មនុស្សប្រុសស្រីចំនួន៣នាក់រួមដៃគ្នាប្លន់សម្លាប់
ខេត្តបាត់ដំបង៖មនុស្ស៣នាក់ត្រូវបានសមត្ថកិច្ចនគរបាលខេត្តបាត់ដំបងធ្វើការចាប់ខ្លួនពាក់ព័ន្ធករណីប្លន់សម្លាប់។
សមត្ថកិច្ចនគរបាលខេត្តបាត់ដំបងបានឲ្យដឹងថា មានករណីឃាតកម្ម ជនរងគ្រោះ ឈ្មោះប្រោញ គ្រិនភេទប្រុស អាយុ ៦៥ ឆ្នាំជាអ្នករស់ នៅភូមិដូនត្រឹក ឃុំតាសាញ ស្រុកសំឡូត ខេត្តបាត់ដំបង ដែលត្រូវបានប្រទះឃើញសពកាលពីថ្ងៃទី២៤ ខែ មីនា ឆ្នាំ២០២៦ នៅក្នុងប្រឡាយក្រុមទី ៣៦ ភូមិចំការសំរោង ២ សង្កាត់ចំការសំរោង ក្រុងបាត់ដំបង។
ជនសង្ស័យមានឈ្មោះ
១-ឈ្មោះសុវណ្ណ បញ្ញា ភេទស្រី អាយុ២៩ឆ្នាំ មានទីលំនៅមិនពិតប្រាកដ ។
២-ឈ្មោះហ៊ាង បូរិទ្ធ ភេទប្រុស អាយុ២៩ឆ្នាំមានទីលំនៅភូមិអូរស្រឡៅ ឃុំវត្តតាមឹម ស្រុកសង្កែ ខេត្តបាត់ដំបង។
៣-ឈ្មោះកុល ណុន ភេទប្រុស អាយុ២៨ឆ្នាំ មានទីលំនៅភូមិអូរស្រឡៅ ឃុំវត្តតាមឹម ស្រុកសង្កែ ខេត្តបាត់ដំបង។
តាមការសាកសួររបស់សមត្ថកិច្ចនគរបាលក្រុងបាត់ដំបង បានឱ្យដឹងថា ឈ្មោះសុវណ្ណ បញ្ញា ភេទស្រី បានឆ្លើយថា ខ្លួននិងឈ្មោះ ហ៊ាង បូរឹទ្ធ បានរៀបគំរោងសម្លាប់ជនរងគ្រោះ យកទ្រព្យសម្បត្តិ មានម៉ូតូម៉ាកហុងដា ឌ្រីម C125 ពណ៌ខ្មៅ ឆ្នាំ២០២៦ ពាក់ផ្លាកលេខបាត់ដំបង 1AZ-6458 និងទូរស័ព្ទដៃ រួចយក សពជនរងគ្រោះទៅចោលនៅប្រឡាយមួយកន្លែង ក៏ប៉ុន្តែមកដល់ពេលនេះ សមត្ថកិច្ចពុំទាន់រកឃើញវត្ថុតាងដែលជាទ្រព្យសម្បត្តិរបស់ជនរងគ្រោះនៅឡើយទេ ក្រៅតែពីម៉ូតូរបស់ជនសង័្សយចំនួន ០២គ្រឿងនិងទូរស័ព្ទ។
សូមជម្រាបថាជនសង្ស័យត្រូវបានសមត្ថកិច្ចនគរបាលចាប់ខ្លួនកាលពីថ្ងៃទី ៣០ ខែ មីនា ឆ្នាំ ២០២៦ ដោយអនុវត្តតាមអនុវសាសន៍របស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងដោយបានការសម្របសម្រួលលើនីតិវិធីពីឯកឧត្តមមាស ចន្ទពិសិដ្ឋ ព្រះរាជអាជ្ញានៃអយ្យការអមសាលាដំបូងខេត្តបាត់ដំបង ក្រោមបញ្ជាដឹកនាំរបស់លោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង លោកវរសេនីយ៍ឯក ឈឿង គឹមសុង ស្នងការរងផែនការងារនគរបាលព្រហ្មទ័ណ្ឌ ដឹកនាំកម្លាំងក្នុងផែនរួមសហការជាមួយសមត្ថកិច្ចនគរបាលក្រុងបាត់ដំបង លោកវរសេនីយ៍ឯក ពេជ្រ សារ៉ែន ជាអធិការនិងនគរបាលស្រុកសង្កែ ដែលមានលោកវរសេនីយ៍ទោ យុត តុងហូ ជាអធិការធ្វើការស្រាវជ្រាវរហូតឃាត់ខ្លួនមនុស្សចំនួន៣នាក់។
បច្ចុប្បន្នមនុស្សទាំងបីនាក់ត្រូវបានសមត្ថកិច្ចកសាងសំណុំរឿងបញ្ជូនទៅតុលាការដើម្បីអនុវត្តតាមផ្លូវច្បាប់៕SRP
