ខេត្តសៀមរាប៖ការប្រមូលចំណូលពន្ធរបស់ពន្ធដារសម្រាប់ថវិកាជាតិ កើនជាង២២ភាគរយ នៅក្នុង២ខែដំបូង ឆ្នាំ២០២២នេះ។

ពន្ធដារបានអះអាងថារយៈពេល២ខែដំបូង ឆ្នាំ២០២២នេះ អគ្គនាយកដ្ឋានពន្ធដារប្រមូលពន្ធសម្រាប់ថវិកាជាតិបានចំនួន ២ ០៧៤.៦៦ ប៊ីលានរៀល ស្មើនឹងប្រមាណជា ៥១២.២៦ លានដុល្លារ កើនឡើង២២.៦៩% បើធៀបរយៈពេលដូចគ្នាឆ្នាំ២០២១។

អគ្គនាយកដ្ឋានពន្ធដារ លោកគង់ វិបុល បានឲ្យដឹងថាក្នុងខែកុម្ភៈ ឆ្នាំ២០២២ ចំណូលពីប្រភេទពន្ធសំខាន់ៗ ៥ ប្រភេទ បានបន្តរក្សាកំណើនឡើងគួរឱ្យកត់ សម្គាល់ធៀបនឹងខែកុម្ភៈ ឆ្នាំ២០២១ ក្នុងនោះ ពន្ធលើប្រាក់ចំណូលមានចំនួន ១៩០.១៥ ប៊ីលានរៀល (កើនឡើង ២៣.៦១ ប៊ីលានរៀល ស្មើនឹង ១៤.១៨%), អាករលើតម្លៃបន្ថែមមានចំនួន ២៥២.៧៨ ប៊ីលានរៀល (កើនឡើង ១៣.២៣ ប៊ីលានរៀល ស្មើនឹង ៥.៥២%), អាករពិសេសមានចំនួន ១០៥.៦៧ ប៊ីលានរៀល (កើនឡើង ១៥.៥០ ប៊ីលានរៀល ស្មើនឹង ១៧.១៩%), ពន្ធលើប្រាក់បៀវត្សមានចំនួន ៩៨.៤២ ប៊ីលានរៀល (កើនឡើង ១៨.៥១ ប៊ីលានរៀល ស្មើនឹង ២៣.១៧%), និង ពន្ធប្រថាប់ត្រាលើពន្ធប្រថាប់ត្រាលើការផ្ទេរកម្មសិទ្ធិអចលនទ្រព្យចំនួន ៦៣.២៣ប៊ីលានរៀល (កើនឡើង ៩.១៨ ប៊ីលានរៀល ស្មើនឹង ១៦.៩៨%)។

សូមបញ្ជាក់ថា លទ្ធផលប្រមូលចំណូលនេះ ត្រូវបានប្រកាសឡើងក្នុងកិច្ចប្រជុំបូកសរុបលទ្ធផលប្រមូលចំណូលពន្ធ ប្រចាំខែកុម្ភៈ ឆ្នាំ២០២២ ព្រមទាំងទិសដៅសម្រាប់អនុវត្តបន្ត ដែលរៀបចំតាមប្រព័ន្ធអនឡាញ ក្រោមវត្តមានលោកគង់ វិបុល អគ្គនាយកនៃអគ្គនាយកដ្ឋានពន្ធដារ នៅថ្ងៃចន្ទម្សិលមិញ៕SRP

ខេត្តរតនគិរី៖មានការលើកឡើងថានៅក្នុងទឹកដីខេត្តរតនគិរី សកម្មភាពដឹកជញ្ជូនឈើប្រណីត យកទៅលក់នៅប្រទេសវៀតណាមបានកើតមានយ៉ាងពេញបន្ទុក ប៉ុន្តែករណីនេះមិនត្រូវបានអាជ្ញាធរសមត្ថកិច្ចជំនាញពាក់ព័ន្ធធ្វើការទប់ស្កាត់បង្ក្រាបនោះទេ។ ប្រការដែលអាជ្ញាធរសមត្ថកិច្ចជំនាញពាក់ព័ន្ធមិនមានឆន្ទៈក្នុងការបង្ក្រាបបែបនេះ ត្រូវបានគេសង្ស័យថាទទួលបានផលប្រយោជន៍ពីឈ្មួញឈើ ឈ្មោះមករា តាមរបៀបពុករលួយ។

យោងតាមសេចក្ដីរាយការណ៍ពីខេត្តរតនគិរីបានដឹងថា ឈ្មោះឈើដ៏ធំប្រចាំខេត្តរតនគិរី ឈឈ្មោះលោកមករា បានប៉ាវផ្តាច់ក្នុងការដឹកជញ្ជូនឈើ ចេញពីខេត្តរតនគិរីទាំងយប់ទាំងថ្ងៃ យកទៅលក់នៅប្រទេសវៀតណាម តាមច្រកអូយ៉ាដាវ​ ដោយមានការគប់គិត
ពីសំណាក់ប្រធានច្រកនិងសមត្ថកិច្ចជំនាញពាក់ព័ន្ធប្រចាំការនៅទីនោះផងដែរ។

សេចក្ដីរាយការណ៍បានបន្តថា ឈ្មោះឈើមករា បានគប់គិតគ្នាជាមួយអាជ្ញាធរខេត្តជំនាញពាក់ព័ន្ធទាំងអស់ក្នុងខេត្ត ដើម្បីរូបគេរកស៊ីដឹកជញ្ជូនឈើឆ្លងដែនទៅប្រទេសវៀតណាម បានដោយរលូន។ ទោះបីសកម្មភាពដឹកជញ្ជូនឈើរបស់ឈ្មោះមករាធ្វើសកម្មភាពទាំងយប់ ទាំងថ្ងៃយ៉ាងគគ្រឹកគគ្រេងយ៉ាងនេះក្ដី ក៏អភិបាលខេត្តរតនគិរីមិនមានឆន្ទៈក្នុងការទប់ស្កាត់បង្រ្កាបឡើយ ពោលអភិបាលខេត្តរូបនេះរក្សាភាពស្ងប់ស្ងាត់ បណ្ដែតបណ្ដោយឱ្យមានសកម្មភាពដឹកជញ្ជូនឈើយ៉ាងអនាធិបតេយ្យបំផុត។

ពាក់ព័ន្ធនឹងការដឹកជញ្ជូនឈើ របស់មករាចេញទៅប្រទេសវៀតណាម ច្រកទ្វារអូរយ៉ាដាវ នេះ អង្គភាពសារព័ត៌មានសៀមរាបប៉ុស្ដិ៍ នៅពុំទាន់ទទួលបានការបំភ្លឺពីអាជ្ញាធរជំនាញពាក់ព័ន្ធនៅឡើយទេ៕SRP

ភ្នំពេញ៖សម្ដេចស ខេង បានថ្លែងថាបើទោះបីជាមានការខកខាន រៀបចំពិធីជួបជុំគ្នាដូចថ្ងៃនេះមួយរយៈធំ ដោយសារការឆ្លងរីករាលដាលជំងឺកូវីដ ប៉ុន្តែសម្ដេចមានក្ដីរីករាយបន្ទាប់ពីសង្កេតឃើញថា ក្រុមការងារយុវជនទាំង៣ខេត្ត ដោយមានការគាំទ្រពីថ្នាក់ដឹកនាំ និងរដ្ឋបាលថ្នាក់ក្រោមជាតិ បានខិតខំធ្វើសកម្មភាពជាច្រើនដើម្បីរួមចំណែកបម្រើជាតិ និងប្រជាជន ពិសេសនៅក្នុងស្ថានភាពដែលមានការប្រឈមនឹងការឆ្លងជំងឺកូវីដ-នេះ។

ក្នុងឱកាសអញ្ជើញជាអធិបតីពិធីសំណេះសំណាល ជាមួយថ្នាក់ដឹកនាំយុវជនខេត្តព្រៃវែង បាត់ដំបង និងបន្ទាយមានជ័យ
នៅរសៀលថ្ងៃចន្ទ ម្សិលមិញ សម្ដេចក្រឡាហោមស ខេង ឧបនាយរដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង និងបាត់ដំបង មានប្រសាសន៍យ៉ាងដូច្នេះ ក៏បានមានប្រសាសន៍ អំពីការដាក់ចេញវិធានការណ៍ ប្រកបដោយប្រសិទ្ធភាព ក្នុងការបង្ការទប់ស្កាត់ការឆ្លងរីករាលដាល ជំងឺកូវីដ-១៩ របស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចតេជោនាយករដ្ឋមន្ត្រី ពិសេសជោគជ័យ នៃការចាក់វ៉ាក់សាំងបង្ការជំងឺកូវីដ ដែលបង្កើតបានភាពសាំសហគមន៍ ធ្វើឱ្យប្រទេសកម្ពុជា អាចឈានដល់ការបើកសកម្មភាពសេដ្ឋកិច្ច និងសង្គមឡើងវិញទៅតាមគន្លងប្រក្តីភាពថ្មី និងធ្វើឱ្យមានការកោតសរសើរព្រមទាំងវាយតម្លៃខ្ពស់ពីសហគមន៍អន្តរជាតិ។

សម្ដេច ក៏បានគូសបញ្ជាក់អំពីដំណើរការបោះឆ្នោតនៅកម្ពុជា ដំណើរការកែទម្រង់រដ្ឋបាលថ្នាក់ក្រោមជាតិនៅកម្ពុជាតាមយន្តការវិមជ្ឈការ និងវិសហមជ្ឈការ ដើម្បីជំរុញការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ពិសេសការផ្ទេរមុខងារ ធានធាន សិទ្ធិអំណាច និងការទទួលខុសត្រូវពីថ្នាក់ជាតិ ទៅថ្នាក់ក្រោមជាតិផងដែរ៕SRP

ខេត្តសៀមរាប៖តាមសេចក្ដីរាយការណ៍ព័ត៌មានបឋមបានឲ្យដឹងថា នារីម្នាក់បានបើករថយន្តបុកបង្គោលភ្លើង ទៅមុខលែងរួច បណ្ដាលអោយរថយន្តខូចខាតផ្នែកខាងមុខយ៉ាងដំណំ។

ហេតុការណ៍បានកើតឡើងនៅផ្លូវក្រវ៉ាត់ក្រុងសៀមរាប នៅព្រឹកថ្ងៃទី១៥ ខែមីនាឆ្នាំ ២០២២ នេះ វេលាម៉ោង៦និង០០នាទី។

ប្រភពពីសមត្ថកិច្ចនៅកន្លែងកើតហេតុបានឲ្យដឹងថា រថយន្តដែលបុកបង្គោលភ្លើងម៉ាកព្រូស ពណ៌ស ពាក់ស្លាកលេខភ្នំពេញ ២BF ២០៣៩ ទិសដៅពីជើងទៅត្បូង មកដល់ចំណុចខាងលើក៏បានជ្រុលទៅបុកបង្គោលភ្លើងតែម្ដង។

សមត្ថកិច្ចបានបន្តថានារីរងគ្រោះមានឈ្មោះ ធឿន វណ្ណា អាយុ២៥ មានទីលំនៅ ភូមិអូរុន ឃុំខ្ពបតាងួន សុខស្ទឹងត្រង់ ខេត្តកំពង់ចាម។

ពាក់ព័ន្ធទៅករណីគ្រោះចរាចរណ៍នេះ សមត្ថកិច្ចនៅពុំទាន់បញ្ជាក់អំពីមូលហេតុច្បាស់លាស់នៅឡើយទេ៕SRP

ខេត្តកំពង់ចាម​៖លោក​ អ៊ុន​ ចាន់ដាអភិបាលខេត្តកំពង់ចាម​ បានថ្លែងថាមានតែការចាក់វ៉ាក់សាំងទេ ទើបអាចការពារអាយុជីវិតយេីង ឲ្យរួចផុតពីសេចក្តីស្លាប់​បាន។ លោកមានប្រសាសន៍ថា ក្នុង​ដំណាក់កាល​ចុងក្រោយ​នេះ​ គឺ​មាន​ការ​ផ្ទុះឡេីងនូវ​រលក​ថ្មី​ នៃវីរុស​ប្រភេទ​អូមេក្រុង​ ដែលឆ្លង​ខ្លាំង​ ប៉ុន្តែ​ពុំមាន​អ្នក​ស្លាប់​បាត់បង់​ជីវិត​ ព្រោះ​ប្រជាពលរដ្ឋ​យើង​បាន​ចាក់​វ៉ាក់សាំង​ការពារ​ជម្ងឺ​កូវីដ​-១៩​ ដូច្នេះ​សូមឲ្យ​បងប្អូន​ប្រជាពលរដ្ឋ​ ដែល​មិន​ទាន់​បាន​ចាក់​វ៉ាក់សាំង​ដូស​មូលដ្ឋាន​ ឬ​ដូស​ជម្រុញ​គ្រប់​ចំនួន​​ទេនោះ សូម​អញ្ជើញ​មក​ទទួល​ឲ្យ​បាន​គ្រប់ៗគ្នា​​។

ការ​ថ្លែង​បែប​នេះ​ក្នុង​ឱកាស​ដឹកនាំ​ក្រុមគ្រូពេទ្យស្ម័គ្រចិត្ត​សាខា​សមាគម​សិស្ស​ និស្សិត​បញ្ញវន្ត​ក្មេង​វត្ត​ ខេត្តកំពង់ចាម​ ចុះពិនិត្យ​ និង​ព្យាបាល​ជម្ងឺ​ជូនប្រជាពលរដ្ឋ​ ដោយ​ឥតគិតថ្លៃ​ នៅ​ភូមិ​ឡឥដ្ឋ​ សង្កាត់​បឹងកុក​ ក្រុងកំពង់ចាម​ នៅថ្ងៃ​ចន្ទនេះ។

លោក​ អ៊ុន​ ចាន់ដា​ បាន​ថ្លែងថា​ ​ក្រុមគ្រូពេទ្យស្ម័គ្រចិត្ត​សាខា​សមាគម​សិស្ស​ និស្សិត​បញ្ញវន្ត​ក្មេង​វត្ត​ខេត្តកំពង់ចាម​ ចំនួន​៣៧នាក់​ ដោយ​មាន​ការ​គាំទ្រ​ពី​លោក​ ​ហ៊ុន​ ម៉ានិត​​ ចុះ​ពិនិត្យ​ ព្យាបាល​ជម្ងឺ​ ជូន​ប្រជាពលរដ្ឋ​ ដោយ​ឥតគិតថ្លៃ​ ប្រមាណ​ជា​៤០០នាក់​ ដេីម្បី​ជាការ​ចូលរួម​កាត់បន្ថយ​ ការ​ចំណាយ​របស់​បងប្អូន​ នៅ​ពេល​ដែល​មាន​ជម្ងឺ​ឈឺថ្កាត់​ ដោយមិន​ចាំបាច់​ចំណាយ​ពេលវេលា​ និង​ថវិកា​​ទៅ​មន្ទីរពេទ្យ​រដ្ឋ​ និង​ឃ្លីនីច​​​ឯកជន​ ពោលគឺការ​ពិនិត្យ​ព្យាបាលដោយមិនប្រកាន់បក្សពួក សាសនា ឬនិន្នាការនយោបាយ​អ្វី​ឡេីយ​។

លោក​ អ៊ុន​ ចាន់ដា​ ក៏បាន​លេីកឡេីង​ថា​ យេីង​បាន​ជម្រុញ​ការ​ស្ថាបនា​ផ្លូវ​ និង​ប្រព័ន្ធ​លូ​រំដោះ​ទឹក​ភ្លៀង​ជាច្រើន​ខ្សែ​ក្នុង​សង្កាត់​បឹងកុក​ ក្នុង​នោះ​មាន​ការ​ស្ថាបនា​ផ្លូវ​បេតុង​អាមេ​ និង​ប្រព័ន្ធ​លូ​ ​នៅ​ភូមិ​បឹងកុក​២​ ព្រមទាំង​​ការ​ស្ថាបនា​ផ្លូវ​បេតុង​អាមេ​ជាច្រើន​កំណាត់​នៅ​ភូមិ​ថ្មគោល​ និង​ភូមិ​ឡឥដ្ឋ​ ​ស្រប​គ្នា​ក្នុង​ឱកាស​ចូល​ឆ្នាំ​ខ្មែរ​ ប្រពៃណី​ជាតិ​ កាន់តែ​ខិត​មក​ជិត​ ដែលជា​ការ​ផ្ដល់​ភាព​ងាយស្រួល​សម្រាប់​បងប្អូន​ប្រជាពលរដ្ឋ​យើង​ លេង​ល្បែង​ប្រជាប្រិយ​កម្សាន្ត​នៅ​មុខ​ផ្ទះ​ក៏​បាន​ ​ឬ​ធ្វើ​ដំណើរ​អញ្ជេីញ​ទៅ​វត្ត​ ក៏ស្រួល​ ព្រោះ​ផ្លូវ​បាន​ធ្វើ​ស្អាត​អស់​ហើយ​៕​SRP

ខេត្តសៀមរាប៖បុរសម្នាក់ត្រូវបានសមត្ថកិច្ចរាយការណ៍ថាបានស្លាប់បាត់បង់ជីវិត ដោយសារ រាលកៃផ្ទុះកាំភ្លើងកែច្នៃត្រូវចំដើមទ្រូង។

សមត្ថកិច្ចខេត្តសៀមរាបបានថ្លែងប្រាប់សៀមរាបប៉ុស្ដិ៍ ថា ហេតុការណ៍បានកើតឡើងនៅវេលាម៉ោង ០៨និង៣០ នាទីយប់ ថ្ងៃទី១៣ ខែមីនា ឆ្នាំ២០២២ នៅចំណុច អាង១០០ភ្នំចង្ក្រានរយ ស្រុកវ៉ារិន ខេត្តសៀមរាប។

ជនរងគ្រោះ បឿន វ៉ុន ភេទប្រុស អាយុ៣៧ឆ្នាំ ទីលំនៅបច្ចុប្បន្ន ភូមិលាបចាស់ ឃុំពាក់ស្នែង ស្រុកអង្គរធំ។

របាយការណ៍របស់សមត្ថកិច្ចបានឲ្យដឹងថាតាមការឆ្លើយបំភ្លឺ ពីឈ្មោះ ណែម ស៊ី ភេទប្រុស អាយុ៣២ឆ្នាំ រស់នៅភូមិលាបចាស់ ឃុំពាក់ស្នែង ស្រុកអង្គរធំ បានឆ្លើយថា ព្រឹក ខណ:ខ្លួននៅអង្គុយលេងនៅផ្ទះ មានឈ្មោះបឿន វ៉ុន (ជនរងគ្រោះ)បានមកបបួលខ្លួន និងឈ្មោះ អឿម អិត ភេទប្រុស រស់នៅភូមិឃុំជាមួយគ្នា ដើម្បីទៅយកឃ្មុំនៅទីតាំងកន្លែងកើតហេតុ ដោយជិះម៉ូតូចំនួន២គ្រឿង ចេញទៅ ហើយយកម៉ូតូទៅផ្ញើរទុកនៅជើងភ្នំអំពិល ផ្ទះរបស់ឈ្មោះ ញ៉ ភេទប្រុស ហើយធ្វើការផឹកស៊ីនៅទីនោះ រហូតដល់ម៉ង១៦.០០នាទី ទើបបន្តដំណើរឡើងភ្នំបន្ត ដើរបានប្រហែល៥០០ម៉ែត្រ ឈ្មោះ បឿន វ៉ុន (ជនរងគ្រោះ) ចូលយកកាំភ្លើងកែច្នៃលាក់ទុកនៅទីនោះ រួចបន្តដំណើរបន្ត បានមួយសន្ទុះក៏បានបាញ់បានមាន់ព្រៃ១ ហើយបន្តដំណើរទៅមុខទៀត ក៏បានឃើញ ម្ជូរទ្រមូង ក៏បានប្រាប់អោយជនរងគ្រោះបេះ។ ចំណែកខ្លួនធ្វើដំណើរបន្ត បានប្រហែល៣០ម៉ែត្រក៏បានឮសំឡេងផ្ទុះហើយជនរងគ្រោះស្រែកអោយជួយ និងបានប្រាប់អោយជួយដកឆ្នុកចេញពីដើមទ្រូងអោយផង ភ្លាមនោះក៏បាត់សំឡេងនិងលេងកំរើកស្លាប់បាត់ទៅហើយ ទើបពួកខ្ញុំនាំគ្នាត្រឡប់មកភូមិវិញដើម្បីមកប្រាប់បងប្អូនទៅយកសាកសព។ បច្ចុប្បន្ន សមត្ថកិច្ចបានប្រគល់ជនរងគ្រោះ ជូនគ្រួសារដើម្បីធ្វើពិធីបុណ្យតាមប្រពៃណី។ ចំណែក ឈ្មោះណែម ស៊ី និងឈ្មោះ អឿន អិត បានឃាត់ខ្លួនដើម្បីធ្វើការសាកសួរស្រាវជ្រាវបន្ត៕SRP

ភ្នំពេញ​៖លោកមាស​ សុភ័ណ្ឌ​ អ្នកនាំពាក្យក្រសួងព័ត៌មាន​ បានថ្លែងថា​ ពាក់ព័ន្ធនឹង​ទៅនឹងការថ្កោលទោស​ របស់សមាគមសារព័ត៌មាន​ខេមបូចា​ បានចោទប្រកាន់ថា អ្នកសារព័ត៌មាន​VOD ២រូប​ ត្រូវបានគំរាមកំហែងដោយកម្លាំងអាជ្ញាធរ មិនឲ្យថតរូប និងបង្ខំឲ្យលុបរូបភាព ក្នុងកំឡុងពេលយកព័ត៌មានអំពីការបន្តធ្វើកូដកម្មនៅណាហ្គាវើលដ៍​ ជារឿង​មិនពិតដូច​ការចោទប្រកាន់​នោះ​ទេ។

លោក មាស​ សុភ័ណ្ឌ​ បានថ្លែងបន្តថា​ បេីតាមការរាយការណ៍ របស់មន្ទីរ​ព័ត៌មាន​រាជធានីភ្នំពេញ​ ដោយបានបញ្ជាក់ជាមួយលោកស្នងការរងទទួលបន្ទុកកិច្ចការ នៅទីតាំងនោះបានបញ្ជាក់ថា​ នៅពេលដែលសមត្ថកិច្ចកំពុងអនុវត្តតួនាទី​ និងភារកិច្ចរបស់ខ្លួននៅទីតាំងនោះ​ អ្នកការសែតនោះ​ បានចូលទៅក្នុងក្រុមបាតុករ​ ហេីយ​សមត្ថកិច្ចស្មានថា ពួកគាត់ជាក្រុមបាតុករ​ ដែល​សមត្ថកិច្ច​តម្រូវ​អោយឡេីងរថយន្ត ដេីម្បីទៅធ្វេីចត្តាឡីស័ក​ ប៉ុន្តែ​នៅពេលលោកស្នងការរងចុះទៅពិនិត្យ​ និងសួរនាំទេីបដឹងថា ជាអ្នកសារ​ព័ត៌មាន​ ហេីយក៏មិនបានតម្រូវអោយឡេីងរថយន្តដេីម្បីធ្វេីចត្តាឡីស័កនោះទេ។ សមត្ថកិច្ច​ពុំបានគំរាមកំហែង អោយលុបរូបភាពនោះដែរ។ កាលដែលអ្នកកាសែត​នោះ​ លេីកឡេីងថា​សមត្ថកិច្ច​គំរាមកំហែង​ អោយលុបរូបភាពនោះ​ វាជារឿងមិនពិត​នោះទេ​ នេះជាការ​ចោទប្រកាន់​របស់​ពួក​គាត់​មកលេីសមត្ថកិច្ចតែប៉ុណ្ណោះ។ ដូច្នេះ​សមត្ថកិច្ច​ មិនបាន​ប្រព្រឹត្ត​ដូចការចោទប្រកាន់​ខាងលេី​នេះនោះទេ ហេីយករណីនេះ​ក៏មិនអាចចោទ​ប្រកាន់​សមត្ថកិច្ច​ថា​ បាន​គំរាម​កំហែង​ ឬធ្វេី​ទុក្ខ​បុក​ម្នេញ​ដល់អ្នកកាសែតនោះដែរ។

អ្នកនាំពាក្យក្រសួងព័ត៌មាន​ បានបញ្ជាក់ថា​ ការអនុវត្តសិទ្ធិសេរី​ភាព​ និងការអនុវត្តតួនាទីភារកិច្ចរបស់អ្នកសារ​ព័ត៌មាន​ ត្រូវបានធានាការពារដោយច្បាប់​ នឹង​លិខិត​បទដ្ឋានគតិយុត្តិ​ជាធរមាន​។ ដូច្នេះលោកសូម​លេី​កទឹកចិត្តដល់អ្នកសារ​ព័ត៌មាន​ ដែលកំពុង​ប្រកបវិជ្ជាជីវៈ​សារព័ត៌មាន​ ទាំងអស់នៅកម្ពុជា​ សូមប្រេីសិទ្ធិនេះអោយបានត្រឹមត្រូវតាមច្បាប់​ និងការទទួលខុសត្រូវខ្ពស់​ ព្រមទាំងគោរពអោយបានជានិច្ចនូវក្រម​សីលធម៌​វិជ្ជាជីវៈ​ សារព័ត៌មាន​ និងមិនគួរគប្បីប្រេីប្រាស់​សិទ្ធិ​នេះ​ ទៅបំពានដល់សិទ្ធិ​ និងតួនាទីភារកិច្ចរបស់​អ្នក​ដទៃនោះឡេីយ​ និងក៏សូម​អំពាវនាវ​ផងដែរ សូម​អោយ​អ្នក​សារព័ត៌មាន​ និង​ភាគី​ពាក់ព័ន្ធ​ទាំងអស់​បន្តពង្រឹង​នូវ​កិច្ច​សហការ​ល្អ​ និងឈរលេី​ស្មារតី​ខ្ពស់​ក្នុងការ គោរព​សិទ្ធិ​គ្នាទៅវិញទៅមក៕​SRP

ខេត្តកំពង់ចាម​៖លោក​​ អ៊ុន​ ចាន់ដា​ បានអំណរគុណ​ចំពោះ​ក្រុម​គ្រូពេទ្យ​ស្ម័គ្រចិត្ត​របស់​ លោក​ ហ៊ុន​ ម៉ានី​ ដែលជា​គ្រូពេទ្យ​​មាន​ជំនាញ​បទពិសោធន៍​ច្បាស់លាស់​ ទទួល​បានការ​សិក្សា​នៅឯ​បរទេស​​ ហើយ​បានលះបង់​ពេល​វេលា​ ចុះ​ជួយ​ពិនិត្យ​ ​និង​ព្យាបាល​ជម្ងឺ​ ជូន​បងប្អូន​ប្រជាពលរដ្ឋ​ ដោយ​ឥតគិតថ្លៃ​ និង​​មិន​គិត​​ពី​ការ​នឿយហត់ ​កើតចេញពីស្មារតីមនុស្សធម៌សុទ្ធសាធ ស្តែងចេញពីសេចក្តីស្រឡាញ់​ ក្នុងនាមឈាមជ័រខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ​ ពោលគឺការ​ពិនិត្យ​ព្យាបាលមិនប្រកាន់បក្សពួក សាសនា ឬនិន្នាការនយោបាយ​អ្វីឡើយ។​
ការ​ថ្លែង​បែប​នេះ​ក្នុង​ឱកាស​ដឹកនាំ​ក្រុមគ្រូពេទ្យស្ម័គ្រចិត្តរបស់​ លោក​ ហ៊ុន ម៉ានី ជាង៣០០នាក់​ ចុះពិនិត្យ​ និង​ព្យាបាល​ជម្ងឺ​ជូនដល់ប្រជាពលរដ្ឋ​ដោយ​ឥតគិតថ្លៃ​ ជាង​១០០០នាក់​ នៅវិទ្យាល័យ ព្រែកដំបូក​ ស្ថិត​ក្នុង​ឃុំ​ព្រែកដំបូក​ ស្រុកស្រីសន្ធរ​ ខេត្តកំពង់ចាម​ នៅអាទិត្យនេះ។

លោក​ អ៊ុន​ ចាន់ដា​ អភិបាលខេត្តកំពង់ចាម​ បានលេីក​ឡើង​​ថា​ បេី​ទោះបីជា​មន្ទីរពេទ្យ​បង្អែក​ និង​មណ្ឌល​សុខភាព​ របស់​រដ្ឋ​មាននៅ​គ្រប់​មូលដ្ឋាន​ ប៉ុន្តែ​ការ​ពិនិត្យ​ ​និងព្យាបាល​ជូនប្រជាពលរដ្ឋ​ នៅតែមិនទាន់​តាម​តម្រូវការ​នៅឡើយទេ​ ដូច្នេះ​ទើប​មានការ​ស្នើសុំ​ទៅលោក ហ៊ុន​ ម៉ានី​ បុត្រា​​ សម្តេច​តេជោ​ ហ៊ុន​ សែន​ ដេីម្បី​បញ្ជួន​ក្រុម​គ្រូពេទ្យ​ស្ម័គ្រចិត្ត​ ចុះមកពិនិត្យ និងព្យាបាល​ជម្ងឺ​ ជូន​បងប្អូន​ប្រជាពលរដ្ឋ​ ដល់​មូលដ្ឋាន​​​នាឱកាសនេះ ក្នុង​គោលបំណង​ដើម្បី​ចូល​រួមចំណែក​​ទ្រទ្រង់​ដល់​ជីវភាព​ក្នុង​គ្រួសារ​ពុកម៉ែ​​បងប្អូន ដោយ​មិន​ត្រូវ​ចំណាយ​ពេល​វេលា​ និង​ថវិកា​ទៅ​ពិនិត្យ​ និង​ព្យាបាល​ជម្ងឺ​ ​នៅ​ឯទី​ឆ្ងាយ​ៗ​​ នោះ​ឡើយ​។

អភិបាលខេត្ត​ ក៏បាន​អំពាវនាវ​ដល់​បងប្អូន​ប្រជាពលរដ្ឋ​ ឲ្យ​បន្ត​ការ​ប្រុងប្រយ័ត្ន​ខ្ពស់​ចំពោះ​ការ​ឆ្លង​រីករាល​ដាល​នៃ​ជំងឺ​កូវីដ​-១៩​ បម្លែង​ថ្មី​ ជាពិសេស​ប្រភេទ​អូមីក្រុង​ គឺ​ត្រូវ​អនុវត្ត​ឲ្យ​បាន​ខ្ជាប់ខ្ជួន​នូវ​វិធានការ​ ៣ការពារ​ ៣កុំ​ របស់​ប្រមុខ​រាជរដ្ឋាភិបាល​កម្ពុជា​ សម្ដេចតេជោ​ ហ៊ុន​ សែន​ ក៏ដូចជា​វិធានការ​នានា​របស់​ក្រសួង​សុខាភិបាល​ ព្រមជាមួយ​ការចាក់​វ៉ាក់សាំង​ដូស​មូលដ្ឋាន​ និង​ដូស​ជម្រុញ​ ​ឲ្យ​បាន​គ្រប់​ៗគ្នា​ផងដែរ​៕SRP

ខេត្តព្រះសីហនុ៖ស្នងការនគរបាលខេត្តព្រះសីហនុ​ លោកជួន​ ណារិន​ បានធ្វេីការបដិសេធថា​ មិនមានករណីបូមយកឈាម​ និងវះយកសរីរាង្គនៅខេត្តព្រះសីហនុ​ ដូចជាការផ្សព្វផ្សាយព័ត៌មានរបស់ថៃនោះទេ។ ហេីយនេះ​ គឺជាព័ត៌មានប្រឌិតធ្វេីឲ្យប៉ះពាល់សណ្តាប់ធ្នាប់ប្រទេសកម្ពុជា។

លោកជួន​ ណារិន​ បានបញ្ជាក់ប្រាប់វិទ្យុបាយ័ននៅថ្ងៃទី១៣​ ខែមីនានេះថា​ ” មិនមានករណីវះឬបូមឈាមទេ​ !​ ពេលនេះទើបដឹងថា​ បុគ្កលមួយចំនួនតូចកំពុងវាយប្រហារនិងបំពុលព័ត៌មានមិនពិតធ្វើឲប៉ះពាល់សណ្ដាប់ធ្នាប់ប្រទេសកម្ពុជា។ ខ្ញុំមិនយល់ថា​ ពួកគាត់មានចេតនាបែបណាបានជាប្រឌិតរឿងមិនពិតបែបនេះ”។

ពាក់ព័ន្ធទៅការបីខាងលើនេះ អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិ កម្ពុជាបានចេញសេចក្តីបំភ្លឺផងដែរនៅថ្ងៃទី ១៣ ខែមិនា ឆ្នាំ២០២២នេះ។

អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោកជុំ សុន្ទរី បានបញ្ជាក់ថាពាក់ព័ន្ឋនឹងព័ត៌មានចុះផ្សាយក្នុង Thai Examiner ថ្ងៃទី ១២ ខែមីនា ឆ្នាំ២០២២ អំពីករណីមានស្រ្តីជនជាតិថៃម្នាក់បានអះអាងថាខ្លួនបានប្រឈមនឹងគ្រោះថា្នក់នៃការជួញដូរសរីរាង្គនៅកម្ពុជា ខ្ញុំសូមធ្វើការបំភ្លឺដូចខាងក្រោម:

១. អាជ្ញាធរមានសមត្ថកិច្ចខេត្តព្រះសីហនុ បានប្រកាស បដិសេធ រួចហើយថានោះគឺជាការលើកឡើងដោយគ្មានមូលដ្ឋានត្រឹមត្រូវពិតប្រាកដ ។

២. ទន្ទឹមនឹងនេះ ស្ថានទូតកម្ពុជាប្រចាំនៅប្រទេសថៃ ក៏បានទាក់ទងជាមួយអាជ្ញាធរមានសមត្ថកិច្ចថៃ ស្វែងរកការបញ្ជាក់លើព័ត៌មាននេះ តែរហូតមកដល់ ពេលនេះ (ព្រឹកថ្ងៃទី១៣ ខែមីនា) ពុំទាន់ទទួលបានការ បញ្ជាក់ណាមួយ ថានេះជាករណីដែលបានកើតមានឡើងនៅកម្ពុជា ដូចព័ត៌មានដែលបានផ្សាយនោះឡើយ។ ស្ថានទូតកំពុងបន្តទាក់ទងជាមួយអាជ្ញាធរមានសមត្ថកិច្ចថៃ រកព័ត៌មានបន្ថែមទៀត៕SRP

ខេត្តកំពត៖ស្នងការប៉ូលិសខេត្តកំពតបានឲ្យដឹងថា យ៉ាងហោចណាស់មនុស្សចំនួន ៩ នាក់ត្រូវបានចាប់ខ្លួនករណីចាប់សត្វឆ្កែ យកទៅសម្លាប់ដើម្បីធ្វើម្ហូប។ ការចាប់ខ្លួនមនុស្សទាំង ៩នាក់ធ្វើឡើងកាលពីថ្ងៃទី១១ ខែមីនា ឆ្នាំ២០២២ ក្រោយចាប់សត្វឆ្កែ Husky ចំនួនបីក្បាលទាំងមេទាំងកូន យកទៅធ្វើស៊ី។

ស្នងការនគរបាលខេត្តកំពត លោកម៉ៅ ច័ន្ទមធុរិទ្ធ បានប្រាប់អ្នកសារព័ត៌មានថា ចំពោះករណីនេះ សមត្ថកិច្ចបានឃាត់ខ្លួនជនសង្ស័យចំនួន ៩នាក់ ដើម្បីសាកសួរពាក់ព័ន្ធករណីចាប់សត្វឆ្កែយកទៅសម្លាប់ធ្វើម្ហូប។ ម្ចាស់ឆ្កែទាំងបីក្បាលឈ្មោះ លី ធីឌីន ភេទស្រី អាយុ ៦២ឆ្នាំ នៅភូមិស្វាយធំ ឃុំគ្រាងអំពិល សង្កាត់កំពង់បាយ ខេត្តកំពត។

ការចាប់ខ្លួននេះ បានធ្វើឡើងបន្ទាប់ពីបុរសជាម្ចាស់ឆ្កែបានស្រែកទ្រហោយំយ៉ាងខ្លាំង បន្ទាប់ពីបានឃើទសត្វឆ្កែជាទីស្រឡាញ់របស់គាត់ត្រូវបានក្រុមកម្មករសំណង់មួយក្រុម នៅក្នុងភូមិស្វាយធំ ឃុំគ្រាងអំពិល សង្កាត់កំពង់បាយ ខេត្តកំពត សម្លាប់និងកាប់ជាកង់ៗ ដើម្បីធ្វើម្ហូបក្លែមជាមួយស្រា។

សូមជម្រាបថារឿងរ៉ាវមួយនេះ បានធ្វើឲ្យផ្ទុះកក្រើកនៅលើបណ្តាញសង្គម និងមានការប្រតិកម្មរិះគន់យ៉ាងខ្លាំងទៅលើក្រុមកម្មករដែលចាប់សត្វឆ្កែ Husky ចំនួនបីក្បាលទាំងមេទាំងកូនដែលជាទីស្រឡាញ់យកទៅធ្វើស៊ី។ បញ្ជាក់ករណីនេះ កើតឡើងនៅភូមិស្វាយធំ សង្កាត់ក្រាំងអំពិល ក្រុងកំពត ខេត្តកំពត៕SRP

ខេត្តកំពង់ចាម៖ថ្លែងប្រាប់ប្រជាពលរដ្ឋក្នុងឱកាស អញ្ជើញ ក្នុងពិធីបុណ្យពុទ្ធាភិសេកព្រះពុទ្ធរូបចំនួន ១២៨អង្គ ឆ្លងពុទ្ធិកបណ្ណាល័យ និងសមិទ្ធផលនានាក្នុងវត្តផ្ទះកណ្តាល ស្ថិតក្នុងឃុំផ្ទះកណ្តាល ស្រុកស្រីសន្ធរ នៅថ្ងៃសៅរ៍នេះ លោកអ៊ុន ចាន់ដា អភិបាលខេត្ត បានស្នើឱ្យបងប្អូនប្រជាពលរដ្ឋ កុំចាញ់កលល្បិចភូតកុហកបោកប្រាស់ ពីសំណាក់ជនអគតិមួយក្តាប់តូច ដែលតែងតែបង្កភាពវឹកវរដល់សង្គមជាតិ។

លោកក៏បានស្នើឲ្យបន្តចូលរួមគាំទ្រ និងជឿជាក់លើរាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ដោយបានចូលរួមក្នុងការថែរក្សាសន្តិភាព និងស្ថិរភាពរបស់ប្រទេសជាតិយើង ជាពិសេសតាមរយៈការជ្រើសរើសមេដឹកនាំត្រឹមត្រូវ គឺ សម្តេចតេជោនាយករដ្ឋមន្ត្រី ដែលជាមេដឹកនាំប្រកបដោយធម៌, យុត្តិធម៌, គុណធម៌, មិនរត់ចោលប្រជាពលរដ្ឋ ក្នុងកាលៈទេសៈលំបាក និងមានការទទួលខុសត្រូវម៉ឺងម៉ាត់ចំពោះជោគវាសនាអនាគតជាតិ និងប្រជាជន និងសូមបន្តប្រកាន់យកការសម្រេចចិត្តដ៏ត្រឹមត្រូវបែបនេះនៅក្នុងឆ្នាំ២០២២ និង២០២៣ ក៏ដូចជាពេលខាងមុខៗទៀត ដើម្បីអនាគតប្រទេសជាតិយើង។ ហើយយើងទាំងអស់គ្នាសូមចូលគាំទ្រចំពោះ ឯកឧត្តមបណ្ឌិត ហ៊ុន ម៉ាណែត សម្រាប់បេក្ខភាពនាយករដ្ឋមន្ត្រីនៃព្រះរាជាណាចក្រកម្ពុជា នាពេលអនាគត។

អភិបាលខេត្ត ក៏បានសម្តែងអារម្មណ៍អបអរសាទរ ចំពោះសមិទ្ធផលនានាជាច្រើនទាំងផ្នែកពុទ្ធចក្រ និងអាណាចក្រ ដែលត្រូវបានកសាងឡើងជាបន្តបន្ទាប់ នៅក្នុងមូលដ្ឋានស្រុកស្រីសន្ធរ ក៏ដូចជាខេត្តកំពង់ចាម និងក្នុងក្របខណ្ឌទូទាំងប្រទេស ដែលស្របទៅនឹងស្ថានភាពរួមនៃការអភិវឌ្ឍរីកចម្រើនរបស់ប្រទេសជាតិទាំងមូល ជាពិសេសជីវភាពរស់នៅកាន់តែល្អប្រសើររបស់ប្រជាពលរដ្ឋយើង ក្រោមការដឹកនាំនាំដ៏ភ្លឺស្វាងរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី៕SRP

ខេត្តក្រចេះ៖កម្លាំងគយការិយាល័យស្រាវជ្រាវ និងបង្ក្រាបអំពើរត់ពន្ធតំបន់៦ សហការជាមួយមន្ត្រីគយ និងរដ្ឋាករ ខេត្តក្រចេះ និងអាអាវុធហត្ថបានចុះបង្ក្រាបបានរថយន្តអត់ពន្ធបានចំនួន០៦គ្រឿង។

ការបង្ក្រាបធ្វើឡើងនៅថ្ងៃសុក្រ ទី១១ ខែមីនា ម្សិលមិញ នៅក្នុងភូមិសាស្រ្តខេត្តក្រចេះ។
ការចុះបង្ក្រាបយោងតាមការណែនាំរបស់លោក គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លើករណីផុតសុពលភាពនៃការបន្ធូរបន្ថយប្រាក់ពន្ធនាំចូល១០% ចំពោះរថយន្តចង្កូតឆ្វេង ដែលមានស្រាប់នៅក្នុងស្រុក។

សូមជម្រាបថារថយន្តស៊េរីទំនើបអត់ពន្ធទាំង៦គ្រឿងរួមមាន៖
១៖ រថយន្តម៉ាក Lexus 570 ចង្កូតឆ្វេង ពណ៌ស ផលិតឆ្នាំ២០១៤ ពាក់ស្លាកលេខ ភ្នំពេញ 2BA-4030។
២៖ រថយន្តម៉ាក Lexus Rx 350 ចង្កូតឆ្វេង ពណ៌ស ផលិតឆ្នាំ២០១១ ពាក់ស្លាកលេខ ភ្នំពេញ 2BA-8255។
៣៖ រថយន្តម៉ាក Lexus Rx 350 ចង្កូតឆ្វេង ពណ៌ស ផលិតឆ្នាំ២០១២ ពាក់ស្លាកលេខ ភ្នំពេញ 2AM-2848។
៤៖ រថយន្តម៉ាក TUNDRA ចង្កូតឆ្វេង ពណ៌ស ផលិតឆ្នាំ២០១៤ ពាក់ស្លាកលេខ ក្រចេះ 2C-7707។
៥៖ រថយន្តម៉ាក Lexus Rx 400H ចង្កូតឆ្វេង ពណ៌ស ផលិតឆ្នាំ២០០៦ ពាក់ស្លាកលេខ ភ្នំពេញ 2AI-1501។
៦៖ រថយន្តម៉ាក Lexus HS 250H ចង្កូតឆ្វេង ពណ៌ទឹកប្រាក់ ផលិតឆ្នាំ២០១០ ពាក់ស្លាកលេខ ខម2-2812។

បច្ចុប្បន្ន រថយន្តទាំងអស់បាននាំយកមករក្សាទុកជាបណ្តោះអាសន្ន នៅទីតាំងឈរជើង របស់គយការិយាល័យស្រាវជ្រាវ និងបង្ក្រាបអំពើរត់ពន្ធ តំបន់៦ ពញាក្រែក ដើម្បីធ្វើកំណត់ហេតុល្មើសច្បាប់គយ ទៅតាមនីតិវិធី៕srp