ខេត្តសៀមរាប៖អាជ្ញាធរខេត្តសៀមរាប បានប្រកាសយុទ្ធនាការ ចាក់វ៉ាក់សាំងជូនពលរដ្ឋ ក្នុងក្រុងសៀមរាប។ នេះបើយោងតាម លោក ទៀសីហា អភិបាលខេត្តសៀមរាប បានបញ្ជាក់ឲ្យដឹងនៅមុននេះបន្តិចតាមរយៈទំព័រ page facebook។

លោកទៀ សីហា បានសរសេរថា៖ខ្ញុំបាទមានក្តីរំភើប និងរីករាយបំផុត ដែលសម្តេចនាយករដ្ឋមន្ត្រី ហ៊ុន សែន និងគណៈកម្មការចាក់វ៉ាក់សាំង បានសម្រេចផ្តល់វ៉ាក់សាំងមកខេត្តសៀមរាបយើង។ ខ្ញុំបាទ រួមទាំងប្រជាពលរដ្ឋក្នុងខេត្ត សូមគោរពថ្លែងអំណរគុណ សម្តេចនាយក ដែលតែងតែយកចិត្តទុកដាក់មកលើខេត្តសៀមរាប និងប្រជាជនទូទាំងប្រទេស។

លោកទៀ សីហា បានបន្តថា៖ ខ្ញុំបាទសូមបញ្ជាក់ជូនបងប្អូនប្រជាពលរដ្ឋ ក្នុងខេត្តសៀមរាប ពីកិច្ចការងារនេះ ដោយយើងនឹងទទួលបាន វ៉ាក់សាំងជាបន្តបន្ទាប់ រហូតឈានដល់”ការចាក់វ៉ាក់សាំងអោយបានគ្រប់ៗគ្នា” តាមផែនការ ដោយ៖
– ជំហានទី១ គឺប្រជាជនក្នុងក្រុងសៀមរាប ចាប់ពីថ្ងៃទី១០ ខែកក្កដា ឆ្នាំ២០២១ខាងមុខនេះ ក្នុងរយៈពេល១៤ថ្ងៃ។

– ជំហានទី២ គឺ ស្រុកទាំង១១ នឹងបញ្ជាក់ពេលវេលា នៅពេលដែលយើងនឹងទទួលវ៉ាក់សាំងមកដល់ខេត្តយើងបន្ទាប់ទៀត។

ក្នុងនោះខ្ញុំបាទសូមអំពាវនាវដល់បងប្អូនប្រជាជនយើងដូចតទៅ៖
១. រក្សាគម្លាត សណ្តាប់ធ្នាប់ នៅទីតាំងចាក់វ៉ាក់សាំង តាមសង្កាត់នីមួយៗ

២. សូមកុំប្រជៀត ដណ្តើម និងព្យាយាមរុញគ្នា ដើម្បីបានចាក់មុន

៣. ប្រជាជនដែលនៅតាមបណ្តាស្រុក សូមរងចាំជំហានបន្ទាប់ សូមកុំព្យាយាមមកចុះឈ្មោះចាក់វ៉ាក់សាំងក្នុងក្រុងសៀមរាប ព្រោះយើងនឹងមានយកវ៉ាក់សាំងទៅចាក់នៅស្រុករបស់បងប្អូនផ្ទាល់។

៤. សូមសហការជាមួយ ចៅសង្កាត់ អ្នកសម្របសម្រួលតាមមណ្ឌល ចាក់វ៉ាក់សាំងដែលនៅក្បែរផ្ទះរបស់បងប្អូន ប្រជាពលរដ្ឋ

៥. ចំពោះប្រជាជនក្រៅខេត្តសៀមរាប សូមរងចាំវ៉ាក់សាំងដែលគណៈកម្មការបានចាត់ចែងទៅតាមបណ្តាខេត្តរបស់លោកអ្នក។

ក្នុងនាមអាជ្ញារធរខេត្ត ខ្ញុំបាទសូមទទូច ឲ្យបងប្អូនប្រជាពលរដ្ឋ មេត្តាអនុវត្តតាមការណែនាំទាំង៥ចំនុចខាងលើ ដើម្បីទប់ស្កាត់ហានិភ័យ ការឆ្លងរាលដាល និងការចាត់ចែងគ្រប់គ្រងចំនួនបងប្អូនដែរត្រូវចាក់វ៉ាក់សាំងឲ្យមានប្រសិទ្ធភាព និងរលូន៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅព្រឹកថ្ងៃព្រហស្បតិ៍ ទី៨ ខែកក្កដា ឆ្នាំ២០២១ នេះ បានអញ្ចើញចូលរួមក្នុងកិច្ចប្រជុំតាមប្រព័ន្ធវីដេអូ ជាមួយតំណាងអង្គការសហព័ន្ធសន្តិភាពសកល (UPF) ដឹកនាំដោយលោកបណ្ឌិត Yun Young ho តំណាងលោកជំទាវបណ្ឌិត Hak Ja Han Moon។

កិច្ចប្រជុំពិភាក្សានេះ គឺផ្ដោតសំខាន់ព័ន្ធទៅលើការងារបន្ត រួមមាន៖

ទី១) ពាក់ព័ន្ធនឹងការរៀបចំកិច្ចប្រជុំកំពូលនៅខែវិច្ឆិកាខាងមុខនៅប្រទេសកូរ៉េខាងត្បូង ដែលប្រធានបទសំខាន់ទាក់ទងទៅនឹងសន្តិភាពនៅក្នុងតំបន់អាស៊ី

ទី២) ពាក់ព័ន្ធនឹងការ គោរពអញ្ជើញសម្ដេចតេជោ ហ៊ុន សែន ធ្វើជាសហប្រធានកិត្តិយសនៃការរៀបចំកិច្ចប្រជុំដ៏ធំនោះ

ទី៣) ពាក់ព័ន្ធទៅនឹងពានរង្វាន់សន្តិភាពស៊ុនហាក់។

នៅក្នុងកិច្ចប្រជុំនេះផងដែរ សម្ដេចតេជោ នាយករដ្ឋមន្ត្រី បានមានប្រសាសន៍ថា៖

ចំណុចទី១) សម្តេចតេជោ គាំទ្រទៅលើផែនការនៃការរៀបចំសកម្មភាពនៃកិច្ចប្រជុំ ព្រមទាំងផ្ដល់យោបល់មួយចំនួន និងគំនិតផ្ដួចផ្ដើមនៃកិច្ចប្រជុំនេះផងដែរ ។ ហើយសម្ដេចតេជោក៏បានយល់ព្រមទទួលធ្វើជាសហប្រធានកិត្តិយសនៃកិច្ចប្រជុំនេះ ដោយសម្ដេចមានប្រសាសន៍ថា ប្រធានបទទាក់ទងទៅនឹងសន្តិភាពនេះ វាជារឿងសំខាន់បំផុតប្រទេសនៅក្នុងតំបន់អាស៊ាន ក៏ដូចជានៅលើពិភពលោកផងដែរ

ចំណុចទី២) សម្តេចតេជោ ក៏បានយល់ព្រមទទួលយកផងដែរទាក់ទងទៅនឹងសម្ដេចជាបេក្ខភាពសម្រាប់ពានរង្វាន់សន្តិភាពស៊ុនហាក់នេះ ដោយសម្ដេចសង្ឃឹមថា កន្លងមកសម្ដេចបានចូលរួមសកម្មភាពជាច្រើនក្នុងន័យកសាង និងរក្សាសន្តិភាព រួមជាមួយនឹងសកម្មភពជាមួយអង្គការ UPF ផងដែរ ។

ជាមួយគ្នានោះ សម្តេចតេជោបានមានប្រសាសន៍បញ្ជាក់ថា សម្រាប់ភាគីកម្ពុជាសម្ដេចតេជោ បានចាត់ឲ្យលោកជំទាវ ឃួន សុដារី និងឯកឧត្តម សួស យ៉ារ៉ា ចូលរួមរៀបចំនៃកិច្ចប្រជុំនេះផងដែរ។ សម្ដេចតេជោបានមានប្រសាសន៍បន្តទៀតថា អ្វីដែលសំខាន់ទៀតនោះ យើងគួរសហការគ្នា ក្នុងការចូលរួមសកម្មភាព ពាក់ព័ន្ធនឹងទន្លេមេគង្គ ដែលផ្តោតទៅលើការរក្សាបាននូវសន្តិសុខស្បៀង ដែលកន្លងមកយើងក៏ធ្លាប់មានកិច្ចសហប្រតិបត្តិការ រវាងរដ្ឋាភិបាល ជាមួយនឹងក្របខណ្ឌមេគង្គកូរ៉េនេះផងដែរ៕SRP

ខេត្តកំពង់ធំ៖លោកសុខ លូ អភិបាលខេត្តកំពង់ធំ បានថ្លែងអំណរគុណដល់ សម្តេចហ៊ុន សែន នាយករដ្ឋមន្ត្រី ដែល បានផ្តល់គម្រោងសាងសង់ប្រព័ន្ធលូ និងស្ថានីយ ប្រព្រឹត្តកម្មទឹក កខ្វក់ដល់ខេត្តកំពង់ធំ។ លោកថា គម្រោងនេះ គឺជាគម្រោង របស់រាជរដ្ឋាភិបាល ដែលជាប្រាក់កម្ចី របស់ធនាគារអភិវឌ្ឍន៍អាស៊ី (ADB) ដោយចំណាយថវិកាសរុបជាង ១២លានដុល្លារ ក្នុងនោះបានប្រើប្រាស់ ប្រព័ន្ធលូជាង ២២គីឡូម៉ែត្រ និងហេដ្ឋារចនា សម្ព័ន្ធ ផ្សេងៗ ទៀត ជាច្រើន។

លោកមានប្រសាសន៍យ៉ាងដូច្នេះ នៅថ្ងៃទី០៧ ខែ កក្តដា ម្សិលមិញ ក្នុងឱកាស ដឹកនាំកិច្ច ប្រជុំ ត្រួតពិនិត្យ និងពង្រឹងការអនុវត្ត គម្រោងសាងសង់ ប្រព័ន្ធបង្ហូរទឹកភ្លៀង និងទឹកកខ្វក់ក្នុង ក្រុងស្ទឹងសែន ដើម្បីធានាបាន គុណភាព ល្អ និងមានផ្លូវក្នុងក្រុងទូលាយ នៅថ្ងៃអនាគត។

អភិបាលខេត្តកំពង់ធំ ក៏ណែនាំឲ្យក្រុមហ៊ុនម៉ៅការសាងសង់ សូមឱ្យពន្លឿនការសាងសង់ ព្រោះថា ខែនេះជារដូវវស្សា បើគ្មានប្រព័ន្ធលូរំដោះទឹកទេ ក្រុងស្ទឹងសែន និងមានការលិចដោយសារជំនន់ទឹកភ្លៀង។ លោកថាប្រសិន បើជួបបញ្ហាក្នុងការសាងសង់ ត្រូវជូនដំណឹងមកអាជ្ញាធរដើម្បីឲ្យអាជ្ញាបានដឹងនិង ជួយដោះស្រាយរឿងដែលបាន កើតឡើង។

លោក សុខ លូ ក៏បានដាស់តឿនទៅដល់មន្ត្រីជំនាញពាក់ព័ន្ធ ត្រូវត្រួតពិនិត្យ ឲ្យបានគ្រប់ជ្រុងជ្រោយ នូវសំណង់ទាំងឡាយណា ដែលបានសាងសង់ខុសច្បាប់ ជាពិសេសការចាក់ដីការសាងសង់ផ្ទះ ការធ្វើរបងជាដើម ដែលមាន ការរំលោភបំពានទៅលើចំណីផ្លូវ ធ្វើឱ្យមានការកក់ស្ទះ ដោយគ្មានប្រព័ន្ធលូ ប្រព័ន្ធទឹកស្អាត និងកាបអុបទិកជាដើម។

ជាមួយគ្នានេះដែរ លោកសុខ លូ ក៏បានអំពាវនាវដល់ប្រជាពលរដ្ឋ សូមសហការ ជាមួយអាជ្ញាធរក្នុង ការសាង សង់ ប្រព័ន្ធ លូរំដោះទឹកភ្លៀង ឬទឹកកខ្វក់នេះ គឺធ្វើទៅលើចំណីផ្លូវមុខផ្ទះរបស់ប្រជាពលរដ្ឋ សូមមានការយោគយល់និងអធ្យាស្រ័យ ទើបក្រុមហ៊ុនសាងសង់ អាចពន្លឿនដំណើរ របស់ខ្លួនបានដោយរលូន និងឆាប់រហ័ស។

បើតាមប្រធានមន្ទីរសារធារណការ និងដឹកជញ្ជូនខេត្តកំពង់ធំ លោក ជូ កូល្លា បានឱ្យដឹងថា ការអនុវត្តគម្រោងសាង សង់ ប្រព័ន្ធ រំដោះទឹកភ្លៀង ទឹកកខ្វក់ និងអាងប្រព្រឹត្តកម្ម ក្នុងក្រុងស្ទឹងសែន មានចំនួន២រួមមាន៖

ទី១៖ការសាងសង់ស្ថានីយប្រព្រឹត្តិកម្មទឹកកខ្វក់ ដែលមានសមត្ថភាពច្រោះ ប្រមាណ ២.៥០០ម៉ែត្រគូប ក្នុងមួយថ្ងៃ ការ សាងសង់បំពង់ លូទឹកស្អុយ ប្រវែង ប្រមាណ៣៩,២គីឡូម៉ែត និងបណ្តាញលូបង្ហូរ ទឹកប្រវែង ប្រមាណ ១៧.១គីឡូម៉ែត។ ក្រោយពីបាន ទទួលការយល់ព្រម ពី ធនាគារអភិវឌ្ឍន៍អាស៊ី (ADB) ក្រសួងសាធារណការ និងដឹកជញ្ជូន បានចុះកិច្ចសន្យា ដើម្បីសាងសង់ អនុ គម្រោង ខាង លើ ជាមួយក្រុមហ៊ុន សាងសង់ China First metallurgical Group Ltd. ក្នុង តម្លៃទឹក ប្រាក់ចំនួន ១២,៧៦២,០០០ដុល្លារ កាលពីថ្ងៃទី០៦ ខែកក្កដា ឆ្នាំ២០២០។

ទី២៖ការសាងសង់ទីលានចាក់សំរាម ដែលមានសមត្ថភាពផ្ទុកបរិមាណបានចំនួន ៤៨.០០០ម៉ែត្រគូប និងការបំពាក់ នូវ រថយន្តប្រមូលសំរាម និងទុកដាក់កាក់សំណល់។

ប្រធានមន្ទីរសាធារណការបានឱ្យដឹងថា គម្រោងសាងសង់មានរយៈពេល៣ឆ្នាំ ដោយអនុវត្តចាប់ពី ខែកក្កដា ២០២០ ដល់ខែកក្កដា ឆ្នាំ២០២៣ ខាងមុន៕SRP

ខេត្តសៀមរាប៖មនុស្សចំនួនពីរនាក់បានស្លាប់នៅម្សិលមិញ ក្នុងហេតុការណ៍គ្រោះថ្នាក់ចរាចរណ៍ពីរផ្សេងគ្នា។

ហេតុការណ៍ទី១បានកើតឡើងនៅម៉ោង០៤និង៤០នាទីរសៀល ថ្ងៃទី ០៧ ខែកក្កដា ឆ្នាំ២០២១ ស្ថិតនៅភូមិចែកខ្សាច់ក្រោម ឃុំអន្លង់សំណរ ស្រុកជីក្រែង។

ករណីនេះបង្កដោយខ្លួនឯង ជិះម៉ូតូម៉ាកវ៉េវអាល់ហ្វាពណ៌ខ្មៅ គ្មានស្លាកលេខ ទិសដៅពីត្បូង ទៅជេីង បានទៅបុកដេីមដូង។

ជនរងគ្រោះមានឈ្មោះ ឈ្មោះ ស្រី ចន ភេទប្រុសអាយុ ៤៦ឆ្នាំ មានទីលំនៅភូមិស្វាយតាដោក ឃុំអន្លង់សំណរ ស្រុកជីក្រែង ខេត្តសៀមរាប។ មូលហេតុ៖ ជនរងគ្រោះ ស្រវឹងស្រា បានជិះម៉ូតូទៅបុកដេីមដូង បណ្តាលអោយស្លាប់តែម្ដង។

ចំណែកទី២ នៅវេលាម៉ោង០៨និង៣០នាទីយប់ថ្ងៃទី០៧ ខែកក្កដា ឆ្នាំ២០២១ លេីផ្លូវជាតិលេខ៦ នៅចំណុច ភូមិជ្រៃ ឃុំកណ្ដែក ស្រុកបាសាទបាគង ខេត្តសៀមរាប រវាងរថយន្តនិងម៉ូតូ បើកបញ្ច្រស ទិសគ្នា។

របាយការណ៍របស់សមត្ថកិច្ចបានបង្ហាញថាករណីនេះ ឈ្មោះជា សុជាតិ ភេទប្រុស អាយុ២៥ឆ្នាំរស់នៅភូមិ ត្រាង ឃុំបន្ទាយនាង ស្រុកមង្គលបុរីខេត្ត បន្ទាយមានជ័យ ជិះម៉ូតូស៑េរីឌ្រីម២០១៨ពណ៌ខ្មៅ ស្លាកលេខ១Z ២៧៤៨ បើកពីលិច ទៅកើត បានទៅបុកជាមួយរថយន្តបើកពីកើត ទៅលិច បណ្ដាលអោយស្លាប់ ពេលបញ្ជូនទៅពេទ្យភូមិភាគ៤។ ដោយឡែករថយន្តម៉ាកហាយលែនឌើពណ៌ទឹកប្រាក់ ស្លាក លេខ សៀមរាប ២B០៤០៩ អ្នកបើកបរមិនស្គាល់ឈ្មោះ (រត់គេចបាត់)។ មូលហេតុអ្នក​បេីកបរម៉ូតូ បើកបរល្បឿនលឿន មិនប្រកាន់ស្ដាំ ខ្វះការប្រុងប្រយ័ត្ន។ វត្ថុតាងរថយន្តនិងម៉ូតូរក្សាទុកនៅអធិការនគរបាល ស្រុកប្រាសាទបាគង៕SRP

ខេត្តសៀមរាប៖អាជ្ញាធរស្រុកស្វាយលើបានរាយការណ៍ថា ស្ត្រីម្នាក់កំពុងដេកត្រូវបានសត្វពស់ចូលទៅជិតម្ដាយស្លាប់។

ហេតុការណ៍បានកើតឡើងនៅថ្ងៃ ពុធ​ ទី០៧ ខែកក្កដា ឆ្នាំ២០២១ម្សិលមិញ ស្ថិតនៅភូមិ សែន​ជ័យ​ ឃុំកន្ទួត ស្រុកស្វាយលើ។

អាជ្ញាធរបានបន្តថា ជនរងគ្រោះ​ឈ្មោះ​ លន់​ ជា​ អាយុ៤៥ឆ្នាំ​ រស់នៅភូមិ​សែន​ជ័យ​ ឃុំកន្ទួត ស្រុកស្វាយលើ។ អាជ្ញាធរបានបញ្ជាក់ថាមូលហេតុ​ គាត់កពុងដេកនៅលេីផ្ទះ សត្វពស់ថ្នាំងអំពៅចឹក វាឡេីងចឹកលេីផ្ទះបណ្ដាលឱ្យស្លាប់តែម្ដង៕SRP

ខេត្តកំពង់ចាម៖អាជ្ញាធរខេត្តកំពង់ចាម នៅថ្ងៃទី៧ ខែកក្កដាម្សិលមិញ បានទទួលអំណោយពី លោក ផាន អូន ប្រតិភូរាជរដ្ឋាភិបាល ទទួលបន្ទុកអគ្គនាយក នៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម។

លោក អ៊ុន ចាន់ដា អភិបាលខេត្ត បានថ្លែងអំណរអរគុណចំពោះលោក ផាន អូន និងក្រុមការងារ រួមនឹងលោកឧកញ៉ា លោក លោកស្រីសប្បុរសជន ដែលបានផ្តល់អំណោយជួយដល់រដ្ឋបាលខេត្ត ដើម្បីជួយឧបត្ថម្ភគាំទ្រដល់ប្រជាពលរដ្ឋ ដែលមានជីវភាពខ្វះខាតនិងគ្រួសារកំពុងធ្វើចត្តាឡីស័កនៅមណ្ឌលចត្តាឡីស័ក។

គួបញ្ជាក់ថា អំណោយដែលរដ្ឋបាលខេត្តទទួលបានរួមមាន៖ លោកផាន អូន និងលោកជំទាវ អាកុល ៧៣កាន -លោក ទឹង ចាន់ណា អាកុល ១៥កាន -ឧកញ៉ា ឌី ជោត និងលោកជំទាវ អាកុល ៤កេស -ឧកញ៉ា ឌីណា ប្រាកដ ថ្នាំប៉ារ៉ា ១.០០០បន្ទះ -លោក ហោ ឆាយ សាប៊ូ ១.០០០ដុំ -លោកស្រី ខែ ប៉ូរាមី និងលោកស្រី ត្រាង ហុង ម៉ាស ៥.០០០ម៉ាស -គណៈអាជីវករផ្សារ៧មករា ទឹកសុទ្ធ ២០០យួរ៕SRP

ភ្នំពេញ៖ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង នៅល្ងាចថ្ងៃទី ៧ខែកក្កដានេះ បានបង្ហាញ នូវលទ្ធផលកិច្ចប្រតិបត្តិការបង្ក្រាបបទល្មើសគ្រឿងញៀននៅទូទាំប្រទេសក្នុងខែមិថុនា ឆ្នាំ២០២១ ហើយក៏ជាការចាប់ផ្តើមដើម្បីជម្រាបជូនដល់បងប្អូនជនរួមជាតិអំពីកិច្ចខិតខំប្រឹងប្រែងក្នុងកិច្ចប្រតិបត្តិការរបស់កងកម្លាំងប្រដាប់អាវុធ និងសមត្ថកិច្ចគ្រប់លំដាប់ថ្នាក់ ក៏ដូចជាប្រជាពលរដ្ឋគ្រប់មជ្ឈដ្ឋានដែលបានចូលប្រយុទ្ធប្រឆាំងបទល្មើសគ្រឿងញៀននេះ។

សម្ដេចស ខេង បានបង្ហាញថា តាមរយៈលទ្ធផលនៃកិច្ចប្រតិបត្តិការរបស់កម្លាំងអនុវត្តច្បាប់ បានបង្ហាញឱ្យឃើញថា មានសកម្មភាព ចរាចរណ៍ ជួញដូរ និងប្រើប្រាស់គ្រឿងញៀនខុសច្បាប់ នៅតែបន្តកើតមានឡើងក្នុងភូមិសាស្ត្ររាជធានី ខេត្ត គឺក្នុងខែមិថុនានេះ យើងបង្ក្រាបបាន បទល្មើសគ្រឿងញៀនសរុប ៣៧៧ករណី (ធៀបនឹងខែឧសភា/២០២១, មាន ៤២៣ករណី) ថយចុះ ៤៦ករណី ស្មើនឹង ១០៨ភាគរយ ក្នុងនោះ ករណីជួញដូរ រក្សាទុក ២៨១ករណី, ករណីប្រើប្រាស់ ៨៧ករណី, ករណីសំយោគ កែច្នៃ ០២ករណី, ករណីដាំដុះ ០៧ករណី។

ករណីគ្រឿងញៀនបង្ក្រាបដោយ សមត្ថកិច្ចនគរបាលចំនួន ៣៥៤ករណី ឃាត់ខ្លួនជនសង្ស័យ ចំនួន ៧៦១នាក់ (ស្រី ៥៣នាក់) និង ករណីគ្រឿងញៀនបង្ក្រាបដោយ សមត្ថកិច្ចកងរាជអាវុធហត្ថចំនួន ២៣ករណី ឃាត់ខ្លួនជន សង្ស័យចំនួន ៤៦នាក់ (ស្រី ០៣នាក់)។

ឃាត់ខ្លួនជនសង្ស័យសរុប មាន ៨០៧នាក់ ស្រី ៥៦នាក់ (ធៀបខែឧសភា/២០២១, មាន ៩១៤នាក់) ថយចុះ ១០៧នាក់ ស្មើនឹង ១១៧ភាគរយ ក្នុងនោះ ជនសង្ស័យក្នុងករណីជួញដូរ រក្សាទុក ជនសង្ស័យក្នុងករណីប្រើប្រាស់គ្រឿងញៀន ៥៨៤នាក់ (ស្រី ៣៩នាក់) ២១៤នាក់ (ស្រី ១៧នាក់), ជនសង្ស័យក្នុងករណីសំយោគ កែច្នៃ ០៩នាក់។

ក្រៅពីលទ្ធផលកិច្ចប្រតិបត្តិការបង្ក្រាបបទល្មើសគ្រឿងញៀនជាក់ស្តែងខាងលើនេះ អាជ្ញាធរមានសមត្ថកិច្ចគ្រប់ផ្នែក និងគ្រប់ជាន់ថ្នាក់ក៏បានខិតខំធ្វើសកម្មភាពក្នុងផ្នែកផ្សេងៗទៀតដូចជាការងារអប់រំផ្សព្វផ្សាយ បង្ការ ទប់ស្កាត់ និងបដិសេធគ្រឿងញៀន តាមសហគមន៍ តាមបណ្តាញសារព័ត៌មាន និងបណ្តាញសង្គម ដែលមានអ្នកចូលរួមអាន និងស្តាប់រាប់លាននាក់ ។ ជាមួយគ្នានេះក៏មានសកម្មភាពកាត់បន្ថយគ្រោះថ្នាក់បណ្តាលមកពីការប្រើប្រាស់គ្រឿងញៀនដូចជាការព្យាបាល ការស្តារនីតិសម្បទា និងបណ្តុះបណ្តាលវិជ្ជាជីវៈជាដើម។ ក្រៅពីនោះយើងក៏បានបង្កើនការងារសហប្រតិបត្តិការជាមួយប្រទេសជិតខាង ប្រទេសនៅក្នុងតំបន់ និងសហប្រតិបត្តិការអន្តរជាតិ ដើម្បីប្រយុទ្ធប្រឆាំងគ្រឿងញៀនខុសច្បាប់។

ផ្អែកតាមលទ្ធផលនៃកិច្ចប្រតិបត្តិការប្រយុទ្ធប្រឆាំងគ្រឿងញៀននាខែមិថុនានេះ ខ្ញុំសូមសម្តែងការកោតសរសើរចំពោះសកម្មភាពប្រតិបត្តិការរបស់កម្លាំងអនុវត្តច្បាប់ទាំងអស់ និងបងប្អូនប្រជាពលរដ្ឋទាំងអស់ ដែលបានយកចិត្តទុកដាក់អនុវត្តសកម្មភាពបង្ការ ទប់ស្កាត់ និងបង្ក្រាបបទល្មើសគ្រឿងញៀន និងបានរួមចំណែកដើម្បី ថែរក្សានូវសន្តិសុខ សណ្តាប់ធ្នាប់សាធារណៈ ការពារសុខុមាលភាពសង្គម។

ក្នុងនាមជាប្រធានផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាល ខ្ញុំសូមអំពាវនាវចំពោះកម្លាំងអនុវត្តច្បាប់ទាំងអស់ និងប្រជាពលរដ្ឋយើងទាំងអស់ បន្តចូលរួមអនុវត្តសកម្មភាពបង្ការ ទប់ស្កាត់ និងបង្ក្រាបបទល្មើសគ្រឿងញៀន ដើម្បីឲ្យប្រទេសជាតិយើងអាចកាត់បន្ថយគ្រោះថ្នាក់ដោយគ្រឿងញៀន នឹងឈានទៅគ្មានគ្រឿងញៀន តាមទិសស្លោកប្រយុទ្ធប្រឆាំងគ្រឿងញៀន បីកុំ មួយរាយការណ៍គឺ៖
– កុំពាក់ព័ន្ធ ៖ កុំជួញដូរ កុំចែកចាយ កុំធ្វើខ្នងបង្អែក កុំឃុបឃិត និងកុំប្រើប្រាស់គ្រឿងញៀន ។
– កុំអន្តរាគមន៍ ៖ កុំរារាំងការរអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឫ មិត្តភក្កិក៏ដោយ។
– កុំលើកលែង ៖ កុំបន្ធូរបន្ថយការអនុត្តច្បាប់ចំពោះឧក្រិដ្ឌជនគ្រឿងញៀន។ សមត្ថកិច្ចពាកព័ន្ធទាំងអស់ត្រូវអនុវត្តច្បាប់ដោយម៉ឺងម៉ាត់ និងស្មោះត្រង់វិជ្ជាជីវ:របស់ខ្លួន ហើយជនគ្រប់រូបត្រូវគោរព និងអនុវត្តច្បាប់។
– មួយរាយការណ៍៖ត្រូវរាយការណ៍ ផ្តល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិតនិងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច៕SRP

ភ្នំពេញ៖នាយករដ្ឋមន្ត្រី ហ៊ុន សែន បានថ្លែងនៅក្នុងសន្និសីទកំពូល ដោយបានលើកឡើងអំពីសារៈ សំខាន់នៃស្ថេរភាពនយោបាយ សមភាពអធិបតេយ្យភាព ការមិនជ្រៀតជ្រែកចូលកិច្ចការផ្ទៃក្នុង សាមគ្គីភាពដើម្បីប្រយុទ្ធប្រឆាំងនឹងជម្ងឺរាតត្បាតកូវីដ-១៩ និងការស្ដារសង្គមសេដ្ឋកិច្ចក្រោយជម្ងឺ កូវីដ-១៩។

នាយករដ្ឋមន្ត្រីបានបញ្ជាក់ដែរថា «ជំនួយរបស់ចិនមិនត្រឹមតែជួយដល់ការអភិវឌ្ឍរបស់ កម្ពុជាប៉ុណ្ណោះទេ តែបានជួយពង្រឹងឯករាជ្យភាពរបស់កម្ពុជាផងដែរ»។

នេះបើយោងតាមសេចក្ដីប្រកាសលទ្ធផល នៃការចូលរួម របស់សម្តេចហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី នៃព្រះរាជាណាចក្រកម្ពុជា នៅក្នុងសន្និសីទ កំពូលរវាង គណបក្សកុម្មុយនិស្តចិន និងគណបក្សនយោបាយ លើពិភពលោក តាមប្រព័ន្ធវីដេអូ ថ្ងៃទី០៦ ខែកក្កដា ឆ្នាំ ២០២១នេះ៕SRP

ខេត្តកំពង់ចាម​៖ក្នុងពិធីបើកការដ្ឋានសាងសង់ ផ្លូវក្រាលកៅស៊ូពីរជាន់ប្រភេទ DBST ចំនួន​ ២ខ្សែ ប្រវែង​ ៣.១៨៥ម៉ែត្រ​ ក្នុងសង្កាត់សំបួរមាស​ ក្រុងកំពង់ចាម​ នៅព្រឹក​មិញនេះ​ លោក អ៊ុន​ ចាន់ដា​ អភិបាលខេត្តកំពង់ចាម​ បានថ្លែងថា​ ដោយមានការ​ស្នេីសុំពី​អាជ្ញាធរ​មូលដ្ឋាន​ សម្តេច​ហ៊ុន​ សែន​ នាយករដ្ឋមន្ត្រ បាន​ឯកភាព​ផ្តល់​ផ្លូវ​កៅស៊ូ​ចំនួន​២ខ្សែ​ ដេីម្បី​សម្រួល​ដល់​ជីវភាព​ រស់​នៅ​របស់ប្រជាពលរដ្ឋ​ តាម​រយៈ​ការ​ដឹកជញ្ជូន​កសិផល​ទៅ​កាន់​ទីផ្សារ​ និង​ងាយស្រួល​ក្នុង​ការ​ធ្វើ​ដំណើរ​ផងដែរ​។

អភិបាលខេត្ត​ បានថ្លែងថា​ ​តាម​រយៈគោលនយោបាយអាទិភាព របស់រាជរដ្ឋាភិបាលកម្ពុជាគឺ មនុស្ស​ ទឹក​ ភ្លើង​ និង​ផ្លូវ​ ជាក់ស្ដែង​ថ្ងៃ​នេះ​យើង​បាន​ទទួល​​ផ្លូវ​កៅស៊ូ​២ខ្សែ​ ដែលមានប្រវែង​៣.១៨៥ម៉ែត្រ​ ទទឹង​៦ម៉ែត្រ​ ចាប់ពីចំណុចភូមិចំការខ្ពប តភ្ជាប់ទៅភូមិវាលស្បូវ ឃុំអំពិល ស្រុកកំពង់សៀម គឺ​ត្រូវ​ស្ថាបនា​​ត្រឹម​រយៈពេល​៤ខែ​ ប៉ុណ្ណោះ។ ​នៅពេល​ដែល​ស្ថាបនា​រួច​ សូម​បងប្អូន​ប្រជាពលរដ្ឋ​ប្រេីប្រាស់​ផ្លូវ​នេះ​ ដើម្បី​បង្កេីន​ប្រាក់​ចំណូលចូល​ក្នុង​គ្រួសារ​​ ​ហើយ​ត្រូវ​ចូលរួមជួយ​ថែរក្សា​ឲ្យ​បាន​យូរអង្វែងផង។ ក្រៅពី​នោះ​សូមបងប្អូន​ ​ចូលរួម​គាំទ្រ​ដល់​អាជ្ញាធរយេីង​​ ដេីម្បី​បន្ត​ការ​អភិវឌ្ឍន៍​​ហេដ្ឋារចនាសម្ពន្ធ័​ ក៏ដូចជា​សមិទ្ធផលថ្មីៗ​ជាច្រើន​ទៀត​៕SRP

ភ្នំពេញ៖សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជា នៅរាត្រីថ្ងៃអង្គារទី៦ ខែកក្កដា ឆ្នាំ២០២១ បានអញ្ជើញថ្លែងសន្ទរកថា នៅក្នុងកិច្ចប្រជុំកំពូលរវាងថ្នាក់ដឹកនាំនៃគណបក្សកុម្មុយនីស្តចិន និងគណបក្សនយោបាយលើពិភពលោកក្រោមប្រធានបទ «ការបំពេញការងារដើម្បីសុភមង្គលប្រជាជន៖ការទទួលខុសត្រូវរបស់គណបក្សនយោបាយ»។

កិច្ចប្រជុំនេះមានការអញ្ជើញចូលរួមពីឯកឧត្តម Xi Jinping អគ្គលេខាធិការបក្សកុម្មុយនីស្តចិន និងជាប្រធានាធិបតីនៃសាធារណរដ្ឋប្រជាមានិតចិន និងថ្នាក់ដឹកនាំតំណាងគណបក្សនយោបាយជាច្រើនទៀត។

ខាងក្រោមនេះគឺជាសុន្ទរកថាទាំងស្រុងរបស់សម្ដេចតេជោ ហ៊ុន សែន៕SRP

ខេត្តកំពង់ធំ៖លោក សាយ វាសនា ព្រះរាជអាជ្ញារង អមសាលាដំបូងខេត្តកំពង់ធំ បានដឹកនាំបញ្ជា សមត្ថកិច្ចបង្រ្កាបគ្រឿងចក្រចំនួន៥គ្រឿង របស់ក្រុមហ៊ុន គ្រួសារសុខសាន្ត ដែលកំពុងតែធ្វើសកម្មភាព ឈូសឆាយដីគម្របព្រៃឈើឆ្នាំ២០០២ ដែលជាដីព្រៃអភិរក្សរក្សាទុករបស់រដ្ឋ ដោយយកធ្វើជាកម្មសិទ្ធ។

ការបង្រ្កាបត្រូវបានធ្វើឡើង ចាប់ពីថ្ងៃទី៥ រហូតដល់ថ្ងៃទី៦ ខែកក្កដា ឆ្នាំ២០២១ ស្ថិតនៅក្នុងឃុំទ្រា ស្រុកស្ទោង ខេត្តកំពង់ធំ។

សមត្ថកិច្ចបានឲ្យដឹងថាគ្រឿងចក្រ ទាំង៥គ្រឿង ក្នុងនោះមានអ៊ិចស្កាវទ័រ២គ្រឿង អាប៊ុល២គ្រឿង និងត្រាក់ទ័រមួយគ្រឿង ត្រូវបានកម្លាំងចម្រុះឃាត់បាន យកទៅរក្សាទុកនៅ សង្កាត់រដ្ឋបាលព្រៃឈើស្ទោងដើម្បីអនុវត្តតាមផ្លូវច្បាប់។

ប្រភពបានទម្លាយថា ក្រុមហ៊ុនបានសុំច្បាប់វិនិយោគត្រឹមតែ ៧០ហិកតា ក្នុងនោះមានដីព្រៃជាប់គម្រប៤០ហិកតា ដីមិនជាប់គម្រប៣០ហិចតា តែជាក់ស្តែងក្រុមហ៊ុនបាន ឈូសឆាយដីព្រៃរបស់រដ្ឋដល់ទៅ ជាង២០០ហិចតាឯណោះ។

លោកស្រី គឹមឡេង ( ហៅចែអូន ) ភេទស្រី រស់នៅស្រុកស្ទោង ដែលជាឈ្មួញដីជាប់លំដាប់ បានឲ្យដឹងតាម ប្រព័ន្ឋតេឡេក្រាមថា ប្រវត្តិដីនេះ លោកស្រីបានទិញក្នុងឆ្នាំ ២០០៧ ហើយមកដល់បច្ចុប្បន្ន បានលក់បន្តឲ្យទៅក្រុមគ្រួសារ សុខសាន្ត តែមិនដឹងថា ក្រុមហ៊ុនរត់ការសុំឈូសឆាយដល់ត្រឹមណានោះទេ លោកស្រីក៏មិនដឹងដែរ។

លោកព្រឹម រដ្ឋា អភិបាលរងខេត្តកំពង់ធំ ទទួលបន្ទុកផ្នែកការពារបង្រ្កាបព្រៃឈើ និងនេសាទ បានឆ្លើយបដិសេធ មិនដឹងពីការឈូសឆាយដីរបស់ក្រុមហ៊ុនគ្រួសារ សុខសាសន្តឡើយ។ ចំណែកលោក ប៉ែន វណ្ណរិទ្ធ ប្រធានមន្ទីរកសិកម្មខេត្តកំពង់ធំ បានឲ្យដឹងថា លោកនិងចុះស្រាវជ្រាវឲ្យលម្អិតពី បញ្ហាឈូសឆាយដីព្រៃនេះ៕SRP