ខេត្តសៀមរាប៖លោកសឿន តុលា ស្ថាបនិកក្រុមហ៊ុន ផា ផា យ៉ា បានសរសេរអត្ថបទមួយ រៀបរាប់អំពីសហគ្រិនភាព
” ប្រសិនបើ អ្នករៀនជាមួយមនុស្ស យល់អំពីមនុស្ស អ្នកនឹងយល់អំពីការធ្វើជំនួញជាមួយមនុស្ស”។ លោកសឿន តុលា ថា៖ទាំងអស់នេះ សំដៅទៅលើអ្នកប្រើពេលវេលាដើម្បីរៀននិងពូកែ ទំនាក់ទំនង។
លោកបានសរសេរថា៖ យ៉ាងណាមិញ ចំពោះអ្នកពូកែទំនាក់ទំនង ” ពួកគាត់ពូកែ ពីព្រោះពួកគាត់រៀនកែលម្អឲ្យមានគុណភាព ទំនាក់ទំនង ប្រសើរឡើងៗ ” ពួកគាត់យល់អំពីហេតុផល នៃការអភិវឌ្ឍខ្លួនឯង។
” ហេតុអ្វីទើបពួកគាត់មាន ជំនាញទំនាក់ទំនង ?”
# ចម្លើយ : អនុវត្តន៍បានច្រើន និងរៀនបានច្រើន ហើយមានចំណេះដឹងច្រើន ។
ដូច្នេះហើយអ្នកពូកែទំនាក់ទំនងគឺតែងតែយល់អ្នកណាដែលអាចយល់អំពីតម្លៃនៃភាពទំនាក់ទំនងជាមួយខ្លួន ឬ យល់ អំពីហេតុផលនិមួយៗ ដែលបានកើតឡើង។
ក្នុងពិភពធ្វើជំនួញ អ្នកត្រូវតែចេះភាពទំនាក់ទំនង ពីព្រោះទំនាក់ទំនង គឺជាការ តភ្ជាប់ រវាងមនុស្សជាមួយ និងមនុស្ស ហើយរវាង មនុស្សជាមួយនិងផលិតផល។
មានសំនួរមួយចំនួនដើម្បីឲ្យលោកអ្នកធ្វើការពិចារណាដូចខាងក្រោមនេះ * តើអ្នកអាចចងចាំបានទេនៅក្នុងជីវិតរបស់អ្នកមកដល់ថ្ងៃនេះ តើអ្នកសម្រេចចិត្តឈប់រាប់អានគេ ប៉ុន្មាននាក់ហើយ ? តើនោះមកពីមូលហេតុអ្វី ? ប្រសិនបើអ្នកយល់អំពីខ្លួនអ្នក អ្នកនឹងអាចយល់អំពីអ្នកដទៃបាន។
ប្រហែលជាអ្នកមិនចង់និយាយរកពួកគេទៀត ឬ ក៏មិនចង់ជួបមុខពួកគេ ដោយយោងទៅតាមហេតុផលណាមួយនោះ ប៉ុន្តែទុកអស់នោះប្រហែលជា ចេញមកពីហេតុផលផ្ទាល់ខ្លួនតែប៉ុណ្ណោះ ” ការយល់ហេតុផលទូលំទូលាយ តែងតែ ប្រសើរជាង គំនិតឬយោបល់តែមួយជ្រុង”។
ដោយយោងតាមសភាពការសេដ្ឋកិច្ចពិភពលោកបច្ចុប្បន្នដោយសារជម្ងឺរាតត្បាត Covid-19 អាត្រាភាពក្រីក្របានកើនឡើង ភាពមិនចុះសម្រុងគ្នាក្នុងគ្រួសារនិងក្នុងពិភពលោកបានកើនឡើងជារៀងរាល់ថ្ងៃផងដែរ ទាំងនោះដោយសារតែខ្វះតុល្យភាពការស្ដាប់និងការនិយាយ ” អ្នកនឹងខ្ជះខ្ជាយពេលវេលា ប្រសិនបើ និយាយអ្វី ដែលគេមិនចង់ឮ និងគេមិនចង់ស្ដាប់”។
” ភាពមិនចុះសម្រុងគ្នាកើតឡើង នៅពេលដែលពួកគេបានធ្វើឲ្យធ្លាក់ចុះនៃតម្លៃក្នុងការស្តាប់គ្នាទៅវិញទៅមក ” ប្រសិនបើអ្នកព្យាយាមនិយាយ ឬ ពន្យល់ អ្នកនឹងបាត់បង់ការយកចិត្តទុកដាក់ចំពោះការស្ដាប់” ប៉ុន្តែជីវិតរបស់មនុស្សខ្លីណាស់ អ្នកមិនគួរចំណាយពេលដើម្បី ពន្យល់ដល់អ្នកដែលមិនចង់ស្ដាប់ឡើយ ” ម្យ៉ាងវិញទៀតអ្នកប្រហែលជាយល់ហើយថា មនុស្សចង់ស្ដាប់តែអ្វីដែលគេចង់តែប៉ុណ្ណោះ ។

១. ប្រកាន់យកការស្តាប់ហើយពិចារណាឲ្យបានច្រើន:
” ជំនាញស្ដាប់គឺជាទម្លាប់ ដែលអ្នកអាចធ្វើបាន នៅពេលដែលយើង ព្យាយាមស្ដាប់ជាប្រចាំ”។
អ្នកដែលមានទំនាក់ទំនងល្អពួកគាត់មិនមែនពូកែនិយាយច្រើន ឬ និយាយដើម្បីបញ្ជាក់ថាខ្លួនអ្នកចេះ ឬ ខ្លួនជាអ្នកខ្លាំងជាងអ្នកដទៃឡើយ ពីព្រោះពួកគាត់យល់ថាមានតែ ការស្ដាប់ប៉ុណ្ណោះទើបធ្វើឲ្យពួកគាត់យល់អំពីហេតុផល ក្នុងជំនួបទំនាក់ទំនង ” សូមធ្វើជាអ្នកស្តាប់ដើម្បី ដើម្បីឲ្យមានការយល់ប្រាកដ ប្រសើរជាងស្តាប់ដើម្បីរង់ចំាឱកាស ដើម្បីនិយាយតបតការពារខ្លួន ។

២. ប្រកាន់ឲ្យមានតុល្យភាពក្នុងការទំនាក់ទំនង:
” ការសន្ទនាល្អ គឺជាការសន្ទនាដែលមានតុល្យភាពរវាងអ្នកនិយាយដឹងអ្នកស្ដាប់ ” ជាទូទៅ យើងតែងតែឃើញកំហុសច្រើនកើតឡើង នៅពេលសន្ទនា ពីព្រោះ ពួកគេគិតថា ពួកគេចេះជាង ពួកគេបានដឹងច្រើន ឬពួកគេអ្នកមានឋានៈខ្ពស់ជាង”
នៅក្នុងអង្គភាព ឬ សង្គមគ្រួសារ មេដឹកនាំមានការងារដ៏ធំមួយចំពោះការបង្កើតឲ្យមានតុល្យភាពឲ្យសមាជិករបស់ខ្លួនរៀនពីគ្នាទៅវិញទៅមកពោល គឺពួកគេចេះស្តាប់គ្នានិងគោរពគ្នាទៅវិញទៅមក។
ប្រសិនបើភាគីម្ខាងចេះតែនិយាយហើយភាគីម្ខាងទៀតចេះតែស្តាប់នោះមិនមែនជាបរិយាកាសទំនាក់ទំនងឡើយ។

៣. ទទួលយកការពិត: ” Accept the reality ”

” មនុស្សជឿនូវការពិត ជាជាងសម្ដី នោះមានន័យថាពួកគេជឿលើសកម្មភាពនិងលទ្ធផល ឬក៏សកម្មភាពល្អសម្រាប់ពួកគេ ”

នៅក្នុងដំណើរជីវិតមនុស្សម្នាក់ៗ មានលក្ខណៈអតចរិកផ្សេងៗគ្នាទៅតាមកម្រិតនៃបុគ្គលនីមួយៗ ទាំងអស់នោះជារឿងពិតដែលត្រូវតែទទួលស្គាល់ ទៅលើសកម្មភាពនិងលទ្ធផលដែលពួកគេបានធ្វើ នៅក្នុងកម្រិតណាមួយដែលអ្នកគួរតែកត់សម្គាល់ ទោះបីជាពួកគេអាចគិត
ផ្ទុយពីនាក់ សកម្មភាពផ្ទុយពីអ្នក លទ្ធផលផ្ទុយពីអ្នក
ប៉ុន្តែពួកគេនៅតែមានផ្នែកណាមួយ សម្រាប់បើកផ្លូវទំនាក់ទំនងជាមួយមិត្តភាព ឬ ហេតុផលការងារណាមួយ នៅថ្ងៃក្រោយ ពីព្រោះផែនដីតូចណាស់ គង់មានថ្ងៃណាមួយនឹងជួបគ្នា ។
សូមកុំព្យាយាមកែប្រែមនុស្សឲ្យដូចអ្នកចង់បាន តាមតែពាក្យសម្ដីរបស់អ្នក ” ពួកគេអាចកែ ប្រសិនបើអ្នក
កែខ្លួនឯងជាមុនសិន ” វាពិតជាលំបាកខ្លាំងប្រសិនបើអ្នកកាន់កែវស្រា ហើយប្រាប់អ្នកដទៃទៀតកុំឲ្យផឹកស្រានោះ ។

៤. សូមកុំវិនិច្ឆ័យចេញពីគំនិតអ្នក:

” Avoid judgment and personal comparison”

គំនិតខ្លួនឯង ឬ ការវិនិច្ឆ័យគឺសម្រាប់តែពាក្យចុងក្រោយ ” Saying Good Bey ” នៃទំនាក់ទំនងតែប៉ុណ្ណោះជំនួសមកវិញអ្នកអាចបង្ហាញអ្វីដែលជាផលប្រយោជន៍ចេញពីភាពទំនាក់ទំនងនៅក្នុងកម្រិតណាមួយ នៅក្នុងលោកនេះ គ្មានអ្វីដែលអត់ប្រយោជន៍ឡើយ ប្រសិនបើយើងមើលគ្រប់់ជ្រុងជ្រោយនោះ។

៥. រក្សាបច្ចុប្បន្នភាព: ” Keep the moment alive ”

ការរៀបចំចិត្តគំនិតនិងស្មារតីឲ្យនៅជាប់ខ្លួនក្នុងពេលទំនាក់ទំនង គឺជាឬសគល់នៃការយកចិត្តទុកដាក់ទៅលើតម្លៃនៃភាគីម្ខាងទៀត ពីព្រោះអ្វីដែលជួប ” គឺបច្ចុប្បន្នដែលបង្កើតឲ្យមានគុណភាព ទំនាក់ទំនង ”
និពន្ធដោយ លោក : សឿន តុលា
ស្ថាបនិកក្រុមហ៊ុន ផា ផា យ៉ា PAPAYA NEXT STEP CO,.LTD

* PAPAYA REAL ESTATE
( គម្រោងអភិវឌ្ឍន៍អចលនទ្រព្យ)
* PAPAYA HOMESTAY
( គម្រោងលើវិស័យទេសចរណ៍)
* PAPAYA GARDEN
( គម្រោងលើវិស័យកសិកម្មនិងចែកចាយអាហារ)

ខេត្តសៀមរាប៖កម្លាំងមូលដ្ឋានអាវុធហត្ថស្រុកសូត្រនិគម ដឹកនាំដោយលោក វរសេនីយ៍ត្រី អ៊ឹម មុន្នី មេបញ្ជាការមូលដ្ឋានស្រុក បានចាប់ខ្លួនបុរសម្នាក់ករណីលួចប្រេង។

ការបង្ក្រាបនេះនៅរសៀលវថ្ងៃទី១២ ខែមេសា ម្សិលមិញ នៅស្រុកសូនិគម ដោយមានការសម្របសម្រួលពី លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប និងយោងតាមពាក្យបណ្តឹងរបស់ឈ្មោះ អ៊ុយ ចយ ភេទប្រុស អាយុ ៤៨ឆ្នាំ ជនជាតិខ្មែរ មានទីលំនៅបច្ចុប្បន្ន ភូមិដកពោធិ៍សង្កាត់ស្លក្រាម ក្រុងសៀមរាប។

សមត្ថកិច្ចអាវុធហត្ថបានឲ្យដឹងថា ករណីលួចប្រេងម៉ាស៊ូតនេះ ស្ថិតត្រង់ចំណុចការដ្ឋានព្រលានយន្តហោះថ្មី ស្ថិតនៅ ភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប។

ជនសង្ស័យ ឈ្មោះ ស៊ត់ សើម អាយុ៣០ឆ្នាំ មានទីលំនៅបច្ចុប្បន្ន ភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប និងមានបក្ខពួកមួយចំនួនទៀត បានរត់គេចខ្លួនបាត់។

សមត្ថកិច្ចបានបន្តថាក្រោយពីសាកសួរ ឈ្មោះ ស៊ត់ សើម បានឆ្លើយសារភាពថា៖ ខ្លួន និងបក្ខពួក ពិតជាបានចូលលួចប្រេងនៅចំណុចការដ្ឋានខាងលើប្រាកដមែន។ ករណីបង្ក្រាបនេះសមត្ថកិច្ចបានដកហូត វត្ថុតាងរួមមាន៖ ម៉ូតូចំនួន ០៤គ្រឿង. ប្រេងម៉ាស៊ូតចំនួន០៩កាន ស្មើនិង ២៧០លីត្រ. កានទទេចំនួន ១១កាន
. ទូរស័ព្ទ០១គ្រឿង (ម៉ាកOPPO)។
បច្ចុប្បន្ន៖ ជនសង្ស័យនិងវត្ថុតាង ការិយាល័យព្រហ្មទណ្ឌនៃកងរាជអាវុធហត្ថខេត្តសៀមរាបកសាងសំណុំរឿងបញ្ជូនទៅសាលាដំបូងខេត្តសៀមរាប។ ចំណែកបក្ខពួក សមត្ថកិច្ចកំពុងស្រាវជ្រាវរកចាប់ខ្លួនបន្ត៕SRP

ខេត្តសៀមរាប៖លោកទៀ សីហា អភិបាលខេត្តសៀមរាប បានទទួលអំណោយម៉ាសចំនួន ២ម៉ឺនម៉ាស់ អាល់កុល ៣០០លីត្រ , មី១០កេសធំ ទឹកសុទ្ធ ១០០កេស រួមនឹងថវិកាមួយចំនួន របស់លោកឡាំង អូណា អគ្គលេខាធិការរងក្រសួងការពារជាតិ រួមទាំងក្រុមការងាររដ្ឋាភិបាលចុះជួយឃុំរលួស ស្រុកប្រាសាទបាគង ខេត្តសៀមរាប។

ការទទួលអំណោយនៅថ្ងៃទី ១២ ខែមេសា នេះនៅរដ្ឋបាលខេត្តសៀមរាប។

លោក ទៀ សីហា បានថ្លែងអំណរគុណដល់ទឹកចិត្តដ៏សប្បុរសធម៌ របស់ ប្រតិភូក្រុមការងាររាជរដ្ឋាភិបាលចុះជួយខេត្តសៀមរាប ដែលបានផ្តល់ជូននូវសម្ភារ បម្រើការក្នុងការប្រយុទ្ធប្រឆាំងបង្កា ទប់ស្កាត់ជំងឺកូវីដ-១៩ ដល់រដ្ឋបាលខេត្តសៀមរាប។

លោកក៏បានជម្រាបជូន ដល់សប្បុរសជន និង តំណាងក្រុមហ៊ុនផងដែរថា ក្នុងករណីដែលកម្ពុជាយើង បានកំពុងជួបនូវវិបត្តិជំងឺកូវីដ-១៩នេះ អាជ្ញាធរខេត្តបានផ្តល់នូវសម្ភារឧបករណ៍ ប្រើប្រាស់ ជូនទៅតាមបណ្តាក្រុង ស្រុក រួមទាំងគ្រឿងឧបភោគបរិភោគ ក្នុងការផ្គត់ផ្គង់ដល់បងប្អូនដែលបានវិលមកពី ក្រៅប្រទេស និង រាជធានី ខេត្ត ដែលកំពុងធ្វើចត្តាឡីស័កនៅតាមមណ្ឌល ក្រុង ស្រុក ឃុំ។

លោកក៏បានសំណូមពរ ដល់ប្រតិភូក្រុមការងាររាជរដ្ឋាភិបាល ក៏ដូចសប្បុរសជន បន្តនូវប្រពៃណីវប្បធម៌ចែករំលែកនេះ ទៅតាមបណ្តា ក្រុង ស្រុក ទៀតផងដែរ។

ជាមួយគ្នានេះដែរលោក ក៏បានអំពាវនាវដល់ប្រជាពលរដ្ឋ ទាំងអស់ សំខាន់នៅខេត្តសៀមរាប សូមបងប្អូនត្រូវចូលរួមអនុវត្តវិធានការណ៍របស់ រាជរដ្ឋាភិបាល ៣កុំ ៣ការពារ៕SRP

ខេត្តត្បូងឃ្មុំ៖លោក ជាម ច័ន្ទសោភ័ណ អភិបាលខេត្តត្បូងឃ្មុំ និងលោកជំទាវ នៅថ្ងៃ​ទី​១២​ ខែមេសា​ ព្រឹកមិញ បានអញ្ជើញជួបសំណេះសំណាល ជាមួយ​ថ្នាក់ដឹកនាំ និងមន្ត្រីរាជការចំណុះសាលាខេត្ត ព្រមទាំងចែកជូន​នូវ​ថវិកា​ និង​ សម្ភារមួយចំនួន ដើម្បីជាការលើកទឹកចិត្តចំពោះកិច្ចខិតខំបំពេញភារកិច្ចនាពេលកន្លងមក និងបន្តឲ្យកាន់តែល្អបន្ថែមទៀត ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំឆ្លូវ ត្រីស័ក ព.ស ២៥៦៥ គ.ស ២០២១។

លោកជាម ច័ន្ទសោភ័ណ បានថ្លែងកោតសរសើរដល់ថ្នាក់ដឹកនាំគ្រប់លំដាប់ថ្នាក់ និងមន្ត្រីរាជការសាលាខេត្ត ដែលមានសាមគ្គីភាពផ្ទៃក្នុងបានល្អ ខិតខំប្រឹងប្រែងបំពេញការងារប្រកបដោយឆន្ទៈមនសិការខ្ពស់ និងបន្តអភិវឌ្ឍន៍ចំណេះដឹងពង្រឹងសមត្ថភាព បន្តនាំយកនូវភាពជោគជ័យ ក្នុងភារកិច្ចការងារជូនរដ្ឋបាលខេត្តឲ្យមានប្រសិទ្ធភាពខ្ពស់ ឈរលើគោលការរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាគឺ <<សន្តិភាព អភិវឌ្ឍន៍ រីកចម្រើន បម្រើសេវាសាធារណៈជូនពលរដ្ឋ លឿន រហ័ស មានតម្លាភាព>>។

ក្នុងគ្រានៃការឆ្លងរីករាលដាលនៃជំងឺកូវី-១៩ នេះលោក ជាម ច័ន្ទសោភ័ណ ក៏បានក្រើនរំលឹកអំពាវនាវដល់ថ្នាក់ដឹកនាំ និងមន្ត្រីរាជការទាំងអស់ ត្រូវការពារការឆ្លង នៃមេរោគនេះ ដោយបន្តពាក់ម៉ាស់រក្សាអនាម័យជាប់ជានិច្ច លាងដៃជាមួយអាកុល ឬសាប៊ូ ពោលគឺត្រូវចង់ចាំថា «ការពារប្រសើរជាងព្យាបាល» ពិសេសត្រូវអនុវត្ត( ៣កុំ ៣ការពារ)។

ម្យ៉ាងទៀត ត្រូវបន្តអប់រំផ្សព្វផ្សាយដល់ក្រុមគ្រួសារ និងប្រជាពលដ្ឋឲ្យអនុវត្តនូវិធានការអនាម័យ និងវិធានការផ្សេងៗ តាមការណែនាំរបស់ក្រសួងសុខាភិបាល ក្នុងការការពារទប់ស្កាត់ការឆ្លងរីករាលដាលនៃជំងឺកូវីដ-១៩ ជាពិសេសត្រូវទទួលវ៉ាក់សាំងឲ្យបានគ្រប់២ដង ដើម្បីការពារខ្លួន ក្រុមគ្រួសារ និងសង្គមជាតិ ពីជម្ងឺនេះ។

គួរបញ្ជាក់ថាលោក ជាម ច័ន្ទសោភ័ណ អភិបាលខេត្តត្បូងឃ្មុំ និងលោកជំទាវ តែងតែរៀបចំពិធីជួបសំណះសំណាល ផ្តល់ថវិការ និងប្រេងសាំងលើកទឹកចិត្តជូនមន្ត្រីរាជការ ចំណុះសាលាខេត្ត ចំនួន២ដងក្នុងមួយឆ្នាំ ជារៀងរាល់ឆ្នាំ គឺក្នុងឱកាសនៃពិធីបុណ្យចូលឆ្នាំប្រពៃណីជាតិខ្មែរ និងពីធីបុណ្យភ្ជុំបិណ្ឌ៕SRP

ភ្នំពេញ៖នាយករដ្ឋមន្រ្តី ហ៊ុន សែន បានអញ្ជើញ លោកនាយករដ្ឋមន្រ្តីឡាវ ផនខំា វីផាវ៉ាន់ មកបំពេញទស្សនកិច្ចផ្លូវការនៅកម្ពុជា។ ដូចគ្នានេះដែរ នាយករដ្ឋមន្រ្តី ផនខំា វីផាវ៉ាន់ ក៏បានអញ្ជើញ សម្តេច ហ៊ុន សែន ទៅបំពេញទស្សនកិច្ចផ្លូវការ នៅសាធារណរដ្ឋប្រជាធិបតេយ្យ ប្រជាមានិតឡាវ តាមពេលវេលាសមស្របណាមួយផងដែរ។

ការអញ្ជើញដើម្បីមកទស្សនកិច្ចនៅកម្ពុជា ក្នុងពេល សម្តេចហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានជួបសន្ទនាតាមប្រព័ន្ធវីដេអូ (Video Conference) ជាមួយលិក ផនខាំ វីផាវ៉ាន់ នាយករដ្ឋមន្រ្តី ឡាវ
នៅថ្ងៃទី១២ ខែមេសា ព្រឹកមិញនេះ។

នៅក្នុងជំនួប សម្តេចតេជោនាយករដ្ឋមន្រ្តី បានសម្តែងនូវអំណរសាទរយ៉ាងកក់ក្តៅបំផុត ជូនចំពោះ លោក ផនខាំ វីផាវ៉ាន់ ដែលទើបត្រូវបានបោះឆ្នោតជ្រើសតាំងជានាយករដ្ឋមន្រ្តីនៃសាធារណរដ្ឋប្រជាធិបតេយ្យប្រជាមានិតឡាវ។

សម្តេចតេជោនាយករដ្ឋមន្រ្តី បានសម្ដែងនូវការជឿជាក់ថាផ្អែកលើបទពិសោធន៍ដ៏ធំធេង និងភាពជាអ្នកដឹកនាំដ៏រឹងមាំ សាធារណរដ្ឋប្រជាធិបតេយ្យប្រជាមានិតឡាវ នឹងសម្រេចបានការអភិវឌ្ឍសេដ្ឋកិច្ច-សង្គមកាន់តែល្អប្រសើរ និងវិបុលភាពជូនប្រជាជនឡាវ។

នាយករដ្ឋមន្ត្រីទាំងពីរ បានសម្ដែងនូវការពេញចិត្តទៅវិញទៅមកចំពោះទំនាក់ទំនងល្អជិតស្និទ្ធដោយឈរលើមូលដ្ឋានចំណងមិត្តភាពជាប្រពៃណី និងភាពជាអ្នកជិតខាងល្អ។ ថ្នាក់ដឹកនាំទាំងពីរបានឯកភាពជំរុញបញ្ចប់ឲ្យបានឆាប់នូវសេចក្តីព្រៀងផែនការសកម្មភាពសម្រាប់ភាពជាដៃគូ ដើម្បីបន្តពង្រឹងនូវទំនាក់ទំនងជិតស្និទ្ធនៃកិច្ចសហប្រតិបត្តិការលើគ្រប់វិស័យដូចជា វិស័យនយោបាយ-សន្តិសុខ ពាណិជ្ជកម្ម វិនិយោគ អប់រំ និងវប្បធម៌។

ប្រមុខដឹកនាំនៃប្រទេសទាំងពីរ មានសេចក្តីរីករាយចំពោះកំណើននៃទំហំពាណិជ្ជកម្មទ្វេភាគី ដែលបានកើនឡើងពីត្រឹម១០លានដុល្លារអាមេរិកនៅក្នុងឆ្នាំ២០១៩ រហូតដល់ ១០៤លានដុល្លារអាមេរិក នៅក្នុងឆ្នាំ២០២០។ ដើម្បីជំរុញការវិនិយោគនៅក្នុងប្រទេសទាំងពីរ ថ្នាក់ដឹកនាំទាំងពីរបានឯកភាពពន្លឿនការចរចារលើ “កិច្ចព្រមព្រៀងស្តីពីការចៀសវាងការយកពន្ធត្រួតគ្នា”។

ចំពោះស្ថានភាពនៃការរីករាលដាលនៃជំងឺកូវីដ-១៩ សម្តេចតេជោនាយករដ្ឋមន្រ្តី បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋាភិបាលឡាវក្នុងការគ្រប់គ្រងការរីករាលដាលនៃជំងឺកូវីដ-១៩ ប្រកបដោយជោគជ័យ។ នាយករដ្ឋមន្ត្រីឡាវក៏បានថ្លែងអំណរគុណដ៏ស្មោះចំពោះរាជរដ្ឋាភិបាលកម្ពុជាដែលបានផ្ដល់ជំនួយម៉ាសចំនួន ២លាន និងគ្រឿងបរិក្ខារវេជ្ជសាស្ត្រមួយចំនួន ដើម្បីរួមចំណែកក្នុងការប្រយុទ្ធប្រឆាំងនឹងជំងឺកូវីដ-១៩ នៅប្រទេសឡាវ។ នាយករដ្ឋមន្ត្រីទាំងពីរបានបញ្ជាក់ពីសារៈសំខាន់ក្នុងការពង្រឹងកិច្ចសហការរួមដើម្បីប្រយុទ្ធប្រឆាំងនឹងជំងឺកូវីដ-១៩ និងដោះស្រាយផលប៉ះពាល់អវិជ្ជមាននៃជំងឺនេះ។

ក្រៅពីសហប្រតិបត្តិការទ្វេភាគី ថ្នាក់ដឹកនាំនៃប្រទេសទាំងពីរក៏បានផ្លាស់ប្ដូរគំនិត និងប្ដេជ្ញាធ្វើការយ៉ាងជិតស្និទ្ធនៅក្នុងក្របខណ្ឌកិច្ចសហប្រតិបត្តិការពហុភាគីនានា។ សម្តេចតេជោនាយករដ្ឋមន្រ្តី បានថ្លែងអំណរគុណចំពោះរដ្ឋាភិបាលឡាវ ដែលបានគាំទ្រកម្ពុជាក្នុងការធ្វើជាម្ចាស់ផ្ទះរៀបចំកិច្ចប្រជុំកំពូល ASEM លើកទី១៣ នៅចុងឆ្នាំ២០២១ និងជាប្រធានអាស៊ាន នៅឆ្នាំ២០២២។

ក្នុងឱកាសដ៏មហានក្ខត្តឬក្សនៃពិធីបុណ្យចូលឆ្នាំថ្មីប្រពៃណីជាតិខ្មែរ និងឡាវ ដែលនឹងប្រព្រឹត្តទៅក្នុងពេលតែមួយ នាយករដ្ឋមន្រ្តីទាំងពីរបានជូនពរគ្នាទៅវិញទៅមកឲ្យទទួលបានសុខភាពល្អ វិបុលភាព និងសុភមង្គលដល់ប្រជាជនកម្ពុជា និងឡាវ៕SRP

ខេត្តសៀមរាប៖លោក សឹង្ហ សំរឹទ្ធិ អនុប្រធាន សមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប នៅថ្ងៃច័ន្ទ ទី ១២ ខែមេសា ឆ្នាំ ២០២១ នេះ បានដឹកនាំសមាជិកចុះជួយសម្របសម្រួលដល់គ្រួសារយោធិន និង ប្រជាពលរដ្ឋប្រមាណជាង ៥០០នាក់ ដែលស្ម័គ្រចិត្តទទួលការចាក់វ៉ាក់សាំងការពារមេរោគកូវីដ -១៩ នៅមន្ទីរពេទ្យយោធភូមិភាគទី៤៕SRP

ខេត្តសៀមរាប៖លោកសារឹម វ៉ាន់ថន អតីតកីឡាករប្រដាល់សេរី និងបក្ខពួកម្នាក់ទៀត ត្រូវបាន សមត្ថកិច្ចចាប់ខ្លួន ករណីឆក់ត្រីខុសច្បាប់​នៅក្នុងតំបន់ហាមឃាត់។

របាយការណ៍របស់ប៉ុស្តិ៍នគរបាលសង្កាត់ជ្រាវបានឲ្យដឹងថា នៅយប់ថ្ងៃទី១១ ខែមេសា ឆ្នាំ២០២១ បុរសឈ្មោះ សារឹម វ៉ាន់ថន និងមិត្តភ័ក្រ ម្នាក់ទៀត បានផឹកស៊ីជុំគ្នា នៅចុងភូមិបុស្សក្រឡាញ់ ខាងត្បូង ដែលមានម្ចាស់ផ្ទះឈ្មោះទិត្យ ក្នុងការផឹកស៊ីនេះចាប់ផ្តើមនៅម៉ោងប្រហែល ២០និង០០នាទី លុះផឹកដល់ម៉ោងប្រហែល២២និង៣០នាទី ក៏បានខ្ចីដុំឆក់ពីម្ចាស់ផ្ទះឈ្មោះទិត្យ ជិះម៉ូតូ០២គ្រឿង គ្នា០២នាក់ ចេញទៅឆក់ត្រីនៅចំណុចតំបន់បុស្ស ស្ថិតក្នុងភូមិសាស្រ្ត ចុងស្រែទំនប់ហាប្រា ឈៀងខាងលិច សង្កាត់ជ្រាវ ក្រុងសៀមរាប ខណៈពេលកំពុងចាប់ផ្ដើមឆក់ត្រី ត្រូវបានប្រជាសហគមន៍ សង្កាត់ជ្រាវ ប្រចាំការនៅគោលដៅនោះស្រាប់ ចាប់នាំខ្លួន និងប្រគល់ឲ្យប៉ូលិសប៉ុស្តិ៍ជ្រាវតែម្ដង។

បុរសទាំងទាំងពីរនាក់ ដែលចាប់ខ្លួន ទី១មានឈ្មោះ សារឹម វ៉ាន់ថន ភេទប្រុស អាយុ ៤១ឆ្នាំ មុខរបរ កីឡាប្រដាល់ ទីលំនៅបច្ចុប្បន្ន ភូមិបុសក្រឡាញ់សង្កាត់ជ្រាវ ក្រុងសៀមរាប និងម្នាក់ទៀតនៅភូមិ ជ្រាវសង្កាត់ជ្រាវ ក្រុងសៀមរាប។ ករណីនេះសមត្ថកិច្ច បានរឹបអូស សម្ភារ និងមធ្យោបាយសម្រាប់ប្រព្រឹត្តបទល្មើស ដូចជា ដុំអាំភ្លីឆក់ ០១គ្រឿង អាគុយ ០១គ្រឿងម៉ូតូ ០២គ្រឿង។

ពាក់ព័ន្ធការចាប់ខ្លួនបុរសទាំង២នាក់ មន្ត្រីរដ្ឋបាលជលផល បានប្រាប់អ្នកយកព័ត៌មានថា ករណីនេះ សមត្ថកិច្ចកំពុងសាកសួរបន្ថែម និងកសាងសំណុំរឿងបញ្ជូនទៅតុលាការ នៅរសៀលថ្ងៃទី១២ខែមេសានេះ។ ទោះជាយ៉ាងណា មហាជនជាច្រើនបានសុំសំណូមពរដល់អាជ្ញាធរសមត្ថកិច្ចជំនាញ មេត្តាយោគយល់ ដល់ពួកគាត់ទាំង២នាក់ផង ដោយសុំត្រឹមធ្វើកិច្ចសន្យាឲ្យឈប់ប្រព្រឹត្តទៅបានហើយ។ ដោយអ្នកទាំង២មិនមែនជាអ្នករកស៊ីឆក់ត្រីនោះទេគឺពួកគាត់អត់មានអ្វីក្លែមក៏ខ្ចីរបស់ឆក់គេ ទៅឆក់ដើម្បីយកត្រីមកក្លែមតែប៉ុណ្ណោះ៕SRP

ខេត្តកំពង់ចាម​៖គណកម្មការ​ខេត្ត​ប្រយុទ្ធ​ប្រឆាំង​នឹង​ជំងឺ​កូវីដ​-១៩​​ នៅថ្ងៃ​ទី​១២ ខែមេសា​ ឆ្នាំ​២០២១​នេះ​ បាន​ទទួល​អំណោយ​ជា​សម្ភារ​ និង​ថវិកា​ ពី​​សប្បុរសជន​។

អំណោយ​នេះ​​ ​លោក​ ម៉ៅ​ ហ៊ួរ​ និង​លោកស្រី​ បានជួយឧបត្ថម្ភ​ ថវិកា​២លានរៀល​ មីម៉ាម៉ា​ ចំនួន​២០កេស​ធំ​ ទឹក​បរិសុទ្ធ​ ១០០​កេស​ និង​ទឹក​ផ្លែឈើ​ ចំនួន​២០កេស​.​
លោក​ នៅ​ សារី​ ម្ចាស់​ក្រុមហ៊ុន​ រ៉ាកាននាហ្គា​(ខេមបូឌា​)​ ឯ​.ក​ ឧបត្ថម្ភ​ ​ម៉ាស​ ចំនួន​២៥០០០​ម៉ាស​ និង​ទឹក​បរិសុទ្ធ​ ១០កេស​.​
លោក​ ស្លេះពុន​ យ៉ាម៉ីន​ និង​លោកស្រី​ ​បាន​ខិតខំ​ កៀងគរ​រក​ជំនួយ​ ដើម្បី​ យកមក​ចែកជូនប្រជាពលរដ្ឋ​ ក្នុង​ក្រុងកំពង់ចាម​ ចំនួន​៩០០​គ្រួសារ​។

លោក អ៊ុន ចាន់ដា ​ប្រធាន​គណកម្មការ​ខេត្ត​ប្រយុទ្ធ​ប្រឆាំង​នឹង​ជំងឺ​កូវីដ​-១៩​​ បាន​ថ្លែងអំណរគុណ​ និង​ជូនពរ​ដល់​​ម្ចាស់​ក្រុមហ៊ុន​ សប្បុរសជន​​​​​​​​​ ដែល​បាន​​គាំទ្រ​​ឧបត្ថម្ភ​ ជា​សម្ភារ​ និង​ថវិកា​​ ជូន​ដល់គណៈកម្មការ​ប្រយុទ្ធ​ប្រឆាំង​នឹង​ជំងឺ​កូវីដ​-១៩​ ដែលជាការរួមចំណែក យ៉ាងសំខាន់ ក្នុងសកម្មភាពនានា ដើម្បីប្រយុទ្ធ​ប្រឆាំង​នឹងជំងឺកូវីដ-១៩ ហើយ​ក៏ជាការជួយរំលែកទុក្ខលំបាក​ និង​ការខ្វះខាត របស់បងប្អូន​ពលករ​ចំណូល​ស្រុក​ ក៏ដូចជា​​អ្នក​ពាក់ព័ន្ធ​ព្រឹត្តិការណ៍​២០កុម្ភៈ​ ដែល​កំពុង​​ធ្វើចត្តាឡីស័ក​ ផង​ដែរ​៕SRP

ខេត្តសៀមរាប៖លោក សុខ តុញ និងភរិយា ព្រមទាំងក្រុមគ្រួសារ ទាំងអស់ សូមគោរពជូនពរ ឯកឧត្តម អ្នកឧកញ៉ាបណ្ឌិត សៀង ណាំ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ៕SRP

ខេត្តព្រះវិហារ៖សមត្ថកិច្ចបានចាប់ខ្លួនមេឆ្នោតខុសច្បាប់ម្នាក់ប្រចាំក្រុងព្រះវិហារ បន្ទាប់ពីបានធ្វើសកម្មភាពរាប់ឆ្នាំមកហើយ។

ការបង្ក្រាបនេះធ្វើឡើងនៅរសៀល ថ្ងៃទី១១ ខែមេសា ម្សិលមិញ នៅចំណុចភូមិហ្មសែត សង្កាត់កំពង់ប្រណាក ក្រុងព្រះវិហារ ដឹកនាំដោយលោក វុធ សាវី ព្រះរាជអាជ្ញារងអមសាលាដំបូងខេត្តព្រះវិហារ។

ព្រះរាជអាជ្ញារងអមសាលាដំបូងខេត្តព្រះវិហារ លោក វុធ សាវី បានអោយដឹងថា មេឆ្នោតដែលត្រូវចាប់ខ្លួននេះមានឈ្មោះឈ្មោះចែអូន នឹងប្តីឈ្មោះ ហ័ត មានទីលំនៅភូមិហ្មសែត សង្កាត់កំពង់ប្រណាក ក្រុងព្រះវិហារ។ ករណីនេះសមត្ថកិច្ចបានដកហូតវត្ថុតាង មានម៉ាស៊ីនគិតលេខ ក្រដាស់កត់កន្ទុយលេខ សៀវភៅកត់លេខ នឹងវត្ថុតាងមួយចំនួន។

លោកបានបន្តរថា មេឆ្នោតរូបនេះ បានលួចលាក់កត់ឆ្នោតជាយូណាស់មកហើយ ប៉ុន្តែមិនដែលចាប់បាននោះទេ គាត់នៅតែធ្វើសកម្មភាពកត់ឆ្នោតដដែល រហូតដល់ថ្ងៃឃាត់ខ្លួននេះតែម្តង។

សូមបញ្ជាក់ថា ជនសង្ស័យមេឆ្នោត ត្រូវបានកងរាជអាវុធហត្ថខេត្តព្រះវិហារ កសាងសំណុំរឿងបញ្ជូនទៅកាន់សាលាដំបូងខេត្តដើម្បីអនុវត្តតាមផ្លូវច្បាប់៕SRP

ភ្នំពេញ៖អ្នកស្ម័គ្រចិត្ត ចាក់វ៉ាក់សាំង«ទីមួយលាន​» បានទទួលអំណោយដ៏ថ្លៃថ្លា របស់ នាយករដ្ឋមន្ត្រី ហ៊ុន​ សែន​។

គណកម្មការចំពោះកិច្ចចាក់វ៉ាក់សាំងកូវីដ-១៩​ ក្នុងក្របខណ្ឌទូទាំងប្រទេស​ នៅថ្ងៃទី១១​ ខែមេសា​ ឆ្នាំ២០២១​ ម្សិលមិញ បានរកឃេីញអ្នកដែលស្ម័គ្រចិត្ត ចាក់វ៉ាក់សាំង«ទីមួយលាន​» ដែលមានដូចខាងក្រោម៖
-​ លោក​ ប៉ាន់​ សុវណ្ណរិទ្ធិ​ ភេទប្រុសអាយុ​ ៣៦ឆ្នាំ​ មានទីលំនៅ​ ផ្ទះល្វែងលេខ២​ ព្រែកព្រីង២​ សង្កាត់ចោមចៅខណ្ឌពោធិសែនជ័យ។
-​ មុខរបរ:​ លក់ដូរតាមហាង​
-​ បានទៅចាក់វ៉ាក់សាំងនៅ​ សាលាសន្ធរម៉ុក​ សង្កាត់ទឹកល្អក់១​ រាជធានីភ្នំពេញ
-​ មានភរិយា​ ជាស្ត្រីមេផ្ទះ​ និងមានកូន​ ៣នាក់​ (ស្រី១​ ប្រុស​ ២)។

លោកជំទាវ ឱ​ វណ្ណឌីន​ រដ្ឋលេខាធិការ​ក្រសួងសុខាភិបាល​ និងជាប្រធានគណកម្មការចំពោះកិច្ចចាក់វ៉ាក់សាំងកូវីដ-១៩​ ក្នុងក្របខណ្ឌទូទាំងប្រទេស​ (គ.វ.ក-១៩)) នៅព្រឹកថ្ងៃទី១២​ ខែមេសា​ នេះបាន នាំយកថវិកាចំនួន​ ៥លានរៀល​ ដែលជាប្រាក់រង្វាន់ត្រូវឆ្នោតចាក់វ៉ាក់សាំងកូវីដ-១៩​ និងជាអំណោយដ៏ថ្លៃថ្លារបស់​ សម្ដេចហ៊ុន​ សែន​ ទៅប្រគល់ជូនដល់ជ័យលាភីចាក់វ៉ាក់សាំងកូវីដ-១៩​ «ទីមួយលាន​» តាមការណែនាំដ៏ខ្ពង់ខ្ពស់ របស់នាយករដ្ឋមន្ត្រី ហ៊ុន សែន។

គួរចងចាំថា​ អ្នកចាក់វ៉ាក់សាំងលេខរៀងទី១​ គឺកូនប្រុសច្បង របស់សម្តេច ហ៊ុនសែន គឺ​លោក ហ៊ុន​ ម៉ាណែត​ អគ្គមេបញ្ជាការរងនៃកងយោធពលខេមរភូមិន្ទ​ និងជាមេបញ្ជាការកងទ័ពជេីងគោក​ រីឯ​ អ្នកដែលមានលេខរៀងចាក់វ៉ាក់សាំងកូវីដ-១៩​ «ទីមួយលាន​» គឺលោក​ ប៉ាន់​ សុវណ្ណរិទ្ធិ​ ជាអ្នកលក់ដូរនៅរាជធានីភ្នំពេញ។

សូមបងប្អូនប្រជាពលរដ្ឋ ស្ម័គ្រចិត្តទៅចាក់វ៉ាក់សាំងទៅតាមវេនរៀងៗខ្លួន​ ឱ្យបានគ្រប់គ្នា​ ដេីម្បីការពារភាពធ្ងន់ធ្ងរនៃជំងឺកូវីដ-១៩​ កត់បន្ថយនូវអត្រាសម្រាកពេទ្យ​ និងកាត់បន្ថយអត្រាស្លាប់ដោយសារជំងឺដ៏កាចសាហាវនេះ។

ចូលឆ្នាំនៅផ្ទះ​ (New Year at Home)!

ខេត្តសៀមរាប៖សមាជិកសមាគមអតីតយុទ្ធជនខេត្តសៀមរាប ចំនួន៩៣៣នាក់ បានទទួលការ ចាក់វ៉ាក់សាំង ស៊ីណូវ៉ាក់ បង្ការជំងឺកូវីដ១៩។

ការទទួលបានចាក់វ៉ាក់សាំងបង្ការនេះ នៅមន្ទីរពេទ្យបង្អែកខេត្តសៀមរាប នាថ្ងៃទី១១ ខែមេសា ម្សិលមិញ ដោយមានការអញ្ជើញចុះពិនិត្យ ពីលោក ទៀ សីហា អភិបាលខេត្ត។

លោកស៊ិន ភាត់ ប្រធានសមាគមអតីតយុទ្ធជនកម្ពុជាខេត្ត និង ជាមេបញ្ជាការតំបន់ប្រតិបត្តិការសឹករងសៀមរាប បានឲ្យដឹងថា ថ្ងៃនេះ សមាជិក សមាគម អតីតយុទ្ធជនកម្ពុជា ក្នុងក្រុងសៀមរាប បានទទួលចាក់នៅមន្ទីរពេទ្យបង្អែកខេត្ត និង បងប្អូននៅតាមបណ្តាស្រុកទាំង១១ ចាក់នៅតាមមន្ទីរពេទ្យបង្អែកស្រុក និង មណ្ឌលសុខភាពមួយចំនួន ដែលបានកំណត់។

លោក ទៀ សីហា អភិបាលខេត្ត បានឲ្យដឹងថាការចាក់វ៉ាក់សាំងប្រឆាំងជំងឺកូវីដ១៩ (ស៊ីណូវ៉ាក់) ជូនដល់សមាជិកសមាគមអតីតយុទ្ធ ជនកម្ពុជាខេត្តនាពេលនេះ តាមគោលការណ៍ស្ម័គ្រចិត្ត មិនគិតកម្រៃ និង មិនប្រកាន់និន្នាការអ្វីនោះឡើយ។ លោកក៏បាន ធ្វើការណែនាំ និង ផ្តាំផ្ញើដល់បងប្អូន ដោយបានបញ្ជាក់ថា ទោះបីបានទទួលការចាក់វ៉ាកសាំងរួច ក៏ត្រូវប្រតិបត្តិឲ្យបានទៅតាមវិធានការណ៍ របស់ប្រមុខរាជរដ្ឋាភិបាល ៣កុំ ៣ការពារ ព្រមទាំងការណែនាំរបស់ក្រសួងសុខាភិបាលដើមី្បធ្វើឲ្យវ៉ាក់សាំងដែលបានទទួលពេលនេះ មានប្រសិទ្ធភាព ក្នុងការប្រយុទ្ធប្រឆាំងវីរ៉ុសកូវីដ -១៩។

លោកបានធ្វើការអំពាវនាវ ដល់បងប្អូន ចូលរួមធ្វើការផ្សព្វផ្សាយ អំពីវិធានការ របស់រដ្ឋបាលខេត្តសៀមរាប អំពីបំរាមគោចរនៅពេលយប់នៅក្រុងសៀមរាប ក៏ដូចតាមបណ្តាស្រុក ចាប់ពីម៉ោង២០ រហូតដល់ម៉ោង៥ ទៀបភ្លឺ ក្នុងគោលដៅ ដើមី្បប្រយុទ្ធប្រឆាំងបង្កាទប់ស្កាត់ ការឆ្លងរីករាលដាលនៃជំងឺកូវីដ-១៩ នៅក្នុងសហគមន៍៕SRP