ភ្នំពេញ៖សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តព្រៃវែង និងខេត្តបាត់ដំបង បានផ្ដល់ការណែនាំឱ្យបង្កើនការខិតខំប្រឹងប្រែងពង្រឹងថែរក្សាការពារសន្តិសុខសណ្ដាប់សាធារណៈ និងសុវត្ថភាពសង្គមឱ្យបានល្អប្រសើរដើម្បីបង្កបរិយាកាសដល់ការរៀបចំការបោះឆ្នោត និងការអភិវឌ្ឍន៍សង្គមគ្រប់វិស័យនៅមូលដ្ឋាន បន្តទប់ស្កាត់ការចម្លងជំងឺកូវីដ-១៩ និងខិតខំក្ដាប់ឱ្យបាននូវភាពអសកម្ម ចំណុចខ្សោយ ចំណុចខ្វះខាតនៅមូលដ្ឋាន ហើយចាត់វិធានការដោះស្រាយឱ្យមានប្រសិទ្ធភាព។

សម្ដេច ស ខេង ថ្លែងណែនាំយ៉ាងដូច្នោះនៅរសៀលថ្ងៃសៅរ៍ ទី២ ខែតុលា ម្សិលមិញ ក្នុងឱកាសដឹកនាំកិច្ចប្រជុំពិនិត្យលទ្ធផលនៃការអនុវត្តផែនការឆ្ពោះទៅកាន់ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ ខេត្តព្រៃវែង និងទិសដៅអនុវត្តការងារបន្ត ព្រមទាំងផ្សព្វផ្សាយគោលនយោបាយអភិវឌ្ឍន៍ ឃុំ សង្កាត់ ឆ្នាំ២០២២-២០២៧។

ថ្លែងបើកកិច្ចប្រជុំនាឱកាសនោះ សម្ដេចក្រឡាហោមបានមានប្រសាសន៍ថា ការផ្ទុះរីករាលដាលជំងឺកូវីដ-១៩ បានរារាំងមិនឱ្យមានការជួបប្រជុំគ្នាដោយផ្ទាល់ ហើយថាជាមួយគ្នានេះ ការចុះបំពេញការងារនៅតាមមូលដ្ឋានរបស់ក្រុមការងារគណបក្សក៏មានមិនសូវមានភាពរលូនល្អដែរ ។ យ៉ាងណាក៏ដោយ សម្ដេចបានសង្កត់ធ្ងន់ថា ក្រុមការងារគណបក្សគ្រប់ថ្នាក់នៃខេត្តព្រៃវែង បានខិតខំសម្របសម្រួលអនុវត្តសម្រេចបានផែនការសកម្មភាពសំខាន់ៗឆ្ពោះទៅកាន់ការបោះឆ្នោត ឃុំសង្កាត់ អាណត្តិទី៥ ឆ្នាំ២០២២ ខាងមុខនេះ ។

សម្ដេចក្រឡាហោម បានបន្តថាថ្នាក់ដឹកនាំ និងមន្រ្តីគណបក្សគ្រប់មូលដ្ឋានក្នុងខេត្តព្រៃវែង ក៏បានពុះពារខិតខំប្រឹងប្រែងលើកកម្ពស់ភាពជាម្ចាស់ក្នុងការរែកពន្ធការងារនានា ទាំងការងារគណបក្ស ការងារប្រយុទ្ធប្រឆាំងជំងឺកូវីដ-១៩ ការដោះស្រាយជីវភាពប្រជាជនដែលទទួលរងផលប៉ះពាល់ដោយសារកូវីដ-១៩ និងគ្រោះធម្មជាតិនានា ព្រមទាំងការគ្រប់គ្រងរដ្ឋបាល ការថែរក្សាការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ការផ្ដល់សេវាសាធារណៈ និងការធានាប្រក្រតីភាពគ្រប់វិស័យនៅមូលដ្ឋាន ។

សម្ដេចក្រឡាហោមបន្ថែមថា ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ នៅសល់ពេលវេលាប្រមាណ៩ខែទៀតប៉ុណ្ណោះ ហេតុនេះកិច្ចប្រជុំនៅថ្ងៃនេះនឹងផ្ដោតលើការរួមគ្នាពិនិត្យពិភាក្សាលើការអនុវត្តកិច្ចការដែលបានអនវត្តកន្លងមក និងកិច្ចការដែលនៅសេសសល់ ដើម្បីកំណត់ទិសដៅការងារត្រូវអនុវត្តបន្តសំដៅរួមគ្នាដណ្ដើមយកជោគជ័យសម្រាប់គណបក្សក្នុងការបោះឆ្នោតខាងមុខ ។

សម្ដេច ស ខេង បានផ្ដល់ការណែនាំមួយចំនួនពាក់ព័ន្ធនឹងការងារប្រយុទ្ធប្រឆាំងជំងឺកូវីដ-១៩ ទៅតាមវិធានការរាជរដ្ឋាភិបាល ការងារពង្រឹងសមត្ថភាពនិងបទពិសោធន៍ដើម្បីឱ្យយុវជនគណបក្សកាន់តែមានសក្ដានុពល និងការងារបង្ក្រាបបទល្មើសនៅតាមមូលដ្ឋាន ។

សម្ដេចក្រឡាហោមក៏បង្ហាញការកត់សំគាល់លើកិច្ចការសំខាន់ដែលត្រូវបន្តខិតខំរួមគ្នាអនុវត្តចាប់ពីពេលនេះរហូតដល់ដំណាច់ឆ្នាំ២០២១ ដូចជាការពិនិត្យបញ្ជីឈ្មោះ និងចុះឈ្មោះបោះឆ្នាំ២០២១ ការរៀបចំបេក្ខជនឈរឈ្មោះបោះឆ្នោត ការរៀបចំរបាយការណ៍លទ្ធផលនៃការអនុវត្តគោលនយោបាយ ភូមិ ឃុំ សង្កាត់អាណត្តិទី៥ និងកំណត់គោលនយោបាយអភិវឌ្ឍន៍ ឃុំ សង្កាត់អាណត្តិទី៥ ការរៀបចំសន្និបាទគណៈកម្មាធិការគណបក្សឃុំសង្កាត់ ការបន្តពង្រឹងអង្គការចាត់តាំងគណបក្សគ្រប់ជាន់ថ្នាក់ និងការពង្រឹងពង្រីកសមាជិកគណបក្ស៕SRP

ខេត្តសៀមរាប៖ឯកឧត្តម អ្នកឧកញ៉ាសៀងណាំ អ្នកតំណាងរាស្រ្តខេត្តសៀមរាប រួមជាមួយនិងរដ្ឋបាលក្រុងសៀមរាប នៅល្ងាចថ្ងៃទី០២ ខែតុលា ម្សិលមិញ បាននិមន្តព្រះសង្ឃចំនួន២១វត្តនៅក្នុងក្រុងសៀមរាប ដើម្បីវេរប្រគេននូវទ័យវត្ថុនិងគ្រឿងឧបភោគបរិភោគ សម្រាប់ដោះស្រាយការខ្វះខាតនិងបញ្ហាប្រឈម នានា ក្នុងទីវត្ត អារាមអំឡុងពេលនៃវិបត្តិជំងឺកូវីដ។

ពិធីនេះស្ថិតក្នុង គេហដ្ឋានរបស់ ឯកឧត្តម អ្នកឧកញ៉ាសៀងណាំ ដោយមានការអញ្ជើញចូលរួមពីសំណាក់ លោក នួន ពុទ្ធារ៉ា អភិបាលក្រុងសៀមរាបនិងមន្ត្រីក្រោមឱវាទ។

ឯកឧត្តមអ្នកឧកញ៉ាសៀង ណាំ អ្នកតំណាងរាស្ត្រមណ្ឌលសៀមរាប បានមានប្រសាសន៍ថា កម្មវិធីប្រគេនទេយ្យទាននាថ្ងៃនេះ គឺកើតឡើងដោយទឹកចិត្តសទ្ធាជ្រះថ្លារបស់ថ្នាក់ដឹកនាំរដ្ឋបាលក្រុងសៀមរាប រួមជាមួយនិងក្រុមគ្រួសារ របស់ឯកឧត្តម អ្នកឧកញ៉ា ហើយព្រមទាំង ក្រុមការងាររបស់ឯកឧត្តមអ្នកឧកញ៉ាផងដែរ។ ដោយហេតុថា នៅក្នុងខេត្តសៀមរាប មានការរីករាលដាលជាបន្តបន្ទាប់នូវជំងឺកូវីដ-១៩និងជាខេត្តមួយស្ថិតនៅក្នុងចំណោមរាជធានីខេត្ត ដែលក្រសួងសុខាភិបាលបានចាត់ទុកជាទីតាំងមានហានិភ័យ និងមានការប្រុងប្រយ័ត្នខ្ពស់ ដោយអនុវត្តវិធានការ៣កុំ ៣ការពារ ដូច្នេះប្រជាពលរដ្ឋពុំបានចេញក្រៅ ពិបាកយកចង្ហាន់ទៅវត្ត ដែលធ្វើឱ្យវត្តអារាមទាំងឡាយប្រឈមការខ្វះខាតចង្ហាន់ ភេសជ្ជៈ និងបច្ច័យ៤ជាដើមក្នុងរដូវបិណ្ឌភ្ជុំនេះ។

ឯកឧត្ដមអ្នកឧកញ៉ា ក៏បានបន្ដថា នេះជាសទ្ធាជ្រះថ្លាដ៏បរិសុទ្ធ បើទោះជាមិនបានច្រើន ប៉ុន្តែក៏អាចជួយសម្រាលបន្ទុក និងដោះទ័លដល់ព្រះតេជគុណគ្រប់ព្រះអង្គបានមួយរយៈផងដែរ ប៉ុន្តែប្រការសំខាន់ សូមអំពាវនាវដល់ព្រះតេជគុណគ្រប់ព្រះអង្គ មេត្តាជួយក្រើនរំលឹកដល់ញាតិញោមពុទ្ធបរិស័ទរបស់យើងគ្រប់ៗគ្នា ឱ្យពង្រឹងនូវការគោរពតាម វិធានការ៣កុំ និង ៣ការពារ ឱ្យបានម៉ឺងម៉ាត់បំផុត។ទេយ្យវត្ថុដែលបានប្រគេនចំពោះព្រះសង្ឃក្នុងមួយវត្តៗមាន៖ អង្ករ ១៥០គីឡូក្រាម .មី៦កេសតូច .  ត្រីខកំប៉ុង១កេស. ទឹកត្រី ២យួរ.ទឹកស៊ីអ៊ីវ៣យួរ.  ស្ករស៨គីឡូក្រាម. ទឹកបរិសុទ្ធ១កេស និងបច្ច័យ ៧០ម៉ឺននរៀល៕SRP

ខេត្តត្បូងឃ្មុំ៖សម្តេចហ៊ុន សែន នាយករដ្ឋមន្ត្រីនិងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្ដល់អំណោយជូនសមាជិកសមាគមអតីតយុទ្ធជនកម្ពុជាខេត្តត្បូងឃ្មុំកងពលតូចថ្មើរជើងលេខ២១។

ការផ្ដល់អំណោយតាមរយៈលោក ជាម ច័ន្ទសោភ័ណ នៅថ្ងៃទី០២ ខែតុលា ម្សិលមិញ នៅទីបញ្ជាការដ្ឋានកងទ័ព កងពលតូចថ្មើរជើងលេខ២១ ស្ថិតក្នុងស្រុកត្បូងឃ្មុំ។

លោកលោកជាម ច័ន្ទសោភ័ណ បានថ្លែងការកោតសរសើរ អរគុណដល់ទឹកចិត្តរបស់កម្លាំងយោធាដែលបានចូលនិវត្តន៍ទាំងអស់ នៃសមាគមន៍អតីតយុទ្ធជនកម្ពុជាខេត្តត្បូងឃ្មុំ ក៏ដូចជាទូទាំងប្រទេស ដែលបានរួមដំណើរជាមួយសម្តេចតេជោ និងឥស្សរជនទាំងអស់ ប្រយុទ្ធតស៊ូទាំងថ្ងៃទាំងយប់លះបង់បូជាសាច់ស្រស់ឈាមស្រស់ ការពារបូរណភាពទឹកដី នាំយកសុខសន្តិភាពជូនពលរដ្ឋ និងប្រទេសជាតិមាតុភូមិកម្ពុជា។

លោក ជាម ច័ន្ទសោភ័ណ សង្ឃឹមយ៉ាងមុតមាំ និងបន្តអំពាវនាវដល់កងកម្លាំងអតីតយុទ្ធជនយើងទាំងអស់ បន្តឥតងាករេរ គាំទ្រដាច់ខាតគណបក្សប្រជាជន គាំទ្រសម្តេចតេជោ ហ៊ុន សែន ជានាយករដ្ឋមន្ត្រីជារៀងដរាប ដើម្បីបងប្អូនអតីតយោធិនយើង ពលរដ្ឋយើង និងប្រទេសជាតិកម្ពុជាយើងទាំងមូល បន្តរស់នៅប្រកបដោយក្តីសុខពេញលេញបានដូចសព្វថ្ងៃនេះ «សម្តេចតេជោ ហ៊ុនសែន បិតាសុខសន្តិភាព និងការអភិវឌ្ឍន៍នៃកម្ពុជា»។

លោកម៉ុន មាគ៍ា ស្នងការនគរបាលខេត្ត បានឲ្យដឹងដែរថា នៅទូទាំងខេត្តត្បូងឃ្មុំ មានអតីតយុទ្ធជនជាង២០០០នាក់ ខណៈ៣៨គ្រួសារ បានទទួលដីសម្បទានសង្គមកិច្ច រស់នៅខាងខេត្តក្រចេះ ដែលផ្តល់ជូន និងយកចិត្តទុកដាក់ខ្ពស់បំផុត ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏ដូចជាអតីតយោធិនទាំងអស់នៅទូទាំងប្រទេស។

ចំពោះអំណោយនាំយកទៅផ្តល់ជូនរួមមាន សមាជិកសមាគមអតីតយុទ្ធជនកម្ពុជា៧៥នាក់ ក្នុងម្នាក់ទទួលបាន អង្ករ២៥គីឡូក្រាម មី១កេស ទឹកសុទ្ធ១កេស ត្រីខ១យួរ ប៊ីចេង១កញ្ចប់ ប្រេងឆា១ដប ទឹកត្រី១ដប ទឹកស៊ីអ៊ីវ១ដបខ្ទឹមស ថវិកា១០០.០០០រៀល និងផ្តល់ជូនកងពលតូចថ្មើរជើងលេខ២១ អង្ករ១តោន ទឹកសុទ្ធ១០០កេស មី៦០កេស ម៉ាស២៥០០ម៉ាស អាល់កុល៦០លីត្រ និងថវិកាមួយចំនួន។ ជាមួយគ្នានេះដែរលោក ហ៊ុន ម៉ាណែត អគ្គមេបញ្ជាការរងកងយុទ្ធពលខេមរភូមិន្ទ និងជាមេបញ្ជាការកងទ័ពជើងគោក និងលោកស្រី ពេជ ចន្ទមុនី ក៏បានជួយបំពេញការសាងសង់អគារនៅក្នុងកងពលតូចថ្មើរជើងលេខ២១ នូវថវិកាចំនួន ៤៥,០០០,០០០រៀលបន្ថែមផងដែរ៕SRP

ភ្នំពេញ៖មន្ត្រីបាននិយាយថាមន្ទីរប្រឆាំងបទល្មើសគ្រឿងញៀន បានបង្ក្រាបករណីជួញដូរគ្រឿងញៀន ចាប់ខ្លួនជនជាតិខ្មែរ ២នាក់ និងរឹបអូសគ្រឿងញៀនជាង ៣គីឡូក្រាម នៅរាជធានីភ្នំពេញ និងខេត្តកណ្តាល។

មន្ត្រីបានបន្តថាជនសង្ស័យ ១-ឈ្មោះ សេង សុគន្ធថៃ ភេទប្រុស អាយុ ២៣ឆ្នាំ។ ២-ឈ្មោះ ព្រហ្ម វាសនា ភេទប្រុស អាយុ ៣១ឆ្នាំ។ ករណីនេះដកហូតវត្ថុតាងសរុប ៣ គីក្រាម ២១៥.៣៨ ក្រាម/១. មេតំហ្វេតាមីន(ICE)ទម្ងន់ ៣ គ.ក្រ ១៤៦.៣៧ ក្រាម/២. អ៊ិចស្តាស៊ី(MDMA)ទម្ងន់ ៦៧.៨៧ក្រាម/៣. នីមេតាហ្សេប៉ាម ទម្ងន់ ១.១៤ក្រាម។បច្ចុប្បន្ន ជនសង្ស័យ និងវត្ថុតាងត្រូវបានកសាងសំណុំរឿង បញ្ជូនទៅសាលាដំបូងរាជធានីភ្នំពេញ។

សូមជម្រាបថាប្រតិបត្តិការនេះធ្វើឡើងនៅថ្ងៃទី ២៩ ខែកញ្ញា ឆ្នាំ២០២១ ចំនួន៣គោលដៅ ផ្សេងគ្នាជាបន្តបន្ទាប់ គោលដៅទី១៖ នៅក្នុងសង្កាត់ ខណ្ឌកំបូល រាជធានីភ្នំពេញ គោលដៅទី២ និងទី៣៖ នៅក្នុងឃុំបែកចាន ស្រុកអង្គស្នួល ខេត្តកណ្ដាល៕SRP

ភ្នំពេញ៖សម្ដេច ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ នៅព្រឹកថ្ងៃទី០២ ខែតុលា ឆ្នាំ២០២១នេះ បកស្រាយចម្ងល់ពាក្យថា៖វិមជ្ឈការ និងវិសហមជ្ឈការ។

សម្ដេច ស ខេង បានសរសេរថាខ្ញុំបានសន្យាថានឹងបន្តពិភាក្សាជាមួយបងប្អូនជនរួមជាតិអំពីកំណែទម្រង់ វិមជ្ឈការ និងវិសហមជ្ឈការដែលជាកំណែទម្រង់ផ្នែកអភិបាលកិច្ចពាក់ព័ន្ធយ៉ាងជិតដិតបំផុតទៅនឹង ជីវភាពប្រចាំថ្ងៃរបស់បងប្អូន ។ អាស្រ័យហេតុនេះ ថ្ងៃនេះខ្ញុំឆ្លៀតពេលដើម្បីបកស្រាយនូវចម្ងល់របស់ បងប្អូនមួយចំនួនអំពីថាតើ៖ កំណែទម្រង់វិមជ្ឈការ និងវិសហមជ្ឈការមានន័យដូចម្តេច?

សម្ដេច ស ខេង ពន្យល់ថា៖
ពាក្យថា “ វិមជ្ឈការ ” ត្រូវបានគេឱ្យនិយមន័យជាទូទៅថា គឺជាការផ្ទេរសិទ្ធិ អំណាច មុខងារ និង ធនធានពីរដ្ឋបាលថ្នាក់កណ្ដាលទៅឱ្យរដ្ឋបាលថ្នាក់មូលដ្ឋាន ឬរដ្ឋបាលថ្នាក់ក្រោមជាតិ ដើម្បីគ្រប់គ្រង ចាត់ចែង និងប្រើប្រាស់ក្នុងគោលបំណងលើកកម្ពស់ប្រសិទ្ធភាព និងគុណភាពនៃការផ្តល់សេវាសាធារណៈ និងការអភិវឌ្ឍមូលដ្ឋានឆ្លើយតបទៅនឹងតម្រូវការរបស់ប្រជាពលរដ្ឋដែលស្ថិតនៅក្នុងដែនសមត្ថកិច្ច របស់ខ្លួន ។ ក្នុងបែបផែននេះ រដ្ឋបាលថ្នាក់ក្រោមជាតិដែលមានក្រុមប្រឹក្សាជាប់ឆ្នោតជាតំណាង ត្រូវមាន គណនេយ្យភាពចំពោះប្រជាពលរដ្ឋក្នុងដែនសមត្ថកិច្ចរបស់ខ្លួននៅក្នុងការអនុវត្តនូវសិទ្ធិអំណាច មុខងារ និងធនធានទាំងនោះ។

ដោយឡែកពាក្យថា “ វិសហមជ្ឈការ “ សំដៅដល់កិច្ចដំណើរការដែលរដ្ឋបាលថ្នាក់កណ្ដាលផ្ទេរ មុខងារ និងធនធានទៅឱ្យអង្គភាពក្រោមបង្គាប់ ឬទៅឱ្យរដ្ឋបាលថ្នាក់ក្រោមជាតិប្រភេទណាមួយក្នុងបែប ផែនជាការធ្វើប្រតិភូកម្មនូវសិទ្ធិអំណាច ឬក្នុងបែបផែនជាកិច្ចសន្យា ដើម្បីអនុវត្តមុខងារ និងធនធាន ទាំងនោះក្នុងនាមក្រសួង ស្ថាប័នដែលនៅតែមាន តួនាទីទទួលខុសត្រូវលើការអនុវត្តមុខងារ និងធនធាន ទាំងនោះ ។ ក្នុងន័យនេះ អង្គភាព ឬរដ្ឋបាលថ្នាក់ក្រោមជាតិត្រូវមានគណនេយ្យភាពចំពោះក្រសួង ស្ថាប័ន លើការងារដែលបានប្រតិភូកម្មឱ្យ។

ជារួម វិមជ្ឈការ កំពុងក្លាយជាមាគ៌ាដ៏ពេញនិយមនៃការអនុវត្តគោលនយោបាយសាធារណៈ នៅតាមបណ្តាប្រទេសភាគច្រើននៅលើសកលលោកទាំងក្នុងក្របខ័ណ្ឌជារដ្ឋសហព័ន្ធ និងរដ្ឋទោលផង ដែរ ។ ទោះបីយ៉ាងនេះក្តី វាពុំមែនជាប្រព័ន្ធដ៏ល្អឥតខ្ចោះដែលគ្មានគុណវិបត្តិនោះឡើយ ក្នុងករណីដែល ប្រព័ន្ធនេះត្រូវបានអនុវត្តដោយមិនផ្អែកជាសំខាន់ទៅលើបរិបទជាក់ស្តែងនៃស្ថានភាពនយោបាយ សេដ្ឋកិច្ច សង្គម វប្បធម៌ និងប្រវត្តិសាស្ត្ររបស់ប្រទេសជាតិនីមួយៗ។

សម្រាប់កម្ពុជា កិច្ចដំណើរការផ្ទេរសិទ្ធិអំណាច មុខងារ និងធនធានទៅឱ្យរដ្ឋបាលថ្នាក់ក្រោម ត្រូវបានចាប់ផ្តើម និងបន្តអនុវត្តស្របពេលជាមួយគ្នាទាំងក្នុងបែបផែនវិមជ្ឈការ និងវិសហមជ្ឈការក្នុង គោលបំណងធានាទាំងនិរន្តភាព និងការលើកកម្ពស់ប្រសិទ្ធភាព និងគុណភាពនៃការផ្តល់សេវាសាធារណៈ ចាំបាច់នានាជូនដល់ប្រជាពលរដ្ឋ ក្នុងការអនុវត្តកំណែទម្រង់ប្រព័ន្ធគ្រប់គ្រងនៅរដ្ឋបាលថ្នាក់ក្រោម ជាតិតាមបែបផែនទាំងពីរនេះក្នុងរយៈពេលកន្លងមក យើងបានសម្រេចនូវសមិទ្ធផលជាច្រើនពាក់ព័ន្ធ ទៅនឹងការបង្កើតនូវរចនាសម្ព័ន្ធ ប្រព័ន្ធ និងនីតិវិធីបំពេញការងាររបស់រដ្ឋបាលថ្នាក់ក្រោមជាតិ ផ្អែក តាមគោលការណ៏នៃការអភិវឌ្ឍតាមបែបប្រជាធិបតេយ្យ ព្រមទាំងការផ្ទេរមុខងារ និងធនធានពាក់ព័ន្ធ នានាជាច្រើនទៅឱ្យរដ្ឋបាលថ្នាក់ក្រោមជាតិនីមួយៗ។ ទោះបីយ៉ាងនេះក្តី យើងក៏នូវមានបញ្ហាប្រឈមមួយចំនួនដែលត្រូវបន្តដោះស្រាយទៅមុខទៀតស្របតាមឆន្ទៈរបស់រាជរដ្ឋាភិបាលក្នុងការបន្តកិច្ចដំណើរ ការកំណែទម្រង់ដ៏មានសារៈសំខាន់នេះឱ្យបានស៊ីជម្រៅបន្ថែមទៀត។

ជាមួយគ្នានេះដែរ សម្ដេច ស ខេង ក៏បានបញ្ជាក់ផងដែរថា ខ្ញុំរីករាយនឹងទទួលយកនូវការផ្តល់មតិយោបល់នានា ព្រមទាំងបន្តផ្តល់ព័ត៌មានពាក់ព័ន្ធនឹង ការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការ ជូនបងប្អូនជនរួមជាតិ ជាបន្តបន្ទាប់ទៀត ដើម្បីបន្តរួមគា្នសម្រេចឱ្យបាននូវគោលបំណង និងគោលដៅចុងក្រោយនៃកំណែទម្រង់នេះ៕SRP

ខេត្តកំពង់ចាម​៖លោកអ៊ុន​ ចាន់ដា​ អភិបាលខេត្តកំពង់ចាម​ បានថ្លែងថា​ ម៉ាស៊ីន​ផលិត​ខ្យល់​អុកស៊ីហ្សែនដែល​បម្រើ​ឲ្យ​ការ​ព្យាបាល​ជំងឺ​កូវីដ​-១៩​នេះ​ ជា​អំណោយ​របស់​ឯកឧត្ដម​បណ្ឌិត​ ហ៊ុន​ ម៉ាណែត​ និង​លោក​ជំទាវ​ ដោយ​ម៉ាស៊ីនសម្រាប់ផលិតអុកស៊ីសែន មួយគ្រឿងនេះ មានសមត្ថភាពអាចផលិត​ខ្យល់​អុកស៊ីសែនបានក្នុងមួយម៉ោងចំនួន ១០បំពង់​ឯណោះ​​។ លោកថាបន្ទាប់​ពី​តំឡើង​ម៉ាស៊ីន​នេះ​រួច​ ខេត្តកំពង់ចាម នឹងចាប់ផ្តើមដំណើរការផលិតខ្យល់អុកស៊ីសែន ដោយខ្លួនឯង​ គឺមិន​ចាំបាច់​ទៅទិញ និងដឹកជញ្ជួនពី​រាជធានី​ភ្នំពេញ​ទៀត​នោះ​ឡើយ​។

លោកបញ្ជាក់យ៉ាងដូច្នេះនៅ​ថ្ងៃទី​១​ ខែតុលា​ ឆ្នាំ​២០២១​នេះ​ ក្នុងឱកាសចុះពិនិត្យពិនិត្យ​ស្ថានីយ៍​ផលិត​ខ្យល់​អុកស៊ីហ្សែន​ នៅ​មន្ទីរពេទ្យ​ខេត្តកំពង់ចាម​និងមណ្ឌលព្យាបាលជំងឺកូវីដ-១៩ កម្រិតស្រាល​ នៅ​ភូមិត្រពាំងចារ ឃុំក្រឡា​ ស្រុកកំពង់សៀម​។

លោកអ៊ុន​ ចាន់ដា​ ក៏បាន​ពន្លឿន​ដល់​ក្រុម​ការងារ​បច្ចេកទេស​ ឲ្យ​ខិតខំ​បង្ហេីយ​ការងារ​មួយ​ចំនួន​ដែល​នៅ​សេសសល់​ ដេីម្បី​ផ្ទេរ​អ្នក​ជំងឺ​កូវីដ​-១៩​ ពី​វិទ្យាល័យ​ព្រះសីហនុ​ មក​ព្យាបាល​នៅ​ទី​នេះ​វិញ។

​គួរ​រំលឹក​ផងដែរ​ថា កន្លងទៅនេះ​រដ្ឋបាលខេត្ត​កំពង់ចាម បានរៀបចំ​ឃ្លាំង​ពាណិជ្ជកម្ម ៣ ទីតាំង​សម្រាប់​ធ្វើជា​កន្លែង​ច​ត្រា​ឡី​ស័ក និង​មន្ទីរពេទ្យ​ព្យាបាល​ជំងឺ​កូ​វីដ​១៩ កម្រិត​ស្រាល ដោយ​ទីតាំង ទី​១ ឃ្លាំង នៃ​មន្ទីរ​ពាណិជ្ជកម្ម​ខេត្តកំពង់ចាម ក្នុង​ក្រុង​កំពង់ចាម ធ្វើជា​មណ្ឌល​ច​ត្តា​ឡី​ស័ក អាចដាក់​ប្រជាពលរដ្ឋ​ក្នុង​រង្វង់​ពី ៨០០ ទៅ ១០០០ នាក់។ ទីតាំង​ទី ២ ឃ្លាំង​នៅក្នុង​ស្រុក​កងមាស ធ្វើជា​មណ្ឌល​ច​ត្តា​ឡី​ស័ក អាចដាក់​ប្រជាពលរដ្ឋ ធ្វើ​ច​ត្តា​ឡី​ស័ក​ក្នុង​រង្វង់​ពី ៨០០ ទៅ ១០០០ នាក់​ផងដែរ។ ទីតាំង​ទី​៣ គឺ​ឃ្លាំង​ចំនួន​៣ ស្ថិត​ក្នុងស្រុក​កំពង់សៀម គឺ​ត្រូវ​បានរៀបចំ​សម្រាប់​ព្យាបាល​អ្នកជំងឺ​កូ​វីដ​១៩ កម្រិត​ស្រាល ដែល​អាច​ផ្ទុក​អ្នកជំងឺ​បាន​ក្នុង​រង្វង់​ជិត ១០០០​នាក់៕SRP

ខេត្តកំពង់ចាម​៖លោកអ៊ុន​ ចាន់ដា​ អភិបាលខេត្តកំពង់ចាម​ នៅព្រឹកមិញនេះ​ បានទទួលអំណោយពី​ក្រុមហ៊ុន​ស៊ីភី​ ដែលបានចូលរួមឧបត្ថម្ភ​ ម៉ាស​ចំនួន​១៥០០០សន្លឹក​ និង​ទឹក​អាកុល​ ​៣០០លីត្រ​ សម្រាប់​ប្រេីប្រាស់​ក្នុង​យុទ្ធនាការ​ បង្ការ​ និង​ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ​-១៩​ ក្នុង​ភូមិសាស្ត្រ​ខេត្តកំពង់ចាម​។

លោកអ៊ុន​ ចាន់ដា​ បានថ្លែងអំណរគុណយ៉ាងជ្រាល​ជ្រៅ​បំផុត​ចំពោះទឹកចិត្តប្រកបដោយសប្បុរស ពោរពេញទៅដោយសទ្ធាជ្រះថ្លារបស់លោក​អគ្គនាយក​ក្រុមហ៊ុន​ និង​សហការី​ ដែលបានចំណាយ​ថវិកា ទិញ​សម្ភារ​ការពារ​ជំងឺ​កូវីដ​-១៩ ក៏ដូចជាការជួយដល់សង្គមជាតិ តាមរយៈរដ្ឋបាល​ខេត្ត​កំពង់ចាម​ ដែលនេះគឺជាកាយវិការឆ្លុះបញ្ចាំងពីគុណធម៌ សប្បុរសធម៌ និង​ការចេះជួយគ្នាក្នុង​គ្រាលំបាក៕SRP

ខេត្តត្បូងឃ្មុំ​៖តំបន់ប្រតិបត្តិការសឹករងខេត្តត្បូងឃ្មុំ បានទទួលអំណោយ សម្រាប់ផ្គត់ផ្គង់ក្នុងឱកាសពិធីបុណ្យភ្ជុំបិណ្ឌ និងប្រយុទ្ធ​ប្រឆាំង​នឹងជំងឺកូវីដ-១៩ ពិសេសបន្តកិច្ចការពារបូរណភាពទឹកដី ពីលោកហ៊ុន ម៉ាណែត អគ្គមេបញ្ជាការរងកងយុទ្ធពលខេមរភូមិន្ទ និងជាមេបញ្ជាការកងទ័ពជើងគោក និងលោកស្រី ពេជ ចន្ទមុនី។

ការទទួលបានអំណោយនៅព្រឹកមិញនេះតាមរយៈ លោកជាម ច័ន្ទសោភ័ណ អភិបាលខេត្តត្បូងឃ្មុំ និងភរិយា។

លោកជាម ច័ន្ទសោភ័ណ បានថ្លែងកោតសរសើរ អរគុណដល់ទឹកចិត្តរបស់កម្លាំងយោធា នៃតំបន់ប្រតិបត្តិការសឹករងខេត្ត ដែលមានឆន្ទៈក្នុងការចូលរួមទប់ស្កាត់ ការពារបូរណភាពទឹកដី គាំទ្រឥតងាករេរ តាមបទបញ្ជារបស់រាជរដ្ឋាភិបាល ដែលមានសម្ដេចតេជោ ហ៊ុន សែន ជានាយករដ្ឋមន្រ្តីនៃកម្ពុជា។

លោកជាម ច័ន្ទសោភ័ណ បានថ្លែងទៅកាន់កងកម្លាំងយោធានាឱកាសនោះ ត្រូវបំរើរាស្ត្រដោយស្មោះត្រង់យកចិត្តទុកដាក់តាមបន្ទាត់ព្រំដែនប្រវែង១៣៤គីឡូម៉ែត្រ មិនឲ្យបុគ្គលណា ឬប្រទេសណាឈ្លានពានទឹកដី នេះជាកតព្វកិច្ចកងកម្លាំង បន្តរក្សាសន្តិសុខសណ្តាប់ធ្នាប់ មិនឲ្យមានការចលាចលក្នុងមូលដ្ឋាន ដោយអនុវត្តន៍តាមគោលនយោបាយ ភូមិ-ឃុំ មានសុវត្ថិភាព។

អភិបាលខេត្តត្បូងឃ្មុំ សង្ឃឹមយ៉ាងមុតមាំថា កងកម្លាំងយោធាយើងទាំងអស់បន្តឈរយ៉ាងរឹងមាំការពារទឹកដី និងត្រៀមកម្លាំងអន្តរាគមន៍ នៅពេលគណៈបញ្ជាការឯកភាពរដ្ឋបាលខេត្តត្រូវការ បូករួមទាំងកងកម្លាំងនគរបាល និងកងរាជអាវុធហត្ថដូចគ្នា។ អំណោយនាំយកទៅផ្តល់ជូនរួមមាន អង្ករ២តោន ទឹកសុទ្ធ២០០កេស មី១០០កេស ម៉ាស៥០០០ម៉ាស អាកុល១៥០លីត្រ បន្លែ១៨០គីឡូក្រាម និងថវិកាមួយចំនួន៕SRP

ភ្នំពេញ៖រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ លោកវេង សាខុន នៅព្រឹកថ្ងៃទី ១ ខែតុលា ឆ្នាំ ២០២១នេះ បានបង្ហាញរបាយការណ៍ ស្ដីពីការនាំចេញកសិផល ក្នុងរយៈពេល៩ខែ ឆ្នាំ២០២១។

លោកវេង សាខុន បានបង្ហាញថាលទ្ធផលនៃការនាំចេញកសិផលទៅក្រៅប្រទេសដែលអគ្គនាយកដ្ឋានកសិកម្មទទួលបានផ្អែកលើប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) នៅក្នុងរយៈពេល៩ខែ ឆ្នាំ២០២១នេះ មានបរិមាណសរុប ៥ ៩៣២ ៩២៣,៤៣ តោន ទៅកាន់ទិសដៅ ៦៨ ប្រទេស គឺមានការកើនឡើងចំនួន ២ ៧៨៥ ២៣១,៥៧ តោនស្មើនឹង ៨៨,៤៨% បើធៀបនឹងរយៈពេលដូចគ្នាក្នុងឆ្នាំ២០២០ ដែលទទួលបានត្រឹមតែ ៣ ១៤៧ ៦៩១,៨៦ តោន។ កសិផលសំខាន់ៗដែលបាននាំចេញមានដូចខាងក្រោម៖

១- ការនាំចេញអង្ករ
 បរិមាណអង្ករនាំចេញមានចំនួន ៤១០ ៦៩៨ តោន មានការថយចុះចំនួន ៧៨ ០៧៧ តោន (-១៥,៩៧%) បើធៀបនឹងបរិមាណនាំចេញក្នុងរយៈពេល៩ខែឆ្នាំ២០២០ ដែលមានចំនួន ៤៨៨ ៧៧៥ តោន
 ការនាំចេញអង្ករក្នុងខែកញ្ញា ឆ្នាំ២០២១ មានចំនួន ៦៧ ២៥១ តោន កើនឡើងចំនួន ២៦ ៦៧៩ តោន (៦៥,៧៦%) បើធៀបនឹងខែកញ្ញា ឆ្នាំ២០២០ ដែលមានចំនួន ៤០ ៥៧២ តោន
 អង្ករក្រអូបគ្រប់ប្រភេទមានចំនួន ២៨៨ ៨៣១ តោន ស្មើនឹង ៧០,៣៣% អង្ករសគ្រប់ប្រភេទមានចំនួន ១១៤ ៤៦៩តោន ស្មើនឹង ២៧,៨៧% និងអង្ករចំហុយមានចំនួន ៧ ៣៩៨ តោន ស្មើនឹង ១,៨០%
 បរិមាណអង្ករបាននាំចេញទៅកាន់ទិសដៅសហភាពអឺរ៉ុបចំនួន២២ប្រទេស មានបរិមាណសរុបចំនួន ១០៤ ២២២តោន (ថយចុះចំនួន ៥៧ ៣៩២ តោន ស្មើនឹង -៣៥,៥១%) ទិសដៅប្រទេសចិនមានបរិមាណសរុបចំនួន ២០៣ ២៧៩ តោន (កើនឡើងចំនួន ៣១ ៣៨៣ តោន ស្មើនឹង ១៨,២៦%) ទិសដៅអាស៊ានចំនួន ៧ប្រទេស មានបរិមាណសរុបចំនួន ៤១ ៤៧៦ តោន(ថយចុះចំនួន ២៥ ៩៥៧ តោន ស្មើនឹង -៣៨,៤៩%) និងទិសដៅដទៃទៀតចំនួន២៣ប្រទេស មានបរិមាណសរុប ៦១ ៧២១ តោន (ថយចុះចំនួន ២៦ ១១១តោន ស្មើនឹង -២៩,៧៣%)
 ក្រុមហ៊ុនដែលបាននាំចេញអង្ករមានចំនួន ៥៩ ក្រុមហ៊ុន ហើយបរិមាណអង្ករដែលបាននាំចេញដោយក្រុមហ៊ុនធំៗចំនួន១០ មានរហូតដល់ ២៩៩ ៥៣៣ តោន (៧២,៩៤%) និងក្រុមហ៊ុន៤៩ដទៃទៀតបាននាំចេញត្រឹមតែ ១១១ ១៦៥ តោន (២៧,០៦%)។

២- ការនាំចេញស្រូវ
ការនាំចេញស្រូវមានចំនួន ២ ៥២៣ ២៦៣ តោន ក្នុងរយៈពេល៩ខែឆ្នាំ២០២១ ទៅកាន់ប្រទេសវៀតណាម (មានវិញ្ញាបនបត្រភូតគាមអនាម័យចំនួន ១ ៦២៧ ៧៤០,០២ តោន) ដែលមានការកើនឡើងចំនួន ១ ១៣០ ៩៥៧ តោន (៨១,២៣%) បើធៀបនឹងរយៈពេលដូចគ្នានៅឆ្នាំ២០២០ ដែលមានចំនួន ១ ៣៩២ ៣០៦ តោន។

៣- ការនាំចេញកសិផលក្រៅពីស្រូវ-អង្ករ
ក្នុងរយៈពេល៩ខែ ឆ្នាំ២០២១ ការនាំចេញកសិផលក្រៅពីស្រូវ-អង្ករ មានចំនួន ៣ ៨៩៤ ៤៨៥,៤១ តោន កើនឡើងចំនួន ១ ២៣៥ ៥៦៨,៥៥ តោន ស្មើនឹង ៤៦,៤៧% បើធៀបនឹងរយៈពេលដូចគ្នាក្នុងឆ្នាំ២០២០ ដែលមានចំនួន ២ ៦៥៨ ៩១៦,៨៦តោន ដែលក្នុងនោះរួមមាន៖
 ចំណិតដំឡូងមីក្រៀមមានចំនួន ១ ៣០៨ ៩៤៣,១២ តោន (កើនឡើងចំនួន ៨,៨៤%) ក្នុងនោះនាំចេញទៅប្រទេសថៃចំនួន ៨៥៩ ៨៤០ តោន ប្រទេសវៀតណាមចំនួន ៤២៩ ៤៥១,៥៦ តោន និងប្រទេសចិនចំនួន ១៩ ៦៥១,៥៦ តោន
 ដំឡូងមីស្រស់មានចំនួន ៥៧៥ ៩២០ តោន (កើនឡើងចំនួន ៩,៤៧%) ក្នុងនោះនាំចេញទៅប្រទេសវៀតណាមចំនួន ៣៨៦ ៤២០ តោន និងប្រទេសថៃចំនួន ១៨៩ ៥០០ តោន
 ម៉្សៅដំឡូងមីមានចំនួន ២២ ៣៩៦,៧៤ តោន (កើនឡើងចំនួន ១៣,៤១%) ក្នុងនោះនាំចេញទៅប្រទេសចិនចំនួន ១៩ ៨៦៨,៦០ តោន ប្រទេសថៃចំនួន ១ ៣៧៥,៨០ តោន ប្រទេសអ៊ីតាលីចំនួន ៦៩៤,៣៤ តោន សហរដ្ឋអាមេរិក ចំនួន ១៧០តោន ប្រទេសណេដឺឡែនចំនួន ១៥២ តោន និងប្រទេសប៊ែលហ្ស៉ិកចំនួន ១៣៦ តោន
 កាកសំណល់ដំឡូងមីមានចំនួន ៦ ០៥១,៥០ តោន (ថយចុះចំនួន -៣៧,១០%) នាំចេញទៅប្រទេសចិន
 គ្រាប់ស្វាយចន្ទីមានចំនួន ៨៩២ ៥៣៥,៧១ តោន (កើនឡើងចំនួន ៣៣៧,០៧%) នាំចេញទៅប្រទេសវៀតណាមចំនួន ៨៨៥ ១៤០ តោន ប្រទេសចិនចំនួន ៣ ៨៩៦,៩៤ តោន ប្រទេសថៃចំនួន ៣ ៣០៥,៤០ តោន ប្រទេសឥណ្ឌាចំនួន ៩៨,៦០ តោន ប្រទេសជប៉ុនចំនួន ៤៤,១៣ តោន ប្រទេសកូរ៉េចំនួន ១៦,៨៨ តោន ប្រទេសអារ៉ាប់ចំនួន ១៤,៥១ តោន ប្រទេសណេដឺឡែនចំនួន ៨,២១ តោន ប្រទេសបង់ក្លាដែសចំនួន ៧ តោន ប្រទេសឡាវចំនួន ៤ តោន ប្រទេសស្វីសចំនួន ០,០២ តោន ប្រទេសតូហ្គោចំនួន ០,០១ តោន និងប្រទេសអារ៉ាប់រួមចំនួន ០,០១ តោន
 គ្រាប់ពោតមានចំនួន ១៥៤ ៤៥៩,៣៤ តោន (ថយចុះចំនួន -២០,៣៦%) នាំចេញទៅប្រទេសវៀតណាម ចំនួន ១១១ ១៧០ តោន ប្រទេសថៃចំនួន ៤២ ៣៥០ តោន កោះតៃវ៉ាន់ចំនួន ៨៧៦,២៩ តោន ប្រទេសបង់ក្លាដេស ចំនួន ៤២,០៥ តោន និងប្រទេសកូរ៉េចំនួន ២១ តោន
 គ្រាប់សណ្តែកបាយមានចំនួន ២៥ ៣៣០ តោន (កើនឡើងចំនួន ៤១៩,០៩%) នាំចេញទៅប្រទេសវៀតណាម
 គ្រាប់សណ្តែកសៀងមានចំនួន ២៧ ៩៦០,០៤ តោន (កើនឡើងចំនួន ៣៤៧,៣៦%) នាំចេញទៅប្រទេសវៀតណាមចំនួន ១៩ ១១០ តោន ប្រទេសថៃចំនួន ៨ ៨៥០ តោន និងប្រទេសអារ៉ាប់រួមចំនួន ០,០៤ តោន
 ផ្លែចេកស្រស់មានចំនួន ៣៤៣ ៨១២,៣៤ តោន (កើនឡើងចំនួន ៤៦,២០%) នាំចេញទៅប្រទេសចិនចំនួន ៣០១ ៦២៨,៩៩ តោន ប្រទេសវៀតណាមចំនួន ៤១ ១៦៩,៣៥ តោន ប្រទេសជប៉ុនចំនួន ៥៣៣,៥២ តោន និងប្រទេសសិង្ហបុរីចំនួន ៤៨០,៤៨ តោន
 ផ្លែក្រូចថ្លុងមានចំនួន ៣៤ ៩១៨,៤៤ តោន (កើនឡើងចំនួន ១៣០,៤៨%) នាំចេញទៅប្រទេសថៃចំនួន ៣៤ ៨៥៤ តោន និងប្រទេសវៀតណាមចំនួន ៦៤,៤៤ តោន
 ផ្លែស្វាយស្រស់មានចំនួន ១៧២ ៨៤៦,៨៣ តោន (កើនឡើងចំនួន ១៧៤,៧១%) នាំចេញទៅប្រទេសវៀតណាមចំនួន ១៤៧ ៩៧៤,១៨ តោន ប្រទេសថៃចំនួន ២៤ ៤៦៩,២៨ តោន ប្រទេសចិនចំនួន ២១២ តោន ប្រទេសកូរ៉េចំនួន ១២៤,៣៨ តោន ទីក្រុងហុងកុងចំនួន ៥០,៧៨ តោន ប្រទេសសិង្ហបុរីចំនួន ១៦,២០ តោន និងប្រទេសគុយវ៉ែតចំនួន ០,០១ តោន
 ដំណាប់ស្វាយមានចំនួន ១៤ ៤៦១,៧៨ តោន (កើនឡើងចំនួន ១៨៩,៣១%) នាំចេញទៅប្រទេសចិនចំនួន ១១ ៧៩៤,០២ តោន ប្រទេសថៃចំនួន ១ ២៩២,៥២ តោន ប្រទេសហ្វីលីពីនចំនួន ៧៣៥,៦៩ តោន ប្រទេសជប៉ុនចំនួន ៥១២,៥០ តោន ប្រទេសវៀតណាមចំនួន ៧៦,៨០ តោន ចក្រភពអង់គ្លេស ២១,១៤ តោន ប្រទេសកូរ៉េចំនួន ១៧,៥០ តោន សហរដ្ឋអាមេរិកចំនួន ៨,៥៦ តោន កោះតៃវ៉ាន់ចំនួន ៣ តោន ប្រទេសកាហ្សាក់ស្ថានចំនួន ០,០៥ តោន និងប្រទេសរុស្ស៊ីចំនួន ០,០០១តោន
 ទឹកស៊ីរ៉ូស្វាយមានចំនួន ៤ ១៣០,៨២ តោន (កើនឡើងចំនួន ៦៦,៧៧%) នាំចេញទៅប្រទេសហ្វីលីពីនចំនួន ៣ ៩៨២,៨២ តោន និងប្រទេសចិនមានចំនួន ១៤៨ តោន
 ដូងប្រេងមានចំនួន ៤៥ ៧៩៦,៦៩ តោន (កើនឡើងចំនួន ០,៩៨%) នាំចេញទៅប្រទេសឥណ្ឌាចំនួន ៣៥ ០១៦,៦៩ តោន និងប្រទេសម៉ាឡេស៊ីចំនួន ១០ ៧៨០ តោន
 ម្រេចមានចំនួន ២៧ ៣១៦,៧២ តោន (កើនឡើងចំនួន ៥៦២,៧១%) នាំចេញទៅប្រទេសវៀតណាម ចំនួន ២៦ ៦៨៦,៦៨ តោន ប្រទេសអាល្លឺម៉ង់ចំនួន ៣១៤ តោន ប្រទេសថៃចំនួន ១៨០ តោន ប្រទេសឥណ្ឌាចំនួន ៤២ តោន ប្រទេសបារាំងចំនួន ៣១,១៧ តោន ប្រទេសប៊ែលហ្ស៊ិកចំនួន ១៥,៩៨ តោន កោះតៃវ៉ាន់ចំនួន ១៥,០៤ តោន ប្រទេសប៉ូឡូញចំនួន ៧,០៩ តោន សាធារណរដ្ឋឆេកចំនួន ៦,១០ តោន ប្រទេសជប៉ុនចំនួន ៣,៤០ តោន ប្រទេសកូរ៉េចំនួន ៣,២៥ តោន ប្រទេសរុស្ស៊ីចំនួន ២,៤០ តោន ប្រទេសសិង្ហបុរីចំនួន ១,៩៧ តោន សហរដ្ឋអាមេរិកចំនួន ១,៧៥ តោន ប្រទេសស្វីសចំនួន ១,៦៤ តោន ប្រទេសស៊ុយអ៊ែតចំនួន ១,២៩ តោន ចក្រភពអង់គ្លេសចំនួន ១,២៤ តោន ប្រទេសអូស្រ្តាលីចំនួន ០,៩០ តោន ប្រទេសកាណាដាចំនួន ០,៥២ តោន ប្រទេសកាហ្សាក់ស្ថានចំនួន ០,១៩ តោន និងប្រទេសអារ៉ាប់រួមចំនួន ០,០១ តោន
 ថ្នាំជក់មានចំនួន ២ ៥១៤,០៥ តោន (ថយចុះចំនួន -៥៣,៥៨%) នាំចេញទៅប្រទេសវៀតណាម ២ ៤៣២,៨០ តោន ប្រទេសប៊ែលហ្ស៊ិកចំនួន ៥៩,៤២ តោន ប្រទេសហុងគ្រីចំនួន ១៩,៨០ តោន ប្រទេសបូស្នៀនិងហឺហ្សេហ្គោវីណាចំនួន ១,៩០ តោន ប្រទេសចិនចំនួន ០,១០ តោន ប្រទេសឥណ្ឌូនេស៊ីចំនួន ០,០២ តោន ប្រទេសសិង្ហបុរីចំនួន ០,០១ តោន និងប្រទេសអាល្លឺម៉ង់ចំនួន ០,០០១ តោន
 បន្លែចម្រុះមានចំនួន ៧៧,៥០ តោន (ថយចុះចំនួន -១១,៥០%) នាំចេញទៅប្រទេសបារាំង
 ម្ទេសស្រស់មានចំនួន ៨០ ៣២៧,១២ តោន (កើនឡើងចំនួន ៤៥,៦៤%) នាំចេញទៅប្រទេសថៃចំនួន ៨០ ៣២៧,១២ តោន និងប្រទេសអារ៉ាប់រួមចំនួន ០,០០២ តោន
 ម្ទេសក្រៀមមានចំនួន ១ ៧៤០,២៣ តោន (កើនឡើងចំនួន ១៦,០២%) នាំចេញទៅប្រទេសថៃចំនួន ១ ៧៤០ តោន ប្រទេសប៊ែលហ្ស៊ិកចំនួន ០,២១ តោន ប្រទេសកូរ៉េចំនួន ០,០១ តោន និងប្រទេសកាណាដា ចំនួន ០,០១ តោន
 និងផលិតផលចំនួន ៧៤ មុខ ផ្សេងទៀតមានចំនួន ១៥២ ៩៤៦,៤៤ តោន។

៤-តម្លៃនៃការនាំចេញកសិផល
ការប៉ាន់ស្មានតម្លៃក្នុងរយៈពេល៩ខែឆ្នាំ២០២១ ដែលទទួលបានពីការនាំចេញកសិផល (ឯកតាតម្លៃផ្អែកតាមវិក្កយបត្ររបស់អ្នកនាំចេញ) មានចំនួន ៣ ៤៨៩ ៧៧៦ ៩៩៩,០៥ ដុល្លារអាមេរិក ដែលក្នុងនោះ៖
 ការនាំចេញអង្ករមានចំនួន ៣៤៩ ៩១៤ ៦៩៦ ដុល្លារអាមេរិក
 ការនាំចេញស្រូវមានចំនួន ៤២៨ ៩៥៤ ៧១០ ដុល្លារអាមេរិក
 ការនាំចេញកសិផលក្រៅពីស្រូវ-អង្ករមានចំនួន ២ ៧១០ ៩០៧ ៥៩៣,០៥ ដុល្លារអាមេរិក។

៥-ការកត់សំគាល់
ការនាំចេញកសិផលសរុបក្នុងរយៈពេល៩ខែឆ្នាំ២០២១ មានកំណើនចំនួន ៨៨,៤៨% ក្នុងនោះកសិផល ក្រៅពីអង្ករមានការកើនឡើងចំនួន ១០៧,៦៩% រីឯការនាំចេញអង្ករមានការថយចុះចំនួន -១៥,៩៧% ដោយសារ កម្ពុជាជួបបញ្ហាប្រឈមនឹងកង្វះប្រភេទទូរកុងតេន័រដែលមានទំហំ២០ហ្វិតសម្រាប់ផ្ទុកអង្ករ និងតម្លៃដឹកជញ្ជូនកើនឡើង(យោងសេចក្តីរាយការណ៍របស់សហព័ន្ធស្រូវអង្ករកម្ពុជា)៕SRP

ខេត្តកំពង់ធំ៖ប៉ូលិសសេដ្ឋកិច្ចក្រសួងមហាផ្ទៃចំនួនពីរនាក់នឹងមនុស្សពីរនាក់ទៀតត្រូវបានចាប់ខ្លួនករណីជំរិតទារប្រាក់ពីពលរដ្ឋដឹកឈើ។

មន្ត្រីនគរបាលខេត្តកំពង់ធំបានថ្លែងប្រាប់សារព័ត៌មានសៀមរាបប៉ុស្តិ៍នៅព្រឹកនេះថាជនសង្ស័យទាំង៤នាក់ ត្រូវបានកម្លាំងការិយាល័យ នគរបាលព្រហ្មទណ្ឌ ស្នងការដ្ឋានប៉ូលិសខេត្តកំពង់ធំ ចាប់ខ្លួនបានក្រោយទទួលបានពាក្យបណ្តឹងពីពលរដ្ឋដឹកឈើ «ចំនួន៩សន្លឹក»យកមកធ្វើផ្ទះ។

មន្ត្រីនគរបាលបានថ្លែងបន្តថាក្រុមជនសង្ស័យបានជំរិតទារប្រាក់បង្កឲ្យមានអំពើហិង្សា ក្នុងនោះ ប៉ូលិសសេដ្ឋកិច្ចក្រសួង បានយកអាវុធខ្លីវាយក្បាលជនរងគ្រោះបណ្តាល ឲ្យបែកឈាម និងវាយទាត់ធាក់ទៅលើជនរងគ្រោះផងដែរ។

ស្នងការរងនគរបាលខេត្ត ទទួលផ្នែកព្រហ្មទណ្ឌ លោកទិត សំណាង បានអត្ថាធិប្បាយប្រាប់អ្នកងារសៀមរាបប៉ុស្តិ៍ នៅរសៀលថ្ងៃទី៣០ ខែកញ្ញា ម្សិលមិញថា៖សមត្ថកិច្ចរបស់លោកកំពុងរៀបចំបញ្ជូនជនសង្ស័យទាំង៤នាក់ទៅកាន់សាលាតំបូងខេត្ត បន្ទាប់ពីកម្លាំងរបស់លោកបានចុះឃាត់ជនសង្ស័យទាំង៤នាក់ កាលពីយប់ថ្ងៃទី២៩ ខែកញ្ញា ដោយបានទទួលបទបញ្ជាពីលោក ស៊ិន វិរៈ ព្រះរាជអាជ្ញាអមសាលាតំបូងខេត្ត។

លោកទិត សំណាង ថ្លែងបន្តថាក្រោយពីទទួលបានពាក្យបណ្តឹងពីជនរងគ្រោះ ឈ្មោះ ធី ញ៉ាញ់ ភេទប្រុស អាយុ ៣២ឆ្នាំ រស់នៅភូមិល្អក់ ឃុំកំពង់ថ្ម ស្រុកបារាយណ៍ ខេត្តកំពង់ធំ ថាក្រុមជនសង្ស័យទាំង៤ បន្ទាប់ពីជំរិតទារប្រាក់ពីជនរងគ្រោះ ដែលដឹកឈើបន្តិចបន្តួចមិនបាន ក៏បានបង្កអំពើហិង្សាវាយដំទៅលើគាត់កាលថ្ងៃទី២៨ ខែកញ្ញា ឆ្នាំ២០២១។

ស្នងការរងរូបនេះបន្តរថា៖ជនសង្ស័យទាំង៤នាក់ ទី១.ឈ្មោះ អ៊ុច សុខរិទ្ធី ភេទប្រុស អាយុ៣៤ឆ្នាំ រស់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ទី២.ឈ្មោះ កែវ រីណា ភេទប្រុស អាយុ៣១ឆ្នាំ រស់នៅភូមិលេខ២០ ផ្លូវ ៦១៤សង្កាត់បឹងកក់២ ខណ្ឌទួលគោក រាជធានីភ្នំពេញ ជនសង្ស័យទាំង២ គឺជាប៉ូលិសសេដ្ឋកិច្ចក្រសួងមហាផ្ទៃ ដែលជាជនដៃដល់វាយពលរដ្ឋដឹកឈើក្តាធ្វើផ្ទះ ទី៣,ឈ្មោះ លេង ថេត ភេទប្រុស អាយុ៤៨ឆ្នាំ ជាអ្នកសារព័ត៌មាន រស់នៅភូមិគន្លងខ្ទីង ឃុំឈើទាល ស្រុកសណ្តាន់ និងទី៤,ឈ្មោះ វ៉ាន់ លាងហេង ភេទប្រុស អាយុ៣៧ឆ្នាំ ជាប្រជាការពារភូមិ រស់នៅភូមិអូរពកសាមគ្គី ឃុំឈើទាល ស្រុកសណ្តាន់ ឈ្មោះ លេង ថេង នឹងឈ្មោះ វ៉ាន់ លាងហេង គឺជាអ្នកនាំផ្លូវប៉ូលិសសេដ្ឋកិច្ចក្រសូងខាងលើដើររកលុយ អ្នកទាំង៤ត្រូវបានកសាងសំណុំរឿង បញ្ជូនទៅតុលាការខេត្តកំពង់ធំនៅថ្ងៃនេះ ក្រោយការសាកសួររួច៕SRP

ខេត្តសៀមរាប៖បុរសម្នាក់ត្រូវបានកម្លាំងកងរាជអាវុធហត្ថក្រុងសៀមរាប ឃាត់ខ្លួនពាក់ព័ន្ធការជួញដូរគ្រឿងញៀន។

ការឃាត់ខ្លួនធ្វើឡើងនៅវេលាម៉ោង១៧ ថ្ងៃព្រហស្បតិ៍​ ទី៣០​ ខែកញ្ញា ឆ្នាំ២០២១ ខណ:អង្គុយលេីម៉ូតូម៉ាកសង់​ សេ១២៥​ សេរីឆ្នាំ២០១៩​ ពណ៌ខ្មៅ​ ពាក់ស្លាកលេខ:កំពង់ធំ​ ១M:៦៤៨៥ ចំណុចផ្លូវបេតុង​ ខាងកេីតភោជនីយដ្ឋាន​ ​ហៃ​ វិន​ ស្ថិតក្នុងភូមិធ្លកអណ្ដូង​ សង្កាត់ស្លក្រាម​ ក្រុងសៀមរាប​ ខេត្តសៀមរាប​ ដឹកនាំលោក ប្រាក់ វណ្ណៈ មេបញ្ជាការ មូលដ្ឋានកងរាជអាវុធហត្ថក្រុងសៀមរាប។

អាវុធហត្ថបានឲ្យដឹងថាជនសង្ស័យ​ ឈ្មោះ​ លន​ សេងលឿន​ អាយុ​២៨ឆ្នាំ​ ទីលំនៅ​ភូមិខ្នា​រ​ សង្កាត់ជ្រាវ​ ក្រុងសៀមរាប។

អាវុធហត្ថបានបន្តថា ក្រោយឃាត់ខ្លួនរកឃើញវត្ថុតាង ម្សៅក្រាមពណ៌សរថ្លា​ (ម៉ាទឹកកក)​ ចំនួន២កញ្ចប់​ និងទូរស័ព្ទ៣គ្រឿង​ ។
បច្ចុប្បន្ន​ត្រូវបានបញ្ជូនបន្តរនៅការិយាល័យគ្រឿងញៀន​កងរាជអាវុធហត្ថខេត្តសៀមរាបដេីម្បីបន្តនីតិវិធី​៕SRP

ខេត្តសៀមរាប៖ប្រជាការពារម្នាក់បានស្លាប់នៅក្នុងហាងម៉ាស្សាមួយកន្លែងបង្កឲ្យមានការភ្ញាក់ផ្អើលដល់សមត្ថកិច្ចនិងប្រជាពលរដ្ឋ។

យោងតាមរបាយការណ៍បឋមពីសមត្ថកិច្ចបានឲ្យដឹងថា ហេតុការណ៍បានកើតឡើង នៅល្ងាចថ្ងៃទី​៣០​ខែកញ្ញាឆ្នាំ​២០២១នៅចំណុចហាងម៉ាស្សាយីហោរឈ្មោះ(7777) ស្ថិតនៅភូមិទក្សិណខាងត្បូង​ សង្កាត់គោកចក​ ក្រុងសៀមរាប។

សមត្ថកិច្ចក្នុងហេតុការណ៍បានឲ្យដឹងថា ជនរងគ្រោះ មានឈ្មោះ​ នៅ​ ណាត​ ភេទ​ ប្រុស​ អាយុ​៦០ឆ្នាំ​ មុខរបរប្រជាការពារភូមិ មានអាសយដ្ឋាននៅភូមិស្វាយដង្គំ​ សង្កាត់ស្វាយដង្គំ​ ក្រុងសៀមរាប​ ខេត្តសៀមរាប។ មូលហេតុស្លាប់ តាមការត្រួតពិនិត្យរបស់សមត្ថកិច្ច នឹង ក្រុមគ្រូពេទ្យ បានធ្វើតេស្តយកសំណាករកមេរោគកូវីដ១៩ ជាលទ្ធផល(វិជ្ជមាន)។

​បច្ចុប្បន្ន៖សព ត្រូវបានក្រុមគ្រូពេទ្យដឹកយកទៅបូជានៅឈាបនដ្ឋាន វត្តអរញ្ញរង្សី(ហៅវត្តល្អក់) ស្ថិតនៅភូមិត្រពាំងទឹម ឃុំកណ្តែក ស្រុកប្រាសាទបាគង ខេត្តសៀមរាប។

សូមជម្រាបថានៅថ្ងៃទី ៣០ ខែកញ្ញាឆ្នាំ ២០២១ នេះអាជ្ញាធររដ្ឋបាលខេត្តសៀមរាបបានប្រកាសបើករំសាយឡើងវិញនៅតំបន់ក្រហមតំបន់លឿងទុំ ក្រោយពីបានប្រកាសបិទនៅតាមបណ្តាសង្កាត់មួយចំនួនដូចជាសង្កាត់ស្វាយដង្គំ សង្កាត់ស្លក្រាម សង្កាត់គោកចកគឺគោលបំណងដើម្បីទប់ស្កាត់នៃការរីករាយតើជំងឺកូវីដ១៩៕SRP