ខេត្តសៀមរាប៖ ភ្លើងឆេះវាសស្មៅនៅក្នុងដីឡូតិ៍មួយកន្លែងស្ថិតនៅភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាបបង្កភាពភ័យខ្លាចដល់ប្រជាពលរដ្ឋ ព្រោះទីតាំងឆេះនេះ នៅជិតស្ថានីសាំង និងហ្គាស។  ករណីនេះ បានកើតឡើងនៅវេលាម៉ោងប្រមាណជាង៣រសៀលថ្ងៃនេះ។ ប្រជាពលរដ្ឋដែលមានលំនៅឋានជិតកន្លែងភ្លើងឆេះនេះ បានឱ្យដឹងថា ពួកគាត់មិនបានដឹងថា ភ្លើងនេះឆេះដោយសារគេដុតឬយ៉ាងណានោះទេ ព្រោះពេលឃើញភ្លើងឆេះខ្លាំងទៅហើយ។ ក្រុមប្រជាពលរដ្ឋក៏បានថ្លែងការអគុណដល់សមត្ថកិច្ចដែរ ដែលបានមួយជួយអន្តរាគមន៍ពន្លត់ភ្លើងនេះបានទាន់ពេលវេលា។  លោកវរសេនីទោ ឆឹង សុភា អធិការរងនគរបាលក្រុងសៀមរាប បានឱ្យដឹងថា ករណីអគ្គិភ័យនេះសមត្ថកិច្ចបានប្រើប្រាស់ទឹកអស់ចំនួនពីររថយន្តទើបរលត់ទៅវិញ។  លោកអធិការរងបាន អំពាវនាវឱ្យប្រជាពលរដ្ឋមានការប្រុងប្រយ័ត្នចំពោះការដុតសំរាម ដុតព្រៃរកសត្វ និងភ្លើងធូបទៀន ព្រោះបច្ចុប្បន្ននេះ ក្តៅខ្លាំងងាយនិងបង្កឱ្យមានអគ្គីភ័យណាស់៕SRP

ខេត្តសៀមរាប៖ នៅទីបំផុតក្រុមមន្ត្រីចម្រុះខេត្តសៀមរាបនៅព្រឹកមិញនេះបានសហការណ៍គ្នាចុះពិនិត្យការដ្ឋានជីកស្តារត្រពាំងក្រុះ នៅខាងក្រោមទំនប់៧៨ ស្ថិតនៅក្នុងភូមិតាចេក សង្កាត់ជ្រាវ ក្រុងសៀមរាប ។ មន្ត្រីដែលចុះទៅកន្លែងពិនិត្យនោះបានឲ្យដឹងថា ត្រពាំងក្រុះនេះ មានជម្រៅតែ១.៥ ម៉ែត្រនិងមានទំហំ ៤០ម៉ែត្រx៤០ម៉ែត្រ អាចម៍ដីដែលស្តារចេញមក គឺមិនបានយកទៅធ្វើអាជីវកម្មនោះទេ គឺយកមកធ្វើជាទំនប់បិទជុំវិញមាត់ត្រពាំងនេះ ដើម្បីរក្សាទឹកទុក ប្រើប្រាស់ នារដូវប្រាំង ហើយត្រពាំងនេះគឺជាសម្បត្តិរដ្ឋ មិនអនុញ្ញាតឲ្យបុគ្គលណា រំលោភយកធ្វើជាកម្មសិទ្ធិឯកជននោះឡើយ។ ការចុះត្រួតពិនិត្យនេះ ក្រោយមាន ព័ត៌មានតាមហ្វេសប៊ុក បង្ហោះឲ្យអាជ្ញាធរជួយពិនិត្យមើលដោយលើកឡើងថាមានបុគ្គលម្នាក់បានជីកស្តារត្រពាំងបុរាណនេះ ដោយខុសច្បាប់ និងបានបំផ្លាញព្រៃលិចទឹកជាដើម។

លោកក្អោប រ៉ន ចៅសង្កាត់ជ្រាវ បានមានប្រសាសន៍ថា ក្រុមការងារចម្រុះបានសម្រេចឲ្យថែរក្សាត្រពាំងទុកជាសម្បត្តិរដ្ឋ ដោយមិនឲ្យត្រពាំងនេះធ្លាក់ក្នុងកណ្តាប់ដៃបុគ្គលឯកជននោះឡើយ។លោកបន្តថា ក្រុមការងារបានថ្លែងអំណរគុណចំពោះអាជ្ញាធរសង្កាត់និងសប្បុរសជន ដែលបានរួមគ្នាស្តារត្រពាំងនេះឲ្យបានជ្រៅសម្រាប់ទុកទឹកឲ្យពលរដ្ឋប្រើប្រាស់និងមិនងាយបាត់បង់។ព្រោះបើសិនជាត្រពាំងរ៉ាក់ អាចនិងមានឈ្មួញឈូសឆាយលប់ទុកជាកម្មសិទ្ធិ។

បើតាមការលើកឡើង លោក សំ សារ៉េត ប្រធានការិយាល័យអភិរក្សប្រាសាទ នៃអាជ្ញាធរជាតិអប្សរា បានលើកឡើងថា ការជីកស្តារត្រពាំងនេះពុំមានផលប៉ះពាល់ ឬបាត់បង់ទ្រង់ទ្រាយដើមនៃត្រពាំងបុរាណនោះទេ ហើយការស្តារនេះ ក៏បានរួមចំណែកថែរក្សានិងគ្រប់គ្រងកុំឲ្យមានការរំលោភបំពានពីប្រជាពលរដ្ឋផងដែរ៕SRP

ខេត្តសៀមរាប៖ សេចក្ដីរាយការណ៍បានឲ្យដឹងថាបុរសម្នាក់បានដេកស្លាប់ នៅលើផ្ទះខ្លួនឯង។ ហេតុការណ៍បានកើតឡើង
នៅវេលាម៉ោង០១រំលងអាធ្រាតឈានចូលយប់ថ្ងៃទី២២ ខែមេសាឆ្នាំ២០២០ ស្ថិតនៅភូមិសំរោង ឃុំលាងដៃ ស្រុកអង្គរធំ។
ជនរងគ្រោះឈ្មោះជុល មាឃ ភេទប្រុស អាយុ២៧ឆ្នាំ។ ចំណែកប្រពន្ធឈ្មោះ ទៀង ផា ភេទ ស្រីអាយុ២៦ឆ្នាំ។

យោងតាមការបំភ្លឺ របស់ប្រពន្ធជនរងគ្រោះ បានប្រាប់សមត្ថកិច្ចថាកាលពីល្ងាចប្តីបានទៅបង់ត្រីមកវិញធ្វើហូបជុំគ្នារហូតដល់ម៉ោង១០យប់គាត់ក៏ហូបម្តងទៀតរួចដេកវិញ។ លុះវេលាម៉ោងកើតហេតុរូបគាត់ជាប្រពន្ធបានឭសម្រែកស្រែកឃឺតៗ។ គាត់ជាប្រពន្ធក៏ជួយរឹតហើយហៅបងប្អូនមកជួយមើលតែបានដាច់ខ្យល់ស្លាប់បាត់ទៅហើយ។ ករណីនេះសមត្ថកិច្ចបានបញ្ជាក់ថាតាមការធ្វើកោសល្យវិច័្ចយ របស់នគរបាល និងពេទ្យមណ្ឌលឃុំគឹមូលហេតុបណ្ដាលមកពីខ្យល់គរស្លាប់៕SRP

ខេត្តកំពង់ចាម៖លោកស្រីស៊ុនចន្ថា មេឃុំកោះសូទិននិងលោកហ៊ាបសេរីវុធស្ថាបនិកអង្គការរ​មូលនិធិ​គាំទ្រ​កុមារ​ នៅព្រឹកមិញបានដឹកនាំមន្ត្រីពាក់ព័ន្ធនិងដោយមានការចូលរួមពីសហភាពសហព័ន្ធយុវជនកម្ពុជាបាននាំយក សាប៊ូនិងខិត្តប័ណ្ណចែកជូនបងប្អូនប្រជាពលរដ្ឋទៅដល់ខ្នងផ្ទះប្រមាណជាង២០០០គ្រូសារនៅក្នុងឃុំ កោះសូទិន ស្រុកកោះសូទិន ខេត្តកំពង់ចាម ក្នុងគោលបំណងចូលរួមប្រយុទ្ធប្រឆាំងនឹងការឆ្លងរាតត្បាតនៃវីរុសកូរ៉ូណា។

លោកស្រីស៊ុនចន្ថាមេឃុំកោះសូទិនបានឲ្យដឹងថាក្នុងការបើកយុទ្ធនាការផ្សព្វផ្សាយសារអប់រំអំពីវិធានការ ការពារ ទប់ស្កាត់ការឆ្លងរីករាលដាលនៃជំងឺកូវីដ១៩នេះដោយមានការចូលរួមចំណែកពីអង្គការរមូលនិធិគាំទ្រកុមារ ដែលបានឧបត្ថម្ភជាសាប៊ូជាង២០០០ដុំសម្រាប់ចែកជូនបងប្អូនប្រជាពលរដ្ឋទៅតាមខ្នងផ្ទះដើម្បីឲ្យមានការ យល់ដឹងបន្ថែមពីការធ្វើអនាម័យជាប្រចាំចៀសវាងការឆ្លងជំងឺផ្សេងៗជាពិសេសគឺជំងឺកូវីដ១៩នេះតែម្ដង។
ក្នុងយុទ្ធនាការនេះដែរក្រុមការងារក៏បានធ្វើការផ្សព្វផ្សាយដោយផ្តើមចេញពីការថែរក្សាអនាម័យផ្ទាល់ខ្លួនក្នុង គ្រួសារក៏ដូចជានៅក្នុងសហគមន៍ ទាំងមូលពោលគឺ ត្រូវចៀសវាងការជួបជុំគ្នាក្នុងពិធីធំៗនិងត្រូវពាក់ម៉ាស់នៅ ទី ប្រជុំជនព្រមទាំងលាងសម្អាតដៃដោយសាប៊ូ អាល់កុល ឬជែលសម្លាប់មេរោគ និងវាស់ស្ទង់ កម្ដៅជារៀងរាល់ ថ្ងៃ ស្របតាមការណែនាំ របស់ក្រសួងសុខាភិបាល៕SRP

ខេត្តកំពង់ចាម៖ លោកអ៊ុនចាន់ដាអភិបាលខេត្តកំពង់ចាមនិងជាប្រធានគណៈកម្មការប្រយុទ្ធនិងជំងឺកូវីដ-១៩ ខេត្ត នៅរសៀលថ្ងៃមិញនេះបានថវិកាចំនួន១លានរៀល,ម៉ាស់១.០០០,សាប៊ូ១,០០០ដុំជែលលាងដៃ១០០ដប និងភេសជ្ជៈ អាដេចំនួន១០កេះ ពីលោកមាស ធីបញ្ញា និងសហការី។ ក្នុងឱកាសនោះដែរលោកអ៊ុន ចាន់ដា បានថ្លែងអំណរគុណ ដល់លោកមាស ធីបញ្ញា និងសហការីទាំងអស់ ដែលបានចូលរួមចំណែកក្នុងការឧបត្ថម្ភជាថវិកាសម្រាប់គណៈកម្មការប្រយុទ្ធនឹងជំងឺកូវីដ១៩ខេត្តកំពង់ចាម យកទៅប្រើប្រាស់ តាមតម្រូវការចាំបាច់ក្នុងយុទ្ធនាការនានាដើម្បី រួមគ្នាបង្ការទប់ស្កាត់ការឆ្លងរីករាលដាលនៃ ជំងឺដ៏កាចសាហាវនេះ។

គួរបញ្ជាក់ថាខេត្តកំពង់ចាមកន្លងមកមានអ្នកកើតជំងឺកូវីដ១៩សុទ្ធសឹងតែជាជនបរទេសសរុបចំនួន១៦នាក់។ តែរហូតមកដល់ពេលនេះ គឺក្រុមគ្រូពេទ្យខេត្តកំពង់ចាមបានធ្វើការព្យាបាលអ្នកផ្ទុកវីរុសទាំងនោះបានជាសះស្បើយអស់ហើយ។
ជាមួយគ្នានោះអាជ្ញាធរខេត្តកំពង់ចាមនៅតែបន្តការប្រុងប្រយ័ត្នខ្ពស់ដដែលដោយបានបំពាក់ម៉ាស៊ីនស្វ័យប្រវត្តិ បាញ់សម្លាប់មេរោគនៅតាមច្រកចេញចូលសំខាន់ៗដើម្បីសម្រួលដល់ការធ្វើអនាម័យព្រមទាំងបានបន្តការ ផ្សព្វផ្សាយសារអប់រំអំពីការធ្វើអនាម័យដើម្បីចៀសផុតពីការឆ្លងជំងឺនេះ៕SRP

ខេត្តសៀមរាប៖អធិការនគរបាលក្រុងសៀមរាប ថានឹងឲ្យនាយប៉ុស្ដិ៍ ប្ដឹងហ្វេសប៊ុក “សារព័ត៌មានជោគជ័យ” បើពុំមានអាជ្ញាប័ណ្ណ នៅក្រសួង ក្រោយអាខោននេះបង្ហោះថាមានល្បែងស៊ីសង អាប៉ោង នៅក្រោយវត្តពោធិ៍ក្រោម។

ខាងក្រោមនេះជាខ្លឹមសាររបស់របស់ផេកអធិការនគរបាលក្រុងសៀមរាប៖
សូមបំភ្លឺជូន សាធារណៈជន និងអ្នកសារព័ត៌មាននៅថ្ងៃទី២១ខែមេសាឆ្នាំ២០២០មានផេកឈ្មោះសារព័ត៌មានជោគជ័យ បានសរសេរនិងផុសផ្សព្វផ្សាយថា មានទីតាំងបនល្បែងបាញ់អាប៉ោងមួយកន្លែង នៅក្រោយវត្តពោធិ៍ក្រោម សង្ស័យ ជាឆ្នាំងបាយលោកនាយប៉ុស្តិ៍នគរបាលសង្កាត់សៀមរាបហើយមើលទៅ?

ករណីខាងលើនេះ ក្រោយពីទទួលព័ត៌មានពី អ្នកសារព័ត៌មាន កម្លាំងប៉ុស្តិ៍នគរបាលរដ្ឋបាល សៀមរាប ដឹកនាំដោយលោកនាយប៉ុស្តិ៍ ចុះទៅពិនិត្យជាក់ស្ដែងភ្លាមៗ ឃើញថាពុំមានការបាញ់ អាប៉ោង ដូចជាការចោទប្រកាន់នៅក្នុងការរាយការណ៍នោះទេ ។
ដូច្នេះព័ត៌មានខាងលើនេះ គឺជាព័ត៌មានខ្វះការសាកសួរ បញ្ជាក់ពីលោកនាយប៉ុស្តិ៍ និងខ្វះប្រភពមូលដ្ឋានក្នុងការសរសេរ ហើយយកទៅផ្សាយដោយខ្វះវិជ្ជាជីវៈនិងក្រមសីលធម៌ ។

យើងខ្ញុំនឹង យកផេកនេះ ជូនទៅខាងអគ្គនាយកសារព័ត៌មាននិងសន្ទស្សន៍ ដើម្បីធ្វើការស្រាវជ្រាវ រកអាជ្ញាប័ណ្ណ បើពុំមានអាជ្ញាប័ណ្ណស្ថិតនៅក្នុងការគ្រប់គ្រងដោយក្រសួងនោះទេ យើងខ្ញុំនឹងឱ្យលោកនាយប៉ុស្តិ៍ ដាក់បណ្ដឹងម្ចាស់ផេក ទៅតាមនីតិវិធីនៃច្បាប់។ សូមអរគុណ

ពាក់ព័ន្ធករណីខាងលើនេះ ក៏ឃើញសារព័ត៌មានតាមបណ្ដាញសង្គមមួយចំនួន ក៏បានបង្ហោះចែកចាយ ថាមានល្បែងស៊ីសងនៅតំបន់ខាងលើនោះដែរ។
ម្ចាស់អាខោនហ្វេសប៊ុក”សារព័ត៌មានជោគជ័យ” បានប្រាប់បណ្ដាញសារព័តមាន”សៀមរាបប៉ុស្តិ៍” ថា ព័ត៌មានហ្នឹង លោកបានចម្លងពីគេមក។ឃើញគេបង្ហោះ។ដូច្នេះលោកលុបចេញវិញហើយ៕SRP

ភ្នំពេញ៖ក្រសួងមហាផ្ទៃ បានសម្រេច ផ្អាកជាបណ្ដោះអាសន្ន អង្គការការពារ និងអភិរក្សសត្វ ព្រៃឈើ ជលផលកម្ពុជា។ នេះបើយោងតាម សេចក្ដីប្រកាស របស់ក្រសួងមហាផ្ទៃ ចុះហត្ថលេខា ដោយសម្ដេចក្រឡាហោមស ខេង នៅថ្ងៃទី២១ ខែមេសាឆ្នាំ២០២០នេះ៕SRP

ខេត្តកំពង់ចាម៖លោកយី វណ្ណៈ អភិបាល ស្រុក កោះសូទិន បានរំលឹកឡើងវិញអំពីប្រវត្តិជូរចត់ ពីអតីតកាល សម័យប៉ុលពត៣ឆ្នាំ៨ខែ២០ថ្ងៃ ដែល ជំនឿសាសនា ទាំងអស់ត្រូវបានបំបិទសិទ្ធសេរីភាព មិនថាព្រះពុទ្ធសាសនាឬឥស្លាមសាសនាឡើយ។
លោកយី វណ្ណ: ថា ដោយនយោបាយឈ្នះៗ របស់សម្តេចតេជោ ហ៊ុន សែន ទើបធ្វើអោយប្រទេសកម្ពុជា ទទួលបានសុខសន្តិភាពនិងការអភិវឌ្ឍឡើងវិញ។ ក្នុងនោះជំនឿសាសនា ក៏រស់ឡើងវិញ ហើយពុកម៉ែបបងប្អូនខ្មែរ-ឥស្លាមក៏អាចគោរព ប្រកាន់ទំនៀមទំលាប់របស់ខ្លួនបានរហូតដល់សព្វថ្ងៃនេះ។  លោកអភិបាលស្រុកក៏បាន អំពាវនាវដល់បងប្អូន ប្រជាពលរដ្ឋទាំងអស់សូម ឲ្យមានការចូលរួមបង្ការទប់ស្កាត់ការរីករាលដាល នៃជំងឺកូវីដ១៩ ដោយផ្តើមចេញពីការថែរក្សាអនាម័យផ្ទាល់ខ្លួន ក្នុងគ្រួសារក៏ដូចជានៅក្នុង សហគមន៍ទាំងមូលពោលគឺ ត្រូវជៀសវាងការជួបជុំគ្នាក្នុងពិធីធំៗនិងត្រូវពាក់ម៉ាស់ នៅទី ប្រជុំជនព្រមទាំង លាងសម្អាតដៃដោយសាប៊ូ អាល់កុល ឬជែលសម្លាប់មេរោគ និងវាស់ស្ទង់ កម្ដៅ ជារៀងរាល់ថ្ងៃ ស្របតាមការណែនាំ របស់ក្រសួងសុខាភិបាល។

លោកយី វណ្ណ: ថ្លែងយ៉ាងដូច្នេះ នៅព្រឹកមិញនេះ នាឱកាសលោកបាន អញ្ជើញចូលរួមចែកកញ្ចប់អាហារស្រាយបួសរ៉ាម៉ាឌន ជូនបងប្អូនប្រជាពលរដ្ឋខ្មែរ-ឥស្លាម ចំនួន២៣៧ គ្រួសារស្ថិតនៅ ក្នុងភូមិទី១៣ឃុំកោះសូទិន ស្រុកកោះសូទិន ខេត្តកំពង់ចាម ដែល ជាអំណោយរបស់សប្បុរសជន នានានៅប្រទេសម៉ាឡេស៊ី។

លោកលី មូសា សមាជិកក្រុមប្រឹក្សាស្រុក កោះសូទិន និងជា អ៊ីម៊ាំ ស្រុកកោះសូទិន បានធ្វេី ការថ្លែងអំណរគុណចំពោះប្រមុខរាជរដ្ឋាភិបាល កម្ពុជាក៏ដូចជាសប្បុរសជននានា ទាំងក្នុងនិងក្រៅ ប្រទេស ដែលតែងតែយកចិត្តទុកដាក់ គិតគូរអំពីសុខទុក្ខ ក្នុងការរស់នៅរបស់បងប្អូន ខ្មែរឥស្លាម ជានិច្ច។ ជាពិសេសនៅក្នុងរដូវបួសខែរ៉ាម៉ាឌននេះផ្ទាល់តែម្តងដែល បានផ្តល់អំណោយជាអង្ករ ០៨គីឡូក្រាមស្ករស០៣គីឡូ ទឹក ដោះគោ០២កំប៉ុង ទឹកស៊ីរ៉ូ០១ដប ប្រេងឆា០១ដប សាគូ០១គីឡូ និងតែ០១កញ្ចប់គិតជាថវិកា អស់ ៤.៥៤០០៛ សម្រាប់ក្នុង០១គ្រួសារ ដែលសរុបរួម អស់ ថវិកាចំនួន១០.៧៥៩.៨០០៛សម្រាប់ចែក ជូនប្រជាពលរដ្ឋចំនួន២៣៧គ្រួសារ៕SRP

ភ្នំពេញ៖សម្តេចតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ថារាល់វិនាទី និងជារៀងរាល់ថ្ងៃ សូមបងប្អូនជនរួមជាតិចងចាំនិងយកចិត្តទុកដាក់ខ្ពស់បំផុតចំពោះសុខភាពដែលជាអាយុជីវិតផ្ទាល់របស់បងប្អូន ប្តីប្រពន្ឋ កូនចៅ និងក្រុមគ្រួសារ ក្នុងស្ថានភាពដែលប្រទេសជាតិយើងកំពុងប្រយុទ្ធប្រឆាំងកម្ចាត់ជំងឺឆ្លងកូវីដ ១៩។

សូមយកជាប់តាមខ្លួនរាល់ពេលធ្វេីដំណេីរនូវម៉ាស​ ទឹកអាល់កុល និងជឹលសម្លាប់មេរោគ និងបាក់តេរីផ្សេងៗ។

បងប្អូនត្រូវប្រេីម៉ាសពាក់ការពារគ្រប់ទីកន្លែង និងត្រូវដុសលាងសម្អាតដៃមុនពេលប៉ះពាល់ និងក្រោយពេលប៉ះពាលក់របស់របរ ឬវត្ថុអ្វីមួយនៅតាមទីផ្សារ និងតាមទីធ្លាសាធារណៈដែលយើងមិនដឹងថាតើរបស់របរនិងសម្ភារៈទាំងនោះត្រូវបានប៉ះពាល់ដោយអ្នកមានមេរោគឆ្លងកូវីដ១៩ឬទេ។

យេីងការពារខ្លួនកុំនាំយកមេរោគឆ្លងទៅគេ និងសូមកុំនាំមេរោគពីគេមកយើង និងទៅកាន់ក្រុមគ្រួសារ ហេីយត្រូវមានអនាម័យសុខភាពខ្ពស់ជាប្រចាំ ហើយត្រូវស្តាប់តាមការណែនាំរបស់ក្រសួងសុខាភិបាលជានិច្ច៕SRP

ខេត្តសៀមរាប៖ក្រុមចោរប្លន់ប្រដាប់ដោយអាវុធច្នៃចំនួន០៤នាក់ត្រូវបានចាប់ខ្លួន ក្រោយធ្វើសកម្មភាព។
ហេតុការណ៍ចាប់ខ្លួននេះធ្វើឡើងនៅថ្ងៃទី២០ខែមេសាឆ្នាំ២០២០ត្រង់ចំណុចភូមិក្របៅ ឃុំសង្វើយ ស្រុកជីក្រែង ខេត្តសៀមរាប។

លោកឧត្តមសេនីយ៍ត្រីភឹង  ចិន្តារ៉េត ស្នងការរងទទួលផែនកណ្តាលព្រហ្មទណ្ឌនៃស្នងការដ្ឋានខេត្តសៀមរាបបានមានប្រសាសន៍ប្រាប់ថាជនសង្ស័យទាំង០៤នាក់ ពាក់ព័ន្ធករណី ប្លន់ផ្ទះអ្នកលក់ចាបហួយ ត្រង់ចំណុចភូមិក្របៅ ឃុំសង្វើយ ស្រុកជីក្រែងខេត្តសៀមរាប ត្រូវបានចាប់ខ្លួនដោយកម្លាំងនគរបាលស្រុកជីក្រែងនិងនគរបាលព្រហ្មទណ្ឌកម្រិតធ្ងន់នៃស្នងការដ្ឋានខេត្តសៀមរាប។
ជនសង្ស័យទាំងនោះ មានឈ្មោះទី៖០១.ឈ្មោះ សំ សី ហៅម៉ី ភេទប្រុសអាយុ៥២ឆ្នាំ មុខរបរធ្វើស្រែ។
០២.ឈ្មោះ ឡុន ធុង ហៅ ថុង ភេទប្រុសអាយុ១៤ឆ្នាំ មុខរបរសិស្ស។០៣.ឈ្មោះ ឡឹង ប៊ឿប ហៅ ប៊ឿក ភេទប្រុសអាយុ ២២ឆ្នាំមុខរបរ គ្មាន។០៤.ឈ្មោះ សុត សំអុល ភេទប្រុស អាយុ២៥ ឆ្នាំមុខរបរ កម្មករសំណង់។ ជនសង្ស័យទាំង៤នាក់នេះ បច្ចុប្បន្នរស់នៅភូមិក្របៅ ឃុំសង្វើយស្រុកជីក្រែង ខេត្តសៀមរាប។

យោងតាមបណ្តឹង របស់ជនរងគ្រោះ ឈ្មោះ ទុន បឿត ភេទស្រីអាយុ៥១ ឆ្នាំ មុខរបរ លក់ដូរកាលពីថ្ងៃទី១៩ ខែមេសា ឆ្នាំ២០២០។
បើតាមសមត្ថកិច្ចថានៅវេលាម៉ោង៣ និង០០នាទីយប់ ឈានចូលថ្ងៃទី១៩ ខែមេសា ឆ្នាំ២០២០ មានជនសង្ស័យមួយក្រុម មានគ្នា ០៤នាក់ស្លៀកពាក់ខោអាវប៉ារ៉ា ពាក់មួកការពារសុវត្ថិភាពពណ៌ខ្មៅ បានធ្វើសកម្មភាពយកកាំភ្លើងកែច្នៃ (កាំភ្លើងបាញ់ខ្យល់) គោះទ្វារហៅជនរងគ្រោះដើម្បីទិញស្រា នៅពេលជនរងគ្រោះបើកទ្វា ក្រុមជនសង្ស័យ បានយកកាំភ្លើងខ្យល់ ភ្ជង់ទៅលើជនរងគ្រោះ យកប្រាក់ ចំនួន ៥០០ដុល្លារ និងខ្សែកមាសមួយខ្សែទម្ងន់៣ជី។ ក្រោយពេលធ្វើសកម្មភាពហើយ ក្រុមជនសង្ស័យបាននាំគ្នាគេចខ្លួនបាត់។
តាមចម្លើយសារភាពរបស់ជនសង្ស័យទាំង០៤នាក់ ខាងលើបានឆ្លើយសារភាពថា ពួកខ្លួនពិតជាបានធ្វើសកម្មភាព ករណីខាងលើនេះពិតប្រាកដមែន ដោយឈ្មោះ ឡឹង បឿកបានចំណែក១០០ដុល្លារ, ឈ្មោះ សុត សំអុល បានចំណែក១០០ដុល្លារ, ឈ្មោះ ឡុន ធុង ហៅ ថុង បានចំណែក១០០ដុល្លារ,ចំណែកឈ្មោះ សំ សី ហៅ មុី បានចំណែក២០០ដុល្លារ និងខ្សែក១ខ្សែ ប៉ុន្តែឈ្មោះ សំ សី ហៅ មុី ឆ្លើយថា ខ្សែកនោះ នៅពេលជិះម៉ូតូមកវិញ ខ្លូនបានធ្វើជ្រុះបាត់។
ដកហូតវត្ថុតាងបាន: កាំភ្លើងកែច្នៃ ( កាំ ភ្លើងស្នប់ចំនួន ០១ ) , ម៉ូតូជិះធ្វើសកម្មភាពចំនួន ០២គ្រឿង , ខោអាវប៉ារ៉ា ០១កំផ្លេ ជារបស់ឈ្មោះ សំ សី ហៅមុី ពាក់ធ្វើសកម្មភាព។លោកបញ្ជាក់ថានគរបាលជំនាញកំពុងកសាងសំណុំរឿងបញ្ជូនខ្លួនជនសង្ស័យទៅសាលាដំបូងខេត្តសៀមរាប ដើម្បីចាត់ការតាមផ្លូវច្បាប់៕SRP

ខេត្តសៀមរាប៖បុរសម្នាក់ ស្រវឹងស្រា ចង.ក សម្លាប់ខ្លួន ចោលប្រពន្ធនិងកូន បង្កឱ្យមានការភ្ញាក់ផ្អើល។
ហេតុការណ៍បានកើតឡើងនៅថ្ងៃទី២០ខែមេសាឆ្នាំ២០២០ម៉ោងប្រហែល២០និង៣០នាទីចំណុចលើផ្ទះរបស់ខ្លួន ក្នុងភូមិស្នោរ ឃុំល្វា ស្រុកពួក។
លោកវរសេនីយ៍ឯកទេព ពុំសែន អធិការនគរបាលស្រុកពួក បានឲ្យដឹងនៅព្រឹកនេះថាជនរងគ្រោះឈ្មោះ សួង ជា ហៅប៉ក់ ភេទប្រុស អាយុ៣៦ឆ្នាំ រស់នៅ ភូមិ-ឃុំកើតហេតុ។ មុខរបរកសិករ បានចង.កសម្លាប់ខ្លួនដោយខ្សែអង្រឹងសំប៉ែតប្រវែង២,៥០ម៉ែត្រ ជាប់ទៅនិងធ្នឹមផ្ទះខ្លួន ដែលមានកំពស់២,៤០ម៉ែត្រ មកទល់ក្ដារក្រាល។
លោកអធិការថា ក្រោយទទួលសេចក្ដីរាយការណ៍នៅព្រឹកថ្ងៃទី២១ខែមេសានេះ លោក
បានចុះស្រាវជ្រាវ ពិនិត្យសាកសព រួមមានសមាសភាពចូលរួម ៖
-លោកវ.ទោ នឹម សារ៉ាត់ អធិការរង ដឹកនាំក្រុមការងារន-បព្រ/ទ+ន-បផ្នែកបច្ចេកទេសស្រុក
-លោកអនុ.ឯក. ឯក ស៊ីផុន មេបញ្ជាការរងកងរាជអាវុធហត្ថស្រុក+ក្រុមការងារ
-លោកអនុ.ឯក ឡោ​ ឡាយ នាយប៉ុស្តិ៍ល្វា
-លោក ម៉ង់ សម្បត្តិ ជាគ្រូពេទ្យប្រធានមន្ទីរពេទ្យបង្អែកពួក។
ការសន្និដ្ឋាន៖សមត្ថកិច្ចស្រុក៖ពិនិត្យលើសាកសពឈ្មោះ សួង ជា ហៅប៉ក់ ឃើញមានស្នាមជាំចំណុច.ក​(ចងរឹតខ្សែ)-មានលេចអាចម៍.ចេញទឹកកាម លើដងខ្លួនគ្មានស្លាកស្នាមគួរកត់សម្គាល់ពាក់ព័ន្ធបទឃាតកម្មនោះទេ។ គ្រូពេទ្យបញ្ជាក់ថាៈស្លាប់មូលហេតុស្ទះផ្លូវដង្ហើមបណ្ដាលឱ្យបេះដូងគាំងស្លាប់។
តាមការបំភ្លឺប្រពន្ធរបស់សាកសព ឈ្មោះ
ភោគ អើយ អាយុ៣០ឆ្នាំ បានឱ្យដឹងថា ប្រវត្តិប្ដី(សព)ធ្លាប់ឱ្យតែផឹកស្រាស្រវឹងរករឿងប្រពន្ធ-និងនិយាយថាអញនិងចង.កឱ្យងាប់ តែមិនដែលធ្លាប់ប្រព្រឹត្តចង.កទេ។
ជាក់ស្ដែងនៅយប់កើតហេតុប្តីគាត់ស្រវឹងស្រាទំនាស់ក្នុងគ្រួសារ(វាយកូន)គាត់ឃាត់កុំឱ្យវាយកូន រករឿងជេរស្ដីគាត់ និងនិយាយថា អញ!និងចង.ក ពេលនោះគាត់ខ្លាចប្ដីវាយក៏គេចចេញពីផ្ទះ។ លុះមួយសន្ទុះគាត់មានការសង្ស័យ ត្រឡប់មកផ្ទះវិញឃើញប្ដីធ្វើអត្តឃាតចង.ក និងខ្សែអង្រឹងជាប់ទៅធ្នឹមដំបូលផ្ទះស្លាប់បាត់ទៅហើយ។
ដូច្នោះគាត់ហៅអ្នកជិតខាងជួយមើលនិងរាយការណ៍ជូនសមត្ថកិច្ច។
គាត់បញ្ជាក់ថា៖ ការស្លាប់ប្ដីគាត់នេះពុំមានពាក់ព័ន្ធបទឃាតកម្មទេ។ មូលហេតុៈស្រវឹងស្រាជាកំហឹងវិបត្តិផ្លូវចិត្តរបស់ប្ដី។
ក្រោយពិនិត្យរួចរាល់បានប្រគល់សព ជូនក្រុមគ្រួសារធ្វើបុណ្យតាមប្រពៃណី៕SRP

ខេត្តសៀមរាប៖អាជ្ញាធរខេត្តសៀមរាប បានទទួលអំណោយជាបរិក្ខាពេទ្យ មានម៉ាស់ N95ចំនួន៥០០ សម្លៀកបំពាក់ពេទ្យ១០០កំប្លេរ និង ម៉ាស់ចំនួន១ម៉ឺនម៉ាស់ ពីរដ្ឋបាលក្រុងលីស៊ួយ ខេត្តជឺជាំង នៃសាធារណរដ្ឋប្រជាមានិតចិន។
ការទទួលនេះនៅថ្ងៃទី២០ខែមេសាម្សិលមិញ នៅសាលាខេត្តសៀមរាប ក្រោយវត្តមានរបស់លោក ទៀ សីហា អភិបាលខេត្ត។ ចំណែក រដ្ឋបាលក្រុងលីស៊ួយ ខេត្តជឺជាំង នៃសាធារណរដ្ឋប្រជាមានិតចិន ដឹកនាំដោយលោក Mei Zhongmin អនុប្រធានសមាគមពាណិជ្ជកម្មខេត្តជឺជាំង ប្រចាំនៅព្រះរាជាណាចក្រកម្ពុជា អមដំណើរដោយប្រធានការិយាល័យកុងស៊ុលចិនប្រចាំខេត្តសៀមរាបផងដែរ។
លោក Mei Zhongmin ក៏បានលើកឡើងអំពីកិច្ចសហប្រតិបត្តិការល្អរវាងកម្ពុជា ចិន សំខាន់ខេត្តសៀមរាប និង ក្រុងលីស៊ួយ នៃខេត្តជឺជាំង ក្នុងពេលប្រទេសចិន បានកំពុងជួបវិបត្តិកូវិដ ១៩ រដ្ឋបាលខេត្តសៀមរាប បានជួយឧបត្ថម្ភនូវសម្ភារៈបរិក្ខាពេទ្យ ក្នុងនាមជាបងប្អូនរួមជីវិតតែមួយ ក្នុងការរួមគ្នាប្រយុទ្ធប្រឆាំងនឹងជម្ងឺឆ្លងកូវិដ១៩។ លោកបានបន្តទៀតថា ដោយកាយវិកាដ៏សប្បុរសធម៌របស់រដ្ឋបាលខេត្តសៀមរាប ដែលធ្វើឲ្យក្រុង ខេត្តសម្ព័ន្ធមេត្រីភាពនឹងគ្នា មិនអាចបំភ្លេចបាននូវគ្រាលំបាកនោះឡើយ ។ ដូច្នេះនៅពេលកម្ពុជាបានកំពុងជួបវិបត្តិកូវិដ១៩នេះ រដ្ឋបាលក្រុងលីស៊ួយ ក៏ដូចជាខេត្តសម្ព័ន្ធមេត្រី ត្រូវធ្វើការចែករំលែកគ្នាជួយមិត្តក្នុងគ្រាលំបាក ក៏បាននាំយកនូវសម្ភារៈបរិក្ខាពេទ្យមួយចំនួន ផ្តល់ជូនរដ្ឋបាលខេត្តសៀមរាប យកទៅបម្រើការងារប្រយុទ្ធប្រឆាំងនិងជម្ងឺ ឆ្លងកូវិដ១៩ ។ ក្នុងនោះដែរលោកក៏បានសាទរចំពោះកម្ពុជា បានព្យាបាលជាសះស្បើយជាបន្តបន្ទាប់ ហើយមកដល់ថ្ងៃនេះមិនរកឃើញអ្នកឆ្លងជម្ងឺកូវិដ១៩ ហើយកត្តាទាំងនេះគឺវិធីសាស្ត្រដ៏ល្អក្នុងការណែនាំរបស់រាជរដ្ឋាភិបាលកម្ពុជា និងក្រសួង សុខាភិបាល ក្នុងការទប់ស្កាត់ ការពារការរីករាលដាលនៃជម្ងឺកូវិដ១៩។
លោក ទៀ សីហា ក៏បានលើកថាស្ថិតក្នុងគ្រាដ៏លំបាកនៃវិបត្តិកូវីដ-១៩នេះ បានបង្កើនកម្រឹតលើអត្ថន័យបន្ថែមទៀត នៃការរួមជីវិតតែមួយ លើចំណងសម្ព័ន្ធមេត្រីភាពនេះ។ ការគាំទ្ររបស់ភាគីចិន និងការផ្តល់ជំនួយសម្ភារៈ បរិក្ខានិងអ្នកជំនាញវេជ្ជសាស្រ្តមកកាន់កម្ពុជា គឺជាការយកចិត្តទុកដាក់លើសពីក្របខ័ណ្ឌនៃចំណងមិត្តភាព តែជាការរួមបេះដួងតែមួយជាបងប្អូនចិន-កម្ពុជា ។ ក្នុងនោះដែរអភិបាលខេត្តក៏បានលើកនូវ វិធីសាស្ត្រ និង ការណែនាំរបស់ ប្រមុខរាជរដ្ឋាភិបាល និង ក្រសួងសុខាភិបាលក្នុងការទប់ស្កាត់ ការពារការរីករាលដាលនៃជម្ងឺកូវិដ១៩ ដែលបានកំពុងតែ អនុវត្តនៅឡើយ។
អភិបាលខេត្ត បានថ្លែងអំណរគុណដល់រដ្ឋបាលក្រុងលីស៊ួយ ហើយនឹងធ្វើការផ្តល់អំណោយទាំងនេះ ដល់គណៈកម្មាធិការប្រយុទ្ធប្រឆាំងជម្ងឺកូវីដ១៩ របស់រដ្ឋបាលខេត្ត ហើយម៉ាស់ទាំងនេះនឹងត្រូវបានចែកជូនដល់មន្ទីរពេទ្យ មណ្ឌលសុខភាព និងក្រុមការងារ ដើម្បីបំពេញប្រតិបត្តិការរបស់ខ្លួន ក្នុងការប្រយុទ្ធប្រឆាំងនិងជម្ងឺឆ្លងកូវិដ១៩នេះ៕SRP