ភ្នំពេញ៖វ៉ាក់សាំងប្រយុទ្ធប្រឆាំងជំងឺកូវីដ១៩ ចំនួន ៤លានដូសបន្ថែមទៀត ក្នុងនោះ ប្រភេទសុីណូហ្វាមចំនួន ១លានដូស និងប្រភេទវ៉ាក់សាំងសុីណូវ៉ាក់ចំនួន ៣លានដូស ដែលកម្ពុជាបានបញ្ជាទិញ ពីរដ្ឋាភិបាលចិន នឹងដឹកមកដល់ប្រទេសកម្ពុជា នៅថ្ងៃទី ១០ ខែ កក្កដា ឆ្នាំ២០២១ ស្អែកនេះ។

សូមជម្រាបថា កន្លងមក ក៏ដូចជាបច្ចុប្បន្នប្រមុខរាជរដ្ឋាភិបាលកម្ពុជា ដឹកនាំដោយ សម្តេចតេជោ ហ៊ុន សែន បានដាក់ចេញយុទ្ធសាស្ត្រចាក់វ៉ាក់សាំងនេះឱ្យបានលឿន តាមដែលអាចធ្វើទៅបាន ជូនដល់ប្រជាពលរដ្ឋ របស់ខ្លួន។ ទន្ទឹមនឹងនេះរាជរដ្ឋាភិបាលស្វះស្វែងរកវ៉ាក់សាំង ហើយបាននាំមកដល់នូវវ៉ាក់សាំងជាបន្តបន្ទាប់សម្រាប់ចាក់ជូនប្រជាពលរដ្ឋរបស់ខ្លួន។

មេដឹកនាំកម្ពុជា សម្តេចតេជោ ហ៊ុន សែន បានដាក់ចេញផែនការចាក់វ៉ាក់សាំង ជូនប្រជាពលរដ្ឋអាយុចាប់ពី ១៨ឆ្នាំឡើង ប្រមាណ១៣លាននាក់ ត្រូវនឹងវ៉ាក់សាំងប្រមាណ ២៦លានដូស។កម្ពុជានឹងសម្រេចផែនការចាក់វ៉ាក់សាំង ជូនប្រជាពលរដ្ឋចំនួន ១០លាននាក់ នៅក្នុងឆ្នាំ២០២១នេះ ឬយ៉ាងយូរបំផុតនៅដើមឆ្នាំ២០២២។

ទន្ទឹមនឹងនេះរាជរដ្ឋាភិបាល បានស្វះស្វែងរកវ៉ាក់សាំង ហើយបាននាំមកដល់នូវវ៉ាក់សាំងជាបន្តបន្ទាប់សម្រាប់ចាក់ជូនប្រជាពលរដ្ឋ របស់ខ្លួន ដែលគិតត្រឹមថ្ងៃទី ៩ ខែកក្កដា ឆ្នាំ ២០២១នេះ បូកទាំងវ៉ាក់សាំងចំនួន ៤លានដូសដែលនឹងដឹកមកនៅព្រឹកស្អែក កម្ពុជានឹងមានវ៉ាក់សាំងចំនួន ១៦,០២៤,០០០ដូស សម្រាប់ចាក់ជូនប្រជាពលរដ្ឋ ក្នុងនោះ

១-ជំនួយរបស់រដ្ឋាភិបាលចិនផ្តល់ជូនកម្ពុជា (សុីណូហ្វាម) ចំនួន ២,២០០,០០០ ដូស

២-ជំនួយពីមជ្ឈមណ្ឌល COVAX(CoviShield) ចំនួន ៣២៤,០០០ ដូស

៣-ការបញ្ជាទិញរបស់រាជរដ្ឋាភិបាលរួមមាន សុីណូវ៉ាក់ ចំនួន ១០,៥០០,០០០ ដូស និង សុីណូហ្វាម ចំនួន ៣,០០០,០០០ ដូស។ ហើយវ៉ាក់សាំងកូវីដ-១៩ដែលកំពុងទទួលបាន ហើយកំពុងដំណើរការជូនប្រជាពលរដ្ឋនេះ គឺភាគច្រើន បំផុតជារបស់ប្រទេសចិន។

សូមបញ្ជាក់ថា ក្នុងខែកក្កដា ឆ្នាំ ២០២១នេះ កម្ពុជានឹងទទួលវ៉ាក់សាំងការពារជំងឺកូវីដ-១៩ សរុបចំនួន ៦លានដូស ជាបន្តបន្ទាប់មានដូចខាងក្រោម៖

*នៅថ្ងៃទី ៦ ខែកក្កដា ឆ្នាំ ២០២១

– វ៉ាក់សាំងបង្ការជំងឺកូវីដ-១៩ សុីណូហ្វាម មកដល់ចំនួន ១,០០០,០០០ដូស

*ថ្ងៃទី ១០ ខែកក្កដា ឆ្នាំ ២០២១

– វ៉ាក់សាំងបង្ការជំងឺកូវីដ-១៩ ចំនួន ៤លានដូស(សុីណូហ្វាម)ចំនួន ១,០០០,០០០ដូស និង(សុីណូវ៉ាក់)ចំនួន ៣,០០០,០០០ដូស

*ពាក់កណ្ដាល ខែកក្កដា ឆ្នាំ ២០២១

– វ៉ាក់សាំងបង្ការជំងឺកូវីដ-១៩ (សុីណូហ្វាម) មកដល់ចំនួន ១,០០០,០០០ដូស

សូមជម្រាបបន្ថែមថា យោងតាមចំណារយល់ព្រម របស់សម្តេចហ៊ុន សែន វ៉ាក់សាំងការពារជំងឺកូវីដ-១៩ ដែលនឹងមកដល់ចំនួន ៦,០០០,០០០ដូសនេះ គណកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស នឹងរៀបចំផែនការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋ កម្មករ កម្មការនី តាមបណ្តាខេត្តនានានៅទូទាំងប្រទេសតាមផែនការដែលបានគ្រោងទុក។

បើគិតត្រឹមថ្ងៃទី៨ ខែកក្កដា ឆ្នាំ២០២១ ម្សិលមិញ ក្រសួងសុខាភិបាល បានចាក់វ៉ាក់សាំងកូវីដ-១៩ ជូនដល់ប្រជាពលរដ្ឋសរុបទូទាំងប្រទេសបានចំនួន ៤,៧៥០,២៦៥នាក់ ស្មើនឹង ៤៧.៥០%៕SRP

ខេត្តសៀមរាប៖អាជ្ញាធរបានសម្រេចអោយអាជីវករ ដែលចេញពីផ្សារលើធំថ្មី ទៅលក់នៅទីវាល ទល់មុខ សណ្ឋាគារសុខាសៀមរាប ជាបណ្តោះអាសន្ន។

ការសម្រេចបែបនេះ គឺបន្ទាប់ពីបានបិទខ្ទប់ផ្សារលើធំថ្មី ព្រោះតែការរីករាលដាលជម្ងឺកូវីដ១៩ ហើយក្រុមអាជីវករទាំងនោះ នាំគ្នាសម្រុកទៅដាក់តាំងទំនិញលក់លើចិញ្ចើមផ្លូវ៦០ម៉ែត្រ។

ថ្លែងប្រាប់អ្នកសារព័ត៌មាន អភិបាលក្រុងសៀមរាប លោកនួន ពុទ្ធារ៉ា ថា ជាការពិតណាស់អាជ្ញាធរបាន សម្រេចបែបនេះ។ ពីព្រោះថា ពួកគាត់បាននាំគ្នាទៅលក់លើចិញ្ចើមផ្លូវ៦០ម៉ែត្រ វាជាហានិភ័យខ្ពស់ រឿងចរាចរណ៍។ ម្យ៉ាងវិញទៀត ក៏ធ្វើអោយប៉ះពាល់សណ្តាប់ធ្នាប់ និងសន្តិសុខផងដែរ។

លោកនួន ពុទ្ធារ៉ា បន្តថា ចំពោះការសម្រេចអោយលក់នៅទីវាលមុខសណ្ឋាគារសុខាសៀមរាបនេះ ក៏អនុញាត្តអោយតែជាជីវករលក់ត្រី.បន្លែ.សាច់ និងគ្រឿងហូបប្រចាំថ្ងៃដែរ ព្រោះថាជារបស់ដែលអាចខូចពេលទុកយូ។ តែចំពោះអាជីវករ ដូចជាលក់ខោរអាវ. មាស.និងសម្ភារមិនមែនរបស់ហូបចុក គឺមិនអនុញាត្តឡើយ។

លោកអភិបាលបញ្ជាក់ថា ចំពោះការរៀបចំអោយលក់នេះដែរ គឺគ្រាន់ជាបណ្តោះអាសន្នរហូតដល់បើកដំណើរការផ្សារលើធំថ្មីវិញ។ តែក៏មិនត្រូវបានអោយក្រុមអាជីវករបង់ ប្រាក់អ្វីទាំអស់ រាប់ទាំងភាស៊ី និងអនាម័យជាដើម។ ក្នុង ករណីមានបុគ្គល ទៅទារប្រាក់ថ្លៃអ្វីមួយ អាជ្ញាធរនឹងចាក់វិធានការការភ្លាម។

ចំណែកអាជីវករលក់ត្រី.បន្លែ.សាច់ បាននិយាយប្រហាក់ប្រហែលគ្នាថា ការមកលក់លើចិញ្ចើមផ្លូវ ទោះបីមានវេលាខ្លី តែលក់ដាច់ជាងក្នុងផ្សារលើធំថ្មី។ ព្រោះទី នេះអ្នកទិញងាយស្រួល ដោយមិនបញ្ជ្រៀតគ្នា ហើយមិនចាំបាច់ឆ្លងកាត់ហ្វូងមនុស្ស។ តែក៏សុំថ្លែងអំណរ គុណដល់អាជ្ញាធរ ដែលយកចិត្តទុកដាក់ និងជួយសម្រួលដល់អាជីវករ ពេលជួបការលំបាកនាដំណាក់កាលកូវីដនេះ៕SRP

ភ្នំពេញ៖ប្រធានរដ្ឋសភាជាតិ នៃកម្ពុជា សម្ដេច ហេង សំរិន បានផ្ញើសារដល់រួមជាតិ ចូលរួមដាំកូនឈើ នៅគ្រប់ទីកន្លែង ដើម្បីជាប្រយោជន៍ ដល់ការរស់នៅ របស់មនុស្សនឹងសត្វ។

ក្នុងសារនៅលើទំព័រ page facebook របស់សម្ដេចហេង សំរិន បានសរសេរថា៖ សូមបងប្អូនជនរួមជាតិ ចូលរួមដាំកូនឈើ នៅគ្រប់ទីកន្លែង ដើម្បីជាប្រយោជន៍ ដល់ការរស់នៅរបស់មនុស្សសត្វ និងប្រព័ន្ធជីវៈចម្រុះ ការថែរក្សាការពារបរិស្ថាន ធនធានធម្មជាតិ ឱ្យបានគង់វង្សជាសម្បត្តិរបស់មនុស្សជាតិ តរៀងទៅ។

ការអំពាវនាវ របស់សម្ដេចហេង សំរិន ដល់ជនរួមជាតិ ឱ្យចូលរួមដាំកូនឈើ ស្របពេលក្នុងឱកាសអបអរសាទរពិធីបុណ្យ ”រុក្ខទិវា” ៩ កក្កដា ឆ្នាំ២០២១នេះ។

នៅក្នុងសារដដែល សម្ដេចហេង សំរិន បានបន្ថែមថា ថ្ងៃទី០៩ ខែកក្កដានេះ ជាទិវាដ៏មហានក្ខត្តឬក្សដែលយើង តែងតែប្រារព្ធពិធីបុណ្យនេះឡើងតាំងពីឆ្នាំ១៩៩២ ក្រោមព្រះរាជកិច្ចដឹកនាំរបស់ ព្រះបរមរតនកោដ្ឋ ព្រះបាទសម្តេចព្រះនរោត្តម សីហនុ។

សម្ដេចប្រធានរដ្ឋសភា បានបញ្ជាក់ថា៖ ជារៀងរាល់ឆ្នាំ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់តែងតែសព្វព្រះរាជហឬទ័យ ស្តេចយាងជាព្រះរាជាធិបតីដ៏ខ្ពង់ខ្ពស់បំផុតក្នុងពិធីបុណ្យដ៍មានសារៈសំខាន់នេះ។ ប៉ុន្តែចាប់ពីឆ្នាំ២០១៩មក ដោយសារតែការរាតត្បាតជំងឺកូវីដ១៩ យើងមិនបានរៀបចំទិវានេះឡើយ។ បុណ្យ “រុក្ខទិវា” បានរៀបចំធ្វើឡើងគោលបំណងបំផុសចលនាដាំដើមឈើឡើងវិញ និងលើកទឹកចិត្តដល់ប្រជាពលរដ្ឋចូលរួមថែរក្សាសម្បត្ដិព្រៃឈើ ជាពិសេស ដើម្បីបណ្តុះគំនិតថែរក្សា ការពារ និងគំនិតស្រលាញ់ព្រៃឈើ និងបរិស្ថានធម្មជាតិ៕SRP

ភ្នំពេញ៖សម្ដេចក្រឡាហោមស.ខេង ឧនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅព្រឹកនេះបានបង្ហាញអំពីលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆមាសទី១ ឆ្នាំ២០២១។

សម្ដេច ស ខេង បានបង្ហាញថា៖ នៅក្នុងរយៈពេល៦ខែដើមឆ្នាំ២០២១នេះ សមត្ថកិច្ចបានត្រួតពិនិត្យយានយន្តសរុបចំនួន១០២,៩៩៥គ្រឿង រួមមានម៉ូតូល្មើសចំនួន៧៧,៧៩៤គ្រឿង ក្នុងចំណោមនោះការល្មើសដោយសារមិនពាក់មួកសុវត្ថិភាពមាន៩០ភាគរយ សញ្ញាចរាចរណ៍៦ភាគរយ ផ្លាកលេខ២ភាគរយ ទូរស័ព្ទ២ភាគ និងបើកបរទាំងស្រវឹង១ភាគរយ។ រកឃើញរថយន្តល្មើសចំនួន ២៨,២០១គ្រឿង (រថយន្តធំជាង៦០០គ្រឿង) ហើយក្នុងចំណោមនោះរថយន្តល្មើសខ្សែក្រវ៉ាត៥២ភាគរយ ល្បឿន១៦ភាគរយ ទូរស័ព្ទ១០ភាគរយ សញ្ញាចរាចរណ៍៧ភាគរយ ផ្លាកលេខ៥ភាគរយ ល្មើសចំណុះ ៤ភាគរយ បណ្ណបើកបរ៤ភាគរយ ស្រវឹង១ភាគរយ ឆៀក១ភាគរយ និងអាជីវកម្ម១ភាគរយ។

នៅក្នងរយៈពេល១ឆមាសនេះដែរ មានគ្រោះថ្នាក់ចរាចរណ៍កើតឡើង ១២៦១លើក (ជាង៥០ភាគរយកើតឡើងពេលយប់) បណ្ដាលឱ្យស្លាប់មនុស្ស២០៩នាក់ និងរបួស ១៧៩២នាក់ ក្នុងនោះរបួសធ្ងន់១០៤៦នាក់។ តួលេខនេះ បើប្រៀបធៀបទៅនឹងគ្រោះថ្នាក់ចរាចរណ៍កាលពីឆ្នាំមុនបានថយចុះ៣៥៨លើក ស្មើនឹង២២ភាគរយ ក្នុងនោះស្លាប់១៥២នាក់ ស្មើនឹង១៨ភាគរយ និងរបួសថយ៦៥៧នាក់ ស្មើនឹង២៧ភាគរយ។ មូលហេតុនៃគ្រោះថ្នាក់ គឺពាក់ព័ន្ធនឹងល្បឿន៣៤ភាគរយ មិនគោរពសិទ្ធិ២៣ភាគរយ បត់៩ភាគរយ មិនប្រកាន់ស្តាំ១៦ភាគរយ វ៉ាជែង៨ភាគរយ ស្រវឹង៣ភាគរយ យានយន្ត៣ភាគរយ និងងងុយ១ភាគរយ។

សម្រាប់រយៈពេល៦ខែដើមឆ្នាំនេះ ភូមិសាស្ត្រដែលមានអត្រាគ្រោះថ្នាក់ច្រើន គឺរាជធានីភ្នំពេញ ដែលមានគ្រោះថ្នាក់៣៤០លើក ខេត្តកណ្តាល៨៦លើក និងខេត្តស្វាយរៀង៧៧លើក។ ចំណែកគ្រោះថ្នាក់រថយន្តដឹកកម្មករវិញ បានកើតមានឡើងនៅខេត្តស្វាយរៀង ខេត្តកំពង់ឆ្នាំង កំពង់ស្ពឺ និងតាកែវ ដែលបណ្ដាលឱ្យកម្មកររបួសសរុបចំនួន២៧៦នាក់។ បញ្ហាប្រឈម គឺបទល្មើសមិនពាក់មួកសុវត្ថិភាព ខ្សែក្រវ៉ាត់ និងល្មើសល្បឿននៅតែមានអត្រាខ្ពស់ ខណៈក្នុងចំណោមជនរងគ្រោះដែលស្លាប់មាន៧៨ភាគរយជាអ្នកជិះម៉ូតូ និង៦៩ភាគរយមិនពាក់មួកសុវត្ថិភាព។

ជាថ្មីម្ដងទៀត ខ្ញុំសូមអំពាវនាវជនរួមជាតិទាំងអស់ សូមប្រកាន់យកការបើកបរដោយគោរពច្បាប់ចរាចរណ៍ឱ្យគ្រប់ៗគ្នា និងគ្រប់មធ្យោបាយធ្វើដំណើរ ព្រមទាំងមានស្មារតីប្រុងប្រយ័ត្នឱ្យបានខ្ពស់ និងគ្រប់ពេលវេលា។ បើស្រលាញ់អាយុជីវិតអ្នក និងក្រុមគ្រួសារអ្នក ព្រមទាំងគោរពជីវិត និងសេចក្ដីសុខអ្នកដទៃ សូមរួមគ្នាគោរពច្បាប់ឱ្យបានល្អ។ នៅពេលយើងគ្រប់គ្នាគោរពច្បាប់បានល្អ នោះនឹងធ្វើឱ្យស្ថានភាពចរាចរណ៍នៅក្នុងប្រទេសយើងមានភាពល្អប្រសើរ កាត់បន្ថយបានអ្នកស្លាប់ របួស ពិការ ការខាតបង់ថវិកា និងទ្រព្យសម្បត្តិ ព្រមទាំងរួមចំណែកលើកតម្កើងកិត្តិយសជាតិផងដែរ។ ជាមួយគ្នានេះដែរ សម្តេចស ខេង ក៏បានសរសេរពាក្យស្លោក ថា ថ្ងៃនេះ ថ្ងៃស្អែតកុំឲ្យមានគ្រោះថ្នាក់ចរាចរណ៍! ការពារជីវិតអ្នក ត្រូវពាក់មួកសុវត្ថិភាព! បើកបរលើសល្បឿនដែលច្បាប់កំណត់ ងាយប្រឈមនឹងគ្រោះថ្នាក់! គោរពសញ្ញាចរាចរណ៍ បើកបរសុវត្ថិភាព!៕SRP

ខេត្តសៀមរាប៖បុរសម្នាក់បានស្លាប់ភ្លាមៗ ខណ:ជិះម៉ូតូត្រូវបានរថយន្តបុកចំពេញទំហឹង។

ហេតុការណ៍នេះបានកើតឡើងនៅវេលាម៉ោង ២០និង៣០ នាទី ថ្ងៃទី ០៨ ខែកក្កដា ឆ្នាំ ២០២១ នៅចំណុចភូមិគោលថ្មី ឃុំពពេល ស្រុកសូនិគម លើកំណាត់ផ្លូវកៅស៊ូ លេខ៦៤។

សមត្ថកិច្ចស្រុកសូនិគមបានរាយការណ៍ ប្រាប់បណ្ដាញសៀមរាបប៉ុស្តិ៍ នៅព្រឹកនេះថាករណីគ្រោះថ្នាក់ចរាចរណ៍នេះ កើតឡើងរវាងរថយន្តម៉ាកកាមរីពណ៌ទឹកប្រាក់ ពាក់ស្លាកលេខភ្នំពេញព 2F 0913 អ្នកបើកបរពុំស្គាល់អត្តសញ្ញាណ (រត់គេចខ្លួនបាត់) បើកបុកម៉ូតូម៉ាកវ៉េវពណ៌ឈាមជ្រូក គ្មានស្លាកលេខ បណ្ដាលឲ្យស្លាប់មនុស្សម្នាក់ជាអ្នកបើកបរម៉ូតូ។

ជនរងគ្រោះមាន ឈ្មោះ សំបូរ វិបុល អាយុ២៤ឆ្នាំ មានទីលំនៅភូមិចុងស្ពាន ឃុំខ្វាវ ស្រុកជីក្រែង ខេត្តសៀមរាប។បច្ចុប្បន្នរថយន្ត និង ម៉ូតូ ត្រូវបានសមត្ថកិច្ចយកទៅរក្សាទុក នៅកន្លែងអធិការនគរបាលស្រុក៕SRP

ភ្នំពេញ៖នាយករដ្ឋមន្ត្រី ហ៊ុន សែន នៅព្រឹកថ្ងៃសុក្រ ទី៩ ខែកក្កដា ឆ្នាំ២០២១នេះ  នឹងអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រីតាមប្រព័ន្ធអនឡាញ (Zoom)។

សម្រាប់របៀបវារៈនៃកិច្ចប្រជុំមានដូចតទៅ៖
១-សេចក្តីព្រាងច្បាប់ស្តីពីវិនិយោគនៃព្រះរាជាណាចក្រកម្ពុជា។
២-សេចក្តីព្រាងច្បាប់ ស្តីពីវិសោធនកម្មមាត្រា ១២៣ មាត្រា១៣៨ មាត្រា១៦២ មាត្រា៣០០ មាត្រា៣៤៣ មាត្រា៣៥០ មាត្រា៣៦៣ មាត្រា៣៥០ មាត្រា៣៦៣ និងមាត្រា៣៦៧ នៃច្បាប់ស្តីពីការងារ ដែលត្រូវប្រកាសឱ្យប្រើ ដោយព្រះរាជក្រមលេខ ជស/រកម០៣៩៧/០១ ចុះថ្ងៃទី១៣ ខែមីនា ឆ្នាំ១៩៩៧”។
៣-បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តពីស្ថាប័ននីតិប្បញ្ញត្តិលើសេចក្តីព្រាងច្បាប់ស្តីពី ការអនុម័តយល់ព្រមលើពិធីសារធ្វើវិសោធនកម្មកិច្ចព្រមព្រៀងអាស៊ានបូកបី ស្តីពីការត្រៀមបម្រុងអង្ករសង្រ្កោះបន្ទាន់៕SRP

ភ្នំពេញ៖សម្ដេចហ៊ុន សែននាយករដ្ឋមន្ត្រី បានលើកឡើងថា សូម​បងប្អូន​ប្រជាពលរដ្ឋ​ខ្មែរ​ ទូ​ទាំង​ប្រទេស ចូលរួម​ស្រឡាញ់​ថែរក្សា​ការពារ​ព្រៃឈើ នឹង​ចូលរួម​ដាំ​ដុះ កូន​ឈើ​ ថែរក្សា​ការពារ​បរិស្ថាន​ធម្មជាតិ​ ឲ្យ​បាន​គង់វង្ស​នៅ​គ្រប់​ទីកន្លែង ដើម្បី​ជា​ប្រយោជន៍ ដល់​ការ​រស់នៅ​របស់​ខ្លូ​ន​យើង​ផង សហគមន៍​យើង​ផង និង​ជីវិត​សត្វព្រៃ​គ្រប់​ប្រភេទ​ផង ព្រមទាំង​ប្រព័ន្ធ​ជីវៈចម្រុះ​ជា​ច្រើន​ផង​​ដែល​ជា​សម្បត្តិ​របស់​មនុស្សជាតិ​នៅ​គ្រប់​ជំនាន់​។

នេះបើយោងតាមសំណេរ របស់សម្ដេចតេជោហ៊ុន សែន ដែលបានបង្ហោះនៅលើទំព័រហ្វេសប៊ុកនៅព្រឹកថ្ងៃទី០៩ ខែកក្កដា ឆ្នាំ២០២១នេះ។

សម្ដេចហ៊ុន សែន បានសរសេរថា អបអរសាទរបុណ្យ«រុក្ខទិវា» ០៩ កក្កដា ឆ្នាំ២០២១! បុណ្យ​«​រុក្ខទិវា​»​ត្រូវ​បាន​បង្កើត​ឡើង​នៅ​ក្នុង​ឆ្នាំ ១៩៥២ ក្រោម​ព្រះរាជកិច្ច​ដឹកនាំ​របស់ ព្រះ​បរម​រតន​កោ​ដ ព្រះ​មហា​វីរក្សត្រ ព្រះករុណា ព្រះបាទ​សម្តេចព្រះ នរោត្តម សីហ​នុ ក្នុង​គោលបំណង​បំផុស​ចលនា​ដាំ​ដើមឈើ​ឡើង​វិញ និង​អោយ​ប្រជាពលរដ្ឋ​ចូលរួម​ថែរក្សា​សម្បត្ដិ​ព្រៃឈើ ជា​ពិសេស ដើម្បី​បណ្តុះ​គំនិត​ថែរក្សា ការពារ និង​គំនិត​ស្រលាញ់​ព្រៃឈើ និង​បរិស្ថាន​ធម្មជាតិ​របស់​ប្រទេស​៕SRP

ខេត្តព្រះវិហារ៖មានការលើកឡើងថាភ្នំត្បែងដែលត្រូវបានចុះបញ្ជីបេតិកភណ្ឌធម្មជាតិ ត្រូវបានរងការកាប់បំផ្លាញយ៉ាងធ្ងន់ធ្ងរ ពីសំណាក់ក្រុមអ្នកបំផ្លិចបំផ្លាញធនធានធម្មជាតិ ដើម្បីយកឈើប្រណីតទៅលក់ឲ្យមេឈ្មួញ ហើយក៏មិនត្រូវមានចំណាត់ការតាមផ្លូវច្បាប់ពីស្ថាប័នជំនាញនិងអាជ្ញាធរនេះនៅឡើយទេ រហូតមកដល់ពេល។ នេះបើយោងតាមសេចក្តីរាយការណ៍ពីស្រុកសង្គមថ្មីនៃខេត្តព្រះវិហារ។

ជាក់ស្តែងនៅថ្ងៃទី៧ ខែកក្កដា ឆ្នាំ២០២១នេះ គេមានឃើញរថយន្តស៊េរីទំនើបៗ ជាច្រើនគ្រឿងរបស់មេឈ្មួញបានដឹកឈើចេញពីភ្នំត្បែងស្ថិតនៅចំណុច ភូមិសុច និងភូមិតាសែង ឃុំរណ:សិរ្យ ស្រុកសង្គមថ្មី នៃខេត្តព្រះវិហារ។ហើយឈើទាំងនោះរួមមាន៖ ឈើប្រភេទលេខ១សុក្រម និងឈើឈ្លីក ដោយដឹកតាមរថយន្តទំនើបៗ ម៉ាកធុនត្រា ម៉ាកសុីណាម៉ាស្តា រថយន្តហ្វដពណ៌ត្រេអុី យកទៅលក់ឲ្យឈ្មួញនៅខេត្តកំពង់ធំ។

មេឈ្មួញម្នាក់នេះ ជាអ្នកមានលុយនិងមានអំណាចខ្លាំងណាស់នៅខេត្តព្រះវិហារ។នេះបើតាមការលួចបង្ហើបប្រាប់ពីមន្ត្រីដែលមានលក្ខខណ្ឌសូមមិនបញ្ចេញឈ្មោះនៅស្រុកសង្គមថ្មី។ ហើយមេឈ្មួញដុះស្លែម្នាក់នេះ បានកេណ្ឌប្រជាពលរដ្ឋ ឲ្យទៅកាប់ឈើនៅភ្នំត្បែងដើម្បីយកមកលក់ឲ្យខ្លួន។ ហើយឈ្មួញដ៏មានឥទ្ធិពលដដែលម្នាក់នេះ ពុំមែនទើបតែធ្វើសកម្មភាពបំផ្លាញធនធានធម្មជាតិនិងជំនួញឈើប្រណីតនាពេលបច្ចប្បន្ននេះទេ គឺតាំងពីមានរថយន្ត៦គ្រឿងរហូតមានដល់៩គ្រឿង។

ជុំវិញការកាប់បំផ្លាញធនធានធម្មជាតិ និងជំនួញឈើប្រណីតពីសំណាក់មេឈ្មួញដ៏មហិមាម្នាក់នេះ គេមិនទាន់ឃើញមានការពន្យល់ពីលោក មឿង សំផុន នាយកបេតិកភណ្ឌធម្មជាតិភ្នំត្បែងនៅឡើយទេនៅរសៀលថ្ងៃទី៨ ខែកក្កដានេះ។

ចំណែកលោក មាស ញឹម នាយកព្រៃឡង់ភ្នំត្នោតបានបញ្ជាក់ថា៖ លោកមិនដឹងអំពីមេឈ្មួញដឹកឈើនោះទេ ពីព្រោះលោកមមាញឹកនឹងការងារច្រើន។

ដោយឡែកលោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ បានប្រាប់អ្នកសារព័ត៌មានថា ពាក់ព័ន្ធទៅនឹងការកាប់បំផ្លាញព្រៃឈើ និងជំនួញឈើខាងលើ លោកមិនបានដឹងនៅឡើយទេ ប៉ុន្តែលោកបានបញ្ជាក់ចុងក្រោយបន្តិចថា លោកនឹងទៅសួរនាំកូន-ចៅថ្នាក់ក្រោមសិន។ ចំណែកលោក ជុំ ពុយ អភិបាលស្រុកសង្គមថ្មី និងជាប្រធានគណៈមេបញ្ជាការឯកភាពផងនោះក៏បានបញ្ជាក់ថា ការបំផ្លិចបំផ្លាញធម្មជាតិនៅភ្នំត្បែងនោះ គឺលោកមិនទាន់បានដឹងនៅឡើយទេ។ តែលោកក៏បានអរគុណយ៉ាងជ្រាលជ្រៅចំពោះបង-ប្អូនអ្នកសារព័ត៌មាន ដែលបានផ្តល់ព័ត៌មានជូនលោក។

នៅក្នុងរឿងនេះដែរ គេមិនទាន់ដឹងនៅឡើយទេថាតើថ្នាក់ក្រោមដែលមានជំនាញពាក់ព័ន្ធនឹងអាជ្ញាធរស្រុកបានផ្តល់ដំណឹងនេះជូនទៅលោកអភិបាលខេត្តដែរឬ? ទោះជាយ៉ាងណាសារព័ត៌មាន នៅមិនទាន់សុំការបំភ្លឺពី លោក ប្រាក់ សុវណ្ណ អភិបាលខេត្តព្រះវិហារនៅឡើយទេ នៅរសៀលថ្ងៃទី៨ ខែកក្កដានេះ ជុំវិញនៃការវិនាសធនធានធម្មជាតិនៅភ្នំត្បែង ដែលត្រូវបានចុះបញ្ជីបេតិកភណ្ឌធម្មជាតិរួចហើយនោះ។

ក្រុមអ្នកស្រឡាញ់ធនធានធម្មជាតិ ស្នើសុំឲ្យស្ថាប័នពាក់ព័ន្ធ និងអភិបាលខេត្ត មេត្តាមានចំណាត់ការតាមផ្លូវច្បាប់ចំពោះបុគ្គលដែលពាក់ព័ន្ធក្នុងករណីខាងលើផង ពិសេសសូមឲ្យជំនាញពាក់ព័ន្ធ និងអាជ្ញាធរមេត្តាទប់ស្កាត់ និងជួយអភិរក្សនូវភ្នំប្រវត្តិសាស្ត្រដ៏មានតម្លៃមួយនេះឲ្យបានគង់វង្សផង៕SRP

ខេត្តកំពង់ចាម​៖លោក អ៊ុន ចាន់ដា អភិបាល ខេត្តកំពង់ចាម បានណែនាំជំរុញ​ដល់​មន្ត្រី​ពាក់ព័ន្ធ​ ឲ្យ​រួមគ្នា​ទប់ស្កាត់ ការរំលោភបំពាន លើដីព្រៃសហគម និងដីព្រៃដែននេសាទ តាមរយៈ ការចុះកំណត់ព្រុំប្រទល់ និងរៀបចំផែនទីការពារ ឲ្យបានច្បាស់លាស់។

ការណែនាំនេះក្នុងកិច្ចប្រជុំសាមញ្ញលើកទី២៦ អាណត្តិទី៣ របស់ក្រុមប្រឹក្សាខេត្ត​កំពង់ចាម​ នៅព្រឹកមិញ។

លោកអ៊ុន ចាន់ដា បានថ្លែងថា កន្លងមក ក៏ធ្លាប់មានជនខិលខូច បានទន្ទ្រាន ឈូសឆាយយកដីព្រៃសហគម ក៏ដូចជា ព្រៃលិចទឹកដែននេសាទរបស់រដ្ឋ ធ្វើជាកម្មសិទ្ធិឯកជន​ ដោយជនខិលខូចទាំងនោះ តែងតែឆ្លៀតឱកាសធ្វើសកម្មភាព នៅពេលយប់ ពោលគឺ ធ្វើសកម្មភាពនេះ នៅពេលមន្ត្រីយើងសម្រាកពីការងារ។ ជាមួយគ្នានោះ អាជ្ញាធរ ក៏ធ្លាប់បានធ្វើការដោះស្រាយទប់ស្កាត់ ទៅតាមវិធានការច្បាប់ផងដែរ។ ដើម្បីកុំឲ្យទម្លាប់អាក្រក់នេះ កើតមានបន្តទៀត ស្នើឲ្យមន្ទីរដែនដី និងមន្ទីរធនធានទឹក សហការជាមួយអាជ្ញាធរ ចុះទៅកំណត់ព្រុំប្រទល់ ដើម្បី ការពារអាងស្តុកទឹកនៅចំណុច ឃុំព្រែកបាក់ នៃស្រុកស្ទឹងត្រង់ ដែលក្រុមប្រឹក្សាខេត្ត ស្នើឡើងនេះ ឲ្យបានច្បាស់លាស់។ ក្រៅពីនោះបន្ទាប់ពីការធ្វើការដោះស្រាយផលប៉ះពាល់ហើយ អភិបាលខេត្ត ក៏សុំឲ្យក្រុមការងារឡើងជាផែនទី រួចយកមកតម្កល់ទុក នៅគ្រប់ស្ថាប័នពាក់ព័ន្ធ ក៏ដូចជា អាជ្ញាធរមូលដ្ឋាន ដើម្បី ក្រុមប្រឹក្សាឃុំសាមី បង្កើតតំបន់ ទៅជាសហគមគ្រប់គ្រង និងប្រើប្រាស់ទឹក ដែលជាការបញ្ចៀស ទៅដល់ការបាត់បង់ ដោយប្រការណាមួយ ពីសំណាក់ជនខិលខូចផងដែរ។

លោកក៏បានឲ្យមន្ទីរដែនដី មន្ទីរធនធានទឹក និងមន្ទីរកសិកម្មរុក្ខាប្រមាញ់ និងនេសាទ ចុះទៅដល់ទីតាំងនោះ ដើម្បី ធ្វើការកំណត់ព្រុំការពារដែននេសាទ ឲ្យខាងតែបាន។ ដូច្នេះអាជ្ញាធរ និងស្ថាប័នជំនាញ ត្រូវមានយន្តការច្បាស់លាស់ ក្នុងការស្ដារបឹង ឬមេទឹក ឲ្យបានជ្រៅ ក្នុងតំបន់សហគមនីមួយៗ ដើម្បី រក្សាបានទឹកគ្រប់គ្រាន់ ទុកបំរើផលប្រយោជន៍ សាធារណៈ ជូនដល់ប្រជាពលរដ្ឋ សម្រាប់ការងារបង្កបង្កើនផល។

អភិបាលខេត្ត​ បានលើកឡើងដែរថា កន្លងមក យើងក៏ធ្លាប់មានបទពិសោធន៍ ក្នុងបង្កើតនូវសហគមនេសាទ ស្ថិតនៅចំណុចបឹងធំ នៃស្រុកកំពង់សៀម ដែលមានផ្ទៃដីទំហំប្រមាណជាង ៧ពាន់ហិកតា និងបានបង្កើតទៅជាសហគមគ្រប់គ្រង និងប្រើប្រាស់ទឹកតំបន់នេះ បានជោគជ័យ រួចមកហើយ ផងដែរ៕SRP

ខេត្តសៀមរាប៖សមត្ថកិច្ចស្រុកពូកបានរាយការណ៍ថា នៅម៉ោង១០និង៣០នាទីថ្ងៃទី០៨ ខែកក្កដា ឆ្នាំ២០២១ នៅចំណុចទឹកស្រះខាងកើតភូមិ ភូមិរកា ឃុំល្វា មានក្មេងលង់ទឹកស្រះទំហំ១០ម៉ែត្រគុណ ១៥ម៉ែត្រជម្រៅ២ម៉ែត្រ។

សមត្ថកិច្ចបានបន្តថា ជនរងគ្រោះឈ្មោះ តឿត ឌីម៉ា ភេទស្រី អាយុ២ឆ្នាំ មានទីលំនៅភូមិ ឃុំកើតហេតុ។ តាមការពិនិត្យសាកសព ពុំមានស្លាកស្នាមអ្វីដែលគួរឲ្យសង្ស័យពាក់ព័ន្ធបទល្មើសឡើយ។ មូលហេតុ ជនរងគ្រោះ តាមឪពុកទៅច្រូតស្មៅគោនៅ ជិតស្រះនោះ ហើយឪពុកភ្លេចមើលកូន៕SRP

ខេត្តសៀមរាប៖បុរសម្នាក់បានស្លាប់ភ្លាមៗ ខណៈ ជិះកង់ឌុបស្មៅ ដួលកង់ បោកក្បាលនឹងដុំថ្ម។

ហេតុការណ៍បានកើតឡើងថ្ងៃព្រហស្បត៍ ទី០៨ ខែកក្កដា ឆ្នាំ ២០២១ ម៉ោង០៩និង១៥នាទី ស្ថិតនៅភូមិនគរភាស២ ឃុំនគរភាស ស្រុកអង្គរជុំ ខេត្តសៀមរាប។

ជនរងគ្រោះឈ្មោះ ហ៊ាន់ ហេង អាយុ៦១ឆ្នាំរស់នៅភូមិនគរភាស២ ឃុំនគរភាស ស្រុកអង្គរជុំ ខេត្តសៀមរាប។ មូលហេតុ មានជម្ងឺលើសឈាម។ បើតាមរបាយការណ៍បានបញ្ជាក់ថា ក្រុមគ្រូពេទ្យបានចុះមក ពិនិត្យធ្វើតេស្ត យកសំណាករកជម្ងឺកូវីដ១៩(អវិជ្ជមាន)។

គ្រូពេទ្យបានបញ្ជាក់ថាគាត់ស្លាប់ដោយជម្ងឺលើសឈាម (ដាច់​សរសៃ​ឈាម​ខួរក្បាល​)៕SRP

ខេត្តកំពង់ចាម​​៖អាជ្ញាធរស្រុក​ព្រៃឈរ​​​​​ នៅព្រឹក​មិញនេះ បាន​ដាក់​ឲ្យ​ដំណើរ​ការ​​​ដេញ​ថ្លៃ​ សាងសង់​ផ្លូវ​បេតុង​ ចំនួន​៧ខ្សែ​​។ ការប្រកាសដេញថ្លៃនេះ ជាគម្រោង​មូលនិធិ​ឃុំ​-សង្កាត់​ ​ឆ្នាំ​២០២១​ របស់​គណៈកម្មការ​ជាតិ​សម្រាប់​ការអភិវឌ្ឍន៍​ តាម​បែប​ប្រជាធិបតេយ្យ​ នៅ​ថ្នាក់​ក្រោម​ជាតិ​ លេីការ​កសាង​ហេដ្ឋារចនាសម្ពន្ធ័​ ក្នុង​ភូមិសាស្ត្រ​ស្រុក​ព្រៃឈរ​។

លោក​ លី​ ប៊ុនអ៊ន​ អភិបាល​រង​ស្រុកព្រៃឈរ​ បាន​ធ្វើ​ការ​ណែនាំ​ជំរុញ​​​ដល់​គណៈកម្មការ​លទ្ធកម្ម​ និង​ក្រុម​ហ៊ុន​ទទួល​ការ​ទាំងអស់​ ត្រូវ​អនុវត្ត​គម្រោង​ឲ្យ​មាន​តម្លាភាព​ និង​ធ្វើ​ការ​សាងសង់​សំណង់​ឲ្យ​ត្រូវ​តាម​បទដ្ឋាន​លក្ខណៈ​បច្ចេកទេស​ ប្រយោជន៍​ដល់​ការ​ប្រើប្រាស់​បាន​យូរ​អង្វែង​។

លោក​ ​ឡី​ មិច​​ នាយក​រង​រដ្ឋបាល​ខេត្ត​ បាន​ថ្លែង​អំណរគុណ​ដល់​អាជ្ញាធរ​ស្រុកព្រៃឈរ​ ដែល​បាន​រៀបចំ​ការ​ដេញ​ថ្លៃ​នេះ​ ឲ្យ​មាន​សណ្ដាប់​ធ្នាប់​ និង​របៀបរៀបរយ​​ ព្រមទាំង​បាន​សំណូមពរ​ដល់​តំណាង​ក្រុម​ហ៊ុន​​ ឲ្យ​គោរព​តាម​ក្រមសីលធម៌​របស់​អ្នក​ទទួល​ការ​ និង​ចូលរួម​​សហការ​ជាមួយ​អាជ្ញាធរ​ ដេីម្បី​បង្ការ​ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ​-១៩​ ផងដែរ​។
​
គួរ​បញ្ជាក់​ផង​ដែរ​ថា​ ការ​ដាក់​​ដេញ​ថ្លៃ​គម្រោង​ខាង​លើ​នេះ​ គឺមាន​ផ្លូវ​បេតុង​អាមេ​ ចំនួន​៧គម្រោង​ ក្នុង​នោះ​មាន​

១-ឃុំ​ក្រូច​ សាងសង់ផ្លូវបេតុងអាមេ ប្រវែង ៣៨១ ម៉ែត្រ​ ទទឹង៤ម៉ែត្រ នៅភូមិក្រូច​។

២-ឃុំ​តុងរ៉ុង​ សាងសង់ផ្លូវបេតុងអាមេ ប្រវែង​ ៣៩៨ ម៉ែត្រ​ ទទឹង៤ម៉ែត្រ​ នៅភូមិផ្ទះខ្ពស់។

៣-ឃុំ​ថ្មពូន​ សាងសង់ផ្លូវបេតុងអាមេ ប្រវែង ៤០០ ម៉ែត្រ​ ទទឹង ៤ម៉ែត្រ​ នៅភូមិត្រពាំងបឹង និងភូមិថ្មពូន កណ្តាល។

៤-ឃុំ​បឹងណាយ​ សាងសង់ផ្លូវបេតុងអាមេ ប្រវែង ៤៥១​ ម៉ែត្រ​ ទទឹង៤ម៉ែត្រ​ នៅភូមិទួលខ្វាវ។

៥-ឃុំ​ព្រៃឈរ​ សាងសង់ផ្លូវបេតុងអាមេ ប្រវែង ៣១៤​ ម៉យ​ ទទឹង៤ម៉ែត្រ​ នៅភូមិព្រៃឈរ​។

៦-ឃុំ​ស្រង៉ែ​ សាងសង់ផ្លូវបេតុងអាមេប្រវែង ៣០៧ ម៉ែត្រ​ ទទឹង៥ម៉ែត្រ​ នៅភូមិត្រពាំងធំ។

៧-ឃុំ​សំរោង​ សាងសង់ផ្លូវបេតុងអាមេ ប្រវែង ៣៩៥ ម៉ែត្រ​ ទទឹង៤ម៉ែត្រ​ នៅភូមិសំរោង​៕SRP