ខេត្តប៉ៃលិន៖លោកស្រី បាន ស្រីមុំ អភិបាលខេត្តប៉ៃលិន បានសូមបួងសួងបារមី យាយយ៉ាត ជួយកូនចៅទូទាំងប្រទេស ចៀសផុត ពីជំងឺកូវីដ-១៩។

នេះបើយោងតាមទំព័រហ្វេសប៊ុកផ្លូវការ របស់លោកស្រីអភិបាលខេត្តប៉ៃលិន ដែលបានបង្ហោះរូបភាព និងអមដោយសំណេរបងសួង នៅថ្ងៃទី ១៧ ខែមិថុនាឆ្នាំ ២០២១ នេះ។

នៅលើទំព័រ page facebook លោកស្រីអភិបាលខេត្តបានសរសេរថា៖ កូនលើកម្រាមដៃដប់🙏សូមបួងសួងបារមី អ្នក
ម៉ែយ៉ាត សូមតាមបីបាច់ថែរក្សា កូនចៅ ទូទាំងប្រទេស ជាពិសេស កូនចៅ ចៅទួត ទូទាំងខេត្តប៉ៃលិន ទទួលបានសុខភាពល្អ ចៀសអោយផុត ពីជំងឺដ៍កាចសាហាវ មេរោគកូវីដ-១៩ ទាំងអស់គ្នា🙏។

លោកស្រី បាន ស្រីមុំ បានសរសេរបន្តថា៖
កូនរួមទាំងក្រុមការងារទាំងអស់ខិតខំប្រឹងប្រែងអោយអស់ពីសម្ថភាព មិនហត់នឿយឡើយ ដើម្បីការពារ ពុកម៉ែ បងប្អូន តែទោះបីយ៉ាងណា សូម ពុកម៉ែបងប្អូន ចេះថែរក្សាការពារ សុខភាពខ្លួនឯងត្រូវអនុវត្តន៍តាម ការណែនាំ របស់ ប្រមុខរាជរដ្ឋាភិបាល និង ក្រសួងសុខាភិបាល អោយបានជាប់ជាប្រចាំ កុំភ្លេចខ្លួនអោយសោះ ៣កុំ ៣ការពារ ពាក់ម៉ាស់ លាងដៃអោយបាន ញឹកញាប់ រក្សាគម្លាត កុំជួបជុំមនុស្សច្រើនជាដាច់ខាត។

អភិបាលខេត្តប៉ៃលិនរូបនេះបានបន្តទៀតថា
-គោរពអរគុណ🙏សម្តេចតេជោ ហ៊ុនសែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចទាំងទ្វេ បានគិតគូរគ្រប់ជ្រុងជ្រោយជួយកូនចៅជាង ១៦ លាននាក់ សម្តេច នៅរួមសុខរួមទុក្ខជាមួយកូនចៅគ្រប់ពេលវេលាគ្រប់កាល:ទេស: ទាំងអស់។
គោរពជូនពរសម្តេចទទួលបានសុខភាពល្អ ជាម្លប់ដ៍ត្រជាក់ត្រជុំសំរាប់កូនចៅជារៀងរហូត។

គោរពជូនពរ ពុកម៉ែបងប្អូនទទួលបានសុខភាពល្អគ្រប់ៗគ្នា 🙏- យើងត្រូវរួមសាមគ្គីគ្នាប្រយុទ្ធទប់ស្កាត់ ក្នុងគ្រាលំបាកនេះ យើងនិងឆ្លងផុតការលំបាកនេះជាមួយគ្នា 🙏💪💪💪៕SRP

ខេត្តកំពង់ចាម៖ផ្ទះប្រជាពលរដ្ឋចំនួន០៣ ខ្នង ត្រូវបានអគ្គិភ័យឆាប់ឆេះបំផ្លាញទាំងស្រុង។

ហេតុការណ៍ ស្ថិតនៅភូមិជង្ហុក ឃុំអំពិល ស្រុកកំពង់សៀម ខេត្តកំពង់ចាម នៅថ្ងៃទី១៦ ខែមិថុនា ឆ្នាំ ២០២១ ម្សិលមិញ។

អាជ្ញាធរមូលដ្ឋានបានឲ្យដឹងថា ផ្ទះជនរងគ្រោះដោយករណីគ្រោះអគ្គិភ័យខាងលើ

ទី១ ផ្ទះរបស់ឈ្មោះមាស សេង ភេទស្រីអាយុ៨៥ឆ្នាំជាតិខ្មែរ ខូចខាត ផ្ទះ០១ខ្នងទំហំ ០៤ម×០៤មធ្វើពីឈើប្រក់ដែកសង្កសីជញ្ជាំងដែក និងសម្លៀកបំពាក់ មួយចំនួន។

ទី២ ផ្ទះរបស់ឈ្មោះ ឯក ចាន់ថុន ភេទស្រីអាយុ ៤៥ឆ្នាំ ជាតិខ្មែរ ខូចខាតបាត់បង់ ផ្ទះទំហំ ០៥ម×០៦ម ធ្វើពីឈើប្រក់ដែកសង្កសី ជញ្ជាំងឈើចំនួន០១ខ្នង,ទូរទឹកកកចំនួន០១,ម៉ាសុីនដេរចំនួន០១,ម៉ាសុីនបោកខោអាវចំនួន០១ , គ្រែឈើចំនួន០១ និងសម្ភារះសម្លៀកបំពាក់មួយចំនួន។

ទី៣ ផ្ទះរបស់ឈ្មោះ អេង ស្រីណែត ភេទស្រីអាយុ២៣ឆ្នាំជាតិខ្មែរ .ខូចខាតបាត់បង់ផ្ទះទំហំ០៤ម×៥ម ធ្វើពីឈើប្រក់ដែកជញ្ជាំងឈើចំនួន០១ខ្នងនិងសម្លារះសម្លៀកបំពាក់មួយចំនួន។

អាជ្ញាធរបានឲ្យដឹងទៀតថាករណីអគ្គិភ័យនេះ មិនបណ្តាលរងគ្រោះមនុស្សឡើយ មូលហេតុ មកពីឆ្លងចរន្ធអគ្គីសនី៕SRP

ភ្នំពេញ៖ក្រសួងមហាផ្ទៃ បានចេញសេចក្តីសម្រេចស្តីពីការបង្កើតក្រុមការងាររដ្ឋាភិបាលឌីជីថល បច្ចេកវិទ្យាគមនាគមន៍និងព័ត៌មាន ក្រសួងមហាផ្ទៃ។ នេះបើតាមលិខិតដែលចុះហត្ថលេខាដោយសម្ដេចស ខេង រដ្ឋមន្ត្រីក្រសួងមហាផ្ទៃ។

នៅក្នុងលិខិតបានបញ្ជាក់ថា លោក សក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ ជាប្រធាន និងមានសមាភាពជាអនុប្រធានចំនួន ០២រូប ព្រមទាំងសមាជិក១២រូប។ សម្រាប់ក្រុមការងាររដ្ឋាភិបាលឌីជីថល បច្ចេកវិទ្យាគមនាគមន៍និងព័ត៌មាននេះផងដែរ មានលេខាធិការដ្ឋានមួយជាជំនួយការដែលដឹកនាំដោយនាយកដ្ឋានព័ត៌មានវិទ្យា នៃអគ្គលេខាធិការដ្ឋាន ក្រសួងមហាផ្ទៃ។

គួរបញ្ជាក់ថា ក្រុមការងាររដ្ឋាភិបាលឌីជីថល បច្ចេកវិទ្យាគមនាគមន៍ និងព័ត៌មាន របស់ក្រសួងមហាផ្ទៃ មានតួនាទី និងភារកិច្ចដូចខាងក្រោម ៖

ទី១-ធ្វើជាសេនាធិការជូនក្រសួងមហាផ្ទៃ លើកការងាររដ្ឋាភិបាលឌីជីថលក្របខ័ណ្ឌក្រសួងមហាផ្ទៃ និងគ្រប់គ្រងគម្រោងបច្ចេកវិទ្យាគមនាគមន៍ និងព័ត៌មាន នៅតាមបណ្ដាអគ្គនាយកដ្ឋាន និងអង្គភាពចំណុះក្រសួង។

ទី២-សហការជាមួយដៃគូពាក់ព័ន្ធ ទីប្រឹក្សា និងអ្នកជំនាញតាមការចាំបាច់ ដើម្បីរៀបចំកសាងផែនការមេបច្ចេកវិទ្យាគមនាគមន៍ និងព័ត៌មាន និងការបណ្ដុះបណ្ដាលលើកកម្ពស់សមត្ថភាពធនធានមនុស្ស។

ទី៣-គ្រប់គ្រងការធ្វើសមាហរណកម្មតភ្ជាប់រវាង ប្រព័ន្ធបច្ចេកវិទ្យាគមនាគន៍ និងព័ត៌មាន របស់ក្រសួងមហាផ្ទៃ ជាមួយប្រព័ន្ធបច្ចេកវិទ្យាគមនាគមន៍ និងព័ត៌មាន នៃបណ្ដាក្រសួង-ស្ថាប័នពាក់ព័ន្ធរបស់រាជរដ្ឋាភិបាលកម្ពុជា។

ទី៤-គ្រប់គ្រងការធ្វើបច្ចុប្បន្នភាព វាយតម្លៃគុណភាពប្រព័ន្ធ និងសម្ភារៈបច្ចេកទេស បច្ចេកវិទ្យាគមនាគមន៍ និងព័ត៌មាន ឲ្យសមស្របតាមស្ថានភាពរីកចម្រើននៃបច្ចេកវិទ្យាពិភពលោក បម្រើដល់ការងារជំនាញ និងការងារផ្ដល់សេវាសាធារណៈ ឲ្យកាន់តែមានប្រសិទ្ធភាព។

ទី៥-រៀបចំគោលនយោបាយ និងលិខិតបទដ្ឋានគតិយុត្តពាក់ព័ន្ធនានា ដើម្បីធានាដល់ការងារអនុវត្តប្រព័ន្ធបច្ចេកវិទ្យាគមនាគមន៍ និងព័ត៌មាន ការងាររដ្ឋាភិបាលឌីជីថល ពលរដ្ឋឌីជីថល និងធុរកិច្ចឌីជីថល ក្របខ័ណ្ឌក្រសួងមហាផ្ទៃ។

ទី៦-រៀបចំរបាយការណ៍អំពីលទ្ធផលការងារតាមដំណាក់កាលនីមួយៗ ជូនរដ្ឋមន្ដ្រីដើម្បីជូនជ្រាប ឬស្នើសុំមតិដឹកនាំតាមការចាំបាច់៕SRP

ខេត្តសៀមរាប៖លោក សឿន តុលា ស្ថាបនិកក្រុមហ៊ុនផា ផា យ៉ា បានសរសេរនូវអត្ថបទមួយក្រោមចំណងជើងថា«ភាពប្រថុយប្រថានជាមួយសមត្ថភាពខ្លួន»។

លោក សឿន តុលា បានសរសេរថា “ប្រសិនបើអ្នកសម្រេចចិត្តទទួលយកហានិភ័យ ក្នុងកម្រិតសមត្ថភាពគ្រប់គ្រងបាន នោះអ្នកនឹងអាចបង្កើតឱកាសថ្មី នឹងទទួលបានផលប្រសើរឡើង ក្នុងពេលអនាគត” នៅក្នុងលោកយើងនេះ មនុស្សអាចសម្រេចធ្វើអ្វីក៏បានដែរ ពេលដែលពួកគេ ប្រកាន់ភ្ជាប់ខ្លួននៅតែចំណុចអវិជ្ជមាន ជាពិសេសនោះ គឺហ៊ានសម្រេចចិត្តប្រថុយ ដើម្បីឱ្យបានសម្រេចកិច្ចការអ្វីមួយ។

រីឯកចំពោះការបរាជ័យវិញ គឺជាសញ្ញាមួយបញ្ជាក់ប្រាប់ថា:
# ស្វែងរកចំណេះដឹងបន្ថែម ហើយ កុំបោះបង
# រៀនពីកំហុស ដឹងភាពដាច់ខាតជាមួយវិន័យផ្ទាល់ខ្លួន និងនៅក្នុងអង្គភាព
# បន្ថែមជំនឿលើខ្លួនឯង និងរក្សាមេត្រីភាពល្អ ជាមួយមនុស្សជុំវិញខ្លួន ដឹងបន្ថែមអំពើល្អផ្សេងៗទៀត ដើម្បីលើកកម្លាំងចិត្ត និងកម្លាំងការងារ។

ប្រសិនបើអ្នកខ្វះចំណេះដឹង ក្នុងការធ្វើកិច្ចការអ្វីមួយ សូមធ្វើការប្រថុយក្នុងកម្រិតទាប ដើម្បីមានឱកាសគ្រប់គ្រាន់ រៀនយកចំណេះដឹង ពីព្រោះចំណេះដឹងមានសារះសំខាន់ នៃប្រភព ជោគជ័យ។

សូមចូលចាំថា : ភាពក្លាហានពិតប្រាកដគឺមិនមែនជាការ លោតផ្លោះនោះទេ ” គឺការក្លាហានប្រថុយប្រថាន ជាមួយធ្វើចំណេះដឹង និងកម្រិតសមត្ថភាព សម្រាប់គ្រប់គ្រង រៀបចំកិច្ចការដដែល ប៉ុន្តែឱ្យប្រសើរជាងមុនជារៀងរាល់ថ្ងៃ ពោលគឺ ផ្ដោតទៅលើ ទៅលើគុណភាពការងារ ប្រសើរឡើង ។

ជាទូទៅអ្នកដែលបរាជ័យ កើតចេញពីការងារដែលគ្មានគុណភាព ។
សូមចងចាំថា: ដើម្បីឱ្យមានភាពប្រសើរឡើង គឺត្រូវចំណាយពេលវេលា រៀនពីបទពិសោធ..និងបន្តធ្វើ..
#បញ្ហាដ៏ធំនោះ គឺសំនួរមួយ ដែលត្រូវសួរថា:

តើអ្នក តាំងចិត្តគ្រប់គ្រាន់ ដើម្បីប្រថុយ ដើម្បីរៀន ដើម្បីបង្កើនសមត្ថភាព ដែរឬទេ? ហើយសូមចងចាំថា នៅក្នុងលោកយើងនេះ ប្រសិនបើគ្មានការប្រថុយ នោះមិនមានការរីកចម្រើនអ្វីឡើយ៕

និពន្ធដោយលោក សឿន តុលា ស្ថាបនិកក្រុមហ៊ុន ផា ផា យ៉ា PAPAYA NEXT STEP CO,.LTD. *PAPAYA REAL ESTATE (គម្រោងអភិវឌ្ឍន៍អចលនទ្រព្យ)

*PAPAYA HOMESTAY (គម្រោងលើវិស័យទេសចរណ៍)*PAPAYA GARDEN
(គម្រោងលើវិស័យកសិកម្មនិងចែកចាយអាហារ) ៕ល៕

ខេត្តសៀមរាប៖លោក ធឿន វុឌ្ឍី លេខាធិការដ្ឋាន ចលនាយុវជនកម្ពុជា (ក្រុម១៥៧)ស្រុកជីក្រែង ព្រមជាមួយសមាជិក សមាជិកា បាននាំយកអំណោយ ទៅចែកជូនប្រជាពលរដ្ឋ មុខផ្សារភូមិអូរ។

ការចែកនៅថ្ងៃពុធ ទី១៦ ខែមិថុនា ឆ្នាំ២០២១ នេះ តាមការណែនាំពីលោក ហ៊ុន ប៉ូគា ប្រធានសមាគមចលនាយុវជនកម្ពុជា(ក្រុម១៥៧) សាខាខេត្តសៀមរាប ដោយការចូលរួមពីអាជ្ញាធរសមត្ថកិច្ចមូលដ្ឋានផងដែរ។

ឆ្លៀតក្នុងឱកាសនោះដែរ លោក ធឿន វុឌ្ឍី បានអំពាវនាវដល់បងប្អូន ប្រជាពលរដ្ឋ ទាំងអស់ឱ្យបង្កើនការប្រុងប្រយ័ត្ន ការពារឱ្យបានខ្ពស់ ចំពោះជំងឺកូវីដ១៩ ជាពិសេសអនុវត្តតាមប្រសាសន៍របស់ សម្តេចតេជោ (៣កុំ ៣ការពារ ) ឲ្យបានខ្ជាប់ខ្ជួន ដើម្បីចៀសផុតពីជំងឺដ៏កាចសាហាវនេះ។អំណោយចែកចាយជូនរួម មាន៖-អាកុល ៧០លីត្រ -ម៉ាស ២៥០០ម៉ាស -ដបបាញ់អាកុល ២០០ដប -សាប៊ូ ១០០ដុំ+ក្នុងមួយនាក់ទទួលបាន៖-អាកុល ១ដប-សាប៊ូ ១ដុំ-ម៉ាស ១គូ៕SRP

ខេត្តកំពង់ចាម៖លោក អ៊ុន​ ចាន់ដា​​ អភិបាលខេត្ត​កំពង់ចាម​ បានថ្លែងនូវការកោតសរសើរ ចំពោះ វឌ្ឍនភាពនៃការអភិវឌ្ឍរីកចំរើន លើគ្រប់វិស័យ ក្រោមការដឹកនាំ របស់ក្រុមប្រឹក្សា គណៈអភិបាល និងមន្ត្រីសាលាស្រុកចំការលេីទាំងអស់ ដែលបានចូលរួមចំណែក ដោះស្រាយកិច្ចការ នៅក្នុងអង្គភាព និងការផ្តល់សេវាសាធារណៈ សេវារដ្ឋបាល ជូនប្រជាពលរដ្ឋ ដោយទទួលបានលទ្ធផល យ៉ាងល្អប្រសើរ នាពេលកន្លងមក។

ថ្លែង​យ៉ាង​ដូច្នេះ​ក្នុងពិធីប្រកាសតែងតាំងលោក​ សំ​ ពិសិដ្ឋ​ ជាអភិបាល​ស្រុកចំការលេី​ ជំនួសលោក​ខ្លូត​ ចន្តា​ ដែលត្រូវទទួលភារកិច្ចថ្មី​ នៅថ្ងៃទី១៦​ ខែមិថុនានេះ។

លោកក៏បាន​ផ្តាំផ្ញេីដល់​លោកអភិបាលស្រុកថ្មី ត្រូវប្រែក្លាយការប្ដេជ្ញាចិត្ត នាពេលនេះ ទៅជា​ឆន្ទៈក្នុងការអនុវត្តជាក់ស្ដែង ឲ្យទទួលបានប្រសិទ្ធភាពខ្ពស់ ទៅពេលអនាគត ចំពោះ​សិល្បៈ​នៃ​ការ​ដឹកនាំ​ ត្រូវ​ឲ្យ​មន្ត្រី​ក្រោម​ឱវាទ​ចេះ​ធ្វើ​ការ​ ទាំង​មាន​ធនធាន​សម្រាប់​ការងារ​​ និង​ឲ្យ​មន្ត្រី​ចេះ​សម្រេច​ចិត្ត​​អារកាត់ផងដែរ​។

អភិបាលខេត្តក៏បានណែនាំលោកអភិបាលស្រុកចំការលេី ដែលទើបបានប្រកាសតែងតាំងថ្មីនេះ ត្រូវមានការសាមគ្គីភាពផ្ទៃក្នុង នៅក្នុងអង្គភាព រវាងថ្នាក់លើ និងថ្នាក់ក្រោម ព្រមទាំងមានគំនិតផ្តួចផ្តើម មនសិការការងារខ្ពស់ ប្រកបដោយតម្លាភាព និងគណនេយ្យភាព ក្នុងការ បម្រើប្រជាពលរដ្ឋ ដោយការយកចិត្តទុកដាក់ខ្ពស់ លើការសម្របសម្រួល ការដោះស្រាយបញ្ហាការងារ ប្រកបដោយភាពឈ្លាសវៃ និងមានគំនិតច្នៃប្រឌិត មានចក្ខុវិស័យ លើកជាទិសដៅ ដាក់ចេញនូវផែនការអនុវត្តឲ្យបានច្បាស់លាស់ ព្រមទាំងខិតខំបញ្ចេញឲ្យអស់ពីសមត្ថភាព និងទេពកោសល្យ ក្នុងស្មារតីយកចិត្តទុកដាក់ និងការទទួលខុសត្រូវខ្ពស់ ចំពោះ មុខថ្នាក់ដឹកនាំ ក្រសួងមហាផ្ទៃ និងចំពោះមុខគណៈអភិបាលខេត្ត រដ្ឋបាលខេត្ត លើវិស័យការងារ ដែលខ្លួនកំពុងបំពេញតួនាទី ជាពិសេសនោះ គឺត្រូវ​ប្រែក្លាយការប្ដេជ្ញាចិត្ត នាពេលនេះ ទៅជា​ឆន្ទៈក្នុងការអនុវត្តជាក់ស្ដែង ឲ្យទទួលបានប្រសិទ្ធភាពខ្ពស់ ទៅពេលអនាគតផងដែរ​៕SRP

ខេត្តសៀមរាប៖មានការលើកឡើងថាគេបានឈូសឆាយដីផ្នូរខ្មោច (កប់ខ្មោច)ធ្វើជាដីឡូតិ៍សម្រាប់លក់ ករណីនេះស្ថាបនិក របស់សមាគមសពគ្រីស្ទាន និងជាប្រធានសមាគម គ្រូគង្វាលប្រចាំខេត្តសៀមរាប គ្រោងដាក់ពាក្យប្តឹងទៅតុលាការ។

ដីផ្នូរខ្មោចឬកប់ខ្មោច ដែលត្រូវបានគេឈូសឆាយ បោះបង្គោលធ្វើជាដីឡូតិ៍ សម្រាប់លក់ ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប។

ស្ថាបនិករបស់សមាគមសព គ្រី ស្ទាន និងជាប្រធានសមាគមគ្រូគង្វាល លោកប្រាក់ វុទ្ធី បានថ្លែងតាមទូរស័ព្ទប្រាប់នៅថ្ងៃទី១៥ខែមិថុនាឆ្នាំ២០២១ ម្សិលមិញថា លោកនឹងប្តឹងទៅតុលាការ ចំពោះអ្នកឃុបឃិតគ្នាឈូសឆាយដីផ្នូរខ្មោចនេះ យកធ្វើជាដីពុះឡូតិ៍សម្រាប់លក់។ ដីនេះមានទំហំ៥០ម៉ែត្រគុណ១០០ម៉ែត្រស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប។ កាលពីអំឡុងឆ្នាំ២០០៤ អង្គការ វិហារមេថីឌីសកម្ពុជា បានប្រគល់អោយសមាគមសពគ្រីស្ទាន ទុកសម្រាប់កប់សព។ អីចឹងទេចំពោះបុគ្គល ដែលឃុបឃិតគ្នារំលោភបំពានយកដីនេះធ្វើជាកម្មសិទ្ធិ ឬពុះឡូតិ៍លក់ត្រូវតែទទួលទោសតាមផ្លូវច្បាប់។

លោកបន្តថា ក្នុងរយៈកាលនេះខាងលោកមិន បានដឹងថា មានជនឃុបឃិតទៅឈូសឆាយផ្នូរខ្មោចដើម្បីយកដីពុះចែកគ្នាលក់អីចឹងទេ។ តែបើមានអីចឹងលោកនឹងរៀបចំដើម្បីដាក់ពាក្យប្តឹងលើជនដែលជាប់ពាក់ព័ន្ធទៅតាមផ្លូវច្បាប់។

លោក ក្អោប រ៉ន ចៅសង្កាត់ជ្រាវ បានថ្លែងថា ករណីនេះលោកនៅមិនទាន់ដឹងច្បាស់ដែរទេ តែអាចសួរទៅលោក ខន ទើបដឹងច្បាស់។

លោកឃុន សុខន ថៅកែដីឡូតិ៍ ក្នុងតំបន់សៀមរាប បានអោយដឹងថា ដីខាងលើនេះរូបលោកបានត្រៀមទិញមែន។ តែមិនទាន់ទិញទេ គ្រាន់តែកក់សម្ដីប៉ុណ្ណោះ ព្រោះរងចាំអោយអ្នកលក់រត់ច្បាប់បានសិន។ ឯការឈូសឆាយចាក់ដីនោះ ក៏មិនមែនរូបលោកដែរ។ អីចឹងទេសូមសួរទៅលោក ចាន់ ឆ្វៀល ព្រោះគាត់ជាម្ចាស់។

ទោះជាយ៉ាងណា បណ្ដាញសៀមរាបប៉ុស្ដិ៍ មិនអាចទំនាក់ទំនងស្វែងជួបដើម្បីសុំការពន្យល់ពីលោកចាន់ ឆ្វៀល ដែលអះអាងថាជាម្ចាស់ដីនេះបានទេ នៅថ្ងៃទី១៥ខែមិថុនាម្សិលមិញ។
ប៉ុន្តែលោក នួន ពុទ្ធារ៉ា អភិបាលក្រុងសៀមរាប បានបញ្ជាក់តាមទូរស័ព្ទថា រាល់ការឈូសឆាយពុះជាដីឡូតិ៍ត្រូវមានលិខិតកាន់កាប់ដី និងច្បាប់អនុញ្ញាតត្រឹមត្រូវ។ មិនចឹងទេគឺខុសច្បាប់។ តែបើដីខាងលើនៅជាប់ពាក់ព័ន្ធនិងសមាគម ខាងសមាគមអាចមកដាក់ ពាក្យនៅសាលាក្រុងបាន។

លោកអភិបាលក្រុងបន្តថា ថ្វីត្បិតអាជ្ញាធរក្រុងមិនទាន់បានចុះទៅពិនិត្យ ទីតាំងដីនោះពិតមែន តែបើពិនិត្យឃើញ ថាដីនោះស្ថិតក្រោមការគ្រប់គ្រង របស់អាជ្ញាធរបឹងទន្លេសាប សាលាក្រុងមិនអនុញ្ញាតច្បាប់ឡើយ។

យ៉ាងណាមិញ លោកប្រាក់ វុទ្ធី នៅតែបញ្ជាក់ជំហរ របស់ខ្លួនថា នឹងរៀបចំឯកសារដាក់ពាក្យប្តឹង ព្រម ទាំងធ្វើសន្និសីទកាសែត នៅលើដីផ្នូរខ្មោចតែម្តង ដើម្បីដឹងថា មានបុគ្គលណាខ្លះជាប់ពាក់ព័ន្ធ ហើយចេញមកតតាំង៕SRP

ភ្នំពេញ៖ក្រសួងកសិកម្ម​ រុក្ខាប្រមាញ់និងនេសាទ នៅថ្ងៃទី១៥ ខែមិថុនា ឆ្នាំ២០២១នេះបានចេញសេចក្តីប្រកាសព័ត៌មានពាក់ព័ន្ធការផ្គត់ផ្គង់ត្រីនៅកម្ពុជា៕SRP

ភ្នំពេញ៖អ្នកស្រី ស៊ុ សំអឿន ដែលមនុស្សទី៣លាន ដែលបានចាក់វ៉ាក់សាំងបង្ការជំងឺកូវីដ១៩ បានទទួលថវិកាលើកទឹកចិត្ត របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

ការទទួលបានថវិកា របស់សម្ដេចហ៊ុន សែន នៅរសៀលថ្ងៃទី ១៥ ខែមិថុនា ឆ្នាំ ២០២១ តាមរយៈលោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល។

សូមបញ្ជាក់ថា គិតត្រឹមល្ងាចថ្ងៃ១៤ ខែ មិថុនា ២០២១ កម្ពុជាបានចាក់វ៉ាក់សាំងបានជាង៣លាននាក់ហើយ ក្នុងនោះបានរកឃើញបុគ្គលដែលបានចាក់វ៉ាក់សាំងទី៣លាន គឺអ្នកស្រី ស៊ុ សំអឿន អាយុ៤៨ឆ្នាំ ជាស្ត្រីមេម៉ាយរស់នៅមន្ទីរពេទ្យជ័យជំនះខេត្តកណ្តាល។សម្រាប់មនុស្សទី១លាន មនុស្សទី២លាន ហើយអ្នកស្រី ស៊ុ សំអឿន ជាមនុស្សទី៣លាន ទទួលបានជំនួយឧបត្ថម្ភនូវទឹកប្រាក់ចំនួន១០លានរៀល តាមរយៈលោកជំទាវ ឱ វណ្ណឌីន ដែលប្រគល់នាថ្ងៃនេះ។

សូមជម្រាបថា កម្ពុជាសម្រេចបានការចាក់វ៉ាក់សាំងចំនួន៣០ភាគរយនៃចំនួនដែលត្រូវចាក់ ដែលនេះជាជោគជ័យដ៏ធំក្នុងដំណើរឆ្ពោះទៅរកគោលដៅ១០លាននាក់ដែលត្រូវចាក់៕SRP

ខេត្តកំពង់ចាម​៖ក្នុង​ដំណើរ​អញ្ជើញ​ចុះ​ពិនិត្យ​ការ​សាងសង់​ច្រាំងទន្លេ​នេះ​ លោក អ៊ុន​ ចាន់ដា​ អភិបាលខេត្តកំពង់ចាម​ បានណែនាំឲ្យក្រុមហ៊ុនទទួលការ​ ត្រូវ​ពន្លឿនការងារ​សាងសង់​ ព្រោះរដូវ​ទឹក​ឡើង​ជិតឈាន​ចូលមកដល់នាពេលខាងមុខនេះហេីយ​។ ជាមួយគ្នានោះក្រុមហ៊ុនត្រូវគោរពតាមបទដ្ឋានបច្ចេកទេស ក្នុងការបូមដីកោះដុះថ្មី និងដីខ្សាច់ តម្រង់ចរន្តទឹកហូរ នៅតំបន់កោះតូច ចន្លោះរវាងស្រុកស្រីសន្ធរ និងស្រុកកងមាស ដើម្បីបញ្ជៀសការបាក់ស្រុតច្រាំងទន្លេ។​​

ការណែនាំនេះនៅព្រឹកមិញក្នុងពេលចុះពិនិត្យលក្ខណៈបច្ចេកទេស​ នៃការសាងសង់ច្រាំងទន្លេ​ នៅតំបន់កោះតូច​ ស្រុកស្រីសន្ធរ​ និង​ស្រុកកងមាស​។

សូមជម្រាបថាការសាងសង់ច្រាំងទន្លេ​នៅតំបន់កោះតូច​ ប្រវែង២.០០០ ម៉ែត្រ ស្ថិត​ក្នុង​ឃុំឬស្សីស្រុក និងឃុំកោះអណ្តែត នៃស្រុកស្រីសន្ធរ និងឃុំសូរគង ស្រុកកងមាស​ ដេីម្បី​ត្រៀមលក្ខណ:ការពារច្រាំងទន្លេ​កុំ​ឲ្យ​បាក់​ ខណ:រដូវវ​ទឹក​ឡើង។

បេីតាមការបញ្ជាក់ពីអ្នកបច្ចេកទេស របស់ក្រុមហ៊ុន រីវើសាយឌីវេឡុបម៉ិន ឯ.ក បាន​ឲ្យដឹងថា​ ចំពោះគម្រោង​ការ​សាងសង់​ច្រាំងទន្លេ​នេះ​ ក្រុម​ការងារ​បច្ចេកទេស បានរៀបចំបាវខ្សាច់(Geo-textile) ដើម្បីទប់ច្រាំងទន្លេ ប្រវែង២០០០ ម៉ែត្រ ដោយបានបូមខ្សាច់ធ្វើបាតចាប់ពីដើមខែមេសា​ ក្នុងជំហានទី១ ឲ្យបានកំពស់ ០៤ម៉ែត្រ និងចាប់រៀបចំបាវខ្សាច់ ហើយបន្តក្នុងជំហានទី២ ឲ្យបាន៨,៥ ម៉ែត្រ ស្មើនឹង៥០% នៃកំពស់ច្រាំងទន្លេ រួចត្រូវបន្តធ្វើជំហានទី៣ ទៀត រហូតដល់កំពស់ ១២ ម៉ែត្រ បញ្ចប់គម្រោង ដែលស្មើនឹង៧៥% នៃកំពស់ច្រាំងទន្លេ។ ក្នុងនោះ​ក្រុមហ៊ុន បានប្រើប្រាស់ទន្និន័យមូលដ្ឋានអំពីកំពស់ទឹកទន្លេ ពីមន្ទីរធនធានទឹក និងឧតុនិយមខេត្ត និងទិន្នន័យ ផែនទីបាតទន្លេ ពីវេបសាយ របស់គណៈកម្មាធិការទន្លេមេគង្គ​ផងដែរ​៕SRP

ខេត្តសៀមរាប៖នៅទីបំផុត កម្មករប្រុសស្រីជាង៧០នាក់ អ្នកធ្វើផ្លូវនៅក្រុងសៀមរាប បានទទួលបានឈ្នួលហើយ កាលពីថ្ងៃទី១២ ខែមិថុនា ឆ្នាំ២០២១ បន្ទាប់ពីបានធ្វើការតវ៉ា។

ក្រុមកម្មករធ្វើផ្លូវទាំងនោះ បានអោយដឹងថា ពួក គាត់ទាំងអស់គ្នា ទទួលបានប្រាក់ខែទាំងអស់គ្នាហើយគឺខែ៤និងខែ៥ គ្រាន់តែមានបញ្ហាខុសច្រឡំថ្ងៃឈប់ បន្តិចបន្តួចប៉ុណ្ណោះ។

សូមបញ្ជាក់ កម្មករប្រុសស្រីជាង៧០នាក់ កាលពីរសៀលថ្ងៃទី១១ខែមិថុនាឆ្នាំ២០២១ បាននាំគ្នាតវ៉ារឿងអ្នកម៉ៅការធ្វើផ្លូវ ព្យាពេលការបើកប្រាក់ខែ។

ក្រុមកម្មករបានទៅប្រមូលផ្តុំគ្នានៅទីតាំងស្នាក់ ការនៅរបស់អ្នកម៉ៅការ ក្នុងភូមិគោកចក សង្កាត់គោកចក ក្រុងសៀមរាប។ ប៉ុន្តែក្នុងពេលផ្ទុះការតវ៉ាខ្លាំង សមត្ថកិច្ចនគរបាល ក៏បាននាំអ្នកម៉ៅការផ្លូវនោះទៅកាន់សាលាសង្កាត់ បញ្ជៀសការផ្ទុះហិង្សា។

ក្រុមកម្មករបានរៀបរាបថា ពួកគាត់ទាំងជាង៧០ នាក់ ជាកម្មករធ្វើផ្លូវបេតុង១ខ្សែក្នុងគំរោង(៣៨)ខ្សែក្នុងសង្កាត់គោកចក ឈ្មោះថាផ្លូវលេខ០៧ ដែលគេនិយមហៅថា ផ្លូវពេទ្យ (រ៉ាក់)។ ពួកគាត់អ្នកខ្លះអត់ទាន់បើកប្រាក់តាំងខែ៣មក ឯខ្លះទៀតតាំងខែ៤មក។ នៅរសៀលថ្ងៃទី១១ខែមថុនា អ្នកម៉ៅការសន្យាបើក ប្រាក់ខែអោយ។ លុះពេលមកបើក បែជាឆ្លើយថាអត់ទាន់មានលុយ ទើបពួកគាត់តវ៉ាបែបនេះ។ ប៉ុន្តែកាល ពី ថ្ងៃទី១២ខែមិថុនា ពួកគាត់បានបើកប្រាក់ខែទាំងអស់គ្នាវិញហើយ៕SRP

ភ្នំពេញ៖សម្ដេចអគ្គមហាពញាចក្រី ហេង សំរិន ប្រធានរដ្ឋសភា នៅព្រឹកថ្ងៃអង្គារ ទី១៥ ខែមិថុនាឆ្នាំ២០២១ បានដឹកនាំកិច្ចប្រជុំគណៈគម្មាធិការអចិន្រ្តៃយ៍រដ្ឋសភា តាមប្រព័ន្ធវីដេអូ ដើម្បីអនុម័តរបៀបវារៈមួយចំនួន។

ជាលទ្ធផលអង្គប្រជុំបានអនុម័តយល់ព្រមនូវបេក្ខជន ដែលបានដាក់ពាក្យជា ប្រធានគណៈកម្មាធិការជាតិរៀបចំការបោះឆ្នោត មានលក្ខណៈសម្បត្តិគ្រប់គ្រាន់ចំនួន ២រូប ដើម្បីបញ្ជូនទៅគណបក្សនយោបាយពាក់ព័ន្ធជ្រើសរើស បេក្ខជនចំនួន១រូប ហើយផ្ញើមកគណៈកម្មាធិការអចិន្រ្តៃយ៍រដ្ឋសភា វិញ។

អង្គប្រជុំ ក៏បានអនុម័តប្រគល់ សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀង ពាណិជ្ជកម្មសេរី រវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាមានិតចិន និងសេចក្តីព្រាងច្បាប់ស្តីពីការប្រកួតប្រជែង ដល់គណៈកម្មការជំនាញរដ្ឋសភា ពិនិត្យសិក្សា៕SRP