ភ្នំពេញ៖លោកហ៊ុន ម៉ាណែត មេបញ្ជាការកងទ័ពជើងគោកកម្ពុជា បានស្នើសុំអន្តរាគមន៍បញ្ចុះតម្លៃលើការប្ដូរចង្កូតរថយន្តជ្រកក្រោមស្លាកលេខ (ខម)។

នេះបើយោងតាមសេចក្តីជូនដំណឹងរបស់កងទ័ពជើងគោក ដែលបណ្ដាញសារព័ត៌មានសៀមរាបប៉ុស្តិ៍ ទើបទទួលបាននៅមុននេះបន្តិច៕SRP

ខេត្តបាត់ដំបង៖លោក សុខ លូ អភិបាលខេត្តបាត់ដំបងបានជំរុញដល់មន្ទីរអង្គភាពពាក់ព័ន្ធ ពិនិត្យលទ្ធភាពដើម្បីត្រៀមស្ដារឡើងវិញ នូវហេដ្ឋារចនាសម្ព័ន្ធ ព្រមទាំងផ្នែកកសិកម្មរបស់ប្រជាពលរដ្ឋ ដែលរងផលប៉ះពាល់ និងរងការខូចខាតដោយសារទឹកជំនន់ផងដែរ។

លោកបានបន្តទៀតថា បើទោះបីជាឥឡូវនេះស្ថានភាពទឹកចាប់ផ្ដើមស្រកក្ដី ក៏មិនត្រូវធ្វេងប្រហែសឡើយ ពោលគឺមន្រ្ដីដែលទទួលបន្ទុកឃ្លាំមើលទ្វារទំនប់ទប់ទឹក ត្រូវពិនិត្យមើលស្ថានភាពអាកាសធាតុ ឲ្យបានម៉ត់ចត់ ព្រោះយើងមិនអាចមើលឃើញ ឬទាយដឹងមុនទេថា ពេលណាមានភ្លៀងធ្លាក់ចូលទៀត ពេលណារាំងភ្លៀងទេ ដូចនេះយើងត្រូវតាមដានឲ្យបានជាប់ជាប្រចាំ។ 

ក្នុងឱកាសនោះផងដែរ លោកក៏បានជំរុញដល់ប្រជាពលរដ្ឋ ដែលមិនទាន់បានចាក់វ៉ាក់សាំង ត្រូវប្រញាប់មកទទួលការចាក់វ៉ាក់សាំង និងអ្នកដែលបានចាក់បាន២ដូសរួចមកហើយនោះ គឺត្រៀមលក្ខណៈក្នុងការទទួលការចាក់វ៉ាក់សាំងដុសជំរុញ ដែលជាដុសទី៣ ដើម្បីសង្រ្គោះអាយុជីវិតប្រជាពលរដ្ឋពីការរាតត្បាតពីជំងឺកូវីដ-១៩។ 

លោកសុខ លូ មានប្រសាសន៍យ៉ាងដូច្នេះ ក្នុងឱកាសអញ្ជើញចុះសួរសុខទុក្ខ និងនាំយកអំណោយរបស់សម្តេចស ខេង និងលោកជំទាវ ចែកជូនបងប្អូនប្រជាពលរដ្ឋ ដែលរងផលប៉ះពាល់ដោយសារជំនន់ទឹកភ្លៀង ចំនួន៩៨គ្រួសារ ក្នុងស្រុករុក្ខគិរី នៅថ្ងៃអង្គារ ទី ១៦ ខែវិច្ឆិកានេះ។

លោក សុខ លូ បានមានប្រសាន៍ថា សម្ដេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ និងលោកជំទាវ តែងតែគិតគូរពីសុខទុក្ខប្រជាពលរដ្ឋជាប់ជានិច្ច  ជាក់ស្ដែងក្រោយពីទទួលបានដំណឹងពីការប៉ះពាល់ដោយសារជំនន់ទឹកភ្លៀង ក្នុងស្រុករុក្ខគិរីរួចមក  សម្ដេចក៏បានណែនាំរដ្ឋបាលខេត្តបាត់ដំបង ក្នុងការនាំយកអំណោយសង្រ្គោះបឋម ចែកជូនដល់គ្រួសារដែលរងផលប៉ះពាល់ជាបន្ទាន់ ដើម្បីធ្វើការសម្រួល ដល់ការលំបាករបស់បងប្អូនប្រជាពលរដ្ឋដែលរងផលប៉ះពាល់ដោយសារជំនន់ទឹកភ្លៀងនេះ។ 

សូមជម្រាបថា អំណោយដែលប្រគល់ជូនក្នុងមួយគ្រួសារៗ ទទួលបាននូវ អង្ករ ២៥គីឡូក្រាម  មី១កេស  ទឹកសុទ្ធ ១កេស ទឹកត្រី ១យួរ ទឹកស៊ីអុីវ ១យូរ និង ត្រីខ១យួរ៕SRP

ភ្នំពេញ៖សម្តេចហេង សំរិនបានសង្កត់ធ្ងន់ថា សន្តិភាពនៅក្នុងប្រទេសមួយ តំបន់មួយ ក៏ដូចជាសកលលោកទាំងមូល គឺជាបុរេលក្ខខណ្ឌចម្បងចាំបាច់បំផុតសម្រាប់ការអភិវឌ្ឍ។ តំបន់មួយមានសន្តិភាពជាកន្លែងមួយដែលមានការអភិវឌ្ឍ។ សន្តិភាពត្រូវដើរទន្ទឹមនឹងការអភិវឌ្ឍ។ បើមានតែសន្តិភាព ហើយគ្មានការអភិវឌ្ឍ សង្គមមួយនោះក៏មិនអាចនៅស្ថិតស្ថេរយូរអង្វែងបានឡើយ។ ដូចនេះ សភាត្រូវបន្តលើកកម្ពស់បន្ថែមទៀតនូវវប្បធម៌សន្ទនា និងតម្លៃនៃសន្តិភាព សម្រាប់ដោះស្រាយបញ្ហាទាំងឡាយខាងលើ។

សម្តេចហេង សំរិន មានប្រសាសន៍បែបនេះ ក្នុងឱកាស អញ្ជើញបើកកិច្ចប្រជុំភាពជាដៃសភាអាស៊ី-អឺរ៉ុបលើកទី១១ ដែលសភាកម្ពុជាធ្វើជាម្ចាស់ផ្ទះ។ 

កិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ (ASEP11)  ដែលសភាកម្ពុជាធ្វើជាម្ចាស់ផ្ទះ បានប្រារព្ធពិធីបើកជាផ្លូវការនៅរសៀលថ្ងៃទី១៦ ខែ វិចិ្ឆកា ឆ្នាំ២០២១នេះ តាមប្រព័ន្ធនិម្មិត ផ្សាយចេញពីរដ្ឋសភានៃព្រះរាជាណាចក្រកម្ពុជា ដែលមានគណៈប្រតិភូសភាក្នុងតំបន់ទំាងពីរ អាស៊ី និងអ៊ឺរ៉ុប និងដៃគូជាង៣០ប្រទេសនិងស្ថាប័នចូលរួម។

សម្តេចហេង សំរិន ប្រធានរដ្ឋសភា និងជាសហប្រធាន ASEP11 បានលើកឡើងថា ទោះបីជាក្នុងរយៈពេលជាច្រើនទសវត្សរ៍កន្លងមកនេះ តំបន់អាស៊ីនិងអឺរ៉ុប ទទួលបាននូវសុខសន្តិភាព ស្ថិរភាព និងវឌ្ឍនភាពគួរឱ្យកត់សម្គាល់យ៉ាងនេះក្តី តំបន់ទាំងពីរនៅតែជួបបញ្ហាប្រឈមជាច្រើនដែលបានជះឥទ្ធិពលដោយផ្ទាល់មកលើជីវិត និងក្តីសង្ឃឹមរបស់ប្រជាពលរដ្ឋរបស់យើង។

ជាមួយនឹងផលប៉ះពាល់ដ៏ធ្ងន់ធ្ងរបណ្តាលមកពីជំងឺរាតត្បាតសកលកូវីដ-១៩ តំបន់ទាំងពីរទទួលរងនូវផលប៉ះពាល់ពីបញ្ហាប្រឈមធំៗជាច្រើនទៀត រួមមាន បញ្ហាសន្តិសុខ ភេរវកម្ម ការប្រកួតប្រជែងពាណិជ្ជកម្ម និងបច្ចេកវិទ្យា ការប្រែប្រួលអាកាសធាតុ  សន្តិសុខនៃធនធានធម្មជាតិ វិសមភាពសង្គម និងយេនឌ័រ ពិសេស ការប្រែប្រួលតុល្យភាពអំណាចដែលជាឃ្នាស់អាចបង្ករឱ្យមានសង្រ្គាមក្នុងរូបភាពណាមួយ ក៏ថាបាន។

សម្តេចបានថា ការជួបជុំគ្នាក្នុងកិច្ចប្រជុំភាពជាដៃសភាតំបន់ទំាងពីរនៅ ក្រោមមូលបទស្តីពី “ការលើកកម្ពស់ភាពជាដៃគូសភា ដើម្បីសន្តិភាព និងការអភិវឌ្ឍប្រកបដោយចីរភាព ទាំងក្នុងសម័យ និងក្រោយវិបត្តិកូវីដ-១៩” ពិតជាមានសារៈសំខាន់និងសមស្របបំផុតទៅនឹងបរិបទបច្ចុប្បន្ន។

ការជួបជុំនេះមិនត្រឹមតែផ្តល់នូវឱកាសដល់ការពង្រឹងនិងពង្រីកទំនាក់ទំនង និងកិច្ចសហប្រតិបត្តិការ ព្រមទាំងបង្កើនការយល់ដឹងពីគ្នាទៅវិញទៅមកប៉ុណ្ណោះទេ ថែមទាំងផ្តល់នូវកាលានុវត្តភាពដ៏ប្រសើរមួយ ដើម្បីយើងរួមគ្នាស្វែងរកដំណោះស្រាយចំពោះបញ្ហាប្រឈមនិងក្តីកង្វល់រួមរបស់យើង សំដៅលើកកម្ពស់សុខសន្តិភាព ស្ថិរភាព វិបុលភាព និងការអភិវឌ្ឍប្រកបដោយចីរភាព ដែលជាបំណងប្រាថ្នារួមរបស់ប្រជាជនយើងក្នុងតំបន់ទាំងពីរ ក៏ដូចជាសកលលោកទាំងមូល។ ជាមួយគ្នានេះ ការជួបជុំគ្នានៅពេលនេះ ក៏ជាការសាទរនូវក្តីសង្ឃឹមជាថ្មី នៃការបើកឱ្យដំណើរការនូវ សេដ្ឋកិច្ចសង្គមឡើងវិញ និងការរៀនរស់តាម ប្រក្រតីភាពថ្មី។

យន្តការ “ការទូតសភា” រួមមាន ការទូតបង្ការជម្លោះ និងការទូតផ្សះផ្សារ ជាយន្តការគន្លឹះក្នុងការដោះស្រាយបញ្ហាទាំងនេះ។ បន្ថែមពីនេះ ដើម្បីឱ្យសន្តិភាពបានស្ថិតស្ថេរគង់វង្សយូរអង្វែង យើងចាំបាច់ត្រូវលើកកម្ពស់នូវវិបុលភាពរួម យុត្តិធម៌សង្គម អភិបាលកិច្ចល្អ សិទ្ធិមនុស្ស និងគុណតម្លៃ នៃប្រជាធិបតេយ្យ។

សូមជម្រាបថាកិច្ចប្រជុំភាពជាដៃសភាអាស៊ី-អឺរ៉ុប ដែលសភាកម្ពុជាធ្វើជាម្ចាស់ផ្ទះនេះ ជាផ្នែកសំខាន់មួយនៃកិច្ចប្រជុំកំពូលអាស៊ី-អឺរ៉ុបលើកទី១៣(ASEM13) ដែលរាជរដ្ឋាភិបាលកម្ពុជានឹងធ្វើជាម្ចាស់ផ្ទះនៅចុងខែវិច្ឆិកានេះដែរ។ លទ្ធផលនៃកិច្ចប្រជុំភាពជាដៃគូសភាតំបន់អាស៊ី-អឺរ៉ុបនាពេលនេះគឺជាធាតុចូលសំខាន់ជាសំឡេងរបស់ពលរដ្ឋសម្រាប់កិច្ចប្រជុំកំពូលអាស៊ី-អឺរ៉ុបនាពេលខាង មុខនោះ។

ក្នុងនាមជាម្ចាស់ផ្ទះ ASEP11 នេះ សម្តេចអគ្គមហាពញាចក្រី ហេង សំរិន មានក្តីសង្ឃឹមថា វេទិកានេះ នឹងប្រព្រឹត្តទៅក្នុងបរិយាកាសរីករាយ មិត្តភាព ភាតរភាព និងកិច្ចសហប្រតិបត្តិការល្អ ដោយឈរលើស្មារតី ក្នុងការលើកយកបញ្ហាសំខាន់ៗរួម និងជាក់ស្តែងពីក្នុងតំបន់ មកជជែក ពិភាក្សា និងផ្លាស់ប្តូរយោបល់គ្នា ព្រមទាំងដាក់ចេញនូវដំណោះស្រាយរួម ដែលឆ្លុះបញ្ចាំងពីទស្សនទានប្រកបដោយវិចារណញ្ញាណ និងចក្ខុវិស័យវែងឆ្ងាយសម្រាប់ជាគោលមាគ៌ាក្នុងការពង្រឹងនិងលើកកម្ពស់សហប្រតិបត្តិការទាំងក្នុងក្របខណ្ឌតំបន់ និងរវាងតំបន់ទាំងពីរ ឱ្យកាន់តែស៊ីជម្រៅនិងរឹងមាំថែមទៀត ស្របទៅនឹងការវិវឌ្ឍនៃសភាពការណ៍តំបន់និងសកល សំដៅស្តារសេដ្ឋកិច្ច សង្គម ក្រោយវិបត្តិកូវីដ-១៩ ឱ្យងើបឡើងវិញបានឆាប់រហ័ស ប្រកបដោយភាពធន់ និងរឹងមាំជាងមុន ឈានទៅសម្រេចបាននូវសុខសន្តិភាព ស្ថិរភាព វឌ្ឍនភាព និងវិបុលភាពរួម៕SRP

ភ្នំពេញ៖នាយករដ្ឋមន្ត្រីហ៊ុន សែន បានលើកឡើងថា សន្តិភាពនិងសន្តិសុខសកល កំពុងតែស្ថិតនៅក្រោមសម្ពាធ និងកាន់តែពិបាកប៉ាន់ស្មាន ដោយសារការកើនឡើងនៃការប្រកួតប្រជែងភូមិសាស្រ្តនយោបាយ។

នេះបើយោងតាមសុន្ទរកថាគន្លឹះរបស់សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធាននៃកិច្ចប្រជុំកំពូលអាស៊ី.អឺរ៉ុប លើកទី ១១ ថ្លៃពីរាជធានីភ្នំពេញតាមប្រព័ន្ធវីដេអូ នាថ្ងៃទី ១៦ ខែវិច្ឆិកាឆ្នាំ ២០២១ នេះ៕SRP

ខេត្តកំពង់ចាម​៖អាជ្ញាធរបានរៀបចំ​សាងសង់​វិមានឯករាជ្យ ស្ថិតនៅក្នុង ភូមិ​ទី​៦ សង្កាត់​វាលវង់ ក្រុង​កំពង់ចាម។

ថ្លែង​ថាក្នុង​ដំណើរ​អញ្ជើញ​ចុះ​ពិនិត្យ​ទីតាំង​សម្រាប់​សាងសង់​វិមានឯករាជ្យ​ ​​នៅព្រឹក​មិញនេះ ​លោក អ៊ុន ចាន់​ដា អភិបាលខេត្ត​កំពង់ចាម បានលើកឡើងថាការរៀបចំ​សាងសង់​វិមានឯករាជ្យ​នេះ អាជ្ញាធរខេត្ត​មានបំណង​ទុកជា​សម្បត្តិ​វប្បធម៌​ទេសចរណ៍​​ ​ប្រវត្តិសាស្ត្រ និងលេីក​កម្ពស់​សោភ័ណភាពទីក្រុង​ សំដៅ​ទៅលើ ខួបកំណើត​នៃ​កង​យុទ្ធ​ពល​ខេ​មរ​ភូ​មិន ដែលជា​ស្នាម​ព្រហស្ថ របស់ ព្រះ​រម​រតន​កោដ្ឋ ព្រះបាទ ន​រោ​ត្ដម សីហនុ ដែល​ព្រះអង្គ​បាន​ដណ្ដើម​ឯករាជ្យ ពី​អាណានិគម​បារាំង នៅ​ថ្ងៃទី​៩ ខែវិច្ឆិកា ឆ្នាំ១៩៥៣ ផងដែរ។​

បើតាមលោក​ចាន់ ផល្លី អភិបាលក្រុង​កំពង់ចាម​ បាន​បញ្ជាក់ថា ទីតាំង​ដែលអាជ្ញាធរខេត្ត សម្រេច សាងសង់ ​វិមានឯករាជ្យនេះ គឺ​នៅ​ចំណុច​ផ្លូវ​កៅស៊ូ​មាត់ច្រក​ចូលទៅ​សាលា​គរុកោសល្យ​ខេត្តកំពង់ចាម ដោយ​ចំណុច​នេះ លោក​​អភិបាលខេត្ត បាន​ណែនាំ​ឲ្យ​មន្ត្រី​ជំនាញ​ពាក់ព័ន្ធ សាងសង់​ពង្រីក​ផ្លូវជាតិ​ឲ្យបាន​ធំ​ទូលាយ ចាប់ពី​ចំណុច​នាគព័ន្ធ រហូតមកដល់​ចំណុច​ទន្លេ​អុំ ដើម្បី​បង្កើន​សោភ័ណភាព នៃ​ចំណុច​វិមានឯករាជ្យ ឲ្យ​ក្លាយទៅជា​កន្លែង​ទេសចរណ៍ សម្រាប់​ប្រជាពលរដ្ឋ មក​កម្សាន្ត​ផងដែរ។

លោក ចាន់ ផល្លី ថា វិមានឯករាជ្យ​នេះអភិបាលខេត្ត តម្រូវ​ឲ្យ​ជាង​សាងសង់​រួចរាល់ មុន​ថ្ងៃទី​៩ ខែវិច្ឆិកា​ឆ្នាំ ២០២២៕​SRP

ភ្នំពេញ៖លោកដួង តារា ជំនួយការផ្ទាល់សម្តេចតេជោហ៊ុន សែន នាយករដ្ឋមន្ត្រីនិងជារដ្ឋលេខាធិការទីស្តីការគណៈរដ្ឋមន្ត្រី នៅមុននេះបន្តិចបានបង្ហោះសារមួយថា៖គ្មានមេត្តាធម៌សោះ សូម្បីតែក្មេងស្រីពិការគថ្លង់ក៏បោកធ្វើបាបគ្នាដែរ។

លោកដួង តារា បានរៀបរាប់ថា៖ថ្ងៃទី ១៥ វិច្ឆិកា ២០២១ ម្សិលមិញ ឪពុកឈ្មោះ កង សារ៉ន (គក់) អាយុ៥៣ឆ្នាំ និងម្តាយឈ្មោះ ហង់ ត្រប់ អាយុ៥២ឆ្នាំ បាននាំកូនស្រីពិការគរថ្លង់ឈ្មោះ សេង ចន្ថា អាយុ១៨ឆ្នាំ រស់នៅ ភូមិបន្ទាយទី១ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ មកជួបខ្ញុំដើម្បីគោរពសុំជំនួយអន្តរាគមន៍ពី សម្តេចតេជោនាយករដ្ឋមន្រ្តី លើករណីវិវាទដីធ្លីដោយពួកគាត់បានប្រាប់ខ្ញុំថា មានមន្រ្តីយោធារនៅកងពលតូចលេខ៥១ បានទិញដីកូនស្រីគាត់ ហើយមិនបានឲ្យលុយគ្រប់ចំនួន ដោយបង្ខំអោយកូនពិការគថ្លង់គាត់ផ្តិតមេដៃប្រគល់លិខិតស្នាមអោយទាហានរូបនោះទាំងអស់ ហើយថែមទាំងនិយាយថា ទៅប្តឹងអ្នកណាទៅប្តឹងទៅ!

ឪពុកម្តាយសង្ឃឹមថា ក្រោយពីលក់ដីបានអាចមានប្រាក់ព្យាបាលជំងឺកូន ប៉ុន្តែបែរជាត្រូវមន្រ្តីយោធារចិត្តអាក្រក់នោះបោកទៅវិញ។ តម្លៃដីសរុបដែលបានព្រមព្រៀងលក់អោយមន្រ្តីយោធារគឺ ៤៩,៥០០ដុល្លារ ប៉ុន្តែបានទទួលតែ ២០,០០០ដុល្លារប៉ុណ្ណោះ។ ខ្ញុំកំពុងពិនិត្យសំណុំរឿងនេះ។

ដោយទ្រាំនឹងភាពឈឺចាប់នេះតទៅទៀតមិនបាននៅចំពោះមុខកូនពិការ ឪពុកម្តាយបានសម្រេចចិត្តលក់មាន់ទាបានសោហ៊ុយមួយចំនួននាំកូនឡើងមកជួបខ្ញុំនៅភ្នំពេញដើម្បីគោរពសុំ សម្តេចតេជោ ជួយផ្តល់យុត្តិធម៍។ ដោយបានឃើញពីស្ថានភាពក្មេងស្រីពិការគថ្លង់កំពុងមានជំងឺក្អកធ្លាក់ឈាមក្នុងស្ថានភាពទម្ងន់ ខ្ញុំបានស្នើសុំមន្ទីពេទ្យប៊ីធនកម្ពុជាចិនជួយពិនិត្យព្យាបាលជាបន្ទាន់។ ពេលនេះក្មេងស្រីពិការគថ្លង់កំពុងសម្រាកព្យាបាលនៅទីនោះ ហើយខ្ញុំក៏បានឧបត្ថម្ភថវិកា៤០ម៉ឺនរៀលបន្ថែម។

ក្រុមគ្រួសារក្មេងស្រីពិការបានគោរពអរគុណស ម្តេចតេជោនាយករដ្ឋមន្ត្រី ដែលតែងផ្តល់ក្តីស្រឡាញ់និងភាពកក់ក្តៅដល់ពលរដ្ឋនៅទូទាំងប្រទេស។. ខ្ញុំសូមអរគុណមន្ទីរពេទ្យប៊ីធនកម្ពុជាចិនដែលបានទទួលជួយព្យាបាលសង្រ្គោះជីវិតក្មេងស្រីពិការគថ្លង់រូបនេះ។ យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើងនៅក្រោមដំបូលសន្តិភាព៕SRP

ខេត្តកំពង់ចាម​៖លោក​ អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការដោះស្រាយវិវាទដីធ្លីថ្នាក់ខេត្ត នៅសៀលថ្ងៃទី១៥ ខែវិច្ឆិកា ម្សិលមិញបានប្រជុំដោះស្រាយសម្របសម្រួលទំនាស់ បើកផ្លូវ​ ស្ថិតក្នុងភូមិ ព្រែកចង្ក្រាន ឃុំល្វេ ស្រុកកោះសុទិន ដែលគូភាគី ទាំងសងខាង ជាសាច់ញាតិសន្ដានជាមួយគ្នា ហើយបាន ប្ដឹងផ្ដល់គ្នា ដើម្បីសុំឲ្យមានការបើកផ្លូវចូលដីលំនៅដ្ឋាន និងដីចំការ របស់ពួកគាត់។

ក្នុង​កិច្ចប្រជុំ​នេះ​ដែរ​ លោក​អភិបាលខេត្ត បានសម្របសម្រួលដោះស្រាយ ក្រោមគោល​នយោបាយ​ឈ្នះឈ្នះ របស់​សម្តេច​តេជោ​ ហ៊ុន​ សែន​ ដោយស្នើសុំឲ្យគូភាគីទាំងសងខាង យោគយល់គ្នា ឈានទៅរកការបញ្ចប់ទំនាស់ទាំងស្រុង ហើយអាជ្ញាធរខេត្ត នឹងចូលរួម រកវិធីរៀបចំបើកផ្លូវនេះឲ្យបាន សម្រាប់ជាប្រយោជន៍ ដល់គូភាគី រួមទាំងប្រជាពលរដ្ឋក្នុងភូមិទាំងមូល អាចធ្វើដំណើរឆ្លងកាត់ ដឹកផលិតផលកសិផល ដោយតភ្ជាប់នឹង ផ្លូវមួយចំនួនទៀតទុកចូលទៅចំការ ។
ដោយគូភាគី បានយល់ព្រមឯកភាពគ្នាតាមការសម្របសម្រួលរបស់លោកអភិបាលខេត្ត ហេីយលោកក៏បាន ចាត់ឲ្យ អាជ្ញាធរស្រុក-ឃុំ មន្ត្រីជំនាញ ចុះទៅទីតាំងដីពិនិត្យជាក់ស្តែង ដើម្បីធ្វើកិច្ចសន្យាព្រមព្រៀងគ្នា ដើម្បីបើកផ្លូវនេះ ទទឹងយ៉ាងតិច៣ម៉ែត្រ ។
ជាមួយគ្នានោះ​ លោក​អភិបាលខេត្ដ បានផ្ដាំផ្ញើឲ្យគូភាគីដែលជាញាតិសន្ដាននឹងគ្នា ឲ្យឈប់ទាស់ទែងគ្នា និងត្រូវចេះស្រលាញ់រាប់អានគ្នាឡើងវិញ ក្នុងនាមជាញាតិសណ្តាន រស់នៅភូមិផងរបងជាមួយគ្នាតរៀងទៅ។ ហើយម្យ៉ាងវិញទៀត ក្នុងតំបន់នោះកំពុងមានការវាស់វែងដីធ្លីជាលក្ខណៈប្រព័ន្ធ លោក​បានបញ្ជាក់ថានៅពេលមានកិច្ចព្រមព្រៀងបញ្ចប់ទំនាស់ ស្នើឲ្យជំនាញ បន្តវាស់វែងលក្ខណៈជាប្រព័ន្ធ ដើម្បី បានធ្វើប្លង់កម្មសិទ្ធិសម្រាប់ពួកគាត់ ឲ្យបានឆាប់ និងទាន់ពេលវេលា​ផងដែរ​៕SRP

ខេត្តត្បូងឃ្មុំ៖ក្នុងពិធីប្រកាសគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តត្បូងឃ្មុំ និងផ្សព្វផ្សាយស្ដីពីការរៀបចំនិងការប្រព្រឹត្តទៅ នៃគណៈកម្មាធិការប្រយុទ្ធប្រឆាំងអំពើជួញដូរមនុស្សថ្នាក់ក្រោមជាតិ​ ​នៅថ្ងៃទី១៥ ខែវិច្ឆិកា នេះ​ លោក​ ជាម ច័ន្ទសោភ័ណ អភិបាលខេត្ត បានណែនាំដល់មន្ទីរអង្គភាពពាក់ព័ន្ធនានានៅថ្នាក់ខេត្ត និងថ្នាក់មូលដ្ឋានស្រុក/ក្រុងទាំង៧ ក៏ដូចជា កងកម្លាំងនគរបាលប្រចាំការនៅច្រកព្រំដែន ត្រូវបង្កើនកិច្ចសហប្រតិបត្តិការ និងកិច្ចសហការ ដើម្បីលុបបំបាត់អំពើជួញដូរមនុស្សគ្រប់រូបភាព។
លោកថាស្ថាប័នតុលាការ និងអាយ្យការ​ គឺដើរតួរយ៉ាងសំខាន់ ក្នុងការអនុវត្តទោសទណ្ឌដល់បុគ្គលជាមេខ្លោង និងមេខ្យល់ ក្នុងករណីនាំមនុស្សឆ្លងដែនដោយខុសច្បាប់ ពិសេសអំពើជួញដូរមនុស្សដោយត្រូវផ្ដន្ទាទោសឲ្យបានធ្ងន់ធ្ងរ តាមទោសដែលបានចែងក្នុងនិតិវិធីនៃច្បាប់ ដើម្បីឲ្យអ្នកប្រព្រឹត្តល្មើសរាងចាល។

ថ្លែងនាឱកាសនោះដែរ​ លោក​ ជាម ច័ន្ទសោភ័ណ ក៏បាន​ជំរុញ​ដល់​ថ្នាក់ក្រុង_ស្រុក និងឃុំ-សង្កាត់ បន្តសហការជាមួយប៉ុស្តិ៍នគរបាលរដ្ឋបាល ធ្វើការផ្សព្វផ្សាយតាមរយៈគោលនយោបាយ ភូមិ ឃុំ មានសុវត្ថិភាពទាំង ៩ចំណុច ជូនដល់ប្រជាពលរដ្ឋឲ្យបានទូលំទូលាយ ការធ្វើចំណាកស្រុកប្រកបដោយសុវត្ថិភាព ចៀសផុតពីការចាញ់បោកមេខ្យល់ ដែលអាចឈានដល់ការរងគ្រោះ ដោយអំពើជួញដូរមនុស្ស។ ទន្ទឹមនេះដែរ អាជ្ញាធរស្រុក ក្រុង ត្រូវចុះអប់រំផ្សព្វផ្សាយដល់ប្រជាពលរដ្ឋនៅ តាមដានមូលដ្ឋាន ដែលមានកូនចៅ ទៅធ្វើការនៅ ខេត្តផ្សេង ពិសេសទៅធ្វើការនៅក្រៅ​ប្រទេស​ ទាំងមានច្បាប់និងអត់ច្បាប់ដើម្បីឲ្យពួកគាត់យល់កាន់តែច្បាស់អំពីអំពើជួញដូរមនុស្ស។

អភិបាលខេត្ត ក៏បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់សមត្ថកិច្ច មន្ទីរជំនាញ និងអាជ្ញាធរមូលដ្ឋានគ្រប់ជាន់ថ្នាក់ ដែលបានអនុវត្តសកម្មភាពការងារកន្លងមក ក្នុងការបង្ការបង្ក្រាប ដើម្បីទប់ស្កាត់អំពើជួយដូរមនុស្ស ការធ្វើអាជីវកម្មផ្លូវភេទ លើស្ត្រីនិងកុមារ ការធ្វើចំណាកស្រុកដោយប្រថុយប្រថាន និងការអប់រំផ្សព្វផ្សាយពីការបង្ការទប់ស្កាត់ជម្ងឺកូវីដ-១៩ នៅទូទាំងខេត្ត យ៉ាងមានប្រសិទ្ធភាពផងដែរ៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី នៅរសៀលថ្ងៃទីច័ន្ទ ទី១៥ ខែវិច្ឆិកា ឆ្នាំ២០២១នេះ បានអញ្ជើញជួបសន្ទនាការងារជាមួយ លោក លី ខឺឈាង (Li Keqiang) នាយករដ្ឋមន្រ្តីចិន តាមប្រព័ន្ធវីដេអូ ដោយនៅក្នុងជំនួបនេះ សម្ដេចតេជោ និងលោក លី ខឺឈាំង បានពិភាក្សាគ្នាទាក់ទងនឹងទំនាក់ទំនងកិច្ចសហប្រតិបត្តិការ ទ្វេភាគីរវាងប្រទេសទាំងពីរ ក៏ដូចជាពិភាក្សាគ្នាលើកិច្ចសហប្រតិបត្តិការតំបន់ និងអន្តរជាតិ។ ក្នុងក្របខណ្ឌទ្វេភាគី សម្តេចតេជោ និងលោក លី ខឺឈាំង បានពិភាក្សាគ្នាលើបញ្ហាសេដ្ឋកិច្ច និងពាណិជ្ជកម្ម បញ្ហាកសិកម្ម និងបញ្ហា ទំនាក់ទំនងរវាងប្រជាជននិងប្រជាជន។ ពាក់ព័ន្ធនឹងករណីនេះ សម្ដេចតេជោ និងលោក លី ខឺឈាំង បាន ឯកភាពគ្នាក្នុងការជំរុញពាណិជ្ជកម្មប្រទេសទាំងពីរ ឲ្យបានកើតឡើងដល់ ១០ពាន់លានដុល្លារ ក្នុង១ឆ្នាំ ហើយ ក៏បានឯកភាពគ្នា ដាក់ឱ្យចូលជាធរមាននូវកិច្ចព្រមព្រៀងពាណិជ្ជកម្មសេរីរវាងកម្ពុជានិងចិន នៅខែមករាខាងមុខ។

ដោយឡែកលើវិស័យកសិកម្ម លោក លី ខឺឈាំង បានយល់ស្របនឹងជំរុញឲ្យមានការធ្វើការរួមគ្នារវាងភាគីទាំងពីរ ធ្វើយ៉ាងណា ពិភាក្សា ចរចាគ្នា លើកូតានាំអង្ករចូលទៅប្រទេសចិន និងកសិផលកម្ពុជា ចូលទៅប្រទេសចិនដោយផ្ទាល់ តែម្ដង តាមរយៈការបង្កើតយន្តការរួមគ្នាមួយ ពិនិត្យមើលលទ្ធផលទាំងឡាយណា ដែលត្រូវនាំចេញពីកម្ពុជា ទៅកាន់ ប្រទេសចិន គប្បីណាទាក់ទាញធ្វើឲ្យការនាំចេញនេះ គឺនាំចេញផ្ទាល់ទៅប្រទេសចិនតែម្ដង។

ពាក់ព័ន្ធការជំរុញទំនាក់ទំនងរវាងប្រទេសទាំងពីរ សម្ដេចតេជោ និងលោកលី ខឺឈាំង បានឯកភាពគ្នាថា ភាគីចិន នឹងបន្តជួយដល់កម្ពុជាយើង ផ្ដល់ជូនកម្ពុជា នៅវ៉ាក់សាំងដើម្បីជួយទប់ស្កាត់ជំងឺកូវីដ-១៩ ហើយនៅពេលឆាប់ៗនេះ ប្រទេសចិន នឹងផ្ដល់វ៉ាក់សាំងដល់កម្ពុជា ក៏ដូចជាផ្ដល់នូវជំនួយពាក់ព័ន្ធនឹងវិស័យសុខាភិបាល និងពេទ្យព្យាបាលជំងឺ កូវីដ ដល់កម្ពុជាផងដែរ។ លើសពីនេះទៀត ភាគីចិន នឹងផ្ដល់អាហារូបករណ៍ដល់កម្ពុជាសម្រាប់ឆ្នាំ២០២២-២០២៣ ចំនួន ៥៥០អាហារូបករណ៍ សម្រាប់រយៈពេល ៥ឆ្នាំ ហើយក៏កំពុងតែពិនិត្យពិចារណាមើលផងដែរ ដើម្បីបើកឲ្យនិស្សិតកម្ពុជា បានត្រឡប់ទៅបន្ត ការសិក្សានៅប្រទេសចិនវិញនាពេលឆាប់ៗនេះ។

ក្នុងជំនួបនោះ សម្តេចហ៊ុន សែន បានសម្ដែងក្ដីរីករាយដែលបានជួបពិភាក្សាជាមួយលោក Li Keqiang ហើយឆ្លៀត ឱកាសនោះ សម្តេចតេជោ បានផ្តាំផ្ញើសួរសុខទុក្ខលោក ប្រធានាធិបតី ស៊ី ជីនពីង (Xi Jinping) ហើយបានថ្លែងអំណរគុណចំពោះមិត្តចិន ដែលតែងតែ បដិសណ្ឋារកិច្ចយ៉ាងកក់ក្ដៅ ចំពោះព្រះករុណា ព្រះមហាក្សត្រ និងសម្ដេចព្រះមហាក្សត្រី ក្នុងអំឡុងពេលព្រះរាជទស្សនកិច្ច ពិនិត្យព្រះរាជសុខភាពនៅប្រទេសចិន។

សម្ដេចក៏បានអបអរសាទរការប្រារព្ធខួបអនុស្សាវរីយ៍លើកទី១០០ ពីការបង្កើតបក្សកុម្មុយនិស្តចិន កាលពីខែ កក្កដា ឆ្នាំ២០២១ និងបានកោតសរសើររដ្ឋាភិបាល និងប្រជាជនចិនលុបបំបាត់ទាំងស្រុងនូវភាពទីទាល់ក្រក្នុងសង្គមចិន និងបានអបអរសាទរផងដែរ ចំពោះកំណើនសេដ្ឋកិច្ចចិន ៩,៨ភាគរយ សម្រាប់ ៩ខែដំបូង នៅឆ្នាំ២០២១ ហើយ ជឿជាក់ថា ក្រោមការដឹកនាំរបស់ឯកឧត្តមប្រធានាធិបតីស៊ី ជីនពីង និងការចូលរួមដោយឯកឧត្តមថ្នាក់ដឹកនាំចិន នឹងបន្តរីកចម្រើនកាន់តែខ្លាំងក្លាឡើង។ ក្នុងក្របខ័ណ្ឌសហប្រតិបត្តិការតំបន់ និងអន្តរជាតិ លោក លី ខឺឈាំង បានជម្រាបជូនសម្តេចតេជោថា ភាគីចិន នឹង ចូលរួមប្រជុំអាស៊ី-អឺរ៉ុបនាពេលខាងមុខ នឹងផ្ដល់ការគាំទ្រជំនួយដល់កម្ពុជា ក្នុងឱកាសដែលកម្ពុជា ធ្វើជាប្រធានអាស៊ាននាឆ្នាំក្រោយនេះផងដែរ៕SRP

ខេត្តសៀមរាប៖កម្ពុជា-ជប៉ុន បានរួមគ្នាជម្រុញការផ្សព្វផ្សាយ វិស័យទេសចរណ៍ និងវិស័យផ្សេងៗទៀត ស្របពេលដែលខេត្តសៀមរាប នឹងត្រូវបើកខេត្តឡើងវិញ នៅខែមករា ឆ្នាំ២០២២ ខាងមុខនេះ។ 

អភិបាលខេត្តសៀមរាប លោកទៀ សីហា អភិបាល ថ្ងៃចន្ទ ទី១៥ ខែវិច្ឆិកា ឆ្នាំ២០២១ បាន​អនុញ្ញាតឲ្យ លោក MITORI Naoki ប្រធានការិយាល័យ កុងស៊ុលជប៉ុន ចូលជួបសម្តែងការគួរសម  និងណែនាំ លោក KAWAGUCHI Maski ប្រធានការិយាល័យកុងស៊ុលជប៉ុន ខេត្តសៀមរាប  ដែលត្រូវទទួលតួនាទីបន្ត ក្នុងការរិតចំណងកិច្ចសហប្រតិបត្តិការល្អរវាងប្រទេសទាំងពីរផងដែរ៕SRP

ខេត្តកំពង់ចាម​៖លោក​​ អ៊ុន​ ចាន់ដា អភិបាលខេត្តកំពង់ចាម​ បានថ្លែងប្រាប់ដល់​មន្ត្រីពាក់ព័ន្ធ​ ឲ្យ​ស្វែងរក​ទីតាំង​សាងសង់​បង្គន់​អនាម័យ​សាធារណៈ​ នៅ​តំបន់​សួន​កម្សាន្ត​តាម​ដងទន្លេមេគង្គ​ ក្នុង​ក្រុងកំពង់ចាម​ ចៀសវាង​ការ​បបន្ទោរបង់ ពាសវាលពាសកាល​ និង​ដេីម្បី​លេីក​កម្ពស់​ សុខុមាលភាព​ក្រុង​ និង​លេីក​កម្ពស់​សុខុមាលភាព​​ភ្ញៀវ​ទេសចរណ៍​ ក៏ដូចជា​បងប្អូន​ប្រជាពលរដ្ឋ​ផងដែរ​។

ថ្លែង​យ៉ាង​ដូច្នេះ​ក្នុង​កិច្ចប្រជុំ​សាមញ្ញ​លេីក​ទី​៣០​ អាណត្តិ​ទី​ទី៣​ របស់​ក្រុមប្រឹក្សា​ខេត្តកំពង់ចាម​ នៅថ្ងៃទី​១៥​ ខែវិច្ឆិកា​ នេះ។

លោក​ អ៊ុន​ ចាន់ដា​ បានថ្លែងថា​ រដ្ឋបាល​ខេត្ត បានដាក់​ចេញ​ជា​ផែនការ​ ដេីម្បី​​គិតគូរដល់ការ​លេីក​កម្ពស់​សោភ័ណភាព​ ក្រុងកំពង់ចាម​ និង​ការ​លេីក​កម្ពស់​សុខុមាលភាព​ដល់​ភ្ញៀវ​ទេសចរណ៍​ ក៏ដូចជា​បងប្អូន​​ប្រជាពលរដ្ឋ​ មកដេីរលេងកម្សាន្ត​ ឬ​ធ្វើ​ការ​ហាត់ប្រាណ​។ ដូច្នេះ​យើង​ត្រូវ​សិក្សា​ស្វែងរក​ទីតាំងណាមួយ​ឲ្យ​បាន​សមរម្យ​ ដេីម្បី​សាងសង់​បន្ទប់ទឹក​ បង្គន់​អនាម័យ​សាធារណៈ​។ ​

សូមជម្រាបថានៅក្នុង​កិច្ចប្រជុំនេះដែរ​ លោក​ ខ្លូត​ ផន​ ប្រធាន​ក្រុមប្រឹក្សា​ខេត្តកំពង់ចាម​ បាន​លើក​យក​សេចក្តី​ព្រាង​របៀបវារៈ​សំខាន់​ៗ​ មក​ពិភាក្សា​ រួមមាន​ ១-ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី២៩ អាណត្តិទី៣ របស់ក្រុមប្រឹក្សាខេត្ត។ ២-ពិនិត្យ ពិភាក្សា និងអនុម័តសេចក្តីព្រាងរបាយការណ៍បូកសរុបលទ្ធផលការងារ ប្រចាំខែ តុលា និងទិសដៅការងារប្រចាំខែវិច្ឆិកា ឆ្នាំ២០២១ របស់រដ្ឋបាលខេត្តកំពង់ចាម។ ៣-ពិនិត្យ ពិភាក្សា និងអនុម័តសេចក្តីព្រាងផែនការលទ្ធកម្មប្រចាំឆ្នាំ២០២២ របស់រដ្ឋបាល ខេត្តកំពង់ចាម។៤-បញ្ហាផ្សេងៗ៕SRP

ខេត្តមណ្ឌលគិរី៖លោកគន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានបញ្ជាក់ថា ដើម្បីជាការឆ្លើយតបទៅនឹងគុណបំណាច់មិនអាចកាត់ថ្លៃបាន អតីតយុទ្ធជន ក្នុងបុព្វហេតុស្វែងរកសុខសន្តិភាពជូនប្រទេសជាតិមាតុភូមិ លោកបានណែនាំ និងស្នើដល់អាជ្ញាធរ សមត្ថកិច្ច មន្ទីរជំនាញពាក់ព័ន្ធត្រូវបង្កើនការយកចិត្តទុកដាក់ ចំពោះសុខទុក្ខការលំបាក ក្នុងជីវភាពរស់នៅរបស់បងប្អូនក្រុមគ្រួសាររបស់អតីតយុទ្ធជនឲ្យបានល្អថែមទៀត។ ជាពិសេសមេប៉ុស្តិ៍រដ្ឋបាល មេឃុំ សង្កាត់ ត្រូវចាត់មន្ត្រីរបស់ខ្លួនណាម្នាក់ឲ្យកាន់ការងារ អតីតយុទ្ធជន និងក្តាប់ស្ថានភាព ជីវភាពរស់នៅរបស់បងប្អូនអតីយុទ្ធជន ឲ្យបានច្បាស់លាស់ ដើម្បីធានាថាបងប្អូនយើងទទួលបាន នូវការយកចិត្តទុកដាក់ និងភាពកក់ក្តៅពីប្រមុខរាជរដ្ឋាភិបាល។ ពីព្រោះការលះបង់សាច់ស្រស់ឈាមស្រស់ របស់បងប្អូនអតីតយុទ្ធជន មានគុណបំណាច់មិនអាចកាត់ថ្លៃបានឡើយ ចំពោះប្រជាជនកម្ពុជា ក្នុងបុព្វហេតុស្វែងរកសុខសន្តិភាពជូនជាតិមាតុភូមិ។

លោកគន់ គីម បានស្នើសុំឱ្យគណ:កម្មាធិការ អាជ្ញាធរក្រុង/ស្រុក និងមន្ទីរ អង្គភាពពាក់ព័ន្ធ បន្តចុះពិនិត្យ ឈ្វេងរកដីសម្បទាសង្គមកិច្ច  ដើម្បីចែកជូនអតីតយុទ្ធជនយើង ដែលគ្នានដី ផ្ទះស្នាក់នៅពិតប្រាកដ ស្របតាមគោលនយោបាយរបស់រាជរដ្ឋាភិបាល ក្នុងការចូល រួមកាត់បន្ថយភាពក្រីក្រផងដែរ។

លោកថ្លែបបែបនេះនៅរដ្ឋបាលខេត្តមណ្ឌលគិរី នាព្រឹកមិញនេះ ក្នុងពិធីប្រកាសទទួលស្គាល់ប្រធានកិត្តិយសសមាគមអតីតយុទ្ធជនកម្ពុជា ខេត្តមណ្ឌលគិរី។

លោកគន់ គីម ក៏បានផ្តាំផ្ញើការសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះមន្រ្តីរាជការ ក៏ដូចជាសមាជិកអតីតយុទ្ធជនទាំងអស់ គឺសម្ដេចទាំងទ្វេរ មិនដែលភ្លេច ឬបោះបង់ចោលបងប្អូនអតីតយុទ្ធជនទេ ហើយសម្តេចនឹកឃើញជានិច្ចចំពោះអតីកាល ដែលធ្លាប់រួមអាវុធជាមួយគ្នាព្រោះសម្តេចក៏ជាជនពិការ ដោយសារសង្គ្រាមម្នាក់ផងដែរ។ 

សូមបញ្ជាក់ថា ក្នុងពិធីប្រកាសទទួលស្គាល់ប្រធានកិត្តិយសសមាគមអតីតយុទ្ធជនកម្ពុជា ខេត្តមណ្ឌលគិរី លោក ថង សាវុន ដែលត្រូវផ្ទេរភារកិច្ចពីប្រធានកិត្តិយសសមាគមអតីតយុទ្ធជនកម្ពុជា ខេត្តរតនគិរី ទៅបំពេញភារកិច្ច ជាប្រធានកិត្តិយសសមាគមអតីតយុទ្ធជនកម្ពុជា ខេត្តមណ្ឌលគិរី រីឯលោម ស្វាយ សំអ៊ាង ដែលត្រូវផ្ទេរភារកិច្ចេពីប្រធានកិត្តិយសសមាគមអតីតយុទ្ធជនកម្ពុជា ខេត្តមណ្ឌលគិរី ទៅបំពេញផ្ទេរភារកិច្ច ជាប្រធានកិត្តិយសសមាគមអតីតយុទ្ធជនកម្ពុជា ខេត្តស្ទឹងត្រែង៕SRP