អង្គភាពប្រឆាំងអំពើពុករលួយ ឃាត់ខ្លួន មន្ត្រីក្រសួងការបរទេស និងសហប្រតិបត្តិការអន្តរជាតិ ពាក់ព័ន្ធបទល្មើស online scams
ភ្នំពេញ៖អង្គភាពប្រឆាំងអំពើពុករលួយ បានឃាត់ខ្លួនលោក ថូ សំណាង មន្ត្រីក្រសួងការបរទេស និងសហប្រតិបត្តិការអន្តរជាតិ ពាក់ព័ន្ធបទល្មើស online scams។
ប្រធានអង្គភាពប្រឆាំងអំពើពុករលួយ ឯកឧត្ដម ឱម យ៉ិនទៀង បានប្រាប់អ្នកសារព័ត៌មាន នៅយប់ថ្ងៃទី២០ ខែសីហា ឆ្នាំ២០២៦នេះថា ករណីលោក ថូ សំណាង កំពុងត្រូវបាន ACU ស្តាប់ចម្លើយពាក់ព័ន្ធបទល្មើស Online Scams។ ឯកឧត្ដម ឱម យ៉ិនទៀង បានបញ្ជាក់ទៀតថា លោក ថូ សំណាង បានសារភាពថា បានលួចយកសន្លឹកទិដ្ឋការប្រភេទ C និង Cex ប្រើប្រាស់ខុសច្បាប់ ជាង ៦០០០សន្លឹក ហើយចំណែកសន្លឹកនៅសល់ ៤ពាន់សន្លឹក ACU កំពុងតាមរកដែលគាត់បានថាបានកំទេចចោល។
ឯកឧត្ដម ថ្លែងបញ្ជាក់ថែមទៀតថា យើងរកឃើញ សន្លឹកទិដ្ឋាការរបស់ដែលគាត់បានបញ្ចេញដោយខុសច្បាប់ត្រូវបានជនបរទេស Online Scams យកទៅប្រើបាស់។
ជុំវិញការអង្គភាពប្រឆាំងអំពើពុករលួយឃាត់ខ្លួន មន្ត្រីក្រសួងការបរទេស និងសហប្រតិបត្តិការអន្តរជាតិ ពាក់ព័ន្ធបទល្មើស online scams បែបនេះ គេនៅពុំទាន់ឃើញអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ចេញសេចក្ដីបំភ្លឺព័ត៌មាននៅឡើយទេ។
សូមបញ្ជាក់ផងដែរថា នៅព្រលប់ថ្ងៃនេះតាមបណ្ដាញហ្វេសប៊ុក ឯកឧត្តម ខៀវ កាញ្ញារីទ្ធ បានបង្ហោះសារថា
សូមពឹងមិត្តនៅក្នុងហ្វេសប៊ុក !
ឪពុកមាខាងម្តាយរបស់ខ្ញុំបានបាត់កូនប្រុសម្នាក់ឈ្មោះ ថូ សំណាង ( ក្នុងរូប ) ជាមន្ត្រីក្រសួងការបរទេស មួយថ្ងៃមួយយប់មិនដឹងនៅឯណា ។ គាត់បានដាក់ពាក្យបណ្តឹងទៅនាយប៉ុស្តនគរបាលខណ្ឌជ្រោយចង្វារតាំងពីម្សិលមិញ ( ១៩ សីហា ) ហើយ មកពឹងខ្ញុំជួយរក ។ ក្រៅពីអំពាវនាវទៅអាជ្ញាធរមានសមត្ថកិច្ច ខ្ញុំសូមពឹងមិត្តក្នុងហ្វេសប៊ុកជួយផ្តល់ព័ត៌មានទាក់ទិននឹង លោក ថូ សំណាង មកខ្ញុំ ឬ ជូនទៅអាជ្ញាធរផង ។ គាត់បាត់ខ្លួនជាមួយរថយន្តក្រសួងដូចបានបង្ហាញមកជាមួយនេះ៕SRP
