មេរងគយកម្ពុជាម្នាក់ ត្រូវបានតុលាការរដ្ឋ Victoria ប្រទេសអូស្រ្តាលី ចោទប្រកាន់ពីបទ «រំលោភបំពានផ្លូវភេទលើក្មេងប្រុស» នៅតំបន់ឆ្នេរសមុទ្រសាធារណៈ តែករណីនេះលោកបដិសេធ
ភ្នំពេញ៖លោក សែ សុឃន អគ្គនាយករងគយកម្ពុជា១រូប ត្រូវបានតុលាការរដ្ឋ Victoria ប្រទេសអូស្រ្តាលី ចោទប្រកាន់ពីបទ «រំលោភបំពានផ្លូវភេទលើក្មេងប្រុស» នៅតំបន់ឆ្នេរសមុទ្រសាធារណៈ
តែករណីនេះនៅថ្ងៃទី២៩ ខែកញ្ញា ឆ្នាំ២០២៦ លោក សែ សុឃន ដែលជាជនត្រូវចោទ បានចេញមកបដិសេធយ៉ាងដាច់អហង្ការ និងអះអាងថា លោកកំពុងរង់ចាំតស៊ូ ក្តីប្រឆាំងនឹងបទចោទប្រកាន់ទាំងនេះ ដើម្បីការពារភាពស្អាតស្អំ និងកិត្តិយស។
លោក សែ សុឃន បង្ហោះសារនៅលើទំព័រហ្វេសប៊ុកថា៖ «ខ្ញុំបាទសូមជម្រាបជូនសាធារណជនមេត្តាជ្រាបថា ក្នុងរយៈពេលប៉ុន្មានថ្ងៃថ្មីៗនេះ មានសារព័ត៌មានមួយចំនួន បានចេញផ្សាយថា រូបខ្ញុំត្រូវបានតុលាការរដ្ឋវិកតូរីយ៉ា (Victoria) នៃប្រទេសអូស្ត្រាលី ចោទប្រកាន់ពីបទរំលោភបំពានផ្លូវភេទលើកុមារា កើតចេញពីហេតុការណ៌ កើតឡើងកាលពីប៉ុន្មានឆ្នាំមុននៅកំពង់ផែតំបន់ឆ្នេរសមុទ្រ Mordialloc នៃទីក្រុងមែលប៊ន (Melbourne) ដែលជាទីកន្លែងសាធារណៈដ៏ពេញនិយមមួយ។
ខ្ញុំសូមបដិសេធយ៉ាងដាច់អហង្ការចំពោះការចោទប្រកាន់ទាំងនេះ។ ការចោទប្រកាន់ទាំងនេះ គឺមិនពិតឡើយ។ បច្ចុប្បន្នខ្ញុំកំពុងរង់ចាំតស៊ូក្តីប្រឆាំងនឹងបទចោទប្រកាន់ទាំងនេះ ដើម្បីការពារភាពស្អាតស្អំ និងកិត្តិយសរបស់ខ្ញុំ។ ដោយសាររឿងកំពុងស្ថិតនៅក្នុងដំណើរការនីតិវិធីរបស់តុលាការ ខ្ញុំសូមមិនផ្តល់អត្ថាធិប្បាយបន្ថែមទៀតនៅពេលនេះទេ។ អាស្រ័យហេតុនេះ សូមសាធារណជនទាំងអស់មេត្តាជ្រាបជាព័ត៌មាន»។
តាមសារព័ត៌មានបរទេស បច្ចុប្បន្នលោក សែ សុឃន កំពុងស្នាក់នៅប្រទេសអូស្ត្រាលី ដើម្បីតតាំងរឿងក្តីនេះ ដែលសវនាការរបស់លោកត្រូវបានកំណត់នៅខែវិច្ឆិកាខាងមុខ៕SRP
