ខេត្តបាត់ដំបង៖សម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រួមជាមួយឯកឧត្តម មិកាមិ ម៉ាសាហ៉ីរ៉ូ ឯកអគ្គរាជទូតជប៉ុនប្រចាំនៅព្រះរាជាណាចក្រកម្ពុជានៅព្រឹកមិញនេះបានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឲ្យប្រើប្រាស់ជាផ្លូវការនូវកំណាត់ផ្លូវជាតិលេខ៥ ពីខេត្តបាត់ដំបងទៅក្រុងសិរីសោភណ្ឌ ខេត្តបន្ទាយមានជ័យ។

កំណាត់ផ្លូវនេះ មានប្រវែង ៨៤,៧៤គីឡូម៉ែត្រ គឺជាប្រភេទផ្លូវចាក់បេតុងកៅស៊ូ (AC) មានកម្រាស់ ១៥សង់ទីម៉ែត្រ ដែលបានចំណាយថវិកាសរុបប្រមាណ ១៦៥.៧៨លានដុល្លារអាមេរិក ជាឥនទានសម្បទានពីរាជរដ្ឋាភិបាលជប៉ុន រួមជាមួយនឹងថវិកាបដិភាគរបស់រាជរដ្ឋាភិបាល សម្រាប់ការងារដោះស្រាយផលប៉ះពាល់ បោសសម្អាតគ្រាប់មីន និងយុទ្ធភ័ណ្ឌមិនទាន់ផ្ទុះ។ 

សម្តេចតេជោ ហ៊ុន សែន ពិតជារីករាយចំពោះការទទួលបានសមិទ្ធផលថ្មីកំណាត់ផ្លូវជាតិលេខ៥ភាគខាងជើងតភ្ជាប់បាត់ដំបង ទៅបន្ទាយមានជ័យនាពេលនេះ។ សម្តេចតេជោ ហ៊ុន សែន បានថ្លែងថា រង់ចាំតែមួយឆ្នាំទៀតប៉ុណ្ណោះ ផ្លូវជាតិលេខ៥តភ្ជាប់ពីព្រែកក្តាម មកដល់ធ្លាម្អមខេត្តពោធិ៍សាត់ នឹងរួចរាល់ហើយ ខណៈពីធ្លាម្អមឆ្ពោះមកកាន់ខេត្តបាត់ដំបង ក៏អាចនឹងរួចរាល់ផងដែរ។ សម្តេចតេជោបានមានប្រសាសន៍ថា កំណាត់ផ្លូវជាតិលេខ៥នេះ គឺជាសមិទ្ធផលកើតចេញពីកិច្ចសហប្រតិបត្តិការដ៏ល្អរវាងកម្ពុជា និងជប៉ុនដែលមានជាយូរណាស់មកហើយ។ សម្តេចតេជោនាយករដ្ឋមន្ត្រីបានថ្លែងអំណរគុណដល់រាជរដ្ឋាភិបាល និងប្រជាជនជប៉ុន ដែលបានជួយសាងសង់សមិទ្ធផលផ្លូវ និងស្ពាននៅកម្ពុជា រួមទាំងជំនួយផ្សេងៗជាច្រើនទៀតដល់កម្ពុជា។ 

ទាក់ទងទៅនឹងទំនាក់ទំនងកម្ពុជា-ជប៉ុន នេះផងដែរ សម្តេចតេជោនាយករដ្ឋមន្ត្រី បានមានប្រសាសន៍ថា ប្រទេសជប៉ុនក៏បានរួមចំណែកក្នុងការស្វែងរកសន្តិភាព និងការអភិវឌ្ឍនៅកម្ពុជាផងដែរ។ ក្នុងឆ្នាំ២០២២នេះ គឺជាខួប៣០ឆ្នាំ ដែលជប៉ុនបានបញ្ជូនកងកម្លាំងរក្សាសន្តិភាពចេញក្រៅប្រទេស ហើយបញ្ជូនមកកម្ពុជាតែម្តង។ ដើម្បីអបអរសាទរនៃទំនាក់ទំនងនៃប្រទេសទាំងពីនេះ ជប៉ុន និងកម្ពុជាក៏មានរៀបចំនូវកម្មវិធីសំខាន់ៗមួយចំនួន ក្នុនោះ កងកម្លាំងស្វ័យការពារជើងទឹករបស់ជប៉ុន នឹងត្រូវរៀបចំឱ្យការធ្វើទស្សនកិច្ចនៅមូលដ្ឋានកងទ័ពជើងទឹករាម នៃខេត្តព្រះសីហនុ ដែលនឹងត្រូវធ្វើឡើងនាពេលខាងមុខ។ 

នៅថ្ងៃនេះសម្តេចតេជោក៏បានអបអរសាទរចំពោះការប្រកាសបើកបវេសនកាលឆ្នាំសិក្សា២០២១-២០២២ ដើម្បីផ្តល់ឱកាសឲ្យសិស្សានុសិស្សបានចូលរៀនឡើងវិញ ក្រោយពីកម្ពុជាបានបើកប្រទេសជាតិឡើងវិញកាលពីដើមខែវិច្ឆិកា២០២១។ សម្តេចតេជោនាយករដ្ឋមន្ត្រីក៏បានអោយក្រសួងស្ថាប័នពាក់ព័ន្ធបន្តយកចិត្តទុកដាក់អំពីសុវត្ថិភាពក្នុងការសិក្សារបស់សិស្សានុសិស្សអំឡុងពេលនៃការបើកបវេសនកាលនេះ។ 

ទាក់ទងទៅនឹងបញ្ហានៃជម្ងឺកូវីដ១៩ សម្តេចតេជោនាយករដ្ឋមន្រ្តីបានមានប្រសាសន៍ថា នៅថ្ងៃម្សិលមិញ ថ្ងៃទី០៩ ខែមករា ឆ្នាំ២០២២ កម្ពុជាបន្តរកឃើញមេរោគបំប្លែងថ្មី «អូមីក្រុង» កើតក្នុងសហគមន៍កម្ពុជា ចំនួន៣នាក់បន្ថែមទៀត។ ដូនច្នេះ សូមអោយប្រពលរដ្ឋទាំងអស់មានការប្រុងប្រយ័ត្នអោយបានខ្ពស់ ជាពិសេសអនុវត្តន៍វិធានការ៣កុំ ៣ការពារអោយបានខ្ចប់ខ្ជួន។ សម្តេចតេជោ ហ៊ុន សែន បានអំពាវនាវឱ្យបន្តចាក់វ៉ាក់សាំងដូសជំរុញដូសទី៤ បន្តទៀត។ សម្តេចតេជោ បានបញ្ជាឱ្យទិញវ៉ាក់សាំងចំនួន៥លានដូសបន្ថែមទៀត ខណៈក្នុងឃ្លាំងសល់ប្រមាណ ១០លានដូស  ការបញ្ជាទិញនេះ ដើម្បីធានាថា ពលរដ្ឋមានវ៉ាក់សាំងគ្រប់គ្រាន់សម្រាប់ការចាក់ដូសជំរុញ។ 

ទាក់ទងទៅនឹងដំណើរទស្សនកិច្ចការងាររបស់សម្តេចតេជោទៅមីយ៉ានម៉ា កាលពីពេលថ្មីៗនេះ សម្តេចតេជោ នាយករដ្ឋមន្ត្រី បានមានប្រសាសន៍អរគុណដល់ជប៉ុន ដែលបានប្រកាសគាំទ្រដំណើររបស់សម្តេចទៅកាន់មីយ៉ាន់ម៉ា។ សម្តេចតេជោបានថ្លែងថា លទ្ធផលនៃដំណើររបស់សម្តេចទៅមីយ៉ាន់ម៉ាមាន៣ គឺការពន្យារពេលបទឈប់បាញ់  ការផ្តល់ជំនួយ និងការសន្ទនាជាមួយភាគីពាក់ព័ន្ធរបស់មីយ៉ាន់ម៉ា។ សម្តេចតេជោ បានបង្ហាញក្តីសង្ឃឹមថា អាស៊ាន នឹងខិតខំក្នុងការដោះស្រាយបញ្ហាមីយ៉ាន់ម៉ា។ សម្តេចតេជោបន្តថា បញ្ហាមីយ៉ាន់ម៉ា មិនអាចបញ្ចប់ត្រឹមពេលកម្ពុជាធ្វើប្រធានអាស៊ាននោះទេ វានឹងបន្តទៅដល់ឥណ្ឌូនេស៊ី ធ្វើជាប្រធានអាស៊ានទៀត។ សកម្មភាពនេះមិនមែនជាការជ្រៀតជ្រែកកិច្ចការផ្ទៃក្នុងរបស់មីយ៉ាន់ម៉ានោះទេ តែជាការជួយសម្របសម្រួល។ សម្តេចតេជោបានថ្លែងថា លោក មីង អោងឡាំង បានបើកចិត្តទូលាយឱ្យចែកជំនួយមនុស្សធម៌ទៅគ្រប់ភាគី រួមទាំងអ្នកប្រឆាំងលោកផងដែរ។ សម្តេចតេជោ ហ៊ុន សែន បានថ្លែងថា ការធ្វើឱ្យមានបទឈប់បាញ់ និងការផ្តល់ជំនួយដល់ប្រជាពលរដ្ឋ គឺកិច្ចការចាំបាច់មុនឈានដល់ការសន្ទនាជាមួយអ្នកពាក់ព័ន្ធ ដែលធ្វើដោយប្រេសិតអាស៊ាន។

ទាក់ទៅនឹងសមិទ្ធផលផ្លូវនេះផងដែរ សម្តេចតេជោ ក៏បានថ្លែងអំណរគុណដល់ក្រសួងសាធារណការ និងដឹកជញ្ជូន អាជ្ញាធរមីនកម្ពុជា ព្រមទាំងអាជ្ញាធរពាក់ព័ន្ធទាំងអស់ ដែលបានប្រឹងប្រែងរួមគ្នាធ្វើ ក្នុងការស្ថាបនាធ្វើអោយប្រសើរឡើងនូវផ្លូវជាតិលេខ៥នេះ។ សម្តេចតេជោនាយករដ្ឋមន្ត្រី ក៏បានជូនពរឲ្យបងប្អូនប្រជាពលរដ្ឋទាំងអស់ជួបប្រទះតែសេចក្តីសុខសេចក្តីចម្រើនក្នុងឱកាសឆ្នាំថ្មីឆ្នាំសកល២០២២នេះ និងបានអញ្ជើញកាត់ខ្សែបូរសម្ពោធដាក់ឱ្យប្រើប្រាស់កំណាត់ផ្លូវជាតិលេខ៥ ពីបាត់ដំបង-សិរីសោភ័ណ ចាប់ពីពេលនេះតទៅ៕SRP

ខេត្តសៀមរាប៖សមាគមចលនាយុវជនកម្ពុជា (ក្រុម១៥៧) ខេត្តសៀមរាប បើកកិច្ចប្រជុំបូកសរុបលទ្ធផលការងារទិសដៅឆ្នាំ២០២១-ឆ្នាំ២០២២។

ការបើកកិច្ចប្រជុំនេះ នៅរសៀលថ្ងៃទី០៩ ខែមករា ឆ្នាំ២០២២នេះ  ស្ថិតនៅសណ្ឋាគារ បុរីអង្គរ ខេត្តសៀមរាប។ បន្ទាប់ពីប្រធានក្រុមការងារនៅតាមបណ្តាស្រុកទាំង១២ បានឡើងអានរបាយការណ៏បូកសរុបលទ្ធផលការងារកន្លងមក លោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម១៥៧) ខេត្តសៀមរាប មានប្រសាសន៍លើកឡើងថា ការងារសប្បុរសធម៍ដែលបានជួយដល់បងប្អូនប្រជាពលរដ្ឋ និងសង្គមជាតិ គឹកើតចេញពីការរួបរួមគ្នាជាកម្លាំងសាមគ្គីមួយ ដើម្បីចូលរួមជាមួយរាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែន ទើបធ្វើឲ្យយើងមានសុខសន្តិភាពរហូតមកដល់សព្វថ្ងៃនេះ។ ដូច្នេះ យើងទាំងអស់គ្នា គឺមានតែបេះដូងស្មោះ នឹងយកចិត្តទុកដាក់យ៉ាងខ្ពស់ដើម្បីធ្វើកិច្ចការងារមនុស្សធម៍បន្តទៀត។ លោកប្រធាន បានបន្តថា ក្រុមការងាររបស់យើងនៅតាមបណ្តាស្រុកទាំង១២ កន្លងមកយើងបានចំណាយទាំងកម្លាំងកាយកម្លាំងចិត្ត ទាំងធន់ធាន និងថវិកា សម្រាប់ជួយដល់ប្រជាពលរដ្ឋខ្វះខាតស្ទើរជារៀងរាល់ខែ។ 

ជាក់ស្តែង បើតាមរបាយការណ៍គិតចាប់តាំងពីឆ្នាំ២០២១ រហូតដល់ឆ្នាំ២០២២នេះ ដែលប្រធានក្រុមការងារតាមស្រុកនីមួយៗ បានបង្ហាថា នៅតាមបណ្តាស្រុកខ្លះៗ កម្លងមក ក្រុមការងារយើងបានចំណាយថវិកា និងសម្ភារដែលបានមកពីក្រុមការងារ និងសប្បុរសជននានា ហើយត្រូវបានចំណាយមិនក្រោមចាប់ពី ១០០០ដុល្លាឡើង ស្រុកខ្លះអាច ២០០០ដុល្លា-៣០០០ដុល្លា ឬក៏អាចរហូតដល់ទៅ ៥០០០ដុល្លា-១០០០០ដុល្លា និងស្រុកមួយចំនួនទៀត អាចជិតដល់២០០០០ដុល្លាក៏មានដែរ។ សម្ភារប្រើប្រាស់ និងថវិកាទាំងនេះ គឺបានមកពីការចូលរួមរបស់សមាជិកសមាជិកាសមាគមចលនាយុវជនកម្ពុជា (ក្រុម១៥៧) ដើម្បីចូលរួមគ្នាក្នុងការទិញនូវសម្ភារប្រើប្រាស់ នឹងប្រគល់ជូនបងប្អូនដែលងាយរងគ្រោះ នឹងខ្វះខាតសម្រាប់ប្រើប្រាស់ទៅតាមតម្រូវការចាំបាច់។ 

លោកបានអំពាវនាវដល់បងប្អូនប្រជាពលរដ្ឋទាំងអស់ មេត្តាយកចិត្តទុកដាក់ឲ្យបានខ្ពស់បន្ថែមទៀត ក្នុងការធ្វើអនាម័យជាប្រចាំ ដើម្បីការពារខ្លួនយើង ក្រុមគ្រួសារយើង ក៏ដូចជាសង្គមជាតិទាំងមូលផងដែរ៕SRP

ខេត្តត្បូងឃ្មុំ៖មន្ត្រីសាខា ក.ប.ប. សហការជាមួយមន្ទីរពាណិជ្ជកម្មខេត្តត្បងឃ្មុំ ចុះត្រួតពិនិត្យផលិតផលទំនិញ នៅផ្សារមេមត់ ដេីម្បីណែនាំដល់អាជីវករលក់ទំនិញទាំងឡាយ​ ដែលមិនបានបង់ពន្ធត្រឹមត្រូវ ទាំងពន្ធគយ និងពន្ធដារ​ ឲ្យនាំគ្នាទៅបង់ពន្ធជូនរដ្ឋ។ ការ​ចុះ​ត្រួតពិនិត្យ​មុខ​ទំនិញ​​នេះបានធ្វើឡើងនៅព្រឹកថ្ងៃទី៨ ខែមករា ឆ្នាំ២០២២​។ 

លោក សាន វិជ្ជាសារ៉ាវុទ្ធ បានឲ្យដឹងថា ការលក់ដូររបស់អាជីវករមានលក្ខណៈល្អត្រឹមត្រូវច្រើន ហើយទំនិញដែលមិនអនុលោមភាពនោះមានតិចទួចទេ តួនាទីរបស់ ក.ប.ប យើង គឺការពារអ្នកប្រើប្រាស់ និងបង្ក្រាបការក្លែងបន្លំគ្រប់រូបភាព គ្រប់មធ្យោបាយ ជា​ប្រយោជន៍​ដល់​បងប្អូនប្រជាពលរដ្ឋទិញយកទៅប្រើប្រាស់ប្រកបដោយគុណភាព និងមិនប៉ះពាល់ដល់សុខភាពផងដែរ​។ 

លោក ប្រធាន សាខា ក.ប.ប ខេត្ត បានបញ្ជាក់ថា ជាលទ្ធផលមន្ត្រីជំនាញបានធ្វើការដកហូតផលិតផលដែលមិនអនុលោមច្បាប់ រួមមាន​៖

១-ស្ករ Milky Vitamin Candy ចំនួន ២៥កំប៉ុង ស្មើ ១២.៥គីឡូក្រាម

២-ឡេ Yura in White ចំនួន ៦កំប៉ុង ស្មើ ១.៨គីឡូក្រាម

៣-ឡេ Vitamin Candy ចំនួន ២០កំប៉ុង ស្មើ ៦គីឡូក្រាម

៤-ឡេកូនក្រមុំ ចំនួន ១៥កំប៉ុង ស្មើ ៧.៥គីឡូក្រាម

៥-ធុងលាយឡេ និងឡេ ចំនួន ២គីឡូក្រាម

៦-ឡេកំប៉ុងចម្រុះ ចំនួន ៧.៥គីឡូក្រាម

៧-ឡេ DDY White 3days ចំនួន ៩៤កំប៉ុង ស្មើ ៦៥.៨គីឡូក្រាម

សរុបមានចំនួន ១០៣.១០គីឡូក្រាម ហើយមន្ត្រីជំនាញក៏បានធ្វើការពន្យល់ណែនាំដល់អាជីវករឲ្យដាក់តាំងលក់ផលិតផលទំនិញប្រកបដោយស្តង់ដារអនាម័យខ្ពស់ ចេះមើលអាយុកាលទំនិញ និងផលិតផលទំនិញដែលអនុលោមច្បាប់ មុននិងលក់ទៅដល់ដៃអ្នកប្រើប្រាស់ ចៀសវាងការខាតបង់សេដ្ឋកិច្ចគ្រួសារ និងប្រឈមចំពោះមុខច្បាប់៕SRP

ខេត្តសៀមរាប៖ក្រុមហ៊ុនចំនួន២ បានចុះអនុស្សរណៈនៃការយោគយល់ ដើម្បីពង្រឹងពង្រីក និងថែរក្សាទីផ្សារដៃគូរទៅវិញទៅមក តាមរយៈការផ្តល់ការអនុគ្រោះយោគយល់ជាមួយតម្លៃពិសេស និងលក្ខខណ្ឌពិសេស រវាងក្រុមគ្រួសារភូមិកសិករគំរូ និងក្រុមគ្រួសារយក្សា ទៅលើការប្រើប្រាស់សេវា និងផលិតផល។

ការចុះអនុស្សរណៈនៃការយោគយល់គ្នា (MOU) នេះត្រូវបានធ្វើឡើងកាលពីល្ងាចថ្ងៃទី០៨ នៃមករា ឆ្នាំ២០២២ ស្ថិតនៅភូមិក្រពើជាប់ត្រាវកុដ្ធ ឃុំបាល្ល័ង្គ ស្រុកប្រាសាទបាគង ខេត្តសៀមរាប រវាងក្រុមហ៊ុន រីថាយអឺរមេនហូម&រីសតអ៊ិនវេសម៉ិន ឯ.ក អាស័យដ្ឋាន៖ ផ្ទះលេខ ២០០៩–២០១០ បុរីទេសចរណ៍ ភូមិគោគត្នោត ឃុំកណ្តែក ស្រុកប្រាសាទបាគង ខេត្តសៀមរាប (នៅទីនេះហៅថា “ភាគី ក”) និងក្រុមហ៊ុន យក្សា បោកអ៊ុត ឯ.ក អាស័យដ្ឋានខេត្តសៀមរាប (នៅទីនេះហៅថា “ភាគី ខ”) គឺជាសមូហភាពហៅថាជា “គូភាគី” ។ 

លោក ង៉ាយ ម៉េងលី ជាស្ថបនិកនៃក្រុមហ៊ុន រីថាយអឺរមេនហូម&រីសតអ៊ិនវេសម៉ិន ឯ.ក បានបង្ហាញថា  គោលបំណងនៃអនុស្សរណៈក្នុងការយោគយល់គ្នានេះ គឺដើម្បីបង្កើតមូលដ្ឋានសុច្ឆន្ទៈរវាងគូភាគី សម្រាប់កិច្ចខិតខំប្រឹងប្រែងរួមគ្នាដែលផ្ដល់ផលប្រយោជន៍ទៅវិញទៅមក។ ភាគីទាំងពីរយល់ព្រមធ្វើការជាមួយគ្នាក្នុងលក្ខណៈសហប្រតិបត្តិការ និងសម្របសម្រួល ដើម្បីសម្រេចបាននូវបំណងរួមនៃភាពជាដៃគូ គឺការពង្រឹងពង្រីក និងថែរក្សាទីផ្សារនៃដៃគូរទៅវិញទៅមកតាមរយៈការផ្តល់ការអនុគ្រោះយោគយល់ជាមួយតំលៃពិសេស និងលក្ខខណ្ឌពិសេស រវាងក្រុមគ្រួសារភូមិកសិគំរូ និងក្រុមគ្រួសារយក្សាបោកអ៊ុត ទៅលើការប្រើប្រាស់សេវា និងផលិតផលគូភាគីទាំងសងខាង ដើម្បីបំរើនិរន្តន៍ភាពយូរអង្វែង ដើម្បីសម្រេចបាននូវបំណងប្រាថ្នាទៅវិញទៅមករបស់ភាគីនីមួយៗយល់ព្រមចំពោះតួនាទីរៀងៗខ្លួន។

លោក ង៉ាយ ម៉េងលី បានបន្តថា ក្រុមហ៊ុន រីថាយអឺរមេនហូម&រីសតអ៊ិនវេសម៉ិន ឯ.ក គឺយើងមានសេវាកម្មពុះដីឡូលក់ ផ្ទះ វិឡា និងមានភូមិកសិកគំរូសម្រាប់ដាំដុះបន្លែបង្កាផងដែរ។ ដោយឡែកក្រុមហ៊ុន យក្សាបោកអ៊ុត គឺមានសេវាកម្ម បោកអ៊ុត និងលក់ចែកចាយសាប៊ូ​ហើយមានសាខានៅទូទាំងប្រទេសជាង២០០០សាខារួចមកហើយ។ 

ការចុះMOUនេះបន្ទាប់ពីមើលឃើញពីភាពរីកចម្រើននៅក្នុងខេត្តសៀមរាប ពីរមួយឆ្នាំ ទៅមួយឆ្នាំ និងស្របពេលដែលរាជរដ្ខាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន បានបើកប្រទេសឲ្យល្អប្រសើរឡើងវិញជាធម្មតា បន្ទាប់ពីបានបិទប្រទេសមួយរយ:ពេល ដោយសារព្រឹត្តិការណ៏សហគមន៏ ២០កុម្ភ: កូវិដ.១៩ បានផ្ទុះរីករាលដាលទូទាំងប្រទេសកន្លងមក។ 

សូមជម្រាបថាកម្មវិធីនេះ ក៏មានការចាប់រង្វាន់ឆ្នោតមហាសំណាងធំ គឺវិឡាដែលមានតម្លៃរហូតដល់១០០លានរៀល និងមានដីឡូតិ៍មួយចំនួនផងដែរ៕SRP

ខេត្តកំពង់ចាម​៖ក្នុង​អង្គសន្និបាតគណ:កម្មាធិការគណបក្ស ឃុំល្វាលើ ស្រុកចំការលើ ខេត្តកំពង់ចាម​ នារសៀលថ្ងៃទី៨​ ខែមករាម្សិលមិញនេះ​ លោក សុក ផេង រដ្ឋលេខាធិការទីស្ដីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាល ចុះមូលដ្ឋានឃុំល្វាលើ បានថ្លែងអំណរគុណដល់លោក ហ៊ុន ម៉ានិត ប្រធានក្រុមការងាររាជរដ្ឋាភិបាលចុះមូលដ្ឋានស្រុកចំការលើ ដែលតែងតែជួយឧបត្ថម្ភ និងដោះស្រាយនូវរាល់បញ្ហាប្រឈមនានាជូនប្រជាពលរដ្ឋ ក៏ដូចជាគណៈបក្សក្នុងឃុំល្វាលើ កន្លងទៅផងដែរ។

គួរ​បញ្ជាក់​ថា​ គណៈអចិន្រ្តៃយ៍គណៈកម្មាធិការគណបក្សឃុំល្វាលើ បានបេីកអង្គសន្និបាតបូកសរុបវាយតម្លៃអំពីសមិទ្ធផល បញ្ហាប្រឈម និងសតិអារម្មណ៍ប្រជាពលរដ្ឋក្នុងការអនុវត្តគោលនយោបាយរបស់គណបក្សសម្រាប់អភិវឌ្ឍឃុំពីឆ្នាំ២០១៧ ដល់ឆ្នាំ២០២២ និងកំណត់គោលនយោបាយសម្រាប់បន្តអភិវឌ្ឍឃុំពីឆ្នាំ២០២២ ដល់ឆ្នាំ២០២៧ សំដៅដណ្ដើមជ័យជម្នះក្នុងការបោះឆ្នោតជ្រើសរើសក្រុមប្រឹក្សាសង្កាត់អាណត្តិទី៥ ដែលនឹងប្រព្រឹត្តិទៅនាថ្ងៃទី៥ ខែមិថុនា ឆ្នាំ២០២២ ខាងមុខនេះ។ ជាមួយគ្នានេះ សន្និបាតក៏បានប្រកាសបង្ហាញមុខបេក្ខជន ដែលត្រូវឈរឈ្មោះបោះឆ្នោតជ្រើសរើសក្រុមប្រឹក្សាឃុំ ក្នុងអាណត្តិទី៥នេះផងដែរ។

ពិធីនេះ ធ្វើឡើងនៅស្នាក់ការគណបក្សប្រជាជនកម្ពុជា ឃុំល្វាលើ ស្រុកចំការលើ ដោយមានការអញ្ជើញចូលរួមជាគណៈអធិបតីពីសំណាក់ លោក ខ្លូត ចិន្តា សមាជិកអចិន្ត្រៃយ៍គណៈកម្មាធិការគណបក្សខេត្ត និងជាអនុប្រធានក្រុមការងារថ្នាក់ខេត្តចុះជួយស្រុកចំការលើ លោក កែវ នាឫទ្ធិ សមាជិកអចិន្ត្រៃយ៍គណៈកម្មាធិការគណបក្សខេត្តកំពង់ចាម និងមានការអញ្ជើញចូលរួមពី លោក លោកស្រី ដែលជាសមាជិកសមាជិកាអង្គសន្និបាត សរុប ២១៣នាក់​៕SRP

ខេត្តសៀមរាប៖អភិបាលខេត្តសៀមរាបលោកទៀ សីហា បានលើកឡើងថា ភាពជោគជ័យនៃការអនុវត្តគម្រោងសាងសង់ ហេដ្ឋារចនាសម្ព័ន្ធផ្លូវ៣៨ខែ្ស សម្រាប់អភិវឌ្ឍន៍ក្រុងទេសចរណ៍សៀមរាប-អង្គរ ជាចំណងដៃដ៏ពិសិដ្ឋនៃសម្តេចតេជោ ប្រមុខនៃរាជរដ្ឋាភិបាលកម្ពុជា ទាំងការតស៊ូប្តូរផ្តាច់ ឆ្លងកាត់វិបត្តិកូវីដ-១៩ ដើម្បីអនាគត ដែលត្រូវរង់ចាំ ដោយការប្រើប្រាស់ឱកាស ជាដំណោះស្រាយ បញ្ហាប្រឈម ប្រកបដោយប្រសិទ្ធភាព។

លោកក៏បានថ្លែងណែនាំដល់បណ្តាក្រុង ស្រុង ធ្វើការផ្សព្វ ផ្សាយជូនប្រជាពលរដ្ឋ នៅតាមមូលដ្ឋាន មកទទួលការចាក់វ៉ាក់សាំងដូសទី៣ (ដូសជម្រុញ)ឲ្យបានគ្រប់ៗគ្នា នៅថ្ងៃទី១០ មករាខាងមុខនេះ និង ជម្រុញយកចិត្តទុកដាក់លើកការងារសន្តិសុខ សណ្តាប់ធ្នាប់សាធារណៈ ផងដែរ។

បើតាមប្រសាសន៍ លោកទៀ សីហាក្នុងរយៈពេល១ឆ្នាំមកនេះ ខេត្តសៀមរាប បានរងគ្រោះដោយវិបត្តិកូវិដ១៩ ដែលធ្វើវិស័យសេដ្ឋកិច្ចក្នុងខេត្តធ្លាក់ចុះ។ ក្នុងករណីនេះលោកស្នើឲ្យមានកិច្ចសហការគ្នាពីគ្រប់បណ្តាមន្ទីរ អង្គភាពកងកម្លាំងទាំង៣ ក្នុងប្រយុទ្ធប្រឆាំងទប់ស្កាត់ និង កាត់ផ្តាច់ខ្សែចម្លងវីរុសកូវីដ សំខាន់វីរុសបម្លែងថ្មី (អូមីក្រុង) មិនឲ្យចូលក្នុងសហគមន៍នោះឡើយ។

លោកមានប្រសាសន៍យ៉ាងដូច្នេះ ក្នុងកិច្ចប្រជុំសាមញ្ញលើកទី៣២ របស់ក្រុមប្រឹក្សាខេត្តសៀមរាប អាណត្តិទី៣កាលថ្ងៃទី០៦ ខែមករា ឆ្នាំ២០២២។

នៅក្នុងកិច្ចប្រជុំ លោក អ៊ាន ឃុន ប្រធានក្រុមប្រឹក្សាខេត្តសៀមរាបបានណែនាំដល់កម្លាំងសមត្ថកិច្ច ក៏ដូច អាជ្ញាធរក្រុង ស្រុក បង្កើនការយកចិត្តទុកដាក់លើការងារសន្តិសុខ សណ្តាប់ធ្នាប់សាធារណៈ ក្នុងការរក្សាសន្តិសុខសុវត្ថិភាពជូដល់ប្រជាពលរដ្ឋ ភ្ញៀវជាតិ អន្តរជាតិ៕SRP

ខេត្តកំពង់ចាម​៖អភិបាលខេត្តកំពង់ចាម​ លោក​ អ៊ុន ចាន់ដា នៅព្រឹកមិញនេះបានចុះពិនិត្យការដ្ឋានអ៊ុតផ្លូវ​កៅស៊ូ​ បេទីម ចំនួន​២ខ្សែ ប្រវែងជិត៧០០ម៉ែត្រ ស្ថិតនៅក្នុងសង្កាត់បឹងកុក ក្រុងកំពង់ចាម​។

ឆ្លៀត​​​ក្នុង​ឱកាស​ចុះ​ពិនិត្យ​គម្រោង​​​ស្ថាបនា​ផ្លូវ​ខាង​លើនេះ​ដែរ លោក​ អ៊ុន​ ចាន់ដា​​ ក៏បាន​ជួប​សំណេះសំណាល​សាកសួរ​សុខទុក្ខ​ បងប្អូន​ប្រជាពលរដ្ឋ​ ដែល​រស់នៅ​តាម​បណ្តោយដង​ផ្លូវ​ខាងលេី​ ខណៈ​ពួកគាត់​មាន​ការ​ត្រេកអរ​សាទរ​​ជា​ខ្លាំងចំពោះសមិទ្ធផលថ្មី​នេះ​គឺជា​ការ​បង្ក​លក្ខណៈ​ងាយ​ស្រួល​ដល់​ការ​​ធ្វើដំណើរ​ ​របស់​បងប្អូន​​ប្រជាពលរដ្ឋ​ ​ក៏ដូចជា​អ្នក​រស់នៅ​ក្នុងតំបន់​នោះ​ផងដែរ​។ ​

គួរ​បញ្ជាក់​ថា​ គម្រោងជួសជុលផ្លូវកៅស៊ូ ប្រភេទ​AC ប្រវែង ៦៥២ម៉ែត្រ ទទឹង​៧.៥​ ម៉ែត្រ លើកំណាត់ផ្លូវលេខ៤៩ចាប់ពី កែងផ្លូវត្រសក់ផ្អែម​ រហូតដល់ផ្លូវភ្លោះមុនីវង្ស(ក្រោយសាលាបឋមសិក្សាឧត្តរ)​ ស្ថិតក្នុងសង្កាត់ កំពង់ចាម​ ក្រុងកំពង់ចាម សរុប​តម្លៃ​ ​៧០៤​លានរៀល​ ដែលជាប្រភពថវិការបស់រាជរដ្ឋាភិបាលកម្ពុជា តាមរយៈរដ្ឋបាលខេត្តកំពង់ចាម សម្រាប់​ឆ្នាំ២០២២​៕SRP

ខេត្ដព្រះវិហារ៖សមត្ថកិច្ចកងរាជអាវុធហត្ថខេត្តព្រះវិហារបានឃាត់ខ្លួនបុរសជាប្ដីក្រោយបើកការស៊ើបអង្កេតរកឃើញថាសម្លាប់ប្រពន្ធរបស់ខ្លួនប៉ុន្តែបង្វែរជារឿងប្រពន្ធធ្វើអត្ដឃាតដោយខ្លួនឯង។

ការឃាត់ធ្វើឡើងនៅថ្ងៃទី៦ ខែមករា ឆ្នាំ២០២២ ក្រោយការបើកស៊ើបអង្គេត ដឹកនាំសម្របសម្រួលដោយផ្ទាល់ពីលោក វុធ សាវី ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងខេត្តព្រះវិហារ។

សមត្ថកិច្ចខេត្តបានឲ្យដឹងថា ស្ត្រីជនរងគ្រោះដែលត្រូវបានប្ដីរបស់ខ្លួនសម្លាប់ ឈ្មោះយ៉ុង សុីធឿង ជាមេតុងទីនបានចងកសម្លាប់ខ្លួនឯង ។ 

សមត្ថកិច្ចខេត្តព្រះវិហារបន្តថាក្រោយពីបានចុះពិនិត្យដល់ទីតាំងកើតហេតុ ប្រមូលបានវត្ថុតាងមួយចំនួននៅផ្ទះជនរងគ្រោះ និងបានស្តាប់ចម្លើយសាក្សី ព្រមទាំងស្តាប់ចម្លើយរបស់ជនសង្ស័យឈ្មោះ វិញ ទិត្យបុផា ភេទប្រុស អាយុ ៥៣ឆ្នាំ មុខរបរមន្ត្រីរាជការ មានស្រុកកំណើតនៅសង្កាត់លេខ ៥ ក្រុងភ្នំពេញ បច្ចុប្បន្ននៅភូមិស្រះឈូក សង្កាត់កំពង់ ប្រណាក ក្រុងព្រះវិហារ។

ដែលត្រូវជាប្តីរបស់ស្រ្តីជនរងគ្រោះ តំណាងអយ្យការបានរកឃើញតម្រុយពិរុទ្ធភាព និងសម្រចបើកការស៊ើបសួរទៅលើជនសង្ស័យខាងលើពីបទឃាតកម្មគិតទុកជាមុន និងសន្និធិអាវុធដោយគ្មានលិខិតអនុញ្ញាត តាមបញ្ញតិ្តមាត្រា២០០ និងមាត្រា៤៨៨ នៃក្រមព្រហ្មទណ្ឌ។

សូមរំលឹកថាហេតុការណ៍ឃាតកម្មនេះបានកើតឡើងកាលរសៀលថ្ងៃទី១៨ ខែមិនា ឆ្នាំ២០២១ ភូមិស្រះឈូក សង្កាត់កំពង់ប្រណាក ក្រុងខេត្តព្រះវិហារ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម​ បានរំលឹកប្រាប់ដល់អ្នកចូលរួម និងប្រជាពលរដ្ឋទាំងអស់ត្រូវបង្កើនការពារខ្លួន ថែរក្សាអនាម័យអោយបានជាប្រចាំ ដោយបុគ្គលម្នាក់ៗ ក៏ដូចជាក្រុមគ្រួសារនីមួយៗ ត្រូវបន្តរៀនរស់ជាមួយជំងឺកូវីដ-១៩ ដែលចាំបាច់ ត្រូវអនុវត្ត អោយបានខ្ជាប់ខ្ជួន នូវវិធានសុខាភិបាល ” ៣ការពារ ៣កុំ “ដើម្បីចៀសផុតពីការឆ្លងជំងឺដ៏កាចសាហាវនេះ។

លោក អ៊ុន ចាន់ដា បន្តថា​ ពិតមែនតែស្ថានភាព​ជំងឺ​កូវីដ​-១៩​ បានធូរស្រាល​ ហើយ សម្តេចតេជោ នាយករដ្ឋមន្ត្រី បានប្រកាសបើកប្រទេសពេញលេញឡើងវិញក្តី តែម្នាក់ៗ មិនត្រូវធ្វេសប្រហែស ឬមើលស្រាលបានឡើយ ទោះជាបានចាក់វ៉ាក់សាំងរួចហើយក្តី។

លោកមានប្រសាសន៍យ៉ាងដូច្នេះ នៅព្រឹកមិញនេះ ក្នុងឱកាសប្រគល់ផ្ទះមនុស្សធម៌ទី៧ ជូន ជនមានពិការភាពទ័លក្រ ១គ្រួសារ ឈ្មោះសុខ សុភាព អាយុ៣៦ឆ្នាំ រស់នៅភូមិកកោះ ឃុំត្រពាំងព្រះ ស្រុកព្រៃឈរ។

គួរ​បញ្ជាក់​ថា​ បុរស​ឈ្មោះ​ សុខ សុភាព ជាជនមានពិការភាព( ស្វិតជើងទាំង២ ពីកំណើត) ទ័លក្រ មានប្រពន្ធ និងកូនស្រី ប្រុស ២នាក់ (អាយុ៦ឆ្នាំ និង៣ឆ្នាំ) ក្នុងបន្ទុក។​ ដោយស្ថានភាពលំបាកនេះ លោក អ៊ុន ចាន់ដា ប្រធានគណៈកម្មាធិការសាខា បានសម្រេចផ្តល់ជូនផ្ទះឈើខ្ពស់ផុតពីដី ប្រក់ស័ង្កសី (ទំហំ ៤ម×៦ម ) ១ខ្នង តម្លៃ ៩លាន​ និង៨០ម៉ឺនរៀល​។ ក្នុង​នោះ​ក៏​បានផ្តល់ជូន​នូវអំណោយ​សម្រាប់ឡើងផ្ទះថ្មីនេះ រួមមាន អង្ករ ១០០គក្រ, ត្រីខ ២០កំប៉ុង, ទឹកត្រី ១២ដប ទឹកស៊ីអ៊ីវ ១២ដប, មី ២កេស, ឃីត ២សម្រាប់, អាវយឺត ៨, ម៉ាស់ ៥០ បន្ទះ , សម្ភារផ្ទះបាយ និងថវិកា ៦០ម៉ឺនរៀល​។ ដោយឡែក លោកតា លោកយាយ ដែលអញ្ជើញចូលរួមជាសាក្សី ក្នុងពិធីប្រគល់-ទទួលផ្ទះថ្មីនេះ ចំនួន ១៨នាក់ ក្នុងម្នាក់ៗ ទទួល​បាន​អង្ករ ត្រីខ ឃីត មី ទឹកត្រី ទឹកស៊ីអ៊ីវ និង អាវយឺត ព្រមទាំង ថវិកាចំនួន ២ម៉ឺនរៀលផងដែរ​៕SRP

ភ្នំពេញ៖លោក ជាម ច័ន្ទសោភ័ណ បាន​លេីកឡេីងថា​ តាមរយៈការប្រកួតប្រជែង បានឆ្លុះបញ្ចាំងនូវការចូលរួមលើកកម្ពស់វិស័យកីឡា ឱ្យមានការវិវឌ្ឍឈានទៅមុខ ដើម្បីជាកត្តាមួយនាំឱ្យមានសុខភាពល្អទាំងផ្លូវកាយ និងផ្លូវចិត្ត រួមទាំងទទួលបានចំណងសាមគ្គីភាព ភាតរភាព និងមិត្តភាពស្និទ្ធស្នាល និងបង្កើតឱ្យមានកម្មវិធីវាយសីនេះបន្តទៅឆ្នាំក្រោយៗទៀត។

លោកក៏បានបានអបអរសាទរចំពោះជ័យលាភី ដល់ក្រុមជ័យលាភី ដែលបានខិតខំប្រកួតប្រជែងលើប្រភេទកីឡាមួយនេះ ដែលជាចូលរួមលើកស្ទួយវិស័យកីឡានៅក្នុងខេត្ត ពិសេសចំរាញ់យកគុណភាពកីឡាករទៅកាន់ថ្នាក់ជាតិ។

លោក ជាម ច័ន្ទសោភ័ណ អភិបាលខេត្តត្បូងឃ្មុំ ថ្លែងបែបនេះនៅថ្ងៃទី៦ ខែមករា ឆ្នាំ២០២២នេះ​ ក្នុងឱកាសអញ្ជើញប្រគល់ពានរង្វាន់ដល់ក្រុមកីឡាផ្នែកវាយសី ក្នុងការប្រកួតកីឡាមហាជន ដេីម្បីចូលរួមអបអរសាទរ​ទិវា​ជ័យជំនះ​ ខួបលេីកទី៤៣ឆ្នាំ​ ថ្ងៃ​៧មករាឆ្នាំ១៩៧៩​-​២០២២​ ដែលធ្វើឡើងនៅក្លឹបវាយសីស្តេចកន។

បើតាមលោក អុិន ពៅសម្បត្តិ ប្រធានមន្ទីរអប់រំ យុវជន និងកីឡាខេត្តត្បូងឃ្មុំ ឲ្យដឹងថា តាមរយៈការប្រកួតប្រជែងយ៉ាងស្វិតស្វាញ អស់រយៈពេល២ថ្ងៃ នៅថ្ងៃទី៥ និងទី៦ ខែមករា ឆ្នាំ២០២២ ជាលទ្ធផល

ប្រភេទកីឡាវាយសី អាយុ ៥០ឆ្នាំឡើង 

-ចំណាត់ថ្នាក់លេខ ១ បានទៅលើក្រុមកីឡា ឧកញ្ញា អាន ម៉ាឌី និង កញ្ញា ឡេង ដាវី មកពីក្លឹបវាយសីម៉ារីសា ដោយទទួលបាន ពាន ១ ទង់អនុស្សាវរីយ៍ ១ សម្ភារៈកីឡា ថវិកា និង ម៉ូតូ​ ១ គ្រឿង

– ចំណាត់ថ្នាក់លេខ ២ បានទៅលើក្រុមកីឡា ឧកញ្ញា ម៉ែន សុភក្តិ និង លោក ស៊ាន កុសល្យ មកពីក្លឹបវាយសីចំការកៅស៊ូជប់ ដោយទទួលបានទង់អនុស្សាវរីយ៍ ១ សម្ភារៈកីឡា និងថវិកា ២លានរៀល ។

– ចំណាត់ថ្នាក់លេខ ៣ បានទៅលើក្រុមកីឡា លោក ជឹម ចាន់រិទ្ធ និង លោក អោម មុន្នី មកពីក្លឹបវាយសីម៉ារីសា  ដោយទទួលបាន ទង់អនុស្សាវរីយ៍ ១ សម្ភារៈកីឡា និងថវិកា ១លានរៀល ។

សម្រាប់ប្រភេទកីឡាវាយសី ក្រោមអាយុ ៥០ ឆ្នាំ 

-ចំណាត់ថ្នាក់លេខ ១ បានទៅលើក្រុមកីឡា លោក ស៊ឹម ពិសី និង លោក អ៉ិត ឡេង មកពីក្លឹបវាយសីស្តេចកន ដោយទទួលបាន ពាន ១ ទង់អនុស្សាវរីយ៍ ១ សម្ភារៈកីឡា ថវិកា និង ម៉ូតូ ០១ គ្រឿង ។ 

– ចំណាត់ថ្នាក់លេខ ២ បានទៅលើក្រុមកីឡា លោក កែវ ចិន និង លោក ទិត្យ ប៊ុនឆៃ មកពីក្លឹបវាយសីម៉ារីសា ដោយទទួលបាន ទង់អនុស្សាវរីយ៍ ១ សម្ភារៈកីឡា និងថវិកា ២ លានរៀល ។

– ចំណាត់ថ្នាក់លេខ ៣ បានទៅលើក្រុមកីឡា លោក រ៉ន សូហ៊ាង និង លោក ជា វិចិត្រ មកពីក្លឹបវាយសីស្តេចកន ដោយទទួលបាន ទង់អនុស្សាវរីយ៍ ១ សម្ភារៈកីឡា និងថវិកា ១ លានរៀល ផងដែរ​៕SRP

ភ្នំពេញ៖សម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅព្រឹកថ្ងៃសុក្រ ទី៧ ខែមករា ឆ្នាំ២០២២នេះ បានអញ្ជើញទៅបំពេញទស្សនកិច្ចទៅកាន់ប្រទេសមីយ៉ាន់ម៉ា។ ក្នុងដំណើរទស្សនកិច្ចនៅប្រទេសមីយ៉ាន់ម៉ានេះ សម្តេចតេជោ បាននាំទៅជាមួយជំនួយជាម៉ាស់ជាង ៣លាន និងគ្រឿងបរិក្ខារមួយចំនួនទៀត ដើម្បីចូលរួមប្រយុទ្ធប្រឆាំងការរាតត្បាតជំងឺកូវីដ-១៩នៅក្នុងប្រទេសមីយ៉ាន់ម៉ាផងដែរ។

ដំណើរទស្សនកិច្ចរបស់សម្តេចតេជោនាយករដ្ឋមន្ត្រីនៅក្នុងប្រទេសមីយ៉ាន់ម៉ាមានរយៈពេល២ថ្ងៃ គឺថ្ងៃទី០៧ និងថ្ងៃទី០៨ ខែមករា ឆ្នាំ២០២២។ ដំណើរទស្សនកិច្ចនេះធ្វើឡើងតបតាមការអញ្ជើញរបស់នាយឧត្តមសេនីយ៍ជាន់ខ្ពស់ មីន អោង ឡាំង ប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា។ ដំណើរទស្សនកិច្ចរបស់សម្តេចតេជោនាយករដ្ឋមន្ត្រី បានអមដំណើរដោយឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងមន្ត្រីជាន់ខ្ពស់នៃរាជរដ្ឋាភិបាលកម្ពុជាមួយចំនួនទៀត។

ក្នុងដំណើរទស្សនកិច្ចនេះ សម្តេចតេជោ នឹងមានជំនួបទ្វេភាគីជាមួយ នាយឧត្តមសេនីយ៍ជាន់ខ្ពស់ មីន អោង ឡាំង ដើម្បីពិភាក្សា និងផ្លាស់ប្តូរទស្សនៈអំពីកិច្ចសហប្រតិបត្តិការទ្វេភាគី និងពហុភាគី និងការវិវត្តថ្មីៗនៅក្នុងអាស៊ាន៕SRP