ខេត្តបាត់ដំបង៖លោកសុខ លូ អភិបាលខេត្តបាត់ដំបងនៅថ្ងៃពុធ ម្សិលមិញ បានអញ្ជើញដឹកនាំក្រុមការងារជំនាញ ចុះពិនិត្យការរអិលដីបាក់ស្រុតច្រាំងស្ទឹងសង្កែ ស្ថិតនៅភូមិស្ដីលើ ឃុំព្រែកហ្លួង ស្រុកឯកភ្នំ ខេត្តបាត់ដំបង ដែលរងការខូចខាតមានប្រវែងប្រមាណ ២០០ម៉ែត្រ ដែលបង្កឡើងដោយគ្រោះធម្មជាតិភ្លៀងធ្លាក់ច្រើនបណ្ដាលឱ្យទឹកហូរបុកច្រោះទីតាំងខាងលើនេះ។

ឆ្លៀតក្នុងឱកាសនោះ លោក សុខ លូ បានមានប្រសាសន៍ណែនាំដល់មន្រ្តីជំនាញឱ្យធ្វើការជួសជុលផ្លូវ ដោយកំណត់ឲ្យក្រុមហ៊ុន​ទទួលខុសត្រូវការងារសាងសង់ ត្រូវបុកគ្រឹះនៅទីតាំងដែលកំពុងបាក់ស្រុតខ្លាំងដើម្បីទប់ស្កាត់ការបាក់បន្តទៀតដើម្បីជួយសម្រួលឱ្យបានប្រើប្រាស់ ជាបណ្តោះអាសន្នសិន និង ដើម្បីធ្វើការទប់ស្កាត់ ពីការរអិលបាក់ដីច្រាំងស្ទឹងបន្តកើតមាននៅកន្លែងនេះបន្ថែមទៀត ដែល វាអាចបង្កកាន់តែធ្ងន់ធ្ងរ។

លោកក៏បានជម្រុញដល់រដ្ឋបាលស្រុកឯកភ្នំ មេឃុំនៅទីនោះ ត្រូវដាក់ស្លាកសញ្ញាប្រុងប្រយ័ត្ន ពីការធ្វើដំណើរនិងបើកបរយានជំនិះគ្រប់ប្រភេទ ឲ្យគេបានដឹង និងប្រុងប្រយ័ត្នខ្ពស់ នៅទីនេះ ចៀសវាងការគ្រោះថ្នាក់កើតឡើងជាយថាហេតុ និងបានណែនាំដល់ អភិបាលស្រុកឯកភ្នំត្រូវហាមប្រាមឡានដឹកទំនិញធុនធំដាច់ខាតដោយមិនឲ្យបើកបរឆ្លងកាត់ដឹកកសិផល លើផ្លូវនេះទៀតទេ។ ជាមួយគ្នានេះក៏ត្រូវមានវិធានការរដ្ឋបាល និងត្រូវហាមឃាត់មិនឲ្យមានការសាងសង់សំណង់ឬលំនៅដ្ឋានថ្មីៗខុសច្បាប់ នៅតាមមាត់ស្ទឹងដែលកំពុងកើតមាននៅក្នុងដែនសមត្ថកិច្ចដែលខ្លួនទទួលខុសត្រូវ ៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានថ្លែងថា បានធ្វើការណែនាំដល់រដ្ឋបាលក្រុងពិនិត្យមើល ដោះស្រាយសំណង់អាណាធិបតេយ្យ ដែលមាននៅក្នុងក្រុងបាត់ដំបង ដើម្បីធ្វើការរៀបចំប្រជាពលរដ្ឋ ដែលរស់នៅសំណង់ អាណាធិបតេយ្យទៅកន្លែងផ្សេង ដែលមានការរៀបចំជូនពួកគាត់ ឱ្យមានរបៀបរៀបរយ បើពុំដូចនោះទេ ក្រុងបាត់ដំបង នឹងក្លាយជាទីក្រុងសំបូរទៅសំណង់ អាណាធិបតេយ្យ បង្កភាពរញ៉េរញ៉ៃគ្មានសណ្ដាប់ធ្នាប់ពេញទីក្រុង។

លោកសុខ លូ ថ្លែងបែបនេះក្នុងឱកាសអញ្ជើញ ដឹកនាំកិច្ចប្រជុំផ្សព្វផ្សាយនិងណែនាំអំពីការរៀបចំសោភ័ណភាព សណ្តាប់ធ្នាប់ ការរៀបចំសំយ៉ាបផ្ទះ ចំណតរថយន្ត ក្នងក្រុងបាត់ដំបងនៅរសៀលថ្ងៃពុធ ម្សិលមិញ។

លោក សុខ លូ ក៏បានមានប្រសាសន៍លើកឡើងអំពីការរៀបចំសណ្ដាប់ធ្នាប់ ការរៀបចំសំយ៉ាបផ្ទះ និងចំណតរថយន្ត ថាគោលបំណង នៃកិច្ចប្រជុំផ្សព្វផ្សាយនេះ គឺដើម្បីផ្សព្វផ្សាយជូនប្រជាពលរដ្ឋ ឱ្យមានការយល់ដឹងជាមុនសិន អំពីការរៀបចំសោភ័ណភាព សណ្ដាប់ធ្នាប់ ការរៀបចំសំយ៉ាបផ្ទះ មុននឹងឱ្យប្រជាពលរដ្ឋ ចូលរួមជាមួយរដ្ឋបាលខេត្តបាត់ដំបង ក្នុងការចូលរួមរៀបចំសំយ៉ាបផ្ទះ ទៅតាមប្លង់គំរូរបស់រដ្ឋបាលខេត្ត ពិសេសផ្ទះប្រជាពលរដ្ឋ តំបន់អភិរក្សផ្ទះបុរាណ ក្នុងគោលបំណងតែមួយគត់គឺដើម្បីទាក់ទាញ ផលប្រយោជន៍មកនូវ ភ្ញៀវទេសចរមកទស្សនាកំសាន្ត បង្កើនចំណូលប្រជាពលរដ្ឋ។

លោកបានក៏បានធ្វើការណែនាំបន្តដល់រដ្ឋបាលក្រុង ក្នុងការរៀបចំមន្រ្ដីជំនាញ ដែលយល់ដឹងច្បាស់ ធ្វើការផ្សព្វផ្សាយជូនប្រជាពលរដ្ឋ តាមរយៈការធ្វើសិក្ខាសាលាផ្សព្វផ្សាយ ផ្សព្វផ្សាយ តាមខ្នងផ្ទះ អំពីគោលបំណងនៃការរៀបចំសណ្ដប់ធ្នាប់ និងសំយ៉ាបផ្ទះនេះ ដើម្បីឱ្យគាត់ចូលរួមទាំងអស់គ្នា ហើយយើងធ្វើគឺស្មើភាពគ្នា ដោយមិនត្រូវលើកលែងផ្ទះណាមួយ គឺត្រូវធ្វើឱ្យស្មើភាពគ្នា តាមស្ដង់ដារដែលបានកំណត់ទាំងអស់គ្នា។

លោកបានបន្តទៀតថា នៅថ្ងៃអនាគត រដ្ឋបាលខេត្តនឹងបន្តសាងសង់ និងជួសជុលក្រាលកៅស៊ូបន្ថែមទៀត ប៉ុន្តែត្រូវរង់ចាំដំណើរការសាងសង់ លូរំដោះទឹកកខ្វក់ ដែលជាគម្រោងរបស់ADB ឱ្យហើយរួចរាល់សិន ទើបយើងអាចបន្តការសាងសង់ ជួសជុលការក្រាលកៅស៊ូ ជាបន្តបន្ទាប់ ព្រោះបើមិនដូច្នេះទេ កាលណាដែលយើងជួសជុលរួចហើយ ហើយចាប់ផ្ដើមធ្វើលូ តាមក្រោយទៀត វាធ្វើឱ្យកាន់តែខាតពេលវេលា និងថវិកា កាន់តែច្រើន។ លោកក៏សំណូមពរដល់ប្រជាពលរដ្ឋ ឱ្យមានការអត់ធ្មត់ដោយស៊ូអត់ធ្មត់ ហើយបានសមិទ្ធផលថ្មី ចំណាយពេលតែមួយដង ក៏គ្រាន់បើជាងចំណាយពេល ដល់ទៅ២ដង៕SRP

ខេត្តត្បូងឃ្មុំ​៖សាលាខេត្តត្បូងឃ្មុំ​ នៅថ្ងៃទី១៣ ខែកក្កដា ឆ្នាំ២០២២នេះ​ បាន​បេីក​កិច្ចប្រជុំពិគ្រោះយោបល់ ស្ដីពីនីតិវិធីនៃការផ្តល់ទិដ្ឋាការសម្រាប់ការផ្លាស់ប្ដូរស្ថានភាព រដ្ឋបាល និងគ្រួសារ របស់មន្ត្រីរាជការស៊ីវិលនៅថ្នាក់ក្រោមជាតិ​ ក្រោម​វត្តមាន​ លោក ថោ សេដ្ឋាណា រដ្ឋលេខាធិការក្រសួងមុខងារសាធារណៈ និងលោក ពាង ណារិទ្ធ អភិបាលរងខេត្ត​ត្បូងឃ្មុំ​។

ថ្លែងក្នុង​កិច្ច​ប្រជុំ​នោះ​ ថោ សេដ្ឋាណា បានលើកឡើងថា បន្ទាប់ពីការធ្វើបទបង្ហាញ សេចក្ដីព្រាងសេចក្ដីណែនាំទាំងនេះ គឺបានផ្តល់នូវធាតុចូល ក្នុងការអនុវត្ត និង ដើម្បីរៀបចំបំពេញបន្ថែម ចំពោះនីតិវិធីទាំងនេះ នូវប្រព័ន្ធគ្រប់គ្រងទិន្នន័យមន្ត្រីរាជការ ថ្មីជាប្រព័ន្ធមានលក្ខណៈអនឡាញ ដែលគាំទ្រដល់ការគ្រប់គ្រងមន្ត្រីរាជការនៅទូទាំងប្រទេស ដើម្បីលើកកម្ពស់ប្រសិទ្ធភាព និងស័ក្ថិសិទ្ធភាពនៃការបំពេញការងាររបស់មន្ត្រីរាជការ ពង្រឹងសមត្ថភាពស្ថាប័នក្នុងរដ្ឋបាលសាធារណៈ និងជួយគាំទ្រការរៀបចំកម្មវិធីជាតិនានាក្នុងវិស័យសាធារណៈ ដើម្បីប្រើប្រាស់បច្ចេកវិទ្យាថ្មី និងមជ្ឈមណ្ឌលទិន្នន័យថ្មីដែលលក្ខណៈស្តង់ដារ និងបានបញ្ចប់នូវម៉ូឌុលសំខាន់ៗចំនួនពីរ ការគ្រប់គ្រងទិន្នន័យសលាកប័ត្រព័ត៌មានមន្ត្រីរាជការ និងតារាងទូទាត់បៀវត្ស។

លោក រដ្ឋលេខាធិការ បន្តថា ក្រសួង ស្ថាប័នថ្នាក់ជាតិ និងថ្នាក់ក្រោមជាតិ ប្រើប្រាស់ប្រព័ន្ធគ្រប់គ្រងទិន្នន័យមន្ត្រីរាជការ ដើម្បីគ្រប់គ្រងមន្ត្រីរាជការ ចាប់តាំងពីការជ្រើសរើសមន្ត្រីរាជការ ការវិវត្តអាជីពរបស់មន្ត្រីរាជការ រួមមានការតែងតាំង ការវាយតម្លៃ ការអនុវត្តការងារ ការពង្រាយមន្ត្រី ការពិពណ៌នាមុខតំណែង ការបណ្តុះបណ្តាល ការវិភាគមុខងារ និងការរៀបចំបៀវត្សនិងប្រាក់ឧបត្ថម្ភផ្សេងៗ រហូតដល់ការចូលនិវត្តន៍។

លោក ថោ សេដ្ឋាណា បានបញ្ជាក់ទៀតថា ការប្រើប្រាស់ប្រព័ន្ធគ្រប់គ្រងទិន្នន័យ នេះ បានផ្តល់ភាពច្បាស់លាស់ ភាពងាយស្រួលក្នុងការរៀបចំរបាយការណ៌ និងស្ថិតិមន្ត្រីរាជការ អាចទាញទិន្នន័យមន្ត្រីរាជការ ស្ថិតិ និងរបាយការណ៍ផ្សេងៗ របស់សាមីក្រសួង- ស្ថាប័ន មកប្រើប្រាស់បានគ្រប់ពេលវេលាជាពិសេសមន្រ្តីរាជការអាចពិនិត្យព័ត៌មានផ្ទាល់ខ្លួនតាមរយៈ Mobile App និងអាចធ្វើបច្ចុប្បន្នភាពព័ត៌មានមួយចំនួនរបស់ខ្លួនបាន ប្រកបដោយប្រសិទ្ធភាព​ផងដែរ​៕SRP

ខេត្តសៀមរាប៖ថ្លែងក្នុងឱកាសពិធីដាំកូនឈើហូបផ្លែចំនួន​ ៨០០ដេីម នៅមជ្ឈមណ្ឌល​សិក្សាស្រាវជ្រាវ​ និងអភិរក្ស​កេសរកូល​ សុខ​ អាន​ ភ្នំ​គូលែនដើម្បីអបអរសាទរ​ទិវាជីវៈចម្រុះអន្តរជាតិ ឆ្នាំ២០២២ នៅរសៀល​ថ្ងៃ​អង្គារ​ ម្សិលមិញ លោក
សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាជាតិអភិវឌ្ឍន៍ដោយចីរភាព បានមានប្រសាសន៍ថា៖ ឧទ្យានជាតិព្រះជ័យវរ្ម័ន-នរោត្តម​ “ភ្នំគូលែន” មិនត្រឹមតែជាតំបន់ដែលមានជីវៈចម្រុះគ្រប់ប្រភេទនោះទេ ថែមទាំងជាទឹកដីពោរពេញដោយសម្បត្តិវប្បធម៌ អរិយធម៌ពីបុរាណផងដែរ។ ដូច្នេះ យើង នឹងធ្វើឱ្យឧទ្យានជាតិ មួយនេះឱ្យក្លាយជាតំបន់ទេសចរណ៍ផ្សារភ្ជាប់នឹងទឹកដី ដោយធ្វើយ៉ាងណាបង្កើននូវចំណូលជូនប្រជាសហគមន៍ តាមរយៈអេកូទេសចរណ៍ ការចិញ្ចឹមសត្វ ដាំដំណាំកសិកម្ម​ និងការកសាងសេដ្ឋកិច្ចមូលដ្ឋាន គឺពិតជាមានសារៈសំខាន់ណាស់ ក្នុងកិច្ចការពារអភិរក្សធនធានធម្មជាតិ ពីព្រោះថា កាលណាជីវភាពក្នុងសហគមន៍រីកចម្រើន ពួកគាត់មានការងារធ្វើ​ មានប្រាក់ចំណូល នោះពួកគាត់ក៏លែងចូលព្រៃកាប់ឈើ ទន្ទ្រានដី ឬបរបាញ់សត្វទៀតដែរ។

លោក សាយ សំអាល់ ថា៖ជាក់ស្តែងនៅក្នុងឧទ្យានជាតិព្រះជ័យវរ្ម័ន-នរោត្តម​ “ភ្នំគូលែន” យើងបានបង្កើតស្ថានីយបន្សុទ្ធពូជជ្រូកកណ្តុរ សម្រាប់ចែកជូនដល់សហគមន៍ផ្សេងៗ ក្រៅពីទទួលប្រាក់ចំណូល​ ពីអនុផលព្រៃឈើ និងបានជំរុញឱ្យពួកគាត់ចិញ្ចឹមសត្វ ដាំដំណាំបន្លែបង្ការផ្សេងៗរួមផ្សំ​ ដើម្បីបង្កើនប្រាក់ចំណូល និងធានាបាននូវសន្តិសុខស្បៀងសម្រាប់សហគមន៍ ក៏ដូចជាតំបន់ការពារធម្មជាតិដែលពួកគាត់រស់នៅផងដែរ។

រដ្ឋមន្ត្រីបរិស្ថាន បានបន្ថែមថា​៖ ការដើរកម្សាន្ត របស់ភ្ញៀវទេសចរគ្រប់ទីកន្លែងក្នុងប្រទេស ក៏ដូចជា​ ការអភិវឌ្ឍសព្វបែបយ៉ាងដូចពេលបច្ចុប្បន្ននេះ គឺបានមកពីកត្តាសុខសន្តិភាព ស្ថេរភាពនយោបាយ ដែលសម្តេចតេជោ ហ៊ុន សែន នាយករដ្ឋមន្ត្រី រកបានមកដោយកម្រ​ ហេតុនេះក្នុងនាមយើងជាមន្ត្រីរាជការស៊ីវិល និងអ្នកជំនាន់ក្រោយទាំងអស់​ ត្រូវតែថែរក្សាសុខសន្តិភាព ដែលយើងកំពុងមាននេះ បន្តទៅមុខទៀត ដើម្បីបន្តការអភិវឌ្ឍ រីកចម្រើននៃប្រទេសជាតិយើង៕SRP

ខេត្តត្បូងឃ្មុំ​៖លោក ជាម ច័ន្ទសោភ័ណ អភិបាលខេត្តត្បូងឃ្មុំ បាន​អំពាវនាវ​ ដល់​ សិស្សានុសិស្ស ជាយុវជនគំរូនិងជាជនបង្គោល ឲ្យចូលរួមដំណើរការ អនុវត្តយុទ្ធនាការប្រយុទ្ធប្រឆាំង គ្រឿងញៀនខុសច្បាប់ តាមរយ:ការថែទាំខ្លួនឱ្យស្អាតស្អំ មិនប៉ះពាល់ជាមួយនឹងគ្រឿងញៀន និងជួយអប់រំណែនាំមិត្តភក្តិ និងគ្រួសារចៀសឱ្យឆ្ងាយពី គ្រឿងញៀនខុសច្បាប់គ្រប់ប្រភេទ​។

ការ​ស្នេីឡេីង​បែប​នេះ​ ក្នុង​ឱកាស​ប្រារព្ធ​​ទិវាអន្តរជាតិប្រយុទ្ធប្រឆាំងគ្រឿងញៀន ក្រោមប្រធានបទ «ដោះស្រាយបញ្ហាគ្រឿងញៀនក្នុងវិបត្តិសុខភាព និងមនុស្សធម៌»​ នៅថ្ងៃទី​១២​ ម្សិលមិញ។

លោក ជាម ច័ន្ទសោភ័ណ ក៏បាន​ស្នេីដល់​កងកម្លាំងប្រដាប់អាវុធគ្រប់ប្រភេទ អាជ្ញាធរមូលដ្ឋាន និងអ្នកពាក់ព័ន្ធទាំងអស់ ត្រូវតឹងរឹងបំផុតជៀសវាង ឲ្យបានជាដាច់ខាត់គឺ កុំពាក់ព័ន្ធ កុំនៅពីក្រោយ កុំបន្ធូរបន្ថយ និងកុំអន្តរាគមន៍ ក្នុងករណីបទល្មើស គ្រឿងញៀន ពិសេស​ គឺ​ត្រូវបង្ការបង្រ្កាបរាល់បទល្មើស គ្រប់ប្រភេទ ពិសេសបទល្មើសគ្រឿងញៀន អោយមានប្រសិទ្ធភាព​បំផុត​។

លោក ជាម ច័ន្ទសោភ័ណ ក៏បានជំរុញដល់អាជ្ញាធរសមត្ថកិច្ច ដែលពាក់ព័ន្ធ ត្រូវបន្តធ្វើសកម្មភាព ផ្សព្វផ្សាយ អប់រំឲ្យកាន់តែល្អប្រសើរ សកម្ម និងផុលផុសថែមទៀត ដោយបន្តពង្រឹង និងពង្រីកកិច្ចសហការ និងចលនាឲ្យ មានការចូលរួម និងគាំទ្រពីគ្រប់សមាសភាព នៃសង្គម សំដៅធ្វើយ៉ាងណា ឲ្យគ្រប់ក្រុមគោលដៅទាំងអស់ បានទទួលការ ផ្សព្វផ្សាយអប់រំ និងយល់ដឹងកាន់តែច្បាស់ អំពីច្បាប់ និងផលប៉ះពាល់ពាក់ព័ន្ធនឹងគ្រឿងញៀន។​

គួរ​បញ្ជាក់​ថា​ ក្នុង​ពិធី​នេះក៏មានការដុតបំផ្លាញ​ចោល​នូវគ្រឿងញៀន ដែលទទួលបានពីសាលាដំបូង និងអយ្យការអមសាលាដំបូងខេត្តចំនួន៣ ដែលបង្ក្រាបបានក្នុងដែនសមត្ថកិច្ចខេត្តត្បូងឃ្មុំ ក្រចេះ និងខេត្តកំពង់ចាម​ផងដែរ​៕SRP

ខេត្តកំពង់ចាម​៖លោក​ អ៊ុន​ ចាន់ដា​ អភិបាលខេត្តកំពង់ចាម​ បានជំរុញដល់​អង្គភាព​រដ្ឋាករ​ទឹកខេត្តកំពង់ចាម​ ឲ្យពន្លឿនការរៀបចំសេវាបង់ប្រាក់ថ្លៃប្រេីប្រាស់ ទឹកស្អាតតាមរយៈអេប​ ទូរស័ព្ទដៃ​​ (ធនាគារ​ឯកជន​)​ ដើម្បី​បង្ក​លក្ខណៈ​ងាយស្រួល រហ័ស​ទាន់ចិត្ត និង​មាន​សុវត្ថិភាព​ខ្ពស់បន្ថែម​ទៀត​ជូន​ដល់​អតិថិជន​។

ការ​ស្នេីឡេីង​បែប​នេះ​ក្នុងកិច្ចប្រជុំសាមញ្ញលើកទី៣៨ អាណត្តិទី៣ របស់ក្រុមប្រឹក្សាខេត្តកំពង់ចាម​ នៅថ្ងៃទី១២ ខែកក្កដា ឆ្នាំ២០២២​នេះ ក្រោម​វត្តមាន​លោក​ ខ្លូត​ ផន​ ប្រធាន​ក្រុមប្រឹក្សា​ខេត្ត​។

ក្នុង​កិច្ចប្រជុ លោក​ អ៊ុន​ ចាន់ដា​ បាន​ថ្លែងថា​​ ខេត្តកំពង់ចាម​ ជា​ខេត្ត​ស៊ីវិល័យ​ មានការអភិវឌ្ឍ​ សង្គមវប្បធម៌​ និងសីលធម៌​ ដែលត្រូវបានគេចាត់ទុកថា មានភាពជឿនលឿនជាងមុន។ ដូច្នេះ​យើង​ត្រូវ​ពន្លឿន​ការ​រៀបចំ​ សេវាបង់ប្រាក់ថ្លៃប្រេីប្រាស់ទឹកស្អាត តាមរយៈអេប​ ទូរស័ព្ទដៃ​​ ដែល​មាន​ដូចជា​ធនាគារ​ អេប៊ីអេ អេស៊ីលីដា ឬ​វីង ធ្វើ​យ៉ាងណា​ ឲ្យ​ប្រជាពលរដ្ឋ​ កាន់តែ​មាន​ការ​ងាយស្រួល​ និងមាន​លទ្ធភាព​ បង់​ប្រាក់​ថ្លៃ​ប្រើប្រាស់​ទឹក​ស្អាត បាន​គ្រប់​ពេលវេលា និង​គ្រប់​ទីកន្លែង​ ដូច​ការ​បង់ប្រាក់​សេវា​អគ្គិសនី​ ដែល​មាន​អេប​រួច​ទៅ​ហើយ​នោះដែរ​។

គួរ​បញ្ជាក់​ថា​ ក្នុង​កិច្ចប្រជុំ​នេះ​ ក៏​មាន​ការ​ប្រកាស​ទទួលស្គាល់​ ជា​មេធាវី ប្រចាំការ​ នៅ​រដ្ឋបាលខេត្តកំពង់ចាម ចំនួន​៤រូបផងដែរ​។
រួមមាន​៖​ ១. មេធាវី តែ ស៊ា​ង​រ៉ា​នឹ​ន​ , ២.​មេធាវី ផែន ណាក់​ , ៣.​មេធាវី សួស ព័រ និង ៤. មេធាវី យូ លឹម​ហួត។ តាម​ខ្លឹមសារប្រកា​សលេខ ៩៩២ ប្រក​.​ចុះ​ថ្ងៃទី ២១ ខែមីនា ឆ្នាំ​២០២២ ចុះហត្ថលេខា ដោយ​សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ៕SRP

ភ្នំពេញ៖ក្រសួងសាធារណការ និងដឹកជញ្ជូន បានចេញសេចក្ដីជូនដំណឹង ហាមមិនអនុញ្ញាត ឱ្យយានយន្តគ្រប់ប្រភេទ ធ្វើចរាចរ នៅលើផ្លូវមួយនេះទៀតនោះទេ។

ការហាមបែបនេះដោយមើលឃើញ អំពីកំណើន នៃអ្នកប្រើប្រាស់ផ្លូវល្បឿនលឿន ភ្នំពេញ-ខេត្តព្រះសីហនុ មានការកើនឡើង គួរឲ្យកត់សម្គាល់ និងតែងតែបង្កឲ្យមានគ្រោះថ្នាក់ជាញឹកញាប់។

យោងតាមសេចក្ដីជូនដំណឹង លេខ ០៥០ សជណ.សក នេះ ធ្វើឡើង នៅថ្ងៃទី១២ ខែកក្កដាឆ្នាំ ២០២២ ដែលតម្រូវឱ្យ ក្រុមហ៊ុនសារជីវកម្មស្ពានថ្នល់ចិន(CRBC) ធ្វើការបិទគ្រប់ច្រកចេញ-ចូល ដោយមិនអនុញ្ញាតឲ្យយានយន្តគ្រប់ប្រភេទ ចូលប្រើប្រាស់ផ្លូវល្បឿនលឿន ក្រៅពីយានយន្តដែលបម្រើការងារឲ្យគម្រោង និងយានយន្តមានតម្រូវការចាំបាច់ ដែលមានការអនុញ្ញាតពីក្រសួងសាធារណការ និងដឹកជញ្ជូន ចាប់ពីថ្ងៃជូនដំណឹងនេះតទៅ។

គួរបញ្ជាក់ផងដែរថា នៅលើលិខិតជូនដំណឹង ខាងលើនេះ ក្រសួងសាធារណការ និងដឹកជញ្ជូន ពុំបានបញ្ជាក់កាលបរិឆ្ឆេទ នៃការបើកឱ្យដំណើរការឡើងវិញ នៅថ្ងៃណានោះឡើយ៕SRP០៣៧

ទំនាក់ទំនង៖ ០៨៩ ៩៤៨ ៤៤៤ព័

ត៌មានលម្អិត៖ www.srpostnews.com

ខេត្តសៀមរាប៖បុរសម្នាក់បានស្លាប់ នៅនឹងកន្លែងកើតហេតុ បន្ទាប់ពីជួបគ្រោះថ្នាក់ចរាចរណ៍។

ហេតុការណ៍បានកើតឡើងនៅចំណុចផ្លូវកៅស៊ូ ភូមិអូរលុះ ឃុំដំដែក ស្រុកសូទ្រនិគម ខេត្តសៀមរាប វេលា ម៉ោង១៨ និង ៣០នាទី ថ្ងៃទី១១ ខែកក្កដា ឆ្នាំ២០២២។

ប្រភពពីសមត្ថកិច្ចបានឲ្យដឹងថា៖ ជនរងគ្រោះ ឈ្មោះ មោះ អេង ចំរ៉ុង ភេទប្រុស អាយុ ២៥ឆ្នាំ ទីលំនៅភូមិក្បម ឃុំក្ដាញ់ ស្រុកព្រៃកប្បាស ខេត្តស្វាយរៀង បានធ្វើដំណើរ ម្នាក់ឯង ដោយម៉ូតូម៉ាកហុងដាឌ្រីម ពណ៌ខ្មៅ ពាក់ ស្លាកលេខ ស្វាយរៀង ១L-១៨៧០ ក្នុងទិសដៅពីជើងទៅត្បូង ក៏បានកៀជាមួយម៉ូតូ ម៉ាកហុងដាឌ្រីម ពណ៌ខ្មៅ ពាក់ស្លាកលេខ សៀមរាប ១AC-៩៨៥៣ ដែលបើកបរ ក្នុងទិសដៅស្របគ្នា រួចហើយ រេចង្កួត ទៅបុកគល់ស្ពានបណ្ដាលឲ្យស្លាប់តែម្ដង។ ចំណែកអ្នកបើកបរម្ខាងទៀត មិនស្គាលើអត្តសញ្គាណ បន្ទាប់ពីកើតហេតុ បានរត់គេចខ្លួនបត់ស្រមោល ដោយបន្សល់ទុកតែម៉ូតូ។

សមត្ថកិច្ចបានបន្តទៀតថា ក្នុងករណីនេះបណ្ដាលឲ្យបុរសម្នាក់បានស្លាប់បាត់បង់ជីវិតនិងម៉ូតូ ២ គ្រឿងរងការខូចខាត យ៉ាងដំណំ។

ចំពោះសាកសព ត្រូវតម្កល់ទុក នៅមន្ទីរពេទ្យបង្អែកស្រុកសូទ្រនិគម រង់ចាំសាច់ញាតិ មកទទួលទៅធ្វើបុណ្យ តាមប្រពៃណី។ ឯវត្ថុតាំង ត្រូវយកទៅរក្សារទុកនៅ អធិការនគរបាលស្រុក ដើម្បីដោះស្រាយតាមនីតិវិធី។

សូមបញ្ជាក់ថា រហូតមកដល់ពេលនេះ សមត្ថកិច្ចនៅមិនទាន់អាចបញ្ជាក់អំពីមូលហេតុ នៃការបង្កឲ្យមាន គ្រោះថ្នាក់នេះបាននៅឡើយទេ៕SRP០៣៧

ខេត្តត្បូងឃ្មុំ​​៖លោក​ ហ៊ុន ម៉ាណែត​ បានថ្លែងថា​ សម្តេចតេជោ នាយករដ្ឋមន្ត្រី គឺជាមេដឹកនាំប្រកបដោយធម៌ ដែលតែងប្រកាន់យកគោលការណ៍ សច្ចធម៌ និយាយពិត ធ្វើពិត និងបម្រើពិត រួមជាមួយនឹងឆន្ទៈបង្រួបង្រួមជាតិ លើកតម្កើងសាមគ្គីភាពជាតិ និងស្រឡាញ់អាណិតប្រជាពលរដ្ឋ ដោយមិនមានការរើសអើងបែងចែក ដែលជាក់ស្តែងនោះ គឺការខិតខំប្រឹងប្រែង ប្រកបដោយការទទួលខុសត្រូវ របស់សម្តេច រហូតសង្គ្រោះបានអាយុជីវិតប្រជាពលរដ្ឋ រាប់សែននាក់ចេញពីវិបត្តិគ្រោះភ័យនៃជំងឺកូវីដ-១៩។​

លោកថ្លែង​បែប​នេះក្នុងពិធីបុណ្យបញ្ចុះខណ្ឌសីមាព្រះវិហារថ្មី និងសម្ពោធឆ្លងសមិទ្ធផលនានា ក្នុងវត្តព្រះពុទ្ធឃោសាចារ្យ ស្ថិតនៅភូមិទួលតាហោ ឃុំគងជ័យ ស្រុកអូររាំងឪ ខេត្តត្បូងឃ្មុំ​ នៅថ្ងៃទី១០ ខែកក្កដា ឆ្នាំ២០២២​។ ​

លោក​ ហ៊ុន ម៉ាណែត​ បាន​លេីកឡេីងថា​ ទ្រព្យធំបំផុត របស់គណបក្សប្រជាជនកម្ពុជា គឺជាជំនឿទុកចិត្តរបស់ប្រជាពលរដ្ឋ។ ក្នុងន័យនេះ សូមអរគុណដល់ប្រជាពលរដ្ឋ ដែលបានគោរពស្រឡាញ់ សម្តេចតេជោ និងបានបោះឆ្នោតជូន គណបក្សប្រជាជនកម្ពុជាក្នុងគ្រប់អាណត្តិនយោបាយ កន្លងមក ទាំងនៅកម្រិតថ្នាក់ជាតិ និងថ្នាក់មូលដ្ឋាន។ ប្រទេសកម្ពុជា គឺជាប្រទេសប្រជាធិបតេយ្យសេរីពហុបក្ស ដូច្នេះប្រជាពលរដ្ឋជាម្ចាស់ប្រទេស មានសិទ្ធិក្នុងការជ្រើសរើសអ្នកដឹកនាំរបស់ខ្លួនតាមរយៈការបោះឆ្នោត។

លោក​ ហ៊ុន ម៉ាណែត​ ក៏បាន​លេីក​ឡើង​ថា​ យើងមានគណបក្សនយោបាយច្រើន ដែលបានចូលរួមនៅក្នុងការប្រកួតប្រជែង ប៉ុន្តែប្រជាពលរដ្ឋ នៅតែស្រឡាញ់ជឿទុកចិត្តលើការដឹកនាំរបស់គណបក្សប្រជាជនកម្ពុជា ដែលបានសង្គ្រោះ បម្រើ និងការពារប្រជាពលរដ្ឋ ដោយស្មោះត្រង់ក្នុងគ្រប់កាលៈទេសៈ ហើយជាគណបក្សដែលមានគោលនយោបាយ ច្បាស់លាស់ និងមានរចនាសម្ព័ន្ធចាត់តាំងយ៉ាងរឹងមាំពីថ្នាក់កណ្តាល រហូតដល់ថ្នាក់មូលដ្ឋាន ដែលអាចដឹងច្បាស់ និងដោះស្រាយ បានទាល់ពេលវេលានូវទុក្ខលំបាករបស់ប្រជាពលរដ្ឋ។ ហើយជាសក្ខីភាពជាក់ស្តែង គណបក្សប្រជាជនកម្ពុជា បានទទួលការគាំទ្រយ៉ាងលើសលប់ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ កន្លងមកនេះ ដែលជាការផ្តល់ឱកាសឱ្យគណបក្សប្រជាជនកម្ពុជា នៅបន្តដឹកនាំការអភិវឌ្ឍ រីកចម្រើននៅតាមមូលដ្ឋាន និងលើកកម្ពស់ជីវភាពរស់នៅរបស់ប្រជាជនឱ្យបានល្អប្រសើរឡើងបន្ថែមទៀត​ផងដែរ​៕SRP

ខេត្តកំពង់ចាម៖លោកស្រី​ តោ ពិឡា ប្រធានក្រុមការងារគណបក្សប្រជាជនកម្ពុជា ចុះជួយឃុំបឹងណាយ ស្រុកព្រៃឈរ ខេត្តកំពង់ចាម បានកោតសរសើរ និងថ្លែងអំណរគុណចំពោះក្រុមការងារទាំងអស់ ដែលបានខិតខំប្រឹងប្រែង អស់ពីកម្លាំងកាយចិត្ត ដណ្តើមបានជោគជ័យ ក្នុងការបោះឆ្នោតមេឃុំ-ចៅសង្កាត់ នាពេលកន្លងមក។ លោកស្រី ក៏បានអគុណដល់បងប្អូន ប្រជាពលរដ្ឋក្នុងឃុំបឹណាយ ដែរបានជឿទុកចិត្ត និងបោះឆ្នោតជូនគណបក្សប្រជាជនកម្ពុជា ទទួលបានជោគជ័យ។

លោក ស្រី មានប្រសាសន៍ បែបនេះក្នុងឱកាសបានចុះជួបសំណេះសំណាល និងពិសារអាហារសាមគ្គី ជាលក្ខណ:គ្រួសារ ជាមួយលោក លោកស្រី ក្នុងជួគណៈកម្មាធិការគណបក្សឃុំ ប្រធាន អនុប្រធានសាខាបក្សភូមិ ក្រុមការងារយុវជន សកម្មជន និងបងប្អូនប្រជាពលរដ្ឋ ក្នុងឃុំបឹងណាយ ដែលមានវត្តមានចូលរួម ចំនួន១៦០០នាក់ នៅថ្ងៃទី​៩​ ខែកក្កដា​ ម្សិលមិញ។

ក្នុងពិធីជួបជុំពិសារអាហារសាមគ្គីនេះ ដោយចំណាយថវិកាសរុប ៦.០០០ដុល្លារ។

សូមជម្រាបផងដែរថាលោកស្រី តោ ពិឡា ប្រធានក្រុមការងារគណបក្សប្រជាជនកម្ពុជា ចុះជួយឃុំបឹងណាយ បានប្រគេនទៀនវស្សាចំនួន ៣វត្ត ក្នុងឃុំបឹងណាយ ក្នុង១វត្ត ទៀន១គូ ទឹក១កេស ទឹកក្រូច១កេស នំ១ធុងធំ ប្រេងឆា ៥លីត្រ មី ១កេសតូច កាហ្វេ ១ថុងធំ និងបច្ច័យមួយចំនួនផងដែរ​៕SRP

ខេត្តកំពង់ធំ៖លោកស្រី ជិន អូន បានបញ្ជាក់ថា រូបភាពឡាន ដែលមានការថត នៅក្នុងដេប៉ូ ដោយក្រុមអ្នកសារព័ត៌មាន ហើយយកទៅផ្សព្វផ្សាយ ថា ជាឡានដឹកជញ្ជូនឈើ ចូលពីខេត្តព្រះវិហារ កាលពីយប់ដោយ គ្នានច្បាប់អនុញ្ញាតពីរដ្ឋបាលព្រៃឈើ នោះ ជារូបឡានជាឡាន ដែលទុកសម្រាប់មធ្យោបាយដឹកលក់ចែកចាយឈើ ដែលមាននៅក្នុងរោងស្តុកស្រាប់ លក់បន្ត អោយប្រជាពលរដ្ឋ ដែលមកកម្មង់ទិញ ពីរោងដេប៉ូ តែប៉ុណ្ណោះ ហើយការដឹកជញ្ជូនចេញគឺដោយស្របច្បាប់ តាមជំនាញផ្នែករដ្ឋបាលព្រៃឈើ ដល់តាមផ្ទះអ្នកកម្មង់ទិញ។

លោកស្រី ជិន អូន បន្តថា រោងដេប៉ូនេះផងដែរ ខាងជំនាញ លោកតែងតែចុះពិនិត្យ នឹងវាស់វែងកាត់ស្តុក តាម គោលការណ៍ របស់ជំនាញរៀងរាល់ខែម្តង។ ដោយឡែកចំពោះរូបភាព លោក សាក់ ស៊ិច នឹងលោក ស្រី រាប់លុយនោះ ហើយត្រូវបានក្រុមអ្នកសារព័ត៌មាន ទទួលបាន យកទៅផ្សព្វផ្សាយថា ពួកគាត់ទាំងពីនាក់ កំពុងរាប់លុយ ដើម្បី ផ្គត់ ផ្គង់នឹងទូទាត់ថ្លៃឈើ អោយទៅពួកឈ្មួញទៅវិញ ជាករណីមិនពិតហើយ មិនមានការសុំបំភ្លឺ ពី សាមីខ្លួនមុនចុះផ្សាយនោះទេ។

ការអះអាងច្រានចោល របស់លោកស្រី ជិន អូន ធ្វើឡើង នៅថ្ងៃទី ៩ខែ កក្កដា ឆ្នាំ ២០២២ ប្រាប់អ្នកសារព័ត៌មាន ក្រោយពីមាន ការផ្សព្វផ្សាយព័ត៌មាន ទាក់ទងនឹងរឿងផលអនុផលព្រៃឈើ នៅខេត្តព្រះវិហារ នឹងខេត្តកំពង់ធំ ជាច្រើនអង្គភាពរួចកន្លងមក។ ដោយការផ្សាយនោះ ឃើញថានេះវាជារឿង ភាន់ច្រលំ ដែលបានធ្វើអោយមានការប៉ះពាល់ ដល់សមត្ថកិច្ចនឹងមន្ត្រីជំនាញ គ្រប់ជាន់ថ្នាក់ ជាពិសេស គឺមានទាក់ទង នឹងរូបភាព លោកស្រី រាប់លុយក្នុងថ្ងៃ ធ្វើសាក្សី ទិញលក់ ឈើច្បាប់ដេប៉ូ របស់ ឈ្មោះ ឆន សំណាង ហើយត្រូវបានគេយកទៅធ្វើព័ត៌មាន ចោទថាជាការផ្តល់សោហុយ ដើម្បីប្រមូលទិញឈើទៅវិញ។ ករណីបែបនេះជាហេតុធ្វើអោយមហាជន នឹងថ្នាក់ដឹកនាំមានការ រិះគន់យ៉ាងធ្ងន់ធ្ងរ មកលើរូបនាងខ្ញុំ។

បើតាម លោកស្រី ជិន អូន បានបញ្ជាក់ថា៖ កាលពីថ្ងៃ ទី២០ ខែតុលា ឆ្នាំ២០២១ លោក ឆន សំណាង បានធ្វើការផ្ទេរ កម្មសិទ្ធិនឹងលក់បន្ត ច្បាប់រោងដេប៉ូឈើ នឹងឈើ អាចម្រុះទាំងអស់ អោយទៅឈ្មោះ សាក់ ស៊ិច ដើម្បីជាម្ចាស់កម្មសិទ្ធិបន្តក្នុងតម្លៃ ចចារទិញលក់ ពិតប្រាកដ ចំនួនជា ដុល្លារ ( ៧៥០០០$ ) ដោយមានការមានការប្រគល់ សាច់ប្រាក់ចំពោះមុខ ទើបមានការថតរូប សំរាប់ភស្តតាង ដោយមានស្វាមី របស់ លោកស្រី ជាអ្នកថត នឹងអ្នកចូលរួម ភាគីម្ខាងទៀតក៏បានថតផងដែរ។ ដោយបានភ្ជាប់នូវ ឯកសារនឹងលិខិត ចូលដឹងឮ ពីមេធាវី ជាតំណាង ក្នុងការផ្ទេរសិទ្ធមួយច្បាប់នេះផងដែរ។

ចំពោះបញ្ហាយ៉ាងដូច្នេះ លោក ស្រី ជិន អូន បញ្ជាក់សូមមេត្តា បងប្អូន នឹងមហាជន ដែលបានស្គាល់រូបលោកស្រី សូមកុំយល់ ច្រឡំ ដោយរឿងនេះសុទ្ធសឹង ជារឿងដែលមួលបង្ខូច នឹងជាបំណងរបស់ជន ដែលមិនបានទទួលផលប្រយោជន៍ នឹងជាជន ដែល បំពុលសង្គមរៀបចំអោយ មានបញ្ហាដើម្បី អោយនាងខ្ញុំ ខូចខាតនឹង អាប់អោន កេរ្ត៍ឈ្មោះតែប៉ុណ្ណោះ៕SRP

ខេត្តត្បូងឃ្មុំ៖មានប្រសាសន៍សំណេះ សំណាល លោក ជាម ច័ន្ទសោភ័ណ បានលើកឡើងថា នេះមិនមែនជាលើកទី១ទេ ដែលសមាគមគ្រូពេទ្យស្ម័គ្រចិត្តសម្តេចតេជោ ចុះព្យាបាល ប្រជាពលរដ្ឋដោយឥតគិតថ្លៃ នៅក្នុងស្រុកមេមត់ ដែលជាការងារមនុស្សធម៌សង្គ្រោះជីវិត ជូនប្រជាពលរដ្ឋ។

អភិបាលខេត្តត្បូងឃ្មុំ នៅថ្ងៃទី០៩ ខែកក្កដា ឆ្នាំ២០២២ នេះ​ ក៏បាន​ថ្លែង​អំណរគុណ​ ក្រុមគ្រូពេទ្យស្ម័គ្រចិត្តយុវជន សម្ដេចតេជោជាង​ ៣០០នាក់ ដែលបានពិនិត្យព្យាបាលជំងឺជូន​ ប្រជាពលរដ្ឋ​ប្រមាណ​ជា​២៦០០នាក់ ដោយឥតគិតថ្លៃ នៅសាលាបឋមសិក្សាកោះថ្ម និងសារមន្ទីរតេជោកោះថ្ម ស្ថិតក្នុងភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ។

អភិបាលខេត្តបានបញ្ជាក់ថា៖ ប្រមុខរដ្ឋាភិបាលកម្ពុជា សម្តេចតេជោ ហ៊ុន សែន និងក្រសួង-ស្ថាប័នពាក់ព័ន្ធ បានយកចិត្តទុកដាក់ ទប់ស្កាត់ប្រយុទ្ធប្រឆាំងជំងឺកូវីដ១៩ តាមរយៈការចាក់វ៉ាក់សាំង ជូនប្រជាពលរដ្ឋ នៅទូទាំងប្រទេស។ ម្យ៉ាងទៀត ប្រជាជនកម្ពុជា ពិតជា មានសំណាង ដោយមានប្រមុខរាជរដ្ឋាភិបាល បានយកចិត្តទុកដាក់គ្រប់បែបយ៉ាងដើម្បីទប់ស្កាត់ និងប្រយុទ្ធប្រឆាំងជំងឺកូវី១៩ ដែលធ្វើឱ្យស្ថានភាពកម្ពុជានាពេលបច្ចុប្បន្ន មានសភាពធូរស្រាលជាងប្រទេសដទៃទៀត។

លោក​ ជាម ច័ន្ទសោភ័ណ បានសំណូមពរឱ្យ ប្រជាពលរដ្ឋ ទៅទទួលការចាក់វ៉ាក់សាំងដូសទី៤ ឱ្យបានគ្រប់ៗគ្នា ដើម្បីទប់ស្កាត់ការឆ្លងរីករាលដាលជំងឺកូវីដ១៩ និងបានថ្លែងអំណរគុណក្រុមគ្រូពេទ្យ និងកម្លាំងស្ម័គ្រចិត្តសមាគម TYDA អាជ្ញាធរដែនដី ក្រុមការងារយុវជនគណបក្សប្រជាជនកម្ពុជា យុវជន ស.ស.យ.ក និងផ្នែកដែលពាក់ព័ន្ធជាច្រើនទៀត ដែលបានរៀបចំការពិនិត្យ និងព្យាបាលប្រជាពលរដ្ឋដោយឥតគិតថ្លៃពេលនេះ។

សូមបញ្ជាក់ថា ក្រុមគ្រូពេទ្យ និងកម្លាំងស្ម័គ្រចិត្តនៃសមាគម TYDA ដែលចុះព្យាបាលប្រជាពលរដ្ឋនៅស្រុកមេមត់ ខេត្តត្បូងឃ្មុំ មានគ្រូពេទ្យសរុបចំនូន៣០០នាក់ ព្យាបាលទៅលើប្រភេទជំងឺទូទៅមានដូចជា : (មាត់ធ្មេញ ជំងឺស្ត្រី ផ្ទៃពោះ ភ្នែក វះកាត់តូច គឺវះកាត់នៅនឹងកន្លែង) ក្នុងនោះក្នុងពេល១ថ្ងៃ ក្រុមគ្រូពេទ្យស្ម័គ្រចិត្តនៃសមាគម TYDA ព្យាបាលប្រជាពលរដ្ឋសរុបចំនួន២៦១១ ករណី ដែលការព្យាបាលនិងការចំណាយទាំងអស់ ក្រោមការឧបត្ថម្ភ របស់សម្ដេចតេជោ ហ៊ុន សែន និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន៕