ខេត្តសៀមរាប៖សមត្ថកិច្ចបានរាយការណ៍ថាបុរសម្នាក់ បានខ្យល់គរស្លាប់ នៅក្នុងបន្ទប់ទឹក នៃ អធិការដ្ឋានគរបាលស្រុកសូទ្រនិគម កន្លែងធ្វើចត្តាឡីស័ក។

ហេតុការណ៍បានកើតឡើងនៅថ្ងៃទី១៨ ខែ មិថុនា ឆ្នាំ ២០២១ ចំណុចក្នុងបន្ទប់ទឹកនៃ អធិការដ្ឋានគរបាលស្រុកសូទ្រនិគម កន្លែងធ្វើចត្តាឡីស័ក។

សមត្ថកិច្ចបានឲ្យដឹងថាជនរងគ្រោះ ឈ្មោះ ណី វរះ អាយុ ៤៣ ឆ្នាំ ឋានៈ អនុសេនីយ៍ឯក នាយផ្នែកបច្ចេកទេសវិទ្យាសាស្រ្ត។

បើតាមរបាយការណ៍បានបញ្ជាក់ថាមុនពេលកើតហេតុជនរងគ្រោះ បានក្រោកពីដេកពេលព្រឹក ហើយបានស្លៀកកន្សែងចូលបន្ទប់ទឹក។ លុះដល់ម៉ោង១១ ព្រឹក យើងបានរកគាត់មកហូបបាយ តែរកមិនឃើញ យើងក៏ទៅមើលនៅក្នុងបន្ទប់ទឹកឃើញបន្ទប់ទឹកបិទទ្វារពីក្នុង យើងហៅមិនឮក៏កម្លាំងយើងក៏បានអើតមើល តាមប្រហោងជញ្ជាំងបន្ទប់ទឹក ក៏ឃើញគាត់នៅក្នុងបន្ទប់ទឹក ក៏នាំគ្នាធាក់ទ្វារបន្ទប់ទឹកចូលទៅមើល ក៏ឃើញគាត់ស្លាប់នៅក្នុងបន្ទប់ទឹកតែម្ដង។

របាយការណ៍បានបញ្ជាក់ទៀតថា ក្រោយពេលឃើញហេតុការណ៍ ដូច្នេះយើងក៏ឲ្យគ្រូពេទ្យមកយកសំណាងរកមេរោគ covid-19លទ្ធផលអវិជ្ជមាន។ តាមការសន្និដ្ឋានសាកសពស្លាប់ដោយសារខ្យល់គរ៕SRP

ខេត្តកំពង់ចាម​៖លោក អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជាខេត្ត​កំពង់ចាម​ និងលោកជំទាវ អមដំណើរដោយថ្នាក់ដឹកនាំ សមាជិក សមាជិកា គណៈកម្មាធិការសាខា មន្ត្រីប្រតិបត្តិ ព្រមទាំងអនុសាខាស្រុក បានអញ្ជើញបូជា ធូប ទៀន ផ្កាភ្ញី ថ្វាយព្រះបដិមាករ និងនាំយក ចង្ហាន់ ទេយ្យទាន និងបច្ច័យ ប្រគេនព្រះសង្ឃ​គង់នៅវត្តភ្នំជ័យគិរី ហៅភ្នំហាន់ជ័យ ស្ថិត​ក្នុងឃុំហាន់ជ័យ ស្រុកកំពង់សៀម ដើម្បីឧទ្ទិសព្រះរាជកុសលថ្វាយ សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយស កាកបាទក្រហមកម្ពុជា ក្នុងឱកាសព្រះរាជពិធីបុណ្យចម្រើនព្រះជន្ម ៨៥ យាងចូល ៨៦ព្រះវស្សាដែលនឹងប្រព្រឹត្តទៅ នាថ្ងៃទី១៨ ខែមិថុនា ឆ្នាំ២០២១ នេះ។

លោក អ៊ុន ចាន់ដា និងលោកជំទាវ ព្រមទាំង គណៈកិត្តិយស និងសហការី នៃសាខាកាកបាទក្រហមកម្ពុជា ខេត្តកំពង់ចាម សូមព្រះបរមរាជានុញ្ញាតថ្វាយព្រះសព្ទសាធុការពរជ័យ បវរសួស្តី សិរីវឌ្ឍនមង្គល គ្រប់ប្រការ ថ្វាយសម្តេចព្រះមហាក្សត្រី នរោត្តម មុនិនាថសីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គមានព្រះរាជសុខភាពល្អបរិបូរណ៍ ព្រះបញ្ញាញាណភ្លឺថ្លា ព្រះកាយពលមាំមួន និងព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជុំដល់ប្រជានុរាស្រ្ត ជាកូន ចៅ ចៅទួត របស់ព្រះអង្គ ជារៀងដរាបតទៅ ។

បន្ទាប់ពី ព្រះសីលសំវរ ប៊ត តាំង ឆេង ព្រះមេគណខេត្ត និងព្រះសង្ឃ ៧ អង្គ បាន សូត្រពុទ្ធជ័យមង្គល ចម្រើនព្រះបរិត្តទៅតាមទំនៀមទំលាប់ប្រពៃណីយសាសនា រួចមក លោក អ៊ុនចាន់ដា និងលោកជំទាវ ព្រមទាំង ថ្នាក់ដឹកនាំ បានអញ្ជើញ វេរភត្តហារ ប្រគេនព្រះសង្ឃចំនួន ៧អង្គ នូវចង្ហាន់ ផ្លែឈើ​ សាដក និងបច្ច័យចំនួន ៥ម៉ឺនរៀល ដោយឡែក ព្រះចៅអធិការវត្ត បច្ច័យ ២០ម៉ឺនរៀល។ ឧបត្ថម្ភ យុវជនកាកបាទក្រហមកម្ពុជា ១១នាក់ និងចាស់ព្រឹទ្ធាចារ្យ ចំនួន ៨៦ នាក់ ម្នាក់ៗ ថវិកា ២០,០០០រៀល។

សម្រាប់វត្តភ្នំជ័យគិរី លោក អ៊ុន ចាន់ដា និងលោកជំទាវ បានប្រគេន៖ ទៀនវស្សា ១គូ , អង្ករ ២៥០ គក្រ ,មី ១០កេស ,ត្រីខ ១២០កំប៉ុង ,ទឹកក្រូច ១០កេស, ទឹកសុទ្ធ១០កេស និងបច្ច័យចំនួន ១,៦០០,០០០ រៀល។ ជាមួយនោះ សាខា ក៏បានរៀបចំចង្ហាន់ ប្រគេនព្រះសង្ឃ សម្រាប់ឆាន់ថ្ងៃត្រង់ចំនួន ១០០ អង្គ ក្នុងវត្តភ្នំ ហាន់ជ័យ នេះ ផងដែរ៕SRP

ភ្នំពេញ៖សម្ដេចតេជោនាយករដ្ឋមន្ត្រីហ៊ុន សែន បានថ្លែងអំណរគុណចំពោះលោកជំទាវ Eva Nguyen Binh ដែលបានខិតខំប្រឹងប្រែងអស់ពីសមត្ថភាព ក្នុងការបំពេញបេសកកម្មកាទូត នៅក្នុងប្រទេសកម្ពុជា ដើម្បីពង្រឹង និងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។

សម្ដេចតេជោនាយករដ្ឋមន្ត្រី ក៏បានថ្លែងអំណរគុណចំពោះរដ្ឋាភិបាលបារាំងដែលបានជួយដល់កម្ពុជាក្នុងការប្រយុទ្ធប្រឆាំងជំងឺកូវីដ១៩ ដែលក្នុងនោះមានវិទ្យាស្ថានប៉ាស្ទ័របានដើរតួរនាទីយ៉ាងសំខាន់ក្នុងការចូលរួមចំណែកប្រយុទ្ធប្រឆាំងជំងឺកូវីដ១៩នេះ។

សម្ដេចតេជោក៏បានជម្រាបជូនលោកជំទាវថា យុទ្ធសាស្ត្ររបស់កម្ពុជាគឺផ្ដល់វ៉ាក់សាំងជូនដល់គ្រប់គ្នាទាំងអស់ដែលរស់នៅក្នុងព្រះរាជាណាចក្រកម្ពុជា មិនថាជាជនជាតិខ្មែរ ឬជនជាតិបរទេសនោះទេ ដែលនេះជាជម្រើសចុងក្រោយក្នុងការប្រយុទ្ធប្រឆាំងនឹងជំងឺកូវីដ១៩។

សម្ដេចហ៊ុន សែន មានប្រសាសន៍យ៉ាងដូច្នេះ នៅថ្ងៃសុក្រ ទី១៨ ខែមិថុនាព្រឹកមិញនេះ នាឱកាស បានអនុញ្ញាតឲ្យលោកជំទាវ Eva Nguyen Binh ឯកអគ្គរដ្ឋទូតសាធារណរដ្ឋបារាំងប្រចាំកម្ពុជា ជួបសម្ដែងការគួរសម និងពិភាក្សាការងារក្នុងឱកាសដែលលោកជំទាវត្រូវចប់បេសកកម្មកាទូតនៅកម្ពុជា។

ក្នុងជំនួបនោះ លោកជំទាវបានគោរពថ្លែងអំណរគុណជូនចំពោះសម្ដេចតេជោ ចំពោះមន្ត្រីរាជការកម្ពុជាទាំងអស់ដែលកន្លងមកតែងតែបានដល់នូវកិច្ចសហប្រតិបត្តិការយ៉ាងល្អជូនចំពោះលោកជំទាវ។

លោកជំទាវ Eva Nguyen Binh បានគាត់សម្គាល់ឃើញថារយៈពេល០៤ឆ្នាំក្នុងបេសកកម្មកាទូតរបស់លោកជំទាវនៅព្រះរាជាណាចក្រកម្ពុជា លោកជំទាវបានជួបពិភាក្សាជាមួយសម្ដេចតេជោ ជាមួយមន្ត្រីកម្ពុជាគ្រប់លំដាប់ថ្នាក់ ដែលរាល់កិច្ចពិភាក្សាទាំងអស់បានបង្ហាញពីភាពត្រង់ទៅត្រង់មក មានភាពបើកចំហរ មានភាពស្មោះត្រង់ ដែលទាំងនេះជាកត្តាសំខាន់ធ្វើឲ្យបេសកកម្មកាទូតរបស់លោកជំទាវមកកាន់កម្ពុជាបានទទួលជោគជ័យតាមការកំណត់ នោះគឺការពង្រីក និងពង្រឹងទំនាក់ទំនងរវាងប្រទេសទាំងពីរ។

លោកជំទាវបានមានប្រសាសន៍បន្តថា កម្ពុជាគឺជាប្រទេសដែលមានសុខសន្តិភាព ស្ថិរភាព និងអភិវឌ្ឍន៍ លើសពីនោះទៅទៀត ក៏មានការគ្រប់គ្រងយុទ្ធសាស្ត្រជាក់លាក់ក្នុងការគ្រប់គ្រងប្រយុទ្ធប្រឆាំងនឹងជំងឺកូវីដ១៩ គឺមិនដូចអ្វីដែលអ្នកដទៃមើលមកកម្ពុជាពីចំងាយ១២០០ គីឡូម៉ែត្រនោះទេ។

លោកជំទាវបានមានប្រសាសន៍បន្តថា នេះជាមូលហេតុធ្វើឲ្យរដ្ឋាភិបាលបារាំងដូចជាវិស័យឯកជនបារាំងនៅបន្តជាមួយកម្ពុជា ចូលរួមចំណែកជាមួយកម្ពុជាដើម្បីជំរុញការអភិវឌ្ឍប្រកបដោយបរិយាបន្ន និងចីរភាព។

លោកជំទាវក៏បានបន្ថែមទៀតថា បារាំងនឹងបន្តកិច្ចសហប្រតិបត្តិការជាមួយកម្ពុជា ជាពិសេសលើវិស័យសុខាភិបាល ការអភិវឌ្ឍធនធានមនុស្ស វិស័យវប្បធម៌ និងការថែរក្សាសន្តិភាពនៅក្រោមឆ័ត្រអង្គការសហប្រជាជាតិ។

លោកជំទាវក៏បានសម្ដែងនូវការអបអរសាទរចំពោះសម្ដេចតេជោ ហ៊ុន សែន ក៏ដូចជារាជរដ្ឋាភិបាលកម្ពុជា ដែលបានទទួលជោគជ័យក្នុងការចាក់វ៉ាក់សាំងប្រយុទ្ធប្រឆាំងកូវីដ១៩ ដល់ប្រជាជនកម្ពុជា និងជនបរទេសទាំងអស់នៅក្នុងប្រទេសកម្ពុជា ដែលនេះគឺជាសន្ដានចិត្ត ទឹកចិត្តមនុស្សធម៌របស់កម្ពុជា ដែលរាល់ស្ថានទូតទាំងអស់បានទទួលស្គាល់ និងបានវាយតំលៃខ្ពស់ចំពោះការយកចិត្តទុកដាក់របស់រាជរដ្ឋាភិបាលកម្ពុជា។

សម្តេចតេជោនាយករដ្ឋមន្ត្រី ក៏បានថ្លែងអំណរគុណចំពោះរដ្ឋាភិបាលបារាំងដែលតែងតែផ្ដល់ជំនួយដល់កម្ពុជា ជាពិសេសលើវិស័យអភិវឌ្ឍន៍ធនធានមនុស្ស វិស័យវេជ្ជសាស្ត្រ ដែលបានជួយដល់ការពង្រឹងសមត្ថភាពគ្រូពេទ្យកម្ពុជា និងផ្ដល់ជាជំនួយហិរញ្ញប្បទានក្នុងការអភិវឌ្ឍន៍ កម្ពុជាផងដែរ៕SRP

ភ្នំពេញ៖សម្ដេចនាយករដ្ឋមន្ត្រី ហ៊ុន សែន និងជាប្រធានសមាគមអតីតយុទ្ធជនកម្ពុជា បានចេញសារលិខិតក្នុងឱកាសខួបលើកទី១៤ ទិវាអតីតយុទ្ធជនកម្ពុជា ២១ មិថុនា ឆ្នាំ ២០២១៕SRP

ខេត្តបន្ទាយមានជ័យ៖មនុស្សចំនួន៤នាក់ត្រូវបានចាប់ខ្លួននឹងរឹបអូសគ្រឿងញៀនជិត៤០គីឡូ។

ការបង្ក្រាបធ្វើឡើងនៅថ្ងៃពុធទី១៦ ខែមិថុនាឆ្នាំ២០២១ នៅចំណុចផ្ទះល្វែង១កន្លែង ស្ថិតក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។

សមត្ថកិច្ចក្រុងប៉ោយប៉ែត បានឲ្យដឹងថា ប្រតិបត្តិការនេះ អនុវត្តតាមដីការបញ្ជាអោយចូលជាទីតាំង ជនល្មើសស្នាក់នៅ ដោយ នគរបាលក្រុងប៉ោយប៉ែត សហការជាមួយនគរបាលខេត្តបាត់ដំបង ធ្វើការឆែកឆេរនៅក្នុងលំនៅដ្ឋានខាងលើ ត្រួតពិនិត្យឃើញមានវត្ថុតាងសង្ស័យ គ្រឿងញៀន ដែលមានការវេចខ្ចប់ដាក់សំបកកញ្ចប់តែ ដែលមានពណ៌ទឹកមាស មានរូបសញ្ញាផ្កាយ៥ ដើម្បីបំភាន់ភ្នែកមហាជន និង សមត្ថកិច្ច តាមការប៉ាន់ស្មាន ប្រហែលជា ជិត៤០គីឡូក្រាម។ ជាមួយគ្នានេះដែរក៏ធ្វើការឃាត់ ខ្លួនជនសង្ស័យចំនួន៤នាក់ ក្នុងនោះមាន ស្រី១នាក់ជាជនជាតិថៃម្នាក់។ បើតាមសមត្ថកិច្ចថា បច្ចុប្បន្ន ជនសង្ស័យ រួមទាំងវត្ថតាង ត្រូវបាននគរបាលជំនាញ កសាងសំណុំរឿងទៅតាមនិតិវិធីច្បាប់៕SRP

ខេត្តកំពង់ចាម​៖លោកស្រីញូង ចរិយា អ៊ុន ចាន់ដា ប្រធានកិត្តិយសសាខាសមាគមនារីកម្ពុជា ដើម្បី សន្តិភាព និងអភិវឌ្ឍន៍ ខេត្តកំពង់ចាម និងលោកជំទាវ ជាសមាជិកព្រឹទ្ធសភា រដ្ឋសភា និងក្រុមការងារសាខាសមាគមនារី ជាច្រើនរូបទៀត ​នៅព្រឹកមិញនេះ បានអញ្ជើញជួបសំណេះសំណាល និងនាំយកអំណោយជាសម្ភារ ជាម៉ាស ចំនួន ១.០០០ម៉ាស ទឹកក្រូច ចំនួន ១៩កេស និងទឹកសុទ្ធ ចំនួន ១៩កេស ផ្តល់ជូនក្រុមការងារប្រចាំការ នៅមណ្ឌលចត្តាឡីស័ក មជ្ឈមណ្ឌលគរុកោសល ភូមិភាគ ខេត្តកំពង់ចាម។

​ក្នុងឱកាសនោះ លោកស្រី ប៉ាង ដានី ប្រធានសាខាសមាគមនារីខេត្ត បានកោតសរសើរ និងថ្លែងអំណរគុណ ដល់ក្រុមការងារប្រចាំការ នៅមណ្ឌលចត្តាឡីស័ក ដែលបានខិតខំប្រឹងប្រែង និងចំណាយពេលវេលា ដើម្បី ដោះស្រាយទុក្ខលំបាក ក៏ដូចជា ជាការចូលរួមចំណែក ក្នុងការយកចិត្តទុកដាក់ ថែរក្សាសន្តិសុខសណ្ដាប់ សុខសុវត្ថិភាព ជូនប្រជាពលរដ្ឋ ជាពិសេស ការយកចិត្តទុកដាក់ ជួយជ្រោមជ្រែង ដល់បងប្អូនប្រជាពលរដ្ឋ ដែលកំពុងធ្វើចត្តាឡីស័ក ដើម្បី រួមគ្នាក្នុងការប្រយុទ្ធប្រឆាំងជាមួយជម្ងឺកូវីដ។

លោកស្រី ក៏បានផ្តាំផ្ញើ ដល់អាជ្ញាធរ សូមបន្តការយកចិត្តទុកដាក់​ខ្ពស់ និងតាមដានសុខភាព បងប្អូនដែលកំពុងធ្វើចត្តាឡីស័ក នៅតាមមណ្ឌលនីមួយៗ ដើម្បី បញ្ជូនពួកគេទៅព្យាបាលទាន់ពេលវេលា។ ជាមួយនោះ ក៏សូមបងប្អូនចូលរួមអនាម័យ ដោយអនុវត្តន៍ ៣ការពារ និង៣កុំ ដើម្បី បញ្ចៀសការចម្លងមេរោគ ដ៏កាចសាហាវនេះ ទៅដល់ប្រជាពលរដ្ឋផ្សេងៗទៀត៕SRP

ខេត្តកំពង់ចាម៖លោកគីមសួរ ភីរុណ ប្រធានមន្ទីរសុខាភិបាលខេត្តកំពង់ចាម នៅព្រឹកមិញនេះ បានចុះសួរសុខទុក្ខបុគ្គលិកនៅមណ្ឌលសុខភាពឃុំមៀន នៃស្រុកព្រៃឈរ។

ក្នុងនាមថ្នាក់ដឹកនាមន្ទីរសុខាភិបាលនៃរដ្ឋបាលខេត្តកំពង់ចាមលោកប្រធានបាន ផ្តល់នូវសម្ភារមួយចំនួនសម្រាប់ប្រើប្រាស់ក្នុងមណ្ឌលសុខភាពឃុំមៀន។ រួមមាន ម៉ាស៊ីនបាញ់កម្ដៅមានជើងទម្ររមួយដើម អាកុល មួយកាដុង៥លីត្រ ម៉ាសបួនប្រអប់ ថវិកាចំនួន ១០០ដុល្លារ សម្រាប់កសាងសង់រោងដាក់ម៉ូតូ និង សម្រាប់បុគ្គលិកម្នាក់ទទួលបាន សាប៊ូកក់សក់១ដប សាប៊ូ ដុសខ្លួន១ដុំ និងថ្នាំដុសធ្មេញ១ ផងដែរ។

លោកប្រធានមន្ទីរបានមានប្រសាសន៍ថា បុគ្គលិកត្រូវចេះរួមគ្នា បម្រើប្រជាពលរដ្ឋ ឲ្យបានល្អនិងចេះស្រលាញ់គ្នា និងថែរក្សាសុខភាពឲ្យបានល្អ ដោយត្រូវរួមគ្នាធ្វើ រួមគ្នាគិត រួមគ្នាអនុវត្តការងារឲ្យបានល្អប្រសើរ៕SRP

ខេត្តកំពង់ចាម​៖លោកស្រី ម៉ែន សំអន រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បាននាំយកទៀនវស្សា និងទេយ្យទាន ប្រគេនដល់ព្រះសង្ឃដែលគង់ចាំព្រះវស្សាអស់ត្រីមាស​ នៅវត្តអង្គួញដីសិរីសុខា​ ឃុំក្រឡា​ ស្រុកកំពង់សៀម​ ខេត្តកំពង់ចាម​។

ពិធីនេះត្រូវបានរៀបចំឡើងនៅថ្ងៃទី១៧​ ខែមិថុនា​ ព្រឹកមិញនេះ ដោយមានការ​អញ្ជើញ​ចូលរួម​ពី​​លោកជំទាវ ញូង ចរិយា អ៊ុន ចាន់ដា ប្រធានកិត្តយសសាខាសមាគម នារីកម្ពុជា ដើម្បី សន្តិភាព និងអភិវឌ្ឍន៍ ខេត្តកំពង់ចាម លោកជំទាវ ប៉ាង ដានី អភិបាលរងខេត្ត និងជាប្រធានសាខាសមាគមនារីកម្ពុជា លោកជំទាវ ស្រី គឹមឆយ សមាជិករដ្ឋសភា​ និង​សហការី​ជាច្រើន​រូបផងដែរ​។ ​

លោកស្រី ម៉ែន សំអន បាន​លេីកឡេីងថា ដោយសារប្រទេសជាតិយេីងមានសុខសន្តិភាព ក្រោម​ការ​ដឹកនាំ​ របស់​សម្ដេចតេជោ​ ហ៊ុន​ សែន​ ទេីបយេីងមាន​ឱកាស​ធ្វើ​បុណ្យ​ដាក់ទាន​ជួបជុំ​គ្នា​ បង្ហាញ​ពី​ទឹកចិត្ត​គោរព​ស្រលាញ់​ និង​ប្រតិបត្តិ​តាម​ឱវាទ​របស់ព្រះពុទ្ធសាសនា ដែលជាសាសនារបស់រដ្ឋ ដើម្បីថែរក្សាការពារវិស័យព្រះពុទ្ធសាសនា​ ​និង​ដើម្បីប្រាថ្នាយកកុសលផលបុណ្យ សម្រាប់ជាតិនេះផង និងសម្រាប់អនាគតជាតិផងដែរ។

លោកស្រី ក៏បានក្រើនរំលឹកដល់​ប្រជាពលរដ្ឋទាំងអស់​ សូម​ឲ្យមានការ​ចូលរួម​ជាមួយ​អាជ្ញាធរ​ ដេីម្បី​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ ជាពិសេស​ត្រូវ​អនុវត្ត​វិធានការ​ ៣ការពារ​ ៣កុំ​ តាម​ការណែនាំ​របស់​ប្រមុខ​រាជរដ្ឋាភិបាល​។

សូមជម្រាបថាទេយ្យវត្ថុ ដែលបានប្រគេន រួមមាន៖ ទៀនវស្សា​ ផ្កាស្រស់ ផ្លែឈើ​​ ស្លាដក់​ បាត​ តែ​ ស្ករស​ ទឹកបរិសុទ្ធ​ ទឹកក្រូច​ ទឹកដោះគោ​ មី​ ​អង្ករ​ សាច់ក្រក​ ត្រីងៀត​ ត្រីខ​ ម៉ាស​ អាល់កុល​ ជែលលាងដៃ​ និងបច្ច័យ ចំនួន​ ១លាន​ ៩៥ម៉ឺនរៀល​​ និង​៤០០ដុល្លារ​អាមេរិក​ ផងដែរ៕SRP

ខេត្តសៀមរាប៖លោកប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប បានអញ្ជើញប្រគល់ផ្ទះមួយខ្នងអំណោយ របស់សម្ដេចហ៊ុន សែន ជូនអតីតយុទ្ធជននៅស្រុកប្រាសាទបាគង។

ការប្រគល់អំណោយផ្ទះ នៅថ្ងៃព្រហស្បតិ៍ ទី១៧ ខែមិថុនា ឆ្នាំ២០២១នេះ នៅភូមិសួង ឃុំត្រពាំងធំ ស្រុកប្រាសាទបាគង ខេត្តសៀមរាប។

គ្រួសារទទួលបាន១ខ្នង សម្ភារប្រើប្រាស់ និងថវិកាមួយចំនួននេះ គឺលោកស្រី នួន ឈរ មានជីវភាព ទីទាល់ក្រលំបាក ត្រូវជាភរិយារបស់អតីតយុទ្ធជន ដែលបានពលី នៅភូមិសួង ឃុំត្រពាំងធំ ស្រុកប្រាសាទបាគង ខេត្តសៀមរាប៕SRP

ខេត្តប៉ៃលិន៖លោកស្រី បាន ស្រីមុំ អភិបាលខេត្តប៉ៃលិន បានសូមបួងសួងបារមី យាយយ៉ាត ជួយកូនចៅទូទាំងប្រទេស ចៀសផុត ពីជំងឺកូវីដ-១៩។

នេះបើយោងតាមទំព័រហ្វេសប៊ុកផ្លូវការ របស់លោកស្រីអភិបាលខេត្តប៉ៃលិន ដែលបានបង្ហោះរូបភាព និងអមដោយសំណេរបងសួង នៅថ្ងៃទី ១៧ ខែមិថុនាឆ្នាំ ២០២១ នេះ។

នៅលើទំព័រ page facebook លោកស្រីអភិបាលខេត្តបានសរសេរថា៖ កូនលើកម្រាមដៃដប់🙏សូមបួងសួងបារមី អ្នក
ម៉ែយ៉ាត សូមតាមបីបាច់ថែរក្សា កូនចៅ ទូទាំងប្រទេស ជាពិសេស កូនចៅ ចៅទួត ទូទាំងខេត្តប៉ៃលិន ទទួលបានសុខភាពល្អ ចៀសអោយផុត ពីជំងឺដ៍កាចសាហាវ មេរោគកូវីដ-១៩ ទាំងអស់គ្នា🙏។

លោកស្រី បាន ស្រីមុំ បានសរសេរបន្តថា៖
កូនរួមទាំងក្រុមការងារទាំងអស់ខិតខំប្រឹងប្រែងអោយអស់ពីសម្ថភាព មិនហត់នឿយឡើយ ដើម្បីការពារ ពុកម៉ែ បងប្អូន តែទោះបីយ៉ាងណា សូម ពុកម៉ែបងប្អូន ចេះថែរក្សាការពារ សុខភាពខ្លួនឯងត្រូវអនុវត្តន៍តាម ការណែនាំ របស់ ប្រមុខរាជរដ្ឋាភិបាល និង ក្រសួងសុខាភិបាល អោយបានជាប់ជាប្រចាំ កុំភ្លេចខ្លួនអោយសោះ ៣កុំ ៣ការពារ ពាក់ម៉ាស់ លាងដៃអោយបាន ញឹកញាប់ រក្សាគម្លាត កុំជួបជុំមនុស្សច្រើនជាដាច់ខាត។

អភិបាលខេត្តប៉ៃលិនរូបនេះបានបន្តទៀតថា
-គោរពអរគុណ🙏សម្តេចតេជោ ហ៊ុនសែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចទាំងទ្វេ បានគិតគូរគ្រប់ជ្រុងជ្រោយជួយកូនចៅជាង ១៦ លាននាក់ សម្តេច នៅរួមសុខរួមទុក្ខជាមួយកូនចៅគ្រប់ពេលវេលាគ្រប់កាល:ទេស: ទាំងអស់។
គោរពជូនពរសម្តេចទទួលបានសុខភាពល្អ ជាម្លប់ដ៍ត្រជាក់ត្រជុំសំរាប់កូនចៅជារៀងរហូត។

គោរពជូនពរ ពុកម៉ែបងប្អូនទទួលបានសុខភាពល្អគ្រប់ៗគ្នា 🙏- យើងត្រូវរួមសាមគ្គីគ្នាប្រយុទ្ធទប់ស្កាត់ ក្នុងគ្រាលំបាកនេះ យើងនិងឆ្លងផុតការលំបាកនេះជាមួយគ្នា 🙏💪💪💪៕SRP

ខេត្តកំពង់ចាម៖ផ្ទះប្រជាពលរដ្ឋចំនួន០៣ ខ្នង ត្រូវបានអគ្គិភ័យឆាប់ឆេះបំផ្លាញទាំងស្រុង។

ហេតុការណ៍ ស្ថិតនៅភូមិជង្ហុក ឃុំអំពិល ស្រុកកំពង់សៀម ខេត្តកំពង់ចាម នៅថ្ងៃទី១៦ ខែមិថុនា ឆ្នាំ ២០២១ ម្សិលមិញ។

អាជ្ញាធរមូលដ្ឋានបានឲ្យដឹងថា ផ្ទះជនរងគ្រោះដោយករណីគ្រោះអគ្គិភ័យខាងលើ

ទី១ ផ្ទះរបស់ឈ្មោះមាស សេង ភេទស្រីអាយុ៨៥ឆ្នាំជាតិខ្មែរ ខូចខាត ផ្ទះ០១ខ្នងទំហំ ០៤ម×០៤មធ្វើពីឈើប្រក់ដែកសង្កសីជញ្ជាំងដែក និងសម្លៀកបំពាក់ មួយចំនួន។

ទី២ ផ្ទះរបស់ឈ្មោះ ឯក ចាន់ថុន ភេទស្រីអាយុ ៤៥ឆ្នាំ ជាតិខ្មែរ ខូចខាតបាត់បង់ ផ្ទះទំហំ ០៥ម×០៦ម ធ្វើពីឈើប្រក់ដែកសង្កសី ជញ្ជាំងឈើចំនួន០១ខ្នង,ទូរទឹកកកចំនួន០១,ម៉ាសុីនដេរចំនួន០១,ម៉ាសុីនបោកខោអាវចំនួន០១ , គ្រែឈើចំនួន០១ និងសម្ភារះសម្លៀកបំពាក់មួយចំនួន។

ទី៣ ផ្ទះរបស់ឈ្មោះ អេង ស្រីណែត ភេទស្រីអាយុ២៣ឆ្នាំជាតិខ្មែរ .ខូចខាតបាត់បង់ផ្ទះទំហំ០៤ម×៥ម ធ្វើពីឈើប្រក់ដែកជញ្ជាំងឈើចំនួន០១ខ្នងនិងសម្លារះសម្លៀកបំពាក់មួយចំនួន។

អាជ្ញាធរបានឲ្យដឹងទៀតថាករណីអគ្គិភ័យនេះ មិនបណ្តាលរងគ្រោះមនុស្សឡើយ មូលហេតុ មកពីឆ្លងចរន្ធអគ្គីសនី៕SRP

ភ្នំពេញ៖ក្រសួងមហាផ្ទៃ បានចេញសេចក្តីសម្រេចស្តីពីការបង្កើតក្រុមការងាររដ្ឋាភិបាលឌីជីថល បច្ចេកវិទ្យាគមនាគមន៍និងព័ត៌មាន ក្រសួងមហាផ្ទៃ។ នេះបើតាមលិខិតដែលចុះហត្ថលេខាដោយសម្ដេចស ខេង រដ្ឋមន្ត្រីក្រសួងមហាផ្ទៃ។

នៅក្នុងលិខិតបានបញ្ជាក់ថា លោក សក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ ជាប្រធាន និងមានសមាភាពជាអនុប្រធានចំនួន ០២រូប ព្រមទាំងសមាជិក១២រូប។ សម្រាប់ក្រុមការងាររដ្ឋាភិបាលឌីជីថល បច្ចេកវិទ្យាគមនាគមន៍និងព័ត៌មាននេះផងដែរ មានលេខាធិការដ្ឋានមួយជាជំនួយការដែលដឹកនាំដោយនាយកដ្ឋានព័ត៌មានវិទ្យា នៃអគ្គលេខាធិការដ្ឋាន ក្រសួងមហាផ្ទៃ។

គួរបញ្ជាក់ថា ក្រុមការងាររដ្ឋាភិបាលឌីជីថល បច្ចេកវិទ្យាគមនាគមន៍ និងព័ត៌មាន របស់ក្រសួងមហាផ្ទៃ មានតួនាទី និងភារកិច្ចដូចខាងក្រោម ៖

ទី១-ធ្វើជាសេនាធិការជូនក្រសួងមហាផ្ទៃ លើកការងាររដ្ឋាភិបាលឌីជីថលក្របខ័ណ្ឌក្រសួងមហាផ្ទៃ និងគ្រប់គ្រងគម្រោងបច្ចេកវិទ្យាគមនាគមន៍ និងព័ត៌មាន នៅតាមបណ្ដាអគ្គនាយកដ្ឋាន និងអង្គភាពចំណុះក្រសួង។

ទី២-សហការជាមួយដៃគូពាក់ព័ន្ធ ទីប្រឹក្សា និងអ្នកជំនាញតាមការចាំបាច់ ដើម្បីរៀបចំកសាងផែនការមេបច្ចេកវិទ្យាគមនាគមន៍ និងព័ត៌មាន និងការបណ្ដុះបណ្ដាលលើកកម្ពស់សមត្ថភាពធនធានមនុស្ស។

ទី៣-គ្រប់គ្រងការធ្វើសមាហរណកម្មតភ្ជាប់រវាង ប្រព័ន្ធបច្ចេកវិទ្យាគមនាគន៍ និងព័ត៌មាន របស់ក្រសួងមហាផ្ទៃ ជាមួយប្រព័ន្ធបច្ចេកវិទ្យាគមនាគមន៍ និងព័ត៌មាន នៃបណ្ដាក្រសួង-ស្ថាប័នពាក់ព័ន្ធរបស់រាជរដ្ឋាភិបាលកម្ពុជា។

ទី៤-គ្រប់គ្រងការធ្វើបច្ចុប្បន្នភាព វាយតម្លៃគុណភាពប្រព័ន្ធ និងសម្ភារៈបច្ចេកទេស បច្ចេកវិទ្យាគមនាគមន៍ និងព័ត៌មាន ឲ្យសមស្របតាមស្ថានភាពរីកចម្រើននៃបច្ចេកវិទ្យាពិភពលោក បម្រើដល់ការងារជំនាញ និងការងារផ្ដល់សេវាសាធារណៈ ឲ្យកាន់តែមានប្រសិទ្ធភាព។

ទី៥-រៀបចំគោលនយោបាយ និងលិខិតបទដ្ឋានគតិយុត្តពាក់ព័ន្ធនានា ដើម្បីធានាដល់ការងារអនុវត្តប្រព័ន្ធបច្ចេកវិទ្យាគមនាគមន៍ និងព័ត៌មាន ការងាររដ្ឋាភិបាលឌីជីថល ពលរដ្ឋឌីជីថល និងធុរកិច្ចឌីជីថល ក្របខ័ណ្ឌក្រសួងមហាផ្ទៃ។

ទី៦-រៀបចំរបាយការណ៍អំពីលទ្ធផលការងារតាមដំណាក់កាលនីមួយៗ ជូនរដ្ឋមន្ដ្រីដើម្បីជូនជ្រាប ឬស្នើសុំមតិដឹកនាំតាមការចាំបាច់៕SRP