ខេត្តសៀមរាប៖ឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រសៀមរាប នៅថ្ងៃទី០៦ ខែសីហា ព្រឹកមិញនេះ បានចាត់អោយលោកសុខ តុញ តំណាងអោយរបស់ឯកឧត្តម អ្នកឧកញ៉ា ផ្ទាល់បាននាំយកអង្ករចំនួន១តោននិងត្រីខកំប៉ុងចំនួន៤កេស មកប្រគេនដល់ព្រះសង្ឃ ដែលគង់វត្តប្រាសាទគោកចក ដែលស្ថិតនៅក្នុងសង្កាត់ កោកចកក្រុងសៀមរាប ខេត្តសៀមរាប ដែលកំពុងជួបនូវការខ្វះខាតក្នុងបរិបទជំងឺកូវីដ-១៩។

ក្នុងនាមថា ឯកឧត្តម អ្នកឧកញ៉ាសៀង ណាំ លោក សុខ តុញ បានមានប្រសាសន៍ថាការអភិវឌ្ឍ របស់ប្រទេសកម្ពុជានាពេលបច្ចុប្បន្ននេះ មិនអាចកាត់ផ្តាច់ ចេញពី ព្រះពុទ្ធសាសនា នោះឡើយ មានន័យថាការអភិវឌ្ឍប្រកបដោយ និរន្តរភាពគឺផ្អែកទៅលើកត្តាដាក់ចេញនូវយុទ្ធសាស្ត្រចក្ខុវិស័យ និងគោលនយោបាយឈ្នះៗ ក្នុងនោះក៏ត្រូវក៏មានការ ចូលរួមពីពុទ្ធសាសនាដោយបណ្ដុះសីលធម៌ សតិបញ្ញា ស្មារតីការគោរពដឹងគុណ និងការបណ្ដុះបណ្ដាលធនធានមនុស្សតាមបែបពុទ្ធសាសនា។  ដូច្នេះ ក្រោមម្លប់សន្ដិភាពតាមរយ:នយោបាយឈ្នះៗ ការដឹកនាំប្រកបដោយគតិបណ្ឌិតរបស់សម្ដេចតេជោនាយករដ្ឋមន្ត្រី ប្រទេសកម្ពុជា មានការអភិវឌ្ឍលើគ្រប់វិស័យទាំងផ្លូវពុទ្ធចក្រ និងអាណាចក្រផងដែរ។

ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក បានមានសង្ឃដីកាថា ស្ថិតក្នុងដំណាក់កាលមួយដែលព្រះសង្ឃមិនអាចនិមន្តបិណ្ឌបាតនៅក្រៅវត្តបាន ហើយពុទ្ធបរិស័ទក៏មិនសូវហ៊ានមកវត្ត ដោយសារប្រយ័ត្នប្រយែងនិងការពារខ្លួនកុំឱ្យឆ្លងជំងឺកូវីដ-១៩ ហើយនៅពេលដែលពុទ្ធបរិស័ទមិនសូវមកវត្ត ធ្វើបុណ្យប្រគេន ចង្ហាន់ឬទេយ្យទានច្រើនដូចមុន ដោយភាគច្រើនមកតែពេលថ្ងៃសីលបន្តិចបន្តួចតែប៉ុណ្ណោះ។ ដូច្នោះហើយជីវភាពប្រចាំថ្ងៃរបស់ព្រះសង្ឃទាំងអស់ក៏ត្រូវសម្រួល បន្សាំទៅ តាមសភាពការណ៍ផងដែរ។

គ្រូវិចិត្រវង្សា ហែម គឹមសាន្ត ក៍មានសង្ឃដីកា សូមញាតិញោមពុទ្ធបរិស័ទ គ្រប់មជ្ឈដ្ឋាន មេត្តាចូលរួមទប់ស្កាត់និង ត្រូវបន្តបង្កើនការប្រុងប្រយ័ត្នខ្ពស់នឹងយកចិត្តទុកដាក់បន្ថែមទៀតតាម ការណែនាំរបស់ប្រមុខរាជរដ្ឋាភិបាល ៣កុំ ៣ការពារ: គឺយើងត្រូវពាក់ម៉ាស, ត្រូវលាងដៃ, ត្រូវគម្លាតបុគ្គល, ៣កុំ: គឺកុំនៅបន្ទប់បិទជិត, កុំនៅកន្លែងកុះករ, កុំនៅប៉ះពាល់គ្នាពីព្រោះថា កូវិដមិនរើសអើងអ្នកណាម្នាក់ឡើយ ៕SRP

ខេត្តសៀមរាប៖គួរឲ្យរន្ធត់!ចំពោះស្ត្រីម្នាក់ខណៈកំពុងតែអង្គុយក្នុងតូបមុខផ្ទះត្រូវបានរថយន្តមួយគ្រឿងចូលទៅបុកទាំងកំរោលបណ្ដាលឲ្យស្លាប់ភ្លាមៗ។

ហេតុការណ៍បានកើតឡើនៅរសៀលថ្ងៃទី ០៥ ខែសីហា ឆ្នាំ២០២១នៅត្រង់ចំណុចផ្លូវក្រាលគ្រួសក្រហម ក្នុងភូមិដាក់ផ្កា ឃុំតាយ៉ែក ស្រុកសូទ្រនិគម ខេត្តសៀមរាប។

យោងតាមរបាយការណ៍របស់នគរបាលចរាចណ៍បានបង្ហាញថាករណីគ្រោះថ្នាក់ចរាចណ៍នេះវាងរថយន្តម៉ាកTOYOTA PICK UP ពណ៌ស ពាក់ស្លាកលេខ សៀមរាប 2C.0409  ឆ្នាំផលិត 1990 បើកបរដោយឈ្មោះណាំង សេត ភេទប្រុស អាយុ៤៥ឆ្នាំ មានទីលំនៅបច្ចុប្បន្នភូមិរើល ឃុំរើល ស្រុកពួក ខេត្តសៀមរាប បើកបរទិសដៅ ពីត្បូងទៅជើង ក្នុងល្បឿនលឿន បានរេចង្កូតធ្លាក់ផ្លូវ ទៅបុកមនុស្សដែលកំពុងនៅក្នុងតូបមុខផ្ទះ។

ជនរងគ្រោះឈ្មោះអ៊ុល ហាន ភេទស្រី អាយុ៣៨ឆ្នាំ មានទីលំនៅភូមិដាក់ផ្កា ឃុំតាយ៉ែក ស្រុកសូទ្រនិគម ខេត្តសៀមរាប។ ក្នុងនោះខូចខាតតូបទាំងស្រុងចំណែករថយន្តខូចខាតធ្ងន់។

របាយការណ៍បន្តថាករណីនេះមូលហេតុអ្នកបើកបររថយន្តបើកបរលឿន និងផ្លូវរអិលព្រោះមានមេឃភ្លៀងធ្លាក់ខ្លាំង។ ក្រោយពេលកើតហេតុសមត្ថកិច្ចបានស្ទូចយកវត្ថុតាងមករក្សាទុកនៅអធិការរដ្ឋាននគរបាលស្រុកសូនិគម និងបានឃាត់ខ្លួនអ្នកបើកបររថយន្តដើម្បីបន្តតាមនីតិវិធីច្បាប់៕SRP

ខេត្តកំពង់ចាម​៖លោកអ៊ុន ចាន់ដា អភិបាលខេត្តកំពង់ចាម នៅថ្ងៃទី​៦​ ខែសីហា​ នេះ​ បានអញ្ជើញចុះសួរសុខទុក្ខ និងនាំយកអំណោយរដ្ឋបាលខេត្ត ផ្តល់ជូនមន្រ្តីរាជការនៃមន្ទីរព័ត៌មាន ខេត្តកំពង់ចាម ដែល​កំពុង​ធ្វើចត្តាឡីស័ក​បន្ទាប់​ពី​ពាក់ព័ន្ធ​និង​ករណី​វិជ្ជមាន​កូវី។

លោកអ៊ុន ចាន់ដា បានបញ្ជាក់ថា ផ្អែកទៅតាមស្ថាន នៃការឆ្លងរាលដាល នៃជម្ងឺកូវីដ ១៩ ជាពិសេស មេរោគបម្លែងថ្មី ប្រភេទ ដែលតា (Delta) មានការផ្ទុះខ្លាំង នៅប្រទេសជិតខាង និងបានរាលដាល ចូលមកដល់ខេត្តមួយចំនួន នៅជាប់ព្រំដែនកម្ពុជា ក្នុងនោះ ខេត្តកំពង់ចាម ក៏បានរកឃើញមេរោគបំលែងថ្មីនេះ ផងដែរ។ ដូច្នេះ សូមឲ្យ​មន្ត្រីរាជការ និងប្រជាពលរដ្ឋទាំងអស់ ត្រូវ​យកចិត្តទុកដាក់ខ្ពស់ អំពីសុវត្ថិភាពផ្ទាល់ខ្លួន ក៏ដូចជា ក្រុមគ្រួសារ និងមន្ត្រីរួមអាជីពការងារ នៅក្នុងអង្គភាពនីមួយៗ ផងដែរ​។

អភិបាលខេត្ត ក៏បានណែនាំដល់មន្ត្រីរាជការទាំងអស់ ឲ្យ​ថែទាំសុខភាព តាមរយៈ ការចូលរួមបន្តអនុវត្តវិធានសុខាភិបាល «៣ការពារ និង ៣កុំ» ដើម្បី ចៀសផុតពីការឆ្លងជម្ងឺ ដ៏កាចសាហាវនេះ ទៅក្រុមគ្រួសារ ក៏ដូចជាទៅដល់សហគមន៍។

នាឱកាសនោះដែរ លោកស្រី សម ផល្លា ប្រធាន​មន្ទីរព័ត៌មានខេត្តកំពង់ចាម បានថ្លែងអំណរគុណចំពោះ អភិបាលខេត្ត ដែលបានយកចិត្តទុកដាក់ អំពីសុខទុក្ខ របស់មន្រ្តីរាជការ និងបាននាំមកនូវ​អង្ករ​ មី​ ទឹកបរិសុទ្ធ​ ម៉ាស​ និង​ជែលលាងដៃ​​ ផ្ដល់ជូន រួមទាំងការជួយផ្គត់ផ្គង់អាហារ ចំនួន ៣ពេល ក្នុងមួយថ្ងៃ នាអំឡុងពេលធ្វើចត្តាឡីស័កនេះ។

គួរកត់សម្គាល់ដែរថា មកដល់ពេលនេះ មន្ត្រីរាជការនៅក្នុងមន្ទីរ អង្គភាព ចំនួន ៤ ហើយ ដែលបានប៉ះពាល់នឹងព្រឹត្តិការសហគមន៍ ២០ កុម្ភៈ ក្នុងនោះ រួមមាន៖ មន្ទីរផែនការ មន្ទីរពាណិជ្ជកម្ម មន្ទីរទេសចរណ៍ និងមន្ទីរព័ត៌មានខេត្តកំពង់ចាម។ ជាមួយនោះ អ្នកដែលបានឆ្លងក៏ត្រូវបានអង្គភាពនីមួយៗ បញ្ជូនទៅសម្រាកព្យាបាល។ ដោយឡែក អ្នកប៉ះពាល់ផ្ទាល់ និងប្រយោល ក៏តម្រូវឲ្យធ្វើចត្តាឡីស័ក នៅតាមអង្គភាពសាមីផងដែរ៕SRP

ខេត្តសៀមរាប៖លោក សូរ ប្លាតុង សមាជិកគណបក្សប្រជាជនកម្ពុជាខេត្តសៀមរាបនិង ជាប្រធានគណបក្សប្រជាជនកម្ពុជាស្រុកប្រាសាទបាគង បានណែនាំឲ្យសមាជិករបស់បក្ស ខិតខំបម្រើប្រជាពលរដ្ឋឲ្យបានល្អប្រសើរ។

លោកសូរ ប្លាតុង បានលើកឡើងថាកិច្ចការស្នូលរបស់គណបក្សប្រជាជនកម្ពុជា គឺត្រូវធ្វើល្អជាមួយប្រជាពលរដ្ឋ ជាមួយសមាជិកបក្សរបស់ខ្លួន នៅក្នុងមូលដ្ឋាន ឲ្យបានគ្រប់ជ្រុងជ្រោយ ដោយមិនត្រូវទុកឱ្យពួកគាត់ចោលឡើយ។ ក្នុងនោះត្រូវចុះមូលដ្ឋានឲ្យបានញឹកញាប់ ដើម្បីដឹងសុខទុក្ខលំបាករបស់ប្រជាពលរដ្ឋ ហើយត្រូវរួមគ្នាដោះស្រាយជូនពួកគាត់។ ជាមួយគ្នានេះដែរ ត្រូវពង្រឹងឲ្យបាននូវការសាមគ្គីសមាជិកបក្ស ដើម្បីទទួលបានការគាំទ្រកាន់ច្រើន។ លោកក៏បានលើកឡើងពីចំណុចខ្លាំង ចំណុចខ្សោយដើម្បីដាស់តឿនរំលឹកដល់សមាជិកត្រូវអនុវត្តឲ្យបាននូវការគាំទ្រច្រើនពីប្រជាពលរដ្ឋដើម្បីឈ្នះក្នុងការបោះឆ្នោតនៅឆ្នាំ ២០២២ខាងមុខ។

លោកសូរ ប្លាតុង ថ្លែងណែនាំដល់សមាជិកយ៉ាងដូច្នេះ នៅរសៀលថ្ងៃព្រហស្បតិ៍ ទី ០៥ខែសីហាឆ្នាំ ២០២១នេះ នៅទីស្នាក់ការគណបក្សប្រជាជនកម្ពុជា ឃុំកណ្ដែក ក្នុងឱកាសដឹកនាំកិច្ចប្រជុំស្តីអំពីការពង្រឹងពង្រីកសមាជិកបក្សជួយភូមិត្រាងនិងភូមិអូរ។

សូមជម្រាបថាកិច្ចប្រជុំនេះ មានការអញ្ជើញចូលរួមពីលោក សឹង្ហ សំរឹទ្ធិ អនុប្រធានក្រុមការងារបក្សចុះជួយឃុំកណ្តែក ប្រធានក្រុមការងារចុះជួយភូមិត្រាងនិងភូមិអូរ មេឃុំកណ្ដែក និងសមាជិក ចូលរួមជិត២០នាក់ផងដែរ៕SRP

ភ្នំពេញ៖ឯកអគ្គរាជទូតស្តីទីអង់គ្លេសប្រចាំនៅកម្ពុជាបានបង្ហាញការរំពឹងថា វ៉ាក់សាំងជាជំនួយនេះ នឹងជួយពង្រីក និងពន្លឿនកម្មវិធីចាក់វ៉ាក់សាំងរបស់ប្រទេសកម្ពុជា។

លោកបានថ្លែងបន្តថា វ៉ាក់សាំងជំនួយរបស់អង់គ្លេសនេះ នឹងជួយដល់សហគមន៍ក្នុងមូលដ្ឋាន ដើម្បីចាប់ផ្តើមអាជីវកម្ម ការពារសេវាកម្មសុខភាព និងស្តារជីវភាពរស់នៅរបស់ប្រជាជនកម្ពុជាឡើងវិញ។

លោកបានបញ្ជាក់ថាជំងឺរាតត្បាតកូវីដ-១៩ ជាបញ្ហារបស់សកលលោកដែលទាមទារ ឱ្យមានដំណោះស្រាយជាសកល។ ដូច្នេះហើយបានជាចក្រភពអង់គ្លេសកំពុងរួមចំណែកយ៉ាងសំខាន់ក្នុងការប្រយុទ្ធជាសកលប្រឆាំងនឹងជំងឺកូវីដ១៩។​

លោកបានគូសបញ្ជាក់ថា លោកពិតជារីករាយចំពោះការធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា ដើម្បីប្រយុទ្ធប្រឆាំងនឹងជំងឺកូវីដ-១៩។

លោកថ្លែងនៅរសៀល ថ្ងៃទី៥ ខែសីហា ឆ្នាំ២០២១នេះ ក្នុងឱកាសនាំវ៉ាក់សាំងបង្ការជំងឺកូវី-១៩ ជូនកម្ពុជា ក្រោមកិច្ចទទួលដោយសម្ដេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

សម្ដេចតេជោនាយករដ្ឋមន្ត្រី បានស្វាគមន៍និងអរគុណចំពោះរដ្ឋាភិបាល និងប្រជាពលរដ្ឋនៃចក្រភពអង់គ្លេសដែលបានផ្ដល់វ៉ាក់សាំងបង្ការជំងឺកូវី-១៩ ជូនដល់រាជរដ្ឋាភិបាលនិងប្រជាពលរដ្ឋកម្ពុជាចំនួន៤១៥,០០០ដូស ប្រភេទវ៉ាក់សាំង AstraZeneca ដែលជាជំនួយសប្បុរសធម៌ដ៏ថ្លៃថ្លា និងជាសន្តានចិត្តជួយគ្នាក្នុងគ្រាលំបាកក្នុងបរិការណ៍ដែលវ៉ាក់សាំងគឺជាទំនិញយុទ្ធសាស្ត្រគន្លឹះ និងមានតម្រូវការខ្ពស់ក្នុងសមរភូមិប្រយុទ្ធ នឹងការឆ្លងរាលដាលនៃជំងឺកូវីដ-១៩នៅគ្រប់ទិសទីនៃពិភពលោក។

សម្ដេចហ៊ុន សែន បានមានប្រសាសន៍ទៀតថា ដោយសារតែមេរោគ Covid-19 បានបន្តវិវត្ត និងបំប្លែងខ្លួនឥតឈប់ឈរទៅជាប្រភេទមេរោគកន្លែងថ្មី ជាពិសេសមេរោគប្រភេទDelta ដែលបាន និងកំពុងឆ្លងរាលដាលយ៉ាងខ្លាំងនៅបណ្ដាប្រទេសនានាក៏ដូចជានៅកម្ពុជាផងដែរនោះ រាជរដ្ឋាភិបាលកម្ពុជាក៏បានសម្រេចបិទខេត្តមួយចំនួន និងតំបន់ខ្លះក្នុងរាជធានីភ្នំពេញ និងដាក់ចេញនូវយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺនេះ។

សម្ដេចតេជោបានមានប្រសាសន៍ទៀតថា ដោយយល់យ៉ាងច្បាស់អំពីអត្ថប្រយោជន៍នៃការចាក់វ៉ាក់សាំងរាជរដ្ឋាភិបាលបានខិតខំនឹងព្យាយាមស្វែងរកវ៉ាក់សាំងតាមយន្តការដែលមានជាតិទ្វេភាគីក្តីជាពហុភាគីក្តដើម្បីចាក់ជូនដល់ប្រជាពលរដ្ឋ។ ចាប់តាំងពីថ្ងៃទី១០ ខែកុម្ភៈឆ្នាំ២០២១ កម្ពុជាបានចាប់ផ្ដើមចាក់វ៉ាក់សាំងជូនដល់ប្រជាពលរដ្ឋដែលមានអាយុចាប់ពី១៨ឆ្នាំឡើងទៅ ហើយចាប់ពីថ្ងៃទី១ ខែសីហា២០២១ កម្ពុជាក៏បានសម្រេចបោះមួយជំហានទៀតគឺការចាប់ផ្ដើមបើកយុទ្ធនាការចាក់វ៉ាក់សាំងដល់កុមារនិងយុវវ័យអាយុចាប់ពី១២ ដល់ក្រោម១៨ឆ្នាំដែលមានប្រមាណជាង២លាននាក់បន្ថែមទៀត ។

សម្តេចជោបានបញ្ជាក់ថាវ៉ាក់សាំងដែលជាជំនួយមនុស្សធម៌ដ៏ថ្លៃថ្លារបស់ប្រជាពលរដ្ឋ និងរដ្ឋាភិបាលនៃចក្រភពអង់គ្លេសនេះនឹងត្រូវប្រើប្រាស់ក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសនោះទី៣ ឬដូសជុំវិញ។ សម្ដេចក៏ស្នើដល់ចក្រភពអង់គ្លេសផ្ដល់ជំនួយមនុស្សធម៌ជាវ៉ាក់សាំងជាបន្តទៀត ក៏ដូចជាជួយសម្របសម្រួលដល់កម្ពុជាក្នុងការបញ្ជាទិញវ៉ាក់សាំង AstraZeneca បន្ថែមទៀតសម្រាប់បំពេញសេចក្តីត្រូវការចាំបាច់នាពេលខាងមុខ។

សម្ដេចតេជោក៏នៅតែអំពាវនាវដល់ប្រជាពលរដ្ឋកម្ពុជាទាំងអស់ចូលរួមសហការយ៉ាងសកម្ម និងពេញលេងជាមួយរាជរដ្ឋាភិបាលក្នុងការប្រយុទ្ធនិងជម្ងឺ Covid-19 ដោយត្រូវអនុវត្តកាន់ខ្ជាប់នូវវិធានការសុខាភិបាលជាពិសេសវិធានការ៣ កុំ ៣ការពារ និងចូលរួមក្នុងយុទ្ធនាការជាតិចាក់វ៉ាក់សាំងបង្ការកូវីត-១៩ ដើម្បីសុវត្ថិភាពសុខភាពដូចជាសុខុមាលភាពរបស់យើងទាំងអស់គ្នា៕SRP

ខេត្តកំពង់ចាម​៖លោកអ៊ុន ចាន់ដា អភិបាលខេត្តកំពង់ចាម​ នៅថ្ងៃទី​៥ ខែសីហា ព្រឹកមិញនេះ​ បានអញ្ជើញចុះពិនិតការស្ថាបនាផ្លូវ​បេតុង​អាមេ​ ២ខ្សែ​ ប្រវែង​ជាង១៥០០ ម៉ែត្រ និងប្រព័ន្ធ​លូបង្ហូរទឹក ស្ថិតនៅក្នុងសង្កាត់បឹងកុក ក្រុងកំពង់ចាម។​

ក្នុង​ដំណើរ​អញ្ជើញ​ចុះ​ពិនិត្យ​ការ​ស្ថាបនា​​ផ្លូវ​ខាង​លើនេះ​ លោកអ៊ុន​ ចាន់ដា​ បាន​ធ្វើការ​សាកសួរ​សុខទុក្ខ​ និង​អំពាវនាវ​ដល់​​ប្រជាពលរដ្ឋ​ ដែល​រស់នៅ​អម​សងខាង​ផ្លូវ​ ឲ្យ​ចូលរួម​ជាមួយ​អាជ្ញាធរ​ ដេីម្បី​បន្ត​ការ​អភិវឌ្ឍន៍​ និង​ចូលរួម​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ ផងដែរ​។ ជាមួយ​ការ​ស្ថាបនា​ផ្លូវ​​នេះ​ ប្រជាពលរដ្ឋ​ ពិត​ជា​​មាន​ការ​ត្រេកអរ​ជា​ខ្លាំង​ បេី​ទោះជា​ស្ថិត​ក្នុង​បរិបទ​កូវីដ​-១៩​ អាជ្ញាធរ​ខេត្តកំពង់ចាម​ នៅតែ​បន្ត​ធ្វើការ​អភិវឌ្ឍន៍​ជា​បន្តបន្ទាប់​ ​ជាក់ស្តែង​ដូចជា​ការ​ស្ថាបនា​ពី​ផ្លូវ​ដី​ ទៅ​ជា​ផ្លូវ​បេតុង​​​នេះ​ បង្ក​លក្ខណៈ​ងាយ​ស្រួល​ក្នុង​ការ​ធ្វើដំណើរ​​។

មន្ត្រីបច្ចេកទេសនៃទីចាត់ការផែនការវិនិយោគខេត្តកំពង់ចាម បានឲ្យដឹងថា ផ្លូវបេតុងអាមេ ១ខ្សែ ប្រវែងជាង១៣០០ ម៉ែត្រ ទទឹង ៦ ម៉ែត្រ និង មួយ ខ្សែ ទៀត ប្រវែងជាង ២០០ ម៉ែត្រ ទទឹង ៥ ម៉ែត្រ និង ស្ថាបនា លូរំដោះទឹក ប្រវែង ជាង ១០០០ ម៉ែត្រ និង លូ ដែល ត្រូវ ជួសជុល ប្រវែងជាង ៤០០ ម៉ែត្រ។

លោក​បានថា គម្រោងស្ថាបនា​ផ្លូវ​នេះ គឺជាគម្រោង ស្ថាបនា តទៅ ក្នុង ថវិកា ឆ្នាំ២០២២ របស់រដ្ឋបាលខេត្តកំពង់ចាម។

មន្ត្រីបច្ចេកទេសដដែល បានរំលឹកផងដែរថា ក្នុងឆ្នាំកន្លងទៅ ពេលរដូវវស្សា អាជ្ញាធរខេត្តកំពង់ចាម ដឹកនាំដោយ អ៊ុន ចាន់ដា តែងតែបាន ចុះពិនិត្យរាល់ពេល មានជំនន់ទឹកភ្លៀង ក្នុងភូមិ មួយចំនួន នៅក្នុងសង្កាត់ បឹងកុក ដើម្បីរកវិធីសាស្ត្រ ដោះស្រាយ។ ហេតុដូច្នោះហើយ ទើបមកដល់ បច្ចុប្បន្ននេះ បានអភិវឌ្ឍ ស្ថាបនាផ្លូវបេតុងអាមេ និង ស្ថាបនា លូរំដោះទឹក ដើម្បី បញ្ចៀសការជន់លិច ដោយជំនន់ទឹកភ្លៀងដូច ឆ្នាំមុនៗទៀត​៕SRP

ខេត្តព្រះវិហារ៖លោកប្រាក់ សុវណ្ណ អភិបាលខេត្តព្រះវិហារ បានណែនាំដល់ប្រជាពលរដ្ឋទាំងអស់ អោយគោរពតាមវិធានការសុខាភិបាល ក៏ដូចរាជរដ្ឋាភិបាលគឺ ៣កុំ និង៣ការពារ។

ការណែនាំនេះខណ:លោកនិង លោក វុធ សាវី និង លោក សេង ម៉េងស្រ៊ុនព្រះរាជអាជ្ញារងខេត្តព្រះវិហារ ជួយបរិច្ចាគថវិការផ្ទាល់ខ្លួនចំនួន៦៧% ក្នុងយុទ្ឋនាការ “ខ្មែរតែមួយ បេះដូងតែមួយ”នៃការចំណាយសរុបរបស់ប្រជាពលរដ្ឋ ដើម្បីជួលជុលឆ័ត្រ ក្នុងផ្សារកំពង់ប្រណាកទាំងអស់ យកមកប្រើប្រាស់បិទបាំងការពារកុំអោយត្រូវទឹកភ្លៀង និងកម្ដៅ ថ្ងៃដែលពួកគាត់កំពុងនៅលក់ដូរ។ ដោយពួកគាត់ត្រូវចំណាយប្រាក់ក្នុងការជួលឆ័ត្រ គេក្នុងពេលអំឡុងពេលបិទខ្ទប់ផ្សារកំពង់ប្រណាក ដោយសារតែ មានការឆ្លងនៃជំងឺកូវិដ-១៩ Covit-19 រហូតទាល់តែបើកដំណើរការផ្សារកំពង់ប្រណាកឡើងវិញ៕SRP

ភ្នំពេញ៖ប្រសិនមិនមានអ្វីប្រែប្រួលនោះទេ សម្តេចហ៊ុន សែន នាយករដ្ឋមន្ត្រីនឹងអញ្ជើញទទួលវ៉ាក់សាំង Oxford AstraZeneca ជាជំនួយទ្វេភាគីរបស់ចក្រភពអង់គ្លេស ចំនួន ៤១៥.០០០ ដូស ក្នុងក្របខណ្ឌទ្វេភាគីជូនរាជរដ្ឋាភិបាលកម្ពុជា នៅរសៀលថ្ងៃនេះ។

សូមជម្រាបថា រាជរដ្ឋាភិបាលកម្ពុជា បានសម្រេចដាក់ចេញ នូវយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី ៣ ឬដូសជំរុញ ជូនដល់មន្ត្រីបម្រើសេវាសាធារណៈ នៅជួរមុខ ដែលកំពុងបម្រើការងារនៅតាមបណ្តាខេត្តនានា ដែលស្ថិតតាមព្រំដែនប្រទេសថៃ ដែលមេរោគបំប្លែងថ្មី ដែលតា កំពុងវាយលុក និងរាលដាល។

គួរបញ្ជាក់ថាសម្តេចហ៊ុន សែន កាលពីថ្ងៃទី ១ ខែសីហា ឆ្នាំ ២០២១ ក្នុងឱកាសបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនកុមារ និងយុវវ័យ ចាប់ពីអាយុ ១២ ឆ្នាំ ដល់ ក្រោមអាយុ ១៨ ឆ្នាំ សម្តេចបានអះអាងថា អ្នកធ្លាប់ចាក់វ៉ាក់សាំងបង្ការជំងឺកូវីដ-១៩ ប្រភេទវ៉ាក់សាំង សុីណូហ្វាម និង សុីណូវ៉ាក់ គឺត្រូវចាក់វ៉ាក់សាំងប្រភេទ AstraZeneca សម្រាប់ដូសទី៣ ឬដូសជំរុញ។

សូមជម្រាបផងដែរថា គិតត្រឹមថ្ងៃទី ៤ ខែសីហា ឆ្នាំ ២០២១ កំណេីនអត្រាចាក់វ៉ាក់សាំងកូវីដ-១៩​​ មាន​ ៧៥,៤២%​ ធៀបជាមួយចំនួនប្រជាជនគោលដៅ​ ១០លាននាក់​ និងលើកុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មាន ៨,២៩% ធៀបជាមួយនឹងប្រជាជនគោលដៅ១,៩៦៦,៩៣១នាក់៕SRP

ខេត្តកំពត៖អាជ្ញាធរសមត្ថកិច្ចស្រុកទឹកឈូ បានចុះទៅធ្វើការហាមឃាត់ សកម្មភាពគ្រឿងចក្រ របស់ក្រុមហ៊ុនកំពតផត ដោយបានឈូសឆាយលើដីប្រជាពលរដ្ឋ។

ការចុះហាមឃាត់នៅថ្ងៃទី០៣ ខែសីហាឆ្នាំ២០២១ ក្រោយពីទទួលបានពាក្យបណ្តឹងពីប្រជាពលរដ្ឋចំនួន១៩គ្រួសារ ថាក្រុមហ៊ុនកំពតផត បានយកគ្រឿងចក្រជាច្រើនគ្រឿងទៅឈូសឆាយលើដីរបស់ពួកគាត់។ ប៉ុន្តែក្រោយផ្អាកគ្រឿងចក្រមិនបានប៉ុន្មានម៉ោងផង ក្រុមហ៊ុនក៏បញ្ជាឲ្យឈូសឆាយឡើងវិញ។

លោក អ៉ឹម ចាន់សោធន អភិបាលរងស្រុកទឹកឈូ ដែលបានដឹកនាំកម្លាំងផ្ទាល់បានមានប្រសាសន៍ថា ការចុះមកហាមឃាត់សកម្មភាពឈូសឆាយដីនៅចំណុចភូមិព្រែកអំពិល ឃុំកោះតូច ស្រុកទឹកឈូ ខេត្តកំពត នាពេលនេះ ដោយយោងតាមពាក្យបណ្តឹងរបស់ប្រជាពលរដ្ឋចំនួន ១៩គ្រួសារ បានចោទប្រកាន់ថា ក្រុមហ៊ុនកំពតផត កំពុងធ្វើសកម្មភាពរំលោភលើដីរបស់ខ្លួន។

លោកអភិបាលរងស្រុកបន្តថាការចុះហាមឃាត់នេះ ដោយរងចាំការដោះស្រាយ ពីសំណាក់អាជ្ញាធរ និងជំនាញពាក់ព័ន្ធ រួចរាល់ទើបអាចបន្តធ្វើសកម្មភាពបាន។ ចំពោះករណីនេះលោកនឹងធ្វើរបាយការណ៍ជូនទៅថ្នាក់ដឹកនាំ ដើម្បីរិះរកវិធានការដោះស្រាយបន្តទៀត។

លោក អ៉ឹម ចាន់សោធន បានបញ្ជាក់ថា ក្រុមហ៊ុនកំពតផត ហាក់មានចេតនា មិនចង់ចូលរួមសហការជាមួយនឹងអាជ្ញាធរនោះទេ ហើយកន្លងមក អាជ្ញាធរបានកោះអញ្ជើញតំណាងក្រុមហ៊ុនជាច្រើនសារ ឲ្យចូលរួមពិភាក្សាដោះស្រាយដោយផ្ទាល់ជាមួយប្រជាពលរដ្ឋដែរ តែត្រូវខាងក្រុមហ៊ុនបដិសេធ ហើយចេះតែបន្តធ្វើសកម្មភាពឈូសឆាយលើដីប្រជាពលរដ្ឋដែលនៅជាប់ និងនៅក្បែរនោះរហូតគ្មានក្រែងរអា ព្រោះអះអាងថាជាដីរបស់ក្រុមហ៊ុន។

តំណាងប្រជាពលរដ្ឋ១៩គ្រួសារ បានប្រាប់ឲ្យដឹងថា ដីរបស់ពួកគេមានប័ណ្ណកាន់កាប់ត្រឹមត្រូវ និងបានអាស្រ័យផលជាច្រើនឆ្នាំ។ ហើយពីមុនមកមិនដែលមានបញ្ហាអ្វីកើតឡើងទេ ប៉ុន្តែចាប់ពីដីកំពតឡើងថ្លៃនៅឆ្នាំ២០១៩ រហូតមក ក្រុមហ៊ុនចេះតែវាទព្រំរបស់ខ្លួនកាន់តែធំទៅៗ រំលងភ្នំ ឆ្លងអូរ រហូតមកដល់ដីរបស់ពួកគេទៀត។ ជាមួយនេះ ពួកគាត់ស្នើសុំឲ្យអាជ្ញាធរ មន្ត្រីជំនាញ និងអ្នកពាក់ព័ន្ធ ជួយជំរុញ និងពន្លឿនការដោះស្រាយជូនពួកគេឱ្យបានឆាប់រហ័សបំផុត ព្រោះបច្ចុប្បន្នក្រុមហ៊ុន មិនត្រឹមតែបំផ្លាញ់ដំណាំ និងវាយកម្ទេចរបងព្រំដីនោះទេថែមទាំង យកគ្រឿចក្រមកឈូសឆាយតាមអំពើចិត្តទៀតផង។

ជុំវិញករណីដដែល បើតាមការបញ្ជាក់ពី លោកអភិបាលរងស្រុកទឹកឈូថា ដីរបស់ក្រុមហ៊ុនដែលបានប្រមូលទិញពីប្រជាពលរដ្ឋ ៥៨គ្រួសារ ស្ថិតនៅភូមិព្រែកអំពិល ឃុំកោះតូច ស្រុកទឹកឈូ អំឡុងឆ្នាំ២០១៥ និងមានគំនូសប្លង់កំណត់ព្រំត្រឹមត្រូវ ប៉ុន្តែរយៈពេលចុងក្រោយនេះ មានពលរដ្ឋជាច្រើននាក់ បានដាក់ពាក្យប្តឹងដល់អាជ្ញាធរ ដោយចោទប្រកាន់ថាក្រុមហ៊ុនកំពតផត បានប្រើគ្រឿចក្រឈូសឆាយលើដីរបស់ពួកគេ។

តាមប្រភពពីប្រពលរដ្ឋ មានលំនៅឋានក្បែរទីតាំងដីជម្លោះបានប្រាប់ឲ្យដឹងថា ក្រោយការចុះទៅហាមឃាត់មិនបានប៉ុន្មានម៉ោងផង ខាងក្រុមហ៊ុនក៏បានបញ្ជាគ្រឿងចក្រឲ្យមកឈូសឆាយឡើងវិញតែដដែលហ្នឹង មើលទៅខាងក្រុមហ៊ុនហាក់មិនខ្លាចញញើតអ្វីទាំងអស់។ ចំពោះសកម្មភាពបែបនេះ គេសង្ស័យថាក្រុមហ៊ុនកំពតផត ប្រហែលជាមានខ្នងបង្អែកមិនស្តើងនោះទេ៕SRP

ភ្នំពេញ៖ថ្ងៃនេះជាថ្ងៃខួបកំណើតរបស់មេដឹកនាំកម្ពុជា សម្ដេចហ៊ុន សែន គម្រប់ជន្មាយុ ៧០ឆ្នាំ។

នៅលើទំព័រ គណនីpage facebook របស់សម្ដេចហ៊ុន សែន បានសរសេរថា៖ សម្តេចតេជោ នាយករដ្ឋមន្រ្តី ជាទីគោរពដ៏ខ្ពង់ខ្ពស់នៃយើងមានជន្មាយុ ៧០ឆ្នាំហើយនៅថ្ងៃនេះ។

សំណេរបានបន្តថា៖ ក្នុងឱកាសដ៏មង្គលសួស្ដីប្រពៃថ្លៃថ្លា ពោរពេញដោយក្ដីសោមនស្សរីករាយ នៃថ្ងៃខួបកំណើតគម្រប់៦៩ ឈានចូល៧០ឆ្នាំ (៥ សីហា ១៩៥២ – ៥ សីហា ២០២១) របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ពលរដ្ឋកម្ពុជាសូមគោរពបួងសួងដល់គុណបុណ្យព្រះរតនត្រ័យកែវទាំងបី វត្ថុស័ក្ដិសិទ្ធិក្នុងលោក និងទេវតាឆ្នាំថ្មី សូមប្រោះព្រំសព្ទសាធុការពរ សិរីសួស្ដី ជ័យមង្គលវិបុលសុខ បវរមហាប្រសើរថ្លៃថ្លាជូនចំពោះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និង សម្ដេចកិត្តិព្រឹទ្ធបណ្ឌិត ព្រមទាំងបុត្រា-បុត្រី និងចៅៗជាទីស្រឡាញ់ សូមមានសុខភាពល្អបរិបូរណ៍ អាយុយឺនយូរ ទទួលបានជោគជ័យលើគ្រប់ភារកិច្ច និងសូមបានប្រកបដោយពុទ្ធពរ និងពរទាំងប្រាំប្រការគឺ អាយុ វណ្ណៈ សុខៈ ពលៈ និងបដិភាណ កុំបីឃ្លៀងឃ្លាតឡើយ៕SRP

ខេត្តសៀមរាប៖ខ្ញុំបាទ សឹង្ហ សំរឹទ្ធិ អនុប្រធានក្រុមការងារគណបក្សប្រជាជនកម្ពុជាចុះជួយឃុំកណ្ដែក និងជាប្រធានក្រុមការងារគណបក្សចុះជួយភូមិត្រាងនិងភូមិអូរ សូមគោរពជូនពរ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសថ្ងៃខួបកំណើតជន្នាយុគម្រប់ ៦៩ឆ្នាំ ឈានចូល៧០ឆ្នាំ៕SRP

ភ្នំពេញ៖សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា ផ្ញើលិខិតជូនពរ សម្តចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងឱកាសចម្រើនអាយុវឌ្ឍនា ៦៩ ឆ្នាំ ឈានចូល ៧០ឆ្នាំ៕SRP