ខេត្តសៀមរាប៖ជនជាតិវៀតណាមម្នាក់ ត្រូវបាន
សមត្ថកិច្ចខេត្តសៀមរាប ចាប់ខ្លួនបញ្ជូនខ្លួន
ទៅសាលាដំបូងខេត្តសៀមរាបពាក់ព័ន្ធ ករណី ឆបោក។
ជនសង្ស័យ ឈ្មោះ ឡេវ ទេវ ភេទប្រុស អាយុ ៤១ឆ្នាំ ជនជាតិវៀតណាម ស្នាក់នៅភូមិវត្តស្វាយ សង្កាត់សាលាកំរើក ក្រុងសៀមរាប ខេត្តសៀមរាប។
នគរបាលខេត្តសៀមរាបបានឲ្យដឹងថា
នៅថ្ងៃទី១៥ ខែមិថុនា ឆ្នាំ២០២៣ វេលាម៉ោង ១៥:០០នាទី នៅចំណុចចំណតរថយន្ត មុខ ប្រាសាទអង្គរវត្ត ស្ថិតក្នុងភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប ជនសង្ស័យ ឈ្មោះ ឡេវ ទេវ (និងបក្ខពួក) បានប្រាប់ទៅជនរងគ្រោះ ឈ្មោះ ស៊ិន សូភី ភេទប្រុស អាយុ ៤៨ឆ្នាំ ទីលំនៅភូមិមណ្ឌល៣ សង្កាត់ស្លក្រាម ក្រុងសៀមរាប ខេត្តសៀមរាប ថា៖ រូបគេស្គាល់អ្នករកស៊ីនៅប្រទេសថៃ មានប្រាក់ដុល្លារជាច្រើន គេត្រូវការយកប្រាក់នោះមកប្តូរប្រាក់បាត ដោយមានប្រាក់ចំនួន ៥០.០០០$ (ប្រាំមុឺនដុល្លារអាមេរិក) យកមកប្តូរប្រាក់បាត ចំនួន ១.២០៥.០០០B (មួយលានពីរសែនប្រាំពាន់បាត)។
នគរបាលបន្តថាដោយជនរងគ្រោះមយល់ឃើញថា ចំណេញខ្ពស់បែបនេះ ជនរងគ្រោះក៏បានយកប្រាក់ដុល្លារបស់ខ្លួនចំនួន ៣៦.០៥៤$ (បីមុឺនប្រាំមួយពាន់ហាសិបបួនដុល្លាអាមេរិក) ទៅដូរយកប្រាក់ បាតបានចំនួន ១.២០៥.០០០B (មួយលានពីរសែនប្រាំពាន់បាត) លុះដល់វេលាម៉ោងកើតហេតុខាងលើ ជនសង្ស័យបាននាំជនរងគ្រោះមទៅជួបភាគីម្ចាស់ប្រាក់ដុល្លារ ដែលមានជនជាតិថៃ ម្នាក់
និងជនជាតិខ្មែរ ០២នាក់ ពេលនោះពួកគេក៏បានប្ដូរកញ្ចប់ប្រាក់គ្នា ហើយក្រុមជនសង្ស័យ បានលួចប្តូរកញ្ចប់ប្រាក់ដុល្លាក្លែងក្លាយ ឲ្យមកជនរងគ្រោះ និងបានជិះរថយន្តគេចខ្លួនបាត់តែម្ដង។ ជនរងគ្រោះក៏បានបើកកញ្ចប់ ប្រាក់នោះមើលម្តងទៀត ទើបដឹងថាជាប្រាក់ដុល្លារក្លែងក្លាយ (កញ្ចប់ប្រាក់ត្រូវបានគេលួចប្តូរ) ហើយក៏បានឃាត់ខ្លួនឈ្មោះ ឡេវ ទេវ ប្រគល់ជូនសមត្ថកិច្ចតែម្ដង។
ករណីនេះដកហូតវត្ថុតាងរួមមាន៖ក្រដាសប្រាក់ដុល្លារក្លែងក្លាយ ប្រភេទក្រដាស ១០០ដុល្លា ចំនួន ១០.១៥០.០០០សន្លឹក កាតធនាគារវីង១ និងទូរស័ព្ទ១គ្រឿង៕ដោយនាគខៀវ