ខេត្តសៀមរាប៖បុរសជាងម៉ាស៊ីនត្រជាក់ ត្រូវបានសមត្ថកិច្ចឃាត់ខ្លួន នៅរសៀលថ្ងៃទី១ ខែកុម្ភៈម្សិលមិញ ស្ថិតក្នុងសង្កាត់សៀមរាប ក្រុងសៀមរាប ករណី ប៉ុនប៉ងរំលោភសេពសន្ថវះលើក្មួយស្រីបង្កើត។ ជនសង្ស័យ ឈ្មោះ កុល សាម៉ៃ អាយុ២៨ឆ្នាំ មុខរបរជាងម៉ាស៊ីនត្រជាក់ រស់នៅភូមិឃុំខាងលើ។ ចំណែកជនរងគ្រោះឈ្មោះ ច.ណ ភេទស្រី អាយុ ១៤ឆ្នាំ។

ប្រភពពីសមត្ថកិច្ចបានឲ្យដឹងថានៅវេលាម៉ោង១៧ និង៣០នាទីថ្ងៃទី៣០ ខែមករា ឆ្នាំ២០២២ ខណៈជនរងគ្រោះកំពុងនៅផ្ទះម្នាក់ឯង ដោយម្តាយ និងបងស្រីបានចេញទៅក្រៅអស់ ជនសង្ស័យ ពាក់អាវភ្លៀង និងពាក់មួកក្រណាត់គ្របមុខជិតសល់តែគ្រាប់ភ្នែក បានដើរចូលមកចាប់ជនរងគ្រោះប៉ុនប៉ងរំលោភ ដោយដាល់ពោះជនរងគ្រោះចំនួន២ដៃបណ្តាលឲ្យដួល។ ជនសង្ស័យក៏ចាប់ស្រាតខោក្នុងរបស់ជនរងគ្រោះ ពេលនោះជនរងគ្រោះបានរើបំរាស់។ ជនសង្ស័យបានយកម្ជុលចាក់មកលើជនរងគ្រោះ២ម្ជុល( ដៃស្តាំ១ម្ជុលនិងស្មាស្តាំ១ម្ជុល) ជនរងគ្រោះបានសុំអង្វរដោយដឹងថាជនសង្ស័យ គឺជាពូរបស់ខ្លួន ទើបជនសង្ស័យឈប់ធ្វើសកម្មភាពគេចខ្លួនតែម្តង។

បុរសរូបនេះបានឆ្លើយសារភាពថា ខ្លួនពិតជាបានធ្វើសកម្មភាពពិតប្រាកដមែន ប៉ុន្តែរូបខ្លួនមិនបានយកម្ជុលចាក់ជនរងគ្រោះនោះទេ គ្រាន់តែប្រើហិង្សាប៉ុនប៉ងរំលោភ ដោយឃើញក្មួយសុំអង្វរទើបឈប់តែម្ដង។ ក្នុងនោះកន្លងមករូបគេក៏ធ្លាប់ប្រើប្រាស់សារធាតុញៀនទើបតែឈប់ប្រើផងដែរ។ ក្រោយពីបានសាកសួរសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីចាត់ការតាមផ្លូវច្បាប់៕SRP

ភ្នំពេញ៖នៅទីបំផុតអនុប្រធានសាលាដំបូងរាជ ធានីភ្នំពេញ ជាចៅក្រមស៊ើបសួរលោក គី ម៉ានេរ៉ា នៅពីរសៀលថ្ងៃទី២៩ ខែមករា ឆ្នាំ២០២២ បានសម្រេចចេញដីកាឃុំខ្លួន មន្ត្រីអង្គភាពប្រឆាំងអំពើពុករលួយ លោកទូច ទិត្យវឌ្ឍនា ភេទប្រុស អាយុ២៧ ឆ្នាំ មុខរបរ ជាមន្ត្រីនាយក ដ្ឋានកិច្ចការគតិយុត្ត ពាក្យបណ្តឹង នឹងអន្តរជាតិ នៃអង្គភាពប្រឆាំងអំពើពុករលួយ មានអាសយដ្ឋាននៅរាជធានីភ្នំពេញ ដាក់ពន្ធនាគារជាបណ្តោះអាសន្ន ពីបទ.វិតិក្រម ពាក់ពន្ធទៅនឹងអំពើពុករលួយ។

ការឃុំខ្លួនបុរសរូបនេះ លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញបានប្រាប់អ្នកសារព័ត៌មានឲ្យដឹងថា រឿងនេះតំណាងអយ្យការបានបើកការស៊ើបសួរចប់ នឹងបានបញ្ជូនទៅចៅក្រមស៊ើបសួររួចរាល់ហើយ ដោយចោទប្រកាន់ពីបទ.វិតិក្រម តាមមាត្រា ៥៩២ និងមាត្រា ៥៩៣ នៃក្រមព្រហ្មទណ្ឌ ។

សូមជម្រាបថា កាលពីព្រឹកថ្ងៃទី២៩ ខែមករា ឆ្នាំ២០២២ អង្គភាពប្រឆាំងអំពើពុករលួយបានបញ្ជូនមន្រ្តីរបស់ខ្លួនលោក ទូច ទិត្យវឌ្ឍនា ទៅកាន់សាលាដំបូងរាជធានីភ្នំពេញ ពាក់ពន្ធថាបានប្រព្រឹត្តអំពើពុករលួយ ដែលសំណុំរឿងនេះបានស្ថិតនៅលោក អ៊ុំ សុភក្ត ព្រះរាជអាជ្ញារង (ប្រចាំការ) បើកការស៊ើបសួរ ក្រោយពីសាកសួរតំណាងអយ្យការបានចោទប្រកាន់ជនសង្ស័យជាផ្លូវការ រួចបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន ។

សូមបញ្ជាក់ថា កាលពីថ្ងៃទី២៨ ខែមករា ឆ្នាំ២០២២ អង្គភាពប្រឆាំងអំពើពុករលួយ បានចេញសេចក្តីប្រកាសព័ត៌មាន របស់អ្នកនាំពាក្យអង្គភាពប្រឆាំងអំពើពុករលួយ ស្តីពីការបញ្ជូនខ្លួនជនសង្ស័យឈ្មោះ ទូច ទិត្យវឌ្ឍនា មន្ត្រីនាយកដ្ឋានកិច្ចការគតិយុត្ត ពាក្យបណ្តឹង នឹងអន្តរជាតិ នៃអង្គភាពប្រឆាំងអំពើពុករលួយ។ សេចក្តីប្រកាសព័ត៌មានមានខ្លឹមសារថា អង្គភាពប្រឆាំងអំពើពុករលួយ ហៅថា (ACU) សូមជម្រាបជូនសាធារណជន នឹងអ្នកសារព័ត៌មានជ្រាបថា ក្រុមស៊ើបអង្កេតផ្ទៃក្នុង នៃអង្គភាពប្រឆាំងអំពើពុករលួយ បានធ្វើការប្រមូលព័ត៌មាន ភស្តុតាង ជាបន្តបន្ទាប់ ព្រមទាំងស្តាប់ចម្លើយ របស់ឈ្មោះ ទូច ទិត្យវឌ្ឍនា ភេទប្រុស អាយុ២៧ ឆ្នាំ មន្ត្រីនាយកដ្ឋានកិច្ចការគតិយុត្ត ពាក្យបណ្តឹង អន្តរជាតិ រួចមក អង្គភាពប្រឆាំងអំពើពុករលួយបានរកឃើញថា ជនរូបនេះបានជាប់សង្ស័យ បានប្រព្រឹត្តល្មើសដែលប្បញ្ញាតក្នុងមាត្រា៥៩២(បទវិតិក្រម)នៃក្រមព្រហ្មទណ្ឌនឹងមាត្រា៣២ នៃច្បាប់ស្តីពីការប្រឆាំងអំពើពុករលួយ។

អង្គភាពប្រឆាំងអំពើពុលរលួយបានបញ្ជាក់ថា ជនសង្ស័យឈ្មោះ ទូច ទិត្យវឌ្ឍនា បានប្រើប្រាស់វិធីនានា ក្នុងពេលដែលខ្លួនកំពុងទទួលខុសត្រូវទទួលពិនិត្យពាក្យបណ្តឹង ដើម្បីរកប្រយោជន៍ផ្ទាល់ខ្លួនខុសច្បាប់ ហើយពេលដែលខ្លួនត្រូវបញ្ឍរជើងផ្អាកការងារហើយក្តី ក៏ឈ្មោះនេះមិនបានបញ្ឍប់សកម្មភាពខុសច្បាប់របស់ខ្លួន ហើយទាញយកផលប្រយោជន៍ពីពាក្យប្តឹង ដែលខ្លួនមិនទទួលបន្ទុកទៀតផង។ អង្គភាពប្រឆាំងអំពើពុករលួយ សូមលើកទឹកចិត្តដល់សាធារណជន ចូលរួមផ្តល់ព័ត៌មានមកអង្គភាពប្រឆាំងអំពើពុករលួយជាបន្ទាន់ ក្នុងករណីដែលមានជនខិលខូចណាម្នាក់ អះអាងថាខ្លួនអាចប្រប្រាស់តួនាទីរបស់ខ្លួនជាមន្ត្រី ACU ដើម្បីជួយសម្រួលដល់កិច្ចការល្មើសច្បាប់ណាមួយ៕

ខេត្តកំពង់ចាម​៖លោក អ៊ុន ចាន់ដា អភិបាលខេត្តកំពង់ចាម​ នៅព្រឹក​មិញនេះ​ បានអញ្ជើញជួបពិភាក្សា ការងារជាមួយព្រះសាកលវិទ្យាធិការ​ និង​គណៈគ្រប់គ្រង​ នៃពុទ្ធិសាកលវិទ្យាល័យសម្តេចតេជោ ហ៊ុន សែន​ ស្តីពី​ការ​បណ្តុះបណ្តាល​ និង​ការ​សាងសង់​ ដេីម្បី​ស្នេីសុំ​គោលការណ៍​ប្រារព្ធ​ពិធី​បេីក​សម្ពាធ​អគារ​រដ្ឋបាល​ថ្មី​ ១ខ្នង​ ដែលមានទីតាំងស្ថិតនៅក្នុងភូមិជ្រោយថ្ម សង្កាត់បឹងកុក ក្រុងកំពង់ចាម​ នាពេល​ខាងមុខនេះ​។

លោក​ អ៊ុន​ ចាន់ដា​ បាន​ធ្វេីការ​កោតសរសើរ​ និង​វាយតម្លៃ​ខ្ពស់​ ចំពោះ​ព្រះសាកលវិទ្យាធិការ​ និង​គណៈគ្រប់គ្រង​ នៃពុទ្ធិសាកលវិទ្យាល័យ សម្តេចហ៊ុន សែន​ ដែល​បាន​រួម​សាមគ្គី​គ្នា​​ ក្នុង​ការ​ខិតខំ​គៀងគរ​ស្វែងរក​សប្បុរសជន​ ដេីម្បី​សាងសង់​​អគារ​រដ្ឋបាល​ថ្មី​១ខ្នង​​ ដែល​មាន​បណ្ដោយ​ប្រវែង​ ១៨ម៉ែត្រ​ ទទឹង​ប្រវែង​១៦ម៉ែត្រ​ កម្ពស់​៤ជាន់​ ក្នុង​តម្លៃ​ប្រមាណ​ជាជា​ង​៦៤ម៉ឺន​ដុល្លារ​ សម្រាប់​ឲ្យ​​ព្រះមន្ត្រីសង្ឃ​ និង​មន្ត្រី​រាជការ​ បំពេញ​ការងារ​ប្ប្រចាំថ្ងៃ។

លោកអភិបាលខេត្ត​ ក៏បាន​ឯកភាព​គាំទ្រ​ចំពោះ​ការ​ស្នើ​សុំ​ រៀបចំ​​ប្រារព្ធ​ពិធី​បេីក​សម្ពាធ​ដាក់​ឲ្យ​ប្រេីប្រាស់​ជា​ផ្លូវការ​ នូវអគារ​រដ្ឋបាល​ នៃពុទ្ធិសាកលវិទ្យាល័យសម្តេចហ៊ុន សែន​ ជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន​ រ៉ានី​ ហ៊ុន​ សែន​ ​ដែលទើប​នឹងសាងសង់​រួចរាល់​ជាស្ថាពរ​ ​ក្នុង​អំឡុង​ខែ​វិច្ឆិកា​ ឆ្នាំ​២០២១​ កន្លងទៅនេះ​។

បេីតាមព្រះសាកលវិទ្យាធិការ​ បាន​មានសង្ឃដីកា​ថា​ នៅក្នុងឆ្នាំសិក្សា ២០២១ -២០២២នេះ សាស្ត្រាចារ្យដែលបាននិងកំពុងបង្រៀនសរុបចំនួន ៧៥រូប​ ក្នុងនោះសាស្ដ្រាចារ្យក្របខណ្ឌចំនួន៦រូប​ ហេីយចាប់ពីឆ្នាំសិក្សា២០១៨ ដល់ឆ្នាំសិក្សា២០២១ សមណនិស្សិត និស្សិត ដែលបានសិក្សា និងបានការពារសារណាបញ្ចប់ថ្នាក់បរិញ្ញាបត្រប្រកបដោយជោគជ័យ ដែលនឹងត្រូវទទួលសញ្ញាបត្រនៅពេលសម្ពោធ អគារសិក្សា បណ្ណាល័យ និងអគាររដ្ឋបាល ខាងមុខនេះមានចំនួន ៥៩៤អង្គ/នាក់ ដែលមាន ៣ជំនាន់ ហើយពួក គាត់មានការងារធ្វើគ្រប់ៗគ្នា (៩៩%)។

ព្រះសាកលវិទ្យាធិការ​ បានបញ្ជាក់ថា សមណនិស្សិត និស្សិត ដែលបានសិក្សា និងការពារសារណាបទបញ្ចប់សរុប ទាំងអស់មាន ១០ជំនាន់ (២០១២-២០២១) ស្មើនឹង ៨៨៥រូប ហើយពួកគាត់មានការងារធ្វើ ៩៩% (មន្ត្រីរាជការ ៧០% តាមអង្គការ សមាគម ៦% តាមក្រុមហ៊ុន ១៤% មន្ត្រីកិច្ចសន្យា ៧% បើកអាជីវកម្មផ្ទាល់ខ្លួន ២% និងទៅសិក្សានៅបរទេស ១%)។​ សម្រាប់​ឆ្នាំសិក្សា២០២១-២០២២ នេះ សមណនិស្សិត និស្សិតដែលកំពុងសិក្សាសរុបទាំងអស់ ចំនួន៩៧១ អង្គ/នាក់ ក្នុងនោះថ្នាក់បរិញ្ញាបត្រចំនួន ៨១៩រូប (ព្រះសង្ឃ ៨៦អង្គ ស្រី ៤៧៨រូប) ថ្នាក់ បរិញ្ញាបត្រជាន់ខ្ពស់ ចំនួន១៥២ អង្គ/នាក់ (ព្រះសង្ឃចំនួន៨ អង្គ ប្រុស៦៣ នាក់)​៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រីបានមានប្រសាន៍ថា មានកត្តាសំខាន់ៗចំនួន៤ ដែលបង្កលក្ខណៈសម្រាប់ពលរដ្ឋអាចធ្វើដំណើរកម្សាន្តគ្រប់ទិសទីបាន ដែល កត្តាទាំង៤នោះរួមមាន៖ ទី១ កត្តា សន្តិភាព បើគ្មានសន្តិភាពទេប្រជាពលរដ្ឋគ្មានឱកាសដើរលេងកម្សាន្តគ្រប់ទីកកន្លែងនោះទេ , ទី២ កត្តាហេដ្ឋារចនាសម្ព័ន្ធតភ្ជាប់ ដូចជា មានផ្លូវ មានស្ពាន ស្ទើគ្រប់ទីកន្លែង ដែលបានតភ្ជាប់ពីកន្លែងមួយទៅកន្លែងមួយ ជាបន្តបន្ទាប់ បើមិនមានការតភ្ជាប់ផ្លូវ និងស្ពានទេ គឺយើងមិនអាចឱ្យពលរដ្ឋធ្វើដំណើរកម្សាន្តពីតំបន់មួយ ទៅតំបន់មួយទៀតនោះទេ , ទី៣ គឺកត្តាមធ្យោបាយធ្វើដំណើរ និងដឹកជញ្ជូនកើនឡើង ទាំងមធ្យោបាយដឹកជញ្ជូនរបស់រដ្ឋ និងឯកជន ជាពិសេសមធ្យោបាយដឹកជញ្ជូនឯកជននេះគឺប្រជាពលរដ្ឋ មានទាំងរថយន្ត មានទាំងម៉ូតូ ដែលមានការកើនឡើងជាបន្តបន្ទាប់ផងដែរ ,និងទី៤ កត្តាសេដ្ឋកិច្ចរបស់ប្រជាពលរដ្ឋ មានន័យថា បើប្រជាពលរដ្ឋមិនមានប្រាក់ទេ ពួកគាត់មិនអាចធ្វើដំណើរកម្សាន្តបានឡើយ។

សម្តេចហ៊ុន សែន មានប្រសាសន៍យ៉ាងដូច្នេះ ក្នុងឱកាសអញ្ជើញបើកការដ្ឋានសាងសង់ស្ពានអាកាសថ្មីនៅផ្លូវជាតិលេខ៥ ក្នុងខណ្ឌឫស្សីកែវ នៅថ្ងៃចន្ទ ទី៣១ ខែមករា ឆ្នាំ២០២២នេះ។

សម្តេចតេជោបានមានប្រសាសន៍ថា តាមរយ:ការសាងសង់ស្ពានអាកាសត្រង់ចំណុចនេះ នឹងរួមចំណែកយ៉ាងសំខាន់ ក្នុងការសម្រួលការកកស្ទះចរាចរណ៍ ខណៈដែលតំបន់នេះ កំពុងមានគម្រោងអភិវឌ្ឍន៍ជាច្រើន។

សម្តេចតេជោបានមានប្រសាសន៍រំលឹកថា នយោបាយអភិវឌ្ឍន៍ប្រទេសជាតិយើង គឺនៅតែផ្តោតលើអាទិភាពទាំង៤ គឺ ទឹក , ផ្លូវ ,ភ្លើង និងធនធានមនុស្ស ដែលក្រោយមកយើងបានប្តូរទិសយកការអភិវឌ្ឍធនធានមនុស្ស ជាអាទិភាពនាំមុខវិញ គឺ មនុស្ស ផ្លូវ ទឹក ភ្លើង ដែលអាទិភាពទាំង៤នេះ យើងបានដាក់ចេញតាំងពីក្រោយថ្ងៃរំដោះប្រទេសជាតិមកម្លេះ។

សម្តេចតេជោបានមានប្រសាសន៍ទៀតថា សម្តេចពិតជាមានមោទនភាព និងស្ទើរតែមិនជឿចំពោះការចម្រើនលូតលាស់ក្នុងរាជធានីភ្នំពេញនាពេលបច្ចុប្បន្ននេះ។ នៅថ្ងៃនេះ សម្តេចតេជោនាយករដ្ឋមន្ត្រីបានថ្លែងដោយក្តីមោទភាពចំពោះកំណើននៃការដើរកម្សាន្ត របស់ប្រជាពលរដ្ឋកម្ពុជា ក្នុងរយៈពេលចុងក្រោយនេះជាពិសេស ពេលដែលកូវីដ-១៩មានកាធូរស្រាលនោះ និងក្រោយពេលដែលប្រជាពលរដ្ឋកម្ពុជាយើងបានចាក់វ៉ាក់សាំងកូវីដ-១៩បានច្រើននោះ៕SRP

ភ្នំពេញ៖ប្រសិនមិនមានអ្វីប្រែប្រួលនោះទេ នៅថ្ងៃចន្ទ ទី៣១ ខែមករា ឆ្នាំ២០២២ ស្អែកនេះ  នាយករដ្ឋមន្ត្រីហ៊ុន សែន នឹងអញ្ជើញបើកការដ្ឋានសាងសង់ស្ពានអាកាសថ្មី មួយទៀត ក្នុងរាជធានីភ្នំពេញ ដើម្បីសម្រួល និងរំដោះការកកស្ទះចរាចរណ៍ ដែលកំពុងមានកំណើនយ៉ាងឆាប់រហ័ស។

ស្ពានអាកាសដែលបើកការដ្ឋានសាងសង់ថ្មីនេះ ស្ថិតនៅលើបណ្តោយផ្លូវជាតិលេខ៥ ចំណុចប្រសប់នៃផ្លូវតភ្ជាប់ពីស្ពានខ្សែកាបឫស្សីកែវ ឆ្លងកាត់ទន្លេសាប ដែលតភ្ជាប់រវាងផ្លូវជាតិលេខ៥ និងទីក្រុងរណបជ្រោយចង្វា។ ស្ពានអាកាសនេះ មានបណ្តោយសរុបប្រវែង ៤៨៣ម៉ែត្រ (បណ្តោយស្ពានអាកាស ១៤៥ម៉ែត្រ និងផ្លូវគល់ស្ពានសងខាង ៣៣៨ម៉ែត្រ), មានទទឹង ១៥.៨ម៉ែត្រ។ គ្រោងចំណាយថវិកាសាងសង់ជិត ១០លានដុល្លារអាមេរិក។

គម្រោងស្ពានអាកាសនេះ សាងសង់ដោយក្រុមហ៊ុនវិនិយោគទុនអនិកជនកម្ពុជា (OCIC) ដោយប្រើរយៈពេលប្រមាណ ១៥ខែ។

រាជធានីភ្នំពេញ ដែលត្រូវបានប្រសិទ្ធនាមជាទីក្រុងខ្មោច ក្នុងរបបកម្ពុជាប្រជាធិបតេយ្យ របស់ ប៉ុល ពត និងជាទីក្រុងដ៏ស្ងប់ស្ងាត់បំផុតក្រោយថ្ងៃរំដោះ៧ មករា ឆ្នាំ១៩៧៩នោះ បានប្រែក្លាយជាទីក្រុងដ៏រស់រវើក និងមមាញឹកបំផុតនាពេលបច្ចុប្បន្ន។ ក្នុងរយៈពេលជាង ៤០ឆ្នាំមកនេះ រាជធានីភ្នំពេញ ត្រូវបានពង្រីកផ្ទៃដីជាបន្តបន្ទាប់់ ខណៈប្រព័ន្ធហេដ្ឋារចនាសម្ព័ន្ធ ត្រូវបានកែលំអ និងលើកកម្ពស់កាន់តែល្អប្រសើរ ជាមួយសំណង់អគារពាណិជ្ជកម្ម លំនៅឋានផុសឡើងយ៉ាងព្រោតព្រាតសមជាទីក្រុងដ៏ស៊ីវិល័យ។

ជំរឿនស្ថិតិប្រជាពលរដ្ឋកាលពីឆ្នាំ២០១៩ បានបង្ហាញថា រាជធានីភ្នំពេញ មានប្រជាពលរដ្ឋរស់នៅ ធ្វើការ និងបំពេញការសិក្សារៀនសូត្រសរុបជាង ២លាននាក់។ 

របាយការណ៍ ក៏បានបង្ហាញដែរថា កំណើនយានយន្តក្នុងរាជធានីភ្នំពេញ បានកើនឡើងយ៉ាងឆាប់រហ័សផងដែរ។ បច្ចុប្បន្នចំនួនយានយន្តចរាចរណ៍ ក្នុងរាជធានីភ្នំពេញ មានជាង ២លានគ្រឿង។ ក្នុងនោះរថយន្តមានជាង ៥០ម៉ឺនគ្រឿង និងទោចក្រយានយន្តមានប្រមាណ ២លានគ្រឿង។

កំណើនយានយន្ត កំណើនចរាចរណ៍នេះ បានធ្វើឱ្យរាជធានីភ្នំពេញ ជួបបញ្ហាកកស្ទះខ្លាំងលើការធ្វើដំណើរ។ ឆ្លើយតបនឹងបញ្ហានេះ រាជរដ្ឋាភិបាលកម្ពុជា និងរដ្ឋបាលរាជធានីភ្នំពេញ បានប្រឹងប្រែងកែសម្រួលហេដ្ឋារចនាសម្ព័ន្ធ និងសាងសង់ផ្លូវអាកាសនៅចំណុចប្រសព្វ ដែលមានការកកស្ទះខ្លាំង។

បច្ចុប្បន្ននៅក្នុងរាជធានីភ្នំពេញ មានស្ពានអាកាសចំនួន៥ ដែលបានសាងសង់រួចរាល់ និងកំពុងប្រើប្រាស់ រួមមាន៖ ស្ពានអាកាសក្បាលថ្នល់ (២៤ មិថុនា ២០១០), ស្ពានអាកាស៧មករា (៦ មករា ២០១២), ស្ពានអាកាសស្ទឹងមានជ័យ (៣១ កក្កដា ២០១៤), ស្ពានអាកាស៥មករា (៥ មករា ២០១៦), ស្ពានអាកាសមិត្តភាពកម្ពុជា-ចិន សែនសុខ ឬហៅថា «ស្ពានអាកាសផ្សារដីហ៊ុយ» (២ កក្កដា ២០១៨) ។ ក្រៅពីនេះ ស្ពានអាកាសមួយទៀត គឺស្ពានអាកាសរង្វង់មូលចោមចៅ កំពុងដំណើរការសាងសង់ និងសម្រេចបានជាង ៩០ភាគរយ។

សូមជម្រាបថា ទន្ទឹមនឹងការបើកការដ្ឋានសាងសង់ស្ពានអាកាសនេះ ស្ពានបេតុងខ្សែកាបឫស្សីកែវ ឆ្លងកាត់ទន្លេសាបតភ្ជាប់រវាងផ្លូវជាតិលេខ៥ ទៅកាន់ក្រុងរណបជ្រោយចង្វា ក៏ដូចជាផ្លូវជាតិលេខ៦នោះ សាងសង់សម្រេចបានច្រើនហើយដែរ។

មន្ទីរសាធារណការ និងដឹកជញ្ជូន រាជធានីភ្នំពេញ បានឱ្យដឹងថា គិតត្រឹមខែមករា ឆ្នាំ២០២២ ស្ពានបេតុងអារមេខ្សែកាបឫស្សីកែវ ឆ្លងកាត់ទន្លេសាបនេះ សម្រេចបានជិត ៦៤ភាគរយហើយ។ ស្ពាននេះគ្រោងបញ្ចប់ការសាងសង់នៅខែមីនា ឆ្នាំ២០២៣។

ស្ពានបេតុងអារមេខ្សែកាបឫស្សីកែវ ឆ្លងកាត់ទន្លេសាប មានរចនាបទទំនើប។ មានសរសរធំៗចំនួន ៤បង្គោល មានកំពស់រហូតដល់ ៤០ម៉ែត្រ សម្រាប់ព្យួរខ្សែកាប។ ស្ពាននេះគ្រោងចំណាយថវិកាប្រមាណ ៣៥លានដុល្លារ។ ស្ពាននេះមានប្រវែង ៩២២ម៉ែត្រ និងទទឹង២០.៥ម៉ែត្រ៕SRP

ខេត្តសៀមរាប៖ចោរបានគាស់តូបលក់ខោអាវមួយកន្លែង ដោយយកទ្រព្យសម្បត្តិ ជាង១ម៉ឺនដុល្លារ រួចគេចខ្លួនដោយសុវត្ថិភាព។

ហេតុការណ៍ភ្ញាក់ផ្អើលនៅព្រឹក ថ្ងៃទី៣០ ខែមករា ឆ្នាំ២០២២ ស្ថិតនៅផ្សារសសរស្ដម្ភ ក្នុងភូមិឃុំសសរស្ដម្ភ ស្រុកពួក ខេត្តសៀមរាប។

ប្រភពពីសមត្ថកិច្ចបានអោយដឹងថា ជនរងគ្រោះជាម្ចាស់តូប មានឈ្មោះ ត្រិច សុថាច ភេទស្រី អាយុ៥១ឆ្នាំ រស់នៅ ភូមិឃុំកើតហេតុខាងលើ មុខរបរអាជីវករលក់ខោអាវ បានប្ដឹងរាយការណ៍ថានៅថ្ងៃទី២៩ ខែមករា ឆ្នាំ២០២២ ពេលព្រឹកគាត់បានបើកតូបលក់ នៅក្នុងផ្សារសសរស្ដម្ភ ដូចសព្វដង ហើយម៉ោង២រសៀលកូនឈ្នួលគាត់ឈ្មោះ ឈន់ ស្រីហាច ភេទស្រី អាយុ២៣ឆ្នាំ ផ្ទះនៅភូមិស្វាយ ឃុំសសរស្តម្ភ ស្រុកពួក ខេត្តសៀមរាប បានបិទតូបរៀបទុកដាក់ខោអាវ និងចាក់សោទ្វារតូបត្រឹមត្រូវ ហើយត្រឡប់ទៅដេកផ្ទះរៀងៗខ្លួន លុះរំលង១យប់នៅម៉ោង៥និង០០នាទីព្រឹក ថ្ងៃទី៣០ ខែមករា ឆ្នាំ២០២២ ឈ្មោះឈន់ ស្រីហាច បានមកបើកតូបលក់ ដោយចាក់សោទ្វារមុខបានឃើញខោអាវ ក្នុងតូបរាយប៉ាយនិងបាត់ខោអាវ រ៉ូប សារ៉ុងអស់មួយចំនួន នៅសល់ខោអាវតម្លៃថោកមួយចំនួន និងពិនិត្យឃើញទ្វារតូបផ្នែកចំហៀង បិទធម្មតា តែបាត់មេសោ ពេលនោះដឹងថាតូបត្រូវបានចោរ(ជនមិនស្គាល់មុខ) ធ្វើសកម្មភាពលួច ហើយបានតេទូរស័ព្ទប្រាប់ថៅកែ និងប្ដឹងសមត្ថកិច្ចឲ្យជួយស្រាវជ្រាវតែម្ដង។

ករណីនេះកម្លាំងសមត្ថកិច្ច បានចុះស្រាវជ្រាវឃើញថា ចំណុចទ្វារ (បាត់មេសោ) គ្មានស្លាកស្នាមគាស់ឬកាត់នោះទេ គ្មានស្លាកស្នាមវត្ថុតាងបន្សល់ទុក ហើយគ្មានសាក្សីដឹងព័ត៌មានតម្រុយ នូវសកម្មភាព ជនសង្ស័យប្រព្រឹត្តិ ហើយតូបកើតហេតុមានកាមេរ៉ាសុវត្ថិភាព ប៉ុន្តែកាមេរ៉ាខូចឈប់ប្រើ។

តាមការបញ្ជាក់ពីម្ចាស់តូបគាត់បាត់បង់អស់ដូចជាប្រភេទ ខោខៅបោយ តម្លៃពី ៣៥០០០៛ , ៤៥០០០៛, ប្រភេទខោសាច់ក្រណាត់តម្លៃពី ២៥០០០៛ ទៅ ៤៥០០០៛, ប្រភេទអាវរាង អាវប្រអប់តម្លៃពី ១៥០០០៛ ទៅ ៣៥០០០៛ , រ៉ូបតម្លៃពី ១៥ដុល្លារ , ២០ដុល្លារ , ២៥ដុល្លារ , ឈុតសម្លៀកបំពាក់ប្រពៃណីខ្មែរតម្លៃពី ៣០ដុល្លារ, ៤០ដុល្លារ , សារ៉ុង តម្លៃពី ១០០០០៛ ទៅ ៤០០០០៛ ។ ប្រភេទខោអាវក្មេង មនុស្សធំ បុរស-ស្រ្តី ផលិតផល ថៃ ហុងកុង ភ្នំពេញ។ សរុបជាទឹកប្រាក់ប្រហែល ១០០០០ដុល្លារ(មួយម៉ឺន)ដុល្លារអាមេរិក។

ទោះជាយ៉ាងណាពាក់ព័ន្ធទៅនឹងករណីនេះកម្លាំងសមត្ថកិច្ចកំពុងបើកការស្រាវជ្រាវដើម្បីចាប់ជនប្រព្រឹត្តយកមកផ្ដន្ទាទោសតាមផ្លូវច្បាប់ផងដែរ៕SRP

ខេត្តកំពង់ចាម​៖អតីតថ្នាក់ដឹកនាំមូលដ្ឋាននៃអតីតCNRP ចំនួន​៥រូប​ មកពីសង្កាត់ចំនួន២ ក្នុងក្រុងកំពង់ចាម បានស្ម័គ្រចិត្តសុំចូល​រួមរស់​ជីវភាពនយោបាយ ជាមួយ គណបក្សប្រជាជនកម្ពុជា ខេត្តកំពង់ចាម តាមរយៈ លោក អ៊ុន ចាន់ដា ប្រធានគណៈកម្មាធិការគណបក្ស ប្រជាជនកម្ពុជាខេត្តកំពង់ចាម។

ការចូលនៅរសៀលថ្ងៃទី៣០ ខែមករា ឆ្នាំ២០២២នេះ។

អតីតCNRPទាំង​ ៥រូប ដែលស្ម័គ្រចិត្តសុំចូលមកបម្រើជីវភាពនយោបាយជាមួយគណបក្សប្រជាជនកម្ពុជា ខេត្តកំពង់ចាម រួមមាន÷
១-លោក វ៉ា ចាន់ថុល អតីតប្រធានគណបក្ស CNRP ប្រចាំក្រុងកំពង់ចាម ។
២-លោក អុី សុខុន អតីតសមាជិកក្រុមប្រឹក្សាសង្កាត់វាលវង់ CNRP ។
៣-លោស្រី អុឹម សុខហេង អតីតបេក្ខជន CNRP បម្រុងសង្កាត់កំពង់ចាម ។
៤-លោកស្រី យ៉ុង គីមវួច អតីតសមាជិក បក្ស CNRP​ ។
៥-លោក ហួន សុខ អតីតសមាជិកបក្ស CNRP ។

លោក អ៊ុន ចាន់ដា បានមានមតិសម្តែងការស្វាគមន៍ចំពោះបងប្អូន ដែលបានចូលរួមជីវភាពនយោបាយ ជាមួយ គណបក្សប្រជាជនកម្ពុជា ដោយលោកប្រធានបានស្នើឲ្យបងប្អូន ចូលរួមគោរពលក្ខន្តិកៈ របស់គណបក្សប្រជាជនកម្ពុជា និងសូមរក្សាគោលជំហរស្មោះត្រង់ ជាមួយគណបក្ស និងរាជរដ្ឋាភិបាល កុំវៀចវេរតាមការអូសទាញរបស់គណបក្សណាមួយ ហើយសូមបងប្អូនបន្តចលនាអូសទាញ បងប្អូនដែលជាអតីតបក្សប្រឆាំង ឲ្យមកចូលរួមជាមួយគណបក្សប្រជាជនកម្ពុជាជាបន្តទៀត។

លោកប្រធាន បាន​បញ្ជាក់​ថាគណបក្សប្រជាជនកម្ពុជា សូមបើកទ្វារចំហរចាំទទួលស្វាគមន៍បងប្អូន ដែលភ្ញាក់រលឹកខ្លួន ដើម្បីមកចូលរួមបម្រើជីវភាព នយោបាយជាមួយគណបក្សប្រជាជនកម្ពុជា គ្រប់ពេល៕SRP

ខេត្តកំពង់ចាម​៖លោក​ ហាន​ កុសល​ អភិបាលរងខេត្ត​កំពង់ចាម​ បានប្រាប់​​ប្រជាពលរដ្ឋ​ លោកគ្រូ​ អ្នកគ្រូ​ថា ការ​រៀបចំ​ឲ្យ​ខ្លួន​ឯង​មាន​សុខភាព​ល្អ​ គឺ​ជា​ការ​ទទួល​បាន​នូវ​ទ្រព្យសម្បត្តិ​ដ៏​​មហាសាល​ តាមរយៈ​ការ​ថែទាំ​សុខភាព​ ដែលផ្តេីម​ចេញ​ពី​កន្លែង​សាមញ្ញៗ​ ទី១​-​គឺ​ផ្តេីម​ចេញ​ពី​ផ្ទះ​របស់​យេីង​ ដែល​ត្រូវ​ទាមទារ​ឲ្យ​មាន​ការ​សំអាត​រៀបចំ​ផ្ទះ​សំបែង​ឲ្យ​បាន​ស្អាត​​ល្អ​ ​ជា​ប្រចាំ​ ។ ទី២-​ ផ្ដើម​ចេញ​ពី​សាលា​រៀន​​ ដែលលោកគ្រូ​ អ្នកគ្រូ​ ត្រូវ​មាន​ការ​ធានា​ខ្ពស់​ ថា​តេី​កូន​សិស្ស​របស់​យេីង​ លាង​សំអាត​ដៃ​ជាមួយ​នឹងសាប៊ូ​ជារេីយៗ​​ លេីសពី​នោះ​នៅ​ក្នុងសាលា​រៀន​ គឺគ្មាន​ការ​លក់​ដូរនំ​ចំណី​ ខូច​គុណភាព​ ឬហួស​ដឺឡេ​ ដែល​នាំឲ្យ​ប៉ះពាល់​ដល់​សុខភាព​ ។ ទី៣-​ គឺ​ផ្តេីម​ចេញ​ពី​សហគមន៍​​ ដែល​ទាមទារ​ឲ្យ​ពុកម៉ែ​បងប្អូន​ប្រជាពលរដ្ឋ​ លោកគ្រូ​ អ្នកគ្រូ​ ទាំងអស់​ ត្រូវ​តែ​ចូលរួម​ជាមួយ​អាជ្ញាធរ​ និង​អង្គការ​នានា​ផងដែរ​។ ​

លោកលើកឡើងបែបនេះក្នុង​ឱកាស​ប្រារព្ធ​ទិវា​ជំងឺ​ហង់សិន​ពិភពលោក​ ឆ្នាំ​២០២២​ នៅ​មន្ទីរពេទ្យ​ព្យាបាល​ជំងឺ​ឃ្លង់ត្រេីង​ ស្ថិត​ក្នុង​ឃុំ​មៀន​ ស្រុក​ព្រៃឈរ​ ខេត្តកំពង់ចាម​ នៅថ្ងៃទី​៣០​ ខែមករា​ ឆ្នាំ​២០២២​នេះ​។

លោកបន្តថា រាជរដ្ឋាភិបាល​កម្ពុជា បានលេីក​ទឹកចិត្ត​ ដល់​ក្រុម​គ្រូពេទ្យ​ ដល់​បុគ្គលិក​សុខាភិបាល​ នៅ​ទូទាំង​ប្រទេស​​ ឲ្យ​​​មាន​សមត្ថភាព​កាន់​តែ​ខ្ពស់​ កាន់​តែ​ល្អ​ កាន់តែ​មាន​ជុំនាញ​ ដេីម្បី​ជួយ​ព្យាបាល​ដល់​ប្រជាពលរដ្ឋ​ ដែល​មាន​បញ្ហា​សុខភាព​ បូករួម​ទាំង​ជំងឺ​ ហង់សិន​ ផងដែរ​។

លោក​ ហាន​ កុសល​ បន្តថា​ ពុកម៉ែ​បងប្អូន​ អាច​មាន​សមត្ថភាព​គ្រប់គ្រាន់​ ក្នុង​ការ​ចូលរួម​ជាមួយ​នឹងរាជរដ្ឋាភិបាល​ ដេីម្បី​សម្រេច​នូវគោលបំណង​ លប់​បំបាត់​ជំងឺ​ហង់សិន​ឲ្យ​អស់​នៅ​ត្រឹម​ឆ្នាំ​២០៣០ តាម​រយៈ​ការ​ទទួល​ខុសត្រូវ​ ចំពោះ​ខ្លួន​ឯង​ ថាតេី​នៅ​ផ្ទះ​យេីង​ធ្វេី​ដូចម្ដេច​ ដេីម្បី​ឲ្យ​យើង​មាន​សុខភាព​ល្អ​ និងទប់ស្កាត់​ការ​ឆ្លង​ពី​ជំងឺ​ហង់សិន​ រួមនឹង​ជំងឺ​ផ្សេងៗ​ទៀត​ ព្រោះថា​បេីសិន​ជា​យេីង​ម្នាក់ៗ​មិន​ព្យាយាម​ ទទួល​ខុសត្រូវ​ថែទាំ​សុខភាព​របស់​ខ្លួន​ឯង​ទេ​ យេីង​ប្រហែល​ជា​មានការលំបាក​ក្នុង​ការ​ឈាន​ទៅ​សម្រេច​នូវគោលនយោបាយ​ មិន​ថា​ចំពោះជំងឺ​ហង់សិន​ ជំងឺ​គ្រុនចាញ់​ ជំងឺ​អេដស៍​ និង​ជំងឺ​ផ្សេងៗ​ ទេ​ ដូច្នេះត្រូវ​ទាមទារ​ឲ្យ​មាន​ការ​ចូលរួម​ពី​បុគ្គល​ម្នាក់ៗ​ទាំងអស់​គ្នា​៕​SRP

ខេត្តកំពង់ចាម​៖លោក សុក ផេង សមាជិក គណ:កម្ធាធិការកណ្តាល និងជាប្រធានក្រុមការងារថ្នាក់កណ្តាល ចុះជួយឃុំល្វាលើ លោក សំ ពិសិថ្ឋ ប្រធានគណ:កម្មាធិការគណបក្សស្រុកចំការលើ និងលោក កុយ សាវុទ្ធ អនុប្រធានគណ:កម្មាធិការគណបក្សស្រុកចំការលើ បានប្រកាសបញ្ចូលសមាជិកគណបក្សថ្មីចំនួន ៨៣នាក់ មកពីភូមិចំនួន៤ ក្នុងឃុំល្វាលើ ស្រុកចំការលើ ដើម្បីចូលរួមជីវភាពនយោបាយ ជាមួយគណបក្សប្រជាជនកម្ពុជា។ ពិធីប្រកាសនេះបានធ្វើឡើងនៅថ្ងៃទី៣០ ខែមករា ឆ្នាំ២០២២ នៅស្នាក់ការគណបក្សឃុំល្វាលើ ដោយចូលរួមពីលោក សំណាក់ថ្នាក់ដឹកនាំ សមាជិក-សមាជិកាពាក់ព័ន្ធប្រមាណ ១២៨នាក់ផងដែរ។

ក្នុងឱកាសនោះ លោក សុក ផេង បានលើកឡើងថា តាមរយៈសមិទ្ធផលដែលគណបក្សបន្សល់ទុករយៈពេល ៤៣ឆ្នាំកន្លងមកនេះ គឺផ្ដើមពីជ័យជម្នះ ៧ មករា ដែលគណបក្សប្រជាជនកម្ពុជា បានសម្រេចនូវការផ្លាស់ប្តូរសង្គមយ៉ាងធំធេង ដោយពុំអាចនឹកស្មានដល់។

លោក បានបន្តថា កម្ពុជាបានប្រែក្លាយពីវាលពិឃាតនៃរបបប្រល័យពូជសាសន៍ ពីសមរភូមិនៃសង្គ្រាមដ៏រ៉ាំរ៉ៃ ពីការបែកបាក់ជាតិ និងការបែងចែកទឹកដី ពីគំនរផេះផង់ ទៅជាទឹកដីដែលមានសន្តិភាព ឯកភាព ស្ថិរភាព សេរីភាព ប្រជាធិបតេយ្យ នីតិរដ្ឋ និងអភិវឌ្ឍលើគ្រប់វិស័យ ដែលធ្វើឱ្យប្រជាជនគ្រប់រូបបានរស់នៅយ៉ាងសុខដុមរមនា ក្រោមដំបូលនៃរដ្ឋធម្មនុញ្ញតែមួយ និងម្លប់ដ៏ត្រជាក់នៃអង្គព្រះមហាក្សត្រ។

លោក សុក ផេង ក៏បានស្នើដល់សមាជិក-សមាជិកាថ្មី របស់គណបក្សប្រជាជនកម្ពុជា ត្រូវចូលរួមធ្វើសកម្មភាពល្អៗ បម្រើផលប្រយោជន៍ សង្គមឲ្យបានឲ្យផុលផុស នៅក្នុងមូលដ្ឋាន ដើម្បីទទួលបានការស្រលាញ់ពេញចិត្ត និងគោរពគាំទ្រពីសំណាក់ពលរដ្ឋ។

លោកថា ការបញ្ចូលសមាជិកថ្មីនេះ ដើម្បីពង្រឹង និងបង្កើនការត្រៀម លក្ខណៈ សម្រាប់ការបោះឆ្នោតជ្រើសរើស ក្រុមប្រឹក្សាឃុំ -សង្កាត់អាណត្តិទី៥ នៅថ្ងៃទី៥ ខែមិថុនា ឆ្នាំ២០២២ ខាងមុខ​៕SRP

ខេត្តកំពង់ចាម​៖អាជ្ញាធរ​ខេត្តកំពង់ចាម​ បាន​ចាត់ទុកថា​ សមិទ្ធផល​​ថ្មី​ របស់​ខេវ៉ាយកំពង់ចាម រីសត នៅឃុំអូរស្វាយ ស្រុកកំពង់សៀម​ ជា​ផ្នែក​មួយ​​នៃវិស័យ​ទេសចរណ៍​ ដ៏​សំខាន់​ដែលអាច​ធ្វើ​ឲ្យមាន​កំណើន​សេដ្ឋកិច្ច​​ បាន​មួយកម្រិត​ទៀត​​​ បន្ទាប់​ពី​រាជរដ្ឋាភិបាល​កម្ពុជា​ បាន​បេីក​ប្រទេស​ឡេីងវិញ​។

ការ​រំពឹងទុក​ និង​​អបអរសាទរ​នេះ​ បានធ្វេីឡេីង​ ​ក្នុង​ពិធី​សម្ពោធ​ KY កំពង់ចាម​ រីសត​ នាល្ងាច​ថ្ងៃទី​២៩​ ខែមករា​ ឆ្នាំ​២០២២​ ក្រោម​វត្តមាន​​ លោក​ ខ្លូត​ ផន​ ប្រធាន​ក្រុមប្រឹក្សា​ខេត្តកំពង់ចាម​ រួមនឹង​អភិបាល​រង​ខេត្ត​ និង​មន្ត្រី​អមដំណើរ​ ហេីយ​ក៏​មាន​ការ​ចូលរួម​ពី​ភ្លៀង​កិត្តិយស​ជាច្រើន​រូបផងដែរ​។

លោក​ ប៊ុត​ គីណែត​ ម្ចាស់​ខេវ៉ាយ​កំពង់ចាម​រីសត​ បានឲ្យដឹងថា​ ក្នុង​គោលបំណង​ដែល​លោក​ហេីយ​នឹង​ភរិយា​ បាន​ចំណាយ​ដេីមទុន​ក្នុង​ការកសាង​ KY កំពង់ចាម​រីសត​នេះឡេីង​ ដេីម្បី​ផ្គត់ផ្គង់​សេវាកម្ម​ ទេសចរណ៍​ ទាំង​អាហារ​ ​ការ​ស្នាក់នៅ​ និង​ការ​កំសាន្ត​ ដែល​មាន​ទីតាំងនៅ​ជិត​ទីក្រុង​កំពង់ចាម​ តែម្ដង​​ ព្រោះ​បច្ចុប្បន្ន​នេះ​​វិស័យ​ទេសចរណ៍​ សណ្ឋាគារ​ ផ្ទះ​សំណាក់​ វាមាន​អស់​ហើយ​នៅ​ក្នុង​ក្រុង​ ដូច្នេះហេីយយើង​ចង់​បង្កើត​កន្លែង​មួយ​ ​ដែល​មាន​ខ្យល់​បរិយាកាស​ល្អ​បរិសុទ្ធ​​ សម្រាប់ការ​លំហែ​អារម្មណ៍​ តាម​បែប​ធម្មជាតិ​ និងនាំមក​ដោយផាសុកភាព​ ចំពោះ​ភ្ញៀវ​ទេសចរណ៍​ ដែល​ចង់​មក​សម្រាក​លំហែកាយ​ តាម​របៀប​ស្រុកស្រែ​ ដែល​អាច​ស្ទួច​ត្រី​លេងកម្សាន្ត​ និងញ៉ាំ​អាហារ​តាម​បែប​ទីក្រុង​ ឬ​ស្រុកស្រែ​ ផងដែរ​។

លោក​ ប៊ុត​ គីណែត​ បាន​បញ្ជាក់​ថា​ KY កំពង់ចាម​រីសត​ មាន​ទីតាំង​នៅ​តំបន់​ពាណិជ្ជកម្ម​ ត្រាស់មី​ ខែលជ័យ​(​ ត្រេីង​ )​ ស្ថិត​ក្នុង​ភាព​ខែលជ័យ​ ឃុំ​អូរស្វាយ​ ស្រុកកំពង់សៀម​ ខេត្តកំពង់ចាម​ ដែល​យើង​អាច​ធ្វើ​ដំណើរ​ចេញ​ពី​ខេត្តកំពង់ចាម​ ប្រមាណ​ជា​១២គីឡូម៉ែត្រ​ និង​ពីរាជធានី​ភ្នំពេញ​ ប្រមាណ​ជា​១១០គីឡូម៉ែត្រ​​ ខណៈ​ដែល​ KY កំពង់ចាម​រីសត​ មាន​បម្រើ​សេវា​ស្នាក់នៅ​ពេញ​មួយ​ថ្ងៃ​ និង​មាន​ផ្គត់ផ្គង់​អាហារ​ ពេលព្រឹក​ ពេលថ្ងៃ​ និង​ពេល​ល្ងាច​ ​ចំពោះ​​​អាហារ​ពេល​ល្ងាច​ គឺមាន​លក្ខណៈពិសេសេ​ ដោយ​មាន​ការ​ប្រគំ​តន្ត្រី​ ដែល​មាន​អ្នក​ចំរៀង​ច្រៀង​ពីរោះ​ៗ​ សម្រាប់​​កម្សាន្ត​អារម្មណ៍​ ពោលគឺ​មានសេវាកម្ម​ជាច្រេីន​មុខ​ ហើយ​មាន​ទីតាំង​ នៅ​ជិត​ផ្សារ​​តែម្ដង​​៕

ខេត្តព្រះវិហារ៖ព្រៃឈើ ដែលមាននៅក្នុងឧទ្យានរាជបណ្ឌិត្ យសភាកម្ពុជា តេជោសែន ឫស្សីត្រឹប រងការកាប់បំផ្លាញ។

លោកសុខ ទូច ប្រធានរាជបណ្ឌិតសភាកម្ពុជា បានឲ្យដឹងថាទោះបីជាពេលវេលាចង្អៀតបន្តិចមែន តែយើងមិនភ្លេចក្នុងការដើរល្បាតមើលក្នុងឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹបនោះដែរ។ ជាក់ស្តែង នៅថ្ងៃទី២៩ មករា ២០២២នេះ យើងបានឃាត់៖

១- សកម្មភាពលួចកាប់ឈើខុសច្បាប់មួយករណី, ដោយដកយករណាយន្ត មករក្សាទុក, ហើយយើងបានលែងគាត់ទៅវិញព្រោះ អាណិតក្មេងៗតូច២នាក់ដែលមកជាមួយ។
២- សកម្មភាពឈូសឆាយដីឧទ្យាន៣ករណី ដោយបើកត្រាក់ទ័ររត់គេចពីក្រុមការងារឧទ្យាន, តែយើងរឹបអូសបានម៉ូតូ១គ្រឿង។ ៣- ការដាក់អន្ទាក់យកសត្វ២ករណី៤- ការដុតព្រៃដើម្បីចាប់សត្វជាច្រើនករណី៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ទទួលបានពានរង្វាន់សន្តិភាពស៊ុនហាក់ឆ្នាំ២០២២ ពីមូលនិធិសន្តិភាពស៊ុនហាប់ នៃសាធារណរដ្ឋកូរ៉េ៕SRP