ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី បានស្នើឲ្យឯកអគ្គរដ្ឋទូតវៀតណាមថ្មីប្រចាំនៅកម្ពុជា ជំរុញឱ្យមានការហោះហើរត្រង់រវាងកម្ពុជា និងវៀតណាមឡើងវិញ។

ការស្នើរបស់សម្ដេចតេជោ នៅវិមានសន្តិភាព នាថ្ងៃទី២៤ ខែវិច្ឆិកា ឆ្នាំ២០២១នេះ ក្នុងឱកាសទទួលជួបពិភាក្សាការងារជាមួយលោក ង្វៀន ហ៊ុយតាំង (Nguyen Huy Tang ) អគ្គរដ្ឋទូតវៀតណាមថ្មី ប្រចាំនៅកម្ពុជា។

ក្នុងជំនួបលោក ង្វៀន ហ៊ុយតាំង បានថ្លែងអំណរគុណចំពោះកម្ពុជាដែលបានជួយដល់វៀតណាម នាពេលកន្លងមក ក៏ដូចជាថ្មីៗនេះបានជួយវៀតណាម ក្នុងការផ្ដល់បរិក្ខាពេទ្យ ក៏ដូចជាវ៉ាក់សាំងប្រឆាំងកូវីដ១៩ ដល់ប្រទេសវៀតណាម។

លោកង្វៀន ហ៊ុយតាំង ក៏បានវាយតម្លៃខ្ពស់ និងអបអរសាទរចំពោះការអភិវឌ្ឍរបស់ប្រទេសកម្ពុជា ជាមួយគ្នានោះផងដែរ ឯកឧត្តម ក៏សូមសម្ដែងនូវការកោតសរសើរចំពោះនយោបាយចាក់ស្រោចវ៉ាក់សាំងប្រយុទ្ធប្រឆាំងនឹងជំងឺកូវីដ១៩ របស់កម្ពុជាដែលទទួលបានជោគជ័យយ៉ាងធំធេង។

ឯកអគ្គរដ្ឋទូតវៀតណាមថ្មី បានសន្យាចំពោះសម្ដេចតេជោនាយករដ្ឋមន្ត្រីថា ក្នុងបេសកកម្មកាទូតនៅកម្ពុជា លោកនឹងខិតខំប្រឹងប្រែងអស់ពីកម្លាំងកាយចិត្តដើម្បីពូនជ្រុំទំនាក់ទំនងជាមួយកម្ពុជាឲ្យបានកាន់តែធំធាត់ ជាពិសេសតាមរយៈវិស័យនយោបាយ ការទូត សន្តិសុខ ការពារជាតិ វិស័យពាណិជ្ជកម្ម វិស័យសេដ្ឋកិច្ច វិស័យកសិកម្ម និងការប្រយុទ្ធប្រឆាំងជំងឺកូវីដ១៩ ក៏ដូចជាវិស័យដទៃទៀតផងដែរ។

សម្ដេចតេជោ នាយករដ្ឋមន្ត្រី បានមានប្រសាសន៍ថា ពាណិជ្ជកម្មកម្ពុជា និងវៀតណាម គឺបំពេញឲ្យគ្នាទៅវិញទៅមក ជាអាទិ៍នៅក្នុងអំឡុងពេលនៃការឆ្លងរាលដាលនៃជំងឺកូវីដ១៩ ទំហំសេដ្ឋកិច្ចរវាងប្រទេសទាំងពីរបានកើនឡើងគួរឲ្យកត់សម្គាល់។
ក្នុងន័យនេះ សម្ដេចតេជោ បានលើកទឹកចិត្តឲ្យឯកអគ្គរដ្ឋទូតវៀតណាមថ្មី ផ្ដោតការយកចិត្តទុកដាក់ជំរុញពាណិជ្ជកម្មរវាងប្រទេសទាំងពីរឲ្យកាន់តែមានការរីកធំធាត់ថែមទៀត។ លើសពីនេះទៅទៀត សម្ដេចតេជោក៏បានលើកទឹកចិត្តឲ្យមានការរៀបចំកិច្ចព្រមព្រៀងរវាងប្រទេសទាំងពីរ ជាពិសេសលើវិស័យកសិកម្ម ដូចជាការធ្វើកសិកម្មតាមព្រំដែន ការផ្គត់ផ្គង់វត្ថុធាតុដើម ការអភិវឌ្ឍពូជ និងផ្គត់ផ្គង់ពូជ ការប្រើប្រាស់ទឹកតាមព្រំដែន និងការប្រយុទ្ធប្រឆាំងសត្វល្អិតចង្រៃជាដើម។ល៕SRP

ភ្នំពេញ៖សម្ដេចហ៊ុន សែន នាយករដ្ឋមន្ត្រី នៅថ្ងៃពុធ ទី២៤ ខែវិច្ឆិកា ឆ្នាំ២០២១នេះ បានអញ្ជើញថ្លែងសុន្ទរកថាក្នុងពិធីបើកវេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១ ក្រោមមូលបទ ” ការផ្លាស់ប្ដូរទៅគន្លងប្រក្រតីភាពថ្មី ៖ ការលើកកម្ពស់ការចូលរួមក្នុងខ្សែច្រវ៉ាក់តម្លៃសកល ពហុភាគីនិយម និងបដិវត្តន៍ឧស្សាហកម្មទី៤ “។

ខាងក្រោមនេះ គឺជាសុន្ទរកថារបស់ សម្ដេចហ៊ុន សែន ក្នុងពិធីបើកវេទិកាសេដ្ឋកិច្ច និងធុរកិច្ចអាស៊ីអឺរ៉ុបលើកទី១៖

ខេត្តបាត់ដំបង៖ មនុស្សចំនួន៣នាក់ ត្រូវបានប៉ូលិសឃាត់ខ្លួន ពាក់ព័ន្ធករណីលួចផ្សេងគ្នា។

ការឃាត់ខ្លួនធ្វើឡើងនៅថ្ងៃទី២៣ ខែវិច្ឆិកា ម្សិលមិញ ដោយប៉ូលិសព្រហ្មទណ្ឌអធិការដ្ឋាននគរបាលក្រុងបាត់ដំបង។

នគរបាលខេត្តបាត់ដំបងបានឲ្យដឹងថាករណីលួចទី១ត្រង់ចំណុច​ ក្រុមទី​ ១០ភូមិកម្មករ សង្កាត់ស្វាយប៉ោ ក្រុងបាត់ដំបង។ សម្ភារបាត់បង់មានរទេះដឹកឥវ៉ាន់ពណ៌ខៀវ ១គ្រឿង។

ក្រោយពីទទួលបណ្តឹង ពីម្ចាស់លោកពេជ្រ សារ៉ែន អធិការនគរបាលក្រុងបាត់ដំបង បានដឹកនាំកម្លាំងស៊ើបអង្កេតស្រាវជ្រាវឃាត់ខ្លួនឈ្មោះ​ នឿម វុទ្ធី ភេទប្រុស អាយុ ៣៥ឆ្នាំ មានទីលំនៅភូមិកម្មករ សង្កាត់ស្វាយប៉ោ ក្រុងបាត់ដំបង។ ជនសង្ស័យសារភាពថាពិតជាបានលួចប្រាកដមែន។

ករណីទី២ ត្រង់ចំនុចភូមិកម្មករ សង្កាត់ស្វាយប៉ោ ក្រុងបាត់ដំបង ឃាត់ខ្លួនម្នាក់ ឈ្មោះវ៉ាន់ តុង ភេទប្រុស អាយុ១៩ឆ្នាំ មានទីលំនៅភូមិកម្មករ សង្កាត់ស្វាយប៉ោ ក្រុងបាត់ដំបង ករណីលួចខ្សែភ្លើង។ ជនសង្ស័យសារភាពថា ខ្លួនពិតជាបានធ្វើសកម្មភាពពិតប្រាកដមែន

ដកហូតរួមមាន៖ខ្សែភ្លើងម៉ាស៊ីនត្រជាក់ចំនួន ១៣ម៉ែត្រ -ខ្សែភ្លើង ១x១ចំនួន ២ម៉ែត្រ

-ទុយោស្ពាន់ម៉ាស៊ីនត្រជាក់ ចំនួន៤កំណាត់។

ករណីទី៣ ឃាត់ខ្លួនឈ្មោះអ៊ឹម សឹមហាន ភេទប្រុស អាយុ២៨ឆ្នាំ មានទីលំនៅភូមិកម្មករ សង្កាត់ស្វាយប៉ោ ក្រុងបាត់ដំបង ករណីលួចខ្សែភ្លើង។ ជនសង្ស័យសារភាពថា ខ្លួនពិតជាបានធ្វើសកម្មភាពពិតប្រាកដមែន។ ដកហូតរួមមាន៖ខ្សែភ្លើងដុតរួចចំនួន១ដុំ។

បច្ចុប្បន្នជនសង្ស័យ​ទាំង៣ ត្រូវបានផ្នែកជំនាញព្រហ្មទណ្ឌ កសាងសំណុំរឿងបញ្ជូនទៅតាមនីតិវិធីច្បាប់៕SRP

ខេត្តសៀមរាប៖គ្រូបង្រៀនម្នាក់ត្រូវបានសមត្ថកិច្ចរាយការណ៍ថាបានស្លាប់បាត់បងជីវិតដោយសារតែខ្យល់គរ។ ហេតុការណ៍បានកើតឡើងនៅវេលាម៉ោង១១ ថ្ងៃទី២៣  ខែ វិច្ឆិកាឆ្នាំ ២០២១ ស្ថិតនៅភូមិមណ្ឌល១  សង្កាត់ស្វាយដង្គំ  ក្រុងសៀមរាប។

សមត្ថកិច្ចបានបន្តថាជនរងគ្រោះមានឈ្មោះសាត ឧស្សាហ៍ ភេទប្រុសអាយុ៥៣ឆ្នាំមុខរបរគ្រូបង្រៀនរស់នៅភូមិកេតហេតុ។

ករណីនេះសមត្ថកិច្ចជំនាញ កោសល្យវិច័យនិង គ្រូពេទ្យធ្វើកោសល្យវិច័យលើសាកសព  ពុំមានពាក់ព័ន្ធនឹងបទល្មើលព្រហ្មទណ្ឌនោះទេ។

មូលហេតុស្លាប់ដោយសារខ្វះជាតិស្ករក្នុងឈាម ខ្យល់គរ បណ្តាលអោយដួលស្លាប់តែម្ដង។  ជនរងគ្រោះរស់នៅម្នាក់ឯង ត្រូវបានប្រគល់សាកសពអោយបងប្អូនធ្វើបុណ្យតាមប្រពៃណី៕SRP

ខេត្តបាត់ដំបង៖ លោក សុខ លូ អភិបាលខេត្តបាត់ដំបង បានមានប្រសាសន៍ថា ខេត្តបាត់ដំបង ជាខេត្តមួយដែលមានសក្តានុពលលើវិស័យកសិកម្ម និងវិស័យទេសចរណ៍ ដែលមានប្រព័ន្ធធារាសាស្រ្ដខ្វាត់ខ្វែង ដែលបង្កឲ្យការបង្កបង្កើនផលដំណាំកសិកម្មក្នុងខេត្ត បានលទ្ធផលល្អ ហើយជាពិសេស ការសាងសង់ទំនប់ស្ទាក់ទឹកសាលាតាអន នឹងជិតសម្រេចបានទាំងស្រុងនាពេលឆាប់ៗខាងមុខនេះ ដែលអាចធ្វើការទប់ទឹកស្ទឹងសង្កែបានទៅតាមកម្រិតកម្ពស់ដែលយើងចង់បាន ដែលនឹងជួយបង្កើនសោភ័ណភាពស្ទឹងសង្កែ និងសោភ័ណភាពក្រុងបាត់ដំបងឲ្យកាន់តែស្រស់ស្អាតបន្ថែមទៀត និងតំបន់ទេសចរណ៍ មានអគារបុរាណ ដែលក្បាច់រចនាស្រស់ស្អាត និងទាក់ទាញដល់ភ្ញៀវទេសចរណ៍ជាតិ និងអន្តរជាតិ។ 

លោកសុខ លូ ក៏បានមានប្រសាសន៍ថ្លែងអំណរគុណដល់ គណៈប្រតិភូនៃទីភ្នាក់ងារបារាំងសម្រាប់ការអភិវឌ្ឍប្រចាំប្រទេសកម្ពុជា ក៏ដូចជាប្រតិភូនៃសហភាពអឺរ៉ុប និង លោកចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម ដែលចំណាយពេលវេលា ក្នុងការចូលជួបសម្ដែងការគួរសម ក៏ដូចការពិភាក្សាលើគម្រោមអភិវឌ្ឍន៍វិស័យនានាក្នុងខេត្តបាត់ដំបង។ 

លោក សុខ លូ មានប្រសាសន៍យ៉ាងដូច្នេះក្នុងពេលអនុញ្ញាតទទួលជួបសម្ដែងការគួរសម និងពិភាក្សាការងារ ជាមួយប្រតិភូទីភ្នាក់ងារបារាំងសម្រាប់ការអភិវឌ្ឍ ប្រចាំប្រទេសកម្ពុជា និងប្រតិភូនៃសហភាពអឺរ៉ុប នៅព្រឹកមិញនេះ

លោកស្រី BOURHIS Ophélie នាយិកាប្រចាំប្រទេសកម្ពុជា បានថ្លែងអំណរគុណ ដល់អាជ្ញាធរខេត្ត ដែលខិតខំប្រឹងប្រែងអភិរក្សបឹងទន្លេសាប ដែលជាបឹងដ៏ធំមួយ សំបូរទៅដោយមច្ឆាជាតិជាច្រើន និងបានចូលរួមក្នុងការអភិវឌ្ឍវិស័យកសិកម្មក្នុងខេត្តឲ្យមានការរីកចម្រើនពីមួយថ្ងៃទៅមួយថ្ងៃ។ 

លោកស្រីបានបន្តទៀតថា ចំពោះគម្រោងដែលទីភ្នាក់ងារបារាំងសម្រាប់ការអភិវឌ្ឍ កំពុងដំណើរការនាពេលនេះ គឺផ្ដោតទៅលើវិស័យកសិកម្ម ការប្រែប្រួលអាកាសធាតុ ការគ្រប់គ្រងប្រព័ន្ធទឹកក្នុងខេត្តបាត់ដំបង។ លោកស្រី បានបន្ថែមទៀតថា បើសិនបើមានការគាំទ្ររដ្ឋបាលខេត្ត ទីភ្នាក់ងារបារាំងសម្រាប់ការអភិវឌ្ឍ នឹងធ្វើការសិក្សាអំពីវិធីសាស្រ្ដក្នុងការរំដោះទឹកជំនន់ ក្នុងក្រុងបាត់ដំបង ដែលតែងតែកើតមានឡើងរៀងរាល់ឆ្នាំដែលទឹកស្ទឹងសង្កែ ឡើងដល់កម្រិតខ្ពស់ ដើម្បីកាត់បន្ថយបញ្ហាទឹកលិចក្នុងក្រុងបាត់ដំបង៕SRP

ខេត្តបាត់ដំបង៖ អភិបាលខេត្តបាត់ដំបង លោក សុខ លូ បានមានប្រសាសន៍ថា ការប្រារព្ធទិវាបរិស្ថាននេះ ដើម្បីអប់រំផ្សព្វផ្សាយដល់គ្រប់ស្រទាប់មហាជន ប្រជាជន និងគ្រប់មជ្ឈដ្ឋានទាំងអស់ ឲ្យយល់ដឹងពីអនាម័យបរិស្ថានជុំវិញខ្លួន ហើយទិវានេះទៀតសោត គឺជាទិវាដើម្បីធ្វើការក្រើនរំលឹកដល់មហាជន ប្រជាជន ទាំងអស់អំពីការចូលរួមសំអាតបរិស្ថានឲ្យបានស្អាតជាប្រចាំ ព្រោះថា បន្ទាប់ពីបញ្ចប់ទិវានេះរួច បរិស្ថានមិនអាចស្អាតបានជារៀងរហូតឡើយ លុះត្រាតែមានការចូលរួមពីប្រជាពលរដ្ឋ ក្នុងការចូលរួមសំអាតទាំងអស់គ្នា ទើបអនាម័យបរិស្ថានបានស្អាតជារៀងរហូតបាន។ 

លោកបានបន្តទៀតថា ដោយសារតែវិបត្តិនៃជំងឺកូវីដ-១៩ បានធ្វើឲ្យយើងអាក់ខានក្នុងការប្រារព្ធទិវានេះឡើង តែដោយសារតែការខិតខំប្រឹងប្រែងរបស់សម្ដេចហ៊ុន សែន ក្នុងការស្វែងរកវាក់សាំងកូវីដ-១៩ ដើម្បីបានជូនបងប្អូនប្រជាពលរដ្ឋ ដោយឥតគិតថ្លៃ ដែលជាឱកាសមួយក្នុងការបើកដំណើរសេដ្ឋកិច្ចប្រទេសឡើងវិញ ហើយក៏ជាឱកាសមួយដែលយើងអាចប្រារព្ធពិធី ឬទិវាផ្សេងៗទៀតបាន តែក្នុងរបៀបរបបបែបថ្មី ដោយត្រូវរក្សាគម្លាត ពាក់ម៉ាស បាញ់អាកុលជាដើម។

លោកមានប្រសាសន៍បែបនេះនៅព្រឹកមិញនេះក្នុងឱកាសរដ្ឋបាលខេត្តបាត់ដំបង ប្រារព្ធទិវាអនាម័យបរិស្ថានជាតិ ២៣ វិច្ឆិកា ឆ្នាំ២០២១ ក្រោមប្រធានបទ “ ភូមិឋានស្អាត សុខភាពល្អ ជីវិតរីករាយ” ៕SRP

សម្តេច ហ៊ុន សែន បានបន្ថែមឈ្មោះស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មា នេះថាជា “ស្ពានភ្ជាប់និស្ស័យ” ដែលមានន័យទូលំទូលាយ គឺជាភ្ជាប់និស្ស័យរវាងកម្ពុជា និងចិន , ជាការភ្ជាប់និស្ស័យរវាងប្រជាពលរដ្ឋនៃទឹកដីនៃស្រុកស្ទឹងត្រង់ ខេត្តកំពង់ចាម ទៅទឹកដីនៃស្រុកក្រូចឆ្មារ នៃខេត្តត្បូងឃ្មុំ និងមួយទៀតគឺភ្ជាប់និស្ស័យរវាងរូបសម្តេចផ្ទាល់ជាមួយនឹងឧត្ដមភរិយារបស់សម្តេច គឺសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលសម្តេចមានស្រុកកំណើតនៅស្រុកស្ទឹងត្រង់ ឯសម្តេចកិតិ្តព្រឹទ្ធបណ្ឌិត មានស្រុកកំណើតនៅស្រុកក្រូចឆ្មារ។

សម្តេចជោនាយករដ្ឋមន្ត្រី បានមានប្រសាសន៍ថាពីមុនតំបន់នេះពិតជាមានការលំបាកណាស់ដោយធ្វើដំណើរត្រូវប្រើទូកចែវ បន្ទាប់កទូកម៉ាស៊ីន ដែលមានការលំបាកសម្រាប់ការរស់នៅរបស់បងប្អូនប្រជាពលរដ្ឋទាំងត្រើយខាងលិច ទៅត្រើយខាងកើត ជាពិសេសពេលមានជម្ងឺឈឺថ្កាត់ម្តងៗតែងតែលំបាក ពោលគឺទម្រាំទៅដល់មន្ទីរពេទ្យត្រូវចំណាយពេលវេលាយូរ ។ តែពេលនេះយើងមិនមានការលំបាកទៀតទេ ដោយសារយើងមានស្ពានមិត្តភាពកម្ពុជា ចិន ស្ទឹងត្រង់-ក្រូចឆ្មារ ឬស្ពានភ្ជាប់និស្ស័យនេះ។ 

សម្តេចពិតជាមានមោទនភាពចំពោះសមិទ្ធផលជាតិដែលកើតមានឡើងជាបន្តបន្ទាប់។សម្តេចបានរំលឹកពីការតស៊ូដឹកនាំប្រទេសដំបូងដោយយកជីវិតធ្វើដើមទុន ដើម្បីរំដោះប្រទេសជាតិចេញពីសង្គ្រាម បន្ទាប់មកយើងបានចាប់ផ្តើមអភិវឌ្ឍសង្គម សេដ្ឋកិច្ច ជាបន្តបន្ទាប់រហូតដល់មានការរីកចម្រើនជាបន្តបន្ទាប់រហូតដល់សព្វថ្ងៃនេះ។

សម្តេចតេជោនាយករដ្ឋមន្ត្រី ក៏បានថ្លែងអំណរគុណចំពោះរដ្ឋាភិបាល និងប្រជាជនចិនដែលបានជួយកសាងស្ពាននេះ ក៏ដូចជាសមិទ្ធផលហេដ្ឋារចនាសម្ព័ន្ធ របស់ប្រទេសកម្ពុជាជាច្រើនទៀត។ សម្តេចតេជោ បានអបអសាទរសាទរចំពោះសមិទ្ធផលស្ពានថ្មី និងផ្លូវដែលត្រូវសាងសង់បន្តជាពេលនេះ និងបានជូនពរអោយបងប្អូនប្រជាពលរដ្ឋទាំងអស់ជួបប្រទះតែសេចក្តីសុខ សេចក្តីចម្រើនគ្រប់ៗគ្នា។ បន្ទាប់មកសម្តេចតេជោនាយករដ្ឋមន្ត្រី និងឯកអគ្គរដ្ឋទូតចិនប្រចាំនៅកម្ពុជា ក៏បានអញ្ជើញកាត់ខ្សែបូរសម្ពោធស្ពានមិត្តភាពកម្ពុជា-ចិន ស្ទឹងត្រង់- ក្រូចឆ្មារ ចាប់ពីពេលនេះតទៅ។

សម្តេចតេជោ ហ៊ុន សែន ថ្លែងបែបនេះក្នុងពេលអញ្ជើញសម្ពោធដាក់ឱ្យប្រើប្រាស់ស្ពានស្ទឹងត្រង់-ក្រូចឆ្មារ និងបើកការដ្ឋានសង់ផ្លូវជាតិលេខ «71C» នៅថ្ងៃអង្គារ ៤រោច ទី២៣ ខែវិច្ឆិកា ឆ្នាំ២០២១ ព្រឹកមិញនេះ។

លោក វ៉ាង វិនធៀន ឯកអគ្គរដ្ឋទូតចិន ប្រចាំនៅកម្ពុជា បានបង្ហាញនូវក្តីសោមនស្សរីករាយនៅពេលឃើញថាកិច្ចសហប្រតិបត្តិការជាក់ស្តែងរវាងចិន និងកម្ពុជាទទួលបានសមិទ្ធផលផ្លែផ្កាថ្មីៗឥតឈប់ឈរ។ លោកតំណាងឱ្យភាគីចិនបានចូលរួមអបអរសាទរយ៉ាងកក់ក្តៅជូនចំពោះការសម្ពោធដាក់ឱ្យប្រើប្រាស់ជាផ្លូវការនូវស្ពានមិត្តភាពកម្ពុជា-ចិន និងការចាប់ផ្តើមគម្រោងការដ្ឋានសាងសង់ផ្លូវជាតិលេខ71Cនាពេលនេះ។ ចិនតែងមានសុភាសិតមួយពោលថា ” ចង់ឆ្លងទន្លេត្រូវសង់ស្ពានជាមុន “។ ប្រទេសកម្ពុជាសម្បូរធនធានទឹក ទន្លេតូចធំខ្វាត់ខ្វែងជាបណ្ដាញ ហើយស្ពានមានតួនាទីយ៉ាងសំខាន់ដែលក្នុងការអភិវឌ្ឍន៍សេដ្ឋកិច្ច និងសង្គមនៅក្នុងប្រទេស ដូចនេះ ក្នុងនាមជាមិត្តពិតប្រាកដរបស់កម្ពុជា ភាគីចិនបានផ្តល់ជំនួយសាងសង់ស្ពានជាបន្តបន្ទាប់ជូនកម្ពុជាចាប់តាំងពីឆ្នាំ២០០៧ រហូតមកដល់បច្ចុប្បន្ននេះមានសស្ពានឆ្លងកាត់ទន្លេចំនួនសរុប៨ ហើយស្ពាននីមួយៗមិនត្រឹមតែតភ្ជាប់បណ្ដាទីកន្លែងក្នុងប្រទេសកម្ពុជាប៉ុណ្ណោះទេ ថែមទាំងផ្សារភ្ជាប់បេះដូងនៃប្រជាជនទាំងពីរយ៉ាងស្អិតរមួត វាបានក្លាយជាស្ពានចំណងមិត្តភាកម្ពុជា និងចិនយ៉ាងពិតប្រាកដ៕SRP

ខេត្តកំពង់ចាម៖ថ្លែងក្នុងឱកាសអញ្ជើញសម្ពោធដាក់ឱ្យប្រើប្រាស់ស្ពានស្ទឹងត្រង់-ក្រូចឆ្មារ និងបើកការដ្ឋានសង់ផ្លូវជាតិលេខ «71C» នៅថ្ងៃអង្គារ ព្រឹកមិញនេះ សម្តេច ហ៊ុន សែន បានមានប្រសាសន៍ថា ដោយសារតែស្ថានភាពជំងឺកូវីដ-១៩ រីករាលដាលនៅទូទាំងប្រទេសអស់រយៈពេលប្រមាណជាជិត២ឆ្នាំមកនេះ បានធ្វើឲ្យកម្ពុជាចំណាយថវិកាជាង២,៣០០លានដុល្លារដើម្បីចំណាយលើការប្រយុទ្ធប្រឆាំងនឹងជំងឺកូវីដ និងចំណោយផ្សេងៗ ដែលចំនួនទឹកប្រាក់នេះវាស្មើនឹងការចំណាយលើការសាងសង់ស្ពានបានចំនួន២០ខ្សែ។

សម្តេចតេជោនាយករដ្ឋមន្ត្រី បានរំលឹកពីយុទ្ធសាស្ត្រជាច្រើនពាក់ព័ន្ធយុទ្ធសាស្ត្រក្នុងព្រឹត្តិការណ៍នានា ក្នុងកំលុងរាតត្បាតនៃជំងឺកូវីដ-១៩ ដោយសម្តេចតេជោបានថ្លែងថា ក្នុងនាមជាមេដឹកនាំរបស់ជាតិ សម្តេចមិនអាចឱ្យប្រជាពលរដ្ឋស្លាប់ ដោយមិនដាក់ចេញវិធានការចាំបាច់មួយចំនួននោះទេ ទោះត្រូវគេរិះគន់យ៉ាងណាក៏ដោយ។

នាយករដ្ឋមន្ត្រីក៏បានសូមអោយយកចិត្តទុកដាក់សុខភាពមនុស្សចាស់ ក្នុងពេលរដូវចុះត្រជាក់ខាងមុខនេះ។ សូមអោយអាជ្ញាធរត្រូវបង្កើនការយកចិត្តទុកដាក់ចំពោះសុខភាពមបុស្សចាស់ ដូចជាត្រៀមផ្តល់ជូននូវអាវភ្លៀង អាវរងារ ភួយ ដើម្បីជួយដល់មនុស្សចាស់ទាំងឡាយដែលមានការខ្វះខាត។ សម្តេចតេជោបានថ្លែងនូវការកោតសរសើរចំពោះអាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធ ដែលបានខិតខំបំពេញការងារនាពេលកន្លងមកនេះ ជាពិសេសក្នុងពេលទប់ស្កាត់កូវីដ ក៏ដូចជាពេលដែលបើកប្រទេសជាតិឡើងវិញនេះ៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានប្រាប់ដល់មេឃុំ មេប៉ុស្ដិ៍ ស្មៀន និងមេភូមិ គឺជាបុគ្គលដែលនៅស្និតជាមួយប្រជាពលរដ្ឋជាងគេ ដូចនេះអ្នកទាំងនេះត្រូវបម្រើសេវាជូនប្រជាពលរដ្ឋ ឲ្យកាន់តែមានប្រសិទ្ធិភាព និងរហ័ស ពង្រឹងសេវារដ្ឋបាលឃុំ ស្រុក ដើម្បីឲ្យប្រជាពលរដ្ឋងាយស្រួលទទួល និងពេញចិត្តជាមួយសេវាសាធារណៈដែលយើងបានផ្ដល់ជូនគាត់។

លោកសុខ លូ មានប្រសាសន៍ណែនាំបែបនេះនៅរសៀលថ្ងៃចន្ទ ទី២២ ខែវិច្ឆិកា ម្សិលមិញក្នុងឱកាសអញ្ជើញជួបសំណេះសំណាល ជាមួយថ្នាក់ដឹកនាំ មន្រ្ដីរាជការ មេឃុំ និងកងកម្លាំងប្រដាប់អាវុធ នៃរដ្ឋបាលស្រុកគាស់ក្រឡ។

ឆ្លៀតក្នុងឱកាសនោះ លោកសុខ លូ ក៏បានប្រាប់ដល់មន្រ្ដីរាជការគ្រប់លំដាប់ថ្នាក់ទាំងអស់ឲ្យខិតខំពង្រឹងវិន័យការងាររបស់ខ្លួន ឥរិយាបទ និងសាមគ្គីភាពផ្ទៃក្នុងរបស់ខ្លួន ដើម្បីឲ្យដំណើរការការងារបានល្អប្រសើរទៅមុខ។

លោកក៏បានឲ្យរៀបចំប្លង់មេឲ្យហើយស្រេច ដូចជាការធ្វើផ្លូវត្រូវតែទុកចំណីផ្លូវឲ្យបានរួចជាស្រេច ហើយបើសិនជាមានករណីមានបុគ្គលណាម្នាក់រំលោភបំពានលើចំណីផ្លូវ ទោះត្រឹមរយៈពេលខ្លីក៏ដោយ ក៏ត្រូវឲ្យរុះរើជាបន្ទាន់៕SRP

ខេត្តសៀមរាប៖អាជ្ញាធរចាប់ផ្ដើមឲ្យអនុវត្តគោលការណ៍បើកដំណើរការឡើងវិញ សម្រាប់អាជីវកម្ម សណ្ឋាគារ សេវាស្នាក់នៅ ទេសចរណ៍ និងអាជីវកម្មបៀរហ្គាឌិន។

នេះបើយោងតាមលិខិតរបស់រដ្ឋបាលខេត្តសៀមរាប ចុះហត្ថលេខាដោយលោកទៀ សីហា នៅថ្ងៃទី ២២ ខែវិច្ឆិកា ម្សិលមិញ៕SRP

ខេត្តសៀមរាប៖ស្នងការដ្ឋាននគរបាលខេត្តសៀមរាប នៅថ្ងៃទី ២២ ខែវិច្ឆិកាឆ្នាំ ២០២១ នេះ បានចេញសេចក្ដីបំភ្លឺមួយ
ឆ្លើយតបចំពោះ ហ្វេសប៊ុក «រាត្រី ឯកា» ដែលបានបង្ហោះជាសាធារណ: កាលពីថ្មីៗនេះដោយចោទប្រកាន់ទៅលើមន្ត្រីនគរបាលចរាចរណ៍ស្រុកពួក។សូមអានលិខិតបំភ្លឺខាងក្រោម៖

ភ្នំពេញ៖សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅរសៀលថ្ងៃចន្ទ ទី២២ ខែវិច្ឆិកា នេះ បានអញ្ជើញជាសហប្រធានដឹកនាំកិច្ចប្រជុំវាយតម្លៃលទ្ធផលកិច្ចសហប្រតិបត្តិការឆ្នាំ២០២០-២០២១ និងចុះហត្ថលេខាលើកំណត់ហេតុស្តីពីកិច្ចសហប្រតិបត្តិការឆ្នាំ២០២២ ជាមួយ លោកវីល័យ ឡាខាំហ្វង រដ្ឋមន្ត្រីក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ តាមប្រព័ន្ធវីដេអូ។

សម្ដេច ស ខេង និង លោក វីល័យ ឡាខាំហ្វង បានសម្តែងការ អបអរសាទរចំពោះទំនាក់ទំនងដ៏ល្អរវាងថ្នាក់ដឹកនាំកំពូលនៃប្រទេសទាំងពីរក្នុងស្មារតីមិត្តភាព ជាប្រពៃណី សាមគ្គីភាព និងភាពជាអ្នកជិតខាងល្អ ដែលតាមរយៈទំនាក់ទំនងនេះបានជំរុញដល់ការកើនឡើងគួរឲ្យ កត់សម្គាល់នូវទំហំពាណិជ្ជកម្មទ្វេភាគី កម្ពុជា-ឡាវ កាលពីឆ្នាំ២០២០កន្លងទៅ និងរួមចំណែកយ៉ាង សំខាន់បម្រើដល់ផលប្រយោជន៍ទៅវិញទៅមកសម្រាប់ប្រជាជននៃប្រទេសទាំងពីរ ជាពិសេស ការជួយ ឧបត្ថម្ភគាំទ្រគ្នាទៅវិញទៅមក ក្នុងការប្រយុទ្ធប្រឆាំងនឹងជំងឺកូវីដ-១៩ នៅក្នុងកាលៈទេសៈដ៏លំបាកដែលបង្កឡើងដោយជំងឺរាតត្បាតដ៏កាចសាហាវនេះ។ 

សម្ដេចស ខេង និងលោកវីល័យ ឡាខាំហ្វង ក៏បានសម្តែងនូវការកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់អាជ្ញាធរខេត្តជាប់ព្រំដែន និងកងកម្លាំងអនុវត្តច្បាប់នៃប្រទេសទាំងពីរដែលទោះបីស្ថិតក្នុងស្ថានភាពប្រឈមដ៏ស្មុគស្មាញ បង្កឡើងដោយជំងឺកូវីដ-១៩ យ៉ាងណាក្តីក៏នៅតែបន្តកិច្ចសហការជិតស្និទ្ធ ក្នុងការថែរក្សាបរិយាកាសសន្តិសុខតាមបន្ទាត់ព្រំដែន បានយ៉ាងល្អប្រសើរ រួមចំណែកបង្កលក្ខខណ្ឌអំណោយផលដល់ការប្រកបជីវភាពរស់នៅរបស់ប្រជាជន និងការយកចិត្តទុកដាក់ខ្ពស់ក្នុងកិច្ចសហការបង្ការ ទប់ស្កាត់ និងបង្ក្រាបឧក្រិដ្ឋកម្មឆ្លងដែនគ្រប់ប្រភេទ ជាពិសេសកិច្ចសហការដោះស្រាយបាតុភាពផ្សេងៗនៅតាមព្រំដែន ដោយឈរលើស្មារតីមិត្តភាព សាមគ្គីភាព និងការគោរពអធិបតេយ្យគ្នាទៅវិញទៅមក។ 

ក្នុងស្មារតីបន្តពង្រឹង និងពង្រីកនូវទំនាក់ទំនង និងកិច្ចសហប្រតិបត្តិការកាន់តែសកម្ម និងខ្លាំងក្លាថែមទៀតរវាងភាគីទាំងពីរ សម្ដេចស ខេង និង លោក វីល័យ ឡាខាំហ្វង បានចុះហត្ថលេខាលើកំណត់ហេតុកិច្ចសហប្រតិបត្តិការសម្រាប់ឆ្នាំ២០២២ និងបានឯកភាពបន្តបង្កើនការយកចិត្តទុកដាក់លើការងារមួយចំនួន។

ការងារសំខាន់ៗទាំងនោះ រួមមានការបង្កើន និងពង្រឹងបន្ថែមនូវយន្តការសហប្រតិបត្តិការបង្ក្រាបសកម្មភាពជួញដូរគ្រឿងញៀន ខុសច្បាប់ ព្រមទាំងពង្រីកវិសាលភាពការផ្លាស់ប្តូរព័ត៌មាន ដើម្បីបង្ការទប់ស្កាត់ និងបង្ក្រាបសកម្មភាពជួញដូរ ដឹកជញ្ជូនគ្រឿងញៀនខុសច្បាប់ ដែលកើតឡើងតាមបណ្ដោយព្រំដែន។ 

ភាគីទាំងពីរក៏បានឯកភាពបង្កើនការគ្រប់គ្រង និងត្រួតពិនិត្យតាមបណ្ដោយព្រំដែនក្នុងដែនសមត្ថកិច្ចរៀងៗខ្លួន និងចាត់វិធានការទាន់ពេលវេលាក្នុងការទប់ស្កាត់ និងបង្ក្រាបបទល្មើសឆ្លងដែនគ្រប់ប្រភេទ ជាពិសេស ការលួចឆ្លងដែនខុសច្បាប់ បទល្មើសព្រៃឈើ ការទន្ទ្រានកាប់ព្រៃធ្វើការដាំដុះ និងការបរបាញ់សត្វដោយខុសច្បាប់ និងសកម្មភាពផ្សេងទៀតដែលផ្ទុយនឹងបទប្បញ្ញត្តិព្រំដែន។

ជាមួយគ្នានេះ ក៏បានឯកភាព បន្តយកចិត្តទុកដាក់ត្រួតពិនិត្យ និងសម្រួលការចេញ-ចូលតាមច្រកទ្វារអន្តរជាតិ ស្របតាម នីតិវិធីជាធរមាន រួមទាំងការផ្លាស់ប្ដូរពាណិជ្ជកម្ម ទេសចរណ៍ ការពិនិត្យព្យាបាលជំងឺ ការសួរសុខទុក្ខបងប្អូន និងការចូលរួមពិធីផ្សេងៗតាមប្រពៃណី ព្រមទាំងសហការដោះស្រាយបាតុភាព នានាតាមបណ្ដោយព្រំដែន ឈរលើស្មារតីមិត្តភាព សាមគ្គីភាព និងការគោរពអធិបតេយ្យគ្នាទៅវិញទៅមកផងដែរ៕SRP