ភ្នំពេញ៖លោកស សុខា កូនប្រុសរបស់សម្ដេចស ខេង រដ្ឋមន្ត្រីក្រសួងមហាផ្ទៃ បានបញ្ជាក់ថា៖វត្តមានសម្តេចក្រឡាហោម ស ខេង ទៅប្រទេសបារាំង ដើម្បីពិនិត្យសុខភាពសុទ្ធសាធ ពុំមានជួបអ្នកនយោបាយណាម្នាក់ឡើយ។

លោកស សុខា បានសរសេរសារមួយនៅលើគណនីហ្វេសប៊ុក facebook របស់លោកនៅព្រឹកនេះថា ៖សូមជម្រាបជូន សាធារណជនទាំងអស់ មេត្តាជ្រាបថា ៖ វត្តមានសម្តេចក្រឡាហោម ស ខេងទៅប្រទេសបារាំង រយៈពេល ២សប្តាហ៍ ចាប់ពីថ្ងៃទី២២ សីហា ដល់ថ្ងៃទី៥ កញ្ញា គឺជាការអញ្ជើញទៅពិនិត្យសុខភាពសុទ្ធសាធ ពុំមានការជួបជាមួយអ្នកនយោបាយណាម្នាក់ ដូចការលើកឡើងរបស់អ្នកវិភាគ ក៏ដូចជាអ្នកនយោបាយមួយចំនួនតូច នៃអតីតគណបក្សសង្គ្រោះជាតិ នោះឡើយ។

ចំពោះការលើកឡើងទាំងមិនពិត របស់អ្នកនយោបាយទាំងនោះ វាគ្រាន់តែជាការប្រឌិតឡើងដើម្បីបំភាន់មតិជាតិ និងអន្តរជាតិ សំដៅកេញចំណេញផលប្រយោជន៍នយោបាយរបស់ខ្លួន និងបក្ខពួកប៉ុណ្ណោះ ពិសេសអាចគ្រាន់តែជាសារដង្ហើយរកផ្លូវចរចានយោបាយជាមួយគណបក្សប្រជាជនកម្ពុជា ពោលគឺផ្ទុយពីអ្វីដែលថ្នាក់ដឹកនាំ ក៏ដូចជា សាធារណជន បានធ្វើ និងមើលឃើញជាក់ស្តែង។

ក្រៅពីនេះការលើកឡើងរបស់អ្នកនយោបាយមួយចំនួនតូច នៃអតីតគណបក្សសង្គ្រោះជាតិ សំដៅមុតស្រួចក្នុងន័យបំបែកបំបាក់ផ្ទៃក្នុងគណបក្សប្រជាជនកម្ពុជា ដែលជាគណបក្សតែមួយគត់ បាន និងកំពុងប្រកាន់ខ្ជាប់ខ្ជួននូវសាមគ្គីផ្ទៃក្នុងយ៉ាងរឹងមាំ ពោលគឺមិនមែនអ្នកណាម្នាក់ ឬក្រុមណាមួយ អាចបំបែកបំបាក់ផ្ទៃក្នុងបានឡើយ។

ទង្វើរបស់អ្នកនយោបាយ ដែលធ្វើគ្រាន់តែដេីម្បីមហិច្ឆតាផ្ទាល់ខ្លួនរស់ទោះអ្នកដទៃស្លាប់ក៏ដោយចុះបែបនេះ​ បានឆ្លុះបញ្ចាំងយ៉ាងច្បាស់ពីចរិកអ្នកនយោបាយគ្មានក្រមសីលធម៌វិជ្ជាជីវៈ​ ក្នុងចេតនាទុច្ចរិតដដែលៗ បំភ្លៃរឿងមិនពិត ប្រឌិតបំពុលសង្គម និងបរិយាកាសនយោបាយនៅកម្ពុជា ជាពិសេសបាននិងកំពុងតែមួលបង្កាច់ទម្លាក់កំហុសយ៉ាងពិសពុលលើសម្តេចក្រឡាហោម ស ខេង ផងដែរ។

ដូច្នេះសូមសាធារណជនទាំងអស់ កុំជឿលើការលើកឡើង នៃក្រុមអ្នកនយោបាយអាត្មានិយម ដែលក្នុងចិត្តគំនិតគិតតែពីចង់បានអំណាច​ ផលប្រយោជន៍ផ្ទាល់ខ្លួន និងបក្ខពួក ដោយមិនគិតពីផលប្រយោជន៍ជាតិរួម មិនយកការពិតជាមូលដ្ឋាន នោះឲ្យសោះ។

ក្នុងនាមអ្នកនយោបាយជំនាន់មុន​ គួរគប្បីធ្វេីជាគំរូវិជ្ជមាន​ សម្រាប់អ្នកនយោបាយជំនាន់ក្រោយរៀនសូត្រតាម​ ពិសេសបណ្ដុះមនសិការស្រឡាញ់ជាតិ​ ជ្រោមជ្រែងជាតិពិតប្រាកដ​ ចៀសវាងការធ្វេីប្រជាភិថុតិយុវជន​ ប្រជាជន៕SRP

ខេត្តព្រះវិហារ៖នៅទីបំផុតជំនួញឈើរបស់ឈ្មួញ ឈ្មោះ(ឡាំ) នៅខេត្តព្រះវិហារ ត្រូវបានបង្ក្រាបដោយសមត្ថកិច្ចចម្រុះ។

ការបង្ក្រាបធ្វើឡើង នៅរសៀលថ្ងៃទី២៩ ខែសីហា ម្សិលមិញ នៅចំណុចដីឡូត៍មួយកន្លែង ស្ថិតនៅភូមិឆែបពី ស្រុកឆែប ដឹកនាំដោយលោកវុធ សាវី ព្រះរាជអាជ្ញា រងខេត្តព្រះវិហារ។ ម្ចាស់
ឈើឈ្មោះឡាំ ភេទប្រុសអាយុ ៥៥ឆ្នាំ រស់នៅ ភូមិឆែបពី ស្រុកឆែប ខេត្តព្រះវិហារ។

បើយោងតាមតាមប្រភពពីសមត្ថកិច្ចបានដឹងថាឈ្មួញឈើ ឈ្មោះ ឡាំ បានជួលកម្មករ ចូលអារឈើពីព្រៃ យកមកត្រាំទឹក នឹងយកវ៉ៃតាម ដីឡូតិ៍របស់ខ្លួន ហាលអោយប្រែសប្លុររួចបានរុះរើ វិញលក់អោយទៅឈ្មួញទិញឈើ ផ្ទះចាស់ ដោយបន្លំភ្នែក សមត្ថកិច្ច នឹងជំនាញជាយូឆ្នាំមកហើយ។

ករណីនេះសមត្ថកិច្ចបានធ្វើការរឹបអូស ឈើជាង២០ម៉ែត្រគូប នឹង គោយន្តមួយគ្រឿង។ចំណែកមនុស្ស ត្រូវរត់គេចបាត់ស្រមោល។

ការបង្ក្រាបនេះជំនាញនៅមិនទាន់បានរឹបអូសអស់ឈើនៅឡើយទេ ដោយបន្តនៅថ្ងៃនេះទៀត ដើម្បីយកទៅរក្សានៅស្នាក់ការ កងរាជអាវុធហត្ថ ធ្វើការវាស់វែងនៅពេលក្រោយ៕SRP

ខេត្តប៉ៃលិន៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានផ្ដល់អំណោយរទេះរុញសម្រាប់ជនពិការ ស្បៀងអាហារ ជូនដល់ចាស់ជរា ស្ត្រីមេម៉ាយ ជនពិការ ចំនួន១៥គ្រួសារ។

អំណោយដែលពលរដ្ឋទទួលបាន នៅថ្ងៃទី២៩ ខែសីហា ម្សិលមិញ នៅសង្កាត់បរយ៉ាខា សង្កាត់អូរតាវ៉ៅ និង ឃុំស្ទឹងត្រង់ ខេត្តប៉ៃលិន តាមរយ: លោក ស្រី បាន ស្រីមុំ ប្រធានសាខាកាកបាទក្រហមកម្ពុជាខេត្ត។

លោកស្រី បាន ស្រីមុំ បានពាំនាំនូវការផ្ដាំផ្ញើ សាកសួរសុខទុក្ខពីសំណាក់ សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ដោយក្ដីនឹករលឹក និងអាណិតអាសូរ បំផុតដល់ ប្រជាពលរដ្ឋដែលជួបលំបាកនាពេលនេះ។

លោកស្រី បានបន្តថា សម្ដេចតែងមានការគិតគូរជានិច្ច អំពីសុខទុក្ខរបស់ប្រជាពលរដ្ឋ ទូទៅ នៅគ្រប់ពេលវេលា និងថែមទាំងបានណែនាំជាប្រចាំដល់ មន្រ្តីកាកបាទក្រហម នៅថ្នាក់មូលដ្ឋានទាំងអស់ ត្រូវពិនិត្យមើលពីជីវភាពរស់នៅរបស់ប្រជាពលរដ្ឋ ព្រមទាំងចុះសុខទុក្ខដល់ចាស់ជរាឥតទីពឹង ជនទីទ័លក្រ ស្រី្តមេម៉ាយមានកូនច្រើនក្រីក្រ អ្នកកំពុងរស់នៅជាមួយមេរោគអេដស៍ អ្នកជំងឺអេដស៍ អ្នកមានជំងឺរ៉ាំរ៉ៃហើយមានជីវភាពទីទ័លក្រ កុមារកំព្រា ស្រី្តឆ្លងទន្លេ និងអ្នករងគ្រោះផ្សេងៗ ដោយមិនប្រកាន់ពូជសាសន៍ សាសនា ប្រពៃណី ឬនិន្នាការនយោបាយឡើយ។

លោកស្រី ក៏បានលើកទឹកចិត្តដល់គ្រួសារជនពិការទាំងអស់ មិនត្រូវអស់សង្ឃឹមឡើយ ត្រូវខិតខំប្រកបរបរចិញ្ចឹមជីវិត តាមលទ្ធភាពរបស់ខ្លួន និងខិតខំមើលថែកូនចៅឲ្យបានល្អ ពិសេសត្រូវចូលរួមបង្ការការពារការឆ្លងរីករាលដាលនៃជំងឺកូវីដ–១៩។

សូមជម្រាបថាអំណោយដែលផ្ដល់ជូនគ្រួសារជនពិការ ក្នុងមួយគ្រួសារៗ ទទួលបាន៖ រទេះរុញ១ អង្ករ ,មី ,ត្រីខ ,ទឹកសុទ្ធ,ទឹកស៊ីអ៉ីវ , ម៉ាស , ឃីតមួយ (មុង ក្រមា សារ៉ុង ភួយ ខ្នើយ កន្ទេលថវិកាចំនួន៕SRPដោយ ស សារឿន

ខេត្តសៀមរាប៖លោកភឹង ចិន្តារ៉េត ស្នងការរងទទួលផែនព្រហ្មទណ្ឌស្នងការប៉ូលិសខេត្តសៀមរាប បានឲ្យដឹងថា តាមការស្រាវជ្រាវ មិនមានការផ្ទុះអាវុធនោះទេ ជាការផ្ទុះកំប៉ុងហ្គាសតែប៉ុណ្ណោះ។

លោកភឹង ចិន្តារ៉េត បដិសេធប្រាប់អ្នកសារព័ត៌មានបែបនេះ បន្ទាប់ពីមានហ្វេសប៊ុកបង្ហោះថាមានករណីផ្ទុះអាវុធ ក្នុងជម្លោះដីធ្លីមួយកន្លែង។

លោកភឹង ចិន្តារ៉េត បានបញ្ជាក់ថា កម្លាំងប៉ូលិសព្រហ្មទណ្ឌ របស់លោកបានឃាត់ខ្លួនបុរសម្នាក់ ឈ្មោះតាត គង់ អាយុ៣៦ឆ្នាំមុខរបរកសិករ រស់នៅភូមិរុនតាឯក ឃុំរុនតាឯកស្រុកបន្ទាយស្រី ខេត្តសៀមរាប។

ការឃាត់ខ្លួនធ្វើឡើងនៅថ្ងៃទី២៨ខែសីហា ឆ្នាំ២០២១ ស្ថិតនៅក្នុងភូមិអញ្ចាញ សង្កាត់នគរធំ ក្រុងសៀមរាប តាមបទបញ្ជារបស់ព្រះរាជអាជ្ញាអមសាលាដំបូងខេត្តសៀមរាប។ ចំណែកដើមបណ្ដឹងឈ្មោះ ស៊ូ ដារ៉ា ភេទប្រុសអាយុ២៨ឆ្នាំ មុខរបររកស៊ី បច្ចុប្បន្នរស់នៅភូមិឡកំបោរ សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ ដោយបានប្ដឹងឈ្មោះ គិ ផល្លី ភេទប្រុស អាយុប្រហែល៤០ឆ្នាំ មុខរបររកស៊ី រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប និងបក្ខពួកពីបទធ្វើឲ្យខូចខាតដោយចេតនា។

ប៉ូលិសខេត្តសៀមរាបបានឲ្យដឹងថនៅវេលាម៉ោង១០ថ្ងៃទី ២៨ ខែសីហា ឆ្នាំ២០២១ ម្សិលមិញ សមត្ថកិច្ចបានទទួលព័ត៌មានថា៖ ចុងចោទឈ្មោះគិ ផល្លី និងឈ្មោះ តាត គង់ បាននាំបក្ខពួក មកបំផ្លិចបំផ្លាញទ្រព្យសម្បត្តិ នៅលើដីរបស់ដើមចោទ ទើបនគរបាលចំនួនពីរនាក់លោកងឹម ម៉េងលឹម និងលោកជា ប៊ុនឡុង បានចុះទៅដល់ធ្វើការស្រាវជ្រាវដោយស្លៀកពាក់ស៊ីវិលមិនមានកាំភ្លើងនៅជាប់និងខ្លួននោះទេ។

ប៉ូលិសបានបញ្ជាក់ថាក្រោយក្រោយពិនិត្យនៅកន្លែងកើតហេតុបានឃើញបង្គោលរបងត្រូវបានវាយបំបាក់ និងផ្ទះប្រក់ស័ង្កសីទំហំ៤ម៉ែត្រ គុណនឹង៦ម៉ែត្រ០១ខ្នង បន្ទប់ទឹកប្រក់ស័ង្កសី១ ត្រូវបានខូចខាតទាំងស្រុងផងដែរ។ ក្នុងនោះចុងចោទនិងអ្នកសារព័ត៌មានជាច្រើននាក់ដែលកំពុងធ្វើការឡាយ(Live) ក៏ចុងចោទនិងអ្នកសារព័ត៌មានបាននាំគ្នាគេចខ្លួន នៅសល់តែឈ្មោះតាត គង់ សមត្ថកិច្ចក៏ឃាត់ខ្លួនតែម្ដង។

បើតាមសមត្ថកិច្ចបញ្ជាក់ថាឈ្មោះ តាត គង់ បានឆ្លើយសារភាពថាខ្លួននិងបក្សពួកពិតជាបាននាំគ្នាយកកាំបិតដំបងខ្វែវធ្វើសកម្មភាពវាយបំផ្លិចបំផ្លាញរបងផ្ទះនិងបន្ទប់ទឹក នៅលើដីរបស់ឈ្មោះ ស៊ូ ដារ៉ា មានទីតាំងស្ថិតនៅភូមិអញ្ចាញ សង្កាត់នគរធំ ក្រុងសៀមរាប ពិតប្រាកដមែន។

ឈ្មោះ តាត គង់ បានបន្តថា ពេលដែលនគរបាល ទៅដល់ទីកន្លែងកើតហេតុ លោកពុំឃើញ មានអាវុធ ឬមានការផ្ទុះអាវុធនោះឡើយ។ ទោះជាយ៉ាងណា ករណីនេះសមត្ថកិច្ច បានកសាងសំណុំរឿងបញ្ជូនខ្លួន ឈ្មោះ តាត គង់ ទៅតុលាការតាមនីតិវិធីច្បាប់៕SRP

ខេត្តសៀមរាប៖បុរសម្នាក់ត្រូវបានប្រជាពលរដ្ឋប្រទះឃើញដេកស្លាប់នៅតាមផ្លូវ។

ហេតុការណ៍ភ្ញាក់ផ្អើលបានឡើង នៅវេលាម៉ោង ១២ថ្ងៃទី ២៩ ខែ សីហា ឆ្នាំ ២០២១ នេះនៅត្រង់ចំណុចព្រៃអាងរាងតេ ស្ថិតនៅភូមិ តាចេកសង្កាត់ជ្រាវ ក្រុងសៀមរាប ខេត្តសៀមរាប។

យោងតាមរបាយការណ៍ប៉ូលិសខេត្តសៀមរាបបានឲ្យដឹងថា ជនរងគ្រោះមានឈ្មោះ គង់ យី អាយុ៥១ឆ្នាំ មានទីលំនៅភូមិគោកធ្លក ឃុំកណ្ដែក ស្រុកប្រាសាទបាគង ខេត្តសៀមរាប។

របាយការណ៍ដដែលបានបញ្ជាក់ថា ករណីនេះបើតាមសមត្ថកិច្ចពិនិត្យ មូលហេតុខ្យល់គរស្លាប់ ខណ:ដើររកឃ្មុំក្នុងព្រៃអាងរាងតេ។ ក្រោយពីបានធ្វើការពិនិត្យវិច័យរួច សមត្ថកិច្ចបានប្រគល់ ឲ្យក្រុមគ្រួសារយកទៅធ្វើបុណ្យទៅតាមប្រពៃណី៕SRP

ភ្នំពេញ៖នាយករដ្ឋមន្ត្រីហ៊ុន សែន បាន អបអរសាទរលោកយាយ ព្រំ កួយ ដែលទទួលបានការ ចាក់វ៉ាក់សាំង លេខរៀងទី៩លាននៅថ្ងៃនេះ។

នៅក្នុងគណនីហ្វេសប៊ុកផេក របស់នាយករដ្ឋមន្ត្រី នៅព្រលប់ថ្ងៃនេះ បានបញ្ជាក់ថា៖ខ្ញុំសូមអបអរសាទរលោកយាយព្រំ កួយអាយុ៧៦ឆ្នាំ រស់នៅភូមិថ្មសំលៀង ឃុំមៀន ស្រុកអូរាំងឪខេត្តត្បូងឃ្មុំ ដែលទទួលបានការចាក់វ៉ាក់សាំងលេខរៀងទី៩លាននៅថ្ងៃនេះ។

នាយករដ្ឋមន្ត្រីហ៊ុន សែន បានបញ្ជាក់ថា៖
មកទល់ពេលនេះកម្ពុជាយើង សម្រេចបាននូវការចាក់វ៉ាក់សាំងការពារកូវីដ-១៩ ចំនួន៩លាននាក់ គឺស្មើនឹង ៩០% នៃប្រជាពលរដ្ឋ១០លាននាក់ដែលត្រូវចាក់វ៉ាក់សាំង។ ចំនួននេះមិនទាន់គិតពីការចាក់ជូនកុមារនិងយុវវ័យ ដែលមកដល់ពេលនេះ ចាក់បាន៦៩.៤៧ភាគរយនៃចំនួន១.៩៦៦.៩៣១នាក់ ដែលត្រូវចាក់ព្រមទាំងបងប្អូន ដែលបានចាក់ដូសទី៣ឬដូសជំរុញនោះទេ។ ប្រសិននិយាយពីតួលេខសរុបយើងចាក់បានលើស១០លាន
នាក់ដែលប្រម៉ាន៦៥ភាគរយនៃប្រជាជនសរុប១៦លាននាក់។

ខ្ញុំសូមអរគុណដល់បងប្អូនប្រជាពលរដ្ឋ ក្រុមគ្រូពេទ្យ និងអាជ្ញាធរគ្រប់លំដាប់ថ្នាក់ដែលបានខិតខំចូលរួមនៅក្នុងដំណើរការចាក់វ៉ាក់សាំង។

បើតាមនាយកមន្ត្រីបានបន្ថែមថា៖ លោកជំទាវ ឱ វណ្ណឌីន នឹងនាំយកថវិកា ១០លានរៀល និងសម្ភារៈមួយចំនួនទៀតដែលជាជំនួយ របស់ខ្ញុំទៅប្រគល់ជូនដោយផ្ទាល់។

សូមជូនពរលោកយាយព្រំ កួយ និងក្រុមគ្រួសារព្រមទាំងប្រជាពលរដ្ឋទូទាំងប្រទេសជួបតែសេចក្តីសុខនិងចៀសផុតពីជំងឺកូវីដ-១៩ ទាំអស់គ្នា៕SRP

ខេត្តព្រះសីហនុ៖លោក គួច ចំរើន អភិបាល អភិបាលខេត្តព្រះសីហនុ បានធ្វើការណែនាំដល់ក្រុមការងារបច្ចេកទេស ត្រូវបង្កើនការយកចិត្តទុកដាក់ ក្នុងការស្តារអូរ ប្រឡាយក្នុងក្រុងព្រះសីហនុ ទៅតាមនិយាមកាប្លង់ ប្រព័ន្ធសុរិយោដី ដើម្បីបញ្ចៀសជំនន់ទឹកភ្លៀង នៅក្នុងរដូវវស្សា និងកុំឱ្យជន់លិចផ្ទះប្រជាពលរដ្ឋ។

អភិបាលខេត្តរូបនេះ ក៏បានធ្វើការអំពាវនាវដល់ប្រជាពលរដ្ឋ ត្រូវចូលរួមសហការ ជាមួយ អាជ្ញាធរក្រុង អាជ្ញាធរខេត្ដ ដោយធ្វើការវេចខ្ចប់ទុកដាក់កាកសំណល់ ឱ្យបានត្រឹមត្រូវ កុំបោះចោលសំរាមចូលក្នុងអូរប្រឡាយ ដែលធ្វើឱ្យមានការកកស្ទះលំហូរទឹក និងជាផ្នែកមួយដែលបង្កឱ្យមានការជន់លិចផងដែរ។

ការថ្លែងបែបនេះនៅថ្ងៃសៅរ៍ ទី២៨ ខែសីហា ព្រឹកមិញនេះ នាឱកាសដឹកនាំមន្រ្តីជំនាញពាក់ព័ន្ធ ចុះត្រួតពិនិត្យប្រព័ន្ធអូរប្រឡាយ នៅក្នុងភូមិសាស្ត្រសង្កាត់លេខ៤ ក្រុងព្រះសីហនុ និងសិក្សាបន្ថែមនូវប្រព័ន្ធលំហូរទឹកដើម្បីរំដោះជំនន់ទឹកភ្លៀង៕SRP

ភ្នំពេញ៖មន្ត្រីជាន់ខ្ពស់នៃរដ្ឋបាលជលផល បានអះអាងថា «ក្តាមសេះ១ក្បាល មានស៊ុតប្រហែលមួយលានគ្រាប់ បើយើងលែងចូលសមុទ្រវិញ វានឹងផ្តល់ក្តាមជំទង់មកវិញប្រហែល ១ពាន់ក្បាល ចុះបើយើងលែង ១ម៉ឺនក្បាល នោះនឹងផ្តល់ក្តាមជំទង់មកវិញចំនួន ១០លានក្បាល។

ប្រធាននាយកដ្ឋានអភិរក្សជលផល នៃរដ្ឋបាលជលផល លោក អ៊ុក វិបុល បានលើកឡើងថា៖តើខ្ញុំអង្វរសុំបានទេ បើបងប្អូនអ្នកនេសាទ ចាប់បានក្តាមដែលមានស៊ុតនៅក្រៅស្នូក សូមលែងត្រឡប់វិញ ហើយប្រជាពលរដ្ឋមេត្តាកុំទិញ និងបរិភោគ។រួមគ្នាដើម្បីថែរក្សាធនធានជលផលសមុទ្ររបស់យើង»៕SRP

ខេត្តសៀមរាប៖លោក ទៀ សីហា ជំរុញឲ្យអង្គភាពជំនាញធ្វើការពិនិត្យ និងរៀបចំបណ្តាញអគ្គិសនី និងប្រព័ន្ធទឹកស្អាតឡើងវិញ ដើម្បីភ្ជាប់បណ្តាញ ជូនប្រជាពលរដ្ឋ ដែលកំពុងរស់នៅ និងប្រកបមុខរបរ ទាំងនៅក្នុងទីតាំង និង នៅជុំវិញទីតាំងវិនិយោគ របស់ក្រុមហ៊ុន ស៊ូ ជីង បានប្រើប្រាស់ជាធម្មតា។ ជាមួយគ្នានេះដែរ អាជ្ញាធរក្រុងសង្កាត់ ត្រូវរៀបចំបញ្ហាបរិស្ថាន ឲ្យមានសណ្ដាប់ធ្នាប់។

អភិបាលខេត្តសៀមរាប លោក ទៀ សីហា ក៏បានឲ្យស្រង់នូវសារពើភណ្ឌទ្រព្យសម្បត្តិ របស់ក្រុមហ៊ុន រួមមានអគារ និង គ្រឿងចក្រចាស់ៗមួយចំនួន ដើម្បីធ្វើការដកហូត និងគ្រប់គ្រង់ជាណ្ដោះអាសន្ន។

អភិបាលខេត្តក៏បានប្រាប់មន្ត្រីពាក់ព័ន្ធទាំងអស់ ត្រូវយកចិត្តទុកដាក់ និង ពង្រឹងលើការរៀបចំ សន្តិសុខ សុវត្ថិភាព សណ្ដាប់ធ្នាប់ របៀបរៀបរយ ទូទៅ រួមនឹងការដោះស្រាយ បញ្ហានាៗ ដើម្បីសម្រួលដល់ ដំណើរការជាប្រក្រតី ជូន ប្រជាពលរដ្ឋ ដែលកំពុងប្រកបរបរនៅក្នុងទីតាំង និង សមាគមកាណូតដឹកភ្ញៀវឲ្យដំណើរការ ជាធម្មតារហូតដល់មានការសម្រេចសារជាថ្មី។

លោក ទៀ សីហា ថ្លែងជំរុញបែបនេះ នៅថ្ងៃទី២៧ ខែសីហា ម្សិលមិញ ក្នុងឱកាសដឹកនាំក្រុមមន្ត្រីចុះពិនិត្យមើលស្ថានភាព ទីតាំងកំពង់ផែក្រុមហ៊ុន ស៊ូ ជីង ដែលស្ថិតនៅក្នុងសង្កាត់ ចុងឃ្នៀស ក្រុងសៀមរាប។

មន្ត្រីរដ្ឋបាលសាលាខេត្តសៀមរាបបានឲ្យដឹងថាក្នុងការចុះពិនិត្យក្រុមការងារ បានសម្រេចដកហូតទីតាំងទាំងមូល ដោយបានធ្វើការបិទ និង ហ៊ុំព័ទ្ធទីតាំងអគាររបស់ក្រុមហ៊ុនចំនួន ០២អគារ គឺ ១. ទីតាំងការិយាល័យបម្រើការងារបស់ក្រុមហ៊ុន និង២. ទីតាំងរោងយានដ្ឋានជួសជុល គ្រឿងចក្ររបស់ក្រុមហ៊ុន។ ក្នុងនោះមិនអនុញ្ញាតឲ្យមានការចេញ-ចូលក្នុងបរិវេណទីតាំងដែលត្រូវបានហ៊ុំព័ទ្ឋ ពិសេសសន្តិសុខប្រចាំ ការរបស់ក្រុមហ៊ុនចំនួន ០៦នាក់ ដែលនៅយាមទីតាំងវិនិយោគនេះ ក្រុមការងារចម្រុះបាន ណែនាំឲ្យធ្វើការចាកចេញពីទីតាំង វិនិយោគ ផងដែរ។

សូមរំឭកថាទីស្តីការគណៈរដ្ឋមន្រ្តី បានចេញ សជណសម្រេចលុបចោលនូវ គម្រោងអភិវឌ្ឍន៍កំពង់ផែទេសចរណ៍ចុងឃ្នៀស របស់ក្រុមហ៊ុន ស៊ូ ជីង និងដកហូតទីតាំង វិនិយោគទាំងស្រុង របស់ក្រុមហ៊ុនមួយនេះ ប្រគល់ឲ្យរដ្ឋបាលខេត្តសៀមរាប និងគ្រឹះស្ថានអង្គរគ្រប់គ្រងជាបណ្ដោះអាសន្ន ក្នុងនោះរាល់ទ្រព្យសម្បត្តិ និងហេដ្ឋារចនាសម្ព័ន្ធ នានា នៅទីតាំងវិនិយោគត្រូវបានចាត់ទុកជាសម្បត្តិរដ្ឋ។

សេចក្ដីសម្រេចនេះ បានចេញកាលពីថ្ងៃទី២៩ ខែ កក្កដា ឆ្នាំ២០២១ ចុះហត្ថលេខាដោយ លោក ហុីង ថូរ៉ាក់ស៊ី រដ្ឋលេខាធិការទីស្ដីការគណៈរដ្ឋមន្ត្រី ដោយយោងតាមការណែនាំដ៏ខ្ពង់ខ្ពស់របស់ សម្តេចហ៊ុន សែន នាយករដ្ឋមន្ត្រី៕SRP

ភ្នំពេញ៖នាយកដ្ឋានព័ត៌មានវិទ្យា បានឲ្យដឹងថាដោយសារបរិបទ និងការរីកចម្រើនបច្ចេកវិទ្យា បានជម្រុញប្រជាពលរដ្ឋកម្ពុជាចាប់ផ្តើមប្រឡូកក្នុងវិស័យបច្ចេកវិទ្យា។ តាមរយៈទិន្នន័យរបស់ Hootsuite នៅដើមឆ្នាំ២០២១ បង្ហាញថាប្រជាជនកម្ពុជាប្រើប្រាស់អ៊ីនធឺណិតប្រមាណ ៨,៨៦លាននាក់ (ស្មើ ៥២,៦%)​ ក្នុងនោះគណនីបណ្តាញសង្គមមានប្រមាណ ១២លានគណនី (ស្មើ ៧១,៣% នៃចំនួនប្រជាជនសរុប)។ ដោយសារភាពរីកចម្រើននេះ ជនខិលខូចមួយចំនួនបានព្យាយាមស្វែងរកនូវល្បិចឆបោកផ្សេងៗ ដើម្បីកេងប្រវ័ញ្ចផលប្រយោជន៍នៃភាពរីកចម្រើនបច្ចេកវិទ្យា។

នៅមួយរយៈនេះ​ ក្រុមការងារបច្ចេកទេសនៃនាយកដ្ឋានព័ត៌មានវិទ្យា សង្កេតឃើញមានសកម្មភាពអូសទាញវិនិយោគលើបណ្តាញទំនាក់ទំនងសង្គម ពិសេសកម្មវិធី Telegram ដែលគណនីរបស់អ្នកត្រូវបានដាក់បញ្ចូលក្នុងគ្រុប (Group) ឬមានគណនី (ជនបរទេស ឬជនជាតិខ្មែរ) ទាក់ទងមកគណនីរបសស់អ្នកផ្ទាល់ (Personal Chat) ដែលពិភាក្សាអំពីការវិនិយោគផ្សេងៗ ដែលទទួលបានផលចំណេញច្រើនក្នុងរយៈពេលយ៉ាងខ្លី។

ដើម្បីការពារពីការចាញ់បោក ខាតបង់ប្រាក់ និងពេលវេលា នាយកដ្ឋានព័ត៌មានវិទ្យា សូមណែនាំបងប្អូនពលរដ្ឋទាំងអស់មេត្តាប្រុងប្រយ័ត្ន ធ្វើការពិចារណា និងពិភាក្សាជាមួយអ្នកជំនាញ ឲ្យបានដិតដល់មុនពេលចំណាយប្រាក់វិនិយោគលើជំនួញដែលបងប្អូនពុំបានយល់ដឹងច្បាស់។

បញ្ជាក់៖អត្ថបទនេះមានគោលបំណងអប់រំបងប្អូនពលរដ្ឋកុំឲ្យចាញ់ការឆបោកក្រុមជនខិលខូចមួយចំនួនប៉ុណ្ណោះ ហើយក្រុមការងារសូមបញ្ជាក់ថាអត្ថន័យខាងលើពុំសំដៅដល់ក្រុមហ៊ុន ឬភ្នាក់ងារស្របច្បាប់មួយចំនួន ដែលកំពុងប្រតិបត្តិវិនិយោគ ក្នុងព្រះរាជាណាចក្រកម្ពុជា នោះឡើយ៕SRP

ភ្នំពេញ៖លោកឃួង ស្រេង អភិបាលរាជធានីភ្នំពេញ បានបញ្ជាឲ្យអាជ្ញាធរខណ្ឌទាំង១៤ ចាត់វិធានការឲ្យបានម៉ឺងម៉ាត់បំផុត ចំពោះការលួចបើកក្លឹបកំសាន្តខារ៉ាអូខេ ការជួបជុំផឹកស៊ី នៅក្នុងមូលដ្ឋានរបស់ខ្លួនដើម្បី ទប់ស្កាត់ឲ្យបាននូវការរីករាលដាលជំងឺកូវីដ-១៩ និងដើម្បីឈានទៅបើករាជធានីភ្នំពេញនិងប្រទេសជាតិជាធម្មតាឡើងវិញ។

ការបញ្ជាបែបនេះរបស់លោក ឃួង ស្រេង បានធ្វើឡើង នៅថ្ងៃទី២៧ សីហា ឆ្នាំ២០២១នេះ ក្នុងពិធីប្រកាសចូលកាន់តំណែងអភិបាលខណ្ឌចំនួន២រូប គឺខណ្ឌទួលគោកនិងខណ្ឌប្ញស្សីកែវ។

លោកឃួង ស្រេង បានមានប្រសាសន៍លើកឡើងថា ៖មកដល់ពេលនេះ នៅមានខណ្ឌមួយចំនួនបាននិងកំពុងលួចបើក ក្លឹបកម្សាន្ត លួចបើកខារ៉ាអូខេ ជួបជុំផឹកស៊ី។ ដូច្នេះលោកស្នើឲ្យអាជ្ញាធរខណ្ឌទាំងអស់ត្រូវខិតខំប្រឹងប្រែង ដើម្បីលុបបំបាត់អោយបាននូវក្លឹបកម្សាន្តនិងខារ៉ាអូខេទាំងនេះ។

លោកបញ្ជាក់ថា ៖យើងមិនត្រូវធ្វើតាមការណែនាំទៀតទេ គឺត្រូវតែចុះទៅបង្ក្រាបតែម្ដង ដើម្បីឈានទៅដល់ការលុបបំបាត់ឲ្យបាននូវការរីករាលដាលជំងឺកូវីដ-១៩ ពិសេសវីរុសបំលែងថ្មីប្រភេទដែលតានេះ និងដើម្បីឈានទៅបើកឡើងវិញនៅរាជធានីភ្នំពេញនិងនៅទូទាំងប្រទេស។

លោកឃួង ស្រេង ក៏បានជំរុញឲ្យអភិបាលខណ្ឌទាំងអស់មានការធ្វើល្បាតនៅក្នុងមូលដ្ឋាន ដើម្បីការពារសន្តិសុខសណ្តាប់ធ្នាប់ ជូនបងប្អូនប្រជាពលរដ្ឋ ទប់ស្កាត់បទល្មើសនិងទប់ស្កាត់បាននូវការជួបជុំការផឹកស៊ី ដែលបង្កឲ្យមានហានិភ័យខ្ពស់នៃការឆ្លងរីករាលដាលជំងឺកូវីដ-១៩ផងដែរ។

អភិបាលរាជធានី ក៏បានជំរុញឲ្យអាជ្ញាធរខណ្ឌឫស្សីកែវ ពិសេស លោកឯក ឃុនដឿន អភិបាលខណ្ឌឫស្សីកែវ ដែលត្រូវបានផ្ទេរតំណែងនៅព្រឹកមិញនេះ ត្រូវខិតខំបំពេញការងាររបស់ខ្លួនឲ្យបានល្អប្រសើរ ពិសេស ទប់ស្កាត់ឲ្យបាននូវការហូរចូលមកវិញ នូវបែរត្រី នៅតាមដងទន្លេសាប ក្រោយគណៈបញ្ជាការឯកភាពរាជធានីភ្នំពេញបានរៀបចំឲ្យមាន សណ្ដាប់ធ្នាប់ល្អប្រសើរកន្លងមកនេះ។ ក្នុងនោះត្រូវធ្វើទំនាក់ទំនងគ្នាឲ្យបានល្អប្រសើរ រវាងក្រុមប្រឹក្សានិងគណៈអភិបាល ជាមួយនិងការខិតខំធ្វើការ ដោះស្រាយទំនាស់ដីធ្លី និងទប់ស្កាត់អោយបាននូវទំនាស់ដីធ្លីដែលកើតឡើងថ្មីទៀត។
សូមជម្រាបថា លោកឯក ឃុនដឿន អភិបាលខណ្ឌទួលគោក ត្រូវបានផ្ទេរទៅកាន់តំណែងថ្មី ជាអភិបាលខណ្ឌឬស្សីកែវ។ ចំណែក លោក ជា ពិសី ដែលអភិបាលខណ្ឌឫស្សីកែវ ត្រូវបានផ្ទេរមកកាន់តំណែងជាអភិបាលខណ្ឌទួលគោកវិញ៕SRP

ភ្នំពេញ៖ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង បានប្រកាសថា ចាប់ពីពេលនេះតទៅ គេហទំព័រហ្វេសបុករបស់ខ្ញុំនឹងធ្វើការផ្សព្វផ្សាយជាបន្តបន្ទាប់នូវសមិទ្ធផលការងារកំណែទម្រង់វិមជ្ឈការ និងវិសហមជ្ឈការនៅកម្ពុជា ដែលជាយន្តការមួយមានការពាក់ព័ន្ធយ៉ាងជិតដិតបំផុតទៅនឹងជីវភាពប្រចាំថ្ងៃរបស់បងប្អូន។

សម្ដេចស ខេង បានបន្តថា ពាក់ព័ន្ធនឹងកិច្ចការនេះ ខ្ញុំសូមជម្រាបជូនបងប្អូនជនរួមជាតិថា ប្រទេសកម្ពុជាយើងក៏ធ្លាប់មានប្រព័ន្ធអភិបាលកិច្ចមូលដ្ឋានជាយូរលង់មកហើយ។ ប៉ុន្តែប្រព័ន្ធអភិបាលកិច្ចនេះ មានការប្រែប្រួលទៅតាមការផ្លាស់ប្តូររបបនយោបាយជាច្រើនលើកច្រើនសារ។ ទោះបីមានការផ្លាស់ប្តូរនូវរបបនយោបាយបែបនេះក្តី ក៏ជាទូទៅប្រព័ន្ធគ្រប់គ្រងរដ្ឋបាលសាធារណៈនៅក្នុងប្រទេសយើងនៅរក្សារបៀបគ្រប់គ្រងតាមបែបមជ្ឈការដែលបានបន្សល់ទុកតាំងពីយូរយារមកហើយ។

ក្នុងប្រវត្តិសាស្ត្រនៃការផ្លាស់ប្តូរនូវរបបនយោបាយទាំងនេះ ជាអកុសល ប្រទេសយើងក៏បានជួបនូវសោកនាដកម្មដ៏សែនឈឺចាប់ជាទីបំផុត នោះគឺសង្រ្គាមស៊ីវិលរ៉ាំរ៉ៃដែលបានអូសបន្លាយពេលវេលាជាច្រើនទសវត្សរ៍ ជាពិសេសរបបប្រល័យពូជសាសន៍ប៉ុលពតដែលបានធ្វើទារុណកម្ម និងកាប់សម្លាប់ប្រជាជនយ៉ាងរង្គាល ព្រមទាំងបានបំផ្លិចបំផ្លាញទាំងស្រុងនូវហេដ្ឋារចនាសម្ព័ន្ធសង្គមគ្រប់វិស័យ និងប្រព័ន្ធគ្រប់គ្រងរដ្ឋបាលសាធារណៈនៅគ្រប់ថ្នាក់ ព្រមទាំងធនធានមនុស្ស។ បើទោះបីជា ប្រទេសជាតិរបស់យើងត្រូវរំដោះឱ្យចាកផុតពីរបបយ៉ង់ឃ្នងនេះក៏ដោយ ក៏ប្រទេសជាតិយើងនៅតែបន្តមានសង្រ្គាមស៊ីវិលដែលអូសបន្លាយអស់រយៈពេលជាច្រើនឆ្នាំមកទៀត រហូតដល់យើងទទួលបាននូវសុខសន្តិភាពពេញលេញនាចុងឆ្នាំ១៩៩៨។

បន្ទាប់ពីទទួលបានសន្តិភាព ស្ថេរភាពនយោបាយ ឯកភាពជាតិ និងឯកភាពទឹកដីពេញលេញតាមរយៈការអនុវត្ត “នយោបាយឈ្នះ-ឈ្នះ” ដែលផ្តួចផ្តើមគំនិត និងដឹកនាំអនុវត្តដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នាចុងទសវត្សរ៍៩០ រាជរដ្ឋាភិបាលកម្ពុជាបានកំណត់ទិសដៅជាសារវន្តក្នុងការស្តារ និងអភិវឌ្ឍប្រទេសជាតិ គឺការកសាងសង្គមកម្ពុជាមួយដែលធានាដល់ការបន្តរក្សាបាននូវសន្តិភាព ស្ថេរភាពនយោបាយ សន្តិសុខ សណ្តាប់ធ្លាប់សង្គម មានការអភិវឌ្ឍប្រកបដោយចិរភាព បរិយាប័ន្ន និងសមធម៌សង្គម ឈរលើមាគ៌ានៃលទ្ធិប្រជាធិបតេយ្យ សេរីពហុបក្ស ការគោរពសិទ្ធិ និងសេចក្តីថ្លៃថ្នូររបស់មនុស្ស មានមនសិការផ្សារភ្ជាប់គ្នា មានប្រជាជនប្រកបដោយចំណេះដឹងខ្ពស់ វប្បធម៌ជ្រៅជ្រះ មានជីវភាពសមរម្យ និងមានការរស់នៅប្រកប ដោយសុខដុមរមនាក្នុងសង្គមជាតិ។

បងប្អូនជនរួមជាតិជាទីគោរព! ដើម្បីធានាដល់ការសម្រេចបាននូវទិសដៅជាសារវន្តនេះ រាជរដ្ឋាភិបាលកម្ពុជាបានដាក់ចេញនូវសកម្មភាពនយោបាយ សេដ្ឋកិច្ច និងសង្គមនានាដែលក្នុងនោះរួមមាន យុទ្ធសាស្ត្រចតុកោណតាមនីតិកាលនីមួយៗនៃរដ្ឋសភា ដោយកំណត់យកកំណែទម្រង់អភិបាលកិច្ចធ្វើជាស្នូលនៃយុទ្ធសាស្ត្រទាំងនេះ។ បន្ថែមលើនេះ ផ្អែកលើការរីកចម្រើនផ្នែកសេដ្ឋកិច្ច ភាពសម្បូរបែប បច្ចេកវិទ្យាទំនើប និងការកើនឡើងនូវតម្រូវការសង្គម រួមជាមួយនឹងចរន្តនៃតំបន់ភាវូបនីយកម្ម សកលភាវូបនីយកម្ម និងការប្រកួតប្រជែងទាំងនៅក្នុងតំបន់ និងលើឆាកអន្តរជាតិបានតម្រូវឱ្យរាជរដ្ឋាភិបាលត្រូវតែបន្តធ្វើការកែទម្រង់អភិបាលកិច្ចឱ្យបានស៊ីជម្រៅថែមទៀត ដើម្បីឆ្លើយតបយ៉ាងមានប្រសិទ្ធភាពទៅនឹងការកើនឡើងយ៉ាងឆាប់រហ័សនៃតម្រូវការសង្គម និងចរន្តតំបន់ភាវូបនីយកម្ម និងសកលភាវូបនីយកម្មទាំងនេះ។

ក្នុងន័យនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានផ្តល់នូវទស្សនទានណែនាំជាគន្លឹះថា “កំណែទម្រង់រស់ បើមិនធ្វើកំណែទម្រង់ស្លាប់” “កំណែទម្រង់គឺជាកត្តាស្លាប់រស់របស់កម្ពុជា” “កម្ពុជាគ្មានជម្រើសណាល្អប្រសើរក្រៅពីការធ្វើកំណែទម្រង់ទេ ក្នុងឱកាសដែលប្រទេសជាតិយើងកំពុងតែទទួលផលចំណេញពីសន្តិភាព និងស្ថេរភាពដែលយើងខិតខំកសាង និងការពារបានយ៉ាងលំបាក”។

ដូចខ្ញុំបានបញ្ជាក់ជូនខាងលើ កំណែទម្រង់វិមជ្ឈការ និងវិសហមជ្ឈការ គឺជាកំណែទម្រង់ដ៏មានសារៈសំខាន់មួយក្នុងចំណោមកម្មវិធីកំណែទម្រង់នានានៃប្រព័ន្ធអភិបាលកិច្ចរបស់រាជរដ្ឋាភិបាល។

ដូច្នេះតើកំណែទម្រង់វិមជ្ឈការ និងវិសហមជ្ឈការមានន័យដូចម្តេច?

តើហេតុអ្វីបានជារាជរដ្ឋាភិបាលសម្រេចចិត្តធ្វើកំណែទម្រង់នេះក្នុងប្រព័ន្ធគ្រប់គ្រងរដ្ឋបាលសាធារណៈ?

តើការអនុវត្តកំណែទម្រង់នេះបានសម្រេចលទ្ធផលអ្វីខ្លះ និងមានទិសដៅទៅអនាគតយ៉ាងដូចម្តេច?

រូបខ្ញុំផ្ទាល់ក្នុងនាមជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) និងសហការី ពិសេសលេខាធិការដ្ឋាន គ.ជ.អ.ប រីករាយក្នុងការបកស្រាយ និងជជែកពិភាក្សាជាមួយបងប្អូនជនរួមជាតិលើសំណួរទាំងនេះជាបន្តបន្ទាប់នៅក្នុងគេហទំព័រហ្វេសបុករបស់ខ្ញុំ៕SRP