ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅថ្ងៃទី១៧ ខែតុលា ម្សិលមិញ
បានដឹកនាំមន្ត្រីជំនាញនិងអាជ្ញាធរមូលដ្ឋាន អញ្ជើញចុះពិនិត្យច្រាំងទន្លេ នៅភូមិពង្រលិច ឃុំពង្រ ស្រុកកោះសូទិន ដែលទើបនឹងសាងសង់រួចរាល់ជាស្ថាពរ១០០ភាគរយ។ ជាមួយគ្នានេះ លោកអ៊ុន ចាន់ដា ក៏បានចុះពិនិត្យស្ថានីយបូមទឹក ប្រព័ន្ធធារាសាស្រ្តវ៉ៃកូ និងស្ថានភាពទឹកនៅចំណុចទ្វាទឹកប្រព័ន្ធធារាសាស្រ្តវ៉ៃកូ ស្ថិតនៅក្នុងភូមិរកាកោងត្បូង ឃុំមហាលាភ ស្រុកកោះសូទិនផងដែរ។
ក្នុងឱកាសនៃការចុះពិនិត្យ លោកអ៊ុន ចាន់ដា បានណែនាំដល់អាជ្ញាធរមូលដ្ឋាននិងអំពាវនាវដល់បងប្អូនប្រជាពលរដ្ឋ ឲ្យចូលរួមថែរក្សានូវសមិទ្ធិផលថ្មីនេះ ដើម្បីជាប្រយោជន៍ដល់ការប្រេីប្រាស់បានយូរអង្វែងសម្រាប់មនុស្សជំនាន់ក្រោយៗ។
អភិបាលខេត្ត ក៏បានប្រាប់មន្ត្រីពាក់ព័ន្ធក្នុងមូលដ្ឋាន ឲ្យបន្តការតាមដានស្ថានភាពអាកាសធាតុ និងផលប៉ះពាល់នៅក្នុងមូលដ្ឋានរបស់ខ្លួន ជាមួយគ្នានេះ ត្រូវត្រៀមលក្ខណៈជាស្រេច ដោយប្រើប្រាស់កម្លាំងសរុប មធ្យោបាយសរុប ដើម្បីត្រៀមឆ្លើយតប និងជួយសង្គ្រោះប្រជាពលរដ្ឋឲ្យបានទាន់ពេលវេលា ក្នុងករណីកើតមានជាយថាហេតុនូវគ្រោះមហន្តរាយក្នុងភូមិសាស្រ្តរបស់ខ្លួន។
បេីយោងតាមរបាយការណ៍របស់ លោក អ៊ុម វិបុល ប្រធានមន្ទីរធនធានទឹក និងឧត្តុនិយមខេត្តកំពង់ចាម បានបញ្ជាក់ថា ចាប់គិតត្រឹមព្រឹកថ្ងៃទី១៨ ខែតុលា ឆ្នាំ២០២០នេះ ទឹកទន្លេមេគង្គខេត្តកំពង់ចាមមានកម្ពស់១១.២៨ បេីប្រៀបធៀបនឹងថ្ងៃម្សិលមិញឡេីង០.២១ម៉ែត្រ ចំពោះកម្រិតទឹកដែលត្រូវប្រកាសប្រុងប្រយ័ត្ន១៥,២០ ដោយឡែកនៅឆ្នាំ២០១៩កន្លងទៅទឹកមានកម្ពស់៥.៨០ម៉ែត្រ៕SRP