ភ្នំពេញ៖នាយករដ្ឋមន្ត្រីហ៊ុន សែន បានអះអាងថា៖ វ៉ាក់សាំងកូវីដ១៩ របស់ក្រុមហ៊ុន ស៊ីណូវ៉ាក់ ប្រទេសចិនចំនួន ១លានដូសបន្ថែមទៀត និងឧបករណ៍តេស្តរហ័សចំនួន ៣០ម៉ឺន ដែលជាជំនួយរបស់មិត្តចិន ត្រូវដឹកមកដល់ប្រទេសកម្ពុជា នៅព្រឹកថ្ងៃទី៣១ ខែកក្កដា ឆ្នាំ២០២១នេះ។

នាយករដ្ឋមន្ត្រីបានបន្តថាវ៉ាក់សាំងស៊ីណូវ៉ាក់ ដែលដឹកមកដល់កម្ពុជានេះ គឺជាការបញ្ជាទិញរបស់រាជរដ្ឋាភិបាលកម្ពុជា។ ចំណែកឯឧបករណ៍តេស្តរហ័សចំនួន ៣០ម៉ឺន ដែលដឹកមកជាមួយវ៉ាក់សាំងនេះ គឺជាជំនួយរបស់មិត្តចិន។ វ៉ាក់សាំង គឺជាឧបករណ៍ដ៏សំខាន់មួយក្នុងការប្រយុទ្ធប្រឆាំងនឹងជំងឺកូវីដ១៩ ដែលកំពុងរីករាលដាលលើពិភពលោក។

សូមជម្រាបថារាជរដ្ឋាភិបាលកម្ពុជា ដែលមានសម្តេចហ៊ុន សែន ជាប្រមុខនោះ ក៏បានដាក់ចេញផែនការផ្តល់វ៉ាក់សាំងជូនប្រជាពលរដ្ឋ ជាផែនការយុទ្ធសាស្ត្រមួយក្នុងការប្រយុទ្ធប្រឆាំងនឹងជំងឺកូវីដ១៩នេះផងដែរ។

រាជរដ្ឋាភិបាលកម្ពុជា បានស្វះស្វែងយ៉ាងខ្លាំងក្នុងការរកវ៉ាក់សាំងមកចាក់ជូនប្រជាពលរដ្ឋ។ មកដល់ពេលពេលបច្ចុប្បន្ននេះ រកបានវ៉ាក់សាំងប្រមាណជា ១៨លានដូសហើយ ដែលក្នុងនោះមានទាំងការផ្តល់ជំនួយ និងការបញ្ជាទិញ។ វ៉ាក់សាំងប្រមាណជា ១៧លានដូសនេះ ភាគច្រើនជាវ៉ាក់សាំងរបស់ចិន គឺស៊ីណូហ្វាម និងស៊ីណូវ៉ាក់។

តាមផែនការនៅត្រឹមខែសីហា ខាងមុខនេះ កម្ពុជា នឹងទទួលបានវ៉ាក់សាំងគ្រប់ ២០លានដូសសម្រាប់ចាក់ជូនប្រជាពលរដ្ឋអាយុចាប់ពី ១៨ឆ្នាំឡើង ដែលមានចំនួនប្រមាណ ១០លាននាក់។ កម្ពុជា ក៏បានបញ្ជាទិញវ៉ាក់សាំងប្រមាណ ៥លានដូសបន្ថែមទៀត សម្រាប់ចាក់ជូនក្មេង និងយុវវ័យអាយុចាប់ពី ១២ឆ្នាំ ទៅ១៧ឆ្នាំផងដែរ។ រហូតមកដល់ពេលនេះ ប្រជាពលរដ្ឋជាង ៧លាននាក់ហើយ បានចាក់វ៉ាក់សាំងរួចរាល់៕SRP

ភ្នំពេញ៖លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានបង្ហាញអំពីលទ្ធផល នៃការនាំចេញ កសិផល ក្នុងរយៈពេល៧ខែឆ្នាំ២០២១។

លោក វេង សាខុន បានបង្ហាញថា៖ ដោយផ្អែកលើប្រព័ន្ធទិន្នន័យ គ្រឹះភូតគាមអនាម័យជាតិ (National Phytosanitary Database) របស់អគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល៧ខែឆ្នាំ២០២១នេះ កម្ពុជាបាននាំចេញកសិផលទៅក្រៅប្រទេសមាន៖
– បរិមាណសរុប ៥ ០៣២ ៩៦៨,៦០តោន ទៅកាន់ទិសដៅ ៦៤ប្រទេស គឺមានការកើនឡើងចំនួន ២ ៣៤២ ៩៨១,៣៩តោន ស្មើនឹង ៨៧,១០%
– បើធៀបនឹងរយៈពេលដូចគ្នាក្នុងឆ្នាំ២០២០ គឺទទួលបានត្រឹមតែ ២ ៦៨៩ ៩៨៧,២២តោន ។

កសិផលសំខាន់ៗដែលបាននាំចេញមានដូចខាងក្រោម៖
១- ការនាំចេញអង្ករ
– បរិមាណអង្ករនាំចេញមានចំនួន ៣០៩ ៨៦៥តោន មានការថយចុះចំនួន ១១៦ ២០៨តោន (-២៧,២៧%) បើធៀបនឹងបរិមាណនាំចេញក្នុងរយៈពេល៧ខែឆ្នាំ២០២០ ដែលមានចំនួន ៤២៦ ០៧៣តោន។ ក្នុងនោះការនាំចេញអង្ករក្នុងខែកក្កដា ឆ្នាំ២០២១ មានចំនួន ២៩ ៤១៥តោន កើនឡើងចំនួន ១ ០០២តោន (៣,៥៣%) បើធៀបនឹងខែកក្កដា ឆ្នាំ២០២០ ដែលមានចំនួន ២៨ ៤១៣តោន
– អង្ករក្រអូបគ្រប់ប្រភេទមានចំនួន ២១៤ ៩៦៨តោន ស្មើនឹង ៦៩,៣៧% អង្ករសគ្រប់ប្រភេទមានចំនួន ៨៨ ៧០២តោន ស្មើនឹង ២៨,៦៣% និងអង្ករចំហុយមានចំនួន ៦ ១៩៥តោន ស្មើនឹង ២%
– អង្ករបាននាំចេញទៅកាន់ទិសដៅសហភាពអឺរ៉ុបចំនួន ២១ប្រទេស មានបរិមាណសរុបចំនួន ៧៧ ៧៨៦តោន (ថយចុះចំនួន ៦៦ ៤៦១តោន ស្មើនឹង -៤៦,០៧%) ទិសដៅប្រទេសចិនមានបរិមាណសរុបចំនួន ១៥៣ ៩២១តោន (ថយចុះចំនួន ១ ៤០៦តោន ស្មើនឹង -០,៩១%) ទិសដៅអាស៊ានចំនួន ៥ប្រទេស មានបរិមាណសរុបចំនួន ២៩ ៤៥៣តោន(ថយចុះចំនួន ២៧ ៦១១តោន ស្មើនឹង -៤៨,៣៩%) និងទិសដៅដទៃទៀតចំនួន២២ប្រទេស មានបរិមាណសរុប ៤៨ ៧០៥តោន (ថយចុះចំនួន ២០ ៧៣០តោន ស្មើនឹង -២៩,៨៦%)
– ក្រុមហ៊ុនដែលបាននាំចេញអង្ករមានចំនួន ៥៨ក្រុមហ៊ុន ហើយបរិមាណអង្ករដែលបាននាំចេញដោយក្រុមហ៊ុនធំៗចំនួន១០ មានរហូតដល់ ២២៤ ៩៥២តោន (៧២,៦០%) និងក្រុមហ៊ុន ៤៨ដទៃទៀតបាននាំចេញត្រឹមតែ ៨៤ ៩១៣តោន (២៧,៤០%)។

២- ការនាំចេញស្រូវ
ក្នុងរយៈពេល៧ខែឆ្នាំ២០២១ ការនាំចេញស្រូវមានចំនួន ២ ០០៨ ២៤១តោន ទៅកាន់ប្រទេសវៀតណាម (មានវិញ្ញាបនបត្រភូតគាមអនាម័យចំនួន ១ ២៩០ ៥០២,៥២តោន) ដែលមានការកើនឡើងចំនួន ៩០០ ៧៦៦តោន (៨១,៣៤%) បើធៀបនឹងរយៈពេលដូចគ្នានៅឆ្នាំ២០២០ ដែលមានចំនួន ១ ១០៧ ៤៧៥តោន។

៣- ការនាំចេញកសិផលក្រៅពីស្រូវ-អង្ករ
ក្នុងរយៈពេល៧ខែឆ្នាំ២០២១ ការនាំចេញកសិផលក្រៅពីស្រូវ-អង្ករ មានចំនួន ៣ ៤៣២ ៦០១,០៨ តោនកើនឡើងចំនួន ១ ១៦៨ ៦៨៦,៨៧តោន ស្មើនឹង ៥១,៦២% បើធៀបនឹងរយៈពេលដូចគ្នាក្នុងឆ្នាំ២០២០ ដែលមានចំនួន ២ ២៦៣ ៩១៤,២២តោន ដែលក្នុងនោះរួមមាន៖
1) ចំណិតដំឡូងមីក្រៀមមានចំនួន ១ ២៥៤ ០០៣,១២តោន (កើនឡើងចំនួន ១៤,២២%) ក្នុងនោះនាំចេញទៅប្រទេសថៃចំនួន ៨៤០ ៦០០តោន ប្រទេសវៀតណាមចំនួន ៣៩៣ ៧៥១,៥៦តោន និងប្រទេសចិនចំនួន ១៩ ៦៥១,៥៦តោន
2) ដំឡូងមីស្រស់មានចំនួន ៣៩៦ ៣០០តោន (ថយចុះចំនួន -៨,៦៤%) ក្នុងនោះនាំចេញទៅប្រទេសថៃចំនួន ៩១ ២៥០តោន និងប្រទេសវៀតណាមចំនួន ៣០៥ ០៥០តោន
3) ម៉្សៅដំឡូងមីមានចំនួន ១៨ ៤៦៥,០៤តោន (កើនឡើងចំនួន ២២,៤៣%) ក្នុងនោះនាំចេញទៅប្រទេសចិនចំនួន ១៦ ៣៥៨,៦តោន ប្រទេសអ៊ីតាលីចំនួន ៣៤០,៦៤តោន ប្រទេសណេដឺឡែនចំនួន ១៥២តោន ប្រទេសថៃចំនួន ១ ៣៧៥,៨តោន សហរដ្ឋអាមេរិកចំនួន ១៧០តោន និងប្រទេសប៊ែលហ្ស៉ិកចំនួន ៦៨តោន
4) កាកសំណល់ដំឡូងមីមានចំនួន ៤ ៩០៨តោន (ថយចុះចំនួន -៣៦,១១%) នាំចេញទៅប្រទេសចិន
5) គ្រាប់ស្វាយចន្ទីមានចំនួន ៨៦៦ ២០៧,៧៧តោន (កើនឡើងចំនួន ៣៤៥,២៩%) នាំចេញទៅប្រទេសចិនចំនួន ៣ ៦៣៩,៥តោន ប្រទេសឥណ្ឌាចំនួន ១៧តោន ប្រទេសជប៉ុនចំនួន ៣៤,៤៣តោន ប្រទេសកូរ៉េចំនួន ៣,៩១តោន ប្រទេសឡាវចំនួន ២តោន ប្រទេសអារ៉ាប់ចំនួន ១៤,៥១តោន ប្រទេសតូហ្គោចំនួន ០,០១តោន ប្រទេសថៃចំនួន ៣ ១៩៩,៤០តោន ប្រទេសអារ៉ាប់រួមចំនួន ០,០១តោន ប្រទេសវៀតណាមចំនួន ៨៥៩ ២៩០តោន និងប្រទេសបង់ក្លាដែសចំនួន ៧តោន
6) គ្រាប់ពោតមានចំនួន ១៤៦ ៣០៤,១៩តោន (កើនឡើងចំនួន ១,០៩%) នាំចេញទៅប្រទេសបង់ក្លាដេស ចំនួន ៤២តោន ប្រទេសកូរ៉េចំនួន ២១តោន កោះតៃវ៉ាន់ចំនួន ៧៥១,១៩តោន ប្រទេសថៃចំនួន ៤២ ៣៥០តោន និងប្រទេសវៀតណាមចំនួន ១០៣ ១៤០តោន
7) គ្រាប់សណ្តែកបាយមានចំនួន ២១ ២៣០តោន (កើនឡើងចំនួន ៥៤៧,៣៣%) នាំចេញទៅប្រទេសវៀតណាម
8) គ្រាប់សណ្តែកសៀងមានចំនួន ១៩ ៨៨០,០៤តោន (កើនឡើងចំនួន ១០០%) នាំចេញទៅប្រទេសថៃចំនួន ៧ ៩៥០តោន ប្រទេសអារ៉ាប់រួមចំនួន ០,០៤តោន និងប្រទេសវៀតណាមចំនួន ១១ ៩៣០តោន
9) ផ្លែចេកស្រស់មានចំនួន ២៧០ ២២១,៦៨តោន (កើនឡើងចំនួន ៦១,០៨%) នាំចេញទៅប្រទេសចិនចំនួន ២៤០ ១០៨,៥៧តោន ប្រទេសជប៉ុនចំនួន ៤៩៥,៣០តោន ប្រទេសសិង្ហបុរីចំនួន៤៨០,៤៨តោននិងប្រទេសវៀតណាមចំនួន ២៩ ១៣៧,៣៣តោន
10) ផ្លែក្រូចថ្លុងមានចំនួន ២៧ ៤១៨,៤៤តោន (កើនឡើងចំនួន ៩០,៤១%) នាំចេញទៅប្រទេសថៃចំនួន ២៧ ៣៥៤តោន និងប្រទេសវៀតណាមចំនួន ៦៤,៤៤តោន
11) ផ្លែស្វាយស្រស់មានចំនួន ១៦១ ២២៨,៥៥តោន (កើនឡើងចំនួន ២៤៧,៩២%) នាំចេញទៅទីក្រុងហុងកុងចំនួន ៥០,៧៨តោន ប្រទេសកូរ៉េចំនួន ១២៤,៣៨តោន ប្រទេសគុយវ៉ែតចំនួន ០,០១តោន ប្រទេសសិង្ហបុរីចំនួន ១៦,២០តោន ប្រទេសថៃចំនួន ២១ ២១៩,២៨តោន ប្រទេសវៀតណាមចំនួន ១៣៩ ៦០៦,៦៨តោន និងប្រទេសចិនចំនួន ២១១,២២តោន
12) ដំណាប់ស្វាយមានចំនួន ១៣ ៥២៤,៥តោន (កើនឡើងចំនួន ១៩៤,១៨%) នាំចេញទៅប្រទេសចិនចំនួន ១១ ០៩៥,៥៩តោន ប្រទេសជប៉ុនចំនួន ៥១២,៥០តោន ប្រទេសកូរ៉េចំនួន ១៤,៥៦តោន ប្រទេសហ្វីលីពីន ចំនួន ៧៣៥,៦៩តោន ប្រទេសថៃចំនួន ១ ០៦៤,៦១តោន សហរដ្ឋអាមេរិកចំនួន ៨,៥៦តោន ប្រទេសវៀតណាម ចំនួន ៧៦,៨០តោន ចក្រភពអង់គ្លេស ១៦,១៤តោន និងប្រទេសកាហ្សាក់ស្ថានចំនួន ០,០៥តោន
13) ទឹកស៊ីរ៉ូស្វាយមានចំនួន ៤ ០៦៩,៦២តោន (កើនឡើងចំនួន ៧៩,១៦%) នាំចេញទៅប្រទេសចិនមានចំនួន ១៤៨តោន និងប្រទេសហ្វីលីពីនចំនួន ៣ ៩២១,៦២តោន
14) ដូងប្រេងមានចំនួន ២៩ ៦១៦,៦៩តោន (ថយចុះចំនួន -៩,៧៣%) នាំចេញទៅប្រទេសឥណ្ឌាចំនួន ២៤ ២១៦,៦៩តោន និងប្រទេសម៉ាឡេស៊ីចំនួន ៥ ៤០០តោន
15) ម្រេចមានចំនួន ២២ ៥៨០,៦៨តោន (កើនឡើងចំនួន ៥៥៨,១៩%) នាំចេញទៅប្រទេសប៊ែលហ្ស៊ិក ចំនួន ១៥,៩៨តោន ប្រទេសកាណាដាចំនួន ០,៥២តោន សាធារណរដ្ឋឆេកចំនួន ៦,១០តោន ប្រទេសបារាំងចំនួន ២០,១៤តោន ប្រទេសអាល្លឺម៉ង់ចំនួន ២៤៤,៥៧តោន ប្រទេសឥណ្ឌាចំនួន ៤២តោន ប្រទេសជប៉ុនចំនួន ២,៥៨តោន ប្រទេសកូរ៉េចំនួន ១,៥៥តោន ប្រទេសប៉ូឡូញចំនួន ៧,០៩តោន ប្រទេសរុស្ស៊ីចំនួន ០,៨០តោន ប្រទេសស៊ុយអ៊ែត ចំនួន ១,២៩តោន ប្រទេសស្វីសចំនួន ០,៤៨តោន កោះតៃវ៉ាន់ចំនួន ១៥តោន ប្រទេសអង់គ្លេសចំនួន ១,២៤តោន ប្រទេសអារ៉ាប់រួមចំនួន ០,០១តោន សហរដ្ឋអាមេរិកចំនួន ១,៧៥តោន ប្រទេសវៀតណាមចំនួន ២២ ២១៧,៤២តោន ប្រទេសសិង្ហបុរីចំនួន ១,៩៧តោន និងប្រទេសកាហ្សាក់ស្ថានចំនួន ០,១៩តោន
16) ថ្នាំជក់មានចំនួន ១ ៦៩៩,៧៥តោន (ថយចុះចំនួន -៦០,៣២%) នាំចេញទៅប្រទេសប៊ែលហ្ស៊ិកចំនួន១៩,៨២តោន ប្រទេសអាល្លឺម៉ង់ចំនួន ០,០០១តោន ប្រទេសហុងគ្រីចំនួន ១៩,៨០តោន ប្រទេសឥណ្ឌូនេស៊ីចំនួន ០,០២តោន ប្រទេសសិង្ហបុរីចំនួន ០,០១តោន ប្រទេសវៀតណាម ១ ៦៦០តោន និងប្រទេសចិនចំនួន ០,១០តោន
17) បន្លែចម្រុះមានចំនួន ៥៦,៧៨តោន (ថយចុះចំនួន -២៣,១១%) នាំចេញទៅប្រទេសបារាំង
18) ម្ទេសស្រស់មានចំនួន ៦៦ ២២៧,១២តោន (កើនឡើងចំនួន ៤៦%) នាំចេញទៅប្រទេសថៃចំនួន ៦៦ ២២៧,១២តោន និងប្រទេសអារ៉ាប់រួមចំនួន ០,០០២តោន
19) ម្ទេសក្រៀម មានចំនួន ១ ៣២០,២២តោន (កើនឡើងចំនួន ១០,០២%) នាំចេញទៅប្រទេសថៃចំនួន ១ ៣២០តោន ប្រទេសប៊ែលហ្ស៊ិកចំនួន ០,២១តោន និងប្រទេសកាណាដាចំនួន ០,០១តោន
20) ផលិតផលចំនួន ៦៦មុខ ផ្សេងទៀត មានចំនួន ១ ៣៩៧ ៨៤១,៤២តោន។

៤-តម្លៃនៃការនាំចេញកសិផល
ការប៉ាន់ស្មានតម្លៃក្នុងរយៈពេល៧ខែឆ្នាំ២០២១ ដែលទទួលបានពីការនាំចេញកសិផល (ឯកតាតម្លៃផ្អែកតាមវិក្កយបត្ររបស់អ្នកនាំចេញ) មានចំនួន ២ ៩៦៤ ៩៧៤ ៧១៤,៤៣ដុល្លារអាមេរិក ដែលក្នុងនោះ៖
– ការនាំចេញអង្ករមានចំនួន ២៦១ ៨៣៥ ៩២៥ដុល្លារអាមេរិក
– ការនាំចេញស្រូវមានចំនួន ៣២៩ ៣៥១ ៥២៤ដុល្លារអាមេរិក
– ការនាំចេញកសិផលក្រៅពីស្រូវ-អង្ករមានចំនួន ២ ៣៧៣ ៧៨៧ ២៦៥,៤៣ដុល្លារអាមេរិក។

៥-សន្និដ្ឋាន ការនាំចេញកសិផលសរុបក្នុងរយៈពេល៧ខែឆ្នាំ២០២១ មានកំណើនចំនួន ៨៧,១០% ក្នុងនោះកសិផល ក្រៅពីអង្ករមានការកើនឡើងចំនួន ១០៨,៦៣% រីឯការនាំចេញអង្ករមានការថយចុះចំនួន -២៧,២៧% ដោយសារកង្វះទូរកុងតេន័រសម្រាប់ផ្ទុក និងតម្លៃដឹកជញ្ជូនកើនឡើង៕SRP

ខេត្តព្រះវិហារ៖លោកយាយលោកតា ចំនួនពីរនាក់ រស់នៅក្នុងខេត្តព្រះវិហារ ទទួលបានថវិកានិងគ្រឿងឧបភោគ បរិភោគមួយចំនួនពីសម្ដេច ហ៊ុន សែន នាយករដ្ឋមន្ត្រី។

លោកតា លោកយាយ ទទួលបានអំណោយនៅថ្ងៃទី៣០ ខែកក្កដា ព្រឹកមិញនេះ តាមរយៈលោកស្រី ឱ វណ្ណឌីន រដ្ឋលេខាធិការក្រសួងសុខាភិបាលតំណាងដ៏ខ្ពង់ខ្ពស់សម្តេចតេជោហ៊ុន សែន នាយករដ្ឋមន្ត្រី។

សូមជម្រាបថាថវិកាចំនួន ៣លានរៀល និងគ្រឿងឧបភោគ បរិភោគ មួយចំនួន ប្រគល់ជូន លោកយាយ ថោង ក្រឹម ព្រះជន្ម ១០៣ឆ្នាំ រស់នៅភូមិស្រអែមខាងជើង ឃុំស្រអែម ស្រុកជាំក្សាន្ត ខេត្តព្រះវិហារ។ ថវិកាចំនួន៣លានរៀល និងគ្រឿងឧបភោគបរិភោគមួយចំនួន ប្រគល់ជូន លោកតា គង់ ចាន់ ព្រះជន្ម ១០០ឆ្នាំ រស់នៅភូមិបុស្សស្បូវឃុំ ស្រអែម ស្រុកជាំក្សាន្ត ខេត្តព្រះវិហារ៕SRP

ភ្នំពេញ៖រាជរដ្ឋាភិបាលកម្ពុជាបានសម្រេចបង្កើតក្រុមការងារសិក្សា និង ស្រាវជ្រាវ រកឱសថ និងបរិក្ខារសម្រាប់ប្រយុទ្ធ នឹងជំងឺកូវីដ-១៩។ នេះបើយោងតាមលិខិតចុះហត្ថលេខា ដោយសម្ដេច ហ៊ុន សែន នាយករដ្ឋមន្ត្រី៕SRP

ខេត្តក្រចេះ៖ក្រុមមន្ត្រីរាជការកំពុងបំរើការងារនៅតាមមន្ទីរពេទ្យបង្អែក- ស្រុកប្រតិបត្តិ និងមណ្ឌលសុខទាំងអស់ នៃខេត្តក្រចេះ បានចោទ លោក ទឺ ប៊ុនឡេង ហៅពេទ្យ ទូច បច្ចុប្បន្នជាប្រធានការិយាល័យរដ្ឋបាល នៃមន្ទីរសុខាភិបាលខេត្តក្រចេះ ថាបានយកតួនាទី ទៅសម្លុតគំរាមកំហែង និងគាបសង្កត់មន្ត្រីថ្នាក់ក្រោម របស់ខ្លួនតាមអំពើចិត្ត ដោយប្រាសចាកពីវិជ្ជាជីវៈ និងសិលធ៌មក្នុងភាពជាអ្នកដឹកនាំ។ ជាងនេះទៀត លោក ទឺ ប៊ុនឡេង ថែមទាំងបានតម្រូវឲ្យ​បុគ្គលិកសុខាភិបាលស្ម័គ្រចិត្តបម្រើការងារជំងឺកូវីដ-១៩ ដើម្បីបានចូលក្របខណ្ឌរដ្ឋពេញសិទ្ធិ សរុបមានចំនួន​១៣០នាក់ ដោយក្នុងម្នាក់ៗ ត្រូវបង់លុយជូនគាត់ ចាប់ពី ១ម៉ឺនដុល្លារ ទៅ ១ម៉ឺន៣ពាន់ដុល្លារអាមេរិក ទើបមានឈ្មោះជាប់ក្របខណ្ឌរដ្ឋ។ ប៉ុន្តែក្នុងករណីមន្ត្រីស្មគ្រ័ចិត្តទាំងនោះមិនបង់លុយគ្រប់ចំនួនឲ្យខ្លួនទេ នឹងមិនមានឈ្មោះជាប់ក្របខណ្ឌរដ្ឋឡើយ ព្រោះលុយ ដែលប្រមូលនេះ មួយចំនួនត្រូវយកទៅជូនចៅហ្វាយខេត្តក្រចេះផង និងមន្ត្រីថ្នាក់ដឹកនាំក្រសួងសុខាភិបាលផង។

យោងតាមលិខិតចុះថ្ងៃទី១៩ ខែមិថុនា ឆ្នាំ២០២១ របស់មន្ត្រីសុខាភិបាលកំពុងបំរើការងារនៅតាមមន្ទីរពេទ្យបង្អែក- ស្រុកប្រតិបត្តិ និងមណ្ឌលសុខភាពទាំងអស់ ក្នុងខេត្តក្រចេះ ដាក់ជូនលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ដែលបណ្ដាញសារព័ត៌មានទើបទទួលបានរសៀលថ្ងៃទី៣០ ខែកក្កដា ឆ្នាំ​២០២១នេះ ក៏​​បានចោទ លោក ទឺ ប៊ុនឡេង ថា បានបន្លំឯកសារសាធារណៈ ដោយលួចក្លែងឯកសារបញ្ជាក់លើប្រវត្តិរូបមន្ត្រីស្ម័គ្រចិត្ត ដែលត្រូវចូលក្របខណ្ឌរដ្ឋ ដោយលួចប្រើឈ្មោះ- ហត្ថលេខា និង​បោះត្រា ប្រធាន-អនុប្រធានស្រុកប្រតិបត្តិ របស់ពួកគាត់ ទាំងរូបគាត់ម្នាក់ៗ មិនបានដឹងខ្លួនជាមុនទាល់តែសោះ។

ផ្តើមពីបញ្ហានេះ មន្ត្រីសុខាភិបាលថ្នាក់ក្រោមទាំងអស់ នៅខេត្តក្រចេះ ដែលចំណុះឱ្យក្រសួងសុខាភិបាល បានសំណូមពរដល់ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ជួយបញ្ជូនមន្ត្រីស្អាតស្អំចុះអង្គេតទៅលើសកម្មភាពអនុវត្តការងារ របស់លោក ទឺ ប៊ុនឡេង ប្រធានការិយាល័យរដ្ឋបាល នៃមន្ទីរសុខាភិបាលខេត្តក្រចេះ ដើម្បីឈានទៅផ្តន្ទាទោសជនពុករលួយរូបនេះ ឲ្យសមតាមកំហុសឆ្គង។ ជាងនេះទៀត ក៏ដើម្បីជួយសម្រួលសម្រួលដល់សតិអារម្មណ៍ របស់បុគ្គលិកសុខាភិបាល ឬមន្ត្រីអ្នកដឹកនាំសុខាភិបាល នៅថ្នាក់ក្រោម អាចបំពេញការងារបម្រើសេវាសុខភាព ជូនប្រជាពលរដ្ឋ ឱ្យបានរលូន​ថែមទៀត។

ប្រភពបន្តថា ចំពោះបុគ្គលិកពេទ្យស្ម័គ្រចិត្តបំរើការងារជំងឺកូវីដ-១៩ទាំងអស់ ត្រូវបាន សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតិឲ្យចូលក្របខណ្ឌរដ្ឋពេញសិទ្ធិ ដោយមិនមានការចំណាយលុយកាក់អ្វីទាំងអស់។

ដោយឡែកមន្ត្រីមួយចំនួនទៀត ដែលកំពុងបំរើការងារនៅក្នុងមន្ទីរសុខាភិបាល ខេត្តក្រចេះ ក៏បានឲ្យដឹងដែរថា លោក ទឺ ប៊ុនឡេង និងបក្ខពួក ពិតជាបានប្រព្រឹត្តអំពើពុករលួយ ដូចលិខិតចោទប្រកាន់ របស់មន្ត្រីដឹកនាំនៅតាមមន្ទីរពេទ្យបង្អែក- ស្រុកប្រតិបត្តិ និងមណ្ឌលសុខទាំងអស់ នៃខេត្តក្រចេះ បានលើកឡើងពិតមែន។

ប្រភពបន្តថា កន្លងមកនេះ លោក ទឺ ប៊ុនឡេង បានប្រើអំណាច​តួនាទី របស់ខ្លួន ដើម្បីក្ដោបក្តាប់សេដ្ឋកិច្ចក្រៅប្រព័ន្ធច្បាប់ និងស៊ីដាច់​របបផ្សេងៗ របស់មន្ត្រី ឬបុគ្គលិកសុខាភិបាលថ្នាក់ក្រោម នៃខេត្តក្រចេះ​ ច្រើនឆ្នាំមកហើយៗ មន្ត្រីរូបនេះ ​បានអនុវត្តការងារ របស់ខ្លួន ខុសនីតិវិធី ឬខុសបច្ចេកទេស និងខុសគោលការណ៍ របស់ក្រសួងសុខាភិបាលជាដើម។

ឆ្លើយតបការចោទប្រកាន់នេះ លោក ទឺ ប៊ុនឡេង ហៅ ពេទ្យ ទូច ប្រធានការិយាល័យរដ្ឋបាល នៃមន្ទីរសុខាភិបាលខេត្តក្រចេះ បានប្រាប់ប្រព័ន្ធផ្សព្វផ្សាយក្នុងស្រុក ដោយបដិសេធថា មិនបាន​យកលុយពីមន្ត្រីស្ម័គ្រចិត្តជាប់កិច្ចសន្យាបម្រើការងារប្រឆាំងជំងឺកូវីដ-១៩ ក្នុងម្នាក់ៗចាប់ពី ១ម៉ឺនដុល្លារ ទៅ ១ម៉ឺន៣ពាន់ដុល្លារ ដូចការចោទប្រកាន់ទេ។ ប៉ុន្តែលោកទទួលស្គាល់ថា ពិតជាបានបំពេញប្រវត្តិរូប ឲ្យមន្ត្រីស្ម័គ្រចិត្តទាំងអស់ ដើម្បីចូលក្របខណ្ឌរដ្ឋ ដោយធ្វើរំលងប្រធានអូឌី ពិតប្រាដកមែន។ ប៉ុន្តែលោកថា ការធ្វើបែបនេះ ក៏អនុវត្តតាមគោលការណ៍ របស់ក្រសួងសុខាភិបាល បាន​ណែនាំដែរ។

ចំណែក លោក ឈ្នាង សុវុត្ថា ប្រធានមន្ទីរសុខាភិបាលខេត្តក្រចេះ មានប្រសាសន៍ថា ករណីមន្ត្រីសុខាភិបាលរាប់រយនាក់ សរសេរលិខិតប្តឹង លោក ទឺ ប៊ុនឡេង ​​គឺកំពុងត្រូវបានមន្ត្រីអង្គភាពប្រឆាំងអំពើ​ពុករលួយ ចុះស៊ើបអង្កេតរួចហើយៗ ចំពោះលទ្ធផលបែបណានោះ គឺត្រូវរង់ចាំស្តាប់លទ្ធផលពីអង្គភាពប្រឆាំងអំពើពុករលួយប្រកាសសិន..។

យ៉ាងនេះក្តី មន្ត្រីសុខាភិបាលថ្នាក់ក្រោម កំពុងបំរើការងារនៅតាមមន្ទីរពេទ្យបង្អែក- ស្រុកប្រតិបត្តិ និងមណ្ឌលសុខភាពទាំងអស់ នៅខេត្តក្រចេះ ក៏បានចាត់ទុក លោក ឈ្នាង សុវុត្ថា ថា​ជាមន្ត្រីថ្នាក់ដឹកនាំពុករលួយម្នាក់ដែរ ដោយបានបើកដៃឲ្យ លោក ទឺ ប៊ុនឡេង ប្រធានការរិយាល័យរដ្ឋបាល នៃមន្ទីរសុខាភិបាលខេត្តក្រចេះ ប្រព្រឹត្តអំពើពុករលួយ ហើយ​ទទួលផលប្រយោជន៍ជាមួយគ្នា​។

ទោះជាបែបនេះក្តី គេហទំព័រ «សៀមរាបប៉ុស្ដិ័» នៅមិនទាន់អាចទាក់ទង លោក ម៉ម ប៊ុនហេង រដ្ឋមន្ត្រក្រសួងសុខាភិបាល និងអ្នកស្រី ឳ វ៉ាន់ឌីន រដ្ឋលេខាធិការ និងជាអ្នកនាំពាក្យក្រសួងសុខា​ភិបាល ដើម្បីបំភ្លឺជុំវិញករណីចោទប្រកាន់ លោក ទឺ ប៊ុនឡេង ប្រធានការិយាល័យរដ្ឋបាល នៃមន្ទីរសុខាភិបាលខេត្តក្រចេះ របស់​មន្ត្រីសុខាភិបាល ដែលកំពុងបំរើការងារនៅតាមមន្ទីរពេទ្យបង្អែក​- ស្រុកប្រតិបត្តិ និងមណ្ឌលសុខទាំងអស់ នៃខេត្តក្រចេះ  បាននៅឡើយទេនៅ​ថ្ងៃទី៣០ ខែកក្កដា ឆ្នាំ២០២១នេះ៕SRP

ភ្នំពេញ៖សម្តេចអគ្គមហាពញាចក្រី ហេង សំរិន ប្រធានរដ្ឋសភា បានផ្ញើសារលិខិតអបអរសាទរជូនចំពោះសម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្នុងឱកាសដែលសម្តេចទទួលគ្រឿងឥស្សរិយយសថ្នាក់មិត្តភាព “Order of Friendship” ពីឯកឧត្ត្តម Vladimir Putin ប្រធានាធិបតីនៃសហព័ន្ធរុស្សី៕SRP

ខេត្តសៀមរាប៖ជនសង្ស័យចំនួនពីរនាក់ត្រូវបាននគរបាលក្រុងសៀមរាប ឃាត់ខ្លួនពាក់ព័ន្ធករណីគ្រឿងញៀន។

ការឃាត់ខ្លួនធ្វើឡើងនៅថ្ងៃពុធទី ២៨ ខែកក្កដា ឆ្នាំ២០២១ នៅចំណុចបន្ទប់ជួលស្ថិតនៅភូមិវាល សង្កាត់គោកចក ក្រុងសៀមរាប ដោយកម្លាំងផ្នែកប្រឆាំងគ្រឿងញៀននៃអធិការដ្ឋាននគរបាលក្រុងសៀមរាប និងនគរបាលប៉ុស្តិ៍សង្កាត់គោកចក ចូលរួមសហការ ជាមួយការិយាល័យប្រឆាំងគ្រឿងញៀន ដឹកនាំដោយលោក ដា​ ចំរើន​ អធិការនគរបាលក្រុងសៀមរាប។

ប៉ូលិសក្រុងសៀមរាបបានឲ្យដឹងថាជនសង្ស័យទាំង០២នាក់៖ ១-ឈ្មោះ សា ប៊ុនយ៉ុង ហៅឌួង ភេទប្រុស ឆ្នាំកំណើត ១៩៩២ មុខរបរគ្មាន មានទីលំនៅភូមិវាល សង្កាត់គោកចក ក្រុងសៀមរាប ។(រក្សាទុក ជួញដូរ និងប្រើប្រាស់) (មានសារធាតុ ញៀននៅក្នុងខ្លួន)

២-ឈ្មោះ ហ៊ាម លំអង ភេទប្រុស ឆ្នាំកំណើត២០០០ មុខរបរគ្មាន មានទីលំនៅភូមិប្រឡាយ ឃុំខ្នាត ស្រុកពួក ខេត្តសៀមរាប ។(សមគំនិត ជួញដូរ និងប្រើប្រាស់) (មានសារធាតុ ញៀននៅក្នុងខ្លួន)។

ប៉ូលិសបានបន្តថាករណីនេះសមត្ថកិច្ចក៏ដកហូតវត្ថុតាងរួមមានម្សៅមេតំហ្វេតាមីនចំនួន១០កញ្ចប់ ស្មើនឹងទម្ងន់ ២៧.២ក្រាម(ទម្ងន់សុទ្ធ) ជញ្ជីងថ្លឹងគ្រឿងញៀន០១គ្រឿង សម្ភារវេចខ្ចប់​ និងឧបករណ៏ប្រើប្រាស់គ្រឿងញៀនមួយចំនួន ទូរស័ព្ទចំនួន០៤គ្រឿងផងដែរ។

បច្ចុប្បន្នជនសង្ស័យនឹងវត្ថុតាងត្រូវបានកម្លាំងការិយាល័យជំនាញបញ្ជូនទៅសាលាដំបូងខេត្តសៀមរាប​ ដើម្បីអនុវត្តតាមផ្លូវច្បាប់៕SRP

ភ្នំពេញ៖ប្រធានសហភាពសហព័ន្ធយុវជនកម្ពុជា លោកហ៊ុន ម៉ានី បានលើកឡើងថា៖ខ្ញុំសូមចូលរួមអបអរសាទរជាមួយប្រជាជនកម្ពុជា ទាំងអស់ ដែលទទួលបាននូវវ៉ាក់សាំងបង្ការជំងឺកូវីដ-១៩​ជាបន្តបន្ទាប់ ពីបណ្តាប្រទេសជាមិត្ត។

លោកហ៊ុន ម៉ានី បានបន្តថា៖នៅថ្ងៃនេះ វ៉ាក់សាំង ចនសាន់​ និងចនសាន់ ដែលជាជំនួយរបស់សហរដ្ឋអាមេរិក តាមរយៈយន្តការកូវ៉ាក់ ត្រូវបានដឹកមកដល់ព្រះរាជាណាចក្រកម្ពុជា ដែលនេះគឺជាកាយវិការដ៏មានអត្ថន័យ ក្នុងការចូលរួមចំណែក ជាមួយរាជរដ្ឋាភិបាល ក្នុងកិច្ចខិតខំប្រឹងប្រែងប្រយុទ្ធប្រឆាំងនឹងការឆ្លងរាលដាលនៃជំងឺកូវីដ-១៩។

ទន្ទឹមនឹងការដាក់ចេញនូវចំណាត់ការនានា ប្រកបដោយប្រសិទ្ធភាព សំដៅធានាបាននូវការគ្រប់គ្រងស្ថានការណ៍ ដោយរក្សាបានទាំងប្រក្រតីភាពនៃជីវភាពសង្គម​ និងការកាត់បន្ថយផលប៉ះពាល់ដល់ជីវភាពប្រជាពលរដ្ឋ រាជរដ្ឋាភិបាលកម្ពុជា ក៏សម្រេចបាននូវការចាក់វ៉ាកសាំង ជូនដល់ប្រជាពលរដ្ឋ ស្របតាមផែនការ និងទិសដៅដែលបានកំណត់។ តាមរយៈការមកដល់ជាបន្តបន្ទាប់នៃវ៉ាក់សាំងតាមរយៈជំនួយ និងការបញ្ជាទិញផ្ទាល់ រាជរដ្ឋាភិបាលនឹងអាចសម្រេចគោលដៅបានកាន់តែឆាប់រហ័សក្នុងការទប់ស្កាត់នូវជំងឺដ៏កាចសាហាវនេះ។

លោកហ៊ុន ម៉ានី បន្តទៀតថា៖ក្នុងនាមជាប្រជាពលរដ្ឋកម្ពុជាម្នាក់ ខ្ញុំសូមសម្ដែងនូវអំណរគុណចំពោះកាយវិការសប្បុរសធម៌ដ៏ប្រពៃមួយនេះ​ ដែលការណ៍នេះ បានបង្ហាញពីចំណងមិត្តភាពល្អរវាងប្រទេសយើងទាំង២នៅក្នុងកាលៈទេសៈលំបាកនេះ។ ខ្ញុំក៏សង្ឃឹមដែរថា ប្រទេសជាមិត្តដទៃទៀតនឹងបន្តចូលរួមជាមួយព្រះរាជាណាចក្រកម្ពុជា​​​ដើម្បីសម្រេចបានជ័យជំនះលើការទប់ស្កាត់ការរីករាលដាលនៃវីរុសកូវីដ-១៩ នៅក្នុងប្រទេសកម្ពុជា ក៏ដូចជាសកលលោកទាំងមូល៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រីបានអះអាងថា វ៉ាក់សាំងកូវីដ-១៩ Johnson & Johnson ដែលជាជំនួយរបស់រដ្ឋាភិបាល និងប្រជាជនអាមេរិក តាមរយៈមជ្ឈមណ្ឌលកូវ៉ាក់ បានដឹកមកដល់ប្រទេសកម្ពុជាយើងហើយ នៅថ្ងៃទី៣០ ខែកក្កដា ឆ្នាំ២០២១នេះ។

សម្ដេចតេជោ ហ៊ុន សែន បានបន្តថាតាមរយៈមជ្ឈមណ្ឌលកូវ៉ាក់ សហរដ្ឋអាមេរិក បានប្រកាសផ្តល់វ៉ាក់សាំងចំនួន ១លានដូសដល់រាជរដ្ឋាភិបាល និងប្រជាជនកម្ពុជា។ វ៉ាក់សាំងដែលមកដល់ថ្ងៃនេះ មានចំនួន ៥០ម៉ឺនដូស ដោយឡែកចំនួន ៥០ម៉ឺនដូស នឹងដឹកមកដល់នៅថ្ងៃទី០២ ខែសីហាខាងមុខ។ អំណោយនេះ គឺជាផ្នែកមួយនៃការគាំទ្រជាបន្តបន្ទាប់របស់សហរដ្ឋអាមេរិក ចំពោះប្រជាជនកម្ពុជា និងនៅក្នុងតំបន់ ក្នុងពេលកំពុងតែប្រឹងងើបចេញពីជំងឺរាតត្បាតយ៉ាងធ្ងន់ធ្ងរនេះ។

សម្ដេចបានបញ្ជាក់ថាវ៉ាក់សាំង គឺជាឧបករណ៍ដ៏សំខាន់មួយក្នុងការប្រយុទ្ធប្រឆាំងនឹងជំងឺកូវីដ១៩ ដែលកំពុងរីករាលដាលលើពិភពលោក។

សូមជម្របថា រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខនោះ ក៏បានដាក់ចេញផែនការផ្តល់វ៉ាក់សាំងជូនប្រជាពលរដ្ឋ ជាផែនការយុទ្ធសាស្ត្រមួយក្នុងការប្រយុទ្ធប្រឆាំងនឹងជំងឺកូវីដ-១៩។ កម្ពុជា ក៏បានស្វះស្វែងយ៉ាងខ្លាំងក្នុងការរកវ៉ាក់សាំងមកចាក់ជូនប្រជាពលរដ្ឋ។ មកដល់ពេលពេលបច្ចុប្បន្ននេះ រកបានវ៉ាក់សាំងជាង ១៧លានដូសហើយ ដែលក្នុងនោះមានទាំងការផ្តល់ជំនួយ និងការបញ្ជាទិញ។

ដើម្បីចូលរួមប្រយុទ្ធប្រឆាំងនឹងការរាតត្បាតជំងឺកូវីដ១៩នៅកម្ពុជា មានប្រទេសជាមិត្តចំនួន៤ហើយ បានផ្តល់ និងប្រកាសផ្តល់ជំនួយវ៉ាក់សាំងមកកម្ពុជា។ ប្រទេសដែលបានផ្តល់ និងបានប្រកាសផ្តល់រួមមាន៖ ចិន ផ្តល់វ៉ាក់សាំងជាង ២លានដូស ជប៉ុន ១លានដូស អាមេរិក ១លានដូស និងអង់គ្លេស ៤១ម៉ឺន ៥ពាន់ដូស៕SRP

ខេត្តកំពង់ចាម​៖លោកអ៊ុន ចាន់​ដា​ អភិបាលខេត្ត​កំពង់ចាម នារសៀល​ថ្ងៃទី​២៩ ខែកក្កដា ម្សិលមិញ បាន​ដឹកនាំ​កិច្ច​​ប្រជុំ​គណៈបញ្ជាការ​ឯកភាពរ​ដ្ឋ​បាល​ខេត្ត ផ្សព្វផ្សាយ​សារាចរ​ណែនាំ របស់​រាជរដ្ឋាភិបាល និង​សេចក្តី​សេចក្តីសម្រេច របស់​រដ្ឋបាល​ខេត្តកំពង់ចាម ស្តីពី​ការដាក់ចេញ​នូវ​យុទ្ធនា​ការពង្រឹង​វិធា​ការប្រយុទ្ធ និង​ទប់ស្កាត់​ការឆ្លង​រីក​រាលដាលនៃ​ជម្ងឺ​កូ​វីដ ១៩ ក្នុងភូមិ​សាស្ត្រ ខេត្តកំពង់ចាម។

អភិបាលខេត្ត បាន​មានប្រសាសន៍ថា រាជ​រដ្ឋ​ភិ​បាល​កម្ពុជា បានដាក់​ចេញ​នូវ​សារាចរ​លេខ ០៤​ស​.​រ ចុះ​ថ្ងៃទី​២៨ ខែកក្កដា ឆ្នាំ​២០២១ រយៈពេល ១៤​ថ្ងៃ គិត​ចាប់ពី​ម៉ោង២៣:៥៩​នាទី ថ្ងៃទី​២៩ ខែកក្កដា ឆ្នាំ​២០២១ រហូតដល់​ថ្ងៃទី​១២ ខែសីហា ឆ្នាំ​២០២១ ដើម្បី ធានា​ប្រសិទ្ធភាព នៃ​ការអនុវត្ត​វិធានការ​ប្រយុទ្ធ និង​ទប់ស្កាត់​ការឆ្លង រាលដាល នៃ​ជម្ងឺ​កូ​វីដ ១៩ ជាពិសេស ក្នុង​បរិបទ​ដែល​កម្ពុជា កំពុង​ប្រឈម​នឹង​ការមកដល់ នៃ​រលក​ទី​៣ នៃ​ការឆ្លង រីក​រាលដាល​ទ្រង់ទ្រាយ​ធំ នៃ​ជម្ងឺ​កូ​វីដ ១៩ បណ្តាលមកពី​មេរោគ​បំប្លែង​ខ្លួន​ថ្មី​ប្រភេទ ដែល​តា (Delta)​។ ដូច្នេះដើម្បី ធានាបាន​ប្រសិទ្ធភាព នៃ​ការអនុវត្ត​វិធាន​ប្រយុទ្ធ និង​ទប់ស្កាត់​ការឆ្លង​រាលដាល នៃ​ជម្ងឺ​នេះ នៅក្នុង​ខេត្តកំពង់ចាម រដ្ឋបាលខេត្ត ក៏បាន​ដាក់ចេញ​នូវ​សេចក្តីសម្រេច​លេខ ២២៤/២១ ស​.​ស​.​រ ចុះ​ថ្ងៃទី​២៩ ខែកក្កដា ឆ្នាំ​២០១ ស្តីពី​ការដាក់ចេញ​នូវ​យុទ្ធនា​ការពង្រឹង​វិធា​ការប្រយុទ្ធ និង​ទប់ស្កាត់​ការឆ្លង​រីក​រាលដាលនៃ​ជម្ងឺ​កូ​វីដ ១៩ ក្នុងភូមិ​សាស្ត្រ​ខេត្តកំពង់ចាម សំដៅ​អនុវត្ត​ព្រម​គ្នា ក្នុង​ការងារ​ប្រយុទ្ធ និង​ទប់ស្កាត់​ការឆ្លង​រាលដាល នៃ​ជម្ងឺ​បំប្លែង​ខ្លួន​ថ្មី ប្រភេទ ដែល​តា​(Delta) ផងដែរ។

លោកអ៊ុន ចាន់​ដា បានដាក់​ចេញ​នូវ​វិធានការ​បន្ថែមចំនួន ៧​ចំណុច ដល់​គណៈបញ្ជាការ​ឯកភាព​រដ្ឋបាល​ក្រុង​-​ស្រុក សម្រាប់​ការអនុវត្ត​ព្រម​ពេល​គ្នា ដើម្បី បង្កើន​ប្រសិទ្ធភាព នៃ​យុទ្ធនា​ការពង្រឹង​វិធានការ​ប្រយុទ្ធ និង​ទប់ស្កាត់​ការឆ្លង​រាលដាល នៃ​ជម្ងឺ​កូ​វីដ ១៩ ក្នុងនោះ​មាន ៖
១-​ក្រុង​/​ស្រុក ត្រូវ​បន្ត​ផ្សព្វផ្សាយ និង​ដាក់​វិធានការ​អនុវត្ត ដើម្បី ចែករំលែក​ការទទួលខុសត្រូវ​ដល់​អ្នកពាក់ព័ន្ធ ឱ្យ​អនុវត្ត​ព្រម​គ្នា ។​

២-​ក្នុងពេលដែល​អនុវត្ត​សេចក្តីសម្រេច​ការបិទ​ខ្ទប់ ភូមិសាស្ត្រ​តាម​បណ្តា​ខេត្ត ជាប់​ព្រំដែន រដ្ឋបាល​ក្រុង​/​ស្រុក ត្រូវ​បន្ត​សហការ ជាមួយ​អនុគណៈកម្មការ​គ្រប់គ្រង ច្រកទ្វា​ចេញចូល​ប្រទេស និង​ការធ្វើ​ច​ត្តា​ឡី​ស័ក ដើម្បី រៀបចំ​ផ្ទេរ​មណ្ឌល​ច​ត្តា​ឡី​ស័ក​ពី​សាលារៀន ទៅ​ទីតាំង​ដែល​ទំនេរ ដើម្បី ប្រគល់ជូន​សាលារៀន​ជូន​ក្រសួង​អប់រំ យុវជន និង​កីឡា សម្រាប់​ត្រៀម​រៀបចំ​បើក​សាលារៀន​ឡើងវិញ ។​
៣-​ត្រូវ​ពង្រឹង​វិធានការ​ហាមឃាត់ នូវ​រាល់​សកម្មភាព និង​ទីកន្លែង ដែលមាន​ហានិភ័យ​ខ្ពស់ ក្នុងការ​ឆ្លង​រីក​រាល នៃ​ជម្ងឺ​កូ​វីដ​-១៩ ក្នុង​សហគមន៍ រួម​នឹង​ការអនុវត្ត​កាតព្វកិច្ច​ពាក់​ម៉ាស និង​កាតព្វកិច្ច​រក្សា​គម្លាត សុវត្ថិភាព​ក្នុងអំឡុងពេល​នៃ​ការ ឆ្លង​រាលដាល​នៃ​ជំងឺ​កូ​វីដ​-១៩ ក្នុង​សហគមន៍​។​

៤-​បន្ត​ពង្រឹង​ការត្រួតពិនិត្យ​ការអនុវត្ត​ច្បាប់​ចរាចរណ៍​ផ្លូវគោក រួមបញ្ចូល​នឹង​ការអនុវត្ត​កាតព្វកិច្ច រក្សា​គម្លាត សុវត្ថិភាព​ក្នុងអំឡុងពេល នៃ​ការឆ្លង​រាលដាល នៃ​ជម្ងឺ​កូ​វីដ​-១៩ ក្នុង​សហគមន៍។​

៥-​ត្រូវ​បន្ត​តាមដាន និង​ស្រាវជ្រាវ​អ្នក​ដែល​ពាក់ព័ន្ធ​នឹង​ករណី​វិជ្ជមាន​កូ​វីដ​-១៩ ពិសេស លើ​ករណី​មេរោគ​បំប្លែង​ខ្លួន​ថ្មី ប្រភេទ​ដែល​តា (Delta) នៅក្នុង​មូលដ្ឋាន ដោយ​ត្រូវ​បិទ​ខ្ទប់​ទីកន្លែង ទីតាំង​ដែល​រកឃើញ​ករណី​ភ្លាមៗ និង​ចាត់វិធានការ​បន្ទាន់ សំដៅ​គ្រប់គ្រង​អ្នក​ដែល​ពាក់ព័ន្ធ​នឹង​ករណី​វិជ្ជមាន ដើម្បី គ្រប់គ្រង​តំបន់​ផ្ទុះ​ឆ្លង​បាន​ទាន់ពេលវេលា និង​កាត់ផ្តាច់​កុំឱ្យ​ឆ្លងទៅ​តំបន់​ផ្សេងទៀត។​

៦-​ត្រូវអនុវត្ត​ច្បាប់ ដោយ​មិនមាន​ការលើកលែង ចំពោះ បុគ្គល​ដែល​បំពាន​សារាចរ សេចក្តីណែនាំ សេចក្តីសម្រេច និង​វិធានការ​រដ្ឋបាល ដែល​បាន​ដាក់ចេញ ។

៧-​ត្រូវ​រៀបចំ ការយក​សំណាក ចំពោះ​មន្ត្រីរាជការ កងកម្លាំងប្រដាប់អាវុធ និង​ប្រជាពលរដ្ឋ នៅក្នុង​ភូមិ​ដែល​ផ្ទះ​ឆ្លង​ក្នុង​ទ្រង់ទ្រាយ​ធំ ដើម្បី ស្រាវជ្រាវ​អ្នក​វិជ្ជមាន​កូ​វីដ​-១៩ យកមក​ព្យាបាល​បាន​ទាន់ពេលវេលា និង​ទប់ស្កាត់​ការឆ្លង​រីក​រាល នៃ​ជំងឺ​កូ​វីដ ១៩ ក្នុង​ទ្រង់ទ្រាយ​ធំ៕SRP

ខេត្តកំពង់ធំ៖លោកថោង ខុន រដ្ឋមន្រ្តីក្រសួងទេសចរណ៍ និងជាប្រធាន​ក្រុមការងារ​រាជរដ្ឋាភិបាល​ ចុះមូលដ្ឋានខេត្តកំពង់ធំ បានជំរុញក្រុមការងាររាជរដ្ឋាភិបាល ចុះមូលដ្ឋានខេត្តកំពង់ធំ ក៏ដូចជារដ្ឋបាលខេត្តកំពង់ធំ ត្រូវចូល​រួម​សហការគ្នា ដោះស្រាយបញ្ចប់បញ្ហាជូនប្រជាពលរដ្ឋ ដែលរួមមាន ១៥ ចំណុចសំខាន់ៗ ឱ្យបានរួចរាល់ មុនការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២។

ថ្លែងជំរុញយ៉ាងដូច្នេះក្នុងកិច្ចប្រជុំបូក​សរុបលទ្ធផលការងារ​ប្រចាំ​ឆមាស​ទី១ និងទិសដៅអនុវត្តបន្តឆមាសទី២ ឆ្នាំ២០២១ របស់ក្រុមការងាររាជរដ្ឋាភិបាល ចុះមូលដ្ឋានខេត្តកំពង់ធំ តាមប្រព័ន្ធវីដេអូ Zoom Meeting នៅព្រឹកមិញនេះ។

កិច្ចប្រជុំនេះមានការចូលរួមពីលោក សៅ សុភាព រដ្ឋលេខា​ធិការ​ក្រសួងបរិស្ថាន និងជាអនុប្រធានក្រុមការងារ រាជរដ្ឋាភិបាលចុះមូលដ្ឋានខេត្តកំពង់ធំ លោក សុខ លូ អភិបាល​ខេត្តកំពង់ធំ និងជាអនុប្រធានអចិន្ត្រៃយ៍ ព្រមទាំងមានការចូលរួមពីសំណាក់អភិបាលរងខេត្ត ប្រធានមន្ទីរ អង្គភាព កម្លាំង​សមត្ថកិច្ច​ ពាក់ព័ន្ធជុំវិញខេត្ត ក្រុង-ស្រុកជាច្រើនរូបផងដែរ។

ក្នុងកិច្ចប្រជុំ លោក ថោង ខុន បានលើកឡើងអំពីលទ្ធផលការងារ បញ្ហាប្រឈមក្តីកង្វល់ និងសំណូមពរនានា ដែលកើតមានឡើងនៅខេត្តកំពង់ធំ ដែលក្រុមការងារទាំងអស់គ្នាមានវត្តមានក្នុងកិច្ចប្រជុំនេះ ត្រូវរួមគ្នាគិត រួមគ្នាធ្វើ និងរួម​គ្នា​ទទួលខុសត្រូវ។

លោក ថោង ខុន ក៏បានដាក់ការងារសំខាន់ៗ ១៥ ចំណុចធំៗ ក្រុមការងារ​រាជរដ្ឋាភិបាល និងរដ្ឋបាលខេត្តកំពង់ធំ ត្រូវប្រឹងប្រែងរួមគ្នាបំពេញកិច្ចការសំខាន់ៗក្នុងឆមាសទី២ ឆ្នាំ២០២១ ដូចខាង​ក្រោម៖

ទី១៖ជំរុញការផ្សព្វផ្សាយ និងអនុវត្តសារាចរលេខ ០៤ សរ ចុះថ្ងទី ២៨ ខែកក្កដា ឆ្នាំ២០២១ របស់រាជរដ្ឋាភិបាល ស្តីពី​ការ​ដាក់​ចេញយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាល​ដាលនៃជំងឺកូវីដ-១៩ ឱ្យមានប្រសិទ្ធភាព។

ទី២៖បន្តអនុវត្តការងារប្រយុទ្ធប្រឆាំង និងទប់ស្កាត់ការរីករាលដាលនៃជំងឺកូវីដ-១៩ និងយុទ្ធនាការចាក់វ៉ាក់សាំង​ការពារ​កូវីដ-១៩ ជូនប្រជាពលរដ្ឋនៅមូលដ្ឋានក្រុងស្រុកទាំង ៩ នៃខេត្តកំពង់ធំ។

ទី៣៖បន្តអនុវត្តវិធានការ ៣ការពារ ៣កុំ ឲ្យបានម៉ឺងម៉ាត់ ដើម្បីគ្រប់គ្រងមិនឲ្យមានការឆ្លងរីករាលដាល និងធានាបាន​នូវការ​វិលត្រលប់ទៅរកប្រក្រតីភាពថ្មី (New Normal) នៃជីវភាពរស់នៅប្រចាំថ្ងៃ និងកិច្ចដំណើរការនៃវិស័យសេដ្ឋកិច្ចសង្គម។

ទី៤៖បន្តជួយឧបត្ថម្ភគាំទ្រដល់រដ្ឋបាលខេត្ត និងរដ្ឋបាលក្រុង-ស្រុកក្នុងការងារប្រយុទ្ធប្រឆាំង និងទប់ស្កាត់ការ​រីករាលដាល​នៃជំងឺកូវីដ-១៩ និងយុទ្ធនាការចាក់វ៉ាក់សាំង។

ទី៥៖បន្តយកចិត្តទុកដាក់ និងជួយឧបត្ថម្ភគាំទ្រដ​ល់​គ្រួសារក្រីក្រដែលមាន​សមាជិកគ្រួសារកើតជំងឺកូវីដ-១៩ (កំពុងព្យាបាល​ជំងឺ) អ្នកកំពុងធ្វើចត្តាឡីស័ក​តាមមណ្ឌល ឬតាមផ្ទះ និងអ្នកដែលបាន​ស្លាប់ដោយសារជំងឺកូវីដ១៩។

ទី៦៖បន្តជំរុញការងារកសិកម្ម និងការងារបង្កបង្កើនផលរបស់ប្រជាពលរដ្ឋក្នុង​អំលុងពេលរដូវវស្សានេះ និងត្រៀម​លក្ខណៈ​បង្ការ​ទុក​មុន និងជួយសង្គ្រោះ​អាយុជីវិតប្រជាពលរដ្ឋ និងដំណាំស្រូវ ក្នុងករណីមានគ្រោះមហន្តរាយធម្មជាតិជាយថាហេតុ ដូចជា ខ្យល់កន្ត្រាក់ ជំនន់ទឹកភ្លៀង ទឹកជំនន់ ឬការខូចខាតដំណាំស្រូវរបស់ប្រជាពលរដ្ឋ។

ទី៧៖បន្តជំរុញការពិនិត្យ និងដោះស្រាយនូវការងារចាំបាច់ជាអាទិភាព រួមមាន៖ ការងារឆ្វៀលដីនៅតំបន់៣ តំបន់២ និងដី​តំបន់​​អភិរក្សសត្វខ្សឹប។

ទី៨៖ឈរលើគោលការណ៍ការពារផលប្រយោជន៍​ស្របច្បាប់របស់ប្រជាពលរដ្ឋ ប្រគល់ជូនលោកអភិបាលខេត្ត មន្ទីរជំនាញ និង​សមត្ថកិច្ចពាក់ព័ន្ធ ពិនិត្យ និងដោះស្រាយករណីចាប់ឃាត់គ្រឿងចក្ររបស់ប្រជាពលរដ្ឋនៅស្រុកស្ទោង ស្រុកប្រាសាទ​បល្ល័ង្ក និងកន្លែងដទៃទៀត ដោយត្រូវមកប្រគល់គ្រឿងចក្រជូនប្រជាពលរដ្ឋវិញ។

ទី៩៖បន្តពង្រឹងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម តាមរយៈការអនុវត្តគោល​នយោបាយ​ភូមិ-ឃុំមាន​សុវត្ថិភាព។

ទី១០៖បន្តខិតខំលើកកម្ពស់ការផ្តល់សេវាសាធារណៈ ប្រកបដោយស្មារតីទទួលខុសត្រូវ មានតម្លាភាព និងគណនេយ្យភាព​ចំពោះប្រជាពលរដ្ឋ។

ទី១១៖បន្តជំរុញការធ្វើអត្តសញ្ញាណបណ្ណសញ្ជាតិខ្មែរគំរូថ្មី ជូនប្រជាពលរដ្ឋឲ្យបានគ្រប់ៗគ្នា។

ទី១២៖បន្តពិនិត្យ និងដោះស្រាយបញ្ហាប្រឈម ក្តីកង្វល់ និងសំណូមពរចាំបាច់របស់ប្រជាពលរដ្ឋមូលដ្ឋាន។

ទី១៣៖ត្រៀមលក្ខណៈធ្វើជាម្ចាស់ផ្ទះរៀបចំពិធីបុណ្យទន្លេលើកទី៧ នាខែមីនា ឆ្នាំ២០២២ ខាងមុខ។ ក្នុងករណីដែល​សភាព​ការណ៍​កូវីដបានធូរស្រាល ក្រុមការងារថ្នាក់ជាតិ និងរដ្ឋបាលខេត្តអាចនឹងរៀបចំបានភ្លាម ដើម្បីចូលរួមបើកចរន្តសេដ្ឋកិច្ច និងសង្គមឡើងវិញ។

ទី១៤៖បន្តលុបបំបាត់អំពើអសកម្ម និងចំណុចខ្វះខាត ដែលប៉ះពាល់ដល់សតិអារម្មណ៍ និងជីវភាពប្រជាពលរដ្ឋ។

ទី១៥៖បន្តធ្វើអំពើល្អ ដើម្បីបង្កើនភាពជឿជាក់ ទុកចិត្ត និងកក់ក្តៅរបស់ប្រជាពលរដ្ឋមកលើរាជរដ្ឋាភិបាល។

លោករដ្ឋមន្ត្រីក៏បានដាក់ទិសដៅជំរុញឱ្យក្រុមការងាររាជរដ្ឋាភិបាល ចុះមូលដ្ឋានខេត្តកំពង់ធំ និងរដ្ឋបាលខេត្តបញ្ចប់បញ្ហាជូនពលរដ្ឋឱ្យ ១៥ ចំណុចនេះ ឱ្យបានរួចរាល់មុនការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ដែលនឹងប្រព្រឹត្តទៅនាថ្ងៃអាទិត្យ ទី០៥ ខែមិថុនា ឆ្នាំ២០២២ ខាងមុខ ខណៈការ​បោះឆ្នោត​នេះនៅ​សល់រយៈពេលតែប្រមាណ ១០ ខែទៀតប៉ុណ្ណោះ៕SRP

ខេត្តសៀមរាប៖លោកយាយចាន់ ឃីម បានទទួលថវិកាលើកទឹកចិត្តចំនួន ១០លានរៀលនិងគ្រឿងឧបភោគ បរិភោគមួយចំនួនពី សម្តេចតេជោ ហ៊ុន សែន។

ការបានទទួលនៅរសៀលថ្ងៃទី២៩ ខែកក្កដា នេះតាមរយៈលោកស្រីឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស។

លោកយាយ ចាន់ ឃីម រស់នៅភូមិកន្ត្រក សង្កាត់ស្វាយដង្គំ ក្រុងសៀមរាប មានព្រះជន ៧៥ ឆ្នាំ ដែលបានស្ម័គ្រចិត្តចាក់វ៉ាក់សាំងកូវីដ-១៩ លេខរៀងទី៧លាន ស្ថិតនៅសង្កាត់ស្វាយដង្គំ ក្រុង សៀមរាប ខេត្តសៀមរាប។

តាមរយៈការខិតខំរបស់ក្រុមគ្រូពេទ្យ និងអាជ្ញាធរគ្រប់លំដាប់ថ្នាក់ និងការចូលរួមរបស់ប្រជាជន មកដល់ថ្ងៃនេះ សម្រេចបាននូវការចាក់វ៉ាក់សាំងការពារកូវីដ-១៩បាន ៧លាននាក់ ស្មើនឹង៧០ ភាគរយ នៃប្រជាជន ដែលត្រូវចាក់វ៉ាក់សាំងចំនួន១០លាននាក់៕SRP