ខេត្តសៀមរាប៖អភិបាលខេត្តបានលើកឡើងថាព្រៃលិចទឹកនេះមានសារៈសំខាន់សម្រាប់ទីជម្រកត្រីពងកូន និងជីវៈចម្រុះនៅក្នុងបឹងទន្លេសាប តែបើសិន ព្រៃលិចទឹកបាត់បង់ជារៀងរាល់ឆ្នាំនោះ វានឹងធ្វើឲ្យមានផលប៉ះពាល់យ៉ាងច្រើនដល់ជីវៈចម្រុះជាពិសេសទិន្នផលត្រី និងមានការថយចុះ ជារៀងរាល់ឆ្នាំ ព្រមទាំងសត្វស្លាបទៀតផង។

លោកទៀ សីហា អភិបាលខេត្តសៀមរាបបានបញ្ជាក់ថា ផ្ទាំងផែនទីទិន្នន័យនៃផ្ទៃដីក្នុងតំបន់២និងតំបន់៣ បានដាក់តាំងបង្ហាញឲ្យសាធារណជនបានដឹងបានយល់ក្នុងការកំណត់ព្រំប្រទល់ នឹងបោះបង្គោលឡាក់ ដែលបានបញ្ជាក់នៅក្នុងទីនេះស្រាប់ ក្នុងគោលបំណងចួលរួមទប់ស្កាត់ការពារបឹងទន្លេសាបដែលកំពុងតែរងគ្រោះដោយគោករាក់ និង បាត់បង់ព្រៃលិចទឹកជាបណ្តើរៗ ដោយរងការបំផ្លិចបំផ្លាញពីក្រុមជនអនាធិបតេយ្យនោះ គឺយើងចាំបាច់ត្រូវតែមានវិធានការណ៍។

លោកមានប្រសាសន៍បែបនេះ នៅរសៀលថ្ងៃទីខែ២៧ ខែធ្នូ ម្សិលមិញក្នុងឱកាសអញ្ជើញចុះពិនិត្យនិងកំណត់ដាក់ផ្ទាំងផែនទីតំបន់៣ ព្រៃលិចទឹកបឹងទន្លេសាប ក្នុងភូមិសាស្ត្រត្រង់ចំណុចចុងឃ្នៀស សង្កាត់ចុងឃ្នៀស ក្រុងសៀមរាប ខេត្តសៀមរាប។

សូមបញ្ជាក់ថា កាលពីថ្មីៗនេះ សម្តេចហ៊ុនសែន បានដាក់បទបញ្ជារឲ្យអាជ្ញាធរខេត្ត ជុំវិញបឹងទន្លេសាបទាំងអស់ ពិនិត្យមើលនិងទប់ស្កាត់ជាបន្ទាន់នូវការកាប់រានដីព្រៃលិចទឹក ក្រោយពីមានព័ត៌មានថាមានការកាប់បំផ្លាញព្រៃលិចទឹកនៅជុំវិគបឹងទន្លេសាប។

បើតាមប្រភពបានឲ្យដឹងថា នៅឯសង្កាត់ជ្រាវក្រុងសៀមរាប ក៏មានសកម្មភាពកាប់បំផ្លាញព្រៃលិចទឹកជាច្រើនហិកតាផងដែរ ប៉ុន្តែរហូតមកដល់ពេលនេះគេនៅពុំទាន់ឃើញមេក្លោងនៃការកាប់បំផ្លាញព្រៃទឹកចេញមុខសារភាពនៅឡើយទេ។ ទោះជាយ៉ាងណាប្រជាពលរដ្ឋក៏ដូចជាមហាជនសង្ឃឹមថាអាជ្ញាធរសមត្ថកិច្ចជំនាញពាក់ព័ន្ធនឹងចាត់វិធានការជាក់លាក់ទៅលើមេក្លោងកាប់បំផ្លាញព្រៃលិចទឹកនៅសង្កាត់ជ្រាវជាក់ជាពុំខានឡើយ៕SRP

ភ្នំពេញ៖កម្លាំងនាយកដ្ឋាននគរបាលព្រហ្មទណ្ឌ សហការស្រាវជ្រាវ ចាប់ខ្លួនដៃដល់ នៅស្រុករមាសហែក ខេត្តស្វាយរៀង នាវេលាថ្ងៃត្រង់ថ្ងៃទី២៨ ខែធ្នូ ឆ្នាំ២០២១នេះ ករណីសំណុំរឿងចាក់សម្លាប់ស្ដ្រីជនជាតិចិន នៅខណ្ឌដង្កោ។

 សូមបញ្ជាក់ថាហេតុការណ៍អំពើឃាតកម្មលើស្ដ្រីជនជាតិចិននេះ បានកើតឡើងនៅយប់ថ្ងៃទី២៥ ខែធ្នូ ឆ្នាំ២០២១ ក្នុងរោងចក្រគោលដេនហ្គ្រេស ស្ថិតក្នុងភូមិអន្លង់គងថ្មី សង្កាត់ព្រៃស ខណ្ឌដង្កោ រាជធានីភ្នំពេញ។

សមត្ថកិច្ចព្រហ្មទណ្ឌបានដឹងថាជនដៃដល់ដែលកម្លាំងជំនាញចាប់ខ្លួនបាននេះ ឈ្មោះ សាវ វិន (XIAO WEN) ភេទប្រុស អាយុ៣៤ឆ្នាំ ជនជាតិចិន មុខរបរប្រធានផ្នែកដេរ កាន់លិខិតឆ្លងដែនលេខ EO1271955 ស្នាក់នៅក្នុងរោងចក្រគោលដេនហ្គ្រេស។ ចំណែកជនរងគ្រោះឈ្មោះ ឌៀង លី (DING LI) ភេទស្រី អាយុ៣៧ឆ្នាំ ជនជាតិចិន កាន់លិខិតឆ្លងដែនលេខ EF5967276 មុខរបរប្រធានរោងចក្រ ស្នាក់នៅក្នុងរោងចក្រគោលដេនហ្គ្រេស ស្ថិតនៅភូមិអន្លង់គងថ្មី សង្កាត់ព្រៃស ខណ្ឌដង្កោ រាជធានីភ្នំពេញ។

បច្ចុប្បន្ននគរបាលព្រហ្មទណ្ឌ កំពុងបញ្ជូនខ្លួនជនសង្ស័យមកធ្វើការសាកសួរនៅនាយកដ្ឋាននគរបាលព្រហ្មទណ្ឌ ដើម្បីចាត់ការបន្ដតាមនីតិវិធី៕SRP

ខេត្តកណ្ដាល៖សម្តេចស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានមានប្រសាសន៍ថា មណ្ឌលយុវនីតិសម្បទានេះ គឺជាសមិទ្ធផលថ្មីមួយទៀតរបស់រាជរដ្ឋាភិបាល ដែលអាចចាត់ទុកជាសមិទ្ធផលប្រវត្តិសាស្ត្រដំបូងបង្អស់នៅកម្ពុជា ដែលកន្លងមក កម្ពុជាយើងមិនទាន់មានមណ្ឌលបែបនេះនៅឡើយទេ។ មណ្ឌលយុវនីតិសម្បទានេះ គឺសំដៅទទួលយកអនីតិជនដែលទំនាស់នឹងច្បាប់ ដើម្បីអប់រំ និងកែប្រែឱ្យក្លាយជាយុវជនល្អនៅក្នុងសង្គមកម្ពុជាយើងឡើងវិញ។

សម្តេច ស ខេង ក៏បានស្នើដល់ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងយុត្តិធម៌ និងក្រសួង ស្ថាប័នពាក់ព័ន្ធរួមនិងអង្គការដៃគូអភិឌ្ឍ ឱ្យបន្តចូលរួមសហការឱ្យបានល្អក្នុងដំណើរការ នឹងការប្រព្រឹត្តទៅរបស់មណ្ឌលយុវជនីតិសម្បទានេះឱ្យស្របទៅតាមស្តង់អន្តរជាតិ ក្នុងគោលដៅធានាដល់ឧត្តមប្រយោជន៍ អនីតិជនរបស់យើង។

សម្តេចស ខេង មានប្រសាសន៍យ៉ាងដូច្នេះ ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ នូវ មណ្ឌលយុវនីតិសម្បទា ស្ថិតនៅភូមិបាគូរ ឃុំបាគូរ ស្រុកកណ្តាលស្ទឹង ខេត្តកណ្តាល នៅព្រឹកមិញនេះ។

លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានបញ្ជាក់ថា មណ្ឌលនេះ មានសមត្ថភាពទទួលអនីតិជនបានរហូតដល់ជាង ១០០០នាក់ ដែលជាចំណែកមួយជួយរំដោះអនីតិជនដែលបានដាក់នៅតាមពន្ធនាគាររាជរាជធានី -ខេត្ត កន្លងមក។

រដ្ឋមន្ត្រី បានបន្ថែមថាមណ្ឌលនេះ ពុំត្រឹមតែជាកន្លែងទុកដាក់អនីតិជនប្រព្រឹត្តល្មើសខុសនឹងច្បាប់ប៉ុណ្ណោះទេ តែជាកន្លែងអប់រំបណ្តុះបណ្តាលវិជ្ជាជីវៈ ដើម្បីឱ្យក្លាយទៅជាធនធានមនុស្សសម្រាប់សង្គមជាតិនាពេលអនាគត ស្របតាមឆន្ទៈដ៏មុះមុតរបស់រដ្ឋាភិបាល ជាពិសេសក្នុងការឈានទៅសម្រេចគោលដៅ “គ្មាននរណាម្នាក់ត្រូវបានបំភ្លេចចោល”៕SRP

ភ្នំពេញ៖លោកMasahiro Mikami ឯកអគ្គរាជទូតជប៉ុនប្រចាំនៅកម្ពុជា សម្ដេចតេជោនាយករដ្ឋមន្ត្រី ហ៊ុន សែន ថាទាក់ទងទៅនឹងវិស័យវិនិយោគវិញ ក្រុមហ៊ុន តូយ៉ូតា កំពុងតែរៀបចំស្នើសុំបង្កើតរោងចក្រគ្រឿងបង្គុំនៅក្នុងប្រទេសកម្ពុជា ហើយក៏មានក្រុមហ៊ុនដទៃទៀតកំពុងតែស្នើសុំបង្កើតរោងចក្រផលិតអគ្គិសនីដោយឧស្ម័នធម្មជាតិ និងពន្លឺព្រះអាទិត្យនៅកម្ពុជាផងដែរ។ ជាមួយគ្នានោះផងដែរ លោក Masahiro Mikami ក៏បានជម្រាបជូនសម្ដេចតេជោលើការគាំទ្ររបស់ជប៉ុនធ្វើយ៉ាងណាជំរុញកំពង់ផែក្រុងព្រះសីហនុឲ្យទៅជាកំពង់ផែស្នូលរបស់ព្រះរាជាណាចក្រកម្ពុជាផងដែរ។

ទាក់ទងទៅនឹងវិស័យកិច្ចសហប្រតិបត្តិការក្នុងតំបន់ ជាពិសេសកិច្ចសហប្រតិបត្តិការលើវិស័យអាស៊ាន លោក Masahiro Mikami បានបញ្ជាក់ថា ជប៉ុនបានផ្ដល់រថយន្តមួយចំនួនជូនដល់ក្រសួងការបរទេស និងផ្តល់នូវសម្ភារៈមួយចំនួនដែរ ហើយជប៉ុនក៏នឹងត្រៀម ផ្ដល់នូវកិច្ចសហប្រតិបត្តិការលើការគាំទ្រដល់កម្ពុជា ធ្វើយ៉ាងណាឲ្យកម្ពុជាទទួលបាននូវភាពជោគជ័យក្នុងនាមជាប្រធានអាស៊ាននាពេលខាងមុខ។

លោក Masahiro Mikami បានគោរពរាយការណ៍ជូនសម្ដេចតេជោអំពីលទ្ធផលនៃកិច្ចសហប្រតិបត្តិការរវាងកម្ពុជា និងជប៉ុន ដែលក្នុងនោះមានលើវិស័យសុខាភិបាល ដែលជប៉ុនបានផ្ដល់វ៉ាក់សាំង Astrazeneca មកដល់កម្ពុជាហើយចំនួន៣០ម៉ឺនដូស និងការត្រៀមផ្ដល់ជំនួយដល់កម្ពុជាយើងជាបន្តទៀតដែលនឹងត្រូវចុះហត្ថលេខានៅពេលខាងមុខនេះ ដែលមានទឹកប្រាក់ប្រមាណជា១៤៥លានដុល្លារសហរដ្ឋអាមេរិក។ ទាក់ទងទៅនឹងវិស័យការពារជាតិ លោកថា ឆ្នាំ២០២២ គឺជាខួប ៣០ឆ្នាំ នៃប្រតិបត្តិការរក្សាសន្តិភាព(PKO) ហើយជប៉ុននឹងត្រៀមបញ្ជូននាវាស្វ័យការពារជើងទឹកមកចុះចតនៅកម្ពុជា នៅកំពង់ផែរាម ហើយក៏នឹងអញ្ជើញឯកឧត្តម ហ៊ុន ម៉ាណែត ទៅទស្សនកិច្ចផ្លូវការនៅប្រទេសជប៉ុនផងដែរ។

លោកជម្រាបជូនយ៉ាងដូច្នេះ នៅព្រឹកនេះ ក្នុងឱកាសជួបពិភាក្សាការងារជាមួយសម្តេចតេជោនាយករដ្ឋមន្ត្រី នៅភូមិគ្រឹះក្រុងតាខ្មៅ។

សម្ដេចហ៊ុន សែន បានថ្លែងអំណរគុណចំពោះរាជរដ្ឋាភិបាល និងប្រជាជនជប៉ុន ដែលបានជួយដល់កម្ពុជានារយៈពេលកន្លងមក ជាពិសេសថ្មីៗនេះដែលបានជួយលើការផ្ដល់វ៉ាក់សាំងកូវីដ១៩ មកដល់កម្ពុជា និងជំនួយដទៃទៀតជាបរិក្ខាផ្សេងៗ ដើម្បីប្រយុទ្ធប្រឆាំងជំងឺកូវីដ១៩។ សម្ដេចតេជោក៏បានថ្លែងអំណរគុណផងដែរចំពោះការផ្ដល់ជារថយន្ត ការផ្ដល់ជាសម្ភារៈ កិច្ចសហប្រតិបត្តិការក៏ដូចជាការគាំទ្រដើម្បីធ្វើយ៉ាងណាឱ្យកម្ពុជាទទួលបាននូវភាពជោគជ័យនៃកិច្ចប្រជុំអាស៊ាននាពេលខាងមុខ។

ចំពោះការអញ្ជើញលោក ហ៊ុន ម៉ាណែត ទៅធ្វើទស្សនកិច្ចផ្លូវការនៅប្រទេសជប៉ុន និងការចូលចតនូវនាវាស្វ័យការពារជើងទឹករាមនៅកម្ពុជា សម្ដេចតេជោនាយករដ្ឋមន្ត្រី សូមស្វាគមន៍ និងបានមានប្រសាសន៍ថា ក្នុងខួប៣០ឆ្នាំ នៃប្រតិបត្តិការរក្សាសន្តិភាព(PKO) នៅឆ្នាំ២០២២ ខាងមុខនេះ យើងគប្បីណាធ្វើខួបនេះឱ្យក្លាយទៅជាការពង្រឹង ពង្រីកកិច្ចសហប្រតិបត្តិការរវាងប្រទេសទាំងពីរលើវិស័យការពារជាតិ។

ទាក់ទងទៅនឹងបំណងមកវិនិយោគរបស់ ក្រុមហ៊ុនតូយ៉ូតា មកកាន់ប្រទេសកម្ពុជា ក៏ដូចជាក្រុមហ៊ុនផលិតអគ្គិសនី និងការគាំទ្រកំពង់ផែក្រុងព្រះសីហនុរបស់កម្ពុជា សម្ដេចតេជោនាយករដ្ឋមន្ត្រី បានស្វាគមន៍ និងសូមឱ្យបន្តធ្វើការងារនេះជាមួយនឹងស្ថាប័នពាក់ព័ន្ធជាបន្តបន្ទាប់ទៀត៕SRP

ខេត្តសៀមរាប៖លោក ង៉ាន់ ភិរុណ អភិបាលរងខេត្ត និងជាប្រធានក្រុមការងារទី៥ ទទួលបន្ទុកស្រុកពួក បានថ្លែងថា ការដាំស្តារព្រៃលិចទឹកឡើងវិញនេះ គឺធ្វើឡើងដើម្បីកាត់បន្ថយនូវការបាត់បង់និងរិចរឹលព្រៃឈើ លើតំបន់នេះដែលមានសភាពរិចរឹល ឬក៏បាត់បង់ព្រៃនាពេលកន្លងមក។

លោក ក៏បានអំពាវនាវ ដល់ប្រជាពលរដ្ឋ ជាពិសេសអាជ្ញាធរមូលដ្ឋាន ឃុំ ស្រុក អោយជួយថែរក្សារ ការដាំស្តាកូនឈើប្រភេទព្រៃឈើលិចទឹកនេះ អោយលូតលាស់បានល្អ សម្រាប់
ជាប្រយោជន៍រួមទៅអនាគត។ ម្យ៉ាងទៀត ការដាំកូនឈើទាំងនេះមានសារៈសំខាន់ខ្លាំងណាស់ សម្រាប់ជីវៈចម្រុះ និងត្រីដែលត្រូវការនូវជំរកសម្រាប់ពងកូន។ ដូចនេះសូមបងប្អូនប្រជាពលរដ្ឋចូលរួមថែរក្សា ការពារ ដើម្បីទុកជាប្រយោជន៍ រួមសម្រាប់កូនចៅជំនាន់ក្រោយ។SRP

លោក មានប្រសាសន៍យ៉ាងដូច្នេះ ក្នុងឱកាសអញ្ជើញ ដឹកនាំមន្ត្រីដាំកូនឈើចំនួន២ពាន់ដើម ដែលជាប្រភេទព្រៃឈើលិចទឹក ដើម្បីស្តារឡើងវិញ លើផ្ទៃដី២ហិតា ក្នុងតំបន់៣ នៃភាគខាងជើងបឹងទន្លេសាប នៅដែនសហគមន៍សសរស្តម្ភ ស្រុកពួក ខេត្តសៀមរាប នៅថ្ងៃទី២៧ ខែធ្នូ ម្សិលមិញ៕SRP

ខេត្តសៀមរាប៖មន្ត្រីមន្ទីរអប់រំយុវជន និង កីឡាខេត្ត បានឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិទូទាំងខេត្តសៀមរាប ឆ្នាំសិក្សា២០២០.២០២១នេះ មានចែកចេញជា ១២មណ្ឌលប្រឡង មាន ៣៥៧បន្ទប់ ដែលមានសិស្សប្រឡងសរុប ៨ពាន់៨៣២នាក់ ស្រី៥ពាន់៣៨នាក់ ក្នុងនោះវិទ្យាសាស្ត្រពិត មាន៤មណ្ឌល មាន១១២បន្ទប់ ចំនួន២ពាន់៧៥៦ នាក់ ស្រី ១ពាន់៧៧១នាក់ និង វិទ្យាសាស្ត្រសង្គមមាន៨មណ្ឌល មាន២៤៥បន្ទប់ មានចំនួន៦ពាន់៧៦នាក់ ស្រី៣ពាន់២៦៧នាក់។ ម៉្យាងទៀតវិញ្ញាសារប្រឡង មាន ១០មុខវិជ្ជា គឺ គណិតវិទ្យា , ភាសាខ្មែរ ,គីមីវិទ្យា ភូមិវិទ្យា , ប្រវត្តិវិទ្យា , ពលរដ្ឋវិទ្យា , ផែនដីវិទ្យា , រូបវិទ្យា , ជីវៈវិទ្យា និង ភាសារបរទេស។

សូមជម្រាបថាអភិបាលខេត្តសៀមរាប លោក ទៀ សីហា នៅព្រឹកមិញនេះបានអញ្ជើញកាត់បើកវិញ្ញាសារការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ។

អាជ្ញាធរខេត្តបានឲ្យដឹងថា ការប្រឡងនេះ ជាការវាស់ស្ទង់នូវកម្រិត នៃចំណេះដឹងរបស់ ក្មួយៗ ដែលត្រូវបានបញ្ចប់ការសិក្សានៅ មធ្យមសិក្សាទុតិយភូមិ និង ឈានចូលទៅសិក្សាបន្តនៅមហាវិទ្យាល័យ សកលវិទ្យាល័យផងដែរ។ ម៉្យាងទៀតសូមបេក្ខជនទាំងអស់ គោរពឲ្យបាននូវអង្គការវិន័យផ្ទៃក្នុង នៅពេលប្រឡងឲ្យបានល្អ ដើមី្បធានានូវគុណភាព នៃការបណ្តុះបណ្តាល ធនធានមនុស្ស ដែលមានក្មួយៗបេក្ខជនទាំងនេះហើយ ដែលជាទំពាំងស្នងឬសី្ស នៃប្រទេសជាតិទៅថ្ងៃអនាគត៕SRP

ខេត្តកំពង់ចាម៖អភិបាល​ខេត្ត​ បាន​ប្រាប់លោកស្រីប្រធាន​មន្ទីរ​ ដែល​ទើប​ទទួល​បាន​ការ​ប្រគល់​ភារកិច្ច​ថ្មី​ ត្រូវ​ខិតខំ​បំពេញ​ការងារ​ឲ្យ​អស់​ពី​សមត្ថភាព​ លទ្ធភាព​ ទេពកោសល្យ​ ការ​ប៉ិនប្រសប់​ និង​គំនិត​ច្នៃប្រឌិត​រស់​រវើក​ ក្នុង​ស្មារតី​យក​ចិត្ត​ទុកដាក់​ ​លេីការ​​ដឹកនាំ​ និង​ភាពទទួល​ខុសត្រូវ​ខ្ពស់​ផងដែរ​។ ​

លោក​ អ៊ុន​ ចាន់ដា​ អភិបាលខេត្តកំពង់ចាម ​បានលេីក​ឡើង​ថា​ បច្ចុប្បន្ននេះ​ រាជរដ្ឋាភិបាល​កម្ពុជា​ បាន​កំពុង​កំណែទម្រង់​ស៊ី​ជម្រៅ​គ្រប់​ជ្រុងជ្រោយ​នោះ​ ក្នុង​នាម​ជា​ថ្នាក់​ដឹកនាំ​មន្ទីរ​ជំនាញ​ ត្រូវ​មាន​ការ​ធានា​រ៉ាប់រង​នូវតួរនាទី​ និង​ភារកិច្ច​ស្នូល​របស់​អង្គភាព​ គឺជា​ប្រការ​សំខាន់​ ដែល​ត្រូវ​យក​ចិត្ត​ទុកដាក់​ និង​បំពេញ​តួនាទី​ ភារកិច្ច​ ឲ្យ​បាន​ខ្ជាប់ខ្ជួន​គ្រប់​ពេល​វេលា​ និង​ហ្មត់ចត់​បំផុត​។

លោក អ៊ុន​ ចាន់ដា​ បាន​ថ្លែង​ថា​ ពេល​ធ្វើ​ជា​ថ្នាក់ដឹកនាំ​ ​ជា​មេ​គេ​ហើយ​ គឺពិត​ជាមាន​អម្រែក​ធ្ងន់​ណាស់​ ដូច្នេះ​ត្រូវ​ទាមទារ​ឲ្យ​​មានសិល្បៈ​​នៃ​ការ​ចែករំលែក​ ទេីប​មាន​សាមគ្គីភាព​ផ្ទៃក្នុង​​ ព្រោះ​ថា​ការ​យកចិត្ត​ទុកដាក់​ចំពោះ​មន្ត្រី​ក្រោម​ឱវាទ​ គឺជា​គន្លឹះដ៏​សំខាន់​​ធ្វើ​ឲ្យ​មន្ត្រី​រាជការ​​គោរព​ និង​មាន​ស្មារតី​ចូលរួម​បំពេញ​ការងារ​ប្រកប​ដោយ​ឆន្ទៈ​ខ្ពស់​។

លោកថ្លែង​យ៉ាង​ដូច្នេះ​ក្នុង​ពិធី​ប្រកាស​តែងតាំងលោកស្រី ស៊ាង វណ្ណលក្ខិណា ​ចូលកាន់​​តំណែងជា​ប្រធាន​មន្ទីរ​កិច្ចការ​នារី​ខេត្តកំពង់ចាម​ នៅព្រឹក​មិញនេះក្រោម​វត្តមាន​ លោកស្រី​​ អ៊ឹង​ កន្ថាផាវី​ រដ្ឋមន្ត្រី​ក្រសួង​កិច្ចការ​នារី​ និង​លោក​ ខ្លូត​ ផន​ ប្រធាន​ក្រុមប្រឹក្សា​ខេត្ត​កំពង់ចាម​៕SRP

ខេត្តកំពង់ចាម​៖លោក​ លី​ ម៉េង​សាន​ ប្រធានមន្ទីរ​អប់រំ​យុវជន​និង​កីឡា​ខេត្ត​កំពង់ចាម​ បានឲ្យដឹងថា​ សិស្សានុសិស្ស​ដែលរៀនថ្នាក់ទី១២​ ហេីយត្រូវប្រលងបាក់ឌុបឆ្នាំ២០២១នេះ​ សម្រាប់​ទូទាំង​ខេត្ត មានចំនួនជាង៧ពាន់នាក់ ដែលចំនួនបេក្ខជនដែលបានដាក់ពាក្យប្រលងទុតិយភូមិឆ្នាំ២០២១នេះ​ មានការថយចុះច្រេីន​ បេីប្រៀបធៀបទៅនឹងឆ្នាំកន្លងទៅ​ ដោយមណ្ឌលប្រលងក្នុងខេត្តកំពង់ចាម​ បាន​បែងចែកជា២ផ្នែក​ ក្នុងនោះមានថ្នាក់វិទ្យាសាស្ត្រមានចំនួនបេក្ខជន២៨៣០នាក់​ ដែលមាន៥មណ្ឌល​ ស្មេីនឹង១១៥បន្ទប់​ និងថ្នាក់វិទ្យាសាស្ត្រសង្គម​ មានចំនួន៤២៨១នាក់​ ដែលមាន៧មណ្ឌល​ ស្មេីនឹង១៧២បន្ទប់ផងដែរ​។

សូមជម្រាបថានៅព្រឹកមិញអភិបាល​ខេត្តកំពង់ចាម​ លោក​ អ៊ុន​ ចាន់ដា​​ បានអញ្ជើញកាត់បើកវិញ្ញាសារប្រឡងមធ្យមសិក្សាទុតិយភូមិ​ នាសម័យប្រឡង ថ្ងៃទី២៧​ ខែធ្នូ​ ឆ្នាំ​២០២១នេះ​​ នៅវិទ្យាល័​ ព្រះសីហនុ​​ ស្ថិតក្នុង​ក្រុង​កំពង់ចាម​។

ក្នុងឱកាស​នោះ​ លោក អ៊ុន​ ចាន់ដា​ បានជូនពរដល់បេក្ខជនទាំងអស់ ឲ្យ​បានទទួលលទ្ធផលជាប់និងជោគជ័យ ហើយ​កុំភ័យខ្លាចអ្វីឡើយ​ ត្រូវ​តាំង​អារម្មណ៍​ គិតតែខិតខំប្រឹងប្រែងសរសេរដើម្បីយកនិទ្ទេសល្អ​ ដើម្បីឈានដល់ទទួលបានអាហាររូបករណ៍ និងបន្តទៅរៀននៅមហាវិទ្យាល័យបន្ថែមទៀត៕SRP

ខេត្តត្បូងឃ្មុំ​៖លោក ជាម ច័ន្ទសោភ័ណ អភិបាលខេត្តត្បូងឃ្មុំ បានថ្លែងថា ការប្រឡងបាក់ឌុបឆ្នាំនេះ ក៏មិនខុសពីឆ្នាំមុនៗដែរ នីតិវិធីនៃការរៀបចំទាំងអស់ រឹតតែមានការប្រុងប្រយ័ត្ន និងតឹងរឹងបំផុត ដោយអ្នកចេះ គឺជាប់។
លោកថ្លែងបែបនេះ ក្នុងឱកាសដែលលោក និងលោកស្រី សឿ សុជាតា ប្រធានគណៈមេប្រយោគទូទាំងប្រទេស និងជាអនុរដ្ឋលេខាធិការក្រសួងអប់រំ យុវជន និងកីឡា អញ្ជើញកាត់បើកវិញ្ញាសារប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា ២០២០-២០២១ នៅមណ្ឌលសាកលវិទ្យាល័យ ហេង សំរិន ត្បូងឃ្មុំ ស្ថិតនៅឃុំស្រឡប់ ស្រុកត្បូងឃ្មុំ នៅព្រឹកមិញនេះ។

លោក ជាម ច័ន្ទសោភ័ណ បានបង្ហាញហឹបវិញ្ញាសារ ជូនដល់បេក្ខជនប្រឡង ដោយពិនិត្យភាពបិទជិត មានបិទស្កុត និងត្រាស្រោមប្រធានវិញ្ញាសារ នៅចំពោះមុខបេក្ខជន ដើម្បីធានាបានថា ការប្រឡងប្រព្រឹត្តទៅតាមគោលការណ៍ច្បាប់ យុត្តិធម៌ និង តម្លាភាព។

អភិបាលខេត្តបានផ្តាំផ្ញើដល់ក្មួយៗទាំងអស់ ត្រូវថែរក្សាសុខភាពឲ្យបានល្អ ជាពិសេសនៅថ្ងៃប្រឡងបាក់ឌុប និងខិតខំធ្វើវិញ្ញាសារប្រឡងឲ្យអស់ពីសមត្ថភាព ព្រមទាំងគោរតាមបទបញ្ជាផ្ទៃក្នុងនៅពេលប្រឡងឲ្យបានល្អ ដើម្បីថែរក្សាសន្តិសុខសុវត្ថិភាព និងរក្សាសណ្ដាប់ធ្នាប់របៀបរៀបរយពេលប្រឡង ពិសេសទទួលបានជោគជ័យក្នុងការប្រឡង សាកសមជាទំពាំងស្នងឬស្សី ជាសសរទ្រូងប្រទេសជាតិសម្រាប់ថ្ងៃអនាគត។

បើយោងលើរបាយការណ៍របស់លោក អុិនពៅសម្បត្តិ ប្រធានមន្ទីរអប់រំយុវជននិងកីឡាខេត្តត្បូងឃ្មុំ  បានឲ្យដឹងថាខេត្តត្បូងឃ្មុំ មានមណ្ឌលប្រឡងចំនួន ៩មណ្ឌល ក្នុងនោះ មណ្ឌលថ្នាក់វិទ្យាសាស្ត្រចំនួន៣មណ្ឌល និងថ្នាក់សង្គមចំនួន០៦មណ្ឌល គិតជាបន្ទប់មានចំនួន ១៧២បន្ទប់ និងមានបេក្ខជនដែលត្រូវចូលរួមប្រឡងមានចំនួន៤២៧៩នាក់​៕SRP

ខេត្តកំពង់ចាម​៖លោកស្រី​ តោ ពិឡា ទីប្រឹក្សាក្រសួងពាណិជ្ជកម្ម និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំបឹងណាយ ស្រុកព្រៃឈរ ខេត្តកំពង់ចាម នៅថ្ងៃទី២៦ ខែធ្នូ ម្សិលមិញ បានចែកភួយជូនប្រជាពលរដ្ឋចំនួន៦ភូមិ និង​ផ្ដល់​ថវិកា​មួយចំនួន​ជូន​ស្ត្រី​​ទេីប​សម្រាល​កូន​ផងដែរ។

ឆ្លៀតក្នុងឱកាសនោះដែរ​ លោកស្រី​ តោ ពិឡា បាន​លេីកឡេីងថា​ ជារៀងរាល់ឆ្នាំនៅពេលធ្លាក់ខ្យល់ត្រជាក់ ប្រជាពលរដ្ឋមានការឆ្លងនូវជំងឺផ្តាសាយ ក៏ប៉ុន្តែឆ្នាំកន្លងមក ក៏ដូចឆ្នាំនេះ កម្ពុជាក៏ដូចជាពិភពលោកទាំងមូល មានការគំរាមកំហែងដោយជំងឺកូវីដ-១៩ ហើយនៅពេលចុះត្រជាក់ប្រជាជនយើងអាចប្រឈមនឹងជីងឺផ្តាសាយ ។ ដូច្នេះយើងត្រូវការគ្រប់គ្រងជំងឺស្តាសាយ និងជំងឺកូវីដ-១៩ទាំងអស់គ្នា។ តាមការព្យាករណ៍កម្ពុជា មានការចុះត្រជាក់ជាងឆ្នាំកន្លងមក ទើបសម្តេចតេជោបានធ្វើការណែនាំដល់អាជ្ញាធរមូលដ្ឋានយកអាវរងារ ភួយ ចែកជូនចាស់ជរា និងប្រជាពលរដ្ឋក្រីក្រនៅតាមមូលដ្ឋាន ដើម្បីទប់ទល់នឹងភាពត្រជាក់ ហើយនេះជាការគិតគូរគ្រប់ជ្រុងជ្រោយរបស់ សម្តេចតេជោ ជូនចំពោះចាស់ជរា និងប្រជាពលរដ្ឋក្រីក្រនៅទូទាំងប្រទេស ក៏ជាការឆ្លុះបញ្ចាំងពីការយកចិត្តទុកដាក់ និងដោះស្រាយឆ្លើយតបបានទាន់ពេលវេលា។

លោកស្រី​ បានកោតសរសើរអាជ្ញាធរឃុំបឹងណាយ ដែលតែងតែគិតគូរពីការងារសន្តិសុខ សុវត្ថិភាព និងបរិស្ថាននៅមូលដ្ឋាន ជាពិសេស គឺសុខទុក្ខរបស់បងប្អូនប្រជាពលរដ្ឋក្រីក្រ និងចាស់ជរានៅក្នុងមូលដ្ឋាន និងឈ្វេងយល់ពីការលំបាក ការខ្វះខាតរបស់លោកយាយ លោកតា គ្រប់ពេលវេលា សូមលោកតា លោកយាយ បន្តគាំទ្រដល់ពួកគាត់ ដើម្បីគាត់មានលទ្ធភាពបម្រើបងប្អូនបន្តទៀត។

គួរ​បញ្ជាក់​ថា​ អំណោយភួយផ្តល់ជូនប្រជាពលរដ្ឋក្រីក្រ និងចាស់ជរាគ្មានទីពឹងចំនួន ៧០នាក់ មកពី៦ភូមិ ក្នុងឃុំបឹងណាយ និងជូនថវិកាដល់ស្ត្រីទើបសម្រាលកូនចំនួន ១៣នាក់ និងជូនគ្រួសារមរណៈភាព ២គ្រួសារ ដោយក្នុង១គ្រួសារ ទួលថវិកា ១០០.០០០រៀល ផងដែរ​៕SRP

ភ្នំពេញ៖នាយករដ្ឋមន្ត្រីហ៊ុន សែន បានអះអាងថាទោះបីជាពិភពលោកកំពុងមានវត្តមានមេរោគកូវីដ១៩ បំប្លែងថ្មី «អូមីក្រុង» ក៏កម្ពុជាមិនមានការបារម្ភដែរ។

នាយករដ្ឋមន្ត្រីបានថ្លែងថា ចាប់តាំងពីផ្ទុះជំងឺកូវីដ១៩ រាជរដ្ឋាភិបាលកម្ពុជាបានកំណត់យ៉ាងច្បាស់ថា មានតែវ៉ាក់សាំងទេ ទើបអាចយកឈ្នះជំងឺនេះ។

បើតាមនាយករដ្ឋមន្ត្រីកម្ពុជារកឃើញវិជ្ជមានជំងឺកូវីដ១៩ ចំនួន១៥ករណី ដែល១៥ករណីនេះ ជាករណីនាំចូល ហើយសុទ្ធសឹងតែជាមេរោគបំប្លែងថ្មី «អូមីក្រុង»។
នាយករដ្ឋមន្ត្រី បានអំពាវនាវដល់ប្រជាពលរដ្ឋកុំមានការភិតភ័យជាមួយមេរោគបំប្លែងថ្មីអូមីក្រុង ប៉ុន្តែត្រូវបន្តប្រុងប្រយ័ត្នដោយអនុវត្តវិធានការសុខាភិបាលឲ្យបានខ្ជាប់ខ្ជួនជានិច្ច។

នាយករដ្ឋមន្ត្រីថ្លែងថាយ៉ាងដូច្នេះនៅយប់ថ្ងៃអាទិត្យ ទី២៦ ខែធ្នូ ឆ្នាំ២០២១ ក្នុងឱកាសអញ្ជើញទទួលវ៉ាក់សាំង Pfizer ជំនួយរបស់រដ្ឋាភិបាលអូស្រ្តាលីជាង ២.៣លានដូស នៅព្រលានយន្តហោះអន្តរជាតិភ្នំពេញ​។

នាយករដ្ឋមន្ត្រីបាន ថ្លែងអំណរគុណដល់រដ្ឋាភិបាល និងប្រជានអូស្រ្តាលី ដែលបានផ្តល់ជំនួយវ៉ាក់សាំងដល់ប្រទេសកម្ពុជានាពេលនេះ។ សម្តេចតេជោ បានលើកឡើងថា វ៉ាក់សាំងដែលដឹកមកដល់ប្រទេសកម្ពុជានៅរាត្រីថ្ងៃនេះ មានចំនួន ៧៨៣,០០០ដូស ហើយចំនួន ១,៥៦៧,៥៣០ដូសទៀត នឹងដឹកមកដល់ថ្ងៃទី២៨ ខែធ្នូ៕SRP