ខេត្តកំពង់ចាម៖លោក ហ៊ុន ម៉ានិត បានមានប្រសាសន៍ថា ការស្ថាបនាផ្លូវក្រាលកៅស៊ូមួយខ្សែ តភ្ជាប់ពីភូមិតាអុង ឃុំតាអុង ឆ្ពោះទៅភូមិជយោ ឃុំជយោ នេះ ពិតជាមានសារៈសំខាន់ខ្លាំងណាស់ សម្រាប់ប្រជាពលរដ្ឋ ដែលងាយស្រួលទាំងការធ្វើដំណើរ និងកាត់បន្ថយពេលវេលាទៀតផង។
លោក ហ៊ុន ម៉ានិត បានបន្តថា ក្នុងរយៈពេល៤ខែទៀត ផ្លូវមួយខ្សែនេះ នឹងស្ថាបនារួចរាល់ជាស្ថាពរហេីយ ដូច្នេះសូមឲ្យបងប្អូនប្រជាពលរដ្ឋ ទាំងអស់ ត្រូវបេីកបរដោយមានការប្រុងប្រយ័ត្នខ្ពស់ និងគោរពច្បាប់ចរាចរណ៍ផងដែរ។
លោក ហ៊ុន ម៉ានិត នាយករងខទ្ទកាល័យសម្តេចតេជោ ហ៊ុន សែន មានប្រសាសន៏បែបនេះ ក្នុងឱកាសបេីកការដ្ឋានស្ថាបនាផ្លូវក្រាលកៅស៊ូ មួយខ្សែប្រវែង ១៦.៨ គីឡូម៉ែត្រ តភ្ជាប់ពីផ្លូវជាតិលេខ៧១ ភូមិតាអុង ឃុំតាអុង ឆ្ពោះទៅផ្លូវលេខ ៧១C ស្ថិតនៅក្នុងភូមិជយោ ឃុំជយោ ស្រុកចំការលើ ខេត្តកំពង់ចាម នៅព្រឹកមិញនេះ។
លោក អ៊ុន ចាន់ដា អភិបាលខេត្តកំពង់ចាម បានថ្លែងថា ក្នុងឆ្នាំ២០២២នេះ ស្រុកចំការលើ បានទទួលសមិទ្ធផលថ្មីៗ ជាបន្តបន្ទាប់ ជាក់ស្ដែងការកសាងសំណង់មន្ទីរបក្សស្រុក ដែលប្រជាពលរដ្ឋអាចយកទីតាំងនោះសម្រាប់ប្រារព្ធពិធីរៀបមង្គលការ ឬពិធីបុណ្យផ្សេងៗក៏បាន និងស្ថាបនាផ្លូវក្រាលកៅស៊ូមួយខ្សែនេះ ដេីម្បីបង្កលក្ខណៈងាយស្រួលដល់បងប្អូនប្រជាពលរដ្ឋ ទាំងការធ្វើដំណើរ ក៏ដូចជាការដឹកជញ្ជូននូវកសិផលផ្សេងៗយកទៅលក់នៅទីផ្សារ ផងដែរ។
អភិបាលខេត្ត ក៏បានអំពាវនាវដល់ពលរដ្ឋ ឲ្យបន្តការប្រុងប្រយ័ត្ន ខ្ពស់ចំពោះការឆ្លងរីករាលដាល ជំងឺកូវីដ-១៩ បម្លែងថ្មី ប្រភេទអូមីក្រុង ដោយត្រូវអនុវត្តតាមវិធានការសុខាភិបាល ព្រមជាមួយការចាក់វ៉ាក់សាំងឲ្យបានគ្រប់ៗគ្នា ផងដែរ៕SRP
