ខេត្តសៀមរាប៖សមត្ថកិច្ចនិងពលរដ្ឋបានឃាត់ខ្លួនបុរសម្នាក់ ពាក់ព័ន្ធនឹងករណីអំពើលួចមានស្ថានទម្ងន់ទោស (គាស់ទម្លុះទម្លាយយកទ្រព្យសម្បត្តិ ) នឹងប្រើប្រាស់ដោយខុសច្បាប់នូវសារធាតុញៀន។

ការឃាត់ខ្លួនធ្វើឡើងនៅល្ងាច០៥ ខែសីហាឆ្នាំ២០២១ នៅភូមិខ្នារ សង្កាត់ជ្រាវ ក្រុងសៀមរាប។

ជនសង្ស័យមាន ឈ្មោះលឹម សាវុធ ហៅ វុធ អាយុ៤២ឆ្នាំ  មានស្រុកកំណើតនៅឃុំ ប្រសូត្រ  ស្រុកស្វាយទាប ខេត្តស្វាយរៀង បច្ចុប្បន្នរស់នៅមិនពិតប្រាកដ។

សមត្ថកិច្ចថាជនសង្ស័យរូបនេះបានធ្វើសកម្មភាពកាត់ផ្តាច់សោររបង នឹងគាស់ទ្វារផ្ទះជនរងគ្រោះ នៅភូមិខ្នារ សង្កាត់ជ្រាវ ក្រុងសៀមរាប ដោយចូលលួចយកនាឡិកាដៃចំនួន០១គ្រឿង, ស្រាចំនួន០១ដប (ស្រាបារាំង) និង ឧបករណ៍បំពងសម្លេង(speaker) ចំនួន០១គ្រឿង។

ជនសង្ស័យបានឆ្លើយសារភាពថា រូបគេពិតជាបានគាស់ផ្ទះនិងចូលលួចទ្រព្យសម្បត្តិពិតមែន។វត្ថុតាងដកហូតបានរួមមាន៖ម៉ូតូ០១គ្រឿង ម៉ាកហុងដាឌ្រីម សេរីឆ្នាំ២០២១ ពណ៌ខ្មៅ ពាក់ផ្លាកលេខភ្នំពេញ១IQ-១២៣១ លេខតួ.លេខម៉ាស៊ីន៥៩២៥១៥៤(ម៉ូតូជនសង្ស័យ ), ស្រា១ដប, នាឡិកាដៃ០១គ្រឿង,តួណឺវីស១ ,ម៉ាឡេត១ ,ដង្កាប់មានសោរចម្រុះ១ឈុត,កូនសោរចាក់ចម្រុះ១ឈុត។

បើតាមសមត្ថកិច្ចថាជនសង្ស័យធ្លាប់បានធ្វើសកម្មភាពគាស់ផ្ទះពលរដ្ឋនៅក្រុងសៀមរាប បានចំនួន៥ករណីរួចមកហើយ។

ពាក់ព័ន្ទករណីនេះ ក្រោយសាកសួរសមត្ថកិច្ចកសាងសំណុំរឿងបញ្ជូនទៅតុលាការដើម្បីអនុវត្តតាមផ្លូវច្បាប់៕SRP

ខេត្តសៀមរាប៖លោកទៀ សីហា អភិបាលខេត្តសៀមរាប នៅរសៀលថ្ងៃទី០៦ ខែសីហា ម្សិលមិញបានចុះត្រួតពិនិត្យសណ្តាប់ធ្នាប់ អនាម័យ និងសួរសុខទុក្ខបងប្អូនអាជីវករនៅផ្សារលើធំថ្មី ដែលកំពុងលក់បណ្តោះអាសន្ននៅមុខផ្សារផាមកុងទីន័រ ផ្លូវ៦០ម៉ែត្រ។

លោកទៀ សីហា បានលើកឡើងថា៖ ខ្ញុំសង្កេតឃើញថាបងប្អូនអាជីវករមួយចំនួនធំបានអនុវត្តគម្លាតសុវត្ថិភាព អនាម័យ សណ្តាប់ធ្នាប់យ៉ាងល្អប្រសើរ តែបងប្អូនមួយចំនួនទៀតមិនទាន់យល់ច្បាស់ពីបញ្ហាកូវីដ១៩នៅឡើយ។

អភិបាលខេត្តបន្តថា៖ ដោយសារកត្តាអាកាសធាតុ (ក្តៅ ភ្លៀង) និងដើម្បីពង្រឹងវិធានការកាពារកូវីដ១៩ សណ្តាប់ធ្នាប់ អនាម័យ របៀបរៀបរយជូនបងប្អូនអាជីករ រដ្ឋបាលក្រុង បាននិងកំពុងរៀបចំកន្លែងថ្មីបណ្តោះអាសន្ន ដែលមានទីតាំងនៅលើផ្លូវបេតុងមុខផ្សារផាមកុងទីន័រ។

លោកបន្តថា៖ ខ្ញុំសូមទទូចសុំឲ្យបងប្អូនប្រជាពលរដ្ឋ ត្រូវបន្តបង្កើនការប្រុងប្រយ័ត្ន យកចិត្តទុកដាក់ឲ្យបានខ្ពស់បន្ថែមទៀត អនុវត្តតាមវិធានការ ៣ការពារ ៣កុំ ពាក់ម៉ាសឲ្យជាប់ ឧស្សាហ៍លាងដៃជាមួយសាប៊ូ អាកុលឬជែល ពេលប៉ះជាមួយសម្ភារផ្សេង ដើម្បីចៀសឆ្ងាយពីជំងឺកូនវីដ១៩ ប្រភេទ Delta ដ៏កាចសាហាវនេះនេះ។ លោកបញ្ជាក់ថា ការពារខ្លួនឯង_ស្មើនឹងការពារក្រុមគ្រួសាររបស់លោកអ្នក ៣ការពារ: ត្រូវពាក់ម៉ាស់, ត្រូវលាងដៃ, ត្រូវគម្លាតបុគ្គល៣កុំ: កុំនៅបន្ទប់បិទជិត, កុំនៅកន្លែងកុះករ, កុំនៅប៉ះពាល់គ្នា៕SRP

ភ្នំពេញ៖លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានដឹកនាំដំណើរការកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជា របស់ខ្លួនដើម្បីបូកសរុបសមិទ្ធផលការងារ និងទិសដៅបន្ត។

កិច្ចប្រជុំនេះក៏មានវត្តមានសមាជិក សមាជិកា គណៈកម្មាធិការកណ្តាល និងសមាជិក សមាជិកាអង្គប្រជុំ សរុបប្រមាណ ២០០ នាក់ ដែលប្រព្រឹត្តទៅតាមប្រព័ន្ធវីដេអូអនឡាញ (zoom meeting platform) នៅព្រឹកថ្ងៃទី០៧ ខែសីហានេះ។

សូមជម្រាបថាក្នុងឆ្នាំកន្លងទៅ ស.ស.យ.ក. សម្រេចបានសមិទ្ធផលធំជាច្រើនលើការលើកតម្កើនវប្បធម៌ និងសាសនា ការជំរុញការស្វែងយល់ពីប្រវត្តិសាស្រ្ត ការចូលរួមក្នុងវិស័យអប់រំ កីឡា ព្រមទាំងសកម្មភាពសង្គម និងមនុស្សធម៌នានាជាច្រើនដែលសកម្មភាពទាំងអស់បានទទួលបានការគាំទ្រ និងកោតសរសើរពីសំណាក់ថ្នាក់់ដឹកនាំប្រទេស ស្ថាប័នជាតិ វិស័យឯកជន និងប្រជាពលរដ្ឋទូទៅផងដែរ។ ជាមួយគ្នានោះផងដែរ ស.ស.យ.ក. ក៏បានបន្តដើរតួនាទីក្នុងការពង្រឹងចំណងសាមគ្គីភាពជាមួយស្ថាប័នជាតិ និងអន្តរជាតិដើម្បីស្វែងរកឱកាសបន្ថែមដល់យុវជនកម្ពុជាក្នុងការចូលរួមដោយស្មើមុខស្មើមាត់លើឆាកអន្តរជាតិ និងឱកាសទទួលការបណ្តុះបណ្តាល និងការងារតាមរយៈកិច្ចសហប្រតិបត្តិការរវាង សសយក និងបណ្តាស្ថានទូត អង្គការយុវជនបរទេស និងក្រុមហ៊ុនជាដើម។ ជាពិសេសនៅក្នុងដំណាក់កាលនៃការឆ្លងរាលដាលនៃជំងឺកូវីដ ១៩ កម្លាំងស្ម័គ្រចិត្តរបស់ ស.ស.យ.ក. បានក្លាយជាផ្នែកមួយដ៏សំខាន់ក្នុងយុទ្ធនាការប្រយុទ្ធនឹងការឆ្លងរាលដាលនៃជំងឺដ៏កាចសាហាវមួយនេះ ដោយចូលរួមជាមួយរាជរដ្ឋាភិបាល អាជ្ញាធរដែនដី ក្រុមគ្រូពេទ្យ ក្នុងការបញ្រ្ជាបការយល់ដឹងពីគក្រោះថ្នាក់នៃជំងឺកូវីដ ១៩ ដល់ប្រជាពលរដ្ឋកម្ពុជា ការចូលរួមសម្របសម្រួលចាក់វ៉ាក់សាំង និងការព្យាបាលជំងឺកូវីដ ១៩ផងដែរ។

សមិទ្ធផលដែលសម្រេចបានកន្លងទៅនេះ មិនអាចសម្រេចបាននោះទេប្រសិនបើគ្មានការចូលរួម និងខិតខំប្រឹងប្រែងពីសមាជិក សមាជិកាគ្រប់រចនាសម្ព័ន្ធនៅទូទាំងប្រទេសដែលបានចំណាយកម្លាំងប្រាជ្ញាស្មារតី កម្លាំងកាយ ចិត្តផ្តួចផ្តើម ដឹកនាំ សម្របសម្រួល និងអនុវត្តកម្មវិធីទាំងអស់នោះដោយទឹកចិត្ត ឆន្ទៈមោះមុត ជាពិសេសដោយឈរលើបុព្វហេតុរួមមួយគឺដើម្បីជាតិ មាតុភូមិ៕SRP

ភ្នំពេញ៖សម្ដេចតេជោហ៊ុន សែន នាយករដ្ឋមន្ត្រី បានអះអាងថា៖ជប៉ុន គឺជាប្រទេសមួយដែលបានរួមចំណែកយ៉ាងច្រើនជាមួយរាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងការរាតត្បាតជំងឺកូវីដ១៩។ ការផ្ដល់ជំនួយវ៉ាក់សាំងចំនួន ១លានដូស នេះធ្វើឡើងស្របតាមចំណងមិត្តភាពរវាង ជប៉ុន និងកម្ពុជា និងដោយផ្អែកលើស្ថានភាពកូវីដ១៩ នៅកម្ពុជានាពេលបច្ចុប្បន្ន។ ជំនួយវ៉ាក់សាំងនេះ នឹងជួយគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងកូវីដ១៩ ក៏ដូចជាកាត់បន្ថយការព្រួយបារម្ភមួយចំនួន របស់ប្រជាជនកម្ពុជា។

សម្ដេចតេជោហ៊ុន សែន បានបន្តថា៖រាជរដ្ឋាភិបាល និងប្រជាជនកម្ពុជា ទាំងមូល ពិតជាទទួលបានភាពកក់ក្តៅ និងសម្តែងការដឹងគុណយ៉ាងជ្រាលជ្រៅដល់រាជរដ្ឋាភិបាលជប៉ុន ដែលបានជួយគាំទ្រ និងជ្រោមជ្រែងដល់កម្ពុជា ក្នុងបុព្វហេតុប្រយុទ្ធប្រឆាំងនឹងជំងឺរាតត្បាតនេះឱ្យខានតែបាន តាមរយៈការផ្តល់ជាជំនួយឧបករណ៍ បរិក្ខារសុខាភិបាល និងហិរញ្ញប្បទាន ជាបន្តបន្ទាប់នាពេលកន្លងមក។

សូមជម្រាបថា វ៉ាក់សាំងបង្ការជំងឺកូវីដ១៩ AstraZeneca ដែលជាជំនួយរបស់រាជរដ្ឋាភិបាល និងប្រជាជនជប៉ុនចំនួន ៦៦៨,០០០ដូសទៀត បានដឹកមកដល់កម្ពុជា នៅថ្ងៃទី០៦ ខែកក្កដា ឆ្នាំ២០២១យប់មិញនេះ។ ការមកដល់វ៉ាក់សាំងខាងលើ បន្ទាប់ពីរាជរដ្ឋាភិបាលជប៉ុន បានប្រកាសផ្ដល់ជំនួយវ៉ាក់សាំង AstraZeneca ចំនួន ១លានដូសដល់កម្ពុជា ដើម្បីចូលរួមប្រយុទ្ធប្រឆាំងជំងឺកូវីដ១៩ ដែលរាតត្បាតនៅកម្ពុជា។

វ៉ាក់សាំងដែលដឹកមកយប់នេះ ជាជើងលើកទី២ និងជាចំនួនបង្គ្រប់ចំនួន ១លានដូស ខណៈជើងទី១ បានដឹកមកដល់កាលពីថ្ងៃទី២៣ ខែកក្កដា ក្នុងចំនួន ៣៣២,០០០ដូស៕SRP

ខេត្តកំពង់ចាម៖លោក អាន ស៊ីណា ប្រធានមន្ទីរអភិវឌ្ឍន៍ និងជនបទ ខេត្តត្បូងឃ្មុំ និងលោកស្រី ថា ម៉ាណែត រួមជាមួយមិត្តភ័ក្រ ជាសប្បុរសជនបានសួរសុខទុក្ខ និងនាំយកអំណោយ និងគ្រឿងឧបភោគបរិភោគ ផ្តល់ជូនមន្ទីរ និងមន្រ្តីរាជការ ដែលកំពុងជាប់ចត្តាឡីស័ក បន្ទាប់ពីបានប៉ះពាល់ ដោយព្រឹត្តិការណ៍សហគមន៍ ២០កុម្ភៈ។

ការផ្ដល់អំណោយនៅមន្ទីរព័ត៌មាន ខេត្តកំពង់ចាម នានៅរសៀលថ្ងៃទី០៦ ខែសីហានេះដោយមនោសញ្ចេតនាស្រឡាញ់រាប់អាន សេចក្ដីអាណិតអាសូរ ចំពោះ សុខទុក្ខបងប្អូនមន្ត្រី ដែលធ្លាប់ តែរួមអាជីពការងារជាមួយគ្នាកាលពីអតីតកាល។

សូមជម្រាបថា អំណោយប្បុរសជន ដែលបានចែកជូននាឱកាសនោះ បានធ្វើការបែងចែកជា ២ចំណែកគឺ៖ ទី១.សម្រាប់មន្ត្រីរាជការ មន្ទីរព័ត៌មាន កំពុងជាប់ធ្វើចត្តាឡីស័ក និងទី២.សម្រាប់អង្គភាពផ្ទាល់ ដែលក្នុងនោះបានមកពី៖
លោក អាន ស៊ីណា ប្រធានមន្ទីរអភិវឌ្ឍន៍ ខេត្តត្បូងឃ្មុំ និងលោកស្រី ថា ម៉ាណែត ឧបត្ថម្ភមី ៨កេស ទឹកសុទ្ធ ៨យួរ ត្រីខ ៨យួរ សម្រាប់មន្ត្រីជាប់ចត្តាឡីស័ក និងទឹកអាកុលចំនួន ១២ដប រួមទាំង ថវិកាសរុប ១លាន ២សែនរៀល។ សម្រាប់មន្ទីរព័ត៌មានខេត្ត និងមន្ត្រីបំរើការងារ។

លោក ម៉ី មុនីបុរិន្ទ អនុប្រធានមន្ទីរពេទ្យខេត្តកំពង់ចាម និងលោកស្រី បានឧបត្ថម្ភមី ៨កេស ទឹកសុទ្ធ ៨យួរ ត្រីខ ៨យួរ ដល់មន្ត្រីជាប់ចត្តាឡីស័ក និងទឹកកុលចំនួន ១២ដប សម្រាប់មន្ទីរព័ត៌មានខេត្ត។

លោក ជី ហ៊ា អាជីវករផ្សារ និងលោកស្រី បានឧបត្ថម្ភមី ៨កេស ទឹកសុទ្ធ ៨យួរ និងត្រីខ ៨យួរ សម្រាប់មន្ត្រីជាប់ចត្តាឡីស័ក។
និងលោក ណៃ ស៊ីផាត អាជីវករផ្សារ និងលោកស្រី បានឧបត្ថម្ភ ទឹកអាកុល ចំនួន ០៣ពិដុង សម្រាប់មន្ទីរព័ត៌មានខេត្ត។

លោក អាន ស៊ីណា បានលើកទឹកចិត្តដល់មន្ត្រី ដែលជាប់ចត្តាឡីស័កទាំងអស់ ត្រូវព្យាយាមជំនះនូវឧបសគ្គ នារយៈពេល១៤ថ្ងៃ នេះ ក៏ព្រោះថា យើងគ្រប់ៗគ្នា មិនចង់ឲ្យហេតុការណ៍អាក្រក់នេះ កើតឡើងចំពោះខ្លួនឯងឡើយ។
លោកប្រធានមន្ទីរ ក៏បានណែនាំដល់បងប្អូនឲ្យយកចិត្តទុកដាក់ខ្ពស់ អំពីសុវត្ថិភាពផ្ទាល់ខ្លួន ក៏ដូចជា ក្រុមគ្រួសារ និងមន្ត្រីរួមអាជីពការងារ ដោយខិតខំព្យាយាម អនុវត្តទៅតាមការណែនាំរបស់រាជរដ្ឋាភិបាល ជាពិសេស ការចូលរួមបន្តអនុវត្តវិធានសុខាភិបាល «៣ការពារ និង ៣កុំ» ដើម្បី ចៀសផុតពីការឆ្លងជំងឺដ៏កាចសាហាវនេះ ទៅដល់ក្រុមគ្រួសារ ក៏ដូចជា សហគមន៍យើង ផងដែរ។

លោកស្រី សម ផល្លា ក្នុងនាមថ្នាក់ដឹកនាំ ក៏ដូចជា មន្ត្រីរាជការនៃមន្ទីរព័ត៌មានខេត្តកំពង់ចាម បានថ្លែងអំណរគុណ យ៉ាងជ្រាលជ្រៅបំផុត ចំពោះ លោក អាន ស៊ីណា និងលោកស្រី លោកវេជ្ជបណ្ឌិត ម៉ី មុនីបុរិន្ទ និងលោកស្រី ថា ម៉ាណែត លោក ជី ហ៊ា និងភរិយា និង លោក ណៃ ស៊ីផាត និងភរិយា ដែលបានចូលរួមចំណែកបរិច្ចាកនូវធនធានផ្ទាល់ខ្លួន ដើម្បី ជួយឧបត្ថម្ភ ដល់សម្ភារ និងគ្រឿងឧបភោគ បរិភោគ និងថវិកាមួយចំនួន ដល់មន្ត្រីដែលជាប់ចត្តាឡីស័ក នាពេលនេះ។ ដូច្នេះតាមរយៈ កាយវិករមនុស្សធម៌ទាំងអស់នេះ លោកស្រីប្រធានមន្ទីរ ក៏បានលើកដៃប្រណមគោរពជូនពរ ដល់លោក អាន ស៊ីណា និងលោកស្រី ព្រមទាំង សប្បុរសជនទាំងអស់ សូមជួបប្រទះតែសេចក្ដីសុខ សេចក្ដីចម្រើន និងជោគជ័យគ្រប់ភារកិច្ចការងារ៕SRP

ភ្នំពេញ៖សម្តេចហ៊ុន សែន នាយករដ្ឋមន្ត្រី បានបញ្ជាឲ្យអនុវត្ត ចាក់ដូសទី៣ ដល់មន្ត្រីនៅតាមព្រំដែនកម្ពុជា.ថៃទាំងអស់។

ការបញ្ជារបស់នាយករដ្ឋមន្ត្រីធ្វើឡើងនៅរសៀលថ្ងៃនេះ ដោយសារមានការព្រួយបារម្ភពីការឆ្លងរាលដាលវីរុសបំប្លែងថ្មី Delta។

ករណីនេះ ប្រមុខរាជរដ្ឋាភិបាលកម្ពុជា សម្តេចហ៊ុន សែន បានបញ្ជាឲ្យលោកជំទាវ ឱ វណ្ណឌីន អនុវត្តនូវការចាក់វ៉ាក់សាំងដូសទី៣ សម្រាប់បណ្តាខេត្តនៅតាមព្រំដែនកម្ពុជា ថៃ ដោយយកសប្តាហ៍ទី ២ អាចថា ខានស្អែក ឬខានស្អែក ១ ហើយចាប់អនុវត្តចាក់ដូសទី៣ អោយផ្នែកជួរមុខតាមព្រំដែនកម្ពុជា ថៃ ទាំងអស់ ដែលនៅតំបន់ទទួលសេវា ព្រោះបងប្អូនទាំងនេះ នឹងទទួលហានិភ័យ បន្ទាប់ពីបងប្អូនរាប់ពាន់នាក់ វិលត្រឡប់មកពីប្រទេសថៃ ឬអាចឡើងលើសពីហ្នឹងទៅទៀត ហើយបងប្អូននៅព្រំដែន នឹងទទួលការលំបាក។

សម្តេចហ៊ុន សែន បញ្ជាក់ច្បាស់ៗថាត្រូវដឹកបន្ទាន់វ៉ាក់សាំង AstraZeneca សម្រាប់ចាក់ជូនគ្រូពេទ្យ មន្ត្រីកងទ័ព នគរបាល អាវុធហត្ថ និងមន្ត្រីរាជការនានា ដែលមានការពាក់ព័ន្ធ សូមធ្វើការងារនេះបន្ទាន់បំផុត នឹងធ្វើឲ្យបាន ព្រោះយើងមានវ៉ាក់សាំង AstraZeneca នៅក្នុងដៃហើយ។

សំឡេងពិសេសម្តេចហ៊ុន សែន ថ្លែងថ្ងៃទី ៦ ខែសីហា ឆ្នាំ ២០២១នេះ៕SRP

ខេត្តសៀមរាប៖អភិបាលខេត្តសៀមរាប លោក ទៀ សីហា នៅរសៀលថ្ងៃទី០៦ ខែសីហានេះ បានដឹកនាំមន្ត្រីរបស់ខ្លួន ចុះសួរសុខទុក្ខ អាជីវករលក់ដូរ មកពីផ្សារលើធំថ្មី ដែលកំពុងលក់បណ្តោះអាសន្ននៅផ្លូវ ៦០ម៉ែត្រ និងមុខផ្សារផាមកុងទីន័រ ក្នុងក្រុងសៀមរាប ខេត្តសៀមរាប។

សូមជម្រាបថាក្រោយពីផ្សារលើធំថ្មី ត្រូវបានបិទដើម្បីទប់ស្កាត់ជំងឺកូវីដ១៩ អាជីវករ បានផ្លាស់ប្ដូរមកលក់នៅផ្លូវ៦០ម៉ែត្រជំនួសវិញ៕SRP

ភ្នំពេញ៖សម្ដេចស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅថ្ងៃសុក្រ ថ្ងៃទី៦ ខែសីហា ព្រឹកមិញនេះបានអញ្ជើញជាអធិបតីក្នុងពិធីប្រគល់រថយន្ត Ford Ranger Pick-up ចំនួន៨៧គ្រឿង ដល់ស្នងការដ្ឋាននគរបាលខេត្ត ដើម្បីបែងចែកជូនអធិការដ្ឋាននគរបាល ក្រុង ស្រុក។ ពិធីនេះបានប្រារព្ធឡើងនៅបរិវេណមុខអគារទីស្ដីការក្រសួងមហាផ្ទៃ ដោយមានការអនុវត្តយ៉ាងត្រឹមត្រូវតាមវិធានការសុខាភិបាល ដើម្បីបង្ការទប់ស្កាត់ការរីករាលដាលជំងឺកូវីដ១៩ ដូចជាការពាក់ម៉ាស់ វាស់កំដៅ យកសំណាក បាញ់អាល់កុល និងរក្សាគម្លាតសុវត្ថិភាពផងដែរ។

យោងតាមរបាយការណ៍របស់លោក សេង យូអ៊ាន់ អគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុ គិតចាប់តាំងពីឆ្នាំ២០១៩មក សម្ដេចស ខេង បានផ្ដល់អំណោយរថយន្ត Pikc-up ចំនួន៤លើក សរុប១៥៨គ្រឿង ដល់អង្គភាពចំណុះអគ្គស្នងការដ្ឋាននគរបាលជាតិ ក្នុងនោះរួមមាន ស្នងការដ្ឋាននគរបាលខេត្តចំនួន ២២គ្រឿង វរសេនាតូចនគរបាលការពារព្រំដែនចំណុះភូមិភាគ៤ និងភូមិភាគ៥ចំនួន ១៦គ្រឿង ក្រុមល្បាតត្រួតពិនិត្យបទល្មើសចរាចរណ៍ផ្លូវគោកលើផ្លូវជាតិលេខ៤ និងលេខ៥ ចំនួន ៤គ្រឿង អធិការដ្ឋាននគរបាលខណ្ឌតាមរយៈស្នងការដ្ឋាននគរបាលរាជធានីភ្នំពេញចំនួន ១៣គ្រឿង និងអធិការដ្ឋាននគរបាល ក្រុង ស្រុក ខណ្ឌចំនួន១០៣គ្រឿង។

លោកបានបញ្ជាក់ថា រថយន្តទាំង៨៧គ្រឿងនេះ នឹងប្រគល់ជូនអធិការដ្ឋាននគរបាលក្រុង ស្រុក ដែលពុំទាន់ទទួលបានរថយន្តទាំង ៨៧អធិការដ្ឋាន នៃស្នងការដ្ឋាននគរបាលខេត្តចំនួន២៤ខេត្ត រួមមានខេត្តព្រៃវែង ៤គ្រឿង, បាត់ដំបង ៥គ្រឿង, បន្ទាយមានជ័យ ២គ្រឿង, ស្ទឹងត្រែង ២គ្រឿង, ពោធិ៍សាត់ ៤គ្រឿង, ព្រះវិហារ ៣គ្រឿង, កណ្ដាល ៥គ្រឿង, កំពង់ស្ពឺ ៥គ្រឿង, កំពង់ឆ្នាំង ៦គ្រឿង, កំពង់ចាម ៨គ្រឿង, ត្បូងឃ្មុំ ៤គ្រឿង, ក្រចេះ ១គ្រឿង, តាកែវ ៤គ្រឿង, កំពត ៤គ្រឿង, ព្រះសីហនុ ២គ្រឿង, កោះកុង ៣គ្រឿង, កំពង់ធំ ៧គ្រឿង, សៀមរាប ១០គ្រឿង, កែប២គ្រឿង, ឧត្តរមានជ័យ ១គ្រឿង, ប៉ៃលិន ១គ្រឿង, មណ្ឌលគិរី ១គ្រឿង, និងរតនគិរី ៣គ្រឿង សរុបពីឆ្នាំ២០១៩មក សម្ដេចក្រឡាហោមបានផ្ដល់ជូនរថយន្តចំនួន ៥លើក ស្មើនឹង២៤៥គ្រឿង៕SRP

ខេត្តកំពង់ចាម​៖លោក​តាវ័យជាង​ ១០០ឆ្នាំ​ ចំនួន​២រូប​ ដែល​រស់នៅ​ក្នុង​ឃុំព្រែកដំបូក​ ស្រុកស្រីសន្ធរ​ ខេត្តកំពង់ចាម​ ទទួល​បាន​​អំណោយពី​សម្តេច​ហ៊ុន​ សែន​ ននាយករដ្ឋមន្ត្រី បន្ទាប់​ពី​លោកតាទាំង២រូប​ ស្ម័គ្រចិត្ត​ចាក់​វ៉ាក់សាំង​បង្ការ​ជំងឺ​កូវីដ​-១៩​ ដេីម្បី​ការពារ​អាយុជីវិត​របស់​ខ្លួន​។

ការ​ប្រគល់​អំណោយ​នេះត្រូវបាន​ធ្វើឡើង​នៅថ្ងៃទី០៦ ខែសីហា ព្រឹកមិញនេះ ក្រោម​វត្តមានលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩​ និង​លោក
គីមសួរ ភីរុណ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តកំពង់ចាម ដោយ​មានការ​ចូលរួម​ពី​លោក សុីម គង់ អភិបាលស្រុកស្រីសន្ធរ និង​មន្ត្រី​ពាក់ព័ន្ធ​ជាច្រើន​រូប​ផង​ដែរ​។

គួរ​បញ្ជាក់​ថា​ លោកតាដែលបានស្ម័គ្រចិត្តចាក់វ៉ាក់សាំងបង្ការជំងឺកូវីដ-១៩ ដូសទី១ ដោយក្នុងនោះរួមមាន៖​ ១.លោកតា នន អែម អាយុ១០៤ ឆ្នាំ រស់នៅភូមិតាម៉ុល ឃុំព្រែកដំបូក ស្រុកស្រីសន្ធរ ខេត្តកំពង់ចាម។
២.លោកតា ហែម ម៉ៅ អាយុ១០០ ឆ្នាំ រស់នៅភូមិក្សេរ​ ឃុំព្រែករំដេង ស្រុកស្រីសន្ធរ ខេត្តកំពង់ចាម។

ចំពោះ​អំណោយដ៏ថ្លៃថ្លារបស់សម្តេចតេជោ ដែលបានប្រគល់ជូនលោកតាទាំង២រូប រួមមាន៖​ ថវិកាចំនួន ៣លានរៀល .អង្ករ ៤បេ​ .មី ១០កេស .ត្រីខ ១កេសធំ .ទឹកសុទ្ធ ២កេស .ទឹកត្រី ២យួរ និងប្រេងឆា ២ដប ផងដែរ​៕SRP

ខេត្តសៀមរាប៖ឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រសៀមរាប នៅថ្ងៃទី០៦ ខែសីហា ព្រឹកមិញនេះ បានចាត់អោយលោកសុខ តុញ តំណាងអោយរបស់ឯកឧត្តម អ្នកឧកញ៉ា ផ្ទាល់បាននាំយកអង្ករចំនួន១តោននិងត្រីខកំប៉ុងចំនួន៤កេស មកប្រគេនដល់ព្រះសង្ឃ ដែលគង់វត្តប្រាសាទគោកចក ដែលស្ថិតនៅក្នុងសង្កាត់ កោកចកក្រុងសៀមរាប ខេត្តសៀមរាប ដែលកំពុងជួបនូវការខ្វះខាតក្នុងបរិបទជំងឺកូវីដ-១៩។

ក្នុងនាមថា ឯកឧត្តម អ្នកឧកញ៉ាសៀង ណាំ លោក សុខ តុញ បានមានប្រសាសន៍ថាការអភិវឌ្ឍ របស់ប្រទេសកម្ពុជានាពេលបច្ចុប្បន្ននេះ មិនអាចកាត់ផ្តាច់ ចេញពី ព្រះពុទ្ធសាសនា នោះឡើយ មានន័យថាការអភិវឌ្ឍប្រកបដោយ និរន្តរភាពគឺផ្អែកទៅលើកត្តាដាក់ចេញនូវយុទ្ធសាស្ត្រចក្ខុវិស័យ និងគោលនយោបាយឈ្នះៗ ក្នុងនោះក៏ត្រូវក៏មានការ ចូលរួមពីពុទ្ធសាសនាដោយបណ្ដុះសីលធម៌ សតិបញ្ញា ស្មារតីការគោរពដឹងគុណ និងការបណ្ដុះបណ្ដាលធនធានមនុស្សតាមបែបពុទ្ធសាសនា។  ដូច្នេះ ក្រោមម្លប់សន្ដិភាពតាមរយ:នយោបាយឈ្នះៗ ការដឹកនាំប្រកបដោយគតិបណ្ឌិតរបស់សម្ដេចតេជោនាយករដ្ឋមន្ត្រី ប្រទេសកម្ពុជា មានការអភិវឌ្ឍលើគ្រប់វិស័យទាំងផ្លូវពុទ្ធចក្រ និងអាណាចក្រផងដែរ។

ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក បានមានសង្ឃដីកាថា ស្ថិតក្នុងដំណាក់កាលមួយដែលព្រះសង្ឃមិនអាចនិមន្តបិណ្ឌបាតនៅក្រៅវត្តបាន ហើយពុទ្ធបរិស័ទក៏មិនសូវហ៊ានមកវត្ត ដោយសារប្រយ័ត្នប្រយែងនិងការពារខ្លួនកុំឱ្យឆ្លងជំងឺកូវីដ-១៩ ហើយនៅពេលដែលពុទ្ធបរិស័ទមិនសូវមកវត្ត ធ្វើបុណ្យប្រគេន ចង្ហាន់ឬទេយ្យទានច្រើនដូចមុន ដោយភាគច្រើនមកតែពេលថ្ងៃសីលបន្តិចបន្តួចតែប៉ុណ្ណោះ។ ដូច្នោះហើយជីវភាពប្រចាំថ្ងៃរបស់ព្រះសង្ឃទាំងអស់ក៏ត្រូវសម្រួល បន្សាំទៅ តាមសភាពការណ៍ផងដែរ។

គ្រូវិចិត្រវង្សា ហែម គឹមសាន្ត ក៍មានសង្ឃដីកា សូមញាតិញោមពុទ្ធបរិស័ទ គ្រប់មជ្ឈដ្ឋាន មេត្តាចូលរួមទប់ស្កាត់និង ត្រូវបន្តបង្កើនការប្រុងប្រយ័ត្នខ្ពស់នឹងយកចិត្តទុកដាក់បន្ថែមទៀតតាម ការណែនាំរបស់ប្រមុខរាជរដ្ឋាភិបាល ៣កុំ ៣ការពារ: គឺយើងត្រូវពាក់ម៉ាស, ត្រូវលាងដៃ, ត្រូវគម្លាតបុគ្គល, ៣កុំ: គឺកុំនៅបន្ទប់បិទជិត, កុំនៅកន្លែងកុះករ, កុំនៅប៉ះពាល់គ្នាពីព្រោះថា កូវិដមិនរើសអើងអ្នកណាម្នាក់ឡើយ ៕SRP

ខេត្តសៀមរាប៖គួរឲ្យរន្ធត់!ចំពោះស្ត្រីម្នាក់ខណៈកំពុងតែអង្គុយក្នុងតូបមុខផ្ទះត្រូវបានរថយន្តមួយគ្រឿងចូលទៅបុកទាំងកំរោលបណ្ដាលឲ្យស្លាប់ភ្លាមៗ។

ហេតុការណ៍បានកើតឡើនៅរសៀលថ្ងៃទី ០៥ ខែសីហា ឆ្នាំ២០២១នៅត្រង់ចំណុចផ្លូវក្រាលគ្រួសក្រហម ក្នុងភូមិដាក់ផ្កា ឃុំតាយ៉ែក ស្រុកសូទ្រនិគម ខេត្តសៀមរាប។

យោងតាមរបាយការណ៍របស់នគរបាលចរាចណ៍បានបង្ហាញថាករណីគ្រោះថ្នាក់ចរាចណ៍នេះវាងរថយន្តម៉ាកTOYOTA PICK UP ពណ៌ស ពាក់ស្លាកលេខ សៀមរាប 2C.0409  ឆ្នាំផលិត 1990 បើកបរដោយឈ្មោះណាំង សេត ភេទប្រុស អាយុ៤៥ឆ្នាំ មានទីលំនៅបច្ចុប្បន្នភូមិរើល ឃុំរើល ស្រុកពួក ខេត្តសៀមរាប បើកបរទិសដៅ ពីត្បូងទៅជើង ក្នុងល្បឿនលឿន បានរេចង្កូតធ្លាក់ផ្លូវ ទៅបុកមនុស្សដែលកំពុងនៅក្នុងតូបមុខផ្ទះ។

ជនរងគ្រោះឈ្មោះអ៊ុល ហាន ភេទស្រី អាយុ៣៨ឆ្នាំ មានទីលំនៅភូមិដាក់ផ្កា ឃុំតាយ៉ែក ស្រុកសូទ្រនិគម ខេត្តសៀមរាប។ ក្នុងនោះខូចខាតតូបទាំងស្រុងចំណែករថយន្តខូចខាតធ្ងន់។

របាយការណ៍បន្តថាករណីនេះមូលហេតុអ្នកបើកបររថយន្តបើកបរលឿន និងផ្លូវរអិលព្រោះមានមេឃភ្លៀងធ្លាក់ខ្លាំង។ ក្រោយពេលកើតហេតុសមត្ថកិច្ចបានស្ទូចយកវត្ថុតាងមករក្សាទុកនៅអធិការរដ្ឋាននគរបាលស្រុកសូនិគម និងបានឃាត់ខ្លួនអ្នកបើកបររថយន្តដើម្បីបន្តតាមនីតិវិធីច្បាប់៕SRP

ខេត្តកំពង់ចាម​៖លោកអ៊ុន ចាន់ដា អភិបាលខេត្តកំពង់ចាម នៅថ្ងៃទី​៦​ ខែសីហា​ នេះ​ បានអញ្ជើញចុះសួរសុខទុក្ខ និងនាំយកអំណោយរដ្ឋបាលខេត្ត ផ្តល់ជូនមន្រ្តីរាជការនៃមន្ទីរព័ត៌មាន ខេត្តកំពង់ចាម ដែល​កំពុង​ធ្វើចត្តាឡីស័ក​បន្ទាប់​ពី​ពាក់ព័ន្ធ​និង​ករណី​វិជ្ជមាន​កូវី។

លោកអ៊ុន ចាន់ដា បានបញ្ជាក់ថា ផ្អែកទៅតាមស្ថាន នៃការឆ្លងរាលដាល នៃជម្ងឺកូវីដ ១៩ ជាពិសេស មេរោគបម្លែងថ្មី ប្រភេទ ដែលតា (Delta) មានការផ្ទុះខ្លាំង នៅប្រទេសជិតខាង និងបានរាលដាល ចូលមកដល់ខេត្តមួយចំនួន នៅជាប់ព្រំដែនកម្ពុជា ក្នុងនោះ ខេត្តកំពង់ចាម ក៏បានរកឃើញមេរោគបំលែងថ្មីនេះ ផងដែរ។ ដូច្នេះ សូមឲ្យ​មន្ត្រីរាជការ និងប្រជាពលរដ្ឋទាំងអស់ ត្រូវ​យកចិត្តទុកដាក់ខ្ពស់ អំពីសុវត្ថិភាពផ្ទាល់ខ្លួន ក៏ដូចជា ក្រុមគ្រួសារ និងមន្ត្រីរួមអាជីពការងារ នៅក្នុងអង្គភាពនីមួយៗ ផងដែរ​។

អភិបាលខេត្ត ក៏បានណែនាំដល់មន្ត្រីរាជការទាំងអស់ ឲ្យ​ថែទាំសុខភាព តាមរយៈ ការចូលរួមបន្តអនុវត្តវិធានសុខាភិបាល «៣ការពារ និង ៣កុំ» ដើម្បី ចៀសផុតពីការឆ្លងជម្ងឺ ដ៏កាចសាហាវនេះ ទៅក្រុមគ្រួសារ ក៏ដូចជាទៅដល់សហគមន៍។

នាឱកាសនោះដែរ លោកស្រី សម ផល្លា ប្រធាន​មន្ទីរព័ត៌មានខេត្តកំពង់ចាម បានថ្លែងអំណរគុណចំពោះ អភិបាលខេត្ត ដែលបានយកចិត្តទុកដាក់ អំពីសុខទុក្ខ របស់មន្រ្តីរាជការ និងបាននាំមកនូវ​អង្ករ​ មី​ ទឹកបរិសុទ្ធ​ ម៉ាស​ និង​ជែលលាងដៃ​​ ផ្ដល់ជូន រួមទាំងការជួយផ្គត់ផ្គង់អាហារ ចំនួន ៣ពេល ក្នុងមួយថ្ងៃ នាអំឡុងពេលធ្វើចត្តាឡីស័កនេះ។

គួរកត់សម្គាល់ដែរថា មកដល់ពេលនេះ មន្ត្រីរាជការនៅក្នុងមន្ទីរ អង្គភាព ចំនួន ៤ ហើយ ដែលបានប៉ះពាល់នឹងព្រឹត្តិការសហគមន៍ ២០ កុម្ភៈ ក្នុងនោះ រួមមាន៖ មន្ទីរផែនការ មន្ទីរពាណិជ្ជកម្ម មន្ទីរទេសចរណ៍ និងមន្ទីរព័ត៌មានខេត្តកំពង់ចាម។ ជាមួយនោះ អ្នកដែលបានឆ្លងក៏ត្រូវបានអង្គភាពនីមួយៗ បញ្ជូនទៅសម្រាកព្យាបាល។ ដោយឡែក អ្នកប៉ះពាល់ផ្ទាល់ និងប្រយោល ក៏តម្រូវឲ្យធ្វើចត្តាឡីស័ក នៅតាមអង្គភាពសាមីផងដែរ៕SRP