ខេត្តកំពង់ចាម៖ពលរដ្ឋចំនួន៣ស្រុកនៅខេត្តកំពង់ចាម ស្រុកបាធាយ​ ជេីងព្រៃ​ និង​ស្រុក​កងមាស​ ទទួលបានប្រភពទឹកជូន​ពលរដ្ឋសម្រាប់ប្រើប្រាស់ស្រោចស្រព កសិផល។

ការទទួលបាននេះបន្ទាប់ពីលោក អ៊ុន ចាន់​ដា អភិបាលខេត្តកំពង់ចាម​ ចុះ​ដោះស្រាយ​បញ្ហា​កកស្ទះ​ ដេីម្បី​បន្តការសាងសង់​សំណង់​​ទំនប់​បង្ហៀរ ស្ថិតនៅ​ក្នុងភូមិ​ស្ទឹង​ឆ្វេង ឃុំ​ច្បារអំពៅ ស្រុក​បាធាយ នៅថ្ងៃសុក្រមម្សិលមិញ។

បើតាម​លោក យុទ្ធ ចាន់​ផល មេឃុំច្បារអំពៅ បាន​ប្រាប់​ឲ្យ​ដឹងថា សំណង់​បង្ហៀរ (​ទ្វារ​២) លើ​ស្ទឹង​ឆ្វេង សំណង់​ប​ង្អៀ​រ (​ទ្វារ​២) ទី​១ ប្រវែង ១០០ ម៉ែត្រ និង សំណង់​ប​ង្អៀ​រ (​ទ្វារ​២) ទី​២ មាន ប្រវែង​២០០ ម៉ែត្រ ទទឹង មាន​ប្រវែង ៥,៦០ ម៉ែត្រ។ ដោយសំណង់​ប​ង្អៀ​រ (​ទ្វារ​២) ទី​១ សាងសង់​បាន ៩០% ហើយ ចាប់ផ្ដើម​សាងសង់ ក្នុង​ខែ​មិនា ឆ្នាំ ២០២២ ។ ដោយឡែក សំណង់​ប​ង្អៀ​រ (​ទ្វារ​២) ទី​២ កំពុង​ចាប់ផ្ដើម​ដំណើរការ​សាងសង់។

លោក​មេឃុំ​បាន​ឲ្យ​ដឹង​ទៀតថា ក្នុង​ឆ្នាំ​២០២១ កន្លងទៅ តំបន់​ខាងលើ​មានការ​ចម្រូងចម្រាស់ ខ្វែងគំនិត​គ្នា​ពី​សំណាក់​ប្រជាពលរដ្ឋ​ នៅ​សងខាង​ស្ទឹង ដោយ​កាលនោះ​មានមតិ​ខ្លះ​មិនឱ្យ​ទប់​ទំនប់​រក្សា​ទឹក និង​មតិ​ខ្លះទៀត​ចង់​ទប់​ទំនប់​រក្សា​ទឹក។ រហូតដល់​អភិបាលខេត្ត​កំពង់ចាម លោក​ អ៊ុន ចាន់​ដា បាន​ដឹកនាំ​មន្ត្រី​ជំនាញ ចុះមក​ពិនិត្យ​សិក្សា​ដោយផ្ទាល់ ទើប​រៀបចំ​ផែនការ​ដើម្បី​សាងសង់​ទំនប់​បង្ហៀរ នេះ​ឡើង ក្នុង​គោលបំណង​ដោះស្រាយ​ទំនាស់​របស់​ប្រជាពលរដ្ឋ និង​ជួយ​ដោះស្រាយ​ប្រជាពលរដ្ឋ​ចំនួន ៣ ស្រុក ឱ្យមាន​ប្រភពទឹក​ប្រើប្រាស់ និង​ស្រោចស្រព​ដំណាំ​ស្រូវប្រាំង​ជាដើម។

លោក​មេឃុំ​ច្បារអំពៅ បាន​បញ្ជាក់ថា ការសាងសង់​ទំនប់​បង្ហៀរ​នេះ គឺមាន​ផលប្រយោជន៍​ច្រើន​សម្រាប់​ប្រជាពលរដ្ឋ​នៅ​តំបន់​នេះ​ដូចជា នៅពេលដែល​ទឹក​ស្រក​ផុត​ទៅ ប្រជាពលរដ្ឋ និង​សិស្សានុសិស្ស នៅ​តំបន់​នេះ អាច​អាច​ធ្វើដំណើរ​ឆ្លងស្ទឹង ឬ​ដឹក​កសិផល​ឆ្លងកាត់ ដោយ​មិនចាំបាច់​ប្រើ​ទូក​ចម្លង ឬ​ធ្វើ​ស្ពាន​ឆ្លង​ដូច​មុន​ទេ​៕SRP

ខេត្តសៀមរាប៖សម្ដេចតេជោហ៊ុន សែន នាយករដ្ឋមន្ត្រី បានសម្រេចតែងតាំងសមាសភាពគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ។

សេចក្ដីសម្រេចដូចខាងក្រោម៖

ខេត្តកំពង់ឆ្នាំង៖អ្នកសារព័ត៌មានចំនួន៤នាក់ត្រូវបានដោះលែងឲ្យមានសេរីភាពវិញហើយកាលពីរសៀលថ្ងៃទី ២២ ខែមេសា ម្សិលមិញ បន្ទាប់ពីមានកិច្ចអន្តរាគមន៍របស់ ថ្នាក់ដឹកនាំ សមាគមសេរីភាពអ្នកសារព័ត៌មានកម្ពុជា។

លោក ទេស វិបុល ប្រធាន សមាគមសេរីភាពអ្នកសារព័ត៌មានកម្ពុជា នៅថ្ងៃទី២២ ខែមេសា ឆ្នាំ២០២២នេះ បានដាក់លិខិតស្នើសុំទៅស្ថាប័នតុលា ឱ្យជួយដោះលែង អ្នកសារព័ត៌មានចំនួន៤នាក់ ដែលត្រូវបានសមត្ថកិច្ចឃាត់ខ្លួន កាលពីថ្ងៃទី២១ ឆ្នាំ២០២២ ចោទ ចំនួន៣បទល្មើស គឺបទ ចូលលំនៅឋានឆែកឆេរសួរនាំពុំមានការអនុញ្ញាត, បទលួចថត និង បទជ្រៀតជ្រែកកិច្ចការមុខងារសាធារណៈ ពាក់ព័ន្ធហាងលក់ម៉ូតូ១កន្លែង។

ស្នងការរង និងជាអ្នកនាំពាក្យស្នងការដ្ឋាននគរបាលខេត្តកំពង់ឆ្នាំង លោក អៀរ ប៊ុនធឿន បានឲ្យដឹងថា ជនសង្ស័យទាំង ៤នាក់ដែលត្រូវឃាត់ខ្លួន ១,ឈ្មោះ សាយ រស្មី ភេទប្រុស អាយុ ៣១ឆ្នាំ មានទីលំនៅក្នុងភូមិកណ្តាល ឃុំបន្ទាយដែក ស្រុកគៀនស្វាយ ខេត្តកណ្តាល ជាអ្នកយកព័ត៌មាន រស្មីស្ទឹងត្រង់។ ២, ឈ្មោះទួន ឈុនលី ភេទប្រុស អាយុ ៥២ឆ្នាំ មានទីលំនៅក្នុងភូមិកណ្តាល ឃុំបន្ទាយដែក ស្រុកគៀនស្វាយ ខេត្តកណ្តាល ជាអ្នកសារព័ត៌មាន រស្មីស្ទឹងត្រង់។ ៣,ឈ្មោះ មិន ធី ភេទប្រុស អាយុ៤៣ឆ្នាំ មានទីនៅក្នុងភូមិកណ្តាលលើ ឃុំបន្ទាយដែក ស្រុកគៀនស្វាយខេត្តកណ្តាល ជាអ្នកសារព័ត៌មាន រស្មីបន្ទាយដែក។ និង ៤,ឈ្មោះ ប៊ុត ចន្ថា ភេទប្រុស អាយុ ៦៥ឆ្នាំ មានទីលំនៅក្នុងភូមិព្រៃមាន់ ឃុំព្រៃពួច ស្រុកអង្គស្នួលខេត្តកណ្តាល ជាអ្នកបើកបររថយន្ត។

លោក ទេស វិបុល បានឲ្យដឹងថា នៅរសៀលម្សិលមិញ អ្នកទាំង៤ត្រូវបានដោះលែងឱ្យមានសេរីភាពវិញហើយ ក្រោយដើមបណ្តឹង និងចុងចោទទាំង៤នាក់ បានចាប់ដៃយោគយល់អធ្យាស្រ័យគ្នា ក្នុងនាមជាខ្មែរ ក្រោមការសម្របសម្រួលរបស់លោកប្រធានសមាគម។ លោកក៏បានបានរៀបចំអាហារសាមគ្គី ផ្តល់មតិអប់រំល្អ ជូនក្រុមអ្នកកាសែតដែលបានចូលរួម ឱ្យយល់ដឹង និងចៀសវៀងការប្រព្រឹត្តអំពើខុសច្បាប់បន្តទៀត។

សមាគមសេរីភាពអ្នកសារព័ត៌មានកម្ពុជា ក៏បានសូមអំពាវនាវអ្នកសារព័ត៌មានទាំងអស់គ្នា ចូលរួមសហការល្អ ជាមួយអាជ្ញាធរពេលចុះបំពេញការងារ និង សូមចូលរួមគោរពច្បាប់ជាគោល លិខិតបទដ្ឋានគតិយុត្តិនានា និង ក្រមសីលធម៌វិជ្ជាជីវៈព័ត៌មាន ឲ្យបានខ្ជាប់ខ្ជួន ជាពិសេស អនុវត្តអនុសាសន៍ដ៏ខ្ពង់ខ្ពស់របស់ សម្តេចតេជោ ហ៊ុន សែន « កុំបំពានសិទ្ធិអ្នកដទៃ កុំបំភ្លៃការពិត»៕SRP

ខេត្តកំពង់ឆ្នាំង៖នគរបាលខេត្តកំពង់ឆ្នាំង បានថ្លែងឲ្យដឹងថា សារព័ត៌មាន៣នាក់ និងអ្នកបើកបររថយន្តម្នាក់ ត្រូវបានសមត្ថកិច្ចបានឃាត់ខ្លួន។

ការឃាត់ខ្លួនធ្វើឡើងនៅថ្ងៃទី២១ ខែមេសា ឆ្នាំ២០២២ តាមពាក្យបណ្តឹងរបស់ម្ចាស់ផ្ទះ ជាអ្នករកស៊ីលក់ម៉ូតូ។

ស្នងការរង និងជាអ្នកនាំពាក្យស្នងការដ្ឋាននគរបាលខេត្តកំពង់ឆ្នាំង លោក អៀរ ប៊ុនធឿន បានឲ្យដឹងថា ជនសង្ស័យទាំង ៤នាក់ដែលត្រូវឃាត់ខ្លួន ១,ឈ្មោះ សាយ រស្មី ភេទប្រុស អាយុ ៣១ឆ្នាំ មានទីលំនៅក្នុងភូមិកណ្តាល ឃុំបន្ទាយដែក ស្រុកគៀនស្វាយ ខេត្តកណ្តាល ជាអ្នកយកព័ត៌មាន រស្មីស្ទឹងត្រង់។ ២, ឈ្មោះទួន ឈុនលី ភេទប្រុស អាយុ ៥២ឆ្នាំ មានទីលំនៅក្នុងភូមិកណ្តាល ឃុំបន្ទាយដែក ស្រុកគៀនស្វាយ ខេត្តកណ្តាល ជាអ្នកសារព័ត៌មាន រស្មីស្ទឹងត្រង់។ ៣,ឈ្មោះ មិន ធី ភេទប្រុស អាយុ៤៣ឆ្នាំ មានទីនៅក្នុងភូមិកណ្តាលលើ ឃុំបន្ទាយដែក ស្រុកគៀនស្វាយខេត្តកណ្តាល ជាអ្នកសារព័ត៌មាន រស្មីបន្ទាយដែក។ និង ៤,ឈ្មោះ ប៊ុត ចន្ថា ភេទប្រុស អាយុ ៦៥ឆ្នាំ មានទីលំនៅក្នុងភូមិព្រៃមាន់ ឃុំព្រៃពួច ស្រុកអង្គស្នួលខេត្តកណ្តាល ជាអ្នកបើកបររថយន្ត។

បើតាម លោក អៀរ ប៊ុនធឿន បានបញ្ជាក់ថា អ្នកទាំង៤នាក់នេះ ត្រូវបានចោទពីបទ រំលោភលំនៅឋាន តាមមាត្រា២៩៩ និងបទជ្រៀតជ្រែកដោយខុសច្បាប់ ទៅក្នុងការបំពេញមុខងារ ជាសាធារណៈ តាមមាត្រា៩០៦ នៃក្រមព្រហ្មទណ្ឌ។

បច្ចុប្បន្នអ្នកទាំង៤នាក់ ត្រូវបានឃាត់ខ្លួន ជាបណ្តោះអាសន្ននៅស្នងការខេត្តកំពង់ឆ្នាំង ដើម្បីសាកសួរចម្លើយ៕SRP

ខេត្តត្បូងឃ្មុំ​៖ក្នុងឱកាសដឹកនាំក្រុមការងារចុះសាកសួរសុខទុក្ខ​ ប្រជាពលរដ្ឋចំនួន ៣៦ភូមិ ក្នុងឃុំចំនួន០២​ នៃស្រុកអូររាំងឪ នៅព្រហស្បតិ៍ ម្សិលមិញ លោក ជាម ច័ន្ទសោភ័ណ អភិបាលខេត្តត្បូងឃ្មុំ​ បានលើកឡើងប្រសាសន៍ សម្តេចតេជោ ថា សូមមើលព្រៃទាំងមូល កុំមើលដើមឈើ១ដើម មានន័យថា «មន្ត្រីរាជការដែលល្អ៩៩% កុំយកប្រៀបធៀបមួយចំនួនតូចដែលខិលខូចនោះ ដូច្នេះហើយ សូមកុំខឹងគោវាយរទេះ»។

លោក ជាម ច័ន្ទសោភ័ណ បាន​សំណូមពរ​សូមឲ្យបងប្អូនពលរដ្ឋ ចូលរួមបោះឆ្នោតទាំងអស់គ្នា ជាពិសេសបន្តបោះឆ្នោតគាំទ្រសម្តេចតេជោ ជានាយករដ្ឋមន្ត្រី ដែលខិតខំលះបង់កំលាំងកាយចិត្តតស៊ូនាំយកសន្តិភាព ថែរក្សាសន្តិភាព និងបន្តអភិវឌ្ឍន៍រីកចម្រើនរហូតសព្វថ្ងៃនេះ។

អភិបាលខេត្ត បានលើកឡើងពីយុទ្ធសាស្ត្រស្រោចវ៉ាក់សាំងបានយ៉ាងល្អ របស់សម្តេចតេជោ ដែលធ្វើឲ្យកម្ពុជាជោគជ័យ លើការងារប្រយុទ្ធប្រឆាំងជាមួយកូវីដ១៩ បើប្រៀបធៀបទៅ នឹងប្រទេសមួយចំនួនធំ។

អភិបាលខេត្ត​ត្បូងឃ្មុំ​ ក៏បានអំពាវនាវឲ្យពលរដ្ឋ និងអាណាព្យាបាលទាំងអស់ សូមនាំកុមារអាយុចាប់ពី០៣ឆ្នាំ រហូតដល់មនុស្សចាស់ដែលមិនទាន់បានចាក់វ៉ាក់សាំងដូសទី០១ ក៏ដូចជាដូសជំរុញ សូមមកចាក់ដោយឥតគិតថ្លៃ ដើម្បីទប់ស្កាត់ការឆ្លងរីករាលដាល​ជំងឺ​កូវីដ​-១៩ ដែលនឹងប៉ះពាល់ដល់សេដ្ឋកិច្ច និងអាយុជីវិតខ្លួន ក្រុមគ្រួសារ និងសហគមន៍យើង​ផងដែរ​៕SRP

ភ្នំពេញ៖នាយករដ្ឋមន្ត្រីហ៊ុន សែន នៅព្រឹកថ្ងៃសុក្រនេះ បានដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា ទៅចូលរួមកិច្ចប្រជុំកំពូលស្តីពីបញ្ហាទឹកនៅតំបន់អាស៊ី-ប៉ាស៊ីហ្វិក (APWS) លើកទី៤ ដែលប្រារព្ធធ្វើឡើងនៅទីក្រុង Kumamoto ប្រទេសជប៉ុន។

សូមជម្រាបថាកិច្ចប្រជុំកំពូលលើកទី៤ ស្តីពី «បញ្ហាទឹកក្នុងតំបន់អាស៊ី-ប៉ាស៊ីហ្វិក» នឹងត្រូវធ្វើឡើង ក្រោមមូលបទ «ទឹកសម្រាប់ការអភិវឌ្ឍប្រកបដោយចីរភាព៖ ឧត្តមានុវត្តន៍ និងអ្នកបន្តវេនជំនាន់ក្រោយ» ដែលនឹងធ្វើឡើងចាប់ពីថ្ងៃទី២៣ ដល់២៤ ខែមេសា។

កិច្ចប្រជុំនេះធ្វើឡើងក្នុងគោលបំណងចែករំលែកទស្សនទាន ការប្រមើមើលទៅមុខនៃដំណោះស្រាយ និងការអនុវត្ត ជូនចំពោះប្រមុខរដ្ឋ ប្រមុខរដ្ឋាភិបាល ដែលគាំទ្រដល់ការសម្រេចចិត្តជាគោលនយោបាយ ក្នុងការពន្លឿនសកម្មភាពឲ្យសម្រេចបាននូវការលូតលាស់ប្រកបដោយគុណភាព ឆ្ពោះទៅកាន់សង្គមមួយដែលមានភាពធន់ ប្រកបដោយបរិយាប័ន្ន និងដោយចីរភាព ដោយដោះស្រាយនូវរាល់បញ្ហាដែលពាក់ព័ន្ធនឹងទឹក ក្រោយពេលដែលស្ថានភាពជម្ងឺកូវីដ-១៩ បានប្រសើរឡើងវិញ ក្នុងតំបន់អាស៊ី-បាស៊ីហ្វិក៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង និងលោកជំទាវ ព្រមទាំងមានការអញ្ជើញចូលរួមពី ឯកឧត្តម លោកជំទាវ លោក លោកស្រី គណៈកិតិ្តយសសាខា គណៈកម្មាធិការសាខា អនុសាខា សប្បុរសជន នៅថ្ងៃព្រហស្បតិ៍ នេះ បានអញ្ជើញសំណេះសំណាលសួរសុខទុក្ខ ព្រមទាំងនាំយកអំណោយមនុស្សធម៌ របស់សាខាកាកបាទក្រហមខេត្ត ផ្តល់ជូនគ្រួសារប្រជាពលរដ្ឋងាយរងគ្រោះ ជនចាស់ជរា ដែលមានជីវភាពក្រីក្រចំនួនពីរទីតាំងផ្សេងគ្នា
– ទីតាំងទី១ នៅបរិវេណវត្ត អូរជុំឧត្តមសាមគ្គី ឃុំសន្តិភាព ស្រុកសំពៅលូន ចំនួន២០០គ្រួសារ
-ទីតាំងទី២៖នៅបរិវេណវត្តគីរីសង្វាពេជ្រ ហៅវត្តភ្នំតូច ឃុំពេជ្រចិន្តា ស្រុកភ្នំព្រឹក ចំនួន២៤១គ្រួសារ។

ថ្លែងក្នុងឱកាសនោះ លោក សុខ លូ បាននាំយកនូវប្រសាសន៍ ផ្តាំផ្ញើសាកសួរសុខទុក្ខ ពីសំណាក់ សម្តេចកិត្តិ ព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះ គ្រួសារងាយរងគ្រោះដោយក្តីនឹករឭកបំផុត ដែលជានិច្ចជាកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋជួបការលំបាក អ្នកមានជំងឺ ចាស់ជរា ស្ត្រីមេម៉ាយកូនច្រើនក្នុងបន្ទុក ជនងាយរងគ្រោះ និង ជនរងគ្រោះដោយគ្រោះមហន្តរាយផ្សេងៗដោយមិនប្រកាន់រើសអើង វណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ ពោលគឺ ទីណាមាន ទុក្ខលំបាក ទីនោះមានកាកបាទក្រហមកម្ពុជា និងផ្តាំផ្ញើដល់ប្រជាពលរដ្ឋទាំងអស់ ប្រកាន់យកនូវអនាម័យល្អ រស់នៅស្អាត ហូបស្អាត ផឹកស្អាត និងខិតខំប្រឹង ប្រែងប្រកបមុខរបរ បង្កបង្កើនផលដាំដំណាំរួមផ្សំ ចិញ្ចឹមសត្វ ដើម្បីទ្រទ្រង់ជីវភាពគ្រួសារ ឱ្យបានប្រសើរឡើង។

លោកក៏បានអំពាវនាវដល់ប្រជាពលរដ្ឋទាំងអស់ចូលរួមសហការជាមួយអាជ្ញាធរ និងសមត្ថកិច្ចពាក់ព័ន្ធ ក្នុងការរាយការណ៍ពេលជួបនឹងសកម្មភាពនានាពីការជួញដូរ ចែកចាយ និងប្រើប្រាស់គ្រឿងញៀននៅតាមសហគមន៍ ការចំណាកស្រុកខុសច្បាប់ ដើម្បីមានការអន្តរាគមន៍បង្រ្កាបបានទាន់ពេលវេលា និងត្រូវធ្វើការណែនាំដល់កូនចៅរបស់ខ្លួនឲ្យគេចឲ្យឆ្ងាយអំពីគ្រឿងញៀន។

លោកបានបន្តទៀតថា បញ្ហាគ្រោះថ្នាក់ចរាចរណ៍នៅតែជាហានិភ័យខ្ពស់សម្រាប់ការរស់នៅប្រចាំថ្ងៃរបស់យើងទាំងអស់គ្នា សូមឱ្យប្រជាពលរដ្ឋបន្តអប់រំណែនាំកូនចៅរបស់ខ្លួនឱ្យបានជាប់ជាប្រចាំ ដើម្បីឱ្យពួកគេគោរពច្បាប់ចរាចរណ៍ ពិសេសក្នុងពេលបើកបរសូមកុំសេពគ្រឿងស្រវឹង ត្រូវពាក់មួកសុវត្ថិភាពរាល់ពេលបើកបរម៉ូតូ ទោះទៅណាជិតឬឆ្ងាយ និងពាក់ខ្សែក្រវ៉ាត់ឱ្យបានត្រឹមត្រូវពេលបើកបររថយន្ត ដើម្បីកាត់បន្ថយអាត្រាគ្រោះថ្នាក់ចរាចរណ៍សម្រាប់ខ្លួនឯងនិងអ្នកដទៃ។

លោក បានអំពាវនាវដល់ប្រជាពលរដ្ឋណា ដែលមិនទាន់ចាក់វ៉ាក់សាំងកូវីដ-១៩ ដូសជំរុញ ឬដូសទី៣ និងដូសមូលដ្ឋាន សូមទៅចាក់វ៉ាក់សាំងកូវីដ១៩ ឱ្យបានគ្រប់ៗគ្នា ដើម្បីកាត់បន្ថយការឆ្លង និងហានិភ័យនៃការស្លាប់ដោយមេរោគកូវីដ១៩ បើទោះបីជាការឆ្លងក្នុងសហគមន៍មានការថយចុះបន្តិចក្ដី ក៏មិនត្រូវធ្វើការធ្វេសប្រហែសឡើយ ហានិភ័យនៃការឆ្លងក្នុងសហគមន៍នូវកូវីដ-១៩ នៅតែគំរាមកំហែងដល់យើងគ្រប់ពេលវេលា នៅពេលដែលយើងធ្វេសប្រហែស និងបន្តការចូលរួមអនុវត្តតាមវិធានការសុវត្ថិភាពរបស់ក្រសួងសុខាភិបាល និងគោលការណ៍ ៣កុំ ៣ការពារ ឱ្យបានត្រឹមត្រូវផងដែរ។

អំណោយដែលផ្តល់ជូននាពេលនេះ ក្នុងមួយគ្រួសារៗទទួលបាន៖ អង្ករ២៥គីឡូក្រាម ត្រីខ១០កំប៉ុង ទឹកបរិសុទ្ធ១កេស,មី១កេស ទឹកត្រី ទឹកស៊ីអ៊ីវ ១យួរ ជែលចំនួន១ដបផងដែរ៕SRP

ខេត្តកំពង់ធំ៖សេចក្ដីរាយការណ៍ព័ត៌មានបឋម
បានឲ្យដឹងថា នៅមុននេះបន្តិចនារសៀលថ្ងៃទី ២១ ខែមេសាឆ្នាំ ២០២២ នេះមានរថយន្តមួយគ្រឿងបានជួបគ្រោះថ្នាក់ចរាចរណ៍ដោយធ្លាក់ប្រឡាយ ខណៈកំពុងបើកបរ។

ហេតុការណ៍បានកើតឡើងតាមបណ្តោយផ្លូវជាតិលេខ ៦ ស្ថិតនៅភូមិប្រឡាយ ស្រុកស្ទោង ខេត្តកំពង់ធំ។

ប្រភពពីប្រជាពលរដ្ឋនៅក្បែរកន្លែងកើតហេតុបានឲ្យដឹងថា រថយន្តដែលជួបគ្រោះថ្នាក់ចរាចរណ៍បានបើកទិសដៅពីកើតមកលិច មកដល់ចំណុចកើតហេតុបានរេចង្កូតធ្លាក់ប្រឡាយតែម្ដង។

ប្រភពបានបន្តដឹងថា ករណីគ្រោះថ្នាក់ចរាចរណ៍នេះ អ្នកបើកបររថយន្តមានតែម្នាក់ឯងហើយរងរបួសធ្ងន់ត្រូវបានគេជួយសង្គ្រោះយកទៅមន្ទីរពេទ្យ។ រថយន្តមិនដែលធ្លាក់ប្រឡាយនេះ ម៉ាកកាមរីគូទស្វិត ពណ៌សពាក់ស្លាកលេខ ភ្នំពេញ ២A ១៨២៥៕SRP

ខេត្តមណ្ឌលគិរី៖អំពើពុករលួយ និងការឃុបឃិតគ្នា យូរឆ្នាំមកហើយ របស់លោក ប៉ែត ភក្រ្តា នាយកដែនជំរកសត្វព្រៃស្រែពក បានបើកកកាយជាបន្តបន្ទាប់។

អំពើពុករលួយរបស់លោក ប៉ែត ភក្រ្តា នាយកដែនជំរកសត្វព្រៃស្រែពក តាមរយៈ ឃុបឃិតជាមួយឈ្មួញឲ្យមានការកាប់បំផ្លាញព្រៃឈើ និងដឹកជញ្ជូនឈើ និងការកាប់រានដីព្រៃឈើជាដើម។

នៅលើបណ្ដាញសង្គមហ្វេសប៊ុកឈ្មោះហុង ភក្រ្តា ដែលគេស្គាល់ថាជាហ្វេសប៊ុករបស់លោកប៉ែត ភ័ក្រ្តា បានសរសេរថា” «ធម្មជាតិដ៏ស្រស់ស្អាតនិងមានតម្លៃមហាសាលដែលមិនអាចកាត់ថ្លៃបាន សម្រាប់មនុស្សជាតិ របស់ដែនជម្រកសត្វព្រៃស្រែពក មិនដឹងថាឆន្ទៈនិងឧត្តមគតិខ្ញុំ បាននូវការពារអ្នកបានយូរប៉ុណ្ណាទេ»។

លោកបានសរសេរទៀតថា «ឧត្ដមភាពត្រូវបានបាត់បង់នៅពេលដែលយើងប្រើសិទ្ធអំណាចលើសលុបនិងដោយកម្រោលក្នុងគោលបំណងទុច្ចរិតបម្រើមហិច្ឆតារបស់ខ្លួនទៅឈ្លានពានសិទ្ធិនិងអធិបតេយ្យអ្នកដទៃ»។

យោងសេចក្ដីរាយការណ៍បានលើកឡើងថា ឈ្មួញឈើភាគច្រើនសុទ្ធតែបង់ប្រាក់ឱ្យលោក ប៉ែត្រ ភក្រ្តា នាយកដែនជម្រកសត្វព្រៃស្រែពក មុនពួកគេធ្វើសកម្មភាពនឹងអ្វីមួយ។ឈ្មួញទាំងនោះមានដូចជាយាយរឿន និងប្អូនស្រី,យាយភាព,យាយខុម និងឈ្មួញឈ្មោះកៃដ…ដែលជាជនជាតិខ្មែរអ៊ីស្លាមសុទ្ធតែគេអ្នកធ្លាប់បង់លុយឲ្យលោកប៉ែត ភ័ក្រ្តា ក្នុងនោះការឃុបឃិតបិទភ្នែកឲ្យពួកឈ្មួញយាយរឿន និងប្អូនស្រីឈូសឆាយដីព្រៃជិត 1000 ហិកតាថ្មីៗតាមរបៀបពុករលួយ។

សេចក្ដីរាយការណ៍បានបន្តថា សកម្មភាពនៃការកាប់បំផ្លាញព្រៃឈើថ្មីៗ នៅក្នុងតំបន់ដែនសមត្ថកិច្ច របស់លោកប៉ែត ភ័ក្រ្តា ស្ថិតនៅក្នុងនិយាមការN13,18,30.5,E107.. ជាដើម។ លោកនាយកដែនតែងតែនិយាយថា កម្លាំងរបស់លោកតិចមិនអាចបង្ក្រាបបទល្មើសបានទាំងស្រុងនៅឡើយ។ ប៉ុន្តែតែការកាប់បំផ្លាញឈូសឆាយរានដីព្រៃមិនមែនជារឿងតិចតួចលេងសើចមើលមិនឃើញនោះទេ។ ឈ្មួញយាយរឿន និងប្អូនស្រីឈូសដីព្រៃខ្ទង់ពាន់ហិកតា បើលោកភក្រ្តា ឆ្លើយថាមិនដឹងនោះ ហាក់កុហកមិនសម។

វិញការចុះផ្សាយរបស់សារព័ត៌មានក្នុងស្រុកចោទប្រកាន់ ទៅលើឈ្មួញឈ្មោះ ចែ រឿន ថាជាឈ្មួញរកស៊ីដឹកឈើ ត្រូវបានស្ត្រីឈ្មោះរឿននេះ ធ្វើការបដិសេធ តាមរយ:មេធាវីឲ្យបំភ្លឺសាធារណមតិថា ចែរឿន(ប្រហែលឈ្មោះក្នុងសៀវភៅគ្រួសារ)គ្រាន់តែជឿប្រជាពលរដ្ឋធម្មតាមិនពាក់ព័ន្ធនឹងរបររកស៊ីឈើអ្វីឡើយហើយក៏មិនមានពាក់ព័ន្ធនឹងការឈូសឆាយដីព្រៃអ្វីនោះដែរ។ នេះជាការលើកឡើងរបស់លោកមេធាវី។

បើទោះបីមានការបកស្រាយបំភ្លឺយ៉ាងនេះក្ដី
ប្រជាពលរដ្ឋ នៅតែមានការសង្ស័យថា ស្ត្រីឈ្មោះរឿន គឺជាឈ្មួញរកស៊ីដឹកជញ្ជូនឈើដ៏ធំមួយរូបប្រចាំខេត្តមណ្ឌលគិរី ដែលធ្វើសកម្មភាពដឹកជញ្ជូនចេញពី ដែនជម្រកសត្វព្រៃស្រែពក។

អង្គភាពសៀមរាបប៉ុស្តិ៍ នៅរសៀលថ្ងៃទី ២១ ខែមេសាឆ្នាំ ២០២២ នៅពុំទាន់ទទួលបានការបំភ្លឺពីលោក ប៉ែត ភក្រ្តា នាយកដែនជំរកសត្វព្រៃស្រែពក នៅឡើយទេជុំវិញការចោទប្រកាន់៕SRP

រាជធានីភ្នំពេញ៖កងរាជអាវុធហត្ថនៅថ្ងៃទី២១ ខែមេសា ឆ្នាំ២០២២ ចេញសេចក្តីប្រកាសព័ត៌មាន បញ្ជាក់អំពីការស្លៀកពាក់ឯកសណ្ឋានក្លែង និងការប្រើប្រាស់ឯកសារក្លែង។

ការបញ្ជាក់បែបនេះបន្ទាប់ពីបានឃើញ ក្នុងបណ្ដាញព័ត៌មានសង្គម ហ្វេសប៊ុក គណនីឈ្មោះ “Da Ra” បានផ្សព្វផ្សាយរូបភាព និងការបញ្ចេញមតិមួយចំនួន ក្នុងនោះយើងឃើញបុគ្គលនេះ បានស្លៀកពាក់ឯកសណ្ឋានកងរាជអាវុធហត្ថផងដែរ។

ខ្ញុំបាទ ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស សូមជម្រាបជូនសាធារណជន អ្នកសារព័ត៌មាន ជ្រាបថា ក្រោយពីទទួលបាននូវព័ត៌មាននេះ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស បានបញ្ជាឱ្យជំនាញពាក់ព័ន្ធធ្វើការស្រាវជ្រាវរកអត្តសញ្ញាណបុគ្គលនោះ ដើម្បីបញ្ជាក់ការពិត។ ក្រោយពីធ្វើការស្រាវជ្រាវ និងបានស្តាប់ចម្លើយបុគ្គលឈ្មោះ ប៉ុក ដារ៉ា ជំនាញបានបញ្ជាក់ថា បុគ្គលនេះមិនមាននៅក្នុងបញ្ជីគ្រប់គ្រងចំនួនទ័ពរបស់កងរាជអាវុធហត្ថទេ ចំណែកឯអត្តសញ្ញាណប័ណ្ណនាយទាហាននៃកងយោធពលខេមរភូមិន្ទលេខ ៩ស១១ធ ៨៧៣៧ ដែលមានឈ្មោះ ប៉ុក ដារ៉ា ឋានន្តរសក្តិ អនុសេនីយ៍ឯក អត្តលេខ១៧៨៧៣៣ ចុះថ្ងៃទី៥ ខែ០៨ ឆ្នាំ២០២០ គឺជាឯកសារក្លែងក្លាយ។

ខ្ញុំបាទសូមជម្រាបជូនថា អំពើរបស់បុគ្គលឈ្មោះ ប៉ុក ដារ៉ា បានប្រព្រឹត្តបទល្មើសដូចមានចែងក្នុងមាត្រា៦១២ “បទប្រើប្រាស់ដោយខុសច្បាប់ នូវសម្លៀកបំពាក់ជាអាទិ៍ សម្រាប់អាជ្ញាធរសាធារណៈ” និងមាត្រា៦៣០ “បទប្រើប្រាស់ឯកសារសាធារណៈក្លែង” នៃក្រមព្រហ្មទណ្ឌ។ កងរាជអាវុធហត្ថ នឹងអនុវត្តច្បាប់ចំពោះបុគ្គលដែលប្រព្រឹត្តបទល្មើសព្រហ្មទណ្ឌ៕SRP

ខេត្តបាត់ដំបង៖លោក សុខ លូ បានថ្លែងជំរុញណែនាំបន្ថែមដល់ក្រុមការងារពាក់ព័ន្ធ បន្តសកម្មភាពក្នុងការរៀបចំសណ្តាប់សាធារណៈនៅក្នុង ក្រុងបាត់ដំបង ពិសេសផ្លូវជុំវិញផ្សារនានា ក្រៅពីនោះ បញ្ហាបរិស្ថាន និងសំរាមនៅក្នុងក្រុងបាត់ដំបង ត្រូវធ្វើឱ្យបានលឿននិងអស់ទាន់ពេលវេលា ដោយធ្វើយ៉ាងណាកុំឱ្យក្រុងបាត់ដំបង ក្លាយជាទីក្រុងសំរាមឲ្យសោះ អ្វីដែលសំខាន់ត្រូវរួមគ្នាគិត រួមគ្នាធ្វើទាំងអស់គ្នា ដើម្បីទីក្រុងបាត់ដំបងកាន់តែស្អាត មានសោភណ្ឌភាពស្រស់បំព្រងគ្រប់រដូវកាល។

ពាក់ព័ន្ធទៅនឹងការកាត់សំយ៉ាបមុខផ្ទះនេះ លោក សុខ លូ បានណែនាំដល់មន្រ្ដីជំនាញទាំងអស់ បង្កើតក្រុមការងារមួយដើម្បីធ្វើការសិក្សាអំពីការកាត់សំយ៉ាប ការរៀបចំប្លង់គំរូសំយ៉ាបថ្មីដែលត្រូវសាងសង់ សិក្សាអំពីតម្លៃនៃការសាងសសង់ឲ្យបានច្បាស់លាស់ និងត្រូវធ្វើការពន្យល់ណែនាំដល់ប្រជាពលរដ្ឋ រស់នៅតំបន់ដែលរដ្ឋបាលខេត្ត ត្រូវបានកំណត់ឲ្យមានការរុះរើសំយ៉ាបផ្ទះ ដែលពីមុនមកមានការដាក់រៀបចំសំយ៉ាបផ្ទះយ៉ាងគ្មានសណ្ដាប់ធ្នាប់ ធ្វើឲ្យបាត់បង់សម្រស់នៃផ្ទះបុរាណដែលបន្សល់មកពីសម័យ អាណានិគមបារាំង ធ្វើឲ្យបាត់បង់នូវគុណតម្លៃនៃតំបន់អភិរក្សបេតិកភណ្ឌក្រុងបាត់ដំបង ធ្វើយ៉ាងឲ្យប្រជាពលរដ្ឋ មានការយល់ដឹងអំពីការកាត់សំយ៉ាបនេះ។

លោកសុខ លូ អភិបាល អភិបាលខេត្តបាត់ដំបង មានប្រសាសន៍យ៉ាងដូច្នេះ ក្នុងឱកាស អញ្ជើញដឹកនាំកិច្ចប្រជុំពិភាក្សាលើគំរូប្លង់បច្ចេកទេសសំយ៉ាប ស្លាកយីហោ និងផ្លូវថ្មើរជើង ក្នុងតំបន់អភិរក្សបេតិកភណ្ឌក្រុងបាត់ដំបង នៅរសៀលថ្ងៃពុធនេះ។

លោក សុខ លូ ក៏បានមានប្រសាសន៍ដល់ក្រុមការងារ ធ្វើការសិក្សាអំពីលទ្ធភាពដែលអាចរៀបចំចំណតយានយន្ត កន្លែងថតរូបជាដើម នៅរង្វង់មូលលោកតាដំបងគ្រញូង ដើម្បីអាចឲ្យភ្ញៀវទេសចរ ដែលអញ្ជើញមកធ្វើការបន់ស្រន់ នៅរូបសំណាកលោកតាដំបងគ្រញូង ងាយស្រួលក្នុងការចតយានជំនិះរបស់ខ្លួន និងមានទីកន្លែងដែលអាចថតរូបបានយ៉ាងស្រស់ស្អាត ក្នុងន័យជំរុញសក្ដានុពលទេសចរណ៍ ក្នុងខេត្តបាត់ដំបង និងជាពិសេសត្រូវពិនិត្យមើលការដាំដើមឈើនានា នៅក្នុងក្រុងបន្ថែមទៀត ដើម្បីឲ្យក្រុងបាត់ដំបង មានសោភ័ណភាពបៃតងស្រស់ បង្កើនសម្រស់ក្រុងបាត់ដំបងឲ្យកាន់តែទាក់ទាញបន្ថែមទៀតផងដែរ៕SRP