ខេត្តសៀមរាប៖ចៅសង្កាត់រងទី ១សង្កាត់ជ្រាវ លោកគង់ ប៊ឹប  ដែលមហាជនបានស្គាល់ថា ជាថៅកែដីឡូតិ៍ដ៏ល្បីល្បាញ និងជាបុរសមានប្រជាប្រិយភាពក្នុងខេត្តសៀមរាប ផងនោះ ត្រូវប្រជាពលរដ្ឋ មួយក្រុមប្តឹងទៅតុលាការរឿងជំពាក់លុយជិត២០ម៉ឺនដុល្លារអាមេរិក ហើយគេចវេសមិនព្រមសង។

លោក ជា គីមឆែ ហៅស៊ីង ជាម្ចាស់បំណុលម្នាក់របស់លោក គង់ ប៊ឹប បានអះអាងថា កាលកាលពីថ្ងៃទី២២ ខែកុម្ភៈ ឆ្នាំ២០១៩ ខ្លួនបានចុះកិច្ចសន្យាចាក់ដីបង្វិលជាមួយកូនបំណុល ដើម្បីជីកស្រះនិងចាក់ដីបង្វិលក្នុងភូមិសាស្ត្រ សង្កាត់ជ្រាវ ក្រុងសៀមរាប ទំហំ៦ហិកតា និងស្រះនោះជម្រៅ៦ម៉ែត្រ ដែលមានតម្លៃសរុប ៤៦៨.០០០ដុល្លារ។ ក្នុងគ្រាដែលកំពុងដំណើរការ លោក គង់ ប៊ឹប បានទូទាត់ប្រាក់មួយចំនួនទៅមកឲ្យខ្លួន។ លោកបន្តថា លុះអំឡុងខែមេសាឆ្នាំ ២០១៩ លោក គង់ ប៊ឹប បានផ្អាកការងារប៉ុន្តែនៅជំពាក់លុយលោក ១៣៤.៦១៣.៧ដុល្លារ។

បើតាម លោក ជា គីមឆែ ដោយសារតែការមិនទទួលខុសត្រូវនេះ លោកបានដាក់ពាក្យប្តឹងរក្សាការពារមួយទៅតុលាការ ដើម្បីរឹបអូសដីរបស់លោកគង់ ប៊ឹប ជាបណ្តោះអាសន្ន។   យោងតាមដីកា សម្រេចរក្សាការពារ របស់សាលាដំបូងខេត្តសៀមរាបលេខ ២៧៨ឈ/២០១៩ចុះថ្ងៃទី២ ខែកក្កដាឆ្នាំ ២០១៩ ដែលចុះហត្ថលេខាដោយលោកមុយ សុភក្ត្រ័ ចៅក្រមសាលាដំបូង បានបង្ហាញថា ម្ចាស់បំណុលឈ្មោះជា គីមឆែ បានស្នើសុំអោយតុលាការចេញដីកាសម្រេច រឹបអូសជាបណ្តោះអាសន្ននូវដីមួយកន្លែងដែលមានទំហំ១.៨៥៦ម៉ែត្រក្រឡា ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប។

ដីកាបង្ហាញទៀតថា កាលពីថ្ងៃទី២២ខែកុម្ភៈឆ្នាំ ២០១៩ ម្ចាស់បំណុលបានចុះកិច្ចសន្យាចាក់ដីបង្វិលជាមួយកូនបំណុល ដើម្បីជីកស្រះនិងចាក់ដីបង្វិលក្នុងភូមិសាស្ត្រ សង្កាត់ជ្រាវ ក្រុងសៀមរាប ៦ហិកតា និងស្រះនោះជម្រៅ៦ម៉ែត្រ ដែលមានតម្លៃសរុប ៤៦ ៨.០០០ដុល្លារ។ ក្នុងគ្រាដែលកំពុងដំណើរការ កូនបំណុលបានអោយប្រាក់មួយចំនួនទៅម្ចាស់បំណុល។ លុះអំឡុងខែមេសាឆ្នាំ២០១៩ កូនបំណុលបានផ្អាកការងាររបស់ខ្លួន ដោយនៅជំពាក់លុយម្ចាស់បំណុល ១៣៤.៦១៣.៧ដុល្លារ។

ក្នុងដីកាបញ្ជាក់ សម្រេចរឹបអូសជាបណ្តោះអាសន្នលើអចលនវត្ថុរបស់កូនបំណុលឈ្មោះគង់ ប៊ឹប ដីមួយកន្លែងក្នុងភូមិខ្នារ សង្កាត់ជ្រាវ ក្រុងសៀមរាបមានទំហំ ១៨៥៦ម៉ែត្រក្រឡា។

ជុំវិញករណីខាងលើនេះម្ចាស់បំណុលឈ្មោះជា គីម ឆែ ហៅ(ស៊ីង) បានអោយដឹងថា រឿងនេះខាងលោកបានប្តឹងទៅតុលាការចំនួន២ដងរួចមកហើយ ពេលនេះតុលាការ សម្រេចរឹបអូសដី តាមការស្នើសុំរបស់លោក។

លោកស៊ីង បន្តថា លោកគង់ ប៊ឹប ក្រៅពីជំពាក់បំណុលលោកជាង១៣ម៉ឺនដុល្លារ នៅជំពាក់ឈ្មោះថោង ឡង់ឌី៤ម៉ឺនដុល្លារ .ឈ្មោះថន ពៅ ១៨ ០០០ដុល្លារ. ឈ្មោះផល្លា២ម៉ឺនដុល្លារ.ឈ្មោះថោង សាវុធ ៧៥០០ដុល្លារ។ កាលចុះកិច្ចសន្យា លោកគង់ ប៊ឹប បាននិយាយថា បើភាគីខាងលោក(ស៊ីង) អនុវត្តមិន បានតាមកិច្ចសន្យាត្រូវតែប្រឈមតាមផ្លូវច្បាប់។  ប៉ុន្តែតាំពីឆ្នាំ២០១៩ មក ទល់ឆ្នាំ២០២២ ហើយលោកគង់ ប៊ឹប នៅមិនព្រមសងលុយទៀត។

យោងតាមការបញ្ជាក់របស់លោកស៊ីង បង្ហាញ ថា លោកគង់ ប៊ឹប នៅមានជំពាក់បំណុលមនុស្សច្រើននាក់ទៀត បើទោះបីពេលនេះលោកកំពុងបង្ហាញឡានទំនើប ឡិចស៊ីស៥៧០ដ៏មានតម្លៃ ដល់ក្រសែភ្នែកមហាជនរាប់លានគូរក៏ដោយ។

អះអាងប្រហាក់ប្រហែលនឹងលោក ជា គីមឆែ ហៅ ស៊ីង ដែរ ប្រជាពលរដ្ឋ ៣នាក់ផ្សេងទៀត ដែលជាអ្នក រកស៊ីដាក់គ្រឿងចក្រកាយដីជាមួយលោក គង់ ប៊ឹប ក៏បានលើកឡើងដែរថា លោកគង់ ប៊ឹប បានជំពាក់លុយពួកគាត់មានខ្លះ៤ម៉ឺនដុល្លារ ខ្លះ២ម៉ឺនដុល្លារ តាំងពីឆ្នាំ២០១៩មក ដោយលោក គង់ ប៊ឹប រកលេសដោះសារមិនព្រមសងលុយទាល់តែសោះ។

ជុំវិញករណីនេះ លោកគង់ ប៊ឹប បានថ្លែងប្រាប់អ្នកសារព័ត៌មានថា រឿងខាងលើកំពុងដោះស្រាយតាមផ្លូវតុលាការហើយ។ ចំណែករឿងជីកដី ជាគម្រោងរបស់សម្តេចសង្ឃ។

សូមរម្លឹកថា កាលពីអំឡុងឆ្នាំ២០១៩ មានការជីកស្តារយកអាចម៍ដីចេញពីផ្ទៃដីដ៍ធំធេងមួយកន្លែងក្នុងសង្កាត់ជ្រាវ។ ដែលការជីកនោះត្រូវបានអះអាងថា ជីក ដើម្បីបង្កើតជាបារាយណ៍សិប្បនិមិត្ត សម្រាប់ធ្វើជាតំបន់ទេសចរណ៍។ គម្រោងជីកស្តារនោះ ព័ត៌មានបានទម្លាយថា លោកគង់ ប៊ឹប ចៅសង្កាត់រងទី១ សង្កាត់ជ្រាវ ជាអ្នកក្តោបក្តាប់សេដ្ឋកិច្ច(កាន់លុយ) តែត្រូវរលាយបាត់រូបទៅវិញ ហើយបន្សល់នូវរឿងអាស្រូវរាប់មិនអស់ រហូតដល់បច្ចុប្បន្ន៕SRP

ខេត្តសៀមរាប៖អគ្គនាយករងនៃអគ្គនាយកដ្ឋានសហគមន៍មូលដ្ឋាននៅក្រសួងបរិស្ថាន លោក ងួន សែប បានថ្លែងថា ព្រៃលិចទឹកក្នុងតំបន់៣ ដែលបានដកហូតពីប្រជាពលរដ្ឋ នាពេលកន្លងមក នៅទូទាំងខេត្ដសៀមរាប មានចំនួនជាង២ពាន់ហិកតា ប៉ុន្ដែត្រូវបានដាំដើមឈើសាកល្បងក្នុងបីដំណាក់កាល នៅលើផ្ទៃដី៤០ហិកតា ក្នុងនោះដំណាក់កាលទី១ លើផ្ទៃដីទំហំ៥ហិកតា មានជា២ពាន់ដើម , ដំណាក់កាលទី២ និងដំណាក់កាលទី៣ មានផ្ទៃដីទំហំ៣៥ហិកតា ស្មើនឹងកូនឈើព្រៃលិចទឹកចម្រុះជាង១ម៉ឺនដើម ដើម្បីស្ដារគម្របព្រៃលិចទឹកឡើងវិញ បង្កើតជំរកសម្រាប់មច្ឆជាតិពងកូន និងបង្កើននូវជីវចម្រុះ សម្រាប់តំបន់បឹងទន្លេសាប។

លោក ងួន សែប បន្តថា ក្រសួងបរិស្ថាន បានកំណត់ការដាំស្ដារព្រៃលិចទឹកសាកល្បងនេះជាជំហានៗ ហើយការដាំសាកល្បងជំហានទី១នេះ ក្រសួងបរិស្ថានបានកំណត់ដាំស្ដារសាកល្បងលើផ្ទៃដីព្រៃលិចទឹកក្នុងតំបន់៣ ចំនួន២០០ហិកតា ក្នុងនោះមាន ៖ខេត្តសៀមរាប ចំនួន៤០ហិកតា ក្នុងចំណោមផ្ទៃដីដកហូតសរុប ២.២៤៨,៦១ហិកតា , ខេត្តកំពង់ឆ្នាំង ដាំស្ដារសាកល្បងចំនួន៥០ហិកតា ក្នុងចំណោមផ្ទៃដីដកហូតសរុប ២៧.៨៣៨,១៤ហិកតា , ខេត្តបាត់ដំបងដាំសាកល្បងចំនួន៤០ ក្នុងចំណោមផ្ទៃដីដកហូតសរុប ៤.៣៤៧,១៥ហិកតា , ខេត្តបន្ទាយមានជ័យ ដាំសាកល្បងចំនួន២៥ហិកតា ក្នុងចំណោមផ្ទៃដីដកហូតសរុប ៣.៤៧១ហិកតា និងខេត្តកំពង់ធំ ដាំសាកល្បចំនួន៤៥ហិកតា ក្នុងចំណោមផ្ទៃដីដកហូតសរុបជាង៩ម៉ឺនហិកតា។

លោកថ្លែងបែបនេះក្នុងពិធីដាំស្ដារព្រៃលិចទឹកក្នុងតំបន់៣ នៃតំបន់ប្រើប្រាស់ច្រើនយ៉ាងក្នុងបឹងទន្លេសាប ក្នុងភូមិសាស្ត្រក្រុងសៀមរាប នៅព្រឹកមិញនេះ។

បើតាម លោក ងួន សែប យោងតាមប្រសាសន៍ណែនាំរបស់សម្តេចតេជោ ហ៊ុន សែន កាលពីថ្ងៃ២៨ ខែវិច្ឆិកា ឆ្នាំ២០២១កន្លងទៅនេះ ផ្ទៃដីព្រៃលិចទឹក ដែលត្រូវបានដកហូតពីការកាប់រុករាន រំលោភកាន់កាប់ខុសច្បាប់នោះ ត្រូវដាំឫស្សី និងកូនឈើព្រៃលិចទឹកជាច្រើនប្រភេទឡើងវិញ រួមមានឫស្សី ពឹងពុង ឬស្សីស្រុក ឫស្សីព្រៃ ដើមរាំងទឹក ដើមរំដេញ ដើមល្វា ដើមដង្កៀបក្តាមនិងដើមសណ្ដាន់ នៅលើផ្ទៃដីដកសរុប៤៧.០១៤,៦៩ហិកតា តាមបណ្តាខេត្ដជាប់នឹងបឹងទន្លេសាប៕SRP

ខេត្តកំពង់ចាម​៖លោក​ អ៊ុន​ ​ចាន់ដា​ អភិបាលខេត្តកំពង់ចាម​ បានថ្លែងថា​ ការ​ចាក់​វ៉ាក់សាំង​ដូសជម្រុញ ទី៤​នេះ​ ដើម្បីការពារ​សុខភាព​ សំដៅ​ធ្វើ​យ៉ាងណា​ ​កុំ​ឲ្យមាន​ការ​ឆ្លង​រីករាលដាលនៃ​​មេរោគបំលែង​ខ្លួនថ្មី ប្រភេទ​ អូមីក្រុង ដែល​ពិភពលោក​កំពុង​តែ​មានការ​​​ព្រួយ​បារម្ភ​។ លោកថា មេរោគ​ប្រភេទ​នេះ វា​ពិតជាងាយ​ឆ្លង​លឿនណាស់​ មានតែ​ការ​ចាក់​​វ៉ាក់សាំង​​ទេ​ ដែល​អាច​​ការពារ​យើង​ឲ្យ​ជៀសផុតពី​ការ​ឆ្លង​រីករាល​ដាល​នៃ​ជំងឺ​កូវីដ​-១៩​ បាន ។

អភិបាលខេត្ត​ ក៏បាន​អំពាវនាវ​សូម​ឲ្យមានការ​រួមគ្នាទទួលខុសត្រូវក្នុងការទប់ស្កាត់ការចម្លង​ជំងឺកូវីដ-១៩​ ជាពិសេស​វីរុសបំលែង​ខ្លួនថ្មី ប្រភេទ​ អូមីក្រុង ដោយ​កុំភ្លេចអនុវត្ត​វិធានការ​ ៣ការពារ​ ៣កុំ​ តាម​ប្រសាសន៍​ណែនាំ​សម្តេច​តេជោ​ ហ៊ុន​ សែន​ ក៏ដូចជា​ក្រសួង​សុខាភិបាល​។

លោក​ អ៊ុន​ ចាន់ដា​ មានប្រសាសន៍បែបនេះក្នុងពេកអញ្ជើញ​ចាក់​វ៉ាក់សាំងបង្ការជំងឺកូវីដ-១៩​ ដូសជម្រុញទី៤​ នៅ​សាលសន្និសីទ​សាលាខេត្តកំពង់ចាម​ ​​នៅថ្ងៃទី២៥​ ខែមករា​ ឆ្នាំ​២០២២​នេះ។

លោក​ អ៊ុន​ ចាន់ដា​ ក៏បានថ្លែងអំណរគុណ​យ៉ាង​ជ្រាលជ្រៅ​ចំពោះ​ សម្តេចតេជោ​ ហ៊ុន​ សែន​ ដែល​បាន​ផ្ដល់​ វ៉ាក់សាំង​ម្ជុលទី៤ ជាដូសជម្រុញ​ សម្រាប់​ចាក់ជូន​ថ្នាក់ដឹកនាំ​ មន្រ្តីរាជការ កងកម្លាំងប្រដាប់អាវុធ​ខេត្តកំពង់ចាម។

តាម​របាយការណ៍ របស់​ លោក​វេជ្ជបណ្ឌិត​ គីម​ សួរភីរុណ​ ប្រធាន​មន្ទីរ​សុខាភិបាល​ នៃ​រដ្ឋបាល​ខេត្តកំពង់ចាម បាន​បញ្ជាក់ថា ​ចាប់ពីខែមីនា មកដល់ពេលនេះ ខេត្តកំពង់ចាម​សម្រេច​ចាក់​វ៉ា​ក់​បង្ការ​ជូន​ប្រជាពលរដ្ឋ កុមារ​អាយុ​ ៥ឆ្នាំ​ ចាក់ដូស​ទី​១​ បាន​៨៧%​ ដូសទី​២​ បាន៦៣%​។ កុមារ​អាយុ​៦ឆ្នាំ​ ដល់​១១ឆ្នាំ​ ចាក់​ដូស​ទី​១​ បាន​១១០%​ ដូសទី​២​ បាន១០២%​។ អាយុ​១២​ ដល់​១៨ឆ្នាំ​ ចាក់​ដូស​ទី​១​ បាន​១០០%​ ដូសទី​២​ បាន៩៦%​។ និង​អាយុ​១៨ឆ្នាំ​ឡើង​ ចាក់​ដូស​ទី​១​ បាន​៧២%​ ដូសទី​២​ បាន៦៨%​ និង​ដូស​ជម្រុញ​ទី​៣​ បាន​៣៧​%​។ ​ដោយឡែក នៅថ្ងៃនេះ ខេត្តកំពង់ចាម នឹង​បើក​យុទ្ធនាការ ចាក់​វ៉ាក់សាំង​បង្ការ​ជម្ងឺឆ្លង​កូ​វីដ-១៩ ក្នុង​ដូ​ស​ទី​៤ ឬ​ដូ​ស​ជម្រុញ ជា​អំណោយ​ដ៏​ថ្លៃថ្លា របស់​សម្តេច​ហ៊ុន សែន ដល់​ថ្នាក់ដឹកនាំ​ ​មន្ត្រីរាជការ​ និង​មន្ត្រី​នគរបាលជាតិ នៅក្នុង​ខេត្តកំពង់ចាម ផងដែរ៕SRP

ខេត្តកំពង់ចាម​៖លោក អ៊ុន ចាន់ដា អភិបាលខេត្តកំពង់ចាម បានផ្តល់កំព្យូទ័រយួរដៃ​ និង​ថវិកា​មួយ​ចំនួន​ ដល់សិស្ស​ប្រលង​ជាប់​និទ្ទេសA​ ចំនួន៣២នាក់។ ការផ្ដល់នៅព្រឹកមិញនេះនៅ​សាលា​ខេត្តកំពង់ចាម​។

លោក​ អ៊ុន ចាន់ដា បាន​ថ្លែងថា​ នេះ​ជាការទឹកចិត្ត របស់លោកផ្ទាល់ ដើម្បីឆ្លើយតបទៅនឹងការខិតខំប្រឹងប្រែងរបស់ក្មួយៗ ក្នុងរយៈពេល​១២ឆ្នាំ​កន្លងមក​ ទោះ​ស្ថិត​ក្នុង​បរិបទ​កូវីដ​-១៩​ ហេីយ​ត្រូវ​រៀន​តាម​ប្រព័ន្ធ​អនឡាញ​យ៉ាង​ណាក្ដី​។ ទាំងអស់នេះ គឺជាកិត្តិយស សម្រាប់ខ្លួនឯង ក៏ដូចជា មាតា បិតា ឬអាណាព្យាបាល ក៏ដូចជា នាយកសាលាផ្ទាល់ ជាពិសេស កិត្តិយស សម្រាប់ខេត្តកំពង់ចាម របស់យើងផងដែរ។

អភិបាលខេត្តក៏លើកឡើងថា ទាំងអស់នេះ គឺជាលទ្ធផលជោគជ័យមួយផ្នែក របស់ក្មួយៗ នៅកម្រិតចំណេះដឹងទូទៅ ក៏ប៉ុន្តែ ចំពោះមុខ យើងត្រូវគិតគូអំពីអនាគត ជាពិសេស ការបន្តការសិក្សា លើមុខជំនាញ ក្នុងក្របខ័ណ្ឌបច្ចេកទេស ដើម្បី ចូលរួមប្រកួតប្រជែងក្នុងទីផ្សារការងារ តាមរយៈ ការប្រលង​ប្រជែង នៅកម្រិតឧត្ដមសិក្សា ទៅតាមការសម្រេចចិត្ត និងទេពកោសលរបស់ខ្លួនឯង​ ពោលគឺ ទៅតាមសមត្ថភាព ដែលខ្លួនឯងមានពិតប្រាកដ។ លើសពីនេះទៅទៀតនោះ នៅពេលក្មួយៗ បានបន្តនៅកម្រិតឧត្ដមសិក្សាហើយ ក្មួយៗត្រូវខិតខំព្យាយាមរៀនសូត្រ ឲ្យបានពូកែ ធ្វើយ៉ាងណា ឲ្យក្លាយទៅជាបុគ្គលដែលមានសមត្ថភាព ដើម្បីយកចំណេះដឹង មកបម្រេីជាប្រយោជន៍ដល់សង្គមជាតិ ក៏ដូចជាភាពរីកចំរើន ដល់ក្រុមគ្រួសារ ទន្ទឹមនោះ​នៅពេលដែលក្មួយៗ មានចំណេះដឹងហើយ សូមវិលត្រឡប់ មកខេត្តកំពង់ចាមវិញ ដើម្បីរួមគ្នាកសាងអភិវឌ្ឍ ខេត្តរបស់យើង ឲ្យកាន់តែមានការ​រីកចម្រើន​តទៅមុខទៀត។

បេីតាមលោក លី ម៉េងសាន ប្រធានមន្ទីរ អប់រំយុវជននិងកីឡា ខេត្តកំពង់ចាម បាន​ឲ្យដឹងថា​ លទ្ធផល​ប្រលង​សញ្ញាបត្រ​មធ្យម​សិក្សា​ទុតិយភូមិ​ សម័យ​ប្រលង​ថ្ងៃទី​២៧​ ខែធ្នូ​ ឆ្នាំ​២០២១​ នៅទូទាំងខេត្តកំពង់ចាម មាន​បេក្ខជន​មក​ប្រលង​ចំនួន​ ៦.៧៧៤នាក់​ បេក្ខជន​ប្រលង​ជាប់​ចំនួន​ ៤.៣៣៣នាក់​ ស្មើនឹង​ ៦៣,២៦%​ ក្នុង​នោះ​សិស្សប្រឡង​ជាប់និទ្ទេស A មានចំនួន ១១៨នាក់ ខណៈ​បេក្ខជន​ប្រលង​ជាប់​និទ្ទេស​ A​ នៅ​ទូទាំង​ប្រទេស​ មាន​ចំនួន​ ១.៧៥៣នាក់​។

គួរ​បញ្ជាក់​ថា​ រង្វាន់​លើកទឹកចិត្ត​ដែល​ឯកឧត្ដមអភិបាលខេត្ត​ ផ្តល់​ជូនសិស្សប្រឡងជាប់​និទ្ទេស​ A​ ទាំង ៣២នាក់ ក្នុងម្នាក់ៗ ទទួលបាន កំព្យូទ័រយួរដៃ​ (latop) ១ គ្រឿង , ថវិកា ចំនួន ៤០ម៉ឺនរៀល , សៀវភៅ ២០ក្បាល, ប៊ិច និងខ្មៅដៃ ចំនួន ១០ដើម​ផងដែរ​៕SRP

ភ្នំពេញ៖ពាក់ព័ន្ធនឹងកំណែទម្រង់នគរបាល សម្ដេច ស ខេង បានអះអាងថាលទ្ធផលនៃការស្រាវជ្រាវអំពីថ្នាក់ដឹកនាំ និងមន្ត្រីនគរបាលដែលមិនបានចូលរៀនវគ្គបណ្ដុះបណ្ដាល ព្រមទាំងការធ្វើបច្ចុប្បន្នភាពនៃការតម្លើងឋានៈ តួនាទី និងសក្ដិឱ្យបានសមស្រប ក្នុងនោះឆាប់ៗខាងមុខ ក្រសួងនឹងចេញគោលការណ៍ណែនាំដើម្បីដោះស្រាយបញ្ហានេះ។ សម្ដេចបន្តថាមន្រ្តីនគរបាលមួយចំនួនត្រូវបានរកឃើញថាកំពុងបំពេញការងារ និងដឹកនាំការងារ ដោយមិនបានឆ្លងកាត់វគ្គបណ្ដុះបណ្ដាលនោះទេ ក្នុងនោះក្នុងចំណោមជាង៩ពាន់តំណែង មានជាង២ពាន់តំណែងហើយមិនបានចូលរៀនវគ្គនគរបាលមូលដ្ឋាន។ 

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍យ៉ាងដូច្នេះក្នុងពិធីប្រគល់រថយន្តជូនវរសេនាតូចនគរបាលការពារព្រំដែនប្រចាំទិសភូមិភាគទី១ ភូមិភាគទី២ និងភូមិភាគទី៣ នៅអគ្គស្នងការដ្ឋាននគរបាលជាតិ នាព្រឹកមិញនេះ។

សម្ដេចស ខេង បានគូសបញ្ជាក់ថាការបន្តផ្ដល់រថយន្តនាពេលនេះ គឺជាផ្នែកមួយនៃកំណែទម្រង់កងកម្លាំងនគរបាលជាតិ ដែលនេះគឺជាលើកទី៦ ហើយដែលក្រសួងបានបែងចែករថយន្តប្រភេទនេះដល់អង្គភាពនគរបាលជាតិទូទាំងប្រទេស   ដោយគិតពីឆ្នាំ២០១៩មក មានចំនួន២៦៤គ្រឿង។ នេះមិនគិតពីរថយន្តផ្សេងៗដែលបានផ្ដល់ជូនក្នុងរយៈពេលដូចគ្នានេះ និងនៅនាពេលកន្លងមកផង។ 

បើតាមការបញ្ជាក់អំពី អគ្គនាយកភស្តុភារ និងហិរញ្ញវត្ថុ បានឱ្យដឹងថារថយន្តផ្ដល់ជូននាពេលនេះ ជាប្រភេទរថយន្តភីកអាប់ផលិតឆ្នាំ២០២២ ក្នុងនោះនាយកដ្ឋាននគរបាលព្រំដែនទឹកទទួលបាន៣គ្រឿង, ស្នងការដ្ឋាននគរបាលខេត្តកណ្ដាលទទួលបាន១គ្រឿង, កំពត១គ្រឿង, កោះកុង២គ្រឿង, រតនគិរី២គ្រឿង, ស្វាយរៀង២គ្រឿង, ក្រចេះ១គ្រឿង, មណ្ឌលគិរី២គ្រឿង, ព្រៃវែង១គ្រឿង, ស្ទឹងត្រែង១គ្រឿង, ត្បូងឃ្មុំ២គ្រឿង និងស្នងការដ្ឋាននគរបាលខេត្តតាកែវ១គ្រឿង៕SRP

ភ្នំពេញ៖សម្ដេចស ខេងបានមានប្រសាសន៍ថាសព្វថ្ងៃនេះគ្រឿងញៀនកំពុងវាយលុកសង្គមកម្ពុជាយ៉ាងធ្ងន់ធ្ងរ ហើយទាមទារឱ្យមានការស្វែងរកមូលហេតុនៃបញ្ហានេះ ក្នុងនោះការរកឃើញជាបឋម គឺបញ្ហាគ្រឿងញៀនឆ្លងកាត់តាមព្រំដែន ចូលមកកម្ពុជា និងការនាំចូលគ្រឿងញៀនសំយោគ។ សម្ដេចបានចាត់ទុកបញ្ហាគ្រឿងញៀនសំយោគនេះថាជាបញ្ហាដ៏គួរឱ្យព្រួយបារម្ភបំផុតសម្រាប់កម្ពុជា និងបានស្នើឱ្យរដ្ឋមន្រ្តី ព្រមទាំងថ្នាក់ដឹកនាំពាក់ព័ន្ធយកចិត្តទុកដាក់ឱ្យបានខ្ពស់។

សម្ដេចបានសង្កត់ធ្ងន់ទៀតថា«សូមឯកឧត្តមរដ្ឋមន្ត្រីពាក់ព័ន្ធមើលបញ្ហាហ្នឹង បើមិនដូច្នេះឯកឧត្តមនឹងជាប់ជំពាក់ការទទួលខុសត្រូវចំពោះសង្គមកម្ពុជា ទាក់ទងនឹងបំផ្លាញសុខភាពសាធារណៈ ហើយអាជ្ញាធរគ្រឿងញៀនក៏ដូចគ្នាដែរ ត្រូវតែមើលរឿងហ្នឹងឱ្យបានច្បាស់លាស់»។ 

សម្ដេចបានណែនាំគ្រប់ភាគីសហការផ្ដល់ព័ត៌មានឱ្យគ្នាក្នុងការត្រួតពិនិត្យដំណើរការនាំចូលសាធាតុផ្សេងៗ ដើម្បីតាមដាន និងសិក្សាបន្ថែម ថាតើសាធាតុនោះអាចត្រូវបានប្រើប្រាស់សំយោគជាគ្រឿងញៀនឬយ៉ាងណា?

សម្ដេចក៏បានមានប្រសាសន៍អំពីស្ថានភាពចរាចរណ៍នៅកម្ពុជាដែរ ដែលក្នុងរយៈកាលចុងក្រោយនេះ ស្ថានភាពគ្រោះថ្នាក់ចរាចរណ៍ហាក់មានការហក់ឡើងវិញ ដោយសារកំណើននៃការធ្វើដំណើរតាមដងផ្លូវ ក្រោយពីរាជរដ្ឋាភិបាលបានប្រកាសបើកប្រទេសឡើងវិញ។ សម្ដេចក៏បានបង្ហើបឱ្យដឹងថា ក្រសួងមហាផ្ទៃកំពុងធ្វើសេចក្ដីព្រាងច្បាប់ស្ដីពីចរាចរណ៍ផ្លូវគោកថ្មី ដោយមិនបន្តធ្វើវិសោធនកម្មនោះទេ ហើយថាច្បាប់ថ្មីនេះ មានលក្ខណៈតឹងរឹងជាងមុន ដើម្បីធានាកាត់បន្ថយគ្រោះថ្នាក់ចរាចរណ៍ ការពារអាយុជីវិត និងទ្រព្យសម្បត្តិប្រជាពលរដ្ឋ។

សម្ដេចក៏បានឆ្លៀតមានប្រសាសន៍ដល់ការធ្វើបាតុកម្មតវ៉ានៃក្រុមបុគ្គលិកក្រុមហ៊ុនណាហ្គាវើលដ៍ផងដែរ។ សម្ដេចបានអំពាវនាវឱ្យអាជ្ញាធរ ក្រុមបាតុករ និងក្រុមហ៊ុន រក្សាភាពអត់ធ្មត់ ខិតខំរកវិធីបញ្ចប់បញ្ហាឱ្យបានឆាប់ ដោយមិនគួរបែរខ្នងដាក់គ្នានោះទេ។

សម្ដេចក៏បានផ្ដល់ការណែនាំឱ្យកងកម្លាំងនគរបាលទាំងអស់ត្រូវត្រៀមលក្ខណៈចូលរួមគាំទ្រដល់ដំណើរការបោះឆ្នោតជ្រើសរើសសមាជិកក្រុមប្រឹក្សា ឃុំ សង្កាត់   ពិសេសការបង្កលក្ខណៈឱ្យគ្រប់គណបក្សនយោបាយដែលបានចុះឈ្មោះក្នុងបញ្ជីគណបក្សនយោបាយអាចធ្វើសកម្មភាពស្របទៅតាមច្បាប់ និងដោយគ្មានការរំខាន។ 

សម្ដេចក៏បានណែនាំឱ្យត្រៀមលក្ខណៈសម្រាប់ការការពារសន្តិសុខសណ្ដាប់ធ្នាប់សាធារណៈក្នុងឱកាសដែលនៅឆ្នាំ២០២២នេះកម្ពុជាត្រូវដឹកនាំកិច្ចប្រជុំអាស៊ាន ព្រមទាំងបន្តត្រៀមលក្ខណៈសម្រាប់ព្រឹត្តិការណ៍បោះឆ្នោត និងព្រឹត្តិការណ៍កីឡា ឆ្នាំ២០២៣។

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍យ៉ាងដូច្នេះក្នុងពិធីប្រគល់រថយន្តជូនវរសេនាតូចនគរបាលការពារព្រំដែនប្រចាំទិសភូមិភាគទី១ ភូមិភាគទី២ និងភូមិភាគទី៣ នៅអគ្គស្នងការដ្ឋាននគរបាលជាតិ នៅព្រឹកមិញ៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង នៅព្រឹកថ្ងៃអង្គារ ទី២៥ ខែមករា ឆ្នាំ២០២២ នេះ អញ្ជើញជាអធិបតីភាព ក្នុងពិធីបើកការដ្ឋានជួសជុលផ្លូវចំនួន៦ខ្សែ និងការជួសជុលផ្លូវសំបុកមាន់ ក្នុងក្រុងបាត់ដំបង។

ចំពោះដំណើរការជួសជុលផ្លូវក្នុងក្រុងនេះ រដ្ឋបាលខេត្តបានរៀបចំធ្វើការជួសជុលកំណាត់ផ្លូវដូចខាងក្រោម៖

-ការងារជួសជុលផ្លូវក្រាលកៅស៊ូប្រភេទ DBST ផ្លូវលេខ ៥២៦ ចាប់ពីផ្លូវជាតិលេខ៥ ដល់ផ្លូវលេខ ៥១៥ (ផ្លូវទៅវត្តពោធិ៍ ពីមុខស្នាក់ការ ស.ស.យ.ក ខេត្ត) ដែលមានប្រវែង
១១៦៥ម x ១០ម ស្ថិតក្នុងសង្កាត់ចំការសំរោង ក្រុងបាត់ដំបង។

-ការងារជួសជុលផ្លូវក្រាលកៅស៊ូប្រភេទ DBST ផ្លូវលេខ ៦១៤ ចាប់ពីផ្លូវជាតិលេខ៥ ដល់ផ្លូវលេខ ១៥៣ (ផ្លូវមុខស្នងការនគរបាលខេត្ត ពីស្តុបរំចេក ដល់ផ្លូវមាត់ស្ទឹង) ដែល
មានប្រវែង ១៥២០ម x ៨ម ស្ថិតក្នុងសង្កាត់រតនៈ ក្រុងបាត់ដំបង។

-ការងារជួសជុលផ្លូវក្រាលកៅស៊ូប្រភេទ DBST ផ្លូវលេខ ៥៣០ ចាប់ពីផ្លូវជាតិលេខ៥ (ខាងជើងព្រះនរាយណ៍) ដល់ផ្លូវលេខ ៥១៥ ដែលមានប្រវែង ១១៦៥ម x ៨ម ស្ថិត
ក្នុងសង្កាត់ចំការសំរោង ក្រុងបាត់ដំបង។

-ការងារជួសជុលផ្លូវក្រាលកៅស៊ូប្រភេទ DBST ផ្លូវលេខ ៧១៦ ចាប់ពីផ្លូវជាតិលេខ៥ ដល់ផ្លូវលេខ ៧០០ (មុខយោធភូមិភាគទី៥ ផ្លូវចំការដូង)ដែលមាន ទំហំ ១០៥០ម x ៨ម ស្ថិតក្នុងសង្កាត់ព្រែកព្រះស្តេច ក្រុងបាត់ដំបង។

-ការងារជួសជុលផ្លូវក្រាលកៅស៊ូប្រភេទ DBST ផ្លូវលេខ ១៣៩ ពីផ្លូវលេខ ៣ ដល់ផ្លូវលេខ ១០៦ (ផ្លូវក្រោយបុរី កាណាឌីយ៉ា) ដែលមានប្រវែង ៥០៥ម x ៦ម ស្ថិតនៅ
ក្នុងសង្កាត់ស្វាយប៉ោ ក្រុងបាត់ដំបង។

-ការងារជួសជុលផ្លូវក្រាលកៅស៊ូប្រភេទ DBST ផ្លូវលេខ ១១១ ពីផ្លូវលេខ ៥២៤ ដល់ផ្លូវលេខ ១១៥ (ផ្លូវខាងជើងអតីតសណ្ឋាគារ ហូលីដេ) ដែលមានប្រវែង ២៥០ម x ៦ម
ស្ថិតនៅក្នុង សង្កាត់ស្វាយប៉ោ ក្រុងបាត់ដំបង។

-ការងារជួសជុលផ្លូវសំបុកមាន់ក្នុងក្រុងបាត់ដំបង។

នាឱកាសនោះលោក សុខ លូ បានមានប្រសាសន៍ណែនាំដល់រដ្ឋបាលក្រុង និងសង្កាត់រៀបចំសណ្ដាប់ធ្នាប់ អនាម័យបរិស្ថានឲ្យបានហើយស្រេច ទាំងចំណីផ្លូវ សំណង់អាណាធិបតេយ្យ និងការលក់ដូរគ្មានរបៀបរៀបរយនៅតាមសាធារណៈ ព្រោះបើមិនធ្វើការរៀបចំពីឥឡូវទេ ថ្ងៃទៅមុខនឹងធ្វើឲ្យសណ្ដាប់ធ្នាប់ក្នុងក្រុងកាន់តែគ្មានរបៀបរៀបរយ ហើយពេលដែលមានគម្រោងចង់ពង្រីកផ្លូវ បង្ករការលំបាកក្រុមការងារក្នុងការដោះស្រាយ។

លោក បានអំពាវនាវដល់ប្រជាពលរដ្ឋ ត្រូវចេះរៀបចំសំរាម កាកសំណល់ផ្សេងៗឲ្យមានរបៀប និងចូលរួមថែរក្សាផ្លូវថ្នល់ទាំងអស់ ដើម្បីយើងអាចប្រើប្រាស់ផ្លូវថ្នល់បានយូរអង្វែង និងដើម្បីសោភ័ណភាពក្នុងក្រុងបាត់ដំបង ឲ្យសាកសមនឹងក្រុងដែលទើបទទួលពានរង្វាន់ទីក្រុងទេសចរណ៍ស្អាតអាស៊ាន។

លោកមានប្រសាសន៍ ជំរុញដល់ប្រជាពលរដ្ឋដែលមិនទាន់បានចាក់វ៉ាក់សាំងកូវីដ-១៩ ដូសទី៣ ឬដូសជំរុញ សូមរួសរាន់ចាក់នៅតាមបណ្ដាមណ្ឌលចាក់វ៉ាក់សាំងក្នុងមូលដ្ឋានរបស់ខ្លួន និងអ្នកដែលមិនទាន់បានចាក់ដូសមូលដ្ឋាន ដើម្បីចូលរួមកាត់ផ្ដាច់ការឆ្លងក្នុងសហគមន៍ និងជាពិសេសជំងឺកូវីដ-១៩បម្លែងថ្មី អូមីក្រុង ដែលកំពុងវាយប្រហារយ៉ាងរហ័សក្នុងសហគមន៍ និងពិភពលោក៕SRP

ខេត្តកំពង់ចាម​៖លោកវេជ្ជបណ្ឌិត ង៉ិល វុធ អនុប្រធានមន្ទីរព្យាបាលភ្នែក ហូសេង ភ្នំពេញ​ បាន​ដឹកនាំ​ក្រុមការងារ​ សហការជាមួយ​មន្ទីរពេទ្យយោធ ភូមិភាគទី២​ ដោយមានការគាំទ្រ​ ពី​ស.ស.យ.ក និង​សមាគម LP8​ ដែលបានចូលរួមឧបត្តមនូវ​ថវិកា​ មួយចំនួន​សម្រាប់​ធ្វើការពិនិត្យ ព្យាបាល និងផ្ដល់ជាវែនតា​ ជូន​ដល់ប្រជាពលរដ្ឋ​ ក្នុង​ស្រុកកំង់សៀម​ ប្រមាណ​ជាង​៤០០នាក់​ ដែលមានបញ្ហាភ្នែក​​។ ការចុះចែកនិងពិនិត្យនេះ ធ្វើឡើង​នារសៀល​ថ្ងៃទី​២៤​ ខែមករា​ ម្ម្សិលមិញនៅ​មន្ទីរពេទ្យ​​ ៧ដេ​ ខេត្តកំពង់ចាម​។

លោកវេជ្ជបណ្ឌិត ង៉ិល វុធ​ ជាដុកទ័រជំនាញឯកទេសភ្នែក​ បាន​ឲ្យដឹងថា​ កម្មវិធីថែទាំសុខភាពភ្នែក របស់មន្ទីព្យាបាលភ្នែកហូសេងភ្នំពេញ ជូនដល់ប្រជាពលរដ្ឋក្នុងស្រុកកំពង់សៀម​ នេះ​ ត្រូវបានធ្វេីឡេីង​ក្នុង​រយៈពេល​២ថ្ងៃ​ គឺ​ចាប់ពី​ថ្ងៃទី​២៤​ ដល់​ថ្ងៃទី​២៥​ ខែមករា​ ឆ្នាំ​២០២២​ ក្រោមប្រធានបទ​ «ពន្លឺថ្មីនៃក្តីសង្ឃឺម»​ ក្នុងគោលបំណង ផ្សព្វផ្សាយ អប់រំ អំពីរបៀបថែទាំសុខភាពភ្នែក​ និងចែកវ៉ែនតា​ ក្រោមការ​គាំទ្រ​ពី​លោកស្រី​ សុក សុធាវី តំណាងសមាគម LP8។ ​
លោកវេជ្ជបណ្ឌិត​ បាន​បញ្ជាក់​ថា​ ចំពោះ​លោកយាយ​ លោកតា​ ក៏ដូចជា​បងប្អូន​ប្រជាពលរដ្ឋ​ ប្រសិនណា​ជាការ​ពិនិត្យ​នេះឃើញ​ថា​ ភ្នែក​មាន​បញ្ហា​ធ្ងន់ធ្ងរ​ គឺ​សូម​បន្ត​ទៅ​ធ្វើការ​វះកាត់​នៅមន្ទីរព្យាបាលភ្នែក ហូ​សេងភ្នំពេញ​ នៅ​រាជធានីភ្នំពេញ​ដោយ​ឥតគិតថ្លៃ​ ដែលមន្ទីរព្យាបាលភ្នែកនេះ​ មានស្តង់ដារ​ រួមនឹងគ្រូពេទ្យមានជំនាញ​ និងបទពិសោធន៍ផ្នែកភ្នែកជាយូរឆ្នាំ​ មកពីទីក្រុង សៀង​ហៃ ប្រទេសចិន ដោយមានបំពាក់នូវម៉ាស៊ីនទំនើបៗ ជាមួយនឹងស្តង់ដារខ្ពស់​សម្រាប់​ការធ្វើរោគវិនិច្ឆ័យក្នុងការវះកាត់ភ្នែក​ និងប្រកបដោយផាសុខភាព​ ដើម្បីបម្រើសេចក្តីត្រូវការរបស់អ្នកជំងឺ ដែលផ្តល់នូវការព្យាបាលដល់អ្នកជំងឺ​ ដោយមានការយកចិត្តទុកដាក់បំផុត។​

លោកវេជ្ជបណ្ឌិត ង៉ិល វុធ​ ក៏បាន​ថ្លែងអំណរគុណ​ចំពោះ​ លោក​ ប៊ិន​ ឡាដា​ អភិបាល ស្រុកកំពង់សៀម​ និង​លោក​ ​ឧត្ដមសេនីយ៍​​ វេជ្ជបណ្ឌិត​.ណាំ វណ្ណះ​ នាយកមន្ទីរពេទ្យយោធភូមិភាគទី២​ ក៏ដូចជា​ក្រុមការងារ​ទាំងអស់​ ដែល​បាន​យកចិត្ត​ទុកដាក់​​សហការ​គាំទ្រ​កម្មវិធី​ថែទាំសុខភាពភ្នែក របស់មន្ទីព្យាបាលភ្នែកហូសេងភ្នំពេញ​ ជូនដល់ពលរដ្ឋក្នុងស្រុកកំពង់សៀម​ រយៈពេល​២ថ្ងៃ​នេះ៕SRP

ខេត្តត្បូងឃ្មុំ​៖កំព្យូទ័រយួរដៃ (computer latop) ចំនួន៥៤គ្រឿង ព្រមទាំងថវិកា ជារង្វាន់ដ៏ថ្លៃថ្លារបស់ លោកហ៊ុន ម៉ាណែត ផ្តល់ជូនសិស្សានុសិស្ស ប្រលងជាប់សញ្ញាបត្រទុតិយភូមិ (បាក់ឌុប) និទ្ទេសA ទាំង៥៤នាក់ ក្នុងឆ្នាំសិក្សា២០២០-២០២១ ដែលជាការលើកទឹកចិត្តដល់ប្អូនៗក្មួយៗ ខិតខំសិក្សា ប្រលងជាប់ទទួលបាននិទ្ទេសល្អ ក្នុងចំណោមសិស្សដែលប្រលងជាប់ជាស្ថាពរសរុប២៩៤៤នាក់ ក្នុងខេត្តត្បូងឃ្មុំទាំងមូល​។

ក្នុងឱកាសសំណេះសំណាលផ្តល់រង្វាន់ និងថវិកាលើកទឹកចិត្តសិស្សឆ្នើមនិទ្ទេសA នៅព្រឹកមិញនេះ នៅសាលាខេត្តត្បូងឃ្មុំ លោក ជាម ច័ន្ទសោភ័ណ អភិបាលខេត្ត បានចែកថវិកា ដល់លោកគ្រូអ្នកគ្រូ និងអាណាព្យាបាលសិស្ស ជាការអរគុណដែលខិតខំបង្ហាត់បង្រៀន អប់រំទូន្មានណែនាំ រហូតក្មួយៗទទួលបានលទ្ធផលផ្លែផ្កាដ៏ល្អនាពេលនេះផងដែរ។

អភិបាលខេត្ត ក៏បានពាំនាំប្រសាសន៍ផ្តាំផ្ញើសួរសុខទុក្ខ កោតសរសើរក្មួយៗទាំង៥៤រូប និងលោកគ្រូអ្នកគ្រូ ព្រមទាំងអាណាព្យាបាលសិស្ស ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ជាពិសេសលោកបណ្ឌិត ហ៊ុន ម៉ាណែត ដែលជាបេក្ខភាពនាយករដ្ឋមន្ត្រីដ៏សាកសមបំផុត មានទាំងចំណេះដឹងខ្ពង់ខ្ពស់ បុគ្គលិកលក្ខណៈល្អឥតខ្ចោះ មានសុជីវធម៍ គុណធម៍ និងប្រជាប្រិយភាពគ្រប់ស្រទាប់វណ្ណៈនៃពលរដ្ឋកម្ពុជា ទាំងក្នុងនិងក្រៅប្រទេស។

អភិបាលខេត្ត ក៏បានជំរុញឲ្យប្អូនៗក្មួយៗសិស្សានុសិស្ស យកសម្ភារសិក្សា និងថវិកាដែលផ្តល់ជូន ទៅប្រើប្រាស់ឲ្យចំគោលដៅ ខិតខំប្រឹងប្រែងរៀនសូត្របន្ត នាថ្នាក់ឧត្តមសិក្សា ពិសេសសិស្សានុសិស្សថ្នាក់វិទ្យាល័យនាជំនាន់ក្រោយៗទៀត ខិតខំប្រឹងប្រែងសិក្សាដើម្បីទទួលបានការលើកទឹកចិត្តដូចគ្នាបែបនេះ ពិសេសត្រូវចង់ចាំថា ចំណេះវិជ្ជាជាស្ពានឈានទៅរកជោគជ័យនិងកិត្តិយស សម្រាប់ខ្លួនឯង ក្រុមគ្រួសារ និងសង្គមជាតិយើងទាំងមូល ដែលកំពុងត្រូវការធនធានមនុស្សជាចាំបាច់ នាសព្វថ្ងៃនេះក្នុងការបន្តអភិឌ្ឍន៍ប្រទេស​៕SRP

ខេត្តកំពង់ចាម​៖លោក សុក ផេង អនុប្រធានក្រុមការងារថ្នាក់កណ្តាលចុះជួយស្រុកចំការលើ និងជាប្រធានក្រុមការងារចុះជួយឃុំ ល្វាលើ បានប្រកាសបញ្ចូលសមាជិកគណបក្សថ្មីចំនួន ៨០នាក់ មកពីភូមិចំនួន ៤ គឺភូមិក្បាលហុងថ្មី ភូមិក្បាលហុងចាស់ ភូមិល្វាជើង និងភូមិល្វាត្បូង ក្នុងឃុំល្វាលើ ស្រុកចំការលើ ខេត្តកំពង់ចាម ដើម្បីចូលរួមជីវភាពនយោបាយជាមួយគណបក្សប្រជាជនកម្ពុជា។

ពិធីប្រកាសនេះបានធ្វើឡើងនៅថ្ងៃទី២៣ ខែមករា ឆ្នាំ២០២២ នៅស្នាក់ការគណបក្សឃុំល្វាលើ ដោយចូលរួមពីលោក សំណាក់ថ្នាក់ដឹកនាំ សមាជិក-សមាជិកាពាក់ព័ន្ធប្រមាណ ១១៩នាក់។

ក្នុងឱកាសនោះដែរ​ លោក​ សុក ផេង បានលើកឡើងថា តាមរយៈសមិទ្ធផលដែលគណបក្សបន្សល់ទុករយៈពេល ៤៣ឆ្នាំកន្លងមកនេះ គឺផ្ដើមពីជ័យជម្នះ ៧ មករា ដែលគណបក្សប្រជាជនកម្ពុជាបានសម្រេចនូវការផ្លាស់ប្តូរសង្គមយ៉ាងធំធេង ដោយពុំអាចនឹកស្មានដល់។​

លោកបានបន្តថា កម្ពុជាបានប្រែក្លាយពីវាលពិឃាតនៃរបបប្រល័យពូជសាសន៍ ពីសមរភូមិនៃសង្គ្រាមដ៏រ៉ាំរ៉ៃ ពីការបែកបាក់ជាតិ និងការបែងចែកទឹកដី ពីគំនរផេះផង់ ទៅជាទឹកដីដែលមានសន្តិភាព ឯកភាព ស្ថិរភាព សេរីភាព ប្រជាធិបតេយ្យ នីតិរដ្ឋ និងអភិវឌ្ឍលើគ្រប់វិស័យ ដែលធ្វើឱ្យប្រជាជនគ្រប់រូបបានរស់នៅយ៉ាងសុខដុមរមនា ក្រោមដំបូលនៃរដ្ឋធម្មនុញ្ញតែមួយ និងម្លប់ដ៏ត្រជាក់នៃអង្គព្រះមហាក្សត្រ។

ជាមួយគ្នានោះ​ លោក សុក ផេង ក៏បានស្នើដល់សមាជិក-សមាជិកាថ្មីរបស់គណបក្សប្រជាជនកម្ពុជា ត្រូវចូលរួមធ្វើសកម្មភាពល្អៗ បម្រើផលប្រយោជន៍សង្គមឲ្យបានឲ្យផុលផុសនៅក្នុងមូលដ្ឋាន ដើម្បីទទួលបានការស្រលាញ់ពេញចិត្តនិងគោរពគាំទ្រពីសំណាក់ប្រជាពលរដ្ឋ។ លោកបានបញ្ជាក់ថា ការបញ្ចូលសមាជិកថ្មីនេះ ដើម្បីពង្រឹង និងបង្កើនការត្រៀមលក្ខណៈសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ នៅថ្ងៃទី៥ ខែមិថុនា ឆ្នាំ២០២២ ខាងមុខ​៕SRP

ខេត្តកំពង់ចាម​៖លោក​ អ៊ុន​ ចាន់ដា​ អភិបាលខេត្តកំពង់ចាម​ បាន​ថ្លែងថា​ ក្នុង​យុទ្ធសាស្ត្រ​ចតុកោណ​ដំណាក់កាល​ទី​៤​ របស់​រាជរដ្ឋាភិបាល​ នីតិកាល​ទី​៦​ នៃ​រដ្ឋសភា​​​ បានផ្ដល់​អទិភាព​លេីវិស័យ​ទាំង​៤​ គឺ​ មនុស្ស​ ផ្លូវ​ ទឹក​ និង​ភ្លេីង​ អញ្ចឹង​ការ​បណ្ដុះបណ្ដាល​ធនធាន​មនុស្ស​ យេីងត្រូវ​ជ្រេីសរេីស​​កម្រិត​ជំនាញ​ ​វិជ្ជាសាស្ត្រ​ បច្ចេកទេស​ជា​កត្តាសំខាន់​ ព្រោះការ​កសាង​ប្រទេស​​ឲ្យ​មាន​ការ​រីកចម្រើន​ គឺ​ត្រូវផ្តោត​សំខាន់​ ទៅ​លើ​ការកសាង​ធនធាន​មនុស្ស​​ ទេីប​ធ្វើ​ឲ្យ​​ប្រទេស​យើង​មាន​ការ​រីកចម្រើន​ ហើយ​ក៏នាំមក​នូវ​សុខសន្តិភាព​ ​ដេីម្បី​ឲ្យ​​សុខសន្តិភាព​ មាន​វឌ្ឍនភាព​ គឺ​ត្រូវ​ចំបាច់​មាន​ការ​អភិវឌ្ឍ​លេី​វិស័យ​ទាំង​៤​នេះ ដើម្បី​ផ្តល់​ផលប្រយោជន៍​ ជូនដល់​ប្រជាពលរដ្ឋ​ ដល់​សង្គមជាតិ​ ​និង​នាំមក​នូវ​ការ​រីកចម្រើន​ ក៏ដូចជា​ការ​ចូលរួម​លេីក​កម្ពស់​កម្រិត​ជីវភាព​របស់​បងប្អូន​ប្រជាពលរដ្ឋ​ផងដែរ​។

ថ្លែង​បែប​នេះ​ក្នុងពិធីបើកបវសនកាលថ្មីឆ្នាំសិក្សា២០២១-២០២២ និងចែកប័ណ្ណសរសើរជូននិស្សិត បុគ្គលិក សាស្តចារ្យ នៅសាខាសាកលវិទ្យាល័យគ្រប់គ្រង និងសេដ្ឋកិច្ច ខេត្តកំពង់ចាម​ នៅព្រឹក​មិញនេះ។

ក្នុង​ពិធី​លោក​ អ៊ុន​ ចាន់ដា​ បាន​ក្រេីនរំលឹកចំពោះប្អូនៗសិស្សនិស្សិតទាំងអស់​ ត្រូវចងចាំថា ប្អូនៗ គឺជាអ្នកកាន់កូនសោសម្រាប់បើកជោគវាសនារបស់ខ្លួន នាពេលអនាគត ហើយមានតែការអប់រំ និងចំណេះដឹងប៉ុណ្ណោះ ដែលអាចបើកផ្លូវ​ឲ្យ​ប្អូនៗទាំងអស់ទទួលបានអនាគតដ៏រុងរឿង​។

លោកអភិបាលខេត្ត​ បាន​បន្ត​ថា​ ចំណេះវិជ្ជា និងសីលធម៌ជាក្រុមគ្រួសារ ដូចនេះសូមឲ្យប្អូនៗ​ ខិតខំប្រឹងប្រែងព្យាយាមរៀនសូត្រលើជំនាញសិក្សារបស់ខ្លួន ដើម្បីអាចក្លាយជា “កូនល្អ សិស្សល្អ មិត្តល្អ និងពលរដ្ឋល្អ”​ ​ត្រូវយកចិត្តទុកដាក់ស្រាវជ្រាវបន្ថែមទៅលើកិច្ចការដែលលោកគ្រូ អ្នកគ្រូ សាស្ដ្រាចារ្យ បានដាក់ឲ្យធ្វេី ទាំងនៅក្នុងថ្នាក់រៀន និងក្រៅថ្នាក់រៀន​ ពោលគឺត្រូវចៀសវាងការប្រព្រឹត្តអំពើមិនគប្បី ទាំងឡាយ ដែលជាកង្វល់ចំពោះមុខរបស់សង្គមគ្រួសារ និងសង្គមជាតិទាំងមូលផងដែរ​។​

បេីតាមលោក មួនវាសនា សាកលវិទ្យាធិការរង សាកលវិទ្យាល័យគ្រប់គ្រង និងសេដ្ឋកិច្ច ខេត្តកំពង់ចាម​ បាន​ឲ្យដឹងថា​ ក្នុងឆ្នាំក្សា ២០២០-២០២១  កន្លងមក​នេះUMEខេត្តកំពង់ចាម មាននិស្សិតកំពុងសិក្សាសរុបចំនួន ជាង២៥០០នាក់ និស្សិតស្រីច្រើនជាង៥០% ដែលកំពុងសិក្សាកម្រិតឆ្នាំសិក្សាមូលដ្ឋាន កម្រិត បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ ដែលមានជំនាញដូចជា ជំនាញគ្រប់គ្រង គណនេយ្យ ធនាគារ ហិរញ្ញវត្ថុ​ គ្រប់គ្រងទេសចរណ៍ ទីផ្សារ សេដ្ឋកិច្ច ច្បាប់ ភាសា អង់គ្លេស អភិវឌ្ឃសហគមន៍​ និងវិទ្យាស្ត្រកុំព្យូទ័រ​៕SRP

ខេត្តកំពង់ចាម​៖លោកអ៊ុន​ ចាន់ដា​ សមាជិកគណៈកម្មធិការកណ្ដាល និងជាប្រធានគណៈបក្សប្រជាជនកម្ពុជា​ខេត្តកំពង់ចាម​​ បាន​ជំរុញ​ដល់​យុវជន​ឲ្យ​រួមគ្នាធ្វើការងារ​ ដើម្បីឲ្យគណបក្សប្រជាជនកម្ពុជាឈ្នះ ក្នុងគោលបំណង ឲ្យ​ប្រជាពលរដ្ឋ​ បានរស់នៅក្នុងម្លប់សន្តិភាព​។

ថ្លែង​បែប​នេះក្នុងពិធីបិទកិច្ចប្រជុំបូកសរុបសកម្មភាពការងារឆ្នាំ២០២១ និងលើកទិសដៅការអនុវត្តបន្ត របស់ក្រុមការងារយុវជនគណបក្សប្រជាជនកម្ពុជាខេត្តកំពង់ចាម នៅថ្ងៃ២២ ខែមករា ឆ្នាំ២០២២ នៅទីស្នាក់ការគណបក្សខេត្ត ក្រោម​វត្តមាន​លោក ខ្លូត ផន អនុប្រធានប្រចាំការ គណកម្មាធិការគណៈបក្សខេត្ត និងសមាជិក សមាជិកា គណបក្សប្រជាជនកម្ពុជាខេត្តកំពង់ចាម ព្រមទាំងសមាជិក សមាជិកាតាមបណ្ដា ក្រុង-ស្រុក​ផងដែរ។​

ក្នុង​កិច្ចប្រជុំ​នលោក​ អ៊ុន​ ចាន់ដា​ បាន​លេីកឡេីងពីគោលជំហររបស់ក្រុមការងារយុវជនគណបក្សប្រជាជនកម្ពុជាខេត្តកំពង់ចាម÷
-ត្រូវខិតខំប្រឹងប្រែងធ្វើអំពើល្អ ធ្វើកិច្ចសហការ ពង្រឹងអង្គការចាត់តាំងរបស់គណបក្ស ដោយពង្រឹង និងពង្រីកទ័ពយុវជនបក្ស​ ដើម្បីបម្រើប្រយោជន៍អោយប្រជាជន និងរក្សានិរន្តរភាពនៃសន្តិភាពក្នុងប្រទេសកម្ពុជាយើង។
-បន្តការខិតខំរក្សាសមិទ្ធផលដែលមានស្រាប់ និងខិតខំកសាងសមិទ្ធផលថ្មី
-ខិតខំពង្រឹងសមត្ថភាព និងត្រូវខិតខំប្រឹងប្រែងធ្វើការងារ
-ខិតខំប្រឹងប្រែងរក្សាសាមគ្គីភាពផ្ទៃក្នុង
-ត្រូវមានសមូហភាពដឹកនាំ និងរក្សារបបប្រជុំតាមផែននីមួយៗ
-យុវជនត្រូវធ្វើការប្រមូលផ្ដុំដើម្បីរួមគ្នាធ្វើការងារដើម្បី​ឲ្យ​គណបក្សប្រជាជនកម្ពុជាយើងឈ្នះ ក្នុងគោលបំណងឲ្យប្រជាជនយើងបានរស់ក្នងម្លប់សន្តិភាព
-ត្រូវប្រែក្លាយយុវជនយើងឲ្យទៅជាយុវជនគណបក្ស ដើម្បីរួមចំណែកធ្វើការងារសង្គមបម្រើប្រយោជន៍របស់ប្រជាជន និងរក្សាសុខសន្តិភាពឲ្យបានគង់វង្ស​ផងដែរ​៕SRP