ខេត្តសៀមរាប៖គម្រោងសាងសង់ពីស្ដុបសុខាដល់វង្វង់មូលជ័វរ្ម័នទី៧ មានប្រវែង ៥៨០០ម៉ែត្រ ទទឹងតួផ្លូវ ២១ម៉ែត្រ ជាគម្រោងអនុវត្ដន៍ដោយក្រសួង និងពីរង្វង់មូលជ័យវរ្ម័នទី៧ ដល់ព្រលានយន្ដហោះ មានប្រវែងប្រមាន ១៨០០ម៉ែត្រ ដែលអនុវត្តគម្រោងដោយអាកាសចរណ៍សុីវិល ហើយការដ្ឋានផ្លូវមួយខ្សែនេះនឹងបញ្ចប់នៅខែវិឆ្ឆិកា ២០២១ ឆាប់ៗខាងមុខ បើមិនមានការរាំងស្ទះក្នុងករណីណាមួយ។ គម្រោងរបស់ធនគារអភិវឌ្ឍន៍អាស៊ី (ADB) ដោយបែងចែកជាង ៦គន្លង (៣ទៅ ៣មក) និងមានផ្លូវថ្មេីរជេីង ផ្លូវកង់ផងដែរ។

ម្យ៉ាងទៀតផ្លូវមួយខ្សែ គឺជាផ្លូវមួយដ៏មានសារៈសំខាន់សម្រាប់ភ្ញៀវទេសចរជាតិ អន្តរជាតិដែលបានអញ្ជើញមកទស្សនាខេត្តសៀមរាប ហើយផ្លូវនេះក៏ជួយរំដោះការកកស្ទះក្នុងពេលពិធីបុណ្យផ្សេងៗទៀតផងដែរ។

លោកទៀ សីហា អភិបាលខេត្តនៅ ថ្ងៃទី២២ ខែមិថុនា ម្សិលមិញបានដឹកនាំក្រុមការងារចុះពិនិត្យការដ្ឋានសាងសង់ផ្លូវ (ទ្រូងកណ្តាល) ចាប់ពីស្តុបសុខារហូតដល់ព្រលានយន្តហោះ ដែលជាគម្រោងរបស់ធនគារអភិវឌ្ឍន៍អាស៊ី (ADB)។

ជាមួយគ្នានេះ រដ្ឋបាលខេត្តក៏សូមការយោគយល់ពីសំណាក់ ប្រជាពលរដ្ឋ ក៏ដូចជាសាធារណជនផងដែរ នូវបញ្ហារំខាន និងការកកស្ទះចរាចរណ៍ដែលជួបក្នុងអំឡុងពេលសាងសង់ផ្លូវនេះ៕SRP

ភ្នំពេញ៖គម្រោងសាងសង់ផ្លូវជាតិលេខ៣ (ចោមចៅ-បែកគូស-កំពត) មានប្រវែងសរុប ១៣៤,៧៩៦ គីឡូម៉ែត្រ អនុវត្តសាងសង់ដោយក្រុមហ៊ុនសាជីវកម្មស្ពាន និងថ្នល់ចិន (China Road and Bridge Corporation) ត្រួតពិនិត្យបច្ចេកទេស ដោយក្រុមហ៊ុនទីប្រឹក្សាបច្ចេកទេសសំណង់ ក្វាងចូវ វ៉ានអាន (Guangzhou Wanan Construction Supervision Co., Ltd)។

គម្រោងនេះ ប្រើប្រាស់រយៈពេលសាងសង់ ៤៨ខែ ចំណាយថវិកាសរុបប្រមាណ ២១៩ ៩១១ ០០០ ដុល្លារអាមេរិក ជាហិរញ្ញប្បទានសម្បទានពីសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា គិតរហូតមកទល់ពេលនេះ គម្រោងនេះសម្រេចបានស្ទើរតែ១០០% ហើយ។ កំណាត់ចោមចៅ-បែកគូស-កំពតនេះ ត្រូវបានបែងចែកជា២ផ្នែក៖

គីឡូម៉ែត្រ០+០០០ (ចោមចៅ) ដល់គីឡូម៉ែត្រ ៦៩+៩០០ (បែកគូស)៖ មានប្រវែង ៦៩,៩០គីឡូម៉ែត្រ ត្រូវសាងសង់ពង្រីកទទឹងតួផ្លូវ រហូតដល់២៤,៥ម៉ែត្រ ជាប្រភេទផ្លូវបេតុងកៅស៊ូ (AC) កម្រាស់ ៩សង់ទីម៉ែត្រ ចែកចេញជា៤គន្លង។ គីឡូម៉ែត្រ៦៩+៩០០ (បែកគូស) ដល់គីឡូម៉ែត្រ១៣៤+៧៩៦ (ទីរួមខេត្តកំពត)៖ ប្រវែង ៦៤,៨៩៦គីឡូម៉ែត្រ ត្រូវសាងសង់ជាផ្លូវប្រភេទបេតុងកៅស៊ូ (AC) កម្រាស់ ៧សង់ទីម៉ែត្រ ពង្រីកទទឹងតួផ្លូវរហូតដល់ ១២ម៉ែត្រ ចែកជា២គន្លង។

សូមជម្រាបថានៅថ្ងៃអង្គារ ទី២២ ខែមិថុនា ឆ្នាំ២០២១ ម្សិលមិញ លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូចម្រុះរបស់ក្រសួងសាធារណការ និងសមាជិកសមាជិកា នៃគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា ដើម្បីពិនិត្យវឌ្ឍនភាពការងារសាងសង់ផ្លូវជាតិលេខ៣ (ចោមចៅ-កំពត) ដើម្បីតាមដានការងារបច្ចេកទេសសាងសង់របស់ក្រុមហ៊ុន ដើម្បីធានាឱ្យការសាងសង់ស្របតាមបទដ្ឋានបច្ចេកទេស និងកិច្ចសន្យាសាងសង់ ធានាឱ្យផ្លូវនេះមានគុណភាពរឹងមាំ អាចប្រើប្រាស់ជាប់បានយូរអង្វែង។

សូមបញ្ជាក់ថា ផ្លូវជាតិលេខ៣ ជាផ្លូវជាតិដែលតុបតែងលម្អដោយមាន៖ ដើមរុក្ខជាតិ ផ្កា និងសួនស្មៅនៅ ចំកណ្តាលទ្រូងផ្លូវ ប្រកបដោយទេសភាពពណ៌បៃតងស្រស់ ស្ពានអាកាសថ្មើរជើងសម្រាប់ឆ្លងកាត់ថ្នល់ ប្រកបដោយសុវត្ថិភាព ១០០% ចំនួន២កន្លែង ផ្លាកសញ្ញាចរាចរណ៍ គំនូសសញ្ញាចរាចរណ៍ និងផ្លាកសញ្ញាបង្ហាញទិសដៅផ្លូវ កាមេរ៉ាចាប់ល្បឿនយានយន្តចំនួន១៤កាមេរ៉ា ស្ថានីយថ្លឹងយានយន្ដចំនួន ០២កន្លែង និង គ្រោងបំពាក់ប្រព័ន្ធកាមេរ៉ា និងជញ្ជីងស្វ័យស្វ័យប្រវត្ត (AI Camera and High Speed Weigh in Motion Senior) ផងដែរ។

ឆ្លើយតបទៅនឹងសំណួររបស់ក្រុមអ្នកសារព័ត៌មាននាឱកាសចុះពិនិត្យផ្លូវនេះ លោក ស៊ុន ចាន់ថុល បានគូសបញ្ជាក់ថា៖ ក្រសួងទុកសុពលភាពរយៈពេលមួយឆ្នាំជូនក្រុមហ៊ុនសាងសង់ បន្ទាប់ពីការសាងសង់ត្រូវបានបញ្ចប់ជាស្ថាពរ ដើម្បីដំណើការតាមដានគុណភាពផ្លូវសិន មុននឹងក្រសួងចុះហត្ថលេខា សម្រេចទទួលយកជាផ្លូវការពីក្រុមហ៊ុនសាងសង់ ក្នុងគោលបំណងធានាឱ្យផ្លូវនេះមានគុណភាពរឹងមាំ។

រដ្ឋមន្ត្រី ក៏បានស្នើឱ្យក្រុមហ៊ុនសាងសង់ផ្លូវនេះបង្កប់ជញ្ជីងថ្លឹងទម្ងន់ក្រោមដី ដែលអនុញ្ញាត ឱ្យយើងដឹងទាំងល្បឿន ដឹងទាំងទម្ងន់ឡាន ហើយកាមេរ៉ាចាប់បានទាំងផ្លាកលេខឡាន ដើម្បីថែរក្សាផ្លូវនេះឱ្យបានយូរអង្វែង ដូចដែលក្រសួងធ្លាប់បានអនុវត្តការសាកល្បងបានជោគជ័យនូវជញ្ជីងប្រភេទ នេះនៅឯស្ថានីយថ្លឹងយានយន្តព្រែកឯងកន្លងមក។

រដ្ឋមន្ត្រីបានបញ្ជាក់ថា៖ កន្លងមក ក្រសួងបានចាត់វិធានការ ដូចភ្លៀងរលឹម រួមមានការបង្កើតក្រុមការងារជញ្ជីងចល័តនៅតាមផ្លូវជាតិធំៗផងដែរ ដោយក្នុងនោះបាន ផាកពិន័យយានយន្តដឹកជញ្ជូនលើសទម្ងន់កម្រិតកំណត់ដោយច្បាប់បានប្រមាណជាង១០០គ្រឿង និងបានឃាត់យានយន្តទុករយៈពេល១ឆ្នាំ និងបន្ថែមថា៖ ក្រសួងនៅតែបន្តអនុវត្តវិធានការនេះបន្តទៀត ដោយមិនយោគយល់ចំពោះឡានអ្នកក្រ ឡានអ្នកមាន អ្នកមានខ្នង ឬឡានអ្នកអត់ខ្នងអ្វីឡើយ។

រដ្ឋមន្រ្តី បានសំណូមពរឱ្យបងប្អូនប្រជាពលរដ្ឋ អ្នកប្រើប្រាស់ផ្លូវ គោរពច្បាប់ទាំងអស់គ្នា ចូលរួមថែរក្សាទ្រព្យសម្បត្តិជាតិយើងឱ្យបានគង់វង្ស និងប្រើប្រាស់បានយូរអង្វែង ដោយហេតុថា រាជរដ្ឋាភិបាលបានខិតខំប្រឹងប្រែងរកថវិកាមកសាងសង់ដោយលំបាក និងបានទទូចថា៖ សូមកុំប្រថុយ ប្រថានដឹកជញ្ជូនលើសទម្ងន់ ដែលបង្កឱ្យផ្លូវឆាប់ខូច បង្កគ្រោះថ្នាក់ចរាចរណ៍ កុំបើកលើសល្បឿនកំណត់ដោយច្បាប់ ដើម្បីចូលរួមចំណែកក្នុងការកសាងប្រទេសជាតិមាតុភូមិរបស់យើងឱ្យកាន់តែរីកចម្រើនថែម ទៀតក្រោមការដឹកនាំដ៏ឈ្លាសវៃរបស់សម្ដេចហ៊ុន សែន។

រដ្ឋមន្ត្រី បានបន្ថែមថា៖ បើយើងរួបរួមគ្នា យើងមានផ្លូវថ្នល់ខ្វាត់ខ្វែង អាចធ្វើដំណើរស្រួល លឿន កាត់បន្ថយពេលវេលា កាត់បន្ថយការចំណាយ អាចប្រកួតប្រជែង ទាក់ទាញទេសចរណ៍ ទាក់ទាញអ្នកវិនិយោគមកបណ្ដាក់ទុននៅកម្ពុជា បង្កើតការងារធ្វើជូនបងប្អូនប្រជាពលរដ្ឋយើង និងសូមរួមដំណើរជាមួយសម្ដេចនាយករដ្ឋមន្ត្រីក្នុងការកសាងប្រទេសជាតិមាតុភូមិរបស់យើង ឱ្យបានរុងរឿង ដើម្បីកាត់បន្ថយភាពក្រីក្ររបស់ប្រជាពលរដ្ឋយើង។

ឆ្លៀតក្នុងឱកាសនោះផងដែរ រដ្ឋមន្ត្រី បានជម្រាបជូនអំពីគម្រោងធ្វើឱ្យប្រសើរឡើងផ្លូវជាតិលេខ៤១ ផ្លូវជាតិលេខ៣១ ផ្លូវជាតិលេខ៣៣ គម្រោងសាងសង់ស្ពាននៅក្រចេះ និងបណ្ដាគម្រោងសាងសង់មួយចំនួនផ្សេងទៀត ដើម្បីចូលរួមកាត់បន្ថយចំណាយភស្តុភាកម្ម ទាក់ទាញអ្នកវិនិយោគមកបណ្ដាក់ទុន
នៅកម្ពុជា៕SRP

ខេត្តកំពង់ចាម៖លោក W. Patrick Murphy ឯកអគ្គរដ្ឋទូត សហរដ្ឋអាមេរិកប្រចាំនៅកម្ពុជា
បានថ្លែងអំណរគុណ យ៉ាងជ្រាលជ្រៅបំផុត ចំពោះ អាជ្ញាធរខេត្តកំពង់ចាម ដែលបានអនុញ្ញាត ឱ្យលោកជួបពិភាក្សាការងារ ជាមួយគ្នានេះ ឯកអគ្គរដ្ឋទូត ក៏មានចំណាប់អារម្មណ៍តំបន់រមណីយដ្ឋានទេសចរណ៍ របស់ខេត្ត និងសក្តានុពល ដែលជាទីកន្លែងគួរឱ្យទាក់ទាញនូវឱកាសវិនិយោគនានា ផងដែរ។

លោក W. Patrick Murphy សម្ដែងនូវការចាប់អារម្មណ៍តំបន់ទេសចរណ៍នៅខេត្តកំពង់ចាម យ៉ាងដូច្នេះ នៅរសៀលថ្ងៃទី២២ ខែមិថុនា ម្សិលមិញ ក្នុងឱកាសជួបសំណេះសំណាល និងពិភាក្សាការងារ ជាមួយលោក អ៊ុន ចាន់ដា អភិបាល ខេត្តកំពង់ចាម។

លោក W. Patrick Murphy បានបញ្ជាក់ថា ដំណើរទស្សនកិច្ច របស់ពួកលោក ដើម្បី ស្វែងយល់អំពីការងារគ្រប់គ្រង និងការទប់ស្កាត់ការឆ្លងរីករាល នៃជម្ងឺកូវីដ ១៩។ ស្វែងយល់អំពីសក្តានុពល និងការងារអភិវឌ្ឍន៍ នៅក្នុងខេត្តកំពង់ចាម។

ឯកអគ្គរដ្ឋទូត បានបញ្ជាក់ដែរថាសហរដ្ឋអាមេរិក បានផ្តល់ថវិកាមួយផ្នែក ដល់យន្តការកូវ៉ាក់។ តាមរយៈ យន្តការនេះ កម្ពុជា ក៏បានទទួលនូវវ៉ាក់សាំង សម្រាប់បង្ការជម្ងឺកូវីដ-១៩ ផងដែរ។

លោក អ៊ុន ចាន់ដា បានបញ្ជាក់ថា ទាក់ទងការគ្រប់គ្រង និងការទប់ស្កាត់ការឆ្លងរាលដាល នៃជម្ងឺកូវីដ ១៩ នៅក្នុងខេត្តយើងបានរួមសហការគ្នា ជាមួយអ្នកពាក់ព័ន្ធ ក៏ដូចជា វិស័យឯកជន។ យ៉ាងណាម៉ិញ អនុវត្តតាមការណែនាំ របស់រាជរដ្ឋាភិបាលកម្ពុជា ចាប់តាំងពីឆ្នាំ២០២០មក យើងមានបញ្ហាការគម្រាមកំហែងដោយសារជម្ងឺកូវីដ ១៩ ជាបន្តបន្ទាប់។ ជាក់ស្ដែង ក្នុងដំណាក់កាលចុងក្រោយនេះ ជាពិសេស ចាប់តាំងពីព្រឹត្តិការណ៍ ២០កុម្ភៈ មក គឺជម្ងឺដ៏កាចសាហាវនេះ មានការឆ្លងរាលដាលនៅក្នុងខេត្តកំពង់ចាមកាន់តែខ្លាំងឡើង ដោយសារតែ ខេត្តកំពង់ចាមយើង មានកម្មកររោងចក្រ ក៏ដូចជា ប្រជាពលរដ្ឋចំណាកស្រុក ទៅធ្វើការនៅប្រទេសផ្សេងៗ ហើយបានវិលមកស្រុកកំណើតវិញ។ ឆ្លើយតបទៅនឹងបញ្ហាកូវីដ ១៩ នាពេលកន្លងមក ក៏ដូចជា នាពេលបច្ចុប្បន្ន នេះដែរ អាជ្ញាធរមូលដ្ឋាន គ្រប់លំដាប់ថ្នាក់ តែងបានសហការ ជាមួយអ្នកពាក់ព័ន្ធ ធ្វើការស្រាវជ្រាវរកអ្នកសង្ស័យ និងពាក់ព័ន្ធធ្វើតេស្តរកមេរោគកូវីដ ១៩ និងនាំយកទៅព្យាបាលបានទាន់ពេលវេលា។ ជាមួយគ្នានេះ អ្នកពាក់ព័ន្ធដោយផ្ទាល់ត្រូវបាននាំយកមកធ្វើចត្តាឡីស័ក នៅតាមមណ្ឌលចត្តាឡីស័ក ហើយអ្នកដែលពាក់ព័ន្ធដោយប្រយោល ត្រូវដាក់ឱ្យធ្វើចត្តាឡីស័ក នៅតាមផ្ទះរៀងៗខ្លួន។ ក្រៅពីនោះ យើងបានធ្វើការពង្រឹងគុណភាព នៃការព្យាបាល ដោយបានកែប្រែអតីតសណ្ឋាគារមេគង្គ ទៅជាមន្ទីរពេទ្យ សម្រាប់ព្យាបាលជម្ងឺកូវីដ ១៩ កម្រិតធ្ងន់ និងបានរៀបចំកន្លែង សម្រាប់ព្យាបាលកម្រិតស្រាល នៅវិទ្យាល័យព្រះសីហនុ ក្រុងកំពង់ចាម។
ទន្ទឹមជាមួយនោះ អាជ្ញាធរ ក៏បានយកចិត្តទុកដាក់ផងដែរ ទៅលើជីវភាព អ្នកដែលកំពុងធ្វើចត្តាឡីស័ក ទាំងនៅតាមមណ្ឌលចត្តាឡីស័ក និងអ្នកដែលធ្វើចត្តាឡីស័ក នៅតាមខ្នងផ្ទះ ដោយក្នុងនោះ រាជរដ្ឋាភិបាលកម្ពុជា បានឧបត្ថម្ភអាហារ ៣ពេល ដល់អ្នកធ្វើចត្តាឡីស័ក នៅតាមមណ្ឌល។ ក្រៅពីនោះក៏បានការឧបត្ថម្ភ ជាគ្រឿងឧបភោគបរិភោគ ដល់ក្រុមគ្រួសារប្រជាពលរដ្ឋ ដែលមានជីវភាពខ្វះខាត ដែលធ្វើចត្តាឡីស័ក នៅតាមខ្នងផ្ទះផងដែរ។ យ៉ាងណាម៉ិញ គិតមកដល់បច្ចុប្បន្ននេះ យើងបានជួយឧបត្ថម្ភគាំទ្រ ដល់ពួកគាត់ បានប្រមាណ ៥.០០០គ្រួសារ រួចមកហើយ។ មួយផ្នែកទៀត អាជ្ញាធរ ក៏បានធ្វើការអប់រំផ្សព្វផ្សាយ ដល់ប្រជាពលរដ្ឋ នៅតាមសហគមន៍ អំពីវិធានការពារការឆ្លងរីករាល នៃជម្ងឺកូវីដ-១៩ និងការបង្កើនការប្រុងប្រយ័ត្នខ្ពស់ ដោយជៀសវាងការធ្វើដំណើរ ទៅកាន់ទីតាំង ដែលមិនចាំបាច់..។ល។ ដោយឡែក នាបច្ចុប្បន្ន រដ្ឋបាលខេត្ត បានដាក់ចេញនូវវិធានការចាំបាច់នានា ដើម្បី បិទខ្ទប់ទីតាំងដែលមានបញ្ហាប្រឈមខ្លាំង ដើម្បី កាត់ផ្តាច់ខ្សែចម្លងជម្ងឺកូវីដ មួយនេះផងដែរ៕SRP

ខេត្តតាកែវ៖សមត្ថកិច្ចបានចាប់ខ្លួនជនដៃដល់ចំនួន៣នាក់ ករណីឃាតកម្មកាប់សម្លាប់បុរសម្នាក់ ព្រោះទំនាស់ពាក្យសម្ដី។

ការចាប់ខ្លួនធ្វើឡើងនៅថ្ងៃទី២២ ខែមិថុនា ឆ្នាំ២០២១នេះ ចំណុចភូមិភ្នំតូច ឃុំសំភី ស្រុកបាទី ដោយកម្លាំងនាយកដ្ឋាននគរបាលព្រហ្មទណ្ឌ សហការជាមួយនគរបាលខេត្តតាកែវ តាមបទបញ្ជាពីលោកនេត សាវឿន អគ្គស្នងការនគរបាលជាតិ, លោក អ៉ិន បូរ៉ា អគ្គស្នងការរងទទួលផែន និងលោកង៉េង ជួ ប្រធាននាយកដ្ឋាននគរបាលព្រហ្មទណ្ឌ។

ប្រភពបានដឹងថាករណីឃាតកម្មនេះ កើតឡើងនៅយប់ថ្ងៃទី១៩ ខែមិថុនា ឆ្នាំ២០២១ ចំណុចភូមិខ្នារទង់ ឃុំកុមារាជា ស្រុកបាទី ខេត្តតាកែវ។

សមត្ថកិច្ចក្នុងហេតុការណ៍បង្រ្កាបបានឲ្យដឹងថាក្រោយទទួលបានបទបញ្ជា កម្លាំងជំនាញបានធ្វើការស្រាវជ្រាវរហូតដល់រសៀលថ្ងៃទី២២ ខែមិថុនា ឆ្នាំ២០២១នេះ ទើបកំណត់បានទីតាំងលាក់ខ្លួន របស់ជនសង្ស័យទាំង៣នាក់ និងឈានទៅដល់ការឃាត់ខ្លួនតែម្ដង។

ជនសង្ស័យទាំង៣នាក់ ដែលត្រូវបានចាប់ខ្លួននេះ ទី១៖ឈ្មោះ ម៉ង សម្បត្តិ អាយុ២១ឆ្នាំ, ទី២៖ឈ្មោះ ម៉ង សីហា អាយុ១៩ឆ្នំា (ត្រូវជាបងប្អូនបង្កើត) និងទី៣៖ឈ្មោះ ឌឹម ប្រុស ហៅរាជ អាយុ១៩ឆ្នាំ រស់នៅភូមិខ្នារទង់ ឃុំកុមារាជា ស្រុកបាទី ខេត្តតាកែវ។ ដោយឡែក ជនរងគ្រោះឈ្មោះ មាំង ខែមរៈ អាយុ២៧ឆ្នាំ រងរបួសជាច្រើនកន្លែង និងដាច់កដៃខាងឆ្វេងបណ្ដាលស្លាប់ភ្លាមៗ នៅកន្លែងកើតហេតុមុខផ្ទះជនរងគ្រោះ។

ជនសង្ស័យទាំង៣នាក់បានឆ្លើយសារភាពថា ពួកគេពិតជាបានធ្វើសកម្មភាពយកកាំបិតផ្គាក់កាប់ទៅលើជនរងគ្រោះឈ្មោះ មាំង ខែមរៈ បណ្តាលឲ្យស្លាប់ប្រាកដមែន។ មូលហេតុដោយសារទំនាស់ពាក្យសម្ដីក្នុងពេលលេងបាល់ទះ។ ចំពោះជនសង្ស័យទាំងបីនាក់ខាងលើ នាយកដ្ឋាននគរបាលព្រហ្មទណ្ឌ បានប្រគល់ឲ្យស្នងការដ្ឋាននគរបាលខេត្តតាកែវ ចាត់ការបន្តតាមនីតិវិធី៕SRP

ខេត្តសៀមរាប៖មានការលើកឡើងថាប្រធានមន្ទីរផែនការខេត្តសៀមរាប បានសាងសង់សំណង់មួយកន្លែងយ៉ាង ស្គឹមស្គៃ ក្នុងដែនគ្រប់គ្រង របស់អាជ្ញាធរជាតិអប្សរា គ្រាដែលពលរដ្ឋនៅក្បែរនោះ មិនអាចសង់ផ្ទះបាន។

ករណីនេះមន្ត្រីអាជ្ញាធរអប្សរា បញ្ជាក់ថា ក្រុមការងារធ្លាប់ចុះទៅហាមឃាត់ច្រើនដងហើយ តែបុគ្គលខាងលើនៅតែលួចសាងសង់ទាំងបំពាន។ ពេលនេះអង្គភាពបានដាក់ពាក្យបណ្តឹងទៅតុលាការហើយ។

ប្រភពបានឲ្យដឹងថាការសាងសង់សំណង់របស់ប្រធានមន្ទីរផែនការខេត្តសៀមរាប គឺធ្វើ ប៊ូទិក ដែលកំពុងដំណើរការសាងសង់ក្នុងដែនគ្រប់គ្រង់ដោយអាជ្ញាធរអប្សរានេះ ស្ថិតក្នុងភូមិវាល សង្កាត់គោកចក ក្រុងសៀមរាប ត្រង់ចំណុចខាងកើតវត្តប្រាសាទគោកចក ប្រហែលជាង២០០ម៉ែត្រ។ ជាកម្មសិទ្ធិរបស់លោកហាក់ សុធារ៉ា ប្រធានមន្ទីរផែនការខេត្តសៀមរាប និងប្រពន្ធ។

ការសាងសង់ប៊ូទិក ក្នុងដែនគ្រប់គ្រង របស់អាជ្ញា ធរអប្សរា ដោយគ្មានច្បាប់អនុញ្ញាតនេះ ក្រុមពលរដ្ឋក្នុងតំបន់នោះ បានលើកឡើងថា ពួកគាត់ត្រឹមតែសង់ផ្ទះតូចតាច សម្រាប់រស់នៅ ឬក៏ធ្វើទ្រុងមាន់ ទ្រុងទា ត្រូវបានហាមឃាត់យ៉ាងតឹងរឹងបំផុតពីអង្គភាពអាជ្ញាធរអប្សរា។ ចុះប៊ូទិក ដ៍ធំស្គឹមស្គៃរបស់លោកប្រធានមន្ទីរផែនការ ហេតុអ្វីមិនហាមឃាត់ ឬហាមឃាត់មិនបាន។ តើជាអំណាចបុគ្គល ឬ មានអ្វីនៅពីក្រោយសំណង់ប៊ូទិកនេះ..?។ ក្រុមពលរដ្ឋបានលើកជាសំណូមពរ សុំអោយអាជ្ញាធរពាក់ព័ន្ធ ពិសេសអង្គភាពអាជ្ញាធរអប្សរា មេត្តាពិនិត្យសំណង់ប៊ូទិកនេះ ហើយអនុវត្តវិធានការច្បាប់ ដោយមិនបែងចែករវាងពលរដ្ឋនិងអ្នករាជការ។ ប៉ុន្តែបើប៊ូទិក មួយនេះមិនត្រូវបានចាត់វិធានការច្បាប់ទេនោះ អាចនឹងមានការសាងសង់ប៊ូទិករាប់សិបកន្លែងទៀតបណ្តែតខ្លួនក្នុងដែនអប្សរាដូចគ្នា។

ជុំវិញករណីនេះ ប្រធានមន្ទីរផែនការខេត្តសៀមរាប លោក ហាក់ សុធារ៉ា បានប្រាប់តាមទូរស័ព្ទថា សំណង់នេះមិនមែនជារបស់លោកឡើយ ផ្ទះរបស់លោកនៅភូមិផ្សេងទេ។

ទោះជាបែបនេះ មន្ត្រីរបស់អង្គភាពអាជ្ញាធរអប្សរាបានបញ្ជាក់ថា ប៊ូទិកខាងលើនេះជារបស់លោកហាក់ សុធារ៉ា ប្រធានមន្ទីរផែនការខេត្ត សៀមរាប និងប្រពន្ធ យ៉ាងពិតប្រាកដ។ ប៉ុន្តែពេលអាជ្ញាធរអប្សរាចុះទៅទប់ស្កាត់ហាមឃាត់ការសាងសង់ ប្រធានមន្ទីរផែនការរូបនេះ តែងអោយប្រពន្ធ ឈ្មោះស ពិដោ ជាអ្នកចេញមុខតតាំង។

មន្ត្រីអាជ្ញាធរអប្សរា ដែលសុំមិនបង្ហាញឈ្មោះ បញ្ជាក់ទៀតថា សំណង់ប៊ូទិក របស់លោក ហាក់ សុ ធារ៉ា នេះខាងអាជ្ញាធរអប្សរា បានចុះទៅហាមឃាត់ច្រើនដងហើយ តែគេនៅតែលួចសាងសង់បំពាន។ ពេលនេះអង្គភាពអាជ្ញាធរអប្សរា បានកំពុងដាក់ពាក្យបណ្តឹងប្តឹងទៅតុលាការរួចហើយ។ អង្គភាពរងចាំតែដីកាសម្រេចពីតុលាការប៉ុណ្ណោះ ក្នុងការអនុវត្តរុះរើ៕SRP

ខេត្តសៀមរាប៖លោកទៀ សីហា អភិបាលខេត្តសៀមរាប បានឲ្យដឹងថាការដ្ឋានសាងសង់ផ្លូវ (ទ្រូងកណ្តាល) ចាប់ពីស្តុបសុខា ដល់រង្វង់មូលព្រះបាទជ័យវរ្ម័នទី៧ដែលជាគម្រោងរបស់ធនគារអភិវឌ្ឍន៍អាស៊ី (ADB)។

លោកទៀ សីហា បានបញ្ជាក់ថាការដ្ឋានផ្លូវមួយខ្សែនេះនឹងបញ្ចប់នៅខែវិឆ្ឆិកា ២០២១ ឆាប់ៗខាងមុខ បើមិនមានការរាំងស្ទះក្នុងករណីណាមួយ។

លោកបញ្ជាក់យ៉ាងនេះនៅថ្ងៃអង្គារ ទី២២ ខែមិថុនា ឆ្នាំ២០២១ ព្រឹកមិញនាឱកាស អញ្ជើញចុះពិនិត្យការការដ្ឋានសាងសង់ផ្លូវ (ទ្រូងកណ្តាល ខាងលើដែលស្ថិតនៅបណ្ដោយផ្លូវជាតិលេខ៦៕SRP

ខេត្តព្រះសីហនុ៖លោកស្រី និន សាផុន ប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា និងលោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅ ថ្ងៃអង្គារ ទី២២ ខែមិថុនា ឆ្នាំ២០២១ នេះបាន ដឹកនាំគណៈប្រតិភូចម្រុះ ចុះពិនិត្យកំពង់ផែស្វយ័តក្រុងព្រះសីហនុ។

ដំណើរទស្សនកិច្ចនេះធ្វើឡើងក្នុងគោលបំណងដើម្បីស្វែងយល់ពីសកម្មភាពការងារជាក់ស្តែងក្នុងការដឹកជញ្ជូន ការលើកដាក់ទំនិញនៅកំពង់ផែស្វយ័តក្រុងព្រះសីហនុ និងសកម្មភាពអភិវឌ្ឍន៍នានា ផងដែរ។

គួរកត់សម្គាល់ផងដែរថា៖ កំពង់ផែស្វយ័តក្រុងព្រះសីហនុ បានចូលទីផ្សារមូលបត្រកម្ពុជា បោះផ្សាយ លក់ភាគហ៊ុន បានបញ្ចុះតម្លៃ១០%នៃតម្លៃសេវាលើកដាក់កុងតឺន័រ និងបានអភិវឌ្ឍចំណតកំពង់ផែពហុ បំណង ដោយឡែកទាក់ទងការងារអាជីវកម្មនិងហិរញ្ញវត្ថុឆ្នាំ២០២០ ធៀបនិងឆ្នាំ២០១៩វិញ កំពង់ផែ ស្វយ័តក្រុងព្រះសីហនុមានទំនិញឆ្លងកាត់ចំនួន ៦ ៦០១ ៨០៤តោន កើនឡើង 0,៨៣% បរិមាណនាវាឆ្លងកាត់មានចំនួន១៥៨២គ្រឿង ថយចុះ៤,៨១% បរិមាណកុងតឺន័រឆ្លងកាត់មានចំនួន៦៤១ ៨៤២ TEUs កើនឡើង០,៤១% និងចំណូលសរុបមានចំនួន ៣១១ ៨១៣ ៧៦៩ ០០០ រៀល ថយចុះចំនួន៧%។

ជាមួយគ្នានេះផងដែរ កំពង់ផែស្វយ័តក្រុងព្រះសីហនុ បានដាក់ចេញផែនការអភិវឌ្ឍរយៈពេលវែង ក្រោយឆ្នាំ២០៣០ ដើម្បីពង្រឹង និងពង្រីកសមត្ថភាពនៃការផ្តល់សេវាជូនអតិថិជន ក្នុងនោះរួមមាន៖ គម្រោងកសាងចំណតកុងតឺន័រទី៤ ប្រវែង១៣០០ម៉ែត្រ x ៥៥០ម៉ែត្រ ចំណតកុងតឺន័រទី៣ប្រវែង ១០៥០ម៉ែត្រ x ៥៥០ម៉ែត្រ ចំណតកុងតឺន័រថភ្លើងប្រវែង២៥០ម៉ែត្រ x ១៧០០ម៉ែត្រ អភិវឌ្ឍតំបន់រដ្ឋបាល និងសេដ្ឋកិច្ច ៥៤ ហិកតា និងតំបន់គយត្រួតពិនិត្យទំនិញប្រវែង៦៥០ម៉ែត្រ x ២០០ម៉ែត្រ។

ដោយឡែក ផែនការអភិវឌ្ឍរយៈពេលខ្លីឆ្នាំ២០១៧-២០២៥ កំពង់ផែស្វយ័តក្រុងព្រះសីហនុ មានផែនការអភិវឌ្ឍកំពង់ផែទឹកជ្រៅចំណតកុងតឺន័រជម្រៅ១៤,៥ម៉ែត្រ ក្នុងនោះ៖ គម្រោងកសាងកំពង់ផែ ទឹកជ្រៅចំណតកុងតឺន័រជំហានទីមួយ ប្រវែង៣៥០ម៉ែត្រ ជំហានទីពីរប្រវែង ៣០០ ម៉ែត្រ និងជំហានទីបី ប្រវែង៣០០ម៉ែត្រផងដែរ៕SRP

ខេត្តកំពង់ចាម៖លោកអ៊ុន​ ចាន់ដា​ អភិបាលខេត្តកំពង់ចាម​ បានថ្លែងថា​ តាម​រយៈគោលនយោបាយ អាទិភាព របស់រាជរដ្ឋាភិបាលកម្ពុជាគឺ មនុស្ស​ ទឹក​ ភ្លើង​ និង​ផ្លូវ​។ ជាក់ស្ដែង​ថ្ងៃ​នេះ​យើង​បាន​ទទួល​​ផ្លូវ​បេតុង​អាមេ​​មួយ​ខ្សែ​ ប្រវែង​ជាង​៤ពាន់​ម៉ែត្រ​ ដេីម្បីសម្រួល​ដល់​ការ​រស់នៅ​របស់ប្រជាពលរដ្ឋ​ផងដែរ។

ថ្លែង​យ៉ាង​ដូច្នេះ​ក្នុង​ពិធី​បើក​ការដ្ឋាន​សាងសង់​ផ្លូវ​បេតុង​អាមេ​១ខ្សែប្រវែង៤,៦០០ ម៉ែត្រ ស្ថិតនៅក្នុងភូមិរាយប៉ាយក្រោម ឃុំរាយប៉ាយ ស្រុកកងមាស ខេត្តកំពង់ចាម នៅថ្ងៃទី​២២​ ខែមិថុនា​ ព្រឹកមិញនេះ។

លោកអ៊ុន​ ចាន់ដា​ បាន​ថ្លែង​ថា​ តាម​រយៈ​ការ​ខិតខំ​ប្រឹងប្រែង​របស់​អាជ្ញាធរ​ ពលរដ្ឋទទួល​បាន​សមិទ្ធផល​ថ្មី​ ផ្លូវ​បេតុង​មួយ​ខ្សែ​នេះ​ ហើយ​សម្រាប់​​សប្តាហ៍​ក្រោយ​នេះ​ ស្រុកកងមាស​នឹង​ទទួល​បាន​ផ្លូវ​កៅស៊ូ​ ប្រភេទ​DBST​ ១ខ្សែ​​ ប្រវែង​​២៧ គីឡូម៉ែត្រ​ បន្ថែមទៀត​ ដែល​ជា​អំណោយ​ដ៏​ថ្លៃថ្លា​របស់​ សម្តេច​ហ៊ុន​ សែន​។

លោកក៏បាន​អំពាវនាវ​ដល់ ប្រជាពលរដ្ឋ​ ឲ្យ​មានការ​អត់ធ្មត់​ ក្នុង​អំឡុង​ស្ថាបនា​ផ្លូវ​មួយ​ខ្សែ​នេះ​ ទាំង​អ្នក​ធ្វើដំណើរ​ និងប្រជាពលរដ្ឋ​ ដែល​មាន​លំនៅឋាន​អមសងខាង​ផ្លូវ​ បើ​មាន​ការ​ប៉ះពាល់​អ្វី​មួយ​ សូម​ជួប​ពិភាក្សា​ជាមួយ​អាជ្ញាធរ​មូលដ្ឋាន​ ដេីម្បី​រក​ដំណោះស្រាយ​ ឬ​សំណង​តាម​សន្តិវិធី​។

អភិបាលខេត្ត​ ក៏ណែនាំដល់​ពលរដ្ឋ​ ឲ្យ​អនុវត្ត​វិធានការ​​ ៣ការពារ​ ៣កុំ​ ដែល​ជា​អាវ​ក្រោះសម្រាប់​ការពារ​កុំឲ្យ​ឆ្លង​រីករាល​ដាល​នៃ​ជំងឺ​កូវីដ​-១៩​៕​​SRP

ភ្នំពេញ៖អគ្គនាយកដ្ឋានគយ និងរដ្ឋាករកម្ពុជា សម្រេចអនុញ្ញាតឱ្យនាំចូលសាច់បង្កក និងមុខទំនិញបង្កកពីប្រទេសឥណ្ឌាឡើងវិញ។
នេះបើយោងតាមលិខិតរបស់អគ្គនាយកដ្ឋានគយនិងរដ្ឋាករកម្ពុជា ដែលចុះហត្ថលេខាដោយលោកគុណ ញឹម៕SRP

ខេត្តសៀមរាប៖ការឈូសផ្នូរខ្មោច នៅក្រុងសៀមរាប មួយកន្លែងសម្រាប់ធ្វើដីឡូតិ៍លក់ កំពុងចាប់អារម្មណ៍យ៉ាងខ្លាំងពីសំណាក់មិត្តអ្នកអាន។ ករណីនេះស្ថាបនិករបស់សមាគមសពគ្រីស្ទាន សុំអោយអាជ្ញាធរ ជួយទប់ស្កាត់ការធ្វើលិខិតទិញលក់ដីផ្នូរខ្មោចពីសំណាក់ក្រុមឈ្មួញឃុបឃិត ខណ:ខាងសមាគមន កំពុងដំណើរការពាក្យបណ្តឹង។

ការទទូចសុំអោយអាជ្ញាធរជួយទប់ស្កាត់នេះធ្វើឡើងក្នុងកិច្ចសម្ភាសន៍មួយ នាព្រឹកថ្ងៃទី២១ខែ មិថុនាឆ្នាំ២០២១ នៅក្រុងសៀមរាប បន្ទាប់ពីក្រុមឈ្មួញដីឡូត៍បានឃុបឃិតគ្នាទិញលក់ដីកប់ខ្មោច (ផ្នូរខ្មោច)គ្រីស្ទាន។

លោកប្រាក់ វុទ្ធី ស្ថាបនិក របស់សមាគមសពគ្រីស្ទាន និងជាប្រធានសមាគមគ្រូគង្វាលប្រចាំខេត្តសៀមរាប បានផ្តល់បទសម្ភាសន៍ថា ដីផ្នូរខ្មោចឬកប់ ខ្មោច ដែលត្រូវបានគេឃុបឃិតគ្នាទិញលក់ ឈូសឆាយបោះបង្គោលធ្វើជាដីឡូតិ៍នេះ ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប មានទំហំ៥០ គុណ១០០ម៉ែត្រ ដោយពួកគេឃុបឃិតគ្នាលក់ទិញ ក្នុងតម្លៃជាង១០ម៉ឺនដុល្លារ។

លោកបន្តថា ដីនេះកាលពីអំឡុងឆ្នាំ២០០៤ អង្គការ វិហារមេថីឌីស កម្ពុជា បានប្រគល់អោយសមាគមសពគ្រីស្ទាន ទុកសម្រាប់កប់សព ហើយបន្តគ្រប់គ្រងមកទល់បច្ចុប្បន្ន។ តែថ្មីៗនេះមានបុគ្គលមួយក្រុមតូចឃុបឃិតគ្នាទិញលក់ដីនេះពុះជាដីឡូតិ៍ ទើបខាងលោកសម្រេចរៀបចំដាក់ពាក្យបណ្តឹង។

លោកប្រាក់ វុទ្ធី បញ្ជាក់ថា ពេលនេះលោកកំពុងដំណើរការបណ្តឹងទៅថ្នាក់ក្រុងនិងខេត្ត ដើម្បីរំលាយការទិញលក់ហើយរក្សាដីនេះអោយសមាគមគ្រប់គ្រងកប់សពគ្រីស្ទានវិញ។ តែក្នុងពេលកំពុងដំណើរការបណ្តឹង ក្រុមជនឃុបឃិតលួចបន្តឈូសឆាយនិងបោះបង្គោល ហេតុដូច្នេះហើយទើបរូប លោកទទូចសុំអោយអាជ្ញាធរជួយទប់ស្កាត់បែបនេះ។ ត្បិតបណ្តឹង របស់លោក អាចនឹងឈានដល់តុលាការ។

សូមបញ្ជាក់ថា កាលពីថ្ងៃទី១៥ខែមិថុនាឆ្នាំ ២០២១កន្លងទៅនេះ លោក ក្អោប រ៉ន ចៅសង្កាត់ជ្រាវ បានថ្លែងថា ករណីនេះលោកនៅមិនទាន់ដឹងច្បាស់ដែរទេ តែអាចសួរទៅលោក ខន ទើបដឹងច្បាស់។

លោកឃុន សុខន ថៅកែដីឡូតិ៍ ក្នុងតំបន់សៀមរាប បានអោយដឹងថា ដីខាងលើនេះរូបលោកបានត្រៀមទិញមែន តែរងចាំអោយអ្នកលក់រត់ច្បាប់បានសិន។ ប៉ុន្តែលោក នួន ពុទ្ធារ៉ា អភិបាលក្រុងសៀមរាប បានបញ្ជាក់ថា រាល់ការឈូសឆាយពុះជាដីឡូតិ៍ត្រូវមានលិខិតកាន់កាប់ដី និងច្បាប់អនុញ្ញាតត្រឹមត្រូវ។ មិនចឹងទេគឺខុសច្បាប់។ តែបើដីខាងលើនៅជាប់ពាក់ព័ន្ធនិងសមាគម ខាងសមាគម អាចមកដាក់ ពាក្យនៅសាលាក្រុងបាន។

លោកបន្តថា ថ្វីត្បិតអាជ្ញាធរក្រុងមិនទាន់បានចុះ ទៅពិនិត្យទីតាំងដីនោះពិតមែន តែបើពិនិត្យឃើញ ថាដីនោះស្ថិតក្រោមការគ្រប់គ្រង របស់អាជ្ញាធរបឹងទន្លេសាប សាលាក្រុងមិនអនុញ្ញាតច្បាប់នោះឡើយ។

លោកប្រាក់ វុទ្ធី បញ្ជាក់ចុងក្រោយថា ដីដែលខាងលោកកំពុងដំណើរការប្តឹងនេះ ក្រៅពីសម្រាប់កប់សពគ្រីស្ទាន វាក៏ស្ថិតក្នុងដែនគ្រប់គ្រងរបស់អាជ្ញាធរបឹងទន្លេសាបផងដែរ ហេតុដូច្នេះការឃុបឃិតគ្នាទិញលក់ពិតជាល្មើសច្បាប់៕SRP

ខេត្តកណ្តាល៖សមត្ថកិច្ចបានចាប់ខ្លួនឧត្តមសេនីយ៍ម្នាក់ ករណីឆបោក​ប្រាក់ រត់ការចូលបម្រើការងារជាមន្ត្រីនគរបាលជាតិ ជាង២ម៉ឺនដុល្លារ។

សូមជម្រាបថាការចាប់ខ្លួនជនសង្ស័យរូបនេះគឺបានអនុវត្តតាមដីកាបង្គាប់ឲ្យចាប់ខ្លួន របស់លោក ម៉ៅ ស៊ីណា ចៅក្រមស៊ើបសួរសាលាដំបូងរាជធានីភ្នំពេញ គឺនៅថ្ងៃទី២១ ខែមិថុនា ឆ្នំា២០២១នេះ។ ជនសង្ស័យឋាន:ជាឧត្តមសេនីយ៍ប៉ូលិស ហង្ស វណ្ណៈ អាយុ៤១ មន្ត្រីនគរបាលជាតិ ថ្នាក់ឧត្តមសេនីយ៍ទោ បម្រើការងារនៅក្រសួងមហាផ្ទៃ រស់នៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល។

តាមដីកាបង្គាប់ឲ្យចាប់ខ្លួនបានបញ្ជាក់ថា ឈ្មោះ ហង្ស វណ្ណៈ ត្រូវបានចោទប្រកាន់ពីបទឆបោក ប្រព្រឹត្តនៅចំណុចស្ថានីយ៍ ប្រេងឥន្ទនៈសូគីមិច លើមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី២ ខែកញ្ញា ឆ្នាំ២០១៦ ដែលបទល្មើសព្រហ្ម ទណ្ឌនេះ មានចែងឲ្យផ្តន្ទាទោសតាមបញ្ញត្តិមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ។

លោកឧត្តមសេនីទោ ហង្ស វណ្ណៈ បានរងនូវពាក្យបណ្តឹងរបស់ប្រជាពលរដ្ឋម្នាក់ ដែលប្តឹងចោទប្រកាន់ថា បានយក​លុយគេចំនួន ២២ ០០០ ដុល្លារ ទៅរត់ការចូលបម្រើការងារជាមន្ត្រីនគរបាលជាតិ ប៉ុន្តែមិនបានសម្រេចតាមការសន្យា ពោលគឺស៊ីដាច់ប្រាក់ជាង២ម៉ឺនដុល្លារនោះ នឹងថែមទាំងគេចវេសន៍មិនជួយដោះស្រាយជាមួយម្ចាស់ប្រាក់ទៀត​ផង ទើបគេប្ដឹងមកតុលាការSRP

ខេត្តសៀមរាប៖លោកសឿន តុលា ស្ថាបនិកក្រុមហ៊ុន ផា ផា យ៉ា បាននិពន្ធនូវអត្ថបទមួយក្រោមចំណងជើងថា «ភាពស្មោះត្រង់»។

លោកសឿន តុលា ស្ថាបនិកក្រុមហ៊ុន ផា ផា យ៉ា បានសរសេរថា៖ ពាក្យស្មោះត្រង់  គឺជាឬសគល់ ល្អបំផុតសម្រាប់ទំនាក់ទំនងរវាងគ្នានិងគ្នា  សូម្បីតែមនុស្សដែលចេះកុហកអ្នកដទៃ  ក៏មិនពេញចិត្ត ចំពោះនរណាម្នាក់ ដែលកុហកចំពោះខ្លួន បានឡើយ។

ប៉ុន្តែ ភាពស្មោះត្រង់  គឺមានតម្លៃ ជាងមនុស្ស  ប្រសិនបើ ” អ្នកណាម្នាក់ ប្រកាន់ យកភាពស្មោះត្រង់  ក្នុងមាគា៌ជវិតរបស់ខ្លួន   ពួកគេ មានប្រភព ទុនដ៏ល្អមួយ សម្រាប់ ទំនាក់ទំនង និងការធ្វើអាជីវកម្ម។

ភាពស្មោះត្រង់ កើតចេញមកពី  ការនិយាយពិត   ការដែលមិនលាក់លៀម ក្នុងបំណង យកផលប្រយោជន៍ ដើម្បីតែខ្លួនម្នាក់ឯង ដោយយកប្រៀប ទៅលើអ្នកណាម្នាក់ ឬភាគីម្ខាងទៀត។

គ្រប់មាគ៌ា នៃការធ្វើជំនួញ ទាមទារឱ្យមានភាពស្មោះត្រង់  ” គឺនិយាយការពិត”

នៅទីនេះសូមធ្វើការពិចារណាថា: ប្រសិនបើ អ្នកលក់ មិនមានភាពស្មោះត្រង់ ជូនអតិថិជនទេ  តើអ្នកគិតថា : តើអ្នកមានទំនាក់ទំនងល្អ និងយូរអង្វែង ជាមួយគ្នាដែរឬទេ?

ជាការពិតណាស់ អាជីវកម្មមួយដែលទទួលជោគជ័យទៅបាន  គឺអាស្រ័យទៅលើប្រភពចំណូល  ដែលអតិថិជនត្រូវចំណាយ ទៅលើ ផលិតផល ឬសេវាកម្ម ក៏ប៉ុន្តែ ទាំងនោះ គឺភាពស្មោះត្រង់ ដើរតួរសំខាន់ ក្នុងគោល ខ្លឹមនៃកាធ្វើជំនួញ។

ការលួចកិបកេង  គុណភាព ឬ ទំហំបរិមាណ ដែលជាការបំភាន់ ទៅដល់អ្នកប្រើប្រាស់ ឬអតិថិជន  មិនមែនជាមាគ៌ាធ្វើឱ្យអាជីវកម្មរីកចម្រើនបានទេ  ប្រាក់ចំណូលខ្ពស់អាចកើតឡើង  ប៉ុន្តែគ្រាន់តែជារឿងបណ្ដោះអាសន្នតែប៉ុណ្ណោះ។

ប្រាក់ចំណូល ដែលល្អបំផុត និង គាំទ្រឱ្យអាជីវកម្មឲ្យរីកចម្រើនទៅមុខ  គឺចេញពី ផលិតផល និង សេវាកម្មត្រឹមត្រូវ ជាមួយនិងភាពស្មោះត្រង់។

” ប្រសិនបើអ្នកដាំពូជស្មោះត្រង់   ការប្រមូលផលគ្មានដែនកំណត់”

ជាអកុសល  ភាពស្មោះត្រង់ មានតម្លៃថ្លៃណាស់  លំបាកកើតឡើង ចំពោះ មនុស្សដែលមិនយល់អំពីតម្លៃរបស់វាបានឡើយ ដូច្នេះហើយ  យើងត្រូវចំណាយពេល ដើម្បីឱ្យជឿជាក់ទៅលើអ្នកណាម្នាក់  ហើយយើងអាចសួរថា ” តើយើងត្រូវចំណាយពេលប៉ុណ្ណា  ដើម្បីឱ្យមានការជឿ…? គ្មាននរណាម្នាក់ អាចឆ្លើយបានទេ”

ប៉ុន្តែរឿងដែលល្អនោះគឺថា ” អ្នកណាក៏មានសិទ្ធិ ប្រកាន់យកភាពស្មោះត្រង់បានដែរ  ប្រសិនបើ ពួកគេ ជឿជាក់លើខ្លួនឯង គោរពខ្លួនឯង  និងគោរពដល់អ្នកដទៃ”

សូមចងចាំថា ” អ្នកនឹងទទួលបានជោគជ័យ ជាមូលដ្ឋានគ្រឹះ  ប្រសិនបើអ្នក មានភាពស្មោះត្រង់ចំពោះខ្លួនឯង”

ពីព្រោះភាពស្មោះត្រង់  នឹងនាំអ្នក ទៅរកមាគ៌ា នៃជំនឿ ដែលជឿទៅលើខ្លួនឯង  នៅក្នុងលោកយើងនេះ គ្មានជំនឿណាដែលត្រឹមត្រូវ ហើយល្អឥតខ្ចោះ នោះទេលើកលែងតែយើងជឿលើខ្លួនឯង ជាមុនសិន។

នៅទីនេះ មានរឿងល្អៗ 5 ចំណុច ដើម្បី ធ្វើឱ្យយើងពិចារណានិងអនុវត្ត ក្នុងការអភិវឌ្ឍខ្លួន :

1: អនុវត្តប្រកាន់យកភាពស្មោះត្រង់។

2: ឆ្លៀតពេល រៀនជាប្រចាំ ដោយទទួលស្គាល់ការពិត ថាយើង មិនមែនមនុស្សចេះឡើយ។

3: ធ្វើការផ្ដោតឱ្យបានហ្មត់ចត់ និងឱ្យអស់ពីសមត្ថភាព។

4: ដាក់គោលដៅ គិតតែចំណុចវិជ្ជមាន ដើម្បីបំពេញឱ្យទៅដល់គោលដៅ។

5: បង្កើតភាពរីករាយ និងការស្រឡាញ់ពីលើកិច្ចការ អ្នកកំពុងធ្វើបច្ចុប្បន្ន។

សូមចងចាំថា : ភាពលាក់បាំង មិនអាចធ្វើឱ្យយើង បំពេញកិច្ចការឱ្យអស់ពីសមត្ថភាពបានឡើយ  ហើយ ជោគជ័យកើតឡើងក្នុងរយៈពេលខ្លីតែប៉ុណ្ណោះ។

” លុយតិច ឬក៏ច្រើន គ្រាន់តែជាទំហំ នៃតួលេខប៉ុណ្ណោះ ប៉ុន្តែ នៅពេលដែលយើងមានភាពស្មោះត្រង់  គឺយើងមានអ្វីគ្រប់យ៉ាង។

និពន្ធដោយ លោក : សឿន តុលា ស្ថាបនិកក្រុមហ៊ុន ផា ផា យ៉ា PAPAYA NEXT STEP CO,.LTD * PAPAYA REAL ESTATE( គម្រោងអភិវឌ្ឍន៍អចលនទ្រព្យ) * PAPAYA HOMESTAY (គម្រោងលើវិស័យទេសចរណ៍)* PAPAYA GARDEN(គម្រោងលើវិស័យកសិកម្មនិងចែកចាយអាហារ)