ខេត្តកំពង់ឆ្នាំង៖ក្នុងពិធីសំណេះសំណាល និងប្រគល់បណ្ណសរសើរមេត្រីបរិស្ថានដល់មន្ត្រីឧទ្យានុរក្សឆ្នើមនៅមន្ទីរបរិស្ថានខេត្តកំពង់ឆ្នាំង នាថ្ងៃទី៨ ខែកញ្ញា ព្រឹកមិញនេះ លោក នេត្រ ភក្ត្រា រដ្ឋលេខាធិការក្រសួងបរិស្ថាន បានថ្លែងថា៖ មន្ត្រីឧទ្យានុរក្ស បានដើរតួនាទីដ៏សំខាន់ ក្នុងការពារនិងអភិរក្ស ធនធានធម្មជាតិ។ ដូច្នេះ ហើយក្រសួង បរិស្ថានសូមអរគុណចំពោះមន្ត្រី ឧទ្យានុរក្ស ទាំងអស់ ដែលបានលះបង់កម្លាំងកាយ កម្លាំងចិត្តក្នុង ការបំពេញការងារប្រកបដោយមោទកភាពនេះ។

លោកបានថ្លែងថា មន្ត្រីឧទ្យានុរក្សមិនមែនត្រឹមតែបំពេញការងារតាមតួនាទីភារកិច្ចតាមឯកសណ្ឋាននោះទេ តែបានបំពេញតួនាទីជាឪពុកម្តាយ ជីដូនជីតាការពារធនធានធម្មជាតិ សម្រាប់កូនចៅរាប់ជំនាន់តទៅមុខទៀត។

សូមជម្រាបថា លោកបានប្រគល់ប័ណ្ណសរសើរមេត្រីបរិស្ថាន ដល់មន្ត្រីឧទ្យានុរក្សឆ្នើមចំនួន ៥ រូប ដែលនេះជាការទទួលស្គាល់ពីការបំពេញការងារ ប្រកបដោយ ការទទួលខុសត្រូវនិង វិជ្ជាជីវៈដើម្បីបុព្វហេតុបរិស្ថាននិងធនធានធម្មជាតិ។ លោកក៏បានប្រគល់នូវសម្ភារមួយចំនួន របស់ក្រសួងបរិស្ថាន សម្រាប់បម្រើឱ្យការងារ ចុះល្បាតក្នុងការការពារនិងអភិរក្ស ធនធានធម្មជាតិផងដែរ៕SRP

ខេត្តសៀមរាប៖អាជ្ញាធរបានណែនាំឲ្យសេវាកម្មទេសចរណ៍ ទាំងអស់ ក្នុងខេត្តសៀមរាប ត្រូវអនុវត្តតាមគន្លងថ្មី សម្រាប់ដំណើរការអាជីវកម្មរបស់ខ្លួន។

ការណែនាំធ្វើឡើង នាព្រឹកមិញនេះ នៅរដ្ឋបាលខេត្តសៀមរាប ក្នុងកិច្ចប្រជុំផ្សព្វផ្សាយអំពីបទដ្ឋានគតិយុត្តបច្ចុប្បន្នភាព វិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា សម្រាប់សេវាកម្ម ស្នាក់នៅទេសចរណ៍ ភោជនីយដ្ឋាន-អាហារដ្ឋានទេសចរណ៍ សហគមន៍-អេកូទេសចរណ៍ និងរមណីយដ្ឋានទេសចរណ៍ ក្រោមវត្តមានលោក ពៅ ពិសិដ្ឋ អភិបាលរង ខេត្តសៀមរាប តាមរយៈប្រព័ន្ធរូបភាពនិងសំឡេង Zoom។

កិច្ចប្រជុំនេះបានសម្រេចឲ្យ ១ អាជីវកម្ម សេវាកម្មទេសចរណ៍ និងសហគមន៍ទេសចរណ៍ ដែលកំពុងបើកដំណើរការទាំងអស់ត្រូវប្រត្តិបត្តិការអាជីវកម្មរបស់ខ្លួនឱ្យស្របតាមប្រកាស និងសេចក្តីណែនាំស្តីពីវិធានសុវត្ថិភាពទេសចរណ៍ និងស្តង់ដារអប្បរមា ដែលបានដាក់ចេញដោយក្រសួងទេសចរណ៍។

២ ក្រុមការងារត្រូវចុះផ្សព្វផ្សាយដោយផ្ទាល់ដល់ប្រតិបត្តិករទេសរណ៍ទាំងអស់ក្នុងខេត្តឱ្យយល់ដឹង និងអនុវត្តនូវប្រកាស និងសេចក្តីណែនាំរបស់ក្រសួងទេសចរណ៍ ស្របតាម “គន្លងប្រក្រតីភាពថ្មី”។

៣ សម្រាប់រមណីយដ្ឋាន និងសហគមន៍ទេសចរណ៍ត្រូវកំណត់ឱ្យបាននូវសមត្ថភាពផ្ទុកអតិបរមា ដែលអាចទទួលភ្ញៀវក្នុងពេលតែមួយ ដោយអនុលោមតាមស្តង់ដាគម្លាតសុវត្ថិភាព និងត្រូវធ្វើការចុះឈ្មោះភ្ញៀវចូលទស្សនាជាប្រចាំ ជាពិសេសអនុវត្តឱ្យបាននូវការស្កែន QR Code ទប់ស្កាត់កូវីដ-១៩ ។

៤ គ្រប់អាជីវកម្មសេវាកម្មទេសចរណ៍ទាំងអស់ដែលបើកដំណើរការនឹងទទួលបាននូវឡាប៊ែលបញ្ជាក់ពីសុវត្ថិភាពបន្ទាប់ការចុះវាយតម្លៃរបស់ក្រុមការងារអំពីការអនុវត្តនូវប្រកាស និងសេចក្តីណែនាំរបស់ក្រសួងទេសចរណ៍ ស្របតាម “គន្លងប្រក្រតីភាពថ្មី”៕SRP

ខេត្តកំពង់ចាម​៖លោក អ៊ុន ចាន់ដា អភិបាលខេត្តកំពង់ចាម នៅព្រឹកមិញនេះបាន​អញ្ជើញ​ចុះពិនិត្យផ្លូវតាមភូមិមួយចំនួន ក្នុងសង្កាត់បឹងកុក ក្រុងកំពង់ចាម ដើម្បី​លេីក​គម្រោង​ធ្វើការអភិវឌ្ឍ ជាពិសេស គឺផ្ដោតទៅលើស្ថានភាពផ្លូវ និងប្រព័ន្ធបង្ហូរទឹក។

មន្ត្រីរដ្ឋបាលខេត្តកំពង់ចាម ឲ្យដឹងថា
ផ្លូវមួយចំនួន ក្នុងសង្កាត់បឹងកុក បច្ចុប្បន្ន កំពុងធ្វើការស្ថាបនា ជាផ្លូវក្រាលបេតុង ដែលមានប្រវែង ប្រមាណជាង ១.៥០០ម៉ែត្រ និងប្រព័ន្ធលូបង្ហូរទឹក ផងដែរ។ ក្នុងនោះផ្លូវក្រាលបេតុង ១ខ្សែ ប្រវែងជាង ១.៣០០ម៉ែត្រ ទទឹង ៦ម៉ែត្រ និង ១ខ្សែ ទៀត ប្រវែងជាង ២០០ម៉ែត្រ ទទឹង ៥ម៉ែត្រ និងត្រូវស្ថាបនាលូរំដោះទឹក ប្រវែងជាង ១.០០០ម៉ែត្រ និងលូ ដែលត្រូវជួសជុល ប្រវែងជាង ៤០០ម៉ែត្រ ដោយគម្រោងផ្លូវទាំង ២ខ្សែនេះ ប្រើប្រាស់ថវិកា ឆ្នាំ២០២២ របស់រដ្ឋបាល ខេត្តកំពង់ចាម។

មន្ត្រីបានបន្តថា ទន្ទឹមនិងការអភិវឌ្ឍផ្លូវ និងលូ កំពុងស្ថាបនានេះ ឯកឧត្តម​អភិបាលខេត្ត ក៏បានចុះពិនិត្យដោយផ្ទាល់ នឹងមានគម្រោង បន្តស្ថាបនាផ្លូវបេតុង បន្ថែមទៀត នៅក្នុងសង្កាត់បឹងកុក នាពេលខាងមុខនេះ៕SRP

ខេត្តសៀមរាប៖លោក ដួង តារា ជំនួយការផ្ទាល់សម្ដេច ហ៊ុន សែន នាយករដ្ឋមន្ត្រី និងជារដ្ឋលេខាធិការទីស្ដីការគណៈរដ្ឋមន្ត្រី​ បានលើកឡើងថា«យើងត្រូវរួមគ្នាបញ្ឈប់ធ្វើរបាយការណ៍ភូតកុហកសម្តេច  ដើម្បីដោះស្រាយបញ្ហាវិវាទដីធ្លីជូនប្រជាពលរដ្ឋឆាប់ចប់ពិតប្រាកដ។

តាមរយៈផេកហ្វេសប៊ុក របស់លោក ដួង តារា បានសរសេរថា៖ ខ្ញុំចុះខេត្តមួយភ្លែតទៅប្រគល់បណ្ណកម្មសិទ្ធិដីធ្លី( ប្លង់រឹង)ជូនគូភាគីវិវាទ ដែលទទួលបានយុត្តិធម៌ក្រោមដំណោះស្រាយឈរលើគោលការណ៍ឈ្នះ-ឈ្នះសម្តេចតេជោ។

សំណេរបានបន្តថា៖យើងត្រូវរួមគ្នាបញ្ឈប់ធ្វើរបាយការណ៍ភូតកុហកសម្តេច  ដើម្បីដោះស្រាយបញ្ហាវិវាទដីធ្លីជូនប្រជាពលរដ្ឋឆាប់ចប់ពិតប្រាកដ  និងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង។

លោក ដួង តារា ត្រូវបានគេដឹងថា ជាមន្ត្រីមួយរូបជំនិតនឹងសម្ដេចតេជោ ហ៊ុន សែន លោកបានធ្វើការដោះស្រាយបញ្ហទំនាស់វិវាទដីធ្លី ក្រៅប្រព័ន្ទតុលាការ ដោយបានទទួលបានជោគជ័យ តាមគោលការ ឈ្នះ ឈ្នះ របស់សម្ដេច ហ៊ុន សែន ក្នុងការរកដំណោះស្រាយជូនគូភាគី។

ជាការកត់សំគាល់ បញ្ហាវិវាទដីធ្លីមួយចំនួន នៅតាមបណ្ដាខេត្តក្រុង បានអូសបន្លាយជាច្រើនឆ្នាំ ប៉ុន្តែដោះស្រាយមិនចេញ ទើបគូភាគីខ្លះ បានធ្វើលិខិតស្នើសុំសម្ដេចនាយករដ្ឋមន្ត្រី ហ៊ុន សែន ជួយអន្តរាគមន៍ ដល់ពួកគាត់។ ដូច្នោះទើប លោកដួង តារា បានធ្វើការរកដំណោះស្រាយ ឲ្យគូភាគីទទួលបានឈ្នះទាំងអស់គ្នា តាមគោលការណ៍ ឈ្នះ ឈ្នះ រប​ស់សម្ដេច តេជោ ហ៊ុន សែន៕SRP

ខេត្តបន្ទាយមានជ័យ៖ប្រជាពលរដ្ឋប្រមាណជាង២០ គ្រួសារមានទីលំនៅភូមិអូឬស្សី សង្កាត់ផ្សារកណ្ដាល បានស្នើសុំដល់អាជ្ញាធរក្រុងប៉ោយប៉ែត ជួយបើកផ្លូវចាស់ ឲ្យពួកគាត់អាចធ្វើដំណើរឡើងវិញ។

ការស្នើសុំនេះតាមរយៈផ្ដល់បទសម្ភាសន៍ដល់អ្នកសារព័ត៌មានកាលពីថ្ងៃទី០៧ ខែកញ្ញា ឆ្នាំ២០២១ម្សិលមិញ ដោយសារពួកគាត់ជាង ២០ គ្រួសារ បានដាក់ពាក្យបណ្ដឹងនិងលិខិតអន្តរាគមន៍ ជាច្រើនលើក មកហើយដើម្បីស្នើសុំ ឲ្យអាជ្ញាធរក្រុងប៉ោយប៉ែត ជួយអន្តរាគមន៍បើកផ្លូវ ដែលមានស្រាប់ មានទទឹង ២០ម៉ែត្រគុណនឹងបណ្ដោយ ៣០ ម៉ែត្រ តភ្ជាប់ទៅផ្លូវក្រុងលេខ៥០ ស្ថិតនៅក្នុងភូមិអូរឫស្សីសង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។

ប្រភពបានឲ្យដឹងថាករណីនេះដោយសារតែមានបុគ្គលបានរំលោភយកធ្វើជាកម្មសិទ្ធិ នៅក្នុងកំឡុងឆ្នាំ ២០០៩ រហូតមកដល់ពេលនេះ មានរយៈពេល១២ ឆ្នាំមកហើយ ប៉ុន្តែអាជ្ញាធរក្រុងប៉ោយប៉ែត បានត្រឹមតែសន្យា ជួយរកដំណោះស្រាយ ប៉ុណ្ណោះ។

លោកតា គឹម ហ៊ាន មានវ័យ៧០ ឆ្នាំមានទីលំនៅភូមិអូរឬស្សី សង្កាត់ផ្សារកណ្ដាល ក្រុងប៉ោយប៉ែតតំណាងឲ្យប្រជាពលរដ្ឋទាំង២០ គ្រួសារបានលើកឡើងថា ពួកគាត់កើតទុក្ខមិនសុខចិត្តចំពោះបុគ្គលចំនួនពីរនាក់ ទី១ ឈ្មោះធាប គឹមសាង អតីតមេភូមិអូរឬស្សីចាស់ និងបច្ចុប្បន្នជានាយសាលាបឋមសិក្សាអូរឫស្សីលើ មានទីលំនៅភូមិអូរឬស្សី សង្កាត់ផ្សារកណ្ដាល ក្រុងប៉ោយប៉ែត ទី២ឈ្មោះលីវ អ៊ីធី ភេទប្រុសអាយុ៤៧ ឆ្នាំ មានទីលំនៅបច្ចុប្បន្នភូមិទ្រា សង្កាត់ស្ទឹងមានជ័យ ខណ្ឌស្ទឹងមានជ័យ រាជធានីភ្នំពេញ។ ដោយបុគ្គលទាំងពីរនាក់នេះ ឃុបឃិតគ្នាធ្វើលិខិត ទិញលក់ នៅលើដីផ្លូវសាធារណៈរបស់រដ្ឋដើម្បីយកធ្វើជាកម្មសិទ្ធិរបស់ខ្លួន។ ករណីអាចមានការឃុបឃិតគ្នាពីអាជ្ញាធរមូលដ្ឋានភូមិ សង្កាត់ និងក្រុងប៉ោយប៉ែត ចាស់ផងដែរ។

លោកតា គឹម ហ៊ាន បន្តទៀតថា កាលពីថ្ងៃទី ២១ ខែកុម្ភៈឆ្នាំ ២០២១ ពួកគាត់ជាប្រជាពលរដ្ឋទាំង២០ គ្រួសារដែលមានរូបលោក ជាតំណាងបានដាក់ពាក្យបណ្ដឹងអន្តរាគមន៍ទៅ លោក គៀត ហ៊ុល អភិបាល ក្រុងប៉ោយប៉ែត ដើម្បីឲ្យលោកជួយរកដំណោះស្រាយ អន្តរាគមន៍បើកផ្លូវទទឹង២០ ម៉ែត្រនិងបណ្ដោយ៣០ ម៉ែត្រ ប្រយោជន៍ដល់ការប្រើប្រាស់ របស់ប្រជាពលរដ្ឋឡើងវិញ ព្រោះដីផ្លូវនេះគឺជាដីផ្លូវសាធារណៈរបស់រដ្ឋ ដែលមានក្នុងគំនូសបង្ហាញប្លង់ របស់ជំនាញសុរិយោដីផងដែរ ប៉ុន្តែរហូតមកដល់ពេលនេះ លោក អភិបាលក្រុងប៉ោយប៉ែត មិនទាន់មានដំណោះស្រាយ ឲ្យពួកខ្ញុំអាចធ្វើដំណើរ លើផ្លូវខាងលើនៅឡើយទេ។ ពលរដ្ឋបានបន្តថា ក្នុងករណីនេះ ប្រសិនជាលោកអភិបាលក្រុង មិនដោះស្រាយនោះទេ គួរតែលោកបញ្ជូនសំណុំរឿងនេះ ទៅរដ្ឋខេត្តបន្ទាយមានជ័យ ដើម្បីឲ្យអាជ្ញាធរខេត្តមានវិធានការ។

បើតាមលោកគឹម ហ៊ាន បានបន្ថែមថាដីផ្លូវទាំងនេះ គឺមានក្នុងគម្រោង របស់គណៈកម្មការបែងចែកដីឡូតិ៍ ជូនប្រជាពលរដ្ឋតាំងពីឆ្នាំ ២០០០មកម៉្លេះ ដោយនៅក្នុងកំឡុងឆ្នាំ ២០០៦ ពួកគាត់ ក្នុងភូមិអូឬស្សី បានចូលរួមឧបត្ថម្ភប្រាក់សាមគ្គីដើម្បីសាងសង់ផ្លូវបាន ៤ខ្សែ ដោយក្នុងមួយខ្សែដែលមានទទឹង ២០ម៉ែត្របណ្ដោយប្រវែង១៧៥ម៉ែត្រ ក្រោយពេលសាងសង់រួចហើយ ប្រជាពលរដ្ឋអាចធ្វើដំណើរចេញចូលបានធម្មតា។ ដោយឡែកផ្លូវលំខ្សែទីមួយនេះប្រជាពលរដ្ឋ បានសាងសង់នៅសល់ប្រមាណ ៣០ ម៉ែត្រ ត្រូវបានលោកមេភូមិថ្មីអូឬស្សី យកអេស្កាកាយដី លើកដីធ្វើបន្ត តែត្រូវបានឈ្មោះធាប គឹមសាង មករារាំងហាមឃាត់ មិនឱ្យមេភូមិថ្មី និងប្រជាពលរដ្ឋ បានសាងសង់ផ្លូវថ្មី លើផ្លូវចាស់នោះទេ ដោយលោកធាប គឹមសាង បានប្រាប់ថា ដីនេះខ្លួនបានទិញពីម្ចាស់ដើម គេមានលិខិតស្នាមត្រឹមត្រូវ។ ជាមួយគ្នានេះដែរ ឈ្មោះធាប គឹមសាង បានធ្វើរបងថ្មព័ទ្ធលួសបន្លាយ៉ាងខ្ពស់រឹងមាំ មិនឱ្យ ប្រជាពលរដ្ឋធ្វើដំណើរចេញចូល រហូតមកដល់សព្វថ្ងៃនេះ។ ដូច្នោះហើយទើបពួកគាត់ជាង២០ គ្រួសារ ស្នើសុំ ទៅអាជ្ញាធរក្រុងប៉ោយប៉ែត និងឯកឧត្តម អ៊ុំ រាត្រី អភិបាលខេត្តបន្ទាយមានជ័យ យអន្តរាគមន៍ បើកផ្លូវចំណុចខាងលើឲ្យពួកគាត់អាចធ្វើដំណើរបានវិញផង។

ជុំវិញការចោទប្រកាន់នេះ អង្គភាពសៀមរាបប៉ុស្ដិ៍ នៅមិនទាន់ទទួលបានការបំភ្លឺពីលោកឈ្មោះធាប គឹមសាង អតីតមេភូមិអូរឬស្សីចាស់ និងឈ្មោះលីវ អ៊ីធី បាននៅឡើយទេ ដោយមិនមានលេខទាក់ទំនង។

សូមបញ្ជាក់ថាអាជ្ញាធរខេត្តបន្ទាយមានជ័យ ធ្លាប់បាន ចេញសារាចរ អាជ្ញាធរស្រុក ក្រុង ក្នុងខេត្តបន្ទាយមានជ័យ ឲ្យចូលរួមទប់ស្កាត់ ការរំលោភយកដីចំណីផ្លូវ នឹងដីផ្លូវសាធារណៈរបស់រដ្ឋ ការចាក់លុបរំលោភយកធ្វើជាកម្មសិទ្ធិ ផ្ទាល់ខ្លួន ដោយមិនមានការលើកលែងចំពោះបុគ្គលណារំលោភយកនោះឡើយ៕SRP

ភ្នំពេញ៖សម្ដេចតេជោហ៊ុន សែន នាយករដ្ឋមន្ត្រី បានតែងតាំង លោក ទូច សុខា ជាអភិបាលរងខេត្តកំពង់ធំ។ នេះបើយោងតាមអនុក្រឹត្យ ដែលចុះហត្ថលេខា ដោយសម្ដេចតេជោ ហ៊ុន សែន៕SRP

ភ្នំពេញ៖នាយករដ្ឋមន្ត្រី ហ៊ុន សែន បានចេញសារលិខិតរបស់ ក្នុងឱកាសប្រារព្ធទិវាអក្ខរកម្មជាតិ ៨ កញ្ញា ២០២១។ សូមអានលិខិតខាងក្រោម៖

ភ្នំពេញ៖អ្នកនាំពាក្យ កងរាជអាវុធហត្ថលើផ្ទៃប្រទេស បានសុំឱ្យផេកហ្វេសប៊ុក គណនីឈ្មោះ ហង្ស សំណាង ធ្វើការកែតម្រូវអំពីការផ្សព្វផ្សាយរបស់ខ្លួន ដូចមានចែងក្នុងមាត្រា១០ នៃច្បាប់ស្តីពីរបបសារព័ត៌មាន។ ក្នុងករណីមិនព្រមធ្វើការកែតម្រូវនោះទេ កងរាជអាវុធហត្ថ នឹងប្រគល់សិទ្ធិជូនមេធាវី ដើម្បីប្ដឹងទាម ទារសងជំងឺចិត្តទៅតាមផ្លូវតុលាការ។

នេះបើយោងតាមសេចក្តីប្រកាសព័ត៌មានរបស់កងរាជអាវុធហត្ថលើផ្ទៃប្រទេស ចុះនៅថ្ងៃទី ៧ ខែកញ្ញាឆ្នាំ ២០២១ ម្សិលមិញ៕SRP

ខេត្តស្ទឹងត្រែង៖កម្លាំងអាវុធហត្ថខេត្តស្ទឹងត្រែងបានឃាត់ខ្លួនអ្នកសារព័ត៌មានចំនួន១០នាក់នៅពីថ្ងៃទី០៧ ខែកញ្ញាឆ្នាំ២០២១ ព្រឹកមិញនេះ។

សមត្ថកិច្ចក្នុងហេតុការណ៍ បានឲ្យដឹងថាអ្នកសារ ព័ត៌មានចំនួន១១នាក់ជិះរថយន្ត៣គ្រឿងបានឃាត់រថយន្តយីឌុបដឹកឈើ ប្រភេទគ្រឿងផ្ទះមួយគ្រឿង នៅលើដងផ្លូវជាតិលេខ៩ ស្ថិតត្រង់ចំណុចផ្លូវចូលជាំធំឃុំស្រែឫស្សី ស្រុកថាឡាបរិវ៉ាត់ ខេត្តស្ទឹងត្រែង។

ប្រភពបន្តថា អ្នកសារព័ត៌មានទាំងនោះមិនមែនជាអ្នកនៅ ក្នុងខេត្តស្ទឹងត្រែងទេ គឺពួកគេមកពីតាមបណ្ដាខេត្តផ្សេងដែលបានចុះមកបំពេញ ការងារក្នុងភូមិសាស្ត្រខេត្តស្ទឹងត្រែង។ លុះពេលប្រទះឃើញរថយន្តដឹកឈើខាងលើ ក៏បានឃាត់និងរាយការណ៍ទៅសមត្ថកិច្ច។ បន្ទាប់មកមន្ត្រីកងរាជអាវុធហត្ថខេត្តស្ទឹងត្រែងក៏បានចុះទៅដល់ទីតាំង ដែលរថយន្តក្រុមអ្នកសារព័ត៌មានបានឃាត់រថយន្តដឹកឈើនោះ។ បន្ទាប់ពីមន្ត្រីអាវុធហត្ថចុះទៅដល់ទីតាំងស្រាប់តែអ្នកសារព័ត៌មានទាំងនោះ នាំគ្នាបើករថយន្តចេញអស់។ ខណ:នោះ អ្នកដឹកឈើក៏បានប្ដឹងចោទប្រកាន់ក្រុមអ្នកសារព័ត៌មានពីបទ កំហែងយកទារប្រាក់ចំនួន ៤០០០ដុល្លារ។

ក្រោយពីមានពាក្យបណ្ដឹងពីអ្នកដឹកឈើកម្លាំងកងរាជអាវុធហត្ថខេត្ត ក៏បានឃាត់រថយន្តកាមរីពណ៌ក្រហមមួយគ្រឿងនិងរថយន្ត ២គ្រឿងទៀតត្រូវកងរាជអាវុធហត្ថស្រុកឆែបខេត្តព្រះវិហារ ឃាត់បញ្ជូនមកខេត្តស្ទឹងត្រែង។

អ្នកសារព័ត៌មានចំនួន១១នាក់ត្រូវបានសមត្ថកិច្ចឃាត់ខ្លួន១០នាក់ ហើយម្នាក់ទៀតបានគេចខ្លួន។ ចំពោះរថយន្តដឹកឈើមួយគ្រឿងនោះក៏ត្រូវបានឃាត់ទុកផងដែរ។

ប្រភពបញ្ជាក់ថា រថយន្តដឹកឈើខាងលើនោះ មានទិសដៅចេញពីភូមិស្រឡៅ ឃុំអន្លង់ជ្រៃ ស្រុកថាឡាប រិវ៉ាត់ខេត្តស្ទឹងត្រែង ឆ្ពោះទៅកាន់ភូមិតារេនជោ ឃុំអង្កាញ់ ស្រុកទ្រាំង ខេត្តតាកែវ ដោយមានការអនុញ្ញាតពីជំនាញផ្នែករដ្ឋបាលព្រៃឈើស្រុកថាឡាបរិវ៉ាត់ ដើម្បីយកទៅសាងសង់លំនៅដ្ឋាននៅខេត្តតាកែវ។

ទោះបីយ៉ាងណាករណីនេះ សមត្ថកិច្ចមិនទាន់បញ្ជាក់ថា ក្រុមអ្នកសារព័ត៌មានខាងលើ នឹងត្រូវដោះលែងឬបញ្ជូនទៅតុលាការនោះទេ ត្បិតកំពុងធ្វើការសាកសួរនៅឡើយ៕SRP

ភ្នំពេញ៖នាយកដ្ឋានព័ត៌មានវិទ្យា បានឲ្យដឹងថា កន្លងមក នាយកដ្ឋានព័ត៌មានវិទ្យាធ្លាប់បានធ្វើការផ្សព្វផ្សាយនូវអត្តបទអប់រំ ស្តីអំពី “ហានិភ័យនៃកម្ចីអនឡាញខុសច្បាប់ (Loan Shark / Scam)” ដែលអត្ថបទនោះបានអធិប្បាយអំពីល្បិចកល ដែលជនខិលខូចបានអនុវត្តក្នុងការឆបោក ឬដាក់អន្ទាក់ទៅលើជនរងគ្រោះ ព្រមទាំងបរិយាយអំពីហានិភ័យពាក់ព័ន្ធមួយចំនួនផងដែរ។

នាយកដ្ឋានព័ត៌មានវិទ្យា បានបន្តថា ថ្មីៗនេះ ដោយទទួលបានសេចក្តីរាយការណ៍ជាបន្តបន្ទាប់ពីមហាជន ក្រុមការងារយើងខ្ញុំ សូមលើកយកនូវល្បិចកល និងបច្ចេកទេសថ្មី ដែលជនខិលខូចបានប្រើប្រាស់ក្នុងការអូសទាញជនរងគ្រោះឲ្យយល់ព្រមខ្ចីប្រាក់អនឡាញ ជាសង្ខេបដូចខាងក្រោម៖

១- ជនខិលខូចបានបង្កើតទំព័រហ្វេសប៊ុកផេក ឬគេហទំព័រ ដោយដាក់ឈ្មោះក្រុមហ៊ុនកម្ចីប្រាក់អនឡាញ។

២- ជនខិលខូចធ្វើការផ្សព្វផ្សាយទំព័រហ្វេសប៊ុកផេក ឬគេហទំព័រ (Ads) លើបណ្តាញទំនាក់ទំនងសង្គម ដើម្បីធ្វើការអូសទាញការចាប់អារម្មណ៍ពីជនរងគ្រោះ។

៣- ជនរងគ្រោះអាចធ្វើការស្នើសុំកម្ចីពីជនខិលខូច ជាមួយលក្ខខណ្ឌងាយៗ ដោយគ្រាន់តែផ្តល់នូវរូបថតអត្តសញ្ញាណប័ណ្ណ លេខទូរស័ព្ទ រូបភាព ឬវីដេអូអាក្រាតកាយរបស់ជនរងគ្រោះ។

៤- ជនខិលខូចនឹងប្រើប្រាស់ព័ត៌មានអត្តសញ្ញាណប័ណ្ណ រូបភាព ឬវីដេអូអាក្រាតកាយ ដើម្បីគំរាមកំហែងជនរងគ្រោះករណីពុំសងប្រាក់ ឬបង់ការប្រាក់ដ៏ច្រើនលើសលប់។

៥- ករណីមួយចំនួន ជនខិលខូចបានធ្វើការប្រើប្រាស់រូបភាព ឬវីដេអូអាក្រាតកាយជនរងគ្រោះគំរាមទារប្រាក់ ឬជួញដូរផងដែរ។

ជាថ្មីម្តងទៀតក្រុមការងារនាយកដ្ឋានព័ត៌មានវិទ្យា សូមធ្វើការក្រើនរំលឹកដល់បងប្អូនប្រជាពលរដ្ឋ មេត្តាប្រុងប្រយ័ត្នខ្ពស់ពាក់ព័ន្ធនឹងប្រភេទបទល្មើសខាងលើ និងត្រូវប្រុងប្រយ័ត្នក្នុងការរក្សាការពារព័ត៌មានបុគ្គល តួរយ៉ាងដូចជាអត្តសញ្ញាណប័ណ្ណ ប័ណ្ណធនាគារ លេខទូរស័ព្ទ អាសយដ្ឋានស្នាក់នៅ រូបភាព ឬវីដេអូផ្ទាល់ខ្លួន ចៀសវាងការចែករំលែក ឬផ្ញើឲ្យអ្នកណាម្នាក់ដោយមិនស្គាល់អត្តសញ្ញាណឬប្រភពច្បាស់លាស់៕SRP

ខេត្តបាត់ដំបង៖ក្មេងស្ទាវចំនួន​ ១០​ នាក់​ ត្រូវបានកម្លាំងនគរបាលខេត្តបាត់ដំបងចាប់ខ្លួន ពាក់ព័ន្ធប្រើហិង្សា​ដោយ​ចេតនា​មាន​ស្ថានទម្ងន់​ទោស​ ដោយសារ​មរណភាពនៃ​​ជនរងគ្រោះ​។

ការចាប់ខ្លួនធ្វើឡើង នៅ​ថ្ងៃទី​ ៦​ ខែ​ កញ្ញា​ ឆ្នាំ​ ២០២១​ ម្សិលមិញ នៅ​ចំណុច​ភូមិ​ព្រែកតាតន់​ សង្កាត់​ព្រែកព្រះស្តេច​ ក្រុង​បាត់ដំបង​ ដោយក្រុមអន្តរាគមន៍​ បង្ការ​ បង្ក្រាប។

លោក​ ឈឿង​ គឹមសុង​ នាយការិយាល័យ​នគរបាល​ព្រហ្មទណ្ឌ​កម្រិត​ស្រាល​ បានឲ្យដឹងថា៖ជនសង្ស័យ៖
ឈ្មោះ​ ថាវ​ វុត្ថា​ ភេទប្រុស​ អាយុ​២០​ឆ្នាំ​ មានទីលំនៅ​ភូមិ​ព្រែកតាតន់​ សង្កាត់​ព្រែកព្រះស្តេច​ ក្រុង​បាត់ដំបង​​។

២ឈ្មោះ​ សែម​ វិរ:​ ភេទប្រុស​ អាយុ​១៨​ឆ្នាំ​ មានទីលំនៅ​ភូមិ​អញ្ចាញ​ សង្កាត់​អូរចារ​ ក្រុងបាត់ដំបង។

៣ឈ្មោះ​ មាស​ គ្រឹស្នា​ ហៅ​ បារាំង​ ភេទប្រុស​ អាយុ​១៩​ ឆ្នាំ​ មានទីលំនៅ​ ភូមិ​រំចេក៤​ សង្កាត់​រតនៈ​​។

៤ឈ្មោះ​ វី​ ចិន្តា​ ហៅ​ ខ្មៅ​ ភេទប្រុស​ អាយុ​ ១៥​ ឆ្នាំ​ មានទីលំនៅ​ភូមិ​ត្រាង​ ឃុំ​អូរតាគី​ ស្រុក​ថ្មគោល​​។

៥ឈ្មោះ​ ដៀប​ សុខឡេង​ ភេទប្រុស​ អាយុ​ ១៧​ ឆ្នាំ​ មានទីលំនៅ​ភូមិ​ទួលតាឯក​ សង្កាត់​ទួលតាឯក​ ក្រុងបាត់ដំបង​​។

៦ ឈ្មោះ​ លី​ ថុនា​ ភេទប្រុសអាយុ​ ២៣​ ឆ្នាំ​ មានទីលំនៅ​ភូមិ​គោកក្តួច​ ឃុំ​តាពូង​ ស្រុក​ថ្មគោល​​។

៧ឈ្មោះ​ សុក​ ប៊ុន​ទិត្យ​ ភេទប្រុសអាយុ​ ១៧​ ឆ្នាំ​ មានទីលំនៅ​ ភូមិ​ទួលតាឯក​ សង្កាត់​ទួលតាឯក ក្រុងបាត់ដំបង។

៨ឈ្មោះ​ វ៉ាន់​ ហុកហេង​ ហៅ​ស្រួច​ ភេទប្រុស​ អាយុ​ ១៦​ ឆ្នាំ​ មានទីលំនៅ​ភូមិ​ទួលតាឯក​ សង្កាត់​ទួលតាឯក​ ក្រុងបាត់ដំបង​​។

៩ ឈ្មោះ​ ឆិល​ ឡង់ឌី​ ភេទប្រុស​ អាយុ​ ១៧​ ឆ្នាំ​ មានទីលំនៅ​ ភូមិ​ ទួលតាឯក​ សង្កាត់​ទួលតាឯក​ ក្រុងបាត់ដំបង។

១០ឈ្មោះ​ សឺន​ សិទ្ធិ​សក័​ ភេទប្រុស​ អាយុ​ ១៧​ ឆ្នាំ​ មានទីលំនៅ​ភូមិ​ អូរតាគាំ​២​ សង្កាត់​ទួលតាឯក​ ក្រុងបាត់ដំបង។

សូមជម្រាបថាកាល​ពី​ថ្ងៃទី​ ០៥​ ខែ​ កញ្ញា​ ឆ្នាំ​ ២០២១​ វេលាម៉ោង​ ប្រហែល​ ២២និង៤០​ នាទី​ នៅ​ចំណុច​ ក្រុមទី​២២​ ​ភូមិ​អញ្ចាញ​ សង្កាត់​អូរចារ​ ក្រុងបាត់ដំបង​ ខេត្ត​បាត់ដំបង​ ជនសង្ស័យ​ទាំង​២​ ក្រុមបាន​ធ្វេី​សកម្មភាព​ ប្រេីប្រាស់​កាំបិត​ ដំបង​ និង​ ដុំថ្ម​ កាប់​ វាយ​ និង​គប់​ទៅ​លេី​ ជនរងគ្រោះ​ឈ្មោះ​ អ៊ាង​ វិសាល​ ភេទប្រុស​ អាយុ​ ១៧​ ឆ្នាំ​ មានទីលំនៅ​ភូមិ​ ទួលតាឯក​ សង្កាត់​ ទួលតាឯក​ ក្រុងបាត់ដំបង​ ខេត្ត​ បាត់ដំបង​ បណ្តាល​ឲ្យ​ ស្លាប់​ នៅ​ពេល​ដែល​បញ្ជូន​ទៅ​សង្គ្រោះ​បន្ទាន់​នៅ​មន្ទីរពេទ្យ​។

ករណីនេះសមត្ថកិច្ច ដកហូត វត្ថុតារួម​មាន​៖​ដំបង​ដែក​មាន​រាង​បួន​ជ្រុង​ ប្រវែង​៧០សង់ទីម៉ែត្រ​១​ដេីម​។ កាំបិត​ដែក​ មាន​ដង​ឈេី​ ប្រវែង​៩០​សង់ទីម៉ែត្រ​ ១​ដេីម។
ម៉ូតូ​ម៉ាក​ហុងដា​ វេវ​ពណ៌ស​ គ្មា​ន​ស្លាកលេខ​១​គ្រឿង​។

បច្ចុប្បន្ន​កសាងសំណុំរឿង​ដេីម្បី​បញ្ជូន​ទៅ​សាលាដំបូង​ខេត្ត​បាត់ដំបង​ចាត់ការ​បន្ត​តាម​នីតិវិធី​។

សូមបញ្ជាក់ថា ប្រតិបត្តិការនេះ ដឹកនាំដោយលោក​ ឈឿង​ គឹមសុង​ នាយការិយាល័យ​នគរបាល​ព្រហ្មទណ្ឌ​កម្រិត​ស្រាល​ សហការ​ជាមួយ​នគរបាល​ព្រហ្មទណ្ឌ​កម្រិត​ធ្ងន់​ និងនគរ​បាល​ក្រុង​បាត់ដំបង​ តាមការណែនាំពី​លោក សាត​ គឹមសាន​ ស្នងការ​ ស្នងការខេត្តបាត់ដំបង​ ក្រោមបញ្ជារបស់លោក កែវ​ សុជាតិ​ ព្រះរាជអាជ្ញា​ អយ្យការ​អមសាលាដំបូងខេត្តបាត់ដំបង​៕SRP

ខេត្តសៀមរាប៖ប្រជាពលរដ្ឋ ដែលជួបការលំបាក ដោយសាររងផលប៉ះពាល់នៃជំងឺកូវីដ១៩ ចំនួន ៣០គ្រួសារ នៅក្នុងសង្កាត់ស្វាយដង្គំ បានទទួលអំណោយ ពីសមាគមចលនាយុវជនកម្ពុជា (ក្រុម១៥៧) ក្រុងសៀមរាប ។

ការផ្ដល់អំណោយ នៅថ្ងៃអង្គារ ទី០៧ ខែកញ្ញាឆ្នាំ២០២១នេះ ស្ថិតក្នុងបរិវេណវត្តចក ភូមិស្វាយព្រៃ សង្កាត់ស្វាយដង្គំ ក្រុងសៀមរាប ។

ពិធីនេះមានការចូលរួមពីលោក សឹង្ហ សំរឹទ្ធ អនុប្រធាន សមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប លោក នួន ពុទ្ធារ៉ា អភិបាលក្រុងសៀមរាប និង លោកស្រី សួន មុលឡា ប្រធានសមាគមចលនាយុវជនកម្ពុជា (ក្រុម១៥៧) ក្រុងសៀមរាប សមាជិក សមាជិកា អាជ្ញាធរសង្កាត់ផងដែរ។

លោក សឹង្ហ សំរឹទ្ធិ ក្នុងនាមតំណាង លោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប បានមានមតិសំណេះសំណាល ទៅកាន់ប្រជាពលរដ្ឋ ដោយឲ្យសូមយកចិត្តទុកដាក់ អោយបានខ្ពស់នូវអនាម័យ ដើម្បីចៀសផុតពីជំងឺកូវីដ-១៩។

លោក សឹង្ហ សំរឹទ្ធិ ក៏បានផ្ដាំផ្ញើដល់ប្រជាពលរដ្ឋទាំងអស់ត្រូវដេក ក្នុងមុង ការពារកុំអោយមូសខាំ ដោយហេតុថាពេលនេះជារដូវវស្សា ដើម្បីចៀសផុតពីជំងឺផ្សេងៗ និងជំងឺគ្រុនឈិកផងដែរ។

ក្នុងពិធីចែកអំណោយនេះដែរ លោក នួន ពុទ្ធារ៉ា បានថ្លែងអំណរគុណយ៉ាងជ្រាលជ្រៅ ចំពោះប្រមុខរដ្ឋាភិបាលកម្ពុជា សម្ដេចហ៊ុន សែន ដែលបានស្វែងរកវ៉ាក់សាំងចាក់ជូនប្រជាពលរដ្ឋបានគ្រប់ៗគ្នា។ ក្នុងនោះលោកក៏បានរំលឹកអរគុណ ដល់សម្ដេចទៀ បាញ់ ឯកឧត្តមទៀ សីហា ឯកឧត្តមសៀង ណាំ ដែលលោកតែងតែយកចិត្តទុកដាក់ចំពោះសុខទុកប្រជាពលរដ្ឋនៅតាមមូលដ្ឋានគ្រប់កាលៈទេសៈ មិនប្រកាន់និន្នាកានយោបាយឡើយ។

អភិបាលក្រុងសៀមរាប ក៏បានថ្លែងអរគុណនិងកោតសរសើរចំពោះ លោកស្រី សួន មុលឡា ប្រធានសមាគមចលនាយុវជនកម្ពុជា (ក្រុម១៥៧) ក្រុងសៀមរាប ដែលបាននាំយកនូវអំណោយចែកជូនប្រជាពលរដ្ឋ កំពុងជួបការខ្វះខាតនាពេលនេះ។

សូមជម្រាបថាអំណោយ របស់សមាគមចលនាយុវជនកម្ពុជា ក្រុម១៥៧ ក្រុងសៀមរាប ដែលត្រូវចែកជូនប្រជាពលរដ្ឋទាំង ៣០គ្រួសារ ក្នុង១គ្រួសារទទួលបាន៖ អង្ករ ១០គីឡូក្រាម .ទឹកសុទ្ធ ១កេស. មី ១កេស. ទឹកត្រី ៣ដប ទឹកសុីអុីវ ៣ដប. ស្ករស ១គីឡូក្រាម. អំបិល ១គីឡូក្រាម. សាប៊ូដុំ ១ដុំ និងថវិកា២ម៉ឺនរៀល៕SRP