ភ្នំពេញ៖ប៉ូលិសប្រតិកម្មរហ័ស នៃស្នងការគរបាលរាជធានីភ្នំពេញ បានថ្លែងថា បុរសឈ្មោះ ឌិត សុវណ្ណារិទ្ធ ដែលបានបង្កើតគណនីហ្វេសបុកក្លែងក្លាយ ឈ្មោះ «ទទក-TVK2 » ដោយបានប្រើប្រាស់ឡូហ្កូ និងឈ្មោះទូរទស្សន៍ជាតិនៃកម្ពុជា និងបានយកទៅផ្សព្វផ្សាយព័ត៌មានមិនពិត បានចូលខ្លួនមកទទួលកំហុស ធ្វើកិច្ចសន្យា និងសុំទោសជាសាធារណ: នៅថ្ងៃទី០១ ខែមេសា ឆ្នាំ២០២១ព្រឹកមិញនេះ។
ប៉ូលិសប្រតិកម្មរហ័សបានបន្តថាដោយអនុវត្តតាមបទបញ្ជារបស់លោកស ថេត អគ្គស្នងការរង និងជាស្នងការនគរបាលរាជធានីភ្នំពេញ សមត្ថកិច្ចជំនាញការិយាល័យប្រឆាំងបទល្មើសបច្ចេកវិទ្យា ផែនការងារសន្តិសុខ នៃស្នងការដ្ឋាននគរបាលរាជធានីភ្នំពេញ បានធ្វើការស្រាវជ្រាវ និងកោះហៅឈ្មោះ ឌិត សុវណ្ណរិទ្ធ ដើម្បីធ្វើការសាកសួរ ទាក់ទងទៅនឹងការបង្កើតគណនីយហ្វេសប៊ុកក្លែងក្លាយរបស់ «ទទក»។ បើតាមប៉ូលិសថាបុគ្គលរូបនេះបានសារភាព ទទួលស្គាល់នូវកំហុស ដែលខ្លួនបានធ្វើ ដោយបានធ្វើកិច្ចសន្យា និងសុំទោសជាសាធារណ:ផងដែរ។ ដើម្បីចៀសវាងកុំឲ្យប្រជាពលរដ្ឋ មានការយល់ច្រឡំ តទៅទៀតសមត្ថកិច្ចជំនាញបានធ្វើការលុបគណនីក្លែងក្លាយនេះចោលហើយ៕SRP
