ខេត្តសៀមរាប៖មានការលើកឡើងថាព្រៃឈើនៅក្នុងសហគមន៍បឹងពែរ ដែលគ្រប់គ្រងមើលការខុសត្រូវរបស់មន្ត្រីបរិស្ថានខេត្តសៀមរាបបានរងការកាប់បំផ្លាញយ៉ាងរង្គាល ដោយគ្មានការទប់ស្កាត់នៅឡើយ។

តាមសេចក្ដីរាយការណ៍បានឲ្យដឹងថា ព្រៃសហគមន៍បឹងពែរ ស្រុកជីក្រែង ខេត្តសៀមរាប រងការកាប់យកឈើពីសំណាក់ពលរដ្ឋដោយមានការបើកដៃពីមន្ត្រីបរិស្ថានក្បាលដំរី ដែលមានស្នាក់ការនៅក្នុង ឃុំពង្រលើ ស្រុកជីក្រែង ខេត្តសៀមរាប រាប់ឆ្នាំមកហើយ។

ប្រភពពីម្ចាស់រទេះបានអោយដឹងថា មុនពេលចូលទៅកាប់ឈើក្នុងព្រៃសហគមន៍បឹងពែរ ត្រូវទូស័ព្ទរាយការណ៍ ប្រាប់មន្រ្ដីបរិស្ថាន ទៅតាមវេនជាមុន បើចំវេនអ្នកណាត្រូវខលប្រាប់អ្នកនោះ បើមិនដូច្នោះទេ មិនអោយចូលកាប់ឈើ និងមិនអោយដឹកចេញនោះឡើយ។ ហើយនៅពេលកាប់ឈើរួច លើកដាក់លើរទេះ ត្រូវទូស័ព្ទប្រាប់ពីចំនួនរទេះដែលត្រូវដឹកចេញ ដោយគិតក្នុង១រទេះ ១៥ម៉ឺនរៀល ក្នុងតម្លៃអាចចចារបាន រួចហើយវេលុយតាមវីង។

ជាក់ស្ដែងកាលពីថ្ងៃទី២ ខែ មីនា ឆ្នាំ២០២២ ម្ចាស់រទេះ បានប្រាប់អ្នកសារព័ត៌មានថាពួកគេបានរកស៊ីឈើជាង២០ឆ្នាំហើយ ប៉ុន្ដែចូលទៅកាប់ព្រៃសហគមន៍បឹងពែរ ទើបតែបាន២ឆ្នាំ និងបានវេលុយ អោយ លោក ទេព អាង មន្រ្ដីបរិស្ថាន ក្បាលដំរី ចំនួន ៦៩ម៉ឺនរៀលជាថ្នូរមិនបង្រ្កាបការដឹកឈើរបស់ពួកគេ។

មានការលើកឡើងបន្ថែមថា លោក ទេព អាង អាចជាអ្នករកសេដ្ឋកិច្ចអោយលោក ស៊ុន គង់ ប្រធានមន្ទីរបរិស្ថានខេត្តសៀមរាប ទើបបានជាលោក ស៊ុន គង់ ព្យាយាមការពារ លោក ទេព អាង និងហៅអ្នកការសែត ប្រជាសហគមន៍ មកបំភ្លឺកាលពីរសៀលថ្ងៃទី០៣ ខែ មីនា ឆ្នាំ២០២២ នៅស្នាក់ការបរិស្ថានទួលខ្សាច់ ពាក់ព័ន្ធនិងចោទថា មន្រ្ដីបរិស្ថាន ឈ្មោះ ទេព អាង «ដើរយកលុយពីបទល្មើសដឹកឈើ»។
ក្នុងការបំភ្លឺនោះ អ្នកសារព័ត៏មាន បានលើកយកសម្ដីម្ចាស់រទេះគោ ព្រមទាំងរូបភាពថត សម្ភាស ន៍និងបង្ហាញ (ក្រដាសវីង) ដែលបានវេលុយតាមវីង អោយលោក ទេព អាង ៦៩ម៉ឺនរៀលតាមការតាមការទាមទា។

លោក ទេព អាង បានប្រាប់អ្នកសារព័ត៌មានដោយទទួលស្គាល់ថា ពិតជាបានពាក់ព័ន្ធក្នុងក្រុមរបស់លោក ហើយលោកធ្វើតាមតែមេល្បាតឈ្មោះ សែម អោយធ្វើតែប៉ុណ្ណោះ។ ប៉ុន្ដែររឿងក្រដាសវីង នោះជារឿងកាលពីមុន ចំណែករឿងដែលកើតថ្មីនេះ មិនបានទទួលលុយនោះទេ។

លោក ស៊ុន គង់ ប្រធានមន្ទីរបរិស្ថាន ខេត្តសៀមរាប បានប្រាប់អ្នកសារព័ត៌មានតាមទូស័ព្ទថា លោកស៉ើបមិនទាន់ដឹងច្បាស់នោះទេ បើសិនជាមានករណីនេះ យើងនិងបន្ដនិតិវិធីពិភាគ្សាតទៅទៀត។

ទោះជាយ៉ាងណាប្រធានមន្ទីរបរិស្ថាន ខេត្តសៀមរាប មិនបានប្រាប់ពីចំណាត់ការ លើមន្រ្ដីបរិស្ថាន របស់លោក ដែលពាក់ព័ន្ធបទល្មើសព្រៃឈើឡើយ៕SRP

ខេត្តកំពង់ចាម​៖ថ្នាក់ដឹកនាំមូលដ្ឋាន​នៃអតីតគណបក្សសង្គ្រោះជាតិ ចំនួន៧រូប បានស្ម័គ្រចិត្ត សុំចូលរួមជាមួយគណបក្សប្រជាជនកម្ពុជា។

ការចូលជាមួយ គណបក្សប្រជាជនកម្ពុជា ខេត្តកំពង់ចាម នៅរសៀលថ្ងៃទី៣ ខែមីនា ម្សិលមិញ។

អតីតមន្ត្រីគណបក្សសង្គ្រោះជាតិ៖​ ១. លោក​ យង់ សារិ អតីតគណ:កម្មាធិការនាយក​ ឃុំជ្រៃវៀន ស្រុកព្រៃឈរ។

២.លោក​ លី អៀង អតីតបេក្ខជនបម្រុងក្រុមប្រឹក្សាសង្កាត់កំពង់ចាម។ ៣.លោក​ ស៊ឹម សុផល អតីតសមាជិកក្រុមប្រឹក្សាសង្កាត់បឹងកុក។ ៤. លោក​ ហ៊ត់ ម៉េងលាង អតីតបេក្ខជបម្រុងក្រុប្រឹក្សាសង្កាត់កំពង់ចាម។ ៥. លោកស្រី​ យើង គឹមនី អតីតបេក្ខជនបម្រុងក្រុមប្រឹក្សាសង្កាត់កំពង់ចាម។ ៦.លោក​ ហម យុន អតីតសមាជិកCNRPសង្កាត់សំបួរមាស។ ៧.លោកស្រី​ វ៉ាញ ស៊ីណេត អតីតសមាជិកCNRP សង្កាត់សំបួរមាស។

លោកអ៊ុន ចាន់ដា សមាជិកគណៈកម្មាធិការកណ្តាល​ និងជាប្រធានគណ:កម្មាធិការគណបក្សប្រជាជនកម្ពុជាខេត្តកំពង់ចាម បានសំណេះសំណាល និងផ្ដាំផ្ញើទៅកាន់សមាជិក សមាជិកាថ្មី ដែលមានការភ្ញាក់រលឹកមើលឃើញពីការដឹកនាំដ៏ត្រឹមត្រូវ និងភ្លឺស្វាងរបស់គណបក្សប្រជាជនកម្ពុជា ដែលមានសម្តេចហ៊ុន សែន ប្រធានគណបក្ស​ប្រជាជន​កម្ពុជា​ និងជានាយករដ្ឋមន្ត្រី នៃព្រះរាជាណាចក្រកម្ពុជា ដែលបាននាំមកនូវការ​អភិវឌ្ឍន៍​រីកចម្រើន និងសុខសន្តិភាពពេញលេញជូនជាតិ មាតុភូមិ និងប្រជាជនកម្ពុជា។

លោកអ៊ុន ចាន់ដា ក៏បានផ្តាំផ្ញើដល់សមាជិកគណបក្សថ្មី សូមមានភាពស្មោះត្រង់ ជាមួយគណបក្ស ចូលរួមគាំទ្រគណបក្ស ជាពិសេសបោះឆ្នោតជូន គណបក្សប្រជាជនកម្ពុជា ក្នុងឱកាសបោះឆ្នោតជ្រើសរើស ក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ និងអាណត្តិជាបន្តបន្ទាប់ តបតាមទិសស្លោក “សមាជិកបក្សម្នាក់ ជាសន្លឹកឆ្នោត១សន្លឹក”។

លោកក៏បានជំរុញ​ឲ្យ​បងប្អូន ជួយចលនាសមាជិក ដែលជាអតិតគណបក្សប្រឆាំង ឲ្យមករួមរស់ជាមួយ គណបក្សប្រជាជនកម្ពុជា បន្ថែមទៀត ខណៈ​ដែល​ គណបក្សប្រជាជនកម្ពុជា នៅតែបើកទ្វារស្វាគមន៍បងប្អូន គ្រប់ពេលវេលា៕SRP

ខេត្តបាត់ដំបង៖អភិបាលខេត្តបាត់ដំបង លោកសុខ លូ បានចេញសេចក្តីជូនដំណឹង ស្តីពីការអនុវត្តផែនការធ្វើឱ្យប្រសើរឡើងនូវសោភ័ណភាព បរិស្ថាន អនាម័យ នៅទូទាំងខេត្តបាត់ដំបង៕SRP

ខេត្តព្រះវិហារ៖មានការលើកឡើងថាបច្ចុប្បន្នមេឈ្មួញឈ្មោះ ឡេង ធារ៉ា នៅតែបន្តសកម្មភាពប្រមូលទិញឈើពីតំបន់ព្រៃឡង់ និងតំបន់ព្រៃព្រះរកា​ ដឹកជញ្ជូនចូលដេប៉ូឈើដ៏ធំរបស់ខ្លួននៅភូមិក្រាំងដូង ឃុំព្រះឃ្លាំង ស្រុកត្បែងមានជ័យ យ៉ាងពេញបន្ទុក។ សកម្មភាពរបស់ឈ្មួញឈ្មោះ ឡេង ធារ៉ា កំពុងធ្វើឲ្យព្រៃឡង់ ក្នុងស្រុកជ័យសែន និងព្រៃព្រះរកា ក្នុងស្រុកឆែប ស្រុកជាំក្សាន្ត ត្រូវប្រឈមនឹងសេចក្ដីវិនាស​ ព្រោះមន្រ្តីជំនាញ និងសមត្ថកិច្ចពាក់ព័ន្ធមិនហ៊ានប៉ះពាល់ឈ្មួញឈ្មោះ ឡេង ធារ៉ា នោះទេ។ ចំណែកលោក ពឹង ទ្រីដា ប្រធានមន្ទីរកសិកម្មខេត្តព្រះវិហារ និងលោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារ ក៏ដូចជាលោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ នាំគ្នាសម្ងំស្ងាត់ឈឹង ទុកឲ្យឡេង ធារ៉ា ប្រមូលទិញឈើតាមតែអំពើចិត្ត។

ប្រភពស្និទ្ធនឹងឈ្មួញឈ្មោះ ឡេង ធារ៉ា បានឲ្យដឹងថា ដោយសារឈ្មួញម្នាក់នេះមានខ្នងបង្អែករឹងមាំ ទើបអាចបន្តសកម្មភាពប្រមូលទិញឈើ ដឹកចេញពីតំបន់ព្រៃព្រះរកា និងព្រៃឡង់ ចូលមកដេប៉ូរបស់ខ្លួនយ៉ាងពេញបន្ទុក។ ជាក់ស្ដែងសូម្បីលោក កង សៅគុណ មេបញ្ជាការកងរាជអាវុធហត្ថខេត្តព្រះវិហារ និងលោក សួស សុខដារ៉ា ស្នងការនគរបាលខេត្តព្រះវិហារ ព្រមទាំងលោក ប្រាក់ សុវណ្ណ អភិបាលខេត្តព្រះវិហារ មិនហ៊ានប៉ះពាល់ឈ្មួញឈ្មោះ ឡេង ធារ៉ា នោះឡើយ។​ ហេតុនេះហើយទើបឈ្មួញឈ្មោះ ឡេង ធារ៉ា អាចធ្វើសកម្មភាពដឹកជញ្ជូនឈើពីតំបន់ព្រៃឡង់ និងព្រៃព្រះរកា ចូលមកដេប៉ូរបស់ខ្លួនក្នុងភូមិក្រាំងដូង ឃុំព្រះឃ្លាំង ស្រុកត្បែងមានជ័យ កាន់តែខ្លាំងលើសមុនទៀត។

តាមប្រភពបានលើកឡើងថា បើគ្មានការបើកដៃពីលោក​ ពឹង ទ្រីដា ប្រធានមន្ទីរកសិកម្មខេត្តព្រះវិហារ និងលោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារ ទេនោះ គឺឈ្មួញឈ្មោះ ឡេង ធារ៉ា មិនអាចធ្វើអ្វីៗតាមអំពើចិត្តឡើយ។ បញ្ហានេះថ្នាក់ដឹកនាំក្រសួងកសិកម្ម និងលោក កែវ អូម៉ាលីស្ស ប្រធានរដ្ឋបាលព្រៃឈើនៃក្រសួងកសិកម្ម មិនគួរមើលរំលងករណីបទល្មើសព្រៃឈើនៅខេត្តព្រះវិហារ នោះទេ។​ ជាងនេះទៅទៀត មានការជំរុញឲ្យថ្នាក់ដឹកនាំគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិចាត់វិធានការ បង្ក្រាបបទល្មើសព្រៃឈើនៅខេត្តព្រះវិហារ ឲ្យបានឆាប់និងប្រកបដោយប្រសិទ្ធភាព៕SRP

ភ្នំពេញ៖សម្តេច ស ខេង បានស្នើឱ្យការបន្តចូលរួមគាំទ្រ និងអនុវត្តនៅនយោបាយ ដ៏មានសារសំខាន់នេះដើម្បីជាឧត្តមប្រយោជន៍ របស់យើងទាំងអស់គ្នា និងរបស់ប្រជាពលរដ្ឋ ព្រមទាំងបានអំពាវនាវដល់រដ្ឋបាលគ្រប់ជាន់ថ្នាក់ ទាំងរាជធានី ខេត្ត ក្រុង ខណ្ឌ និងស្ថាប័ន្ធអង្គភាពដែលមានការពាក់ព័ន្ធត្រូវយកចិត្តទុកដាក់ក្នុងការដោះស្រាយបញ្ហាប្រឈម សំណើនានារបស់ប្រជាពលរដ្ឋ ឱ្យបានល្អប្រសើរដើម្បីទទួលបាននូវជំនឿទុកចិត្តពីសំណាក់ប្រជាពលរដ្ឋ។

សម្តេចក៏បានមានប្រសាសន៍បន្ថែមថា “មកដល់ពេលនេះយើង បានបោះជំហានយ៉ាងល្អលើការអនុវត្តកម្មវិធីជាតិដំណាក់កាលទី១ ឥឡូវនេះយើងបានឈានចូលដល់ជំហានទី២ ក្នុងអនុវត្តកម្មវិធីជាតិ ដំណាក់កាលទី២ ដែលមានរយៈពេល១០ទៅមុខដំណាក់កាលនេះ ត្រូវយកចិត្តទុកដាក់ក្នុងការផ្ទេរមុខងារតាមបែបវិមជ្ឍការក្តី វិសហមជ្ឍការ ក្តី ទៅឱ្យរដ្ឋបាលថ្នាក់ក្រោមជាតិ ព្រមទាំងត្រូវយកចិត្តទុកដាក់ ផ្ទេរធនធនទាំងធនធានមនុស្ស និងធនធានថវិការជាតិតាមលទ្ធភាពដែលអាចធ្វើទៅបាន”។

សម្ដេចស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ មានប្រសាសន៍យ៉ាងដូច្នេះក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២១ និងលើកទិសដៅការងារអនុវត្តឆ្នាំ២០២២ របស់រដ្ឋបាលរាជធានីភ្នំពេញ នៅថ្ងៃព្រហស្បតិ៍ ទី០៣ ខែមីនា ឆ្នាំ២០២២នេះ៕SRP

ខេត្តកណ្ដាល៖មានការលើកឡើងថាមន្រ្តីរាជការនៅក្នុងមន្ទីរសាធារណការ និងដឹកជញ្ជូនខេត្តកណ្ដាល បានឲ្យដឹងថា ក្រោយពេលរឿងអាស្រូវរបស់ខ្លួនត្រូវបានលាតត្រដាងជាបន្តបន្ទាប់គឺប្រធានមន្ទីរសាធារណការ និងដឹកជញ្ជូនខេត្តកណ្ដាល លោក ម៉ឹង​ យូឡេង​ កំពុងព្យាយាមបិទបាំងអំពើរបស់ខ្លួន។ ប៉ុន្តេទោះជាយ៉ាងណាលោក ម៉ឹង យូឡេង មិនអាចបិទបាំងរឿងអាស្រូវរបស់ខ្លួនបានទេ ព្រោះបណ្ដាញព័ត៌មាននានាបានចុះផ្សាយជាសាធារណៈ រួចទៅហើយជុំវិញការ បើកដៃឲ្យប្រធានស្ថានីយ៍ជញ្ជីងថ្លឹងរថយន្តជាច្រើនកន្លែងប្រព្រឹត្តរឿងភាពមិនប្រក្រតីពេញទំហឹង។

នៅក្នុងលិខិតរបស់លោក​ ម៉ឹង យូឡេង ប្រធានមន្ទីរសាធារណការ និងដឹកជញ្ជូនខេត្តកណ្ដាល កាលពីថ្ងៃទី23 ខែកុម្ភៈ ឆ្នាំ2022 បានបញ្ជាក់អំពីការផ្លាស់ប្ដូរមន្រ្តីស្ថានីយ៍ជញ្ជីងថ្លឹងរថយន្តចំនួន5។ ក្នុងនោះទី1-ស្ថានីយ៍ថ្លឹងរថយន្តកំពង់ភ្នំផ្លូវជាតិលេខ1​, ទី2-ស្ថានីយ៍ក្រសាំងផ្លូវជាតិលេខ2,ទី3-ស្ថានីយ៍កំពង់ទួលផ្លូវជាតិលេខ3,ទី4-ស្ថានីយ៍អង្គស្នួលផ្លូវជាតិលេខ4 និងទី5-ស្ថានីយ៍ព្រែកស្ដី ផ្លូវជាតិលេខ21។ ការសម្រេចរបស់លោក ម៉ឹង យូឡេង ក្នុងការផ្លាស់ប្ដូរមន្រ្តីស្ថានីយ៍ជញ្ជីងថ្លឹងរថយន្តចំនួន5កន្លែងបែបនេះបានកើតឡើងក្រោយពេលរឿងអាស្រូវរបស់លោក ម៉ឹង យូឡេង ត្រូវបានលាតត្រដាងជាបន្តបន្ទាប់។

ប្រភពស្និទ្ធនឹងលោក ម៉ឹង យូឡេង បានបង្ហើបឲ្យដឹងថា​ ការផ្លាស់ប្ដូរមន្រ្តីស្ថានីយ៍ជញ្ជីងថ្លឹងរថយន្តទាំង5កន្លែងគឺជាវិធីរបស់លោក ម៉ឹង យូឡេង ដើម្បីបិទបាំងរឿងអាស្រូវរបស់ខ្លួនតែប៉ុណ្ណោះ។ ដោយហេតុថាកន្លងមកបើគ្មានការបើកដៃពីលោក ម៉ឹង យូឡេង ទេនោះ គឺក្រុមមន្រ្តីប្រចាំស្ថានីយ៍ជញ្ជីងថ្លឹងរថយន្តទាំង5កន្លែង មិនហ៊ានប្រព្រឹត្តយ៉ាងពេញបន្ទុកឡើយ។ ដូច្នេះលោក ស៊ុន ចាន់ថុល រដ្ឋមន្រ្តីសាធារណការ និងដឹកជញ្ជូន មិនគួរទុកឲ្យលោក ម៉ឹង យូឡេង ធ្វើអ្វីៗតាមអំពើចិត្តតទៅទៀតឡើយ ព្រោះក្នុងតំណែងជាប្រធានមន្ទីរសាធារណការ និងដឹកជញ្ជូនខេត្តកណ្ដាល ច្រើនឆ្នាំកន្លងទៅនេះលោក ម៉ឹង យូឡេង ល្បីល្បាញខ្លាំងរឿងភាពមិនប្រក្រតី៕SRP

ខេត្តព្រះវិហារ៖សមត្ថកិច្ចរដ្ឋបាលព្រៃឈើរវៀង បានបង្ក្រាបរថយន្តដឹកឈើរបស់មេឈ្មួញឈ្មោះ ខ្លា ដែលជាឈ្មួញឈើដុះស្លែប្រចាំស្រុករវៀង។

ការបង្ក្រាបធ្វើឡើងនៅយប់មិញ ថ្ងៃទី ៣ ខែមិនា ឆ្នាំ២០២២ ចំណុចបុស្សសៀម ស្ថិតនៅក្នងភូមត្រពាំងផ្ចឹក ឃុំរុងរឿង ស្រុករវៀងខេត្តព្រះវិហារ ខណៈដឹកលក់អោយដេប៉ូនានានៅក្នុងខេត្តកំពង់ធំ។

រថយន្តដែលបង្ក្រាបម៉ាកសាំយ៉ុង ពាក់ផ្លាកលេខបន្ទាយមានជយ័ 2A 4867 ជារបស់មេឈ្មួញឈ្មោះខ្លា ដែលតែងតែធ្វើសកម្មភាពដឹកជញ្ជូនឈើចេញពីស្រុករវៀង ទៅខេត្តកំពង់ធំ តាមផ្លូវជាតិលេខ៦២។

មន្ត្រីផ្នែករដ្ឋបាលព្រៃឈើរវៀងបានអោយដឹងថា រថយន្តដឹកឈើនេះត្រូវបានបង្ក្រាបហើយ ហើយក៏មានអ្នកអន្តរាគមន៍ច្រើនដែរ សុំអោយដោះលែងរថយន្តដឹកឈើនេះ។ ការសុំអន្តរាគមន៍អោយដោះលែងរថយន្តដឹកបទល្មើសព្រៃឈើ បានធ្វើសមត្ថកិច្ចជំនាញអស់ទឹកចិត្តធ្វើការ ដោយសាមិនស្មើភាពចំពោះប្រជាពលរដ្ឋដឹកឈើគ្រាន់តែយកទៅប្រើប្រាស់ ត្រូវបានបញ្ជាអោយបង្ក្រាប។ ប៉ុន្តែទោះបីមានអន្តរាគមន៍យ៉ាងណាក៏ដោយ លោកធ្វើទៅតាមច្បាប់មិនអាចដោះលែងនោះឡើយ។

មន្ត្រីជំនាញថា វត្ថុតាងមានរថយន្តនឹងឈើត្រូវបានរឹបអូសយកមករក្សាទុកនៅផ្នែករដ្ឋបាលព្រៃឈើរវៀង ដើម្បីចាត់ការបន្តទៅតាមនីតិវិធីច្បាប់។ សូមជម្រាបថាសកម្មភាពដឹកឈើរបស់ឈ្មោះ ខ្លា កន្លងមកមិនត្រូវបានសមត្ថកិច្ចហ៊ានបង្ក្រាបនោះទេដោយសាមានលោកផ្កាយ១ម្នាក់កាងពីក្រោយបទល្មើសដឹកជញ្ជូនឈើនេះ៕SRP

ភ្នំពេញ៖សម្ដេចតេជោនាយករដ្ឋមន្ត្រី ហ៊ុន សែន បានមានប្រសាសន៍ប្រាប់លោក Joo Ok Lee ថា កម្ពុជាបានចាក់ស្រោចវ៉ាក់សាំកូវី១៩ ទៅដល់ប្រជាពលរដ្ឋកម្ពុជា ហើយក៏បានបើកប្រទេសជាតិឡើងវិញ កាលពីថ្ងៃទី ១ខែវិច្ឆិកា ឆ្នាំ២០២១ កន្លងទៅនេះ ហើយអ្វីដែលគួរឲ្យកត់សម្គាល់នោះ សេដ្ឋកិច្ចកម្ពុជារំពឹងថានឹងមានការកើនឡើង ប្រមាណជា 5,6% សម្រាប់ឆ្នាំ២០២២ នេះ។

ក្នុងនាមជាប្រធានអាស៊ាន សម្ដេចតេជោ បានមានប្រសាសន៍ថា អ្វីដែលសម្ដេចចង់បាន គឺអាស៊ានសហការគ្នាបើកប្រទេសឡើងវិញព្រមគ្នា ជំរុញទំនាក់ពាណិជ្ជកម្មក្នុងតំបន់ និងបំពេញឲ្យគ្នាទៅវិញទៅមក ជាពិសេសនៅពេលដែលទាំងអស់គ្នា រស់នៅក្នុងបរិបទថ្មីនៃសម័យកូវីដ១៩ នោះ។ លើសពីនេះទៅទៀត សម្ដេចតេជោនាយករដ្ឋមន្ត្រី ក៏បានផ្ដល់ជូន លោក Joo Ok Lee នូវទស្សនៈរបស់សម្ដេច ពាក់ព័ន្ធទៅនឹងរូបមន្ត១បូក នោះគឺការវិនិយោគមិនប្រមូលផ្ដុំ មានន័យថា ការវិនិយោគនៅប្រទេសមួយហើយ គប្បីណាវិនិយោគនៅប្រទេសជាប់នោះមួយទៀត ដើម្បីដោះស្រាយ នៅពេលដែលប្រទេសមួយជួបនូវវិបត្តិ ដូចជាបញ្ហាជំងឺកូវីដ រីករាលដាលជាដើម ប្រទេសមួយទៀតអាចបំពេញនូវតម្រូវការ ប្រទេសមួយទៀត ដើម្បីរក្សានូវស្ថិរភាព , ការផ្គត់ផ្គង់ទំនិញ ក៏ដូចជាការទាញចំណាប់អារម្មណ៍ ទៅលើការវិនិយោគ លើវិស័យ ឌីជីថល ដែលកន្លងមកនេះវិស័យឌីជីថល មិនត្រឹមតែមិនមានការប៉ះពាល់ ជាមួយនឹងការរីករាលដាលជំងឺកូវីដទេ ផ្ទុយទៅវិញវិស័យនេះបាននឹងកំពុងតែវិវត្តរីកចម្រើនយ៉ាងឆាប់រហ័សផងដែរ។

សម្ដេចមានប្រសាសន៍យ៉ាងដូច្នេះនៅវិមានសន្តិភាព នាថ្ងៃទី៣ ខែមីនា ឆ្នាំ២០២២ ក្នុងឱកាសពិភាក្សាការងារជាមួយ លោក Joo Ok Lee ប្រធានកម្មវិធីតំបន់ ប្រចាំអាស៊ីប៉ាស៊ីហ្វិក និងជាសមាជិកគណៈកម្មការប្រតិបត្តិនៃវេទិកាសេដ្ឋកិច្ចពិភពលោក(WEF)។

ក្នុងជំនួបនេះ លោក Joo Ok Lee បានអបអរសាទរចំពោះសម្ដេចតេជោនាយករដ្ឋមន្ត្រី ដែលបានទទួលធ្វើជាប្រធានអាស៊ានសម្រាប់ឆ្នាំ២០២២នេះ និងបានសម្តែងការអបអរសាទរចំពោះវឌ្ឍនភាព និងភាពរីកចម្រើនរបស់ប្រទេសកម្ពុជា ។ លោកបានមានប្រសាសន៍ថា លោកបានធ្វើដំណើរមកកាន់ប្រទេសកម្ពុជាកាលពីឆ្នាំ២០១៧ ហើយនៅពេលនេះ ឃើញថាប្រទេសកម្ពុជា មានការអភិវឌ្ឍរីកចម្រើនយ៉ាងខ្លាំង ទោះបីស្ថិតនៅក្នុងដំណាក់កាលនៃការរីករាលដាលនៃជំងឺកូវីដ១៩ នាពេលនេះក៏ដោយ ។ លោកបានបញ្ជាក់ថា ប្រសិនបើគ្មានការរីករាលដាលនៃជំងឺកូវីដ១៩ជាសកលនោះទេ កម្ពុជាពិតជាមានការអភិវឌ្ឍរីកចម្រើនជាងនេះទៅទៀត។

លោក Joo Ok Lee បានគោរពជម្រាបជូនសម្តេចតេជោ អំពីដំណើរការរៀបចំកិច្ចប្រជុំវេទិការសេដ្ឋកិច្ចពិភពលោក ដែលនឹងប្រព្រឹត្តទៅនៅខែមិថុនា ឆ្នាំ២០២២ ខាងមុខនេះ ហើយលោកនឹងទទួលទស្សនៈ ក៏ដូចជាអនុសាសន៍ល្អៗពីសម្ដេចតេជោនាយករដ្ឋមន្ត្រី ទាក់ទងទៅនឹងវេទិកាសេដ្ឋកិច្ចពិភពលោក ក្នុងនាមសម្ដេចតេជោជាប្រធានអាស៊ាន។

សម្ដេចហ៊ុន សែន បានយល់ស្របជាមួយ លោក Joo Ok Lee ដែលលើកឡើងថាប្រសិនបើគ្មានការឆ្លងរីករាលដាលនៃជំងឺកូវីដ១៩ជាសកលនោះទេ កម្ពុជានឹងមានការរីកចម្រើនជាងនេះ ជាមួយនឹងការកាត់បន្ថយភាពក្រីក្រ កាន់តែច្រើនបន្ថែមទៀត៕SRP

ខេត្តកំពង់ចាម៖អភិបាលខេត្តលោកអ៊ុន ចាន់ដា បានថ្លែងជំរុញឱ្យក្រុមហ៊ុនទទួលការ ធ្វើការស្ថាបនាផ្លូវគមនាគមន៍ខាងលើឱ្យមានគុណភាពខ្ពស់ ស្របទៅតាមបទដ្ឋានស្តង់ដារបច្ចេកទេស ដោយស្ថិតនៅក្រោមការត្រួតពិនិត្យយ៉ាងហ្មត់ចត់ពីគណៈកម្មការថែទាំគម្រោង និងអ្នកពាក់ព័ន្ធ សំដៅធ្វើយ៉ាងណាឲ្យផ្លូវខាងលើបានប្រើប្រាស់គង់វង្ស យូរអង្វែង។

លោកអ៊ុន ចាន់ដា ក៏បានថ្លែងថា សមិទ្ធផលដែលបានលេចរូបរាងឡើងជាបន្តបន្ទាប់ គឺដោយសារកត្តាប្រទេសជាតិមានសុខសន្តិភាពពេញលេញ ក្រោមការដឹកនាំដ៏ឈ្លាសវៃ របស់សម្ដេចតេជោ ហ៊ុន សែន។

លោកថ្លែងបែបនេះក្នុងឱកាស អញ្ជើញចុះសួរសុខទុក្ខប្រជាពលរដ្ឋ នៅសង្កាត់សំបួរមាស និងពិនិត្យគម្រោងការងារស្ថាបនាកំណាត់ផ្លូវក្រុងលេខ៩២ ប្រភេទបេតុង ១ខ្សែ ស្ថិតនៅជាប់សាលាបឋមសិក្សា និងវិទ្យាល័យសំបួរមាស និង ១ខ្សែផ្សេងទៀត ស្ថិតនៅលើកំណាត់ផ្លូវក្រុងលេខ៥១ ចំណុចផ្សារព្រែកដើមចាន់ សង្កាត់សំបួរមាស ក្រុងកំពង់ចាម។ ក្នុងនោះលោកក៏បានសួរសុខទុក្ខប្រជាពលរដ្ឋ និងពិនិត្យវឌ្ឍនភាពនៃការស្ថាបនាផ្លូវបេតុង ១ខ្សែ ផ្សេងទៀត ស្ថិតនៅក្នុងភូមិ មេម៉ាយ សង្កាត់បឹងកុក ក្រុងកំពង់ចាមផងដែរ៕SRP

ភ្នំពេញ៖សម្ដេចតេជោនាយករដ្ឋមន្ត្រី ហ៊ុន សែន បានសំដែងនូវក្តីរីករាយចំពោះកិច្ចសហប្រតិបត្តិការ រវាងនគរបាលជាតិនៃសមាជិកអាស៊ាន ដែលអាចទប់ស្កាត់នូវអំពើភេរវកម្មទាន់ពេលវេលា។ ក្នុងន័យនេះ សម្តេចតេជោបានលើកចិត្តឲ្យនគរបាលជាតិនៃសមាជិកអាស៊ានទាំងអស់ បន្តកិច្ចសហប្រតិបត្តិការបន្ថែមទៀត ជាពិសេសទប់ស្កាត់ ឱ្យខានតែបាននូវអំពើភេរវកម្មទាំងឡាយណា ប្រែក្លាយអាស៊ានដោយគ្មានអំពើភេរវកម្ម។ សម្ដេចតេជោក៏បានលើកទឹកចិត្តផងដែរឲ្យនគរបាលជាតិនៃសមាជិកអាស៊ានទាំងអស់ចែករំលែកនូវបទពិសោធន៍ព័ត៌មាន និងចង់ឲ្យនគរបាលជាតិនៃសមាជិកអាស៊ានក្លាយជាឯកអគ្គរដ្ឋទូតដើម្បីពង្រីក ពង្រឹងទំនាក់ទំនង រវាងប្រទេសផង និងពង្រឹងពាណិជ្ជកម្មរវាងប្រទេសអាស៊ាន និងក្នុងតំបន់ផង។

សម្ដេចហ៊ុន សែន មានប្រសាសន៍យ៉ាងដូច្នេះ ក្នុងឱកាស អញ្ជើញទទួលជួបពិភាក្សាការងារជាមួយប្រតិភូនគរបាលជាតិនៃបណ្ដាប្រទេសសមាជិកអាស៊ាន នៅវិមានសន្តិភាព នាព្រឹកថ្ងៃទី៣ ខែមីនា ឆ្នាំ២០២២នេះ។

ក្នុងជំនួបនោះ សម្ដេចហ៊ុន សែន បានស្វាគមន៍ប្រតិភូនគរបាលជាតិនៃប្រទេសសមាជិកអាស៊ាន និងបានថ្លែងអំណរគុណចំពោះប្រតិភូទាំងអស់ ដែលបានអញ្ជើញមកចូលរួមសន្និសីទអាស៊ានណាប៉ូលលើកទី៤០ នៅរាជធានីភ្នំពេញនាពេលនេះ ស្របពេលដែលជំងឺកូវីដ១៩ កំពុងតែរាតត្បាត នៅទូទាំងពិភពលោក។

សម្ដេចតេជោបានមានប្រសាសន៍ថា កម្ពុជាក៏ជាប្រទេសមួយដែលរងនូវការរាតត្បាតដោយជំងឺកូវីដ១៩ផងដែរ ប៉ុន្តែដោយសារតែការចាក់ស្រោចនូវវ៉ាក់សាំងប្រឆាំងកូវីដ១៩ ទៅដល់ប្រជាពលរដ្ឋ មិនថាតែពលរដ្ឋកម្ពុជាខ្លួនឯងទេ គឺទៅដល់ប្រជាពលរដ្ឋជនបរទេសដែលរស់នៅកម្ពុជាផងដែរ ដែលធ្វើអោយកម្ពុជាយើងអាចបើកដំណើរការប្រទេសជាតិឡើងវិញ កាលពីដើមខែវិច្ឆិកាកន្លងទៅនេះ។

សម្ដេចតេជោក៏បានថ្លែងអំណរគុណចំពោះ ឯកឧត្តមប្រធានគណៈប្រតិភូ អាស៊ានណាប៉ូលទាំងអស់ ហើយក៏បានផ្ដល់នូវក្តីសង្ឃឹមថា ប្រតិភូទាំងអស់នឹងចូលរួមធ្វើឲ្យសន្និសីទនេះ ទទួលបាននូវភាពជោគជ័យ។

ជាការឆ្លើយតប ប្រតិភូនគរបាលជាតិនៃសមាជិកអាស៊ាន បាន គោរពប្ដេជ្ញាជូនចំពោះសម្ដេចតេជោ ថា នឹងអនុវត្តតាមអនុសាសន៍របស់សម្ដេចតេជោនាយករដ្ឋមន្ត្រី នឹងខិតខំប្រឹងប្រែងធ្វើយ៉ាងណាប្រែក្លាយតំបន់អាស៊ានឱ្យក្លាយទៅជាតំបន់នៃកិច្ចសហប្រតិបត្តិការ ប្រកបដោយសុខដុមនីយកម្ម ស្ថេរភាព និងសន្តិភាព៕SRP

ភ្នំពេញ៖សម្តេចហេង សំរិន ប្រធានរដ្ឋសភា បានដឹកនាំកិច្ចប្រជុំគណៈកម្មាធិការអចិន្រ្តៃយ៍រដ្ឋសភា នៅព្រឹកថ្ងៃព្រហស្បតិ៍ ទី៣ ខែមីនា ឆ្នាំ២០២២នេះ តាមប្រព័ន្ធនិម្មិត។

កិច្ចប្រជុំគណៈកម្មាធិការអចិន្រ្តៃយ៍រដ្ឋសភាបានអនុម័តរបៀបវារៈចំនួនពីររួមមាន៖

១- អនុម័តយល់ព្រមលើសំណើសុំជ្រើសតាំងសមាជិកក្រុមប្រឹក្សាធម្មនុញ្ញ ១រូប សម្រាប់ជំនួស ឯកឧត្តម អុឹម សួស្តី សមាជិកក្រុមប្រឹក្សាធម្មនុញ្ញ ដែលត្រូវបញ្ចប់អាណត្តិ ដោយប្រគល់ភារកិច្ចជូនអគ្គលេខាធិការដ្ឋានរដ្ឋសភា ធ្វើសេចក្តីជូនដំណឹងផ្សព្វផ្សាយជ្រើសរើសបេក្ខជន ហើយធ្វើរបាយការណ៍ជូន គណៈកម្មាធិការអចិន្ត្រៃយ៍រដ្ឋសភាវិញ។

២- អង្គប្រជុំបានអនុម័តទទួលយកសំណើរបស់រាជរដ្ឋាភិបាលនូវសេចក្តីព្រាងច្បាប់ ស្តីពីការការពាររុក្ខជាតិ និងភូតគាមអនាម័យ ដោយប្រគល់ភារកិច្ចជូនគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា ពិនិត្យសិក្សា ហើយធ្វើរបាយការណ៍ជូនគណៈកម្មាធិការអចិន្រ្តៃយ៍រដ្ឋសភាវិញ៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានមានប្រសាសន៍ថា សម្រាប់មន្រ្ដីរាជការ ដែលទើបតែប្រកាសចូលកាន់មុខតំណែង និងភារកិច្ចថ្មី ដែលនេះកើតឡើងដោយសារការវាយតម្លៃយ៉ាងមុតចត់ពីគណៈអភិបាលខេត្ត ថ្នាក់ដឹកនាំមន្ទីរអង្គភាពជុំវិញខេត្ត ហើយបន្ទាប់ពីទទួលភារកិច្ចថ្មីហើយ សូមបន្តខិតខំប្រឹងប្រែងបំពេញការងាររបស់ខ្លួន ជាពិសេសបន្តរក្សាសាមគ្គីភាពផ្ទៃក្នុង គោរពថ្នាក់ដឹកនាំរបស់ខ្លួន និងត្រូវគេចឲ្យឆ្ងាយនូវគំនិតញុះញងើ អុចអាលអ្នកដទៃក្នុងចេតនាបង្កភាពបែកបាក់សាមគ្គីផ្ទៃក្នុង។

លោកបន្តទៀតថា សព្វថ្ងៃនេះមន្រ្ដីរាជការ នៅតាមស្ថាប័ននានាមិនខ្វះទេ ក៏ប៉ុន្តែគឺអ្នកធ្វើការ ដោយអ្នកខ្លះមិនខិតខំប្រឹងប្រែង ខ្វះការយកចិត្តទុកដាក់ក្នុងការងារ ឬអវត្តមានជាដើម ដែលជាហេតុធ្វើឲ្យខ្វះអ្នកធ្វើការ ដូចនេះថ្នាក់ដឹកនាំនៃស្ថាប័ននីមួយៗ ត្រូវពង្រឹងឥរិយាបថមន្រ្ដីរបស់ខ្លួន ពិសេសត្រូវពង្រឹងនូវសមត្ថភាពរបស់មន្រ្ដីរបស់ខ្លួន សិក្សាស្រាវជ្រាវ ដូចជាការស្វែងយល់ពីលិខិតបទដ្ឋានថ្មីៗ ឬច្បាប់មួយចំនួនដែលត្រូវរាជរដ្ឋាភិបាលបានកែសម្រួលថ្មីៗនេះ។

លោកសុខ លូ បញ្ជាក់បែបនេះ ក្នុងពិធីប្រកាសចូលកាន់មុខតំណែង មន្រ្ដីរាជការចំណុះក្នុងរចនាសម្ព័ន្ធមន្ទីររ៉ែ និងថាមពលខេត្ត មន្ទីរបរិស្ថានខេត្ត មន្ទីរទេសចរណ៍ខេត្ត មន្ទីរកិច្ចការនារីខេត្ត និងមុខតំណែងគ្រប់គ្រងក្នុងវិស័យអប់រំមធ្យមសិក្សាក្នុងស្រុកឯកភ្នំ ខេត្តបាត់ដំបងនៅថ្ងៃពុធ ទី០២ ខែមីនា ឆ្នាំ២០២២នេះ។

លោកបានបញ្ជាក់បន្តទៀតថា ដោយសារតែការរីករាលដាលនៃជំងឺកូវីដ-១៩ ប្រភេទបម្លែងថ្មី អូមីក្រុង ទើបធ្វើឲ្យការរៀបចំកម្មវិធីត្រូវបានកាត់បន្ថយចំនួនអ្នកចូលរួម ដោយត្រូវចូលរួមតាមរយៈផ្ទាល់ផង និងតាមរយៈប្រព័ន្ធបញ្ជូនរូប និងសម្លេងផង ដើម្បីគោរពតាមវិធានការរបស់ក្រសួងសុខាភិបាល។ លោកបានបន្តទៀតថា ទោះបីជាមានការផ្ទុះក្នុងសហគមន៍ច្រើនក៏ដោយ ក៏មិនមានផែនការក្នុងការបិទអាជីវកម្មមួយចំនួនដូចកាលពីមុនឡើយ ដោយសាររាជរដ្ឋាភិបាលកម្ពុជា បានចេញយុទ្ធសាស្រ្ដស្រោចវ៉ាក់សាំងកូវីដ ជូនប្រជាពលរដ្ឋទូទាំងប្រទេស ដើម្បីឲ្យមានភាពស៊ាំនឹងជំងឺនេះ ដូច្នេះសូមមន្រ្ដីរាជការចូលរួមធ្វើការណែនាំបន្ថែមទៀតដល់ប្រជាពលរដ្ឋ ដោយជំរុញគាត់ទៅទទួលការចាក់វ៉ាក់សាំង ដូសជំរុញឬដូសទី៣បន្ថែមទៀត ដើម្បីចូលរួមចំណែកក្នុងការទប់ស្កាត់ការឆ្លងជាសហគមន៍ ព្រោះវ៉ាក់សាំងជួយប្រជាពលរដ្ឋ ឲ្យឆ្លងផុតពីការឆ្លងផង ឬជួយសង្រ្គោះប្រជាពលរដ្ឋ នូវអាត្រាស្លាប់ឲ្យកាន់តែទាប និងឆាប់ជាសះស្បើយពេលដែលឆ្លងនូវជំងឺនេះផងដែរ៕SRP