ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម​ បានរំលឹកប្រាប់ដល់អ្នកចូលរួម និងប្រជាពលរដ្ឋទាំងអស់ត្រូវបង្កើនការពារខ្លួន ថែរក្សាអនាម័យអោយបានជាប្រចាំ ដោយបុគ្គលម្នាក់ៗ ក៏ដូចជាក្រុមគ្រួសារនីមួយៗ ត្រូវបន្តរៀនរស់ជាមួយជំងឺកូវីដ-១៩ ដែលចាំបាច់ ត្រូវអនុវត្ត អោយបានខ្ជាប់ខ្ជួន នូវវិធានសុខាភិបាល ” ៣ការពារ ៣កុំ “ដើម្បីចៀសផុតពីការឆ្លងជំងឺដ៏កាចសាហាវនេះ។

លោក អ៊ុន ចាន់ដា បន្តថា​ ពិតមែនតែស្ថានភាព​ជំងឺ​កូវីដ​-១៩​ បានធូរស្រាល​ ហើយ សម្តេចតេជោ នាយករដ្ឋមន្ត្រី បានប្រកាសបើកប្រទេសពេញលេញឡើងវិញក្តី តែម្នាក់ៗ មិនត្រូវធ្វេសប្រហែស ឬមើលស្រាលបានឡើយ ទោះជាបានចាក់វ៉ាក់សាំងរួចហើយក្តី។

លោកមានប្រសាសន៍យ៉ាងដូច្នេះ នៅព្រឹកមិញនេះ ក្នុងឱកាសប្រគល់ផ្ទះមនុស្សធម៌ទី៧ ជូន ជនមានពិការភាពទ័លក្រ ១គ្រួសារ ឈ្មោះសុខ សុភាព អាយុ៣៦ឆ្នាំ រស់នៅភូមិកកោះ ឃុំត្រពាំងព្រះ ស្រុកព្រៃឈរ។

គួរ​បញ្ជាក់​ថា​ បុរស​ឈ្មោះ​ សុខ សុភាព ជាជនមានពិការភាព( ស្វិតជើងទាំង២ ពីកំណើត) ទ័លក្រ មានប្រពន្ធ និងកូនស្រី ប្រុស ២នាក់ (អាយុ៦ឆ្នាំ និង៣ឆ្នាំ) ក្នុងបន្ទុក។​ ដោយស្ថានភាពលំបាកនេះ លោក អ៊ុន ចាន់ដា ប្រធានគណៈកម្មាធិការសាខា បានសម្រេចផ្តល់ជូនផ្ទះឈើខ្ពស់ផុតពីដី ប្រក់ស័ង្កសី (ទំហំ ៤ម×៦ម ) ១ខ្នង តម្លៃ ៩លាន​ និង៨០ម៉ឺនរៀល​។ ក្នុង​នោះ​ក៏​បានផ្តល់ជូន​នូវអំណោយ​សម្រាប់ឡើងផ្ទះថ្មីនេះ រួមមាន អង្ករ ១០០គក្រ, ត្រីខ ២០កំប៉ុង, ទឹកត្រី ១២ដប ទឹកស៊ីអ៊ីវ ១២ដប, មី ២កេស, ឃីត ២សម្រាប់, អាវយឺត ៨, ម៉ាស់ ៥០ បន្ទះ , សម្ភារផ្ទះបាយ និងថវិកា ៦០ម៉ឺនរៀល​។ ដោយឡែក លោកតា លោកយាយ ដែលអញ្ជើញចូលរួមជាសាក្សី ក្នុងពិធីប្រគល់-ទទួលផ្ទះថ្មីនេះ ចំនួន ១៨នាក់ ក្នុងម្នាក់ៗ ទទួល​បាន​អង្ករ ត្រីខ ឃីត មី ទឹកត្រី ទឹកស៊ីអ៊ីវ និង អាវយឺត ព្រមទាំង ថវិកាចំនួន ២ម៉ឺនរៀលផងដែរ​៕SRP

ភ្នំពេញ៖លោក ជាម ច័ន្ទសោភ័ណ បាន​លេីកឡេីងថា​ តាមរយៈការប្រកួតប្រជែង បានឆ្លុះបញ្ចាំងនូវការចូលរួមលើកកម្ពស់វិស័យកីឡា ឱ្យមានការវិវឌ្ឍឈានទៅមុខ ដើម្បីជាកត្តាមួយនាំឱ្យមានសុខភាពល្អទាំងផ្លូវកាយ និងផ្លូវចិត្ត រួមទាំងទទួលបានចំណងសាមគ្គីភាព ភាតរភាព និងមិត្តភាពស្និទ្ធស្នាល និងបង្កើតឱ្យមានកម្មវិធីវាយសីនេះបន្តទៅឆ្នាំក្រោយៗទៀត។

លោកក៏បានបានអបអរសាទរចំពោះជ័យលាភី ដល់ក្រុមជ័យលាភី ដែលបានខិតខំប្រកួតប្រជែងលើប្រភេទកីឡាមួយនេះ ដែលជាចូលរួមលើកស្ទួយវិស័យកីឡានៅក្នុងខេត្ត ពិសេសចំរាញ់យកគុណភាពកីឡាករទៅកាន់ថ្នាក់ជាតិ។

លោក ជាម ច័ន្ទសោភ័ណ អភិបាលខេត្តត្បូងឃ្មុំ ថ្លែងបែបនេះនៅថ្ងៃទី៦ ខែមករា ឆ្នាំ២០២២នេះ​ ក្នុងឱកាសអញ្ជើញប្រគល់ពានរង្វាន់ដល់ក្រុមកីឡាផ្នែកវាយសី ក្នុងការប្រកួតកីឡាមហាជន ដេីម្បីចូលរួមអបអរសាទរ​ទិវា​ជ័យជំនះ​ ខួបលេីកទី៤៣ឆ្នាំ​ ថ្ងៃ​៧មករាឆ្នាំ១៩៧៩​-​២០២២​ ដែលធ្វើឡើងនៅក្លឹបវាយសីស្តេចកន។

បើតាមលោក អុិន ពៅសម្បត្តិ ប្រធានមន្ទីរអប់រំ យុវជន និងកីឡាខេត្តត្បូងឃ្មុំ ឲ្យដឹងថា តាមរយៈការប្រកួតប្រជែងយ៉ាងស្វិតស្វាញ អស់រយៈពេល២ថ្ងៃ នៅថ្ងៃទី៥ និងទី៦ ខែមករា ឆ្នាំ២០២២ ជាលទ្ធផល

ប្រភេទកីឡាវាយសី អាយុ ៥០ឆ្នាំឡើង 

-ចំណាត់ថ្នាក់លេខ ១ បានទៅលើក្រុមកីឡា ឧកញ្ញា អាន ម៉ាឌី និង កញ្ញា ឡេង ដាវី មកពីក្លឹបវាយសីម៉ារីសា ដោយទទួលបាន ពាន ១ ទង់អនុស្សាវរីយ៍ ១ សម្ភារៈកីឡា ថវិកា និង ម៉ូតូ​ ១ គ្រឿង

– ចំណាត់ថ្នាក់លេខ ២ បានទៅលើក្រុមកីឡា ឧកញ្ញា ម៉ែន សុភក្តិ និង លោក ស៊ាន កុសល្យ មកពីក្លឹបវាយសីចំការកៅស៊ូជប់ ដោយទទួលបានទង់អនុស្សាវរីយ៍ ១ សម្ភារៈកីឡា និងថវិកា ២លានរៀល ។

– ចំណាត់ថ្នាក់លេខ ៣ បានទៅលើក្រុមកីឡា លោក ជឹម ចាន់រិទ្ធ និង លោក អោម មុន្នី មកពីក្លឹបវាយសីម៉ារីសា  ដោយទទួលបាន ទង់អនុស្សាវរីយ៍ ១ សម្ភារៈកីឡា និងថវិកា ១លានរៀល ។

សម្រាប់ប្រភេទកីឡាវាយសី ក្រោមអាយុ ៥០ ឆ្នាំ 

-ចំណាត់ថ្នាក់លេខ ១ បានទៅលើក្រុមកីឡា លោក ស៊ឹម ពិសី និង លោក អ៉ិត ឡេង មកពីក្លឹបវាយសីស្តេចកន ដោយទទួលបាន ពាន ១ ទង់អនុស្សាវរីយ៍ ១ សម្ភារៈកីឡា ថវិកា និង ម៉ូតូ ០១ គ្រឿង ។ 

– ចំណាត់ថ្នាក់លេខ ២ បានទៅលើក្រុមកីឡា លោក កែវ ចិន និង លោក ទិត្យ ប៊ុនឆៃ មកពីក្លឹបវាយសីម៉ារីសា ដោយទទួលបាន ទង់អនុស្សាវរីយ៍ ១ សម្ភារៈកីឡា និងថវិកា ២ លានរៀល ។

– ចំណាត់ថ្នាក់លេខ ៣ បានទៅលើក្រុមកីឡា លោក រ៉ន សូហ៊ាង និង លោក ជា វិចិត្រ មកពីក្លឹបវាយសីស្តេចកន ដោយទទួលបាន ទង់អនុស្សាវរីយ៍ ១ សម្ភារៈកីឡា និងថវិកា ១ លានរៀល ផងដែរ​៕SRP

ភ្នំពេញ៖សម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅព្រឹកថ្ងៃសុក្រ ទី៧ ខែមករា ឆ្នាំ២០២២នេះ បានអញ្ជើញទៅបំពេញទស្សនកិច្ចទៅកាន់ប្រទេសមីយ៉ាន់ម៉ា។ ក្នុងដំណើរទស្សនកិច្ចនៅប្រទេសមីយ៉ាន់ម៉ានេះ សម្តេចតេជោ បាននាំទៅជាមួយជំនួយជាម៉ាស់ជាង ៣លាន និងគ្រឿងបរិក្ខារមួយចំនួនទៀត ដើម្បីចូលរួមប្រយុទ្ធប្រឆាំងការរាតត្បាតជំងឺកូវីដ-១៩នៅក្នុងប្រទេសមីយ៉ាន់ម៉ាផងដែរ។

ដំណើរទស្សនកិច្ចរបស់សម្តេចតេជោនាយករដ្ឋមន្ត្រីនៅក្នុងប្រទេសមីយ៉ាន់ម៉ាមានរយៈពេល២ថ្ងៃ គឺថ្ងៃទី០៧ និងថ្ងៃទី០៨ ខែមករា ឆ្នាំ២០២២។ ដំណើរទស្សនកិច្ចនេះធ្វើឡើងតបតាមការអញ្ជើញរបស់នាយឧត្តមសេនីយ៍ជាន់ខ្ពស់ មីន អោង ឡាំង ប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា។ ដំណើរទស្សនកិច្ចរបស់សម្តេចតេជោនាយករដ្ឋមន្ត្រី បានអមដំណើរដោយឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងមន្ត្រីជាន់ខ្ពស់នៃរាជរដ្ឋាភិបាលកម្ពុជាមួយចំនួនទៀត។

ក្នុងដំណើរទស្សនកិច្ចនេះ សម្តេចតេជោ នឹងមានជំនួបទ្វេភាគីជាមួយ នាយឧត្តមសេនីយ៍ជាន់ខ្ពស់ មីន អោង ឡាំង ដើម្បីពិភាក្សា និងផ្លាស់ប្តូរទស្សនៈអំពីកិច្ចសហប្រតិបត្តិការទ្វេភាគី និងពហុភាគី និងការវិវត្តថ្មីៗនៅក្នុងអាស៊ាន៕SRP

ភ្នំពេញ៖សម្ដេចនាយករដ្ឋមន្រ្តីហ៊ុន សែន និងជាប្រធាគណបក្សប្រជាជនកម្ពុជា បានចេញសារលិខិតក្នុងឱកាសរំឮកខួបទី៤៣ នៃទិវាជ័យជម្នះ ៧មករា៕SRP

ខេត្តសៀមរាប៖នារីម្នាក់ខណៈកំពុងតែជិះកង់ត្រូវបានរថយន្តដឹកដីបុកចំពេញទំហឹងបណ្ដាលឲ្យស្លាប់នៅនឹងកន្លែងកើតហេតុ។

ហេតុការណ៍បានកើតឡើងម៉ោង០៩និង៣០ ថ្ងៃទី៦ ខែមករា ឆ្នាំ២០២២នៅត្រង់ចំណុចផ្លូវបំបែកជាបួន ទល់មុខផ្លូវឡើងភ្នំខាងកើត ស្ថិតនៅភូមិភ្នំក្រោម សង្កាត់សៀមរាប ក្រុងសៀមរាប។

របាយការណ៍របស់សមត្ថកិច្ចបានបង្ហាញថា
ករណីគ្រោះថ្នាក់ចរាចរណ៍នេះ រវាង រថយន្តដឹកដី ម៉ាកNISSAN ពណ៌សលាយខៀវ ពាក់ស្លាកលេខសៀមរាប 3A-1480 បើកបរដោយជនមិនស្គាល់អត្តសញ្ញាណនិងអ្នកជិះកង់ឈ្មោះ វិត ស្រីនិច ភេទស្រីអាយុ១៨ឆ្នាំមានអាស័យដ្ឋាននៅភូមិទី០១ សង្កាត់ចុងឃ្នៀស ក្រុងសៀមរាប(បណ្តាលឲ្យស្លាប់នៅនឹងកន្លែងកើតហេតុ)និង ខូចខាតកង់១គ្រឿង។
មូលហេតុបណ្តាលមកពីរថយន្តបើកបរខ្វះការប្រុងប្រយ័ត្ន។បច្ចុប្បន្នអ្នកបើកបរ និង រថយន្តត្រូវបានសមត្ថកិច្ចឃាត់ខ្លួនបញ្ជូនទៅការិយាល័យជំនាញដើម្បីអនុវត្តន៍តាមនីតិវិធី៕SRP

ភ្នំពេញ៖អ្នកនាំពាក្យស្ថានទូតអាមេរិកប្រចាំកម្ពុជាលោក Chad Roedemeier បានឆ្លើយតបនឹងសារអេឡិចត្រូនិចអ៊ីម៉ែលរបស់ EAC News ថាបញ្ហាសញ្ញាបត្រលោក ហ៊ុន ម៉ាណែត ត្រូវបានសាលាទាហានអាមេរិក West Point បកស្រាយរួចហើយកាលពីឆ្នាំ២០១៩ ដែលមានន័យថាស្ដង់ដាសញ្ញាបត្ររបស់សាលាអាមេរិកមិនមានការបែងចែកស្ដង់ដារកម្រិត២ ឬសញ្ញាបត្រយោគយល់ដូចដែលលោក សម រង្ស៊ី លើកឡើងនោះទេ។

លោក Chad Roedemeier បានបញ្ជាក់ប្រាប់ EAC News ថាស្ថានទូតមិនអាចឆ្លើយតបរឿងសញ្ញាបត្រជំនួសសាលារបស់អាមេរិកនោះទេ តែលោកថាករណីសញ្ញាបត្ររបស់លោក ហ៊ុន ម៉ាណែត ត្រូវបានសាលា West Point បកស្រាយរួចហើយកាលពីខែតុលា ឆ្នាំ២០១៩ ដែលពេលនោះប្រធានផ្នែកកិច្ចការសាធារណៈ និងទំនាក់ទំនងនៅសាលាបណ្ឌិត្យសភាយោធាអាមេរិក West Point លោក Christopher Ophardt បានបញ្ជាក់កាលពីខែតុលា ឆ្នាំ២០១៩ថា ការអនុញ្ញាតដល់សិស្សអន្តរជាតិបានមកសិក្សានៅសាលាបណ្ឌិតសភាអាមេរិក West Point គឺជាគំនិតផ្ដួចផ្ដើមរបស់ក្រសួងការបរទេសនិងក្រសួងការពារជាតិអាមេរិក។ ហើយរបៀបនៃជ្រើសរើស ការសិក្សា និងបណ្ដុះបណ្ដាលយោធាគឺដូចគ្នាទៅនឹងសិស្សជនជាតិអាមេរិកដូចគ្នា។ គ្មានការបែងចែកសិស្សកម្រិត២ ឬសិស្សទទួលបានការយោគយល់នោះទេ។

កាលពីព្រឹកថ្ងៃទី៥ ខែមករា ឆ្នាំ២០២២ សម្ដេចតេជោ ហ៊ុន សែន បានស្នើដល់ឯកអគ្គរដ្ឋទូតអាមេរិកប្រចាំកម្ពុជាលោក Patrick Murphy ឱ្យជួយបកស្រាយករណីដែលមានការលើកឡើងថាសញ្ញាបត្រដែលនិស្សិតកម្ពុជាទទួលបានពីអាមេរិកគឺជាសញ្ញាបត្រកម្រិត២ ឬជាសញ្ញាបត្រយោគយល់ ដោយថាដើម្បីការពារកិត្តិយសការអប់រំនៅក្នុងសហរដ្ឋអាមេរិក។

ការលើកឡើងរបស់សម្ដេចតេជោបែបនេះដោយរំលឹកពីការវាយប្រហារលើសញ្ញាបត្រដែលកូនប្រុសរបស់សម្ដេចតេជោ គឺលោក ហ៊ុន ម៉ាណែត ត្រូវបានលោក សម រង្ស៊ី លើកឡើងមកវាយប្រហារជានិច្ចជាកាល។

សម្ដេចតេជោ ស្នើដល់ឯកអគ្គរដ្ឋទូតអាមេរិកប្រចាំកម្ពុជាបកស្រាយករណីដែលចោទប្រកាន់នេះដោយថាដើម្បីការពារកិត្តិយសវិស័យអប់រំរបស់អាមេរិក។

សម្ដចតេជោថ្លែងថា៖ «អាចនឹងនិយាយបានទេពីបញ្ហាហ្នឹង! ដែលថាសាលា West Point មានកម្រិតជាសញ្ញាបត្រប្រភេទ២ឬសញ្ញាបត្រកិត្តយស។ តើសហរដ្ឋអាមេរិកការពារជនខិលខូច ឬការពារសាលាអាមេរិក? មិនមែនការពារ ហ៊ុន ម៉ាណែត ទេ! គឺការពារសាលា។ […] អញ្ចឹងទេគឺមានតែសហរដ្ឋអាមេរិក និងអង់គ្លេស ដើម្បីការពារស្ថាប័នអបរំរបស់ខ្លួនគឺមានតែចេញមកបញ្ជាក់អញ្ចឹងទៅ។ ហើយបើថាចេញមកបញ្ជាក់អញ្ចឹងទៅហាក់បីដូចជាវាយប្រហារចំពោះអ្នកដែលបាននិយាយ។ អើ! អញ្ចឹងទុកអញ្ចឹងទៅ យើងក៏សម្គាល់មើលអាហ្នឹងដែរ។ តើគេការពារស្ថាប័នអប់រំរបស់គេ ឬគេការពារមនុស្សខិលខូច? យើងក៏សម្គាល់មើលរឿងហ្នឹងដែរ»។

កាលពីថ្ងៃទី២៥ ខែធ្នូ កន្លងទៅលោក សម រង្ស៊ី បានផ្ដល់បទសម្ភាសន៍ជាមួយសារព័ត៌មានបរទេសដែលផ្សាយជាភាសាខ្មែរដោយបានលើកឡើងថាសញ្ញាបត្រដែលលោក ហ៊ុន ម៉ាណែត ទទួលបានទាំងពីសាលាបណ្ឌិតយោធា West Point និងសាកលវិទ្យាល័យញូវយ៉ករបស់សហរដ្ឋអាមេរិក និងសញ្ញាបត្រពីសាកលវិទ្យាល័យប្រ៊ីសស្ដូលនៅចក្រភពអង់គ្លេសគឺជាសញ្ញបត្រប្រភេទ២ ឬសញ្ញាបត្រយោគយល់។

បន្ទាប់មកដើម្បីការពារលើសញ្ញាបត្រខ្លួន លោក ហ៊ុន ម៉ាណែត បានប្រកាសហៅលោក សម រង្ស៊ី ភ្នាល់គ្នាដាក់«ជីវិតនយោបាយ» ប្រសិនជា សម រង្ស៊ី អាចរកភស្ភុតាងបញ្ជាក់ថាលោកទទួលបានសញ្ញាបត្រប្រភេទ២ ឬសញ្ញាបត្រយោគយល់ដូចដែល សម រង្ស៊ី អះអាងមែន។ ទោះជាយ៉ាងណាក្រោយរង់ចាំពីការភ្នាល់២ថ្ងៃដោយគ្មានការឆ្លើយតប លោក ហ៊ុន ម៉ាណែត បានដាក់បន្ថែមមួយទៀតដោយស្នើឱ្យលោក សម រង្ស៊ី ឈប់ធ្វើនយោបាយទៅព្រោះលោក សម រង្ស៊ី គ្មានភាពក្លាហានក្នុងការការពារអំណះអំណាងរបស់ខ្លួនមិនមែនជាគំរូរបស់ពលរដ្ឋ៕SRP

ខេត្តសៀមរាប៖ករណីឃាតកម្ម នៅស្រុកអង្គរជុំ ត្រូវបានកម្លាំងកងរាជអាវុធហត្ថស្រុកអង្គរជុំ ឃាត់ខ្លួនជនដៃដល់ក្រោយពីបានធ្វើសកម្មភាពវាយសម្លាប់បុរសម្នាក់រយៈពេលប៉ុន្មានម៉ោងក្រោយមក។

សមត្ថកិច្ចស្រុកអង្គរជុំបានរាយការណ៍ថា ករណីនេះបានកើតឡើង វេលាម៉ោង៨ព្រឹក ថ្ងៃទី៥ ខែមករា ឆ្នាំ២០២២នៅចំណុច ភូមិ រាជជន្ទល់ ឃុំស្រែខ្វាវ ស្រុកអង្គរជុំ។

សមត្ថកិច្ចស្រុកអង្គរជុំបានបន្តថា ការឃាត់ខ្លួនជនដៃដល់ នៅម៉ោង៤និង៥០នាទីរសៀល ថ្ងៃទី៥ ខែមករា ឆ្នាំ២០២២ នៅចំណុចភូមិ រលំ ឃុំស្រែខ្វាវ ខាងត្បូងកន្លែងកើតហេតុប្រមាណ៤គីឡូម៉ែត្រ។ ជនសង្ស័យឈ្មោះ ផាន់ សូយ ភេទប្រុសអាយុ៣៤ឆ្នាំនៅភូមិ កើតហេតុខាងលើមុខរបរកម្មករ។ ចំណែកជនរងគ្រោះ ឈ្មោះ សឿយ អឿយ ភេទប្រុសអាយុ៣៨ឆ្នាំ នៅភូមិទឹកថ្លា ឃុំស្រែខ្វាវ ស្រុកអង្គរជុំ។

ក្រោយពីបានយកមកសាកសួរឈ្មោះ ផាន់ សូយ បានសារភាពថា រូបខ្លួនពិតជាបានយកដំបងឈើវាយសម្លាប់ជនរងគ្រោះឈ្មោះ សឿយ អឿយ ប្រាកដមែន។ មូលហេតុ៖ ដោយសារឈ្មោះសឿយ អឿយ បានខឹងរូបខ្លួនថាឲ្យរូបគេ រឿងចូលបន្ទប់ទឹកយូរ ក្រោយពេលចេញពីបន្ទប់ទឹករួចជនរងគ្រោះបានទាញដំបងឈើរកវាយមកលើរូបខ្លួន ទើបពេលនោះរូបខ្លួន បានទាញយកដំបងឈើជ្រុងប្រវែងប្រហែល ១០០សង់ទីម៉ែត្រ វាយតបទៅលើជនរងគ្រោះចំនួន៤ដំបង (ត្រូវក្បាល១ដំបងនិងស្មា០៣ដំបង)។ បច្ចុប្បន្ន៖ ជនសង្ស័យខាងលើ ព្រមទាំងវត្ថុតាង ការិយាល័យជំនាញកំពុងតែអនុវត្តន៍តាមនីតិវិធី៕SRP

ខេត្តកំពង់ចាម​៖អភិបាលខេត្តកំពង់ចាម​ លោក​ អ៊ុន​ ចាន់ដា​ បានប្រាប់មន្ត្រីនៃ​មន្ទីរ​កសិកម្ម​ ត្រូវត្រៀមលក្ខណៈ និងសម្ភារទុកជាមុន សម្រាប់ចុះជួយអន្តរាគមន៍ ពេលមានគ្រោះធម្មជាតិកើតឡើង ជាពិសេសគ្រោះខ្វះទឹក ដោយត្រូវសហការល្អជាមួយអជ្ញាធរមូលដ្ឋាន ដើម្បីធ្វើការផ្សព្វផ្សាយដល់កសិករឲ្យចេះគ្រប់គ្រងទឹក ដោយលើកភ្លឺ លើកទំនប់ទប់ស្កាត់ និងស្តុកទឹកទុកការពារគ្រោះខ្វះទឹកជាយថាហេតុ​។

ថ្លែង​យ៉ាង​ដូច្នេះ​ក្នុង​កិច្ចប្រជុំ​បូកសរុប​លទ្ធផល​ការងាររបស់មន្ទីរកសិកម្ម រុក្ខាប្រមាញ់​ និងនេសាទខេត្តកំពង់ចាម​ ​នៅរសៀល​ថ្ងៃទី​៥​ ខែមករា​ ឆ្នាំ​២០២២​។ ​

ក្នុង​កិច្ចប្រជុំ​អភិបាលខេត្ត បានជំរុញ​ដល់​មន្ត្រីជំនាញ ឲ្យ​បន្តចុះអនុវត្ត និងតាមដានការអនុវត្ត របស់ប្រជាកសិករ​ ព្រមទាំងផ្តល់ប្រឹក្សាបច្ចេកទេសសមស្រប ឲ្យបានទាន់ពេលវេលា​ និង​អប់រំផ្សព្វផ្សាយពីវិធានបច្ចេកទេស នៃការប្រើប្រាស់ថ្នាំកសិកម្ម​ និងជីកសិកម្ម ព្រមទាំងវិធានសុវត្ថិភាព ជូនដល់ប្រជាពលរដ្ឋ សំដៅឲ្យការដាំដុះទទួលបានទិន្នផលខ្ពស់ស្របតាមតំរូវការទីផ្សារ​ ក្រៅពីនោះ​ត្រូវចុះសិក្សាវាយតម្លៃ និងស្វែងរកទីផ្សារដើម្បីជួយដល់ប្រជាកសិករ​ ចៀងវាងការក្រឡុកតម្លៃពីសំណាក់ឈ្មួញកណ្តាល​។

លោក​ អ៊ុន​ ចាន់ដា​ ក៏បានណែនាំ​ដល់​ថ្នាក់ដឹកនាំ​មន្ទីរកសិកម្ម ឲ្យសហការជាមួយមន្ត្រីជំនាញ​ និងអាជ្ញាធរក្រុង-ស្រុក ត្រូវកំណត់ផ្ទៃដីបឹង ដីរដ្ឋរក្សាទុក ហេីយត្រូវបោះបង្គោលព្រំ និងចុះបញ្ជីឲ្យបានត្រឹមត្រូវ​ ព្រមទាំង​ពិនិត្យលទ្ធភាពក្នុងការសិក្សាប្រភេទដីជូនប្រជាពលរដ្ឋ​ ហេីយត្រូវខិតខំបណ្តុះកូនឈើសម្រាប់ដាំ និងចែកចាយជូនប្រជាពលរដ្ឋ​ ដេីម្បីយកទៅដាំនៅតាមលំនៅដ្ឋាន និងផ្លូវសាធារណៈផងដែរ​។

អភិបាលខេត្ត​ ក៏បាន​ជំរុញ​មន្ត្រី​ជំនាញ​ឲ្យ​ធ្វើការអប់រំផ្សព្វផ្សាយដល់ប្រជានេសាទទាំងក្នុង និងក្រៅសហគមន៍នេសាទឲ្យយល់ជ្រួតជ្រាបពីសារៈប្រយោជន៍នៃការគ្រប់គ្រងធនធានជលផលក្នុងដែននេសាទសហគមន៍​ ហេីយ​ត្រូវចុះត្រួតពិនិត្យទប់ស្កាត់បទល្មើសនេសាទគ្រប់ប្រភេទពិសេសនៅតំបន់អភិរក្សជលផល​ លេីសពីនេះ​ត្រូវបណ្តុះបណ្តាលបច្ចេកទេសផលិតកូនត្រីពូជ ដល់កសិករថ្មី​ ដែលបានជ្រើសរើស​ និង​បន្តចុះផ្សព្វផ្សាយដល់វារីវប្បករទូទៅ ស្តីពីការគ្រប់គ្រងការចិញ្ចឹមត្រីរ៉ស់ និងត្រីឆ្តោ​ ដេីម្បី​លេីកស្ទួយដល់ការនាំចេញ៕SRP

ភ្នំពេញ៖រាជរដ្ឋាភិបាលបានព្រមជាគោលការណ៍ឲ្យលើកលែងពន្ធនាំចូលដោយពន្ធអាករ ជាបន្ទុករបស់រដ្ឋចំពោះរថយន្តពាក់ស្លាកលេខនគរបាល ចំនួន៧៥៧គ្រឿង។

នេះបើយោងតាមលិខិតរបស់ទីស្ដីការគណៈរដ្ឋមន្ត្រី ដែលចុះហត្ថលេខាដោយលោក កែន សត្ថា រដ្ឋលេខាធិការទីស្ដីការគណៈរដ្ឋមន្ត្រី៕SRP

ខេត្តកំពង់ធំ៖ភ្លើងប្រចណ្ឌនិងញៀនស្រាស បុរសជាប្តីយកពូថៅមកកាប់ចញ្រ្ចាំប្រពន្ធដាច់ ក.ធ្លាក់ពីលើស្មា ហើយពុះទ្រូងនិងទាញពោះវៀនចេញមកក្រៅ និងរត់បន្តទៅកាប់អ្នកជិតខាងបណ្តាលឲ្យស្លាប់ម្នាក់ទៀតនិងកាប់អ្នកផ្សេងទៀត រងរបួសធ្ងន់២នាក់ ស្រាលម្នាក់។

អំពើឃាតកម្មដ៏ព្រៃផ្សៃនេះបានកើតឡើង នៅវេលាម៉ោង១៩ និង៣០នាទីយប់ថ្ងៃទី០១ខែមករាឆ្នាំ២០២២ ចំណុចភូមិពន្លៃ ឃុំចើងដើង ស្រុកបារាយណ៍ ខេត្តកំពង់ធំ។

ជនសង្ស័យដែលជាជនដៃដល់ឈ្មោះប៉ុស ឡា អាយុ៣៣ឆ្នាំ។ ជនរងគ្រោះទី១ ស្រ្តីរងគ្រោះត្រូវប្រពន្ធឈ្មោះ យ៉ន យឿន អាយុ៣៤ឆ្នាំ ត្រូវជាប្រពន្ធជនដៃដល់(ស្លាប់)មានទីលំនៅ ភូមិឃុំកើតហេតុបន្សល់ទុកនូវកូន២នាក់(ស្រីទាំងពីរ)កំព្រាឪពុកម្តាយ។

ទី២ជនរងគ្រោះឈ្មោះពេជ្រ ហ៊ុន ភេទប្រុសអាយុ៥៦ឆ្នាំជនសង្ស័យកាប់ចំកញ្ចឹង.ក.(ស្លាប់ក្រោមផ្ទះ)មានទីលំនៅភូមិឃុំកើតហេតុ
ទី៣អ្នកដែលរងរបួសទី១ឈ្មោះ កង រិនភេទស្រីអាយុ៣៩ឆ្នាំ(របួសធ្ងន់)
ទី៤ឈ្មោះ កែ អំ ភេទស្រីអាយុ៧៦ឆ្នាំ (របួសធ្ងន់)
ទី៥ឈ្មោះខាត់ ប្រេង ភេទប្រុសអាយុ៤១ឆ្នាំ (របួសស្រាល)។

លោកទិត្យ សំណាងស្នងការរងទទួលផែនព្រហ្មទ័ណ្ឌខេត្តកំពង់ធំ បានផ្តល់ព័ត៌មានតាមប្រព័ន្ធ តេឡេក្រាមឲ្យដឹងថា៖ក្រោយពីទទួលព័ត៌មានពីប្រជាពលរដ្ឋ លោកបានបញ្ជាកម្លាំងក្រោមឱវាទនិងសហការណ៍ជាមួយកម្លាំងអាវុធហត្ថស្រុកបារាយណ៍ធ្វើការហ៊ុំព័ទ្ធទីតាំងកន្លែងកើតហេតុ ឃាត់ខ្លួនជនសង្ស័យបានភ្លាមៗ។

ជនសង្ស័យត្រូវបានកម្លាំង នគរបាលស្រុកបារាយណ៍កសាងសំណុំរឿងបញ្ជូនទៅស្នងការ នគរបាលខេត្តកំពង់ធំ ដើម្បីចាត់បន្តទៅតាមនិតិវិធី។ ចំណែកសាកសពជនរងគ្រោះសាច់ញាតិយកទៅធ្វើបុណ្យតាមប្រពៃណី។ ឯអ្នករងរបួសធ្ងន់ស្រាល ត្រូវបានគេដឹកយកមកសង្រ្គោះនៅមន្ទីពេទ្យបង្អែកបារាយណ៍សន្ទុក៕SRPអ៊ុងសំអាត

ខេត្តសៀមរាប៖ពិតជាអស្ចារ្យណាស់ នៅ ក្នុងថ្ងៃឆ្លងឆ្នាំសកល ២០២១ចូល ២០២២នេះ មានភ្ញៀវទេសចរប្រមាណជិត១៩ម៉ឺននាក់មករីករាយកម្សាន្ត នៅក្នុងខេត្តសៀមរាប។

របាយការណ៍របស់មន្ទីរទេសចរខេត្តសៀមរាបបានបង្ហាញថា ភ្ញៀវទេសចរដើរកម្សាន្តតាមរមណី យដ្ឋាននានា រួមទាំងរាត្រី ឆ្លងឆ្នាំថ្មី ឆ្នាំសកល២០២១ ឈានចូល ឆ្នាំ២០២២ មានចំនួនប្រមាណជា ជិត ១៩ម៉ឺននាក់ ក្នុងនោះ ភាគច្រើនដ៏លើសលុប គឺភ្ញៀវទេសចរក្នុងស្រុក។

តាមការប៉ាន់ប្រមាណរបស់មន្ទីរបានឲ្យដឹងថា ភ្ញៀវអ្នកដំណើរកំសាន្តទាំងនោះ មានមកពីបណ្តាខេត្តនានាប្រមាណជាជិត ៧៦% គឺស្មើនឹងប្រមាណពី ១៤ ទៅ ១៥ម៉ឺននាក់។ ឯភ្ញៀវម្ចាស់ផ្ទះមានប្រមាណជាពី ៤ ទៅ ៥ ម៉ឺននាក់។

ជាលក្ខណៈពិសេសគួរកត់សម្គាល់នោះ គឺការធ្វើដំណើរកម្សាន្តជាលក្ខណៈគ្រួសាររបស់ប្រជាពលរដ្ឋ បានឆ្លុះបង្ហាញ អំពីស្ថានភាពរស់នៅរបស់ប្រជាពល រដ្ឋកម្ពុជា និងកំពុងស្ថិតក្នុងប្រក្រតីភាពថ្មី ទម្លាប់រស់ជាមួយកូវីដ-១៩ ហើយកត្តាប្រុងប្រយ័ត្ន គឺជាគន្លឹះស្នូលនៃសេចក្តីសុខចម្រើន។

របាយការណ៍ដដែលបង្ហាញទៀតថា គោលដៅសំខាន់ៗនៃដំណើរកម្សាន្តនោះ មានដូចជារមណីយ ដ្ឋានអង្គរ ប្រហែលជា ១៧ម៉ឺននាក់ រមណីយដ្ឋានឧទ្យានជាតិភ្នំគូលែនប្រហែល ៥ពាន់នាក់ សហគមន៍ទេសចរណ៍-អេកូទេសចរណ៍ និងតំបន់ផ្សេងៗ មានប្រហែលជា ១៤ពាន់នាក់។

ជាការកត់សម្គាល់ បណ្តាភ្ញៀវទេសចរទាំងនោះ បានជួបជុំគ្នាកំសាន្តរាត្រីឆ្លងឆ្នាំនៅក្រុងសៀមរាបផងដែរ ដូចជានៅផាប់ស្រ្ទីត និងនៅសួនច្បារព្រះរាជដំណាក់ផងដែរ។ ក៏ប៉ុន្តែ យ៉ាងហោចណាស់ នៅក្នុងព្រឹត្តិការណ៍ឆ្លងឆ្នាំថ្មី ឆ្លងឆ្នាំសកលនេះ មានភ្ញៀវទេសចរបរទេសផ្ទៃក្នុង ប្រហែលជាង៤០០ នាក់ ផងដែរ៕SRP

ខេត្តសៀមរាប៖យ៉ាងហោចណាស់មនុស្សចំនួន ៣នាក់ បានស្លាប់និងម្នាក់ទៀតបានរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍។

ហេតុការណ៍ បានកើតឡើងនៅវេលាម៉ោង០៣រសៀល ថ្ងៃទី០១ ខែមករា ឆ្នាំ២០២២ នៅចំណុចភូមិរុនខាងត្បូង ឃុំដានរុន ស្រុកសូទ្រនិគម ខេត្តសៀមរាប លើផ្លូវកៅស៊ូ។

សមត្ថកិច្ចស្រុកសូទ្រនិគមបានរាយការណ៍ថាគ្រោះថ្នាក់ចរាចរណ៍នេះ បង្កដោយម៉ូតូម៉ាកហុងដា ឌ្រីមពណ៌ខ្មៅ ពាក់ស្លាកលេខសៀមរាប 1AK5954 បើកបង្ហោះពីកើតទៅលិច បុកនឹងម៉ូតូម៉ូតូ ZooMERX ពណ៌ក្រហម ពាក់ស្លាកលេខ ប.មានជ័យ1W.7053 បើកពីលិចទៅកើត បណ្ដាលអោយស្លាប់មនុស្ស០៣នាក់ និងរបួសធ្ងន់ម្នាក់។

សមត្ថកិច្ចបានបន្តថា ជនរងគ្រោះដែលបានស្លាប់ ១/ឈ្មោះសុខ ចាន់រ៉ត់ ភេទស្រី អាយុ២២ឆ្នាំ ទីលំនៅភូមិត្រាវកៀត ឃុំដានរុន ស្រុកសូទ្រនិគម ខេត្តសៀមរាប(ជាអ្នកបើកបរម៉ូតូម៉ាកZooMERX)។ ២/ឈ្មោះវ៉ន ដេវីត ភេទប្រុស អាយុ១៩ឆ្នាំ នៅភូមិគោកឬស្សីត្បូង ឃុំដានរុន ស្រុកសូទ្រនិគម ខេត្តសៀមរាប(ជាអ្នកបើកបរម៉ូតូម៉ាកហុងដា) ៣/ឈ្មោះខន ឃា ភេទប្រុស អាយុ១៩ឆ្នាំ នៅភូមិគោកឬស្សីត្បូង ឃុំដានរុន ស្រុកសូទ្រនិគម ខេត្តសៀមរាប(អ្នកជិះពីក្រោយម៉ូតូហុងដា)។ អ្នករបួសធ្ងន់ឈ្នោះ ឈន កូឡាប ភេទស្រី អាយុ១៧ឆ្នាំ នៅភូមិគោកឬស្សីត្បូង ឃុំដានរុន ស្រុកសូទ្រនិគម ខេត្តសៀមរាប(អ្នកជិះពីក្រោយម៉ូតូZOOMWERX) ត្រូវបានគេបញ្ជូនទៅមន្ទីរពេទ្យស្រុក។ ចំណែកសាកសពប្រគល់អោយក្រុមគ្រួសារធ្វើបុណ្យតាមប្រពៃណី។ ដោយឡែកមូ៉តូរក្សាទុកនៅអធិការនគរបាលស្រុកដើម្បីរង់ចាំការដោះស្រាយ៕SRP