ខេត្តក្រចេះ៖កម្លាំងគយការិយាល័យស្រាវជ្រាវ និងបង្ក្រាបអំពើរត់ពន្ធតំបន់៦ សហការជាមួយមន្ត្រីគយ និងរដ្ឋាករ ខេត្តក្រចេះ និងអាអាវុធហត្ថបានចុះបង្ក្រាបបានរថយន្តអត់ពន្ធបានចំនួន០៦គ្រឿង។

ការបង្ក្រាបធ្វើឡើងនៅថ្ងៃសុក្រ ទី១១ ខែមីនា ម្សិលមិញ នៅក្នុងភូមិសាស្រ្តខេត្តក្រចេះ។
ការចុះបង្ក្រាបយោងតាមការណែនាំរបស់លោក គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លើករណីផុតសុពលភាពនៃការបន្ធូរបន្ថយប្រាក់ពន្ធនាំចូល១០% ចំពោះរថយន្តចង្កូតឆ្វេង ដែលមានស្រាប់នៅក្នុងស្រុក។

សូមជម្រាបថារថយន្តស៊េរីទំនើបអត់ពន្ធទាំង៦គ្រឿងរួមមាន៖
១៖ រថយន្តម៉ាក Lexus 570 ចង្កូតឆ្វេង ពណ៌ស ផលិតឆ្នាំ២០១៤ ពាក់ស្លាកលេខ ភ្នំពេញ 2BA-4030។
២៖ រថយន្តម៉ាក Lexus Rx 350 ចង្កូតឆ្វេង ពណ៌ស ផលិតឆ្នាំ២០១១ ពាក់ស្លាកលេខ ភ្នំពេញ 2BA-8255។
៣៖ រថយន្តម៉ាក Lexus Rx 350 ចង្កូតឆ្វេង ពណ៌ស ផលិតឆ្នាំ២០១២ ពាក់ស្លាកលេខ ភ្នំពេញ 2AM-2848។
៤៖ រថយន្តម៉ាក TUNDRA ចង្កូតឆ្វេង ពណ៌ស ផលិតឆ្នាំ២០១៤ ពាក់ស្លាកលេខ ក្រចេះ 2C-7707។
៥៖ រថយន្តម៉ាក Lexus Rx 400H ចង្កូតឆ្វេង ពណ៌ស ផលិតឆ្នាំ២០០៦ ពាក់ស្លាកលេខ ភ្នំពេញ 2AI-1501។
៦៖ រថយន្តម៉ាក Lexus HS 250H ចង្កូតឆ្វេង ពណ៌ទឹកប្រាក់ ផលិតឆ្នាំ២០១០ ពាក់ស្លាកលេខ ខម2-2812។

បច្ចុប្បន្ន រថយន្តទាំងអស់បាននាំយកមករក្សាទុកជាបណ្តោះអាសន្ន នៅទីតាំងឈរជើង របស់គយការិយាល័យស្រាវជ្រាវ និងបង្ក្រាបអំពើរត់ពន្ធ តំបន់៦ ពញាក្រែក ដើម្បីធ្វើកំណត់ហេតុល្មើសច្បាប់គយ ទៅតាមនីតិវិធី៕srp

ខេត្តត្បូងឃ្មុំ​៖លោកហ៊ុន ម៉ាណែត បាន​ថ្លែងថា​ នៅក្រោយគំនរផេះផង់បន្សល់ទុកដោយរបបប៉ុលពត រហូតមកដល់សព្វថ្ងៃនេះ កម្ពុជាមានវត្តព្រះពុទ្ធសាសនាជាង ៥,០០០ វត្តទៅហើយ ជាការបញ្ជាក់បានថា ការរីកចម្រើនរបស់ផ្នែកពុទ្ធចក្រ គឺអាស្រ័យទាំងស្រុងទៅនឹងកត្តាដឹកនាំខាងផ្នែកអាណាចក្រ ដូចដែលគណបក្សប្រជាជនកម្ពុជាខិតខំសម្រេចបានក្នុងរយៈពេលជាង ៤០កន្លងមកនេះ។ បើមានការដឹកនាំខុស គឺវិស័យសាសនា និងសិទ្ធិសេរីភាពរបស់ប្រជាពលរដ្ឋក្នុងការគោរពប្រតិបត្តិសាសនា នឹងត្រូវរលាយបាត់បង់។

ក្នុងពិធីបញ្ចុះខណ្ឌសីមាព្រះវិហារ និងសម្ពោធសមិទ្ធផលនានា ក្នុងវត្តបុព្វកសុវារី ហៅវត្តជីទ្រុន ស្ថិតក្នុងភូមិជីទ្រុន ឃុំត្រពាំងព្រីង ស្រុកតំបែរ ខេត្តត្បូងឃ្មុំ​ នៅថ្ងៃសុក្រម្សិលមិញ លោក ហ៊ុន ម៉ាណែត​ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក បាន​លេីកឡេីងថា​ នៅក្នុងសង្គមប្រជាធិបតេយ្យ មិនថានៅក្នុងប្រទេសកម្ពុជា ឬបណ្តាប្រទេសនានាលើសាកលលោក ការលេចឡើងនូវអ្នកដឹកនាំដែលត្រូវទទួលកាន់ចង្កូតនាវាប្រទេសជាតិ គឺអាចនឹងមានបេក្ខជនច្រើន ដូចនឹងការរីកដុះដាលស្អេកស្កះនៃរុក្ខជាតិផ្សិតក្នុងរដូវភ្លៀងធ្លាក់ ដែលក្នុងនោះមានផ្សិតខ្លះពោរពេញដោយជីវជាតិផ្តល់ឱ្យអ្នកហូបទទួលបានសុខភាពល្អ ហើយក៏មានផ្សិតខ្លះទៀតជាផ្សិតពុលអាចបង្កជម្ងឺ ឬគ្រោះថ្នាក់ធ្ងន់ធ្ងរដល់អាយុជីវិតក៏ថាបាន។ ដូច្នេះការជ្រើសរើសឱ្យបានត្រឹមត្រូវ គឺមានតែពឹងទៅលើការពិចារណាឱ្យបានហ្មត់ចត់ល្អិតល្អន់​។

លោក ហ៊ុន ម៉ាណែត​ បាន​បន្ត​ថា​ ក្នុងការជ្រើសរើសថ្នាក់ដឹកនាំកំពូលរបស់ប្រទេស ដែលជាបុគ្គលសំខាន់នៅក្នុងការកំណត់ទិសដៅអនាគត ធានារក្សាការពារសុខសន្តិភាព និងភាពសុខសាន្តសម្បូរសប្បាយជូនប្រទេសជាតិ និងប្រជាជន យើងអាចមើលឃើញថា សម្តេចតេជោ គឺជាឥស្សរជនដែលលេចធ្លោជាងគេ ក្នុងនាមជាអ្នកនយោបាយប្រកបដោយបទពិសោធន៍លើសលប់ និងចក្ខុវិស័យខ្ពង់ខ្ពស់ ដែលបានបង្ហាញនូវស្នាដៃ និងលទ្ធផលជាក់ស្តែងជាច្រើននៅក្នុងដំណាក់កាលផ្សេងៗនៃប្រវត្តិសាស្ត្រកម្ពុជា ទាំងលើការរំដោះជាតិ ការកសាងការពារជាតិ និងការអភិវឌ្ឍជាតិ។

លោក ហ៊ុន ម៉ាណែត​ ក៏បាន​ថ្លែងអំណរគុណចំពោះប្រជាពលរដ្ឋ ដែលតែងជឿជាក់លើរាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា និងបានចូលរួមក្នុងការថែរក្សាសន្តិភាព និងស្ថិរភាពរបស់ប្រទេសជាតិយើង ជាពិសេសតាមរយៈការជ្រើសរើសមេដឹកនាំត្រឹមត្រូវ គឺ សម្តេចតេជោនាយករដ្ឋមន្ត្រី ដែលជាមេដឹកនាំប្រកបដោយធម៌, យុត្តិធម៌, គុណធម៌, មិនរត់ចោលប្រជាពលរដ្ឋក្នុងកាលៈទេសៈលំបាក និងមានការទទួលខុសត្រូវម៉ឺងម៉ាត់ចំពោះជោគវាសនាអនាគតជាតិ និងប្រជាជន និងសូមបន្តប្រកាន់យកការសម្រេចចិត្តដ៏ត្រឹមត្រូវបែបនេះនៅក្នុងឆ្នាំ២០២២ និង២០២៣ ក៏ដូចជាពេលខាងមុខៗទៀត ដើម្បីអនាគតប្រទេសជាតិយើង​៕SRP

ខេត្តសៀមរាប៖វាជាសញ្ញាល្អមួយ សម្រាប់បងប្អូនប្រជាពលរដ្ឋនៅក្រុងខេត្តសៀមរាប ខណៈ កំណើនជើងហោះហើរ មកដល់ព្រលានយន្តហោះសៀមរាប មានការកើនឡើង
ក្នុងបរិបទជំងឺកូវីដ។

ក្រុមនិស្សិតសាកលវិទ្យាល័យ INSEAD នៃប្រទេសសិង្ហបុរីចំនួន៨០នាក់ នៅព្រហស្បតិ៍ ម្សិលមិញ បានមកដល់ព្រលានយន្តហោះអន្តរជាតិខេត្តសៀមរាប ខណៈជើងហោះហើរពីបរទេសកើនឡើងពីជិត ២០ជើងក្នុងខែ ទៅជិត៤០ជើងក្នុងមួយខែក្នុងរយ:ពេល៣ខែចុងក្រោយនេះ។

លោក លី សុផារី តំណាងលោក ថោង ប៊ុនថារី ប្រធានសមាគមសហគ្រិនវ័យក្មេងកម្ពុជា សាខាខេត្តសៀមរាប បង្ហាញថា អ្នកដំណើរទាំង៨០នាក់នោះ សុទ្ធតែទទួលបានការចាក់វ៉ាក់សាំង និងពុំមានរកឃើញវិជ្ជមានឡើយ។ ក្រុមនិស្សិតបរទេសនេះដែរ នឹងស្នាក់នៅក្នុងខេត្តសៀមរាបរយៈពេល៤ថ្ងៃ។

លោក លី សុផារី បន្ថែមថា ការមកដល់ជាបន្តបន្ទាប់ នៃទេសចរវ៉ាក់សាំងមកកាន់កម្ពុជា បានបង្ហាញពីទំនុកចិត្តរបស់ភ្ញៀវទេសចរអន្តរជាតិ លើរាជរដ្ឋាភិបាល និងអាជ្ញាធរខេត្ត ក្នុងការគ្រប់គ្រង និងរៀបចំខេត្តសៀមរាបជាគោលដៅទេសចរណ៍សុវត្ថិភាព។

លោក សឿង ស៊ីថា ប្រធានការិយាល័យទីក្រុងស្អាត នៃមន្ទីរទេសចរណ៍ខេត្តសៀមរាប បង្ហាញថា ចាប់ពីថ្ងៃទី១៧ ខែធ្នូ ឆ្នាំ២០២១ មកដល់ដំណាច់ខែកុម្ភៈ ឆ្នាំ២០២២ ភ្ញៀវបរទេស ដែលធ្វើដំណើរតាមជើងហោះហើរមានប្រមាណជាង៦,០០០នាក់។ បច្ចុប្បន្ន ក្រុមហ៊ុនអាកាសចរណ៍ ដែលកំពុងដំណើរការហោះហើរមានចំនួន៣ រួមមានក្រុមហ៊ុន Singapore Airlines Thai Smile និង Southern China។ តាមការសង្កេតរបស់លោក ការមកដល់របស់ក្រុមនិស្សិតបរទេសនាពេលនេះជាក្រុមអ្នកដំណើរធំដំបូងគេ ក្រោយពីប្រទេសកម្ពុជាបើកឱ្យមានទេសចរណ៍វ៉ាក់សាំង៕SRP

ខេត្តកំពង់ចាម​៖ក្នុង​ឱកាស​ប្រារព្វពិធីអបអរសាទរ​​​ខួបលើកទី១១១ នៃទិវាអន្តរជាតិនារី ៨មីនា ឆ្នាំ២០២២​​​​ ក្រោមប្រធានបទ “ សមភាពយេនឌ័រថ្ងៃនេះ ដើម្បីចីរភាពនាពេលអនាគត ” ដែល​បាន​រៀបចំ​ឡើង​ដោយ​ស្នងការរដ្ឋាននគរបាល​ខេត្តកំពង់ចាម​ នៅ
ថ្ថ្ងៃសុក្រនេះ​ លោកស្រី​​ ប៉ាង​ ដានី​ អភិបាល​រង​ ខេត្តកំពង់ចាម​ បានថ្លែងថា​ ការប្រារព្វពិធី​​នេះ ​ពិតជាមាន​សារៈសំខាន់ និងចាំបាច់បំផុត ដើម្បីពង្រឹងភាពអង់អាច ដល់កងកម្លាំងនគរបាលនារី និងការផ្តល់ សេវាសង្គម ដល់ប្រជាពលរដ្ឋក្រីក្រ និងក្រុមងាយរងគ្រោះ គឺជាកត្តាដ៏ចាំ​បាច់​បំផុត ​ដើម្បីធានាបាននូវ ដំណើរការសង្គម ប្រកបដោយសុខដុមរមនា។ ដោយរាជរដ្ឋាភិបាលកម្ពុជា បានផ្តល់ការយកចិត្តទុកដាក់ យ៉ាងខ្លាំង ក្នុងការលើកកម្ពស់សមភាព​យេនឌ័រនិងពង្រឹងភាពអង់​អាច​ដល់​នគរបាលនារី និងស្រ្តី ដើម្បីឲ្យពួកគេ ក្លាយជាកម្លាំងចលករមួយ ចូលរួមក្នុង​កិច្ចអភិវឌ្ឍ​សង្គម ​និង​សេ​ដ្ឋកិច្ច។

លោកឯម​ កុសល​ ស្នងការ​នគរបាល​ខេត្ត​កំពង់ចាម​ បាន​លេីកឡេីងថា​ កម្លាំងនគរបាលនារី បានខិតខំពុះពារគ្រប់ឧបសគ្គ ប្រឹងប្រែងយ៉ាងសកម្ម ចូលរួមចំណែកអនុវត្តតាមបទបញ្ហា ផែនការបង្ការទប់ស្កាត់បទល្មើសគ្រប់ប្រភេទ តាមដែនសមត្ថកិច្ច និងឯកទេសជំនាញរបស់ខ្លួន ប្រកបដោយស្មារតីទទួលខុសត្រូវខ្ពស់។ មិនតែប៉ុណ្ណោះ កម្លាំងនគរបាលនារី បានចូលរួមយ៉ាងសកម្ម និងក្លៀវក្លាក្នុងការងារសង្គម ដោយរួមជាមួយអាជ្ញាធរដែនដី បំពេញការងារសង្គម វប្បធម៌ សាសនា ជាពិសេសចូលរួមជួយសង្គ្រោះប្រជាពលរដ្ឋ ដែលបានជួបប្រទះ នូវគ្រោះធម្មជាតិ នាពេលកន្លងមកគួរអោយកោតសរសើរផងដែរ៕SRP

ខេត្តសៀមរាប៖បើគិតត្រឹមខែមីនា ឆ្នាំ២០២២នេះ ប្រជាពលរដ្ឋ ដែលបានទទួលស្គាល់កំហុស និងយល់ព្រម ប្រគល់ដីព្រៃលិចទឹកតំបន់៣ ជូនរដ្ឋវិញ១,៤៤៧គ្រួសារ ស្មើនឹងទំហំផ្ទៃដី ជាង៣ពាន់ហិកតា។

ថ្លែងក្នុងពិធីប្រកាសអភិបាលរងខេត្តសៀមរាបនៅព្រឹកមិញនេះ លោក ទៀ សីហា បានបញ្ជាក់ថា៖ ផ្អែកតាមអនុសាសន៍ណែនាំដ៏ខ្ពង់ខ្ពស់ របស់សម្តេចតេជោ ហ៊ុន សែន និងសេចក្តីណែនាំរបស់ទីស្តីការគណៈរដ្ឋមន្ត្រី ដើម្បីបង្កើនប្រសិទ្ធភាពត្រួតពិនិត្យ និងចាត់វិធានការបង្ក្រាបការទន្ទ្រានដីរដ្ឋក្នុងដែនព្រៃលិច ទឹកតំបន់៣ នៃបឹងទន្លេសាប ស្ថិតក្នុងភូមិសាស្ត្រខេត្ត រដ្ឋបាលខេត្តបានដឹកនាំក្រុមការងារចម្រុះ ចុះអនុវត្តការងារជាប្រចាំ ដោយទទួលបានលទ្ធផលការងារដូចខាងក្រោម៖
– បានរៀបចំទិន្នន័យ និងព័ត៌មានជាប្រចាំ ពីការទន្ទ្រានដីព្រៃលិចទឹក និងបានចាត់ក្រុមការងារចុះបំពេញទិន្នន័យ ព័ត៌មាន និងបានរៀបចំក្រុមការងារបច្ចេកទេសចុះវាស់វែងដោយបែងចែកជា ០៦ក្រុម ដើម្បីចុះទៅតាមបណ្តាក្រុង-ស្រុក ពិនិត្យ និងកំណត់វាស់វែងបង្គោលព្រំនៅសល់ បាត់បង់ និងការរំកិលបង្គោល។

លោក ទៀ សីហា បន្តថា៖គិតត្រឹមខែមីនា ឆ្នាំ២០២២នេះ ប្រជាពលរដ្ឋ ដែលបានទទួលស្គាល់កំហុស និងយល់ព្រម ប្រគល់ដីព្រៃលិចទឹកតំបន់៣ជូនរដ្ឋវិញ១,៤៤៧គ្រួសារ ស្មើនឹងទំហំផ្ទៃដី ៣.២៤១,៩០០៩(បីពាន់ពីររយសែសិបមួយហិកតា និង៩០០៩ម៉ែត្រការ៉េ)។

លោកបានបញ្ជាក់ទៀតថា បន្ទាប់ពីក្រុមការងារចម្រុះបានចុះត្រួតពិនិត្យ ព្រៃលិចទឹកតំបន់៣ ក្នុងក្រុងស្រុកចំនួន៦ ដែលជាប់បឹងទន្លេសាបរួចមក ក្រុមការងារក៏បានធ្វើការដាំដុះឡើងវិញនូវគ្រាប់ត្នោត បានចំនួន ៥៩.១៩១(ប្រាំម៉ឺនប្រាំបួនពាន់មួយរយកៅសិបមួយ)គ្រាប់ កូនត្នោត១០ដើម, ដើមច្រកែង ២០០ដើម, ដើមរាំង ២៣៥០ ដើម, ដើមឫស្សីផ្ទោល ២០០ដើម, ដើមរំដេញ ៤៥០ដើម, ដើមសណ្តាន់ ១.៥៥០ដើម, ដើមត្រល់ត្រល់ ១០០ដើម និង ដើមកន្សែង ២០០ដើម៕SRP

ខេត្តសៀមរាប៖សមិទ្ធិផលផ្លូវចំនួន៣៨ខ្សែ នៅក្រុងសៀមរាប សម្រេចបានសាងសង់រួចជាស្ថាពរគ្រោងដាក់សម្ពោធប្រើប្រាស់ជាផ្លូវការ ថ្ងៃទី០៤ ខែមេសា ឆ្នាំ២០២២ ក្រោមអធិបតីភាព សម្ដេចហ៊ុន សែន។

ថ្លែងក្នុងពិធីប្រកាសចូលកាន់តំណែងអភិបាលរងអភិបាលខេត្តសៀមរាប នៅថ្ងៃសុក្រនេះ លោក ទៀ សីហា អភិបាលខេត្តបានបញ្ជាក់ថា៖ ការរីករាលដាលនៃជំងឺកូវីដ-១៩ បានអូសបន្លាយអស់រយៈពេល ជិត២ឆ្នាំ បានធ្វើឱ្យមានផលប៉ះពាល់យ៉ាងធ្ងន់ធ្ងរ ដល់សេដ្ឋកិច្ចសកល ក៏ដូចជាសេដ្ឋកិច្ចជាតិ ពិសេសប្រតិបត្តិករ និងអ្នកបម្រើការងារក្នុងវិស័យទេសចរណ៍។ ផលវិបាកនៃជំងឺនេះ បានធ្វើឱ្យខេត្តសៀមរាប ពិសេសតំបន់រមណីយដ្ឋានអង្គរ ដែលធ្លាប់តែទទួលភ្ញៀវទេសចរជាតិ និងអន្តរជាតិចូលមកទស្សនាកម្សាន្ត យ៉ាងច្រើនកុះករនោះ បែរជាមានសភាពស្ងប់ស្ងាត់ទៅវិញ។

បើទោះជាស្ថិតក្នុងដំណាក់កាល នៃផលប៉ះពាល់ ដោយសារជំងឺកូវីដ ធ្ងន់ធ្ងរក៏ដោយ ក៏រដ្ឋបាលខេត្ត ដោយមានការគាំទ្រពីរាជរដ្ឋា-ភិបាលបាន និងកំពុងជំរុញ និងយកចិត្តទុកដាក់លើការកែលម្អសោភ័ណភាពក្រុងឱ្យបានកាន់តែល្អប្រសើរថែមទៀត។ ជាសក្ខីភាពហេដ្ឋារចនាសម្ព័ន្ធផ្លូវថ្នល់ ៣៨ខ្សែ ប្រព័ន្ធលូ ភ្លើងបំភ្លឺសាធារណៈ និងកែលម្អស្ទឹងសៀមរាប ក្នុងក្រុងសៀមរាបគឺជាសមិទ្ធផលប្រវត្តិសាស្រ្តថ្មីមួយមិនអាចកាត់ថ្លៃបានរបស់ សម្តេចតេជោ ហ៊ុន សែន សម្រាប់ខេត្តសៀមរាប ដែលមកដល់ពេលនេះយើងបានសម្រេច នៃការសាងសង់ផ្លូវបាន១០០% គឺនៅសេសសល់បន្តិចបន្តួច លើការងារបំពាក់ប្រព័ន្ធភ្លើងបំភ្លឺសាធារណៈ និងការងារផ្សេងទៀត ហើយគ្រោងនឹងធ្វើពិធីសម្ពោធដាក់ឱ្យប្រើប្រាស់ជាផ្លូវការ នាថ្ងៃទី០៤ ខែមេសា ឆ្នាំ២០២២ខាងមុខ ក្រោមអធិបតីភាពដ៏ខ្ពង់ខ្ពស់ សម្តេចតេជោ នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត។

លោកបន្តថាស្របពេលដែលស្ថានភាព នៃការរីករាលដាលនៃជំងឺកូវីដ មានសភាពស្ងប់ស្កាត់ រាជរដ្ឋាភិបាលកម្ពុជា ក៏បានបើកប្រទេសឡើងវិញ នាចុងឆ្នាំ២០២១កន្លងទៅ ដើម្បីធ្វើឱ្យកំណើនសេដ្ឋកិច្ចជាតិ វិលទៅរកប្រក្រតីភាពឡើងវិញ។ ដោយឡែកខេត្តសៀមរាប បានត្រៀមខ្លួនរួចរាល់ ដើម្បីទទួលភ្ញៀវទេសចរជាតិ និងអន្តរជាតិ ពីគ្រប់ទិសទីមកទស្សនាប្រកបដោយភាពជឿទុកចិត្ត នូវរាល់វិធានការ ដែលរដ្ឋបាលខេត្តបានចាត់ចែងបង្ការ ការរីករាលដាល នៃជំងឺកូវីដ-១៩ ការពង្រឹងនូវសេវាកម្មទេសចរណ៍ឱ្យកាន់តែប្រសើរថែមមួយកម្រិតទៀត។ ជាក់ស្តែងតាមរយៈនៃការរៀបចំពិធីបុណ្យឆ្លង ឆ្នាំចាស់ផ្លាស់ចូលឆ្នាំថ្មី ២០២១-២០២២កន្លងទៅ មានភ្ញៀវទេសចរជាតិ-អន្តរជាតិ បានចូលមកទស្សនាខេត្តសៀមរាប ប្រមាណ២០ម៉ឺននាក់ផងដែរ។ ម្យ៉ាងវិញទៀតក្រុងសៀមរាប ដោយទទួលបានការគាំទ្រ ពីទីភ្នាក់ងារសហប្រតិបត្តិការអន្តរជាតិជប៉ុន(JICA) និងក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃប្រទេសជប៉ុន ក្នុងការរៀបចំក្រុងសៀមរាបឱ្យក្លាយជាទីក្រុងឆ្លាតវៃ ស្របតាមផែនការមេចង្អុលផ្លូវទីក្រុងឆ្លាតវៃក្រុងសៀមរាប ខេត្តសៀមរាបផងដែរ។

លោកបន្តទៀតថាក្រោយពីមានការស្ងប់ស្កាត់ នៃការរីករាលដាលនៃជំងឺកូវីដ តែស្ថានភាពនៃការឆ្លងនូវវីរុសបំលែងថ្មី«អូមីក្រុង» នាពេលបច្ចុប្បន្ននេះ មានសន្ទុះកើនឡើង នៅកម្ពុជាគួរឱ្យព្រួយបារម្ភ ដែលធ្វើឱ្យវិស័យផ្សេងៗ ពិសេសវិស័យទេសចរណ៍របស់ខេត្ត ដែលទើបនឹងងើបឡើង បានបន្តិច នឹងអាចធ្វើឱ្យមានផលប៉ះពាល់ជាអវិជ្ជមាន ថែមទៀត។ បើទោះបីជាយ៉ាងនេះក្តី រដ្ឋបាលខេត្តបានដាក់ចេញនូវវិធានការនានា ក្នុងការបង្ការ និងទប់ស្កាត់ នៃការរីករាលដាល នៃជំងឺកូវីដ-១៩ លើវិធានការដែលមានស្រាប់ «៣កុំ និង៣ការពារ» ដើម្បីឆ្លើយតបទៅនឹងការរីករាលដាលនៃជំងឺដ៏កាចសាហាវនេះ ឱ្យកាន់តែមានប្រសិទ្ធភាពខ្ពស់៕SRP

ខេត្តសៀមរាប៖លោកប្រាក់ សោភ័ណ ប្រធានសហភាពសហព័ន្ធយុវជនកម្ពុជាខេត្តសៀមរាប និងលោកអ៉ឹង គឹមលាង អភិបាលរងខេត្តពោធិ៍សាត់ ត្រូវបានប្រកាសតែងតាំង ជាអភិបាលរងខេត្តសៀមរាប នៅព្រឹកថ្ងៃសុក្រនេះ។

ការប្រកាសតែងតាំងនេះធ្វើឡើងនៅរដ្ឋបាលខេត្តសៀមរាប ក្រោមវត្តមានលោកសក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ តំណាងដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ៕SRP

ខេត្តបន្ទាយមានជ័យ៖លោកអ៊ុំ រាត្រី បានថ្លែងថាជាលទ្ធផល នៃកិច្ចប្រជុំស្តីពីការបើកដំណើរការជាបណ្តោះអាសន្នច្រកទ្វារព្រំដែនអន្តរជាតិស្ទឹងបត់ ជាច្រកសម្រាប់ដឹកទំនិញចេញ-ចូល មិនទាន់មានការសម្រេចថា បើកឲ្យដំណើរការថ្ងៃណា ពេលណានោះទេ ពេលនេះរដ្ឋបាលខេត្តនឹងធ្វើរបាយការណ៍ រាយការណ៍ទៅរាជរដ្ឋាភិបាលនៃប្រទេសទាំង២ ដើម្បីមានគោលការណ៍ពិនិត្យសម្រេច។

លោកថ្លែងបែបនេះ ក្នុងឱកាសជួបប្រជុំគ្នា ស្តីពីការបើកដំណើរការជាបណ្តោះអាសន្នច្រកទ្វារព្រំដែនអន្តរជាតិស្ទឹងបត់-ច្រកណងអៀន ច្រកសម្រាប់ដឹកទំនិញចេញ-ចូលនៅរសៀលថ្ងៃទី១០ ខែមីនា ឆ្នាំ២០២២ ម្សិលមិញ នៅស្នាក់ការច្រកទ្វារចក្រក្លងលឹក ស្រុកអារ័ញ្ញ ខេត្តស្រះកែវ ជាប់គ្នាច្រកអន្តរជាតិប៉ោយប៉ែត ខេត្តបន្ទាយមានជ័យ។

សូមជម្រាបថាភាគីកម្ពុជាដឹកនាំប្រតិភូចូលរួមប្រជុំ លោក អ៊ុំ រាត្រី អភិបាលខេត្តបន្ទាយមានជ័យ អគ្គកុងស៊ុលកម្ពុជាប្រចាំប្រទេសថៃ លោក លោកស្រី អភិបាលរងខេត្ត ប្រធានមន្ទីរពាក់ពន្ធ័ អភិបាលក្រុងប៉ោយប៉ែត មន្ត្រីរាជការ និងកម្លាំងប្រដាប់អាវុធ គ្រប់ប្រភេទ។ ចំណែកភាគីថៃដឹកនាំដោយ លោក បរិនញ៉ា ភោធីសាធ Parinya Phothisat អភិបាលខេត្តស្រះកែវ និងមន្ត្រីពាក់ព័ន្ធជាច្រើនរូបផងដែរ។

កិច្ចប្រជុំនេះភាគីទាំងពីរ កម្ពុជា-ថៃ បានជជែកគ្នាផ្តោតលើការពង្រឹងសម្ព័ន្ធមេត្រីភាព ផ្លាស់ប្តូរព័ត៌មានគ្នា ពិភាក្សាលើការបើកច្រកបណ្តោះអាសន្នច្រកទ្វារព្រំដែនអន្តរជាតិ ស្ទឹងបត់ ជាច្រកសម្រាប់ដឹកទំនិញចេញចូល ដែលបាននឹងកំពុងដំណើរការ កសាងអគារ ការិយាល័យរដ្ឋបាល ការងារនៃប្រទេសទាំងពីរ ទោះបីជាអគាររដ្ឋបាលកម្ពុជា សម្រេចបានត្រឹមតែ ៤០ភាគរយ និងខាងថៃសម្រេចបាន ៩០ភាគរយ ប៉ុន្តែយើងប្រជុំថ្ងៃនេះ ពិនិត្យវឌ្ឍនៈភាព និងលទ្ធភាព ធ្វើការពិភាក្សាដើម្បីបើកដំណើរការជាបណ្តោះអាសន្ន សម្រាប់ដឹកទំនិញចេញចូលរវាងប្រទេសទាំងពីរផងដែរ៕SRP

ខេត្តបាត់ដំបង៖លោកសុខ លូ អភិបាល ខេត្តបាត់ដំបង បានលើកឡើងថាសព្វថ្ងៃនេះ មានបញ្ហាប្រឈមមួយចំនួន គឺនៅពេលប្រមូលផលដំណាំនានា ដែលខ្វះការកែច្នៃ ដូចនេះឯកឧត្តម បានស្នើដល់ស្ថានទូតអូស្រ្ដាលី ធ្វើការផ្សព្វផ្សាយដល់វិនិយោគិន ក្នុងប្រទេសអូស្រ្ដាលី ដើម្បីវិនិយោគផ្នែកកែច្នៃប្រភេទផ្លែឈើ ឬផលិតផលកសិកម្មនៅក្នុងភូមិសាស្រ្ដខេត្តបាត់ដំបង ឲ្យកាន់តែច្រើន ក្នុងន័យជួយដល់ប្រជាកសិករ ខេត្តបាត់ដំបង អាចរកប្រាក់ចំណូលបានច្រើន និងជាពិសេសមានឱកាសក្នុងការនាំចេញផលិតផល កសិកម្មដែលបានកែច្នៃរួច ទៅក្រៅប្រទេស និងជួយបន្តផ្សព្វផ្សាយដល់ភ្ញៀវទេសចរ នៃប្រទេសអូស្ដ្រាលី ឲ្យមកទស្សនាខេត្តបាត់ដំបង ឲ្យកាន់តែច្រើនឡើង។

លោកបានមានប្រសាសន៍ ថ្លែងអំណរគុណដល់រដ្ឋាភិបាលប្រទេសអូស្ដ្រាលី តាមរយៈស្ថានទូតអូស្រ្ដាលី ដែលបានជួយឧបត្ថម្ភគាំទ្រ មានដូចជាផ្នែកសុខាភិបាល ផ្នែកអប់រំ ផ្នែកកសិកម្ម និងពិសេសផ្នែកបោសសំអាតមីននៅក្នុងខេត្តបាត់ដំបង បើទោះបីជាការដោះស្រាយបញ្ហាគ្រាប់មីន និងគ្រាប់មិនទាន់ផ្ទុះនៅក្នុងខេត្តបាត់ដំបង មិនទាន់ទទួលបានជោគជ័យ១០០%ក្ដី ប៉ុន្តែក៏បានជួយផ្ដល់ឱកាសដល់ប្រជាកសិករមួយចំនួនធំ អាចធ្វើការដាំដុះនៅលើដីរបស់ខ្លួនដែលបានបោសសំអាតមីនរួច ដោយសុវត្ថិភាព និងលែងភ័យខ្លាច។
លោកក៏បានមានប្រសាសន៍ថ្លែងអំណរគុណដល់រដ្ឋាភិបាលប្រទេសអូស្ដា្រលី ដែលបានផ្ដល់ជូនវ៉ាក់សាំងកូវីដ-១៩ ប្រភេទ Pfizer មកកាន់ប្រទេសកម្ពុជា និងធុងត្រជាក់សម្រាប់ដាក់វ៉ាក់សាំងកូវីដ-១៩ជូនដល់រដ្ឋបាលខេត្តបាត់ដំបង ដើម្បីអាចធ្វើការដាក់វ៉ាក់សាំងកូវីដ-១៩ និងរក្សាទុកមិនឲ្យខូចគុណភាពវ៉ាក់សាំងផងដែរ។

លោកសុខ លូ មានប្រសាសន៍យ៉ាងដូច្នេះនៅរសៀលថ្ងៃព្រហស្បតិ៍ នេះក្នុងឱកាសអនុញ្ញាតទទួលជួបសម្ដែងការគួរសម លោក Andreas Zurbrugg ឯកអគ្គរាជទូតរងនៃស្ថានទូតអូស្ដ្រាលី ប្រចាំប្រទេសកម្ពុជា នៅសាលប្រជុំB1 VIP ៕SRP

ខេត្តបាត់ដំបង៖សម្ដេចស ខេង បានណែនាំឱ្យរដ្ឋបាលខេត្តបាត់ដំបង យកចិត្តទុកដាក់ទប់ស្កាត់ការបំផ្លិចបំផ្លាញ ធនធានធម្មជាតិ ទាំងលើគោកនិងក្នុងទឹក ពិសេសធនធាននៅបឹងទន្លេសាប។ សម្ដេចក៏បានស្នើក្រុមការងាររាជរដ្ឋាភិបាល ផ្ដល់ការគាំទ្ររដ្ឋបាលខេត្ត ដោយសង្កត់ធ្ងន់ថា បើធ្វើមិនបានល្អទេ នឹងទទួលការរិះគន់ពីអ្នកជំនាន់ក្រោយ។

ជាមួយគ្នានេះដែរ សម្ដេចបានផ្ដល់អនុសាសន៍ឱ្យទប់ស្កាត់ការដឹកជញ្ជូនលើសទំងន់បំផ្លាញផ្លូវថ្នល់ រៀបចំសណ្ដាប់ធ្នាប់ក្រុងឱ្យមានចញ្ចើមផ្លូវសម្រាប់ថ្មើជើង រៀបចំកែលម្អរសួនច្បារលើទ្រូងផ្លូវឱ្យបានស្អាតដើម្បីលើកកម្ពស់សោភណ្ឌភាព។ សម្ដេចថាការងារនេះទាមទារការបំផុសចលនាចូលរួមពីប្រជាពលរដ្ឋ ដែលរស់នៅអមសងខាងផ្លូវទើបទទួលបានជោគជ័យ។

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ថាយ៉ាងដូច្នេះ នៅថ្ងៃព្រហស្បតិ៍ នេះ ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២១ និងលើកទិសដៅការងារឆ្នាំ២០២២ របស់រដ្ឋបាលខេត្តបាត់ដំបង៕SRP

ខេត្តបាត់ដំបង៖សម្ដេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃព្រហស្បតិ៍នេះ ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២១ និងលើកទិសដៅការងារឆ្នាំ២០២២ របស់រដ្ឋបាលខេត្តបាត់ដំបង បានមានប្រសាសន៍ថា ពាក់ព័ន្ធនឹងការដោះស្រាបញ្ហារបស់ប្រជាពលរដ្ឋ សម្ដេចបានផ្ដល់ទស្សនទានដល់ក្រុមការងាររាជរដ្ឋាភិបាល និងរដ្ឋបាលខេត្តបាត់ដំបងថា«យើងគួរបើកយុទ្ធនាកាវេទិកាសាធារណៈឱ្យបានគ្រប់ភូមិ ព្រោះបើធ្វើមួយឃុំក្រែងច្រើនពេក អ៊ីចឹងអាចចុះទៅភូមិ រៀបចំនៅក្រោមដើមឈើ ក្រោមកុដិលោក ឬសាលារៀននាថ្ងៃទំនេរសៅរ៍អាទិត្យ ដើម្បីស្ដាប់សំណើរ សំណូមពរ និងកង្វល់ប្រជាពលរដ្ឋ»។

សម្ដេចបន្តថា«បញ្ហាអ្វីដែលអាចដោះស្រាយបាននៅនឹងកន្លែងត្រូវដោះស្រាយ ហើយត្រូវមានរបាយការណ៍ ដោះស្រាយបានអ្វី នៅសេសសល់អ្វី ហើយសូមថាធ្វើម៉េចកុំឱ្យពលរដ្ឋគាត់ខ្លាច ត្រូវបំផុសឱ្យគាត់ហ៊ាននិយាយ ហ៊ានថាជាមួយយើង ហើយយើងត្រូវប្រកាន់អកប្បកិរិយាបំរើគាត់ គាត់ជាចៅហ្វាយនាយមិនមែនយើងចុះទៅជាអ្នកធំ គាត់ជាអ្នកតូចតាចនោះទេ»។

សម្ដេចប្រធានក្រុមការងារថ្នាក់ជាតិចុះមូលដ្ឋានខេត្តបាត់ដំបង បានស្នើឱ្យយុទ្ធនាការនេះត្រូវរៀបចំឱ្យបានចប់សព្វគ្រប់នៅពាក់កណ្ដាលខែមេសាឬសប្ដាហ៍ទី៣ខែមេសាឆ្នាំ២០២២ ពោលគឺឱ្យបានមុនយុទ្ធនាការឃោសនារកសំឡេងឆ្នោត។ សម្ដេចថាការរៀបចំវេទិកាសាធារណៈនេះ ជាការភ្ជាប់ភាពជាក់ស្ដែងនៃការបំពេញការងាររបស់មន្រ្តីនិងជីវភាពរស់នៅរបស់ពលរដ្ឋ។

សម្ដេចក៏បានបន្តលើកឡើងអំពីកំណែទម្រង់វិមជ្ឈការ និងវិសហមជ្ឈការនៅកម្ពុជាដើម្បីធ្វើឱ្យរដ្ឋបាលថ្នាក់ក្រោមជាតិកាន់តែមានសមត្ថភាព និងទំនួលខុសត្រូវក្នុងការផ្ដល់សេវាសាធារណៈប្រកដោយប្រសិទ្ធភាពជូនប្រជាពលរដ្ឋ។ សម្ដេចបានបញ្ជាក់ជាថ្មីទៀតថាដំណើរការកែទម្រង់នេះ បើទោះបីជាមានបញ្ហាប្រឈមខ្លះៗ ប៉ុន្តែរាជរដ្ឋាភិបាលមិនដកថយនោះឡើយ៕SRP

ខេត្តកំពង់ចាម​៖អភិបាលខេត្តកំពង់ចាម​ លោក​ អ៊ុន​ ចាន់ដា​ បានព្រមានថា បេីសិន​ជា​បាន​ដឹង​ថា​ មាន​បុគ្គល​ណា​មួយ​ ដែលរពឹស​ដៃ​ ស្តុក​នូវ​ឯកសារ​ សម្រាប់​បម្រើ​សេវា​សាធារណៈ​​ ដើម្បី​​ចង់បាន​ប្រយោជន៍​ដោះដូរ ជា​ថវិកា​ពី​បងប្អូន​ប្រជាពលរដ្ឋ​នោះ​ លោក​នឹង​លែង​មាន​ការ​យោគយល់ទៀត​ហេីយ​ ពោលគឺ​លោក​នឹង​ប្រគល់​ទៅ​ឲ្យ​ACU​ចាត់ការ​តាម​ផ្លូវ​ច្បាប់​តែម្ដង​ បេីសិន​ជា​បុគ្គល​នោះ​ នៅតែមិន​ព្រម​ផ្លាស់​ប្រែ​តាម​ការ​អប់រំ​ណែនាំ​។

ក្នុងកិច្ចប្រជុំសាមញ្ញលើកទី៣៤ អាណត្តិទី៣ របស់ក្រុមប្រឹក្សាខេត្ត​កំពង់ចាម​ ​នៅថ្ងៃទី១០ ខែមីនា ឆ្នាំ២០២២​នេះ លោក​ អ៊ុន​ ចាន់ដា​ បាន​លេីកឡេីងថា​ ចំពោះ​ឯកសារ​សម្រាប់​បំពេញ​ជា​សំបុត្រ​កំណើត​ ឬ​សំបុត្រ​បញ្ជាក់​កំណើត​ អាច​មាន​ការ​ខ្វះខាត​មួយ​ពេល​ៗ​ វាជារឿង​ជៀស​​មិន​ផុត​ទេ​ ព្រោះ​សេចក្តី​តម្រូវការ​វា​មាន​ច្រេីន​តាម​កំណើន​របស់​​ប្រជាពលរដ្ឋ​ តែទោះបីជាយ៉ាងណា​ អាជ្ញាធរ​ខិតខំ​ស្នើ​មក​ឲ្យបាន​គ្រប់​ចំនួន​តាម​អ្វី​ដែល​បងប្អូន​ប្រជាពលរដ្ឋ​ចង់បាន​ ផ្ទុយ​ទៅ​វិញ​បេីសិន​ជា​មាន​បុគ្គល​ណា​មួយ​ ដែលរពឹស​​ដៃ​ ស្តុក​នូវ​ឯកសារ​ ដើម្បី​ចង់​បាន​ប្រយោជន៍​ជា​ថវិកា​នោះ​ គឺ​ត្រូវ​អនុវត្ត​តាម​ផ្លូវ​ច្បាប់​តែម្ដង​ ប្រសិនជា​មានការអប់រំ​ណែនាំ​មួយ​លេីកជាពីរលេីកហេីយ​ ​តែ​​បុគ្គល​ខិលខូច​នៅតែមិន​ព្រម​ផ្លាស់​ប្រែនោះ​ ។

អភិបាលខេត្តបាន​បញ្ជាក់​ថា​ ដោយសារ​ជួបប្រទះ​នឹង​បញ្ហា​ខ្វះខាត​មន្ត្រី​ បច្ចុប្បន្ន​រដ្ឋបាល​ថ្នាក់ជាតិ​ បាន​ប្រតិភូកម្ម​មុខ​ងារ​មក​ឲ្យ​យើង​ នៅ​ចំពោះ​មុខ​គឺ​យើង​ត្រូវ​ធ្វើការ​​អប់រំ​ណែនាំ​​កែប្រែចំពោះមន្ត្រីដែលប្រព្រឹត្ត ខុសឆ្គង​​ ដើម្បី​ប្រេីប្រាស់​​បន្ត​ទៀត​ យេីង​មិន​មែនធ្វើ​ការ​របៀប​ប៉ះដៃ​យកដៃ​ ប៉ះជេីងយកជេីងនោះទេ​ ​​ប៉ុន្តែ​យើង​ក៏​មិន​ត្រូវ​ទុក​ឱកាស​ឲ្យ​មន្ត្រី​ខិលខូច​ ធ្វើ​ឲ្យ​ខូច​ដល់​ការ​ដឹកនាំ​របស់​ស្ថាប័ន​រដ្ឋ​ដែរ​។ ​

ក្នុង​កិច្ចប្រជុំនេះដែរ​ លោក​ ខ្លូត​ ផន​ ប្រធាន​ក្រុមប្រឹក្សា​ខេត្តកំពង់ចាម​ បាន​លើក​យក​សេចក្តី​ព្រាង​របៀបវារៈ​សំខាន់​ៗ​ មក​ពិភាក្សា​ រួមមាន​៖​ ១- ពិនិត្យ និងអនុម័តលើសេចក្ដីព្រាងកំណត់ហេតុនៃកិច្ចប្រជុំសាមញ្ញអាណត្តិទី៣៣ របស់សាលាខេត្ត។
២ -ពិនិត្យពិភាក្សា និងអនុម័តសេចក្ដីព្រាងរបាយការណ៍បូកសរុបលទ្ធផលការងារប្រចាំខែកុម្ភៈ​ និងលើកទិសដៅការងារប្រចាំខែមីនា ឆ្នាំ២០២២ របស់រដ្ឋបាលខេត្តកំពង់ចាម។
៣​ -ពិនិត្យ និងអនុម័តលើសេចក្តីព្រាងស្តីពីការបិទបញ្ជីចំណូលចំណាយ និងការធ្វើរបាយការណ៍បូកសរុបការងារអនុវត្តចំណូល ចំណាយថវិការបស់រដ្ឋបាលខេត្តកំពង់ចាម សម្រាប់ការគ្រប់គ្រង ឆ្នាំ២០២១។
៤ -ពិនិត្យ ពិភាក្សា និងអនុម័តលើសេចក្តីព្រាងផែនការក្របខណ្ឌឆ្នាំ២០២៣ របស់សាលាខេត្ត​។
៥ -ពិនិត្យ ពិភាក្សា និងអនុម័តលើសេចក្តីព្រាងផែនការក្របខណ្ឌសម្រាប់ ឆ្នាំ២០២៣ របស់មន្ទីរសុខាភិបាលនៃរដ្ឋបាលខេត្ត​កំពង់ចាម​៕SRP