អង្គភាពប្រឆាំងអំពើពុករលួយ ចាប់ខ្លួនមេរងសាខាគយ ខេត្តកោះកុង និងបក្សពួកបញ្ជូនទៅតុលាការ

អនុប្រធាន និងមន្រ្តីសាខាគយ និងរដ្ឋាករខេត្តកោះកុង ព្រមទាំងមនុស្ស៣នាក់ទៀត ត្រូវបានអង្គភាពប្រឆាំងអំពើពុករលួយ ចាប់ខ្លួន
បញ្ជូនទៅតុលាការ ដែលល្បីល្បាញ ចាប់ឡានដឹកទំនិញមិនរើស តាំងពីទំនិញមានពន្ធ ទំនិញគ្មានពន្ធ គ្រឿងអេតចាយ ត្រី សាច់ បន្លែ គ្រឿងផ្ទះដែលរុះរើ…នៅកន្លែងឈរជើងរបស់ពួកគេចំណុចអណ្តូងទឹក។

សម្រាប់ជនសង្ស័យទាំងនេះ ត្រូវបាន ACU បញ្ជូនទៅកាន់តុលាការកាលពីថ្ងៃទី១៨ ខែមីនា ឆ្នាំ២០២៦មកម្ល៉េះ តែទើបទម្លាយចេញ នៅក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព.) លើកទី៨ អាណត្តិទី៤ នាថ្ងៃទី២៥ ខែមីនា ឆ្នាំ២០២៦នេះ។

យោងតាមរបាយការណ៍របស់លោក យ៉ិនទៀង ពុទ្ធិរិទ្ធ អនុប្រធានទី១ ACU បានបញ្ជាក់ថា ជនសង្ស័យ ៤រូបរួមមាន៖

ទី១៖ ឈ្មោះ ម៉ៅ សាន់សូនា ភេទប្រុស អាយុ ៥៨ឆ្នាំ មុខរបរ អនុប្រធានសាខាគយ និងរដ្ឋាករ ខេត្តកោះកុង ជាប់សង្ស័យក្នុងអំពើរំលោភអំណាច និងសម្អាតប្រាក់

ទី២៖ ឈ្មោះ ម៉ៅ ទិត្យា ភេទប្រុស អាយុ ៥៤ឆ្នាំ មុខរបរ បុគ្គលិកជាប់កិច្ចសន្យា នៃសាខាគយ និងរដ្ឋាករ ខេត្តកោះកុង ជាប់សង្ស័យពីបទ សមគំនិតក្នុងអំពើរំលោភអំណាច និងសម្អាតប្រាក់

ទី៣៖ ឈ្មោះ ពត ស្រីនាង ភេទស្រី អាយុ ៣២ឆ្នាំ មុខរបរមេផ្ទះ ជាប់សង្ស័យពីបទ សមគំនិតក្នុងការសម្អាតប្រាក់

ទី៤៖ ឈ្មោះ ផល ដុល្លា ភេទ ប្រុស អាយុ២៧ឆ្នាំ មុខរបរបុគ្គលិកធនាគារ ជាប់សង្ស័យពីបទ សមគំនិតក្នុងការសម្អាតប្រាក់។

សូមជម្រាបថា សាខាគយនិងរដ្ឋាករខេត្តកោះកុង គឺលោក ទុំ ណូ ជាប្រធានសាខា ដែលធ្លាប់មានរឿងភាពមិនប្រក្រតីជាច្រើន កាលនៅខេត្តប៉ៃលិន និងខេត្តព្រះសីហនុ រហូតដល់ខេត្តកោះកុង។ ដូច្នេះស្នើសុំអង្គភាពប្រឆាំងអំពើពុករលួយ មេត្តាសាវជ្រាវនិងត្រួតពិនិត្យមេគយខេត្តកោះកុងឈ្មោះទុំ ណូ នេះផង៕SRP

អភិបាលខេត្តបាត់ដំបង ប្រគល់ផ្ទះមនុស្សធម៌ ១ខ្នង ជូនដល់ភរិយា និងកូនៗរបស់វីរៈកងទព័ ញ៉ែម ភារិន ដែលបានពលីជីវិតលើសមភូមិ

ខេត្តបាត់ដំបង៖ឯកឧត្តម សុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត អមដំណើរដោយ លោក លោកស្រី អនុប្រធាន សមាជិក សមាជិកាគណៈកម្មាធិការសាខា អនុសាខាស្រុកបាណន់ ក្រុមកាកបាទក្រហមសង្កាត់ អ្នកស្មគ្រ័ចិត្ត នៅរសៀលថ្ងៃនេះ បានអញ្ជើញចុះប្រគល់ផ្ទះ មនុស្សធម៌ ១ខ្នងលេខរៀងទី ២៤ ជាអំណោយរបស់ សាខាកាកបាទក្រហមកម្ពុជាខេត្ត ជូនដល់ អ្នកស្រី តាយ សារី អាយុ៣៧ឆ្នាំ ជាភរិយា និងកូនរបស់លោកពលបាលឯក ញ៉ែម ភារិន ជាវីរៈកងទ័ពដែលបានពលីជីវិតលើសមរភូមិ ព្រមទាំងសំណេះសំណាល និងផ្តល់អំណោយមនុស្សធម៌ដល់ប្រជាពលរដ្ឋងាយរងគ្រោះ មានចាច់ជរា ជនមានពិការភាព និងមានជីវភាពក្រីក្រ ចំនួន៣២គ្រួសារ ស្ថិតនៅភូមិថ្មី ឃុំកន្ទឺ១ ស្រុកបាណន់ ខេត្តបាត់ដំបង។

ចំពោះស្ថានភាពរបស់គ្រួសារវីរកងទ័ព អនុសេនីយ៍ត្រី ញ៉ែម ភារិន នៅអង្គភាពវរសេនាតូចលេខ២៤១ កងពលធំអន្តរាគមន៍លេខ២ យោធភូមិភាគទី៤ នៅទិសតាក្របី ដែលមាន ប្រពន្ធ ឈ្មោះ តាយ សារី រស់នៅផ្ទះជាមួយឪពុកម្តាយ (ទីលំនៅចំណុចចេកហាល ភូមិថ្មី ឃុំកន្ទឺ១) ពុំមានដី ផ្ទះសំបែង ដោយកន្លងមកលោកស្រី និងកូនទៅរស់នៅដោយរស់នៅជាមួយប្តីនៅបន្ទាយ(ខេត្តឧត្តរមានជ័យ)។ ក្រោមការយកចិត្តទុកដាក់របស់ ឯកឧត្តម សុខ លូ អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង ដោយមើលពីការលំបាកក្រខ្សត់ ទើប ឯកឧត្តមប្រធានសម្រេចទិញដី និងសាងសង់ ផ្ទះជូនលោកស្រី តាយ សារី និងកូនៗបានរស់នៅសមរម្យនាពេលនេះ។

ក្នុងនាមសាខាកាកបាទក្រហមកម្ពុជាខេត្ត ឯកឧត្តម សុខ លូ បានពាំនាំប្រសាសន៍ចូលរួមរំលែកមរណទុក្ខដ៏ក្រៀមក្រំបំផុត និងប្រសាសន៍ផ្តាំផ្ញើសាកសួរសុខទុក្ខរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានកាកបាទក្រហមកម្ពុជា ជូនដល់ក្រុមគ្រួសារនៃសពវីរកងទ័ព ដោយក្តីនឹករលឹក អាណិតស្រឡាញ់ចំពោះបងប្អូនប្រជាពលរដ្ឋទាំងអស់។

ឯកឧត្តម សុខ លូ បានបញ្ជាក់បន្ថែមថា ជាការតបស្នងសងគុណ រាជរដ្ឋាភិបាល រួមទាំងប្រជាជនកម្ពុជា ទាំងអស់ សូមចងចាំនូវវីរភាពដ៏អង់អាចក្លាហានរបស់ វីរកងទ័ព ដែលបានបូជាសាច់ស្រស់ឈាមស្រស់ដើម្បីការពារបូរណភាពទឹកដី ក៏ដូចជាការផ្តល់ជូនមកវិញនូវសន្តិភាពជូនជាតិ មាតុភូមិ ។ ឯកឧត្តមបានបញ្ជាក់ផងដែរថា សម្តេចធិបតី បានដាក់ចេញនូវគោលនយោបាយ និងយន្តការជាច្រើនដើម្បីជួយសម្រួលដល់ក្រុមគ្រួសាររបស់យុទ្ធជនពលីដូចជាការផ្តល់ឱ្យមុខរបរចិញ្ចឹមជីវិត ការស្រោចស្រង់សមាជិកគ្រួសារ ការផ្តល់អាហារូបករណ៍ដល់កូនៗបានសិក្សាកម្រិតបរិញ្ញាបត្រ ការរៀបចំឥណទានសារជាថ្មី ការដោះស្រាយបំណុលជូនវីរយុទ្ធជនក្នុងសមរភូមិ ថែមទាំងមានការគិតគូរបង្កើតជាមូលនិធិសម្រាប់ជួយទ្រទ្រង់ដល់ក្រុមគ្រួសារវីរយុទ្ធជនពលីទៀតផង។

បន្ថែមពីលើនេះ រាជរដ្ឋាភិបាលក៏បាននិងកំពុងជួយសម្របសម្រួលឱ្យជនភៀសសឹកបានទៅផ្ទះសំបែងវិញ ការជួយដោះស្រាយហេដ្ឋារចនាសម្ព័ន្ធ ការជួយបោសសម្អាតអាវុធ គ្រាប់ យុទ្ធភ័ណ្ឌមិនទាន់ផ្ទុះ និងការស្តារជីវភាពរស់នៅប្រចាំថ្ងៃជាដើម។

ជាកិច្ចឆ្លើយតបអ្នកស្រី តាយ សារី និងក្រុមគ្រួសារបានថ្លែងអំណរគុណយ៉ាងជ្រាលជ្រៅបំផុតចំពោះឯកឧត្តម សុខ លូ ប្រធានគណៈកម្មាធិការសាខា ជាពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានគិតគូរនិងជួយឧបត្ថម្ភជាបន្តបន្ទាប់ ជាពិសេសផ្ទះថ្មី១ខ្នង ដែលធ្វើឱ្យលោកស្រីមានទីជម្រកយ៉ាងសមរម្យបែបនេះទេ។

សូមបញ្ជាក់ថា កន្លងមកក្រុមគ្រួសារខាងលើនេះ ត្រូវបានជួយសម្រាលការលំបាកពីកាកបាទក្រហមកម្ពុជា និងសាខាកាកបាទក្រហមកម្ពុជា ខេត្តបាត់ដំបង រដ្ឋបាលខេត្ត រដ្ឋបាលស្រុក សប្បុរជន និងថ្ងៃនេះបានទទួលផ្ទះថ្មថ្មី១ខ្នងរួមជាមួយអំណោយសម្រាប់សង្កត់ផ្ទះមួយចំនួនទៀតរួមមាន ៖ អង្ករ ១០០គីឡូក្រាម, មី២កេស,ទឹកត្រី ២យួរ ទឹកស៊ីអ៊ីវ ២យួរ ត្រីខ២យួរ, ទឹកបរិសុទ្ធ២កេស និងថវិកាមួយចំនួនផងដែរ។

ដោយឡែកលោកយាយ លោកតានិងប្រជាពលរដ្ឋមានជីវភាពទីទ័លក្រ ដែលរស់នៅភូមិផងរបជាមួយចំនួន ៣២គ្រួសារក៏ទទួលបានអំណោយឧបត្ថម្ភផងដែរ ដោយមួយគ្រួសារទទួលបានអង្ករ ២៥គីឡូក្រាម, មី១កេស,ទឹកត្រី ១២យួរ ទឹកស៊ីអ៊ីវ ១យួរ ត្រីខ១យួរ, ទឹកបរិសុទ្ធ១កេសផងដែរ៕SRP

រដ្ឋមន្ត្រីក្រសួងព័ត៌មាន៖ សូមបងប្អូនប្រជាពលរដ្ឋទាំងអស់ បង្កើនការប្រុងប្រយ័ត្នខ្ពស់ មិនត្រូវជឿ មិនត្រូវចែករំលែក និងមិនត្រូវធ្វើការសន្និដ្ឋានលើព័ត៌មានណាមួយ ដែលមិនមានប្រភពច្បាស់លាស់ ឬមិនមានការបញ្ជាក់ពីស្ថាប័នផ្លូវការឡើយ

សេចក្តីអំពាវនាវរបស់រដ្ឋមន្ត្រីក្រសួងព័ត៌មាន ឯកឧត្តម នេត្រ ភក្រ្តា៖

ក្នុងបរិបទដែលបណ្តាញសង្គមជាពិសេស facebook និង tiktok ត្រូវបានប្រើប្រាស់យ៉ាងទូលំទូលាយនាពេលបច្ចុប្បន្ននិងជាមធ្យោបាយទទួលព័ត៌មានមួយយ៉ាងសំខាន់, មានក្រុម និងប្រភពព័ត៌មានមួយចំនួនដែលមានមូលដ្ឋានពីក្រៅប្រទេស កំពុងបន្តផ្សព្វផ្សាយព័ត៌មានមិនពិត ព័ត៌មានបំភ្លៃ និងព័ត៌មានបំផ្លើស ដោយមានចេតនាបង្កការភាន់ច្រឡំ បង្កភាពចលាចលក្នុងសង្គម និងប៉ះពាល់ដល់ស្ថិរភាពសាធារណៈ និងទំនុកចិត្តរបស់ប្រជាពលរដ្ឋ។

អាស្រ័យហេតុនេះ សូមបងប្អូនប្រជាពលរដ្ឋទាំងអស់ បង្កើនការប្រុងប្រយ័ត្នខ្ពស់ មិនត្រូវជឿ មិនត្រូវចែករំលែក និងមិនត្រូវធ្វើការសន្និដ្ឋានលើព័ត៌មានណាមួយ ដែលមិនមានប្រភពច្បាស់លាស់ ឬមិនមានការបញ្ជាក់ពីស្ថាប័នផ្លូវការឡើយ។

សូមបងប្អូនប្រជាពលរដ្ឋទាំងអស់ ជឿជាក់ និងតាមដានព័ត៌មានតែពីប្រភពផ្លូវការរបស់រាជរដ្ឋាភិបាល និងស្ថាប័នមានសមត្ថកិច្ច ដូចជា សេចក្តីប្រកាសផ្លូវការ ស្ថាប័នព័ត៌មានជាតិ និងប្រព័ន្ធផ្សព្វផ្សាយដែលមានវិជ្ជាជីវៈ និងគោរពតាមស្តង់ដារសារព័ត៌មាន។

ទន្ទឹមនឹងនេះ សូមបងប្អូនចូលរួមជាដៃគូក្នុងការប្រយុទ្ធប្រឆាំងព័ត៌មានក្លែងក្លាយ ដោយត្រូវពិនិត្យផ្ទៀងផ្ទាត់ព័ត៌មានមុននឹងចែករំលែក (Think Before You Share) និងរួមគ្នាការពារបរិយាកាសព័ត៌មានឱ្យមានភាពស្អាតស្អំ តម្លាភាព និងទទួលខុសត្រូវ។​ ការប្រុងប្រយ័ត្នរបស់បងប្អូន គឺជាកម្លាំងសំខាន់ក្នុងការការពារសន្តិសុខព័ត៌មាន ស្ថិរភាពសង្គម និងផលប្រយោជន៍ជាតិ។

សូមគោរពអរគុណចំពោះការចូលរួមសហការរបស់បងប្អូន៕SRP

ចាប់វៀតណាម ១០នាក់ ជាប់ពាក់ព័ន្ធ Online Scam

ភ្នំពេញ៖ក្នុងយុទ្ធនាការពង្រឹងសន្តិសុខ និងទប់ស្កាត់បទល្មើសបច្ចេកវិទ្យា កម្លាំងចម្រុះនៃគណៈបញ្ជាការឯកភាពរដ្ឋបាលរាជធានីភ្នំពេញ កាលពីថ្ងៃទី២៤ ខែមីនា ឆ្នាំ២០២៦ បានចុះប្រតិបត្តិការត្រួតពិនិត្យ និងបង្ក្រាបទីតាំងសង្ស័យពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា Online Scams មួយកន្លែង ស្ថិតនៅនៅផ្ទះលេខ១៦០ ផ្លូវលេខ៣៦៩ ភូមិអូរអណ្ដូង១ សង្កាត់ព្រែកប្រា ខណ្ឌច្បារអំពៅ បន្ទាប់ពីមានការសង្ស័យលើសកម្មភាពស្នាក់នៅរបស់ជនបរទេស។

ប្រតិបត្តិការបង្ក្រាបនេះធ្វើឡើងក្រោមការបញ្ជាពីឯកឧត្តម ឃួង ស្រេង អភិបាលរាជធានីភ្នំពេញ និងឯកឧត្តមឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ អនុវត្តន៍ផ្ទាល់ដោយកម្លាំងសមត្ថកិច្ចជំនាញ និងមានការចូលរួមពីអាជ្ញាធរខណ្ឌច្បារអំពៅ ដោយមានការសម្របសម្រួលនីតិវិធីផ្ទាល់ពី លោកស្រី ភី ស៊ីថង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។

ជាលទ្ធផល អាជ្ញាធរបានរកឃើញ និងឃាត់ខ្លួនជនជាតិវៀតណាមចំនួន ១០នាក់ (ក្នុងនោះមានលិខិតឆ្លងដែនចំនួន ០៩ក្បាល)។ ជាមួយគ្នានេះ សមត្ថកិច្ចបានដកហូតសម្ភារៈបម្រើឱ្យសកម្មភាពបទល្មើសរួមមានៈ កុំព្យូទ័រប្រភេទ All-in-one ៩គ្រឿង, ម៉ាស៊ីន CPU ៤គ្រឿង,អេក្រង់ Monitor ៣គ្រឿង និងទូរសព្ទដៃ ១០គ្រឿង។

ផ្អែកតាមការពិនិត្យជាក់ស្តែង ទីតាំងខាងលើត្រូវបានរកឃើញថាមានការពាក់ព័ន្ធនឹងការប្រព្រឹត្តបទល្មើស “កម្ចីប្រាក់ខុសច្បាប់”។ បច្ចុប្បន្ន អាជ្ញាធរបានសម្រេចបិទឃ្លុំទីតាំងនោះជាបណ្ដោះអាសន្ន ចំណែកមនុស្សទាំង ១០នាក់ រួមនិងវត្ថុតាងទាំងអស់ ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញដើម្បីបន្តការសាកសួរ និងកសាងសំណុំរឿងបញ្ជូនទៅកាន់តុលាការ តាមនីតិវិធីច្បាប់។

‎លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) សូមជម្រាបថា ការបោសសម្អាតOnline Scams នៅទូទាំងប្រទេស គិតចាប់ពីឆ្នាំ២០២៥ រហូតដល់សប្តាហ៍ទី២ ខែមីនា ឆ្នាំ២០២៦ នេះ សមត្ថកិច្ច និងអាជ្ញាធរក្នុងរាជធានី-ខេត្ត បានបង្ក្រាបដល់ទីតាំង និងបិទសៀល(មិនឱ្យមានសកម្មភាព) សរុបចំនួន ២៣៦ ទីតាំង នៅក្នុងបណ្តារាជធានី ខេត្ត ក្នុងនោះទីតាំងកាស៊ីណូ ចំនួន ៩១ ទីតាំង ទៅតាំងជាប្រភេទបុរី វីឡា ខុនដូ លំនៅឋាន ចំនួន ១៤៥ ទីតាំង។

‎តាមរបាយការណ៍របស់ក្រសួងយុត្តិធម៌ ក្នុងរយៈពេល៨ខែចុងក្រោយនេះ តុលាការកម្ពុជាបានអនុវត្តនីតិវិធីផ្លូវច្បាប់លើសំណុំរឿងពាក់ព័ន្ធនឹងការឆបោកអនឡាញ សរុបចំនួន ៧៩ សំណុំរឿង ដើម្បីផ្តន្ទាទោសមេខ្លោង និងបក្ខពួកចំនួន ៦៩៧ នាក់ ចំណោមនោះមានជនជាតិចិន វៀតណាម ឥណ្ឌូណេស៊ី ជប៉ុន កូរ៉េខាងត្បូង មីយ៉ាន់ម៉ា បង់ក្លាដេស សិង្ហបុរី នេប៉ាល់ ឥណ្ឌា ម៉ាឡេស៊ី ខ្មែរ ប៉ាគីស្ថាន ថៃ ហើយក្នុងនោះរាប់បញ្ចូលទាំងសំណុំរឿង ចេន ស៊ី, សំណុំរឿងឧកញ៉ា លី គួង និងសំណុំរឿងធំៗពាក់ព័ន្ធនឹងមេខ្លោងជាជនបរទេសផ្សេងទៀត។ តាមការកត់សម្គាល់របស់អាជ្ញាធរ ក្រុមមេខ្លោង និងអ្នកពាក់ព័ន្ធនឹងឧក្រិដ្ឋកម្មឆបោកនេះ ចំនួនប្រមាណ ជាង ២២ម៉ឺនាក់ បានគេចខ្លួនចេញពីប្រទេសកម្ពុជា ខ្លះចេញតាមផ្លូវអាកាស ខ្លះតាមផ្លូវគោក។

‎សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រី នៃព្រះរាជាណាចក្រកម្ពុជាបានប្ដេជ្ញាចិត្តបោសសម្អាតឱ្យអស់នូវបទល្មើសឆបោកតាមប្រព័ន្ធបច្ចេកវិទ្យាចេញពីកម្ពុជានៅត្រឹមខែមេសា ឆ្នាំ២០២៦។ សម្តេចធិបតីបានបញ្ជាក់ថា កម្ពុជាមិនមែនជាកន្លែងសម្រាប់ឧក្រិដ្ឋជន បច្ចេកវិទ្យាប្រើប្រាស់ក្នុងការប្រព្រឹត្តការឆបោក ឬបទល្មើសឆ្លងដែនឡើយ។ រាល់បុគ្គល ឬអង្គភាពទាំងឡាយណាដែលនៅពីក្រោយសកម្មភាព ឆបោកទាំងនេះ នឹងត្រូវប្រឈមមុខនឹងទោសទណ្ឌខ្ពស់បំផុតដោយ គ្មានការយោគយល់ ឬការអន្តរាគមន៍ណាមួយឡើយ៕SRP

ស្នងការខេត្តសៀមរាប ដឹកនាំកម្លាំងផែនជំនាញ ចុះបំពេញបែបបទផ្តល់អត្តសញ្ញាណប័ណ្ណសញ្ជាតិខ្មែរ នៅសាលាបឋមសិក្សា និងវិទ្យាល័យ ហ៊ុន សែន រុនតាឯក

ខេត្តសៀមរាប៖ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិនៅថ្ងៃពុធ ទី២៥ ខែមីនា ឆ្នាំ២០២៦ លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប បានអញ្ជើញចុះត្រួតពិនិត្យ ដឹកនាំកម្លាំងផែនជំនាញ ចុះបំពេញបែបបទផ្តល់អត្តសញ្ញាណប័ណ្ណសញ្ជាតិខ្មែរ ជូនលោកគ្រូ អ្នកគ្រូ សិស្សានុសិស្ស និងបងប្អូនប្រជាពលរដ្ឋ នៅសាលាបឋមសិក្សា និង វិទ្យាល័យ ហ៊ុន សែន រុនតាឯក ដែលស្ថិតនៅក្នុងភូមិតានី សង្កាត់រុនតាឯក ក្រុងរុនតាឯកតេជោសែន ខេត្តសៀមរាប។

សូមបញ្ជាក់ផងដែលថា ចំពោះការស្នើសុំផ្តល់អត្តសញ្ញាណបណ្ណសញ្ជាតិខ្មែរ សាមីខ្លួនត្រូវភ្ជាប់ឯកសារយោងរួមមាន៖
១-សេចក្តីចម្លងសំបុត្រកំណើត ឬសេចក្តីចម្លងសំបុត្របញ្ជាក់កំណើត។
២-សៀវភៅស្នាក់នៅ ឬសៀវភៅគ្រួសារ(បញ្ជាក់នីត្យានុកូលកម្ម) ឬលិខិតបញ្ជាក់ទីលំនៅ។
៣-ប្រជាពលរដ្ឋខ្មែរដែលកំពុងបំពេញជាបព្វជិតក្នុងព្រះពុទ្ធសាសនា ត្រូវភ្ជាប់ឯកសារបន្ថែម៖ ឆាយា ឬសង្ឃដីកា ឬសុទ្ធិបត្រ។ ករណីលាចាកសិក្ខាបទសាមីខ្លួន ត្រូវស្នើសុំប្តូរទិន្នន័យនៅលើអត្តសញ្ញាណបណ្ណសញ្ជាតិខ្មែរ រួមមានរូបថត និងអាសយដ្ឋាន។
ចំពោះប្រជាពលរដ្ឋដែលប្រើប្រាស់អត្តសញ្ញាណបណ្ណសញ្ជាតិខ្មែរអស់សុពលភាព ឬ មានសុពលភាពតិចជាង១៨០ថ្ងៃ(៦ខែ) សូមអញ្ជើញទៅបំពេញបែបបទបន្តសុពលភាពឡើងវិញ។
ដោយតម្រូវភ្ជាប់ឯកសារយោងសម្រាប់ស្នើសុំរួមមាន៖
១- អត្តសញ្ញាណបណ្ណសញ្ជាតិខ្មែរអស់សុពលភាព។
២-ករណីផ្លាស់ប្តូរអាសយដ្ឋាន សូមភ្ជាប់ឯកសារ(សៀវភៅស្នាក់នៅ ឬសៀវភៅគ្រួសារ បញ្ជាក់នីត្យានុកូលកម្ម ) ឬលិខិតបញ្ជាក់ទីលំនៅ។

ព័ត៌មានលម្អិតសូមទំនាក់ទំនងមកកាន់មន្រ្តីនគរបាលជំនាញតាមរយៈទូរស័ព្ទលេខ☎️ 078 246 501, 078 250 025, 095 880 025, 012 690 691, 078 918 918៕SRP

មន្ទីរពេទ្យជ័យវរ្ម័នទី៧ (គន្ធបុប្ផាទី៣) ទទួលបានប័ណ្ណសរសើរ ក្នុងឱកាសសន្និបាតសុខាភិបាលខេត្តសៀមរាប

ខេត្តសៀមរាប៖ក្នុងឱកាសដែលឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល អញ្ជើញជាអធិបតីក្នុង “កម្មវិធីបើកសន្និបាតបូកសរុបសមិទ្ធផលការងារសុខាភិបាលនៃរដ្ឋបាលខេត្តសៀមរាប ប្រចាំឆ្នាំ២០២៥ និងទិសដៅការងារឆ្នាំ២០២៦” ដែលបានប្រារព្ធឡើងនៅមន្ទីរពេទ្យជ័យវរ្ម័នទី៧ កាលពីថ្ងៃទី២៣ ខែមីនា ឆ្នាំ២០២៦។

ឯកឧត្តមរដ្ឋមន្ត្រី បានបំពាក់មេដាយជូនមន្ត្រីរាជការ និងបុគ្គលិកដែលមានស្នាដៃល្អ និងបានចូលនិវត្តន៍សរុបចំនួន ២២រូប ព្រមទាំងបានប្រគល់ប័ណ្ណសរសើរ ជូនថ្នាក់ដឹកនាំ និងបុគ្គលិកមន្ទីរពេទ្យជ័យវរ្ម័នទី៧ ដែលបានខិតខំបំពេញភារកិច្ចដោយភាពអត់ធ្មត់ តស៊ូ និងលះបង់កម្លាំងកាយចិត្ត ក្នុងការសង្គ្រោះ ព្យាបាល និងថែទាំសុខភាពកុមារ និងប្រជាពលរដ្ឋ ជាពិសេសក្រុមគ្រួសារវីរៈកងទ័ព និងប្រជាជននៅតំបន់ព្រំដែនកម្ពុជា–ថៃ ទាំងនាពេលកន្លងមក និងបច្ចុប្បន្ន។

ក្នុងឱកាសនេះដែរ លោកសាស្ត្រាចារ្យ យ៉ៃ ចន្ទនា ប្រធានមន្ទីរពេទ្យ បានធ្វើរបាយការណ៍ជម្រាបជូនឯកឧត្តមរដ្ឋមន្ត្រី អំពីវឌ្ឍនភាព និងសកម្មភាពសុខាភិបាលសំខាន់ៗ ដែលមន្ទីរពេទ្យបានអនុវត្តន៍ក្នុងរយៈពេលកន្លងមក ដោយគូសបញ្ជាក់ពីការផ្តល់សេវាសុខាភិបាលចាប់ពីឆ្នាំ១៩៩៩ ដល់ឆ្នាំ២០២៥ រួមមានសេវាពិគ្រោះជំងឺក្រៅ សេវាជំងឺសម្រាកព្យាបាល ការព្យាបាលជំងឺធ្ងន់ៗ ដូចជា មហារីក ទឹកនោមផ្អែម ជំងឺបេះដូង និងប្រព័ន្ធប្រសាទ ការវះកាត់ទំនើប ព្រមទាំងសេវាសម្ភពទាំងការសម្រាលធម្មជាតិ និងការវះកាត់។

លោកសាស្ត្រាចារ្យប្រធានមន្ទីរពេទ្យ បានបន្ថែមថា មន្ទីរពេទ្យកំពុងបន្តពង្រីកសមត្ថភាព ដោយសាងសង់អគារថ្មីមានក្រឡាផ្ទៃ ១៨ x ២៤.៥ ម៉ែត្រ កម្ពស់ ២ជាន់ ដែលនឹងបន្ថែមគ្រែចំនួន ៧០គ្រែ សម្រាប់បម្រើសេវាសង្គ្រោះបន្ទាន់ផ្នែកសម្ភព និងទារក ដើម្បីឆ្លើយតបទៅនឹងតម្រូវការកើនឡើង ខណៈអត្រាប្រើប្រាស់គ្រែបានឈានដល់ ១៣៨% ក្នុងឆ្នាំ២០២៥។

បច្ចុប្បន្នមន្ទីរពេទ្យជ័យវរ្ម័នទី៧ បានពង្រីកសេវាព្យាបាលជំងឺដុំមហារីក មហារីកគ្រាប់ឈាម មានគ្រែសម្រាប់សម្រាកព្យាបាលចំនួន២៦គ្រែ
សេវារោគវិនិច្ឆ័យ និង ព្យាបាលប្រព័ន្ធប្រសាទតាមរយៈម៉ាស៊ីន Angiography សេវាព្យាបាលផ្នែក ខ្សោយតម្រងនោមតាមរយៈ លាងស្រោមភ្នាសពោះវៀន peritoneal dialysis (PD) និង Hemofiltration និង ផ្នែកសង្រ្គោះបន្ទាន់ទារកទើបកើត មានការអភិវឌ្ឍន៍លើបច្ចេកទេសព្យាបាលដូចជា៖ ក្រុមគ្រូពេទ្យឯកទេសទារក នៅប្រចាំការសង្គ្រោះបន្ទាន់ ព្យាបាល និងតាមដាន២៤ម៉ោងលើ២៤ម៉ោង, ការរក្សាកម្តៅទារកក្នុងប្រអប់ Incubator និង Radiant warmer, ជំនួយក្នុងការធ្ចើរោគវិនិច្ឆ័យដោយម៉ាស៊ីន Ultrasound និង Xray, MRI ជំនួយដង្ហើមទារកដោយម៉ាស៊ីន CPAP និង Mechanical ventilation, ការតាមដានសញ្ញាជីវិត Cardiopulmonary monitoring, និងបច្ចេកទេសព្យាបាលខ្ពស់បំផុត ដោយការចាក់សរសៃទងផ្ចិត (UVC), ការចាក់សរសៃជ្រៅដល់បេះដូង (PICC), ការផ្តល់អាហាររូបត្ថម្ភបន្ថែមតាមសរសៃ (Parenteral nutrition) និងការផ្តល់ថ្នាំ សំរាប់ជួយសួតទារកមិនគ្រប់ខែ Surfactant តាមបចេ្ចកទេស។

ក្នុងឱកាសដ៏មានអត្ថន័យនេះ ថ្នាក់ដឹកនាំ និងបុគ្គលិកទាំងអស់នៃមន្ទីរពេទ្យជ័យវរ្ម័នទី៧ បានសម្តែងនូវការគោរពថ្លែងអំណរគុណយ៉ាងជ្រាលជ្រៅ ចំពោះឯកឧត្តមរដ្ឋមន្ត្រី ដែលបានយកចិត្តទុកដាក់ លើកទឹកចិត្ត និងផ្តល់កិត្តិយសជាប័ណ្ណសរសើរ ដែលជាកម្លាំងចិត្តដ៏មានតម្លៃសម្រាប់បន្តបេសកកម្មសុខាភិបាល។

មន្ទីរពេទ្យជ័យវរ្ម័នទី៧ បន្តប្តេជ្ញាផ្តល់សេវាសុខាភិបាលដោយឥតគិតថ្លៃ សម្រាប់កុមារ និងប្រជាពលរដ្ឋគ្រប់រូប ដោយគ្មានការរើសអើង ព្រមទាំងបន្តអភិវឌ្ឍគុណភាពសេវា ប្រកបដោយវិជ្ជាជីវៈ ក្រមសីលធម៌ និងមនុស្សធម៌ ដើម្បីរួមចំណែកលើកកម្ពស់សុខុមាលភាពប្រជាពលរដ្ឋកម្ពុជា ឲ្យកាន់តែប្រសើរឡើង៕SRP

ស្នងការខេត្តសៀមរាបដឹកនាំកិច្ចប្រជុំបូកសរុបលទ្ធផលកិច្ចប្រតិបត្តិការ រក្សាសន្តិសុខ សណ្ដាប់ធ្នាប់ប្រចាំខែមីនា ឆ្នាំ២០២៦ និងលើកទិសដៅការងារបន្ត ព្រមទាំងផ្សព្វផ្សាយផែនការ ការពារពិធីបុណ្យចូលឆ្នាំថ្មី ប្រពៃណីជាតិខ្មែរ

ខេត្តសៀមរាប៖លោកឧត្ដមសេនីយ៍ទោ ហួត សុធី ស្នងការនគរបាលខេត្ដសៀមរាប បានអញ្ជើញដឹកនាំកិច្ចប្រជុំបូកសរុបលទ្ធផលកិច្ចប្រតិបត្តិការ រក្សាសន្តិសុខ សណ្ដាប់ធ្នាប់សាធារណៈ សុវត្ថិភាពសង្គម ប្រចាំខែមីនា ឆ្នាំ២០២៦ និងលើកទិសដៅការងារបន្ត ព្រមទាំងផ្សព្វផ្សាយផែនការ ការពារពិធីបុណ្យចូលឆ្នាំថ្មី ប្រពៃណីជាតិខ្មែរ របស់ស្នងការដ្ឋាននគរបាលខេត្តសៀមរាប។

ពិធីនៅសាលប្រជុំស្នងការដ្ឋាននគរបាលខេត្ត នាព្រឹកថ្ងៃអង្គារ ទី២៤ ខែមីនា ឆ្នាំ២០២៦ ដោយបានការអញ្ជើញចូលរួមពី អង្គភាពនគរបាលការពារបេតិកភណ្ឌ អង្គភាពនគរបាលទេសចរណ៍ លោក-លោកស្រីស្នងការរងទាំងអស់ លោកនាយការិយាល័យទាំង៣៣ លោកអធិការនគរបាលក្រុង-ស្រុកទាំង១៣ ប្រធានមជ្ឈមណ្ឌលស្តារនីតិសម្បទា អ្នកញៀនគ្រឿងញៀន លោកនាយប៉ុស្តិ៍នគរបាលរដ្ឋបាលទាំង១០០ និងលោកនាយប៉ុស្តិ៍គោលដៅការពារបេតិកភណ្ឌទាំង ៦ ដោយអនុវត្តតាមការចង្អុលដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ។

ក្នុងឱកាសនោះដែរ លោកឧត្តមសេនីយ៍ត្រី ណុប សារ៉ាក់ ស្នងការរង ទទួលផែនការងារសេនាធិការ បានឡើងអានរបាយការណ៍ លទ្ធផលកិច្ចប្រតិបត្តិការរក្សាសន្តិសុខ សណ្ដាប់ធ្នាប់សាធារណៈ នាពេលកន្លងមក និងលើកឡើងពីបញ្ហាប្រឈមនានា ដើម្បីរកដំណោះស្រាយក្នុងការអនុវត្តឲ្យមានប្រសិទ្ធភាព។ ជាកិច្ចបន្តក្នុងកិច្ចប្រជុំនោះផងដែរ លោកឧត្តមសេនីយ៍ត្រី អៀង មករា ស្នងការរងទទួលផែនការងារធនធានមនុស្ស បានឡើងរាយការណ៍ស្តីពីការចុះត្រួតពិនិត្យកម្លាំង បញ្ជីវត្តមាន ឯកសណ្ឋាន និងពង្រឹងបទវិន័យនគរបាលជាតិកម្ពុជា នៅតាមបណ្តាអធិការដ្ឋាននគរបាលក្រុង-ស្រុក និងប៉ុស្តិ៍នគរបាលរដ្ឋបាលចំណុះ។

ថ្លែងក្នុងឱកាសនោះដែរ លោកឧត្តមសេនីយ៍ទោ ហួត សុធី ស្នងការនគរបាលខេត្ត បានមានប្រសាសន៍លើកសរសើរពីលទ្ធផល ក្នុងការខិតខំប្រឹងប្រែងអនុវត្តតួនាទីភារកិច្ច ក្នុងកិច្ចប្រតិបត្តិការ រក្សាសន្តិសុខ សណ្ដាប់ធ្នាប់សាធារណៈ នាពេលកន្លងមក និងបានផ្តល់នូវបទពិសោធន៍ល្អៗ រួមទាំងយុទ្ធសាស្រ្តក្នុងការអនុវត្តតួនាទីភារកិច្ចប្រចាំថ្ងៃ ដើម្បីយកទៅអនុវត្តឲ្យកាន់តែមានប្រសិទ្ធភាពបន្ថែមទៀត។ បន្ថែមលើនោះផងដែរ លោកឧត្តមសេនីយ៍ទោ ស្នងការ ក៏បានណែនាំបន្ថែម និងដាក់ចេញនូវផែនការ ការពាររក្សាសន្តិសុខ សុវត្ថិភាព សណ្តាប់ធ្នាប់សាធារណៈ នាឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងគ្រោងរៀបចំព្រឹត្តិការណ៍ “សៀមរាបសង្រ្កាន្ត” ឆ្នាំ២០២៦ នាពេលខាងមុខនេះ ដោយត្រូវបន្តជំរុញការអនុវត្តន៍គោលនយោបាយ ភូមិ ឃុំ-សង្កាត់មានសុវត្ថិភាព រួមទាំងការផ្តល់សេវាសាធារណៈជូនប្រជាពលរដ្ឋធ្វើយ៉ាងណាឲ្យមានប្រសិទ្ធភាព និងឆាប់រហ័ស និងជាពិសេសផងដែលត្រូវយកចិត្តទុកដាក់គ្រប់គ្រងឱ្យបានហ្មត់ចត់នូវមុខសញ្ញាប្រព្រឹត្តបទល្មើសព្រហ្មទណ្ឌ ក្មេងទំនើង រួមទាំងបទល្មើសផ្សេងៗទៀត សំដៅចាត់វិធានការបង្ការ ទប់ស្កាត់ និងបង្ក្រាប ឱ្យមានប្រសិទ្ធភាពខ្ពស់៕SRP

បង្ក្រាបបទល្មើស Online Scams ឃាត់ខ្លួនជនសង្ស័យចំនួន៥០នាក់

ខេត្តព្រះសីហនុ៖ក្រុមការងារចម្រុះ នៃរដ្ឋបាលខេត្តព្រះសីហនុ កាលពីថ្ងៃទី២៣ ខែមីនា ឆ្នាំ២០២៦ បានបន្តយុទ្ធនាការយ៉ាងសកម្មក្នុងការអនុវត្តអនុក្រឹត្យលេខ០៣ និងការត្រួតពិនិត្យបទល្មើសឆបោកតាមប្រព័ន្ធបច្ចេកវិទ្យា Online Scams ដោយបានចុះត្រួតពិនិត្យទីតាំងស្នាក់នៅប្រមូលផ្តុំចំនួន ២៦ទីតាំង និងឈានទៅបង្ក្រាបបានចំនួន ៤ទីតាំងជាក់ស្តែង។ រដ្ឋបាលខេត្តព្រះសីហនុ បានឱ្យដឹងថា ទីតាំងទាំង៤កន្លែង ដែលសមត្ថកិច្ចចុះបង្ក្រាបនោះ រួមមានៈ សណ្ឋាគារ ជីនសា ហូលីដេ , វីឡាភូមិគ្រឹះ , អគារខុនដូរ ស៊ែង យូរ និង ផ្ទះជួល នៅសង្កាត់៤។

ជាលទ្ធផលសមត្ថកិច្ចបានឃាត់ខ្លួន ជនសង្ស័យសរុបចំនួន ៥០ នាក់ ក្នុងនោះមានជនជាតិចិនចំនួន៣៦, ជនជាតិខ្មែរចំនួន ៣ នាក់ (ស្រី្ត ១ នាក់), ជនជាតិឥណ្ឌា ចំនួន ៥ នាក់ (ក្នុងនោះ ស្រី្ត ២ នាក់), ជនជាតិបង់ក្លាដេស ចំនួន ៣ នាក់, ជនជាតិប៉ាគីស្ថាន ចំនួន ២ នាក់ និងស្រ្តីជនជាតិភូមា ចំនួន ១ នាក់ រួមទាំងបានដកហូតវត្ថុតាង មានដូចជាកុំព្យូទ័រលើតុ ទូរសព្ទដៃ និងកុំព្យូទ័រយួរដៃមួយចំនួន។

ក្រៅពីការបង្ក្រាបទីតាំងទាំង៤ខាងលើ ក្រុមការងារបានចុះត្រួតពិនិត្យនៅកាស៊ីណូ ហ្គោលដិន ដែលមានទីតាំងស្ថិតនៅភូមិ១ សង្កាត់លេខ១ ក្រុងព្រះសីហនុ ផងដែរ ដោយរកឃើញសម្ភារៈសង្ស័យពាក់ព័ន្ធនឹងការធ្វើ សកម្មភាពឆបោកតាមអនឡាញរួមមាន កុំព្យូទ័រលើតុចំនួន ១៨៦ គ្រឿង និងទូរសព្ទដៃចំនួន ១៥៤ គ្រឿង។
បច្ចុប្បន្នជនសង្ស័យ និងវត្ថុតាងខាងលើនេះ ត្រូវបានប្រគល់ជូនសមត្ថកិច្ចជំនាញនៃស្នងការដ្ឋាននគរបាលខេត្តព្រះសីហនុដើម្បីអនុវត្តតាមនីតិវិធីច្បាប់ និងឈានទៅកំណត់មុខសញ្ញាមេខ្លោងពាក់ព័ន្ធជាបន្តទៀត។

លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) សូមជម្រាបជូនថា ការបោសសម្អាតOnline Scams នៅទួទាំងប្រទេស គិតចាប់ពីឆ្នាំ២០២៥ រហូតដល់សប្តាហ៍ទី២ ខែមីនា ឆ្នាំ២០២៦ នេះ សមត្ថកិច្ច និងអាជ្ញាធរក្នុងរាជធានី-ខេត្ត បានបង្ក្រាបដល់ទីតាំង និងបិទសៀល(មិនឱ្យមានសកម្មភាព) សរុបចំនួន ២៣៦ ទីតាំង នៅក្នុងបណ្តារាជធានី ខេត្ត ក្នុងនោះទីតាំងកាស៊ីណូ ចំនួន ៩១ ទីតាំង ទៅតាំងជាប្រភេទបុរី វីឡា ខុនដូ លំនៅឋាន ចំនួន ១៤៥ ទីតាំង។

តាមរបាយការណ៍របស់ក្រសួងយុត្តិធម៌ ក្នុងរយៈពេល៨ខែចុងក្រោយនេះ តុលាការកម្ពុជាបានអនុវត្តនីតិវិធីផ្លូវច្បាប់លើសំណុំរឿងពាក់ព័ន្ធនឹងការឆបោកអនឡាញ សរុបចំនួន ៧៩ សំណុំរឿង ដើម្បីផ្តន្ទាទោសមេខ្លោង និងបក្ខពួកចំនួន ៦៩៧ នាក់ ចំណោមនោះមានជនជាតិចិន វៀតណាម ឥណ្ឌូនេស៊ី ជប៉ុន កូរ៉េខាងត្បូង មីយ៉ាន់ម៉ា បង់ក្លាដេស សិង្ហបុរី នេប៉ាល់ ឥណ្ឌា ម៉ាឡេស៊ី ខ្មែរ ប៉ាគីស្ថាន ថៃ ហើយក្នុងនោះរាប់បញ្ចូលទាំងសំណុំរឿង ចេន ស៊ី , សំណុំរឿងឧកញ៉ា លី គួង និងសំណុំរឿងធំៗពាក់ព័ន្ធនឹងមេខ្លោងជាជនបរទេសផ្សេងទៀត។

សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រី នៃព្រះរាជាណាចក្រកម្ពុជាបានប្ដេជ្ញាចិត្តបោសសម្អាតឱ្យអស់នូវបទល្មើសឆបោកតាមប្រព័ន្ធបច្ចេកវិទ្យាចេញពីកម្ពុជានៅត្រឹមខែមេសា ឆ្នាំ២០២៦។ សម្តេចធិបតីបានបញ្ជាក់ថា កម្ពុជាមិនមែនជាកន្លែងសម្រាប់ឧក្រិដ្ឋជន បច្ចេកវិទ្យាប្រើប្រាស់ក្នុងការប្រព្រឹត្តការឆបោក ឬបទល្មើសឆ្លងដែនឡើយ។ រាល់បុគ្គល ឬអង្គភាពទាំងឡាយណាដែលនៅពីក្រោយសកម្មភាព ឆបោកទាំងនេះ នឹងត្រូវប្រឈមមុខនឹងទោសទណ្ឌខ្ពស់បំផុតដោយ គ្មានការយោគយល់ ឬការអន្តរាគមន៍ណាមួយឡើយ៕SRP

ផ្អាកការងារបណ្តោះអាសន្ន នាយ​ប៉ុស្តិ៍​រដ្ឋបាលព្រៃជ្រូក

ខេត្តសៀមរាប៖នៅទីបំផុតនាយ​ប៉ុស្តិ៍​រដ្ឋបាលព្រៃជ្រូក ត្រូវបានផ្អាកការងារបណ្តោះអាសន្ន តាមរយៈលិខិតបង្គាប់ការរបស់លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប នៅថ្ងៃទី 24 ខែមីនា ឆ្នាំ 2026 នេះ។

នៅក្នុងលិខិតបង្គាប់ការរបស់ស្នងការនគរបាលខេត្តសៀមរាបបានបញ្ជាក់ថា

សម្រេច ប្រការ១: ត្រូវបានអនុវត្តវិន័យចំពោះលោកវរសេនីយ៍ត្រី គិន នឿង អត្តលេខៈ២៩៩៥៥ ឋានៈនាយប៉ុស្តិ៍ នគរបាលរដ្ឋបាលព្រៃជ្រូក នៃអធិការដ្ឋាននគរបាលស្រុកពួក ដោយរូបភាពផ្អាកការងារបណ្តោះអាសន្ន និងមកបង្ហាញមុខនៅអធិការដ្ឋាននគរបាលស្រុកពួក ចាប់ពីថ្ងៃចុះហត្ថលេខានេះតទៅ។ – មូលហេតុ៖ ល្មើសបទវិន័យកងកម្លាំងនគរបាលជាតិកម្ពុជា។

ប្រការ២: លោកស្នងការរង ទទួលផែនការងារធនធានមនុស្ស, លោកស្នងការរង ទទួលផែនការងារសេនាធិការ, លោកនាយការិយាល័យបុគ្គលិក, លោកអធិការនគរបាលស្រុកពួក អង្គភាពពាក់ព័ន្ធនិងសាមីខ្លួន ត្រូវអនុវត្តតាមលិខិតបង្គាប់ការនេះចាប់ពីថ្ងៃចុះហត្ថលេខាតទៅ។

សូមជម្រាបថា លោក គិន នឿង នាយប៉ុស្តិ៍នគរបាលឃុំព្រៃជ្រូក ស្រុកពួកខេត្តសៀមរាប បានរងការរិះគន់ថា បានដោះលែងមេល្បែងស៊ីសងអាប៉ោង ម្នាក់ ដោយមិនខ្លាចញញឹមនិងផ្គើននឹងថ្នាក់លើ។

ការដោះលែងនេះបន្ទាប់ពីអាជ្ញាធរស្រុកពួក បានធ្វើការចុះបង្ក្រាបវង់ល្បែងអាប៉ោងកាលពីថ្មីៗនេះ។ នេះបើតាមការចុះផ្សាយរបស់គេហទំព័រសៀមរាប ប៉ុស្តិ៍។

យោងតាមប្រភពបានរាយការណ៍ថា អភិបាលរងស្រុកពួក ចុះបង្ក្រាបល្បែងស៊ីសង ដែលមានឈ្មោះ សៀង ជាមេខ្លោង សរុបមានគ្នា ចំនួន ៧នាក់ ប្រគល់ឱ្យប៉ុស្តិ៍នគរបាលឃុំព្រៃជ្រូក ដើម្បីអនុវត្តតាមនីតិវិធី ប៉ុន្តែក្រោយមកបាត់ឈ្មោះ សៀង ដែលជាមេខ្លោងនៅសល់តែមនុស្ស៦នាក់ប៉ុណ្ណោះ។

បើតាមប្រភព ករណីនេះ នគរបាលឃុំព្រៃជ្រូក ជាពិសេស លោក គិន នឿង នាយប៉ុស្តិ៍នគរបាលព្រៃជ្រូក អាចមានចេតនា ដោះលែងមេការអាប៉ោង ឈ្មោះ សៀង ឲ្យរត់គេចខ្លួន មុនបញ្ជូនទៅអធិការ។

ជុំវិញករណីនេះ អភិបាលស្រុកពួក លោកស៊ិន ចាន់ថុល បានប្រាប់សារព័ត៌មានសៀមរាប ប៉ុស្តិ៍ ថា កាលពី ខែកុម្ភៈ ឆ្នាំ ២០២៦ លោកបានចាត់ឱ្យអភិបាលរងស្រុកម្នាក់ ចុះទៅបង្ក្រាប ហើយបានយកមកធ្វើការអប់រំនៅប៉ុស្តិ៍នគរបាលឃុំព្រៃជ្រូក ក៏ប៉ុន្តែពួកគេមិនរាងចាល នៅតែលេងបន្តទៀត ហើយនៅប៉ុន្មានថ្ងៃមុននោះ លោកបានចុះទៅបង្ក្រាបផ្ទាល់ ក៏ប៉ុន្តែអ្នកមើលផ្លូវឲ្យក្រុមលេងល្បែង ស្គាល់ឡានរបស់លោក ក៏រាយការណ៍ដល់លេងល្បែងរត់គេចអស់ ហើយយប់លោកក៏បានចាត់ឲ្យបានរងស្រុក ចុះទៅម្ដងទៀតនៅពេលយប់ ក៏ចាប់បាន ៧នាក់ ប្រគល់ឲ្យទៅប៉ុស្តិ៍ឃុំព្រៃជ្រូកតែម្ដង។

បើតាមអភិបាលស្រុកពួក ករណីនេះខ្ញុំបានចាត់អភិបាលរង ឲ្យទៅបង្រ្កាបក្រោយទទួលសេចក្តីរាយការណ៍ពីភូមិមក ក្រោយពីចាប់បានប្រគល់ទៅឲ្យប៉ុស្តិ៍ ស្រាប់តែបាត់មេអាប៉ោង ! គឺមេល្បែង។

ជាមួយគ្នានេះដែរ លោកឧត្តមសេនីយ៍ទោហួត សុធី ស្នងការនគរបាលខេត្តសៀមរាប ក៏បានបញ្ជាក់ផងដែរថា ចំពោះករណីនេះ លោកទទួលបានព័ត៌មានហើយ ឯរឿងយកលុយនោះ កំពុងស្រាវជ្រាវ មិនដឹងពិតឬអត់។

សូមជម្រាបថា បង្ក្រាបល្បែងស៊ីសងនេះ គឺបង្ក្រាបដោយអាជ្ញាធរស្រុកពួក មិនមែន លោក គិន នឿង មេប៉ុស្តិ៍ឃុំព្រៃជ្រូកចុះបង្ក្រាបនោះទេ ព្រោះកាលណាប្រាប់អាចបែកការណ៍។ ជាមួយគ្នាដែរ លោក គិន នឿងមេប៉ុស្តិ៍ព្រៃជ្រូកមានរឿងមិនប្រក្រតីជាច្រើន ក្នុងការដឹកនាំប៉ុស្តិ៍នគរបាលរដ្ឋបាលឃុំព្រៃជ្រូក។

ពាក់ព័ន្ធទៅនឹងករណីនេះ ទីភ្នាក់ងារសារព័ត៌មានសៀមរាប ប៉ុស្តិ៍ មិនទាន់ទទួលបានការបំភ្លឺពីប៉ុស្តិ៍នគរបាលឃុំព្រៃជ្រូកនៅឡើយទេរហូតដល់ម៉ោងផ្សាយនេះ៕SRP

ឯកឧត្តម អ្នកឧកញ៉ាបណ្ឌិត សៀង ណាំ និងលោកជំទាវ ផ្ដល់អំណោយរថយន្តពន្លត់អគ្គិភ័យ ចំនួន ០២គ្រឿង ជូនដល់ស្នងការដ្ឋាននគរបាលខេត្តសៀមរាប

ខេត្តសៀមរាប៖រថយន្តពន្លត់អគ្គិភ័យ ចំនួន ០២គ្រឿង
ជាអំណោយដ៏ថ្លៃថ្លារបស់ ឯកឧត្តម អ្នកឧកញ៉ាបណ្ឌិត សៀង ណាំ អ្នកតំណាងរាស្រ្តមណ្ឌលសៀមរាប និងលោកជំទាវ បានផ្តល់ជូនដល់ស្នងការដ្ឋាននគរបាលខេត្តសៀមរាប ដើម្បីបំពេញតម្រូវការក្នុងការប្រើប្រាស់នៅក្នុងអង្គភាព។

ពិធីប្រគល់ទទួលរថយន្តពន្លត់អគ្គិភ័យ ចំនួន ០២គ្រឿង ជូនដល់ស្នងការដ្ឋាននគរបាលខេត្តសៀមរាប នៅព្រឹកថ្ងៃអង្គារ ទី២៤ ខែមីនា ឆ្នាំ២០២៦ ដោយអនុវត្តតាមការណែនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ។

លោកឧត្ដមសេនីយ៍ទោ ហួត សុធី ស្នងការ ក្នុងនាមថ្នាក់ដឹកនាំ និងមន្ដ្រីនគរបាលជាតិ នៃស្នងការដ្ឋាននគរបាលខេត្តសៀមរាបទាំងអស់ សូមគោរពជូនពរ ឯកឧត្តម អ្នកឧកញ៉ាបណ្ឌិត សៀង ណាំ អ្នកតំណាងរាស្រ្តមណ្ឌលសៀមរាប និងលោកជំទាវ ព្រមទាំងក្រុមគ្រួសារជាទីស្រលាញ់ សូមប្រកបដោយ សុខភាពល្អបរិបូរណ៍ កម្លាំងពលំមាំមួន បញ្ញាញាណភ្លឺថ្លា ជន្មាយុយឺនយូរ សេចក្តីសុខ សេចក្ដីចម្រើន ទទួលបាននូវភាពជោគជ័យគ្រប់ភារកិច្ចការងារ និងជួបប្រទះតែនឹងពុទ្ធពរទាំងបួន ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕SRP

អ្នកទេសចរបានជាង៧ម៉ឺននាក់ មកកាន់ខេត្តសៀមរាប ក្នុងព្រឹត្ដិការណ៍ “សមរាត្រី”

រយៈពេល៣ថ្ងៃ ចាប់ពីថ្ងៃទី២១ ដល់ទី២៣ ខែមីនា ឆ្នាំ២០២៦ នៃព្រឹត្តិការណ៍សមរាត្រី ឬថ្ងៃរះចំកំពូលប្រាសាទអង្គរវត្ត ទាក់ទាញអ្នកទេសចរបានជាង ៧៦ ០០០នាក់ ខណៈភ្ញៀវទេសចរអន្តរជាតិមានប្រមាណជាង ៦ ៥០០នាក់ ដោយភ្ញៀវទេសចរបានបង្ហាញក្ដីរំភើប ដែលបានមកទស្សនាដោយផ្ទាល់ នូវព្រឹត្តិការណ៍ដ៏អស្ចារ្យ ដែលលើសពីការរំពឹងទុក។

អ្នកទេសចរដែលបានមកទស្សនាព្រឹត្តិការណ៍ ពួកគាត់មានភាពភ្ញាក់ផ្អើលចំពោះព្រឹត្តិការណ៍ដ៏អស្ចារ្យនេះ ហើយវាជាលើកទី១ សម្រាប់ពួកគាត់ដែលបានមកទស្សនាផ្ទាល់បែបនេះ។ ពួកគាត់បានចូលមកទស្សនាថ្ងៃរះនេះចាប់ពីម៉ោង៣ទៀបភ្លឺ ហើយបានឃើញភាពស្រស់ស្អាតនៃថ្ងៃរះនៅលើកំពូលប្រាសាទអង្គរវត្ត ឆ្លុះជាមួយស្រះទឹកបញ្ចេញពន្លឺព័ណ៌មាសស្របពេលមានទេសភាពសម្រស់ខៀវខ្ចីនៃរុក្ខជាតិស្មៅក្នុងបរិវេណអង្គរ។ ពួកគាត់ថា វាពិតជាមិនខកបំណងឡើយ ដែលពួកគាត់បានចំណាយពេលដើម្បីមករង់ចាំទស្សនាថ្ងៃរះនៅប្រាសាទអង្គរវត្ត។

សូមបញ្ជាក់ថា ព្រឹត្ដិការណ៍ថ្ងៃរះចំកណ្ដាលប្រាសាទអង្គរ ឬហៅថា សមរាត្រី (Equinox) កើតឡើងចំនួន២ដង ជារៀងរាល់ឆ្នាំ គឺសមរាត្រីរដូវប្រាំង កើតឡើងនៅថ្ងៃទី២១ ខែមីនា និងសមរាត្រីរដូវវស្សា កើតឡើងនៅថ្ងៃទី២២ ខែកញ្ញា ដែលបានទាក់ទាញអារម្មណ៍ភ្ញៀវទេសចរជាតិ និង អន្តរជាតិ មកទស្សនាដោយផ្ទាល់ កាន់តែកើនឡើងពីមួយឆ្នាំទៅមួយឆ្នាំ៕SRP

អត្ថបទ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ

ស្នងការនគរបាលខេត្តសៀមរាប៖ ត្រីមាសទី១ ឆ្នាំ២០២៦ បទល្មើសព្រហ្មទណ្ឌមានការថយចុះ បើធៀបនឹងរយៈពេលដូចគ្នាក្នុងឆ្នាំ២០២៥

តាមរបាយការណ៍របស់លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប ក្នុងកិច្ចប្រជុំត្រួតពិនិត្យការងារអនុវត្តគោលនយោបាយ “ភូមិឃុំ សង្កាត់ មានសុវត្ថិភាព” ប្រចាំត្រីមាសទី១ ឆ្នាំ២០២៦ នៅថ្ងៃទី២៣ ខែមីនា ឆ្នាំ២០២៦ បានបង្ហាញថា គិតត្រឹមត្រីមាសទី១ ឆ្នាំ២០២៦ នេះ ខេត្តសៀមរាបមានបទល្មើសព្រហ្មទណ្ឌកើតឡើង ១៩ករណី ថយចុះ៤ករណី បើប្រៀបធៀបនឹងរយៈពេលដូចគ្នាក្នុងឆ្នាំ២០២៥ ខណៈបទល្មើសគ្រឿងញៀន សមត្ថកិច្ចបង្ក្រាបបាន ៨១ករណី ថយចុះ ៥ករណី និងឃាត់ខ្លួនមនុស្សបានចំនួន ៤៦០នាក់។

លោកឧត្តមសេនីយ៍ទោ ហួត សុធី ក៏បានឱ្យដឹងថា ដើម្បីពង្រឹងសន្តិសុខជូនប្រជាពលរដ្ឋ និងភ្ញៀវទេសចរ ស្នងការដ្ឋាននគរបាលខេត្ត បានបំពាក់កាមេរ៉ាសុវត្ថិភាពសរុបចំនួន ១២៤ គ្រឿង នៅតាមបណ្តាក្រុងស្រុកទាំង១៣ ហើយក្រោមជំនួយរបស់ JICA តំបន់ដែលមានមនុស្សអ៊ូអរដូចជា Pub Street ត្រូវបានបំពាក់ដោយ AI Camera និងប៊ូតុងសញ្ញាសុវត្ថិភាពដើម្បីឆ្លើយតបចំពោះហេតុការណ៍បន្ទាន់បានទាន់ពេលវេលា។ ក្រៅពីការពង្រឹងសន្តិសុខជូនប្រជាពលរដ្ឋតាមប្រព័ន្ធបច្ចេកវិទ្យា ស្នងការដ្ឋាននគរបាលខេត្តក៏បានបង្ក្រាបករណី Online Scams បាន ២ករណី និងបានឃាត់ខ្លួនមនុស្ស ៩នាក់ផងដែរ។

ឯកឧត្តមនាយឧត្តមសេនីយ៍ សួស អង្គារ៍ រដ្ឋលេខាធិការក្រសួងមហាផ្ទៃ និងជាប្រធានក្រុមការងារទី៩ បានវាយតម្លៃខ្ពស់ចំពោះលទ្ធផលនៃការអនុវត្តគោលនយោបាយភូមិឃុំ សង្កាត់មានសុវត្ថិភាព ប្រចាំត្រីមាសរបស់រដ្ឋបាលខេត្តសៀមរាប និងបានណែនាំទៅដល់អ្នកពាក់ព័ន្ធទាំងអស់ ត្រូវបន្តពង្រឹងការអនុវត្តវិធានការច្បាប់ពាក់ព័ន្ធនឹងបទល្មើសទាំងឡាយឱ្យបានម៉ឺងម៉ាត់ ប្រកបដោយវិជ្ជាជីវៈ និងទទួលខុសត្រូវខ្ពស់។ ចំពោះបញ្ហាបទល្មើសល្បែងស៊ីសង ក្មេងទំនើង ចោរកម្ម គ្រឿងញៀន កម្លាំងសមត្ថកិច្ច និងអាជ្ញាធរមូលទាំង១០០ ឃុំសង្កាត់ ក្នុងខេត្តសៀមរាប ត្រូវតែអនុវត្តវិធានការច្បាប់ និងបញ្ឈប់ឱ្យខាងតែបាន។

ឯកឧត្តម សួស អង្គារ៍ ក៏បានសាទរផងដែរ ចំពោះវិធានការរបស់គណៈបញ្ជាការឯកភាពរដ្ឋបាលខេត្តសៀមរាប និងកម្លាំងសមត្ថកិច្ចគ្រប់ជាន់ថ្នាក់ ដែលបានសហការគ្នាល្អជាមួយអាជ្ញាធរមូលដ្ឋាន ក្នុងការគ្រប់គ្រង ធានាសន្តិសុខ សុវត្ថិភាពជូនប្រជាពលរដ្ឋ និងភ្ញៀវទេសចរជាតិ ដែលបានមកកម្សាន្តក្នុងខេត្តប្រវត្តិសាស្ត្រមួយនេះ និងការកសាងសមិទ្ធផលនានាបានយ៉ាងច្រើនផងដែរ។ ក្នុងនោះក៏ត្រូវបន្តផ្ដោតយ៉ាងសំខាន់លើបញ្ហា Online Scams ដោយត្រូវបោសសម្អាតកុំឱ្យមាននៅក្នុងភូមិសាស្ត្រខេត្តសៀមរាប។

ឯកឧត្តមរដ្ឋលេខាធិការ ក៏បានណែនាំដល់គណៈបញ្ជាការឯកភាពរដ្ឋបាលខេត្ត ក្រុងស្រុក ត្រូវបន្តជំរុញ ពង្រឹងការងារប្រឡងប្រណាំងការអនុវត្តគោលនយោបាយភូមិ ឃុំសង្កាត់ មានសុវត្ថិភាព ឱ្យបានម៉ឺងម៉ាត់ និងមានប្រសិទ្ធភាពខ្ពស់ ដោយអនុវត្តទៅតាមគោលការណ៍ទាំង ៧ចំណុច ដើម្បីធានាបាននូវសន្តិសុខសណ្ដាប់ធ្នាប់ល្អ។ ម្យ៉ាងទៀត ត្រូវពង្រឹងការគ្រប់គ្រង និងត្រៀមលក្ខណៈឆ្លើយតបបញ្ហាគ្រោះមហន្តរាយ គ្រោះថ្នាក់ និងជំងឺរាតត្បាតផ្សេងៗឱ្យមានប្រសិទ្ធភាពសំខាន់ក្នុងឱកាសបុណ្យចូលឆ្នាំថ្មី ប្រពៃណីខ្មែរខាងមុខនេះ។ ជាមួយគ្នានេះ អាជ្ញាធរមូលដ្ឋាន និងគណៈបញ្ជាការឯកភាពរដ្ឋបាលក្រុងស្រុក ក៏ត្រូវសហការពង្រឹងការទប់ស្កាត់ និងអនុវត្តការងារបង្ក្រាបបទល្មើសនានាឱ្យបានល្អប្រសើរ និងប្រសិទ្ធភាព។

លោក ង៉ូវ សេងកាក់ អភិបាលរងខេត្ត ក៏បានជំរុញដល់គណៈបញ្ជាការឯកភាពរដ្ឋបាលក្រុងស្រុក និងកងកម្លាំងសមត្ថកិច្ចទាំងអស់ ចូលរួមបង្ក្រាបបញ្ហាគ្រឿងញៀន ក្មេងទំនើង និងគ្រោះថ្នាក់ចរាចរណ៍ ត្រូវអនុវត្តឱ្យមានប្រសិទ្ធភាព និងទៀងទាត់ នៅតាមទីសាធារណៈសាលារៀន និងតាមទីតាំងអាជីវកម្មសប្បាយ ព្រមទាំងត្រូវពង្រឹងក្រមសីលធម៌ អង្គការវិន័យរបស់កងកម្លាំង និងអនុវត្តឱ្យបាននូវអភិក្រមទាំង៥ របស់រាជរដ្ឋាភិបាល និងបង្កើនការយកចិត្តទុកដាក់អនុវត្តឱ្យមានប្រសិទ្ធភាពខ្ពស់ លើគោលនយោបាយភូមិឃុំសង្កាត់មានសុវត្ថិភាពនេះ។

ការថ្លែងរបស់ថ្នាក់ដឹកនាំធ្វើឡើង ក្នុងឱកាសរដ្ឋបាលខេត្តសៀមរាប បើកកិច្ចប្រជុំបូកសរុបការងារអនុវត្តគោលនយោបាយ (ភូមិ ឃុំ សង្កាត់មានសុវត្ថិភាព) ប្រចាំត្រីមាសទី១ និង លើកទឹកដៅត្រីមាសទី២ ឆ្នាំ២០២៦៕SRP

អត្ថបទ និងរូបភាព៖ លោក ឡៃ បញ្ញា
កែសម្រួល៖ លោក អ៊ុន ណារាជ្យ