ខេត្តកំពង់ចាម​៖ការស្ថាបនាប្រព័ន្ធធារាសាស្ត្រ ព្រែកពោធិ៍ នៃគម្រោងកែលម្អវិស័យធារាសាស្រ្តកសិកម្ម ដែលជាកម្ចីហិរញ្ញប្បទាន របស់ធនាគារអភិវឌ្ឍន៍អាស៊ី (ADB) ដោយមានក្រសួងធនធានទឹក និងឧតុនិយម ជាម្ចាស់គម្រោង​ ក្នុងទំហំទឹកប្រាក់​ប្រមាណ​ជា​ ៣២លានដុលា្លរ ដែលមានស្រុកចំនួនពីរទទួលផល រួមមាន៖ ស្រុកស្រីសន្ធរ ខេត្តកំពង់ចាម មាន ៦ឃុំ ស្មើនឹង ២១ភូមិ និងស្រុកខ្សាច់កណ្តាល ខេត្តកណ្ដាល មាន ២ឃុំ ស្មើនឹង ៥ភូមិ ត្រូវបានលោក អ៊ុន ចាន់ដា អភិបាលខេត្តកំពង់ចាម ចុះពិនិត្យ នៅថ្ងៃទី​១៩​ ខែកុម្ភ: ម្សិលមិញ។

គួរបញ្ជាក់ថា៖ ទំហំការងារ នៃគម្រោងប្រព័ន្ធធារាសាស្រ្តព្រែកពោធិ៍ រួមមាន ៖
-ប្រឡាយមេ ចំនួន ១២ខ្សែ និងប្រឡាយរង ៤៦ខ្សែ មានប្រវែងសរុប ១០៥.៣៧ គីឡូម៉ែត្រ ក្នុងនោះប្រឡាយបេតុង មានប្រវែង ២៧.១៩ គីឡូម៉ែត្រ និងប្រឡាយដី ៧៨.១៧ គីឡូម៉ែត្រ
-សំណង់សិប្បៈការតូចធំ ចំនួន ១៩៥កន្លែង
-ស្ថានីយបូមទឹកទំនើប ពីទន្លេមេគង្គរង មកប្រឡាយមេ ដេីរដោយចរន្តអគ្គីសនី បំពាក់ម៉ូទ័រ ៧គ្រឿង ចំនួន ១កន្លែង និងអាចស្រោចស្រពលើផ្ទៃដីរដូវវស្សា ប្រមាណ ៨.០០០ហិចតា និងរដូវប្រាំង ប្រមាណ ៨.០០០ហិកតា។

គម្រោងកែលម្អវិស័យធារាសាស្រ្តកសិកម្ម កំពុងអនុវត្តនៅក្នុងភូមិសាស្រ្តឃុំព្រែកពោធិ៍ ស្រុកស្រីសន្ធរ ខេត្តកំពង់ចាម បើតាមផែនការគឺត្រូវបានសាងសង់រួចរាល់ហើយ តែដោយសារការរីករាលនៃជំងឺកូវីដ-១៩ បានបង្កភាពយឺតយាវដល់ការអនុវត្តគម្រោងដែលរហូតមកដល់ពេលនេះទើបសម្រេចបានប្រមាណជា៧៥% ប៉ុណ្ណោះ​៕SRP

ខេត្តសៀមរាប៖លោក ហ៊ុន ម៉ាណែត សមាជិកគណៈអចិន្ត្រៃយ៍នៃគណៈកម្មាធិការកណ្តាល និងជាប្រធានយុវជនគណបក្សប្រជាជនកម្ពុជាថ្នាក់កណ្តាល បានបញ្ជាក់ថា យុវជនគណបក្សប្រជាជនកម្ពុជា ជំនាន់មុនបានបន្សល់នូវគំរូវីរភាព និងសមិទ្ធផលច្រើនអនេកបន្តទុកឱ្យយុវជនជំនាន់នេះ ដូច្នេះគប្បីខិតខំចូលរួមចំណែកបន្តថែរក្សា និងបង្កើតសមិទ្ធផលវិជ្ជមានថ្មីៗបន្ថែមទៀត ដោយឈរលើមូលដ្ឋានគ្រឹះរឹងមាំនៃស្មារតីសាមគ្គីភាព ការតម្កល់ផលប្រយោជន៍ជាតិជាធំ ការបន្តលើកកម្ពស់សមត្ថភាព ការប្រកាន់ខ្ជាប់នូវគុណធម៌ សីលធម៌ និងការយល់ដឹងច្បាស់ពីតួនាទីភារកិច្ចក្នុងនាមជាសមាជិកបក្ស ដើម្បីធ្វើយ៉ាងណាបម្រើប្រជាជន ថែរក្សាសុខសន្តិភាព និងចូលរួមចំណែកទាំងអស់គ្នា បន្តដឹកនាំនាវាកម្ពុជាទៅកាន់វឌ្ឍនភាព ភាពសម្បូរសប្បាយ ប្រកបដោយកិត្តិយស និងសុភមង្គល។

លោកការបញ្ជាក់នេះ បានធ្វើឡើងក្នុងពិធីប្រកាសសមាសភាពក្រុមការងារយុវជនគណបក្សខេត្តសៀមរាប នៅព្រឹកមិញនេះ៕SRP

ខេត្តសៀមរាប៖លោកហ៊ុន ម៉ាណែត សមាជិកគណៈអចិន្ត្រៃយ៍នៃគណៈកម្មាធិការកណ្តាល និងជាប្រធានយុវជនគណបក្សប្រជាជនកម្ពុជាថ្នាក់កណ្តាល បានបញ្ជាក់ថា ក្នុងសង្រ្គាមកូវីដ-១៩ សម្តេចតេជោ ហ៊ុន សែន បានរក្សានូវលំនឹងពីហានិភ័យនៃវិនាសកម្មបង្កដោយជំងឺនេះ តាមរយៈ ការសម្រេចរៀបចំមូលដ្ឋាននៃការព្យាបាលរឹងមាំ រួមមានជាអាទិ៍ ការបើកដំណើរការមណ្ឌល ព្យាបាលទាំងថ្នាក់មូលដ្ឋាន និងថ្នាក់តំបន់នៅទូទាំងប្រទេស ការសម្រេចចិត្តរហ័សទាន់ពេលវេលាក្នុងការជ្រើសរើសយកថ្នាំព្យាបាល និងវ៉ាក់សាំងកូវីដ-១៩ ដើម្បីចាក់ជូនប្រជាពលរដ្ឋ ព្រមទាំងការសម្រេចអនុញ្ញាតឱ្យព្យាបាលតាមផ្ទះ ដោយមានការចូលរួមពិចារណា ពិគ្រោះយោបល់ និងសិក្សាស្រាវជ្រាវច្បាស់លាស់ត្រឹមត្រូវរបស់ក្រុមបច្ចេកទេសជំនាញនៃក្រសួងសុខាភិបាល និងភាគីពាក់ព័ន្ធនានា។ D-19-2-22-MND1

លោកបញ្ជាក់នេះ បានធ្វើឡើងក្នុងពិធីប្រកាសសមាសភាពក្រុមការងារយុវជនគណបក្សខេត្តសៀមរាប នៅពីព្រឹកមិញនេះ។

លោកហ៊ុន ម៉ាណែត បានបន្តថា ចំណាត់ការដ៏ស័ក្តិសិទ្ធិ និងប្រកបដោយភាពហ្មត់ចត់នេះ បានធ្វើឲ្យគ្រប់គ្រង បានអត្រាអ្នកឆ្លងទាប ហើយក៏មិនមានករណីស្លាប់ថ្មីទៀតទេគិតត្រឹមថ្ងៃនេះ។ ការណ៍នេះបានជួយឱ្យកម្ពុជា ឈានទៅបើកប្រទេសទ្បើងវិញ លើគ្រប់វិស័យ ដែលជាការធានាបាននូវតុល្យភាព នៃសុខភាព សុខមាលភាព ប្រជាពលរដ្ឋ និងដំណើរការជាប្រក្រតីនៃចរន្តសេដ្ឋកិច្ចរបស់ប្រទេសជាតិទាំងមូល។ យ៉ាងណាក៏ដោយ សម្តេច ក៏បានអំពាវនាវឱ្យបន្តការប្រុងប្រយ័ត្នខ្ពស់ និងអនុវត្តវិធានការ “៣ការពារ និង៣កុំ” ក៏ដូចជាវិធានការសុវត្ថិភាពផ្នែកសុខាភិបាលផ្សេងទៀត ឱ្យបានខ្ជាប់ខ្ជួន ជាពិសេសការចូលរួមទទួលការចាក់វ៉ាក់សាំងកូវីដ-១៩ ដូសជំរុញទី៣ និងទី៤ ឱ្យបានគ្រប់ៗគ្នាសំដៅទប់ស្កាត់ និងកាត់បន្ថយគ្រោះថ្នាក់នៃមេរោគបំប្លែងថ្មីៗ។

លោកបានសង្កត់ធ្ងន់ថា គណបក្សប្រជាជនកម្ពុជា ដែលមានសម្តេចតេជោ ជាប្រមុខ រួមជាមួយនឹងឥស្សរជនទាំងអស់ បានកំណត់យកការសង្រ្គោះប្រជាពលរដ្ឋ នៅទូទាំងប្រទេសជាកត្តាអាទិភាពខ្ពស់បំផុត ដូចស្តែងឡើងតាមរយៈគំរូវីរភាពក្នុងដំណាក់ កាលសំខាន់ៗ ក្នុងប្រវត្តិសាស្ត្រកម្ពុជា រួមមានជាអាទិ៍ការយកអាយុជីវិតធ្វើជាដើមទុនក្នុងការរំដោះពីការសម្លាប់រង្គាល របស់របបប៉ុលពត ការប្តូរជីវិតចូលតំបន់ឧទ្ទាម ដើម្បីអនុវត្តនយោបាយឈ្នះ-ឈ្នះ ដែលនាំមកនូវសន្តិភាពពសពេញផ្ទៃប្រទេស និងថ្មីៗនេះ គឺការសង្រ្គោះអាយុជីវិតប្រជាពលរដ្ឋ ចេញពីមាត់មច្ចុរាជកូវីដ-១៩ ដោយមិនមានការរើសអើង និងប្រកាន់និន្នាការនយោបាយ ណាមួយទ្បើយ ដែលផ្ទុយពីអ្នកនយោបាយ ជ្រុលនិយមមួយចំនួន តែងតែចិញ្ចឹមចិត្តរង់ចាំតែរកចន្លោះ ដើម្បីកេងចំណេញមហិច្ឆិតានយោបាយ របស់ខ្លួន ដោយមិនខ្វល់ពីសុខទុក្ខ និងការស្លាប់រស់ របស់ប្រជាពលរដ្ឋឡើយ៕SRP

ភ្នំពេញ៖លោកឧត្តមសេនីយ៍ត្រី ខាត់ សារ័ត្ន អនុប្រធាននាយកដ្ឋានច្រកទ្វារទី១ ត្រូវបានតែងតាំងមុខតំណែងទៅជានាយប៉ុស្តិ៍នគរបាលច្រកទ្វារព្រំដែនអន្តរជាតិបាវិត ការិយាល័យច្រកទ្វារព្រំដែនអន្តរជាតិ នាយកដ្ឋានច្រកទ្វារទី២ នៃអគ្គនាយកដ្ឋានអន្តោប្រវេសន៍ ជំនួសលោកវរសេនីយ៍ឯក ម៉ម យ៉យ ដែលត្រូវចូលនិវត្តន៍។​

នេះយោងបើតាមប្រកាសរបស់សម្ដេច

សម្តេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ពីថ្ងៃទី១៦ ខែកុម្ភៈ ឆ្នាំ២០២២៕SRP

ខេត្តកំពង់ចាម៖លោក​ អ៊ុន​ ចាន់ដា​ បាន​ណែនាំ​ដល់​សមាជិក​ សមាជិកា​គណបក្សប្រជាជន​ទាំងអស់​ ត្រូវ​បន្ត​ខិតខំ​កសាង​នូវ​អំពើ​ល្អ​ ក៏ដូចជា​ការបម្រើ​សេវា​រដ្ឋបាល​ និង​សេវា​ផ្សេងៗ​ ជូនប្រជាពលរដ្ឋ​ ជាពិសេស​ការ​ទប់ស្កាត់​ និងដោះស្រាយ​ ចំពោះ​ការ​ទន្ទ្រាន​កាន់កាប់​ដី​ បឹងបួ​នានា​ ដែល​ជា​ទ្រព្យ​សម្បត្តិ​របស់​រដ្ឋ​ផងដែរ។

លោក​​ អ៊ុន​ ចាន់ដា​ សមាជិកគណៈកម្មធិការកណ្ដាល និងជាប្រធានគណៈ​បក្សប្រជាជនកម្ពុជា​ខេត្តកំពង់ចាម​​ បានថ្លែងបែបនេះក្នុង​ពិធីសម្ពោធ​ដាក់​ឲ្យ​ប្រេីប្រាស់​ជា​ផ្លូវការ​នូវ​អគារ​ទីស្នាក់ការ​គណបក្សប្រជាជន​កម្ពុជា​ឃុំ​ស្វាយ​ពោធិ​ ស្រុកស្រីសន្ធរ​ នៅថ្ងៃទី​១៩​ ខែកុម្ភៈ​ ឆ្នាំ​២០២២​នេះ។

លោកបន្តថាដោយសារ​មាន​សុខសន្តិភាព​ទេីប​មាន​ការ​អភិវឌ្ឍន៍​ ដេីម្បី​ថែរក្សា​សុខសន្តិភាព​ឲ្យ​បាន​នៅ​គង់វង្ស​យូរអង្វែង​ យេីង​ត្រូវ​បន្ត​ធ្វើការ​អភិវឌ្ឍន៍​ ដេីម្បី​​ឲ្យមានការអភិវឌ្ឍន៍​កាន់តែ​រីកចម្រើន​នោះ គឺត្រូវ​បោះ​ឆ្នោត​ជូន​គណបក្សប្រជាជន​កម្ពុជា​។

ក្នុង​ឱកាសនោះ​ដែរ​ លោក​ អ៊ុន​ ចាន់ដា​ បាន​លើក​ឡើង​ថា​ កំណើត​រស់រាន​មាន​ជីវិត​​របស់​យើង​គឺមាន​៣​ ទី១-​កំណើត​ប្រសូត​ចេញ​ពី​ផ្ទៃ​អ្នក​ម្តាយ​ ។ ទី២-​កំណើត​រស់រាន​មាន​ជីវិត​តាម​រយៈ​ការ​ជួយសង្គ្រោះ​រំដោះប្រជា​ពលរដ្ឋ​យើង​ចេញពីការកាប់សម្លាប់ក្នុងរបបប៉ុលពត​ ។ និង​ទី៣-​ កំណេីត​រស់រាន​មាន​ជីវិត​តាម​រយៈ​ការ​ចាក់​វ៉ាក់សាំង​បង្ការ​ជំងឺ​កូវីដ​-១៩ ដែល​ជា​យុទ្ធសាស្ត្រ​កន្លឹះ​ របស់​សម្តេច​ហ៊ុន​ សែន​ ក្នុង​ការ​បញ្ជា​ទិញ​វ៉ាក់សាំង​សម្រាប់​ចាក់​ការពារ​អាយុជីវិត​ប្រជាពលរដ្ឋ​យើង​៕SRP

ខេត្តបាត់ដំបង៖សម្ដេច ស ខេង បានជំរុញឱ្យថ្នាក់ដឹកនាំ និងសមាជិកសមាជិការគណបក្សដែលស្ថិតក្នុងមុខតំណែងសាធារណៈផ្សេងៗនៅតាមមូលដ្ឋានខេត្តបាត់ដំបង សូមបន្តខិតខំបំពេញភារកិច្ចបំរើប្រជាពលរដ្ឋឱ្យបានល្អ រួមគ្នាដោះស្រាយ ភាពអសកម្មទាំងឡាយដែលប៉ះពាល់ដល់ប្រយោជន៍ជាតិ និងប្រជាជន ក្នុងនោះរាប់ទាំងការដោះស្រាយបញ្ហារំលោភដីព្រៃលិចទឹក ជាប់បឹងទន្លេសាប ចាប់ពីស្រុកមោងឬស្សី ស្រុកសង្កែរ ស្រុកឯកភ្នំ និងស្រុកថ្មគោល។ សម្ដេចបានណែនាំឱ្យផ្ដល់ព័ត៌មាន ជូនសម្ដេចអំពីបញ្ហានេះ ដើម្បីចូលរួមចំណែកជំរុញការដោះស្រាយ ទៅតាមយន្តការដែលអាចធ្វើទៅបាន។

សម្តេចស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបាត់ដំបង និងខេត្តព្រៃវែង មានប្រសាសន៍យ៉ាងដូច្នេះ នៅថ្ងៃសៅរ៍ ទី១៩ ខែកុម្ភៈ ឆ្នាំ២០២២នេះ ក្នុងឱកាសបានអញ្ជើញជាអធិបតីក្នុងសន្និបាតបូកសរុបសកម្មភាពការងារប្រចាំឆ្នាំ២០២១ និងលទ្ធផលអនុវត្តផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ និងលើកទិសដៅអនុវត្តឆ្នាំ២០២២ របស់គណៈកម្មាធិការគណបក្សប្រជាជនកម្ពុជា ខេត្តបាត់ដំបង។

សម្ដេចស ខេង ក៏បានសម្ដែងការកោតសរសើរ និងថ្លែងអំណរគុណចំពោះថ្នាក់ដឹកនាំនិងសមាជិក សមាជិការគណបក្សគ្រប់ជាន់ថ្នាក់ និងគ្រប់ផ្នែក ដែលបានខិតខំជំរុញការបំពេញភារកិច្ចបំរើជាតិ និងប្រជាជននៅតាមមូលដ្ឋាន ព្រមទាំងការបំពេញភារកិច្ចសំខាន់ៗជាច្រើនទៀតជូនគណបក្ស ក្នុងដំណើរឈានឆ្ពោះទៅកាន់ការបោះឆ្នោតជ្រើសរើសសមាជិកក្រុមប្រឹក្សាឃុំ សង្កាត់អាណត្តិទី៥ ដែលនឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២នេះ។

សម្ដេចក៏បានផ្ដល់អនុសាសន៍ជំរុញការដោះស្រាយទំនាស់ដីធ្លី ប្រកបដោយតម្លាភាព និងយុត្តធម៌ផងដែរ៕SRP

ខេត្តត្បូងឃ្មុំ៖អភិបាលខេត្តលោក ជាម ច័ន្ទសោភ័ណ បានស្នើដល់មន្ទីរអង្គភាពជំនាញ អាជ្ញាធរមូលដ្ឋាន រួមជាមួយប្រជាពលរដ្ឋ ត្រូវរួមគ្នាអភិរក្សថែរក្សា វប្បធម៌ ប្រពៃណី ជំនឿ ឲ្យ​បានគង់វង្ស និងលើកស្ទួយតម្លៃកេរ្តិ៍តំណែល បុព្វបុរស បានបន្សល់ទុក ឱ្យនៅលើទឹកដីប្រវត្តិសាស្រ្តនៃយើង​។ តួយ៉ាងដូចជាទីតាំងកស្សិនទឹកបឹងប្រាក់ និងរមណីយដ្ឋានប្រវត្តិសាស្រ្ត ហ្លួងព្រះស្តេចកននេះ ដើម្បីបង្ហាញដល់ភ្ញៀវជាតិ អន្តជាតិថា ខ្មែរមានជំនឿ វប្បធម៌ ប្រពៃណីតាំងពីយូរយាណាស់មកហើយ និងអាចបង្កើតអោយមានជាការប្រណាំងទូក(ទូកត្នោត) សម្រាប់រដ្ឋបាលខេត្ត ក្នុងឱកាសពិធីបុណ្យអុំទូក ដែលជាបុណ្យជាតិផងដែរ។

លោកបញ្ជាក់បែបនេះក្នុងឱកាសចុះពិនិត្យតំបន់បូជនីយដ្ឋាន ប្រវត្តិសាស្ត្រ ហ្លួងព្រះស្តេចកន និងនាំយកអំណោយសម្តេចតេជោ ចែកជូនពលរដ្ឋ ២០០គ្រួសារ នៅថ្ងៃទី១៨ ខែកុម្ភៈ ឆ្នាំ២០២២នេះ ម្សិលមិញ។

ថ្លែងក្នុងពិធីសំណេះសំណាល ទៅកាន់លោកតាលោកយាយ ប្រជាពលរដ្ឋ នៅក្នុងបរិវេណវត្តព្រៃអង្គរក្នុង ឃុំដូនតី ស្រុកពញាក្រែក លោក ជាម ច័ន្ទសោភ័ណ បានបញ្ជាក់ថា ការចែកអំណោយនាពេលនេះ ដើម្បីឆ្លើយតបតាមតម្រូវការចាំបាច់របស់បងប្អូន ជាពិសេសតបតាមការអំពាវនាវ របស់សម្ដេចហ៊ុន សែន ដែលបានឱ្យអាជ្ញាធរ ត្រូវយកចិត្តទុកដាក់ ចំពោះសុខទុក្ខ ជនងាយរងគ្រោះ ដែលរងផលប៉ះពាល់ក្នុងពេលមានការឆ្លងរាតត្បាត ជំងឺកូវីដ ដើម្បីរក្សាសុខុមាលភាពសង្គម និងសុខសុវត្ថិភាព នៅក្នុងសហគមន៏ផងដែរ៕SRP

ខេត្តសៀមរាប៖ស្នងការនគរបាលខេត្តសៀមរាបនៅថ្ងៃទី ១៨ ខែកុម្ភៈឆ្នាំ ២០២២ នេះ បានបព្ជាក់ថា មិនមានល្បែងស៊ីសងជល់មាន់ដូចសារព័ត៌មានចុះផ្សាយនោះទេ។

ការបញ្ជាក់នេះ ធ្វើឡើងក្នុងសេចក្ដីបំភ្លឺមួយក្រោយសារព័ត៌មាន ឦសាន ប៉ុស្តិ៍ បានចុះផ្សាយថា រោងការរិះគន់ថាទីតាំងជល់មាន់របស់ លោកវ៉ាន់ បើកដំណើរការយ៉ាងមានសុវត្ថិភាពព្រោះអាជ្ញាធរនិងសមត្ថកិច្ចមិនហ៊ានបង្ក្រាប៕SRP

ខេត្តសៀមរាប៖យ៉ាងហោចណាស់មនុស្សចំនួន ៣ នាក់បានរងរបួសធ្ងន់ស្រាលក្នុងហេតុការណ៍គ្រោះថ្នាក់ចរាចរណ៍រវាងរថយន្តចំនួន ៣ គ្រឿងដែលបានបុកបន្តគ្នា។

ហេតុការណ៍បានកើតឡើងនៅថ្ងៃទី ១៦ ខែកុម្ភ: ឆ្នាំ២០២២ វេលាម៉ោង ០៤និង៤០នាទី​ ស្ថិតនៅ​ភូមិក្រឡាញ់ ឃុំ​ក្រឡាញ់​ ស្រុកក្រឡាញ់ ខេត្តសៀមរាប លើផ្លូវលេខ​ ៦ ត្រង់​ចំណុចចន្លោះគីឡូម៉ែត្រលេខ 36៤និង 36៥ រវាងរថយន្តក្រុងបុក ជាមួយរថយន្តធុនធំដឹកស៊ីម៉ង់ និងរថយន្តធុនតូច។

សមត្ថកិច្ចបានឲ្យដឹងថា៖រថយន្តក្រុងដឹកអ្នកដំណើរមួយគ្រឿងម៉ាក MITSUBISHI ពាក់ផ្លាកលេខ ភ្នំពេញ 3B.9886 ពណ៌បៃតង បើកបរដោយឈ្មោះ (មិនស្គាល់អត្ដសញ្ញាណ ) ក្នុងទិសដៅពីកើតទៅលិច បានរ៉េចង្កូតឆ្វេងដៃ បានបុករថយន្តធំមួយគ្រឿងដឹកស៊ីម៉ង់ម៉ាក NISSAN UD ពាក់ស្លាកលេខ ស្វាយរៀង 3A.0625 ចំពីមុខបើកបរដោយឈ្មោះ (មិនស្គាល់អត្តសញ្ញាណ ) ក្នុងទិសដៅពីលិចទៅកើត។

ក្រោយពេលកើតហេតុរួចកម្លាំងផ្នែកចរាចរណ៍ស្រុកក្រឡាញ់ បានចុះសម្រួលចរាចរណ៍ការពារកុំឲ្យមានគ្រោះថ្នាក់បន្ថែមទៀត ស្រាប់តែមានរថយន្តមួយគ្រឿងទៀតម៉ាក HYUNDAI MIGHTY ពណ៌ខៀវ ពាក់ផ្លាកលេខ ភ្នំពេញ 3C.6797 បើកដោយឈ្មោះ ឈី សុខ ភេទប្រុស អាយុ ៤៩ឆ្នាំ រស់នៅភូមិវត្តរំដួល សង្កាត់ចំការសំរោង ក្រុង/ខេត្តបាត់ដំបង មានអ្នករួមដំណើរ៣នាក់ទៀតមួយឈ្មោះ រស់ ម៉ារិទ្ធិ ភេទ ស្រី អាយុ៣០ ឆ្នាំនិងប្តីឈ្មោះ ហឿ ធារ៉ា ភេទស្រី អាយុ៤០ឆ្នាំ និងកូនក្មេងប្រុសតូចមួយទៀតមិនស្គាល់ឈ្មោះ រស់នៅភូមិ ពពាលខែ ឃុំជ្រៃ ស្រុកថ្មគោល ខេត្តបាត់ដំបង បើកមកពីទិសខាងលិចយ៉ាងលឿនឃើញបែបនោះមន្ត្រីចរាចរណ៍យើងបានធ្វើសញ្ញាឲ្យបន្ថយល្បឿន តែមិនព្រមបន្ថយល្បឿន ទើបមន្ត្រីចរាចរណ៍យើងបានលោតគេចចេញ ហើយរថយន្តខាងលើនោះក៏បានបើកមកបុកគូទរថយន្តដឹកស៊ីម៉ងត៍ពីក្រោយបន្ថែមទៀត។

ក្នុងហេតុការណ៍គ្រោះថ្នាក់ចរាចរណ៍នេះបណ្ដាលអោយគ្រោះថ្នាក់ និងខូចខាត
១. ឈ្មោះ រស់ ម៉ារិទ្ធិ (បាក់ជើងទាំងពីរ)
២. ឈ្មោះ ហឿ ធារ៉ា (របួសស្រាល)។
ខូចខាតរថយន្តធ្ងន់២គ្រឿង និងរថយន្តស្រាល១គ្រឿង។

មូលហេតុ​គ្រោះ​ថ្នាក់​ចរាចរណ៍​បណ្តាល​
មក​ពី​អ្នកបើកបររថយន្តក្រុង និងរថយន្ត. HYUNDIA បេីកបរក្នុងល្បឿនលឿន និងមិនប្រកាន់ស្ដាំ។

ករណីនេះកម្លាំងជំនាញបានពិនិត្យ វាស់វែង បញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យបង្អែក។ ចំណែកវត្ថុតាងទាំងបីគ្រឿង រក្សាទុកនៅអធិការនគរបាលស្រុក ដើម្បីចាត់ការតាមនីតិវិធីច្បាប់បន្ត៕SRP

ខេត្តសៀមរាប៖អាជ្ញាធរខេត្តសៀមរាប បានអះអាងថាខ្លួននឹងលុបបំបាត់អ្នកសុំទានជនអនាថា ដែលតែងតែត្រាច់ចរនៅតាមដងផ្លូវនាៗ។

ការអះអាងនេះធ្វើឡើងក្នុងកិច្ចប្រជុំ រកដោះស្រាយ បញ្ហាជនអាណាថា អ្នកសុំទាន និងជនមានវិប្បល្លាសស្មារតី ខេត្តសៀមរាប នៅថ្ងៃទី១៧ ខែកុម្ភៈ ម្សិលមិញ។

លោក នាក់ ណេរ៉ុន អភិបាលរងខេត្ត និងជាប្រធានអនុគណៈកម្មាធិការ ដែលបានដឹកនាំកិច្ចប្រជុំ បានបញ្ជាក់ថា កិច្ចប្រជុំនាពេលនេះ គឺដើម្បីជជែកពិភាក្សារៀបចំទិន្នន័យច្បាស់លាស់ និងរៀបចំយន្តការដោះស្រាយ ប្រកបដោយនិរន្តរភាព សំដៅឈានទៅលុបបំបាត់បញ្ហាអ្នកសុំទាន ជនអាថា ដែលតែងតែត្រាច់ចរនៅតាមដងផ្លូវនានា ក្នុងក្រុងសៀមរាប នាំឱ្យមានភាពរញ៉េរញ៉ៃបាត់បង់សណ្តាប់ធ្នាប់ ក្នុងក្រុង ពិសេសសំដៅរួមចំណែក ជាមួយរាជរដ្ឋាភិបាលក្នុងការអភិវឌ្ឍក្រុងសៀមរាប ដែលជាទីក្រុងទេសចរណ៍ ស្របជាមួយនឹងសមិទ្ឋផលផ្លូវទាំង៣៨ខ្សែ នឹងដើម្បីលើកស្ទួយកិត្តិយសខេត្តផងដែរ។

លោក នាក់ ណេរ៉ុន បានបញ្ជាក់ទៀយថា ជនអាណាថានិង អ្នកសុំទាន ជាបញ្ហាកើតមានយូរណាស់មកហើយ ហើយមើលទៅអាចថាជារឿងធម្មតា តែវាប្រៀបដូចជាជំងឺមហារីក ដែលគេមិនដឹងពីមូលដ្ឋាន នៃការកើតឡើងនោះទេ ហើយបើគ្មានយន្តការនិងដំណោះស្រាយទេវានឹងចេះតែរីកធំឡើងៗ នាំឱ្យហួសពេល និងពិបាកក្នុងការដោះស្រាយ នាពេលខាងមុខដូច្នេះសូមសមាជិក ក្រុមការងារទាំងអស់ ត្រូវធ្វើការស្រង់ទិន្នន័យ ដើម្បីកំណត់ និង ញែកឱ្យដាច់លក្ខណៈ នៃជនមានវិប្បល្លាសស្មារតី ឱ្យបានជាក់ច្បាស់ អំពីស្ថានភាពវិប្បល្លាសបុគ្គល ចំពោះអ្នកសុំទាន ហើយជនអាណាថា ក៏អាជ្ញាធរមូលដ្ឋានក្រុងស្រុក ត្រូវពិនិត្យពីភាពអត្តសញ្ញានៃក្រីក្ររបស់់ពួកគាត់ និងទាញគាត់ទៅក្នុងកម្មវិធីនៃគម្រោងនានាដែលកំពុងដំណើរការ៕SRP

ខេត្តសៀមរាប៖ម៉ូតូចំនួន២គ្រឿងបានបុកគ្នា ហើយខ្ទាតមនុស្សចូលក្រោមរថយន្ត ហើយរថយន្តជាន់ស្លាប់ភ្លាមៗ។ ហេតុការណ៍បានកើតឡើងនៅម៉ោង១៧និង៤០ ថ្ងៃទី១៧ខែកុម្ភៈឆ្នាំ២០២២ តាមផ្លូវជាតិលេខ៦៤ ស្ថិតក្នុងភូមិបត់ង្កោ ឃុំសំរោង ស្រុកសូទ្រនិគម ខេត្តសៀមរាប។

សមត្ថកិច្ចខេត្តសៀមរាបបានឲ្យដឹងថាគ្រោះថ្នាក់ចរាចរណ៍នេះ បង្កឡើងរវាងម៉ូតូម៉ាកហុងដាពណ៌ខ្មៅ ពាក់ស្លាកលេខសៀមរាប1G-4192 បានបុកប៉ះ ម៉ូតូZOOMER X ពណ៌ក្រហម ពាក់ស្លាកលេខសៀមរាប 1AB-8820 ហើយបានខ្ទាតមនុស្សចូល រថយន្ត ម៉ាកFUSO ពណ៌បៃតង ពាក់ស្លាកលេខ ភ្នំពេញ3E-6519  បណ្ដាលឲ្យស្លាប់ម្នាក់និងរបួសធ្ងន់ម្នាក់។

សមត្ថកិច្ចបានបន្តថាករណីនេះមូលហេតុម៉ូតូបើកបរល្បឿនលឿន វ៉ាជែងខ្វះការប្រុងប្រយ័ត្នបណ្ដាលឲ្យបុកគ្នាហើយខ្ទាតមនុស្សចូលក្រោមរថយន្តតែម្ដង។ ក្រោយកើតហេតុសមត្ថកិច្ចចរាចណ៍បានចុះធ្វើការវាស់វែងនិងយកវត្ថុតាងទៅរក្សាទុកដើម្បីដោះស្រាយតាមនីតិវិធី៕SRP

ភ្នំពេញ៖រាជរដ្ឋាភិបាលកម្ពុជាបានចេញសរាចរ ស្ដីពីការពង្រឹងការអនុវត្តវិធានការប្រយុទ្ធ និងទប់ស្កាត់ការឆ្លងរាលដាល ក្នុងសហគមន៍នៃមេរោគកូវីដ-១៩ ពិសេសមេរោគបំប្លែងថ្មីប្រភេទ “អូមីក្រុង” ។ សរាចរនេះធ្វើឡើងនៅថ្ងៃទី១៧ ខែកុម្ភៈ ឆ្នាំ២០២២ ចុះហត្ថលេខាដោយ សម្ដេចតេជោ ហ៊ុន សែន នាយករដ្ឋមន្ត្រី៕SRP