំនួន ៥០គ្រួសារ ដោយក្នុងមួយគ្រួសារ ទទួលបាន៖ អង្ករ ២៥គីឡូ មី១កេសត្រីខ១យួរ ននិងថវិកាចំនួន១០ម៉ឺនរៀល។

ការចែកអំណោយនេះនៅព្រឹកមិញនេះ ក្នុងពិធី រំលឹកខួបលើកទី៦៨​ ថ្ងៃ​បុណ្យឯករាជជាតិ៩ វិច្ឆិកា ឆ្នាំ​១៩៥៣-៩ វិច្ឆិកា ឆ្នាំ២០២១ និង​អបអរ​សាទរ​​ខួប​អនុស្សាវរីយ៍​លើក​ទី​៦៨ នៃទិវា​កំណើត​កងយោធពល​ខេ​ម​ភូភូមិន្ទ ដើម្បីផ្សាភ្ជាប់សម្ដែងនូវសេចក្ដីដឹងគុណ ដល់វីរយុទ្ធជន វីរៈយុទ្ធនារីកម្ពុជា។

ពិធីនេះ​ត្រូវ​បាន​រៀបចំ​ឡើង​នៅបរិវេណ សួនសាធារណ ខាងមុខសាលាគរុកោសល្យភូមិភាគ ខេត្តកំពង់ចាម​ ក្រោម​វត្តមាន លោក​​ អ៊ុន​ ចាន់ដា​ អភិបាលខេត្តកំពង់ចាម​​ និង​លោក​ ខ្លូត​ ផន​ ប្រធាន​ក្រុមប្រឹក្សា​ខេត្ត​ ដោយមានការអញ្ជើញចូលរួមពីលោក​ លោកស្រី​ សមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរ អង្គភាពជុំវិញខេត្ត កងកម្លាំងប្រដាប់អាវុធ មន្ត្រីរាជការ​ និង​ព្រះមន្ត្រីសង្ឃ​ ​ផងដែរ​​។

លោក​ អ៊ុន​ ចាន់ដា​ អភិបាលខេត្ត​កំពង់ចាម​ បានឡើងថា ការប្រារឰពិធីអបអរសាទររំលឹកខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា និងទិវាកំណើតនៃកងយោធពលខេមរភូមិន្ទ (៩ វិច្ឆិកា ១៩៥៣ – ៩ វិច្ឆិកា ២០២១ ) គឺជាទិវាប្រវត្តិសាស្ត្រដ៏ថ្លៃថ្លារបស់ប្រជាជាតិខ្មែរ ដើម្បីរំលឹកគុណូបការៈ ដ៏ខ្ពង់ខ្ពស់បំផុត ចំពោះព្រះវិញ្ញាណក្ខ័ន្ធព្រះបរមរតនកោដ្ឋ ដែលបានដឹកនាំទាមទារឯករាជ្យ ពីអាណានិគមនិយមបារាំង និងរំលឹកគុណដល់វីរៈជន កងកម្លាំងប្រដាប់អាវុធ នៃកងយោធពលខេមរភូមិន្ទ នៅគ្រប់ជំនាន់ ដែលបានឆ្លងកាត់នូវគ្រប់ដំណាក់កាលធំៗ ជាប្រវត្តិសាស្ត្ររបស់ប្រទេសជាតិ រួមមានការ តស៊ូដណ្តើមឯករាជ្យ ការពុះពារ ឆ្លងកាត់ដំណាក់កាលនៃសង្គ្រាម និងរបបប្រល័យពូជសាសន៍ ប៉ុល ពត ជាពិសេសលើមូលដ្ឋាន នៃជ័យជម្នះថ្ងៃ០៧ មករា ឆ្នាំ១៩៧៩ ដែលបានកសាងនូវអ្វីៗគ្រប់បែបយ៉ាង ដូចបច្ចុប្បន្ននេះ។ ទិវាបុណ្យ ឯករាជ្យជាតិ ៩-វិច្ឆិកា និងទិវាកំណើតកងយោធពលខេមរភូមិន្ទនាពេលនេះ បានឆ្លុះបញ្ចាំង ពីជោគជ័យក្នុងកម្លាំងមហាសាមគ្គី របស់ប្រជាជាតិខ្មែរយើងទាំងមូល ដែលបានឆ្លងកាត់ដំណាក់កាលមួយ ទៅដំណាក់កាលមួយប្រកបដោយភាពបត់បែន នៃដំណើរប្រវត្តិសាស្ត្រដ៏ស្មុគស្មាញជាច្រើន ជាពិសេស ឆ្លងកាត់រយៈពេល ៦៨ឆ្នាំកន្លងមក រហូតដល់បច្ចុប្បន្ននេះ គឹនៅតែរក្សាបាននូវអត្តសញ្ញាណជាកម្លាំងប្រដាប់អាវុធ របស់ជាតិកម្ពុជា ជាកងយោធពលខេមរភូមិន្ទដ៏អង់អាចក្លាហាន ដែលប្រសូត្រចេញពីប្រជាជន ដើម្បីប្រជាជន និងឆ្លើយតបទៅនឹងសំណូមពរ នៃការតស៊ូដ៏ត្រឹមត្រូវរបស់ប្រជាជន អ្វីៗទាំងអស់ដើម្បីបម្រើ ឧត្តមប្រយោជន៍ប្រទេសជាតិ និងប្រជាជនកម្ពុជា ជាដរាបតរៀងមក និងយូរអង្វែងផងដែរ៕SRP

ខេត្តព្រៃវែង៖សមត្ថកិច្ចបានបំបែកសំណុំរឿងករណីឃាតកម្មសម្លាប់ក្មេងស្រីដោយទម្លាក់ចូលក្នុងទឹកអូរ​មួយ​ នៅចំណុចភូមិទួលជៃ ឃុំព្រះស្ដេច ស្រុកព្រះស្ដេច ខេត្តព្រៃវែង​។

គួរបញ្ជាក់ថាកាលពីថ្ងៃទី ០៧ ខែវិច្ចិកា ឆ្នាំ២០២១ វេលាម៉ោង ១៥និង៣០នាទី មានករណីប្រទះឃើញសាកសពក្មេងស្រីម្នាក់ស្លាប់នៅក្នុងប្រលាយអូរ ស្ថិតក្នុងភូមិទួលជ្រៃ ឃុំព្រះស្តេច ស្រុកព្រះស្តេច ខេត្តព្រៃវែង។ សាកសពមានឈ្មោះ ផល ផានិត អាយុ ១២ឆ្នាំ ស្នាក់នៅភូមិកើតហេតុខាងលើ។

ប្រត្តិបត្តិការនេះធ្វេីឡេីង នៅថ្ងៃទី ០៨ ខែវិច្ឆិកា ឆ្នាំ២០២១ម្សិលមិញ។

សូមជម្រាបថា ដោយបានបទបញ្ជារពីលោកនេត សាវឿន អគ្គស្នងការនគរបាលជាតិ លោកជាវ វិបុល អនុប្រធាននាយកដ្ឋាននគរបាលព្រហ្មទ័ណ្ឌ បានដឹកនាំសហការជាមួយ នគរបាលខេត្តព្រៃវែង​ ការិយាល័យព្រហ្មទណ្ឌកម្រិតធ្ងន់ បានសហការជាមួយនាយកដ្ឋាបច្ចេកទេស​និងនវិទ្យាសាស្រ្ត និង​ អង្គការ CPU ចុះពិនិត្យកន្លែងកើតហេតុ និងធ្វើកោសល្យវិច័យទ្បើងវិញ ដោយបានវះកាត់សាកសពពិនិត្យឃើញថា៖ មានភក់នៅក្នុងបំពង់កនិងក្នុងសួត , បាក់ឆ្អឹងជំនីខាងស្តាំ, ទ្វារមាសពុំមានស្លាកស្នាមពីការចាប់រំលោភទេ គឺជាករណីឃាតកម្ម។

នៅថ្ងៃម្សិលមិញកម្លាំងជំនាញបានធ្វើការស្រាវជ្រាវរហូតដល់កំណត់បានមុខសញ្ញាម្នាក់ឈ្មោះ យ៉ែម សុផែន ភេទប្រុសអាយុ២១ឆ្នាំ ស្នាក់នៅភូមិទួលជៃ ឃុំព្រះស្តេច ស្រុកព្រះស្តេច ខេត្តព្រៃវែង មកធ្វើការសាកសួរ និងបានសារភាពថា កាពីយប់ថ្ងៃទី ០៦ ខែវិច្ឆិកា ឆ្នាំ២០២១ ខ្លួនបានទៅចូលរួមកម្មវិធីខួបកំណើតកូនរបស់អ្នកជិតខាង រហូតដល់វេលាម៉ោងប្រហែល ២២និង០០នាទី ម្ចាស់កម្មវិធីបានប្រើខ្លួនឲ្យទៅទិញ ទឹកកក ពេលធ្វើដំណើរតាមផ្លូវក៏ប្រទះឃើញក្មេងស្រីរងគ្រោះឈ្មោះ ផល ផានិត ឈរនៅមុខផ្ទះហើយខ្លួនបានឈប់ម៉ូតូនិងបបួលក្មេងស្រីរងគ្រោះទៅផឹកស៊ីដែរ ហើយក្មេងស្រីនោះក៏យល់ព្រមទ្បើងជិះម៉ូតូ ពេលធ្វើដំណើរតាមម៉ូតូក្មេងស្រីរងគ្រោះបានជិះអោបចង្កេះខ្លួន ធ្វើឲ្យមានអារម្មណ៍ផ្លូវភេទ ទើបខ្លួនដឹកក្មេងស្រីរងគ្រោះទៅចំណុចកើតហេតុខាងលើ រួចក៏ធ្វើសកម្មភាពចាប់ស្ទាបអង្អែលសុដន តែត្រូវក្មេងស្រីនោះរើបំរ៉ាស់ ដោយខ្លាចបែកការខ្លួនក៏ច្រាន ក្មេងស្រីរងគ្រោះទម្លាក់ក្នុងអូរ ហើយចាប់សង្កត់ច្រមុជក្នុងទឹកអូរនោះរហូតដល់ដាច់ខ្យល់។ ក្រោយពីធ្វើសកម្មភាព សម្លាប់ក្មេងស្រីរួចហើយខ្លួនក៏ជិះម៉ូតូទៅផ្ទះធ្វើដូចគ្មានរឿងអ្វីកើតទ្បើង រហូតដល់សមត្ថកិច្ចទៅនាំខ្លួនមកសាកសួរ តែម្តង។

បច្ចុប្បន្នជនសង្ស័យ ត្រូវបានប្រគល់ឲ្យនគរបាលខេត្តព្រៃវែង ដើម្បីកសាងសំណុំរឿងបញ្ជូនទៅអយ្យការអមសាលាដំបូងផ្តន្ទាទោសតាមផ្លូវច្បាប់៕SRP

ខេត្តសៀមរាប៖រដ្ឋបាលខេត្តសៀមរាបបានរំលឹកខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា (៩ វិច្ឆិកា ១៩៥៣- ៩ វិច្ឆិកា ២០២១)។

ពិធីធ្វើនាព្រឹក ថ្ងៃទី០៩ ខែវិច្ឆិកា ឆ្នាំ២០២១នេះ នៅទីលានវិមានរំលឹកគុណអតីតវីរយុទ្ធជនខេត្ត ក្រោមវត្តមានលោកអ៊ាន ឃុនប្រធានក្រុមប្រឹក្សាខេត្ត ដោយ
មានការចូលរួមពីសំណាក់មន្ត្រីរាជការកងកម្លាំងប្រដាប់អាវុធជុំវិញខេត្តនិងសិស្សានុសិស្សផងដែរ។

សូមជម្រាបថាថ្ងៃនេះ គឺជាថ្ងៃដែលប្រទេសកម្ពុជាត្រូវប្រារព្ធខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា(៩ វិច្ឆិកា ១៩៥៣-៩ វិច្ឆិកា ២០២០) ដែលកម្ពុជាទទួលបានឯករាជ្យ ពីអាណានិគមនិយមបារាំង។ ទិវាបុណ្យឯករាជ្យជាតិ ៩ វិច្ឆិកា បានរំលឹកឲ្យឃើញពីព្រះរាជបេសកកម្មដើម្បីជាតិមាតុភូមិ និងប្រជារាស្ត្រខ្មែររបស់ព្រះករុណាព្រះបាទ សម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណ យ៉ាងក្លៀវក្លាបំផុតធ្វើការតស៊ូក្នុងក្របខ័ណ្ឌនៃព្រះរាជបូជនីកិច្ច ដើម្បីទាមទារឯករាជ្យដ៏ពិតប្រាកដនៅកម្ពុជា។ផ្តើមចេញពីគំរូព្រះវីរៈភាពនេះ រាជរដ្ឋាភិបាលកម្ពុជា ក្រោមកិច្ចដឹកនាំដ៏ឈ្លាសវៃប្រកបដោយ គតិបណ្ឌិតដ៏ខ្ពង់ខ្ពស់របស់សមេ្តចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឲ្យប្រទេសជាតិ ទាំងមូល មានកិច្ចអភិវឌ្ឍន៍រីកចម្រើន លើគ្រប់ហេដ្ឋារចនាសម្ព័ន្ធ និង បានលើកកម្ពស់ជីវភាពរស់នៅរបស់ប្រជាពលរដ្ឋ កាន់តែមានភាពល្អប្រសើរឡើង ពីមួយថ្ងៃទៅមួយថ្ងៃ ព្រមទាំងទទួលយកនូវក្រុមនិន្នាការនយោបាយ មកចូលរួមក្នុងការ អភិវឌ្ឍន៍សង្គមជាតិហើយនៅក្នុងវិបត្តិកូវិដ១៩នេះសមេ្តចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានយកចិត្តទុកដាក់ខ្ពស់ ពីសុខភាព សាធារណៈជូនប្រជាពលរដ្ឋ ដោយខិតខំស្វែងរកនូវវ៉ាក់សាំងការពារប្រឆាំងជម្ងឺកូវិដ១៩ ចាក់ជូនដល់ប្រជាពលរដ្ឋបាន គ្រប់ៗគ្នា ចាប់ពីកុមារអាយុ៥ ឡើងទៅ ផងដែរ។

សូមបញ្ជាក់ថា ថ្ងៃ ៩ វិច្ឆិកា ទិវាបុណ្យឯករាជ្យជាតិ ត្រូវបានប្រារព្ធឡើងជារៀងរាល់ឆ្នាំ ដើម្បីបង្ហាញពីឯករាជ្យជាតិខ្មែរ និងជាការឧទ្ទិសដល់ព្រះរាជបូជនីយកិច្ច របស់អតីត ព្រះមហាក្សត្រ ព្រះបាទសម្ដេចព្រះនរោត្តម សីហនុ ព្រះបរមរតនកោដ្ឋ ដែលព្រះអង្គ បានលះបង់ព្រះកាយពល និងព្រះបញ្ញាញាណ នៅក្នុងព្រះរាជបូជនីយកិច្ច ទាមទារឯករាជ្យ ពីអាណានិគមបារាំង នៅថ្ងៃទី៩ ខែវិច្ឆិកា ឆ្នាំ១៩៥៣៕SRP

ភ្នំពេញ៖សម្តេចតេជោនាយករដ្ឋមន្ត្រី ហ៊ុន សែន បានផ្ដល់នូវការណែនាំទៅកាន់មន្ត្រីថ្នាក់ដឹកនាំក្រសួងរៀបចំដែនដី នគរូបនីយកម្មនិងសំណង់ដែលទីនូវ៣ចំនុចសំខាន់៖
១- ត្រូវបន្តខិតខំចេញប័ណ្ណកម្មសិទ្ធិអោយប្រជាពលរដ្ឋអោយបានឆាប់។
២- ត្រូវបន្តខិតខំដោះស្រាយជំលោះដីធ្លី ជាពិសេសការដោះក្រៅប្រព័ន្ធតុលាការ ។
៣-ត្រូវខិតខំបន្តដោះស្រាយដីសម្បទានសង្គមកិច្ចជាបន្តបន្ទាប់ទៀត។

សម្តេចហ៊ុន សែន មានប្រសាសន៍បែបនេះ ក្នុងឱកាសអញ្ជើញសម្ពោធអគារទីស្តីការក្រសួងរៀបចំដែនដី នគររូបនីយកម្ម និងសំណង់ នៅព្រឹកមិញនេះ នាយករដ្ឋមន្ត្រីក៏បានមានប្រសាសន៍ដាសតឿនរំលឹក ដល់មន្ត្រីថ្នាក់ដឹកនាំក្រសួងរៀបចំដែនដី នគររូបនីយកម្ម និងសំណង់អោយខិតខំបំពេញការងារអោយបានល្អប្រសើរ។

សម្តេចតេជោបានសង្កត់ធ្ងន់ថា ត្រូវរួមថែរក្សាសមិទ្ធផលដែលកើតមាននេះអោយបានគង់វង្សប្រើប្រាស់អោយបានយូរអង្វែង មានកន្លែងធ្វើការល្អហើយ ត្រូវធ្វើការអោយមានប្រសិទ្ធភាព និងចំនុចមួយទៀតត្រូវចេះសន្សំ ទឹក ភ្លើង ផងដែរ៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃចន្ទ ទី៨ ខែវិច្ឆិកា ឆ្នាំ២០២១ នេះ អញ្ជើញជាអធិបតីក្នុងពិធីសម្ពោធទីស្តីការនៃអគារក្រសួងរៀបចំដែនដី នគររូបនីយកម្ម និងសំណង់។

អគារក្រសួងរៀបចំដែនដី នគរូបនីយកម្ម និងសំណង់ ជាសមិទ្ធផលមួយ ដែលបង្ហាញពីគុណតម្លៃនៃការដឹកនាំរបស់រាជរដ្ឋាភិបាលកម្ពុជាក្នុងការលើកម្ពស់តម្លៃស្ថាបត្យកម្ម ដែលជាស្នាដៃផ្ទាល់របស់កូនខ្មែរ ហើយក៏បានបង្ហាញនូវសមត្ថភាពរបស់រាជរដ្ឋាភិបាលលើការគ្រប់គ្រង និងប្រើប្រាស់ថវិកាជាតិ ដើម្បីបង្កើតនូវសមិទ្ធផលជាទីមោទនភាពសម្រាប់ជាតិផងដែរ។

អគារទីស្តីការក្រសួងរៀបចំដែនដី នគរូបនីយកម្ម និងសំណង់ មានទីតាំងស្ថិតនៅ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ នាប៉ែកខាងជើងឆៀងខាងលិចរាជធានីភ្នំពេញ ត្រូវបានប្រារព្ធពិធីបើការដ្ឋានសាងសង់នៅថ្ងៃទី២៨ ខែមករា ឆ្នាំ២០២០ ។ អគារនៃក្រសួងនេះសាងសង់នៅលើផ្ទៃដីទំហំ ៤.៥ហិកតា មានទំហំតួអគារបណ្ដោយប្រវែង ១៣២.៧ ម៉ែត្រ និងទទឹងប្រវែង ៩៤.៧ម៉ែត្រ មានចំនួន ៨ជាន់ កម្ពស់សរុបពីទ្រនាប់ខ្សាច់ ដល់ចុងកំពូលបុស្បុក ៨៨.៥ម៉ែត្រ ក្នុងនោះមានកម្ពស់បុស្បុក ៣៣.២៨ម៉ែត្រ មានចំណតរថយន្តប្រមាណ ៤៥០គ្រឿង និងចំណតទោចក្រយានយន្តជាច្រើនគ្រឿងទៀត៕SRP

ខេត្តសៀមរាប៖សមត្ថកិច្ចបានឃាត់ខ្លួនមនុស្សចំនួន០៥នាក់ ពីបទសមគំនិត ចែកចាយជួញដូរ និងប្រើប្រាស់ដោយខុសច្បាប់ នូវសារធាតុញៀន។

ការឃាត់ខ្លួនធ្វើឡើងថ្ងៃទី០៦ ខែវិច្ឆិកា ឆ្នាំ២០២១ ស្ថិតក្នុងលំនៅឋានមួយកន្លែងភូមិត្រពាំងសេះ សង្កាត់ គោកចក ក្រុង ខេត្តសៀមរាប។
ជនសង្ស័យចំនួន០៥នាក់៖
១-ឈ្មោះ ឃី ទី ភេទប្រុស កើតនៅឆ្នាំ២០០០ ជនជាតិខ្មែរ មុខរបរកម្មករ មានទីលំនៅភូមិជ័យ សង្កាត់ទឹកវិល ក្រុងសៀមរាប (រក្សាទុក ជួញដូរនិងប្រើប្រាស់) (មានសារធាតុញៀននៅក្នុងខ្លួន)។
២-ឈ្មោះ គឹម សុគុណ ហៅចយ ភេទប្រុស ឆ្នាំកំណើត ២០០៤ ជនជាតិខ្មែរ មុខរបរកម្មករ មានទីលំនៅភូមិត្រពាំងសេះ សង្កាត់គោកចក ក្រុងសៀមរាប(ជួញដូរ និងប្រើប្រាស់) (មានសារធាតុ ញៀននៅក្នុងខ្លួន)។
៣-ឈ្មោះ ហៃ សុផៃ ភេទប្រុស ឆ្នាំកំណើត ២០០១ ជនជាតិខ្មែរមុខរបរគ្មានមានទីលំនៅភូមិតាភុល សង្កាត់ស្វាយដង្គំ ក្រុង ខេត្តសៀមរាប(ចាត់ចែង និងប្រើប្រាស់) (មានសារធាតុ ញៀននៅក្នុងខ្លួន)។
៤-ឈ្មោះ ស៊ីវ ទីទី ភេទប្រុស ឆ្នាំកំណើត ២០០០ ជនជាតិខ្មែរ មុខរបរកម្មករសំណង់ មានទីលំនៅភូមិទ្រាំង សង្កាត់ស្លក្រាម ក្រុងសៀមរាប (សមគំនិតជួញដូរ) (គ្មានសារធាតុ ញៀននៅក្នុងខ្លួន)
៥-ឈ្មោះ ណាង ចាន់ណា ភេទប្រុស ឆ្នាំកំណើត ២០០៥ ជនជាតិខ្មែរ មុខរបរ កម្មករសំណង់ មានទីលំនៅភូមិទ្រាំង សង្កាត់ស្លក្រាម ក្រុងសៀមរាប ។(ជួញដូរ)។ វត្ថុតាងដកហូតម្សៅមេតំហ្វេតាមីន ៣កញ្ចប់តូច, ជញ្ជីងថ្លឹងគ្រឿងញៀន១គ្រឿង, ទូរស័ព្ទ៤គ្រឿងផងដែរ៕SRP

ខេត្តកំពង់ចាម​៖លោក​ អ៊ុនចាន់ដា អភិបាលខេត្តកំពង់ចាម និងលោកស្រី ញូង ចរិយា អ៊ុន ចាន់ដា នៅថ្ងៃទី៧ ខែវិច្ឆិកា ឆ្នាំ២០២១នេះ​ បានអញ្ជើញចូលរួមពិធីវេរអង្គកឋិនទានមហាសាមគ្គី និងឆ្លងបុណ្យអង្គកឋិន ដែលប្រារព្ធធ្វើឡើងនៅវត្ត ខេមវន័ បឹងស្នាយ និងបានប្រគេនបច្ច័យ ដល់វត្តចំនួនបីទៀត នៅក្រុងកំពង់ចាម។

គួរ​បញ្ជាក់​ថា​ អ្នកផ្តេីមបុណ្យអង្គកឋិនទានមហាសាមគ្គីរបស់រដ្ឋបាលខេត្តកំពង់ចាម នេះ រួមមាន​ លោក​ យឹម ឆៃលី ប្រធានក្រុមប្រឹក្សា អភិវឌ្ឍន៏វិស័យកសិកម្ម និងជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម​ លោក​ ហ៊ុន ណេង អ្នកតំណាងរាស្ត្រមណ្ឌលកំពង់ចាម លោក​ ខ្លូត ផន ប្រធានក្រុមប្រឹក្សាខេត្ត និងលោក​ អ៊ុន ចាន់ដា អភិបាលខេត្តកំពង់ចាម រួមជាមួយមន្ត្រីរាជការក្នុងខេត្ត និងប្រជាពលរដ្ឋជាសប្បុរសជនច្រើននាក់ទៀតបាននាំបច្ច័យសរុប​ចំនួន ៧២.៩៤១ ដុល្លារ រួមនិងត្រៃយ៍ធំ​ ២ -លៀង ១០ -សាដក់ ៨៨ និងទេយ្យវត្ថុមួយចំនួនទៀត។​ ក្នុងនោះរដ្ឋបាលខេត្តបានប្រគេនព្រះសង្ឃចំនួន៣ វត្តក្នុងក្រុងកំពង់ចាម រួមមាន​៖ វត្តបុទមរតនៈដីដុះចំនួន ១០លានរៀល,វត្តសុទស្សនារាម ជ្រោយថ្ម ចំនួន ១០លានរៀល, វត្តជោតនារាម បឹងកុកចំនួន ១០លានរៀល។ បច្ច័យដែលបានប្រគេនព្រះសង្ឃ វត្តខេមវ័ន ហៅវត្តបឹងស្នាយ សរុបចំនួន ៦៥.៦២៣ដុល្លារ ផងដែរ​៕SRP

ខេត្តសៀមរាប៖ក្រុមចោរចំនួន៤នាក់ បានប្លន់យកម៉ូតូអស់ចំនួន២គ្រឿង រួចជិះរត់គេចខ្លួនបាត់ដោយសុវត្ថិភាព។

ហេតុការណ៍បានកើតឡើងរំលងអាធ្រាត ថ្ងៃទី០៧ ខែវិច្ឆិកា ឆ្នាំ២០២១ នៅត្រង់ចំណុចខាងជើងរង្វង់មូលផ្លូវ៦០ម៉ែត្រ ស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប។

ប្រភពបានឱ្យដឹងថាករណីនេះក្រុមជនសង្ស័យ១ក្រុមមិនស្គាល់អត្តសញ្ញាណ មានគ្នាចំនួន០៤នាក់បានធ្វើសកម្មភាពប្លន់ប្រដាប់ដោយដាវកាប់ទៅលើជនរងគ្រោះ យកម៉ូតូ២គ្រឿងបានសម្រេចគេចខ្លួនបាត់។ ចំណែកជនរងគ្រោះត្រូវបានកម្លាំងនគរបាលប៉ុស្តិ៍ស្លក្រាម នាំមកសាកសួរបំភ្លឺ ដើម្បីកំណត់មុខសញ្ញាជនសង្ស័យ៖
ជនរងគ្រោះទី១ៈ ឈ្មោះ ផាន សុភា ភេទប្រុស អាយុ២២ឆ្នាំ រស់នៅភូមិគោកត្នោត សង្កាត់គោកចក ក្រុងសៀមរាប ជាម្ចាស់ម៉ូតូម៉ាកSCOPY ពណ៌ស សេរីឆ្នាំ២០២០ ស្លាកលេខសៀមរាប 1AH-2278។ជនរងគ្រោះទី២ៈ ឈ្មោះ ម៉ៅ សុវណ្ណារ៉ា ភេទប្រុស អាយុ១៩ ឆ្នាំ រស់នៅភូមិរហាល សង្កាត់នគរធំ ក្រុងសៀមរាប ជាម្ចាស់ម៉ូតូម៉ាក សង់ឌ្រីម ពណ៌ខ្មៅ សេរីឆ្នាំ២០១៧ ស្លាកលេខ សៀមរាប1Y-5890៕SRP

ខេត្តសៀមរាប៖ក្រុមប៉ូលិសខេត្តសៀមរាបដែលចុះត្រួតពិនិត្យច្បាប់ចរាចរណ៍នៅផ្លូវ៦០ ម៉ែត្របានឃាត់ខ្លួនបុរសម្នាក់ រកឃើញគ្រឿងញៀនជាច្រើនកញ្ចប់។

ស្នងការរងខេត្តសៀមរាប ទទួលការិយាល័យប្រឆាំងបទល្មើសគ្រឿងញៀន លោកអ៊ុំ អមរា បានថ្លែងថាជនសង្ស័យមានឈ្មោះ ចាន់ បូរ៉ាឌី ភេទប្រុស៣៣ឆ្នាំ ជនជាតិខ្មែរ មុខរបរជាងថតរូប មានទីលំនៅភូមិចុងកៅស៊ូ សង្កាត់ស្លក្រាម ក្រុងសៀមរាប។ មានសារធាតុញៀននៅក្នុងខ្លួន និងធ្លាប់ជាប់ពន្ធនាគារចំនួន២លើក នេះជាលើកទី៣ហើយ។

លោកអ៊ុំ អមរា បន្តថាក្រោយចាប់ខ្លួនដកហូតវត្ថុតាង៖ ម្សៅមេតំហ្វេតាមីន(ម៉ាទឹកកក)ចំនួន ០៨កញ្ចប់ ស្មើនឹងទម្ងន់ ៨៦,៩៩ ក្រាម(ទម្ងន់សុទ្ធ).ជញ្ជីងថ្លឹងគ្រឿងញៀន១គ្រឿង.ទូរស័ព្ទ៣គ្រឿងនិងសម្ភារវេចខ្ចប់មួយចំនួនទៀត។

ករណីនេះសមត្ថកិច្ចបានបញ្ជូនជនសង្ស័យនិងវត្ថុតាង ទៅតុលាការទៅតាមផ្លូវច្បាប់។ សូមបញ្ជាក់ថាការចាប់ខ្លួនធ្វើឡើងនៅយប់ថ្ងៃទី ៥ ខែវិច្ឆិកា ឆ្នាំ២០២១ ត្រង់ចំណុចរង្វង់មូលផ្លូវ៦០ម៉ែត្រ ក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប៕SRP

ខេត្តកំពង់ចាម៖លោក យឹម ឆៃលី ប្រធានក្រុមប្រឹក្សា អភិវឌ្ឍន៏វិស័យកសិកម្ម និងជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្ត កំពង់ចាម បានប្រាប់ដល់មន្ត្រីគណបក្សប្រជាជន​ ​ឲ្យបន្តអនុវត្តគោលការណ៍គ្រឹះរបស់គណបក្ស​ ត្រូវពង្រឹងសាមគ្គីភាពផ្ទៃក្នុងបក្សដោយឈរលើទស្សនៈ ពង្រឹងចាស់បង្កើតថ្មី​ និងត្រូវធ្វើអំពើល្អទៅលើប្រជាជន​​។

មានប្រសាសន៍​បែបនេះក្នុងកិច្ចប្រជុំត្រួតពិនិត្យលទ្ធផល នៃការអនុវត្តសេចក្តីសម្រេច ស្ដីពីផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំសង្កាត់​ អាណត្តិទី៥ ឆ្នាំ២០២២ របស់គណៈកម្មាធិការគណបក្សប្រជាជន​កម្ពុជា​ខេត្តកំពង់ចាម នាព្រឹកថ្ងៃទី៦ ខែវិច្ឆិកា ឆ្នាំ២០២១ ក្នុងបរិវេណសួនក្រញូង នៅភូមិតាណេង សង្កាត់សំបួរមាស ក្រុងកំពង់ចាម​។

លោក​ យឹម​ ឆៃលី​ បានមានប្រសាសន៍ថា ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ ដែលនឹងត្រូវធ្វើនៅថ្ងៃអាទិត្យទី៥ ខែមិថុនា ឆ្នាំ២០២២ គឺជាសមរភូមិដែលមន្ត្រីគណបក្សត្រូវបន្តការគ្រប់គ្រងឃុំ-សង្កាត់ នៅក្នុងខេត្តកំពង់ចាម ពីព្រោះការបោះឆ្នោតឃុំសង្កាត់លើកទី៥នេះ គឺជាមូលដ្ឋានគ្រឹះដែលនឹងមានឥទ្ធិពលដល់ការរៀបចំបោះឆ្នោតជាតិ​ ឆ្នាំ២០២៣។

លោក​ យឹម​ ឆៃលី​ បានរំលឹកថា ប្រជាពលរដ្ឋកម្ពុជាទាំងអស់បានឃើញការពិតយ៉ាងច្បាស់ថារយៈពេលជាង៣០ឆ្នាំមកនេះគណបក្សប្រជាជនកម្ពុជាបានដឹកនាំប្រទេសពុះពារជម្នះនូវឧបសគ្គ​ និងការលំបាកផ្សេងៗរាប់ម៉ឺនជំពូកសម្រេចបានសមិទ្ធផលធំៗជាប្រវត្តិសាស្ត្រយ៉ាងច្រើនដែលនាំប្រទេសជាតិឲ្យចេញផុតពីស្រមោលនៃអតីតកាលដ៏ខ្មៅងងឹត​ និងឈឺចាប់បំផុតមកកាន់សម័យដ៏ភ្លឺថ្លាដែលពោរពេញដោយក្តីសង្ឃឹម។ ទន្ទឹមនិងនេះសម្តេចតេជោ​ ហ៊ុន​ សែន​ ជានាយករដ្ឋមន្ត្រីគឺជាមហារដ្ឋបុរសមួយរូបដែលមានឆន្ទៈមោះមុត​ និងទឹកចិត្តស្នេហាជាតិពិតប្រាកដក្នុងការដឹកនាំនិងកសាងប្រទេសជាតិយើងដែលនេះគឺជា ប្រវត្តិសាស្ត្រមួយដែលគ្មាននរណាម្នាក់ដែលអាចមើលរំលងបានឡេីយ៕SRP