ភ្នំពេញ៖ផ្ទៃដីបឹងតាមោក (បឹងកប់ស្រូវ) ដែលជាទ្រព្យសម្បត្តិសាធារណៈ របស់រដ្ឋស្ថិតនៅភូមិសាស្ត្ររាជធានីភ្នំពេញ ត្រូវបានរាជរដ្ឋាភិបាលកម្ពុជា សម្រេចកាត់ចេញទំហំ២ ៥៥៤ ០០០ម៉ែត្រក្រឡា (២៥៥,៤ហិកតា) និងធ្វើអនុបយោគ ពីទ្រព្យសម្បត្តិសាធារណៈ របស់រដ្ឋ ទៅជាទ្រព្យសម្បត្តិឯកជនរបស់រដ្ឋ ព្រមទាំងប្រទានកម្មជូនឧកញ៉ាដ៏មានឥទ្ធិពលចំនួន២រូប គឺឯកឧត្តមឧកញ៉ា កុក អាន ដែលគេស្គាល់ថា ជាអគ្គនាយកក្រុមហ៊ុនអានកូ និងជាសមាជិកព្រឹទ្ធសភានៃព្រះរាជាណាចក្រកម្ពុជា និងលោកឧកញ៉ា ជឹង ធានសេង ធ្វើជាកម្មសិទ្ធិកាលពីខែវិច្ឆិកា ឆ្នាំ២០២១កន្លងទៅថ្មីៗនេះ។
ឧកញ៉ា ជឹង ធានសេង ប្រធានក្រុមប្រឹក្សាភិបាលក្រុមហ៊ុន Five Sibling & NH Co.,Ltd. ទទួលបានចំណែកផ្ទៃដីបឹងតាមោក (បឹងកប់ស្រូវ) ទំហំ១ ០០០ ១៦៨ម៉ែត្រក្រឡា ស្ថិតនៅសង្កាត់គោករកា សង្កាត់ពញាពន់ និងសង្កាត់សំរោង ខណ្ឌព្រែកព្នៅ រាជធានីភ្នំពេញ ធ្វើជាកម្មសិទ្ធិ ដែលពន្ធ និងអាករផ្សេងៗជាបន្ទុករបស់រដ្ឋ ដោយអនុក្រឹត្យលេខ២៣០អនក្រ.បក ចុះថ្ងៃទី១៧ ខែវិច្ឆិកា ឆ្នាំ២០២១។
ឧកញ៉ា កុក អាន អគ្គនាយកក្រុមហ៊ុនអានកូ ទទួលបានចំណែកផ្ទៃដីបឹងតាមោក (បឹងកប់ស្រូវ) ទំហំ១ ៥៥៣ ៨៣២ម៉ែត្រក្រឡា ស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ធ្វើជាកម្មសិទ្ធិដែលពន្ធ និងអាករផ្សេងៗជាបន្ទុករបស់រដ្ឋ ដោយអនុក្រឹត្យលេខ២៣១អនក្រ.បក ចុះថ្ងៃទី១៧ ខែវិច្ឆិកា ឆ្នាំ២០២១ ។
ឧកញ៉ា កុក អាន ទទួលបានការតែងតាំងគោរមងារជាឧកញ៉ា ដោយព្រះរាជក្រឹត្យលេខនស/រកត/០១៩៥/០៤ ចុះថ្ងៃទី២១ ខែមករា ឆ្នាំ១៩៩៥ និងលោក ជឹង ធានសេង ទទួលបានការតែងតាំងគោរមងារជាឧកញ៉ា ដោយព្រះរាជក្រឹត្យលេខនស/រកត/០៤១៣/២៨៥ ចុះថ្ងៃទី០១ ខែមេសា ឆ្នាំ២០១៣ ។
ឧកញ៉ា ជឹង ធានសេង ក៏អតីតជានាយទាហានជាន់ខ្ពស់នៃកងយោធពលខេមរភូមិន្ទក្រសួងការពារជាតិម្នាក់ដែរ អត្តលេខ០១១៦០៩ ឋានន្តរស័ក្តិវរសេនីយ៍ឯក(ស័ក្តិ៥) និងធ្លាប់កាន់តំណែងជាមេបញ្ជាការរងកងរាជអាវុធហត្ថខេត្តបាត់ដំបង (ប៉ុន្តែត្រូវបានលុបឈ្មោះចេញពីក្របខ័ណ្ឌកងយោធពលខេមរភូមិន្ទវិញ ដោយអនុក្រឹត្យលេខ១៦៥៧អនក្រ.តត ចុះថ្ងៃទី០៨ ខែធ្នូ ឆ្នាំ២០១៤) ។
សូមរំលឹកជូនថា កាលពីឆ្នាំ២០១៨កន្លងទៅ ក្រុមហ៊ុន Phnom Penh Precast Plants Co.,Ltd. ដែលមានឧកញ៉ា ជឹង ធានសេង ជានាយកក្រុមហ៊ុន ក៏ធ្លាប់ទទួលបានចំណែកផ្ទៃដីបឹងទំពុន ស្ថិតនៅសង្កាត់បឹងទំពុន ខណ្ឌមានជ័យ រាជធានីភ្នំពេញ ទំហំ៣៥ហិកតា ធ្វើជាកម្មសិទ្ធិផងដែរ។ គិតត្រឹមថ្ងៃទី២១ ខែធ្នូ ឆ្នាំ២០២១កន្លងទៅនេះ ផ្ទៃដីបឹងតាមោក (បឹងកប់ស្រូវ) ដែលជាទ្រព្យសម្បត្តិសាធារណៈរបស់រដ្ឋ ស្ថិតនៅភូមិសាស្ត្ររាជធានីភ្នំពេញ យ៉ាងហោចណាស់ទំហំប្រមាណ១៨ ៣៨២ ៨៦៩,៥ ម៉ែត្រក្រឡា (ជាង១ ៨៣៨ហិកតា) ត្រូវបានរាជរដ្ឋាភិបាលកម្ពុជា កាត់ចេញធ្វើអនុបយោគ ទៅជាទ្រព្យសម្បត្តិឯកជនរបស់រដ្ឋ និងប្រទានកម្មទៅឲ្យស្ថាប័នរដ្ឋ និងបុគ្គលឯកជនជាហូរហែធ្វើជាកម្មសិទ្ធិ៕SRP