តំណាងរាស្ត្រសៀមរាប ផ្ដល់អំណោយ ជូនពលរដ្ឋ ៣០០គ្រួសារ ក្នុងសង្កាត់ស្រង៉ែ
ខេត្តសៀមរាប៖ប្រជាពលរដ្ឋចំនួន ៣០០គ្រួសារ រស់នៅក្នុងសង្កាត់ស្រង៉ែ ក្រុងសៀមរាប នៅព្រឹកថ្ងៃទី៧ ខែមេសា ឆ្នាំ២០២៦នេះ បានទទួលអំណោយជាស្បៀងអាហារ និងថវិកាពីឯកឧត្តមអ្នកឧកញ៉ា សៀង ណាំ អ្នកតំណាងរាស្ត្រសៀមរាប និងលោកជំទាវ ក្នុងឱកាសអបអរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងមកដល់នាពេលខាងមុខនេះ។
ឯកឧត្តមអ្នកឧកញ៉ា សៀង ណាំ បានមានប្រសាសន៍ថា ក្នុងនាមជាតំណាងរាស្ត្រម្នាក់ដែលបងប្អូនបានផ្ដល់សេចក្ដីទុកចិត្ត គឺឯកឧត្តមមិនដែលបំភ្លេចសុខទុក្ខរបស់បងប្អូនឡើយ គឺចង់បង្ហាញថា រាជរដ្ឋាភិបាលកម្ពុជា និងតំណាងរាស្ត្រ តែងតែនៅក្បែរបងប្អូនជានិច្ច មិនថាបងប្អូនស្ថិតក្នុងស្ថានភាពបែបណានោះទេ។
ឯកឧត្តមមានប្រសាសន៍បន្តថា ទោះបីជាអំណោយដែលនាំមកចែកជូនបងប្អូននាថ្ងៃនេះ មានដូចជា អង្ករ សារុង និងថវិកា ដើម្បីជាការចែករំលែក និងដើម្បីជួយសម្រាលការលំបាករបស់បងប្អូនបានមួយគ្រា ជាពិសេសសម្រាប់ត្រៀមរៀបចំទទួលទេវតាឆ្នាំថ្មីឱ្យបានសប្បាយរីករាយនៅក្នុងគ្រួសារនាថ្ងៃខាងមុខនេះ។
ឯកឧត្តមអ្នកតំណាងរាស្ត្រ ក៏បានផ្ដាំផ្ញើដល់បងប្អូនប្រជាពលរដ្ឋទាំងអស់ សូមថែរក្សាសុខភាពឱ្យបានល្អ បរិភោគស្អាត រស់នៅស្អាតព្រោះរដូវនេះជារដូវក្ដៅ ហើយត្រូវបង្កើនការបង្កបង្កើនផល និងខិតខំប្រកបរបរចិញ្ចឹមជីវិតដោយភាពអត់ធ្មត់ ហើយសូមចូលរួមគោរពច្បាប់ចរាចរណ៍ និងចៀសវាងល្បែងស៊ីសងផ្សេងៗ ក្នុងកំឡុងពេលបុណ្យចូលឆ្នាំ ដើម្បីសុវត្ថិភាពខ្លួនឯង និងក្រុមគ្រួសារផងដែរ៕SRP
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
