ខេត្តសៀមរាប៖បុរសជាងម៉ូតូម្នាក់បានដេកស្លាប់ក្រោយពីបានផឹកស្រាអស់ចំនួន៥កំប៉ុង។

ហេតុការណ៍ភ្ញាក់ផ្អើលបានកើតឡើងនៅវេលា​ម៉ោង​៥ និង​៣០​នាទី​ ត្រូវនិងថ្ងៃទី​២៦ខែ​ មេសា​ឆ្នាំ២០២២ នៅចំណុច​ក្នុងផ្ទះក្នុងបន្ទប់ស្ថិតនៅក្រុមទី១០ភូមិ​មណ្ឌល​៣​ សង្កាត់​ ស្លក្រាម​ ក្រុង​សៀមរាប​។

ជនរងគ្រោះមានឈ្មោះ សិទ្ធ ស្រេង​ អាយុ​ ២៥​ ​ មុខរបរជាងម៉ូតូ ស្នាក់​នៅ​ក្រុមទី១០ភូមិ​មណ្ឌល៣ សង្កាត់​ស្លក្រាម​ ក្រុងសៀមរាប។
យោងតាមការបំភ្លឺពីស្ត្រីជាប្រពន្ធ ឈ្មោះ រី សោភា ភេទស្រី​ អាយុ២០ឆ្នាំស្នាក់នៅក្រុមទី១០ភូមិមណ្ឌល៣ សង្កាត់ស្លក្រាម ក្រុង;ខេត្តសៀមរាប បានបំភ្លឺថា នៅក្នុងឆ្នាំ២០២០ នាងខ្ញុំ បានរៀបការជាមួយប្ដីនាងខ្ញុំឈ្មោះសិទ្ធ ស្រេង ក្រោយរៀបការហើយគាត់បានមករស់នៅជាមួយខ្ញុំនៅភូមិឃុំខាងលើ។កន្លងមកក្នុងការរស់នៅប្ដី របស់នាងខ្ញុំ មិនដែលមានជំងឺអ្វីទេ ហើយនាក់នៅជិតខាងវិញ ប្ដីរបស់នាងខ្ញុំមិនដែលមានទំនាស់ពាក្យសម្ដីជាមួយអ្នកណាដែរ។

ស្ត្រីជាប្រពន្ធ បន្តថានៅថ្ងៃទី២៥ ខែមេសា ឆ្នាំ២០២២ វេលាម៉ោង១៩:៣០នាទី ប្ដីរបស់នាងខ្ញុំបានអង្គុយផឹកស្រា ជាមួយពូឈ្មោះមុន គឹមធី ភេទប្រុសហើយប្ដីរបស់ខ្ញុំ បានផឹកស្រាអស់៣កំប៉ុង ក៏ឈប់ផឹកហើយដើរទៅផ្ទះរបស់បងឈ្មោះបាន ភេទប្រុសហើយផឹកនៅទីនោះអស់២កំប៉ុងទៀត រហូតដល់វេលាម៉ោង២៣:០០នាទី ប្ដីរបស់នាងខ្ញុំបានត្រលប់មកផ្ទះវិញ ហើយបានហូបបាយធម្មតា ហើយបានចូលងងូតទឹករួចហើយបានចូលដេកក្នុងបន្ទប់ជុំគ្នាក៏ដេកលក់ទៅ។ លុះដល់វេលាម៉ោង០៥:៣០នាទីថ្ងៃទី២៦ ខែមេសា ឆ្នាំ២០២២ ពេលនោះមានគេតេមកហើយខ្ញុំបានលើកទូរស័ព្ទ ហើយគេប្រាប់ថាយាយខាងប្ដីរបស់នាងខ្ញុំស្លាប់នៅស្រុក។ ពេលនោះខ្ញុំបានដាស់ប្ដីប្រាប់តែគាត់អត់ដឹងខ្លួន ហើយខ្ញុំបានស្ដាប់មើលបេះដូង តែមិនដើរពេលនោះបានហៅម៉ែនិងបងអោយជួយធ្វើចលនា តែមិនដឹងខ្លួនហើយបានហៅពេទ្យមកពេទ្យក៏បានប្រាប់ថាប្ដីរបស់នាងខ្ញុំស្លាប់បាត់ហើយ។

តាមការពិនិត្យសាកសព៖ -ផ្នែកក្បាល: ដងខ្លួន និង អវយវៈទាំងអស់ ពុំមានស្លាកស្នាម អ្វីពាក់ព័ន្ធ និងបទល្មេីសព្រហ្មទ័ណ្ឌទេ។ ការសន្និដ្ឋាន ផ្អែក​តាម​លោក​គ្រូ​ពេទ្យ​កោសល្យ​វិច័យ​ មិនទាន់បានបញ្ជាក់​ថា​ ពុំទាន់ដឹងមូលហេតុ នៃការស្លាប់​ដោយសារ​អ្វីនោះទេ (រងចាំការពិនិត្យទឹកនោមសពពីគ្រូពេទ្យកោសល្យវិច័យបង្អែកខេត្តសៀមរាប)៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម​ បាន​ចាត់ទុកថា នេះពិតជាឱកាសដ៏ល្អសម្រាប់ បងប្អូនប្រជាកសិករ តំណាងសហគមន៍កសិកម្ម ក្នុងការទទួលបានព័ត៌មាន ពីការផ្សព្វផ្សាយគម្រោងហិរញ្ញប្បទានពិសេស របស់រាជរដ្ឋាភិបាលដំណាក់កាលទី ២ ដែលជាប្រាក់កម្ចីយកអត្ត្រាការប្រាក់ទាប ដើម្បីជាប្រយោជន៍ ក្នុងការពង្រឹងអាជីវកម្ម និងពង្រីកការងារកសិកម្មក្នុងសហគមន៍របស់ខ្លួន។

លោក អ៊ុន ចាន់ដា ក៏បានផ្ដាំផ្ញើដល់អភិបាលស្រុកទាំងអស់ ដែលបានចូលរួមសូមយកព័ត៌មាននេះ ជួយផ្សព្វផ្សាយ បន្តដល់កសិករ នៅក្នុងសហគមន៍ តាមមូលដ្ឋានរបស់ខ្លួនផងដែរ។

លោកលើកឡើងយ៉ាងដូច្នេះក្នុង​កិច្ចប្រជុំផ្សព្វផ្សាយហិរញ្ញប្បទានពិសេស របស់រាជរដ្ឋាភិបាលកម្ពុជា ដំណាក់កាលទី ២ ដល់កសិករ និងតំណាងសហគមន៍ កសិកម្មនៅចន្ទម្សិលមិញ។

នៅក្នុងកិច្ចប្រជុំ លោក កែវ ថាច ប្រតិភូរដ្ឋាភិបាល ទទួលបន្ទុកអគ្គនាយកធនាគារអភិវឌ្ឍន៍ជនបទ និងកសិកម្ម បានលើកឡើងថា ហិរញ្ញប្បទានពិសេស របស់រាជរដ្ឋាភិបាលដំណាក់កាលទី ២ គឺមានទឹកប្រាក់ចំនួន ៥០ លានដុល្លារ ប្រើប្រាស់ក្នុងក្របខណ្ឌស្ដារ សេដ្ឋកិច្ចឡើងវិញ ក្រោយពេលប្រទេសជាតិជួបវិបត្តិជំងឺកូវីដ១៩ ពោលគឺជាឥណទាន មួយជួយជំរុញនាំមុខ ក្នុងវិស័យកសិកម្មផ្សេងៗ ក្នុងនោះ លើវិស័យ៤ បូក៣មានដូចជា៖

*ទី១ ៖ ពាក់ព័ន្ធការដាំដុះបន្លែផ្លែឈើ។
*ទី២ ៖ ការចិញ្ចឹមសត្វ ។
*ទី៣ ៖ កាងារវ៉ារីវប្បកម្ម ។
*ទី៤ ៖ ការកែច្នៃផលិតផលកសិកម្ម ។
ចំណែក ៣ទៀតនោះទាក់ទងទៅនឹងផលដំណាំអាចនាំចេញក្រៅប្រទេស មានដូចជា៖

*ទី១ ៖ គឺផលដំណាំស្វាយចន្ទី ។
*ទី២ ៖ គឺផ្លែស្វាយកែវល្មៀត ។
*ទី៣ ៖ ផ្លែមានខេត្តប៉ៃលិន ឬ ហៅផ្លែតាង៉ែន។

លោក កែវ ថាច បានបញ្ជាក់ថា មុខសញ្ញាផ្លែឈើទាំងបីប្រភេទខាងលើនេះ ជាដំណាំយុទ្ធសាស្ត្រ សម្រាប់ចូលរួមអនុវត្តធ្វើការនាំចេញតាមរយៈ កិច្ចព្រមព្រៀងពាណិជ្ជកម្មសេរី ជាមួយប្រទេសចិន ដែលប្រទេសកម្ពុជាយើង បានចុះកិច្ចព្រមព្រៀង ជាមួយប្រទេសចិនរួចហើយ ដើម្បីអនុវត្តនាំចេញនូវផលដំណាំទាំងនោះ៕SRP

ខេត្តកណ្ដាល៖បន្ទាប់ពីបែកធ្លាយរឿងអាស្រូវជាបន្តបន្ទាប់របស់ លោក នុត វុត្ថា​ ប្រធានសាខាពន្ធដារខេត្តកណ្ដាល លោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានសម្រេចដកលោក នុត វុត្ថា​ ប្រធានសាខាពន្ធដារខេត្តកណ្ដាល ហើយ។ ប៉ុន្តែអ្វីដែលគួរឲ្យចាប់អារម្មណ៍នោះគឺលោក នុត វុត្ថា ទទួលបានតំណែងធំជាងមុនទៅទៀត នៅក្នុងអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ។

យោងតាមលិខិតរបស់លោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានឲ្យដឹងថាលោក ងួន សុវណ្ណ បច្ចុប្បន្នប្រធានសាខាពន្ធដារខេត្តតាកែវ ជាប្រធានសាខាពន្ធដារខេត្តកណ្ដាល ជំនួសលោក នុត វុត្ថា ដែលទទួលភារកិច្ចថ្មី។ ក្នុងលិខិតចុះថ្ងៃទី១៨ ខែមេសា ឆ្នាំ២០២២ បានបញ្ជាក់យ៉ាងច្បាស់ថា ផ្ទេរភារកិច្ចលោក នុត វុត្ថា បច្ចុប្បន្នប្រធានសាខាពន្ធដារខេត្តកណ្ដាល ជាអនុប្រធាននាយកដ្ឋានគ្រប់គ្រងអ្នកជាប់ពាក់ព័ន្ធតូច និងមធ្យម នៃអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ។

តាមលិខិតរបស់លោក អូន​ ព័ន្ធមុនីរ័ត្ន គឺលោក នុត វុត្ថា ត្រូវបានដកចេញពីតំណែងប្រធានសាខាពន្ធដារខេត្តកណ្ដាល ប៉ុន្តែលោក នុត វុត្ថា ទទួលបានតំណែងដែលធំជាងមុននៅក្នុងអគ្គនាយកដ្ឋានពន្ធដារ។

គួររំលឹកដែរថាមួយរយៈចុងក្រោយនេះ រឿងអាស្រូវរបស់លោក នុត វុត្ថា ប្រធានសាខាពន្ធដារខេត្តកណ្ដាល ត្រូវបានលាតត្រដាងជាបន្តបន្ទាប់។ប៉ុន្តែលោក គង់ វិបុល អគ្គនាយកនៃអគ្គនាយកដ្ឋានពន្ធដារ មិនចាត់វិធានការណាមួយទៅលើលោក នុត វុត្ថា នោះទេ ទើបលោក អូន ព័ន្ធមុនីរ័ត្ន សម្រេចផ្លាស់ប្ដូរតួនាទីរបស់លោក នុត​ វុត្ថា៕SRP

ថ្លែងក្នុងពិធីប្រគល់-ទទួល អំណោយវ៉ាក់សាំង Covid 19 ចំនួន១ លាន៥ម៉ឺន ៦ពាន់ដូស ដែលជាអំណោយរបស់រដ្ឋាភិបាល និងប្រជាជនអ៊ីតាលី នៅថ្ងៃចន្ទ នេះ សម្តេចតេជោ ហ៊ុន សែន នាយករដ្ឋមន្ត្រី មានបំណងចង់ដកបំរាមការពាក់ម៉ាសនៅទីសាធារណៈ ប៉ុន្តែនៅទីបិទដែលជិតនៅតែបន្តពាក់ម៉ាសដដែល ប៉ុន្តែការសម្រេចនេះ នឹងរង់ចាំកិច្ចប្រជុំពិសេសនៅថ្ងៃនេះសិន ដែលដឹកនាំដោយឯកឧត្តមឧបនាយករដ្ឋមន្រ្តី អូន ព័ន្ធមុនីរ័ត្ន ជាមួយនឹង ឯកឧត្តម ម៉ម ប៊ុន ហេង រដ្ឋមន្ត្រីក្រសួងសុខាភិបាល។

សម្តេច ហ៊ុន សែន បានមានប្រសាសន៍បញ្ជាក់ថា ការដែលសម្ដេចមានបំណងចង់ដកបំរាមការពាក់ម៉ាសតាមទីសាធារណៈនេះ គឺក្នុងគោលបំណងកាត់បន្ថយការចំណាយទៅលើការទិញម៉ាស របស់ប្រជាពលរដ្ឋទូទាំងប្រទេស ពីព្រោះពីមួយថ្ងៃទៅមួយថ្ងៃ យើងត្រូវចំណាយប្រាក់កាសច្រើនណាស់ទៅលើការទិញម៉ាសនេះ។ ដូច្នេះនេះ គឺជាការរួមចំណែកក្នុងការស្ដារសេដ្ឋកិច្ចប្រទេសជាតិឡើងវិញផងដែរក្រោយពីប្រទេសយើងបានដាក់ចេញនូវវិធានការជាបន្តបន្ទាប់ ក្នុងការប្រយុទ្ធទប់ស្កាត់ជំងឺកូវី19 បានជោគជ័យ ជាពិសេសការចាក់ស្រោចវ៉ាក់សាំងជូនដល់បងប្អូនប្រជាពលរដ្ឋបានដ៏ច្រើនលើសលប់នោះ។

សម្ដេចតេជោក៏នៅតែបន្តអំពាវនាវអោយបងប្អូនប្រជាពលរដ្ឋទាំងអស់ដែលមិនទាន់បានចាក់វ៉ាក់សាំងដូសជំរុញ ទី៣សូមអញ្ជើញទៅចាក់ឲ្យបានគ្រប់ៗគ្នាដើម្បីពង្រឹងភាពស៊ាំក្នុងសហគមន៍ និងឈានទៅដល់ការលុបនូវកាតព្វកិច្ចនៃការពាក់ម៉ាសនៅតាមទីសាធារណៈ នាពេលខាងមុខនេះផងដែរ៕SRP

ខេត្តកណ្ដាល៖ភាពមិនប្រក្រតីរបស់លោក នុត វុត្ថា ប្រធានសាខាពន្ធដារ ខេត្តកណ្ដាល ត្រូវបានបែកធ្លាយជាបន្តបន្ទាប់ ពីសំណាក់ប្រជាពលរដ្ឋ អ្នកលក់ដី អ្នករកស៊ីផ្នែកអចលនទ្រព្យ ជាពិសេស អ្នកកាន់ឯកសារ រត់ការផ្ទេរកម្មសិទ្ធដីធ្លីតែម្ដង។

មានការលើកឡើងថាបន្ទាប់ពីបែកធ្លាយរឿងមិនប្រក្រតី អគ្គនាយកដ្ឋានពន្ធដា​ និងក្រសួងសេដ្ឋកិច្ច​ ននិងហិរញ្ញវត្ថុលោកគង់​ វិបុល​ បានដឹកនាំកិច្ចប្រជុំបន្ទាន់កាលពីថ្ងៃទី៦​ ខែមេសា​ ឆ្នាំ២០២២​ ពាក់ព័ន្ធរឿងលោក នុត វុត្ថា ប្រធានសាខាពន្ធដារ ខេត្តកណ្ដាល។

ប្រភពបានអោយដឹងថា​  ប្រជាពលរដ្ឋ លក់ដីធ្លីក្នុងមួយប្លង់ៗ ត្រូវបង់លុយអស់ច្រើនទ្វេដង ១គុណជា២ និងគុណជា៣ ឯណោះ បើប្រៀបធៀប និងចំនួនប្រាក់ដែលបង់ចូលរដ្ឋជាក់ស្ដែង!។

ក្នុងនោះលិខិតផ្ទេរកម្មសិទ្ធបង់ពន្ធប្រថាប់ត្រា នៅស្រុកស្អាង ចំនួន៥សន្លឹក ដែល ចុះហត្ថលេខាកាលពីថ្ងៃទី២០ ខែកញ្ញា ឆ្នាំ២០២១។

សរុបប្រាក់ដែលត្រូវបង់ចូលរដ្ឋ នៅលើលិខិតទាំង៥ច្បាប់នោះ តែជាង៤.០០០$ (បួនពាន់ដុល្លារ)ទេ។ ប៉ុន្តែលោក នុត វុត្ថា ទារយកពីម្ចាស់ដីបានសម្រេច ចំនួន ១.០៥០០$(មួយម៉ឺនប្រាំរយដុល្លារ)។ មិនត្រឹមតែប៉ុណ្ណោះ សូម្បីលិខិតបង់ពន្ធផ្ទេរកម្មសិទ្ធ នៅស្រុកស្អាង ចុះថ្ងៃទី០៦ ខែមីនា ឆ្នាំ២០២២។ ទឹកប្រាក់បង់ចូលរដ្ឋ នៅក្នុងលិខិតចំនួន១.៩៣៤.៤០០រៀល ពោលគឺមិនដល់៥០០$(ប្រាំរយដុល្លារ)ផង។ ប៉ុន្តែម្ចាស់ដីបង់អស់ចំនួន១.០០០$(មួយពាន់ដុល្លារ) គឺមន្ត្រីពន្ធដារ ខេត្តកណ្ដាល ស៊ីជាងពាក់កណ្ដាល លើសតម្លៃបង់ចូលរដ្ឋ។

ចំពោះដីស្រែតូចៗ ដែលត្រូវផ្ទេរកម្មសិទ្ធ ទំហំចាប់ពី៥០០ម៉ែត្រការ៉េ ទៅ៤.០០០ម៉ែត្រការ៉េ ក្នុងមួយប្លង់ៗ ត្រូវបង់លុយក្រោមតុ.ជូនមន្ត្រីពន្ធដារ ខេត្តកណ្ដាល ចាប់ពី ២៥០$ ទៅ៥០០$ ក្នុង១ប្លង់ៗ ខណៈប្រាក់បង់ចូលរដ្ឋ គិតបន្ថែមទៀតទៅតាមតម្លៃនិងទីតាំងជាក់ស្ដែង។
ទន្ទឹមនិងនោះ ឯកសារភាគច្រើន មន្ត្រីពន្ធដារខេត្តកណ្ដាល គេម៉ៅការយកសរុបតែម្ដង។
ដោយ១គុណជា៣ នៃចំនួនបង់ពន្ធចូលរដ្ឋ ឧទាហរណ៍បើបង់ពន្ធអស់១.០០០$ គេម៉ៅយកពីម្ចាស់ដីឬអ្នករត់ឯកសារចំនួន ៣.០០០$។ ការម៉ៅការសរុបបែបនេះ គឺមន្ត្រីបានសន្យាធ្វើឯកសារបង់ពន្ធ អោយរួចរាល់ក្នុងរយៈពេលចាប់ពី០៧ថ្ងៃ ទៅ១៥ថ្ងៃ។

ប៉ុន្តែបើយើងដាក់ឯកសារត្រង់ៗ ចូលពន្ធដារ ដោយមិនមានអ្នករត់ការ ឬមិនបានបង់លុយក្រោមតុ តាមកំណត់ទេ មិនដឹង ថ្ងៃណា ខែណា ឯកសារបង់ពន្ធរួចរាល់នោះទេ..?។

អ្នកកាន់ឯកសារម្នាក់ទៀតនៅស្រុកខ្សាច់កណ្ដាល បានលើកឡើងថា៖ សម្រាប់ដីស្រែ ដែលត្រូវផ្ទេរកម្មសិទ្ធក្នុង១ហិកតា បង់លុយក្រោមតុ ជូនមន្ត្រីពន្ធដារ ចាប់ពី ៧០០$ទៅ១.០០០$ ដោយប្រាក់បង់ចូលរដ្ឋ គិតបន្ថែមទៀតទៅតាមតម្លៃនិងទីតាំងតំបន់..!។

ចំណែកដីលំនៅដ្ឋាន ដែលត្រូវផ្ទេរកម្មសិទ្ធ មន្ត្រីពន្ធដារខេត្តកណ្ដាល កំណត់យកលុយក្រៅផ្លូវការច្រើនជាងដីស្រែ។

ឧទាហរណ៍ បើដីនោះទំហំ ១.០០០ម៉ែត្រការ៉េ ប្រាក់ត្រូវបង់ចូលរដ្ឋចំនួន១.០០០$(មួយពាន់ដុល្លារ) គឺមន្ត្រីនឹងកំណត់យក សរុបចំនួន៣.០០០$(បីពាន់ដុល្លារ) ពោលគឺយកច្រើន១គុណជា៣។

កត្តាទាំងនេះហើយ បណ្ដាលឱ្យពលរដ្ឋ អ្នកលក់ដី អ្នករកស៊ីផ្នែកអចលនទ្រព្យ ជាពិសេស អ្នកកាន់ឯកសារ រត់ការផ្ទេរកម្មសិទ្ធដីធ្លីរអ៊ូរទាំនិងរិៈគន់ជាខ្លាំង រឿងរត់ការផ្ទេរកម្មសិទ្ធ អស់លុយច្រើនសន្ធឹកសន្ធាប់។​ បើទោះបីជាត្រូវបង់លុយក្រោមតុ ច្រើន បែបនោះក្ដី ប៉ុន្តែគ្មានជម្រើសឡើយ  គឺម្នាក់ៗត្រូវបង់លុយគ្រប់ៗគ្នា ព្រោះថា៖ បើពួកខ្លួនមិនបង់លុយក្រោមតុជូនមន្ត្រីទេ មិនដឹងខែណា ឆ្នាំណា.ផ្ទេរកម្មសិទ្ធរួចនោះឡើយ??។

ស្របពេលតម្រូវការ នៃការផ្ទេរកម្មសិទ្ធ អចលនទ្រព្យដីធ្លី នៅខេត្តកណ្ដាល ច្រើនកុះក ទើបមន្ត្រីពន្ធដារ ខេត្តកណ្ដាល មានឱកាស ផ្អឹបរាល់ឯកសារ អត់លុយក្រោមតុ ទុកចោលរយៈពេលវែង។

ជុំវិញការលើកឡើងបែបនេះ អង្គភាពសៀមរាបប៉ុស្ដិ៍ នៅមិនទាន់ទទួលបានការបំភ្លឺពីលោក នុត វុត្ថា ប្រធានសាខាពន្ធដារ ខេត្តកណ្ដាល នៅឡើយទេ៕SRP

ខេត្តសៀមរាប៖ជនជាតិ​ អាមេរិក​កាំង​ម្នាក់បាន ស្លាប់​បង្កឲ្យមានការភ្ញាក់ផ្អើល។

ហេតុការណ៍បានកើតឡើងនៅវេលាម៉ោង១០និង៤២នាទី ថ្ងៃ អាទិត្យ​​ ទី ២៤ ខែមេសា ឆ្នាំ ២០២២ នៅចំណុច​ ផ្ទះ​ជួល​ ស្ថិតនៅក្រុម​ទី​១៣​ ភូមិ​មណ្ឌល​ ៣​ សង្កាត់ស្លក្រាម​ ក្រុងសៀមរាប។

ជនរងគ្រោះឈ្មោះ​ BROWN JOSEPH ភេទប្រុស​ អាយុ​ ៧៨ ឆ្នាំ​ មុខរបរគ្មាន​ កាន់លិខិតឆ្លងដែនលេខ​ ៥៤៩៨៣៥៤៤៣​។

តាមកាពិនិត្យសាកសព និង ផ្អែកតាមលោកគ្រូពេទ្យកោសល្យវិច័យខេត្តសៀមរាប បញ្ជាក់ថា៖ជនរងគ្រោះស្លាប់ដោយគាំងបេះដូង​ (ស្ទះសសៃឈាម)​។ករណីនេះសមត្ថកិច្ចបានយកសាកសព ទៅរក្សាទុក​នៅ​វត្ត​ ស្ទឹងមានជ័យ​ រាជធានីភ្នំពេញ ដេីម្បីបន្តនីតិវិធី​៕SRP

ខេត្តសៀមរាប៖បុរសជាប្ដីបានស្លាប់ភ្លាមៗ ឯប្រពន្ធនិងកូនបានរងរបួសធ្ងន់។

ហេតុការណ៍បានកើតឡើងនៅថ្ងៃទី ២៤ ខែមេសា ឆ្នាំ២០២២ វេលាម៉ោង ៧ព្រឹក នៅភូមិគោកត្នោត ឃុំកណ្ដែក ស្រុកប្រាសាទបាគង លើ កំណាត់ផ្លូវជាតិ ២៦៥F ចំណុច ចន្លោះគីឡូលេខ ១ រវាងរថយន្ដ និងម៉ូតូច្រាសទិសគ្នា។

លោក លឹម សម្បត្ដិ អធិការនគរបាលស្រុកប្រាសាទបាគង បានឲ្យដឹងថា ករណីគ្រោះថ្នាក់ចរាចរណ៍នេះ រថយន្ដមួយគ្រឿង ម៉ាកលុចស៊ីស RX300 ពណ៌ស ពាក់ផ្លាកលេខ សៀមរាប 2C 55 17បើកបរដោយឈ្មោះ ទីវ គឹមអានភេទប្រុសអាយុ ៥៨ឆ្នាំសញ្ជាតិខ្មែរ ដែលមានទីលំនៅភូមិទ្រាំង សង្កាត់ស្លក្រាម ក្រុងសៀមរាប ខេត្តសៀមរាប បើកបរពីត្បូង ទៅជើង បុកនិងម៉ូតូមួយគ្រឿងម៉ាក វេវ សេ១០០ ពណ៌ខ្មៅពាក់ផ្លាកលេខ សៀមរាប 1L 906១ បើកបរដោយ ឈ្មោះ សួន ភើយ ភេទប្រុសអាយុ ៣២ឆ្នាំសញ្ជាតិខ្មែរមានទីលំនៅភូមិ ល្វាឃុំត្រពាំងធំ ស្រុកប្រាសាទបាគង ខេត្ដសៀមរាប (ស្លាប់) បើកបរដឹកប្រពន្ធនិងកូនប្រុសម្នាក់ ដែលមានឈ្មោះ ដូចខាងក្រោម៖

ប្រពន្ធ ឈ្មោះ លាន អាយុ ៣១ឆ្នាំ កូនប្រុសឈ្មោះ ធី អាយុ៣ឆ្នាំ របួសធ្ងន់ បើកបរមានទិសដៅ ពីជើងទៅត្បូង។

លោក លឹម សម្បត្ដិ បន្តថាករណីនេះខូចខាតម៉ូតូមួយគ្រឿងធ្ងន់ រថយន្ដមួយគ្រឿងស្រាល បានយកមករក្សាទុកនៅអធិការដ្ឋាននគរបាលស្រុកប្រាសាទបាគង ដើម្បីកសាងសំណុំរឿងចាត់ការទៅតាមនិតិវីធី។ មូលហេតុរថយន្ដបើកបរមិនប្រកាន់ស្ដាំ៕SRP

ខេត្តព្រៃវែង៖ក្នុងពិធីបញ្ចុះខណ្ឌសីមាព្រះសវិហារនៅស្រុកពាមជរ ខេត្តព្រៃវែង នៅថ្ងៃសៅរ៍ ម្សិលមិញ សម្ដេច ស ខេង បានបញ្ជាក់អំពីព័ត៌មានពាក់ព័ន្ធហេតុការណ៍ឧក្រិដ្ឋជនគ្រឿងញៀន បាញ់ប្រហារលើ មន្ត្រីនគរបាលនៅស្រុកអង្គស្នួល ខេត្តកណ្ដាល ដែលបណ្តាលឲ្យស្លាប់ចំនួនពីរនាក់ និងរបួសម្នាក់ កាលពីថ្ងៃទី២១ ខែមេសា ឆ្នាំ២០២២ នៅភូមិចន្ទ្រាថ្មី ឃុំទួលព្រេជ ស្រុកអង្គស្នួល។

សម្ដេចស ខេង នាយករដ្ឋមន្ត្រីស្តីទីបានបញ្ជាក់ថា ករណីបទល្មើសគ្រឿងញឿន នៅស្រុកអង្គស្នួល ត្បិតថាឧក្រិដ្ឋជន មិនមែនរកស៊ីជួញដូរគ្រឿងញៀនទ្រង់ទ្រាយធំ ប៉ុន្តែក៏បានបង្កការរំខាន អុកឡុក បង្កើតភាពអសន្តិសុខនៅកន្លែងនោះផងដែរ ពិសេសធ្វើឱ្យយុវជនមួយចំនួនវីវក់នឹងគ្រឿងញៀន។

សម្តេចបានបញ្ជាក់យ៉ាងដូច្នេះថា “នគរបាលប៉ុស្តិ៍របស់យើងគាត់ឮព័ត៌មាននេះ ក៏បាននាំគ្នាទៅជាមួយសមត្ថកិច្ចដ៏ទៃទៀតដែលមានការពាក់ព័ន្ធ” ពេលចុះទៅដល់ទីតាំងផ្ទះមុខសញ្ញាជួញដូរចែកចាយគ្រឿងញៀននោះ សមត្ថកិច្ចបានឆែកឆេរដែរ ក៏ប៉ុន្តែរកមិនឃើញជនល្មើសនោះទេ “សំទោស ដំបូងហាក់ដូចជាថាប្រយ័ត្នដែរ ព្រោះរកមិនឃើញ ក៏សន្និដ្ឋានថាតាមមើលប្រហែលជាវារត់ចូលព្រៃអស់ហើយ” ជនសង្ស័យមិនបានរត់ចូលព្រៃដូចការសន្និដ្ឋាននោះទេ ដោយទៅអង្គុយគៀនផ្ទះយកភួយគ្របពីលើ។ អ្នកទៅឆែកហ្នឹងមិនចាប់អារម្មណ៍ទៅទៀត ទៅលើកអាភួយហ្នឹង ដល់តែលើកអាភួយហ្នឹង អានោះវាមានកាំភ្លើងស្រេច។ មេប៉ុស្តិ៍ប៉ូលិសទៅលើកភួយ អានោះបាញ់ផូងត្រូវចំដើមទ្រូង ហើយនឹងប៉ូសលិសម្នាក់ទៀតទៅជាមួយ។ ស្លាប់អស់ពីរនាក់ មានការសោកស្ដាយណាស់”។

គួរបញ្ជាក់ថា មន្ត្រីនគរបាលចំនួន ២នាក់ ត្រូវបានបាញ់សម្លាប់ និងម្នាក់បានរងរបួស នៅក្នុងប្រតិបត្តិការបង្ក្រាបបទល្មើសគ្រឿងញៀន។ ចំណែកជនល្មើសម្នាក់ស្លាប់ និងម្នាក់ចាប់ខ្លួន។ ជនល្មើសដែលស្លាប់ គឺជាជនដៃដល់ដែលបានបាញ់លើមន្ត្រីនគរបាល។ ហេតុការណ៍នេះ បានកើតឡើងកាលពីវេលាម៉ោងជិត ១២ថ្ងៃត្រង់ កាលពីថ្ងៃទី២១ ខែមេសា ឆ្នាំ២០២២នៅភូមិចន្ទ្រាថ្មី ឃុំទួលព្រេជ ស្រុកអង្គស្នួល។

មន្ត្រីនគរបាលដែលស្លាប់ និងរងរបួសមានដូចជា៖ ១. លោក ជុច សុភា មេប៉ុស្តិ៍ទួលព្រេច , ២. លោក រីមសុផាន់ណា មន្ត្រីផ្នែកគ្រឿងញៀន។ ៣. លោក វ៉ន វុទ្ទី មន្ត្រីប៉ុស្តិ៍ទួលព្រេច របួសម្រាមដៃស្តាំ។ ចំណែកជនល្មើសដែលស្លាប់ឈ្មោះ ធីម ឌឿន អាយុ២៣ឆ្នាំ ជាមុខសញ្ញាចាស់ និងម្នាក់ទៀតឈ្មោះ ថេង.ធឿន អាយុ១៦ ឆ្នាំ ត្រូវចាប់ខ្លួន។

ករណីនេះសមត្ថកិច្ចដកហូតវត្ថុតាងនៅកន្លែងកើតហេតុមានដូចជា៖ អាវុធម៉ាករ៉ូឡូ ១ដើម ដាវ៣ កាំបិតតូច២ ពូថៅ២ ម៉ូតូ១គ្រឿង ថ្នាំញៀន ២កញ្ចប់ ជញ្ជីងថ្លឹងគ្រឿងញៀន១ និងសម្ភារ:ប្រើប្រាស់ថ្មញៀនមួយចំនួនផងដែរ៕SRP

ខេត្តព្រៃវែង៖អញ្ជើញជាអធិបតី ពិធីបុណ្យបញ្ចុះខណ្ឌសីមាព្រះវិហារ វត្តមុនីរតនប្បភា ហៅវត្តថ្មី ស្ថិតនៅក្នុងភូមិបង្អែក ឃុំស្វាយភ្លោះ ស្រុកពាមជរ ខេត្តព្រៃវែង នៅថ្ងៃសៅរ៍ នេះ សម្ដេចស ខេង នាយករដ្ឋមន្ត្រីស្ដីទីនៃរាជរដ្ឋាភិបាលកម្ពុជា បានគូសបញ្ជាក់ក្នុងន័យដើមថា«យើងមិនអាចធ្វើផ្ទុយពីបំណងប្រាថ្នារបស់ប្រជាពលរដ្ឋបានទេ ហើយអ្នកដឹកនាំណាដែលធ្វើផ្ទុយមិនស្របតាមបំណងប្រាថ្នាប្រជាពលរដ្ឋ អ្នកដឹកនាំនោះគឺមិនទទួលជោគជ័យទេ តែងតែទទួលបរាជ័យ។ នេះជាសច្ចៈធម៌ដែលយើងមិនអាចប្រកែកបាន…។ សព្វថ្ងៃនេះដោយសារយើងបានរក្សានូវឧត្តមគតិបែបនេះ យើងទទួលបានសុខសន្តិភាព និងស្ថិរភាព»។

សម្ដេច ស ខេង បានបន្ថែមថាការកសាងប្រទេស ជាពិសេសការរៀបចំឱ្យមានសុខសន្តិភាព ស្ថិរភាព និងមានការអភិវឌ្ឍនេះមិនអាចកាត់ផ្ដាច់បានពីគោលនយោបាយឬបន្ទាត់នយោបាយនៃអ្នកដឹកនាំគណបក្ស និងរាជរដ្ឋាភិបាលនោះឡើយ។ សម្ដេចបន្ថែមថានយោបាយដែលត្រឹមត្រូវគឺនយោបាយដែលផ្អែកលើផលប្រយោជន៍ជាតិនិងប្រជន និងការធ្វើអ្វីៗដែលគោរពតាមការសម្រេចចិត្ត ការចង់បាន សំណូមពរ និងការទាមទាររបស់ពលរដ្ឋ។

សម្ដេចនាយករដ្ឋមន្រ្តីស្ដីទីបានបន្តថារាជរដ្ឋាភិបាលនិងគណបក្ស ដែលមានសម្ដេចតេជោជាប្រធានបន្តវេនពីថ្នាក់ដឹកនាំមុន និងជានាយករដ្ឋមន្រ្តីបានខិតខំប្រឹងប្រែងដើម្បីបញ្ចប់សង្គ្រាម ពង្រឹងសុខសន្តិភាព ស្ថិរភាព បង្កើតបានឱកាសសម្រាប់ការកសាងវត្ត សាលារៀន ផ្លូវ និងសមិទ្ធផលផ្សេងៗទៀតជាប្រយោជន៍របស់ប្រជាពលរដ្ឋដោយសម្ដេចបានបន្ថែមថា« បើយើងមិនទាន់មានសុខសន្តិភាព យើងត្រូវខិតខំតស៊ូដើម្បីមានសុខសន្តិភាព ឥឡូវយើងមានសុខសន្តិភាពហើយ យើងតស៊ូដើម្បីកសាងជីវភាពឱ្យកាន់តែប្រសើរឡើង»។

សម្ដេចបានបន្តគូសបញ្ជាក់អំពីការប្រឹងប្រែងស្ថាបនាជាតិរបស់រាជរដ្ឋាភិបាល ដូចជាការស្ថាបនាស្ពាន ផ្លូវ ការអភិវឌ្ឍទឹកស្អាត និងអគ្គិសនីជាដើម ដើម្បីសម្រួលដល់ជីវភាពរស់នៅប្រចាំថ្ងៃរបស់ប្រជាពលរដ្ឋ។ សម្ដេចបន្ថែមថា«មកដល់ពេលនេះយើងពិតជាមានមោទកភាព យើងបានធ្វើឱ្យប្រទេសជាតិយើងកាន់តែមានសុខសន្តិភាព ស្ថិរភាព មានការអភិវឌ្ឍ ហើយយើងសង្ឃឹមថាបន្តធ្វើឱ្យមានការអភិវឌ្ឍកាន់តែរីកចំរើនថែមទៀត»៕SRP

ខេត្តកំពង់ចាម​៖លោក​ អ៊ុន​ ចាន់ដា​ អភិបាលខេត្តកំពង់ចាម​ បានថ្លែងប្រាប់ដល់​​ប្រជាពលរដ្ឋ​ ឲ្យ​រួមគ្នា​​ ថែរក្សា​សុខសន្តិភាព​​ទាំងអស់គ្នា ដើម្បី​បន្ត​ធ្វើ​​ការ​អភិវឌ្ឍន៍​ប្រទេសជាតិ​យើង ឲ្យកាន់តែ​មានការ​រីកចម្រើន​លើ​គ្រប់​វិស័យ សម្បូរ សប្បាយ​រុងរឿង​បន្តទៅទៀត​។

ថ្លែង​បែប​នេះ​ក្នុង​ពិធី​សម្ភោ​ធ​ដាក់​ឲ្យ​ប្រើប្រាស់​សមិទ្ធផល​នានា ក្នុង​វត្ត​ឥន្ទ​កោ​សី ហៅ​វត្ត​កោះជ្រូក ស្ថិតក្នុង​ភូមិ​ទី​១៣ ឃុំ​កោះសំរោង ស្រុក​កំពង់សៀម នៅថ្ងៃសៅរ៍នេះ។

អភិបាលខេត្តកំពង់ចាម​ បាន​ថ្លែង​ថា ក្រោម​ការដឹកនាំ​ដ៏​ត្រឹមត្រូវ​របស់​សម្ដេច​តេ​ជោ ហ៊ុន សែន ជា​នាយករដ្ឋមន្ត្រី បាន​នាំមក​នូវ​សុខសន្តិភាព​ជូន​ប្រទេសជាតិ នឹងធ្វើ​ឲ្យ​មានការ​អភិវឌ្ឍ​លើ​គ្រប់​វិស័យ ទាំង​វិស័យ​អាណាចក្រ និង​វិស័យ​ពុទ្ធចក្រ។ ជាក់ស្ដែង​នៅក្នុង​ថ្ងៃនេះ សមិទ្ធផល​ដែល​សាងសង់​រួច ក្នុង​ទី​អារាម​ឥន្ទ​កោ​សី ហៅ​វត្ត​កោះជ្រូក ដែលមាន​តម្លៃ​ប្រមាណ​ជា ៥៣ ម៉ឺន​ដុល្លារ​អា​មេ​រិច ត្រូវបាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ។

អភិបាលខេត្បាន​បញ្ជាក់ថា សមិទ្ធផល​ខាងលើ​នោះ គឺ​ផ្ដើមចេញ​ដោយ​កត្តា​ប្រទេសជាតិ​ មាន​សុខ សន្តិភាព ធ្វើឱ្យ​ប្រជាពលរដ្ឋ​ យើង​មានឱកាស​គ្រប់គ្រាន់ ក្នុង​ការរក​ទទួលទាន​មានបាន មាន​ជីវភាព​ធូរធារ ទើប​ធ្វើឱ្យមាន​ថវិកា​ ដើម្បី​ចូលរួម​ជា​បច្ច័យ ដោយ​សទ្ធា​ជ្រះថ្លា យកមក​កសាង​សមិទ្ធផល​ទាំងឡាយ​ដូចជា​ការចាក់ដី​ក្នុង​ទីធ្លា​វត្ត , ជួសជុល​ព្រះវិហារ​, កសាង​ឈាបនដ្ឋាន , កសាង​ដងទង់ និង​ឧប្បដ្ឋានសាលា ។​ល​។​ដែលមាន​តម្លៃ​រហូតដល់​ទៅ​ជាង ៥០​ម៉ឺន​ដុល្លារ​អាមេរិក​ដូច​ពេលនេះ។

លោកបាន​សង្កត់​ធ្ងន់​ថា​ ដោយសារ​កត្តា​សុខសន្តិភាព ទើប​ធ្វើ​ឲ្យ​ប្រទេស​ជាតិ​យើង​ មាន​ការរីកចម្រើន​ទន្ទឹមគ្នា ទាំង​វិស័យ​ពុទ្ធចក្រ និង​វិស័យ​អាណាចក្រ​៕SRP