ខេត្តបាត់ដំបង៖មន្ត្រីនគរបាលខេត្តបានឲ្យដឹងថា មនុស្សចំនួន៨នាក់ រួមនឹងវត្ថុតាង ត្រូវបានកសាងសំណុំរឿង បញ្ជូនទៅសាលាដំបូងខេត្តនៅរសៀលថ្ងៃ ទី២៦សីហា នេះ ពាក់ព័ន្ធលេងល្បែងជល់មាន់។ ចំណែកអ្នកលេងមួយចំនួនទៀតបានរត់គេចខ្លួនអស់ នាយការិយាល័យព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា ការបង្ក្រាបល្បែងស៊ីសង ធ្វើឡើងនៅថ្ងៃ ទី២៥ ខែសីហា ម្សិលមិញ នៅចំណុចភូមិបេង ឃុំអន្លង់វិល ស្រុកសង្កែ ខេត្តបាត់ដំបង តាមបទបញ្ជាផ្ទាល់ពីលោកស្នងការខេត្ត។
យោងតាមរបាយការណ៍ការិយាល័យព្រហ្មទណ្ឌកំរិតស្រាលបានឲ្យដឹងថា ជនសង្ស័យទាំង ០៨នាក់រួមមាន៖
១/ឈ្មោះ ឡុ ង រតនៈ អាយុ៤៦ឆ្នាំ។ ២/ឈ្មោះ ឃុំ សាវុទ្ធ អាយុ៤៧ឆ្នាំ។ ៣/ឈ្មោះ អ៊ាន នឿត អាយុ៤២ឆ្នាំ ៤ /ឈ្មោះ យី ពិសី អាយុ៣០ឆ្នាំ ៥ -ឈ្មោះ ខេង លាក អាយុ៦១ឆ្នាំ ៦ /ឈ្មោះ គឹម /បាន អាយុ៣១ឆ្នាំ ៧/ ឈ្មោះ សេង ម៉េត អាយុ៦៥ ឆ្នាំ ៨ /ឈ្មោះ ជា សាវ៉ុន អាយុ៤៣ ឆ្នាំ។ ដោយឡែកវត្ថុតារឹបអូស វត្ថុតាង រួមមាន សង្វៀនជល់មាន់១ មាន់ជល់ចំនួន០២ក្បាល និង ម៉ូតូចំនួន៩គ្រឿង រួមទាំងសម្ភារៈពាក់ព័ន្ធ មួយចំនួនទៀត។
បើតាមប្រភពបានឲ្យដឹងថាទីតាំងជល់មាន់ នេះ បានបើកដំណើរជាយូណាស់មកហើយ ទើបតែសមត្ថកិច្ចចុះបង្ក្រាប៕SRP
ខេត្តកំពង់ចាម៖មន្ត្រីសាលាខេត្តបានឲ្យដឹងថា អាជ្ញាធខេត្តកំពង់ចាម បានរៀបចំជាទីលានចាក់សំរាមថ្មី នៅលើទីតាំងដីគ្រប់គ្រងដោយរដ្ឋមួយកន្លែង ទំហំប្រមាណជិត២០ ហិកតា ដែលមានអំណោយផលល្អ ព្រោះទីតាំងដីនេះនៅឆ្ងាយពីលំនៅដ្ឋាន របស់ប្រជាពលរដ្ឋ ហេីយទំហំដីនេះ ក៏ត្រូវតាមស្តង់ដា របស់ម្ចាស់គម្រោង ADB គាំទ្រដោយក្ក្រសួងបរិស្ថាន។
មន្ត្រីសសាលាខេត្តបានឲ្យដឹងទៀតថា បច្ចុប្បន្នខេត្តកំពង់ចាម មានទីលានចាក់សំរាមមួយកន្លែង ស្ថិតនៅក្នុងឃុំបុសខ្នុរ ស្រុកចំការលើ ខេត្តកំពង់ចាម ដែលមានទំហំប្រមាណជា១០ ហិកតា ត្រូវបានក្រុមហ៊ុនប្រមូលសំរាមនៅក្នុងក្រុងកំពង់ចាម ហើយយកទៅចាក់ចោលនៅតំបន់នោះ។
កន្លងមកលោកសាយ សំអាល់ រដ្ឋមន្ត្រីក្រសួងបរិស្ថាន បានឧបត្ថម្ភផ្ដល់ម៉ូតូ និងរថយន្តដឹកសំរាម ជូនដល់រដ្ឋបាលខេត្តកំពង់ចាម ជាច្រើនគ្រឿង ដោយបាន បែងចែក ជូនតាមបណ្ដាក្រុងស្រុកមួយចំនួន ដេីម្បីប្រើប្រាស់ក្នុងយុទ្ធនាការ ប្រមូលសំរាមឲ្យបានស្អាត និងមានបរិស្ថានល្អ។
សូមបញ្ជាក់ថានៅព្រឹកមិញនេះលោក អ៊ុន ចាន់ដា អភិបាលខេត្តកំពង់ចាម បានដឹកនាំមន្ត្រី ពាក់ព័ន្ធ និងអាជ្ញាធរមូលដ្ឋាន ចុះពិនិត្យទីតាំចំណុចទួលទល់មេឃ ស្ថិតក្នុងភូមិទួលស្រែ ឃុំកោះរការ សស្រុកកំពង់សៀម ដេីម្បីរៀបចំទៅជាទីលានចាក់សំរាម៕SRP
ភ្នំពេញ៖ប្រទេសកម្ពុជាសម្រេចបានការចាក់វ៉ាក់សាំងការពារកូវីដ-១៩ ជិត ៩០% ធៀបនឹងចំនួនប្រជាជនគោលដៅ ១០លាននាក់ ហើយការឆ្លង និងស្លាប់ដោយសារជំងឺកូវីដ-១៩ មានការថមថយ ដែលជាសញ្ញាល្អមួយ «អាចនឹងឈានទៅលុបបំបាត់ព្រឹត្តិការណ៍សហគមន៍ ២០កុម្ភៈ នាពេលដ៏ខ្លីខាងមុខ»។
សម្តេចហ៊ុន សែន បានប្រកាសថា ទោះក្នុងតម្លៃណាក៏ដោយ រាជរដ្ឋាភិបាលកម្ពុជា ត្រូវតែសម្រេចឲ្យបាន នូវការចាក់វ៉ាក់សាំងជូន ប្រជាជនកម្ពុជា ដែលដល់អាយុត្រូវចាក់ហើយពេទ្យអនុញ្ញាតឱ្យចាក់។
សម្តេចហ៊ុន សែន បានបញ្ជាក់ថា នៅពិភពលោក ក៏ដូចជានៅកម្ពុជា នៅសង្ឃឹមតែលើវ៉ាក់សាំង ហើយយើងបានឃើញសញ្ញានៃការថមថយចុះនៃការឆ្លង តែបើសិនយើងបានចាក់វ៉ាក់សាំងហើយមានការឆ្លង វាមិនរត់ទៅរកស្ថានភាពជំងឺធ្ងន់ធ្ងរ និងការស្លាប់នោះទេ វាអាចកាត់បន្ថយ។
ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នៅតែជា អគ្គមគ្គុទេសក៍ដ៏ឆ្នើម ដែលបានដាក់ចេញនូវយុទ្ធសាស្ត្រគន្លឹះ និងវិធានការប្រកបដោយប្រសិទ្ធភាព ជាពិសេសខិតខំខ្នះខ្នែងស្វែងរកវ៉ាក់សាំងការពារជំងឺកូវីដ-១៩ ដើម្បីការពារអាយុជីវិតប្រជាពលរដ្ឋ សម្រេចបានជិត ៩០% បើធៀបនឹងចំនួនប្រជាជនគោលដៅ ១០លាននាក់ និងបានសម្រេចដាក់ដូសទី៣ (ដូសជំរុញ)ជូនមន្ត្រីជួរមុខ ព្រមទាំងកំពុងបើកយុទ្ធនាការចាក់ជូនកុមារ និងយុវវ័យ ចាប់ពីអាយុ ១២ ឆ្នាំ ដល់អាយុ ក្រោម ១៨ ឆ្នាំ ទាំងនៅរាជធានីភ្នំពេញ និងបណ្ដាខេត្តនានា មាន ៥៩,០១% ធៀបជាមួយនឹងកុមារ និងយុវវ័យគោលដៅ ១,៩៦៦,៩៣១ នាក់។
កម្ពុជា មានវ៉ាក់សាំងបង្ការជំងឺកូវីដ-១៩ គ្រប់គ្រាន់ សម្រាប់ចាក់ជូនពករដ្ឋខ្លួន ដោយឡែកប្រទេសខ្លះ ទោះបីមានលុយក៏ដោយតែមិនអាចរកទិញវ៉ាក់សាំង បានគ្រប់មកចាក់នោះដែរ។ តែសម្រាប់កម្ពុជាយើង មានមេដឹកនាំល្អ និងដោយសារភាពឈ្លាសវៃ របស់សម្ដេចហ៊ុន សែន និងមានទំនាក់ទំនងល្អទាំងបុគ្គល និងអន្តរជាតិ ជាពិសេសកម្ពុជាបានចាត់ទុកមិត្តចិនជាខ្នងបង្អែកយុទ្ធសាស្ត្រសម្រាប់ផ្គត់ផ្គង់វ៉ាក់សាំងផងនោះ ទេីបកម្ពុជា ទទួលបានវ៉ាក់សាំងជំនួយផង និងទិញផង ដេីម្បីយកមក ចាក់ជូនពលរដ្ឋខ្លួន បានយ៉ាងច្រេីនដល់ រហូតឈានដល់ចាក់ដូសទី ៣ ដល់ក្រុមជួរមុខបន្ថែមទៀត។ នៅលេីពិភពមានតែប្រទេស ២ទេ ដែលបានចាក់ វ៉ាក់សាំងជូនប្រជាជនបានច្រេីនជាងគេ គឺប្រទេស អ៊ីស្រាអែល និង ប្រទេសកម្ពុជា ដែលបានចាក់វ៉ាក់សាំងបានលឿន និងរហ័សជាងគេ ពោលគឺមិនមែនកើតឡើងដោយចៃដន្យនោះទេ។ ប្រទេសយើងក្រតែយើងមិនក្រខាងការគិតគូរ និងរកវិធីការពារអាយុជីវិតប្រជាជនយើងនោះឡើយ។
សូមជម្រាបថា គិតមកដល់បច្ចុប្បន្ននេះ ដោយសារបងប្អូនប្រជាពលរដ្ឋខ្មែរ នៅទូទាំងប្រទេសមួយចំនួនធំ បានប្រកាន់ខ្ជាប់នូវការអនុវត្តវិធានការសុខាភិបាល ដើម្បីទប់ស្កាត់ការចម្លងវីរុសកូវីសកូវីដ-១៩ ធ្វើឱ្យការឆ្លង និងការស្លាប់នៅតាមបណ្តារាជធានី ខេត្ត មានការថយចុះជាបន្តបន្ទាប់។ ទន្ទឹមនឹងនេះ មានខេត្តមួយចំនួន បានអនុញ្ញាតឲ្យដាក់ពាក្យស្នើសុំបើកអាជីវកម្ម ភោជនីយដ្ឋាន-អាហារដ្ឋាន ដើម្បីទទួលភ្ញៀវ ព្រោះដោយសារស្ថានភាពការរីករាលដាលជំងឺកូវីដ-១៩ ក្នុងខេត្តនោះមានលក្ខណៈធូរស្រាល និងល្អប្រសើរ។
ទោះបីកម្ពុជាយើងបាន នឹងកំពុងវាយលុកដោយវីរុសកូវីដ-១៩ បំប្លែងថ្មី ប្រភេទ Delta យ៉ាងណាក្តី តែការឆ្លង និងស្លាប់ដោយសារជំងឺកូវីដ-១៩ បានបន្តធ្លាក់ចុះជាលំដាប់ ដែលការថមថយនេះ ជាសញ្ញាល្អមួយសម្រាប់រាជរដ្ឋាភិបាលកម្ពុជា អាចនឹងឈានទៅលុបបំបាត់ព្រឹត្តិការណ៍សហគមន៍២០កុម្ភៈ នាពេលដ៏ខ្លីខាងមុខជាក់ជាមិនខាន៕SRP
ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម និងលោក ខ្លូត ផន ប្រធានក្រុមប្រឹក្សាខេត្ត រួមនឹងអភិបាលរងខេត្ត នៅព្រឹកមិញនេះបានទទួលអំណោយជាសម្ភារ និងថវិកា ពីសប្បុរសជន។
លោកអ៊ុន ចាន់ដា បានថ្លែងអំណរគុណ និងជូនពរដល់ សប្បុរសជន ដែលបានឧបត្ថម្ភ គាំទ្រដល់គណៈកម្មការប្រយុទ្ធប្រឆាំងនឹងជំងឺកូវីដ-១៩ ដែលជាការចូលរួមចំណែក យ៉ាងសំខាន់ ក្នុងការប្រយុទ្ធប្រឆាំងនឹងការឆ្លងរាតត្បាតជំងឺដ៏កាចសាហាវនេះ ហើយក៏ជាការជួយរំលែកទុក្ខលំបាក និងការខ្វះខាត របស់ពលករចំណូលស្រុក ក៏ដូចជាអ្នកពាក់ព័ន្ធព្រឹត្តិការណ៍២០កុម្ភៈ ដែលកំពុងធ្វើចត្តាឡីស័ក ផងដែរ។
គួរបញ្ជាក់ផងដែរថា ពិធីប្រគល់ និងទទួលអំណោយនេះ ដោយលោកសៀម សាវ៉ាន់ និងលោកស្រី ជួង ម៉ារុន បានជួយឧបត្ថម្ភ ថវិកាចំនួន ១០លានរៀល ម៉ាស ១៥កេស អាកុលSNK ១៥កាន ទឹកបរិសុទ្ធវីតាល់ ១៥០កេស ត្រីខ ១០០០កំប៉ុង និងមី ចំនួន១០០កេសតូច ផងដែរ៕SRP
ខេត្តបាត់ដំបង៖ក្រសួងសាធារណការនិងដឹកជញ្ជូន បានប្រកាសតែងតាំងមន្ត្រីថ្លឹងយានយន្ត និងដាក់ដំណើរការស្ថានីយជញ្ជីងអចល័តបណ្តោះអាសន្ន មួយកន្លែង «ពុកឆ្មា-ខេត្តបាត់ដំបង» ស្ថិតនៅលើកំណាត់ផ្លូវជាតិលេខ៥ ក្នុងភូមិដំបូកខ្ពស់ ឃុំអូរដំបង២ ស្រុកសង្កែ ខេត្តបាត់ដំបង ស្ថិតនៅលើកំណាត់ផ្លូវជាតិលេខ៥ ត្រង់ចំណុចគ.ម ២៨១+៥០០ ក្នុងភូមិដំបូកខ្ពស់ ឃុំអូរដំបង២ ស្រុកសង្កែ។
អភិបាលខេត្តបាត់ដំបង លោកងួន រតនៈ បានស្វាគមន៍ និងផ្តល់ការសហការលើការដាក់ដំណើរការស្ថានីយជញ្ជីងក្នុងទឹកដីខេត្តបាត់ដំបង ដើម្បីទប់ស្កាត់យានយន្តដឹកជញ្ជូនលើសទម្ងន់កម្រិតកំណត់។
លោកមានប្រសាសន៍ថា ដើម្បីទប់ស្កាត់បញ្ហាដឹកលើសទម្ងន់នេះឱ្យមានប្រសិទ្ធភាព គឺទាមទារ ឲ្យមានការចូលរួមសហការ ពីគ្រប់ភាគីពាក់ព័ន្ធ ទាំងមន្រ្តីអនុវត្តច្បាប់ អាជ្ញាធរមូលដ្ឋាន និងគ្រប់ម្ចាស់យានយន្តដឹកជញ្ជូន ហើយក្រុមការងារត្រូវតែមានភាពស្មោះត្រង់ មានទំនួលខុសត្រូវខ្ពស់ និងត្រូវអនុវត្តតាមច្បាប់ដែលបានកំណត់ ប្រកបដោយតម្លាភាព និងគ្មានការលើកលែងឡើយដល់អ្នកដែលប្រព្រឹត្តខុសច្បាប់។
សូមបញ្ជាក់ផងដែរថា ស្ថានីយជញ្ជីងអចល័តបណ្តោះអាសន្នពុកឆ្មា-ខេត្តបាត់ដំបង នឹងចាប់ផ្ដើមដំណើរការថ្លឹងសាកល្បងក្នុងរយៈពេល១៤ថ្ងៃ ចាប់ពីថ្ងៃទី២៣ ខែសីហា ដល់ថ្ងៃទី០៥ ខែកញ្ញា ឆ្នាំ២០២១ និងអនុវត្តផ្លូវការចាប់ពីថ្ងៃទី០៦ ខែកញ្ញា ឆ្នាំ២០២១ខាងមុខនេះ។
សូមជម្រាបថាការដាក់ស្ថានីយ៍ថ្លឹងរថយន្តនេះ នៅថ្ងៃចន្ទ ទី២៣ ខែសីហា ឆ្នាំ២០២១៕SRP
