ខេត្តសៀមរាប៖បុរសម្នាក់បានស្លាប់ភ្លាមៗខណៈបើកម៉ូតូទៅបុកគោយន្តកន្ត្រៃដឹកអុសចំពីក្រោយយ៉ាងពេញទំហឹង។

ហេតុការណ៍បានកើតឡើង នៅថ្ងៃទី២១ ខែសីហា ឆ្នាំ២០២១ នៅម៉ោង២៣និង១៥នាទី នៅចំណុចចន្លោះគីឡូម៉ែត្រលេខ៥៦.៥៧ ក្នុងភូមិវត្ត ឃុំស្រែណូយ ស្រុកវ៉ារិន ខេត្តសៀមរាបទិសគ្នាពីជើងទៅត្បូង ស្របទិសគ្នា។

សមត្ថកិច្ចស្រុកវ៉ារិនបានឲ្យដឹងថា ករណីគ្រោះថ្នាក់ចរាចរណ៍នេះ កាត់ឡើងរវាងម៉ូតូ

ម៉ាកHONGDA c125សេរីឆ្នាំ២០១៥ ពណ៌ខ្មៅ ពាកស្លាកលេខ សៀមរាប1T8320 បើកបរដោយឈ្មោះ ទេព សាឡន ភេទប្រុស អាយុ២៤ឆ្នាំ នៅភូមិស្រែពោធិ៍ ឃុំស្រែណូយ ស្រុកវ៉ារិន ខេត្តសៀមរាប (ស្លាប់) ដោយបើកបរម្នាក់ឯង បុកនឹងគោយន្តកន្រ្តៃដឹកក្រាក់ពីក្រោយ ម៉ាកគូប៊ូតាពណ៌ក្រហម សេរីឆ្នាំ២០០៤ អ្នកបើកបរឈ្មោះ នី ណឺ ភេទប្រុស អាយុ៣៤ នៅភូមិត្រពាំងធំ ឃុំរើល ស្រុកពួក ខេត្តសៀមរាប មានរួមដំណើរម្នាក់ឈ្មោះ នី ណាក់ ភេទប្រុស អាយុ៣៦ រស់នៅភូមិជាមួយគ្នា។

សមត្ថកិច្ចបានដឹងថា ករណីនេះក៏បណ្តាលអោយខូតខាតម៉ូតូ ១គ្រឿងនិង គោយន្តកន្ត្រៃ១គ្រឿង។ មូលហេតុគោយន្តគ្មានភ្លើងបំភ្លឺពីក្រោយ ពេលបុករួចគោយន្តបើករត់ចេញពីកន្លែងកើតហេតុបាន១គីឡូក៏ទុកគោយន្តចោល ហើយអ្នកបើក រត់គេចខ្លួនបាត់៕SRP

ខេត្តសៀមរាប៖មន្ត្រីជំនាញខេត្តបានឲ្យដឹងថារថយន្តទំងន់៣តោនបានក្រឡាប់ហើយបង្កជាឆេះយ៉ាងសន្ធោសន្ធៅ។

ហេតុការណ៍បានកើតឡើងថ្ងៃអាទិត្យ ទី២២ ខែសីហា ឆ្នាំ២០២១ លើផ្លូវជាតិលេខ៦ចំណុចភូមិទួលរវៀង ឃុំល្វា ស្រុកពួក ខេត្តសៀមរាបមានទិសដៅពីលិច មកទិសកើត។

ស្នងការរងទទួលការិយាល័យបង្ការពន្លត់អគ្គិភ័យនិងសង្រោះ លោកឌុត ខុន បានអោយដឹងថា មូលហេតុនៃការឆេះនេះ បណ្តាលមកពីអ្នកបើកបរងងុយដេក ទេីបធ្វើឱ្យរថយន្ដបើកខុសផ្លូវហើយបុកគល់ឈេីបណ្ដាលឱ្យផ្ទុះឆេះរថយន្តតែម្ដង។

ក្នុងហេតុការណ៍នេះដែរ សមត្ថកិច្ចបានប្រេីប្រាស់រថយន្តពន្លត់អគ្គិភ័យរបស់អធិការដ្ឋានស្រុកពួក ដោយប្រើប្រាស់ទឹកអស់ចំនួន ១ឡាន ទេីបភ្លេីងរលត់ទៅវិញ តែមិនមានប៉ះពាល់ដល់អាយុជីវិតប្រជាពលរដ្ឋនោះឡើយ៕SRP

ខេត្តសៀមរាប៖បុរសម្នាក់បានលង់ទឹកស្លាប់ក្រោយពីបានផឹកសុរា។ ហេតុការណ៍បានកើតឡើងនៅចំណុចស្ទឹងសង្កែ ស្ថិតក្នុងភូមិទ្រាយ ឃុំពោធិ៍ទ្រាយ ស្រុកពួក។

យោងតាមរបាយការណ៍របស់សមត្ថកិច្ចខេត្តសៀមរាបបានឲ្យដឹងថា ជនរងគ្រោះមានឈ្មោះ ដុំ ជុំ អាយុ៥១ឆ្នាំ បានលែងលះប្រពន្ធ រស់នៅភូមិទ្រាយ ឃុំពោធិ៍ទ្រាយ ស្រុកពួក ខេត្តសៀមរាប តែម្នាក់ឯង ដោយ ជនរងគ្រោះបានផឹកស្រាស្រវឹងជាប្រចាំ។

របាយការណ៍បន្តថាមុនកើតហេតុនៅវេលាម៉ោង០៦ និង៣០នាទីល្ងាច ថ្ងៃទី២០ ខែសីហា ឆ្នាំ២០២១ ជនរងគ្រោះផឹកស្រាសជុំគ្នា ៣នាក់ នៅភូមិជាមួយគ្នា ពួកគាត់ផឹកអស់ចំណុះ ៣លីត្រកន្លះ ក៏បានបែកគ្នា។ លុះនៅម៉ោង០៨និង១៥យប់ជនរងគ្រោះ បានអុំកាណូត មិនបញ្ឆេះម៉ាស៊ីន តែម្នាក់ឯងទៅផ្ទះលើដីចំការ។ រហូតដល់នៅម៉ោងប្រហែល៧និង៣០នាទីព្រឹក ថ្ងៃទី២១ ខែសីហា ឆ្នាំ២០២១ ត្រូវបានបងប្អូនអ្នកភូមិឃើញកាណូតរបស់ជនរងគ្រោះអណ្ដែតលើទឹកស្ទឹង តែពុំឃើញមនុស្សក៏នាំគ្នារកដល់ផ្ទះក៏មិនឃើញ ដោយមានការសង្ស័យថាធ្លាក់ទឹកព្រោះស្រវឹង ពួកគាត់រាយការណ៍ឲ្យសមត្ថកិច្ច នឹងបាននាំគ្នាជួយស្រាវជ្រាវរក។

របាយការណ៍បន្ថែមថារហូតដល់ម៉ោង១៦និង១៩នាទីល្ងាច ថ្ងៃទី២១ ខែសីហា ឆ្នាំ២០២១ ក៏បានប្រទះឃើញសពជនរងគ្រោះអណ្តែតទឹកស្ទឹងសង្កែ នៅចំណុចចុងភូមិទ្រាយ ទិសខាងត្បូងចម្ងាយប្រហែល៥៥០ម៉ែត្រ ទឹកជម្រៅប្រហែល៤ម៉ែត្រ។

របាយការណ៍បានបញ្ជាក់ថាតាមការពិនិត្យសាកសព ជនរងគ្រោះ ចូលរួមពិនិត្យដោយគ្រូពេទ្យមណ្ឌលពោធិ៍ទ្រាយ សាកសព ពុំមានស្លាកស្នាមអ្វីគួរសង្ស័យេជាបទល្មើសឡើយ។

មូលហេតុ និងការសន្និដ្ឋានរបស់គ្រូពេទ្យថាការស្លាប់ដោយសារស្រវឹងស្រា ធ្លាក់ទឹកលង់ស្លាប់តែម្ដង៕SRP

ភ្នំពេញ៖នាយកដ្ឋានព័ត៌មានវិទ្យា នៃក្រសួងហាផ្ទៃបានបង្ហាញអត្ថបទមួយថា ក្រុមការងារសូមចែករំលែកសារជាថ្មី​ និងសូមទាញចំណាប់អារម្មណ៍បងប្អូនស្វែងយល់អំពីបច្ចេកវិទ្យា DeepFake ដែលកំពុងពេញនិយមប្រើប្រាស់ពីសំណាក់យុវជនកម្ពុជា លើបណ្តាញទំនាក់ទំនងសង្គម។

DeepFake គឺជាកម្មវិធីម្យ៉ាងដែលមានសមត្ថភាពធ្វើការផ្លាស់ប្តូរមុខ និងសម្លេងរបស់បុគ្គលណាម្នាក់ដាក់ចូលទៅក្នុងរូបភាព ឬវីដេអូ ដែលមានស្រាប់ ដោយប្រើប្រាស់បច្ចេកទេស Marchine Learnning និងបញ្ញាសប្បនិម្មិត (Artificial intelligence)។ បច្ចេកទេស DeepFake ត្រូវបានស្រាវជ្រាវចាប់តាំងពីអំឡុងឆ្នាំ១៩៩៧ ដែលដំបូងមានឈ្មោះថា “Video Rewrite Program” រហូតដល់អំឡុងឆ្នាំ២០១៧ បច្ចេកវិទ្យា DeepFake បានល្បីពេញពិភពលោក និងត្រូវបានបង្កើតជាកម្មវិធីផ្សេងៗ ដោយក្រុមហ៊ុនផលិតកម្មវិធីកុំព្យូទ័រ និងទូរស័ព្ទដៃ (ឧទាហរណ៍៖ កម្មវិធី FakeApp FaceApp FaceSwap DeepFaceLab DeepNude។ល។)។ លើសពីនេះនៅឆ្នាំ២០១៨ អ្នកស្រាវជ្រាវមួយរូប នៅសាកលវិទ្យាល័យកាលីហ្វ័រញ៉ា បានចុះផ្សាយលទ្ធផលស្រាវជ្រាវរបស់ខ្លួន ស្តីពីការពង្រីកសមត្ថភាពរបស់បច្ចេកវិទ្យា DeepFake ដែលអាចធ្វើការបន្លំមុខ ក្នុងសកម្មភាពវីដេអូ និងបញ្ជាលើដងខ្លួនមនុស្សទាំងមូលតែម្តង។

ទោះបីជាយ៉ាងណាបច្ចេកវិទ្យា DeepFake បានផ្តល់នូវគុណសម្បត្តិ និងគុណវិបត្តិ មួយចំនួនដូចខាងក្រោម៖

គុណសម្បត្តិ៖

– ត្រូវបានប្រើប្រាស់ដោយក្រុមហ៊ុនផលិតភាពយន្ត ក្នុងការកែតម្រូវសកម្មភាព ឬសម្លេងរបស់តួរសម្តែង ដោយពុំចាំបាច់ថតឡើងវិញ

– ប្រើប្រាស់ក្នុងវិស័យសុខាភិបាល ដើម្បីបញ្ចូលរូបភាពអ្នកជំងឺក្នុងសកម្មភាពវីដេអូវះកាត់

– ប្រើប្រាស់ក្នុងការបង្កើតវីដេអូសប្បនិម្មិតរបស់គ្រូឧទ្ទេស ក្នុងកម្មវិធីបណ្តុះបណ្តាល (Video Training)

– ប្រើប្រាស់ក្នុងកម្មវិធីលក់ទំនិញអនឡាញ ដើម្បីអនុញ្ញាតឲ្យអតិថិជន ធ្វើការសាកល្បងទំនិញ តួរយ៉ាងសម្លៀកបំពាក់

– ប្រើប្រាស់ក្នុងគោលបំណងផ្តល់ការកំសាន្តសប្បាយផ្សេងៗ

គុណវិបត្តិ៖

– ប្រើប្រាស់ដោយជនខិលខូច ក្នុងការបន្លំរូបភាព ឬវីដេអូ មួលបង្ខូចកិត្តិយសជនរងគ្រោះ

– ប្រើប្រាស់ក្នុងការបន្លំរូបភាព វីដេអូ និងសម្លេង យកជាមធ្យោបាយឆបោកប្រាក់ បន្លំផ្ទេរប្រាក់ ឬលួចព័ត៌មានផ្សេងៗ

– ប្រើប្រាស់ជាមធ្យោបាយក្នុងសកម្មភាពប្រព្រឹត្តិបទល្មើសផ្សេងៗ។

ក្រឡេកមកមើលព្រះរាជាណាចក្រកម្ពុជា ដែលបច្ចុប្បន្ន បច្ចេកវិទ្យា DeepFake នេះកំពុងពេញនិយមប្រើប្រាស់ក្នុងស្រទាប់យុវជន ជាពិសេសក្នុងកម្មវិធីបណ្តាញទំនាក់ទំនងសង្គម Facebook ឬ TikTok ជាដើម។ ដោយសារការនិយមកាន់តែច្រើនឡើង ក៏មានជនខិលខូចមួយចំនួនបានបន្តការស្រាវជ្រាវបន្ថែម រហូតឈានដល់ការប្រើប្រាស់បច្ចេកវិទ្យានេះ ក្នុងការប្រព្រឹត្តអំពើអសីលធម៌ ឬអំពើល្មើសផ្សេងៗ ដូចជា៖

– បង្កើតរូបភាព ឬវីដេអូ អាសអាភាសដោយបន្លំបញ្ចូលរូបមុខជនរងគ្រោះ ធ្វើការបរិហារកេរ្តិ៍ជាសាធារណៈ ឬគម្រាមជនរងគ្រោះឲ្យធ្វើអ្វីមួយតាមការចង់បាន

– បង្កើតរូបភាព ឬវីដេអូ ដែលមានសកម្មភាពអសីលធម៌ ដើម្បីបង្ខូចកិត្តិយសជនរងគ្រោះ

– ប្រើបាស់រូបភាព វីដេអូ ឬសម្លេង ជនរងគ្រោះដើម្បីឆបោកបន្លំផ្ទេរប្រាក់ ឬលួចព័ត៌មានផ្សេងៗ

ជាថ្មីម្តងទៀត នាយកដ្ឋានព័ត៌មានវិទ្យា សូមក្រើនរំលឹកដល់បងប្អូន នូវអនុសាសន៍មួយចំនួនដូចខាងក្រោម៖

– សូមប្រើប្រាស់បច្ចេកវិទ្យា តួរយ៉ាងកម្មវិធីនៃបច្ចេកវិទ្យា DeepFake ប្រកបដោយសីលធម៌ និងស្របតាមក្រិតក្រមច្បាប់នៃព្រះរាជាណាចក្រកម្ពុជា- សូមធ្វើការរាយការណ៍ដល់ជនរងគ្រោះ នៅពេលដែលអ្នកបានទទួល ឬឃើញនូវរូបភាព ឬវីដេអូរបស់ជនរងគ្រោះ ឬធ្វើសេចក្តីរាយការណ៍ដល់អាជ្ញាធរមានសមត្ថកិច្ចដែលនៅជិតលោកអ្នក៕SRP

ខេត្តសៀមរាប៖លោកជ្រិញ គឹមនី នាយការិយាល័យ នគរបាលប្រឆាំងបទល្មើសសេដ្ឋកិច្ចស្នងការដ្ឋានខេត្តសៀមរាប បានអះអាងថា៖ចាប់តាំងពីលោកទទួលតំណែងនេះមកលោកមិនដែលប្រើមនុស្សឲ្យដើរប្រមូលលុយ រឺកាងបទល្មើសដូចការលើកឡើងនោះទេ។

ការច្រានចោលបែបនេះបន្ទាប់ពីសារព័ត៌មានឈ្មោះ «ខ្មែរអនឡាញ»និងទំព័រសាព័ត៌មានឈ្មោះ «ជួយខ្មែរ»នៅតាមបណ្ដាញសង្គម facebook កាលពីថ្ងៃទី១៨ខែសីហាឆ្នាំ២០២១ កន្លងទៅនេះ ដោយមិនបានសុំការបំភ្លឺពីសមត្ថកិច្ចពាក់ព័ន្ធ។ ដោយករណីនេះលោកថាជាព័ត៌មានមិនពិត។

លោកជ្រិញ គឹមនី បានបន្តថាលោកតែងតែបង្ក្រាបបទល្មើសសេដ្ឋកិច្ច គ្រប់ប្រភេទជាប់ជាប្រចាំដូចជាបទល្មើសព្រៃឈើ,បទល្មើសជលផល,ទំនិញគេចពន្ធ,បទល្មើសកម្មសិទ្ធិបញ្ញានិងបទរល្មើសធនធានរ៉ែជាដើម។ល។ ការបង្ក្រាបនោះទៀតសោទបានសហការជាមួយមន្ទីរជំនាញពាក់ព័ន្ធ ស្របទៅតាមនីតិវិធីច្បាប់។

លោកបញ្ជាក់ទៀតថាកន្លងមកនេះលោកទទួលបញ្ជាពីលោកឧត្តមសេនីយ៍ត្រីស្នងការទទួលបន្ទុកនិងលោកឧត្តមសេនីយ៍ទោស្នងការស្នងការដ្ឋាននគរបាលខេត្ត ដាក់ផែនការឲ្យនគរបាល ក្រុងស្រុកទាំង១២ និងមន្ត្រីនៃការិយាល័យជំនាញ ចាត់វិធានការឲ្យបានម៉ឺងម៉ាត់ចំពោះការទប់ស្កាត់ និងបង្ក្រាបបទល្មើស សេដ្ឋកិច្ចគ្រប់ប្រភេទ ឲ្យបានទាន់ពេលវេលា។ ជាពិសេសបានឲ្យសហការជា មួយសារព័ត៌មានគ្រប់អង្គភាព និងប្រជាពលរដ្ឋ ដែលបានផ្តល់ព័ត៌មានអំពីបទល្មើស។

ជុំវិញករណីនេះ លោកសូមសំណូមពរដល់អ្នកសារព័ត៌មានមួយចំនួនមុននឹងបង្ហោះផ្សព្វផ្សាយនូវព័ត៌មានអ្វីមួយ មេត្តាសូមយកព័ត៌មាន ឱ្យបានច្បាស់លាស់ ជាមុនសិន ដើម្បីចៀសសវាងប៉ះពាល់កិត្តិយសនិងសេចក្តីថ្លៃថ្នូររបស់បុគ្គលនិងអង្គភាព៕SRP

ភ្នំពេញ៖សម្ដេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ផ្ដល់អនុសាសន៍ឱ្យបន្តការងារអប់រំផ្សព្វផ្សាយអំពីការអនុវត្តវិធានការ៣កុំ ៣ការពារ ពង្រឹងការអនុវត្តច្បាប់ និងវិធានការ និងត្រូវជំរុញការចាក់វ៉ាក់សាំងឱ្យបានតាមគោលការណ៍ក្រសួងសុខាភិបាល។

រដ្ឋមន្ត្រីក្រសួងមហាផ្ទៃ ក៏បានណែនាំឱ្យមានការផ្ដល់ព័ត៌មានអំពីសំណើ និងសំណូមពរនានាដើម្បីរៀបចំការសម្របសម្រួល ពិសេសជាមួយក្រសួងសុខាភិបាល ហើយគ្រប់អង្គភាពត្រូវធ្វើរបាយការណ៍ឱ្យទៀងទាត់។

រដ្ឋមន្ត្រីក៏បានសម្ដែងការកោតសសើរ និងវាយតម្លៃខ្ពស់ចំពោះ រដ្ឋលេខាទទួលបន្ទុក និងអគ្គនាយកពន្ធនាគារ ក្នុងការងារប្រយុទ្ធប្រឆាំងជំងឺកូវីដ-១៩ក្នុងពន្ធនាគារ ពិសេសការរៀបចំចាក់វ៉ាក់សាំងជូនអ្នកជាប់ឃុំ។

រដ្ឋមន្ត្រីថ្លែងយ៉ាងដូច្នេះ នៅថ្ងៃសៅរ៍ ទី២១ ខែសីហា ឆ្នាំ២០២១នេះ ក្នុងឱកាសអញ្ជើញដឹកនាំកិច្ចប្រជុំតាមដានវឌ្ឍនភាពនៃការប្រយុទ្ធប្រឆាំងជំងឺកូវីដ-១៩របស់ក្រសួងមហាផ្ទៃ តាមប្រព័ន្ធវីដេអូ Zoom។

យោងតាមរបាយការណ៍របស់ លោក សេង យូអ៊ាន់ អគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុ គិតត្រឹមថ្ងៃទី១៩ ខែសីហា ឆ្នាំ២០២១ ក្រសួងមហាផ្ទៃបានទទួលវ៉ាក់សាំងពីក្រសួងសុខាភិបាល ចំនួន២០លើក ស្មើនឹង១០៧,៣២១ដូស និងទទួលបានសម្ភារៈបរិក្ខារមួយចំនួនទៀត។

លោកអគ្គនាយកបន្តថា ក្រសួងមហាផ្ទៃក៏បានទទួលជំនួយបង្ការទប់ស្កាត់ជំងឺកូវីដ-១៩នេះ ផ្ដល់ដោយថ្នាក់ដឹកនាំក្រសួង អគ្គស្នងការដ្ឋាននគរបាលជាតិ អគ្គនាយកដ្ឋានភស្តុភារ និងហិរញ្ញវត្ថុ អគ្គនាយកដ្ឋាន និងអង្គភាពចំណុះនានាមួយចំនួនទៀត មានទាំងជំនួយថវិកា និងសម្ភារបរិក្ខារ។

លោកបានបន្ថែមថា ក្រសួងមហាផ្ទៃ ក៏បានទទួលឧបករណ៍តេស្តរហ័សផ្ដល់ដោយក្រសួងសុខាភិបាល និងទទួលបានពីជំនួយថ្នាក់ដឹកនាំក្រសួង និងសប្បុរសជនជាបន្តបន្ទាប់ ព្រមទាំងបានបញ្ជាទិញឧបករណ៍តេស្តរហ័សនេះបន្ថែមសម្រាប់ការប្រើប្រាស់ផងដែរ។

ពាក់ព័ន្ធនឹងឆ្លងជំងឺកូវីដ-១៩ លោក សេង យូអ៊ាន់ បានបញ្ជាក់ថា មកដល់ពេលនេះមានថ្នាក់ដឹកនាំ និងមន្រ្តីចំណុះក្រសួងមហាផ្ទៃ ២.១៩៨នាក់ បានឆ្លងជំងឺនេះ ក្នុងនោះជាសះស្បើយ ១.៤៤១នាក់ កំពុងព្យាបាល ៧៣៦នាក់ និងស្លាប់ ២១នាក់៕SRP

ខេត្តសៀមរាប៖លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និង វិចិត្រសិល្បៈ អមដោយគណៈប្រតិភូអចិន្ត្រៃយ៍ នៃកម្ពុជាប្រចាំនៅ អង្គការយូណេស្កូ នៅពីថ្ងៃទី២០ ខែ សីហា ម្សិលមិញ ក្នុងឱកាសបំពេញទស្សនកិច្ចនៅសាធារណរដ្ឋបារាំង បានជួបពិភាក្សា និងសម្តែងការ គួរសមជាមួយ៖ ១-លោក Tim Curtis ប្រធានលេខាធិការដ្ឋាននៃអនុសញ្ញា ឆ្នាំ២០០៣ ស្តីពីការការពារ និង អភិរក្សបេតិកភណ្ឌអរូបី និង ឯកឧត្តម Firmin Edouart Matoko អគ្គនាយករង ទទួលបន្ទុកទំនាក់ទំនង អន្តរជាតិ និង ជាតំណាងដ៏ខ្ពង់ខ្ពស់របស់លោកជំទាវ Audrey Azoulay អគ្គនាយិកានៃអង្គការយូណេស្កូ នៅទីស្នាក់ការកណ្តាល នៃអង្គការយូណេស្កូ នាទីក្រុងប៉ារីស។

កិច្ចសន្ទនា បានផ្តោតជាចម្បងទៅលើប្រធានបទ សំខាន់ៗ ដូចជា៖ ១-វឌ្ឍនាភាព នៃកិច្ចការអភិរក្ស និង គាំពារបេតិភណ្ឌរូបី និង អរូបីនៅកម្ពុជា ២-ការរៀបចំដាក់បញ្ចូលតំបន់ ប្រាសាទកោះកេរទៅក្នុងបញ្ជីបេតិកភណ្ឌពិភពលោក និង ការចុះសម្បត្តិវប្បធម៌ អរូបីនៃកម្ពុជា ទៅក្នុងបញ្ជីបេតិកភណ្ឌ អរូបីនៃមនុស្សជាតិ (បេតិកភណ្ឌឆ្នើម) ៣-ការរៀបចំ ឯកសារ ដើម្បីចុះខេត្តបាត់ដំបង ជាទីក្រុងច្នៃប្រឌីត ៤-កិច្ច សហប្រតិបត្តិការ រវាងស្ថាប័ននានានៃអង្គការយូណេស្កូ ជាមួយរាជរដ្ឋាភិបាលកម្ពុជា លើវិស័យវប្បធម៌ វិស័យអប់រំ និង វិស័យនានា និង ៥-ជំនួយឧបត្ថម្ភ និង គាំទ្ររបស់ អង្គការយូណេស្កូ លើគម្រោងអភិរក្ស ស្រាវជ្រាវ និង ការ រៀបចំធ្វើបញ្ជីសារពើភណ្ឌបេតិកភណ្ឌអរូបីនៅកម្ពុជា។

នៅក្នុងកិច្ចប្រជុំនេះ តំណាង អង្គការយូណេស្កូ បានថ្លែង កោតសរសើរដោយស្មោះ នូវការខិតខំប្រឹងប្រែងរបស់រាជ រដ្ឋាភិបាលនៃព្រះរាជាណាចក្រកម្ពុជា ក្នុងកិច្ចការអភិរក្ស និង គាំពារ បេតិកភណ្ឌរូបី និង អរូបី ព្រមទាំងការផ្តល់សច្ចាប័ន និង ការអនុវត្តបានខ្ជាប់ខ្ជួននូវខ្លឹមសារ នៃ អនុសញ្ញានានា របស់អង្គការ យូណេស្កូ៕SRP

ខេត្តកំពង់ចាម៖ផ្ទះមួយខ្នង​គិតជា​ថវិកា​សាងសង់អស់ជាង៨ពាន់ដុល្លារ​ ​រួមនឹង​សម្ភារប្រេីប្រាស់​ ដែលជាអំណោយ​របស់​សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុន​ សែន​ ប្រធានកាកបាតក្រហមកម្ពុជា​ ត្រូវ​បាន​ប្រគល់​ជូន​ លោកយាយ​ម្នាក់​ឈ្មោះ​ ឌឿ ម៉េត អាយុ៧៣ឆ្នាំ​ មុខរបរ​ដេីរ​បេះ​បន្លែ​ស្លឹកឈើ​លក់ ដែលធ្លាប់ស្នាក់នៅក្នុងខ្ទមចាស់ទ្រុឌទ្រោម ជាមួយនឹងកូនស្រីមេម៉ាយម្នាក់​ និងចៅប្រុសស្រី​២នាក់ ស្ថិតនៅក្នុង ភូមិរមូល ឃុំរអាង ស្រុកកំពង់សៀម ខេត្តកំពង់ចាម​។

ពិធីបានធ្វេីឡេីងនៅព្រឹកមិញនេះ ក្រោម​វត្តមាន​លោកជំទាវ ម៉ែន នារីសោភ័គ អគ្គលេខាធិការរងទី១ តំណាងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងលោកអ៊ុន ចាន់ដា ប្រធានគណៈកម្មាធិការសាខា​កាកបាទក្រហម​ខេត្ត​។

លោកជំទាវ ម៉ែន នារីសោភ័គ បានពាំនាំ​នូវ​ប្រសាសន៍​ផ្តាំផ្ញេី​សាកសួរសុខទុកពី​សំណាក់​ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះ លោកយាយ ឌឿ ម៉េត ដោយក្តីនឹករលឹក និងអាណិតអាសូរបំផុត​ ដែលជានិច្ចកាល សម្តេច លោកតែងតែខ្វាយខ្វល់គិតគូរពីសុខទុក្ខ​ប្រជាពលរដ្ឋ ជនរងគ្រោះ និងជនងាយរងគ្រោះ ដោយមិនរើសអើង ហើយបានដោះស្រាយទុក្ខលំបាកបានទាន់ពេលវេលា តាមទិសស្លោក ” ទីណាមានការលំបាក ទីនោះកាមកាកបាទក្រហមកម្ពុជា “។​

ក្នុងឱកាសនោះ​ដែរ​ លោក អ៊ុន​ ចាន់ដា​​ បាន​អំពាវនាវ​ដល់​លោកយាយ​លោក​តា​ បងប្អូនប្រជាពលរដ្ឋ​ទាំងអស់​ ឲ្យ​ខិតខំ​យកចិត្តទុកដាក់​ថែទាំ​សុខភាព​ ត្រូវ​រស់នៅ​ប្រកប​ដោយ​អនាម័យ​ ជាពិសេស​ត្រូវ​​អនុវត្ត​វិធានការ​ ៣ការពារ​ ៣កុំ​ និង​២ចូលរួម​ តាម​ការណែនាំ​របស់​​ក្រសួង​សុខាភិបាល​ផងដែរ​។

គួរ​បញ្ជាក់​ថា​ អំណោយមនុស្សធម៌ ដែលផ្តល់ជូន លោកយាយឌឿ ម៉េត សម្រាប់ឡើងផ្ទះថ្មីនេះ រួមមាន៖ អង្ករ ៥០គក្រ, មី ២កេស, ត្រីខ ២០កំប៉ុង, ទឹកត្រី ១២ដប, ទឹកស៊ីអ៉ីវ ១២ដប, ឃីត ២សម្រាប់, ម៉ាស់ ២ប្រអប់ , អាវយឺត ១៦, សម្ភារផ្ទះបាយ ២សម្រាប់ , ធុងទឹកធំ ១, ចង្ក្រាន ២ , ធ្យូង ៥គក្រ និងអុស១បាច់។​

ដោយឡែក ជូន លោកយាយ និងលោកតា ចំនួន ២១នាក់ ដែលចូលរួមក្នុងឱកាសនោះ ក្នុងម្នាក់ៗទទួលបាន៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកត្រី ៦ដប, ទឹកស៊ីអ៊ីវ ៦ដប, ម៉ាស់ ១ប្រអប់, , និង ថវិកា ២០,០០០ រៀលផងដែរ៕SRP

ខេត្តសៀមរាប៖គ្រួសារចាស់ជរានិងពិការភាពមួយនៅក្នុងខេត្តសៀមរាប បានទទូចសុំអោយស្ថាបន័តុលាការកំពូលចុះអង្កេតនិងស្រាវជ្រាវជាថ្មី មុនសម្រេចក្តី។

ការទទូចស្នើសុំអោយមានការស៊ើបអង្កេតជាថ្មីនេះ គឺ ក្រោយពីសាលាឧទ្ធរណ៍កាត់ក្តីអោយគ្រួសារគាត់ឈ្នះ ហើយតុលាការកំពូល បង្វែរឿងអោយសាលា ឧទ្ធរណ៍កាត់ក្តីម្តងទៀត បែជាកាត់អោយគ្រួសារគាត់ចាញ់វិញ។

ភាគីចាញ់ក្តីលើកទី២មានឈ្មោះពេជ្រ ផៃ ភេទ ប្រុសអាយុ៨១ឆ្នាំ ទីលំនៅភូមិប្រីយ៍ថ្មី សង្កាត់ទឹកវិល ក្រុងសៀមរាប សៀមរាប។ ចំណែកគូភាគីមានឈ្មោះ លាន គីវ ភេទស្រី(ស្លាប់)ដោយឈ្មោះ លាន ស៊ីម ភេទស្រីជាអ្នកបន្តក្តី។

លោកពេជ្រ ផៃ បានអោយដឹងថា ដោយសាតែរឿងក្តីនេះហាក់មានភាពមិនប្រក្រតី រូបលោកបានសម្រេចដាក់ពាក្យបណ្តឹងសារទុក្ខ ដោយរំពឹងថាស្ថាប័ននៃច្បាប់នឹងបើកការស្រាវជ្រាវ ហើយផ្តល់ភាពយុត្តិធម៌ដល់គូភាគី។

យោងពាក្យបណ្តឹងសារទុកចុះថ្ងៃទី២៨ខែកក្កដាឆ្នាំ២០២១បញ្ជាក់ថា  ខ្ញុំបាទឈ្មោះ ពេជ្រ ផៃ ភេទ ប្រុស កើតឆ្នាំ១៩៤០ អា ស័យដ្ឋានក្រុម៦ ភូមិប្រីយ៍ថ្មី សង្កាត់ទឹកវិល ក្រុង.ខេត្តសៀមរាប។ កម្មវត្ថុ សុំប្តឹងសារទុក្ខទៅនឹងសាលដីការដ្ឋប្បវេណីលេខ៤០ ”ក្រ. III.ស.អ” ចុះថ្ងៃទី៣០ ខែធ្នូ ឆ្នាំ២០២០ របស់ សាលា ឧទ្ធរណ៍ភ្នំពេញ ត្រង់សេចក្តីសម្រេចទាំងមូល។

បណ្តឹងសារទុក្ខ បញ្ជាក់ថា កាលពីថ្ងៃទី៣០ ខែធ្នូ ឆ្នាំ២០២០ សាលាឧទ្ធរណ៍ភ្នំពេញបានធ្វើនីតិវិធីទាញ ហេតុផល ដោយផ្ទាល់មាត់លើ សំណុំរឿងរដ្ឋប្បវេណីលេខ០១១ ចុះថ្ងៃទី២៤ ខែមេសា ឆ្នាំ២០១៩ ហើយបាន ប្រកាសសាលដីកា រដ្ឋប្បវេណីលេខ ៤០”ក្រ. III. ស.អ” ចុះថ្ងៃទី៣០ ខែធ្នូ ឆ្នាំ២០២០ ដោយវិនិច្ឆ័យ សេចក្តីពុំមានភាពត្រឹមត្រូវស្របតាមនីតិវិធីច្បាប់ និង ផ្ទុយពីគោការណ៍ទទួលបានលទ្ធកម្មនៃការកាន់កាប់ តាមរយៈការកាន់កាប់ជាក់ស្តែង និងជាភោគីស្របច្បាប់។

សេចក្តីសម្រេចរបស់សាលឧទ្ធរណ៍ភ្នំពេញ គឺពិនិត្យទៅលើតែឯកសាររបស់ភាគី ដើមបណ្តឹង តែមួយមុខគត់ប៉ុណ្ណោះ។ ដែលមានដូចជា សាក្សីដឹងឮ, សេចក្តីបំភ្លឺ របស់មេភូមិប្រិយ៍ថ្មី, លិខិតបំភ្លឺចុះថ្ងៃទី២៧ ខែសីហា ឆ្នាំ ២០០៧ របស់ប្រធាន មន្ទីរសុរិយោដី, បង្កាន់ដៃបង់ប្រាក់ ចុះថ្ងៃទី០៥ ខែ មិថុនា ឆ្នាំ១៩៩៣ របស់លោកស្រីលាន គីវ, លិខិត បញ្ជាក់របស់ខ្ញុំបាទឈ្មោះពេជ្រ ផៃ និងឈ្មោះប្រាក់ គឹមថន នៅខែធ្នូ ឆ្នាំ១៩៩៦, លិខិតទទួល ស្គាល់របស់ប្រជាជនឃុំទឹកវិល ស្រុកពួក ខេត្តសៀមរាប ចំនួន១៨នាក់ បញ្ជាក់ថា បានកាន់កាប់ដីខាងលើនៅក្នុងឆ្នាំ ១៩៧៩។  រាល់ឯកសារទាំងអស់ខាងលើនេះ គឺសំដៅទៅលើដីរបស់គាត់ ដែលមាននៅក្នុងពាក្យសុំកាន់កាប់ ប្រើប្រាស់ដីធ្លីលេខ:១២៣៦៨ ចុះថ្ងៃទី០៥ ខែមីនា ឆ្នាំ១៩៩៣ ដែលមានទំហំតែ ២០០០ម៉ែត្រការ៉េតែប៉ុណ្ណោះ។ សរុបមក ឯកសារទាំងអស់នោះជាឯកសារសម្គាល់ដី របស់ឈ្មោះ លាន គីវ ដែលដីនោះនៅផ្នែកខាងក្រោយ ដីរបស់ខ្ញុំបាទពេជ្រ ផៃ ហើយក៏ពុំមែនជាឯកសារដែលសម្គាល់ ដីរបស់ខ្ញុំបាទនោះទេ។ ចំណែកលិខិតផ្ទេរសិទ្ធិ កាន់កាប់ដីធ្លីចុះថ្ងៃទី០១ ខែមករា ឆ្នាំ២០០៥ គឺជាលិខិត ដោះដូរដីមួយកន្លែងដែលឈ្មោះ លាន គីវ ទទួលបាន ដីពីឈ្មោះសុខ ទៀង និងលោកយូ អាន ដែលទីតាំងដីនោះក៏ស្ថិតនៅផ្នែកខាងក្រោយនៃដីរបស់ខ្ញុំបាទពេជ្រ ផៃដែរ។

បណ្តឹងសារទុក្ខ បញ្ជាក់ទៀតថា សាលក្រម លេខ១៨”ឆ” ចុះថ្ងៃទី២៤ ខែវិច្ចិកា ឆ្នាំ២០១៥ របស់សាលាដំបូងខេត្តសៀមរាប ពុំមែនសំដៅទៅលើ ឈ្មោះរបស់ខ្ញុំបាទពេជ្រ ផៃនោះទេ។ ដីទំនាស់នេះមិនស្ថិតនៅក្នុងទំហំដី ដែលឈ្មោះ លាន គីវ បានឈ្នះក្តីពីឈ្មោះប្រាក់ គឹមថន នោះទេ។ ដីដែលឈ្មោះលាន គីវ បានឈ្នះក្តី ពីឈ្មោះប្រាក់ គឹមថន ស្ថិតនៅតាម បណ្តោយផ្លូវជាតិលេខ៦(ជាប់ផ្លូវធំ) ចំណែកដីទំនាស់រវាងខ្ញុំបាទស្ថិតនៅផ្លូវចូលទៅបារាយណ៍ទឹកថ្លា។ រីឯ របាយការណ៍ស្តីពីលទ្ធផល ចុះសង្កេតស្រាវជ្រាវចុះថ្ងៃទី២១ ខែមករា ឆ្នាំ២០០៨ របស់ក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច គឺធ្វើឡើងដោយមិនបានសាកសួរ និងសហការ ដោយពុំមានការចូល រួមពីអាជ្ញាធរមូលដ្ឋាននោះដែរ។

លោកពេជ្រ ផៃ គ្រួសារដែលមានចាស់ជរានិងពិការភាព បានបញ្ជាក់ចុងក្រោយថា ករណីនេះរូបលោក ទទូចសុំអោយតុលាការកំពូល បើកការស្រាវជ្រាវ និងចុះពិនិត្យដោយផ្ទាល់មុននឹងសម្រេចក្តី។ លោកនិងគ្រួសារ នៅ តែរំពឹងថា ស្ថាប័នច្បាប់ នឹងផ្តល់ភាពយុត្តិធម៌ដល់គ្រួសាររបស់លោក។

ជុំវិញរឿងវិវាទដីធ្លីនេះ អង្គភាពព័ត៌មាន«សៀមរាបប៉ុស្ដិ៍» នៅមិនទាន់ទទួលបានការបកស្រាយពីភាគីឈ្មោះលាន ស៊ីម ដែលជាអ្នកបន្តក្តីនោះទេ ទោះជាយ៉ាងណា អង្គភាពសៀមរាបប៉ុស្ដិ៍ រងចាំបកស្រាយ៕SRP

ខេត្តបាត់ដំបង៖ក្រុមមន្ត្រីអធិការកិច្ចមន្ទីរទេសចរណ៍ខេត្តបាត់ដំបង នៅថ្ងៃទី២០ ខែសីហា ឆ្នាំ២០២១ បានចុះត្រួតពិនិត្យស្តីពីការអនុវត្តសេចក្តីសម្រេចលេខ ៣១៨/២១ សសរ របស់រដ្ឋបាលខេត្តបាត់ដំបង តាមភោជនីយដ្ឋាន អាហារដ្ឋានទេសចរណ៍ និងតូបលក់អាហារតាមវិថីលក់ម្ហូបអាហារទូទាំងក្រុងបាត់ដំបង។

លោកអ៊ុច អ៊ុភីនីស្សារ៉ា ប្រធានមន្ទីរទេសចរណ៍ខេត្តបានឲ្យដឹងប្រតិបត្តិការនេះ មន្ត្រីបានរកឃើញអាជីវកម្មមួយចំនួនធំ បានផ្អាកដំណើរការបណ្តោះអាសន្ន និងមួយចំនួនទៀត បានចូលរួមសហការនិងអនុវត្តតាមវិធានសុវត្ថិភាពបានល្អ និងមួយចំនួនតូចការអនុវត្តនៅមានកម្រិត។ ក្រុមការងារក៏បានណែនាំដល់ម្ចាស់ និងអ្នកគ្រប់គ្រងអាជីវកម្មទាំងនោះអោយបន្តពង្រឹងការអនុវត្តការរស់នៅបែបគន្លងថ្មី (New Normal) ជាប្រចាំ ៣ការពារ ៣កុំ ហាមឃាត់ដាច់ខាតការលក់គ្រឿងស្រវឹងដល់ភ្ញៀវ ក្រើនរំលឹកពីពេលវេលាបំរាមគោចរផងដែរ។

លោកប្រធានមន្ទីរ បានបន្តទៀតថា មានអាហារដ្ឋានមួយទីតាំង ឈ្មោះ បុកល្ហុងបែបថៃ ស្រាក្រឡុក ស្ថិតលើសួនច្បារមាត់ស្ទឹងជាប់នឹងគល់ស្ពានសោហឺត្រើយខាងកើត ក្នុងភូមិរតនៈ សង្កាត់រតនៈ ក្រុងបាត់ដំបង ដែលមិនមានអាជ្ញាប័ណ្ណទេសចរណ៍ មិនអនុវត្តតាមសេចក្តីសម្រេចរបស់រដ្ឋបាលខេត្ត ដោយអនុញ្ញាតអោយភ្ញៀវចូលទៅប្រមូលផ្តុំសេពគ្រឿងស្រវឹងស្ទើរតែគ្រប់តុ និងមានបោះសម្រាមពាសវាលពាសកាលលើសួនច្បារផងដែរ។

បើតាមប្រធានមន្ទីរបានឲ្យដឹងថាដើម្បីទប់ស្កាត់ការរីករាលដាលជំងឺកូវីដ១៩ និងពង្រឹងការចុះអនុវត្តការងារ អោយមានប្រសិទ្ធិភាពខ្ពស់ មន្ទីរទេសចរណ៍សូមស្នើសុំ បិទផ្អាកដំណើរការទីតាំងអាហារដ្ឋានខាងលើ៕SRP

ខេត្តកំពង់ចាម៖លោកហ៊ុន ម៉ានិត ប្រធានក្រុមការងារថ្នាក់កណ្ដាលចុះជួយស្រុកចំការលើ​ បានប្រកាសតែតាំង​ លោក​សម​ ពិសិដ្ឋ​ ជាប្រធានគណៈកម្មាធិការគណបក្សប្រជាជន​ ស្រុកចំការលើថ្មី។

ពិធីធ្វើឡើងនៅថ្ងៃទី​២០​ ខែសីហា​ ឆ្នាំ​២០២១​នេះ​ ដោយមានការចូលរួមពីលោអ៊ុន ចាន់ដា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជា ខេត្តកំពង់ចាម និងលោក ខ្លូត ផន អនុប្រធានគណៈប្រចាំការ គណបក្សខេត្ត និងលោក លោកស្រី សមាជិក សមាជិកា គណបក្សប្រជាជនកម្ពុជា ជាច្រើនរូបផងដែរ។

លោក​សម​ ពិសិដ្ឋ​ ប្រធាន​គណបក្សប្រជាជន​កម្ពុជា​ ស្រុកចំការលើ​​ថ្មី បានឡើងធ្វើការថ្លែង អំណរគុណចំពោះ​ ថ្នាក់ដឹកនាំដែលបានផ្តល់នូវជំនឿទុកចិត្តលេីរូបលោក ឲ្យទទួលមុខតំណែងជា ប្រធានគណបក្ស​ប្រជាជន​កម្ពុជា​ស្រុកចំការលើ​ ហើយលោក​ក៏​បានធ្វើការប្តេជ្ញាចិត្តថា នឹង អនុវត្តឲ្យបានខ្ជាប់ខ្ជួនតាមលក្ខន្តិកៈ និងបទបញ្ជាផ្ទៃក្នុងគណបក្ស សំដៅពង្រឹងធ្លុងសាមគ្គីភាព ឯកភាពផ្ទៃក្នុងគណបក្ស​ ឲ្យកាន់តែរឹងមាំ​ ទាំងខាងនយោបាយ សតិអារម្មណ៍ និងចាត់តាំង ដោយឈរលើគោលការណ៍ សមូហភាពដឹកនាំ បុគ្គលទទួលខុសត្រូវ ដើម្បីឈានឆ្ពោះទៅដណ្តើមជ័យជំនះគ្រប់ការបោះឆ្នោតជាបន្តបន្ទាប់។

លោកអ៊ុន​ ចាន់ដា ក៏ណែនាំដល់អាជ្ញាធរ​ស្រុក​ចំការលេីត្រូវយកចិតទុកដាក់ខ្ព​ល់​ លើផ្នែកសន្តិសុខសណ្តាប់ធ្នាប់ សាធារណៈ​ បន្តរួមគ្នាអនុវត្តគោលនយោបាយ ភូមិយុំ មានសុវត្ថិភាព អប់រំផ្សព្វផ្សាយ ច្បាប់ចរាចរផ្លូវគោក ​លប់បំបាត់ល្បែងសីសង​ និងគ្រឿងញៀន​ ជាពិសេស​​ត្រូវ​ផ្សព្វផ្សាយ​ឲ្យ​មាន​ការ​អនុវត្ត​វិធានការ​ ៣ការពារ​ ៣កុំ​ ដេីម្បីចៀសសផុត​ពី​ការ​ឆ្លង​រីករាល​ដាល​នៃ​ជំងឺ​កូវីដ​-១៩​៕SRP