ភ្នំពេញ៖សម្តេចស ខេង បានដាក់ផែនការឲ្យខិតខំដោះស្រាយ បញ្ហាវិវាទ ក្រុមហ៊ុនណាហ្គាវើលដ៍ឲ្យបានឆាប់ចប់។
ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេចស ខេង ដាក់ផែនការបែបនេះ ក្នុងឱកាស ដឹកនាំកិច្ចប្រជុំស្តីពីការដោះស្រាយ វិវាទការងារ នៃក្រុមហ៊ុន ណាហ្គាវើលដ៍។
ក្នុងកិច្ចប្រជុំនេះ នៅសាលារាជធានីភ្នំពេញ នៅថ្ងៃទី៩ ខែមីនា នេះ ម្សិលមិញ សម្តេចស ខេង បានដឹកនាំដើម្បីស្តាប់របាយការណ៍ អំពីការវិវឌ្ឍន៍បាតុកម្មនៅក្រុមហ៊ុន ណាហ្គាវើលដ៍ និងបានពិភាក្សាគ្នាដើម្បីបន្តនីតិវិធីសម្រាប់ការដោះស្រាយ និងប្រមូលផ្តុំទៅលើការបន្តពិភាក្សាចរចាដោះស្រាយបញ្ហានេះ ដោយសន្តិវិធី និងស្របទៅតាមច្បាប់ជាធរមាន។ សម្តេចស ខេង បានដាក់ផែនការឲ្យខិតខំដោះស្រាយ បញ្ហាវិវាទឲ្យឆាប់ចប់ កុំឲ្យអូសបន្លាយ និងឲ្យកម្មករនិយោជិត និងក្រុមហ៊ុនណាហ្គាវើលដ៍ ឲ្យជាសះគ្នា។
សូមបញ្ជាក់ថាកិច្ចប្រជុំនេះ មានការចូលរួមពីសំណាក់រដ្ឋមន្ត្រីក្រសួងពាក់ព័ន្ធ និងស្ថាប័នជំនាញ។ សមាសភាពចូលរួមកិច្ចប្រជុំស្តីពីការដោះស្រាយវិវាទការងារ នៃក្រុមហ៊ុន ណាហ្គាវើលដ៍ មានដូចជា :រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រដ្ឋមន្ត្រីក្រសួងយុត្តិធម៌ រដ្ឋមន្ត្រីក្រសួងសុខាភិបាលអគ្គស្នងការនគរបាលជាតិ អភិបាល នៃគណៈអភិបាលរាជធានីភ្នំពេញ ប្រធានសាលាដំបូងរាជធានីភ្នំពេញភ្នំពេញ ស្នងការនគរបាលរាជធានីភ្នំពេញ និងមេបញ្ជាការកងរាជអាវុធហត្ថរាជធានីភ្នំពេញ៕SRP
