ខេត្តកំពង់ចាម៖ក្រុមមន្ត្រីអន្តរាគមន៍បង្ក្រាបបទល្មើសចរាចរសត្វ និងផលិតផលមានដើមកំណើតពីសត្វ សហការជាមួយការិយាល័យផលិតកម្ម និងបសុព្យាបាលមន្ទីរកសិកម្មខេត្តកំពង់ចាម បានចាប់រថយន្ត១គ្រឿង ដឹកប្រហិតជិត ២០តោន នាំចូលពីប្រទេសថៃ។

ការបង្ក្រាបធ្វើឡើងនៅថ្ងៃទី១៨ ខែកញ្ញា ឆ្នាំ២០២១ ស្ថិតក្នុងភូមិបាធាយ ឃុំបាធាយ ស្រុកបាធាយ ខេត្តកំពង់ចាម។

មន្ត្រីជំនាញបានឲ្យដឹងថារថយន្តដឹកប្រហិតម៉ាក HYUNDAI ពណ៌ស ជាប្រភេទរថយន្តដឹកទំនិញចំណុះ២០តោន(V1) ពាក់ស្លាកលេខកំពង់ចាម ៣A ៩៩៨៣ បានដឹកផលិតផលកែច្នៃពីសត្វ (ប្រហិត)ចំនួនសរុប១៨,៤៥៤គីឡូក្រាម ( ហតដកសាច់ក្ដាម៧,៥០៤គីឡូក្រាម និងហតដកសាច់មាន់១០,៩៥០គីឡូក្រាម)។

មន្ត្រីបានបន្តថារថយន្តខាងលើនេះបាននាំចូលផលិតផលមានដើមកំណើតពីសត្វ(ប្រហិត) មកពីប្រទេសថៃ តាមច្រកអូរស្មាច់ សង្កាត់អូរស្មាច់ ខេត្តឧត្តរមានជ័យ ឆ្ពោះទៅចែកចាយនៅរាជធានីភ្នំពេញ ដោយពុំមានលិខិតអនុញ្ញាតអ្វីទាំងអស់។

បើតាមមន្ត្រីបានបញ្ជាក់ថាវត្ថុតាងបទល្មើសត្រូវបានយកទៅរក្សាទុកនៅទីតាំងចត្តាឡីស័កសត្វរបស់ឣគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់ការទៅតាមនិតិវិធីច្បាប់៕SRP

ខេត្តកំពង់ចា៖លោកអ៊ុន ចាន់ដា អភិបាលខេត្ត និងជាប្រធានគណកម្មការចំពោះកិច្ច ចាក់វ៉ាក់សាំងក្នុងក្របខណ្ឌ ខេត្តកំពង់ចាម បានថ្លែងថា អ្វីដែលកូនៗ​ ក្មួយៗ​ រង់ចាំបានមកដល់ហេីយគឺ​ វ៉ាក់សាំង​ការពារជំងឺកូវីដ-១៩​ ក្តីសង្ឃឹមរបស់កុមារ និងយុវ័យ គឺការទទួលបានវ៉ាក់សាំង​បង្ការជំងឺកូវីដ-១៩ ដើម្បីមានឱកាសបានចូលសាលារៀនវិញ។

ថ្លែងយ៉ាងដូច្នេះក្នុងឱកាសបើកយុទ្ធនាការចាក់វ៉ាក់សាំង​បង្ការ​ជំងឺ​កូវីដ ១៩ ដល់កុមារ អាយុចាប់ពី ៦ឆ្នាំ ដល់ក្រោម ១២ឆ្នាំ នៅទូទាំងខេត្តកំពង់ចាម នៅព្រឹកមិញនេះ។

លោកអ៊ុន ចាន់ដា បាន​ថ្លែង​ថា​ យុទ្ធនាការចាក់វ៉ាក់សាំង សម្រាប់កុមារអាយុ ៦ឆ្នាំ ដល់ក្រោម ១២ឆ្នាំ នាពេលនេះ សបញ្ជាក់អំពី ការយកចិត្តទុកដាក់ខ្ពស់ របស់​សម្តេច​ហ៊ុន​ សែន​ នាយករដ្ឋមន្ត្រី​កម្ពុជា​ មកលើចៅៗ កុមារ ដើម្បីជំរុញ​ឲ្យ​មានការបើកសាលាបឋមសិក្សាឡើងវិញ នាពេលខាងមុខ ខណៈពេលដែល កុមារ អាយុចាប់ពី ១២ឆ្នាំ រហូតដល់ ១៨ឆ្នាំ បាននឹងកំពុងតែបន្តចាក់វ៉ាក់សាំងដូសបន្ត ហើយឈានទៅដល់ការបើកសាលាអនុវិទ្យាល័យ និងវិទ្យាល័យ ឡើងវិញផងដែរ។ ម្យ៉ាងវិញទៀត រដ្ឋបាលខេត្ត ក៏គ្រោងនឹងបើកឲ្យសិស្សថ្នាក់បឋម ចូលរៀនវិញនៅថ្ងៃទី១១ ខែតុលា ឆ្នាំ២០២១ ខាងមុខ ផងដែរ។ ដូច្នេះយុទ្ធនាការចាក់វ៉ាក់សាំង ដល់កុមារ ចាប់ពីអាយុ ៦ ដល់ក្រោម ១២ឆ្នាំ នាពេលនេះ វានឹងអាចបន្ស៊ីទៅនឹងផែនការ បើកឲ្យដំណើរការចូលរៀនឡើងវិញ នៅថ្នាក់កម្រិតបឋម ហើយក្មួយៗ ក៏អាចនឹងឈានចាក់វ៉ាក់សាំងម្ជុលទី ២ និងទទួលបានភាពសាំនៅក្នុងខ្លួន ដើម្បីការពារការឆ្លងរាលដាល នៃជំងឺកូវីដ-១៩ ផងដែរ។

អភិបាលខេត្តកំពង់ចាម បានធ្វើការអំពាវនាវ ដល់បងប្អូនប្រជាពលរដ្ឋ មាតាបិតា អាណាព្យាបាល និងកុមារ ដែលបានទទួលការចាក់វ៉ាក់សាំង រួចហើយ ត្រូវតែមានការប្រុងប្រយ័ត្នខ្ពស់បន្តអនុវត្ត តាមការណែនាំ របស់ក្រសួងសុខាភិបាល ការអនុវត្តវិធាន ៣ការពារ​ ៣កុំ​ ដើម្បីជៀសផុតពី​ជំងឺដ៏កាចសាហាវនេះ​។

គួរ​បញ្ជាក់ថា យុទ្ធនាការចាក់វ៉ាក់សាំងបង្ការ ដល់កុមារអាយុចាប់ពី ៦ឆ្នាំ ដល់អាយុក្រោម ១២ឆ្នាំ នៅក្នុងខេត្តកំពង់ចាម សរុបមានចំនួន ១០៦.៥០១នាក់ ក្នុងនោះ រដ្ឋបាលខេត្តកំពង់ចាម បានរៀចំទីតាំងចាក់ នៅតាមបណ្តាក្រុង-ស្រុក ចំនួន ២៨កន្លែង។​ ដោយ​បច្ចុប្បន្ននេះ នៅទូទាំងខេត្តកំពង់ចាម សម្រេចចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋមានអាយុចាប់ពី ១៨ឆ្នាំឡើង បានចំនួន ៥៧៩.៩៥២នាក់ ស្មើនឹង ៨២,៦៥% និងកុមារមានអាយុចាប់ពី ១២ឆ្នាំ ដល់ក្រោម ១៨ឆ្នាំ បានចំនួន ១០៧.៦៩៦នាក់ ស្មើនឹង ៩៧,៥៦%។

ក្នុង​ឱកាស​នោះដែរ លោក អ៊ុន ចាន់ដា អមដំណើរដោយ​មន្ត្រី​ពាក់ព័ន្ធ​ ក៏បានអញ្ជើញពិនិត្យអាគារ សម្រាប់រៀបចំម៉ាស៊ីនផលិតអុកស៊ីសែន ដែលមានទីតាំង ស្ថិតនៅក្នុងមន្ទីរពេទ្យ ខេត្តកំពង់ចាម សម្រាប់បម្រើ​ឲ្យ​ការព្យាបាលជំងឺកូវីដ-១៩ ផងដែរ៕SRP

ភ្នំពេញ៖ថ្លែងនៅក្នុងសន្និសីទសារព័ត៌មាន សម្តេចហ៊ុន សែន នាយករដ្ឋមន្ត្រី បានមានប្រសាសន៍ថា ពេលនេះកម្ពុជាស្ថិតនៅក្នុងប្រទេសដែលបានចាក់វ៉ាក់សាំងច្រើនជាងគេ ខណៈដែលស្ថានភាពកូវីដ-១៩ នៅលើពិភពលោកមិនទាន់មានការថមថយនៅឡើយ។

នាយករដ្ឋមន្ត្រី បានមានប្រសាសន៍ជាថ្មីម្តងទៀតថា សម្តេចមិនចាក់វ៉ាក់សាំងនៅកន្លែងនេះបន្តិច កន្លែងនោះបន្តិចទេ គឺត្រូវចាក់ស្រោចវ៉ាក់សាំងតែម្តង ទើបមានភាពស៊ាំក្នុងសហគមន៍ ដែលមានន័យថា ស្រោចកន្លែងណាគឺត្រូវស្រោចឱ្យជោគតែម្តង។
សម្តេចតេជោ បានមានប្រសាសន៍ថា យើងមានវិធានការ៣សំខាន់ៗ ដែលកម្ពុជាដាក់ចេញជាប្រចាំថ្ងៃ នោះគឺទី១ ការធ្វើចត្តាឡីស័ក និងការធ្វើតេស្តរហ័ស ទី២ ការចាក់វ៉ាក់សាំង និងទី៣ ការព្យាបាលដោយថ្នាំ និងវិធីថ្មីៗ។

សម្តេចនាយករដ្ឋមន្ត្រី បានមានប្រសាសន៍ថា គោលការណ៍បើកសាលាឡើងវិញ រួមមានទី១ នៅតាមជនបទដែលមានហានិភ័យទាប ទី២ នៅតំបន់មានហានិភ័យមធ្យម ដែលផ្តល់លទ្ធភាពឱ្យថ្នាក់ទី៩ ដល់១២, ទី៣ នៅតំបន់ដែលមានហានិភ័យខ្ពស់ គឺត្រូវរៀនតាមអនឡាញ, ទី៤ ត្រូវបង្កើតគណៈកម្មការតាមដាន ទី៥ បន្តត្រួតពិនិត្យអ្នកជំងឺថ្មី កុំឱ្យឆ្លងចូលសាលារៀន។ សម្តេចតេជោ ហ៊ុន សែន បានមានប្រសាសន៍ទៀតថា ការបើកអ្វីៗឡើងវិញក្រោយថមថយកូវីដ ត្រូវចាប់ផ្តើមពីដំបូងវិស័យអប់រំ បន្ទាប់មកគឺវិស័យសេវា ដែលវិស័យសេវាត្រូវធ្វើ២ជំហាន ដោយជំហានទី១ បើកទេសចរណ៍ក្នុងស្រុក ជំហានទី២ គឺទេសចរណ៍វ៉ាក់សាំង។
សម្តេចតេជោ ថ្លែងថា ពេលខាងមុខ អ្នកចាក់វ៉ាក់សាំងគ្រប់អាចមកកម្ពុជាបាន ប៉ុន្តែអាចធ្វើចត្តាឡីស័កនៅក្របខណ្ឌមូលដ្ឋានខេត្តនោះ៧ថ្ងៃ ដោយមិនឱ្យឆ្លងទៅខេត្តដទៃ។ កម្ពុជាសុខចិត្តចំណាយរាប់រយលានដុល្លារដើម្បីរកវ៉ាក់សាំង ដើម្បីទាញចំណូលរាប់ពាន់ដុល្លារត្រឡប់មកវិញ។

សម្តេចហ៊ុន សែន ថ្លែងយ៉ាងដូច្នេះ នៅព្រឹកមិញនេះ ក្នងឱកាសអញ្ជើញប្រកាសបើកយុទ្ធនាការថ្មីមួយទៀត គឺការចាក់វ៉ាក់សាំងបង្ការជំងឺកូវីដ-១៩ ជូនដល់កុមារអាយុចាប់ពី ៦ឆ្នាំ ដល់ ១២ឆ្នាំ ដែលធ្វើឡើងនៅវិមានសន្តិភាព រាជធានីភ្នំពេញ។

ជាមួយនឹងការប្រកាសបើកយុទ្ធនការចាក់វ៉ាក់សាំងជូនកុមារអាយុចន្លោះពី ៦ឆ្នាំ ទៅ១២ឆ្នាំនេះ ចៅៗរបស់សម្តេចតេជោ និងចៅៗរបស់ឥស្សរជនជាន់ខ្ពស់ រាជរដ្ឋាភិបាលកម្ពុជាមួយចំនួនទៀត បានមកទទួលវ៉ាក់សាំងបើកយុទ្ធនាការនេះផងដែរ។ ការចាក់វ៉ាក់សាំងជូនដល់កុមារអាយុចន្លោះពី ៦ឆ្នាំ ទៅ ១២ឆ្នាំនេះ គឺដើម្បីបង្កើតភាពសាំក្នុងសង្គមឱ្យកាន់តែធំដែលអាចឈានទៅបើកលំហរសកម្មភាពក្នុងសង្គម ឱ្យកាន់តែទូលាយ បន្ថែមពីលើនេះគោលដៅសំខាន់ក្នុងការចាក់វ៉ាក់សាំងនេះ ដើម្បីឱ្យកុមារតូចៗអាចចូលរៀននៅសាលាឡើងវិញ។

សម្តេចហ៊ុន សែន បានណែនាំឱ្យគណៈកម្មការចាក់វ៉ាក់សាំង សិក្សាអំពីការចាក់វ៉ាក់សាំងដល់កុមារអាយុ៣ ទៅ៦ឆ្នាំ ដែលមានប្រមាណជាង ៩១ម៉ឺននាក់នៅកម្ពុជា ខណៈដែលពួកគេត្រូវចូលរៀនថ្នាក់មត្តេយ្យផងដែរ។ នៅថ្ងៃនេះផងដែរ សម្តេចតេជោនាយករដ្ឋមន្ត្រីក៏បានប្រកាសរួមគ្នាតែម្ដងជាមួយនឹងការចាក់វ៉ាក់សាំងដល់កុមារដែលមានអាយុចាប់ពី៦ ឆ្នាំដល់១២ ឆ្នាំ និងប្រកាសបើកយុទ្ធនាការចាក់វ៉ាក់សាំងដូសទី៣ ជូនដល់ប្រជាពលរដ្ឋកម្ពុជាចាប់ពីពេលនេះតទៅផងដែរ៕SRP

ខេត្តសៀមរាប៖មន្ត្រីជាន់ខ្ពស់អាជ្ញាធរជាតិអប្សរា បានបដិសេធការចោទប្រកាន់ថា បានកាប់ដើមឈើធំៗ នៅមុខប្រាសាទអង្គរ សម្រាប់ធ្វើអាជីវកម្ម។

ការបដិសេធបែបនេះបន្ទាប់ពី កាសែតឌឹខេមបូឌាដេលី ដែលបានផ្សាយចោទប្រកាន់អ្នក គ្រប់គ្រងរមណីយដ្ឋានអង្គរថា បានកាប់ដើមឈើធំៗនៅមុខប្រាសាទអង្គរវត្ត ដើម្បីធ្វើអាជីវកម្ម។

នៅមុខប្រាសាទអង្គរ នៅថ្ងៃទី១៦ ខែកញ្ញាម្សិលមិញ លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានថ្លែងប្រាប់ក្រុមអ្នកសារព័ត៌មានថា កាលពីពេលថ្មីៗនេះ មន្ត្រីជំនាញរបស់អាជ្ញាជាតិអប្សរា បានកាប់ដើមឈើប្រភេទឈើទាល ចំនួន២ដើមនៅមុខបរិវេណប្រាសាទអង្គរវត្ត។

លោក យិត ចាន់ដារដ្ឋ ថ្លែងថា មុននឹងកាប់ដើមឈើទាំង២ដើមនោះ មន្ត្រីជំនាញបានថែទាំព្យាបាលវាយ៉ាងហ្មត់ចត់បំផុតដើម្បីឱ្យមានជីវិត ប៉ុន្ដែដោយសារវាមានអាយុកាលច្រើនឆ្នាំ និងមានជំងឺមិនអាចព្យាបាលបានទើបអាជ្ញាធរសម្រេចកាប់ចោល ដើម្បីបញ្ចៀសគ្រោះថ្នាក់ដល់ភ្ញៀវទេសចរ ហើយការកាប់នេះមានការជូនដំណឹងជាមុន មិនមែនកាប់ធ្វើអាជីវកម្មដូចការរិះគន់របស់បុគ្គលមួយចំនួន និងការចុះផ្សាយតាមបណ្ដាសង្គមហ្វេសប៊ុករបស់ឌឹខេមបូឌាដេលីខ្មែរនោះទេ។

លោកបានថ្លែងទៀតថា ដើមឈើនៅខាងមុខអង្គរនោះ មានច្រើនដើមដែលបានមានហានីភ័យដល់ភ្ញៀវទេសចរ សំណង់អគារជាដើម ជាក់ស្ដែងដើមឈើទាលនៅខាងអង្គរវត្ដដែលអាចបង្ករគ្រោះថ្នាក់ដល់អ្នកទេសចរ។ លោកថា ដើមឈើពិតមែនតែជារុក្ខជាតិ ប៉ុន្ដែវាក៏មានជំងឺដូចមនុស្សសត្វដែរ ដែលលោកចាត់ទុកការរិះគន់និងការផ្សព្វផ្សាយតាមហ្វេសប៊ុកឌឹខេមបូឌាដេលីជាព័ត៌មានបំភ្លើសខ្វះការពិត។

បើតាមលោក យិត ចាន់ដារដ្ឋ ដើមឈើនៅខាងមុខអង្គរក្នុងបរិវេណប៉ាកវី នឹងត្រូវកាត់កាត់ចោលបន្ថែមទៀត ព្រោះវាបានងាប់ ទោះបីអ្នកជំនាញអាជ្ញាធរជាតិខិតខំថែរក្សា យ៉ាងក៏ដោយ ដើម្បីកុំឱ្យមានហានីភ័យដល់អ្នកទេសចរ ក៏ដូចប្រជាពលរដ្ឋ អាជីវករផងដែរ។

គួរបញ្ជាក់ថាកាលពីថ្ងៃទី១៥ខែកញ្ញា ឆ្នាំ២០២១នេះ ផេកហ្វេសប៊ុក ឌឹខេមបូឌាដេលី ខ្មែរ The Cambodia Daily Khmer បានផ្សព្វផ្សាយថា ដើមឈើទាលធំៗមានអាយុកាលរាប់រយឆ្នាំ ដុះក្នុងតំបន់ឧទ្យានអង្គរទល់មុខប្រាសាទអង្គរវត្ត ដែលទាក់ទាញភ្ញៀវទេសចរនោះ កំពុងប្រឈមងាប់ជាបណ្តើរៗដោយសារដាក់ថ្នាំពុល និងមានដើមឈើខ្លះទៀត ត្រូវគេកាប់ដោយស្របច្បាប់។

យោងតាមលោក យិត ចាន់ដារដ្ឋ បានលើកឡើងថា កន្លងមកអាជ្ញាធរជាតិអប្សរា បានធ្វើការដកហូតដើមឈើដែលមានអាចបង្កហានិភ័យប្រមាណជា៣០០ដើមរួចមកហើយ ហើយរាល់ការដកហូតសុទ្ធតែមានការជូនដំណឹងជាមុន។ ក្រៅពីការដកហូតនេះ អាជ្ញាធរជាតិអប្សរា ក៏បានធ្វើការដាំកូនឈើ និងចែកកូនឈើដល់សាធារណជនក្នុងមួយឆ្នាំៗប្រមាណជា២០ម៉ឺនដើមផងដែរ៕SRP

ខេត្តសៀមរាប៖បុរសម្នាក់ស្រវឹងស្រាហើយបើកម៉ូតូដួលបណ្ដាលឲ្យស្លាប់។

ហេតុការណ៍បានកើតឡើងវេលាម៉ោង ៤និង៤០នាទី ថ្ងៃទី១៦ ខែកញ្ញា ឆ្នាំ២០២១ នេះនៅចំណុចផ្លូវលេខ២៦៦ ក្នុងភូមិស្រោង ឃុំខ្វាវ ស្រុកជីក្រែង ខេត្តសៀមរាប។

សមត្ថកិច្ចបានឲ្យដឹងថា ជនរងគ្រោះមានឈ្មោះ កែវ គន អាយុ៦៣ឆ្នាំ រស់នៅភូមិ ឃុំខាងលេី។ ករណីគ្រោះថ្នាក់ចរាចរណ៍នេះជនរងគ្រោះ បេីកបរម៉ូតូម៉ាកវ៉េវអាល់ហ្វាពណ៌ក្រហម គ្មានស្លាកលេខ ទិសដៅពីត្បូង ទៅជេីង។ មូលហេតុជនរងគ្រោះ ស្រវឹងស្រាបេីកបរម៉ូតូលឿន បត់កែងមិនទាន់ បណ្តាលអោយដួលម៉ូតូក៏ស្លាប់ពេលបញ្ជូនដល់មណ្ឌលសុខភាពខ្វាវ៕SRP

ខេត្តសៀមរាប៖លោកទៀ សីហា អភិបាលខេត្តសៀមរាប បានព្រមានដាក់ក្រុងសៀមរាបជាតំបន់ក្រហមក្នុងពេលឆាប់ៗនេះ។

ការព្រមានបែបនេះបន្ទាប់ពីលោកបានអះអាងនៅប៉ុន្មានថ្ងៃចុងក្រោយនេះថា ក្នុងខេត្តសៀមរាបមានករណីឆ្លងជំងឺកូវីដ១៩មានការកើនឡើង។

អភិបាលខេត្តសៀមរាប លោកទៀ សីហា នៅព្រលប់ថ្ងៃទី ១៦ ខែកញ្ញា ឆ្នាំ ២០២១ នេះ បានបញ្ជាក់នៅលឺទំព័រ page facebook ថា៖ក្រុងសៀមរាប នឹងដាក់ជាតំបន់ក្រហម ក្នុងពេលឆាប់ៗនេះ ដោយមូលហេតុបងប្អូនប្រជាពលរដ្ឋ មួយចំនួនមិនសហការ មិនអនុវត្តតាមការណែនាំ មិនចេះការពារខ្លួន និងក្រុមគ្រួសាររបស់ខ្លួន បន្តនាំអោយឆ្លងដល់អ្នកដទៃ ដែលមានការយល់ដឹង និងប្រុងប្រយ័ត្នខ្ពស់។

លោកទៀ សីហា បានបញ្ជាក់ថា ខ្ញុំបាទសូមការយោគយល់ និងអធ្យាស្រ័យ ចំពោះបងប្អូនប្រជាពលរដ្ឋក្នុងក្រុងដែលតែងតែគាំទ្រ និងអនុវត្តតាមការណែនាំរបស់ក្រសួងសុខាភិបាល និង រដ្ឋបាលខេត្ត។ ជាមួយគ្នានេះលោកទៀ សីហា ក៏បាន អំពាវនាវ ឱ្យប្រជាពលរដ្ឋអនុវត្តនូវវិធានការសុខាភិបាល ៣ការពារ: ត្រូវពាក់ម៉ាស់, ត្រូវលាងដៃ, ត្រូវគម្លាតបុគ្គល និង៣កុំ: កុំនៅបន្ទប់បិទជិត, កុំនៅកន្លែងកុះករ,កុំនៅប៉ះពាល់គ្នា។

សូមបញ្ជាក់ថាកាលពីថ្ងៃទី១១ ខែកញ្ញា នេះអាជ្ញាធរខេត្តសៀមរាប បានសម្រេចកំណត់ជា “តំបន់លឿងទុំ” នៅក្នុងភូមិសាស្ត្រក្រុងសៀមរាប ជាបណ្ដោះអាសន្ន រយៈពេល ១(មួយ)សប្តាហ៍ រហូតដល់ថ្ងៃទី ១៨ ខែកញ្ញា ឆ្នាំ២០២១ ដើម្បីទប់ស្កាត់ការឆ្លងរាលដាលជំងឺកូវីដនៅក្នុងភូមិសាស្ត្រខេត្តសៀមរាប៕SRP

ខេត្តកំពង់ចាម៖អាជ្ញាធរខេត្តកំពង់ចាមនៅថ្ងៃទី ១៦ ខែកញ្ញាឆ្នាំ ២០២១ នេះ បានចេញសេចក្ដីជូនដំណឹងស្តីពីការចាក់វ៉ាក់សាំងដល់កុមារចាប់ពីអាយុ ៦ឆ្នាំឡើងទៅ៕SRP

ខេត្តត្បូងឃ្មុំ៖អភិបាលខេត្តត្បូងឃ្មុំ លោកជាម ច័ន្ទសោភ័ណ បានប្រាប់ដល់មន្ត្រី​នគរបាល​ទាំងអស់​ ត្រូវបន្តធ្វើកិច្ចការពារ សុខសុវត្ថិភាព សណ្តាប់ធ្នាប់ សាធារណៈ ជូនប្រជាពលរដ្ឋ ឲ្យបានកាន់តែល្អប្រសើរ ស្របតាមគោលនយោបាល «ភូមិ-ឃុំមានសុវត្ថិភាព»។

អភិបាលខេត្ត ក៏បានអំពាវនាវដល់ប្រជាពលរដ្ឋ ត្រូវបន្តអនុវត្តបានម៉ឺងម៉ាត់ និងមានប្រសិទ្ធភាព នូវវិធានការ​ ៣ការពារ​ ៣កុំ​ ដើម្បីចៀសផុត​ពីជំងឺកូវីដ។

អភិបាលខេត្ត​ ក៏បានធ្វើការសំណេះសំណាលលើកទឹកចិត្ត ដល់អាជ្ញាធរ និងកងកម្លាំងកំពុងឈរជើង១២ គោលដៅ លេីទីតាំងបិទខ្ទប់២ សរុប៨៤នាក់ ដោយបានឧបត្ថម្ភ មី៦៥កេស ទឹកសុទ្ធ៣០កេស ម៉ាស២កេស អាកុល៣កាន និងថវិកាក្នុងម្នាក់២ម៉ឺនរៀល សរុប១,៦៨០,០០០រៀល​ផងដែរ។

លោកថ្លែងបែបនេះក្នុងឱកាសចុះពិនិត្យស្ថានភាព​ពលរដ្ឋ ធ្វើ​ចត្តាឡីស័ក​ ក្នុងតំបន់បិទខ្ទប់​ នៅក្រុងសួង​ និងស្រុកត្បួងឃ្មុំ នៅព្រឹក​មិញនេះ​។

សូមជម្រាបថាលោកជាម ច័ន្ទសោភ័ណ និងក្រុមការងារ​ ក៏បានចុះពិនិត្យផ្លូវមួយខ្សែដែលខូចខាតដោយទឹកភ្លៀងជន់លិច ក្នុងការវាយតម្លៃលើការងារជួសជុលឡើងវិញ។លោកក៏បានចុះពិនិត្យទីតាំងទីទួលសុវត្ថិភាព មានផ្ទៃក្រឡា១៥ហិកតា ត្រៀមសម្រាប់ពលរដ្ឋ​ ដែលរងគ្រោះដោយទឹកជំនន់ មកស្នាក់នៅបណ្តោះអាសន្ន ស្ថិតក្នុងឃុំទន្លេបិទ ស្រុក​ត្បូងឃ្មុំ​ ផងដែរ​៕SRP

ខេត្តសៀមរាប៖អាជ្ញាធរខេត្តសៀមរាប អំពាវនាវដល់ពលរដ្ឋចំនួន១៦នាក់ ឲ្យមកបង្ហាញមុខយកសំណាក ចៀសវាង ប្រឈមនឹងផ្លូវច្បាប់។

អាជ្ញាធរបានឲ្យដឹងថារដ្ឋបាលខេត្តសូមជូនដំណឹងដល់ប្រជាពលរដ្ឋចំនួន១៦នាក់ (ដែលមានឈ្មោះដូចខាងក្រោម) ដែលមិនបានបំពេញកាតព្វកិច្ច សហការជាមួយមន្ត្រីសុខាភិបាល ដើម្បីយកសំណាក។

សូមបញ្ជាក់ថា ពលរដ្ឋទាំង១៦នាក់បំពេញព័ត៌មានដើម្បីយកសំណាករួចហើយ ប៉ុន្តែដល់ពេលត្រូវយកសំណាកមិនបានបង្ហាញមុខយកសំណាក។

ទោះជាយ៉ាងណាអាជ្ញាធរសូមស្នើដល់បងប្អូនដូចមានរាយនាមខាងលើ សូមរួសរាន់ទំនាក់ទំនង ជាមួយអាជ្ញាធរមូលដ្ឋាន ដើម្បីមកយកសំណាក នៅតាមទីតាំងដែលមន្ទីរសុខាភិបាលខេត្តបានរៀបចំ។ ក្នុងករណី មិនរួសរាន់មកយកសំណាក តាមការជូនដំណឹងនេះ រដ្ឋបាលខេត្តនឹងចាត់ក្រុមការងារកសាងសំណុំរឿងតាមវិធានការច្បាប់ ស្របតាមខ្លឹមសារ មាត្រា១១ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងមាត្រា២១ នៃអនុក្រឹត្យលេខ៣៧ អនក្រ.បក ចុះថ្ងៃទី១២ ខែមីនា ឆ្នាំ២០២១ ស្តីពីវិធានការសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ រាល់ព័ត៌មានបន្ថែមសូមទំនាក់ទំនងទូរស័ព្ទលេខ ០១២ ៨២៣ ៤៥១។

អាជ្ញាធររដ្ឋសង្ឃឹមយ៉ាងមុតមាំថា ពលរដ្ឋទាំង១៦នាក់ខាងលើចូលរួមសហការយកសំណាកឱ្យបានទាន់ពេលវេលាកុំបីខាន៕SRP

ខេត្តសៀមរាប៖សណ្ឋាគារឡុទុសប្លង្គ ដែលមានទីតាំងស្ថិតនៅកណ្ដាលក្រុងសៀមរាប ត្រូវបានក្រសួងសុខាភិបាលអនុញ្ញាតឱ្យផ្ដល់សេវាថែទាំ និងព្យាបាលអ្នកជំងឺកូវីដ-១៩កម្រិតស្រាល រយៈពេល ២ឆ្នាំ។ នេះបើយោងតាមលិខិតអនុញ្ញាត របស់ក្រសួងសុខាភិបាលដែលចុះហត្ថលេខាដោយរដ្ឋមន្ត្រីម៉ម ប៊ុនហេង។

ក្នុងលិខិតបានបញ្ជាក់ថា អនុលោមតាមលិខិតលេខ ០២/២១ អបស.មព ចុះថ្ងៃទី១៥ ខែកញ្ញា ឆ្នាំ២០២១ របស់ក្រសួងសុខាភិបាល បានអនុញ្ញាតឱ្យសណ្ឋាគារឡុទុសប្លង្គ ស្ថិតនៅបណ្តោយផ្លូវជាតិលេខ៦ សង្កាត់ស្វាយដង្គំ ក្រុងសៀមរាប ផ្តល់សេវាថែទាំ និងព្យាបាលអ្នកជំងឺកូវីដ-១៩ កម្រិតស្រាល រយៈពេល ២ឆ្នាំ ដោយគិតចាប់ពីថ្ងៃទី១៥ ខែកញ្ញា ឆ្នាំ២០២១ ដល់ថ្ងៃទី១៥ ខែកញ្ញា ឆ្នាំ២០២៣៕SRP

ខេត្តកំពង់ចាម៖លោកអ៊ុន​ ចាន់ដា​ អភិបាលខេត្តកំពង់ចាម​ បាន​ប្រាប់ដល់​មន្ត្រី​អប់រំ​ និងលោកគ្រូ អ្នកគ្រូ ​ទាំងអស់ ឲ្យ​ណែនាំ​ដល់​សិស្សានុសិស្ស ត្រូវអនុវត្ត​ឲ្យ​បាន​ខ្ជាប់ខ្ជួន​ វិធានការ​៣ការពារ ៣កុំ​ ដេីម្បីចៀសសផុត​ពី​នៃ​ជំងឺ​កូវីដ​-១៩​។ លោកថា ក្នុងនោះ​សិស្សានុសិស្ស ដែលមានអាយុ ១២ឆ្នាំ ឡើងទៅ ត្រូវទៅ​ចាក់​វ៉ាក់សាំងបង្ការ​ជំងឺ​កូវីដ​-១៩ ឲ្យបានគ្រប់ៗគ្នា និងត្រូវប្រុងប្រយ័ត្ន​ឲ្យបានខ្ពស់ អំឡុងពេលសិក្សារៀនសូត្រ របស់លោកគ្រូ អ្នកគ្រូ និងក្មួយៗ​សិស្សានុសិស្ស​ នាពេលខាងមុខនេះ ដោយ​ហេតុ​ថា​ នៅថ្ងៃទី២០ ខែកញ្ញា នេះ រដ្ឋបាលខេត្តកំពង់ចាម នឹងសម្រេចបើកឲ្យដំណើរសាលាឡើងវិញ ចាប់ពីថ្នាក់កម្រិតអនុវិទ្យាល័យឡើង នៅក្នុងដំណាក់ទី១។ ដោយឡែក ក្នុងដំណាក់ទី២ ក៏គ្រោងឲ្យបើកដំណើរការរៀនសូត្រ នៅថ្នាក់កម្រិតបឋមសិក្សា នៅថ្ងៃទី១១ ខែតុលា ខាងមុខនេះផងដែរ។

លោកណែនាំបែបនេះនៅព្រឹកមិញនេះ​ ក្នុងឱកាសផ្ដល់​សម្ភារ​ការពារ​ជំងឺ​កូវីដ​-១៩​ រួមមាន​ ​ម៉ាស​ អាកុល​ សាប៊ូ​ និង​ថវិកា​ ជូនដល់សាលា​អនុវិទ្យាល័យ​ និង​វិទ្យាល័យ​ ខណៈ​សាលា​ ចំនួន​១២៤​ ក្នុង​ខេត្តកំពង់ចាម​​ត្រៀម​បេីក​ឲ្យ​សិស្ស​ចូល​សិក្សា​ឡេីង​វិញ​នៅ​ថ្ងៃ​ទី​២០​ ខែកញ្ញា​ ឆាប់ៗខាងមុខនេះ​។

គួរ​បញ្ជាក់​ផងដែរ​ថា​ សម្ភារ​ដែល​ត្រូវ​ផ្ដល់​ជូន​អនុវិទ្យាល័យ​ និង​វិទ្យាល័យ​​ទាំង​ ១២៤សាលា​ ដោយ​ក្នុង​១សាលា​ទទួល​បាន​ ​ម៉ាស​ ១០០០​ម៉ាស​ ទឹកអាកុល ៣០លីត្រ និង​សាប៊ូ ១៥ដុំ ចំពោះ​សាលា​ ដែលត្រូវ​យកធ្វើជាមណ្ឌលចត្តាឡីស័ក ចំនួន​ ២២សាលា​ ក្នុង​១សាលា​ ទទួល​បាន​ថវិកា​ ១លានរៀន។ ដោយឡែក វិទ្យាល័យ ព្រះសីហនុ ក្រុងកំពង់ចាមត្រូវយកធ្វើជាមន្ទីរពេទ្យព្យាបាលកូវីដ កម្រិតស្រាលទទួលបានថវិកា២លានរៀល​ផងដែរ​៕SRP

ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ផ្ញើសារអបអរសាទរ គោរពជូន សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាស សម្ដេចអគ្គមហាសេនាបតីតេជោ ទទួលបាន «មេដាយសហប្រធានកិច្ចប្រជុំកំពូលសន្តិភាពពិភពលោក២០២១» ពីមហាសន្និបាតនៃក្ដីសង្ឃឹមលើក ទី៧ ក្រោមប្រធានបទស្ដីពី សន្តិភាពនៅតំបន់អាស៊ីប៉ាស៊ីហ្វិក ។

សារអបអរសាទរបានបញ្ជាក់ខ្លឹមសារថា៖

សម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្ត្រី នៃព្រះរាជាណាចក្រកម្ពុជា សម្តេចអគ្គមហាសេនាបតីតេជោ ជាទីគោរពដ៏ខ្ពង់ខ្ពស់!

តាងនាមថ្នាក់ដឹកនាំ មន្ត្រីនគរបាលជាតិ មន្ត្រីរាជការស៊ីវិល និងមន្ត្រីពន្ធនាគារ នៃក្រសួងមហាផ្ទៃ ខ្ញុំសូម អនុញ្ញាតចូលរួមសម្ដែងអំណរសាទរ ប្រកបដោយ មនោសញ្ចេតនារំភើបរីករាយយ៉ាងក្រៃលែង ជាមួយជនរួមជាតិ កម្ពុជានៅទូទាំងប្រទេស ក្នុងឱកាស សម្ដេចអគ្គមហាសេនាបតីតេជោ ទទួលបាន «មេដាយសហប្រធាន កិច្ចប្រជុំកំពូលសន្តិភាពពិភពលោក២០២១» ពីមហាសន្និបាតនៃក្តីសង្ឃឹម លើកទី៧ ក្រោមប្រធានបទស្តីពី សន្តិភាពនៅតំបន់អាស៊ីប៉ាស៊ីហ្វិក។

ការទទួលបាននូវគ្រឿងឥស្សរិយយស ប្រកបដោយគុណតម្លៃជាសកល និងពោរពេញដោយអត្ថន័យដ៏ ជ្រាលជ្រៅនេះ ពិតជាសក្តិសមទៅនឹងគុណបំណាច់ដ៏ឧត្តុង្គឧត្តមរបស់ សម្តេចតេជោ នាយករដ្ឋមន្ត្រី ដែល បានតស៊ូប្ដូរផ្តាច់ និងលះបង់កម្លាំងកាយ ព្រមទាំងប្រាជ្ញាស្មារតី ក្នុងបុព្វហេតុជាតិ និងប្រជាជន នាំមកនូវ សុខសន្តិភាពពេញបរិបូរណ៍ ក្រោមគោលនយោបាយ ឈ្នះ-ឈ្នះ ដ៏ស័ក្ដិសិទ្ធិ ។ ខ្ញុំក៏សូមសម្តែងនូវការកោតសរសើរ ដ៏ស្មោះស្ម័គ្រចំពោះគំរូវីរភាពដឹកនាំដ៏ឈ្លាសវៃ និងប៉ិនប្រសប់ ប្រកបដោយការប្តេជ្ញាចិត្តដ៏អង់អាចមោះមុតរបស់ សម្តេចតេជោ នាយករដ្ឋមន្ត្រី ដែលបានជំនះរាល់ឧបសគ្គ និងការលំបាកគ្រប់បែបយ៉ាង ការពារបាន យ៉ាងរឹងមាំនូវឯកភាពជាតិ អធិបតេយ្យ និងបូរណភាពទឹកដី ព្រមទាំងកសាងនូវទំនាក់ទំនងដ៏ល្អជាមួយបណ្ត ប្រទេសជាមិត្តក្នុងតំបន់ និងលើសកលលោក រួមចំណែកលើកស្ទួយកិត្យានុភាពជាតិកាន់តែលេចធ្លោថែមទៀត លើឆាកអន្តរជាតិ។

ក្នុងឱកាសដ៏វិសេសវិសាលនេះ តាងនាមថ្នាក់ដឹកនាំ មន្ត្រីនគរបាលជាតិ មន្ត្រីរាជការស៊ីវិល និងមន្ត្រី ពន្ធនាគារ់ នៃក្រសួងមហាផ្ទៃ ខ្ញុំសូមប្រសិទ្ធពរជ័យ សិរីសួស្ដី ជ័យមង្គល វិបុលសុខ បវរមហាប្រសើរជូនចំពោះ សម្ដេចតេជោ និង សម្ដេចកិត្តិព្រឹទ្ធបណ្ឌិត ព្រមទាំងក្រុមគ្រួសារ សូមបានប្រកបដោយពុទ្ធពរទាំងបួន ប្រការគឺ អាយុ វណ្ណៈ សុខៈ ពលៈ និងចៀសផុតពីរោគាព្យាធិទាំងឡាយទាំងពួងកុំបីអាក់ខានឡើយ។

សូម សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាទទួលនូវសេចក្តីគោរពដ៏ខ្ពង់ខ្ពស់ពីខ្ញុំ៕